1 Petameko Kalunga okwa shiti egulu nevi.
2 Evi olya li lya vongakana nolya li owala. Omilema odha siikile omeya omale apehe, nOmbepo yaKalunga oya tengelele kombanda yomeya.
3 Kalunga okwa popi e ta ti: “Naku ninge uuyelele,” uuyelele nowa holoka.
4 Kalunga okwa mono kutya uuyelele owo opala, nokwa yoolola uuyelele momilema.
5 Uuyelele okwe u luku “omutenya” nomilema “uusiku.” Okwa toko kwa ningi ongulohi, nokwa shi kwa ningi ongula — olyo esiku lyotango.
6 Nena Kalunga okwa popi e ta ti: “Naku ninge eyalelo pokati komeya.”
7 Kalunga okwa yalaleke eyalelo lyokutopola omeya ngoka ge li kohi yalyo naangoka ge li kombanda. Osho sha li ngaaka.
8 Eyalelo okwe li luku “egulu.” Okwa toko kwa ningi ongulohi, nokwa shi kwa ningi ongula — olyo esiku etiyali.
9 Kalunga okwa popi e ta ti: “Omeya gokohi yeyalelo naga gongale pehala limwe, opo uukukutu u holoke.” Osho sha ningwa.
10 Kalunga okwa luku uukukutu “evi,” nomeya ngoka ga gongala kevi, okwe ga luku “efuta.” Kalunga nokwa mono kutya osho opala.
11 Nena okwa popi e ta ti: “Evi nali meneke iimeno yi ili noyi ili mbyoka yi na oomuma, nomiti ndhoka hadhi imi iiyimati.” Osho nosha ningwa.
12 Evi olya meneke iimeno yi ili noyi ili, naKalunga okwa mono kutya osho opala.
13 Okwa toko kwa ningi ongulohi, nokwa shi kwa ningi ongula — olyo esiku etitatu.
14 Kalunga okwa popi a ti: “Omaminikilo naga holoke keyalelo lyegulu, ga yoolole omutenya muusiku nokuutha omathimbomumvo, omasiku nomimvo.
15 Naga minikile keyalelo lyegulu nokugandja uuyelele kevi.” Osho nosha ningwa.
16 Kalunga okwa shiti omaminikilo omanene gaali, etango lyokupangela omutenya nomwedhi gwokupangela uusiku; okwa shiti wo oonyothi.
17 Kalunga okwa tula omaminikilo keyalelo lyegulu, ga minikile evi,
18 okupangela omutenya nuusiku nokuyoolola uuyelele nomilema. Kalunga okwa mono kutya osho opala.
19 Okwa toko kwa ningi ongulohi, nokwa shi kwa ningi ongula — olyo esiku etine.
20 Kalunga okwa popi a ti: “Momeya namu wiwime iinamwenyo yomaludhi gi ili nogi ili, noondhila nadhi tuke keyalelo lyegulu.”
21 Kalunga okwa shiti iikwameya iinene, iishitwa yomaludhi agehe hayi wiwima momeya, nomaludhi agehe goondhila. Kalunga okwa mono kutya osho opala.
22 Okwe yi yambeke e ta ti: “Valathaneni, ne mu indjipale nokuudha efuta, noondhila nadhi indjipale kombanda yevi.”
23 Okwa toko kwa ningi ongulohi, nokwa shi kwa ningi ongula — olyo esiku etitano.
24 Kalunga okwa popi e ta ti: “Evi nali etithe po iinamwenyo yomaludhi agehe: iimuna, iihono niiyamakuti.” Osho nosha ningwa.
25 Kalunga okwa shiti iiyamakuti ayihe, iimuna ayihe niihono ayihe. Okwa mono kutya osho opala.
26 Kalunga okwa popi e ta ti: “Natu shiteni aantu ye tu fe, oshifetha shetu. Oyo ye na okupangela oohi dhomefuta, oondhila dhokegulu, iimuna, iiyamakuti, evi alihe niihono ayihe.”
27 Kalunga okwa shiti omuntu oshifetha she, e ya shiti omulumentu nomukiintu.
28 Okwe ya yambeke e ta ti: “Valathaneni, ne mu indjipale nokuudha evi alihe. Li tuleni mepangelo lyeni; pangeleni oohi dhomefuta noondhila dhokegulu niinamwenyo ayihe tayi inyenge kombanda yevi.
29 Onde mu menithile iimeno ayihe yi na oomuma nomiti adhihe dhiiyimati. Nadhi kale oondya dheni.
30 Ihe iiyamakuti ayihe, oondhila adhihe dhokegulu niinamwenyo ayihe mbyoka hayi ipwedha, onde yi menithile omwiidhi niimeno, yi lye.” Osho sha ningwa.
31 Kalunga okwa tala eshito lye alihe nokwe li mono lyo opala lela. Okwa toko kwa ningi ongulohi, nokwa shi kwa ningi ongula — olyo esiku etihamano.
1 Ano osho ngeyi egulu nevi noongundu dhago adhihe odha pu okushitwa.
2 Mesiku etiheyali Kalunga sho a tsakanitha iilonga ye ayihe yeshito, okwa vululukwa.
3 Kalunga nokwa yambeke esiku etiheyali e te li yapula, oshoka okwa mana eshito lye alihe nokwa vululukwa kiilonga ye.
4 Ndika olyo ehokololo lyeshito lyegulu nevi, sho ga shitwa. Omuwa Kalunga sho a shiti egulu nevi,
5 kevi kakwa li ku na iihwa yokelundu nenge omwiidhi komalundu, oshoka okwa li inaa lokitha manga omvula, nokakwa li ngoka a longo evi,
6 ihe oshimuke osha zi mevi e tali tosima.
7 Omuwa Kalunga okwa kutha ontsi yevi e te yi umbu omuntu. Okwe mu fudhile ombepo yomwenyo momayulu, omuntu nokwa ningi omunamwenyo.
8 Nena Omuwa Kalunga okwa toto eyana muEden, kuuzilo, nokwa langeke mo omuntu ngoka e mu shiti.
9 Okwa menithile mo omiti dhomaludhi gi ili nogi ili dho opala dhokutalwa nodhokuliwa. Pokati keyana okwa menithile po omuti gwomwenyo nomuti gwokutseya uuwanawa nuuwinayi.
10 Omulonga gwa tondoka muEden e tagu tutike eyana. Handiya yaEden ogwa topoka miimpanalonga ine.
11 Oshimpanalonga shotango oPishon tashi tondokele moshilongo ashihe shaHavila.
12 (Oshingoli shoshilongo shika oshiwanawa, noku na wo iizimba iiwanawa nomamanya gondilo.)
13 Oshimpanalonga oshitiyali oGihon tashi kunkula nevi alihe lyaKush.
14 Oshimpanalonga oshititatu oTigris, shoka tashi tondokele kuuzilo waAssur, noshimpanalonga oshitine osho Eufrat.
15 Omuwa Kalunga okwa langeke omuntu meyana lyaEden, opo e li longe ye e li keelele.
16 Okwa ti kuye: “Lya komuti kehe meyana,
17 kakele komuti gwokutseya uuwanawa nuuwinayi. Iiyimati yomuti ngoka ino yi lya; ngele oto shi ningi, oto si shili.”
18 Omuwa Kalunga okwa popi e ta ti: “Inashi opala, omuntu i ikalele oye awike. Otandi mu shitile omukwathi e mu opalela.”
19 Okwa kutha ontsi yevi e ta shiti iinamwenyo ayihe noondhila adhihe. Ayihe okwe yi eta komuntu a tale, nkene te yi luku omadhina gayo. Osho iinamwenyo ayihe oyi na omadhina gayo, ngaashi omuntu e yi luku.
20 Omuntu okwa luku iinamwenyo ayihe, oondhila adhihe niiyamakuti ayihe, ihe ini imonena omukwathi e mu opalela.
21 Omuwa Kalunga okwa kotheke omuntu omposi ondhigu, nomanga a li a kotha, okwa kutha mo olupati lwe lumwe nopehala mpoka e lu kutha, okwa thitike po nontumba.
22 Olupati okwe lu shiti omukiintu e te mu eta komulumentu.
23 Omulumentu okwa ti: “Ndika esipa lyomomasipa gandje nonyama yomonyama yandje. Na lukwe omukiintu oshoka okwa kuthwa momulumentu.”
24 Omolwashika omulumentu oku na okuthiga po he nayina e ta kwatathana nomukadhi, oyo notaa ningi omuntu gumwe.
25 Omulumentu nomukiintu ayehe oya li omudhuu, ihe inaa saathana ohoni.
1 Eyoka olya li li na omakoto unene li vule iinamwenyo ayihe mbyoka Omuwa Kalunga e yi shiti. Eyoka olya pula omukiintu lya ti: “Kalunga okwe mu lombwele shili, mwaa lye komiti adhihe dhomeyana?”
2 Omukiintu okwa yamukula a ti: “Ohatu li iiyimati yomiti adhihe dhomeyana.
3 Iiyimati yomuti ngoka gu li pokati kalyo, Kalunga okwe tu lombwele, twaaye yi lye tse twaa gume omuti; ngele tatu shi ningi, otatu ka sa.”
4 Eyoka olya yamukula lya ti: “Itamu si shili.
5 Oshoka Kalunga okwa tseya kutya uuna tamu li ko, omeho geni otaga tonata, one notamu fe Kalunga mokutseya uuwanawa nuuwinayi.”
6 Omukiintu okwa ndhindhilike, omuti nkene gwo opala niiyimati yagwo yi etitha olwiho okuliwa nokuninga omuntu omunandunge. Okwa toonona ko iiyimati yimwe e ta li. Okwa pe wo omulume, naye wo okwa li.
7 Nanziya omeho gawo ayehe oga tonata noya mono ye li omalutu gowala; oya hondjele kumwe iifo yomukwiyu e taa isiikile.
8 Komatango sho kwa talala, oyu uvu Omuwa Kalunga ta lyanga meyana noye ke mu holama momiti.
9 Ihe Omuwa Kalunga okwi ithana omuntu a ti: “Ou li peni?”
10 Omuntu okwa yamukula a ti: “Ondu uvu iikukulo yoye meyana, onkee nda tila, molwashoka ondi li olutu lwowala, e te holama.”
11 Omuwa nokwa ti: “Olye e ku lombwele kutya ou li olutu lwowala? Owa li nani komuti nde gu ku indike, waa lye ko?”
12 Omuntu okwa ti: “Omukiintu nguka wa pe ndje, oye a pe ndje iiyimati e tandi yi li.”
13 Omuwa Kalunga okwa pula omukiintu a ti: “Owe shi ningile shike?” Omukiintu okwa yamukula: “Eyoka lya kotokele ndje nonda li.”
14 Nena Omuwa Kalunga okwa lombwele eyoka e ta ti: “Molwashoka wa ningi ngeyi, oto thingwa mokati kiinamwenyo ayihe. Okuza nena oto kala ho enditha ela lyoye, nou na okulya ontsi yevi omasiku goye agehe, manga u na omwenyo.
15 Otandi tula etondathano pokati keni nomukiintu, nopokati koluvalo lwoye noluvalo lwe. Oluvalo lwe otalu nyanyagula omutse gwoye, ongoye noto mu tsu moshithi shompadhi ye.”
16 Omuwa okwa lombwele omukiintu a ti: “Otandi ku indjipalithile uudhigu wuusimba woye nuuwehame woshitheta shokuvala. Omulumentu gwoye oto kala noku mu yuulukwa, ndele ota kala noku ku pangela.”
17 Oye okwa lombwele omulumentu a ti: “Owa pulakene oohapu dhomukiintu gwoye nowa li komuti nde gu indike. Molwashoka wa ningi ngeyi, evi otali thingwa molwoye. Ou na oku li longa u na omazigudhe mokukalamwenyo kwoye akuhe, opo li ku pe iipalutha.
18 Otali ku menithile oondjoho nomakwega, nou na okulya omboga yokelundu.
19 Ou na okulonga nuudhigu nokupusha, opo evi li ku pe sha, sigo to ka shuna mevi moka wa kuthwa mo. Owa kuthilwe mevi nou na okushuna mevi.”
20 Adam okwa luku omukadhi Eva, oshoka oyina yaanamwenyo ayehe.
21 Omuwa Kalunga okwa tungile Adam nomukadhi oonguwo dhiipa e te dhi ya zaleke.
22 Nena Omuwa Kalunga okwa ti: “Ngashingeyi omuntu okwe tu fe, e shi uuwanawa nuuwinayi. Ihe ke na okupitikwa, a lye we iiyimati yokomuti gwomwenyo ye a kale e na omwenyo sigo aluhe.”
23 Omuwa Kalunga okwe mu tidha mo meyana lyaEden, a ye a ka longe evi moka a kuthwa mo.
24 Kuuzilo weyana okwa langeke ko aakerubi ye na egongamwele tali yeta omulilo, opo li keelele shaa ngoka ta hedha komuti gwomwenyo.
1 Adam okwa lala nomukadhi Eva e ta ningi omusimba. Okwa vala okanona okamati e ta ti: “Kekwatho lyOmuwa onda pulumutha okamati.” Okwe ka luku Kain.
2 Konima yaambika okwa vala ishewe omumati, Abel. Abel okwa ningi omusita gwiimuna, ihe Kain omulongi gwepya.
3 Sho pwa piti omasiku, Kain okwa yambele Omuwa omayambo giiliwa yomepya lye.
4 Abel okwe eta onzigona ondjelipa yomoonzi dhe nokwe yi dhipaga e te yi yambele Omuwa. Omuwa okwa hokwa Abel nondjambo ye,
5 ihe ina hokwa Kain nondjambo ye. Kain okwa geye a sizimaneka oshipala she kondjahi.
6 Omuwa nokwa ti kuKain: “Omolwashike wa geya? Oshike wa sizimaneka oshipala?
7 Ngele to longo uuwanawa, nena oshipala shoye oshi li nawa, ihe ngele to longo uuwinayi, nena uulunde owe ku langele posheelo. Owo wa hala oku ku pangela, ihe ou na oku u pangela.”
8 Opo ihe Kain okwa lombwele mumwayina Abel ta ti: “Tu ye kelundu.” Sho ya yi ko, Kain okwa ponokele omumwayina e te mu dhipaga.
9 Omuwa okwa pula Kain a ti: “Omumwanyoko Abel oku li peni?” Kain okwa yamukula a ti: “Kandi shi wo. Ongame omusita gwomumwameme nani?”
10 Nena Omuwa okwa ti: “Omolwashike wa longo iihuna yi thike mpono? Ombinzi yomumwanyoko otayi kugile ndje mevi.
11 Okuza ngashingeyi ongoye omuthingwa, noto tidhwa mo mepya. Evi olye ekama okana kalyo okutaamba ombinzi yomumwanyoko, sho we mu dhipaga.
12 Nge to longo epya lyoye, itali ku kutitha; oto ka ninga epongo nontembuki kombanda yevi.”
13 Kain okwa lombwele Omuwa a ti: “Ondjo yandje ondhigu unene, ite vulu oku yi humbata.
14 Oto tidha ndje mo mepya nokoshipala shoye. Otandi ka ninga epongo nontembuki kombanda yevi, noshaa ngoka ta mono ndje, ota dhipaga ndje.”
15 Omuwa okwa yamukula a ti: “Aawe, ngele ope na ngoka te ku dhipaga, ota ka geelwa luheyali.” Omuwa okwa ndhindhilike Kain endhindhiliko lyokulondodha shaa ngoka te mu tsakaneke, keehe mu dhipage.
16 Kain nokwa zi ko koshipala shOmuwa e ta yi, a ka kale moshilongo hashi ithanwa Nod, kuuzilo waEden.
17 Kain okwa lala nomukadhi e ta ningi omusimba. Okwa vala okamati nokwe ka luku Enok. Kain okwa tungu oshilando e te shi lukile omwana Enok.
18 Enok okwa vala Irad, ngoka a li he yaMehujael, naMehujael okwa vala Metushael, he yaLamek.
19 Lamek okwa li a hokana ombanda, aakadhi oAda naZilla.
20 Ada okwa vala Jabal, ngoka a li hekulu yaanamatsali naanahambo.
21 Omumwayina okwa li Jubal, hekulu yaahiki yuuharpa noohiya.
22 Zilla okwa vala Tubal Kain, omuhambudhi gwiilongitho yi ili noyi ili yiiyela iikushu niiluudhe. Omumwayina omukiintu gwaTubal Kain oNaama.
23 Lamek okwa lombwele aakadhi a ti: “Ada naZilla, pulakenii ndje, aakulukadhi yaLamek, uveni oohapu dhandje. Onda dhipaga omuntu, sho a dhenge ndje oshilalo, omuntu omugundjuka omolwombole yandje.
24 Kain ngele ta geelwa luheyali, Lamek omilongo heyali luheyali.”
25 Adam okwa lala ishewe nomukadhi e ta ningi omusimba. Okwa vala omumati gulwe e ta ti: “Kalunga okwa pe ndje omumati peha lyaAbel, ngoka a dhipagwa kuKain.” Onkee okwe mu luku Set.
26 Set okwa vala omumati e te mu luku Enos. Pethimbo ndyoka aantu oya tameke okugalikana Omuwa.
1 Mpaka ope na omusholondondo gwoluvalo lwaAdam. (Kalunga sho a shiti aantu, okwe ya shiti ye mu fa.
2 Okwe ya shiti omulumentu nomukiintu. Okwe ya laleke nuuyamba e te ya luku “aantu.”)
3 Adam sho a gwanitha omimvo 130, okwa vala omumati e mu fa e te mu luku Set.
4 Konima yokuvalwa kwaSet, Adam okwa kala nomwenyo omimvo 800 nokwa vala aamati naakadhona.
5 Adam okwa si e na omimvo 930.
6 Set sho a gwanitha omimvo 105, okwa vala Enos.
7 Konima yokuvalwa kwaEnos, Set okwa kala e na omwenyo omimvo 807, nokwa vala aamati naakadhona.
8 Set okwa si e na oomvula 912.
9 Enos sho a gwanitha omimvo 90, okwa vala Kenan.
10 Konima yokuvalwa kwaKenan, Enos okwa kala e na omwenyo omimvo 815, oye nokwa vala aamati naakadhona.
11 Enos okwa si e na omimvo 905.
12 Kenan sho a gwanitha omimvo 70, okwa vala Mahalalel.
13 Konima yokuvalwa kwaMahalalel, Kenan okwa kala e na omwenyo omimvo 840. Oye nokwa vala aamati naakadhona.
14 Kenan okwa si e na omimvo 910.
15 Mahalalel sho a gwanitha omimvo 65, okwa vala Jared.
16 Konima yokuvalwa kwaJared, Mahalalel okwa kala e na omwenyo omimvo 830, oye nokwa vala aamati naakadhona.
17 Mahalalel okwa si e na omimvo 895.
18 Jared sho a gwanitha omimvo 162, okwa vala Enok.
19 Konima yokuvalwa kwaEnok, Jared okwa kala e na omwenyo omimvo 800. Okwa vala aamati naakadhona.
20 Jared okwa si e na omimvo 962.
21 Enok sho a gwanitha omimvo 65, okwa vala Metusala.
22 Konima yokuvalwa kwaMetusala, Enok okwe ende pamwe naKalunga omimvo 300 nokwa vala aamati naakadhona.
23 Enok okwa li e na omimvo 365.
24 Enok okwa longele Kalunga nokwa kana po, molwaashoka Kalunga e mu kutha po.
25 Metusala sho a gwanitha omimvo 187, okwa vala Lamek.
26 Konima yokuvalwa kwaLamek, Metusala okwa kala e na omwenyo omimvo 782 nokwa vala aamati naakadhona.
27 Metusala okwa si e na omimvo 969.
28 Lamek sho a gwanitha omimvo 182, okwa vala omumati
29 e ta ti: “Omunona nguka ote tu etele epupalitho netalaleko miilonga nomomaupyakadhi giikaha yetu mevi ndika lya thingwa kuKalunga” e te mu luku Noa.
30 Konima yokuvalwa kwaNoa, Lamek okwa kala e na omwenyo omimvo 595 nokwa vala aamati naakadhona.
31 Lamek okwa si e na omimvo 777.
32 Noa sho a gwanitha omimvo 500, okwa vala Sem, Ham naJafet.
1 Aantu sho yi indjipala kombanda yevi noya valelwa aakadhona,
2 aamati aana yaKalunga oya tala aakadhona aana yaantu yo opala noya hokana mboka ye yi ihogololele.
3 Nena Omuwa okwa popi e ta ti: “Ombepo yandje itayi kala nokukumagidha omuntu aluheluhe, oshoka oye omusi; omasiku ge naga ninge omimvo ethele nomilongo mbali.”
4 Muuyuni mbwiyaka nomuuyuni we u landula omwa li mu na aalefule. Oyo oluvalo lwaamati aana yaKalunga mboka ya hokana aakadhona aana yaantu. Oya li oofule naanamadhina okuza kuukulu wonale.
