1 Omuwa okwa li metsalihangano e ti ithana Moses nokwe mu pe omautho ngaka
2 Aaisraeli ye na oku ga gwanitha uuna taa yamba omafikilondjambo. Ngele oku na ngoka ta yamba oshimuna, na yambe ongombe nenge onzi nenge oshikombo.
3 Nenge ota yamba ongombe ye efikilondjambo, na ete ongombe ondumentu yaa na oshipo. Ne yi ete posheelo shetsalihangano, opo Omuwa e yi taambe nohokwe.
4 Na tenteke oshikaha she komutse gwayo, notayi taambwa yi ninge efikilondjambo lyokukutha po oondjo dhe.
5 Ongombe ne yi tselele mpoka koshipala shOmuwa, naana yaAaron aayambi naa gandje ombinzi yayo kOmuwa e taye yi shashamine koombinga ne dhoshiyambelo shoka shi li posheelo shetsalihangano.
6 Na yuye oshimuna e te shi tete iintimbu.
7 Aayambi naa tule iikuni koshiyambelo e taye yi tomeke.
8 Iintimbu naye yi tule momulilo pamwe nomutse noofu.
9 Naa yoge iikwamela nomagulu momeya. Omuyambi na lungunithe iinima mbika ayihe koshiyambelo. Ndika olyo efikilondjambo li na ezimba lya nika nawa notali opalele Omuwa.
10 Omuntu ngele ota yamba onzi nenge oshikombo, nashi kale oshilumentu shaa na oshipo.
11 Ne shi dhipagele kuumbangalantu woshiyambelo koshipala shOmuwa, naayambi naa shashamine oshiyambelo ashihe nombinzi yasho.
12 Na tete onyama iintimbu, nomuyambi ne yi tule pamwe nomutse noofu dhasho piikuni mbyoka yi li momulilo koshiyambelo.
13 Na yoge iikwamela momeya, omuyambi note yi pe Omuwa efikilondjambo e te yi lungunithile po ayihe koshiyambelo. Olyo efikilondjambo li na ezimba lya nika nawa notali opalele Omuwa.
14 Ngele oku na omuntu ta yambele Omuwa efikilondjambo lyondhila, nali kale lyonguti nenge lyokangutyona.
15 Omuyambi ne yi fale koshiyambelo e te yi thingonona othingo e ta lungunitha omutse gwayo koshiyambelo. Ombinzi yayo nayi ndondithilwe molumbumbu lwoshiyambelo.
16 Ne yi kuthe oshikutunino nomalwenya e te yi umbile pelunda lyomutoko lwokuuzilo woshiyambelo.
17 Ne yi tandule olumana, ewawa li kale kombinga kehe pwaa naa okuteta ewawa, noyi lungunithilwe ayihe kombanda yiikuni koshiyambelo. Olyo efikilondjambo li na ezimba lya nika nawa notali opalele Omuwa.
1 Ngele oku na omuntu ta yambele Omuwa ondjambo yiikulya, na ete uusila womunziya. Ne u nothele omagadhi gooholivi nokugwedha po iitsinino.
2 Ne u pe aana yaAaron aayambi. Omuyambi na kuthe mondjambo ombinga yokuyambelwa koshiyambelo, eke limwe lyuusila u na omagadhi niitsinino ayihe, e te yi lungunithile koshiyambelo. Olyo efikilondjambo li na ezimba lya nika nawa notali opalele Omuwa.
3 Oshihupe shondjambo yiikulya otashi ningi shaAaron noyana; osho oshiyapukilela, oshoka osha za kondjambo yiikulya ya yambelwa Omuwa.
4 Ngele oto yambele Omuwa ondjambo yiikulya ya pya peziko, nayi kale oshikwiila sha mbumbwakana inaashi tulwa efulika, sha ningwa nuusila womunziya, sha tulwa omagadhi gooholivi, nenge yi kale okakwiila ka pepuka ka gwayekwa omagadhi gooholivi.
5 Ngele oto yamba oshikwiila sha pya poshikangwa, nashi kale shuusila womunziya mwa tulwa omagadhi gooholivi, ihe ino tula mo efulika.
6 Shi nyanyagula e to tile ko omagadhi, uuna to shi yamba, shi ninge ondjambo yiikulya.
7 Ondjambo yiikulya ngele oya pya mombiga, nayi kale yuusila womunziya nomagadhi gooholivi.
8 Etela Omuwa ondjambo yiikulya ya longekidhwa ngeyi; yi gandja komuyambi, ngoka te yi fala koshiyambelo.
9 Omuyambi na kuthe mondjambo ombinga yokuyambelwa koshiyambelo e te yi lungunithile koshiyambelo. Oyo efikilondjambo li na ezimba lya nika nawa notali opalele Omuwa.
10 Shoka tashi hupu kondjambo yiikulya, oshaayambi; osho oshiyapukilela, oshoka osha za mondjambo yiikulya ya yambelwa Omuwa.
11 Oondjambo dhiikulya ndhoka to yambele Omuwa, ino tula mo efulika; ino longitha efulika nenge omagadhi goonyushi moondjambo dhiikulya tadhi yambelwa Omuwa.
12 Iinima mbika otayi vulu okweetelwa Omuwa moondjambo dhoshipe, ihe inayi lungunithilwa koshiyambelo.
13 Toya ondjambo kehe yiikulya nomongwa, oshoka omongwa otagu kalele po ehangano pokati keni naKalunga. (Ou na okutoya oondjambo dhoye adhihe nomongwa.)
14 Uuna to etele Omuwa ondjambo yoshipe shiilya, yamba omaha ga yaywa nenge iilya ya hompwa.
15 Yi nothela omagadhi gooholivi nokugwedha po iitsinino.
16 Omuyambi na lungunithe po ombinga ndjoka yoomuma nomagadhi yi na okuyambelwa koshiyambelo niitsinino ayihe, yi ninge ondjambo yiikulya ya yambelwa Omuwa.
1 Uuna omuntu ta yamba ekwatathanondjambo te li kutha miimuna ye, na ete ongombe ondumentu nenge ondema yaa na oshipo.
2 Omuntu na tenteke oshikaha she komutse gwongombe e te yi tselele posheelo shetsalihangano. Aana yaAaron aayambi naa shashamine ombinzi koombinga adhihe dhoshiyambelo.
3 Mekwatathanondjambo naa kuthe mo omakagadhi gokiikwamela noofu e te yi yambele Omuwa,
4 osho wo iitiyanathigo niinkene yayo nekalokwa lyokehuli.
5 Ayihe mbika aayambi naa yi lungunithile koshiyambelo kombanda yefikilondjambo tali gandja ezimba lya nika nawa lyo opalela Omuwa.
6 Uuna omuntu ta yamba ekwatathanondjambo te li kutha moonzi nenge miikombo ye, na ete oshimuna oshilumentu nenge oshikiintu shaa na oshipo.
7 Omuntu ngele ota yamba onzi, ne yi ete koshipala shOmuwa,
8 na tenteke oshikaha she komutse gwayo e te yi dhipagele posheelo shetsalihangano. Aayambi naa shashamine ombinzi yayo koombinga adhihe dhoshiyambelo
9 nokuyambela Omuwa iitopolwa mbika yekwatathanondjambo: oofu, omushila gwa tetwa metindi, omakagadhi agehe gokiikwamela,
10 iitiyanathigo niinkene yayo nekalokwa lyokehuli.
11 Ayihe mbika omuyambi ne yi lungunithile poshiyambelo, yi ninge ondjambo yiikulya ya yambelwa Omuwa.
12 Ngele oku na omuntu ta yamba oshikombo, ne shi ete koshipala shOmuwa.
13 Na tenteke oshikaha she komutse gwasho e te shi dhipagele posheelo shetsalihangano. Aayambi naa shashamine ombinzi yasho koombinga adhihe dhoshiyambelo
14 nokuyambela Omuwa iitopolwa mbika: omakagadhi agehe gokiikwamela,
15 iitiyanathigo niinkene yayo nekalokwa lyokehuli.
16 Omuyambi ne yi lungunithile poshiyambelo, yi ninge ondjambo yiikulya yi na ezimba lya nika nawa. Omakagadhi agehe ogOmuwa.
17 Kape na Omuisraeli ta li omakagadhi nenge ombinzi; eutho ndika nali dhigininwe kAaisraeli sigo aluhe shaa mpoka ye li.
1 Omuwa okwa lombwele Moses,
2 a lombwele Aaisraeli kutya ngele oku na omuntu a yono nokwa pogola kiipango yOmuwa mokwaashiwo, na gwanithe omautho ngaka.
3 Ngele omuyambimukuluntu ta yono e te etele aantu ondjo, na gandje ongombe ondumentu yomutanda yaa na oshipo, e yi yambele Omuwa eyonondjambo.
4 Na ete ongombe ondumentu kosheelo shetsalihangano, na tenteke oshikaha she komutse gwayo e te yi tselele koshipala shOmuwa.
5 Nena omuyambimukuluntu na kuthe ombinzi yongombe e te yi fala metsalihangano.
6 Na yaye omunwe gwe mombinzi e te yi shashamine komeho getopolitho lyetsalihangano, te shi ningi luheyali.
7 Nena ombinzi yimwe ote yi gogo kooniga dhoshiyambelo shiitsinino metsalihangano. Ombinzi onkwawo ote yi tile pekota lyoshiyambelo shomafikilondjambo shi li posheelo shetsalihangano.
8 Mongombe na kuthe mo oofu adhihe nomakagadhi gokiikwamela,
9 iitiyanathigo niinkene yayo nekalokwa lyokehuli,
10 ngaashi tashi ningwa nongombe yekwatathanondjambo. Iinima mbika omuyambi ne yi lungunithile koshiyambelo shomafikilondjambo.
11 Ihe ekunka, onyama ayihe, omutse, omagulu, iikwamela yayo nehoho
12 ne yi fale pondje yontanda pehala lya yogoka mpoka hapu tulwa omutoko, naampoka tayi lungunithilwa momulilo gwiikuni.
13 Ngele egongalo alihe lyaIsrael tali yono e tali itsike ondjo yokuyona kiipango yOmuwa mokwaashiwo,
14 nena shampa tuu ondjo ya tseyika, egongalo nali ete ongombe ondumentu yomutanda, yi ninge eyonondjambo. Na yi etwe ketsalihangano.
15 Aawiliki yegongalo naa tenteke iikaha yawo komutse gwayo e taye yi tselele koshipala shOmuwa.
16 Omuyambimukuluntu na kuthe mo mombinzi yongombe, e yi fale metsalihangano.
17 Na yaye omunwe gwe mombinzi e te yi shashamine komeho getopolitho luheyali.
18 Na goge ombinzi yimwe kooniga dhoshiyambelo shiitsinino, shoka shi li komeho gOmuwa metsalihangano. Oshihupe shombinzi ne shi tile pekota lyoshiyambelo shomafikilondjambo, shoka shi li posheelo shetsalihangano.
19 Nena na kuthe oofu dhayo adhihe e te dhi lungunithile koshiyambelo.
20 Ongombe ndjika ne yi ninge, ngaashi a ningile nongombe yeyonondjambo. Pahedhi ndjika omuyambi ota yamba omolweyono lyaantu, oyo notaa kala ya dhiminwa po.
21 Ongombe ne yi fale pondje yontanda e te yi lungunitha po, ngaashi naanaa a lungunithile po ongombe ya yambelwa ondjo ye mwene. Ondjambo ndjika oyo tayi kutha po ondjo yegongalo.
22 Ngele omuwiliki ta yono e ta ningi omupogoli gwiipango yOmuwa mokwaashiwo,
23 nena shampa a dhimbulula a yona, na ete ondjambo ye yoshikombo oshilumentu shaa na oshipo.
24 Na tenteke oshikaha she komutse gwasho e te shi dhipagele kuumbangalantu woshiyambelo, hoka haku dhipagelwa iimuna yomafikilondjambo. Osho eyonondjambo.
25 Omuyambi na yaye omunwe gwe mombinzi yoshikombo, te yi gogo kooniga dhoshiyambelo, nombinzi onkwawo ote yi tile pekota lyoshiyambelo.
26 Oofu dhasho adhihe ne dhi lungunithile koshiyambelo, ngaashi naanaa ha lungunitha oofu dhiimuna ya dhipagelwa omakwatathanondjambo. Pahedhi ndjika omuyambi ota yamba omolweyono lyomuwiliki nota kala a dhiminwa po.
27 Ngele nani gumwe gwomaantu yowala ta yono e ta pogola kiipango yOmuwa mokwaashiwo,
28 nena shampa tuu a dhimbulula eyono lye, na ete ondjambo ye yoshikombo oshikiintu shaa na oshipo.
29 Na tenteke oshikaha she komutse gwasho e te shi dhipagele kuumbangalantu woshiyambelo, hoka haku dhipagelwa iimuna yomafikilondjambo.
30 Omuyambi na yaye omune gwe mombinzi yoshikombo e te yi gogo kooniga dhoshiyambelo e ta tile ombinzi onkwawo pekota lyoshiyambelo.
31 Nena na kuthe oofu adhihe, ngaashi oofu hadhi kuthwa koshimuna sha dhipagelwa ekwatathanondjambo, e te dhi lungunithile koshiyambelo, opo dhi gandje ezimba lya nika nawa tali opalele Omuwa. Pahedhi ndjika omuyambi ota yamba omolweyono lyomuntu ngoka, oye nota dhiminwa po.
32 Omuntu ngele ote eta onzi yeyonondjambo, nayi kale onkiintu yaa na oshipo.
33 Ota tenteke oshikaha she komutse gwayo e te yi dhipagele kuumbangalantu woshiyambelo, hoka iimuna yomafikilondjambo hayi dhipagelwa.
34 Omuyambi na yaye omunwe gwe mombinzi yonzi e te yi gogo kooniga dhoshiyambelo; ombinzi onkwawo te yi tile pekota lyoshiyambelo.
35 Nena na kuthe oofu adhihe, naanaa ngaashi oofu hadhi kuthwa konzi ya dhipagelwa ekwatathanondjambo, e te dhi lungunithile koshiyambelo kombanda yomafikilondjambo ga yambelwa Omuwa. Pahedhi ndjika omuyambi ota yamba omolweyono lyomuntu ngoka, oye nota dhiminwa po.
1 Ngele oku na omuntu ti ithanwa kombala, a gandje uumbangi mompangu, ihe ita gandja uumbangi waashoka a uva nenge a mona, oye ta humbata iilanduliko.
2 Ngele oku na ngoka ta gumu sha sha nyata mokwaashiwo, ngaashi oshimuna shi isila, ota kala a nyata nomunandjo, sigo a dhimbulula shoka a ningi.
3 Ngele oku na ngoka ta gumathana nomuntu a nyata ye ke shi shi, ota ka kala e na ondjo, sigo a dhimbulula shoka a ningi.
4 Ngele oku na omuntu ta gana muuhasha, kashi na mbudhi kutya egano olyashike, ota kala e na ondjo, sigo a dhimbulula shoka a ningi.
5 Uuna omuntu e na ondjo, ne yi hempulule
6 nokweetela Omuwa onzi onkiintu nenge oshikombo oshikiintu, shi ninge eyonondjambo lyokufuta ondjo ye. Omuyambi na yambele ondjo yomuntu nguka.
7 Omuntu ngele ita vulu okumona onzi nenge oshikombo, na etele Omuwa ofuto yondjo ye oonguti mbali, nenge uungutyona uyali, yimwe omolweyonondjambo nonkwawo omolwefikilondjambo.
8 Ne dhi ete komuyambi, ngoka ta yamba tango ondhila yeyonondjambo. Ote yi thingonona othingo, ihe ina tokola ko omutse gwayo.
9 Na shashamine ombinzi yimwe molumbumbu lwoshiyambelo. Ombinzi onkwawo ne yi kamene pekota lyoshiyambelo. Ondjambo ndjika otayi kutha po ondjo.
10 Nena na yambe ondhila ontiyali efikilondjambo pamautho. Pahedhi ndjika omuyambi ota yamba omolweyono lyomuntu ngoka, oye nota dhiminwa po.
11 Ngele omuntu ita vulu okumona oonguti mbali, nenge uungutyona uyali, na ete omakopi gaali guusila womunziya, u ninge eyonondjambo. Ina tula mo tuu nando omagadhi gooholivi nenge iitsinino, molwashoka eyonondjambo.
12 Ne u ete komuyambi, ngoka ta kutha mo eke limwe, ombinga yokuyambelwa koshiyambelo, note u lungunithile koshiyambelo kombanda yefikilondjambo. Owo eyonondjambo.
13 Pahedhi ndjika omuyambi ota yamba omolweyono lyomuntu ngoka, oye nota dhiminwa po. Uusila mboka tau hupu ko, owomuyambi pahedhi yoondjambo dhiikulya.
14 Omuwa okwa pe Moses omautho ngaka.
15 Ngele oku na ngoka ta yono mokwaashiwo inaa gandja iigandjwa ya yapulilwa Omuwa, na ete ondjondjambo kOmuwa, onzi ondumentu yaa na oshipo nenge oshikombo oshilumentu shaa na oshipo. Ondjundo yoshimuna nayi uthwe pandjele yiimaliwa hayi longithwa motempeli.
16 Omuntu ota futu shoka a li e na okufuta e ta gwedha po oshititano. Ne yi pe omuyambi, nomuyambi ota yamba oshimuna omolweyono lyomuntu ngoka, oye nota dhiminwa po.
17 Ngele oku na omuntu ta pogola kiipango yOmuwa mokwaashiwo, ota kala e na ongunga noku na oku yi futa.
18 Oku na okweeta komuyambi ondjondjambo, onzi ondumentu yaa na oshipo nenge oshikombo oshilumentu shaa na oshipo. Ondjundo yasho nayi uthwe pandjele yiimaliwa hayi longithwa motempeli. Omuyambi ota yamba omolweyono lyomuntu ngoka, oye nota dhiminwa po.
