1 Aana yaIsrael mboka ya yi kuEgipiti, kehe ngoka negumbo lye, oyo
2 Reuben, Simeon, Levi, Juda,
3 Issaskar, Sebulon, Benjamin,
4 Dan, Naftali, Gad naAser.
5 Omwaalu gwaantu ayehe mboka ya za muJakob, oya li omilongo heyali. Omwana Josef okwa kala nale muEgipiti.
6 Josef okwa si, osho wo aamwayina ayehe nepipi ndiyaka alihe,
7 ihe Aaisraeli oya li ye na aanona oyendji noyi indjipala noonkondo nokuudha evi.
8 Nena omukwaniilwa ngoka inaa tseya Josef, okwa lala Egipiti.
9 Okwa lombwele aantu a ti: “Aaisraeli mbaka oyendji noye na oonkondo ye tu vule.
10 Natu ya ningile po ondunge, opo yaa indjipale we; otaa ningi ya game kaatondi yetu, uuna tatu matukilwa, yo ya fadhuke po ya ze mo moshilongo.”
11 Aayegipiti oye ya thiminike niilonga iidhigu tayi ehameke oomwenyo dhawo. Aaisraeli oya tungu iilando Pitom naRameses, yi ninge iipungulilolando yomukwaniilwa.
12 Ihe mpoka pu thike Aaisraeli taa hepekwa, opo wo pu thike Aaisraeli taa indjipala noya taandele nevi alihe. Aayegipiti oya tila Aaisraeli
13 e taye ya thiminike ye ya tsike iilonga iidhigu yuupika taye ya longitha nonyanya. Oye ya tungitha omatungo noye ya longitha omapya noinaye ya yaalela nando.
14
15 Omukwaniilwa gwaEgipiti okwa lombwele aavalithi yAahebeli Shifra naPua a ti:
16 “Ngele tamu valitha aakulukadhi Aahebeli, uumati u dhipagii po, ihe uukadhona u etheni u kale u na omwenyo.”
17 Ihe aavalithi oya tila Kalunga noinaa vulika komukwaniilwa. Oye etha uumati inaaye u dhipaga po.
18 Omukwaniilwa okwi ithana aavalithi e te ya pula ta ti: “Omolwashike mwa ningi ngeyi? Omolwashike mwe etha uumati u kale nomwenyo?”
19 Aavalithi oya yamukula ya ti: “Aakulukadhi Aahebeli kaa fele aakulukadhi Aayegipiti. Ohaa vala nuupu, uuhanona wawo otau valwa, manga inaatu thika ko nokuli.”
20 Molwashoka aavalithi ya li ya tila Kalunga, Kalunga okwe ya yambeke e te ya pe oluvalo lwawo yene. Aaisraeli oya tsikile okwiindjipala nokunkondopala.
21
22 Omukwaniilwa okwa gandja oshipango kaantu ye ayehe tashi ti: “Uumati auhe mboka tau valwa kAahebeli, u kuthii po, mu u umbile momulonga Niili, ihe uukadhona u etheni u kale u na omwenyo.”
1 Pethimbo ndika omulumentu gwomezimo lyaLevi okwa hokana omukiintu gwomezimo lye.
2 Omukiintu okwe mu valele okamati. Sho e ka mono okawanawa, okwe ka kutha e te ka holeke oomwedhi ndatu.
3 Ihe sho a nyengwa oku ka holeka, okwa kutha okatemba komanenge e te ka hoto neka. Okwa langeke mo okahanona e te ka tula momanenge komunkulo gwomulonga.
4 Omumwayina omukadhona gwokahanona okwa thikama mpeyaka, a tale, nkene taka ningwa.
5 Omuna gwomukwaniilwa omukadhona okwe ya komulonga i iyoge, manga aadhike ye taa kunkula nomulonga. Ohaluka okwa ndhindhilike okatemba ke li momanenge e ta tumu omupika gwe e ke ka tale mo.
6 Omuna gwokombanda okwe ka siikulula e ta mono okamati taka lili. Okwa li e ka uvitile ohenda e ta ti: “Okanona haka okAahebeli.”
7 Omumwayina gwako omukadhona okwa pula a ti: “Nandi ke ku talele omukulukadhi Omuhebeli, e ye e ke ku yamuthile okanona?”
8 Omuna gwokombanda okwa yamukula a ti: “Eeno, inda.” Omukadhona okwa yi e ti ithana yina yokanona.
9 Omuna gwokombanda okwa lombwele omukulukadhi a ti: “Taamba okahanona haka, u ke ka yamuthile ndje, e tandi ke ku futa.”
10 Okanona sho ka koko, okwe ka fala komuna gwokombanda, ngoka e mu taamba ongomwana. Okwi ipopile a ti: “Ndishi onde ka kutha momeya, otandi ka luku Moses.”
11 Moses sho a koko, okwa yi a ka talele po Aahebeli aakwawo nokwa mono, nkene taa longithwa iilonga iidhigu. Okwa mono nokuli Omuegipiti ta dhenge Omuhebeli, gumwe gwomaakwawo.
12 Moses okwa lengalenga koombinga noombinga. Sho a mono kutya kaku na omuntu, okwa dhipaga Omuegipiti e te mu fumvike mehekevi.
13 Esiku lyanofu okwa yi ko ishewe e ta adha ko Aahebeli yaali taa kondjo. Okwa lombwele ngoka a li e na uusama a ti: “Omolwashike to dhenge mukweni?”
14 Omudhengi okwa yamukula a ti: “Olye e ku ningi omuleli nomutokolihapu gwetu? Oto dhipaga ndje, ngaashi wa dhipagele Omuegipiti?” Nena Moses okwa tila nokwi ipopile ta ti: “Nani shoka nda ninga osha tseyika.”
15 Omukwaniilwa sho u uvu shoka sha ningwa po, okwa kambadhala a dhipage Moses, ihe Moses okwa fadhuka po e ta yi kuMidian. Sho a thiki ko, okwa kuutumba pomuthima.
16 Jetro, omuyambi gwaMidian, okwa li e na aakadhona yaheyali. Oye ya okuteka omeya, opo ya hugile oonzi niimuna yahe.
17 Ihe aasita yalwe oye ya tidha po. Nena Moses okwe ya popile e ta hugile iimuna yawo.
18 Sho ya shuna kuhe Reuel, okwe ya pula a ti: “Omolwashike nena mwa zi ko mbala?”
19 Aakadhona oya yamukula ya ti: “Omulumentu Omuegipiti okwe tu kanyutulula miikaha yaanahambo e ta hugile iimuna yetu.”
20 Reuel okwa pula oyana aakadhona ta ti: “Oku li peni? Omolwashike mwe mu thigile ko? Indeni mu ke mu ithane, a pewe iikulya.”
21 Moses okwa kala hoka, naJetro okwe mu pe omwana omukadhona Sippora, e mu hokane po.
22 Sippora e mu valele omumati. Moses okwi ipopile a ti: “Ngame ondjendi mevi ndika,” e te mu luku Gersom.
23 Momukokomoko gwomimvo omukwaniilwa gwaEgipiti okwa si, ihe Aaisraeli oya li taa keme notaa kugu moluupika wawo. Onkugo yawo oya thiki kuKalunga,
24 ngoka u uvu ekemo lyawo e ta dhimbulukwa ehangano lyawo naAbraham, Isak naJakob.
25 Okwa mono okupikwa kwAaisrael e ta kala e ya ipyakidhilila.
1 Esiku limwe Moses sho a li ta litha oonzi niikombo yahemweno Jetro, omuyambi gwokuMidian, iimuna okwe yi tokolitha ombuga e te ya kuSinai, ondundu yaKalunga.
2 Omuyengeli gwOmuwa okwe mu ihololele momulilo gwa hwama moshihwa sheno. Moses okwa mono oshihwa sha hwama, ihe itashi lunguna po.
3 Okwi ipopile ta ti: “Ndika emoniko enene. Omolwashike oshihwa itashi lunguna po? Otandi ke shi tala popepi.”
4 Omuwa sho a mono Moses ta hedha ko, okwe mu ithana mokati koshihwa ta ti: “Moses! Mosesee!” Moses okwi itaale a ti: “Ee.”
5 Kalunga okwa ti: “Ino hedha ko huka. Hula ko oongaku koompadhi dhoye, oshoka pehala mpoka wa thikama, opehala eyapuki.
6 Ongame Kalunga koohokulu, Kalunga kaAbraham, Kalunga kaIsak naKalunga kaJakob.” Nena Moses okwa siikile oshipala she, oshoka okwa li a tila okutala Kalunga.
7 Omuwa okwa ti: “Onda mono, nkene aantu yandje taa hepekwa muEgipiti; ondu uvu taa kugile emanguluko kaapiki yawo. Onda tseya omahepeko gawo agehe,
8 onkee nda kuluka ndi ya mangulule mAayegipiti noku ya tembudha muEgipiti, ya ye kevi lya mbwalangandja, evi lya tondoka omahini nomagadhi goonyushi, evi lya kalwa kAakaanana, Aaheti, Aayamori, Aaperesi, Aahevi nAayebusi.
9 Ondu uvu shili onkugo yaantu yandje nonda mono, nkene Aayegipiti taye ya thindile pevi.
10 Ngashingeyi otandi ku tumu komukwaniilwa gwaEgipiti, opo u tembudhe mo aantu yandje moshilongo she.”
11 Moses okwa ti kuKalunga: “Ongame lye? Ote vulu ngiini okuya komukwaniilwa nokutembudha mo Aaisraeli muEgipiti?”
12 Kalunga okwa yamukula a ti: “Ondi li pamwe nangoye, nongele wa tembudha mo aantu yandje muEgipiti, oto ka simanekela ndje pondundu ndjika. Shika otashi holola kutya onde ku tuma.”
13 Moses okwa yamukula a ti: “Nge te yi kAaisraeli e tandi ya lombwele te ti: ‘Kalunga koohokulu okwa tumu ndje kune,’ otaa ka pula ndje taa ti: ‘Edhina lye olye?’ Nandi ya lombwele ndi tye ngiini?”
14 Kalunga okwa ti: “Ngame nda kala ngu NGAME-NDA-KALA. Oto ya lombwele to ti: ‘Ngoka haku tiwa NGAME-NDA-KALA, okwa tumu ndje kune.’
15 Lombwela Aaisraeli to ti: ‘Omuwa, Kalunga koohokulu, Kalunga kaAbraham, Kalunga kaIsak naKalunga kaJakob, okwa tumu ndje kune. Ndika olyo edhina lyandje sigo aluhe. Osho tandi ka tumbulwa komaluvalo nomaluvalo.’
16 Inda u ka hiye aakuluntu yAaisraeli ya gongale e to ya lombwele to ti: ‘Omuwa, Kalunga koohokulu, Kalunga kaAbraham, Kalunga kaIsak naKalunga kaJakob, okwi ihololele ndje e ta ti: Onde mu tala nondi wete shoka Aayegipiti taye mu ningile.
17 Onda tokola ndi mu tembudhe muEgipiti, moka mwa hepekwa nonyanya, notandi mu fala kevi lya tondoka omahini nomagadhi goonyushi, kevi lyAakaanana, Aaheti, Aayamori, Aaperesi, Aahevi nAayebusi.’
18 “Aantu yandje otaa ka pulakena shoka to ya lombwele. Nena otamu yi pamwe naakuluntu yAaisraeli komukwaniilwa gwaEgipiti e tamu ti kuye: ‘Omuwa, Kalunga kAahebeli okwe tu ihololele. Tu zimina tu ye ondjenda yomasiku gatatu mombuga, tu ka yambele Omuwa, Kalunga ketu, oontselelandjambo.’
19 Onda tseya kutya omukwaniilwa gwaEgipiti ita ka pitika mu ye, manga inaa thiminikwa oku shi ninga.
20 Otandi ka taganeka oshikaha shandje nokudhenga Egipiti niikumithalonga. Oye note ke mu etha, mu ye.
21 “Otandi ka ninga Aayegipiti aanahenda nane, opo aantu yandje nge taa yi, yaa ze mo iikaha yowala.
22 Omukulukadhi kehe Omuisraeli ota ka ya kaashiinda ye nokomukulukadhi kehe Omuegipiti a kala maandjawo, a pule omizalo, oshingoli noshisiliveli. Niinima mbika naa yi zaleke oyana aamati naakadhona nokufaalela omauyamba gAayegipiti.”
1 Nena Moses okwa yamukula Omuwa e ta ti: “Ondu uvite, Aaisraeli itaa ka itaala ndje noitaa ka pulakena shoka tandi ti. Otaa ka tya: Omuwa ine ku ihololela.”
2 Omuwa okwe mu pula a ti: “Ou na shike moshikaha?” Moses okwa yamukula: “Ondhimbo.”
3 Omuwa okwa ti: “Yi umbila pevi.” Moses sho e yi umbile pevi, oya shituka eyoka, nokwa yi ontuku.
4 Omuwa okwa lombwele Moses a ti: “Petama, u li kwate komushila.” Moses okwa petama e te li kwata, nolya shituka ishewe ondhimbo.
5 Omuwa okwa ti: “Shi ninga, u hololele Aaisraeli kutya Omuwa, Kalunga koohokulu, Kalunga kaAbraham, Kalunga kaIsak naKalunga kaJakob okwe ku ihololele.”
6 Omuwa okwa lombwele Moses ishewe a ti: “Tula oshikaha shoye monkwapa yoye.” Moses okwe shi ningi. Sho e shi kutha mo, osha li sha kwatwa koshilundu, shi na iitotono iitokele.
7 Omuwa okwa ti: “Shuna mo ishewe oshikaha shoye monkwapa.” Moses okwe shi ningi nasho e shi kutha mo, osha li sha aluka sha faathana nolutu lwe.
8 Omuwa okwa ti: “Ngele itaye ku itaale, nenge ya tompwe koshinyengandunge shotango, nena shika otashi ke ya tompa.
9 Ngele iinyengandunge mbika iyali itaye yi itaale, nenge taa tindi okupulakena shoka to ti, teka omeya muNiili e to ga tile pevi. Omeya ngaka otaga ka shituka ombinzi.”
10 Moses okwa ti: “Aawe, Omuwa, ino tuma ndje, kandi shi kupopya. Osho nda kala nale nosho ndi li nena, sho wa popitha ndje. Ongame omunyengwi mokupopya, omukakadhali nomukokomi.”
11 Omuwa okwa ti kuye: “Olye a shitile omuntu okana? Olye te mu ningi ombolo nenge omuthitawi? Olye te mu pe omeho nenge te mu tsikitha? Ongame Omuwa.
12 Ngashingeyi inda! Otandi ke ku popitha notandi ku lombwele shoka to ka tya.”
13 Moses okwa yamukula a ti: “Aawe, Omuwa, kwatha ndje u tume ko gulwe shila.”
14 Nena Omuwa okwa geele Moses e ta ti: “Mumwanyoko Aaron, Omulevi, ke ko? Ondi shi shi kutya oku shi kupopya nawa. Ote ke ku tsakaneka nota ka nyanyukilwa oku ku mona.
15 Oto vulu oku mu lombwela e to mu hokololele shoka e na okutya. Ne amuhe yaali otandi ke mu lombwela shoka mu na okuninga.
16 Ota ka ninga omupopi peha lyoye nokulombwela oshigwana peha lyoye. Oto kala wa fa Kalunga to mu lombwele shoka e na okutya.
17 Kutha ondhimbo yoye e to ka ninga nayo iinyengandunge.”
18 Moses okwa shuna kuhemweno Jetro e ta ti kuye: “Kwatha ndje ndi ye ndi ka talele po aakwetu muEgipiti, ndi tale, ngele oko ye li ye na omwenyo.” Jetro okwa zimine e te mu laleke nombili.
19 Manga Moses a li muMidian, Omuwa okwa ti kuye: “Shuna kuEgipiti, oshoka ayehe mbeyaka ya li ya hala oku ku dhipaga, oya sa.”
20 Moses okwa kutha omukadhi noyana aamati e te ya londeke kokasino nokwa yi kuEgipiti a humbata ondhimbo ndjoka Kalunga a ti ne yi kuthe.
21 Omuwa okwa lombwele Moses ishewe a ti: “Sho to shuna kuEgipiti, ka ninge koshipala shomukwaniilwa gwaEgipiti iinyengandunge mbyoka nde yi ku pe. Ihe otandi ka kukutika omukwaniilwa noita ka etha aantu ya tembuke.
22 Nena ou na oku mu lombwela kutya ngame, Omuwa, otandi ti: ‘Israel oye omumwandje osheeli.
23 Onde ku lombwele, u ethe omumwandje a ye a ka simaneke ndje, ihe ngoye owa tindi. Nena otandi ka dhipaga omumwoye osheeli.’ ”
24 Montanda mondjila yokuya kuEgipiti Omuwa okwa tsakaneke Moses, a hala oku mu dhipaga.
25 Nena omukadhi Sippora okwa kutha emanya lya tsa e ta kenke omwana omumati, nokapa okwe ka umbile koompadhi dhaMoses. Pamukalo gwefukaleko okwa ti kuMoses: “Oshili, ngoye ombushikimbinzi gwandje.” Omuwa nokwe mu etha, a hupitha omwenyo gwaMoses.
26
27 Omuwa okwa lombwele Aaron a ti: “Inda kombuga u ka tsakaneke Moses.” Aaron okwa yi nokwe mu tsakanekele pondundu yaKalunga e te mu thipi komilungu.
28 Moses okwa hokololele Aaron shoka Omuwa a popi, sho e mu lombwele a shune kuEgipiti. Okwe mu hokololele wo iinyengandunge mbyoka Omuwa e mu lombwele e yi tsakanithe.
29 Nena Moses naAaron oya yi kuEgipiti e taa hiya aakuluntu ayehe yAaisraeli ya gongale.
30 Aaron okwe ya hokololele ayihe mbyoka Omuwa a lombwele Moses. Moses kombinga ye okwa longo iinyengandunge ayihe montaneho yaantu.
31 Oyo noyi itaale. Sho yu uvu kutya Omuwa oku na oshimpwiyu nayo nokwa mono nkene taa hepekwa nonyanya, oyi inyongamene pevi noya galikana.
1 Moses naAaron oya yi komukwaniilwa gwaEgipiti noya ti: “Omuwa Kalunga kaIsrael ota ti: ‘Etha aantu yandje ya ka dhanene ndje oshituthi mombuga nokugalikana ndje.’ ”
2 Omukwaniilwa okwa ti: “Omuwa olye, ndi pulakene ewi lye nondi laleke Aaisraeli ya ye? Omuwa ngoka kandi mu shi noite laleke Aaisraeli.”
3 Moses naAaron oya yamukula ya ti: “Kalunga kAahebeli okwe tu ihololele. Tu zimina, tu ye ko ondjenda yomasiku gatatu mombuga, tu ka yambele Omuwa, Kalunga ketu, omafikilondjambo. Ngele itatu shi ningi, ote tu dhipaga po nuuvu nenge niita.”
4 Omukwaniilwa okwa ti kuMoses naAaron: “Omolwashike tamu kateke aantu, sho tamu tonyalitha aantu miilonga yawo? Indeni kiilonga yeni!
5 Aantu yeni oyi indjipala ye vule Aayegipiti. Ngashingeyi omwa hala mu kankeke iilonga!”
6 Esiku tuu ndyoka omukwaniilwa okwa lombwele aalongithi yaapika naawiliki yiilonga Aaisraeli ta ti:
7 “Etheni okupa aantu omwiidhi gwokutholomitha oondhopi. Naa ke gu ikongele yo yene.
8 Ihe naa gwanithe omwaalu gwoondhopi ngaashi shito, itapu kala nando ondhopi yimwe inaayi gwanithwa. Oyo aananyalo unene, nomolwashoka taa pula ndje, ndi ya laleke, ya ka yambele Kalunga kawo omafikilondjambo.
9 Iilonga yaantu mbaka yi ningeni oyindji, opo yi itule mo, yaa kale ye na olweedhe lwokupulakena oohapu dhiifundja.”
10 Aalongithi yaapika naawiliki Aaisraeli oya yi e taa lombwele Aaisraeli taa ti: “Omukwaniilwa ota ti, ite mu kwatha we omwiidhi gwokutholoma.
11 Indeni mu ki ikongele omwiidhi mpoka tamu gu mono, ihe omwaalu gwoondhopi omu na oku gu gwanitha.”
12 Aantu noya andjalala Egipiti alihe taa kongo omwiidhi.
13 Aalongithi yaapika oya dhiginine oku ya thiminika, ya gwanithe omwaalu gwoondhopi esiku kehe, ngaashi ya li haa ningi shito, sho ya li haa pewa omwiidhi.
14 Aalongithi yaapika Aayegipiti oya dhenge aawiliki Aaisraeli ya li haa tonatele iilonga. Oya ti: “Omolwashike aantu yeni inaa gwanitha omwaalu gwoondhopi, ngaashi haa ningi shito?”
15 Nena aawiliki oya yi komukwaniilwa noya yemata ya nyenyeta taa ti: “Nkeyama, omolwashike to tu ningi ngeyi?
16 Itatu pewa omwiidhi, ndele otatu lombwelwa, tu tholome oondhopi! Nongashingeyi otatu dhengwa, nando ombedhi oyi li koshigwana shoye.”
17 Omukwaniilwa okwa yamukula a ti: “One aananyalo. Inamu hala okulonga, nomolwashoka hamu pula ndje, ndi mu laleke, mu ka yambele Omuwa omafikilondjambo.
18 Shuneni kiilonga yeni! Itamu pewa we omwiidhi, ihe otamu gwanitha omwaalu gwoondhopi.”
19 Aawiliki oya dhimbulula kutya ngashingeyi oye li muudhigu, sho ya lombwelwa kutya otaa tholoma omwaalu gwoondhopi gu thike pungoka haa tholoma shito.
20 Sho ya zi po, oya tsakaneke Moses naAaron, mboka ya li ye ya tegelela.
21 Oya lombwele Moses naAaron ya ti: “Omuwa okwa mono shoka mwa ningi note ke mu geela, oshoka omwe tu tonditha komukwaniilwa nomalenga ge. Omwe ya pe egongamwele, ye tu dhipage.”
22 Nena Moses okwa shuna kOmuwa e ta ti: “Omuwa, omolwashike to hepeke aantu yoye? Omolwashike wa tumu ndje huno?
23 Okuza mpoka nda yile komukwaniilwa ndi mu lombwele medhina lyoye, okwa hepeke aantu yoye nonyanya. Ihe ngoye ino ninga sha u ya kwathe.”
1 Nena Omuwa okwa lombwele Moses a ti: “Ngashingeyi otamu ka mona shoka te ningile omukwaniilwa. Otandi ke mu thiminika, a laleke aantu yandje. Otandi ke mu thiminika, a tidhe mo aantu yandje mevi lye.”
2 Kalunga okwa lombwele Moses a ti: “Ongame Omuwa.
3 Ondi ihololele Abraham, Isak naJakob, ngame Kalunga Omunankondoawike, ihe inandi itseyitha kuyo ngame mwene, ndi tseyithe edhina lyandje eyapuki, Omuwa.
4 Onda hangana nayo nondu uvaneke ndi ya pe evi lyaKaanan, moka ya li mo oondjendi.
5 Ngashingeyi ondu uvu ekemo lyAaisraeli, mboka ya pikwa kAayegipiti, ongame nonda dhimbulukwa ehangano lyandje.
6 Lombwela Aaisraeli kutya ngame otandi ya lombwele te ti: ‘Ongame Omuwa; otandi mu mangulula e tandi mu kanyutulula mo muupika wAayegipiti. Otandi yelutha okwooko kwandje kwoonkondo e tandi ya etele omageelo guuwehame notandi mu hupitha.
7 Otandi mu ningi oshigwana shandje mwene, ongame notandi ningi Kalunga keni. Otamu ka tseya kutya ongame Omuwa, Kalunga keni, sho tandi mu mangulula muupika muEgipiti.
8 Otandi ke mu fala kevi ndyoka ndu uvanekele Abraham, Isak naJakob nokugana. Otandi li mu pe, li ninge eliko lyeni. Ongame Omuwa.’ ”
9 Moses okwa hokololele Aaisraeli shika, ihe inaye mu pulakena, molwashoka oomwenyo dhawo odha li dha lulilwa kuupika uululululu.
10 Nena Omuwa okwa lombwele Moses ta ti:
11 “Inda u ka lombwele omukwaniilwa gwaEgipiti, a laleke Aaisraeli ya ze mo moshilongo she.”
12 Moses okwa yamukula a ti: “Aaisraeli sho itaa pulakene ndje, ngele nduno omukwaniilwa? Ngame omusama mokupopya.”
13 Omuwa okwa lombwele Moses naAaron ta ti: “Lombweleni Aaisraeli naFarao, omukwaniilwa gwaEgipiti, kutya onde mu lombwela, mu tembudhe mo Aaisraeli muEgipiti.”
14 Reuben, osheeli shaJakob, okwa li e na oyana aamati yane. Oyo Hanok, Pallu, Hezron naKarmi; oyo ya li oohekulu yomaludhi ngoka ge na omadhina gawo.
15 Simeon okwa li e na oyana aamati yahamano. Oyo Jemuel, Jamin, Ohad, Jakin, Zohar naShaul, omuna gwomukulukadhi Omukaanani. Oyo ya li oohekulu yomaludhi ngoka ge ya lukilwa
16 Levi okwa li e na oyana aamati yatatu. Oyo Gerson, Kohat naMerari. Oyo ya li oohekulu yomaludhi ngoka ga lukilwa omadhina gawo. Levi okwa kala e na omwenyo omimvo 137.