5 Omuwa sho a mono uuwinayi waantu kombanda yevi mpoka u thike, nomadhiladhilo gawo nkene ga pilaala ethimbo alihe,
6 oku uvu nayi, sho a shitile omuntu kombanda yevi.
7 Omuwa okwa popi e ta ti: “Aantu mbaka nde ya shiti, otandi ya kombo ko kombanda yevi, nosho wo iinamwenyo noondhila, oshoka ondi ipe ombedhi, sho nde ya shiti.”
8 Ihe Omuwa okwa li a hokwa Noa.
9 Ndjika oyo ondjokonona yaNoa. Okwa vala aamati yatatu: Sem, Ham naJafet. Noa ka li e na uusama, okwa li omuyuuki pethimbo lye. Okwa kala mekwatathano naKalunga,
10
11 ihe aantu ayehe oya li aawinayi koshipala shaKalunga, niikolokosha oya li ya taandela shaa mpoka.
12 Kalunga okwa tala uuyuni nokwa mono kutya owo uuwinayi, oshoka aantu mboka ya kala mo, oya kala muuwinayi.
13 Kalunga okwa lombwele Noa a ti: “Onda tokola ndi hulithe po aantu ayehe. Otandi ya kombo po thiluthilu, oshoka uuyuni ou udha iilonga yawo iiwinayi.
14 Itungila onguluwato yiipilangi yo opala, nayi kale yi na omala, ngoye u yi hote nomaka meni nokombanda.
15 Nayi kale oondya 300 momutaandelo, oondya 50 momutamo noondya 30 momuthika.
16 Konguluwato tula ko ondunda nokuthiga po othaalo yolundya lumwe pokati kondunda nolungenge lwonguluwato. Yi tunga moontala ndatu, nomweelo molupati.
17 Otandi ka tuma eyelu kombanda yevi, li yonagule po omufudho aguhe. Shaa shoka shi na omwenyo kombanda yevi, otashi si.
18 Ihe otandi ka dhika ehangano nangoye. Inda monguluwato nomukiintu gwoye, aamwoyemati naakadhi.
19 Monguluwato fala mo iinamwenyo yomaludhi agehe ooiyali, oshilumentu noshikiintu moludhi kehe lwiinamwenyo nolwoondhila, opo yi hupe yi kale yi na omwenyo.
20
21 Fala mo wo iikulya yomaludhi agehe, yoye mwene noyiinamwenyo.”
22 Noa okwa ningi, ngaashi Kalunga e mu lombwele.
1 Omuwa okwa lombwele Noa a ti: “Inda monguluwato negumbo lyoye alihe; onda mono kutya ongoye awike muuyuni auhe ho longo uuyuuki.
2 Fala mo iinamwenyo ooiyali luheyali yomomaludhi agehe ngoka gaa na oshipwe, opo ihe iinamwenyo ooiyali ayihe yoshipwe.
3 Fala mo oondhila oombali luheyali komaludhi gadho. Shi ninga, opo omaludhi giinamwenyo nenge goondhila ga kale ge na omwenyo go ga ka indjipale ishewe.
4 Ngele pwa piti omasiku gaheyali, otandi ka lokitha omvula tayi ka tilahi omeya omasiku omilongo ne omutenya nuusiku, opo yi hanagule po iinamwenyo ayihe nde yi shiti.”
5 Noa okwa ningi, ngaashi Omuwa e mu lombwele.
6 Noa okwa li e na omimvo omathele gahamano, eyelu sho lye ya kombanda yevi.
7 Oye nomukadhi, oyanamati naakadhi, oya yi monguluwato, ya ka holame eyelu.
8 Oshilumentu noshikiintu moludhi kehe lwiinamwenyo nolwoondhila lwaa na oshipwe ngaashika wo lwoshipwe
9 oya yi monguluwato pamwe naNoa, ngaashi Kalunga a ti.
10 Sho pwa piti omasiku gaheyali, eyelu olye ya.
11 Noa sho a gwanitha omimvo omathele gahamano, mesiku etimulongo netiheyali lyomwedhi omutiyali oothithiya adhihe dhomuule odhe eguluka, noombende adhihe dhokegulu odha makuka.
12 Omvula oya puuka noya loko omutenya nuusiku omasiku omilongo ne.
13 Esiku tuu ndyoka Noa nomukadhi oya yi monguluwato noyanamati yatatu: Sem, Ham naJafet naakadhi.
14 Oya yi mo niinamwenyo yomaludhi agehe gopaantu nogomokuti, iinene niishona, noondhila dhomaludhi agehe.
15 Iinamwenyo iilumentu niikiintu yomaludhi agehe oya yi monguluwato pamwe naNoa,
16 ngaashi Kalunga e mu lombwele. Nena Omuwa okwa pata omweelo konima yaNoa.
17 Eyelu olye ya kombanda yevi momasiku omilongo ne, onguluwato noya kaama kombanda yomeya omale.
18 Omeya oga lundalala, nonguluwato oya telagana kombanda yago.
19 Omeya ogi itumbu, sigo ga siikile oondundu oondeendeka;
20 oga tsikile okulundalala, sigo ga ningi oometa heyali kombanda yoondundu.
21 Oonakukala ayehe kombanda yevi ye na omwenyo, oya si: oondhila adhihe, iinamwenyo ayihe naantu ayehe.
22 Shaa shoka sha li shi na omufudho kombanda yevi, osha si.
23 Omuwa okwa hanagula po iinamwenyo ayihe kombanda yevi: aantu, iiyamakuti noondhila. ONoa awike a hupu ko naamboka ya li puye monguluwato.
24 Omeya oga siikile evi omasiku ethele nomilongo ntano.
1 Kalunga okwa dhimbulukwa Noa niinamwenyo ayihe ya li pamwe naye monguluwato. Okwa pepitha ombepo, nomeya oga tameke okupwina.
2 Oothithiya dhomuule noombende dhokegulu odha thiti. Omvula oya sheka,
3 nomeya oga tameke okukuluka momasiku ethele nomilongo ntano.
4 Mesiku etimulongo netiheyali lyomwedhi omutiheyali onguluwato oya hakele kondungu yondundu Ararat.
5 Omeya oge ende taga pwine, nomesiku lyotango lyomwedhi omutimulongo oondungu dhoondundu odha anduka ko.
6 Sho pwa piti omasiku omilongo ne, Noa okwe egulula ombende
7 e ta pititha mo edhilakola. Edhilakola inali galuka we, olya kala tali telagana, sigo omeya ga pwine.
8 Sho pwa piti okathimbo, Noa okwa piitha mo onguti, a tale, ngele omeya oga pwina,
9 ihe oshoka oga li ga siikile natango evi, onguti inayi mona nando eha lyokulambela. Oya galukile konguluwato, naNoa okwa ganeke oshikaha she e te yi shuna mo.
10 Noa okwa tegelele omasiku gaheyali e ta piitha mo ishewe onguti.
11 Ongulohi oya galukile kuye yi na efo lyomuolivi komulungu. Noa okwa koneke kutya nani omeya oga pwina.
12 Okwa tegelele ishewe omasiku gaheyali e ta piitha mo onguti, noinayi galuka we.
13 Noa sho a gwanitha omimvo 601, mesiku lyotango lyomwedhi gwotango, omeya oga adhika ga pwine. Noa okwa kutha ko ondunda yonguluwato e ta tala koombinga noombinga. Okwa mono kutya nani evi olya kaha.
14 Mesiku etimilongombali netiheyali lyomwedhi omutiyali evi olya li ekukutu thiluthilu.
15 Kalunga okwa lombwele Noa a ti:
16 “Za mo monguluwato, ongoye mwene nomukulukadhi gwoye naamwoyemati naakadhi.
17 Piitha mo oondhila adhihe niinamwenyo, opo yi valathane yo yi indjipale kombanda yevi alihe.”
18 Noa okwa piti mo nomukadhi noyanamati naakadhi.
19 Iinamwenyo ayihe noondhila odha piti mo monguluwato moongundu dhomaludhi gadho.
20 Noa okwa tungile Omuwa oshiyambelo; okwa kutha shimwe shomoludhi kehe lwiinamwenyo yaa na oshipwe nolwoondhila e te yi lungunitha po omidhidhindjambo koshiyambelo.
21 Ezimba lyoondjambo olya nyanyudha Omuwa, e ti ipopile ta ti: “Evi itandi li geelele we omuntu; onda tseya kutya omadhiladhilo ge omawinayi okuza kuunona we. Itandi ka hanagula po we iinamwenyo ayihe, ngaashi nda ningi ngashingeyi.
22 Ihe manga uuyuni u li po, otaku ka kala ethimbo lyokukuna nethimbo lyokuteya. Otaku ka kala aluhe uutalala nuupyu, othinge nokufu, omutenya nuusiku.”
1 Kalunga okwa yambeke Noa noyana e ta ti: “Kaleni mu na oluvalo ne mu indjipale kombanda yevi alihe.
2 Iinamwenyo ayihe, oondhila noohi otayi kala hayi mu tila. Ayihe oya tulwa mepangelo lyeni.
3 Ngashingeyi otayi ningi oondya dheni naanaa ngaashi iimeno, mbyoka nde yi mu pele, yi ninge oondya dheni.
4 Ihe inamu lya onyama yi na ombinzi; otandi yi indike, oshoka omwenyo ogwa kala mombinzi.
5 Ihe ngele ku na ngoka ta dhipaga omuntu, ota geelwa. Nokehe oshinamwenyo tashi dhipaga omuntu, otashi geelwa neso.
6 Omuntu okwa shitwa a fa Kalunga, onkee ngoka ta dhipaga omuntu mukwawo, ota ka dhipagwa wo.
7 “Kaleni mu na oluvalo ne mu indjipale kombanda yevi alihe.”
8 Kalunga okwa lombwele Noa e ta ti:
9 “Taleni, otandi dhike ehangano nane nonoluvalo lweni
10 noniinamwenyo ayihe kombanda yevi — oondhila adhihe, iimuna ayihe niiyamakuti ayiheyihe mbyoka ya piti monguluwato pamwe nangoye.
11 Otandi hangana nane notandi uvaneke kutya iinamwenyo itayi ka hanagulwa po we kefundja, eyelu itali ka hanagula po we evi.
12 Endhindhiliko lyehangano lyaaluhe ndyoka tandi hangana nane noniinamwenyo ayihe, olyo ndika:
13 otandi tula uutamvula miikogo, notau ningi endhindhiliko lyehangano lyandje nevi.
14 Uuna te tula iikogo kegulu, ndele uutamvula tau holoka,
15 nena otandi dhimbulukwa euvaneko ndyoka nde li mu uvanekele niinamwenyo ayihe kutya eyelu itali ka hanagula po we iinamwenyo ayihe.
16 Uuna uutamvula tau holoka miikogo, otandi u mono e te dhimbulukwa ehangano lyaaluhe pokati ketu noonakukala kombanda yevi ye na omwenyo.
17 Ndika olyo endhindhiliko lyeuvaneko ndyoka nda uvanekele oonakukala ayehe kombanda yevi.”
18 Aana yaNoa aamati mboka ya zi monguluwato, oyo Sem, Ham naJafet. (Ham ohe yaKaanan.)
19 Aana yaNoa mbaka yatatu oyo oohekulu yiigwana ayihe kombanda yevi.
20 Noa okwa li omunamapya, oye gwotango a ningi oshitsambe shomiviinu.
21 Ihe sho a nu omaviinu, okwa kolwa, a hula mo oonguwo dhe e ta lala e li omudhuu metsali lye.
22 Ham, he yaKaanan, sho a mono he e li omudhuu, okwa piti mo e te shi lombwele aamwayina yaali.
23 Nena Sem naJafet oya kutha elwaakani ye li humbata komapepe gawo. Oye ende oshaanimanima yu uka metsali e taa siikile he. Inaa tala nande konima, opo yaa mone epenge lyahe.
24 Noa sho a kololokwa, okwa dhimbulula shoka omwana onkelo e shi mu ningile,
25 e ta ti: “Kaanan na tulwe omutima! Na kale omupika gwaamwaina!
26 Omuwa, Kalunga kaSem, na hambelelwe! Kaanan na kale omupika gwaSem!
27 Kalunga na indjipalithe Jafet! Jafet na kale momagumbo gaSem! Kaanan na kale omupika gwawo!”
28 Konima yeyelu Noa okwa kala nomwenyo omimvo 350
29 nokwa si e na omimvo 950.
1 Mpaka ope na omusholondondo gwoluvalo lwaana yaNoa: Sem, Ham naJafet. Oyana mbaka yatatu oya ka mona aanona konima yeyelu.
2 Aana aamati yaJafet Gomer, Magog, Madai, Javan, Tubal, Meshek naTiras — oyo oohekulu yiigwana mbyoka ya lukilwa omadhina gawo.
3 Oluvalo lwaGomer olwAashkenas, Aarifat nAatogarma.
4 Omaluvalo gaJavan oga li Aaelisha, Aaespania, Aakipro nAarodes;
5 oyo oohekulu yiigwana mbyoka yi li komunkulofuta nokoontuntu. Mbaka oyo oluvalo lwaJafet ye li momazimo gawo nomiilongo yawo yi ili noyi ili; ongundu kehe otayi popi elaka lyayo.
6 Oluvalo lwaHam Kush, Egipiti, Libia naKaanan — oyo oohekulu yiigwana mbyoka ya humbata omadhina gawo.
7 Oluvalo lwaKush olwo Aaseba, Aahavila, Aasabta, Aaragma nAasabteka. Oluvalo lwaRagma olwo Aasheba nAadedan.
8 Kush okwa li e na omwana edhina lye — Nimrod, ngoka a ningi ofule yotango mokusinda uuyuni.
9 Kekwatho lyOmuwa okwa ningi omukongo omunene, nomolwashoka aantu haa ti: “Omuwa ne ku ninge omukongo omunene ngaashi Nimrod.”
10 Petameko oshilongo she osha kwatelele mo Babel, Erek naAkkad, ayihe itatu muBabilon.
11 Okuza kevi ndyoka okwa yi kuAssur e ta tungu iilando Ninive, Rehobot Ir, Kala
12 naResen, shoka shi li pokati kaNinive noshilando oshinene Kala.
13 Omaluvalo gaEgipiti oga li Aalidia, Aayanam, Aalehab, Aanaftu,
14 Aapatros, Aakaslu, nAakreta, moka mwa za Aafilisti.
15 Aana yaKaanan aamati oyo osheeli Sidon naHet; oyo oohekulu yaantu mboka haa ithanwa nomadhina gawo.
16 Kaanan okwa li wo hekulu yAayebusi, yAayamori, yAagirgashi,
17 yAahevi, yAayarki, yAasini,
18 yAayarvadi, yAazemari noyAahamati. Omazimo gi ili nogi ili gAakaanana oga halakana,
19 noshitopolwa shAakaanana osha taandele okuza kuSidon sigo okuGerar kuumbugantu, popepi naGaza, nokuSodom, Gomorra, Adma naZebojim kuuzilo, popepi naLasha.
20 Ngaka ogo omaludhi goluvalo lwaHam ga kala miilongo yi ili noyi ili, noludhi kehe otalu popi elaka lyalwo.
21 Sem oye omukuluntu omumwayina gwaJafet, noye hekulu yAahebeli ayehe.
22 Aana yaSem aamati oyo Elam, Assur, Arpakshad, Lud naAram — oohekulu yaantu mboka haa ithanwa nomadhina gawo.
23 Aana yaAram aamati oyo Uz, Hul, Geter naMash.
24 Arpakshad ohe yaShela, ngoka a vala Eber.
25 Eber okwa li e na oyanamati yaali, gumwe oPeleg, molwashoka muuyuni mbwiyaka aantu oya topoka; namukwawo oye Joktan.
26 Omaluvalo gaJoktan oga li Aayalmodad, Aashelef, Aahazarmavet, Aajerak,
27 Aahadoram, Aausal, Aadikla,
28 Aaebal, Aayabimael, Aasheba,
29 Aaofir, Aahavila nAajobab. Ayehe mbaka oluvalo lwaJoktan.
30 Oya kala mevi lya taandela okuza kuMesha sigo okuSefar mevi lyoondundu dhokuuzilo.
31 Ngaka ogo omaludhi goluvalo lwaSem ga kala miilongo yi ili noyi ili, noludhi kehe otalu popi elaka lyalwo.
32 Ayehe mbaka oluvalo lwaNoa, oshigwana noshigwana pamaludhi gawo gi ili nogi ili. Konima yeyelu iigwana ayihe kombanda yevi oya zi moluvalo lwaana yaNoa.
1 Petameko aantu yomuuyuni auhe oya li haa popi elaka limwe alike, niipopya oya faathana.
2 Sho ye ende nevi muuzilo, oye ya kolushandja muBabilonia e taa tula mo.
3 Oya lombwelathana ya ti: “Ileni! Tu tholomeni oondhopi noku dhi yotha.” Oya tholoma oondhopi dhokutunga noya longitha onka yomevi yoku dhi kwatela kumwe.
4 Oya popi ya ti: “Natu umbeni oshilando shi na oshungo ya tsa megulu, opo tu iningile edhina lya simana tse twaa halakane nevi alihe.”
5 Nena Omuwa okwa kuluka, a tale oshilando noshungo ndjoka aantu taye yi tungu,
6 e ta ti: “Ngashingeyi aantu mbaka oyo oshigwana shimwe notaa popi elaka limwe; ndika olyo etameko lyowala lyaashoka taa ka ninga. Otaa ka tsakanitha mbala shoka ye shi hala!
7 Natu kulukeni nokuvundakanitha elaka lyawo, opo yaa uvathane.”
8 Omuwa okwe ya halakanithile nombanda yevi alihe, e taa etha okutunga oshilando.
9 Oshilando osha lukwa Babel, molwashoka Omuwa okwa vundakanitha elaka lyaantu ayehe, nopokuza mpoka okwe ya halakanithile kombanda yevi alihe.
10 Mpaka ope na oluvalo lwaSem. Omimvo mbali konima yeyelu, Sem sho a li e na omimvo 100, okwa vala omumati edhina lye Arpakshad.
11 Okuza mpoka okwa kala natango nomwenyo omimvo 500 nokwa vala aanona yalwe.
12 Arpakshad sho a gwanitha omimvo 35, okwa vala Shela.
13 Konima yokuvalwa kwaShela, Arpakshad okwa kala nomwenyo omimvo 403 nokwa vala aanona yalwe.
14 Shela sho a gwanitha omimvo 30, okwa vala omumati edhina lye Eber.
15 Konima yokuvalwa kwaEber, Shela okwa kala nomwenyo omimvo 403 nokwa vala aanona yalwe.
16 Eber sho a gwanitha omimvo 34, okwa vala omumati Peleg.
17 Konima yokuvalwa kwaPeleg, Eber okwa kala nomwenyo omimvo 430 nokwa vala aanona yalwe.
18 Peleg sho a gwanitha omimvo 30, okwa vala omumati Reu.
19 Konima yokuvalwa kwaReu, Peleg okwa kala nomwenyo omimvo 209 nokwa vala aanona yalwe.
20 Reu sho a gwanitha omimvo 32, okwa vala omumati Serug.
21 Konima yokuvalwa kwaSerug, Reu okwa kala nomwenyo omimvo 207 nokwa vala aanona yalwe.
22 Serug sho a gwanitha omimvo 30, okwa vala omumati Nahor.
23 Konima yokuvalwa kwaNahor, Serug okwa kala nomwenyo omimvo 200 nokwa vala aanona yalwe.
24 Nahor sho a gwanitha omimvo 29, okwa vala omumati Tera.
25 Konima yokuvalwa kwaTera, Nahor okwa kala nomwenyo omimvo 119 nokwa vala aanona yalwe.
26 Tera sho a gwanitha omimvo 70, okwa vala Abram, Nahor naHaran.
27 Nduka oluvalo lwaTera, he yaAbram, Nahor naHaran. Haran ohe yaLot.
28 Haran okwa sile muUr shaBabilonia, moshilando moka a valelwa, manga he Tera e na natango omwenyo.
29 Abram okwa hokana Sarai, naNahor okwa hokana Milka yaHaran. Haran ohe yaJiska.
30 Sarai okwa li ihaa vala.
31 Tera okwa kutha omwana Abram, omutekulu Lot yaHaran noshitenya she Sarai, omukadhi gwaAbram. Okwa yi nayo ya zi muUr shaBabilonia, ya ye kevi lyaKaanan. Oya yi sigo okuHaran e taa tula hoka.
32 Tera okwa sile nkoka, sho a li nomimvo 205.
1 Omuwa okwa lombwele Abram ta ti: “Za mo mevi lyaandjeni, mezimo lyeni nomegumbo lyaho, u ye kevi ndyoka tandi ke li ku ulukila.
2 Otandi ke ku pa oluvalo olwindji, olwo notalu ka ninga oshigwana oshinene. Otandi ku yambeke, edhina lyoye otandi li ningi enene, noto ka ninga elaleko nuuyamba.