19 Ndhika oondjambo dhoondjo ndhoka a yono kOmuwa.
1 Omuwa okwa pe Moses omautho ngaka.
2 Ondjambo nayi yambwe, shampa gumwe a yono kOmuwa, ongele mokutinda okushunitha shoka Omuisraeli a thigile po sha fa ombambyona nenge sha yakelwe nenge moku mu kotokela
3 nenge a fundju molwoshinima sha kana ye ta gana ta ti, ine shi mona.
4 Uuna omuntu ta yono pamukalo nguka, na fute shoka e na, molwashoka ke li moshili. Esiku ndyoka ta monika ondjo, oku na okufuta mwene gwiinima ofuto yu udha mwa gwedhwa oshititano.
5
6 Ne ete komuyambi ondjondjambo ye, yi yambelwe Omuwa: onzi ondumentu yaa na oshipo nenge oshikombo oshilumentu shaa na oshipo, pamuthika gwondjele.
7 Omuyambi ota yamba omolweyono lyomuntu ngoka, oye nota dhiminwa po.
8 Omuwa okwa lombwele Moses
9 a gandje kuAaron noyana omautho gomidhidhindjambo taga landula. Efikilondjambo nali kale koshiyambelo momulilo tali pi uusiku auhe, sigo otaku shi.
10 Nena omuyambi na zale eguyo lye lyoliina nombulukweya yoliina e ta yuku po omutoko gwa li koshiyambelo e te gu tula pooha dhoshiyambelo.
11 Nena ota lundulula omizalo dhe e ta fala omutoko pondje yontanda pehala lya yogoka.
12 Omulilo nagu kale gwa tema koshiyambelo, inagu pitikwa gu dhime. Ongula kehe omuyambi na hohe iikuni mugwo e ta longekidha efikilondjambo nokulungunitha oofu dhekwatathanondjambo kombanda yalyo.
13 Omulilo nagu kale aluhe gwa tema koshiyambelo, inagu dhima!
14 Omautho gondjambo yiikulya ogo ngaka. Aana yaAaron naa ete ondjambo yiikulya kOmuwa komeho goshiyambelo.
15 Omuyambi na kuthe mo ombinga yokuyambelwa koshiyambelo, oyo eke lyu udha lyuusila womunziya u na omagadhi gooholivi niitsinino ayihe yi li mo, e te yi lungunithile koshiyambelo, li ninge ezimba lya nika nawa tali opalele Omuwa.
16 Oshihupe otashi liwa po kaayambi. Otashi ningwa moshikwiila inaashi tulwa efulika e tashi lilwa pehala eyapuki, omehale lyetsalihangano. Omuwa okwe shi pa aayambi, shi ninge oshitopolwa shoondjambo dhiikulya. Osho oshiyapukilela sha faathana nomayonondjambo noondjondjambo.
17
18 Aana yaAaron ayehe aalumentu oye na oku shi lya. Osho oshipewa shawo shaaluhe shoondjambo dhiikulya ya yapulilwa Omuwa. Kehe ngoka te shi gumu, ota kala omuyapuki.
19 Omuwa okwa pe Moses eutho ndika lyondjambo yaAaron noyana taa yamba esiku ndyoka taa yapulwa. Naa ete kOmuwa omakopi gaali guusila womunziya, u ninge ondjambo yiikulya, etata limwe ongula nekwawo ongulohi.
20
21 Namu tulwe omagadhi noku u kangela moshikangwa noku u nyangushula uupambu, opo u ninge ondjambo yiikulya yezimba lya nika nawa tali opalele Omuwa.
22 Ondjambo ndjoka oyi na okuyambwa aluhe koluvalo lwaAaron kungoka ta kala omuyambimukuluntu. Nayi lungunithwe po thiluthilu; oyo oshipewa shOmuwa shaaluhe.
23 Ondjambo kehe yiikulya tayi zi komuyambi, nayi lungunithwe po ayihe, ihayi liwa.
24 Omuwa okwa lombwele Moses,
25 a pe Aaron noyana omautho geyonondjambo. Oshimuna sheyonondjambo otashi dhipagelwa kuumbangalantu woshiyambelo, hoka haku dhipagelwa iimuna yomafikilondjambo. Shika osho ondjambo ondjapukilela.
26 Omuyambi ngoka ta yamba eyonondjambo lyoshimuna, ne li lile mehala eyapuki, omehale lyetsalihangano.
27 Kehe ngoka nenge shaa shoka tashi gumu onyama ndjoka, otashi kala oshiyapuki. Ngele onguwo ya nothelwa kombinzi yoshimuna, nayi yogelwe mehala eyapuki.
28 Ombiga yoshikangwa kehe ya pila onyama, nayi tatulwe; ngele oyosheela, nayi kwehulwe nokuyagwa e tayi simpulwa nawa nomeya.
29 Aalumentu ayehe yomezimo lyaayambi otaa li ondjambo ndjika; oyo ondjapukilela.
30 Ihe eyonondjambo ngele oshitopolwa shimwe shombinzi sha falwa metsalihangano oku ka dhima po oondjo, oshimuna shoka inashi liwa; oshi na okulungunithwa po.
1 Otapa landula omautho gondjondjambo. Oyo ondjapukilela.
2 Oshimuna shondjondjambo nashi dhipagelwe kuumbangalantu woshiyambelo, hoka haku dhipagelwa iimuna yomafikilondjambo, ombinzi yasho nayi shashaminwe koombinga adhihe dhoshiyambelo.
3 Oofu dhasho adhihe nadhi kugunyunwe ko e tadhi yambelwa koshiyambelo, omushila gwonzi, omakagadhi gokiikwamela,
4 iitiyanathigo niinkene yayo, nekalokwa lyokehuli.
5 Omuyambi na lungunithile koshiyambelo oofu adhihe dhi ninge ondjambo ya yambelwa Omuwa. Oyo ondjondjambo.
6 Omulumentu kehe mezimo lyaayambi ota vulu oku yi lya, ihe nayi lilwe mehala eyapuki, oshoka oyo ondjapukilela.
7 Eutho olimwe omolweyonondjambo nomolwondjondjambo; onyama oyomuyambi ngoka ta yamba.
8 Omuyambi ngoka ta yambele omuntu efikilondjambo, na pewe ekunka lyoshimuna sha yambwa.
9 Ondjambo yiikulya kehe ya pya peziko nenge poshikangwa nenge mombiga, oyomuyambi ngoka te yi yambele Omuwa.
10 Ihe oondjambo dhiikulya adhihe inaadhi pya, ongele ndhoka dha tulwa omagadhi nenge oonkunkutu, otadhi ningi dhaayambi aana yaAaron nodhi na okutopolwa dhi thike pamwe.
11 Omautho taga landula ogekwatathanondjambo tali yambelwa Omuwa.
12 Ngele omuntu te li etele Kalunga omolwepandulo, na yambe pamwe noshimuna shepandulo ondjambo yiikwiila inaayi tulwa efulika yomaludhi ngaka: iikwiila ya mbumbwakana ya ningwa nuusila womunziya wa lungilwa momagadhi gooholivi, uukwiila wa pepuka wa gwayekwa omagadhi gooholivi, nuukuki wa ningwa nuusila womunziya wa lungilwa momagadhi gooholivi.
13 Na yambe ano iikwiila inaayi tulwa efulika pamwe noshimuna she shepandulo.
14 Na ete oshikwiila shimwe sholudhi kehe kOmuwa; otashi ningi shomuyambi ngoka ta shashamine ombinzi yoshimuna shekwatathanondjambo koshiyambelo.
15 Onyama yoshimuna nayi liwe esiku ndyoka ya yambwa; inapu hupithilwa yangula.
16 Ngele oku na omuntu ta yamba ekwatathanondjambo omolweuvaneko nenge ta yamba pahalo lye mwene, ondjambo nayi liwe mesiku lyeyambo, ihe ngele otaku hupu sha, nashi liwe esiku lyanofu.
17 Onyama kehe tayi hupile esiku etitatu, nayi lungunithwe po.
18 Ngele ope na onyama yomundjoka tayi liwa esiku etitatu, Kalunga ita ka taamba ondjambo yomuntu ngoka. Itayi mu yalulilwa we, otayi talwa ya nyata, naangoka te yi li, ota pewa ondjo.
19 Onyama ngele oya gumathana naashoka sha nyata, inayi liwa, ndele oyi na okulungunithwa po. Omuntu kehe a yogoka ota vulu okulya onyama yekwatathanondjambo,
20 ihe shaa ngoka te yi li a nyata, na dhimwe mo maantu yaKalunga.
21 Nongele oku na ngoka a gumu shoka sha nyata, nashi kale shoka shomuntu nenge shoshimuna, na dhimwe mo maantu yaKalunga.
22 Omuwa okwa lombwele Moses
23 a gandje kAaisraeli omautho ngaka. Inamu lya omakagadhi goongombe, goonzi nenge giikombo.
24 Omakagadhi goshimuna shi isila nenge sha lika kiilikama, inamu ga lya, ihe otamu vulu oku ga longitha miilonga yilwe yi ili.
25 Shaa ngoka ta li omakagadhi goshimuna shoka tashi yambelwa Omuwa, na dhimwe mo maantu yaKalunga.
26 Shaa mpoka tamu kala, inamu lya ombinzi yoondhila nenge yiimuna.
27 Shaa ngoka ta li ombinzi, na dhimwe mo maantu yaKalunga.
28 Omuwa okwa lombwele Moses
29 a gandje kAaisraeli omautho ngaka. Shaa ngoka ta yambele Omuwa ekwatathanondjambo, na gandje oshitopolwa shalyo, shi ninge ondjambo yedhugadhugo,
30 te yi eta niikaha ye mwene. Na ete omakagadhi goshimuna nondete yasho te yi yambele Omuwa ondjambo yedhugadhugo.
31 Omuyambi na lungunithile omakagadhi koshiyambelo, ihe ondete otayi ningi yaayambi.
32 Oshilama shokolulyo shoshimuna shekwatathanondjambo lyeni nashi pewe omuyambi, opo shi ninge ekwathelo lye.
33 Otashi ningi shomuyambi ngoka ta yamba ombinzi nomakagadhi gekwatathanondjambo.
34 Ondete yoshimuna oyo ondjambo yedhugadhugo, noshilama shokolulyo osho ekwathelo ndyoka Omuwa e li kutha kAaisraeli e te li pe aayambi. Aaisraeli oye na oku shi gandja kaayambi aluhe sigo aluhe.
35 Shika osho oshitopolwa shoka tashi zile Aaron noyana moondjambo tadhi yambelwa Omuwa. Oshe ya uthilwa esiku ndyoka ya yapulilwa oshilonga shuuyambi.
36 Esiku ndyoka Omuwa okwa lombwele Aaisraeli, ye ya pe oshitopolwa shika shoondjambo aluhe sigo aluhe.
37 Ngaka ogo omautho gomafikilondjambo, goondjambo dhiikulya, gomayonondjambo, goondjondjambo, goondjambo dheyapulo nogomakwatathanondjambo.
38 Omuwa okwa pe Moses iipango mbika kondundu Sinai esiku ndyoka a lombwele Aaisraeli ya yambele Omuwa oondjambo mombuga yaSinai.
1 Omuwa okwa lombwele Moses a ti:
2 “Eta Aaron noyana kosheelo shetsalihangano. Eta wo omizalo dhuuyambi, omagadhi gokugwaya, ongombe ondumentu yomutanda yokuyambelwa eyonondjambo, oonzi mbali oondumentu nontungwa yi na iikwiila inaayi tulwa efulika.
3 Hiya egongalo alihe li gongalele ko.”
4 Moses okwa ningi, ngaashi Omuwa e mu lombwele, negongalo olya gongalele posheelo shetsalihangano.
5 Moses okwa ti kegongalo: “Shoka tandi longo ngashingeyi, osho Omuwa a utha shi ningwe.”
6 Moses okwa hedhitha Aaron noyana komeho e te ya yogo nawa nomeya.
7 Okwa zaleke Aaron ohema neguyo nekwamo mombunda ye. Okwe mu zaleke omapepenguwo e te ga mangele ko nepaya lyago lyomombunda.
8 Okwe mu zaleke oshipapa shomontulo e ta tula mo Urim naThummin.
9 Okwe mu zaleke egala komutse nokomeho galyo okwa tula ko epapa lyoshingoli, endhindhiliko eyapuki lyeyapulo, naanaa ngaashi Omuwa a lombwele Moses.
10 Moses okwa kutha omagadhi gokugwaya e te ga gwayeke etsalihangano naayihe mbyoka yi li mo. Pahedhi ndhika okwe yi yapulile Omuwa.
11 Okwa kutha omagadhi gamwe e te ga shashamine oshiyambelo luheyali e ta gwayeke oshiyambelo niikwaniipangitho yasho ayihe, netemba lyokwiiyogela nompadhi yayo, opo e yi yapulile Omuwa.
12 Okwa yapula Aaron, sho e mu tile omagadhi momutse nokwe mu gwayeke.
13 Opo ihe Moses okwa hedhitha ko aana yaAaron komeho e te ya zaleke oohema nomakwamo moombunda e ta tula omatsilu komitse, naanaa ngaashi Omuwa e mu lombwele.
14 Moses okwe eta po ongombe ondumentu yeyonondjambo, Aaron noyana noya tenteke iikaha yawo komutse gwayo.
15 Moses okwe yi tsele e ta kutha mbinzi e te yi gwayeke kooniga dhoshiyambelo, opo e shi yapule. Ombinzi onkwawo okwe yi tile pekota lyoshiyambelo. Pahedhi ndjika okwe shi yapula noku shi yelitha.
16 Moses okwa kutha omakagadhi agehe kiikwamela, ekalokwa lyokehuli, iitiyanathigo niinkene yayo e te yi lungunithile koshiyambelo.
17 Ihe onyama yongombe, ekunka nehoho okwe yi fala e te yi lungunithile pondje yontanda, naanaa ngaashi Omuwa a lombwele Moses.
18 Moses natango okwe eta po onzi ondumentu yefikilondjambo, Aaron noyana noya tenteke iikaha yawo komutse gwayo.
19 Moses okwe yi dhipaga e ta shashamine ombinzi koombinga adhihe dhoshiyambelo.
20 Okwa tete onzi iintimbu e ta yogo iikwamela niilama momeya nokwa lungunitha omutse, oofu noshihupe ashihe shonzi koshiyambelo, naanaa ngaashi Omuwa a lombwele Moses. Oya li efikilondjambo lyokugandja ezimba lya nika nawa, ondjambo tayi opalele Omuwa.
21
22 Moses okwe eta po ishewe onzi ondumentu ontiyali, onzi yeyapulo lyaayambi, Aaron noyana noya tenteke iikaha yawo komutse gwayo.
23 Moses okwe yi dhipaga e ta kutha mbinzi e te yi gwayeke koshipapatsi shokolulyo shaAaron, komulumenwe gwoshikaha she shokolulyo nokomunwe omunene gwokompadhi yokolulyo.
24 Nena okwa hedhitha ko aana yaAaron e te ya gwayeke kiipapatsi yawo yokomalulyo, komilumenwe dhokiikaha yokomalulyo nokominwe ominene dhokoompadhi dhawo dhokomalulyo. Ombinzi onkwawo Moses okwe yi shashamine koombinga adhihe dhoshiyambelo.
25 Okwa kutha oofu, omushila gwonzi, omakagadhi gokiikwamela, ekalokwa lyokehuli, iitiyanathigo niinkene yayo noshilama shokolulyo.
26 Montungwa yiikwiila inaayi tulwa efulika ya yapulilwa Omuwa, okwa kutha mo oshikwiila shimwe sha mbumbwakana, okakuki kamwe ka ningwa nomagadhi nokakwiila kamwe ka pepuka e te yi tula kombanda yomakagadhi, oofu noshilama shokolulyo.
27 Iikulya mbika ayihe okwe yi tula peke lyaAaron nopomake goyana e te yi ya dhugadhugitha koshipala shOmuwa.
28 Nena Moses okwa kutha iikulya pomake gawo e te yi lungunithile koshiyambelo, kombanda yefikilondjambo. Oyo ondjambo yeyapulo, ondjambo yezimba lya nika nawa lyo opalela Omuwa.
29 Moses okwa kutha ondete e te yi dhugadhuga koshipala shOmuwa. Oya ningi oshipewa shaMoses shonzi yeyapulo, ngaashi Omuwa a lombwele Moses.
30 Moses okwa kutha mo momugwayo gokugwaya nomombinzi ndjoka ya li koshiyambelo e ta shashamine Aaron noyana nokoonguwo dhawo. Pahedhi ndjika okwe ya yapulile Omuwa pamwe noonguwo dhawo.
31 Moses okwa lombwele Aaron noyana e ta ti: “Faleni onyama ndjika posheelo shetsalihangano, mu yi pake po ne mu yi lile mpoka pamwe niikwiila yomontungwa yoondjambo dheyapulo, naanaa ngaashi Omuwa a ti.
32 Lungunitheni onyama kehe nenge oshikwiila tashi hupu ko.
33 Inamu za po posheelo shetsalihangano omasiku gaheyali, sigo omisindilo dheyapulo lyeni dha pu thiluthilu.
34 Omuwa oye e tu lombwele, tu ninge shoka twa longo nena, opo oondjo dheni dhi dhimwe po.
35 Omasiku gaheyali, uusiku nomutenya, omu na okukala posheelo shetsalihangano tamu longo shoka Omuwa a ti nashi longwe. Ngele itamu shi ningi, otamu si. Osho Omuwa a lombwele ndje.”
36 Aaron noyana oya gwanitha ayihe mbyoka Omuwa e ya lombwelitha kuMoses.
1 Esiku limwe sho lya piti po, omisindilo dheyapulo sho dha tsakanithwa, Moses okwi ithana Aaron noyana naawiliki yAaisraeli.