17 Gerson okwa li e na oyana aamati yaali. Oyo Libni naShimei, noyo ya li ye na oluvalo olwindji.
18 Kohat okwa li e na oyana aamati yane. Oyo Amram, Izhar Hebron naUssiel. Kohat okwa li e na omwenyo omimvo 133.
19 Merari okwa li e na oyana aamati yaali. Oyo Mahli naMushi. Ngaka omaludhi gaLevi nomaluvalo gago.
20 Amram okwa hokana hegona omukadhona Jokebed e te mu valele Aaron naMoses. Amram okwa li e na omwenyo omimvo 137.
21 Izhar okwa li e na oyana aamati yatatu. Oyo Kora, Nefeg naSikri.
22 Ussiel okwa li wo e na oyana aamati yatatu: Mishael, Elzafan naSitri.
23 Aaron okwa hokana Elisheba lyaAminadab, omumwayina gwaNahshon. Elisheba okwe mu valele Nadab, Abihu, Eleasar naItamar.
24 Kora okwa li e na oyana aamati yatatu. Oyo Assir, Elkana naAbiasaf. Oyo ya li oohekulu yomaludhi gaKora.
25 Eleasar lyaAaron okwa hokana omuna gwaPutiel, e te mu valele Pinehas. Mbaka oyo aakuluntu yomazimo nomaludhi gondhikwa yaLevi.
26 Aaron naMoses oyo mboka ya lombwelwa kOmuwa, ya tembudhe mo Aaisraeli muEgipiti.
27 Oyo mboka ya lombwele omukwaniilwa gwaEgipiti, a ethe Aaisraeli ya ye.
28 Omuwa sho a popi naMoses mevi lyaEgipiti,
29 Okwa ti: “Ongame Omuwa. Lombwela omukwaniilwa gwaEgipiti ashihe shoka tandi ku lombwele.”
30 Moses okwa yamukula a ti: “Ou shi ndje kutya ngame omukakadhali mokupopya, omukwaniilwa ota pulakene ndje ngiini?”
1 Omuwa okwa ti: “Otandi ke ku ninga wa fa Kalunga komukwaniilwa, namumwanyoko Aaron ote ke mu lombwela a fa omuhunganeki gwoye.
2 Hokololela Aaron ashihe shoka tandi ku lombwele, noye ta ka lombwela omukwaniilwa, a laleke Aaisraeli ya tembuke mo moshilongo she.
3 Ihe otandi ka kukutika omukwaniilwa, noite ke mu pulakena nando, kashi na mbudhi, nando ndi longe iitilithi oyindji muEgipiti.
4 Nena otandi ka etela Egipiti egeelo edhigu nokutembudha mo omazimo gaantu yandje moshilongo.
5 Aayegipiti otaa ka tseya kutya ongame Omuwa, sho tandi yelutha okwooko kwandje ndi ya kondjithe e tandi tembudha mo Aaisraeli moshilongo.”
6 Moses naAaron oya ningi sho ya lombwelwa kOmuwa.
7 Pethimbo ndyoka sho taa popi nomukwaniilwa, Moses okwa li e na omimvo omilongo hetatu, naAaron omimvo omilongo hetatu nandatu.
8 Omuwa okwa lombwele Moses naAaron a ti:
9 “Omukwaniilwa ngele ote mu lombwele ta ti: ‘Ningii po oshinyengandunge shasha’, lombwela Aaron a umbile ondhimbo ye komeho gomukwaniilwa, oyo notayi shituka eyoka.”
10 Moses naAaron oya yi komukwaniilwa e taa ningi, ngaashi Omuwa e ya lombwele. Aaron oku umbile ondhimbo ye komeho gomukwaniilwa nomalenga ge, noya shituka eyoka.
11 Nena omukwaniilwa okwi ithana aanongo noompulile dhe, nokoonkondo dhawo dhuumpulile osho ya ningi wo.
12 Oyu umbile oondhimbo dhawo pevi, nodha shituka omayoka. Ihe ondhimbo yaAaron oye dhi nina po.
13 Omukwaniilwa okwa kukutike omwenyo gwe, ngaashi Omuwa a ti, ye ina pulakena Moses naAaron.
14 Nena Omuwa okwa lombwele Moses a ti: “Omukwaniilwa okwa kukuta unene nokwa tindi okulaleka aantu ya ye.
15 Inda u ke mu tsakaneke ongula, sho ta yi kuNiili. Inda nondhimbo yoye ndjoka ya shitukile eyoka, u mu tegelele pomunkulo gwomulonga.
16 Mu lombwela u tye: ‘Omuwa, Kalunga kAahebeli, okwa tumu ndje, ndi ku lombwele, u laleke aantu ye ya ye ye ke mu simaneke mombuga. Ihe ngoye ino pulakena sigo opo mpaka.
17 Ngashingeyi, Nkeyama, Omuwa ote ke ku ulukila kutya oye lye, sho ta ka longa sha. Tala ko, otandi dhenge omeya gomomulonga nondhimbo ndjika, nomeya otaga shituka ombinzi.
18 Oohi otadhi ka sa, nomulonga otagu ka nika unene; Aayegipiti itaa ka vula okunwa mo.’ ”
19 Omuwa okwa lombwele Moses a ti: “Lombwela Aaron a kuthe ondhimbo ye, e yi taganekele komilonga, komikanka nokomadhiya agehe gaEgipiti. Omeya otaga ka shituka ombinzi, notayi ka menka nevi alihe notayi ka kala momatenga nomiiyuma.”
20 Moses naAaron oya ningi, ngaashi Omuwa e ya lombwele. Montaneho yomukwaniilwa nomalenga ge Aaron okwa yelutha ondhimbo ye e ta dhenge omulonga, nomeya agehe gamo oga shituka ombinzi.
21 Oohi odha sile momulonga, nogwa li tagu nika nayi, nAayegipiti inaa vula we okunwa mo. MuEgipiti alihe omwa li mu na ombinzi.
22 Nena oompulile dhomukwaniilwa odhe shi ningi wo koonkondo dhuumpulile wadho, omukwaniilwa nokwa kukutike omwenyo gwe e vule nale. Okwa tindi okupulakena Moses naAaron, ngaashi Omuwa a tile.
23 Okwa shuna kuuwa we ye ina pupa ko kwaashika.
24 Aayegipiti ayehe oya hupu momunkulo gwomulonga, ya mone omeya gokunwa, oshoka oya li itaa vulu okunwa omeya gomomulonga.
25 Opwa piti omasiku gaheyali, Omuwa sho a dhenge omulonga Niili.
1 Omuwa okwa lombwele Moses a ti: “Inda komukwaniilwa u mu lombwele u tye: ‘Laleka aantu yandje ya ye, opo ya ka simaneke ndje.
2 Ngele oto tindi, otandi geele oshilongo shoye noku shi siikila nomafuma.
3 Niili otagu ka ndumbakana omafuma, notaga ka za mo tage ya muuwa woye nomondjugo yoye yokulala nokombete yoye, osho wo momagumbo gomalenga goye nogaantu yoye, otage ya nokuli meziko lyoye nomiipana yoye yokukangela.
4 Otage ke ku nukila ngoye naantu yoye nomalenga goye agehe.’ ”
5 Omuwa okwa lombwele Moses a ti: “Lombwela Aaron a yeluthile ondhimbo ye komilonga, komikanka nokomadhiya, opo omafuma ga ndjituke ga siikile evi lyaEgipiti.”
6 Aaron okwe yi yeluthile komeya agehe, nomafuma oga ndjituka e taga siikile evi.
7 Ihe oompulile odha longitha uumpulile, nadho wo odha ndjitukitha omafuma ga holoka.
8 Omukwaniilwa okwi ithana Moses naAaron e ta ti: “Galikaneni Omuwa a kuthe po omafuma ngaka, notandi ka laleka aantu yeni ya ye, opo ya ka yambele Omuwa omafikilondjambo.”
9 Moses okwa yamukula a ti: “Otandi nyanyukilwa oku ku galikanena. Utha ethimbo, uuna tandi ke ku galikanena, osho wo omalenga goye naantu yoye. Nena oto ka manguluka komafuma, noitaku ka kala we nando olimwe, shila omuNiili amuke.”
10 Omukwaniilwa okwa yamukula a ti: “Galikanena ndje ongula.” Moses okwa ti: “Otandi ka ninga, ngaashi wa pula. Ngoye oto ka tseya kutya kaku na kalunga e thike pOmuwa, Kalunga ketu.
11 Ngoye, omalenga goye naantu yoye otamu ka manguluka komafuma noitaku ka kala we nando olimwe, shila omuNiili amuke.”
12 Moses naAaron oya zi pomukwaniilwa, Moses nokwa galikana Omuwa, a kuthe po omafuma ngoka u undulile omukwaniilwa.
13 Omuwa okwa ningi, ngaashi Moses a pula, nomafuma ngoka ga li momagumbo, momalundu nomuuwa, oga si.
14 Aayegipiti oye ga ndumbile moondumba oonene, nevi alihe olya nika komafuma.
15 Omukwaniilwa sho a mono omafuma ga si, okwa kukutike ishewe omwenyo gwe, naanaa ngaashi Omuwa a tile kutya omukwaniilwa ita ka pulakena Moses naAaron.
16 Omuwa okwa lombwele Moses a ti: “Lombwela Aaron a fundule ontsi yevi nondhimbo ye, nontsi otayi ka shituka uumbululu muEgipiti alihe.”
17 Aaron okwa fundula evi nondhimbo ye, nontsi ayihe muEgipiti oya shituka oomwe dha siikile aantu niimuna.
18 Oompulile odha kambadhala okulonga kuumpulile wadho, dhi hololithe po uumbululu, ihe odha nyengwa. Uumbululu odha li apehe,
19 noompulile odha lombwele omukwaniilwa dha ti: “Kalunga oye a ningi shika!” Ihe omukwaniilwa okwa li a kukuta, naanaa ngaashi Omuwa a ti, noina pulakena Moses naAaron.
20 Omuwa okwa lombwele Moses a ti: “Meneka ongula onene u ka tsakaneke omukwaniilwa, sho ta yi komulonga, u mu lombwele kutya Omuwa ota ti: ‘Laleka aantu yandje ya ye, opo ya ka simaneke ndje.
21 Ngele oto tindi, otandi ku geele noku ku tumina omatopola, ngoye mwene, omalenga goye naantu yoye. Omatopola otaga ka udha omagumbo agehe gAayegipiti notaga siikile evi alihe.
22 Ihe otandi yoolola mo omukuma gwaGoshen, moka mwa kala aantu yandje, noitamu kala nando omatopola. Otandi shi ningi, opo u tseye kutya ongame Omuwa tandi longo moshilongo shika.
23 Otandi ka ninga eyooloko pokati kaantu yandje naantu yoye. Oshinyengandunge shika otashi ka ningwa ongula.’ ”
24 Omuwa okwa tumu oshikogo shomatopola muuwa womukwaniilwa nomomagumbo gomalenga ge. Oshilongo ashihe shaEgipiti osha hepekwa nayi komatopola.
25 Omukwaniilwa okwi ithana Moses naAaron e ta ti: “Indeni mu ka yambele Kalunga keni omafikilondjambo, ihe omoshilongo muka tuu.”
26 Moses okwa yamukula a ti: “Itashi opala oku shi ningila muka, oshoka Aayegipiti otaa ka hindwa komafikilondjambo getu giimuna mbyoka tatu ka yambela Omuwa, Kalunga ketu. Ngele tatu yamba iimuna e tatu hindi Aayegipiti pomafikilondjambo getu ye tu wete, otaye tu dhipaga nomamanya.
27 Otu na okweenda omasiku gatatu tu ye kombuga, tu ka yambele Omuwa, Kalunga ketu, omafikilondjambo, naanaa ngaashi e tu lombwele.”
28 Omukwaniilwa okwa ti: “Otandi ke mu etha, mu ka yambele Omuwa, Kalunga keni, omafikilondjambo mombuga, ngele itamu yi kokule unene. Galikanenii ndje.”
29 Moses okwa yamukula a ti: “Mbalambala shampa nda zi mpaka, otandi ka galikana Omuwa. Ongula omatopola otage mu thigi po, ngoye mwene, omalenga naantu yoye. Ihe ino tu kotokela we nokwiimba aantu koku ka yambela Omuwa omafikilondjambo.”
30 Moses okwa zi pomukwaniilwa e ta galikana Omuwa,
31 nOmuwa okwa ningi, ngaashi Moses a pula. Omatopola oga thigi po omukwaniilwa, omalenga ge naantu ye; inaku kala we nando etopola limwelimwe.
32 Ihe nando ongaaka, omukwaniilwa okwa kukutike omwenyo gwe noina laleka aantu ya ye.
1 Omuwa okwa lombwele Moses a ti: “Inda u ka lombwele omukwaniilwa kutya Omuwa, Kalunga kAahebeli, ota ti: ‘Laleka aantu yandje, opo ya ka simaneke ndje.
2 Ngele oto tindi ishewe oku ya laleka,
3 otandi ke ku tumina oshivu oshidhigu miimuna yoye ayihe: uukambe, uusino, oongamelo, oongombe, oonzi niikombo.
4 Otandi ka yoolola pokati kiimuna yAaisraeli naambyoka yAayegipiti; kape na oshimuna shAaisraeli shimwe tashi ka sa.
5 Ngame Omuwa ondu utha, ndi shi tsakanithe ongula yanakwasha moshilongo shika.’ ”
6 Esiku lya landula Omuwa okwa ningi, ngaashi a tile. Iimuna ayihe yAayegipiti oya si, ihe kape na nando oshimuna shOmuisraeli shimwe sha sa.
7 Omukwaniilwa okwa tumu okutala iimuna yAaisraeli, ihe inaku sa nando oshimwe. Ihe omwenyo gwomukwaniilwa ogwa li gwa kukuta, noina laleka oshigwana shi ye.
8 Nena Omuwa okwa lombwele Moses naAaron a ti: “Kutheni omutoko peziko gu udha omake geni; Moses ne gu gundile mombepo koshipala shomukwaniilwa.
9 Otagu ka gunduka gwa fa ontsi naEgipiti alihe, noshaa mpoka otagu tukula po iitumbuka mbyoka tayi ningi iilalo tayi ehameke aantu niimuna.”
10 Oya kutha omutoko e taa yi koshipala shomukwaniilwa. Moses okwe gu gundile mombepo, nogwe eta iitumbuka e tayi ningi iilalo kaantu nokiimuna.
11 Oompulile inadhi holoka ko we koshipala shaMoses, oshoka odha li dha kakata iitumbuka dha fa Aayegipiti ooyakwawo.
12 Ihe Omuwa okwa kukutike omwenyo gwomukwaniilwa, naanaa ngaashi a tile, nomukwaniilwa ina pulakena we Moses naAaron.
13 Omuwa okwa lombwele Moses a ti: “Meneka ongula onene, u ka tsakaneke omukwaniilwa u mu lombwele kutya Omuwa, Kalunga kAahebeli, ota ti: ‘Laleka aantu yandje, opo ya ka simaneke ndje.
14 Ngashingeyi otandi ke ku tumina omageelo gandje agehe, ge ku hepeke ngoye mwene, omalenga goye naantu yoye, opo u ke shi tseye kutya kaku na ngu a fa ndje muuyuni auhe.
15 Ando nde ku dhenge pamwe naantu yoye noshivu, ando wa kombwa po nale kombanda yevi.
16 Ihe opo ndi ku ulukile oonkondo dhandje, onde ku kaleke ko u na omwenyo, opo esimano lyandje li taandele nuuyuni auhe.
17 Ihe natango owa tangalala nowa tindi okulaleka aantu yandje ya ye.
18 Ongula pethimbo ngaandika otandi ka tukula oshikungulu shoompawe oshidhigu shoka inaashi tseyika nale muEgipiti okuza ketameko ndongo onena.
19 Ngashingeyi lombwela ayehe naayihe u yi na, yi kale megumbo meni. Oompawe otadhi ka lokela kaantu nokiimuna ayihe tayi adhika pondje notayi si.’ ”
20 Omalenga gamwe gomukwaniilwa ngoka ga li ga tila oohapu dhOmuwa, oga fala aapika yawo niimuna yawo, yi ondame meni megameno.
21 Gamwe inaga pupa ko kelondodho lyOmuwa noye ethele aapika yawo niimuna yawo pondje.
22 Omuwa okwa lombwele Moses a ti: “Yeluthila okwooko kwoye kegulu, noompawe otadhi ka loka mevi alihe lyaEgipiti kaantu, kiimuna nokiimeno ayihe yokelundu.”
23 Moses sho a yeluthile ondhimbo ye kegulu, Omuwa okwa zigike iikogo nomindundumo noompawe, nolwaadhi olwa tsu mevi. Omuwa okwa tumu
24 oshikungulu oshidhigu shoompawe, noombadhi odha li tadhi shelagana. Osha li oshikungulu oshitilithi inaashi tseyika kuEgipiti hela a za.
25 Oompawe odha nyanyagula muEgipiti alihe ashihe sha li pondje, aantu niimuna ayihe. Osha thepagula iimeno ayihe momapya nokuteyagula po omiti adhihe.
26 Omukuma gwaGoshen, moka mwa kala Aaisraeli, omo amuke kaamwa li nando ompawe yimwe.
27 Omukwaniilwa okwi ithana Moses naAaron e ta ti: “Nena onda yono. Omuwa oku li mondjila, tse naantu yandje otwa puka.
28 Galikaneni Omuwa! Omindundumo noompawe odha lunda pombanda! Otandi uvaneke oku mu laleka, itamu kala mo we muka olule.”
29 Moses okwa ti kuye: “Mbalambala sho tandi zi mo moshilando, otandi ka yelutha omaako gandje megalikano kOmuwa. Omindundumo otadhi ka mwena noitaku ka kala we oompawe, opo u tseye kutya evi olyOmuwa.
30 Ihe ondi shi shi kutya ne nomalenga goye natango ihamu tila Omuwa Kalunga.”
31 Iigwanga yoliina niishokelya oya li ya thepagulwa po, oshoka iishokelya oya li ya vala, niigwanga yoliina oya li ya sheneka oongala.
32 Ihe omaludhi gosiima inaga yonwa po, oshoka ogo ga hugunina okutiligana.
33 Moses okwa zi pomukwaniilwa e ta piti mo moshilando e ta yelutha omaako ge megalikano kOmuwa. Omindundumo, oompawe nomvula oya sheka.
34 Ihe omukwaniilwa sho a mono kutya omvula, omindundumo noompawe odha mwena, okwa yono ishewe. Oye nomalenga ge oya kukutike oomwenyo dhawo,
35 Ngaashi Omuwa e shi lombwelele Moses. Omukwaniilwa ina laleka Aaisraeli ya ye.
1 Omuwa okwa lombwele Moses a ti: “Inda komukwaniilwa, oshoka onda kukutike omwenyo gwe noomwenyo dhomalenga ge, opo ndi tsakanithile iinyengandunge mbika mokati kawo,
2 nopo u wape okuhokololela aamwoye naatekulu yoye, nkene nda goyapaleke Aayegipiti, sho nda tsakanitha iinyengandunge mbika. One amuhe otamu ka tseya kutya ongame Omuwa.”
3 Moses naAaron oya yi komukwaniilwa e taa ti kuye: “Omuwa Kalunga kAahebeli ota ti: ‘Sigo uunake to tindi okuvulika kungame? Laleka aantu yandje ya ye, opo ya ka simaneke ndje.
4 Ngele oto tindi natango, ongula otandi ka undulila oombahu moshilongo shoye.
5 Otadhi ka kala odhindjidhindji tadhi siikile evi. Otadhi ka lya po ashihe shoka sha thigwa po koompawe, nomiti ndhoka dha hupu ko.
6 Otadhi ka udha muuwa woye nomomagumbo gomalenga goye nogaantu yoye ayehe. Owindji wadho inau monika nokoohokulu, hela ya kalele kombanda yevi.’ ” Nena Moses okwa pilamene ko e ta shuna.
7 Omalenga gomukwaniilwa oga ti kuye: “Sigo uunake omulumentu nguno te tu talitha omalwa? Laleka aalumentu Aaisraeli ya ye, opo ya ka simaneke Omuwa, Kalunga kawo. Ou wete ko tuu kutya Egipiti otali ka teka po?”
8 Oyo noya galulile Moses naAaron komukwaniilwa, e ta ti kuyo: “Otamu vulu okuya, opo mu ka simaneke Omuwa, Kalunga keni. Oolye naanaa ya hala okuya?”
9 Moses okwa yamukula a ti: “Atuhe otatu ka ya, aanona yetu naakulupe yetu. Otatu yi naana yetu aamati naakadhona, oonzi niikombo noongombe dhetu, oshoka otatu ka dhana oshituthi, tu simaneke Omuwa.”
10 Omukwaniilwa okwa ti: “Otandi gana kOmuwa kutya itandi mu pitika nando, mu kuthe aakulukadhi yeni naanona! Osha yela kutya ne omu na iipotha.
11 Aawoo! Aalumentu oyo ayeke naa ye ndati, mu ka simaneke Omuwa, ngele osho mwa hala.” Oyo noya tidha po Moses naAaron pomukwaniilwa.
12 Omuwa okwa lombwele Moses a ti: “Yeluthila okwooko kwoye kombanda yevi lyaEgipiti alihe, opo oombahu dhi ye. Otadhi ya e tadhi li po ashihe hashi koko, ashihe shoka sha hupu ko koompawe.”
13 Moses okwa yelutha ondhimbo ye, Omuwa nokwa pendutha ombepo yokuuzilo tayi pepe noshilongo omutenya nuusiku auhe. Ongula sho kwa shi, oombahu odha holoka.
14 Odhe ya miiluku nodha halakana noshilongo ashihe. Odha li iiluku iinenenene yoombahu inaayi monika nale, noinayi monika we.
15 Odha siikile evi ndele tali ti tuu tye. Odha li po ashihe sha thigwa po koompawe, niiyimati yokomiti. MuEgipiti alihe inamu kala we efo li li komuti nenge oshimeno sha ziza.
16 Opo mpoka omukwaniilwa okwi ithana Moses naAaron onkolonkolo e ta ti: “Onda yono kOmuwa, Kalunga keni, nokune.
17 Dhiminii ndje po oondjo dhandje lumwe natango ne mu galikane Omuwa, Kalunga keni, a kuthe po egeelo ndika lyeso pungame.”
18 Moses okwa zi pomukwaniilwa e ta galikana Omuwa.
19 Omuwa okwa pepitha ombepo yokuuzilo ya piluka tayi zi kuuninginino, ndjoka ya yelutha po oombahu e tayi dhi undulile mEkololo lyaSues. MuEgipiti inamu kala we nando ombahu yimwe.
20 Omuwa okwa kukutike omwenyo gwomukwaniilwa noina laleka we Aaisraeli, ya ka ye.
21 Omuwa okwa lombwele Moses a ti: “Yeluthila okwooko kwoye kegulu, nomilema omiluudhe thokothoko, ngomuntu oto hala u tye oto dhi kwata, otadhi siikile evi alihe lyaEgipiti.”
22 Moses okwa yeluthile okwooko kwe kegulu, nomuEgipiti omwa kala omilema thokothoko omasiku gatatu.
23 Aayegipiti inaa vula we okumonathana, nokape na we ngoka a zi maandjawo pethimbo mpoka. Mpoka pwa li Aaisraeli, opwa li uuyelele.
24 Omukwaniilwa okwi ithana Moses e ta ti: “Otamu vulu okuya, mu ka simaneke Omuwa; aakulukadhi yeni naanona yeni otamu yi nayo wo. Ihe oonzi niikombo noongombe dheni nadhi kale po.”
25 Moses okwa yamukula a ti: “Tu pa wo iimuna mbyoka yoontselelandjambo noyomafikilondjambo okuyambela Omuwa, Kalunga ketu.
26 Aawoo, otatu yi niimuna yetu; itatu thigi po nando oshimwe. Tse yene otatu hogolola iimuna mbyoka tatu ka yambela Omuwa, Kalunga ketu. Nokuli inatu tseya iimuna oyini tatu ka yambela Omuwa, sigo twa thiki ko.”
27 Omuwa okwa kukutike omwenyo gwomukwaniilwa, noine ya etha ya ye.
28 Okwa ti kuMoses: “Za po pungame! Inandi ku mona we! Esiku to shi ningi, oto si!”
29 Moses okwa yamukula a ti: “Owa popi dhu uka. Itandi ka mona we oshipala shoye.”
1 Omuwa okwa lombwele Moses a ti: “Otandi tumu owala egeelo limwe komukwaniilwa gwaEgipiti naantu ye. Nena ote mu laleke mu ye. Nokuli ote ke mu tidha mo moshilongo.
2 Ngashingeyi lombwela Aaisraeli, ya lombwelathane ayeheyehe to ti naa hehele kaashiinda yawo iinima yiingoli noyiisiliveli.”
3 Omuwa okwa simanekitha Aaisraeli kAayegipiti. Eeno, nomalenga go gene wo naantu ayehe oya simaneke Moses omuntu omunene.
4 Moses okwa ti komukwaniilwa: “Omuwa ota ti: ‘Pokati kuusiku otandi taakana Egipiti,
5 nomumati kehe osheeli muEgipiti ota ka sa, okuza kosheeli shomukwaniilwa, ngoka te mu landula muukwaniilwa, sigo okosheeli shomukulukadhi omupika, ngoka ha tsu koshini. Iisheeli ayihe yiimuna wo oyi na okusa.