3 Otandi ka yambeka mboka taye ku yambeke, ihe otii ka tula omutima mboka taye ku tula omutima. Omungoye iigwana ayihe otayi ka lalekwa nuuyamba.”
4 Abram sho a li e na omimvo omilongo heyali nantano, okwa tembuka mo muHaran, ngaashi Omuwa e mu lombwele; Lot nokwa yi pamwe naye.
5 Abram okwa kutha omukadhi Sarai, omwanagona Lot, omaliko gawo agehe naapika ayehe ya li ye ya na muHaran, oyo noya yi kevi lyaKaanan. Sho ya thiki muKaanan,
6 Abram okwe ende noshilongo, sigo okwe ya peha eyapuki puShekem, pomuti gwomwandi gwaMore. (Pethimbo ndyoka Aakaanana oya li moshilongo.)
7 Omuwa okwa holokele Abram e ta ti kuye: “Oshilongo shika otandi ke shi pa oluvalo lwoye.” Abram okwa tungile Omuwa, ngoka e mu ihololele, oshiyambelo.
8 Okuza nkoka oku uka lwokuumbugantu, kevi lyoondundu kuuzilo waBetel e ta yungu ontanda a gama Betel kuuninginino naAi kuuzilo. Naahoka okwa tungu oshiyambelo e ta simaneke Omuwa.
9 Nena okwa lunduluka po ta yi kehala nehala u uka lwokuumbugantu waKaanan.
10 MuKaanan omwa li mu na ondjala yekomba. Ondjala sho ya geye, Abram okwa yi kuEgipiti e ta kala ko ethimbo lyontumba.
11 Sho a li pokutaaguluka ongamba a ye kuEgipiti, okwa ti komukadhi Sarai: “Ngoye omukiintu wa shitika.
12 Ngele Aayegipiti taye ku mono, otaa ka dhiladhila kutya ngoye ogwandje. Oyo notaa dhipaga ndje po notaye ku etha u kale nomwenyo.
13 Ya lombwela kutya ngoye omumwameme; nena otaa hupitha ndje molwoye e taa ningi ndje nawa.”
14 Sho ya thiki kuEgipiti, Aayegipiti oya mono kutya omukiintu okwa shitika.
15 Omalenga gomukwaniilwa sho ge mu mono, nkene e li po a shitika, oge shi hokololele omukwaniilwa, Sarai nokwa falwa kuuwa.
16 MolwaSarai omukwaniilwa okwa ningi Abram nawa e te mu pe iigunda yoonzi niikombo, oongombe, uusino, aapika noongamelo.
17 Ihe molwashoka omukwaniilwa okwa kutha po Sarai, Omuwa okwa tumine omukwaniilwa naantu ye yomuuwa uuvu uudhigu.
18 Omukwaniilwa okwi ithana Abram e ta ti kuye: “Owa ningi ndje ngiini? Omolwashike inoo lombwela ndje kutya Sarai omukiintu gwoye?
19 Omolwashike wa tile kutya omumwanyoko, sigo nde mu kutha po nokuli, a ninge gwandje? Mukadhoye oye nguka, mu kutha po, mu ye.”
20 Omukwaniilwa okwa lombwele aapiya ye, oyo noya kutha Abram e taye mu pititha mo moshilongo, pamwe nomukadhi neliko lye alihe.
1 Abram okwa zi muEgipiti e ta yi kuumbugantu waKaanan pamwe nomukadhi neliko lye alihe. Lot wo okwa yi naye.
2 Abram okwa li omuyamba unene e na oonzi, iikombo noongombe, osho wo oshisiliveli noshingoli.
3 Abram okwa zi ko nkoka e ta kala ta tembukatembuka u uka lwokuBetel. Okwe ya pehala li li pokati kaBetel naAi, mpoka a yungilile nale oontanda
4 nokwa li a tungile po oshiyambelo. Opo mpoka a simanekele Omuwa.
5 Lot okwa li wo e na oonzi, iikombo noongombe negumbo lye naapiya.
6 Omaunapelo oga li inaage ya gwanena, oshoka oya li ye na iimuna oyindji.
7 Oontamanana odha tukuka pokati kaasita yiimuna yaAbram naasita yiimuna yaLot. (Pethimbo ndyoka Aakaanana nAaperesi oya li moshilongo.)
8 Nena Abram okwa ti kuLot: “Tse aakwezimo. Inapu kala oontamanana pokati kaasita yandje noyoye.
9 Natu topokeni nombili. Hogolola ombinga yoshilongo ndjoka wa hala. Ngele to gama kombinga yimwe, ngame ote gama kombinga onkwawo.”
10 Lot okwa tala koombinga noombinga e ta mono ko olusilu lwaJordan aluhe, ondjila ayihe sigo okuZoar. Olwa li lu na omeya ogendji lwa fa oshikunino shOmuwa nenge lwa fa evi lyaEgipiti. (Shika osha ningwa, manga Omuwa inaa hanagula po Sodom naGomorra).
11 Lot okwi ihogololele olusilu lwaJordan e ta yi u uka lwokuuzilo. Osho ngaaka aalumentu mbaka yaali ya topoka.
12 Abram okwa kala mevi lyaKaanan, ihe Lot okwa kala miilando yomolusilu e ta yungu ontanda popepi naSodom.
13 Aantu yomuSodom oya li aayonaguli noya yono kOmuwa.
14 Lot sho a yi, Omuwa okwa lombwele Abram a ti: “Lengalenga koombinga adhihe okuza mpoka u li.
15 Evi alihe u wete otandi li ku pe pamwe noluvalo lwoye, notali ningi lyoye sigo aluhe.
16 Otandi ke ku pa oluvalo olwindji, notalu nyengana okuyalula ngaashi ontsi yevi.
17 Ngashingeyi shilila evi alihe, oshoka otandi ke li ku pa.”
18 Abram okwa tembudha omatsali ge e te ya, a kale popepi noomwandi oondjapuki dhaMamre puHebron; oko nkoka a tungile ko Omuwa oshiyambelo.
1 Aakwaniilwa yane: Amrafel gwokuBabilonia, Arjok gwokuEllasar, Kedorlaomer gwokuElam naTidal gwokuGoiim.
2 Oya ka hingila aakwaniilwa yakwawo yatano iita: Bera gwokuSodom, Birsha gwokuGomorra, Shinab gwokuAdma, Shemeber gwokuSeboim nomukwaniilwa gwaBela (kokutya gwaZoar).
3 Aakwaniilwa mbaka yatano oya hangana e taa gongele omatangakwiita gawo molusilu lwaSiddim, mpoka pu na ngashingeyi Efuta lya sa.
4 Oya adhika ya kala mepangelo lyaKedorlaomer omimvo omulongo nambali, ihe momumvo omutimulongo nomutitatu oya tsu ondumbo naye.
5 Momumvo omutimulongo nomutine Kedorlaomer naamboka ya gama kuye, oye ya nomatangakwiita gawo e taa dhenge Aarafa muAshterot-Karnajim, Aasusi muHam, Aaemim molushandja lwaKirjatajim
6 nAahori moondundu dhaEdom sigo okuElparan kooha dhombuga.
7 Nena oya galuka e taye ya kuKadesh (haku tiwa Enmishpat). Oya lala evi alihe lyaAayamaleki e taa dhenge Aayamori mboka ya kala muHazazon Tamar.
8 Nena aakwaniilwa gwaSodom, gwaGomorra, gwaAdma, gwaZebojim nogwaBela oya fala omatangakwiita gawo molusilu lwaSiddim e taa kondjitha
9 aakwaniilwa mboka gwaElam, gwaGoiim, gwaBabilonia nogwaEllasar, aakwaniilwa yatano ya kondjitha aakwaniilwa yane.
10 Ihe olusilu lwaSiddim olwa li lu udha iiko yi na onka yomevi, naakwaniilwa gwaSodom nogwaGomorra sho ya kambadhala okufadhuka po, oya gwile miiko, manga aakwaniilwa yakwawo yatatu ya yi ontuku koondundu.
11 Aakwaniilwa mboka yane oya yugu po shaa shoka muSodom nomuGomorra, osho wo iikulya, e taa yi.
12 Lot, omwanagona gwaAbram, okwa li wo muSodom, onkee oye mu kwata po pamwe nomaliko ge agehe.
13 Ihe omuntu gumwe okwi iyaka po e te ke shi lombwela Abram, Omuhebeli ngoka a li popepi noomwandi oondjapuki dhaMamre Omuamori. Mamre naamwayinamati Eshkol naAner oya li ye na ekwatathano naAbram.
14 Abram sho a kundana kutya omwanagona a kwatwa po, okwa homateke aapiya ye aainekelwa ayehe mboka ye shi okukondja, ye li 318 ayehe kumwe, e taa landula aakwaniilwa mbeyaka yane sigo okuDan.
15 Oko Abram a topola aantu ye moongundu e ta ponokele aatondi ye uusiku e te ya dhenge. Okwe ya tidha sigololo oHoba, kuumbugantu waDamaskus,
16 e ta galula ko iihakanwa ayihe ya li ya kuthwa po. Okwa galula ko wo omwanagona Lot nomaliko ge agehe pamwe naakiintu noonkwatwa adhihe.
17 Abram sho a galuka kokusinda Kedorlaomer naakwaniilwa ooyakwawo, omukwaniilwa gwaSodom okwe mu tsakaneke molusilu lwaShave (halu ithanwa wo Olusilu lwaakwaniilwa).
18 Nena Melkisedek, omukwaniilwa gwaSalem, ngoka a li wo omuyambi gwaKalunga kokombandambanda, okwe etele Abram oshikwiila nomaviinu
19 nokwe mu yambeke ta ti: “Kalunga kokombandambanda, ngoka a shiti egulu nevi, na yambeke Abram;
20 Kalunga kokombandambanda, ngoka e ku pe esindano okusinda aatondi yoye, na simanekwe!” Abram nokwa pe Melkisedek oshitimulongo shomiihakanwa ye ayihe e yi kutha miita.
21 Omukwaniilwa gwaSodom okwa lombwele Abram a ti: “Kwatha ndje, u galulile ndje aantu yandje ayehe, ihe iihakanwa kala nayo.”
22 Abram okwa yamukula a ti: “Otandi gana koshipala shOmuwa, Kalunga kokombandambanda, omushiti gwegulu nevi,
23 kutya itandi tindile sha shoye, nando okashona, nando oluthipathipa nenge omuya gwoongaku, opo waa tye, owa yambapaleke Abram.
24 Itandi ikuthile sha. Otandi zimine owala shoka aantu yandje ya longitha mokulya. Ihe aalumentu mbaka twa li nayo: Aner, Eshkol naMamre, naa taambe oshitopolelwa shawo.”
1 Konima yaambika Abram okwa mono emoniko noku uvu Omuwa te mu lombwele ta ti: “Abram, ino tila. Otandi ku shigi kiiponga e tandi ku pe ondjambi onene.”
2 Abram okwa yamukula a ti: “Omuwa Omupangeliawike, uuwanawa owashike to u ningile ndje, oshoka kandi na aanona. Elieser a za kuDamaskus, oye awike omuthigululi gwandje.
3 Ino pa ndje aanona, onkee gumwe gwomaapiya yandje ota ka thigulula ndje.”
4 Nena oku uvu Omuwa te mu popitha ishewe ta ti: “Omupika nguka Elieser haye te ke ku thigulula, ihe omumwoyelela te ke ku thigulula.”
5 Omuwa okwe mu fala pondje e ta ti: “Tala kegulu, u yalule oonyothi; osho to ka kala u na oluvalo olwindji lu thike pudho.”
6 Abram okwi inekele Omuwa, nomolwashika Omuwa okwe mu hokwa e te mu tala omuyuuki.
7 Nena Omuwa okwa ti kuye: “Ongame Omuwa nde ku tembudha muUr shaBabilonia, ndi ku pe evi ndika, li ninge lyoye mwene.”
8 Ihe Abram okwa pula a ti: “Omuwa Omupangeliawike, otandi shi tseya ngiini kutya otali ka ninga lyandje?”
9 Omuwa okwa yamukula a ti: “Etela ndje ondema yomimvo ndatu, oshikombo oshikiintu shomimvo ndatu nonzi ontsezi yomimvo ndatu, onguti nongutyona.”
10 Abram okwe eta iinamwenyo mbika kuKalunga e te yi tandula olumana. Oombinga ndhoka dhonyama dha tandulwa olumana, okwe dhi tegameke momikweyo mbali, ihe oondhila ine dhi tandula.
11 Oontsa odha lambele ponyama, ihe Abram okwe dhi tidha po.
12 Etango sho lya li pokuningina, Abram okwa kotha omposi ondhigu nokwa adhika kuumbanda nehaluko.
13 Omuwa okwa ti kuye: “Oluvalo lwoye otalu ka kala aakwiilongo moshilongo shuundjendi; otaa ka ninga aapika e taa hepekwa omimvo omathele gane.
14 Ihe otandi ka geela oshigwana shoka tashi ya piki, nuuna taa tembuka mevi lyuundjendi, otaa ka faalela uuyamba owindji.
15 Ngoye mwene oto ka koka sigo omuukulupe e to ka sa nombili e to fumvikwa.
16 “Epipi etine olyo tali ka galukila huka, oshoka itandi tidha po Aayamori, sigo ya yono nokuyonenena.”
17 Etango sho lya ningine nokwa luudha, eziko lya tema nonyeka ya hwama oya holoka pokati komalumana giinamwenyo.
18 Osho ngeyi Omuwa okwa hangana naAbram. Okwa popi ta ti: “Otandi uvaneke okugandja evi ndika koluvalo lwoye okuza kongamba yaEgipiti sigo omulonga Eufrat,
19 mwa kwatelelwa iilongo yAakeni, yAakenasi, yAakadmoni,
20 yAaheti, yAaperesi, yAarafa,
21 yAayamori, yAakaanana, yAagirgashi noyAayebusi.”
1 Omukulukadhi gwaAbram Sarai ine mu valela nando aanona. Ihe Sarai okwa li e na omudhike Omuegipiti omupika, edhina lye Hagar,
2 onkee Sarai okwa ti kuAbram: “Omuwa okwa keelele ndje okuvala aanona. Inda, u ka lale nomupika gwandje, pamwe ta valele ndje okanona.” Abram okwa zimine ndhoka a lombwelwa kuSarai.
3 Sarai okwa kutha omupika gwe Hagar Omuegipiti e te mu gandja kuAbram, a kale omukiintu gwe. (Shika sho sha ningwa, Abram okwa adhika a kala muKaanan omimvo omulongo.)
4 Abram okwa lala naHagar e ta ningi omusimba. Sho i idhimbulula kutya a ningi omusimba, okwi inenepeke e ta dhini Sarai.
5 Nena Sarai okwa ti kuAbram: “Epuko olyoye, Hagar sho a dhini ndje. Ongame mwene nde mu gandja kungoye, ihe sho i idhimbulula kutya a ningi omusimba, okwa dhini ndje. Omuwa na tokole kutya olye e li mondjila, ongoye nenge ongame.”
6 Abram okwa yamukula a ti: “Onawa, omupika gwoye oku li mepangelo lyoye, mu ninga shoka wa hala.” Nena Sarai okwa ngwandjagula Hagar, sigo i iteka po puye e ta yi.
7 Omuyengeli gwOmuwa okwa tsakaneke Hagar poluthithiya mombuga mondjila yu uka kuShur
8 e ta ti: “Hagar, omupika gwaSarai, oto zi peni nowu uka peni?” Hagar okwa yamukula a ti: “Ote yi ontuku mwene gwandje.”
9 Omuyengeli gwOmuwa okwa ti: “Shuna kuye, u kale omupika gwe.”
10 Nena omuyengeli gwOmuwa okwa ti: “Otandi ke ku pa oluvalo olwindji, nokape na ngoka ta vulu oku lu yalula.
11 Oto ka vala okamati; ka luka Ismael, oshoka Omuwa oku uvu okulila kwoye.
12 Ihe omumwoye ota ka kala a fa okasinokuti. Ota ka tsa ondumbo nomuntu kehe, nashaa ngoka ota tsu ondumbo naye. Ota ka kala kokule naakwanezimo lye.”
13 Hagar okwi ipopile e ta ti: “Onda mono tuu shili Kalunga notandi kala tuu ndi na omwenyo, opo ndi shi hokolole?” Onkee okwa luku Omuwa ngoka e mu popitha “Kalunga ngoka ha mono.”
14 Shika osho sha ningitha, aantu ya luke omuthima gwopokati kaKadesh naBered “Omuthima gwOmunamwenyo ngoka e wete ndje.”
15 Hagar okwa valele Abram omumati e te mu luku Ismael.
16 Pethimbo ndyoka Abram okwa li e na omimvo omilongo hetatu nahamano.
1 Abram sho a gwanitha omimvo omilongo omugoyi nomugoyi, Omuwa okwe mu ihololele e ta ti: “Ongame Kalunga Omunankondoawike. Vulika kungame e to longo shoka shu uka.
2 Otandi hangana nangoye e tandi ku pe oluvalo olwindji.”
3 Abram okwi ihata po a tsa oshipala she mevi, naKalunga okwa ti:
4 “Otandi dhike ehangano ndika nangoye. Otandi uvaneke kutya oto ka ninga hekulu yiigwana oyindji.
5 Edhina lyoye itali kala we Abram, ihe oAbraham, oshoka otandi ku ningi hekulu yiigwana oyindji.
6 Otandi ku pe oluvalo olwindji, nayamwe yomuyo otaa ka ninga aakwaniilwa. Oto ka kala u na oluvalo olwindji, notalu ka ninga iigwana.
7 “Otandi dhiginine euvaneko lyandje kungoye nokoluvalo lwoye momapipi gokomeho, naandika olyo ehangano lyaaluhe. Ote ningi Kalunga koye naKalunga koluvalo lwoye.
8 Evi moka u li ngashingeyi ondjendi, otandi li pe oluvalo lwoye. Evi alihe lyaKaanan otali ka ninga lyoluvalo lwoye sigo aluhe, nangame otii ka kala Kalunga kawo.”
9 Kalunga okwa ti kuAbraham: “Ngoye wo ou na okuzimina okudhiginina ehangano ndika, ongoye mwene noluvalo lwoye lwokomeho.
10 Ngoye mwene noluvalo omu na okuzimina, mu fukalekithe omulumentu kehe etanda.
11 Okuza nena okanona okamati kehe oke na okufukalekwa, nge ka ningi omasiku gahetatu, ayehe naapika taa valelwa maandjeni naapika mboka taa landwa ya za kaakwiilongo. Shika osho tashi holola ehangano pokati ketu nane.
12
13 Shaa ngoka na fukalekwe, naashika otashi ka ninga endhindhiliko lyokuholola kutya ehangano lyandje nane olyaaluhe.
14 Omulumentu kehe ngoka inaa fukalekwa, ita kala gwomaantu yandje, oshoka okwa yono ehangano lyandje.”
15 Kalunga okwa lombwele Abraham a ti: “Mukadhoye ino mu ithana we Sarai. Okuza nena edhina lye oSara
16 Otandi mu yambeke notandi mu pe oluvalo, e ku valele omumati. Otandi mu yambeke e ta ningi yina yiigwana, nomoluvalo lwe otamu ka za aakwaniilwa.”
17 Abraham okwi ihata po a tsa oshipala she mevi, ihe okwa tameke okumenya mo, sho a dhiladhila: “Omulumentu gwomimvo ethele ota vulu tuu okuvala okanona? Sara sho e na omimvo omilongo omugoyi, ota vala we?”
18 Abraham okwa pula Kalunga a ti: “Omolwashike Ismael itaa thigulula ndje?”
19 Kalunga okwa ti: “Aawe. Mukadhoye Sara ote ku valele omumati e to mu luku Isak. Otandi ka dhiginina ehangano lyandje naye nonoluvalo lwe sigo aluhe.
20 Ondu uvu epulo lyoye kombinga yaIsmael, onkee otandi mu yambeke e tandi mu pe aanona oyendji noluvalo olwindji. Oye ta ka ninga he yaawa omulongo nayaali, noluvalo lwe otandi ke lu ninga oshigwana oshinene.
21 Ihe ehangano lyandje otali kwatelele mo wo omumwoye Isak, ngoka ta ka valwa kuSara omumvo tagu ya pethimbo ngaandika.”
22 Kalunga sho a mana okupopya naAbraham, okwa yi.
23 Esiku ndyoka Abraham okwa vulika kuKalunga e ta fukalekitha Ismael naalumentu ayehe ya li maandjawo, aapika mboka ya valelwa maandjawo nenge ya landwa.
24 Abraham okwa li e na omimvo omilongo omugoyi nomugoyi, sho a fukala,
25 nomwana Ismael okwa li e na omimvo omulongo nandatu.