2 Okwa ti kuAaron: “Ikuthila ongombe ondumentu yomutanda nonzi ondumentu yaa na oshipo, u yi yambele Omuwa, ongombe oyeyonondjambo nonzi oyefikilondjambo.
3 Nena lombwela Aaisraeli ya kuthe oshikombo oshilumentu shi ninge eyonondjambo, ontana yomumvo gumwe nonzigona yomumvo gumwe yaa na oshipo yi ninge efikilondjambo,
4 nongombe ondumentu nonzi ondumentu yi ninge ekwatathanondjambo. Naa yi yambele Omuwa pamwe nondjambo yiikulya mwa tulwa omagadhi. Naye shi ninge, oshoka Omuwa ote ya ihololele nena.”
5 Oye eta kosheelo shetsalihangano ashihe shoka Moses e ya lombwele, negongalo alihe olya gongala li simaneke Omuwa.
6 Moses okwa ti: “Osho Omuwa e mu lombwele mu shi ninge, opo eadhimo lyOmuwa li mu holokele.”
7 Nena okwa lombwele Aaron e ta ti: “Inda koshiyambelo u ka yambe eyonondjambo nefikilondjambo gokukutha po oondjo dhoye noondjo dhoshigwana. Yamba oondjambo ndhika, dhi kuthe po oondjo dhoshigwana, ngashika Omuwa a popi.”
8 Aaron okwa yi koshiyambelo e ta tsele ongombe ondumentu yomutanda omolwokuyambela oondjo dhe mwene.
9 Oyana oye mu etele ombinzi. Okwa yaya mo omunwe gwe e ta gwayeke ombinzi kooniga dhoshiyambelo. Ombinzi onkwawo okwe yi tile pekota lyoshiyambelo.
10 Nena okwa lungunithile koshiyambelo oofu, iitiyanathigo nekalokwa lyokehuli, naanaa ngaashi Omuwa a lombwele Moses.
11 Ihe onyama nekunka okwe yi lungunithile pondje yontanda.
12 Okwa dhipaga oshimuna shefikilondjambo. Oyana oye mu etele ombinzi, oye nokwe yi shashamine koombinga adhihe dhoshiyambelo.
13 Oye mu pe omutse niintimbu iikwawo yoshimuna nokwe yi lungunithile koshiyambelo.
14 Nena okwa yogo iikwamela nomakondo nokwe yi lungunithile koshiyambelo kombanda yefikilondjambo.
15 Konima yaambika okwa yambele oshigwana. Okwa kutha oshikombo shoka tashi yambelwa oondjo dhoshigwana, okwe shi dhipaga e te shi yamba, ngaashi a yambele oondjo dhe mwene.
16 Okwe eta po wo oshimuna shefikilondjambo e te shi yamba pamautho.
17 Okwe eta po ondjambo yiikulya e ta kutha eke lyu udha uusila womunziya e te u lungunithile koshiyambelo. (Shika ohashi gwedhwa pefikilondjambo lyesiku kehe.)
18 Okwa tsele ongombe ondumentu nonzi ondumentu, yi ninge ekwatathanondjambo lyoshigwana. Oyana oye mu etele ombinzi nokwe yi shashamine koombinga adhihe dhoshiyambelo.
19 Aaron okwa tula oofu dhongombe ondumentu nodhonzi ondumentu
20 kombanda yoondete dhiimuna e te dhi fala koshiyambelo
21 e ta dhugadhuga oondete niilama yokomalulyo koshipala shOmuwa, ngaashi Omuwa a utha.
22 Aaron sho a mana okuyamba oondjambo adhihe, okwa yelutha omaako ge kombanda yoshigwana e te shi laleke nuuyamba e ta zi ko.
23 Moses naAaron oya yi metsalihangano, naasho ya zi mo, oya laleke oshigwana nuuyamba, neadhimo lyOmuwa olya holokele oshigwana ashihe.
24 Ohaluka Omuwa a tumu omulilo, nogwa lungunitha po efikilondjambo noofu koshiyambelo. Aantu sho ye shi mono, oya ligola e taa tsu iipala yawo mevi.
1 Aana yaAaron, Nadab naAbihu, shaa ngoka okwa kutha oshikangwa she e ta tula mo omakala ga geta ta gwedha mo iitsinino e te yi yambele Omuwa. Ihe omulilo nguka kagwa li omuyapuki, oshoka Omuwa ine ya lombwela ye gu yambe.
2 Ohaluka Omuwa okwa tumu omulilo e tagu ya lungunitha po e taya sile koshipala shOmuwa.
3 Moses okwa lombwele Aaron a ti: “Shika osha ningwa pahapu dhOmuwa, sho a tile: ‘Ayehe mboka taa longele ndje, oye na okusimaneka uuyapuki wandje; otandi talithile aantu yandje eadhimo lyandje.’ ” Ihe Aaron okwa kala a tya tuu thilu.
4 Moses okwi ithana Mishael naElzafan, aana yaUssiel, hegona yaAaron, e ta ti kuyo: “Ileni mu kuthe po omidhimba dhaamwenigona metsalihangano, mu dhi fale kondje yontanda.”
5 Oye ya e taye dhi kutha po dhi li moonguwo dhadho noku dhi fala kondje yontanda, ngaashi Moses a ti.
6 Nena Moses okwa lombwele Aaron noyana Eleasar naItamar a ti: “Inamu shindalaleka omafufu geni nenge mu tuule oonguwo dheni, mu holole okulila kweni. Ngele tamu shi ningi, otamu si, Omuwa nota geele egongalo alihe. Ihe Aaisraeli ayehe ooyakweni oya zimininwa okulila oosa dhe etwa komulilo gwa tumwa kOmuwa.
7 Inamu za mo mosheelo shetsalihangano, opo mwaa se, oshoka omwa yapulwa nomagadhi gOmuwa gokugwaya.” Oyo noya ningi, ngaashi ya lombwelwa kuMoses.
8 Omuwa okwa lombwele Aaron e ta ti:
9 “Inamu nwa omaviinu nomalovu omadhigu, ongoye mwene naamwoye, nge tamu yi metsalihangano. Ngele tamu shi ningi, otamu si. Ompango ndjika oyi na okudhigininwa koluvalo lweni aluhe sigo aluhe.
10 Omu na okuyoolola pokati kaambyoka iiyapuki naambyoka inaayi yapuka, pokati kaambyoka ya yogoka naambyoka inaayi yogoka.
11 Omu na okunongeka Aaisraeli oompango adhihe ndhoka nde mu pethitha Moses.”
12 Moses okwa lombwele Aaron noyana ya hupu ko, Eleasar naItamar, ta ti: “Kutheni ondjambo yiikulya ndjoka ya hupu koondjambo dha yambelwa Omuwa, yaa na efulika, ne mu yi lile ontega noshiyambelo, oshoka ondjapukilela.
13 Yi lileni mehala eyapuki; oyo oshitopolwa sheni naamwoye shomiikulya ya yambelwa Omuwa. Shika osho shoka Omuwa a lombwele ndje.
14 Ihe ngoye naamwoye aamati naakadhona otamu vulu okulya ondete yedhugadhugo noshilama sha gandjwa. Yi lileni mehala lya yogoka pamisindilo. Oyo oshitopolelwa sheni naamwoye sha zi mekwatathanondjambo lyAaisraeli.
15 Oshilama sha gandjwa nondete yedhugadhugo nayi etwe pethimbo ndyoka oofu tadhi yambwa, opo yi dhugadhugwe koshipala shOmuwa. Oshitopolwa shika oshoye naamwoye aluhe sigo aluhe, ngaashi Omuwa a ti.”
16 Moses okwa kala ta kongakonga oshikombo sheyonondjambo e ta koneke kutya nani osha lungunithwa po nale. Shika oshe mu geelitha Eleasar naItamar, aana yaAaron mboka ya hupu ko, e ta ti:
17 “Omolwashike inaamu lila eyonondjambo mehala eyapuki? Olyo eyapukilela, nOmuwa okwe li gandja kune, opo mu dhime po oondjo dhegongalo.
18 Talii ko, nani nombinzi inayi falwa metsalihangano, omwa li mu na oku li lila metsalihangano, ngaashi nde mu lombwelele.”
19 Aaron okwa yamukula a ti: “Aantu nena oya yambele Omuwa eyonondjambo nefikilondjambo lyawo, ihe onda adhika kiinima yi thike mpa. Ando onda li nda lya eyonondjambo nena, oshinima shino ando osha ziminwa ngaa kOmuwa?”
20 Moses sho e shi uvu, okwa geyuluka.
1 Omuwa okwa lombwele Moses naAaron e ta ti:
2 “Lombweleni Aaisraeli omautho ngaka. Otamu vulu okulya iinamwenyo ayihe yokevi
3 mbyoka yi na omakondo ga shandjuka nohayi ekeshele.
4 Ihe inamu lya oongamelo, uuhele nuulimba. Oyo iinamwenyo yoshipwe; ohayi ekeshele, nonando kayi na omakondo ga handjuka.
5
6
7 Inamu lya iingulu. Oyi na oshipwe; nomakondo gayo oga shandjuka, ihe ihayi ekeshele.
8 Iinamwenyo mbika inamu yi lya ne inamu guma omituntu dhayo; oyi na oshipwe.”
9 Otamu vulu okulya oohi adhihe ndhoka dhi na omilenge niipeta,
10 ihe ayihe mbyoka yi li momeya yaa na omilenge niipeta inamu yi lya.
11 Iishitwa ya tya ngaaka oyi na oshipwe. Inamu yi lya nenge mu gume omituntu dhayo.
12 Inamu lya iinamwenyo mbyoka yi li momeya yo yaa na omilenge niipeta.
13 Moondhila nyanyaleni ndhika mwaa dhi lye, oshoka odhi na oshipwe: ekodhi eluudhe, ekwatandimba, onkwalukwa,
14 embiimbili, oondhila oonkwakodhi,
15 omaludhi gomakola,
16 ompo, lumbamba, kakwaya, ookakodhi,
17 oshukutula, ontyololola, ehwiyu,
18 kakulu, onyundu, ontsa,
19 kandoko omaludhi gomayamakalwa, dhepupu nelimalima.
20 Iipethipethi ayihe yomawawa yi na omagulu gane, oyi na oshipwe.
21 Ihe otamu vulu okulya iipethipethi mbyoka yomawawa yi na omagulu gane hayi nyantuka pevi.
22 Ano otamu li mbika: oombahu dhanakapipi nomaludhi gadho, oombahu dhomakamuti nomaludhi gadho noshapapa.
23 Iipethipethi yilwe yi na omawawa nomagulu gane, oyi na oshipwe.
24 Iipuka mbika oyo oshipwe. Ngoka te yi gumu, ota kala e na oshipwe sigo ongulohi.
25 Shaa ngoka ta humbata omituntu dhayo, na yoge oonguwo dhe nota kala e na oshipwe sigo ongulohi.
26 Iinamwenyo ayihe yomakondo ga tashuka go inaaga shandjuka nawa yo ihayi ekeshele, oyo oyi na oshipwe. Shaa ngoka te yi gumu, ota kala e na oshipwe.
27 Iinamwenyo ayihe yomagulu gane yi na omakaha, oyi na oshipwe. Ngoka ta gumu omituntu dhayo, ota kala e na oshipwe sigo ongulohi.
28 Oongoka ta humbata omituntu dhayo, na yoge oonguwo dhe nota kala e na oshipwe sigo ongulohi. Oyi na oshipwe.
29 Uunamwenyo mbuka hau ende pevi, ou na oshipwe: ontunankwi, ombuku nomaludhi gomayengele,
30 eyompompolo, eyangomba, kakoko, nyandako nethimbithimbi.
31 Iipuka mbika oyi na oshipwe. Shaa ngoka te yi gumu ngele oya sa, ota kala e na oshipwe sigo ongulohi.
32 Noshaa shoka tashi gwilwa kuyo ngele oya sa, otashi kala shi na oshipwe. Oshiti kehe nenge oshilapi nenge oshipa nenge oshako, shaa shoka hashi longithwa, oshi na okutulwa momeya e tashi kala shi na oshipwe sigo ongulohi; oyo notayi ka za nduno oshipwe.
33 Ngele shimwe shayo otashi gwile mombiga nenge moshiyuma, ayihe mbyoka tayi adhika mo, otayi kwata oshipwe. Oshiyuma nashi tatulwe po.
34 Ashihe hashi liwa e tashi kwatathana nomeya gomoshiyuma shoshipwe, otashi kwata oshipwe; omeya haga nuwa ge li moshiyuma shoka, otaga kwata oshipwe.
35 Apehe mpoka tapu gwile omituntu dhayo, otapu kwata oshipwe; omasiga gatatu naga tatulwe po, oge na oshipwe tage mu kwatitha oshipwe.
36 Ihe iipemba nomakango gomeya otaga kala ga yogoka, nando iinima yilwe ayihe tayi gumu omituntu dhayo, otayi kala yi na oshipwe.
37 Ngele omutuntu otagu gwile mombuto, otayi kala ya yela.
38 Ihe ngele ombuto ya adhika ya tutikwa, nomutuntu tagu gwile mo, otayi kwata oshipwe.
39 Oshimuna hashi liwa ngele tashi si, ngoka te shi gumu, ota kala e na oshipwe sigo ongulohi.
40 Ngele oku na ngoka ta li ontumba yoshimuna shika, na yoge oonguwo dhe nota kala e na oshipwe sigo ongulohi. Ngoka ta humbata oshimuna sha sa, na yoge oonguwo dhe, ihe na kale e na oshipwe sigo ongulohi.
41 Inamu lya uupuka mboka hau mikita mevi,
42 auhe mboka hau ipwedha nenge hau ende u na omagulu gane nenge ge vule po.
43 Inamu ikwatitha oshipwe moku u lya.
44 Ongame Omuwa Kalunga keni. Kaleni aayapuki, oshoka ngame omuyapuki.
45 Ongame Omuwa nde mu tembudha muEgipiti, opo ndi ninge Kalunga keni. Kaleni aayapuki, oshoka ngame omuyapuki.
46 Ompango ndjika oyiinamagulugane noyoondhila naambyoka hayi kala momeya naambyoka hayi ende mevi.
47 Kotokeni mu yoolole pokati kaambyoka ya yogoka naambyoka yoshipwe, iinamwenyo mbyoka hayi liwa naambyoka ihaayi liwa.
1 Omuwa okwa lombwele Moses
2 a gandje kAaisraeli omautho ngaka. Omukulukadhi ngele ta ningi omusimba e ta vala omumati, ota kala omasiku gaheyali e na oshipwe, ngaashi ha kala noshipwe pomasiku geimono lye.
3 Mesiku etihetatu omumati na fukalekwe.
4 Nena otashi pula natango omasiku omilongo ndatu nagatatu molwali nokanyaangidhe. Ina guma sha oshiyapuki nenge a ye ketsalihangano, sigo omasiku geiyopaleko lye lyolwali taga gwana.
5 Ihe ngele okwa vala omukadhona, ota kala omasiku omulongo nagane e na oshipwe, ngaashi ha kala pomasiku geimono lye. Nena otashi pula omasiku omilongo hamano nagahamano, manga inaa adha meiyopaleko lye lyolwali.
6 Uuna ethimbo lyeiyopaleko lye tali pu, nongele omolwomumati nenge omukadhona, na fale komuyambi posheelo shetsalihangano onzigona yomumvo gumwe yi ninge efikilondjambo nokangutyona nenge onguti yeyonondjambo.
7 Omuyambi ota ka yamba oondjambo ndhika dhomukiintu kOmuwa e ta gwanitha omusindilo gwokukutha po oshipwe she e ta kala a yogoka. Shika osho shoka omukulukadhi e na okuninga, ngele a pulumutha.
8 Omukulukadhi ngele ita mono onzigona, ne ete uungutyona uyali nenge oonguti mbali, yimwe oyefikilondjambo nonkwawo yeyonondjambo, nomuyambi ota gwanitha omusindilo gwokukutha po oshipwe she, nota kala a yogoka.
1 Omuwa okwa lombwele Moses naAaron omautho ngaka.
2 Ngele oku na omuntu e na okandhulumutu moshipa, okupya omuthithilalo nenge okatotono okatokele a fa a kwatwa koshilundu, na falwe komuyambi Aaron nenge kugumwe gwomoyana aayambi.
3 Omuyambi na konakone okatotono hoka kaa li nawa. Ngele omafufu mokatotono oga shituka omatokele, nena mbuka owo uuvu woshilundu. Omuyambi nge e shi mono, na tye omuntu nguka oku na oshidhila.
4 Ihe okatotono okatokele ngele inaka taka okandambo moshipa, nomafufu inaga shituka omatokele, omuyambi ne mu ikalekele omasiku gaheyali e li awike.
5 Omuyambi ne mu konakone ishewe mesiku etiheyali, nongele ota tala okatotono oka fa ngaashi ka li nale, inaka taandela, ne mu ikalekele ishewe omasiku gaheyali.
6 Omuyambi ne mu konakone ishewe mesiku etiheyali, nongele okatotono oka ganya ko inaaka taandela we nolutu, ne mu uthe omuyelele; okwa pya omuthithilalo gwowala. Omuntu ngoka na yoge oonguwo dhe nota kala omuyelele.
7 Ihe ngele okatotono oka taandele nolutu, sho omuyambi e mu konakona nokwe mu utha omuyelele, na holoke ishewe komuyambi.
8 Omuyambi ote mu konakona ishewe, nongele oka taandela, nena ne mu uthe e na oshidhila; mbuka uuvu woshilundu.
9 Ngele oku na omuntu e na uuvu woshilundu, ne etwe komuyambi,
10 ngoka ne mu konakone. Ngele oku na okandhulumutu okatokele moshipa she ka shitukitha omafufu ga ninga omatokele nomwa mena ontumba,
11 mbuka owo uuvu uukulu woshilundu. Omuyambi ne mu uthe e na oshidhila; ita pumbwa okwiikalekelwa, oshoka oye e na oshidhila pwaa na omalimbililo.