6 MuEgipiti otamu ka kala elilagano enene, noshinima shika inashi kala mo nale noitashi ka kala mo we.
7 Ihe kape na nokuli ombwa tayi ka gwedha Aaisraeli nenge iimuna yawo. Nena otamu ka tseya kutya ngame Omuwa tandi ningi eyooloko pokati kAayegipiti nokAaisraeli.’ ”
8 Moses okwa tsikile ko ta ti: “Omalenga goye agehe otage ke ya kungame e tagi inyongamene kungame nokwiindila ndje, ndi kuthe po aantu yandje ayehe, ndi ze po ndi ye. Konima yaambika otandi ka ya.” Nena Moses okwa zi po pomukwaniilwa a geya omulilo gwowala.
9 Omuwa okwa lombwele Moses e ta ti: “Omukwaniilwa ota ka tinda oku mu pulakena, opo ndi longe iinyengandunge iinene muEgipiti.”
10 Moses naAaron oya tsakanitha iinyengandunge mbika ayihe koshipala shomukwaniilwa, ihe Omuwa okwa kukutike omwenyo gwe, noina laleka Aaisraeli ya ze mo moshilongo she.
1 Omuwa okwa lombwele Moses naAaron muEgipiti ta ti:
2 “Omwedhi nguka nagu ninge omwedhi gwotango gwomumvo gweni.
3 Lombweleni egongalo alihe lyaIsrael omakumagidho ngaka: Mesiku etimulongo lyomwedhi nguka omulumentu kehe na hogolole onzigona nenge oshikombo omolwaanegumbo.
4 Egumbo lye ngele eshona okumana po oshimuna ashihe, oye pamwe namushiinda naa topole oshimuna pokati pawindji waanegumbo ya gwanena shaa ngoka a lye.
5 Omu na okuhogolola onzi nenge oshikombo, ihe nashi kale oshilumentu shomumvo gumwe shaa na oshipwe.
6 Ongulohi yesiku etimulongo netine lyomwedhi egongalo alihe lyaIsrael nali yi dhipage.
7 Aantu naa kuthe ko ombinzi ye yi gwayeke kiikulo nopiipamba yomiyelo dhomagumbo ngoka tamu lilwa iimuna.
8 Uusiku mboka onyama nayi yothwe, notayi liwa niigwanga iilulu pamwe niikwiila inaayi tulwa efulika.
9 Onyama inamu yi lya ombihu nenge ya fumikwa, ihe yi lyeni ya yothwa ayihe, nomutse nomagulu nomandjandja.
10 Inamu hupitha ko yimwe yi thike kongula; ngele otapa hupu sha, shi lungunitheni.
11 Yi lyii po mbala, ne mwa zalela olweendo, oongaku koompadhi noondhimbo dheni pomake. Shika osho oshituthi shaPaasa shokusimaneka ndje, ngame Omuwa.
12 “Uusiku mboka otandi ka taakana evi lyaEgipiti, nokudhipaga aatango ayehe aalumentu, ayehe yaantu noyiimuna, note pangula iikalunga ayihe yaEgipiti. Ongame Omuwa.
13 Ombinzi kiikulo yomiyelo otayi ka kala endhindhiliko okudhimbululitha omagumbo moka mu li mo. Shampa nda mono ombinzi, otandi mu pitilile po noitandi mu etele oshiponga, sho tandi geele Aayegipiti.
14 Dhaneni esiku ndika li ninge oshituthi shelongelokalunga, li mu dhimbuluthe shoka ngame Omuwa nda ningi. Kaleni tamu li dhana nomaluvalo geni sigo aluhe.”
15 Omuwa okwa ti: “Omasiku gaheyali inamu lya iikwiila ya tulwa efulika; lyeni owala iikwiila inaayi tulwa efulika. Mesiku lyotango kuthii mo efulika alihe maandjeni, oshoka ngele ope na ngoka ta li oshikwiila sha tulwa efulika momasiku ngoka gaheyali, ita talwa we gwomaantu yandje.
16 Mesiku lyotango nomesiku etiheyali otamu gongala melongelokalunga. Omasiku ngoka inamu longa sha, ihe omu na ngaa okuteleka iikulya.
17 Dhiginineni oshituthi shika, oshoka mesiku ndika onda tembudha omazimo geni muEgipiti. Omathimbo agehe tage ya, omu na okudhana oshituthi mesiku ndika.
18 Okuza kongulohi yesiku etimulongo netine lyomwedhi gwotango sigo ongulohi yesiku etimilongombali nolyotango inamu lya oshikwiila sha tulwa efulika.
19 Omasiku gaheyali efulika inali monika mo momagumbo geni, oshoka shaa ngoka, omuvalelwamo nenge omukwiilongo, ta li oshikwiila sha tulwa efulika, ita ka yalulilwa maantu yandje.”
20
21 Moses okwa hiya aawiliki ayehe yaIsrael e ta ti kuyo: “Shaa ngoka gwomune oku na okuhogolola onzigona nenge oshikombo noku shi dhipaga, opo omagumbo geni ga dhane Opaasa.
22 Kutheni oshisopi noku shi yaya mokayo moka mu na ombinzi yoshimuna, ne mu gwayeke ombinzi kiikulo nopiipamba yomiyelo dhomomagumbo geni. Inapa kala nando omuntu ta piti pondje, sigo taku shi.
23 Omuwa sho ta taakana Egipiti ta dhipaga Aayegipiti, ota mono ombinzi kiikulo nopiipamba yomiyelo noita pitika omuyengeli gweso a ye momagumbo geni e mu dhipage.
24 Ne naana yeni omu na okuvulika koshipango shika sigo aluhe.
25 Sho tamu ka ya mevi ndyoka Omuwa a uvaneke oku li mu pa, omu na okutsakanitha omusindilo nguka.
26 Aana yeni nge taye mu pula taa ti: ‘Iinima mbino otayi ti ngiini?’
27 Otamu yamukula tamu ti: ‘Oyo eyambo lyOpaasa lyokusimaneka Omuwa, molwashoka a pitilila omagumbo gAaisraeli muEgipiti. Okwa dhipaga Aayegipiti, ihe okwe tu hupitha.’ ” Aaisraeli oya tsu oongolo noya galikana.
28 Opo ihe oya yi noya ningi shoka Omuwa a lombwele Moses naAaron.
29 Pokati kuusiku Omuwa okwa dhipaga aatango ayehe muEgipiti okuza komuna gwomukwaniilwa, ngoka a li te mu landula melelo, sigo okomuna gwonkwatwa, ngoka e li mokakuma komeni lyevi; aatango ayehe yiimuna oya dhipagwa wo.
30 Uusiku mbwiyaka omukwaniilwa, omalenga ge nAayegipiti ayehe yalwe oya penduka noya lili. Omwa li oosa muEgipiti alihe, oshoka kamwa li nando egumbo moka inaamu sa omumati.
31 Uusiku tuu mboka omukwaniilwa okwi ithana Moses naAaron e ta ti: “Indeni, one nAaisraeli yeni. Zii mo moshilongo shandje; indeni mu ka simaneke Omuwa, ngaashi mwi indile.
32 Indeni noonzi niikombo noongombe dheni. Galikanenii ndje wo, ndi yambekwe.”
33 Aayegipiti oya ulumike aantu ye endelele ya thige po oshilongo shawo. Oya ti: “Otatu ka sa po atuhe, ngele itamu yi.”
34 Aantu oyu udha uuyo wawo nondombo inaayi tulwa efulika e taye u mangele miikayiwa noye u humbata komapepe gawo.
35 Aaisraeli oya ningi, ngaashi ya lombwelwa kuMoses, e taa hehela Aayegipiti iinima yiingoli noyiisiliveli noonguwo.
36 Omuwa okwa tula mAayegipiti ondjaalela ya yaalele Aaisraeli e taye ya pe shoka ya pula. Pamukalo nguka Aaisraeli oya faalele uuyamba wAayegipiti.
37 Aaisraeli oya zi muRameses yu uka kuSukkot. Ayehe kumwe aalumentu omayuvi omathele gahamano, aakiintu naanona inaa yalulwa.
38 Aantu yalwe aayeni pamwe noonzi niikombo noongombe odhindji oya yi pamwe nayo.
39 Mondombo ndjoka ya zi nayo muEgipiti, oya yotha mo iikwiila inaayi lulikwa. Ondombo oya li inaayi lula, oshoka muEgipiti oya tidhwa mo neulumo, noya li yaa na olweedhe okwiilongekidhila onguta.
40 Aaisraeli oya kalele muEgipiti omimvo 430.
41 Mesiku ndyoka omimvo 430 sho dha tsakana, omazimo agehe goshigwana shOmuwa oga tembuka muEgipiti.
42 Okwa li uusiku, Omuwa sho a tonatela nokwe ya tembudha mo muEgipiti; uusiku tuu mbuka Aaisraeli ayehe naa dhiginine ya kale ya tonata, opo ya simaneke Omuwa sigo okomaluvalo agehe.
43 Omuwa okwa lombwele Moses naAaron ta ti: “Omautho gOpaasa ogo ngaka: Kape na omukwiilongo ta li uulalelo waPaasa,
44 ihe omupika kehe ngoka we mu landa, ota vulu oku u lya, ngele we mu fukalekitha tango.
45 Kape na omweendanandjila nenge omulongi a hehelwa te u li.
46 Uulalelo auhe nau lilwe megumbo moka wa telekelwa; inau falwa pondje. Inamu nyanyula nando esipa limwe lyoshimuna.
47 Egongalo alihe lyaIsrael nali dhane oshituthi shika,
48 ihe inashi liwa kaafukolume nando. Ngele ope na omukwiilongo a kala mokati keni nokwa hala okudhana Opaasa, a simaneke Omuwa, nena fukalekitheni aalumentu ayehe yomaandjawo. Nena ota vulu okuyalulwa ngaashi omuvalwa Omuisraeli nota yi mongundu yoshituthi.
49 Omautho ngaka otaga kwatelele mo aavalwa Aaisraeli naakwiilongo mboka ya kala mokati keni.”
50 Aaisraeli ayehe oya vulika noya ningi, ngaashika Omuwa a lombwele Moses naAaron.
51 Esiku ndyoka Omuwa okwa tembudha mo Aaisraeli muEgipiti.
1 Omuwa okwa lombwele Moses a ti:
2 “Yapulilii ndje aatango ayehe aalumentu, oshoka omutango kehe Omuisraeli omulumentu nomutango kehe gwoshimuna ogwandje.”
3 Moses okwa lombwele aantu a ti: “Dhimbulukweni esiku ndika, uuna ndoka mwa tembuka muEgipiti, moka mwa li aapika. Esiku olyo ndika Omuwa e mu tembudha mo koonkondo dhe oonene. Inamu lya iikwiila ya tulwa efulika.
4 Otamu tembuka muEgipiti mesiku ndika momwedhi gwotango, omwedhi Abib.
5 Omuwa okwa uvanekele oohokulu nokugana e mu pe evi lyAakaanana, Aaheti, Aayamori, Aahevi nAayebusi. Shampa e mu fala mevi ndyoka lya tondoka omahini nomagadhi goonyushi, omu na okudhana oshituthi momwedhi gwotango omumvo kehe.
6 Omasiku gaheyali omu na okulya iikwiila inaayi tulwa efulika nomesiku etiheyali oku na oshituthi shokusimaneka Omuwa.
7 Omasiku gaheyali inamu lya iikwiila yi na efulika; moshilongo shoye ashihe inamu kala nande efulika nenge ondombo ya lulikwa.
8 Uuna oshituthi tashi tameke, fatululila omumwoye omumati kutya otandi ningi ngeyi, oshoka Omuwa okwe shi ningile ndje, sho nda tembuka muEgipiti.
9 Oshinima shika nashi kale edhimbulukitho lya fa lya mangelwa koshikaha shoye nenge li li moshipala shoye; otashi ku dhimbulutha okutsikila okutotomona nokwiilonga ompango yOmuwa, oshoka Omuwa okwe ku tembudha muEgipiti koonkondo dhe oonene.
10 Dhaneni oshituthi shika mesiku lyu uthwa omumvo kehe.”
11 “Omuwa ote ku fala mevi lyAakaanana, ndyoka e li ku uvanekele nokugana, nosho wo oohokulu. Shampa e li ku pe,
12 ou na okuyambela Omuwa omumati kehe osheeli. Osheeli kehe shiimuna oshOmuwa,
13 ihe oshi na okukulilwa, ngele osheeli shokasino, u yambe onzigona peha lyasho. Ngele ino hala okukulila okasino, teya othingo yako. Ou na okukulila osheeli shoye shomumati.
14 Konakuyiwa omumwoye omumati nge te ku pula kutya shika otashi ti ngiini, mu yamukula u tye: ‘Omuwa okwe tu tembudha muupika muEgipiti koonkondo dhe oonene.
15 Omukwaniilwa gwaEgipiti sho a li a kukutika omwenyo gwe nokwa tindi oku tu laleka tu tembuke, Omuwa okwa dhipaga aatango ayehe aalumentu muEgipiti noyiimuna wo. Omolwashoka tatu yambele Omuwa omutango kehe gwoshimuna oshilumentu, ihe aana yetu aamati ohatu ya kulile.
16 Shika nashi kale edhimbulukitho lya fa lya mangelwa koshikaha shoye nenge li li moshipala shoye; otashi ku dhimbulutha kutya Omuwa okwe tu tembudha muEgipiti koonkondo dhe oonene.’ ”
17 Omukwaniilwa gwaEgipiti sho a laleke aantu ya ye, Kalunga ine ya fala mondjila yu uka komunkulo gwaFilistia, nando oyo ya li ondjila ya tetula. Kalunga okwa ti: “Inandi hala aantu ya lundulule omadhiladhilo gawo e taa shuna kuEgipiti, shampa ya dhimbulula nani kutya otaa ka kondja.”
18 Ndele okwe ya fala nondjila ya dhingoloka mombuga yu uka kEkololo lyaSues. Aaisraeli oya li ya homata, sho ya tembuka.
19 Moses okwa kutha iipongo yaJosef, ngaashi Josef a uvanekitha Aaisraeli nokugana ye shi ninge. Josef okwa tile: “Kalunga nge te mu mangulula, omu na okufaalela iipongo yandje mu ze nayo mpaka.”
20 Aaisraeli oya zi muSukkot e taa ka yunga oontanda puEtam kooha dhombuga.
21 Omutenya Omuwa okwe ya tetekelele moshikogo shomuzile e ya ulukile ondjila, nuusiku okwe ya tetekelele moshikogo shomulilo e ya minikile, opo ya vule okweenda uusiku nomutenya.
22 Oshikogo shomunzile osha li aluhe komeho gaantu omutenya aguhe, nuusiku oshikogo shomulilo.
1 Omuwa okwa lombwele Moses a ti:
2 “Lombwela Aaisraeli ya shune ya ka yunge oontanda peelo lyaPi Hahirot pokati kaMigdol nEfuta etiligane, popepi naBaal Zefon.
3 Omukwaniilwa ota ka dhiladhila kutya Aaisraeli otaye endagula noshilongo ya kondekwa kombuga.
4 Otandi ka kukutika omwenyo gwe note ke mu landula, ihe esindano lyandje lyokusinda iita ye otali ka simanekitha ndje. Nena Aayegipiti otaa ka tseya kutya ongame Omuwa.” Aaisraeli oya ningi, ngashika ya lombwelwa.
5 Omukwaniilwa gwaEgipiti sho a lombwelwa kutya aantu ya yi, ye nomalenga ge oyi itedhulula e taa ti: “Otwa ningi ngiini? Otwe etha Aaisraeli ya ye, e tatu kanitha aapika yetu!”
6 Omukwaniilwa okwa londo metembakwiita lye, netangakwiita lye oli ilongekidha.
7 Okwa piti mo nomatembakwiita ge agehe, mwa kwatelelwa mo ngoka omathele gahamano ga simana, taga wilikwa komalenga ge.
8 Omuwa okwa kukutike omwenyo gwomukwaniilwa e ta landula Aaisraeli mboka ya tembuka mo nomukumo.
9 Etangakwiita lyAayegipiti, uukambe wawo auhe, omatembakwiita naahingi oye ya landula e taye ya endje mo mpoka ya yunga oontanda pEfuta etiligane popepi naPi Hahirot naBaal Zefon.
10 Aaisraeli sho ya mono omukwaniilwa netangakwiita lye taye ya landula, oya haluka e taa kugile Omuwa ekwatho.
11 Oya ti kuMoses: “MuEgipiti kamwa li oombila nani? Owe tu tembudha mo, tu ye tu sile mombuga? Tala nduno shoka wa ningi, sho we tu tk embudha muEgipiti.
12 Inatu ku lombwela nale kutya etha, tu longele Aayegipiti? Oshoka okukala muupika oku vule okusila mombuga muka.”
13 Moses okwa yamukula a ti: “Inamu tila! Ikoleleleni ne mu tale ehupitho ndyoka Omuwa te mu hupitha nalyo nena ndjika; oshoka Aayegipiti mboka mwa tala itamu ya mono we sigo aluhe.
14 Omuwa ote mu kondjele, nane omu na okumwena thilu.”
15 Omuwa okwa lombwele Moses a ti: “Omolwashike to kugile ndje ekwatho? Lombwela aantu ya hume ko.
16 Yeluthila ondhimbo yoye kefuta. Omeya otaga ka topoka pokati, nAaisraeli otaa ka enda mefuta puukukutu.
17 Otandi ka kukutika oomwenyo dhAayegipiti notaye ya landulile mo, notandi ka likola esimano mesindano lyandje, sho te sindi omukwaniilwa, aakwiita ye, omatembakwiita ge naahingi ye.
18 Shampa nde ya dhenge, Aayegipiti otaa ka tseya kutya ongame Omuwa.”
19 Omuyengeli gwaKalunga ngoka a li komeho gosheendo shaIsrael, okwa lunduluka e ta yi konima yawo. Oshikogo shomunzile wo osha lundulukile konima yawo,
20 sha yi pokati kAayegipiti nAaisraeli. Kombinga yAayegipiti osha ningi omilema, ihe osha minikile Aaisraeli, onkee omatangakwiita inaga wapa okuhedhathana uusiku auhe.
21 Moses okwa yeluthile okwooko kwe kefuta, Omuwa nokwa tondokitha po efuta lya shunithwa kombepo ondhigu yokuuzilo. Oya pepe uusiku auhe e tayi kutha po omeya, omeya noga thikama. Omeya oga topoka pokati,
22 nAaisraeli oya yi mefuta taa ende puukukutu. Omeya oga thikama ga fa omakuma koombinga noombinga.
23 Aayegipiti oye ya landulile mo mefuta pamwe nuukambe wawo auhe, nomatembakwiita gawo naahingi.
24 Ongula yoontundumene Omuwa okwa talele Aayegipiti moshikogo shomulilo noshomunzile e te ya piyaganeke.
25 Omagulu gomatemba gawo oga yi montopo noya humu ko nuudhigu. Aayegipiti oya ti: “Omuwa ota kondjele Aaisraeli note tu kondjitha. Tu yeni ontuku.”
26 Omuwa okwa lombwele Moses e ta ti: “Yeluthila okwooko kwoye kombanda yefuta, nomeya otaga siikile Aayegipiti nomatembakwiita gawo naahingi.”
27 Moses okwa ganeke oshikaha she kombanda yefuta, nopokutenda kweluwa omeya oga shuna kumwe ga kale ngashika shito. Aayegipiti oya kambadhala ye ga ye ontuku, ihe Omuwa okwe ya undulile mefuta.
28 Omeya oga shuna kumwe e taga siikile omatembakwiita, aahingi netangakwiita lyAayegipiti alihe ndyoka lya landulile Aaisraeli mefuta; inapa hupa nando ogumwe.
29 Aaisraeli oya taaguluka efuta puukukutu pokati komakuma gaali gomeya koombinga noombinga.
30 Esiku ndyoka Omuwa okwa hupitha Aaisraeli miikaha yAayegipiti, nAaisraeli oya mono omidhimba dhawo komunkulo gwefuta.
31 Aaisraeli sho ya mono, Omuwa nkene a dhenge Aayegipiti koonkondo dhe oonene, oya tila Omuwa; oyo noyi itaale Omuwa nomuntu gwe Moses.
1 Moses nAaisraeli oyi imbile Omuwa eimbilo ndika tali ti: “Otandi imbile Omuwa, oshoka okwa mono esindano enene; uukambe naakayili yawo okwe ya undulile mefuta.
2 Omuwa oye oonkondo dhandje neimbilo lyandje; oye tuu a hupitha ndje. Oye Kalunga kandje, notandi mu tanga, Kalunga katate, notandi mu imbile molwuunene we.
3 Omuwa oye ofule; edhina lye Omuwa.
4 Aakwiita yAayegipiti nomatembakwiita gawo okwe ga umbile mefuta; omalenga gawo ga simana okwe ga dhogele mEfuta etiligane.
5 Uulefuta we ya siikile; oya ka ningina mo sigo okondaandelo ngomamanya.
6 Olulyo lwoye, Omuwa, olwa simana noonkondo; olwa tetagula aatondi iintimbu.
7 Mesimano lyoye enene owa dhenge aatondi yoye; ondjahi yoye ya hwama oye ya lungunitha ya fa iiyagaya.
8 Owa fudhile efuta, omeya noga thikama; oga thikama ga fa omakuma; ondaandelo yefuta oye ya pontundulu.
9 Omutondi okwa ti: ‘Etha utale ndi ya landule notandi ya kwata po; otii ka hakana uuyamba, ndi kuthe shoka nda hala; otandi pweya mo egongamwele lyandje, e te kutha po ayihe yawo.’
10 Omuwa, owa fudha lumwe aluke, nAayegipiti ya kulukile mo; oya ningine mo ya fa ooshumbu momeya omatilithi.
11 Omuwa, olye ngo e ku fa mokati kookalunga? Olye e ku fa meadhimo nomuuyapuki? Olye ta vulu okulonga iinyengandunge niilongankondo e ku fa?
12 Owa ganeke okwooko kwoye kwokokulyo, evi nolya nina po aatondi yetu.
13 Owa dhiginine euvaneko lyoye, owa wilike oshigwana shoka we shi mangulula; koonkondo dhoye owe shi wilike, u shi fale kevi eyapuki.
14 Iigwana oye shi uvu, oyo notayi kakama; Aafilisti oya kwatwa kehaluko.
15 Aawiliki Aaedom oya tila; aalumentu aanankondo yokuMoab otaa kakama; Aakaanana oya kanitha omukumo gwawo.
16 Ehaluko netilo lye ya lambele. Omuwa, oya tala oonkondo dhoye noya pugalala ya kumwa ko, osigo aantu yoye ya piti taa katuka — aantu tuu mboka wa mangulula muupika.
17 Owe ya eta mo e to ya tsike kondundu yoye, ehala ndyoka ngoye, Omuwa, we li ihogololele, li ninge onganda yoye, otempeli ndjoka ngoye mwene we yi tungu.
18 Ongoye, Omuwa, to kala omukwaniilwa aluhe sigo aluhe.”
19 Aaisraeli oye ende mefuta puukukutu. Ihe omatembakwiita gAayegipiti nuukambe wawo naahingi sho ya yi mefuta, Omuwa okwe ya siikile nomeya gefuta.
20 Omuhunganeki omukiintu Miriam, omumwayina gwaAaron, okwa kutha okantunda ke, naakulukadhi ayehe oye mu landula taa hiki uuntunda yo taa tembula.
21 Miriam okwe ya yamukula ti imbi ta ti: “Imbileni Omuwa, oshoka okwa mono esindano enene; uukambe naakayili yawo okwe undulile mefuta.”
22 Moses okwa kutha po Aaisraeli pEfuta etiligane e te ya fala mombuga Shur. Oye ende omasiku gatatu mombuga, ihe inayi itsa nando omeya.
23 Nena oye ya kehala hali ithanwa Mara, ihe omeya gamo omalulu inaa vula nando oku ga nwa. Omolwashoka ehala lya lukwa Mara.
24 Aantu oya ngungutulile Moses noya pula ya ti: “Otatu ka nwa shike?”
25 Moses okwa galikana Omuwa a pwila po, Omuwa nokwe mu ulukile oshiti shoka e shi umbile momeya, nomeya oga ningi omatoye, taga nuwa. Pehala mpoka Omuwa okwe ya pe iipango, ye yi dhiginine nokwe ya makele.
26 Okwa ti: “Ngele otamu vulika kungame shili mokugwanitha shoka tandi shi tala shu uka e tamu dhiginine iipango yandje, nena itandi mu geele ndi mu undulile nando olimwe lyomomahepeko ngoka nde ga undulile Aayegipiti. Ongame Omuwa, ngoka te mu aludha.”
27 Esiku lyanofu oye ya kuElim, nkoka kwa li oothithiya omulongo nambali nomilunga omilongo heyali. Oyo noya yungu ontanda yawo pomeya.
1 Egongalo alihe lyaIsrael olya zi po puElim nomesiku etimulongo netitano lyomwedhi omutiyali, sho ya zi muEgipiti, oye ya mombuga Sin, ndjoka ya li pokati kaElim naSinai.
2 Mombuga moka oya ngungutulile Moses naAaron
3 noya ti kuyo: “Otwa hala Omuwa andola e tu dhipagelele muEgipiti. Hwiyaka otwa li hatu kuutumba poombiga dhoonyama niikulya oyindjiyindji ngaashi twa hala. Ne omwe tu tembudha mo, mu tu ete mombuga muka, mu tu sithe kondjala.”
4 Omuwa okwa lombwele Moses e ta ti: “Ngashingeyi otandi ke mu lokithila iikulya megulu. Aantu naa ye ko esiku kehe, ya ka toole iikulya ya gwanena esiku ndyoka alike. Pamukalo nguka otandi ya makele ndi tale, ngele otaa landula omapukululo gandje.