26 Ayehe yaali oya fukala esiku limwe,
27 Osho wo aapika ayehe yaAbraham.
1 Omuwa okwi ihololele Abraham moomwandi oondjapuki dhaMamre. Abraham manga a li a kuutumba posheelo shetsali lye omutenya,
2 okwa ligamene ko e ta mono aalumentu yatatu ya thikama komeho ge. Sho e ya mono, okwa matuka nziya, e ke ya tsakaneke. Okwi ihata po a tsa oshipala she mevi
3 e ta ti: “Omuwa gwandje, ngele wa sile ndje ohenda, ino pitilila ndje po, omuntu gwoye.
4 Etelweni omeya, mu yoge oompadhi dheni mu vule okugondja momuti nguka.
5 Otandi ke eta sha shokulya, shi mu koleke, opo mu tsikile ondjila yeni. Osho opala, sho mwe ya maandjetu.” Oyo oya yamukula ya ti: “Ninga, ngaashi wa ti.”
6 Abraham okwa yi neendelelo metsali e ta ti kuSara: “Kutha mbala uusila womunziya, u ninge iikwiila.”
7 Opo ihe okwa matukile kiimuna e ta kutha ko ontana yo ondodhwa e te yi pe omupiya, e yi longekidhe mbala.
8 Okwa kutha omahini gomoosi nogomunya nonyama e ta fala iikulya kaalumentu mbaka. Ye mwene okwa li a thikama puyo momunzile gwomuti, manga taa li.
9 Oye mu pula ya ti: “Mukadhoye Sara oku li peni?” Abraham okwa yamukula a ti: “Oku li metsali.”
10 Gumwe gwomuyo okwa ti: “Omumvo tagu ya pethimbo ngaandika otandi ka galuka, namukadhoye Sara ota ka kala e na okanona okamati.” Sara okwa li konima ye posheelo shetsali, e ya pulakena.
11 Abraham naSara oya li ya kulupilila, naSara okwa li ihii imono we.
12 Sara okwi iyolele e ta ti: “Sho nda kulupa ngeyi, nomusamane gwandje naye wo okwa kulupilila, moondjokana ote mono mo we omulyo gwasha?”
13 Omuwa okwa pula Abraham a ti: “Omolwashike Sara a yolo ye ta ti: ‘Ote vulu we ngaa okuvala, sho nda kulupa ngeyi?’
14 Oku na sha tashi nyenge Omuwa? Ngaashi nda ti, omumvo tagu ya pethimbo ngaandika otandi ka galuka notandi adha Sara e na okanona okamati.”
15 Sara sho a li a tila, okwi ipatana a ti: “Inandi yola.” Ihe Omuwa okwa yamukula a ti: “Eeno, owe shi ninga, owa yola.”
16 Aalumentu oya thikama noya yi nondjila ndjoka yu uka kuSodom, naAbraham okwe ya thindikile.
17 Omuwa nokwi ipopile a ti: “Itandi holeke Abraham shoka tandi ka ninga.
18 Oluvalo lwe otalu ka ninga oshigwana oshinene noshinankondo, nomuye otandi ka yambeka iigwana ayihe.
19 Onde mu hogolola, opo a lombwele oyana noluvalo lwe, lu vulike kungame yo ya longe shoka shu uka noshoshili. Nongele taye shi ningi, nena otandi ka gwanitha shoka ndu uvanekele Abraham.”
20 Nena Omuwa okwa ti: “Oku na ekugo enene tali kugile aantu yomuSodom naGomorra, nuulunde wawo owa lunda pombanda.
21 Otandi yi ko ndi ka tale, ekugo ndyoka ndu uvu, ngele olyoshili.”
22 Nena aalumentu yaali oya yi yu uka kuSodom, ihe Abraham okwa kala po a thikama koshipala shOmuwa.
23 Abraham okwa hedha kOmuwa e ta ti: “Oto ka yona po omuyuuki pamwe nomukolokoshi?
24 Moshilando ngele omu na aayuuki omilongo ntano, oto shi hanagula po? Ito shi hupitha, opo u hupithe aayuuki mboka omilongo ntano?
25 Omuyuuki oto mu dhipagele mumwe nomunandjo? Ito vulu oku shi ninga. Itashi vulika, omuyuuki a yonuke po pamwe nomulunde. Omupanguli guuyuni auhe ita longo ando pauyuuki?”
26 Omuwa okwa yamukula a ti: “MuSodom ngele onda adha mo aayuuki omilongo ntano, ote hupitha oshilando ashihe omolwawo.”
27 Abraham okwa popi ishewe ta ti: “Ombili, kwatha ndje ngaa, sho tandi tsikile okupopya nOmuwa, nonando ngame omuntu gwowala, ontsi nomutoko.
28 Pamwe oto adha mo aayuuki omilongo ne nayatano peha lyomilongo ntano. Oto hanagula po oshilando ashihe, ngele aayuuki inaa adha omilongo ntano?” Omuwa okwa yamukula a ti: “Oshilando itandi shi hanagula po, ngele otandi adha mo aayuuki omilongo ne nayatano.”
29 Abraham okwa popi ishewe a ti: “Ngele oye li owala omilongo ne?” Oye nokwa yamukula: “Itandi shi hanagula po, ngele oku na omilongo ne.”
30 Abraham okwa ti: “Ombili, ino geya, Omuwa, sho te popi ishewe te ti: Ongiini, ngele oye li omilongo ndatu?” Okwa ti: “Itandi shi ningi, ngele otandi mono mo omilongo ndatu.”
31 Abraham okwa ti: “Ombili, kwatha ndje, sho tandi tsikile okupopya nOmuwa. Ongiini, ngele omilongo mbali ayeke taa monika mo?” Omuwa okwa ti: “Itandi shi hanagula po, ngele otandi adha mo omilongo mbali.”
32 Abraham okwa ti: “Ombili, Omuwa, ino geya, otandi popi natango lumwe. Ongiini, ngele otamu adhika omulongo?” Okwa ti: “Itandi shi hanagula po, ngele otandi adha mo omulongo.”
33 Omuwa sho a mana okukundathana naAbraham, okwa zi po, naAbraham okwa shuna kegumbo.
1 Pethimbo lyongulohi aayengeli yaali oya thiki kuSodom, naLot okwa li a kuutumba peelo lyoshilando. Sho e ya mono, okwa thikama, e ke ya tsakaneke.
2 Okwi ihata po a tsa oshipala mevi e ta ti: “Ootatekulu, ngame omupiya gweni. Ileni maandjetu, mu iyoge koompadhi e tatu tokelweni. Ongula otamu penduka moontundumene, mu tsikile ondjila yeni.” Ihe yo oya yamukula ya ti: “Aawe, uusiku otatu ke u lala pondje momapandaanda.”
3 Lot okwa dhiginine oku ya thiminika, nahugunina oya yi naye maandjawo. Lot okwe ya longekidhile iikulya. Okwe ya ningile oshikwiila inaashi fulikwa e taa li.
4 Aayenda manga inaa ka lala, aalumentu Aasodomu, aagundjuka naakokele, oye ya ya zi koombinga adhihe dhoshilando e taa kundukidha egumbo.
5 Oyi ithana Lot e taye mu pula: “Aalumentu mboka ya tokelwa maandjeni, oye li peni? Ya piitha mo, ye ye kutse, tse tu lale nayo.”
6 Lot okwa piti mo e ta yi kuyo pondje nokwe edhile po omweelo.
7 Okwa ti kuyo: “Ookuume, otandi mu galikana, inamu longa iihuna yi thike mpoka!
8 Taleni, ondi na aakadhona yaali inaaya lala nando nomulumentu. Otandi ya eta kune e tamu ningi, ngaashi mwa hala. Ihe aalumentu mbaka inamu ya hinda. Oyo aayenda maandjetu, nondi na oku ya popila.”
9 Ihe oya yamukula: “Za po putse! Omuntu nguka omukwiilongo, ihe nena okwa hala i ininge omupangeli. Otatu vulu tu ku ninge nayi shi vulithe pumboka.” Oyu undula Lot noya hala okuteya po omweelo.
10 Ihe aalumentu yaali ya li meni, oya hilile Lot megumbo e taa pata omweelo.
11 Nena aayenda mbaka oya tsikitha aantu ayehe ya li pondje e taa kala taa kongo osheelo osima.
12 Aalumentu yaali oya lombwele Lot ya ti: “Ngele ou na aakweni muka, aamwoye aamati nenge aakadhona, iitenya nenge aakwanezimo ya kala muka, ya lombwela ya tembuke mo,
13 oshoka otatu ka hanagula po ehala ndika. Omuwa oku uvu onkugo ondhigu molwaantu mbaka nokwe tu tumu, tu hanagule po Sodom.”
14 Nena Lot okwa yi kiitenya ye mbyoka ya li yi na okuhokana oyanakadhona e ta ti: “Endeleleni, oshoka Omuwa ota ka hanagula po oshilando.” Ihe oya tala kutya ota ningi omashendjo.
15 Eluwa sho tali tende, aayengeli oya kambadhala okuulumika Lot e taa ti: “Yambuka! Kutha mukadhoye naamwoyekadhona yaali, mu ye ontuku, opo mwaa yonukile mumwe noshilando, sho tashi geelwa.”
16 Lot sho a li ta kakadhala, aalumentu oye mu kwata mokwooko, nomukadhi noyanakadhona yaali, e taye ya pititha mo moshilando, oshoka Omuwa okwa li e ya uvitile ohenda.
17 Nena gumwe gwomaayengeli okwa ti: “Fadhukii po, mu ka hupithe oomwenyo dheni. Inamu tala konima ne inamu thikama molusilu nduka. Matukileni koondundu, opo mwaa dhipagwe.”
18 Lot okwa yamukula a ti: “Aawe, Omuwa gwandje.
19 Owa longele ndje uuwanawa uunene nowa hupitha omwenyo gwandje. Oondundu odhi li kokule unene, itandi adha ko; ehanagulo otali adha ndje e te si.
20 Ku wete okalando heya okashona? Oke li popepi hwepo. Pitika ndje, ndi ye hoka — okashona unene, hasho? Ihe ote hupitha omwenyo gwandje.”
21 Omuwa okwa yamukula a ti: “Eewa ano, nda zimine. Okalando hoka itandi ka hanagula po.
22 Endelela! Matuka! Ite vulu okuninga sha, manga inoo thika ko.” Okalando hoka noka lukwa Zoar.
23 Lot sho a thiki muZoar, lyo etango otali piti.
24 Ohaluka Omuwa okwa lokithile Sodom naGomorra osulufuli ya hwama
25 e ta hanagula po iilando mbyoka nolusilu aluhe pamwe naantu niimeno ayihe.
26 Ihe omukiintu gwaLot okwa tala konima e ta shituka oshaanda shomongwa.
27 Abraham okwa meneka ongula onene ta yi kehala nkoka a li koshipala shOmuwa.
28 Okwa ligamene lwokuSodom naGomorra nokolusilu aluhe e ta mono olwithi talu tsinagala koshilongo shoka lwa fa olwithi lweziko enenenene lyomulilo.
29 Ihe Kalunga sho a hanagula po iilando yomolusilu ndoka mwa kala Lot, okwa dhimbulukwa Abraham e ta hupitha Lot mehanagulo lyiilando mbyoka.
30 Lot noyanakadhona oya tembuka mo muZoar, oshoka oya li ya tila okukala mo. Oya yi koondundu e taa kala mekololo.
31 Omukadhona osheeli okwa ti konkelo: “Tate okwa kulupa, naampaka kape na nando omulumentu e tu hokane po, opo tu vale aanona.
32 Tu pe tate omaviinu a kolwe, opo tu lale naye tse tu mone aanona.”
33 Ongulohi ndjoka oya pe he omaviinu, nomukadhona osheeli okwa lala naye. Ihe he sho a li a kolwa, ina dhimbulula po sha.
34 Mesiku lya landula omukadhona osheeli okwa ti konkelo: “Onda lala natate uusiku wa zi ko; natu mu pe a nwe ishewe uusiku wonena ngoye e to lala naye, opo tu imonene aanona mutate.”
35 Uusiku mboka oye mu kolitha ishewe, nomukadhona onkelo okwa lala naye. Natango he okwa li a kolwa ye ina tseya sha.
36 Pamukalo nguka aana yaLot ayehe yaali oya ningithwa aasimba kuhe.
37 Omukadhona osheeli okwa vala omumati e te mu luku Moab. Oye hekulu yAamoabi yongashingeyi.
38 Omukadhona onkelo okwa vala omumati ngoka e mu luku Benammi. Oye hekulu yAayammoni yongashingeyi.
1 Abraham okwa tembuka po puMamre e ta yi kuumbugantu waKaanan nokwa kala pokati kaKadesh naShur. Konima sho a kala muGerar,
2 okwa ka tya omukadhi Sara omumwayina. Onkee omukwaniilwa gwaGerar Abimelek okwa tumu kuSara, a ninge gwe.
3 Uusiku wontumba Kalunga okwi ihololele Abimelek mondjodhi e ta ti kuye: “Oto ka sa omolwomukiintu ngoka u na, oshoka oku na mwene.”
4 Ihe Abimelek okwa adhika inee mu guma nando nokwa ti: “Omuwa, oto yonagula po aantu yaa na oondjo?
5 Abraham oye mwene a ti kutya omumwayina, nomukiintu osho a tile. Shika onde shi ningi neiyuvo ewanawa.”
6 Kalunga okwe mu yamukula mondjodhi e ta ti: “Eeno, onda tseya kutya owe shi ningi neiyuvo ewanawa, onkee nde ku keelele, waa yone kungame nomolwaasho inandi pitika, u mu gume.
7 Ngashingeyi shunitha omukiintu komulumentu gwe. Omulumentu ngoka oye omuhunganeki note ku galikanene, opo waa se. Ihe ngele ito mu shunitha, otandi ku londodha kutya oto ka sa, ongoye mwene naantu yoye ayehe.”
8 Abimelek okwa meneka ongula onene e ti ithana omalenga ge agehe e te ga lombwele shoka sha ningwa po, ogo noga li ga tila.
9 Nena Abimelek okwi ithana Abraham e ta pula ta ti: “Owe tu ningi ngiini ngeyi? Uuwinayi owashike nde ku ningile, opo u etele ndje omupya gu thike mpano nosho wo oshilongo shandje? Owa ningile ndje shoka ihaashi ningwa.”
10 Abimelek okwa tsikile ko natango ta pula: “Omolwashike we shi ningi?”
11 Abraham okwa yamukula a ti: “Onda dhiladhila kutya kamu na nando omuntu muka ha tila Kalunga; ayehe otaa ka dhipaga ndje, ya kuthe po mukadhandje.
12 Sho shene omuntu nguka omumwameme shili, twa za muhe gumwe, nonando hayina gumwe, onkee nde mu hokana po.
13 Kalunga sho a tembudha ndje maandjatate, ndi ye komavi guundjendi, onda lombwele Sara nda ti: ‘Akuhe hoka tatu ka ya, oto vulu okuhololela ndje ohole yoye nokutumbula to ti: Nguka oye omumwameme.’ ”
14 Abimelek okwa shunitha Sara kuAbraham nokwe mu pe oonzi, oongombe naapika.
15 Okwa ti kuAbraham: “Oshilongo shandje ou shi wete; kala shaa mpoka wa hala.”
16 Okwa ti kuSara: “Omumwanyoko otandi mu pe iimaliwa iisiliveli eyuvi omolweyono ndyoka nda yono kungoye, noshaa ngoka ota ka tseya kutya ngoye ku na uusama.”
17 Nena Abraham okwa galikana Kalunga, naKalunga okwa aludha Abimelek. Okwa aludha wo omukadhi naadhike ye naapika, opo ya vule okumona uunona.
18 Oshoka Omuwa okwa li a pata oluvalo megumbo lyaAbimelek omolwaSara, omukiintu gwaAbraham.
1 Omuwa okwa yambeke Sara, ngaashi u uvaneka.
2 Sara okwa ningi omusimba e ta valele Abraham okamati muukulupe. Okamati oka valwa pethimbo ndyoka Kalunga e li uvaneke.
3 Abraham okwe ka luku Isak.
4 Isak sho a gwanitha omasiku gahetatu, Abraham okwe mu fukalekitha, ngaashi Kalunga e mu lombwele.
5 Abraham okwa li e na omimvo ethele, Isak sho a valwa.
6 Sara okwa ti: “Kalunga okwa pe ndje enyanyu e tandi yolo. Shaa ngoka te shi uvu, ota ka yola pamwe nangame.”
7 Sara okwa gwedha ko a ti: “Olye a li ta vulu okulombwela Abraham kutya Sara ona ka yamutha aanona? Onkene tuu onde mu valele okamati muukokele we.”
8 Okamati oka koko, nuuna ndoka ka toya, Abraham okwa ningi oshituthi oshinene.
9 Ihe Sara sho a mono okamati hoka Hagar Omuegipiti e ka valele Abraham, taka popi oohapu dhomasheko,
10 okwa ti kuAbraham: “Tidha po omupika nguka nomwana. Omuna gwomukiintu nguka ke na okuthigulula uuthiga mboka tau thigululwa komumwandje Isak.”
11 Shika osha ningitha Abraham omwenyo omwiinayi, oshoka Ismael okwa li omwana.
12 Ihe Kalunga okwa ti kuAbraham: “Ino ipyakidhila nomumati nonomupika gwoye Hagar. Gwanitha shoka Sara te ku lombwele, oshoka muIsak omo to mono oluvalo nde lu ku uvanekele.
13 Omuna gwomupika otandi ke mu pa oluvalo olwindji nota ka ninga oshigwana, oshoka oye omumwoye wo.”
14 Abraham okwa meneka e ta pe Hagar iikulya nombago yu udha omeya. Abraham okwa tsike Hagar e te mu laleke, a ye. Okwa yi e ta alaala nombuga yaBeersheba.
15 Omeya sho ga pu po, okwa tula omunona poshihwa,
16 e ta ka kuutumba oshinano shi thike peumbilo lyoshikuti. Okwi ipopile ta ti: “Itandi vulu okutala omumwandje ta si.” Okwa kuutumba mpoka e ta lili.
17 Kalunga oku uvu elilo lyomunona, nomuyengeli gwaKalunga okwa popi megulu a lombwele Hagar a ti: “Hagar, oto lilile shike? Ino lila. Kalunga oku uvu elilo lyomunona, sho a lala mpee.
18 Inda, u ke mu kuthe po. Otandi mu ningi oshigwana oshinene.”
19 Kalunga okwa tonatitha omeho gaHagar e ta mono omuthima. Okwa yi e tu udhitha ombago omeya e ta nwetha omunona.
20 Kalunga okwa li pamwe nomunona mokukoka kwe. Okwa kala mombuga yaParan e ta ningi ondjumbeta.
21 Mokukala kwawo mombuga yina okwe mu kongele omukiintu Omuegipiti.
22 Pethimbo ndyoka Abimelek nondjayi yiita ye Pikol oye ya kuAbraham noye mu lombwele ya ti: “Kalunga oku li pamwe nangoye mwaayihe mbyoka to ningi.
23 Ngashingeyi gana koshipala shaKalunga kutya ito kotokele ndje, naamwandje naatekulu yandje. Hololela ndje ohenda yoye, osho wo oshilongo moka u li mo, ngaashi ngame nde ku ningile.”
24 Abraham okwa yamukula a ti: “Otandi gana.”
25 Abraham okwa nyenyetele Abimelek molwomuthima ngoka aapiya yaAbimelek ye gu mu yugile.
26 Abimelek okwa ti: “Inandi tseya ngoka e shi ningi, nangoye ino shi lombwela ndje nando onale. Opo tandi shi uvu lwotango nena mpa.”
27 Nena Abraham okwa pe Abimelek oonzi noongombe noyo ayehe yaali oya ningi euvathano.
28 Abraham okwa yoolola oonzigona heyali moonzi dhe,
29 naAbimelek okwe mu pula ta ti: “Omolwashike we shi ningi?”
30 Abraham okwa yamukula a ti: “Taamba oonzigona ndhika heyali, shi ninge onzapo kutya ongame nda hupa po omuthima nguka.”
31 Ehala ndyoka onkee lya lukwa Beersheba, molwashoka mboka yaali opo ya ganenathana.
32 Sho ya ningi euvathano puBeersheba, Abimelek naPikol oya shuna kuFilistea.
33 Nena Abraham okwa tsike omuti omutamariske muBeersheba, oye nokwa galikana Omuwa, Kalunga kaaluhe.
34 Abraham okwa kalele muFilistia ethimbo ele.
1 Konima yaambika Kalunga okwa yeleke Abraham. Okwa ti kuye: “Abraham!” Abraham okwa yamukula a ti: “Ee!”
2 Kalunga okwa ti: “Kutha omumwoye, epona lyoye Isak, ngoka u mu hole, ngoye u ye koshilongo shaMoria. Inda, u ke mu yambe, a ninge efikilondjambo kondundu ndjoka tandi yi ku ulukile.”
3 Abraham okwa meneka ongula onene e ta kutile okasino, a kutha omwana Isak naapiya ye yaali. Sho a panda iikuni yefikilondjambo, okwa yi u uka kehala hoka a lombwelwa.