12 Oshilundu ngele osha taandela nolutu aluhe sha siikila olutu okuza komutse sigo okoshithi shompadhi,
13 omuyambi ne mu konakone natango. Ngele okwa mono kutya osha siikila naanaa olutu aluhe, na uthe omuntu ngoka omuyelele. Oshoka oshipa she osha toka apehe, oye omuyelele.
14 Ihe shampa tuu a mena ontumba, oye e na oshidhila.
15 Omuyambi ne mu konakone ishewe, nongele ota mono ontumba ya mena, ne mu uthe e na oshidhila. Ontumba ya mena otayi holola uuvu woshilundu.
16 Ihe ontumba ngele tayi pwine po e tayi shituka ontokele, omuntu na ye komuyambi,
17 ngoka ne mu konakone ishewe. Ontumba ngele oya toka, oye omuyelele, nomuyambi ne mu uthe omuyelele.
18 Ngele oku na omuntu ta tumbuka oshitumbuka e tashi polo,
19 nopehala ndyoka tapu tutuluka okandhulumutu okatokele nenge okatotono ka nika uutokele, omuntu ngoka na ye komuyambi.
20 Omuyambi ne mu konakone, nehala ndyoka ngele olya fa lya kuluka lya taka okandambo, nomafufu gamo oga shituka omatokele, ne mu uthe e na oshidhila. Owo uuvu woshilundu sha tameke moshitumbuka.
21 Ihe omuyambi ngele ota konakona ehala ndyoka e ta mono kutya omafufu ngoka ga mena mo, kage shi omatokele lyo inali taka okandambo, ihe olya tsima, omuyambi na ikalekele omuntu ngoka omasiku gaheyali.
22 Ngele okatotono otaka taandele, omuyambi ne mu uthe e na oshidhila; oku na uuvu woshilundu.
23 Ihe ngele okatotono otaka kala inaaka lunduluka, osho oshiyadhi showala shoshitumbuka; omuyambi na uthe omuntu ngoka omuyelele.
24 Omuntu ngele nani okwa pi, nomontumba ya mena moshilalo otamu holoka okatotono ka nika uutokeletiligane nenge uutokele,
25 omuyambi ne mu konakone. Omafufu gomoshilalo ngele oga shituka omatokele nasho osha taka okandambo, owo uuvu woshilundu we endele moshilalo shomulilo. Omuyambi ne mu uthe e na oshidhila.
26 Ihe omafufu ngele inaga shituka omatokele noshilalo inashi taka okandambo, ndele oshi li po sha tsima, omuyambi ne mu iyoololele omasiku gaheyali.
27 Omuyambi ne mu konakone ishewe mesiku etiheyali. Ngele okatotono oka taandele, owo uuvu woshilundu, nomuyambi ne mu uthe e na oshidhila.
28 Ihe ngele okatotono oka kala inaaka taandela ko ka tsima, nena mboka kau shi uuvu woshilundu. Omuyambi ne mu uthe omuyelele, oshoka osho oshiyadhi showala.
29 Ngele oku na omulumentu nenge omukiintu e na oshitopolwa shaa li nawa momutse nenge koshama,
30 omuyambi ne shi konakone. Ngele osha taka okandambo, nomafufu ge li mo omashunga go omashona molumbumbu, owo uuvu woshilundu shomomutse, nomuyambi na uthe omuntu ngoka e na oshidhila.
31 Omuyambi mokukonakona ehala ndyoka lyaa li nawa ngele ota mono kutya inali taka okandambo, ihe kali na omafufu omaluudhe, ne mu ikalekele omasiku gaheyali.
32 Omuyambi na konakone ehale ndyoka ishewe mesiku etiheyali, nongele inali taandela nomulyo kamu na omafufu omashunga lyo inali taka okandambo,
33 omuntu ni ikulule kakele kehala ndyoka lyaa li nawa. Omuyambi ne mu ikalekele omasiku omakwawo gaheyali.
34 Mesiku etiheyali omuyambi ne mu konakone ishewe. Ehala lyaa li nawa ngele inali taandela lyo inali taka okandambo, omuyambi ne mu uthe omuyelele. Omuntu ngoka na yoge oonguwo dhe nota kala omuyelele.
35 Ihe ngele uuvu owa taandele konima sho u uthwa omuyelele,
36 omuyambi ne mu konakone ishewe. Uuvu ngele owa taandele, ita pumbwa we a tale omafufu ngele oga fa oshunga; omuntu ngoka oku na oshidhila pwaa na omalimbililo.
37 Ihe omuyambi ngele ote shi tala kutya uuvu inau taandela nomafufu omaluudhe oga mena mehala lyawo, omuntu okwa aluka, nomuyambi ne mu uthe omuyelele.
38 Ngele oku na omulumentu nenge omukiintu e na uutotono uutokele moshipa she,
39 omuyambi na konakone omuntu ngoka. Uutotono ngele uutokele wa dhimeya, nena mbyoka oyo iipulu yowala ya tuta molutu; omuntu ngoka omuyelele.
40 Ngele oku na omulumentu omutse gwe tagu thuka, oye oku na ongwala; oye omuyelele.
41 Omutse gwe ngele otagu thuka koshipala, oku na oohenya; oye omuyelele.
42 Ihe mongwala nenge moohenya nge tamu holoka okandhulumutu okatokele ka nika uutiligane, mboka owo uuvu woshilundu wa tuta mongwala nenge moohenya.
43 Omuyambi ne mu konakone, nongele oku na okandhulumutu okatokele ka nika uutiligane,
44 omuyambi ne mu uthe e na oshidhila omoluuvu woshilundu u li momutse gwe.
45 Omuntu ngoka e na uuvu woshilundu, na zale oonguwo dha tuuka, omafufu ge inaga kamulwa, na siikile oshama she ti igidha ta ti: “Onakunika oshidhila, nakunika oshidhila!”
46 Ota kala e na oshidhila, manga e na uuvu woshilundu, ye na kale kondje yontanda.
47 Oshushi ngele oyi li monguwo yomafufu goonzi nenge yoliina,
48 moshilapi sholiina nenge shomafufu goonzi nenge moshipa nenge mushoka sha ningwa moshipa,
49 ngele eha ndyoka lya kwaulwa olya nika lya ziza nenge lya tiligana, oyo oshushi tayi taandele, noshinima oshi na okuulukilwa omuyambi.
50 Omuyambi ne shi konakone nokwiikalekela onguwo omasiku gaheyali.
51 Mesiku etiheyali ne yi konakone ishewe, nongele oshushi oya taandela, nena oshinima otashi kala shi na oshidhila.
52 Omuyambi na fike po oshinima sha kwaulwa, oshoka oshushi ombwinayi; oyi na okufikwa po.
53 Ihe omuyambi ngele ta mono kutya oshushi inayi taandela we moshinima sha kwaulwa,
54 ne shi yogithe e te shi ikalekele ishewe omasiku gaheyali.
55 Nena ne shi konakone, noshushi ngele inayi lundulula olwaala lwayo, nando ongaaka inaayi taandela, oshinima oshi na oshidhila; nashi lungunithwe po, oshoka osha lika koshushi, kape na mbudhi eolelo oli li kombanda nenge omeni.
56 Ihe uuna omuyambi te shi konakona ishewe, noshushi ya ganya, na tuule oshitopolwa shoka konguwo yelapi nenge yoshipa.
57 Oshushi nge tayi holoka ishewe tayi taandele, oshinima shoshushi nashi fikwe po.
58 Ngele oshushi mokuyogwa oya ganya, oshinima nashi yogululwe notashi yele ishewe.
59 Ndjika oyo ompango yekwaulo lyoshushi moonguwo, ongele dhomafufu goonzi nenge dholiina nenge dha ningwa moshipa.
1 Omuwa okwa pe Moses
2 omautho ngaka geiyopaleko lyomunashilundu ngoka a aluka. Mesiku ndyoka e na okuuthwa omuyelele, ne etwe komuyambi.
3 Omuyambi ne mu fale pondje yontanda e te mu konakona. Oshilundu ngele osha aluka,
4 omuyambi ne etithe oondhila mbali hadhi liwa dhi na omwenyo, iiti yomusedeli, ongodhi ontiligane noshisopi.
5 Omuyambi na dhipagithile ondhila yimwe kombanda yomeya omayelele ge li moshuma sheloya.
6 Na kuthe ondhila onkwawo e te yi yaya mo pamwe niiti yomusedeli, ongodhi ontiligane noshisopi mombinzi yondhila ndjoka ya dhipagwa.
7 Na shashamine ombinzi luheyali kunakwoopalekwa moshilundu note mu utha omuyelele. Ondhila ndjoka yi na omwenyo, ne yi ethe yi tuke yi ye nomalundu.
8 Nakwoopalekwa na yoge oonguwo dhe, ni ikulule nawa omafufu agehe e ti iyogo momeya e ta ningi omuyelele. Ota vulu okuya montanda, ihe na kale omasiku gaheyali pondje yetsali lye.
9 Mesiku etiheyali ni ikulule omutse, oombenzi niikulugumbo, eeno, ni ikulule omafufu agehe; na yoge oonguwo dhe e ti iyogo olutu aluhe nota kala omuyelele.
10 Mesiku etihetatu ne ete oonzigona mbali oondumentu, onzigona onkiintu yomumvo gumwe yaa na oshipwe, omakopi gahamano guusila womunziya mwa pilulilwa omagadhi gooholivi noshititatu sholita shomagadhi gooholivi.
11 Omuyambi na fale nakwoopalekwa noondjambo ndhika kosheelo shetsalihangano.
12 Nena omuyambi na kuthe onzigona ondumentu pamwe noshititatu sholita shomagadhi e te yi yamba yi ninge ondjondjambo; ne yi dhugadhuge koshipala shOmuwa.
13 Na dhipagele onzigona mehala eyapuki moka hamu dhipagelwa iimuna yomayonondjambo nomafikilondjambo. Ota ningi ngeyi, oshoka ondjondjambo neyonondjambo ogomuyambi; ogo omayapukilela.
14 Omuyambi na kuthe mombinzi yonzigona e te yi gogo koshipapatsi shokolulyo, komulumenwe gwoshikaha shokolulyo nokomunwe omunene gwokompadhi yokolulyo yanakwoopalekwa.
15 Omuyambi na kuthe omagadhi gamwe gooholivi moshititatu sholita e te ga tile peke lye mwene lyokolumoho
16 e ta yaya mo omunwe gwomuuliko gwoshikaha shokolulyo e ta nagele omagadhi koshipala shOmuwa luheyali.
17 Na kuthe momagadhi ngoka ge li peke lye e te ga tula pomahala ngoka a gogele ombinzi koshipapatsi shokolulyo, komulumenwe gwoshikaha shokolulyo nokomunwe omunene gwokompadhi yokolulyo yanakwoopalekwa.
18 Omagadhi ngoka taga hupu peke lye, omuyambi ne ga gwayeke momutse gwanakwoopalekwa. Pahedhi ndjika ota tsakanitha omisindilo dheopaleko koshipala shOmuwa.
19 Nena omuyambi na yambe eyonondjambo e ta tsakanitha omusindilo gweopaleko. Konima yaambika na dhipage oshimuna shefikilondjambo,
20 e te shi yamba pamwe nondjambo yiikulya koshiyambelo. Pahedhi ndjika omuyambi ota tsakanitha omisindilo dheopaleko, nomuntu ota kala omuyelele.
21 Omulumentu ngele ohepele ye ita vulu okugandja shi thike mpoka, ne etele eiyopaleko lye onzigona yimwe ondumentu, yi ninge ondjondjambo yi dhugadhugwe, opo a dhiminwe po. Ne ete ashike omakopi gaali guusila womunziya mwa pilulilwa omagadhi gooholivi, u ninge ondjambo yiikulya, noshititatu sholita shomagadhi gooholivi.
22 Ne ete wo oonguti mbali nenge uungutyona uyali, yimwe oyeyonondjambo nonkwawo efikilondjambo.
23 Mesiku etihetatu lyeiyopaleko lye ne yi ete komuyambi posheelo shetsalihangano.
24 Omuyambi na kuthe onzigona nomagadhi gooholivi e te ga yamba ondjambo yedhugadhugo koshipala shOmuwa.
25 Na dhipage onzigona e ta kutha mo ombinzi e te yi gogo koshipapatsi shokolulyo, komulumenwe gwoshikaha shokolulyo nokomunwe omunene gwokompadhi yokolulyo yanakwoopalekwa.
26 Omuyambi na kuthe momagadhi e te ga tile peke lye mwene lyokolumoho,
27 e ta nagele gamwe nomunwe gwe gwomuuliko gwokolulyo koshipala shOmuwa luheyali.
28 Omagadhi gamwe ne ga tule pomahala ngoka a gogele ombinzi koshipapatsi shokolulyo, komulumenwe gwoshikaha shokolulyo nokomunwe omunene gwokompadhi yokolulyo yanakwoopalekwa.
29 Omagadhi ngoka taga hupu po peke lye, omuyambi ne ga gwayeke momutse gwanakwoopalekwa. Pahedhi ndjika ota tsakanitha omisindilo dheopaleko koshipala shOmuwa.
30 Nena na yambe onguti yimwe yomoonguti nenge okangutyona kamwe komuungutyona
31 u ninge eyonondjambo, nonkwawo yi ninge efikilondjambo pamwe nondjambo yiikulya. Pahedhi ndjika omuyambi ota tsakanitha omisindilo dheopaleko koshipala shOmuwa.
32 Ndjika oyo ompango yanakwaala oshilundu ngoka ita vulu okugandja oondjambo ndhoka dhu uthilwa eiyopaleko lye.
33 Omuwa okwa gandja omautho ngaka kuMoses naAaron.
34 Ngele tamu ka ya mevi lyaKaanan, ndyoka tandi li mu pe li ninge lyeni, e tandi eta oshushi mongulu yontumba mevi ndyoka,
35 mwene gwegumbo ndyoka na ka lombwele omuyambi kutya mongulu omwa fa mu na oshiponga shasha.
36 Omuyambi na uthe iinima ayihe yi tutilwe pondje, manga inaa konakona oshiponga, opo iinima ayihe kaaku tiwe oyi na oshidhila. Nena ota yi mongulu
37 e ta konakona oshiponga. Kekuma ngele okwa guguka ku na oondambo dha ziza kashona nenge dha nika uutiligane,
38 na ze mo mongulu e tayi edhilwa omasiku gaheyali.
39 Mesiku etiheyali na galuke e ta konakona ekuma ishewe. Ekwaulo ngele olya taandela,
40 na lombwele aantu ya kuthe mo mekuma oondhopi ndhoka dha kwaulwa nodhi falwe kehala lyoshidhila pondje yoshilando.
41 Ekuma lyomeni nali kokolwe, neloya lya kokolwa ko, nali tutilwe kehala lyoshidhila pondje yoshilando.
42 Oondhopi oompe nadhi pingene ndhoka dha kuthwa mo, nomakuma naga kolongwe nomunoko omupe.
43 Oshushi nge tayi monika ishewe mongulu, konima yoondhopi sho dha pingakanithwa nekuma lya kokolwa nolya kolongwa,
44 omuyambi na ye ko a ka tale. Ngele oshushi oya taandela, ongulu oyoshidhila.
45 Nayi kumunwe po, oondhopi, omitenge nomunoko gwayo, ayihe nayi tutilwe kehala lyoshidhila.
46 Shaa ngoka ta yi mongulu, manga ya li ye edhilwa, ota kala e na oshidhila sigo ongulohi.
47 Shaa ngoka ta lala nenge ta li sha mongulu ndjoka, na yoge oonguwo dhe.
48 Omuyambi nge te ya a tale ongulu nota dhimbulula kutya oshushi inayi holoka we, ongulu sho ya kolongwa, ne yi uthe ondjelele. Oshushi oya za mo thiluthilu.
49 Mokwoopaleka egumbo omuyambi na kuthe oondhila mbali, iiti yomusedeli, ongodhi ontiligane noshisopi.
50 Na dhipagele ondhila yimwe kombanda yomeya omayelele ge li moshuma sheloya.
51 Nena na kuthe iiti yomusedeli, oshisopi, ongodhi ontiligane nondhila yi na omwenyo e te yi yaya mombinzi yondhila ndjoka ya dhipagwa nomomeya omayelele. Na shashamine ongulu luheyali.
52 Pahedhi ndjika oto opaleke ongulu nombinzi yondhila, omeya omayelele, ondhila yi na omwenyo, iiti yomusedeli, oshisopi nongodhi ontiligane.
53 Nena na ethe ondhila ndjoka yi na omwenyo, yi tuke po yi ye pondje yoshilando momalundu. Pahedhi ndjika oto opaleke ongulu notayi kala ya yela.
54 Oompango ndhika odhuuvu woshilundu nuuvu woshipa,
55 dhoshushi yomoonguwo noyomoongulu,
56 dhuundhulumutu, okupya omuthithilalo nuutotono uutokele,
57 okunongela shoka sha yogoka naashoka shoshidhila. Ndjika ompango yuuvu woshilundu.
1 Omuwa okwa lombwele Moses naAaron ya gandje
2 kAaisraeli omautho ngaka. Ngele oku na omulumentu ta zi omayoyo muulumentu, omayoyo oshidhila.
3 Omulumentu oku na oshidhila, ongele omayoyo taga zi mo muulumentu we nenge taga thigala mo.
4 Pombanza kehe a lalele nenge apehe ta kuutumba, otapu kala pwa nika oshidhila.
5 Shaa ngoka ta gumu ombete ye, na yoge oonguwo dhe ye ni iyoge olutu aluhe, nota kala e na oshidhila sigo ongulohi.
6 Shaa ngoka ta kuutumba poshinima a li a kuutumba po, na yoge oonguwo dhe ye ni iyoge olutu aluhe, nota kala a nika oshidhila sigo ongulohi.