5 Mesiku etihamano oye na okweeta mo oyindji lwaali yi vule yesiku limwe, ye yi longekidhe.”
6 Moses naAaron oya lombwele Aaisraeli ayehe ya ti: “Ongulohi yonena otamu ka tseya kutya Omuwa oye e mu tembudha mo muEgipiti.
7 Ongula nge kwa shi, otamu ka mona eadhimo lyOmuwa. Okwa uvu omayemato geni, sho tamu mu nyenyetele — eeno, omwe mu tamaneke, oshoka tse otatu gwanitha owala omalombwelo ge.”
8 Moses okwa ti natango: “Omuwa ote mu pe onyama yokulya ongulohi niikwiila ya gwana ongula, oshoka oku uvu engungutulo lyeni, sho mwe mu ngungutulile. Hatse mwa ngungutulile, aawe, omwa ngungutulile Omuwa.”
9 Moses okwa lombwele Aaron a ti: “Lombwela egongalo alihe li ye li thikame koshipala shOmuwa, oshoka oku uvu engungutulo lyawo.”
10 Aaron manga tu uvithile egongalo, oye mu pilamene ya taalela kombuga, nohaluka eadhimo lyOmuwa olya holoka moshikogo.
11 Omuwa okwa lombwele Moses a ti:
12 “Ondu uvu omangungutulo gAaisraeli. Ya lombwela kutya peningino lyetango sho taku wiwile, otaa ka mona onyama yokulya, nongula sho kwa shi, otaa ka mona eloolo lyiikwiila. Nena otaa ka tseya kutya ongame Omuwa, ngame oKalunga kawo.”
13 Ongulohi sho ye ya, okwa zi iimote oyindji noya halakana nontanda, nongula sho kwa shi, okwa li omume ya kunkula nontanda.
14 Omume sho ya kaha, okwa monika uunima uushuushuu wa fa uumuma uunenguni u li pevi. Owa li wa fa oompawe.
15 Aaisraeli sho ye u mono, inaye u tseya noya pulathana ya ti: “Shino oshikwashike?” Moses okwa ti kuyo: “Mbika iikwiila mbyoka Omuwa e mu pe mu lye.
16 Omuwa okwa gandja oshipango tashi ti, shaa ngoka gwomune na gongele shi thike poompumbwe dhe, oshiyelekitho shogomer komuntu kehe maandjawo.”
17 Aaisraeli oye shi ningi, yamwe oya gongele oshindji, nayamwe oshishona.
18 Sho ye shi yeleke, mboka ya gongele oshindji, inaa hupitha ko sha, naamboka ya gongela oshishona, inaa kokota. Shaa ngoka okwa gongele pampumbwe dhe.
19 Moses okwe ya lombwele a ti: “Inamu yi hupithila ongula.”
20 Yamwe oye shi ningi, inaa pulakena Moses, e taa hupitha ko sha. Ongula sho kwa shi, oya li yu udha omazinyo noyo ola, Moses nokwe ya geele.
21 Ongula kehe shaa ngoka okwa gongele shi thike poompumbwe dhe, nomutenya nge gwa tsu, mbyoka ya hupu ko otayi hemukile mevi.
22 Mesiku etihamano oya gongele lwaali yi vule iikulya yesiku limwe, oogomer mbali komuntu kehe. Aawiliki yegongalo ayehe oye ya kuMoses e taye shi mu lombwele,
23 oye nokwe ya lombwele ta ti: “Omuwa okwa gandja oshipango tashi ti kutya ongula esiku eyapuki lyevululuko, lye mu yapulilwa. Telekeni shoka tamu teleke, ne mu pake po shoka tamu paka po nena. Shoka tamu hupitha, shi pungulileni ongula.”
24 Oya pungula, ngaashi ya lombwelwa kuMoses, sigo esiku lyongula noinashi yonuka nenge shi ninge omazinyo.
25 Moses okwa ti: “Shi lyeni nena, oshoka nena Esabati, esiku lyevululuko lya yapulilwa Omuwa, noitamu ka mona we iikulya pondje yontanda.
26 Omu na okugongela iikulya omasiku gahamano, ihe mesiku etiheyali, esiku lyevululuko, itaku kala sha.”
27 Mesiku etiheyali yamwe yomaantu oya yi ya ka konge iikulya, ihe inaa mona ko sha.
28 Omuwa okwa ti kuMoses: “Sigo uunake aantu taa tindi okuvulika kiipango yandje?
29 Dhimbulukweni kutya ongame Omuwa nde mu pe esiku lyevululuko, nomolwashoka mesiku etihamano tandi mu pe aluhe iikulya ya gwana omasiku gaali. Shaa ngoka na kale mpoka a kala mesiku etiheyali, ina za mo maandjawo!”
30 Ano aantu inaa longa sha mesiku etiheyali!
31 Aaisraeli iikulya mbyoka oye yi luku “Omanna.” Oya li ya fa oombuto oonshona oontokele, yi na omulyo gwa fa guumbisikiti womagadhi goonyushi.
32 Moses okwa ti: “Omuwa okwe tu lombwele, tu kuthe ogomer yomanna tu yi pungulile omaluvalo tage ke ya, opo ya mone iikulya mbyoka e tu palutha nayo mombuga, sho e tu tembudha muEgipiti.”
33 Moses okwa ti kuAaron: “Kutha okayo e to tula mo ogomer yu udha omanna. Ka tula koshipala shOmuwa, opo omanna yi pungulilwe omaluvalo getu.”
34 Aaron okwe yi tula komeho goshikethahangano, yi pungulwe, ngaashi Omuwa a lombwele Moses.
35 Aaisraeli oya lile omanna omimvo omilongo ne, sigo ya thiki mevi lyaKaanan, moka ya tula.
36 (Ogomer yimwe oolita 20.)
1 Egongalo alihe lyaIsrael olya zi mo mombuga Sin, lya zi mehala limwe e tali yi kekwawo palombwelo lyOmuwa. Oya yungu ontanda muRefidim, ihe kamwa li omeya gokunwa.
2 Oya ngungutulile Moses noya ti: “Tu pa omeya tu nwe.” Moses okwa yamukula a ti: “Omolwashike tamu ngungutula? Omolwashike tamu hindi Omuwa?”
3 Ihe aantu oya li ya sa enota e taa tsikile okungungutulila Moses. Oya ti: “Omolwashike we tu tembudha mo muEgipiti? Ou tu dhipage po tse naana yetu niimuna yetu, tu se po kenota?”
4 Moses okwa galikana Omuwa e ta ti: “Aantu mbano otandi ya ningi ngiini? Oya hala nokuli ya dhipage ndje nomamanya.”
5 Omuwa okwa lombwele Moses a ti: “Kutha aawiliki yamwe yAaisraeli e to yi pamwe nayo komeho goshigwana. Faalela ondhimbo yoye ndjoka wa dhengele nayo Niili.
6 Otandi ka thikama komeho goye pemanya pondundu Sinai. Dhenga emanya, nomeya otaga ka za mo, ga nuwe kaantu.” Moses nokwe shi ningi montaneho yaawiliki yaIsrael.
7 Ehala ndyoka olya lukwa Massa naMeriba molwashoka Aaisraeli oya tamanana noya hindi Omuwa, sho ya pula ya ti: “Omuwa omo tuu e li mokati ketu nenge aawe?”
8 Aayamaleki oye ya noya ponokele Aaisraeli muRefidim.
9 Moses okwa lombwele Josua a ti: “Ihogololela aalumentu yamwe, u ye u ka kondjithe Aayamaleki ongula. Otandi ka thikama kondungu yondundu nda yelutha ondhimbo ndjoka Kalunga a lombwele ndje ndi yi humbate.”
10 Josua okwa ningi, ngaashi Moses e mu lombwele, e ta zi mo a ka kondjithe Aayamaleki, manga Moses, Aaron naHur ya londo kondungu yondundu.
11 Moses shampa a yelutha omaako ge, Aaisraeli oya sindi, ihe shampa e endjeleleke omaako ge, nena Aayamaleki oya tameke okusindana.
12 Omaako gaMoses sho ga vulwa, Aaron naHur oya kutha emanya e taye mu kuutumbike ko, manga yo ya thikama kombinga nombinga ya yelutha omaako ge, ye ga yelutha sigo etango tali ningine.
13 Pamukalo nguka Josua okwa dhenge Aayamaleki e te ya sindi thilu.
14 Nena Omuwa okwa lombwele Moses e ta ti: “Nyola shika membo, shi ninge edhimbulutho. Lombwela Josua kutya Aayamaleki otandi ke ya hanagula po thiluthilu.”
15 Moses okwa tungu oshiyambelo e te shi luku “Omuwa oye epandela lyandje.”
16 Okwa tsikile a ti: “Yelutheni epandela lyOmuwa pombanda. Omuwa oku na olugodhi nAayamaleki okuza koluvalo sigo okoluvalo.”
1 Hemweno yaMoses, Jetro omuyambi gwaMidian, okwa kundana ashihe shoka Kalunga a ningile Moses noshigwana shaIsrael, sho e shi tembudha muEgipiti.
2 Okwe ya kuMoses, e etelele omukulukadhi gwaMoses Sippora, ngoka Moses e mu shunine kaandjawo.
3 Sippora okwe ya noyana aamati yaali, Gersom naElieser. Moses okwa tile: “Onda ningi omukwiilongo mevi lyuundjendi,” nokwa luku omwana gumwe Gersom.
4 Okwa tile ishewe: “Kalunga katate okwa kwatha ndje e ta hupitha ndje mokudhipagwa komukwaniilwa gwaEgipiti;” nosho a luku omumati omukwawo Elieser.
5 Jetro okwe etelele omukulukadhi gwaMoses noyana aamati yaali mombuga, moka Moses a li a yunga ontanda pondundu yaKalunga.
6 Okwa tumu elaka kuMoses kutya oye li mondjila taye ya.
7 Moses okwa piti mo a yi e ke mu tsakaneke. Okwe mu inyongamene e te mu thipi komilungu. Oyu uhalekathana nokupulathana, nkene ye li po e taa yi ketsali lyaMoses.
8 Moses okwa hokololele Jetro ayihe mbyoka Omuwa e yi ningile omukwaniilwa gwaEgipiti naantu ye, opo a mangulule Aaisraeli. Okwe mu hokololele wo omaudhigu ngoka ya piti mugo mondjila nonkene Omuwa e ya hupitha.
9 Jetro sho u uvu ayihe mbika, okwa nyanyukwa
10 nokwa ti: “Omuwa na hambelelwe, ngoka e mu hupitha komukwaniilwa gwaEgipiti naantu ye! Omuwa na hambelelwe, ngoka a hupitha aantu ye muupika!
11 Ngashingeyi onda tseya kutya Omuwa oye omunene e vule ookalunga ayehe, oshoka a longo shika, Aayegipiti sho ya hepeke Aaisraeli noku ya dhina.”
12 Nena Jetro, hemweno yaMoses, okwe eta omafikilondjambo noontselelandjambo okuyambelwa Kalunga; naAaron naawiliki yaIsrael ayehe oya ka lya pamwe naye iikulya iiyapuki koshipala shaKalunga.
13 Esiku lyanofu Moses hela a kuutumbile tu utha iihokolola mokati kaantu, nokwa li e na uupyakadhi okuza ongula sigo ongulohi.
14 Hemweno Jetro sho a mono ayihe mbyoka Moses ta ningi, okwa pula a ti: “Aantu oto ya ningile ano ngiini? Omolwashike ongoye awike to longo, naantu ya thikama ngaa mpano ongula sigo uusiku taa pula omayele kungoye?”
15 Moses okwa yamukula a ti: “Ondi na oku shi ninga, oshoka aantu otaye ya kungame yi ilonge ehalo lyaKalunga.
16 Uuna yaali ye na oontamanana, otaa ya kungame, nangame otandi tokola ngoka gwomuyo kee na uusama e tandi ya hokololele omautho niipango yaKalunga.”
17 Nena hemweno yaMoses okwa ti: “Omukalo nguka wa lamba kagu shi omwaanawa.
18 Oto ivulitha ngoye mwene naantu mbaka. Iilonga mbika iidhigu, ku yi vulu ongoye awike.
19 Ngashingeyi otandi ku pe omayele omawanawa, Kalunga nota kala pamwe nangoye. Kalela po aantu koshipala shaKalunga nokufala oontamanana dhawo kuye.
20 Ya nongeka iipango noku ya fatululila, nkene ye na okukala naashoka ye na okulonga.
21 Ndele hogolola mo moshigwana ashihe aalumentu yamwe ya yeleka, u ya langeke aawiliki yasho okutonatela oongundu dhomayuvi, dhomathele, dhomilongo ntano nodhomulongo. Naa kale aantu haa tila Kalunga, aainekelwa yo itaa pukithwa koombumbo.
22 Naa kale ethimbo alihe taa tokola oohapu. Iinima iidhigu ayihe naye yi ete kungoye, ndele yo otaa vulu okutokola oontamanana oonshona. Shika otashi ke ku pupalela, ngele taa topolelwa omutenge gwoye.
23 Ngele oto ningi ngeyi, ngaashi Kalunga ta ti, ito ivulitha nayi, naantu mbaka ayehe otaa vulu okuya kaandjawo ye na ombili.”
24 Moses okwa pulakene omayele gahemweno Jetro,
25 e ta hogolola aalumentu ya yeleka mokati kAaisraeli ayehe. Okwe ya langeke aawiliki yoongundu dhomayuvi, dhomathele, dhomilongo ntano nodhomulongo.
26 Oya tokola iinima ethimbo alihe. Iinima iidhigu oye yi fala kuMoses, ihe oontamanana oonshona oye dhi tokola yo yene.
27 Nena Moses okwa laleke hemweno Jetro, oye nokwa yi kaandjawo.
1 Aaisraeli oya zi puRefidim, nomesiku lyotango lyomwedhi omutitatu sho ya tembuka muEgipiti, oye ya mombuga yaSinai. Oya yungu ontanda ponyonga yondundu Sinai,
2
3 Moses nokwa londo kondundu kuKalunga. Omuwa okwe mu ithana kondundu e te mu lombwele, a lombwele Aaisraeli, oluvalo lwaJakob, a tye:
4 “Omwa mono shoka ngame, Omuwa, nda ningile Aayegipiti, nonkene nde mu humbata, ngaashi ekodhi tali humbata uunimona komawawa galyo, nonde mu eta huka.
5 Ngashingeyi, ngele otamu vulika kungame e tamu dhiginine ehangano lyandje, otamu ningi aantu yandje mwene. Evi alihe olyandje, ihe ne otamu ka ninga oshigwana shandje sha hogololwa,
6 oshigwana sha yapulilwa ndje ngame awike, notamu ka ninga onkwaniilwa yaayambi.”
7 Moses nokwa londoloka e ti ithana aawiliki yoshigwana ya gongale e te ya hokololele ayihe mbyoka Omuwa e mu lombwele.
8 Nena aantu ayehe oya yamukula kumwe oshita ya ti: “Otatu gwanitha ashihe shoka Omuwa a popi.” Moses okwa fala eyamukulo lyoshigwana kOmuwa.
9 Omuwa okwa ti kuMoses: “Otandi ke ya kungoye moshikogo oshinene, opo aantu ya uve ndje tandi popi nangoye noye ku itaale.” Moses okwa hokololele Omuwa shoka aantu ya popi.
10 Omuwa okwa ti kuye: “Inda kaantu u ya lombwele, yi iyapule nena nongula omolwelongelokalunga. Naa yoge oonguwo dhawo,
11 noyi ilongekidhile esiku lyahela. Mesiku ndyoka otandi kulukile kondundu Sinai montaneho yaantu.
12 Ninga ongamba ya dhingoloka ondundu, opo aantu yaahe yi taaguluke nando. Ya lombwela, yaa londe kondundu nenge ye yi gume. Ngele pe na ngoka te yi lyata ompadhi, na dhipagwe.
13 Na dhipagwe nomamanya nenge a yahwe niikuti pwaa na ngoka te mu gumu. Shika nashi ningwe, ngele omuntu nenge oshinamwenyo; nashi dhipagwe. Ihe enkuma ngele lya hikwa, nena aantu naa londe kondundu.”
14 Moses okwa londoloka kondundu e ta lombwele aantu yi ilongekidhile elongelokalunga. Oya yogo oonguwo dhawo,
15 Moses nokwa ti kuyo: “Ilongekidhileni esiku etitatu ne inamu lala naakiintu.”
16 Ongula yesiku etitatu okwa ningi omindundumo noombadhi tadhi shela, oshikogo oshinene osha holoka kondundu, nokwa uvika enkuma tali hikwa tali kugagana. Aantu ayehe montanda oya kala taa kakama kuumbanda.
17 Moses okwe ya piitha mo montanda, ya ka tsakaneke Kalunga, oyo noya thikama ponyonga yondundu.
18 Ondundu ayihe yaSinai oya kala tayi gundumuka olwithi, oshoka Omuwa okwa kulukile ko e li momulilo. Olwithi olwa gundumuka lwa fa olwithi lweziko enenenene, naantu ayehe oya li taa kakama noonkondo.
19 Ewi lyenkuma olya mbololoka nokukugagana pombanda. Moses okwa popi, naKalunga okwe mu yamukula mendundumo.
20 Omuwa okwa kulukile kondungu yondundu Sinai e ti ithanene Moses kondungu yondundu. Moses okwa londo,
21 nOmuwa okwa ti kuye: “Kulukila pohi, u ka londodhe aantu yaa taaguluke ongamba, ye ye yo ya tale ndje. Ngele taye shi ningi, nena oyendji yomuyo otaa si.
22 Nokuli aayambi taa hedha popepi nangame, oye na okwiiyapula, opo ndaahe ya geele.”
23 Moses okwa ti kOmuwa: “Aantu itaa vulu okulonda ko, oshoka owe tu londodha wa ti: ‘Ningila ondundu olugumbo, u yi yapule.’ ”
24 Omuwa okwa yamukula a ti: “Kulukila pevi, u ka tale ko Aaron, mu ye naye. Ihe aayambi naantu inaa taaguluka ongamba, ya londe ye ye kungame, ote ningi ndi ya geele.”
25 Moses okwa kulukile pevi kaantu e te ya hokololele shoka Omuwa a ti.
1 Kalunga okwa popi oohapu ndhika a ti:
2 “Ongame Omuwa, Kalunga koye, nde ku tembudha muEgipiti, moka wa li omupika.
3 “Ino kala u na ookalunga yalwe koshipala shandje.
4 “Ino ihongela oshiyelekela nenge efano lyashaashoka megulu nenge kombanda yevi nenge momeya kohi yevi.
5 Ino yi inyongamena nenge u yi simaneke, oshoka ongame Omuwa, Kalunga koye, omulaadhi; otandi geele mboka haa tondo ndje sigo okoluvalo lwawo olutitatu nolutine.
6 Ihe otandi sile ohenda omayuvi mboka ye hole ndje notaa vulika kiipango yandje.
7 “Edhina lyandje ino li tumbulila iinima yowala, oshoka ongame Omuwa, Kalunga koye, tandi geele ayehe mboka taa tumbulile edhina lyandje iinima yowala.
8 “Dhimbulukwa esiku lyEsabati ngoye u li yapule.
9 Ou na omasiku gahamano moka to longo,
10 ihe esiku etiheyali olyo esiku lyevululuko lya yapulilwa ndje. Mesiku ndyoka kape na ngoka ta longo — ngoye mwene, aamwoye, aapika yoye, iimuna yoye nenge aakwiilongo ya kala moshilongo sheni.
11 Momasiku gahamano ngame, Omuwa, onda shiti egulu nevi nefuta naayihe yi li mo, ihe mesiku etiheyali onda vululukwa. Omolwashoka ngame, Omuwa, nda yambeke esiku lyEsabati nonde li yapula.
12 “Simaneka ho nanyoko, opo u kale u na omwenyo omule mevi ndyoka tandi ke li ku pa.
13 “Ino dhipaga.
14 “Ino hondela.
15 “Ino yaka.
16 “Ino lundila mukweni.
17 “Ino haluka egumbo lyamukweni; ino haluka omukiintu gwamukweni, omupika gwe, oongombe nenge uusino we, nenge eliko lye kehe.”
18 Aantu sho yu uvu endundumo nenkuma tali hikwa e taa mono olwaadhi nondundu sho tayi gundumuka olwithi, oya kwatwa kehaluko noya thikama kokule.
19 Oya ti kuMoses: “Ngele to tu uvithile, otatu pulakene; ihe otwa tila kutya Omuwa ngele te tu uvithile, otatu ningi tu se.”
20 Moses okwa yamukula a ti: “Inamu tila; Kalunga ote mu yeleke owala, ngele ohamu mu tila tuu, opo mwaa yone.”
21 Ihe aantu oya kala ngaa kokule, Moses awike a hedha popepi noshikogo oshiluudhe, moka mwa li Kalunga.
22 Omuwa okwa lombwele Moses a lombwele Aaisraeli a tye: “One yene mwa mono nkene ngame, Omuwa, nde mu uvithile okuza kegulu.
23 Inamu ihambulila iikalunga yoshisiliveli nenge yoshingoli, mu yi longele ponto yandje.
24 Tungilii ndje oshiyambelo shevi, ne mu yambelele ndje ko omafikilondjambo nomakwatathanondjambo goonzi nogoongombe dheni. Mehala kehe nda hala edhina lyandje li simanekwe, otandi ya kune notandi mu yambeke.
25 Ngele tamu tungu oshiyambelo shomamanya, inamu tunga shomamanya ga hongwa, oshoka uuna tamu longitha epanda, otamu ga nyateke gaa opalele ndje we.
26 Inamu tungila ndje oshiyambelo shi na iilyatelelo yokulondela ko. Ngele tamu shi ningi, epenge lyeni otali monika, sho tamu londo ko.”
1 “Longa Aaisraeli oompango ndhika:
2 Ngele to landa omupika Omuhebeli, ne ku longele omimvo hamano. Momumvo omutiheyali oku na okumangululwa pwaa na iifuta yasha.
3 Ngele okwa ningi omupika gwoye, manga inaa ya mondjokana, ina ya nomukiintu nge ta manguluka, ihe ngele okwa li mondjokana, sho a ningi omupika gwoye, nena na ye nomukadhi.
4 Ngele omwene gwe te mu pe omukiintu e te mu valele aamati naakadhona, nena omukiintu naanona oyamwene gwe, nomulumentu ota yi awike.
5 Ihe ngele omupika ota ti, ye oku hole mwene gwe, omukadhi noyana noina hala okumanguluka,
6 nena mwene gwe ne mu fale kehala lyelongelokalunga e te mu tula pomweelo nenge piikulo yomweelo e tu ulula okutsi kwe noniho. Nena ota kala omupika gwe sigo aluhe.
7 “Ngele oku na omuntu ta landitha po omwana omukadhona a ninge omupika, ina mangululwa, ngaashi aapika aalumentu haa ningwa.
8 Ngele okwa landithwa po kungoka e mu hala a ninge omukadhi, ihe ine mu hala we, nena ne mu landithulule po, a shune kuhe; mwene gwe ita vulu oku mu landitha po kaakwiilongo, oshoka okwe mu henge po.
9 Ngele oku na omuntu ta landa omupika omukiintu, e mu pe omwana, nena na kale naye ngaashi omwana omukadhona.
10 Ngele ope na omuntu tu ushike omukiintu omutiyali, oku na okupa omukadhi gwotango natango iikulya, omizalo nuuthemba mboka a kala nawo nale.
11 Ngele ite mu gwanithile mbika itatu, ne mu ethe a ye pwaa na iikahu yasha.”
12 “Ngele oku na ngoka ta dhenge omuntu e ta si, na dhipagwe.
13 Ihe ngele oshiponga shohaluka, molwashoka ina dhiladhila a dhipage omuntu, nena ota vulu okufadhuka po, a ye kehala ndyoka tandi mu hogololele nota hupu.
14 Ihe uuna omuntu a geya e ta dhipaga mukwawo owina, na dhipagwe, nonando na ka holame koshiyambelo.
15 “Ngele oku na ngoka ta dhenge he nenge yina, na dhipagwe.
16 “Ngele ope na ngoka ta yaka po omuntu, ashihe shimwe ngele te mu landitha po nenge ta ningi omupika gwe, na dhipagwe.
17 “Ngele oku na ngoka ta tuku he nenge yina, na dhipagwe.
18 “Ngele oku na olugodhi, nagumwe ta dhenge mukwawo nemanya nenge nongonyo, ye ine mu dhipaga, nena ina geelwa. Ngele omudhengwa okwa kala momulalo,
19 nokomeho okwa aluka e ta yi pondje ti itsile koshiti, ngoka e mu dhengele oku na oku mu futila ethimbo lye ndyoka a kanitha noku mu sila oshimpwiyu, sigo a ti po nawa.
20 “Ngele oku na ngoka ta kutha oshitago e ta dhenge omupika gwe omulumentu nenge omukiintu, nomupika ta sile miikaha ye, na geelwe.
21 Ihe ngele omupika ina sa esiku ndyoka nenge konima yomasiku gaali, nena mwene gwe ina geelwa, oshoka oye eliko lye.
22 “Ngele oku na omukiintu omusimba, ndele ela tali gu mo, ye ina mona we oshiponga shilwe, ngoka e mu ehameke na fute, omulume shoka ta pula, nongaashi aatokolihapu ya koleke.
23 Ihe ngele omukiintu mwene oye a si, nena egeelo otali pula omwenyo gu futwe nomwenyo,
24 eho okeho, eyego okeyego, oshikaha okoshikaha, ompadhi okompadhi,
25 efiko okefiko, oshilalo okoshilalo, ombole okombole.