4 Mesiku etitatu Abraham okwa lengalenga nokwa monene ehala ndyoka kokule.
5 Nena okwa lombwele aapiya ye a ti: “Kaleni mpaka nokasino. Tse nomumwandjemati otatu yi tu ka galikane hwiyaka notatu ka galukila huka.”
6 Abraham okwa tsike Isak iikuni yefikilondjambo, noye mwene okwa humbata omwele nomulilo. Manga ya li taa ende,
7 Isak okwa pula he Abraham ta ti: “Tate!” He nokwa ti: “Ee.” Isak okwa ti: “Otu na omulilo niikuni, ihe onzi yefikilondjambo oyi li peni?”
8 Abraham okwa yamukula a ti: “Kalunga mwene oti imonene.” Oyo noye ende pamwe ayehe yaali.
9 Sho ya thiki kehala ndyoka Kalunga e li mu lombwele, Abraham okwa tungu oshiyambelo e ta tula ko iikuni. Okwa manga omwana Isak e te mu langeke koshiyambelo kombanda yiikuni.
10 Okwa pweya mo omwele, e mu dhipage.
11 Ihe omuyengeli gwOmuwa okwe mu igidha megulu a ti: “Abraham, Abraham!” Abraham okwa yamukula a ti: “Ee!”
12 Omuyengeli okwa ti kuye: “Oshikaha shoye ino shi gumitha omumwoye, u mu ningile ando uuwinayi washa. Ngashingeyi ondi shi shi kutya oho tila Kalunga, oshoka ino mu tindila omumwoye epona.”
13 Abraham okwa lengalenga e ta mono onzi yi li mengande ya kwatwa komankono. Okwa yi e te yi patukununa mo nokwe yi yamba efikilondjambo peha lyomwana.
14 Ehala ndyoka Abraham okwe li luku “Omuwa ti imonene.” Sigo onena aantu ohaa ti: “Okondundu yOmuwa ti imonene.”
15 Omuyengeli gwOmuwa okwi ithana Abraham megulu lutiyali
16 a ti: “Otandi iganene mwene — Omuwa osho ta ti — otandi ke ku yambeka. Molwashoka wa ningi shika noino tindila ndje omumwoye epona,
17 Otandi uvaneke kutya otandi ku pe oluvalo olwindji lwa fa oonyothi dhokegulu nenge ehekevi lyomooha dhefuta. Oluvalo lwoye otalu ka sinda aatondi yalwo.
18 Omungoye nomoluvalo lwoye aantu yomiigwana ayihe otaa ka lalekwa nuuyamba, oshoka owa vulika kelombwelo lyandje.”
19 Abraham okwa shuna kaapiya ye, noyo ayehe oye ya kuBeersheba, nkoka Abraham a tula.
20 Konima yaambika Abraham okwa lombwelwa: “Milka ota mono aanona; okwa valele omumwanyoko Nahor aamati.”
21 Osheeli oUz, taku landula Bus, Kemuel, he yaAram,
22 Kesed, Haso, Pildash, Jidlaf naBetuel.
23 Betuel ohe yaRebekka. Milka okwa valele Nahor, omumwayina gwaAbraham, aamati mbaka yahetatu.
24 Omukiintu gwaNahor gwoponto, edhina lye Reuma, okwa valele Nahor Tebak, Gaham, Tahash naMaaka.
1 Sara okwa kala nomwenyo omimvo ethele nomilongo mbali naheyali.
2 Okwa sile muHebron, kokutya Kiriatarba, mevi lyaKaanan, Abraham nokwe mu lili oosa.
3 Nena Abraham okwa zi po pomudhimba gwomukadhi e ta lombwele Aaheti ta ti:
4 “Ngame ondjendi ndi li mokati keni. Kwathii ndje, ndi lande kune eha, ndi fumvike mo omusi gwandje.”
5 Oya yamukula ya ti:
6 “Tatekulu, tu pulakena! Ongoye omuwiliki omunankondo mokati ketu. Fumvika mukadhoye mombila ombwanawa kwaadhihe ndhoka dhetu. Shaa ngoka gwomutse ota nyanyukwa oku ku pa ombila, opo u mu fumvike mo.”
7 Nena Abraham okwi inyongamene pevi koshipala shawo
8 e ta ti: “Ngele otamu pitika, ndi fumvike mukadhandje mpaka, kwathii ndje, mu pule Efron lyaZohar,
9 a landithe ndje po ekololo lyaMakpela ontega nepya lye. Mu puleni, e li landithe po kungame ondando yalyo ya gwana po, opo li ninge lyandje mwene lyomayendo.”
10 Efron mwene okwa li a kuutumba pamwe nAaheti pehala lyoshigongi posheelo shoshilando. Okwa yamukula montaneho yaantu ayehe a ti:
11 “Pulakena, tatekulu. Epya alihe otandi li ku pe nekololo ndyoka li li mulyo. Otandi li ku pe mpaka montaneho yaakwetu, opo u fumvike mo mukadhoye.”
12 Abraham okwi inyongamene pevi koshipala shAaheti
13 e ta ti kuEfron montaneho yaantu: “Kwatha ndje ngaa u pulakene. Epya alihe onda hala ndi li lande. Taamba iifuta yandje notii ka fumvika mo mukadhandje.”
14 Efron okwa yamukula a ti:
15 “Tatekulu, eyana ndyoka olyiimaliwa iisiliveli omathele gane, ihe kayi shi sha pokati ketu. Fumvika owala mukadhoye.”
16 Abraham okwa zimine e te mu yelekithile omwaalu ngoka Efron a tomona montaneho yaantu — iimaliwa iisiliveli omathele gane pamuthika ngoka hagu yelekwa kaalandithi.
17 Osho ngaaka eliko lyaEfron puMakpela, kuuzilo waMamre, olya ningi lyaAbraham, epya alihe nekololo ndyoka li li mo nomiti adhihe mepya nopooha dhalyo.
18 Osha ziminwa kAaheti ayehe ya li moshigongi posheelo shoshilando.
19 Abraham okwa fumvike mo omukadhi Sara mekololo ndyoka li li mevi lyaKaanan.
20 Osho ngaaka epya lyAaheti nekololo li li mulyo, olya ningi lyaAbraham lyomayendo.
1 Abraham okwa li a kulupilila, Omuwa okwe mu yambekele iilonga ye ayihe.
2 Abraham okwa lombwele omupiya gwe omukuluntu, ngoka a li ha tonatele eliko lye alihe, a ti: “Tula oshikaha shoye kohi yetundji lyandje e to gana.
3 Onda hala ndi ku ganithe medhina lyOmuwa, Kalunga kegulu nevi, kutya ino kongela omumwandje omukiintu maakadhona yaantu mbaka Aakaanana.
4 Ou na okuya kevi hoka nda valelwa, u ka kongele omumwandje Isak omukiintu mokati kezimo lyetu.”
5 Omupiya okwa yamukula a ti: “Otashi ningwa ngiini, omukadhona ngele ina hala okuza kaandjawo, e ye huka? Nandi shune omumwoye kevi hoka wa zile?”
6 Abraham okwa yamukula a ti: “Kotoka, waa shune ko omumwandje!
7 Omuwa, Kalunga komegulu, okwa tembudha ndje maandjatate nomevi lyaandjetu nokwa uvanekele ndje nokugana kutya evi ndika ote li pe oluvalo lwandje. Ote ku tetekelithile omuyengeli gwe, opo u monene omumwandje omukiintu.
8 Omukadhona ngele ina hala okuya nangoye, nena owa manguluka megano ndika. Ihe ino fala ko nando omumwandje nkwiyaka.”
9 Omupiya okwa tula oshikaha she kohi yetundji lyaAbraham, mwene gwe, e ta gana a gwanithe shoka Abraham a ti.
10 Omupiya okwa kutha oongamelo omulongo niinima yi ili noyi ili yondilo meliko lyamwene gwe e ta yi koshilando nkoka kwa kala Nahor, muumbangalantu waMesopotamia.
11 Sho a thiki ko, okwa tsitha oongamelo oongolo pomuthima gu li pondje yoshilando. Okwa li komatango, ethimbo ndyoka aakiintu haa ya okuteka omeya.
12 Okwa galikana a ti: “Omuwa, Kalunga kamwene gwandje Abraham, nena ndjika kwatha ndje, iinima yi ende nawa e to dhiginine euvaneko lyoye we li uvanekele mwene gwandje.
13 Ondi li mpaka pomuthima mpoka aakiintu yomoshilando taa ya okuteka omeya.
14 Otii ka pula gumwe gwomuyo te ti: ‘Kwatha ndje, u endeke oshuma shoye, ndi nwe mo.’ Ngele ota ti: ‘Nwa mo, noongamelo dhoye otandi dhi hugile wo,’ oye na ninge ngoka we mu hogololele omuntu gwoye Isak. Ngele shika tashi ningwa, otandi ka tseya kutya owa dhiginine euvaneko lyoye kumwene gwandje.”
15 Manga omupiya inaa mana okugalikana, ye Rebekka ota thiki nokuli a humbata oshuma she kepepe. Oye omuna gwaBetuel yaNahor, omumwayina gwaAbraham, e mu valelwa komukadhi Milka.
16 Okwa li a shitika, omukadhonalela. Okwa yi momuthima, ta teke oshuma she e ta zi mo.
17 Omupiya okwa yi kuye e ta ti: “Kwatha ndje ndi nwe mo moshuma shoye.”
18 Okwa ti: “Nwa mo, tatekulu,” nokwe endeke mbala oshuma she e shi kwata, manga ta nu.
19 Sho a mana, okwa ti: “Otandi hugile wo oongamelo dhoye dhi kumwe.”
20 Okwa tile mbala omeya metemba e ta shuna nziya momuthima, a ka tale omeya, sigo a hugile oongamelo dhe adhihe.
21 Omulumentu okwa thikama a fa a pugalala ta nongonona omukadhona, a tale ngele Omuwa e mu wilike tuu nondjila yi na elago.
22 Sho a mana, omulumentu okwa kutha okalinga koshingoli ke na ondilo e te ke mu zaleke keyulu, okwe mu zaleke wo uugondo uyali komaako.
23 Okwa ti: “Kwatha ndje u lombwele ndje, ongoye lye? Maandjeni omu na tuu ehala lyaayenda, tse naantu yandje tu ka lale mo?”
24 Okwa yamukula a ti: “Ongame Rebekka yaBetuel yaNahor. Yina yaBetuel oMilka.
25 Maandjetu omu na omwiidhi ogwindji, omu na wo ehala lyokulala.”
26 Nena omulumentu okwa tsu oongolo e ta hambelele Omuwa.
27 Okwa ti: “Omuwa, Kalunga kamwene gwandje Abraham, na hambelelwe, sho a li omudhiginini mokugwanithila mwene gwandje euvaneko lye. Omuwa okwe enditha ndje nondjila yu uka kezimo lyamwene gwandje.”
28 Omukadhona okwa matukile kuyina e te mu hokololele ayihe.
29 Rebekka okwa li e na omumwayina edhina lye Laban. Laban okwa matukile komuthima komupiya gwaAbraham.
30 Laban sho a mono okalinga kokomayulu nuugondo wokomaako gamumwayina ye ta pulakene shoka omulumentu e mu hokololele, okwa yi komupiya gwaAbraham. Omupiya okwa li a thikama natango poongamelo dhe pomuthima.
31 Laban okwa ti: “Ila, tu ye kegumbo. Ngoye omuntu ngoka a yambekwa kOmuwa. Omolwashike wa thikama pondje? Onda longekidha ehala maandjetu, nehala lyoongamelo dhoye wo.”
32 Omulumentu okwa yi megumbo. Laban okwa kutulula oongamelo e te dhi pe iikulya. Opo ihe okwe etele omupiya gwaAbraham naantu ye omeya gokuyoga oompadhi.
33 Iikulya sho ye etwa po, omulumentu okwa ti: “Itandi li, manga inaandi popya shoka she enditha ndje.” Laban okwa ti: “Shi popya ano.”
34 Omulumentu okwa ti: “Ngame omupiya gwaAbraham.
35 Omuwa okwa yambeka mwene gwandje noonkondo e te mu ningi omuyamba. Okwe mu pe iigunda yoonzi noyiikombo, oongombe, oshisiliveli noshingoli, aapika aalumentu naakiintu, oongamelo nuusino.
36 Sara, omukulukadhi gwamwene gwandje, okwe mu valele omumati muukokele we, namwene gwandje okwe mu pa eliko lye alihe.
37 Mwene gwandje okwa ganitha ndje e ta ti: ‘Ino kongela omumwandje omukadhona maakadhona yomuKaanan.
38 Inda kaandjatate, kezimo lyandje, u ke mu kongele omukiintu.’
39 Onda pula mwene gwandje nda ti: ‘Otashi ningwa ngiini, omukadhona ngele ina hala, tu ze ko naye?’
40 Okwa yamukula a ti: ‘Omuwa mwene, ngoka handi vulika kuye aluhe, ota ka tuma omuyengeli gwe, a ende pamwe nangoye noku ku pa elago. Oto ka monena omumwandje omukiintu kaandjetu, kegumbo lyatate.
41 Nge wa thiki kezimo lyandje, yo taa tindi oku mu ku pa, nena owa manguluka keganitho lyandje.’
42 “Sho nda thiki pomuthima, onda galikana nda ti: ‘Omuwa, Kalunga kamwene gwandje Abraham, kwatha ndje, olweendo nduka lwandje lu kale lu na elago.
43 Ondi li mpaka pomuthima. Uuna omukadhona te ya okuteka omeya, otandi ke mu indila, ndi nwe mo moshiyuma she.
44 Ngele ota zimine e ta hugile wo oongamelo dhandje, oye na ninge ngoka wa hogololele omuna gwamwene gwandje, a ninge omukadhi.’
45 Manga inaandi mana egalikano lyandje lyomonguwi, ye Rebekka oye ngu e ya ko e na oshuma kepepe. Okwa yi momuthima e ta teke omeya. Onda ti kuye: ‘Kwatha ndje wo, ndi nwe mo.’
46 Okwe endekithile nanziya oshuma kungame e ta ti: ‘Nwa mo, notandi hugile wo noongamelo dhoye.’ Onda nu, e ta hugile oongamelo.
47 Onde mu pula nda ti: ‘Ho olye?’ Okwa yamukula a ti: ‘Tate oBetuel yaNahor, meme oMilka.’ Nena onde mu zaleke okalinga keyulu nuugondo komaako ge.
48 Onda tsu oongolo e tandi galikana Omuwa. Onda hambelele Omuwa, Kalunga kamwene gwandje Abraham, ngoka e enditha ndje nondjila yu uka kezimo lyamwene gwandje hoka nda monene omuna gwamwene gwandje omukadhona.
49 Ngashingeyi, ne ngele omwa tokola okuhololela mwene gwandje ohole nuudhiginini, kwathii ndje, mu lombwele ndje, nongele hasho, lombwelii ndje wo, opo ndi tokole shoka te ningi.”
50 Laban naBetuel oya yamukula ya ti: “Oshinima shika osha zi kOmuwa, tse itatu ti sha.
51 Rebekka oye nguka, na ninge omukiintu gwomuna gwamwene gwoye, ngaashi Omuwa ye mwene a ti.”
52 Omupiya gwaAbraham sho e shi uvu, okwi inyongamene pevi e ta hambelele Omuwa.
53 Nena okwa longolola mo oonguwo, oshisiliveli noshingoli e te yi pe Rebekka. Okwa gandja wo omagano ge na ondilo komumwayina omulumentu nokuyina.
54 Nena omupiya gwaAbraham naantu mboka ya li pamwe naye, oya li e taa nu e taa ka lala. Sho ya penduka ongula, okwa ti: “Lalekii ndje, ndi shune kumwene gwandje.”
55 Ihe omumwayina gwaRebekka nayina oya ti: “Omukadhona na kale ngaa putse manga omasiku gamwe nenge tu tye omulongo, ne mu ye ihe.”
56 Ihe okwa ti: “Inamu tu dhika. Omuwa okwe enditha ndje nawa, lalekii ndje ashike, ndi ye kumwene gwandje.”
57 Oya yamukula ya ti: “Natu ithane omukadhona, tu pulakene shoka ta ti.”
58 Oyi ithana Rebekka e taa pula: “Owa hala u ye nomulumentu nguka?” Rebekka okwa yamukula a ti: “Eeno, onda hala.”
59 Oya laleke Rebekka nomuyamuthi gwe, ya ye nomupiya gwaAbraham naantu ye.
60 Oya yambeke Rebekka noku mu lombwela taa ti: “Ngoye mumwameme, ninga yina yomamiliyona! Oluvalo lwoye nalu ka lale iiyelo yaaniita nangoye!”
61 Nena Rebekka naadhike ye oya pyakudhukwa e taa londo oongamelo, ya ye nomupiya gwaAbraham, noyi idhenge mela lyondjila.
62 Isak okwa adhika ta zi “kOmuthima gwOmunamwenyo e wete ndje,” oshoka okwa li a kala muumbugantu waKaanan.
63 Okwa piti mo komatango, a ka lyange kelundu e ta mono oongamelo tadhi hedha ko.
64 Rebekka sho a mono Isak, okwa londoloka ko kongamelo
65 e ta pula omupiya gwaAbraham ta ti: “Omulumentu ngono te ya e tu tsakaneke melundu, olye?” Omupiya okwa yamukula a ti: “Omwene gwandje.” Rebekka okwa kutha oshisaali she e ta siikile oshipala she.
66 Omupiya okwa hokololele Isak ashihe e shi ningi.
67 Nena Isak okwa fala Rebekka metsali moka yina Sara a li ha kala e ta ningi omukadhi. Isak okwa li e hole Rebekka, noshe mu hupulitha yina.
1 Abraham okwa hokanununa omukulukadhi edhina lye Ketura.
2 Ketura okwe mu valele Simran, Jokshan, Medan, Midian, Jishbak naShua.
3 Jokshan ohe yaSheba naDedan. Oluvalo lwaDedan olwo Aayashuri, Aaletushi nAaleumi.
4 Aana yaMidian oyo Efa, Efer, Hanok, Abida naEldaa. Ayehe mbaka oyo oluvalo lwaKetura.
5 Abraham okwa gandja ayihe kuIsak, ihe manga a li e na omwenyo, okwa pe
6 oyana mboka ye mu valelwa kaakiintu ye yalwe, omagano. Nena okwa laleke aanona mbano, yu uke kevi lyokuuzilo, kokule nomwana Isak.
7 Abraham okwa si e na omimvo ethele nomilongo heyali nantano.
8 Okwa si muukokele uunene nokwa li a kuta omwenyo, sho a gongelwa poohekulu.
9 Oyana Isak naIsmael oye mu fumvike mekololo lyaMakpela meyana lyOmuheti Efron lyaZohar li li kuuzilo waMamre.
10 Eyana ndyoka Abraham e li landa kAaheti; Abraham nomukadhi ayehe yaali oya fumvikwa mo.
11 Konima yeso lyaAbraham Kalunga okwa yambeke Isak, ngoka a li a kala popepi “nOmuthima gwOmunamwenyo e wete ndje.”
12 Ndjika ondjokonona yaIsmael yaAbraham. Yina oHagar, omudhike Omuegipiti gwaSara.
13 Oyana aamati yaIsmael okuza kosheeli sigo konkelo oyo mbaka: Nebaiot, Kedar, Adbeel, Mibsam,
14 Mishma, Duma, Massa,
15 Hadad, Tema, Jetur, Nafish naKedema.
16 Oya li oohekulu yomazimo omulongo nagaali, nomadhina gawo oga lukilwa omikunda dhawo nomahala gawo.
17 Ismael okwa si e na omimvo ethele nomilongo ndatu naheyali e ta taambelwa poohekulu.
18 Oluvalo lwaIsmael olwa kala moshilongo pokati kaHavila naShur, kuuzilo waEgipiti mondjila yu uka kuAssur. Olwa kala lu na uutondwe noluvalo lulwe lwaAbraham.
19 Ndika olyo ehokololo lyaIsak yaAbraham.
20 Isak okwa li e na omimvo omilongo ne, sho a hokana Rebekka yaBetuel, Omuaramea gwokuPaddan muMesopotamia. Rebekka omumwayina gwaLaban.
21 Isak okwa galikanene omukadhi Rebekka, oshoka okwa li omuntimbe. Omuwa oku uvu egalikano lye, naRebekka okwa ningi omusimba.
22 Okwa li metegelelo lyaakwaanambwiyu, nomanga aanona inaa valwa, oya kondjithathana mela lyayina. Rebekka okwa ti: “Omolwashike nda adhika kiinima ya tya ngeyi?” Nokwa yi a ka pule eyamukulo kOmuwa.
23 Omuwa okwa ti kuye: “Mela lyoye omu na iigwana iyali. Oto ka vala aantu yaali taa kondjithathana. Gumwe ota ningi omunankondo e vule mukwawo. Omukuluntu ota longele ondenge ye.”