7 Ngoka ta gumu nakuziya omayoyo, na yoge oonguwo dhe ye ni iyoge olutu aluhe, nota kala a nika oshidhila sigo ongulohi.
8 Nakuziya omayoyo ngele ota hiyile omuntu omuyelele omayeye, omuntu ngoka na yoge oonguwo dhe ye ni iyoge olutu aluhe, nota kala a nika oshidhila sigo ongulohi.
9 Omutumba kehe gwokakambe nakuziya omayoyo a li a kuutumba, ogwa nika oshidhila.
10 Omuntu kehe ta gumu shoka nakuziya omayoyo a li a kuutumba, oku na oshidhila sigo ongulohi. Ngoka a humbata oshinima sha kuutumbwa kunakuziya omayoyo, na yoge oonguwo dhe ye ni iyoge olutu aluhe, nota kala a nika oshidhila sigo ongulohi.
11 Nakuziya omayoyo ngele ota gumu omuntu ye ina yoga tango iikaha ye, omuntu ngoka omugumwa na yoge oonguwo dhe ye ni iyoge olutu aluhe, nota kala a nika oshidhila sigo ongulohi.
12 Oshiyuma kehe sheloya nakuziya omayoyo te shi gumu, nashi tatulwe po, ihe etenga kehe lyoshiti te li gumu, nali yogwe momeya.
13 Ehiho lyomayoyo nge lya kodha, na tegelele omasiku gaheyali. Nena na yoge oonguwo dhe nota yogo olutu lwe momeya omayelele, nota kala a yogoka.
14 Mesiku etihetatu na kuthe oonguti mbali nenge uungutyona uyali e ta holoka koshipala shOmuwa posheelo shetsalihangano, e dhi fale komuyambi.
15 Omuyambi na yambe po yimwe yi ninge eyonondjambo, nonkwawo yi ninge efikilondjambo. Pahedhi ndjika omuyambi ota tsakanitha omusindilo gweiyopaleko lyomuntu ngoka.
16 Ngele oku na omulumentu ta hiha omasita goluvalo, na yoge olutu lwe aluhe, nota kala a nika oshidhila sigo ongulohi.
17 Oshilapi nenge oshipa kehe sha nothelwa komasita goluvalo, nashi yogwe, notashi kala sha nika oshidhila sigo ongulohi.
18 Omulumentu nge ta lala nomukiintu, ndele omasita goluvalo taga tika mo, naa yoge nawa omalutu gawo, notaa kala ya nika oshidhila sigo ongulohi.
19 Omukiintu ngele oku li komwedhi, ota kala a nika oshidhila omasiku gaheyali. Shaa ngoka te mu gumu, ota kala a nika oshidhila sigo ongulohi.
20 Ashihe shoka te shi kuutumba nenge ta lala po methimbo lye lyokomwedhi, otashi kala sha nika oshidhila.
21 Shaa ngoka ta gumu ombete ye nenge mpoka a li a kuutumba po, na yoge oonguwo dhe ye ni iyoge olutu aluhe, nota kala a nika oshidhila sigo ongulohi.
22
23
24 Ngele oku na omulumentu ta lala nomukiintu pethimbo lye lyokomwedhi, ota nyatekwa nota kala e na oshidhila omasiku gaheyali, nopombanza kehe ta ka lala po, otayi kala ya nika oshidhila.
25 Ngele oku na omukiintu ta ziya ombinzi omasiku ogendji yaa shi yokomwedhi, nenge tayi ziya ya pitilila ethimbo lye lyokomwedhi, ota kala a nika oshidhila ethimbo alihe lyombinzi tayi ziya ngaashi naanaa pethimbo lye lyokomwedhi.
26 Kombete kehe a lala ko naapehe a kuutumba methimbo lyoluziyo lwe, otayi kala ya nika oshidhila.
27 Shaa ngoka te yi gumu, ota kala a nika oshidhila. Na yoge oonguwo dhe ye ni iyoge olutu aluhe, nota kala a nika oshidhila sigo ongulohi.
28 Oluziyo lwe ngele olwa kodha, na tegelele omasiku gaheyali, nena ota kala a yogoka.
29 Mesiku etihetatu na kuthe oonguti mbali nenge uungutyona uyali e te dhi fala komuyambi posheelo shetsalihangano.
30 Omuyambi na yambe po yimwe yi ninge eyonondjambo, nonkwawo yi ninge efikilondjambo. Pahedhi ndjika omuyambi ota tsakanitha omusindilo gweiyopaleko lyomuntu ngoka.
31 Omuwa okwa lombwele Moses a londodhe Aaisraeli omolwokunika oshidhila kwawo, opo yaa nyateke etsalihangano, ndyoka li li mokati koontanda dhawo. Ngele taye shi ningi, otaa dhipagwa po.
32 Ngaka ogo omautho gomulumentu nakuhiha omayoyo naangoka ta hiha omasita goluvalo,
33 nogomukiintu e li komwedhi nenge gomulumentu nomukiintu e na oluziyo nenge gomulumentu ngoka ta lala nomukiintu a nika oshidhila.
1 Omuwa okwa popi naMoses konima yeso lyaana yaAaron yaali mboka ya si, sho ya holoka koshipala shOmuwa ye na omulilo gwaa shi omuyapuki.
2 Omuwa okwa ti: “Lombwela omumwanyoko Aaron kaa ye ethimbo kehe a hala mEhala lyUuyapukielela meni lyetopolitho, oshoka omo tandi holoka ndi li moshikogo kombanda yoshisiikilo shoshikethahangano. Ngele ita vulika, ota si.
3 Ihe uuna ta yi mEhala lyUuyapukielela, na ete ongombe yomutanda yi ninge eyonondjambo, nonzi ondumentu yi ninge efikilondjambo.
4 Ni iyoge olutu aluhe nawa ye na zale oonguwo dhuuyambi dholiina: ohema, ombulukweya, ekwamo nentsilu.”
5 Egongalo lyaIsrael nali gandje iikombo iyali iilumentu yi ninge eyonondjambo, nonzi ondumentu yi ninge efikilondjambo.
6 Aaron na yambe ongombe ondumentu yi ninge eyonondjambo lyokukutha po oondjo dhe mwene nodhaanegumbo lye.
7 Nena na kuthe iikombo mbyoka iyali e te yi fala kosheelo shetsalihangano.
8 Oko ne yi umbile oshihogololitho ta longitha uumanya uyali, kamwe ka nyolwa “oshOmuwa” nakamwe “oshaAsasel.”
9 Aaron na kuthe oshikombo shoka sha kwatwa koshihogololitho shi ninge shOmuwa e te shi yamba eyonondjambo.
10 Oshikombo shoka sha hogololelwa Asasel, nashi tulwe koshipala shOmuwa shi na omwenyo e tashi tidhilwa kombuga shi ye kuAsasel, opo shi kuthe po oondjo dhaantu.
11 Uuna Aaron ta yamba ongombe ondumentu yi ninge eyonondjambo lye mwene naanegumbo lye,
12 na kuthe oshikangwa shomulilo shu udha omakala gomulilo koshiyambelo neshambekela lyu udha lyiitsinino noku yi fala mEhala lyUuyapukielela.
13 Iitsinino ne yi tule momulilo koshipala shOmuwa, olwithi lwayo lu siikile oshisiikilo shoshikethahangano, opo kee shi mone a se.
14 Na kuthe ombinzi yimwe yongombe ondumentu note yi nagele nomunwe gwe komeho goshisiikilo e ta nagele onkwawo komeho goshikethahangano luheyali.
15 Konima yaambika na dhipage oshikombo sheyonondjambo lyoshigwana e ta fala ombinzi yasho mEhala lyUuyapukielela e te yi shashamine koshisiikilo nokomeho goshikethahangano.
16 Pahedhi ndjika na opaleke pamusindilo Ehala lyUuyapukielela koonyata dhAaisraeli nokomayono gawo agehe. Oye oku na oku shi ningila etsalihangano, oshoka oli li mokati kontanda ndjoka ya nyatekwa.
17 Okuza pethimbo ndyoka Aaron ta yi mEhala lyUuyapukielela, a ka tsakanithe eopaleko lyopamusindilo, sigo okethimbo ndyoka ta mana a ze mo, inamu kala nando omuntu metsalihangano. Ngele a tsakanitha eopaleko lyopamusindilo omolwe mwene naanegumbo lye nomolwegongalo alihe,
18 na pite mo e ta yi koshiyambelo shi li koshipala shOmuwa, opo e shi yapule. Na kuthe mombinzi yongombe ondumentu nomombinzi yoshikombo e te yi gogo kooniga adhihe dhoshiyambelo.
19 Na nagele ombinzi yimwe koshiyambelo nomunwe gwe luheyali. Pahedhi ndjika ote shi yelitha koonyata dhuulunde wAaisraeli e te shi yapula.
20 Aaron sho a mana okutsakanitha omisindilo dhokuyelitha Ehala lyUuyapukielela, etsalihangano alihe noshiyambelo, nena na ete po oshikombo shoka shi na omwenyo sha hogololelwa Asasel.
21 Na tenteke iikaha ye komutse gwoshikombo e ta hempulula uuwinayi auhe noondjo adhihe niikulumuna ayihe yAaisraeli. Osho ngaaka te yi tenteke komutse gwoshikombo. Nena omuntu ngoka a uthilwa oku shi ninga, na tidhile oshikombo kombuga.
22 Oshikombo otashi humbata po oondjo dhawo adhihe noku dhi fala kokuma kwa mbugala.
23 Nena Aaron ne ye metsalihangano, a hule mo oonguwo dhuuyambi ndhoka a zalele, manga inaa ya mEhala lyUuyapukielela, e te dhi thigi mo.
24 Na yoge olutu lwe aluhe mehala eyapuki e ta zala oonguwo dhe dhoshito. Konima yaambika na ze mo e ta yamba efikilondjambo lyokukutha po oondjo dhe mwene nodhoshigwana.
25 Na lungunithile oofu dhoshimuna koshiyambelo, dhi ninge eyonondjambo.
26 Omulumentu ngoka a tidhile oshikombo kombuga, shi ye kuAsasel, na yoge oonguwo dhe ye ni iyoge olutu aluhe, manga inaa galukila montanda.
27 Ongombe ondumentu noshikombo sheyonondjambo mbyoka ombinzi yayo ya falelwe mEhala lyUuyapukielela okudhima po oondjo, nayi falwe kondje yontanda nokulungunithwa po. Ekunka, onyama niikwamela nayi lungunithwe po ayihe.
28 Ngoka te yi lungunitha po, na yoge oonguwo dhe ye ni iyoge olutu aluhe, manga inee ya montanda.
29 Omautho taga landula naga dhigininwe aluhe sigo aluhe. Mesiku etimulongo lyomwedhi omutiheyali Aaisraeli naakwiilongo ya kala mokati kawo naa idhilike iikulya yo inaa longa sha.
30 Esiku ndyoka otaa yelithwa koondjo dhawo adhihe, opo ya kale ya yogoka koshipala shOmuwa.
31 Esiku ndyoka nali kale eyapukilela kuyo, uuna ndoka taa idhilike iikulya noitaa longo nando osha. Eutho ndika nali dhigininwe aluhe sigo aluhe.
32 Omuyambimukuluntu ngoka a yapulwa nokwa yoololelwa a landule he moshilonga, na tsakanithe omisindilo dheyelitho. Na zale oonguwo dhuuyambi,
33 e ta tsakanitha omisindilo dhokuyelitha Ehala lyUuyapukielela netsalihangano alihe, oshiyambelo, aayambi naakwanegongalo ayehe.
34 Omautho ngaka naga dhigininwe aluhe sigo aluhe. Omisindilo nadhi gwanithwe lumwe omumvo kehe okuyelitha Aaisraeli koondjo dhawo adhihe. Osha ningwa, ngaashi Omuwa a lombwele Moses.
1 Natango Omuwa okwa lombwele Moses
2 a gandje kuAaron noyana nAaisraeli ayehe omautho ngaka.
3 Omuisraeli ngoka ta dhipaga ongombe nenge onzi nenge oshikombo, shi ninge ondjambo yOmuwa, te shi dhipagele palwe pwaa shi posheelo shetsalihangano, okwa yono ompango. Oye oku na ondjo yokutilahi ombinzi noita yalulilwa we maantu yaKalunga.
4
5 Ngashingeyi Aaisraeli naa etele ano Omuwa iimuna mbyoka ya li haye yi dhipagele momalundu. Naye yi ete komuyambi posheelo shetsalihangano e taye yi dhipagele po yi ninge omakwatathanondjambo gokuyambelwa Omuwa.
6 Omuyambi na shashamine ombinzi koombinga noombinga dhoshiyambelo posheelo shetsalihangano e ta lungunitha po oofu, dhi gandje ezimba lya nika nawa tali opalele Omuwa.
7 Aaisraeli inaa kala ya dhine Omuwa nokudhipagela iimuna yawo momalundu, ye yi yambele iikalungakombo. Naa dhiginine eutho ndika aluhe sigo aluhe.
8 Shaa ngoka gwomAaisraeli nenge maakwiilongo ya kala mokati kawo ta yamba efikilondjambo nenge ontselelandjambo
9 noite li eta posheelo shetsalihangano li yambelwe Omuwa, na dhimwe mo maantu yaKalunga.
10 Ngele oku na Omuisraeli nenge omukwiilongo a kala megongalo ta li onyama yi na ombinzi, Omuwa ote mu geele, nota dhimwa mo maantu yaKalunga.
11 Omwenyo gwomomayulu ogwa kala mombinzi. Omolwaashoka Omuwa a gandja oshipango tashi ti, ombinzi ayihe nayi tilwe koshiyambelo, yi yoge po oondjo dhoshigwana, ombinzi ndjoka yi na omwenyo, otayi yogo po oondjo.
12 Omolwaashoka Omuwa a lombwele Aaisraeli kutya inaku kala nando omuntu gwomuyo nenge omukwiilongo a kala mokati kawo ta li onyama yi na ombinzi.
13 Ngele oku na Omuisraeli nenge omukwiilongo a kala megongalo ta yewe oshiyamakuti nenge ondhila hayi liwa e te yi dhipaga, na kutule omunino, opo ombinzi yi ze mo, ye e yi file omavi.
14 Omwenyo gwomomayulu ogwa kala mombinzi, omolwaashoka Omuwa a lombwele Aaisraeli kutya inaa lya nando onyama yi na ombinzi, noshaa ngoka te yi li, ota dhimwa mo maantu yaKalunga.
15 Omuntu kehe, Omuisraeli nenge omukwiilongo, ngoka ta li onyama yoshinamwenyo shi isila nenge sha lika kiilikama, oku na okuyoga oonguwo dhe ye ni iyoge olutu aluhe, nota kala e na oshidhila sigo ongulohi,
16 Ngele ite shi ningi, nena ota pewa ondjo.
1 Omuwa okwa lombwele Moses a ti:
2 “Lombwela Aaisraeli to ti: ‘Ongame Omuwa Kalunga keni.
3 Inamu holela iilonga yAayegipiti, sho mwa li mokati kawo, nenge yaantu mboka ye li muKaanan, hoka tandi mu fala.
4 Vulikeni koompango dhandje, mu ninge shoka tandi mu lombwele. Ongame Omuwa Kalunga keni.
5 Landuleni iiholelwa noompango tandi dhi mu pe; ngele tamu shi ningi, otamu kala mu na omwenyo. Ongame Omuwa.
6 “ ‘Inapu kala omuntu ta hedha komukwawolela, opo a lale naye. Ongame Omuwa.
7 Ino sitha ho ohoni, u lale nanyoko; ino lala naye.
8 Ino lala nomukiintu gwaho; otashi sitha ho ohoni.
9 Ino lala namumwanyoko, na kale nee omumwaho, omuna gwaho nenge omuna gwanyoko, a valelwa maandjeni nenge palwe.
10 Ino lala nomuna gwomumwoye omumati nenge nomuna gwomumwoye omukadhona: otashi ku sitha ohoni.
11 Ino lala nomumwaho, oshoka a valwa kuho.
12 Ino lala nahogona, oshoka oye omukwawo gwaho.
13 Ino lala nanyokogona, oshoka oye omukwawo gwanyoko.
14 Ino sitha hogona omusamane ohoni, u lale nomukiintu gwe.
15 Ino lala noshitenya shoye, oshoka oye omukiintu gwomumwoye.
16 Ino lala nasuwala yoye, oye omukiintu gwomumwanyoko.
17 Ino lala nomuvongambelela gwoye nenge omuna gwomumati gwomuvongambelela. Oyo aakweni. Shika oshipwe oshinene.
18 Ino ushika suwala yoye, a ninge gumwe gwomaakiintu yoye, manga omumwayina ngoka wa hokana e na omwenyo.
19 “ ‘Ino lala nomukiintu e li komwedhi, oshoka kwa nika oshidhila.
20 Ino lala nomukiintu gwamukweni; otashi ku kwatitha oshidhila.
21 Ino gandja aamwoye ya yambelwe oshikalunga Molek, opo waa nyateke edhina lyOmuwa. Ongame Omuwa.
22 Hamulumentu ta lala nomulumentu mukwawo. Shika iihunalela.
23 Hamulumentu ta lala noshimuna, nenge omukiintu i igandje kusho, opo shi mu hambe. Shika oshipwelela.
24 “ ‘Inamu inyatekitha iilonga ya tya ngaaka ngaashi iigwana mbyoka ya kala moshilongo, manga ne inaamu ya mo; oyo tuu mbyoka Omuwa te ke yi tidha mo, opo ne mu ye mo.
25 Iilonga yawo oya nyateke oshilongo. Nomolwashoka Omuwa ta geele oshilongo notu umbitha mo aantu mboka ya kala mo.
26 Oya longo iitonditha ayihe mbyoka noya nyateke oshilongo, ihe ne inamu ya holela. Ne amuhe, Aaisraeli nenge aakwiilongo ya kala pune, dhiginineni oompango dhOmuwa nomautho ge.