26 “Ngele ope na omuntu ta dhenge omupika gwe omulumentu nenge omukiintu keho e tali tsipuka mo, nena ne mu mangulule omolweho lye.
27 Ngele ota kula mo eyego lyomupika, ne mu mangulule omolweyego lye.”
28 “Ongombe ngele tayi tsu omuntu e ta si, nayi dhipagwe nomamanya, nonyama yayo inayi liwa, ihe mwene gwayo ina geelwa.
29 Ihe ongombe ngele ohayi tsu aantu, namwene okwe shi lombwelwa noine yi edhilila moshili — nena nge tayi tsu omuntu e ta si, nayi dhipagwe nomamanya, ndele namwene gwayo na dhipagwe wo.
30 Mwene gwayo ngele okwa ziminwa a fute oshikolo, a hupithe omwenyo gwe, nena na fute omwaalu aguhe gwa pulwa.
31 Ongombe ngele otayi tsu omumati nenge omukadhona e ta si, osho ngaa tashi ningwa, ngaashi sha tiwa.
32 Ongombe ngele otayi tsu omupika omulumentu nenge omukiintu e ta si, mwene gwayo na fute mwene gwomupika iimaliwa iisiliveli omilongo ndatu, nongombe nayi dhipagwe nomamanya.
33 “Ngele oku na omuntu itaa siikile onyombo, nenge te yi hupu ye ite yi siikile, ndele ongombe nenge okasino taka gwile mo,
34 na fute oshimuna shoka. Iimaliwa mbyoka ne yi pe mwene gwasho ye ta kala noshimuna shoka sha sa.
35 Ngele ongombe yomuntu tayi tsu ongombe yamukwawo e tayi si, nena aantu ayehe yaali naa landithe po ongombe yi na omwenyo, yo ya topolelathane iimaliwa. Otaa topolelathana wo onyama yongombe ya sa.
36 Ihe ngele okwa tseyika kutya ongombe ndjoka ohayi tsana, namwene gwayo ine yi dhiginina, nena na gandje ongombe yi na omwenyo ye a kuthe po ndjoka ya sa.”
1 “Ngele oku na omuntu ta yaka ongombe nenge onzi e te yi dhipaga nenge te yi landitha po, na fute oongombe ntano mongombe yimwe, noonzi ne monzi yimwe.
2 Na fute shoka a yaka. Ngele ke na sha, na landithwe po a ninge omupika, opo a fute shoka a yaka. Ngele oshimuna sha yakwa — ongombe nenge okasino nenge onzi — tashi monika miimuna ye, ota futu iyali molwoshimuna shimwe. “Omufuthi ngele ota fulu egumbo uusiku e ta kwatwa nota dhipagwa, nena ngoka e mu dhipaga ke na ondjo yedhipago. Ihe ngele otashi ningwa omutenya, nena oku na ondjo yedhipago.
3
4
5 “Ngele oku na omuntu te etha iimuna ye yi ye mepya nenge moshitsambe shomiviinu e tayi lyatagula mo nokulya po iimeno ya mena mepya lyamukwawo, na kuthe miilikolwa yomepya nenge moshitsambe she shomiviinu e yi fute.
6 “Ngele ope na omuntu ta hwameke omulilo mepya lye e tagu taandele sigo okepya lyaantu e tagu fike po iilya mbyoka tayi koko nenge mbyoka ya teywa noya ndumbilwa, omutomeki gwomulilo na fute oshiponga shoka.
7 “Ngele ope na omuntu ta zimine okupungula iimaliwa nenge iinima yilwe yamukwawo e tayi yakwa mo megumbo lye, omufuthi ngele okwa monika, na fute ayihe oohiyali.
8 Ihe omufuthi ngele ina monika, omuntu ngoka a li a pungula iinima, ne etwe kehala lyelongelokalunga, noko nkoka ta gana kutya ye ina yaka iinima yaantu.
9 “Moontamanana adhihe dhomaliko, mwa kwatelelwa oongombe, uusino, oonzi, omizalo nenge ekanitho lyasha shilwe, aantu mboka taa tamananene eliko, naa falwe kehala lyelongelokalunga. Ngoka ta hololwa kuKalunga kutya oye omunandjo, na fute mukwawo lwaali.
10 “Ngele ope na omuntu ta zimine a kale nokasino kamukwawo nenge ongombe nenge onzi nenge oshimuna shilwe, noshimuna tashi si nenge tashi mono oshiponga nenge tashi yiwa nasho mokuluwa, nongele kaku na oonzapo,
11 omuntu ngoka na ye kehala lyelongelokalunga e ta gana kutya ye ina yaka oshimuna shomuntu. Oshimuna ngele inashi yakwa, mwene gwasho ita futwa sha, nomudhiginini ita pumbwa okufuta sha;
12 ihe oshimuna ngele osha yakwa po, omudhiginini na fute mwene gwasho.
13 Ngele osha lika po kiilikama, omudhiginini ne ete iipongo yi ninge onzapo; ita pumbwa okufuta shoka sha lika po kiilikama.
14 “Ngele ope na omuntu ta hehela mukwawo oshimuna notashi adhika koshiponga nenge tashi si mwene manga kee po, oku na oku shi futa.
15 Ihe ngele osha ningwa mwene opo e li, nena ita futu. Ngele oshimuna osha hehelwa, ekanithopo olya siikilwa kiimaliwa yehehelo.”
16 “Ngele ope na omuntu ta pukitha omukadhonalela inaa yalekwa e ta lala naye, oku na okufuta iikulila yuukadhona we ye e te mu hokana po.
17 Ihe ngele he ota tindi e mu hokane po, nena na fute he iimaliwa yi thike piikulila yaafuko.
18 “Ino etha omukiintu ompulile a kale e na omwenyo.
19 “Omulumentu kehe ta lala noshimuna, na se.
20 “Shaa ngoka ta yambele kalunga kalwe kee shi ngame, Omuwa, na pangulilwe eso.
21 “Ino ehameka omukwiilongo nenge u mu thindile kongundhi; dhimbulukwa kutya ne omwa li aakwiilongo muEgipiti.
22 Inamu ehameka omuselekadhi kehe nenge othigwa.
23 Ngele tamu shi ningi, ngame, Omuwa, otandi ya uvu, sho taa kugile ndje ekwatho,
24 notandi ka geya notandi mu dhipagele miita. Aakulukadhi yeni otaa ka ninga aaselekadhi naana yeni oothigwa.
25 “Ngele ope na gumwe gwomaantu yandje ohepele te ku lile oongunga dhiimaliwa, ino mu thiminika wa fa omugandjingunga omulandithi, ngoye ino tegelela ontanitho kuye.
26 Ngele ope na ngoka to mu kutha elwaakani lye ombambyona, opo e ku fute, ou na oku li mu shunithila, etango manga inaali ningina,
27 Oshoka olyo alike eisiikilo lye lyoku mu shiga kuutalala. Ota vulu okukotha ngiini kee li na? Ngele ta kugile ndje ekwatho, otandi ke mu uva, oshoka ngame omunamutimahenda.
28 “Ino tuka Kalunga, ngoye ino sheka omuleli gwoshilongo shaandjeni.
29 “Ino dhikaleka omayambo taga zi miilya yoye nomomaviinu goye. “Pe ndje osheeli shomaana yoye aamati.
30 Pe ndje iisheeli yiimuna yoye yoongombe noyoonzi. Iisheeli nayi kale pooyina omasiku gaheyali, nomesiku etiheyali otayi yambelwa ndje.
31 “One aantu yandje aayapuki. Inamu lya onyama ya lika kiilikama mokuti; yi umbileni oombwa.”
1 “Ino taandelitha oluhoko, ngoye ino kwatha omunandjo mokugandja uumbangi wiifundja.
2 Ino landula ongundu muuwinayi nenge u gandje pamwe nongundu uumbangi mboka tau goyokitha uuyuuki.
3 Ino tondola ohepele, nge tayi tamanekwa.
4 “Ngele owi itsu ongombe nenge okasino komutondi gwoye ka kanena mokuti, ka shunithila kumwene.
5 Ngele okasino ke oka gundikwa komutenge gwako, mu kwatha mu kutulule okasino.
6 “Ino pataneka uuyuuki wohepele, uuna ta pangulwa.
7 Ino gandja uusama wiifundja, ngoye ino dhipagitha omuntu kee na ondjo, oshoka otandi pangula ayehe mboka ya tya ngaaka.
8 Ino taamba ombumbo, oshoka ombumbo otayi posipaleke aantu okulonga uuyuuki notayi goyokitha omukanka gwaakaanandjo.
9 “Ino ehameka omukwiilongo; ou shi shi nkene omukwiilongo e li, oshoka omwa li aakwiilongo muEgipiti.”
10 “Kuna epya lyoye omimvo hamano nou pungule shoka to likola mo.
11 Ihe momumvo omutiheyali li etha li vululukwe, ino teya shoka shi imenitha mo. Oohepele oyo naa lye shoka sha mena mo, naashoka ya thigi mo, nashi liwe kiiyamakuti. Osho wo to ningi oshitsambe shoye shomiviinu noshomiolivi.
12 “Longa omasiku gahamano, ihe ino longa mesiku etiheyali, opo aapika yoye naakwiilongo mboka haye ku longele, nokuli niimuna yoye otayi vulu okuvululukwa.
13 “Dhiginina adhihe ndhoka ngame, Omuwa, nde ku lombwela. Ino galikana ookalunga yalwe; ino tumbula nokuli omadhina gawo.”
14 “Dhaneni iituthi itatu momumvo, mu simaneke ndje.
15 Momwedhi Abib, omwedhi ngoka mwa tembuka muEgipiti, dhaneni Oshituthi shiikwiila inaayi tulwa efulika pamukalo ngoka nde mu lombwele. Inamu lya oshikwiila sha tulwa efulika momasiku gaheyali goshituthi. Koshipala shandje inamu holoka mu li iikaha yowala.
16 Dhaneni Oshituthi shoshipe, uuna tamu tameke okuteya iilya yeni. “Dhaneni Oshituthi shokulikola, sho tamu likola iiyimati miitsambe yeni pehulilo lyomumvo.
17 Omumvo kehe miituthi mbika itatu aalumentu yeni ayehe oye na okuya, ya simaneke ndje, ngame, Omuwa, Kalunga keni.
18 “Ino yamba iikwiila ya tulwa efulika pamwe nombinzi yiimuna. Oofu dhiimuna nadhi yambelwe ndje momasiku giituthi, dhaa hupe ko sigo ongula tayi landula.
19 “Omumvo kehe eta kongulu yOmuwa, Kalunga koye, oshipe shomepya lyoye. “Onyama yokanzona nenge yokakombwena ino yi teleka momahini gayina.”
20 “Otandi ku tumine omuyengeli, e ku gamene mondjila noku ku kwatela komeho, sho to ende to yi kehala hoka nde ku longekidhile.
21 Mu pulakena ngoye u vulike kuye. Ino mu tsila ondumbo, oshoka ongame nde mu tumu, noye ita ka vula okwiidhidhimikila oondumbo.
22 Ihe ngele oto vulika kuye, e to ningi shoka tandi ku lombwele, nena ngame otandi ka kala omutondi gwaatondi yoye nomuthiminiki gwaathiminiki yoye.
23 Omuyengeli gwandje ote ku tetekelele okuya mevi lyAayamori, Aaheti, Aaperesi, Aakaanana, Aahevi nAayebusi, ongame notandi ke ya hanagula po.
24 Ino inyongamena kookalunga yawo nenge u ya galikane, noino taamba eitaalo lyawo u li holele. Hanagula po ookalunga yawo ngoye u kumune po oongundhimanya dhawo.
25 Ngele oto longele ndje, ngame Omuwa Kalunga koye, otandi ku yambekele iikulya nomeya e tandi kutha po uuvu auhe.
26 Moshilongo shoye itamu kala omukiintu ta gwitha ela nenge omuntimbe. Otandi ku kaleke nomwenyo omule kombanda yevi.
27 “Otandi ka tula uumbanda maakondjithi yoye. Otandi ka piyaganeka iigwana ayihe mpoka to yi e tandi tidha po aatondi yoye ayehe komeho goye.
28 Otandi ka tuma omambonzi komeho goye, opo ga tidhe po Aahevi, Aakaanana nAaheti mondjila yoye.
29 Itandi ya tidha po momumvo gumwe; ngele tandi shi ningi, evi otali mbugala, niithitukuti otayi ku gwililile po.
30 Ano otandi ke ya tidha po kashona nakashona, sigo wa tana u lale oshilongo.
31 Oongamba dhevi lyoye otandi ke dhi taandeleka okuza kEkololo lyaAkaba sigo okomulonga Eufrat nokuza kEfuta lyopokati sigo okombuga. Otandi ke ku pa oonkondo u sinde aakalimo yevi ndyoka, noto ke ya tidha mo, opo u kale mo.
32 Ino hangana nando okuli nayo nenge nookalunga yawo.
33 Aantu mboka ino etha ya kale moshilongo shoye; ngele to shi ningi, otaye ke ku yonitha kungame. Ngele to longele ookalunga yawo, otashi ka ninga omwigo gwoye.”
1 Omuwa okwa lombwele Moses a ti: “Londa kondundu u ye kungame pamwe naAaron, Nadab, Abihu naawiliki yaIsrael omilongo heyali; nomanga mu li kokule kashona, inyongameneni megalikano.
2 Ongoye awike to hedha popepi nangame; yalwe inaa hedha ko. Aantu inaa londa kondundu!”
3 Moses okwa yi e ta lombwele aantu iipango yaKalunga ayihe nomautho ge agehe, aantu ayehe noya yamukula ya ti: “Otatu ningi ayihe mbyoka Omuwa a popi.”
4 Moses okwa nyola oohapu adhihe ndhoka dha popiwa kOmuwa. Ongula onene okwa meneka e ta tungu oshiyambelo ponyonga yondundu e ta dhike po omamanya omulongo nagaali, kehe limwe lyomazimo gaIsrael omulongo nagaali.
5 Okwa tumu aamati, oyo noya fikile Omuwa omafikilondjambo e taa yamba iimuna yimwe omakwatathanondjambo.
6 Moses okwa kutha etata lyombinzi yiimuna e te yi tula miiyaha, etata ekwawo okwe li shashamine oshiyambelo.
7 Nena okwa kutha embo lyehangano, moka mwa nyolelwa iipango yOmuwa e te li leshele aantu mokule. Oya ti: “Otatu vulika kOmuwa e tatu ningi ashihe sho ta ti.”
8 Nena Moses okwa kutha ombinzi miiyaha e te yi shashamine aantu ta ti: “Ombinzi ndjika oyehangano ndyoka Omuwa a hangana nane, sho a gandja iipango mbika ayihe.”
9 Moses, Aaron, Nadab, Abihu naawiliki yaIsrael omilongo heyali oya londo kondundu
10 noya mono Kalunga kaIsrael. Meni lyoompadhi dhe omwa li mu na oshinima sha fa olupanda lwoosafire, tashi tayima sha fa egulu lyo lyene.
11 Kalunga ina ganeka oshikaha she a gume aawiliki yaIsrael. Oya tala Kalunga noya li e taya nu.
12 Omuwa okwa lombwele Moses a ti: “Londa kondundu u ye kungame, ongame notandi ku pe iipelende yomamanya, moka mu na oompango adhihe ndhoka nda nyola okukumagidha aantu.”
13 Moses nomuyakuli gwe Josua oyi ilongekidha, naMoses okwa tameke okulonda kondundu yaKalunga.
14 Moses okwa lombwele aawiliki a ti: “Tu tegeleleni mpaka montanda, sigo tatu galuka. Aaron naHur oyo mbaka ye li pune; ngoka e na oontamanana, ne ye kuyo.”
15 Moses okwa londo kondundu Sinai, noshikogo oshe yi siikile.
16 Eadhimo lyokukalapo kwOmuwa olya kulukile kondundu. KAaisraeli eadhimo olya li lya fa uuyelele weziko enene kondungu yondundu. Oshikogo osha siikile ondundu omasiku gahamano, nomesiku etiheyali Omuwa okwi igidha Moses moshikogo.
17
18 Moses okwa londo kondundu a yi moshikogo. Omasiku omilongo ne okwa kala kondundu omutenya nuusiku.
1 Omuwa okwa lombwele Moses a ti:
2 “Lombwela Aaisraeli ya yambele ndje omayambo. Shaa ngoka na gandje, ngaashi omwenyo gwe tagu mu lombwele.
3 Omayambo taga etwa, ogo oshingoli, oshisiliveli, oshikushu,
4 oongodhi oombulau, oombwilili noontiliganembwilili, iiyata yoliina ombwanawa nomafufu giikombo;
5 iipa yoonzi oondumentu ya tetwa iitiligane, iipa yoongombefuta, iipilangi yomuthiya,
6 omagadhi gomoolamba, iizimba yokugwaya noyokufikitha iitsinino;
7 omamanya gaoniks nuuwe wokutula momapepenguwo gomuyambimukuluntu nomoshipapa shomontulo.
8 Aantu naa tungile ndje etsali eyapuki, opo ndi kale mokati kawo.
9 Nali tungwe niikwaniipangitho yalyo pandunge tandi yi ku ulukile.
10 “Pangeleni oshiketha shiipilangi yomuthiya, uule washo oondya mbali netata, omutamo gwasho olundya lumwe netata nomuthika gwasho olundya lumwe netata.
11 Shi kolonga noshingolilela meni nokombanda ngoye u shi tule oongenge dhoshingoli dha kunkula nasho.
12 Shi ningila oonkogo ne dhoshingoli komakuvu gasho, kombinga kehe oonkogo mbali.
13 Honga omitenge dhomuthiya e to dhi kolongitha oshingoli.
14 Dhi hwekela moonkogo kombinga kehe yoshiketha.
15 Omitenge odhi na okukala moonkogo, inadhi kuthwa mo.
16 Moshiketha pungula mo iipelende iyali yomamanya mbyoka tandi ku pe, moka mwa nyolelwa iipango.
17 “Ninga oshisiikilo shoshingoli sho shene, uule washo oondya mbali netata nomutamo gwasho olundya lumwe netata.
18 Longekidha aakerubi yaali moshingoli sha hambulwa,
19 gumwe komutse nguka namukwawo komutse ngwiyaka gwoshisiikilo. Naa kale ya kwatathana noshisiikilo.
20 Aakerubi naa kale ya taalelathana poshisiikilo nomawawa gawo ge shi siikila.
21 Moshiketha pungula mo iipelende iyali yomamanya e to tenteke ko oshisiikilo.
22 Oko tuu nkoka tandi ku tsakaneke, poshisiikilo pokati kaakerubi tandi ku pe oompango dhandje adhihe, u dhi lombwele Aaisraeli.”
23 “Pangela oshitaafula shiipilangi yomuthiya, uule oondya mbali, omutamo olundya lumwe nomuthika olundya lumwe netata.
24 Shi kolongitha oshingoli sho shene e to shi tula oongenge dhoshingoli dha kunkula nasho.
25 Shi ningila eketsu li thike peke lya kunkula nasho, noongenge dhoshingoli dha kunkula neketsu.
26 Shi hambulila oonkogo ne dhoshingoli u dhi tule komakuvu gane pomagulu.
27 Oonkogo odhokuhwekela omitenge dhokuhumbata oshitaafula tadhi tulwa popepi neketsu.
28 Honga omitenge moshiti shomuthiya e to dhi kolongitha oshingoli.
29 Shi hambulila iiyaha, iitsininitho, iitenga nuuyo wokutula iinuwandjambo. Ayihe mbika otayi ningwa moshingoli sho shene.
30 Oshitaafula nashi tulwe komeho goshikethahangano, nokoshitaafula naku kale aluhe iikwiila iiyapuki.”
31 “Hambula oshihukikwanyeka shoshingoli sho shene. Ninga ompadhi yasho niimpana yasho moshingoli sha hambulwa; uulenga wiiyimino, woonkuto nowoongala dha sheneka nau kale wa hambulilwa mumwe niimpana.
32 Moombati dhasho namu kale mwa tsapuka iimpana ihamano, itatu kombinga ndjika niitatu kombinga onkwawo.
33 Oshimpaga kehe shomwiihamano nashi kale shi na uulenga utatu wa fa iiyimino, oonkuto noongala dha sheneka dhomumandeli.
34 Molutu lwoshihukikwanyeka namu kale uulenga wa fa iiyimino, oonkuto noongala dha sheneka dhomumandeli.
35 Onkuto yimwe nayi kale kohi yepando kehe lyiimpana ya tsapuka molutu.
36 Oonkuto niimpana nayi kale ya kwatathana noshihukikwanyeka noya hambulwa moshingoli sha yela.
37 Longekidhila oshihukikwanyeka oolamba heyali tadhi minikile lwokomeho.
38 Iikonde yokutetitha omalapi goolamba niikangwa yokutula mo omutoko gwokomalapi nayi kale oshingoli sho shene.
39 Iilongitho ayihe mbika yi ninga moshitalendi shimwe shoshingoli sho shene.
40 Ndhindhilika tuu nawa, u yi ninge pashiholelwa nde shi ku ulukile kondundu.”
1 “Tunga etsali lyotenda momalapi omulongo goliina ombwanawa ga tungilwa oongodhi oombulau, oombwilili noontiliganembwilili. Tungila mo omafano gaakerubi paunkulungu.
2 Elapi kehe nali kale oondja omilongo mbali nahetatu muule noondja ne momutamo.
3 Hondjela kumwe oondja ntano, dhi ninge oshitopolwa shimwe, osho wo oondja ntano okuninga oshitopolwa oshitiyali.
4 Kolungenge lwelapi lyotango moshitopolwa kehe ninga ko omalulo gongodhi ombulau omilongo ntano. Miitopolwa mbika iyali omalulo naga kale ga tegama.
5 Monguwo yimwe na mu tulwe oombululu omilongo ntano nokoongenge dhonguwo onkwawo ya shiga kooha oonkwawo, na mu kale mu na oombululu omilongo ntano opo dhi tsaathane.
6 Ninga uuhake woshingoli omilongo ntano, u kogeke iitopolwa mbika iyali kumwe.
7 “Longa po esiikilo lyotenda lyomalapi omulongo nalimwe lya tungwa momafufu giikombo.
8 Ga ninga ge thike pamwe guule woondja omilongo ndatu nomutamo gwoondja ne.
9 Hondjela oondja ntano kumwe, osho wo oonkwawo hamano kumwe. Elapi etihamano li gonyena kumwe kombanda komeho gotenda.
10 Tula omalulo omilongo ntano kolungenge lwelapi lyahugunina moshitopolwa shimwe, nomalulo omakwawo omilongo ntano kolungenge lwelapi lyahugunina moshitopolwa oshikwawo.
11 Hambula uuhake woshikushu omilongo ntano e to u tula momalulo, u kogeke kumwe iitopolwa, yi ninge esiikilo limwe.
12 Etata lyuule womalapi, mboka wa pitilila, nali endjelele konima yetsali.
13 Uule wolundya lumwe lwelapi kehe nau endjelele koombinga dhotenda noku yi siikila.
14 “Tunga natango omasiikilo gaali gokusiikila otenda, limwe olyiipa yoonzi oondumentu iitiligane nalimwe olyiipa yoongombefuta.
15 “Honga momuthiya iipilangi yokuthikameka etsalihangano lyOmuwa.
16 Oshipilangi kehe nashi kale shuule woometa ne nomutamo gwoosentimeta omilongo hamano nahamano.
17 Oshipilangi kehe nashi kale shi na iikwatakanithi iyali tayi shi kwatakanitha kumwe noshikwawo. Iipilangi ayihe oyi na okukala yi na iikwatakanithi mbika.
18 Honga iipilangi omilongo mbali omolwombinga yokuumbugantu wotenda,
19 noku yi tholomena oompadhi omilongo ne dhoshisiliveli, mu hwekelwe iikwatakanithi yiipilangi yoku yi thikamitha.
20 Honga iipilangi omilongo mbali omolwombinga yokuumbangalantu wotenda,
21 noompadhi dhoshisiliveli omilongo ne, mbali kohi yoshipilangi kehe.
22 Konima yotenda kuuninginino hongela ko iipilangi ihamano
23 niipilangi iyali yokomakuvu.
24 Iipilangi mbika yokomakuvu otayi kwatathana pekota e tayi kwatele kumwe ayihe sigo opombanda. Iipilangi iyali mbyoka tayi ningi omakuvu, otayi longwa pamukalo nguka.
25 Otaku kala iipilangi ihetatu yi na oompadhi dhayo dhoshisiliveli omulongo nahamano, koshipilangi shimwe oku na mbali.
26 “Honga omalukambo omulongo nagatano gomuthiya, gatano omolwiipilangi kombinga yimwe yetsali,
27 gatano ogokombinga onkwawo nagatano ogokuuninginino konima.
28 Olukambo lwopokati nalu kale pokati kiipilangi lwa shigakana lwa tsa koombinga adhihe.
29 Iipilangi yi kolonga noshingoli e to tula ko oonkogo dhoshingoli dhokukwatela kumwe omalukambo, ngoka nago wo oge na okukolongwa noshingoli.
30 Tunga etsali pashiholelwa nde shi ku ulukile kondundu.
31 “Tula po etopolitho lyoshiyata sholiina ombwanawa sha tungilwa oongodhi oombulau, oombwilili noontiliganembwilili. Nali tungilwe omafano gaakerubi paunkulungu.
32 Li endjelelitha koongundhi ne dhomuthiya dha kolongwa noshingoli, ku na uuhake, dha thikama koompadhi dhoshisiliveli.
33 Etopolitho li tula kohi yomukweyo guuhake moombuli dhetsali, ngoye u pungule handiyaka yetopolitho oshikethahangano shi na iipelende iyali yompango. Etopolitho otali yoolola Ehala lyUuyapuki kEhala lyUuyapukielela.