24 Ethimbo lyokuvala sho lya thiki, Rebekka okwa vala epaha lyaamati yaali.
25 Osheeli osha li shi na olufufu olundjimbi lwa fa lwoshinamwenyo, nosha lukwa Esau.
26 Onkelo oya piti mo ya kwata oshithi shaEsau e taye mu luku Jakob. Sho ya valwa, Isak okwa li e na omimvo omilongo hamano.
27 Aamati oya koko. Esau okwa ningi omukongo omunene, omulumentu e hole mombuga, ihe Jakob okwa li omumweni e hole pegumbo.
28 Isak okwa hokwa Esau, oshoka okwa li e hole okulya onyama yiiyamakuti, ihe Rebekka okwa hokwa Jakob.
29 Esiku limwe manga Jakob a li a tula po oshigali, Esau okwa zi kuukongo u ulumbwambwa kondjala.
30 Okwa ti kuJakob: “Onde etwa mo kondjala, pe ndje wo moshigali shoye oshitiligane.” (Omolwashoka hi ithanwa Edom.)
31 Jakob okwa yamukula a ti: “Otandi shi ku pe ashike, ngele oto pe ndje uuthemba woye wuusheeli.”
32 Esau okwa ti: “Eewa! Ngame ote si; uuthemba wuusheeli otau kwatha ndje shike?”
33 Jakob okwa yamukula a ti: “Gana tango kutya oto pe ndje uuthemba woye.” Esau okwa gana e ta pe Jakob uuthemba we wuusheeli.
34 Nena Jakob okwe mu pe oshikwiila noshigali. Okwa li ihe ye e ta nu nokwa zi po. Osho ngaaka Esau a dhini uuthemba we wuusheeli.
1 Oshilongo osha adhika ishewe kondjala yekomba ya fa ndjiyaka ya li ko muuyuni waAbraham. Isak okwa yi kuAbimelek, omukwaniilwa gwAafilisti kuGerar.
2 Omuwa okwi ihololele Isak e ta ti: “Ino ya kuEgipiti; kala mevi ndyoka tandi ku lombwele.
3 Kala muka, notandi kala pamwe nangoye e tandi ku yambeke. Otandi ke ku pa oshilongo shika ashihe noluvalo lwoye. Otandi ka gwanitha euvaneko nde li uvanekele ho Abraham.
4 Otandi ke ku pa oluvalo lu thike poonyothi dhokegulu, notandi ke lu pa oshilongo shika ashihe. Iigwana ayihe otayi ka lalekwa nuuyamba moluvalo lwoye.
5 Otandi ke ku yambeka, oshoka Abraham okwa vulika kungame nokudhiginina iipango yandje ayihe, omautho nomalombwelo gandje agehe.”
6 Isak nokwa kala muGerar.
7 Aantu sho ye mu pula kombinga yomukadhi, okwa ti, oye omumwayina. Okwa li a tila okuholola kutya oye omukadhi. Okwa dhiladhila kutya aantu mbeyaka otaa vulu oku mu dhipaga, ya kuthe po Rebekka, oshoka okwa li a shitika.
8 Isak sho a kala ko ethimbo ele, omukwaniilwa Abimelek okwe entamene mekende lye esiku limwe, nokwa mono Isak ta kwatakwata Rebekka.
9 Abimelek okwi ithana Isak e ta ti: “Nani omuntu omukiintu gwoye: Omolwashike wa tile, oye omumwanyoko?” Isak okwa yamukula a ti: “Onda dhiladhila kutya otandi ka dhipagwa, ngele tandi ti omukadhandje.”
10 Abimelek okwa ti: “Owe tu ningi ngiini? Ando gumwe gwomaantu yandje a lalele namukadhoye, ando we tu tula ondjo.”
11 Abimelek okwa londodha aantu ye ayehe ta ti: “Shaa ngoka ta gumu omulumentu nguka nenge omukadhi, oku na okusa.”
12 Isak okwa kunu oombuto mevi, nomumvo ngoka okwa teya lwethele shi vulithe pekuno, oshoka Omuwa okwe mu yambeke.
13 Okwa tsikile okulikola, sigo a ningi omuyamba omunene.
14 Molwashoka a li e na iigunda oyindji yoonzi noongombe naapiya oyendji, Aafilisti oye mu sile efupa.
15 Oya file po omithima ndhoka aapiya yahe Abraham ya hupile, manga a li e na omwenyo.
16 Nena Abimelek okwa ti kuIsak: “Za mo moshilongo shetu. Owa ningi omunankondo u tu vule.”
17 Isak okwa zi ko e ta ka yunga ontanda molusilu lwaGerar, moka a kala ethimbo.
18 Okwa hupulula omithima dha li dha hupwa muuyuni wahe Abraham, ndhoka dha li dha filwa kAafilisti, Abraham sho a si. Isak okwe dhi luku omadhina ngoka ga li ga lukwa kuhe.
19 Aapiya yaIsak oya hupu omuthima molusilu e taa yuula omeya.
20 Aasita yokuGerar oya tamanana naasita yaIsak e taa ti: “Omeya ngaka ogetu.” Isak okwe gu luku Esek.
21 Aapiya yaIsak oya hupu ishewe omuthima gulwe nogwa tamananenwa natango, onkee e gu luku Sitna.
22 Okwa zi ko hoka e ta hupu omuthima gulwe. Punguka inapa kala we oontamanana, onkee e gu luku Rehobot e ta ti: “Ngashingeyi Omuwa okwe tu pe ehala lya andjuka, tu indjipale moshilongo.”
23 Isak okwa zi po e ta yi kuBeersheba.
24 Uusiku mbwiyaka Omuwa okwe mu ihololele e ta ti: “Ongame Kalunga kaho Abraham. Ino tila, oshoka ondi li pungoye. Otandi ku yambeke e tandi ku pe oluvalo olwindji omolwomuntu gwandje Abraham.”
25 Isak okwa tungile ko oshiyambelo e ta galikana Omuwa. Okwa yungile ko ontanda, naapiya ye oya hupu omuthima.
26 Abimelek okwa zi kuGerar e li pamwe nomugandjindunge gwe Ahusat nondjayi yiita ye Pikol. Oye ya okutalela po Isak.
27 Isak okwa pula a ti: “Omolwashike mwe ya mu talele ndje po, nando ne omwa li mwaa na nangame nale nomwa tidha ndje moshilongo sheni?”
28 Oya yamukula ya ti: “Ngashingeyi otu shi shi kutya Omuwa oku li nangoye, onkee otatu dhiladhila, pokati ketu nangoye pu kale ehangano lya kolekwa negano. Otwa hala, u uvaneke
29 kutya ito tu etele omukundu, ngaashika natse wo itatu ku hindi. Otwa li tu na ombili nangoye notwe ku laleke nombili. Osha yela kutya Omuwa okwe ku yambeka.”
30 Isak okwe ya hangele oshituthi, oyo noya li e taa nu.
31 Ongula yoontundumene oya ningi euvathano e taye li koleke negano. Isak okwe ya laleke, oyo noya topoka nombili e taa yi.
32 Esiku tuu ndyoka aapiya yaIsak oye ya ye mu lombwele kutya omuthima ngoka ya hupu, ogwa yuuka.
33 Omuthima okwe gu luku Shiba omolwashoka oshilando shi ithanwa Beersheba.
34 Esau sho a gwanitha omimvo omilongo ne, okwa hokana aakadhona yaali Aaheti, Judit yaBeeri naBasemat yaElon,
35 noya li ya lulila Isak naRebekka.
1 Isak okwa li a kulupa, nomeho ge oga tsika. Okwi ithana osheeli she Esau e ta ti kuye: “Mentu gwandje.” Esau okwa ti: “Tate.”
2 Isak okwa ti: “Ou wete kutya onda kulupa nondi li pokusa.
3 Kutha ano uuta woye niikuti, u ye mokuti u dhipagele ndje oshiyamakuti.
4 Telekela ndje oondya dha dhoga, ndhoka ndi hole, u dhi etele ndje. Shampa nde dhi li, otandi ke ku yambeka, manga inaandi sa.”
5 Isak sho a li ta lombwele Esau, ye Rebekka okwa pulakena. Esau sho a yi kuukongo,
6 Rebekka okwa ti kuJakob: “Ondu uvu naanaa ho sho ta lombwele Esau ta ti:
7 ‘Etela ndje oshiyamakuti, u shi telekele ndje. Shampa nde shi li, otandi ku yambeke montaneho yOmuwa, manga inaandi sa.’
8 Ano ngashingeyi, mumwandje, pulakena ndje sho te ti.
9 Inda kiimuna, u kuthe uukombwena uyali wo ondoka, opo ndi teleke iikulya yi holike kuho.
10 Oto yi mu faalele e te ke ku yambeka, manga inaa sa.”
11 Ihe Jakob okwa ti kuyina: “Ou shi shi kutya Esau oku na olufufu, manga ngame ndaa lu na.
12 Pamwe tate ota pampadhala ndje e ta dhimbulula kutya otandi mu kotokele. Pamukalo nguka otandi iyetele etulomutima, hayambeko.”
13 Yina okwa yamukula: “Etulomutima lyoye nali ye mungame, mumwandje. Ninga owala shoka tandi ti. Inda, u ka talele ndje uukombwena.”
14 Jakob okwa yi e ke u tale, e te u etele yina, yina nokwe u teleke oondya dha dhoga, ndhoka he e dhi hole.
15 Nena okwa kutha oonguwo dhaEsau oombwanawa, ndhoka e dhi pungula megumbo, e te dhi zaleke Jakob.
16 Okwe mu zaleke uupa wiikombo komaako nomothingo ye yaa na olufufu.
17 Okwe mu pe iikulya ya dhoga pamwe noshikwiila shoka a ninga.
18 Nena Jakob okwa yi kuhe e ta ti: “Tate!” He okwa yamukula a ti: “Ee. Ongoye lye, mentu gwandje?”
19 Jakob okwa yamukula a ti: “Osheeli shoye Esau. Onda ningi, ngaashi wa lombwele ndje. Penduka, u lye onyama ndjoka nde yi ku etele, opo u yambeke ndje.”
20 Isak okwa ti: “Mentu gwandje, owe endelele ngiini oku shi mona?” Jakob okwa yamukula a ti: “Omuwa, Kalunga koye, okwa kwatha ndje, ndi shi mone.”
21 Isak okwa ti ku Jakob: “Hedha ko, opo ndi ku pampadhale. Ongoye ngaa shili omumwandje Esau?”
22 Jakob okwa hedha kuhe, ngoka e mu pampadhala e ta ti: “Ewi olyaJakob, ihe iikaha oyaEsau.”
23 Ina dhimbulula Jakob, oshoka omaako ge ga li ge na olufufu ga fa gaEsau. Opo a ale e mu yambeke,
24 ihe okwa pula ishewe a ti: “Ongoye ngaa shili Esau?” Jakob okwa yamukula a ti: “Ee.”
25 Isak okwa ti: “Etela ndje nduno onyama. Konima nge nde yi li, opo tandi ku yambeke.” Jakob okwe yi mu etele nokwe mu etele nomaviinu wo, a nwe.
26 Nena he okwa ti kuye: “Mentu gwandje, hedha ko, u thipe ndje komilungu.”
27 Sho a hedha ko oku mu thipa komilungu, Isak okwa nika ko ezimba lyoonguwo dhe, onkee okwe mu yambeke. Okwa ti: “Ezimba ewanawa lyomumwandje olya fa ezimba lyelundu ndyoka lya yambekwa kOmuwa.
28 Kalunga ne ku pe oomume dhomegulu nevi lyo ondoka! Ne ku pe eloolo lyiilya nolyomaviinu.
29 Iigwana nayi ku longele, naantu naye ku inyongamene. Pangela mokati kaanezimo lyoye, oluvalo lwanyoko nalu ku inyongamene. Oomboka taye ku tula omutima, naa tulwe omutima; naamboka taye ku laleke nuuyamba, naa lalekwe nuuyamba.”
30 Isak opo tuu a mana okuyambeka Jakob, naJakob a zi po puye, omumwayina Esau okwa galuka kuukongo.
31 Naye wo okwa teleke oondya dha dhoga e te dhi fala kuhe. Okwa ti: “Tate, penduka, u lye onyama ndjoka nde yi ku etele, opo u yambeke ndje.”
32 Isak okwa pula a ti: “Ongoye lye?” Esau okwa yamukula: “Ngame osheeli shoye Esau.”
33 Isak okwa tameke okukakama noonkondo e ta pula ta ti: “Olye ano ngwiyaka a dhipaga oshiyamakuti nokwe shi eta kungame? Opo nde shi li, manga inoo ya. Onde mu yambeka nosha pwa tuu ngaaka.”
34 Esau sho e shi uvu, okwa takuma mokule e ta ti: “Tate, yambeka ndje wo!”
35 Isak okwa yamukula: “Omumwanyoko okwi ile nokwa kotokele ndje. Okwa kutha po eyambeko lyoye.”
36 Esau okwa ti: “Nduka olutiyali, sho a kotokele ndje. Itashi kumitha, sho a lukwa Jakob. Okwa kutha ndje uuthemba wandje wuusheeli, nena a kutha po ishewe eyambeko lyandje. Ino thigila ndje po nando eyambeko?”
37 Isak okwa yamukula a ti: “Onde mu ningi nokuli omupangeli gwoye, naakwawo ayehe onde ya ningi aapiya ye. Onde mu pa eloolo lyiilya nolyomaviinu. Mentu gwandje, kape na we sho te vulu oku ku ningila.”
38 Esau okwa tsikile okuhehela he e ta ti: “Tate, ndele nando eyambeko limwelimwe olyo ngaa kuu na? Yambeka ndje wo, tate!” Ye ota tameke okulila nokuli.
39 Nena Isak okwa ti kuye: “Oto kala kokule nevi lyo ondoka nokokule noomume dhokegulu.
40 Oto hupithwa kegongamwele lyoye. Oto ningi omupiya gwomumwanyoko. Ihe ngele oto pwidhuka, oto ki inaga ondjoko ye.”
41 Esau okwa tondo Jakob, molwashoka he a yambeke Jakob. Okwa dhiladhila: “Omasiku gokulila oosa dhatate oga thikana. Konima otii ka dhipaga omumwameme Jakob.”
42 Rebekka sho u uvu edhiladhilo lyaEsau, okwi ithana Jakob e ta ti: “Omumwanyoko Esau okwi iyuvanene, e ku dhipage.
43 Ngashingeyi, mumwandje, ninga shoka tandi ti. Inda ontuku kaandjamumwameme Laban kuHaran,
44 u kale puye manga, sigo ondjahi yomumwanyoko tayi loto
45 e ta dhimbwa shoka we shi mu ningile. Otandi ke ku tumina elaka, u galukile kegumbo. Omolwashike ndi mu kanithe amuhe yaali esiku limwe?”
46 Rebekka okwa lombwele Isak a ti: “Omwenyo gwandje ogwa vulithwa kaakiintu mbaka yaEsau aakwiilongo. Jakob ngele ota ka hokana ishewe aakadhona mbaka Aaheti, otandi si owala.”
1 Isak okwi ithana Jakob e te mu laleke ta ti: “Ino hokana omukadhona Omukaanani.
2 Inda kuMesopotamia, kaandjahokulu Betuel, u hokane gumwe gwomaana yahokulu Laban.
3 Kalunga Omunankondoawike na yambeke ondjokana yoye, ye e ku pe aanona oyendji, opo u ka ninge he yiigwana oyindji!
4 Ne ku yambeke noluvalo lwoye, ngaashi a yambekele Abraham; ne ku pe evi ndika, moka wa kala mo ondjendi naandyoka Kalunga e li pe Abraham!”
5 Isak okwa laleke Jakob, a ye kuMesopotamia kaandjaLaban yaBetuel, Omuaramea, ngoka omumwayina gwaRebekka, yina yaJakob naEsau.
6 Esau okwa koneke kutya Isak okwa yambeke Jakob e te mu laleke, a ye kuMesopotamia, a ka konge omukiintu. Okwa koneke wo kutya Isak mokuyambeka Jakob okwe mu lombwele, kaa hokane aakiintu Aakaanana.
7 Okwe shi kutha mo wo kutya Jakob okwa vulika kuhe nayina e ta yi kuMesopotamia.
8 Nena Esau okwa li wo u uvite kutya he ina hokwa aakiintu Aakaanana.
9 Okwa yi kaandjaIsmael yaAbraham e ta hokana omwana Mahalat, omumwayina gwaNebaiot.
10 Jakob okwa zi kuBeersheba u uka kuHaran.
11 Peningino lyetango okwe ya pehala eyapuki e ta yungu ontanda. Okwa lala a kothe, a gwila omutse gwe kemanya.
12 Okwa yaguma e wete oshilondelo sha za pevi sha tsa megulu, naayengeli taa londo notaa kuluka ye li kusho.
13 Omuwa mwene oku li kondungu yasho e ta ti kuye: “Ongame Omuwa, Kalunga kaAbraham naIsak. Evi ndika mpoka wa lala, otandi li ku pe noluvalo lwoye.
14 Oluvalo lwoye otalu ka kala lu thike pontsi yevi, lwaa shi kuyalulwa. Otalu ka taandela kuuninginino nokuuzilo, kuumbangalantu nokuumbugantu. Mungoye nomoluvalo lwoye otandi ka yambekela iigwana ayihe kombanda yevi.
15 Dhimbulukwa, otandi kala nangoye e tandi ku gamene shaa nkoka to yi, notandi ke ku galulila kevi ndika. Itandi ku etha, sigo nda gwanitha ayihe nde yi ku uvanekele.”
16 Jakob okwa papudhuka po nokwa ti: “Omuwa oku li mpaka! Oku li mehala ndika, ngame inandi shi tseya!”
17 Okwa li a tila e ta ti: “Ehala ndika etilithi ngiini! Mpaka ope na egumbo lyaKalunga, mpaka ope na osheelo shegulu.”
18 Jakob okwa meneka ongula onene, okwa kutha emanya ndyoka a li a gwila ko omutse gwe e te li dhike, li ninge endhindhiliko. Nena okwa tile ko omagadhi gooholivi, opo e li yapulile Kalunga.
19 Ehala ndika okwe li luku Betel, nando oshilando shoka nale okwa li hashi ithanwa Lus.
20 Nena Jakob okwa ganene Omuwa a ti: “Ngele oto kala pungame e to gamene ndje mondjenda ndjoka tandi ende e to pe ndje iikulya noonguwo,
21 nongele tandi galukile kaandjatate, nena oto ningi Kalunga kandje.
22 Emanya ndika lyendhindhiliko nde li dhike, otali ka ninga ehala mpoka to galikanenwa, ongame notandi ke ku pa oshitimulongo mwaashihe shoka to shi pe ndje.”
1 Jakob okwa tsikile ondjila ye yokuuzilo.
2 Ohaluka okwa thiki pomuthima gu li melundu pu na iigunda yoonzi dha lala. Iigunda mbika oya li hayi hugilwa momuthima nguka gwa siikilwa nemanya edhigu.
3 Shampa oonzi dhe ya po adhihe, aasita ohayu undula po emanya e taye dhi hugile. Konima ohaye li shuna po ishewe pehala lyalyo.
4 Jakob okwa pula aasita a ti: “Yakwetu, ne oyapeni?” Oya yamukula ya ti: “OyokuHaran.”
5 Okwa pula a ti: “Laban, omutekulu gwaNahor, omu mu shi?” Oya yamukula ya ti: “Eeno, otu mu shi.”
6 Okwa pula a ti: “Oku li tuu nawa?” Oya yamukula ya ti: “Eeno, oku li nawa. Tala, omwana omukadhona Rakel oye ngwiya te ya e na oonzi dhahe.”
7 Jakob okwa ti: “Tala, omutenya natango, nokali shi ethimbo lyokukongolola oonzi. Dhi hugileni, dho dhi ye dhi ka nape.”
8 Oya yamukula ya ti: “Itatu vulu oku shi ninga, manga oonzi adhihe inaadhi gwana po. Opo ihe emanya tali kuthwa po, e tatu dhi hugile.”
9 Jakob manga ta kundathana nayo, Rakel okwa thiki noonzi.
10 Jakob sho a mono Rakel pamwe noonzi dhahekulu Laban, okwa yi komuthima e ta kutha po emanya e te dhi hugile.
11 Nena okwe mu thipi komilungu nokwa lili kenyanyu.
12 Okwe mu hokololele a ti: “Ngame omunezimo lyaho, omuna gwaRebekka.” Rakel okwa matuka, a ka lombwele he.
13 Laban sho u uvu omutekulu gwe Jakob, okwa matuka e ke mu tsakaneke. Okwe mu papatele e te mu thipi komilungu e te mu fala megumbo. Jakob sho a hokololele Laban ayihe ya ningwa po,
14 Laban okwa ti: “Eeno, osho naanaa, ngoye onyama nombinzi yandje.” Jakob okwa kala ko omwedhi.
15 Laban okwa lombwele Jakob a ti: “Nando ngoye omukwetu, ku na okulongela ndje owala. Lombwela ndje kutya ondjambi yoye oyashike.”