27
28 Nena oshilongo itashi ke mu umba mo, ngaashi shu umbu mo iigwana mbyoka ya kala mo nale.
29 Ne omu shi lela kutya kehe ngoka ta longo oshikungitha shontumba shomwaambika, ita ka yalulilwa we maantu yaKalunga.
30 “ ‘Vulikeni ano komautho nde ga gandja ne inamu landula iilonga yaantu mboka ye mu tetekelele okukala moshilongo. Inamu inyateka mokulonga iilonga mbyoka. Ongame Omuwa Kalunga keni.’ ”
1 Omuwa okwa lombwele Moses a ti:
2 “Lombwela egongalo alihe lyaIsrael to ti: ‘Kaleni aayapuki, oshoka ngame Omuwa Kalunga keni omuyapuki.
3 Shaa ngoka na simaneke yina nahe ye na dhiginine Esabati lyandje, ngaashi nde mu uthile. Ongame Omuwa Kalunga keni.
4 “ ‘Inamu etha ndje, ne mu ka longele iimenka. Inamu ihambulila iikalunga yiiyela noku yi simaneka. Ongame Omuwa Kalunga keni.
5 “ ‘Ngele tamu yamba ekwatathanondjambo, dhiginineni omautho ngoka nde mu pa, ongame notandi li taamba.
6 Onyama oyi na okuliwa uuna oshimuna sha dhipagwa, nenge esiku tali landula. Onyama kehe tayi hupile esiku etitatu, nayi lungunithwe po.
7 Esiku etitatu oya nika oshidhila, nongele oku na ngoka te yi li, itandi ka taamba we eyambo ndyoka.
8 Shaa ngoka te yi li, ota pewa ondjo, oshoka okwa shundula shoka oshiyapuki shOmuwa, nota ka dhimwa mo maantu yandje.
9 “ ‘Uuna tamu teya omapya geni, inamu ga teya sigo okomunkulo, ne inamu ga pupula, nge mwa teya.
10 Inamu shuna kiitsambe yeni yomiviinu, mu ka toonone ko omakukila, nenge mu toole po omandjembele ngoka ga gwila pevi. Ga thigileni po oohepele naakwiilongo. Ongame Omuwa Kalunga keni.
11 “ ‘Inamu yaka, inamu kotokela, inamu fundja.
12 Inamu gana iifundja medhina lyandje, mu nyateke ngeyi edhina lyandje. Ongame Omuwa.
13 “ ‘Inamu hepeka mukweni ne inamu mu yuga. Oondjambi dhaalongeli yeni inadhi kala pune sigo esiku lyangula.
14 Inamu tuka ombolo ne inamu tulila omuposi epundukitho mondjila. Tileni ndje; ongame Omuwa Kalunga keni.
15 “ ‘Inamu goyokitha oohapu moompangu. Inamu popila ohepele nenge mu game komuyamba; utheni eutho lyu uka.
16 Omutotolombo tagu popi mukweni, inamu gu taandelitha, nongele gumwe e li mepupyu lyemakelo, popyeni shoka tasha ningi onzapo yoku mu popila. Ongame Omuwa.
17 “ ‘Inamu tonda omumwanyoko koomwenyo dheni. Guneni mukweni nomwenyo gu uka, opo mwaa itsike ondjo omolwe.
18 Mukweni inamu kala mu mu nine iikonene noku mu tonda, ihe holeni mukweni, ngaashi mu ihole ne yene. Ongame Omuwa.
19 “ ‘Vulikeni komautho gandje. Inamu hambitha ontsezi yoshimuna sholudhi lulwe. Inamu kuna oombuto dhomaludhi gaali mumwe. Inamu zala oonguwo dha tungithwa oongodhi dhomaludhi gaali.
20 “ ‘Ngele omulumentu ta lala nomukadhona omupika ngoka a uvanekwa a ka ninge omukiintu gwomulumentu gulwe, ihe nani ine mu futa, na geelwe, ihe ina dhipagwa, oshoka oye omupika gwe.
21 Omulumentu na ete onzi ondumentu kosheelo shetsalihangano, yi ninge ondjondjambo ye.
22 Omuyambi na tsakanithe nayo eopaleko lyokudhima po ondjo yomuntu ngoka, naKalunga ote mu dhimine po.
23 “ ‘Nge tamu ka ya mevi lyaKaanan e tamu tsike omiti dhi ili nodhi ili, iiyimati yadho yi taleni ya nika oshidhila omimvo ndatu dhopetameko. Methimbo ndyoka inamu yi lya tuu.
24 Momumvo omutine iiyimati ayihe nayi yoololelwe Omuwa, yi ninge ondjambo yoku mu hambelela.
25 Ihe momumvo omutitano otamu vulu okulya iiyimati mbyoka. Ngele otamu ningi ayihe mbika, omiti dheni otadhi ka ima iiyimati oyindji. Ongame Omuwa Kalunga keni.
26 “ ‘Onyama yi na ombinzi inamu yi lya nando. Inamu anekela ne inamu kala mu na uunganga.
27 Inamu ikulula omapalu, noombenzi dheni inamu dhi kulula omapalu.
28 Inamu ishata oonsha nenge mu kwegunyune omalutu geni mokulila oonakusa. Ongame Omuwa.
29 Inamu sitha aana yeni aakadhona ohoni, mu ya pitike okuninga oohonda dhomotempeli. Ngele tamu shi ningi, otamu longele iikalunga, nevi otali ka udha oluhondelo.
30 Dhiginineni Esabati ne mu simaneke ehala moka tandi longelwa. Ongame Omuwa.
31 “ ‘Inamu ya kaantu mboka haa pula aathithi nokoompulile. Ngele tamu shi ningi, otamu ikwatitha oshidhila. Ongame Omuwa Kalunga keni.
32 “ ‘Simanekeni aakulupe, ne mu yele aakuluntu yoomvi. Tileni Kalunga keni. Ongame Omuwa.
33 “ ‘Inamu hepeka aakwiilongo mboka ya kala mevi lyeni.
34 Kaleni nayo, ngaashi mu li nOmuisraeli omukweni. Kaleni mu ya hole, ngaashi mu ihole ne yene. Dhimbulukweni kutya ne omwa li aakwiilongo muEgipiti. Ongame Omuwa Kalunga keni.
35 “ ‘Inamu kotokela shaa ngoka mokulongitha iiyelekitho yiifundja yuule, yuudhigu nenge yiipindomwa.
36 Kaleni mu na oshiviha shi shi kwiinekelwa, oomasandjundo dhi shi kwiinekelwa niipindithomwa yi shi kwiinekelwa. Ongame Omuwa Kalunga keni nde mu tembudha muEgipiti.
37 Vulikeni koompango nokomautho gandje agehe. Ongame Omuwa.’ ”
1 Omuwa okwa lombwele Moses e ta ti:
2 “Lombwela Aaisraeli to ti: ‘Shaa ngoka gwomAaisraeli nenge gwomaakwiilongo ya kala mokati keni, ta gandja omwana a yambelwe Molek, na dhipagwe. Aantu naye mu dhipage nomamanya.
3 Shaa ngoka ta yambele Molek oyana e ta nyatekitha etsalihangano lyandje e ta sitha edhina lyandje eyapuki ohoni, otandi mu geele e ta dhimwa mo maantu yandje.
4 Aantu ngele otaa thithikile omeho gawo ye mu yaalela noitaye mu dhipaga,
5 ongame mwene tandi ikwatele ko, ndi geele omuntu ngoka nezimo lye alihe naayehe mboka inaa inekela ndje ya kala miihuna yaMolek. Otandi ke ya komba mo maantu yandje.
6 “ ‘Ngele oku na omuntu ti igandja kaathithi nokupula aakwampungu, a kwatathane nayo, otandi mu geele notandi mu dhimi mo maantu yandje.
7 Iyapuleni ne mu kale aayapuki, oshoka ongame Omuwa Kalunga keni.
8 Vulikeni koompango dhandje, oshoka ongame Omuwa notandi mu yapula.
9 “ ‘Shaa ngoka ta tuku he nenge yina, na dhipagwe; oshoka oye mwene i iyetele eso.
10 “ ‘Ngele oku na omulumentu ta hondele nomukiintu gwamukwawo, ayehe yaali naa dhipagwe.
11 Ngele oku na omulumentu te lala nomukiintu gwahe, ota siikulula epenge lyahe, onkee ayehe yaali naa dhipagwe. Oyo yi ilongele eso.
12 Ngele oku na omulumentu ta lala nomukiintu oshitenya she, ayehe yaali naa dhipagwe. Oya hunu noyi ilongele eso.
13 Ngele oku na omulumentu ta lala nomulumentu omukwawo, oya longo iikungitha; ayehe yaali naa dhipagwe.
14 Ngele oku na omulumentu ta hokana omukiintu nomuvongambelela gwe, ayehe yatatu naa fikwe po ya se, oshoka oya longo iihuna; iinima ya tya ngaaka inayi pitikwa mokati keni.
15 Ngele oku na omulumentu ta lala noshinamwenyo, na dhipagwe pamwe noshinamwenyo.
16 Ngele oku na omukiintu ti igandja koshinamwenyo shi mu hambe, na dhipagwe pamwe noshinamwenyo. Oyi ilongele eso.
17 “ ‘Ngele oku na omulumentu ta hokana omumwayina nenge omumwahe e ta tala epenge lye, shika oshiponga. Naa dhimwe mo montaneho yoshigwana. Okwa siikulula epenge lyomumwayina; ota pulwa ondjo ye.
18 Ngele oku na omulumentu a lala nomukiintu e li komwedhi, ayehe yaali naa kondwe mo megongalo, oshoka oya yono omautho gomisindilo dhiidhila.
19 “ ‘Ngele oku na omulumentu ta lala nayinagona omukiintu nenge hegona omukiintu, ayehe yaali naa hepekelwe ondjo yombinzi ndjoka.
20 Ngele oku na omulumentu ta lala nomukiintu gwahegona omusamane nenge nomukiintu gwahekulu, ota sitha hegona nenge hekulu ohoni, noye nomukiintu otaa pewa ondjo; otaa si inaa vala.
21 Ngele oku na omulumentu ta hokana suwala ye, otaa kala inaa vala. Okwa longo iihuna nokwa sitha omumwayina ohoni.
22 “ ‘Dhiginineni oompango dhandje adhihe nomautho gandje, opo mwaa tidhwe mo mevi lyaKaanan, moka tandi ke mu fala.
23 Inamu taamba oohedhi dhaantu mboka ya kala mo; otandi ke ya tidha mo, opo mu ye mo mevi. Oya nyanyalitha ndje niilonga yawo iiwinayi.
24 Evi ndika lya tondoka omahini nomagadhi goonyushi, onde li mu uvanekele li ninge eliko lyeni. Otandi li mu pe. Ongame Omuwa Kalunga keni. Onde mu yoolola miigwana yilwe.
25 Onkee ano yoololeni iinamwenyo ya yela naambyoka ya nyata, noondhila dha yela naandhoka dha nyata. Inamu lya iinamwenyo nenge oondhila dhoshidhila. Onde yi yoolola ayihe, opo mwaa inyateke.
26 “ ‘Kaleni aayapuki yandje awike, oshoka ongame Omuwa, ngame omuyapuki. Ongame nde mu yoolola miigwana yilwe, opo mu ninge yandje ngame awike.
27 “ ‘Ngele oku na omulumentu nenge omukiintu ha pula aathithi nenge e na ombepo yuunganga, na dhipagwe nomamanya. Oye okwi ilongele eso.’ ”
1 Omuwa okwa lombwele Moses a lombwele aana yaAaron aayambi a tye: “Hamuyambi ti inyateke tuu nande, a ye komafumviko goonakusa,
2 kakele kayina, he, omwanamati, omwanakadhona, omumwayina omulumentu
3 nenge omumwayina omukiintu inaa hokanwa a kala maandjawo.
4 Ini ikwatitha oshidhila peso lyomukwezimo.
5 “Kape na omuyambi ti ikulula epalu nenge a kulule oombenzi dhe epalu nenge i ishatithe molutu.
6 Na kale omuyapuki noina sitha edhina lyandje ohoni. Oha yambele ndje oondjambo dhiikulya, noku na okukala omuyapuki.
7 Omuyambi ke na okuhokana omukiintu ohonda nenge omukiintu kee shi omukadhonalela nenge omukulukadhi a hengwa; omuyambi oye omuyapuki.
8 Aantu naa tale omuyambi kutya omuyapuki, oshoka ota yambele ndje oondjambo dhiikulya. Ongame Omuwa, ngame omuyapuki notandi yapula aantu yandje.
9 Ngele ope na omuna gwomuyambi omukiintu ta ningi ohonda, ota sitha he ohoni; na fikwe po a se.
10 “Omuyambimukuluntu, ngoka a tilwa omagadhi gokugwaya komutse nokwa yapulilwa okuzala oonguwo dhuuyambi, ina etha nando omafufu ge ga shindalale nenge a tuule oonguwo dhe mokulila oosa.
11 Ina hedha komudhimba, nando nagu kale ogwahe nenge gwayina, ini ikwatitha oshidhila.
12 Ina pita mo metsalihangano a ye komudhimba, opo kaa nyateke etsali eyapuki lyaKalunga ke, oshoka eyapulo lyomagadhi gokugwaya gaKalunga ke oli li kuye. Ongame Omuwa.
13 Na hokane omukadhonalela,
14 hamuselekadhi nenge omukulukadhi a hengwa nenge omukiintu ohonda. Na hokane ashike omukadhonalela gwomoludhi lwe mwene,
15 opo kaa nikithe oluvalo lwe oshidhila. Ongame Omuwa nonde mu yoolola a ninge omuyambimukuluntu.”
16 Omuwa okwa lombwele Moses ta ti:
17 “Lombwela Aaron to ti: ‘Kape na gumwe gwomoluvalo lwoye ngoka e na oshipo molutu lwe, ta vulu okuyambela ndje oondjambo dhiikulya. Shika otashi kala aluhe sigo aluhe.
18 Kape na omuntu e na oshipo ta yamba oondjambo, ngele omuposi, oshilema, e na oshipo moshipala nenge molutu,
19 Oshintimbukugulu nenge oshintimbukaha,
20 omuntu a tya okankundundu nenge eyungu, e na omeho goongala, olwaga, oshilundu nenge omatupa ge ga mona oshiponga.
21 Kape na omuntu gwomoluvalo lwaAaron ta ningi omuyambi ngoka e na oshipo molutu, a yambele ndje oondjambo dhiikulya.
22 Omuntu a tya ngaaka ota vulu ngaa okulya iikulya ayihe ya yambelwa ndje, oondjambo dhiikulya oondjapuki noondjambo oondjapukilela.
23 Ihe oshoka e na oshipo molutu lwe, ina hedha ketopolitho eyapuki nenge koshiyambelo. Oye kee na okushundula iinima yandje iiyapuki, oshoka ongame Omuwa, ongame tandi yi yapula.’ ”
24 Moses okwe shi lombwele Aaron noyana nosho wo Aaisraeli ayehe.
1 Omuwa okwa lombwele Moses
2 a lombwele Aaron noyana ta ti: “Kwateni nesimaneko oondjambo oondjapuki ndhoka Aaisraeli taa yoololele ndje, opo mwaa sithe edhina lyandje eyapuki ohoni. Ongame Omuwa.
3 Ngele ope na ngoka gwomoluvalo lweni a nyata, ihe ota hedha koondjambo ndhoka Aaisraeli ye dhi yoololele ndje, na dhimwe po koshipala shandje. Shika otashi kala aluhe sigo aluhe.
4 “Kape na ngoka gwomoluvalo lwaAaron e na oshilundu nenge ehiho lyomayoyo muulumentu, ta li oondjambo oondjapuki sigo aluhe. Omuyambi kehe ota kwata oshidhila, ngele ta gumu sha sha nyatekwa komudhimba nenge ta zi omasita goluvalo
5 nenge ta gumu oshinamwenyo sha nyata nenge omuntu a nyata.
6 Omuyambi kehe ngoka ta kala a nika oshidhila, ota kala nasho sigo ongulohi, nongele osho e li ngeyi, ina lya nando oondjambo oondjapuki, sigo i iyogo olutu aluhe.
7 Etango nge lya ningine, ota kala a yela nota vulu ihe okulya oondjambo oondjapuki, ndhoka iikulya ye.
8 Ina lya onyama yoshinamwenyo shi isila nenge sha lika kiilikama; otayi mu kwatitha oshidhila. Ongame Omuwa.
9 “Aayambi ayehe oye na okudhiginina omautho ngoka nda gandja. Ngele itaye ga dhiginine ya vulike komautho omayapuki, otaa si. Ongame Omuwa, ongame tandi ya yapula.
10 “Aayambi ayeke taa li oondjambo oondjapuki, hagulwe, nando oku li megumbo lyomuyambi nenge he mu longele.
11 Ihe aapika yomuyambi mboka a landa niimaliwa ye mwene nenge ya valelwa maandjawo, otaa vulu okulya iikulya yomiikulya ye.
12 Omuna omukadhona gwomuyambi ta hokanwa komulumentu kee shi omuyambi, ina lya oondjambo oondjapuki.
13 Ihe omwana omuselekadhi nenge a hengwa, ndele ke na aanona, ngele okwa shuna a kale megumbo lyahe ngaashi muugundjuka we, ota vulu oku dhi lya. Oluvalo aluke lwomuyambi otalu vulu oku dhi lya.
14 “Ngele omuntu gulwe ta li sha mondjambo ondjapuki mokwaashiwo, na fute omuyambi ondjele ya gwedhwa oshititano.
15 Aayambi kaye na okushundula oondjambo oondjapuki,
16 ye ethe omuntu gulwe e dhi lye; shika otashi eta ondjo negeelo komuntu ngoka. Ongame Omuwa, ongame tandi dhi yapula.”