34 Tula oshisiikilo koshikethahangano.
35 Pondje yEhala lyUuyapukielela tula po oshitaafula sha gama kuumbangalantu wetsali noshihukikwanyeka lwokuumbugantu.
36 “Posheelo shetsali tula po eshigolapi lyoliina ombwanawa lya tungilwa oongodhi oombulau, oombwilili noontiliganembwilili.
37 Eshigolapi ndika li hongela oongundhi ntano dhomuthiya dha kolongwa noshingoli nokwa tulwa uuhake woshingoli; dhi tholomena oompadhi dhoshikushu ntano.”
1 “Ninga oshiyambelo shiipilangi yomuthiya. Nashi kale shi na uule woondya ntano, omutamo gwoondya ntano nomuthika gwoondya ndatu.
2 Komakuvu gasho gane ninga ko ooniga dha kwatathana noshiyambelo. Ayihe nayi kolongithwe oshikushu.
3 Hambula iikangwa yokuyuka omutoko nou hambule wo iihupulo, iiyaha, iizigitho niikangwa yomakala. Iilongitho mbika ayihe nayi hambulwe moshikushu.
4 Hambula oshihaya shoshikushu e to tula ko oonkogo ne dhoshikushu komakuvu gasho gane.
5 Tula oshihaya kohi yoongenge dhoshiyambelo, opo oshihaya shi endjelele sigo olwopokati koshiyambelo.
6 Honga omitenge dhomuthiya e to dhi kolonga noshikushu.
7 Dhi hukula moonkogo kombinga nombinga yoshiyambelo, sho tashi humbatwa.
8 Ninga oshiyambelo shiipilangi shi na omututu. Shi ninga pashiholelwa nde shi ku ulukile kondundu.”
9 “Etsalihangano lyandje li dhikila wo ehale lyomalapi goliina ombwanawa. Kombinga yokuumbugantu omalapi naga kale guule woondya ethele,
10 ge li koongundhi omilongo mbali noompadhi dhadho dhoshikushu omilongo mbali; uuhake nomalukambo goongundhi naga kale goshisiliveli.
11 Shika osho wo tashi ningwa kombinga yokuumbangalantu wehale.
12 Kombinga yokuuninginino naku kale omalapi guule woondya omilongo ntano, oongundhi omulongo noompadhi omulongo.
13 Kombinga yokuuzilo, nkoka ku na osheelo, ehale nali kale oondya omilongo ntano.
14 Kombinga kehe yosheelo naku kale omalapi goondya omulongo nantano, oongundhi ndatu noompadhi ndatu.
15
16 Nopomweelo gwehale napu kale eshigolapi lyuule woondya omilongo mbali, lyoshiyata sholiina ombwanawa sha tungilwa paunkulungu oongodhi oombulau, oombwilili noontiliganembwilili. Olya thikama koongundhi ne noompadhi dhadho ne.
17 Omalukambo nuuhake woongundhi adhihe nau kale woshisiliveli, ihe oompadhi dhadho odhoshikushu.
18 Ehale nali kale lyuule woondya ethele nomutamo gwoondya omilongo ntano. Elapi lya kunkula nalyo nali kale lyomutumbo gwoondya ntano, lya tungwa moongodhi oombwanawa dholiina.
19 Oompadhi nadhi kale dhoshikushu noomboha adhihe dhetsali nadhi ningwe moshikushu.”
20 Lombwela Aaisraeli ye etele oolamba dhoshihukikwanyeka omagadhi omawanawa gooholivi, opo dhi wape okutema ongulohi kehe.
21 Aaron noyana naa hwameke oshihukikwanyeka metsalihangano, pondje yetopolitho, ndyoka li li komeho goshikethahangano, opo shi minikile montaneho yandje okuza ongulohi sigo taku shi. Oshipango shika nashi dhigininwe kAaisraeli nomaluvalo gawo sigo aluhe.
1 “Ithana omumwanyoko Aaron noyana Nadab, Abihu, Eleasar naItamar. Ya yoolola mAaisraeli, opo ya longele ndje muuyambi.
2 Tungila omumwanyoko Aaron oonguwo dhuuyambi dhi na uulenga nodha simana.
3 Ithana oonkulungu adhihe ndhoka ndu udhitha nombepo yuunongo, u dhi lombwele, dhi tungile Aaron oonguwo, opo a yapulilwe oshilonga shuuyambi, a longele ndje.
4 Dhi lombwela, dhi tunge oshipapa shomontulo, omapepenguwo, eguyo, ohema yiiyala, egala nekwamo. Nadhi tungile omumwanyoko Aaron noyana aamati oonguwo ndhika oondjapuki, opo ya longele ndje muuyambi.
5 Oonkulungu nadhi longithe oshingoli noongodhi oombulau, oombwilili noontiliganembwilili noliina ombwanawa.
6 “Omapepenguwo oge na okutungwa nuunkulungu noongodhi dhoshingoli, noongodhi oombulau, oombwilili noontiliganembwilili nonoongodhi dholiina ombwanawa.
7 Oge na okukala ge na omakwi gaali ge enda komapepe goku ga kwatakanitha.
8 Ekwamo ndjoka li li ko, oli na okukala lya tungikika lya faathana nomapepenguwo, opo li tse kumwe nago.
9 Kutha omamanya gaali gaoniks e to takele mugo omadhina omulongo nagaali gaana yaIsrael
10 melandulathano lyokuvalwa kwawo, gahamano memanya limwe nagahamano mekwawo.
11 Konga omulongi guuwe onkulungu gwokutakela momamanya gaali omadhina gaana yaIsrael noku ga dhamithitha muundambo woshingoli.
12 Ga tula komakwi gomapepenguwo, ga kalele po omazimo omulongo nagaali gaIsrael. Pamukalo nguka Aaron ota humbata omadhina gawo komapepe ge, opo ngame, Omuwa, ndi dhimbulukwe aluhe aantu yandje.
13 Panda uupando uyali woshingoli
14 nuulyenge uyali woshingoli wa dhingwa wa fa oongodhi e to u mangele kuupando.”
15 “Tungila omuyambimukuluntu oshipapa shomontulo tashi longithwa mokupula ehalo lyaKalunga. Nashi tungwe moshiyata shimwe nomapepenguwo: sha tungikika noongodhi dhoshingoli, noongodhi oombulau, oombwilili noontiliganembwilili nonoongodhi dha dhingwa dholiina ontokele.
16 Nashi kale shi na oonkotso ne, sha gonywa, uule washo oshitine sholundya, osho wo omutamo.
17 Tula mo omikweyo ne dhomamanya gondilo: momukweyo gwotango tula mo ospineli, otopasi nosmaragdi;
18 momukweyo omutiyali orubini, osafire nojaspes;
19 momukweyo omutitatu oturkoisi, oagate noametiste;
20 nomomukweyo omutine oberil, okarnelia nojasper. Oga li ga dhamithwa muundambo woshingoli.
21 Pamwaalu gwaana yaJakob omamanya naga kale omulongo nagaali, kehe limwe lyokukalela po ezimo limwe padhina ndyoka lya takelwa mo.
22 Koshipapa shomontulo oto ningile ko uulyenge woshingoli sho shene wa dhingwa nawa wa fa oongodhi.
23 Hambula uulinga uyali woshingoli e to u tula koonkotso dhopombanda dhoshipapa shomontulo.
24 Kuulinga mbuka uyali mangela ko oongodhi dhoshingoli.
25 Oondungu oonkwawo dhadho dhi mangela komapando gaali e to ga mangele ishewe komakwi gomapepenguwo, kombinga yokomeho.
26 Hambula ishewe uulinga uyali woshingoli e to u tula koonkotso mbali dhokohi dhoshipapa shomontulo, koongenge dhomeni dha gama pomapepenguwo.
27 Hambula po ishewe uulinga uyali woshingoli e to u tula koondungu dhopevi dhopontulo dhomakwi agehe gaali gomapepenguwo, popepi nomuhondjo kombanda yekwamo lyuulenga.
28 Mangela uulinga woshipapa shomontulo kuulinga womapepenguwo nongodhi ombulau, opo oshipapa shomontulo shi kankame kombanda yekwamo noitashi dhituluka we.
29 “Aaron uuna ta yi mEhala lyUuyapuki, na zale oshipapa shika shomontulo mwa nyolelwa omadhina gomazimo gaIsrael, opo ngame, Omuwa, ndi kale aluhe tandi dhimbulukwa aantu yandje.
30 Tula Urim naTummim moshipapa shomontulo, opo Aaron e u humbate, nge te ya koshipala shandje mEhala lyUuyapuki. Poompito dha tya ngaaka oku na okuzala aluhe oshipapa shomontulo, opo a vule okuhumbata eutho lyandje kAaisraeli.
31 “Eguyo lyokombanda yomapepenguwo ou na oku li hondja moshiyata oshimbulau.
32 Otali kala li na ombululu yokuya omutse, nombululu ndjika nayi kolekwe nomugoyo gwa tungikika, opo yaa tuuke.
33 Komugoyo gwopevi aguhe tula ko omafano giiyimati yomugranati omambulau, omambwilili nomatiliganembwilili ga togwa mumwe nuungendjo woshingoli.
34
35 Aaron na zale eguyo ndika, uuna ta longo iilonga yuuyambi. Uuna te ya koshipala shandje mEhala lyUuyapuki nenge uuna ta zi mo, ewi lyuungendjo otali uvika, opo kaa se.
36 “Hambula epapa lyoshishani lyoshingoli sho shene e to takele mo enyolo tali ti: ‘Osha yapulilwa Omuwa.’
37 Li mangela mongodhi ombulau komeho gegala.
38 Aaron ne li zale komutse gwe, opo ngame, Omuwa, ndi taambe omayambo agehe ngoka Aaisraeli taa yapulile ndje, nando ya yone moku ga yambela ndje.
39 “Tungila Aaron ohema yoshiyata sholiina sha tungika nou mu tungile egala lyoliina lya tungika nosho wo ekwamo lyuulenga.
40 “Aana ya Aaron ou na oku ya tungila oohema omakwamo nomatsilu, opo ya simanekwe noya kale yo opala.
41 Oonguwo ndhika dhi zaleka Aaron noyana. Ya gwayeka nomagadhi gooholivi, opo u ya yapule okulongela ndje muuyambi.
42 Ya tungila oombulukweya dholiina dha za mombunda sigo okomatundji, opo dhi siikile epenge lyawo.
43 Aaron noyana naye dhi zale aluhe, uuna taa yi metsalihangano nenge taa hedha koshiyambelo, ya ka yakule miilonga yuuyambi mEhala lyUuyapuki, opo yaa itsike ondjo ya se. Eutho ndika olyaaluhe lyaAaron noluvalo lwe.”
1 “Nge to yapula Aaron noyana, ya ninge aayambi, oto ningi ngeyi. Oto kutha ongombe ondumentu yomutanda noonzi mbali oondumentu dhaa na oshipwe.
2 Kutha osiimela, ihe ino kutha efulika. Ninga iikwiila mu na omagadhi gooholivi, iikwiila yimwe mwaa na omagadhi nayimwe molupe lwekaka yomapapi ya gwayekwa omagadhi.
3 Yi tula montungwa e to yi yambele ndje, uuna to yamba ongombe ondumentu noonzi mbali oondumentu.
4 “Eta Aaron noyana kosheelo shetsalihangano e to ya yogo nawa nomeya.
5 Opo ihe zaleka Aaron omizalo dhuuyambi — ohema, omapepenguwo, eguyo lyokombanda, oshipapa shomontulo nekwamo.
6 Mu zaleka etsilu e to mangele ko epapa eyapuki.
7 Nena kutha omagadhi gokugwaya, ga tila komutse gwe e to mu gwayeke.
8 “Hedhitha ko oyana e to ya zaleke oohema;
9 ya zaleka omakwamo moombunda dhawo nomatsilu komitse dhawo. Osho ngaaka to yapula Aaron noyana. Oyo noluvalo lwawo oye na okulongela ndje muuyambi sigo aluhe.
10 “Eta ongombe ondumentu kosheelo shetsalihangano e to lombwele Aaron noyana, ya tenteke iikaha yawo komutse gwayo.
11 Dhipagela ongombe ondumentu koshipala shandje oshiyapuki posheelo shetsalihangano.
12 Kutha mombinzi yongombe e to yi gogo kooniga dhoshiyambelo nomunwe gwoye. Ombinzi onkwawo yi tila pekota lyoshiyambelo.
13 Nena kutha ko oofu dhomiikwamela, ekalokwa lyokehuli niitiyanathigo ayihe iyali niinkene mbyoka yi li kuyo e to yi lungunithile koshiyambelo yi yambelwe ndje.
14 Ihe onyama yongombe, ekunka lyayo nehoho lyayo yi lungunithila pondje yontanda. Ndika eyambo lyokukutha po oondjo dhaayambi.
15 “Kutha yimwe yomoonzi oondumentu e to lombwele Aaron noyana, ya tenteke iikaha yawo komutse gwayo.
16 Yi dhipaga e to kutha ombinzi yayo e to shashamine koombinga adhihe dhoshiyambelo.
17 Tetagula onzi miintimbu, yoga iikwamela yayo e to yi tula pomutse nopiintimbu iikwawo.
18 Onzi ayihe yi lungunithila koshiyambelo yi ninge iikulyandjambo. Oyo efikilondjambo kOmuwa, oyo eyambo lyezimba etoye kOmuwa.
19 “Kutha onzi onkwawo ondumentu e to lombwele Aaron noyana, ya tenteke iikaha yawo komutse gwayo.
20 Yi dhipaga e to kutha ko ombinzi yayo yimwe e to yi gwayeke koshipapatsi shokutsi kwokolulyo kwaAaron nokiipapatsi yomakutsi gokomalulyo goyana nokomilumenwe dhawo dhokiikaha yokomalulyo nokominwe dhawo ominene dhokoompadhi dhokomalulyo. Shashamina ombinzi onkwawo koombinga adhihe dhoshiyambelo.
21 Kutha mo ombinzi yimwe nombinzi ndjoka yi li koshiyambelo nomomagadhi gokugwaya e to ga shashamine Aaron noyana noonguwo dhawo. Osho ngaaka ye mwene, oyana noonguwo dhawo otaa yapulilwa ndje.
22 “Konzi kutha ko iinkene, omushila, oofu dhokiikwamela, ekalokwa lyokehuli, iitiyanathigo ayihe iyali niinkene yayo noshilama shokolulyo, molwashoka onzi ndjika oyeyapulo.
23 Montungwa yiikwiila mbyoka ya yapulilwa ndje, kutha mo oshikwiila shimwe moludhi kehe: oshikwiila shimwe sha ningwa nomagadhi gooholivi, shimwe inaashi ya omagadhi nashimwe shepapi.
24 Ayihe mbika yi tenteka peke lyaAaron nopomake goyana e to yi dhungadhunga koshipala shOmuwa.
25 Nena yi kutha po pomake gawo, u yi lungunithile koshiyambelo kombanda yefikilondjambo, yi ninge iikulyandjambo yokuyambelwa ndje. Ezimba lyondjambo ndjika ohali opalele ndje, ngame Omuwa.
26 “Kutha ondete yonzi ndjika ondumentu e to yi dhungadhunga koshipala shOmuwa. Oshitopolwa shika otashi ningi shoye.
27 “Uuna omuyambi ta yapulwa, ondete noshilama shonzi tayi longithwa peyapulo, nayi yapulilwe ndje, yi ninge omagano gedhungadhungo, mu ga itulile ga ninge gaayambi.
28 Eutho ndika itali lunduluka nando, uuna aantu yandje taa yamba omakwatathanondjambo; ondete noshilama shoshimuna nashi ninge shaayambi. Omagano ngaka aantu otaye ga yambele ndje, ngame Omuwa.
29 “Konima yeso lyaAaron oonguwo dhe dhuuyambi nadhi thigululwe po koyana, ye dhi zale, uuna taa gwayekwa ya yapulilwe oshilonga.
30 Omuna gwaAaron ngoka te mu landula muuyambi e ta yi metsalihangano, a longele ndje mUuyapuki, na zale oonguwo ndhika omasiku gaheyali.
31 “Kutha onyama yonzi ondumentu ya longithwa meyapulo lyaAaron noyana, e to yi telekele pehala eyapuki.
32 Aaron noyana naye yi lile posheelo shetsalihangano pamwe niikwiila mbiyaka ya hupile montungwa.
33 Oye na okulya shoka sha longithwa momusindilo gwokudhima po oondjo dhawo peyapulo lyawo, sho taa langekwa miilonga. Aayambi oyo ayeke naa lye iikulya mbika, oshoka oyo iiyapuki.
34 Nongele onyama yimwe nenge iikwiila yimwe ya hupu ko e tayi lala sigo ongula, nayi lungunithwe po; inayi liwa we, oshoka oyo iiyapuki.
35 “Gwanitha omisindilo dheyapulo lyaAaron noyana omasiku gaheyali, naanaa ngaashi nde ku lombwele.
36 Esiku kehe ou na okuyamba ongombe ondumentu, yi ninge efikilondjambo, opo oondjo dhi dhimbwe po. Otayi yelitha oshiyambelo. Nena shi gwayeka nomagadhi gooholivi, shi ninge oshiyapuki.
37 Ninga shika esiku kehe momasiku gaheyali. Nena oshiyambelo otashi ningi naanaa oshiyapuki, ndele shaa ngoka nenge shaa shoka tashi shi gumu, otashi ningi oshiyapuki.”
38 “Esiku kehe ethimbo alihe koshiyambelo naku yambelwe oonzigona mbali dhomumvo gumwe.
39 Onzigona yimwe ou na oku yi yamba ongula, nonkwawo oto yi yamba lwokongulohi.
40 Onzigona yotango oto yi yamba pamwe noolita mbali dhosiimela ya pilulilwa mumwe nolita yimwe yomagadhi gooholivi ga yengwa. Tila mo ishewe olita yimwe yomaviinu, ga ninge omayambo.
41 Onzigona ontiyali yi yamba ongulohi pamwe niikulyandjambo noshinuwandjambo naanaa ngaashi ongula. Ezimba etoye lyondjambo ndjika ohali opalele ndje, ngame Omuwa.
42 Esiku kehe ethimbo alihe kala ho yamba efikilondjambo ndika koshipala shandje posheelo shetsalihangano. Opo mpoka tandi tsakaneke aantu yandje e tandi ku popitha.
43 Opo mpoka tandi tsakaneke Aaisraeli, nehala ndyoka otali yapulwa keadhimo lyandje.
44 Otandi yapula etsalihangano noshiyambelo, notandi yapula Aaron noyana, ya longele ndje muuyambi.
45 Otandi ka kala mokati kAaisraeli, ongame Kalunga kawo.
46 Otaa ka tseya kutya ongame Omuwa, Kalunga kawo, nde ya tembudha muEgipiti, opo ndi wape okukala mokati kawo. Ongame Omuwa, Kalunga kawo.”
1 “Tunga oshiyambelo shiipilangi yomuthiya shokufikila ko iitsinino.
2 Nashi kale nuule wolundya lumwe nomutamo gwolundya lumwe nomuthika gwoondya mbali. Ooniga dhokomakuvu nadhi kale dha kwatathana noshiyambelo.
3 Kolonga kombanda yasho, olutu nooniga dhasho noshingoli sha yela, u shi ningile wo epaya lyoshingoli.
4 Koombinga adhihe mbali dholutu kohi yoongenge, shi ningila oonkogo mbali dhoshingoli dhokuhukilwa omitenge dhoku shi humbata.
5 Omitenge dhi honga dhomuthiya e to dhi kolonga noshingoli.
6 Oshiyambelo shika shi tula pondje yetopolitho ndjoka lye endjelela komeho goshikethahangano. Pehala mpoka opo tandi ku tsakanekele.
7 Ongula kehe Aaron sho te ya a opaleke oolamba, na fikile ko iitsinino ya nika nawa.
8 Nonge ta ka hwameka oolamba ongulohi, osho natango ta ningi. Etsininondjambo ndika nali kale tali yambwa esiku kehe koshipala shOmuwa sigo aluhe.
9 Koshiyambelo shika inamu yambela ko iitsinino yi indikwa nenge omafikilondjambo nenge iikulyandjambo; inamu tila ko oshinuwandjambo.
10 Lumwe momumvo kehe Aaron na yelithe oshiyambelo pamisindilo nokutula ko kooniga dhasho ne ombinzi yeyonondjambo. Shika nashi ningwe omumvo kehe aluhe sigo aluhe. Oshiyambelo shika oshiyapukilela, sha yoololelwa ndje, ngame Omuwa.”
11 Omuwa okwa lombwele Moses a ti:
12 “Nge to yalula Aaisraeli, kehe ngoka e na okukala meyalulo, na fute iikulila yomwenyo gwe, opo kaa kwatwe koshivu pethimbo lyeyalulo.
13 Kehe ngoka e li meyalulo, na fute etatasekeli pandjele yosekeli ndjoka hayi longithwa motempeli. Iimaliwa mbika nayi kale eyambo kungame Omuwa.
14 Shaa ngoka ta yalulwa meyalulo, omulumentu kehe gwomimvo omilongo mbali noku vule po, na fute omwaalu nguka.
15 Omuyamba ina futa oshindji, nohepele ina futa oshishona, uuna taa futu iikulila yoomwenyo dhawo.
16 Gongela iimaliwa mbika kAaisraeli, u yi longithile iilonga yometsalihangano. Iigandjwa mbika otayi ningi iikulila yoomwenyo dhawo, notandi dhimbulukwa oku ya gamena.”
17 Omuwa okwa lombwele Moses a ti:
18 “Hambula oshiyaha shoshikushu nomagulu gasho goshikushu. Shi tula pokati ketsalihangano noshiyambelo e to tula mo omeya.
19 Aaron noyana naa yoge iikaha noompadhi dhawo,
20 manga inaaya ya metsalihangano nenge manga inaaya hedha koshiyambelo ya yambe iikulyandjambo, opo yaa se.
21 Naa yoge tuu iikaha noompadhi dhawo, opo yaa se. Shika nashi kale eutho taye li gwanitha nomaluvalo gawo sigo aluhe.”
22 Omuwa okwa lombwele Moses a ti:
23 “Kutha iizimba iiwanawa: ookilograma hamano dhomira ya hemuka, ookilograma ndatu dhokanela ya nika nawa, ookilograma ndatu dholutope
24 nookilograma hamano dhakasia (ayihe ya vihwa pamuthika gu uthwa). Kutha wo oolita ne dhomagadhi gooholivi
25 e to lungu omugwayo omuyapuki gwa longekidhwa paunkulungu niizimba.
26 Gwayeka nagwo etsalihangano noshikethahangano,
27 oshitaafula niinima yasho ayihe, oshihukikwanyeka niikwaniipangitho yasho ayihe, oshiyambelo shiitsinino,
28 oshiyambelo shomafikilondjambo niikwaniipangitho yasho ayihe noshiyaha shokwiiyogela nomagulu gasho.
29 Iinima mbika yi yapula pamukalo nguka, e tayi ningi iiyapukilela, noshaa ngoka te yi gumu, ota yapuka.
30 Gwayeka Aaron noyana noku ya yapula, ya ninge aayambi taa longele ndje.
31 Lombwela Aaisraeli u tye: ‘Omugwayo nguka omuyapuki nagu longithwe melongelokalunga lyandje aluhe sigo aluhe.
32 Inamu gu tila kolutu lwomuntu gwowala ne inamu gu holela, mu ilungile omugwayo gwa fa nguka. Ogwo omuyapuki, nomu na oku gu tala omuyapuki.
33 Ngele oku na ngoka te gu ilungile nenge te gu gwayeke omuntu kee shi omuyambi, na dhimwe mo maantu yandje.’ ”
34 Omuwa okwa lombwele Moses a ti: “Kutha oondumba dhi thike pamwe dhiinima mbika ya nika nawa: eka lya nika nawa, iipakosolwa ya nika nawa, iitowaleki ya nika nawa niitsinino yo yeneyene.
35 Yi ninga iitsinino ya nika nawa, ya longwa nuunkulungu. Gunda mo omongwa gwoku yi ninga iiyogoki niiyapuki.
36 Vundula po yimwe yi ninge uusila, u yi fale metsalihangano e to yi gundu komeho goshikethahangano, mpoka tandi ku tsakaneke. Otayi kala iiyapukilela nokune wo.
37 Inamu iningila iitsinino yilwe ya tya ngeyi. Yi taleni iiyapuki ya yapulilwa ndje, ngame Omuwa.
38 Ngele ope na ngoka te shi yelekele a longithe iizimba ngaambika, na dhimwe mo maantu yandje.”
1 Omuwa okwa lombwele Moses a ti:
2 “Onda hogolola Bezalel yaUri, omutekulu gwaHur gwomezimo lyaJuda
3 nonde mu udha ombepo onkwakalunga, uunongo, oondunge, ontseyo nuunkulungu
4 okuthaneka iinima yuungomba noku yi longa moshingoli, moshisiliveli nomoshikushu,
5 okuwega nawa omamanya gondilo noku ga tula moondambo, okuhonga omiti nokulonga oshilonga kehe shuunkulungu.