16 Laban okwa li e na oyana aakadhona yaali. Edhina lyosheeli oLea, nonkelo oRakel.
17 Lea okwa li e na omeho ga nkundipala, ihe Rakel okwa li omwaanawa a shitika.
18 Jakob okwa li e hole Rakel nokwa ti: “Otandi ku longele omimvo heyali, ngele oto zimine ndje, ndi hokane Rakel.”
19 Laban okwa yamukula a ti: “Oku mu ku pa oku vule oku mu gandja komuntu gulwe; kala pungame.”
20 Jakob okwa longo omimvo heyali, opo a pewe Rakel, nomimvo ndhoka odha li dha fa kuye omasiku gowala omashona ga piti po, oshoka okwa li e mu hole.
21 Nena Jakob okwa ti kuLaban: “Ethimbo lya thiki; pe ndje omukiintu gwandje, ndi mu hokane.”
22 Laban okwa hanga ohango e ta hiya ayehe.
23 Ihe uusiku mbwiyaka Jakob a li e na okupewa Rakel, Laban okwa kutha Lea e te mu pe Jakob, naJakob okwa lala naye.
24 (Laban okwa gandja omupika gwe omukadhona Silpa, a ninge omudhike gwaLea.)
25 Ongula sho kwa shi, Jakob okwa mono kutya nani omuntu oLea. Okwa yi kuLaban e ta ti: “Omolwashike wa ningi ndje ngeyi? Ngame onda longo, ndi pewe Rakel. Omolwashike wa kotokele ndje?”
26 Laban okwa yamukula: “Kagu shi omukalo gwoshilongo shetu okugandja omunona a hokanwe tango, manga omukuluntu e li po.
27 Tegelela owala, omasiku gohango ga kuke, notandi ke ku pa Rakel, ngele oto ka longela ndje ishewe omimvo omikwawo heyali.”
28 Jakob okwa zimine, nomasiku gohango sho ga kuka, Laban okwe mu pe omwana Rakel, a ninge omukadhi.
29 (Laban okwa gandja omupika gwe omukadhona Bilha kuRakel, a ninge omudhike gwe.)
30 Jakob okwa ka lala ishewe naRakel, nokwa li e mu hole unene e vule Lea. Nena okwa longele Laban omimvo omikwawo heyali.
31 Omuwa sho a mono kutya Lea ke holike, okwe mu pe oluvalo, ihe Rakel okwa ningi omuntimbe.
32 Lea okwa ningi omusimba e ta vala omumati e ta ti: “Omuwa okwa mono uukweyi wandje, ngashingeyi omusamane gwandje ota kala e hole ndje.” Lea okwa luka omumati Reuben.
33 Okwa ningi omusimba ishewe e ta vala omumati. Okwa ti: “Omuwa okwa pe ndje omumati nguka, oshoka oku uvu kutya kandi holike.” Okwe mu luka Simeon.
34 Okwa ningi omusimba ishewe e ta vala omumati gulwe. Okwa ti: “Ngashingeyi omusamane gwandje ota kala a kanyatela ndje, oshoka onde mu valele aamati yatatu.” Oye nokwe mu luka Levi.
35 Nena okwa ningi omusimba ishewe e ta vala omumati gulwe. Okwa ti: “Ngashingeyi ote hambelele Omuwa.” Oye nokwe mu luka Juda. Nena okwa hulitha okuvala.
1 Ihe Rakel ina valela Jakob aanona. Okwa sile omumwayina efupa e ta ti kuJakob: “Valitha ndje aanona, ote ningi ndi se.”
2 Jakob okwa geele Rakel e ta ti: “Ongame Kalunga ngoka e ku keelele oluvalo?”
3 Rakel okwa ti: “Omudhike gwandje Bilha oye nguka. Lala naye, opo a valele ndje omunona poongolo dhandje. Pamukalo nguka ote vulu okuninga omuvali molwe.”
4 Okwa gandja Bilha komulume e ta lala naye.
5 Bilha okwa ningi omusimba eta valele Jakob omumati.
6 Rakel okwa ti: “Kalunga okwa tokola ndje nawa. Oku uvu egalikano lyandje e ta pe ndje omumati.” Okwe mu luku Dan.
7 Bilha okwa ningi omusimba ishewe e ta valele Jakob omumati.
8 Rakel okwa ti: “Onda kondjo olugodhi olunene nomumwameme, ihe onda sindana.” Okwe mu luku Naftali.
9 Lea sho a dhimbulula kutya nani ita vala we, okwa gandja omudhike gwe Silpa kuJakob, a ninge omukadhi.
10 Silpa okwa valele Jakob omumati.
11 Lea okwa ti: “Nda ningi elago,” nokwe mu luku Gad.
12 Silpa okwa valele Jakob ishewe omumati.
13 Lea okwa ti: “Ngame omunelago ngiini! Ngashingeyi aakulukadhi otaa ka ithana ndje omunelago.” Nokwe mu luku Aser.
14 Pethimbo lyeteyo lyiilya Reuben okwa yi kelundu e ti itsu iiyimati yohole, mbyoka e eta kuyina Lea. Rakel okwa ti kuLea: “Pe ndje mo wo miiyimati yomumwoye yohole.”
15 Lea okwa yamukula a ti: “Inashi gwana nani, sho wa yugu ndje omusamane gwandje? Ngashingeyi owa hala ishewe u kuthe po iiyimati yomumwandje yohole.” Rakel okwa ti: “Ngele oto pe ndje iiyimati yomumwoye yohole, oto ka lala uusiku wonena naJakob.”
16 Jakob sho a galuka kepya lye ongulohi, Lea okwe ke mu tsakaneka ta ti: “Nena onde ku futa iiyimati yomumwandje yohole, ila kungame.” Oye nokwa lala naye uusiku tuu mboka.
17 Kalunga okwa yamukula egalikano lyaLea. Okwa ningi omusimba e ta valele Jakob omumati omutitano.
18 Lea okwa ti: “Kalunga okwa futu ndje, oshoka onda gandja omupika gwandje komusamane gwandje.” Oye okwe mu luku Issaskar.
19 Lea okwa ningi omusimba ishewe e ta valele Jakob omumati omutihamano.
20 Lea okwa ti: “Kalunga okwa pe ndje omagano omawanawa. Ngashingeyi omusamane gwandje ota taamba ndje, oshoka onde mu valele aamati yahamano.” Oye okwe mu luku Sebulon.
21 Konima yaambika okwa vala omukadhona e te mu luku Dina.
22 Omuwa okwa dhimbulukwa wo Rakel, okwa yamukula omagalikano ge e te mu pe oluvalo.
23 Okwa ningi omusimba e ta vala omumati. Okwa ti: “Kalunga okwa kutha po omupya gwandje, sho a pe ndje omumati.
24 Omuwa na pe ndje ishewe omumati gulwe.” Oye nokwe mu luku Josef.
25 Konima yokuvalwa kwaJosef Jakob okwa lombwele Laban a ti: “Laleka ndje, ndi shune kaandjetu.
26 Pe ndje aakiintu yandje naana yandje mboka nde ya mono, sho nde ku longele, note yi ihe. Ou shi shi kutya onde ku longele nawa.”
27 Laban okwa ti: “Ngele oto sile ndje ohenda, kala po, oshoka onda dhimbulula kutya Omuwa okwa yambeke ndje molwoye.
28 Lombwela ndje ondjambi yoye, notandi ku futu.”
29 Jakob okwa yamukula a ti: “Oto tseya, nkene nde ku longele nonkene iimuna yoye yi indjipala, sho nde yi dhiginine.
30 Oya li iishona, sho nde ya, noyi indjipala oyindji. Omuwa okwe ku yambeke shaa mpoka nde ende. Ngashingeyi ethimbo lyandje, ndi tameke okulongela egumbo lyandje mwene.”
31 Laban okwa pula a ti: “Otandi ku futu shike?” Jakob okwa yamukula a ti: “Ine hala ondjambi yasha. Ote tsikile okulitha iimuna yoye, nge oto zimine edhiladhilo ndika.
32 Pitika ndje, ndi konakone iimuna yoye nena, ndi kuthe mo oonzigona adhihe oonduudhe nuukombwena auhe wiiyala nenge wuutotono. Owo ondjambi yandje nda hala.
33 Komeho sho to ka tala ondjambi yandje, oto ka dhimbulula nuupu, ngele ondi li tuu moshili. Ngele oto adha ndi na oshikombo kaashi na iiyala nenge uutotono nenge onzi yaa shi onduudhe, nena oto tseya kutya oya yakwa.”
34 Laban okwa yamukula a ti “Onawa. Otatu ningi, ngaashi wa ti.”
35 Ihe esiku ndyoka Laban okwa yoolola mo iikombo ayihe iilumentu yi na iiyala nuutotono niikombo iikiintu mbyoka yi na iiyala nuutotono nenge ya nika iitokele nando okashuushuu. Okwa yoolola mo wo oonzi adhihe oonduudhe. Iimuna mbika okwe yi tula muusita woyana
36 e ta zi puJakob nayo ye ende uule womasiku gatatu. Jakob okwa litha oshihupe shiimuna yaLaban.
37 Jakob okwa kutha uutayi uutalala womwaango, womumandeli nowomukwiyu e ta takele mo uupola, opo uutokele wu holoke.
38 Okwe u tula komeho giimuna momatemba. Okwe u tula mo, oshoka oya londelathana mpoka, sho tayi ya kehugilo.
39 Ano iikombo mbyoka ya kwatele montaneho yuutayi, oya vala uukombwena woompola, wiiyala nowuutotono.
40 Jakob okwa yoolola oonzi miikombo e te dhi taalelitha oonzi dhaLaban dhiiyala noonduudhe. Pamukalo nguka okwa likola iimuna ye mwene e te yi yoolola mo muyaLaban.
41 Aluhe pomathimbo gokulondathana Jakob okwa tula iimuna ya kola pomatemba mu na uutayi, noya londathana montaneho yawo.
42 Ihe uutayi ine u tula miimuna mbyoka iinkundi. Osho ngaaka Laban okwa mono iimuna iinkundi, manga Jakob mbyoka yo ondoka.
43 Pamukalo nguka Jakob okwa ningi omuyamba unene. Okwa li e na iimuna oyindji, aapika, oongamelo nuusino.
1 Jakob okwa kundana kutya aana yaLaban aamati otaa ti: “Jakob okwa kutha po iinima yatate ayihe. Uuyamba we auhe owatate.”
2 Sho a tala oshipala shaLaban, kasha li sha fa ohela nuunambo, sho a li e na ombili.
3 Omuwa okwa lombwele Jakob a ti: “Shuna koshilongo shooho nokaakweni, otandi kala pamwe nangoye.”
4 Jakob okwa tumine Rakel naLea elaka, ya ye kuye kiimuna kelundu.
5 Okwa ti kuyo: “Sho nda tala ho, ke na ombili nangame, ngaashi ha kala shito, ihe Kalunga katate oku li pungame.
6 Ne amuhe omu shi shi, nkene nda longele ho noonkondo dhandje adhihe.
7 Ndele okwa kotokele ndje nokulundulula ondjambi yandje lwomulongo. Ihe Kalunga ine mu pitika, a monithe ndje oshiponga.
8 Shampa Laban a ti: ‘Iikombo yuutotono otayi ka ninga ondjambi yoye,’ likombo ayihe otayi vala owala uukombwena wuutotono. Uuna ta ti: ‘Iikombo yiiyala otayi ka ninga ondjambi yoye,’ iikombo ayihe otayi vala uukombwena wiiyala.
9 Kalunga okwa kutha ho iimuna e te yi pe ndje.
10 “Pethimbo lyeepepelo lyiimuna onda yaguma ndi wete iikombo iitsezi mbyoka ya li tayi epepele, ya li yi na iiyala, iimbathi nuutotono.
11 Omuyengeli gwaKalunga okwa lombwele ndje mondjodhi a ti: ‘Jakob!’ Onda yamukula: ‘Ee.’
12 Okwa tsikile a ti: ‘Tala ko, iikombo ayihe iitsezi mbyoka tayi epepele, oyo oyi na iiyala, iimbathi nuutotono. Otandi ningi ngeyi, oshoka ondi wete Laban shoka te ku ningile.
13 Ongame Kalunga ngoka nde ku ihololele puBetel, hoka wa yapula emanya li ninge endhindhiliko, sho wa tilile ko omagadhi gooholivi nowa ganene ndje. Ngashingeyi thikama, u shune kevi lyaandjeni hoka wa valelwa.’ ”
14 Rakel naLea oya yamukula Jakob ya ti: “Tse katu na we uuthiga washa putate.
15 Ote tu ngwandjagula twa fa aayeni. Okwe tu landitha po nokwa hepitha owala iimaliwa mbyoka a futa molwetu.
16 Eliko alihe ndika Kalunga e li kutha tate, olyetu nolyaana yetu. Ninga ano shoka Kalunga e ku lombwele.”
17 Jakob okwa londeke oyana naakadhi koongamelo,
18 e ta faalele iimuna ye ayihe naashihe shoka a likola muMesopotamia. Osho a zi po, a ka shune kuhe Isak kevi lyaKaanan.
19 Laban okwa adhika a ka kulula oonzi dhe. Manga a li hoka, Rakel okwa yaka po iimenka yomegumbo lyahe.
20 Jakob okwa kotokele Laban Omuaramea, ine mu lombwela nando kutya ye ota yi.
21 Okwa gongele iinima ye ayihe e ta yi neulumo. Okwa tokola omulonga Eufrat e ta yi u uka koshilongo shokoondundu dhaGilead.
22 Omasiku gatatu sho ga piti po, Laban okwa lombwelwa kutya Jakob a yi ontuku.
23 Laban okwa kutha aantu ye e ta landula Jakob. Konima yomasiku gaheyali okwe mu adha moshilongo shokoondunda dhaGilead.
24 Uusiku tuu mboka Kalunga okwe ya kuLaban mondjodhi e ta ti kuye: “Kotoka, waa ende Jakob nayi.”
25 Jakob okwa adhika a yungu ontanda ye kondundu, naLaban okwa yungu ontanda ye koshilongo shokoondundu dhaGilead pamwe naantu ye.
26 Laban okwa ti kuJakob: “Omolwashike wa kotokele ndje e to kutha po aamwandje ya fa aakiintu ya kwatwa po kiita?
27 Omolwashike wa kotokele ndje e to iyaka po inoo lombwela ndje? Ando owa li wa laleke ndje, ando nde ku thindikile mondjila yoye nondigolo nokwiimba nokuhika oontunda nuuharpa.
28 Inandi pitikwa ndi laleke aatekulu yandje naamwandje nethipo lyokomilungu. Owa ningi uugoya!
29 Ondi na oonkondo oku ku monitha oshiponga, ihe uusiku mbuka wonena Kalunga kaho okwa londodha ndje, ndaahe ku ninge nayi.
30 Ondi shi shi kutya owa zi po, oshoka owa yuulukwa kegumbo, ihe omolwashike wa yaka po iimenka yandje yomegumbo?”
31 Jakob okwa yamukula a ti: “Onda li nda tila, oshoka onda dhiladhila kutya oto kutha ndje aamwoye.
32 Ihe ngoka to adha e na iimenka yoye, na dhipagwe. Montaneho yaantu yetu noyoye konga ashihe shoka shoye, ngoye u shi kuthe po.” Jakob ina tseya kutya Rakel okwa yaka po iimenka yaLaban.
33 Laban okwa hadha metsali lyaJakob, nena okwa yi metsali lyaLea nometsali lyaakulukadhi aapika yaali, ihe ina mona mo iimenka ye. Nena okwa yi metsali lyaRakel.
34 Rakel okwa li a kutha po iimenka e te yi tula kohi yomutumba gwongamelo nokwa li a kuutumba kugwo. Laban okwa hadha etsali alihe, ihe ine yi mona.
35 Rakel okwa lombwele he a ti: “Tate, ino geela ndje, oshoka ite vulu okuthikama montaneho yoye; ondi li komwedhi.” Laban okwa hadha, ihe ina mona iimenka ye yomegumbo.
36 Nena Jakob okwa geye e ta ti: “Uuwinayi washike nda ninga?” Okwa nyenyetele Laban e ta ti: “Oshinima naanaa nda yona, oshishike, sho to thiminike ndje ngeyi?
37 Ngashingeyi sho wa hadha iinima yandje ayihe, owa mona tuu iinima yoye? Yi tula nduno mpaka puuyelele, opo tse naantu yoye tu yi mone, yo ya tokole kutya olye gwomutse e li mondjila.
38 Onda kala pungoye omimvo omilongo mbali. Oonzi dhoye niikombo inayi gwitha mo omala, nangame inandi lya po nando onzi yoye yimwe.
39 Onzi ndjoka ya lika po kiilikama, ondi ihepeke nayo. Inandi yi kutha, ndi yi ete kungoye ngaye ndi tye kandi na mbedhi. Owa li ho pula ndje, ndi fute oshimuna kehe sha yakwa, ongele omutenya nenge uusiku.
40 Omutenya onda li nda pi omutenya nuusika onda si uutalala, omulumentu nda londokwa koomposi.
41 Osho sha li omimvo ndhoka omilongo mbali, sho nda kalele pungoye. Omimvo omulongo nane onde ku longelele aakadhona yoye yaali, nomimvo hamano iimuna. Nando ongeyi, owa lundulula ondjambi yandje lwomulongo.
42 Ando Kalunga kootate, Kalunga kaAbraham naIsak, ina kala pungame, ando wa shunitha ndje iikaha yowala. Ihe Kalunga okwa mono uudhigu wandje niilonga mbyoka nda ningi, nuusiku wa zi ko okwa pangula shoka shu uka.”
43 Laban okwa yamukula Jakob a ti: “Aakiintu mbaka aamwandje, oyana wo aamwandje, iimuna mbika oyandje. Tashi ti, iinima ayihe to mono mpaka, oyandje. Ihe aamwandje noyana otandi ya ningi ngiini?
44 Ondi ilongekidha okuhangana nangoye. Natu ninge ondumba yomamanya, yi ninge onzapo yehangano lyetu.”
45 Jakob okwa kutha emanya e te li dhike, li ninge endhindhiliko.
46 Jakob okwa lombwele aantu ye, ya ndumbile omamanya ondumba. Sho ye shi ningi, oya lile po pondumba.
47 Laban okwe li luku Jegar Sahaduta, manga Jakob e li luka Galed.
48 Laban okwa lombwele Jakob a ti: “Ondumba ndjika yomamanya oyo edhimbulutho lyetu atuhe yaali.” Omolwashoka ehala ndyoka olya lukwa Galed.
49 Laban okwa ti ishewe: “Omuwa ne tu tonatele, sho tatu topoka.” Onkee ehala olya lukwa Mispa.
50 Laban okwa tsikile a ti: “Ngele oto ningi aamwandje nayi nenge to hokana aakiintu yalwe, manga ndaaye shi shi, dhimbulukwa kutya Kalunga okwe tu tonatela.”
51 Laban okwa ti natango kuJakob: “Mpaka ope na ondumba yomamanya naampaka ope na endhindhilikomanya nde li dhike pokati ketu nangoye.
52 Ondumba ndjika nendhindhilikomanya ndika nayi kale onzapo okudhimbulutha ndje, ndaa konde omamanya ngaka, ndi ku matukile. Onzapo ndjika nayi ku dhimbuluthe wo, waa konde omamanya ngaka, u matukile ndje.
53 Kalunga kaAbraham naKalunga kaNahor na tokole pokati ketu.” Jakob okwa gana medhina lyaKalunga ngoka he Isak ha tila, a gwanithe euvaneko ndika.
54 Okwa dhipaga oshimuna e te shi yamba omagandjelondjambo kondundu e ta hiya aantu ye kiikulya. Sho ya li, oya lala kondundu.
55 Laban okwa meneka ongula onene e ta laleke aatekulu ye noyana nethipo lyokomilungu nokwa shuna kaandjawo.
1 Jakob sho a tsikile ondjila ye, okwa tsakanekwa kaayengeli.
2 Sho e ya mono, okwa ti: “Ndika etangakwiita lyaKalunga,” onkee ehala ndyoka e li luku Mahanaim.
3 Jakob okwa tumu aatumwa, ye mu tetekele, ya ye komumwayina Esau moshilongo shaEdom.
4 Okwe ya kumagidha ya tye: “Ongame Jakob, omupiya gwoye, tandi ihokolola kumwene gwandje Esau kutya onda li nda kala puLaban sigo ongashingeyi.
5 Onda likola oongombe, uusino, oonzi, iikombo naapika. Mwene gwandje, otandi ku tumine elaka, u sile ndje ohenda.”
6 Aatumwa sho ya galukile kuJakob, oya ti: “Otwa yile komumwanyoko Esau, nokuli oku li mondjila te ya e ku tsakaneke, oku na aalumentu omathele gane.”