17 Omuwa okwa lombwele Moses
18 a pe Aaron noyana nAaisraeli ayehe omautho ngaka. Omuisraeli nenge omukwiilongo e li muIsrael ngoka te eta efikilondjambo, ongele okugwanitha euvaneko nenge ta yamba pahalo lye mwene,
19 ne ete oshimuna oshilumentu shaa na oshipo, opo shi taambwe.
20 Ngele otamu yamba oshimuna shi na oshipo, Omuwa ite shi taamba.
21 Ngele oku na ngoka te etele Omuwa ekwatathanondjambo, ongele okugwanitha euvaneko nenge ta yamba pahalo lye mwene, oshimuna nashi kale shaa na oshipo, ngele tashi taambwa.
22 Inamu yambela Omuwa oshimuna oshiposi nenge oshilema nenge shi na oshilalo nenge oshitumba, oluthingwe nenge olwaga. Iimuna ya tya ngaaka inamu yi yambela koshiyambelo, yi ninge oondjambo dhiikulya.
23 Oshimuna shoka inaashi shitika nenge oshilema oto vulu ngaa okuyamba pahalo lyoye mwene, ihe kashi shi kutaambwa megwanitho lyeuvaneko.
24 Inamu yambela Omuwa oshimuna shoka shi na omatupa ga thengenyenwa, sha tetwa, sha nyankagulwa nenge sha tuulwa omatupa. Shika inashi ziminwa mevi lyeni.
25 “Inamu yamba oshimuna mwe shi landa komukwiilongo. Iimuna ya tya ngaaka otayi talwa yi na oshipo noitayi taambwa.”
26 Omuwa okwa lombwele Moses a ti:
27 “Okatana nenge okanzona nenge okakombwena ngele ka valwa, naka kale puyina omasiku gaheyali, ihe mesiku etihetatu otaka vulu okuyambwa notaka opalele Omuwa.
28 Ongombe ino yi yambela pamwe nokatana kayo, osho wo onzi nokanzona kayo nenge oshikombo nokakombwena kasho mesiku limwe.
29 Uuna tamu yamba epandulondjambo kOmuwa, landuleni omautho, opo li taambwe;
30 li lyii po esiku ndyoka ne mwaa hupithile sha esiku lyangula.
31 “Vulikeni kiipango yandje ne mu yi landule. Ongame Omuwa.
32 Inamu nyateka edhina lyandje eyapuki. Aaisraeli ayehe oye na okutseya kutya ngame omuyapuki. Ongame Omuwa, ongame tandi mu yapula,
33 nonde mu tembudha muEgipiti, ndi ninge Kalunga keni. Ongame Omuwa.”
1 Omuwa okwa pe Moses
2 omautho taga landula gomatango omanene, uuna Aaisraeli taa gongala melongelokalunga.
3 Iilonga nayi longwe momasiku gahamano, ihe esiku etiheyali olyo Esabati, esiku lyevululuko. Esiku ndyoka inamu longa iilonga, ihe gongaleni melongelokalunga. Esabati olyOmuwa, shaa mpoka mwa kala.
4 Ngaka ogo omasiku gomatango omanene gOmuwa mu na oku ga tseyitha pomathimbo gago.
5 Opaasa yokusimaneka Omuwa otayi tameke peningino lyetango mesiku etimulongo netine lyomwedhi gwotango.
6 Mesiku etimulongo netitano lyomwedhi ngoka Oshituthi shiikwiila inaayi tulwa efulika otashi tameke, nomomasiku gaheyali inamu lya iikwiila ya tulwa efulika.
7 Mesiku lyotango lyomomasiku ngaka gongaleni kelongelokalunga nokape na omuntu ta longo sha.
8 Yambeni oondjambo dhiikulya kOmuwa momasiku gaheyali. Mesiku etiheyali gongaleni ishewe kelongelokalunga, ihe inamu longa sha.
9 Omuwa okwa popi naMoses a ti:
10 “Lombwela Aaisraeli u tye: ‘Ngele mwa thiki mevi ndyoka tandi li mu pe, e tamu teya iilya yamo, ondudhi yotango yiilya yoshipe sheni yi eteni komuyambi.
11 Ote yi dhugadhuga koshipala shOmuwa, opo mu opalele Omuwa. Omuyambi ote yi dhugadhuga mesiku lya landula Esabati.
12 Esiku ndyoka ondjambo yeni yiilya tayi dhugwadhugwa, yambeni onzigona ondumentu yomumvo gumwe yaa na oshipo, yi ninge efikilondjambo kOmuwa.
13 Pamwe nayo gandjeni omakopi gane guusila womunziya mwa tulwa omagadhi gooholivi, u ninge ondjambo yiikulya yi na ezimba lya nika nawa lyo opalela Omuwa. Yambeni wo oshinuwandjambo sholita yimwe yomaviinu.
14 Iilya iipe inamu yi lya iiyihu nenge ya kangwa nenge oshikwiila shayo sha yothwa, sigo mwa yamba tango ondjambo ndjika kuKalunga. Eutho ndika oli na okulandulwa komaluvalo geni agehe aluhe sigo aluhe.’ ”
15 “ ‘Yaluleni iiwike yu udha iheyali okuza kesiku lya landula Esabati, uuna ndoka mwe eta ondudhi yiilya mu yi yambele Omuwa.
16 Mesiku etimilongontano, esiku lya landula Esabati etiheyali, otamu yambele Omuwa ondjambo yiilya iipe.
17 Egumbo kehe nali ete iikwiila iyali yokudhugadhugwa. Iikwiila mbika nayi ningwe momakopi gane guusila womunziya mwa tulwa efulika notayi pewa Omuwa yi ninge ondjambo yiilya yotango opo yi teywe.
18 Pamwe noshikwiila egongalo nali yambe oonzigona heyali dhomumvo gumwe, ongombe yimwe ondumentu yomutanda niikombo iyali; ayihe nayi kale yaa na oshipo. Nayi ninge efikilondjambo kOmuwa pamwe nondjambo yiikulya noshinuwandjambo. Ondjambo ndjika oyi na ezimba lya nika nawa tali opalele Omuwa.
19 Yambeni eyonondjambo lyoshikombo oshilumentu nekwatathanondjambo lyoonzigona mbali oondumentu dhomumvo gumwe.
20 Omuyambi na dhugadhuge oshikwiila shoshipe noonzigona mbali oondumentu koshipala shOmuwa. Oondjambo ndhika oondjapuki dhOmuwa otadhi ningi dhaayambi.
21 Esiku ndyoka inamu longa, ihe gongaleni kelongelokalunga. Omaluvalo geni naga landule omautho ngaka aluhe sigo aluhe.
22 “ ‘Uuna tamu teya omapya geni, inamu ga teya sigo okomunkulo, ne inamu ga pupula, nge mwe ga teya; ga thigilii po oohepele naakwiilongo. Ongame Omuwa Kalunga keni.’ ”
23 Omuwa okwa lombwele Moses a ti:
24 “Lombwela Aaisraeli to ti: ‘Esiku lyotango lyomwedhi omutiheyali li ningeni esiku lyevululuko, esiku lyedhimbuluko lyokuhika omankuma tamu gongala kelongelokalunga.
25 Inamu longa sha esiku ndyoka. Yambeleni Omuwa ondjambo yiikulya.’ ”
26 Omuwa okwa lombwele Moses e ta ti:
27 “Esiku etimulongo lyomwedhi omutiheyali olyo esiku lyegeyulukitho. Nena ningeni oshigongi oshiyapuki, idhilikeni iikulya nokweetela Omuwa ondjambo.
28 Inamu longa nando osha mesiku ndyoka, oshoka olyo esiku lyegeyulukitho lyokukutha po oondjo dheni koshipala shOmuwa.
29 Shaa ngoka iti idhilike iikulya esiku ndyoka, ota dhimwa mo maantu yaKalunga.
30 Naangoka ta longo sha esiku ndyoka, Omuwa oye mwene te mu dhipaga.
31 Eutho ndika nali dhigininwe sigo aluhe komaluvalo geni shaa mpoka ge li.
32 Okuza keningino lyetango mesiku etimugoyi sigo okeningino lyetango lyesiku etimulongo taleni esiku ndika lyevululuko nolyeidhiliko lyiikulya.”
33 Omuwa okwa lombwele Moses a ti:
34 Lombwela Aaisraeli u tye Mesiku etimulongo netitano lyomwedhi omutiheyali oku na oshituthi shomatsali giihwa iitalala shomasiku gaheyali.
35 Mesiku lyotango lyomomasiku ngaka gongaleni kelongelokalunga ne inamu longa sha.
36 Esiku kehe lyomomasiku gaheyali yambeni ondjambo yiikulya. Mesiku etihetatu gongaleni okuhulitha oshituthi e tamu yamba ondjambo yiikulya. Osho oshigongi oshiyapuki, inamu longa sha.
37 (Ngaka ogo omatango omanene moka tamu gongala okusimaneka Omuwa e tamu yamba oondjambo: omafikilondjambo, oondjambo dhiikulya, oontselelandjambo niinuwandjambo, ngaashi tadhi pumbiwa esiku nesiku.
38 Omatango ngaka omanene oga gwedhwa kOmasabati goshito, noondjambo ndhika otadhi gwedhelwa koondjambo dheni dhoshito, oondjambo dhegwanitho lyomauvaneko noondjambo dhopahalo lyeni ndhoka tamu pe Omuwa.)
39 “ ‘Uuna mwa teya omapya geni, dhaneni oshituthi shika omasiku gaheyali tashi tameke mesiku etimulongo netitano lyomwedhi omutiheyali. Esiku lyotango olyo esiku lyevululuko lya sheywa, nesiku etihetatu osho wo.
40 Mesiku lyotango toononeni iiyimati iiwanawa komiti dheni, kutheni iiyale yomilunga niitayi yomiti dha hapa e tamu tameke okudhana oshituthi tamu simaneke Omuwa Kalunga keni.
41 Shi dhaneni omasiku gaheyali. Eutho ndika nali dhigininwe koluvalo lweni aluhe sigo aluhe.
42 Aaisraeli ayehe naa kale momatsali omasiku gaheyali,
43 opo oluvalo lweni lu tseye kutya Omuwa okwa kaleke aantu ye momatsali, sho a li te ya enditha moku ya tembudha muEgipiti. Ongame Omuwa Kalunga keni.’ ”
44 Moses okwa pe Aaisraeli omautho gomatango ngaka omanene gokusimaneka Omuwa.
1 Omuwa okwa lombwele Moses
2 a gandje kAaisraeli omautho ngaka. Eteleni oolamba dhoshihukikwanyeka omagadhi omayelele gooholivi, opo omulilo gu kale gwa tema aluhe.
3 Ongulohi kehe Aaron ne dhi hwameke metsalihangano, pondje yetopolitho, ndyoka li li komeho goshikethahangano, opo dhi minikile montaneho yOmuwa okuza ongulohi sigo taku shi. Eutho ndika oli na okudhigininwa koluvalo noluvalo aluhe sigo aluhe.
4 Aaron na sile oolamba dhomoshihukikwanyeka shoshingolilela oshimpwiyu nokutala kutya odha tema aluhe koshipala shOmuwa.
5 Kutha uusila womunziya e to ningi iikwiila ya mbumbwakana omulongo niiyali. Moshikwiila kehe namu kale uusila womakopi gane.
6 Iikwiila yi tula moondongelwa mbali, iikwiila ihamano mondongelwa kehe ya tentekwa koshitaafula shoshingoli sho shene, shoka shi li koshipala shOmuwa.
7 Kombanda yondongelwa kehe tula ko iitsinino, yi ninge ombinga ndjoka tayi yambelwa koshiyambelo peha lyiikwiila.
8 Esabati kehe aluhe sigo aluhe iikwiila mbika nayi tulwe koshipala shOmuwa. Oyo omagano Aaisraeli taye ga gandja aluhe sigo aluhe.
9 Iikwiila otayi ningi yaAaron noyana. Oyo naye yi lile mehala eyapuki, oshoka oyo iiyapukilela. Oyo oshipewa shaaluhe tashi zi moondjambo tadhi yambelwa Omuwa.
10 Montanda yAaisraeli omwa li omulumentu a zi maandjawo muEgipiti e te ende pamwe nAaisraeli. Yina, omukulukadhi Omuisraeli, ihe he Omuegipiti. Edhina lyayina oShelomit yaDibri gwomezimo lyaDan. Omulumentu nguka okwa tameke okutamanana nomulumentu Omuisraeli. Okwa sheke edhina lyOmuwa nokwe li tuku. Nena oye mu eta kuMoses.
11
12 Oye mu tula moonkandja ya tegelela eutho lyOmuwa.
13 Omuwa okwa lombwele Moses a ti:
14 “Kutha mo omuntu ngoka montanda. Shaa ngoka e mu uvile ta sheke, na tenteke oshikaha she komutse gwe, shi mu ningile onzapo. Nena egongalo alihe nali mu dhipage nomamanya.
15 Lombwela nduno Aaisraeli kutya shaa ngoka ta sheke Kalunga, ota pewa ondjo
16 nota dhipagwa. Omuisraeli kehe nomukwiilongo kehe a kala muIsrael ta sheke Omuwa, ota dhipagwa nomamanya kegongalo alihe.
17 “Oongoka ta dhipaga omuntu, na dhipagwe,
18 noshaa ngoka ta dhipaga oshimuna shaantu, oku na oku shi futa — omwenyo omomwenyo.
19 “Ngele oku na omuntu ta monitha mukwawo oshiponga, shoka a ningi mukwawo, osho na ningwe wo.
20 Ngele okwe mu teya esipa, esipa lye nali teywe; ngele okwe mu tsipula eho, eho lye limwe nali tsipulwe mo; ngele okwe mu kula eyego, eyego lye limwe nali kulwe mo. Ano shoka a ningile mukwawo, osho naanaa na ningilwe.
21 Shaa ngoka a dhipaga oshimuna, ne shi fute, ihe ngele okwa dhipaga omuntu, na dhipagwe.
22 Ompango oyimwe kune amuhe, Aaisraeli nenge aakwiilongo ya kala mokati keni, oshoka ongame Omuwa Kalunga keni.”
23 Moses sho a lombwele Aaisraeli oohapu ndhika, oya fala omulumentu ngoka kondje yontanda e taye mu dhipaga nomamanya. Aaisraeli oya gwanitha shoka Omuwa a lombwele Moses.
1 Omuwa okwa popi naMoses kondundu Sinai,
2 a gandje kAaisraeli omautho taga landula. Uuna tamu ka thika mevi ndyoka mwe li pewa kOmuwa, evi nali ningile Omuwa Esabati momumvo omutiheyali.
3 Momimvo hamano kuneni omapya geni, nomomimvo hamano opalekeni iitsambe yeni yomiviinu ne mu likole iiyetwamo yayo.
4 Ihe omumvo omutiheyali ogwo omumvo gwevululuko lyevi, omumvo gwa yapulilwa Omuwa. Inamu kuna omapya geni ne inamu opaleka iitsambe yeni yomiviinu.
5 Iilya mbyoka yi imenitha, inamu yi teya ne inamu likola omahila gomiviinu inaadhi opalekwa. Nguka ogwo omumvo gwevululuko lyevi.
6 Evi nali kale inaali longwa momumvo ngoka, otali mene iilya yoye noyaapika yoye, aalongeli yoye naakwiilongo ya kala mokati keni,
7 iimuna yoye niiyamakuti momalundu geni. Ashihe shoka tashi mene mo, iipalutha yayo.
8 Yaluleni omimvo heyali lwomimvo heyali, opo omimvo dhi ninge omilongo ne nomugoyi.
9 Nena mesiku etimulongo lyomwedhi omutiheyali hikitheni enkuma; mesiku lyegeyulukitho enkuma nali hikwe mevi alihe.
10 Yoololeni omumvo omutimilongontano e tamu igidha emanguluko lyaakalimo ayehe mevi. Omumvo nguka nagu kale omumvo gweligolo. Omaliko agehe ngoka ga landwa, naga shune kooyene nenge koyana, naangoka a landwa omupika, na shune koyaandjawo.
11 Inamu kuna omapya geni nenge mu teye iilya yi imenitha yo yene e tayi koko nenge mu likole omandjembele momiviinu dheni inaadhi opalekwa.
12 Omumvo aguhe otagu mu ningile omuyapuki; otamu li owala iilya mbyoka yi imenitha yo yene.
13 Momumvo nguka omaliko ngoka ga landwa, oge na okushuna kooyene yonale.
14 Uuna tamu landitha po omapya kAaisraeli ooyakweni nenge tamu ga landa kuyo, inamu thindilathana kongundhi.
15 Ondando nayi yelekwe nomimvo ndhoka epya tali vulu okugandja iilya sigo okomumvo gweligolo.
16 Ngele oku na omimvo odhindji, ondando otayi londo, ihe ngele oku na owala omimvo omishona, ondando otayi kuluka, oshoka shoka tashi landithwa po, iilya mbyoka tayi ka mena mepya moka.
17 Ino kotokela mukweni, tila Kalunga koye; oshoka oye Omuwa Kalunga koye.
18 Vulikeni koompango dhOmuwa adhihe nokomautho ge agehe, opo mu kale mu na ombili moshilongo.
19 Evi otali menitha iilya, notamu ka mona iikulya ya gwana po e tamu kala mu na ombili.
20 Ihe otashi vulika tamu pula tamu ti: “Oshike tashi ka liwa momumvo omutiheyali, omapya sho inaaga kunwa ko kwaa na eteyo?”
21 Omuwa ota yambeke evi momumvo omutihamano, li menithe iikulya ya gwana omimvo ndatu.
22 Sho tamu kunu omapya geni momumvo omutihetatu, otamu ka lya natango shoka mwa kunine momumvo omutihamano; otamu ka kala mu na iikulya ya gwana sigo tamu teya iilya momumvo omutimugoyi.
23 Omapya inaga landithwa po sigo aluhe, oshoka evi kali shi lyoye, olyaKalunga. Ngoye omukwiilongo ngoka a zimininwa oku li longitha.