6 Onda hogolola ishewe Oholiab yaAhisamak, gwomezimo lyaDan, a longe pamwe naye. Aanongo ayehe yalwe onde ya pa uunkulungu, ya vule okugwanitha iilonga ayihe nde yi ku lombwele:
7 etsalihangano, oshikethahangano noshisiikilo shasho, iipumbiwa ayihe yometsalihangano,
8 oshitaafula niikwaniipangitho yasho, oshihukikwanyeka shoshingoli sho shene niikwaniipangitho yasho ayihe, oshiyambelo shiitsinino,
9 oshiyambelo shomafikilondjambo niikwaniipangitho yasho ayihe, oshiyaha shokwiiyogela nomagulu gasho,
10 oonguwo dha tungikika dhomuyambi Aaron noyana dhokuzala, sho taa yakula moshilonga shuuyambi,
11 omugwayo gwomagadhi niitsinino yezimba lya nika nawa omolwEhala lyUuyapuki. Iinima mbika ayihe naaye yi ninge, naanaa ngaashi nde ku lombwele.”
12 Omuwa okwa lombwele Moses,
13 a lombwele Aaisraeli ta ti: “Dhiginineni Esabati, esiku lyandje lyevululuko, oshoka olyo endhindhiliko pokati ketu nane sigo okoluvalo noluvalo lyokuhokolola kutya ongame mwene, Omuwa, tandi mu yapula.
14 Omu na okudhiginina esiku lyevululuko, oshoka olyo eyapuki. Kehe ngoka itee li yapula, ndele ota longo esiku ndyoka, na dhipagwe.
15 Omu na omasiku gahamano moka tamu longo iilonga yeni, ihe esiku etiheyali olyo Esabati, esiku lyevululuko lya yapulilwa ndje. Oongoka ta longo esiku ndyoka, na dhipagwe.
16 Aaisraeli oye na okudhiginina esiku ndika, olyo ehangano lyaaluhe.
17 Olyo endhindhiliko lyaaluhe pokati ketu nAaisraeli, oshoka ongame, Omuwa, nda shiti egulu nevi momasiku gahamano nomesiku etiheyali onda zimbuka e tandi vululukwa.”
18 Kalunga sho a mana okupopya naMoses kondundu Sinai, okwe mu pe iipelende iyali yomamanya, moka Kalunga mwene a nyolela mo iipango.
1 Aantu sho ya mono Moses a kala ko kondundu inaa za ko, oya gongalele Aaron e taa ti kuye: “Katu shi wo tuu shoka sha adha omulumentu nguka Moses, ngoka e tu tembudha muEgipiti; tu ningila kalunga e tu kwatele komeho.”
2 Aaron okwa ti kuyo: “Kuthii mo omagola goshingoli ngoka ga zalwa momakutsi kaakiintu nokaana yeni aamati naakadhona, mu ga etele ndje.”
3 Aantu ayehe oya hula mo omagola gawo goshingoli momakutsi gawo e taye ga eta kuAaron.
4 Oye okwa taamba omagola nokwe ga hemuna e ga tula montelekelo e te ga tholoma ontana yoshingoli. Aantu oya popi ya ti: “Israel, kalunga koye oye ngu e ku tembudha muEgipiti!”
5 Aaron sho e shi mono, okwa tungile oshiyambelo komeho gontana yoshingoli e ta ti: “Ongula esiku lyoshituthi shOmuwa.”
6 Aantu oya meneka ongulangula noya yamba omafikilondjambo nomakwatathanondjambo. Oya kuutumba ya lye e taa nu noya thikama ya dhane.
7 Omuwa okwa lombwele Moses a ti: “Londoloka u ye pohi, oshoka aantu yoye mboka wa tembudha muEgipiti, oya yono noye ekelehi ndje.
8 Oye etha ondjila ndjoka nde ya lombwele ye yi landule; oyi iningile ontana ya tholomwa moshingoli noye yi simaneke noku yi yambela omayambo. Otaa ti, oyo kalunga kawo, ngoka e ya tembudha muEgipiti.”
9 Omuwa okwa ti ishewe kuMoses: “Aantu mbaka onde ya tala, oyo aatangalali.
10 Ano ngashingeyi etha ndje, ndi ya geele. Otandi ya kombo po, ihe ngoye otandi ku ningi oshigwana oshinene.”
11 Moses okwa galikana Omuwa, Kalunga ke, e ta ti: “Omuwa, omolwashike to geele aantu yoye, mboka we ya mangulula muEgipiti koonkondo dhoye oonene noshikaha shoye sha kola?
12 Omolwashike to pe Aayegipiti ompito yokutya, aantu yoye owe ya tembudha muEgipiti, opo u ya dhipagele moondundu noku ya komba po thilu? Geyuluka, itedhulula, waa etele aantu yoye omupya gu thike mpoka.
13 Dhimbulukwa euvaneko lyoye we li uvanekele aantu yoye Abraham, Isak naJakob nokugana wa ti: ‘Otandi mu pe oluvalo lu thike poonyothi dhokegulu; evi alihe ndjoka ndu uvaneke, otali ningi uuthiga wawo sigo aluhe.’ ”
14 Omuwa nokwi itedhulula noine etela we aantu ye uuwinayi mboka a li e u ya dhiladhilile.
15 Moses okwa punguluka e ta londoloka ko kondundu a humbata iipelende yomamanya yiipango ya nyolwa koombinga adhihe mbali.
16 Kalunga oye mwene a hongo iipelende mbika e ta takele mo iipango.
17 Josua oku uvu ombuyagano yaantu, sho taa kudhile e ta ti kuMoses: “Ondu uvite onkugo yolugodhi montanda.”
18 Moses okwa ti: “Ewi ndika kali shi lyekaluluko lyekandanga lyesindano nenge lyaamboka taa kugu sho ya sindika, ondu uvite ewi lyaantu taa imbi meziminathano.”
19 Ano Moses sho a hedha kontanda e ta mono ontana naantu nkene taa dhana, ondjahi ye oya hwama. Oye nokwe ekelehi iipelende mbyoka a li a humbata e te yi tatulile mpoka ponyonga yondundu.
20 Okwa kutha ontana ndjoka ye yi hambula e te yi lungunitha po momulilo e tayi ningi omutoko, ngoka a pilulile momeya e te ga nwetha Aaisraeli.
21 Okwa ti kuAaron: “Aantu mbaka oye ku ningi shike, sho we ya etele eyono enene li thike mpano?”
22 Aaron okwa yamukula a ti: “Ino geela ndje, mwene gwandje, ou shi shi naanaa kutya aantu mbaka aawinayi shili.
23 Oya lombwele ndje ya ti: ‘Katu shi wo shoka sha adha omulumentu nguka Moses, ngoka e tu tembudha muEgipiti; tu ningila kalunga e tu kwatele komeho.’
24 Onde ya indile, ye etele ndje iingoli yawo, mbyoka ye yi ikutha e taye yi etele ndje. Onde yi tula meziko e tamu zi ihe ontana ndjika.”
25 Moses okwa mono kutya aantu oya tangalala, oshoka Aaron okwe ya ethele etangalalo, ya ninge ekugililo kaatondi yawo.
26 Moses okwa thikama muuyanda wontanda e ti igidha ta ti: “Shaa ngoka a gama kOmuwa, ne ye kungame.” Aalevi ayehe noye mu gongalele,
27 e ta ti kuyo: “Omuwa, Kalunga kaIsrael, ta ti: ‘Omulumentu kehe na zale egongamwele lye ponto, ye a ye moontanda okuza posheelo shika sigo okoshikwawo nokudhipaga shaa ngoka, ngele omumwayina nenge kuume ke nenge omushiinda.’ ”
28 Aalevi oya vulika noya dhipaga po aalumentu ye thike pomayuvi gatatu esiku ndyoka.
29 Moses okwa ti kAalevi: “Nena omwi iyapula ne yene mwa ningi aayambi mokulongela Omuwa, sho mwa dhipaga aana yeni aamati naamwanyoko aalumentu, onkee Omuwa te mu yambeke.”
30 Esiku lyanofu Moses okwa lombwele aantu a ti: “Omwa yono nayi. Ano ngashingeyi otandi londo ndi ye kOmuwa kondundu, pamwe tandi ningile wo tuu eyono lyeni epopilokwatathano.”
31 Moses okwa shuna kOmuwa e ta ti: “Aantu mbaka oya yono nayi. Oyi iningile kalunga koshingoli.
32 Dhima po oondjo dhawo; ihe ngele nani hasho, dhima ndje mo shila membo lyoye moka wa nyolele aantu yoye.”
33 Omuwa okwa yamukula a ti: “Ngoka a yono kungame, oye tandi dhimi mo membo lyandje.
34 Ngashingeyi inda u ka fale aantu kehala ndyoka nde ku lombwele. Tala, omuyengeli gwandje ote ku kwatele komeho, ihe esiku tandi ke ya adha, otandi ya geelele ondjo yawo.”
35 Omuwa nokwa tumu oshivu maantu, oshoka oya thiminikile Aaron e ya hambulile ontana.
1 Omuwa okwa lombwele Moses a ti: “Inda, za po mpaka, ngoye mwene naantu we ya tembudha muEgipiti, mu ye kevi nde li uvanekele Abraham, Isak naJakob nomaluvalo gawo.
2 Otandi ka tuma omuyengeli gwandje e ku tetekele, notandi ka tidha mo Aakaanana, Aayamori, Aaheti, Aaperesi, Aahevi nAayebusi.
3 Oto yi koshilongo hashi kunguluka omahini nomagadhi goonyushi, ihe ngame mwene itandi yi nane, molwaashoka ne aatangalali, ote ningi ndi mu hanagulile mondjila.”
4 Aantu sho ye shi uvu, oya tameke okulila noinaa zala we uulenga.
5 Omuwa okwa lombwele Moses, a lombwele aantu a tye: “Ne aantu aatangalali. Andola ndi ende nando okathimbo ndi li mokati keni, ando otandi mu mana po. Ngashingeyi huleni mo uulenga weni, ndi tale sho tandi mu ningi.”
6 Aaisraeli noyi ihula ihe uulenga wawo okuza pondundu Sinai.
7 Aaisraeli shampa ya yungu ontanda, Moses oha kutha otenda noku yi dhika kokule kashona nontanda. Oya lukwa etsalihangano, noshaa ngoka a hala okupula Omuwa, oku na okuza mo montanda a ye kulyo pondje.
8 Moses shampa ta yi ko, nena aantu otaa thikama pomatsali gawo noku mu tongolola, sigo ota ka ningina mo.
9 Moses shampa a ningine mo, oshikogo otashi kuluka e tashi kala posheelo shetsalihangano, Omuwa nota popitha Moses e li moshikogo.
10 Mbalambala shampa tuu aantu ya mono oshikogo shokugulu posheelo shetsalihangano, yo otaa inyongamene pevi, shaa ngoka posheelo shetsali lye.
11 Omuwa okwa li ha popi naMoses koshipala noshipala, naanaa ngaashi omuntu ta popi nakuume ke. Opo ihe Moses ota shuna montanda. Ihe omugundjuka omuyakuli gwe, Josua yaNun, okwa kala metsalihangano ina za mo.
12 Moses okwa lombwele Omuwa a ti: “Eeno, odhoshili, sho wa lombwele ndje, ndi fale aantu mbaka kevi ndyoka, ihe ngoye ino lombwela ndje ngoka to tumu, a ende pamwe nangame. Owa tile, ou shi ndje nawa nou na ombili nangame.
13 Ngashingeyi ngele nda mono ohenda koshipala shoye, tseyithila ndje oondjila dhoye, opo ndi ku tseye nondi kale ndi na ombili nangoye. Dhimbulukwa wo kutya owa hogolola oshigwana shika, shi ninge shoye mwene.”
14 Omuwa okwa ti: “Ongame mwene tandi yi nangoye notandi ke ku vululukitha.”
15 Moses okwa yamukula a ti: “Ngele ito yi natse, ino tu etha tu ze mpaka.
16 Olye ta tseya kutya ou na ombili naantu yoye, nonangame, ngele ito ende pamwe natse? Okukala kwoye mokati ketu otaku tu yoolola kiigwana yilwe yokombanda yevi.”
17 Omuwa okwa lombwele Moses a ti: “Otandi ningi naanaa ngaashi wi indile, oshoka ondi ku shi nawa nondi na ombili nangoye.”
18 Nena Moses okwa ti: “Talitha ndje eadhimo lyoye.”
19 Omuwa okwa yamukula a ti: “Otandi ka pititha eadhimo lyandje koshipala shoye nokutumbula edhina lyandje eyapuki. Ongame Omuwa, tandi sile ohenda ngoka tandi sile ohenda notandi sile olukeno ngoka tandi sile olukeno.
20 Itandi etha u tale oshipala shandje, molwaashoka kaku na ngoka ta tala ndje e ta kala e na omwenyo,
21 ihe mpaka ope na ehala ponto yandje mpoka to vulu okuthikama pemanya.
22 Eadhimo lyandje sho tali piti po, otandi ke ku tula mekololo li li memanya e tandi ku siikile noshikaha shandje sigo tandi pitilile po.
23 Nena otandi kutha po oshikaha shandje, noto mono ndje ombunda, ihe hashipala shandje.”
1 Omuwa okwa lombwele Moses a ti: “Ihongela iipelende yomamanya iyali ya faathana naambiyaka yotango, notandi ka nyolela mo oohapu ndhiyaka dha li miipelende yotango mbyoka wa tatula.
2 Ilongekidhila ngula, opo ongula u londe u ye kondundu Sinai, kungame kondungu yayo.
3 Ino ya ko nomuntu; nopondundu inapa monika tuu nando omuntu; hanzi nenge ongombe tayi napa ponyonga yondundu.”
4 Moses okwa hongo iipelende iyali yomamanya ya fa mbiyaka yotango. Ongula okwa meneka e te yi humbata ta londo kondundu Sinai, ngaashi Omuwa e mu lombwele.
5 Omuwa okwa kulukile ko e li moshikogo e ta thikama pamwe naye nokwa tumbula edhina lye, Omuwa.
6 Omuwa okwa piti koshipala she ti igidha ta ti: “Ongame Omuwa, ongame Kalunga omunamutimahenda, omunalukeno nomutalanteni, ihandi geye mbala nondu udha esilohenda nuudhiginini.
7 Ohandi dhiginine ohole yandje koluvalo lwomayuvi note dhimi po uukolokoshi omayono noondjo, ihe itandi etha okugeela omayono goohe koyana nokaatekulu sigo oluvalo olutitatu nolutine.”
8 Moses okwi inyongamene pevi meendelelo e ta galikana.
9 Okwa ti: “Omuwa, ngele onda silwa ohenda kungoye, kala mokati ketu. Oshigwana shika osha tangalala, ihe dhima po uukolokoshi wetu noondjo dhetu, ngoye u tu ninge aantu yoye mwene.”
10 Omuwa okwa lombwele Moses a ti: “Ngashingeyi otandi dhike ehangano nAaisraeli. Montaneho yawo otandi ka longa iinyengandunge mbyoka inaayi ningwa mo nale mokati kiigwana muuyuni. Aantu ayehe otaa ka mona iinyengandunge mbyoka ngame, Omuwa, tandi yi longo, oshoka otandi ke ku ningila iinima iitilithi.
11 Vulikeni koompango ndhoka tandi dhi mu pe nena. Otandi ka tidha mo Aayamori, Aakaanana, Aaheti, Aaperesi, Aahevi nAayebusi mondjila yeni.
12 Inamu hangana naantu yomoshilongo shoka tamu ka ya mo, opo shaa ninge omwigo gweni.
13 Kumunii po iiyambelo yawo, hanagulii po oongundhi dhawo dhiidhila ne mu keke po iiyelekela yawo yoshikalungakiintu Asheera.
14 “Ino simaneka kalunga gulwe, oshoka ngame Omuwa omulaadhi, Kalunga omukodhi.
15 Ino hangana naantu yoshilongo shoka, oshoka uuna taa longele iikalunga yawo notaye yi yambele omayambo, otaa ke ku hiya, u ye kuyo, noto ka kwatwa kemakelo, u lye iikulya ye yi yambele iikalunga yawo.
16 Aana yoye aamati otaa ningi ya hokane aakiintu aakwiilongo, mboka taye ya fala mokwaaitaala ndje nokulongela iikalunga yawo.
17 “Ino ihambulila iiyelekela yookalunga, u yi longele.
18 “Dhiginina Oshituthi shiikwiila inaayi tulwa efulika. Lya iikwiila inaayi tulwa efulika omasiku gaheyali momwedhi Abib, ngaashi nde ku lombwele, oshoka momwedhi ngoka owa tembuka muEgipiti.
19 “Omwiiyelipwa kehe omulumentu noshiiyelipwa kehe oshilumentu shoshimuna oshandje,
20 ihe oshiiyelipwa shokasino ou na oku shi kulilitha onzi, ihe ngele ito shi ningi, shi teya othingo. Osheeli kehe shomumati shi kulila ko. “Koshipala shandje inaku holoka omuntu e li iikaha yowala.
21 “Ou na okulonga omasiku gahamano, ihe ino longa mesiku etiheyali, vululukwa nando pu kale pethimbo lyoondima nenge lyeteyo.
22 “Dhiginina Oshituthi shoshipe, uuna to teya iilya yoye yotango, noto dhiginine Oshituthi shomatsali, sho to likola iiyimati moshitsambe shoye pehulilo lyomumvo.
23 “Aalumentu ayehe oye na okuholoka lutatu momumvo kehe koshipala shOmuwa, Kalunga kaIsrael.
24 Otandi ke ku tidhila po iigwana nokutaandelitha oshilongo shoye, nokape na ngoka ta ka haluka evi lyoye, sho to ka holoka koshipala shOmuwa, Kalunga koye, lutatu momumvo.
25 “Ino yamba oshikwiila sha tulwa efulika, uuna to yambele ndje omafikilondjambo. Onyama yoshimuna sha dhipagelwa oshituthi shaPaasa, ino yi hupithila ongula.
26 “Omumvo kehe oto eta kongulu yOmuwa oshipe shiilya yoye mbyoka wa teya. “Okakombwena ino ka telekela momahini gayina.”
27 Omuwa okwa lombwele Moses a ti: “Inyolela oohapu ndhika, oshoka okomukanka gwadho nda dhike ehangano pamwe nangoye nonaIsrael.”
28 Moses okwa kala pOmuwa omasiku omilongo ne uusiku nomutenya, ina lya sha noina nwa sha. Oye nokwa nyola oohapu dhehangano kiipelende, odho iipango omulongo.
29 Moses sho a londoloka kondundu Sinai a humbata iipelende iyali yiipango omulongo, oshipala she osha li tashi adhima, oshoka okwa popi nOmuwa, ihe ye ine shi tseya.
30 Aaron naantu ayehe oya tala Moses noya mono oshipala she tashi adhima noya tila okuhedha puye.
31 Moses okwe ya ithana, Aaron naawiliki yegongalo oya galukile kuye, Moses nokwe ya popitha.
32 Konima yaashika Aaisraeli ayehe oya gongala puye, naMoses okwe ya pe oompango adhihe ndhoka e dhi pewa kOmuwa kondundu Sinai.
33 Moses sho a mana oku ya lombwela, okwa siikile oshipala she nelapi.
34 Ihe shampa ta yi metsalihangano koshipala shOmuwa, ota siikulula oshipala she. Nge ta zi mo, otu uvithile Aaisraeli mbyoka a pewa e yi ya lombwele,
35 noyo taa mono oshipala she tashi adhima. Nena ota siikile oshipala she, ihe nge ta yi a ka popye nOmuwa, ota siikulula oshipala she.
1 Moses okwa gongele egongalo alihe lyAaisraeli e ta ti kulyo: “Oohapu ndhika Omuwa okwa ti nadhi gwanithwe:
2 Ne omu na omasiku gahamano gokulonga iilonga yeni, ihe esiku etiheyali olyo eyapuki, esiku lyevululuko lya yapulilwa ndje, ngame Omuwa. Shaa ngoka ta longo esiku ndyoka, na dhipagwe.
3 Inamu tema nokuli omulilo momagumbo geni mEsabati.”
4 Moses okwa lombwele Aaisraeli ayehe a ti: “Omuwa okwa utha ngeyi:
5 Momaliko geni kuthii mo omayambo gokuyambela Omuwa. Shaa ngoka a hala oku shi ninga, ne ete omayambo goshingoli, goshisiliveli nenge goshikushu;
6 oongodhi oombulau, oombwilili noontiliganembwilili, iiyata yoliina ombwanawa nomafufu giikombo;
7 iipa yoonzi oondumentu ya tethwa iitiligane, iipa yoongombefuta, iipilangi yomuthiya,
8 omagadhi gomoolamba, iizimba yokugwaya noyokufika iitsinino,
9 omamanya gaoniks nuuwe wokutula momapepenguwo gomuyambi nomoshipapa shomontulo.”
10 “Oonkulungu adhihe dhomokati keni nadhi ye dhi longe ashihe shoka Omuwa a ti:
11 otenda nesiikilo lyetsalihangano, uuhake, iipilangi, omalukambo, oongundhi noompadhi dhadho,
12 oshikethahangano nomitenge dhasho, oshisiikilo shasho netopolitho lyoku shi shiga;
13 oshitaafula, omitenge dhasho niikwaniipangitho ayihe; iikwiila iiyapuki;
14 oshihukikwanyeka shokuminikila niipumbiwa yasho; oolamba nomagadhi gadho;
15 oshiyambelo shiitsinino nomitenge dhasho; omagadhi gomugwayo, iitsinino yezimba etoye neshigolapi lyoposheelo shetsalihangano;
16 oshiyambelo shomafikilondjambo noshihaya shoshikushu, omitenge niikwaniipangitho yasho ayihe; oshiyaha shokwiiyogela nomagulu gasho;
17 omalapi gehale, oongundhi dhago noompadhi dhago, eshigolapi lyoposheelo shehale;
18 oomboha noongodhi dhothayila yetsalihangano nodhomalapi gehale;
19 noonguwo dha tungika dhaayambi dhokuzala, sho taa yakula mEhala lyuuyapuki — oonguwo oondjapuki dhomuyambi Aaron nodhoyana.”
20 Aaisraeli ayehe oya zi puMoses ya yi,
21 noshaa ngoka a li a hala, okwe etele Omuwa omayambo gokutunga etsalihangano. Oye eta shaa shoka sha pumbiwa meyakulo nomokutungitha oonguwo dhaayambi.
22 Shaa ngoka a hala oku shi ninga, omulumentu nenge omukiintu, okwe eta oompate, omagola, uulinga, uugondo wuulenga nuulenga auhe woshingoli noku yi yapulila Omuwa.
23 Shaa ngoka a li e na oongodhi oombulau, oombwilili noontiliganembwilili, oliina ya tungika, omafufu giikombo, iipa yoonzi oondumentu ya tethwa iitiligane niipa yoongombefuta, okwe yi eta.
24 Ayehe mboka ya li ye na oshisiliveli nenge oshikushu, oye shi etele Omuwa ombalagelo, naamboka ya li ye na iipilangi yomuthiya yokulongitha, oye yi eta.
25 Aakiintu ayehe oonkulungu oya yogoha oongodhi oombulau, oombwilili noontiliganembwilili noongodhi oontokele dholiina noye dhi eta.
26 Oya yogoha wo oongodhi dhomafufu giikombo.
27 Aawiliki oye eta omamanya gaoniks nomamanya omakwawo gondilo gokutula momapepenguwo nomoshipapa shomontulo,
28 niizimba nomagadhi gomoolamba, gomugwayo nogiitsinino yezimba etoye.
29 Aaisraeli ayehe mboka ya li ya hala okweetela Omuwa omayambo gawo molwiilonga mbyoka Omuwa a lombwele Moses, oye shi ningi.
30 Moses okwa lombwele Aaisraeli a ti: “Omuwa okwa hogolola Bezalel yaUri, omutekulu gwaHur gwomezimo lyaJuda.
31 Kalunga okwe mu udhitha ombepo ye e te mu pe uunongo, oondunge, ontseyo nuunkulungu
32 okuthaneka iinima yuungomba noku yi longa moshingoli, moshisiliveli nomoshikushu,
33 okuwega nawa omamanya gondilo noku ga tula moondambo, okuhonga omiti nokulonga oshilonga kehe shuunkulungu.
34 Omuwa okwe mu pa wo omagano guulongi, a longe yakwawo, nosho wo Oholiab yaAhisamak gwomezimo lyaDan e mu pa omagano gokulonga yakwawo.
35 Okwe ya pe uunkulungu wiilonga yi ili noyi ili mbyoka hayi longwa kaawegi yomamanya, kaafaneki nokaatungi yiiyata yi na uulenga yoongodhi oombulau, oombwilili noontiliganembwilili, yiiyata yoliina ombwanawa noyiiyata yilwe. Oyo mboka taa vulu okulonga shaa shoka noku shi faneka.”
1 “Bezalel naOholiab nayakwawo oonkulungu ayehe mboka ya pewa kOmuwa uunongo noondunge okutseya, nkene oshilonga kehe shi na okulongwa metungo lyetsalihangano, oye na okuninga ashihe, naanaa ngaashi Omuwa e shi utha.”
2 Moses okwi ithana Bezalel naOholiab noonkulungu adhihe ndhoka dha pewa kOmuwa uunongo nodha hala okulonga.
3 Odha pewa kuMoses omayambo agehe ngoka ge etwa kAaisraeli okutunga etsalihangano. Ihe aantu oya tsikile okweetela Moses oombalagelo ongula kehe.
4 Nena oonkulungu ndhoka dha li tadhi longo, odha yi
5 e tadhi tseyithile Moses tadhi ti: “Aantu otaye eta oshindji shi vulithe shoka sha pumbiwa miilonga mbyoka Omuwa e yi utha yi longwe.”
6 Moses okwa tumu elaka lya yi noontanda adhihe kutya aantu inaye eta we oombalagelo dhokutungitha etsalihangano. Osho ngaaka aantu ya zimbuka okweeta oombalagelo.