24 Uuna epya tali landithwa po, uuthemba woshito wamwene gwalyo nau dhimbulukiwe.
25 Omuisraeli ngele ta shunduka a ninge ohepele e tashi mu thiminike a landithe po epya lye, omunezimo gwe gwomekota ne ke li landulule ko.
26 Omuntu ngoka kee na omunezimo gwomekota gwoku li landulula ko, ngele ota ningi omuyamba, e ke li landulule ko ye mwene,
27 na yalule omimvo ndhoka dha piti okuza kelandithopo lye, opo a fute omuntu ngoka e li landa iisimpo mbyoka tayi gwana sigo okomumvo gweligolo tagu ya. Nena ote li mono ishewe.
28 Ihe ngele ke na iimaliwa e li landulule ko, epya otali kala miikaha yaangoka e li landa sigo okomumvo gweligolo. Momumvo ngoka otali shuna kumwene gwalyo.
29 Ngele oku na omuntu ta landitha po egumbo li li moshilandohote, oku na uuthemba e ke li landulule ko omumvo gwotango gu udha okuza kesiku ndyoka lya landithwa po.
30 Ihe ngele ite li landulula ko momumvo ngoka, ota kanitha uuthemba woku li monununa. Egumbo otali ningi eliko lyanakulanda noluvalo lwe; itali ka galuka we omumvo gweligolo.
31 Ihe omagumbo ngoka ge li momikunda, naga ningwe ngaashi omapya; mwene e na uuthemba woku ga landulula notaga shuna omumvo gweligolo.
32 Ihe Aalevi naa kale ye na uuthemba waaluhe wokulandulula omagumbo miilando mbyoka ye yi pewa.
33 Ngele egumbo otali landithwa kOmulevi lyo inali landululwa we, nali shune momumvo gweligolo, oshoka omagumbo miilando yAalevi ogo eliko lyawo yene mokati kAaisraeli.
34 Ihe omaunapelo ga kunduka iilando yAalevi, inaga landithwa po; ogo eliko lyawo aluhe.
35 Ngele omushiinda gwoye Omuisraeli omukweni ta ningi ohepele ye ita vulu okwiikwatha, ou na oku mu kwatha ngaashi wo omukwiilongo nenge omuntu a kala maandjeni.
36 Ino mu pula ontanitho, ihe tila Kalunga nou kaleke omukweni pungoye.
37 Miimaliwa mbyoka te ku hehela, ino mu pula ontanitho nenge elikolo kiikulya mbyoka we yi mu landitha.
38 Oshipango shika oshOmuwa Kalunga keni, ngoka e mu tembudha muEgipiti, opo e mu pe evi lyaKaanan ye a ninge Kalunga keni.
39 Ngele Omuisraeli omukweni a kala pungoye ta hepa noti ilanditha po kungoye, a ninge omupika, ino mu longitha papika.
40 Na kale pungoye omulongeli gwoye note ku longele sigo okomumvo gweligolo.
41 Nena nge gwa thiki, ota manguluka pamwe noyana e ta shuna kaandjawo keliko lyoohekulu.
42 Aaisraeli oyo aapika yOmuwa, ngoka e ya tembudha muEgipiti, itaa landithwa po aapika.
43 Ino ya pangela nonyanya, ihe tila Kalunga.
44 Ngele owa pumbwa omupika, mu landa kiigwana yopuushiinda woye.
45 Otamu vulu wo okulanda aana yaakwiilongo mboka ya kala mokati keni. Aanona mboka ya valelwa mevi lyeni, otaa vulu ya ninge yeni,
46 notamu vulu oku ya thigila aana yeni ya ninge eliko lyawo noku ya longela mokukalamwenyo kwawo akuhe. Ihe Omuisraeli ino mu pangela nonyanya.
47 Omukwiilongo a kala mokati keni ngele ta yambapala, manga Omuisraeli omukweni ta thigonapala e ti ilanditha po, a ninge omupika komukwiilongo nenge komuntu gwaandjawo,
48 Omuisraeli oku na uuthemba wokumangululwa. Gumwe gwomaamwayina
49 nenge hekulu nenge gwaantsezi ye nenge omunezimo gulwe gwomekota ota vulu oku mu mangulula a shune; nenge ngele okwi iyadha ye mwene, ota vulu okwiikulila ko.
50 Na pule omayele komulandi gwe, oyo notaa yalula omimvo okuza kethimbo, uuna i ilanditha po sigo okomumvo gweligolo, e ta yeleke iikulila pandjele yondjambi yokufuta omuntu gwomiilonga.
51 Na fute oshitopolwa shoka shondando ye shi thike pomwaalu gwomimvo ndhoka dha thigala ko okwaadha omumvo gweligolo.
52
53 Iikulila nayi yalulwe pandjele ndjoka omuntu ta longele ondjambi. Ihe mwene gwe na kale itee mu pangele nonyanya.
54 Ngele ita mangululwa pamukalo nguka, na ka mangululwe pamwe noyana momumvo gweligolo tagu ya.
55 Omuisraeli ita vulu okukala omupika aluhe, oshoka Aaisraeli oyo aapika yOmuwa. Okwe ya tembudha muEgipiti. Oye Omuwa Kalunga kawo.
1 “Inamu iningila iimenka nenge mu idhikile iiyelekela, oongundhimanya nenge omamanya ga hongwa, mu ga tsile oongolo. Ongame Omuwa Kalunga keni.
2 Dhiginineni Esabati lyandje ne mu simaneke ehala mpoka handi simanekelwa. Ongame Omuwa.
3 “Ngele otamu ende paipango yandje e tamu vulika komautho gandje,
4 otandi mu lokithile omvula pethimbo lyo opala, opo evi li menithe iilya nomiti dhi ime iiyimati.
5 Iilya yeni otayi ka ninga oyindji notamu ka yungula iilya sigo opethimbo lyokulikola omandjembele notamu ka likola omandjembele sigo opethimbo lyokukuna iilya. Otamu ka mona iikulya ya gwana po notamu ka kala mu na ombili moshilongo.
6 “Otandi mu pe ombili mevi lyeni, notamu ka kotha mwaa na omahalutho gasha. Otandi ke mu mangulula miiponga yiilikama moshilongo, noitaku ka kala we iita.
7 Otamu ka sinda aatondi yeni;
8 yatano yomune otaa ka tidha ethele, nethele lyomune otali ka sinda omayuvi omulongo.
9 Otandi ke mu yambeka noku mu pa oluvalo olwindji; otandi dhiginine ehangano ndyoka nda hangana nane.
10 Eteyo lyeni otali ka kala eloolo tali adha sigo okomumvo omukwawo, nando iigandhi tamu yi opalekele eteyo epe.
11 Otandi ka kala mokati keni metsalihangano lyandje, noitandi mu thigi po nando.
12 Otandi ka kala pamwe nane. Otandi ka ninga Kalunga keni, none aantu yandje.
13 Ongame, Omuwa Kalunga keni, nde mu tembudha muEgipiti, opo mwaa kale we aapika. Onda sindi oonkondo ndhoka dhe mu thindile pevi nonde mu enditha mwa thikameka omitse.”
14 “Iipango yandje ngele itamu yi dhiginine,
15 ihe otamu tindi okuvulika koompango dhandje nokomautho gandje e tamu yono ehangano lyetu nane,
16 otandi ke mu geela. Otandi mu undulile oshivu — omikithi dha nyengana nomalwiidhi tage mu tsikitha omeho e tage mu uvitha omwenyo omutoye. Otamu ka kuna oombuto dheni, ihe osima yowala, oshoka aatondi yeni otaye ke mu sinda e taa li po shoka mwa kokitha.
17 Otandi mu pilukile e tamu ka sindika, naamboka ye mu tonde, otaye ke mu pangela. Otamu ka haluka tamu pwampwauka, ko kwaa na ngo te mu tidha.
18 “Ngele natango itamu vulika kungame, otandi ka indjipalitha egeelo lyeni luheyali.
19 Otandi ka teyagula po omatha guuntsa weni; itaku ka lokwa we, evi lyeni notali ka sa oluteni e tali kolonda lya fa osheela.
20 Oonkondo dheni otadhi ka hepa, oshoka evi lyeni itali ka menitha we iimeno, nomiti itadhi ka ima we iiyimati.
21 “Ngele otamu tsikile natango okutangalala e tamu tindi okuvulika kungame, egeelo lyeni otandi li indjipalitha ishewe luheyali.
22 Otandi ka tuma iilikama hayi lyana mokati keni, notayi ka lya po aana yeni, tayi thekula po iimuna yeni notayi thigi po aashona yowala, nomapola geni taga mbugala.
23 “Ihe ngele natango konima yegeelo ndika inamu pulakena ndje, ndele otamu tsikile okwiinenepekela ndje,
24 nena otandi mu pilukile e tandi mu geele luheyali ndi vulithe ponale.
25 Otandi mu undulile iita, opo ndi mu geelele eyono lyehangano lyandje, nongele tamu gongala miilando mu holame, otandi ke mu tumina elega notamu ka gandjwa miikaha yaatondi yeni.
26 Otandi ka kutha po ondjundo yoondya dheni, opo aakulukadhi omulongo taa vulu okuninga oshikwiila shimwe ashike. Otaye shi topola, ihe nge mwe shi li, otamu kala mwa nkololoka.
27 “Konima yaambika ngele otamu tsikile natango okwiinenepekela ndje nokutinda okuvulika kungame,
28 nena mondjahi yandje otandi mu pilukile, negeelo lyandje otandi li ningi edhigu luheyali li vule nale.
29 Ondjala yeni otayi ka geya, sigo tamu li po aana yeni nokuli.
30 Otandi ka hanagula po omahala geni gomalongelokalunga koondundu, tandi kumuna po iiyambelo yeni yiitsinino, e tandi umbile omidhimba dheni kombanda yiimenka ya hatwa po. Menyanyalo
31 otandi kumuna po iilando yeni nokuhanagula po omahala geni gelongelokalunga, notandi tindi okutaamba oontselelandjambo dheni.
32 Oshilongo sheni otandi shi hanagula po thiluthilu, naatondi mboka ye shi lala, otaa ka haluka pehanagulo.
33 Otandi ke mu undulila iita noku mu halakanitha nomavi gaakwiilongo. Evi lyeni tali ka mbugala, niilando yeni tayi ningi omakulukuma.
34 Nena evi otali ka nyanyukilwa omimvo dhevululuko li ihwa po ndyoka inaamu li gandja; otali ka kala lye ethiwa li vululukwe, manga ne mu li muupongekwa mevi lyaatondi yeni.
35
36 “Mboka ya hupu ko ye li muupongekwa, otandi ke ya kukumitha noshihomo shombepo tayi pepe komafo. Otamu matuka mwa fa tamu tidhwa molugodhi notamu punduka, nando omutondi ina thika pune.
37 Otamu ka tantagala tamu londathana, nando kape na ngoka te mu tidha, noitamu vulu okukondjitha aatondi yeni.
38 Otamu ka sila muupongekwa mwa ninwa po kevi lyaatondi yeni.
39 Aashona yomune mboka taa hupu ko moshilongo shaatondi yeni, otaa ka thithonokela mo omoluulunde weni nomoluulunde woohekulu.
40 “Ihe oluvalo lweni otalu ka hempulula oondjo dhalwo noondjo dhoohekulu mboka ya tindi ndje noya tsu ondumbo nangame,
41 opo ndi ya pilukile noku ya undulila muupongekwa mevi lyaatondi yawo. Hugunina, oluvalo lweni sho lwi ifupipike nolwa futu eiteko lyalwo,
42 nena otandi dhimbulukwa ehangano lyandje nda hangana naJakob, naIsak nonaAbraham, notandi ningi euvaneko lyandje epe ishewe, opo ndi pe aantu yandje oshilongo.
43 Ihe tango evi otali mbugala e tali nyanyukilwa evululuko lyi ihwa po, manga aantu kaaye mo. Aantu oye na okufuta eiteko lyawo, sho ye ekelehi oompango dhandje nomautho gandje.
44 Ihe nando ye li mevi lyaatondi yawo, itandi ya etha thiluthilu nenge ndi ya yone po. Itandi hulitha po ehangano lyandje nayo, oshoka ongame Omuwa Kalunga kawo.
45 Onda hangana ehangano noohekulu, sho nde ya tembudha muEgipiti montaneho yiigwana, opo ndi kale Kalunga kawo. Ehangano ndika otandi li ningi epe ishewe. Ongame Omuwa.”
46 Oompango ndhika adhihe nomautho ngaka agehe Omuwa e ga gandja kuMoses kondundu Sinai, opo e ga pe Aaisraeli.
1 Omuwa okwa lombwele Moses a ti:
2 “Lombwela Aaisraeli to ti: ‘Ngele oku na omuntu tu uvaneke euvaneko ta gandja omuntu kOmuwa, omuntu ngoka a gandjwa ota vulu okumangululwa nokufutilwa ngeyi.
3 Ngele omulumentu gwomimvo omilongo mbali sigo omilongo hamano: iimaliwa iisiliveli omilongo ntano pandjele yoshimaliwa oshisiliveli shoka hashi longithwa motempeli,
4 ihe ngele omukiintu: iimaliwa omilongo ndatu;
5 omulumentu gwomimvo ntano sigo omilongo mbali: iimaliwa omilongo mbali, ihe ngele omukiintu: iimaliwa omulongo;
6 okanona okamati kohi yomimvo ntano: iimaliwa itano, ihe ngele okakadhona: iimaliwa itatu;
7 omusamane e vule omimvo omilongo hamano: iimaliwa omulongo niitano, ihe ngele omukulukadhi: iimaliwa omulongo.
8 “ ‘Omuntu ngoka tu uvaneke ngele ohepele ta nyengwa okufuta, mu faleni komuyambi, nomuyambi ota fupipike ondando pandjele yomufuti.
9 “ ‘Ngele oshimuna shaa na oshidhila tashi uvanekwa, nena ayihe mbyoka tayi pewa Omuwa, nayi kale iiyapuki.
10 Omuntu ngoka tu uvaneke ina landakanitha oshimuna shilwe nasho. Nge te shi ningi, iimuna ayihe oyOmuwa.
11 Ihe ngele oshimuna oshoshidhila, shoka inaashi opalela okuyambela Omuwa, na fale oshimuna komuyambi.
12 Omuyambi ote shi uthile ondando pandjele yasho yuuwanawa noyondjundo, nondando otayi mana po oohapu.
13 Omuntu ngele okwa hala e shi kulile ko, na fute ondando a gwedha ko oshititano.
14 “ ‘Ngele oku na omuntu ta yoololele Omuwa egumbo lye, omuyambi na uthe ondando pandjele yuuwanawa nondjundo yalyo, ondando notayi mana po oohapu.
15 Omugandji gwalyo ngele okwa hala e li kulile ko, na fute ondando a gwedha ko oshititano.
16 “ ‘Omuntu ngele ota yapulile Omuwa oshipambu shepya lye, ondando otayi yelekwa nombuto tayi kunwa mo. Oolata omulongo nambali dhombuto yiilya otadhi gu iimaliwa iisiliveli omilongo ntano.
17 Ngele ote li gandja mbala okuza komumvo gweligolo, nena ondando ayihe otayi pulwa.
18 Ngele ote li gandja komeho, omuyambi na tale ondjundo pamwaalu gwomimvo dha hupu ko sigo okomumvo gweligolo, e tu utha ondando ya kuthilwe ko.
19 Omuntu ngoka ta gandja epya ngele okwa hala oku li kulila ko, na fute ondando mwa gwedhwa oshititano.
20 Ngele ota landitha po epya komuntu gulwe, manga inee li kulila ko kOmuwa, nena ota kanitha uuthemba woku ke li kulila ko ishewe.
21 Komumvo gweligolo epya otali ningilile lyOmuwa; otali ningi eliko lyaayambi.
22 “ ‘Omuntu ngele ota yapulile Omuwa epya e li landa,
23 omuyambi na tale ondando pamwaalu gwomimvo sigo okomumvo gweligolo, nomuntu na fute ondando esiku tuu ndyoka; iimaliwa mbika oyOmuwa.
24 Momumvo gweligolo epya nali shune kumwene gwalyo nenge koluvalo lwe.
25 “ ‘Oondando adhihe nadhi yelekwe pandjele yoshimaliwa oshisiliveli hashi longithwa motempeli.
26 “ ‘Osheeli shoshimuna oshOmuwa, onkee kaku na ngoka te shi mu yoololele we. Okatana, okanzigona nenge okakombwena kosheeli okOmuwa,
27 ihe osheeli shoshimuna shi na oshidhila, otashi kulilwa pandando ya yeleka ya gwedhwa oshititano shimwe. Ngele itashi kulilwa, nashi landithwe kushaa ngoka pandando ya yeleka.
28 “ ‘Kaku na omuntu ta landa nenge ta kulile shoka a yapulila Omuwa nokugana, nashi kale omuntu nenge oshimuna nenge epya. Otashi ningilile shOmuwa.
29 Nokuli omuntu ngoka a yapulilwa okuhanagulwa po, ina kulilwa; na dhipagwe.
30 “ ‘Iitimulongo ayihe yomiilikolwa yomomapya, iilya nenge iiyimati, oyOmuwa.
31 Ngele oku na omuntu e yi kulile, na fute pandando ya yeleka mwa gwedhwa oshititano shimwe.
32 Shimwe shomiimuna omulongo kehe oshOmuwa. Uuna iimuna tayi yalulwa, oshimuna oshitimulongo oshOmuwa.
33 Mwene ina simonona iimuna, a mone kutya shika oshiwanawa nenge oshiwinayi, noine shi landakanitha, ihe ngele ote shi landakanitha, ayihe iyali oyOmuwa, itayi kulilwa.’ ”
34 Iipango mbika oyo mbyoka Omuwa e yi pe Moses kondundu Sinai yokulombwela Aaisraeli.