7 Mbyoka ya gongelwa oya li ya gwanenena noya pitilila metungo alihe.
8 Aalumentu oonkulungu mokati kaalongi yiilonga oya tungu etsalihangano momalapi omulongo goliina ombwanawa ga tungilwa oongodhi oombulau, oombwilili noontiliganembwilili nomafano gaakerubi paunkulungu.
9 Elapi kehe olya li li thike pekwawo, lyuule woondya omilongo mbali nahetatu nomutamo gwoondya ne.
10 Oya hondjele kumwe oondya ntano, dhi ninge oshitopolwa shimwe, osho wo oondya ntano okuninga oshitopolwa oshitiyali.
11 Kolungenge lwelapi lyotango moshitopolwa kehe oya ningi ko omalulo gongodhi ombulau.
12 Oya ningi omalulo omilongo ntano kolungenge lwelapi lyahugunina moshitopolwa shimwe nomalulo omakwawo omilongo ntano kolungenge lwelapi lyahugunina moshitopolwa oshitiyali. Miitopolwa ayihe iyali omalulo oga li ga tegama.
13 Oya hambula uuhake woshingoli omilongo ntano wokukogekela iitopolwa kumwe.
14 Oya ningi esiikilo lyotenda lyomalapi omulongo nalimwe lya tungwa momafufu giikombo.
15 Elapi kehe olya li li na uule woondya omilongo ndatu nomutamo gwoondya ne.
16 Oya hondjele oondya ntano kumwe, osho wo oonkwawo ntano kumwe.
17 Oya tula omalulo omilongo ntano kolungenge lwelapi lyahugunina moshitopolwa shimwe nomalulo omilongo ntano kolungenge lwelapi lyahugunina moshitopolwa oshikwawo.
18 Oya hambula uuhake woshikushu omilongo ntano wokukogekela iitopolwa kumwe, yi ninge esiikilo limwe.
19 Oya ningi omasiikilo gaali galwe, limwe olyiipa yoonzi oondumentu ya tethwa iitiligane nekwawo lyiipa yoongombefuta.
20 Oya hongo momuthiya iipilangi yokuthikameka etsalihangano.
21 Oshipilangi kehe osha li shi na uule woometa ne nomutamo gwoosentimeta omilongo hamano nahamano.
22 Oshipilangi kehe osha li shi na iikwatakanithi iyali tayi shi kwatakanitha kumwe noshikwawo. Iipilangi ayihe oya li yi na iikwatakanithi mbika.
23 Oya hongo iipilangi omilongo mbali omolwombinga yokuumbugantu wotenda,
24 noku yi tholomena oompadhi omilongo ne dhoshisiliveli, mu hwekelwe mo iikwatakanithi yiipilangi yoku yi thikamitha.
25 Oya ningi iipilangi omilongo mbali omolwombinga yokuumbangalantu wotenda,
26 noompadhi dhoshisiliveli omilongo ne, mbali kohi yoshipilangi kehe.
27 Konima yotenda kuuninginino oya hongele ko iipilangi ihamano
28 niipilangi iyali yokomakuvu.
29 Iipilangi mbika yokomakuvu oya kwatathana pekota nokukwatela kumwe ayihe sigo opombanda. Iipilangi iyali mbyoka ya ningi omakuvu, oya longwa pamukalo nguka.
30 Okwa li ku na iipilangi ihetatu yi na oompadhi dhayo dhoshisiliveli omulongo nahamano, koshipilangi shimwe okwa li mbali.
31 Oya hongo omalukambo omulongo nagatano gomuthiya, gatano omolwiipilangi kombinga yimwe yetsali,
32 gatano ogokombinga onkwawo nagatano ogokuuninginino konima.
33 Olukambo lwopokati olwa tulwa pokati kiipilangi lwa shigakana lwa tsa koombinga adhihe.
34 Oya kolonga iipilangi noshingoli noya tula ko oonkogo dhoshingoli dhokukwatela kumwe omalukambo, ngoka nago wo ga kolongwa noshingoli.
35 Oya ningi etopolitho lyoshiyata sholiina ombwanawa sha tungilwa oongodhi oombulau, oombwilili noontiliganembwilili nomafano gaakerubi paunkulungu.
36 Oya hongele eshigolapi oongundhi ne dhomuthiya dha kolongwa noshingoli, dhi na uuhake woshingoli. Oya tholoma oompadhi ne dhoshisiliveli dhokuthikamitha oongundhi.
37 Posheelo shetsali oya tula po eshigolapi lyoliina ombwanawa lya tungilwa oongodhi oombulau, oombwilili noontiliganembwilili.
38 Etopolitho ndika oye li hongele oongundhi ntano dhi na uuhake; omitse nomalukambo gadho oga kolongwa noshingoli nodha tholomenwa oompadhi dhoshikushu ntano.
1 Bezalel okwa pangele oshiketha shiipilangi yomuthiya, uule washo oondya mbali netata, omutamo gwasho olundya lumwe netata nomuthika gwasho olundya lumwe netata.
2 Okwe shi kolonga noshingolilela meni nokombanda nokwe shi tula oongenge dhoshingoli dha kunkula nasho.
3 Okwe shi ningile oonkogo ne dhoshingoli komakuvu gasho, kombinga kehe oonkogo mbali.
4 Okwa hongo omitenge dhomuthiya nokwe dhi kolongitha oshingoli.
5 Okwe dhi hwekele moonkogo kombinga kehe yoshiketha.
6 Okwa ningi oshisiikilo shoshingoli sho shene, uule washo oondya mbali netata nomutamo gwasho olundya lumwe netata.
7 Okwa longekidha aakerubi yaali moshingoli sha hambulwa,
8 gumwe komutse nguka namukwawo komutse ngwiyaka gwoshisiikilo. Okwe ya ningi ya kwatathana noshisiikilo.
9 Aakerubi oya li ya taalelathana poshisiikilo nomawawa gawo ge shi siikila.
10 Okwa pangele oshitaafula shiipilangi yomuthiya, uule oondya mbali, omutamo olundya lumwe nomuthika olundya lumwe netata.
11 Okwe shi kolongitha oshingoli sho shene nokwe shi tula oongenge dhoshingoli dha kunkula nasho.
12 Okwe shi ningile eketsu li thike peke lya kunkula nasho noongenge dhoshingoli dha kunkula neketsu.
13 Okwe shi hambulile oonkogo ne dhoshingoli nokwe dhi tula komakuvu gane pomagulu.
14 Oonkogo dhokuhwekela omitenge dhokuhumbata oshitaafula okwe dhi tula popepi neketsu.
15 Okwa hongo omitenge moshiti shomuthiya nokwe dhi kolongitha oshingoli.
16 Iinima yokoshitaafula okwe yi hambula moshingoli sho shene: iiyaha, iitsininitho, iitenga nuuyo wokutula iinuwandjambo.
17 Okwa hambula oshihukikwanyeka shoshingoli sho shene. Okwa ningi ompadhi yasho niimpana yasho moshingoli sha hambulwa; uulenga wiiyimino, woonkuto nowoongala dha sheneka okwe dhi hambulile mumwe niimpana.
18 Moombati dhasho omwa tsapuka iimpana ihamano, itatu kombinga ndjika niitatu kombinga onkwawo.
19 Oshimpana kehe shomwiihamano osha li shi na uulenga utatu wa fa iiyimino, oonkuto noongala dha sheneka dhomumandeli.
20 Molutu lwoshihukikwanyeka omwa li uulenga une wa fa iiyimino, oonkuto noongala dha sheneka dhomumandeli.
21 Onkuto yimwe oya li kohi yepando kehe lyiimpana ya tsapuka molutu.
22 Oonkuto niimpana oya li ya kwatathana noshihukikwanyeka noya hambulwa moshingoli sha yela.
23 Okwa longekidhile oshihukikwanyeka oolamba heyali; iikonde yokutetitha omalapi goolamba niikangwa yokutula mo omutoko gwokomalapi. Okwe yi ningi moshingoli sho shene.
24 Iilongitho ayihe mbika okwe yi ningi moshitalendi shimwe shoshingoli sho shene.
25 Okwa tungu oshiyambelo shiipilangi yomuthiya shokufikila ko iitsinino. Osha li shi na uule wolundya lumwe nomutamo gwolundya lumwe nomuthika gwoondya mbali. Ooniga dhokomakuvu odha li dha kwatathana noshiyambelo.
26 Okwa kolonga kombanda yasho, olutu nooniga dhasho noshingoli sha yela nokwe shi ningile epaya lyoshingoli.
27 Koombinga adhihe mbali dholutu kohi yoongenge okwe shi ningile oonkogo mbali dhoshingoli dhokuhukilwa omitenge dhoku shi humbata.
28 Omitenge okwe dhi hongo dhomuthiya nokwe dhi kolonga noshingoli.
29 Okwa lungu omugwayo omuyapuki, osho wo iitsinino yezimba etoye ya longekidhwa paunkulungu.
1 Okwa ningi oshiyambelo shomafikilondjambo miipilangi yomuthiya. Osha li shuule woondya ntano, omutamo gwoondya ntano nomuthika gwoondya ndatu.
2 Komakuvu gasho gane okwa ningile ko ooniga dha kwatathana noshiyambelo. Ashihe okwe shi kolonga noshikushu.
3 Okwa hambula iikwaniipangitho ayihe yoshiyambelo: Iipana, iihupulo, iiyaha, iizigitho niikangwa yomakala. Iikwaniipangitho mbika ayihe oya li ya hambulwa moshikushu.
4 Okwa hambula oshihaya shoshikushu e te shi tula kohi yoongenge dhoshiyambelo, she endjelela sigo olwopokati koshiyambelo.
5 Okwa hambula oonkogo ne e te dhi tula komakuvu gane goshihaya.
6 Okwa hongo omitenge dhomuthiya e te dhi kolonga noshikushu.
7 Okwe dhi hwekele moonkogo koombinga adhihe mbali dhoshiyambelo. Oshiyambelo osha li sha pangelwa miipilangi shi na omututu meni.
8 Okwa hambula oshiyaha shoshikushu shi na omagulu goshikushu. Okwe shi ningi miiyitalelo yaakiintu mboka haa yakula posheelo shetsalihangano.
9 Etsalihangano okwe li dhikile ehale lyomalapi goliina ombwanawa. Kombinga yokuumbugantu omalapi oga li guule woondya ethele,
10 ga tsilikwa koongundhi omilongo mbali noompadhi dhadho dhoshikushu omilongo mbali; uuhake nomalukambo goongundhi oga li goshisiliveli.
11 Osho wo a ningi kombinga yokuumbangalantu wehale.
12 Kombinga yokuuninginino omalapi oga li guule woondya omilongo ntano, oongundhi omulongo noompadhi omulongo.
13 Kombinga yokuuzilo, nkoka kwa li osheelo, ehale olya li oondya omilongo ntano.
14 Kombinga kehe yosheelo okwa li omalapi goondya omulongo nantano, oongundhi ndatu noompadhi ndatu.
15
16 Omalapi agehe ga dhingilila ehale oga li ga tungwa moshiyata sholiina ombwanawa.
17 Oompadhi dhoongundhi odha li dhoshikushu, ihe uuhake nomalukambo oga li goshisiliveli, nomitse dhoongundhi odha li dha kolongwa noshisiliveli. Oongundhi adhihe dhehale odha li dha kwatelwa kumwe nomalukambo goshisiliveli.
18 Eshigolapi lyoposheelo shehale olya li lya ningwa moshiyata sholiina ombwanawa sha tungilwa oongodhi oombulau, oombwilili noontiliganembwilili. Olya li li na uule woondya omilongo mbali nomuthika gwoondya ntano gwa faathana nomalapi gehale.
19 Olya li lya tsilikwa koongundhi ne dhi na oompadhi ne dhoshikushu. Uuhake nomalukambo gadho oga li goshisiliveli, nomitse dhadho odha li dha kolongwa noshisiliveli.
20 Oomboha adhihe dhotenda nodhehale odha li dhoshikushu.
21 Mpaka ope na elandulathano lyuutale mboka wa longithwa metungo lyetsalihangano, moka mwa pungulwa iipelende yomamanya iyali mwa nyolelwa iipango omulongo. Elandulathano olya ningwa kuMoses keyalulo lyAalevi mboka ya longo mewiliko lyaItamar, omuna gwomuyambi Aaron.
22 Bezalel yaUri, omutekulu gwaHur, gwomezimo lyaJuda, okwa gwanitha ashihe shoka Omuwa a popi.
23 Omukwathi gwe Oholiab yaAhisamak, gwomezimo lyaDan, okwa li omuwegi gwomamanya, omufaneki nomutungi gwiiyata yi na uulenga woongodhi oombulau, oombwilili noontiliganembwilili nogwiiyata yoliina ombwanawa.
24 Oshingoli ashihe shoka sha yapulilwa Omuwa okutunga etsalihangano nosha gandjwa ombalagelo, osha li iitalendi omilongo mbali nomugoyi noosekeli omathele gaheyali nomilongo ndatu pandjele yosekeli ndjoka hayi longithwa motempeli.
25 Oshisiliveli shoka sha zi meyalulo lyegongalo, osha li iitalendi ethele noosekeli eyuvi limwe omathele gaheyali omilongo heyali nantano pandjele yosekeli ndjoka hayi longithwa motempeli.
26 Omuntu kehe meyalulo okwa futu etatasekeli pandjele yosekeli ndjoka hayi longithwa motempeli. Ayehe mboka ya yalulwa yomimvo omilongo mbali nenge dhi vule po, oya li 603 550.
27 Oshisiliveli shondjundo yoograma 3,400 osha tholoma oompadhi dhetsalihangano nodhetopolitho, oshitalendi shimwe ompadhi yimwe.
28 Oosekeli eyuvi limwe omathele gaheyali omilongo heyali nantano Bezalel okwe dhi hambula uuhake nomalukambo koongundhi nokusiikila omitse dhadho.
29 Oshikushu shoka she etwa ombalagelo, osha li iitalendi omilongo heyali noosekeli omayuvi gane.
30 Oshikushu shika okwe shi hambula oompadhi dhomweelo gwetsalihangano, oshiyambelo shoshikushu, oshihaya niikwaniipangitho ayihe yasho,
31 oompadhi dhehale nodhosheelo shalyo noomboha adhihe dhetsalihangano nodhehale lye li kunduka.
1 Oya tungu oonguwo dhuuyambi noongodhi oombulau, oombwilili noontiliganembwilili, dhi zalwe kaayambi, sho taa ka yakula mEhala lyuuyapuki. Oya tungile Aaron oonguwo, ngaashi Omuwa a lombwele Moses.
2 Oya tungu omapepenguwo noongodhi dhoshingoli, noongodhi oombulau, oombwilili noontiliganembwilili nonoongodhi dholiina ombwanawa.
3 Oya ndanda oshingoli, sigo sha pepuka noonkondo noye shi kondo oondali noku dhi tungila mumwe noongodhi oombulau, oombwilili noontiliganembwilili nonoongodhi dholiina.
4 Oya ningile omapepenguwo omakwi gaali ge ga kwatakanitha koombinga adhihe mbali.
5 Ekwamo olya ningwa moshiyata shomapepenguwo nolya kwatakanithwa kugo, ngaashi Omuwa a lombwele Moses.
6 Oya longo omamanya gaoniks e taye ga tula muundambo woshingoli; omadhina gaana yaJakob omulongo nayaali oga li ga takelwa mo nuunkulungu.
7 Oye ga tula komakwi gomapepenguwo, ga kalele po omazimo omulongo nagaali gaIsrael, naanaa ngaashi Omuwa a lombwele Moses.
8 Oya tungu oshipapa shomontulo moshiyata shimwe nomapepenguwo: sha tungikika noongodhi dhoshingoli, noongodhi oombulau, oombwilili noontiliganembwilili nonoongodhi dha dhingwa dholiina ontokele.
9 Osha li shi na oonkotso ne, sha gonywa, uule washo oshitine sholundya, osho wo omutamo.
10 Oya tula mo omikweyo ne dhomamanya gondilo: momukweyo gwotango oya tula mo ospineli, otopasi nosmaragdi;
11 momukweyo omutiyali orubini, osafire nojaspes;
12 momukweyo omutitatu oturkoisi, oagate noametiste;
13 momukweyo omutine oberil, okarnelia nojasper. Oga li ga dhamithwa muundambo woshingoli.
14 Pamwaalu gwaana yaJakob omamanya oga li omulongo nagaali, kehe limwe lyokukalela po ezimo limwe padhina ndyoka lya takelwa mo.
15 Koshipapa shomontulo oya ningile ko uulyenge woshingoli sho shene wa dhingwa nawa wa fa oongodhi.
16 Oya hambula uulinga uyali woshingoli e taye u tula koonkotso dhopombanda dhoshipapa shomontulo.
17 Kuulinga mboka uyali oya mangele ko oongodhi dhoshingoli.
18 Oondungu oonkwawo dhadho oye dhi mangele komapando gaali e taye ga mangele ishewe komakwi gomapepenguwo, kombinga yokomeho.
19 Oya hambula ishewe uulinga uyali woshingoli e taye u tula koonkotso mbali dhokohi dhoshipapa shomontulo, koongenge dhomeni dha gama pomapepenguwo.
20 Oya hambula po ishewe uulinga woshingoli e taye u tula koondungu dhopevi dhopontulo dhomakwi agehe gaali gomapepenguwo, popepi nomuhondjo kombanda yekwamo lyuulenga.
21 Oya mangele uulinga woshipapa shomontulo kuulinga womapepenguwo nongodhi ombulau, opo oshipapa shomontulo shi kankame kombanda yekwamo noitashi dhituluka we. Ashihe osha ningwa, ngaashi Omuwa a lombwele Moses.
22 Eguyo lyokombanda yomapepenguwo olya hondjwa moshiyata oshimbulau.
23 Olya li li na ombululu yokuya omutse, nombululu ndjika oya kolekwa nomugoyo gwa tungikika, opo yaa tuuke.
24 Komugoyo gwopevi aguhe oya tula ko omafano giiyimati yomugranati omambulau, omambwilili nomatiliganembwilili ga togwa mumwe nuungendjo woshingoli, naanaa ngaashi Omuwa a lombwele Moses.
25
26
27 Oya tungile Aaron noyana oohema dhoongodhi oontokele dholiina,
28 egala, omatsilu, oombulukweya
29 nekwamo lyoongodhi oontokele dha dhingwa dholiina li na uulenga woongodhi oombulau, oombwilili noontiliganembwilili, ngaashi Omuwa a lombwele Moses.
30 Oya hambula uulenga wokoshipala, epapa lyoshishani oshiyapuki lyoshingoli sho shene e taa takele mo enyolo tali ti “Osha yapulilwa Omuwa.”
31 Oye li mangele nongodhi ombulau kegala lwokomeho, ngaashi Omuwa a lombwele Moses.
32 Iilonga ayihe yetsalihangano oya hulithwa ya pu. Aaisraeli oya gwanitha ashihe shoka Omuwa a lombwele Moses.
33 Oye etele Moses otenda niikwaniipangitho yayo ayihe, uuhake wayo, iipilangi yayo, omalukambo gayo, oongundhi dhayo noompadhi dhadho;
34 esiikilo lyiipa yoonzi oondumentu ya tethwa iitiligane; esiikilo lyiipa yoongombefuta; etopolitho lyokushiga;
35 oshikethahangano shi na iipelende yomamanya, omitenge dhasho noshisiikilo shesilohenda;
36 oshitaafula niikwaniipangitho yasho ayihe niikwiila iiyapuki;
37 oshihukikwanyeka shoshingoli sho shene, oolamba dhasho, iikwaniipangitho yasho ayihe nomagadhi gomoolamba;
38 oshiyambelo shoshingoli; omugwayo; iitsinino yezimba etoye; eshigolapi lyoposheelo shetsalihangano;
39 oshiyambelo shoshikushu noshihaya shasho shoshikushu, omitenge dhasho niikwaniipangitho yasho ayihe; oshiyaha shokwiiyogela nomagulu gasho;
40 omalapi gehale noongundhi dhago noompadhi dhadho; eshigolapi lyoposheelo shehale noongodhi dhalyo; oomboha dhotenda; iikwaniipangitho ayihe tayi longithwa metsali;
41 oonguwo dha tungika dhokuzalwa kaayambi, nge ye li meyakulo mEhala Lyuuyapuki — oonguwo oondjapuki dhomuyambi Aaron nodhoyana.
42 Aaisraeli oya ningi ayihe mbika, naanaa ngaashi Omuwa a lombwele Moses.
43 Moses okwa konakona ayihe nokwa mono kutya oya ningwa, naanaa ngaashi Omuwa a gandjele oshipango shoku yi longa. Moses okwe ya laleke nuuyamba.
1 Omuwa okwa lombwele Moses e ta ti:
2 “Mesiku lyotango lyomwedhi gwotango thikameka etsalihangano.
3 Pungula mo oshikethahangano shi na iipelende yiipango omulongo e to tula etopolitho komeho goshikethahangano.
4 Tula mo oshitaafula e to tenteke ko iikwaniipangitho yasho ayihe. Tula mo wo oshihukikwanyeka e to hwameke oolamba dhasho.
5 Tula mo oshiyambelo shoshingoli shokufikila iitsinino komeho goshikethahangano e to endjeleleke eshigolapi posheelo shetsalihangano.
6 Oshiyambelo shomafikilondjambo oto shi tula komeho getsalihangano.
7 Oshiyaha shokwiiyogela oto shi tula pokati ketsalihangano noshiyambelo e to shi udhitha omeya.
8 Dhika olugumbo lwehale e to endjeleleke eshigolapi posheelo shalyo.
9 “Nena yapula etsalihangano niikwaniipangitho yalyo ayihe noku yi gwayeka nomagadhi omayapuki, notali ningi eyapuki.
10 Otaku landula eyapulo lyoshiyambelo niikwaniipangitho yasho ayihe, notashi ningi oshiyapuki.
11 Gwayeka wo oshiyaha shokwiiyogela nomagulu gasho, opo u shi yapule.
12 “Eta Aaron noyana posheelo shetsalihangano e to ya yogo nomeya.
13 Zaleka Aaron oonguwo oondjapuki e to mu gwayeke noku mu yapula, opo a ninge omuyambi a longele ndje.
14 Eta wo oyana e to ya zaleke oohema.
15 Nena ya gwayeka, naanaa ngaashi wa gwayeke he, opo ya ninge aayambi ya longele ndje. Egwayeko ndika otali ya ningi aayambi sigo okoluvalo noluvalo.”
16 Moses okwa gwanitha ayihe, ngaashi Omuwa a popi.
17 Mesiku lyotango lyomwedhi gwotango omumvo omutiyali, sho ya tembuka muEgipiti, etsalihangano olya thikamekwa.
18 Moses okwa tenteke po oompadhi dhetsalihangano niipilangi yalyo, okwa tula ko omalukambo gayo nokwa dhike oongundhi dhalyo.
19 Okwa hwanuna ko otenda e ta tula ko esiikilo kombanda, naanaa ngaashi Omuwa a popi.
20 Nena okwa kutha iipelende iyali yomamanya e te yi pungula moshikethahangano. Okwa hwekele omitenge moonkogo dhoshiketha e ta tenteke ko oshisiikilo shesilohenda.
21 Okwa langeke oshiketha metsalihangano e te endjeleleke etopolitho nolya siikile oshikethahangano, ngaashi Omuwa a lombwele Moses.
22 Okwa tula oshitaafula meni lyetsalihangano lwokuumbangalantu kombinga yopondje yetopolitho
23 e ta tenteke ko iikwiila iiyapuki koshipala shOmuwa, naanaa ngaashi Omuwa a lombwele Moses.
24 Okwa tula oshihukikwanyeka metsalihangano lwokuumbugantu sha taalelathana noshitaafula,
25 nokwa hwameke oolamba koshipala shOmuwa, ngaashi Omuwa a lombwele Moses.
26 Okwa tula oshiyambelo shoshingoli metsalihangano komeho getopolitho,
27 nokwa lungunitha iitsinino yezimba etoye, naanaa ngaashi Omuwa a lombwele Moses.
28 Okwe endjeleleke eshigolapi posheelo shetsalihangano,
29 noshiyambelo shomafikilondjambo okwe shi tula komeho gosheelo shetsalihangano. Okwa yambele ko efikilondjambo niikulyandjambo, naanaa ngaashi Omuwa a lombwele Moses.
30 Okwa tula oshiyaha shokwiiyogela pokati ketsalihangano noshiyambelo e te shi udhitha omeya.
31 Moses, Aaron noyana oya yogo iikaha yawo noompadhi dhawo moshiyaha shoka,
32 shampa taa yi metsalihangano nenge koshiyambelo, naanaa ngaashi Omuwa a lombwele Moses.
33 Moses okwa thikameke olugumbo lwehale lwa kunduka etsalihangano noshiyambelo e te endjeleleke eshigolapi posheelo shehale. Nena okwa manitha iilonga ayihe.
34 Oshikogo osha kwidhidhike etsalihangano, neadhimo lyOmuwa olye li udhitha.
35 Omolwashika, Moses ina wapa okuya mo metsalihangano.
36 Aaisraeli oya dhilukitha po ontanda yawo yu uka palwe aluhe, oshikogo sho sha yeluka kombanda yetsalihangano
37 Oya kala mpoka, sigo oshikogo sha yeluka po ishewe, nena oya dhilutha wo ontanda yawo.
38 Moondjenda dhawo adhihe oya vulu okumona oshikogo shOmuwa sha kala kombanda yetsalihangano omutenya, nomulilo tagu yeta musho uusiku.