7 Jakob okwa haluka e ta kunkwa. Okwa topola aantu ye moongundu mbali, osho wo oonzi, iikombo, oongombe noongamelo dhe.
8 Okwa dhiladhila: “Esau nge ta dhenge ongundu yotango, onkwawo otayi vulu okuya ontuku.”
9 Jakob okwa galikana a ti: “Kalunga katatekulu Abraham, Kalunga katate Isak, uva ndje! Omuwa, ongoye wa lombwele ndje wa ti: ‘Shuna kevi lyaandjeni nokezimo lyeni, ongame notandi ku ningi nawa.’
10 Inandi opalela esilohenda lyoye nuudhiginini woye we u ulukile ndje, ngame omuntu gwoye. Onda tokolele Jordan ndi li iikaha yowala, eeno, ondhimbo ayike nda li ndi yi na, ihe nena onda galuka ndi na oongundu mbali.
11 Hupitha ndje miikaha yomumwameme Esau, oshoka ongame nda tila kutya ote ke tu homona e te tu hanagula po atuhe, nokuli aakulukadhi naanona.
12 Dhimbulukwa, nkene u uvaneke, u ninge ndje nawa e to pe ndje oluvalo olwindji talu nyenge okuyalulwa, lu thike pehekevi lyomooha dhefuta.”
13 Sho ya tokelwa hoka uusiku, Jakob okwa yoolola miimuna ye omagano ga ye komumwayina Esau:
14 iikombo iinzinzi omathele gaali niilumentu omilongo mbali, oonzi oonzinzi omathele gaali noondumentu omilongo mbali,
15 oongamelo oonyali omilongo ndatu nuunimona wadho, oongombe oonzinzi omilongo ne noontsezi omulongo, uusino uukiintu omilongo mbali nuulumentu omulongo.
16 Okwe yi topola miigunda niigunda e ta tula moshigunda kehe omuwiliki gwasho. Okwe ya lombwele a ti: “Tetekelelii ndje, nopokati koshigunda noshigunda napa kale oshinano melandulathano.”
17 Okwa lombwele omupiya gwotango a ti: “Omumwamene Esau nge te ku tsakaneke nota pula ta ti: ‘Mwene gwoye olye? Oto yi peni? Iimuna mbika oyalye to hingi?’
18 Yamukula u tye: ‘Oyomupiya gwoye Jakob e yi tumine mwene gwe Esau omagano. Jakob ye mwene oku li konima e tu landula.’ ”
19 Osho wo a lombwele omutiyali, omutitatu nokaawiliki ayehe yiigunda a ti: “Osho naanaa shoka mu na okulombwela Esau, nge tamu mu tsakaneke.
20 Omu na okutya: ‘Eeno, omupiya gwoye Jakob oku li komina e tu landula.’ ” Jakob okwi ipopile ta ti: “Otandi mu geulukitha nomulongelo, nonge tatu tsakanene, ngiika ota ka taamba ndje nombili.”
21 Okwa tumu omagano ge mu tetekelele ye e ta lala montanda.
22 Uusiku tuu mboka Jakob okwa penduka e ta kutha aakadhi yaali, aadhikekadhi ye yaali noyana aamati omulongo nagumwe e taa taaguluka omulonga Jabbok.
23 Sho e ya laleke, ya ka taaguluke, okwa taagulukitha wo omaliko ge agehe.
24 Jakob okwa kala konima oye awike. Nena omulumentu okwe ya e ta kondjo naye, sigo eluwa lya tende.
25 Omulumentu sho a dhimbulula kutya nani ite mu sindi molugodhi, okwa ngwamuna Jakob monto, oyo noya dhamuka.
26 Omulumentu okwa ti: “Etha ndje, ndi ye, eluwa otali tende.” Jakob okwa yamukula a ti: “Itandi ku etha, manga inoo yambeka ndje.”
27 Omulumentu okwe mu pula a ti: “Ongoye lye ano?” Oye okwa ti: “Ongame Jakob.”
28 Omulumentu okwa ti: “Edhina lyoye itali kala we Jakob. Sho wa kondjo naKalunga nonaantu nowa sindana, onkee edhina lyoye oIsrael.”
29 Jakob okwa ti: “Lombwela ndje edhina lyoye.” Ihe ye okwa yamukula a ti: “Omolwashike wa hala okutseya edhina lyandje?” Nena okwa yambeke Jakob.
30 Jakob okwa ti: “Onda tala Kalunga koshipala noshipala, ihe nando ongaaka, omwenyo gwandje ogwa hupithwa.” Ehala ndyoka okwe li luku Penuel.
31 Etango olya li tali piti, sho Jakob ta zi puPenuel, nokwa li ta tina omolwonto ye.
32 Sigo onena Aaisraeli ihaa li oothipa dhomonto, oshoka opo pehala mpoka omulumentu a dhengele Jakob.
1 Jakob okwa ligamene ko e ta mono Esau te ya naalumentu ye omathele gane, onkee a topolele Lea, Rakel naadhike ye yaali aanona.
2 Aadhike ye noyana okwe ya tula po tango, taku landula Lea noyana, nohugunina oRakel naJosef.
3 Jakob okwe ya tetekelele e ti inyongamene pevi luheyali, sho ta hedha kumumwayina.
4 Ihe Esau okwa matuka e mu tsakaneke, okwe mu papatele momaako ge e te mu thipi komilungu. Ayehe yaali oya lili.
5 Esau sho a lengalenga e ta mono aakulukadhi naanona, okwa pula a ti: “Oolye mbano u li nayo?” Jakob okwa yamukula a ti: “Oyo aanona mboka Kalunga e ya pe omuntu gwoye omagano.”
6 Nena aadhike oya hedha ko noyana e tayi inyongamene pevi.
7 Lea noyana oye ya, nohugunina oJosef naRakel ye ya e taa inyongamene pevi.
8 Esau okwa pula a ti: “Ongundu ndjiya nda tsakaneke, oyashike? Elalakano lyayo olyashike?” Jakob okwa yamukula a ti: “Oyoku ku geulukitha.”
9 Esau okwa ti: “Mumwameme, ondi na nale sha gwana; kala niinima yoye.”
10 Jakob okwa ti: “Aawe, ngele owa sila ndje ohenda, taamba omagano gandje. Ngame nge te tala oshipala shoye, onda fa nda tala oshipala shaKalunga, sho u na ombili nangame.
11 Kwatha ndje ngaa, u taambe omagano ngaka nde ge ku etele; Kalunga okwa sile ndje ohenda e ta pe ndje ayihe mbyoka nda pumbwa.” Jakob okwe mu thiminike, sigo e yi taamba.
12 Esau okwa ti: “Thikameni tu yeni, ngame otandi ku tetekelele.”
13 Jakob okwa yamukula e ta ti: “Ou shi shi kutya aanona aankundi. Ondi na wo oonzi noongombe oonyali nuunzona nuutana. Ngele otadhi ulumikwa nando esiku limwe, oshigunda ashihe otashi si.
14 Kwatha ndje, u tetekelele ndje, otandi isisidha tandi ku landula, te hingi iimuna tse naanona sigo tandi ku adha kuEdom.”
15 Esau okwa ti: “Onda hala ndi ku thigile po aantu yandje yamwe.” Jakob okwa yamukula a ti: “Kandi na ompumbwe yasha we, onda li owala nda hala, u sile ndje ohenda.”
16 Esiku ndyoka Esau okwa tetekele a shuna kuEdom.
17 Ihe Jakob okwa yi kuSukkot, nkoka a dhike egumbo lye niigunda yiimuna ye, onkee ehala lya lukwa Sukkot.
18 Mokugaluka kwe kuMesopotamia Jakob okwa thiki nawa kuShekem mevi lyaKaanan e ta yungu ontanda ye melundu, popepi noshilando.
19 Elundu ndyoka okwe li landa koluvalo lwaHamor, he yaShekem, iimaliwa iisiliveli ethele.
20 Okwa dhikile ko oshiyambelo e te shi lukile El, Kalunga kaIsrael.
1 Esiku limwe omukadhona Dina yaJakob naLea okwa ka talela po aakadhona yomoshilando shAakaanan.
2 Shekem, omuna gwomunashikandjo Hamor Omuhevi, sho e mu ti tuu keho, okwe mu kwata koonkondo e ta lala naye nokwe mu mitike.
3 Ihe okwa pwile mohole naDina yaJakob e ta kala te mu ikumbu.
4 Shekem okwa lombwele he Hamor a ti: “Omukadhona nguka onde mu hala, a ninge mukadhandje.”
5 Jakob okwa koneke kutya omwana Dina okwa mitikwa, ihe oyanamati sho ya li kuusita wiimuna ye kohambo, ina ninga sha, sigo ya galuka.
6 Hamor, he yaShekem, okwa yi ya ka kundathane naJakob
7 pethimbo mpoka aana yaJakob ya zi kohambo. Sho ye shi uvu, oya li ya haluka noya geele Shekem, sho a ningi esithahoni muIsrael nokwa mitike omuna gwaJakob. Osho oshinima ihaashi ningwa.
8 Hamor okwa ti kuye: “Omumwandje Shekem oku hole omumwoye omukadhona, tu kwatheni, e mu hokane po.
9 Natu hanganeni, opo tu hokanathaneni tse nane.
10 Nena otamu vulu okukala mokati ketu moshilongo; otamu kala shaa mpoka mwa hala, omwa manguluka okushingitha nokulikola eliko.”
11 Nena Shekem okwa lombwele he yaDina naamwayina ta ti: “Silii ndje ohenda, otandi ke mu pa ashihe shoka mwa hala.
12 Lombwelii ndje iigonda mbyoka mwa hala ne mu yele pombanda eyambo lyomongalo, ngaashi mwa hala. Otandi mu pe shoka tamu pula, ngele tamu zimine, ndi mu hokane po.”
13 Molwashoka Shekem a yono po omumwayina Dina, aana yaJakob oya yamukula Shekem nahe Hamor nomakengelelo.
14 Oya ti kuye: “Itatu vulu okuzimina, omumwameme a hokanwe komulumentu inaa pita etanda; otashi tu sitha ohoni.
15 Otatu zimine ashike, ngele otamu kala mwe tu fa mwa pita etanda ne aalumentu amuhe.
16 Nena otatu zimine, tu hokanathaneni. Otatu kala mokati keni e tatu ningi yamwe yomune.
17 Ihe ngele itamu taamba edhiladhilo lyetu, mu pite etanda, otatu mu kutha omumwameme e tatu yi.”
18 Edhiladhilo ndika olyo opalele Hamor nomwana Shekem,
19 nomugundjuka ina kwatakwata we, oshoka okwa li e hole omukadhona omuna gwaJakob. Okwa li omunenentu mezimo lyawo alihe.
20 Hamor nomwana Shekem oya yi kehala lyoshigongi posheelo shoshilando e ta lombwele ooyakwawo taa ti:
21 “Aalumentu mbaka aanambili, ya pitikeni, ya kale moshilongo pamwe natse yo ye ende shaa mpoka. Evi olye ya gwanena wo. Natu hokane oyana, tse tu ya pe wo yetu, ye ya hokane.
22 Ihe aalumentu mbaka otaa zimine, ya kale mokati ketu yo ya ninge yamwe natse ashike, ngele aalumentu ayehe otaa piti etanda, ngaashi yo ya pita etanda.
23 Omaliko gawo, iimuna yawo niinima yawo ayihe, itayi ka ninga yetu? Natu zimineni, opo ya kale putse.”
24 Aantu ayehe yomoshilando oya zimine shoka Hamor naShekem ya ti, aalumentu ayehe noya piti etanda.
25 Sho pwa piti omasiku gatatu, manga aalumentu ya li ye na iilalo yetanda, aana yaJakob yaali, Simeon naLevi, aamwayina yaDina, oya kutha omagongamwele gawo e taa yi moshilando, manga inaashi fekela sha, e taa dhipaga aalumentu ayehe.
26 Oya dhipaga wo Hamor nomwana Shekem. Oya kutha mo Dina maandjaShekem e taa yi.
27 Konima yedhipago aana yaJakob yalwe oya yugu oshilando e taye ya galulile ondjahi molwokuyona omumwayina.
28 Oya kutha po iigunda yiimuna, oonzi niikombo, oongombe nuusino noshaa shoka sha li moshilando nokomalundu.
29 Oya kutha iinima ayihe yi na ondilo, oya kwata po aakiintu ayehe naanona e taa hakana po shaa shoka sha li momagumbo.
30 Jakob okwa lombwele Simeon naLevi a ti: “Omwa etele ndje uudhigu; ngashingeyi Aakaanana nAaperesi noshaa ngoka moshilongo ota tondo ndje. Kandi na aantu oyendji; ngele ayehe taa hangene ndje ya ponokele ndje, ezimo lyetu alihe otali ka hanagulwa po.”
31 Oya yamukula ya ti: “Inatu hala, omumwameme ta ningwa ngaaka a fa ohonda.”
1 Kalunga okwa lombwele Jakob a ti: “Inda kuBetel, u kale ko. Tungila ndje ko oshiyambelo, Kalunga ngoka nde ku ihololele, sho wa li to yi ontuku omumwanyoko Esau.”
2 Jakob okwa lombwele egumbo lye alihe naayehe mboka ya li puye ta ti: “Thigii po iikalunga ayihe iikwiilongo mbyoka mu na, iyapuleni ne mu zale oonguwo dha yela.
3 Otatu tembukeni po mpaka, tu ye kuBetel, nkoka tandi ka tungila Kalunga oshiyambelo, Kalunga ngoka a kwatha ndje methimbo lyuudhigu wandje naangoka a kala pungame shaa mpoka nda yile.”
4 Oyo noya gandja kuJakob iikalunga yawo ayihe mbyoka ya li ye yi na nosho wo uutenda womomakutsi mboka ya li ya zala. Oye nokwe u fumvike momwandi popepi naShekem.
5 Jakob noyana sho ya zi po, etilo enene olya kwata aantu yomiilando yopopepi, yo inaye ya landula.
6 Jakob okwe ya naantu ye ayehe puLus, ngashingeyi oBetel, mevi lyaKaanan.
7 Okwa tungu oshiyambelo e ta luku ehala Kalunga kaBetel, oshoka Kalunga okwe mu ihololele hoka, sho a li ta yi mumwayina ondapo.
8 Omuyamuthi gwaRebekka, Debora okwa si nokwa fumvikwa momwandi kuumbugantu waBetel. Onkee gwi ithanwa “Omwandi gwokulila oosa.”
9 Jakob sho a galuka kuMesopotamia, Kalunga okwe mu ihololele ishewe e te mu yambeke.
10 Kalunga okwa ti kuye: “Edhina lyoye oJakob, ihe okuza konena otali ningi Israel.” Osho ngaaka Kalunga e mu luku Israel.
11 Kalunga okwa ti kuye: “Ongame Kalunga Omunankondoawike. Kala u na oluvalo olwindji. Iigwana nayi ze moluvalo lwoye, oto ka ninga hekulu yaakwaniilwa.
12 Otandi ku pe evi ndyoka nda pele Abraham naIsak, notandi li pe oluvalo lwoye talu ku landula.”
13 Nena Kalunga okwe mu thigi po a yi.
14 Peha mpoka Kalunga e mu popitha, Jakob okwa dhike po endhindhilikomanya e te li yapula noku li tila omaviinu nomagadhi gooholivi.
15 Ehala okwe li luku Betel.
16 Jakob naantu ye oya tembuka po puBetel, nomanga ya li natango oshinano shimwe okuza kuEfrata, ethimbo olya thikana, Rakel a vale okanona; okwa li e na oshitheta oshilulu.
17 Oshitheta sho sha li tashi lundalala mokuvala, omuvalithi okwa ti kuye: “Rakel, ino tila, owa eta ko omumati ishewe.”
18 Ihe okwa li nokuli pokusa, nopethimbo ta fudha mo omufudho gwe gwahugunina, okwa luku omwana Benoni, ihe he okwe mu luku Benjamin.
19 Rakel sho a si, okwa fumvikwa pondjila yu uka kuEfrata, ngashingeyi oBetlehem.
20 Jakob okwa dhike po endhindhilikomanya pombila ye; olyo endhindhiliko lyombila yaRakel sigo onena.
21 Jakob okwa humu ko e ta ka yunga ontanda peha lilwe handiyaka yaEder.
22 Jakob manga a li moshilongo shika, Reuben okwa lala naBilha, omudhike gwahe. Jakob okwe shi uvu nokwa li a thita po kondjahi. Jakob okwa li e na oyana aamati omulongo nayaali.
23 Aana yaLea oyo Reuben (osheeli shaJakob), Simeon, Levi, Juda, Issaskar naSebulon.
24 Aana yaRakel oyo Josef naBenjamin.
25 Aana yaBilha, omupika gwaRakel, oyo Dan naNaftali.
26 Aana yaSilpa, omupika gwaLea, oyo Gad naAser. Aanona mbaka oya valelwa muMesopotamia.
27 Jakob okwa yi kuhe Isak kuMamre, popepi naHebron, nkoka Abraham naIsak ya li ya kala.
28 Isak okwa li e na omwenyo omimvo ethele nomilongo hetatu.
29 Oye okwa si muukulupe uunene nokwa li a kuta omwenyo, sho a gongelwa poohekulu. Oyana Esau naJakob oye mu fumvike.
1 Nduka olwo oluvalo lwaEsau, haku tiwa Edom.
2 Esau okwa hokana aakulukadhi Aakaanana: Ada yaElon Omuheti, Oholibama yaAna yaZibon Omuhevi
3 naBasemat yaIsmael, omumwayina gwaNebaiot.
4 Ada okwa vala Elifas; Basemat okwa vala Reuel;
5 naOholibama okwa vala Jeush, Jalam naKora. Aanona mbaka ayehe oya valelwa Esau muKaanan.
6 Esau okwa kutha aakadhi, oyana aamati naakadhona naantu ye ayehe pamwe niinima ye ayihe nomaliko ge agehe a likola muKaanan e ta zi po pomumwayina Jakob e ta tembukile kevi lilwe.
7 Okwa zi po, oshoka evi moka ya kala yo naJakob, inaa gwana mo we. Oya li ye na iimuna oyindji, noinaa vula we okukala pamwe.
8 Esau okwa kala moshilongo shokoondundu dhaEdom.
9 Nduka olwo oluvalo lwaEsau, hekulu yAaedom.
10 Omukulukadhi gwaEsau Ada okwe mu valele omumati edhina lye Elifas. Elifas okwa li e na oyana aamati yatano: Teman, Omar, Zefo, Gatam naKenas. Timna okwa li omudhike gwaElifas yaEsau, oye nokwa valele Elifas Amalek. Omukulukadhi gwaEsau Basemat okwe mu valele omumati Reuel, naReuel okwa li e na oyanamati yane. Oyo Nahat, Sera, Shamma naMissa.
11
12
13
14 Omukulukadhi gwaEsau Oholibama yaAna yaZibon okwe mu valele aamati yatatu: Jeush, Jalam naKora.
15 Ngaka ogo omazimo goluvalo lwaEsau. Elifas, osheeli shaEsau, okwa li hekulu yomazimo ngaka taga landula mpa: lyaTeman, lyaOmar, lyaZefo, lyaKenas,
16 lyaKora, lyaGatam nolyaAmalek. Nduka olwo oluvalo lwomukulukadhi gwaEsau Ada.
17 Reuel yaEsau okwa li hekulu yomazimo ngaka taga landula mpa: lyaNahat, lyaSera, lyaShamma nolyaMissa. Nduka oluvalo lwomukulukadhi gwaEsau Basemat.
18 MuOholibama yaAna, omukulukadhi gwaEsau, omwa zi omazimo lyaJeush, lyaJalam nolyaKora.
19 Omazimo ngaka agehe ogo oluvalo lwaEsau.
20 Aakali yomuEdom aakulukulu oya topolwa momazimo ngoka ga za koyanamati mbaka yaSeir Omuhori: Lotan, Shobal, Zibon, Ana, Dishon, Ezer naDishan.
21
22 Lotan ohekulu yomaludhi gaHori naHeman. (Lotan namumwayina Timna.)
23 Shobal ohekulu yomaludhi gaAlvan, Manahat, Ebal, Shefo naOnam.
24 Zibon okwa li e na oyanamati yaali, Aja naAna. (Ana nguka oye ngoka i itsile oothithiya dhomeya omapyu mombuga, sho a li ta litha uusino wahe.)
25 Ana ohe yaDishon, ngoka a li hekulu yomaludhi gaHemdan, Eshban, Itran naKeran. Ana okwa li e na omwana omukadhona Oholibama.
26
27 Ezer ohekulu yomaludhi gaBilhan, Saavan naAkan.
28 Dishan ohekulu yomaludhi gaUz naAran.
29 Mbaka oyo aaniikandjo yomazimo gAahori mevi lyaEdom: Lotan, Shobal, Zibon, Ana, Dishon, Ezer naDishan.
30
31 Aakwaniilwa mboka ya lele Edom ya landulathana muuyuni mbwiyaka, manga muIsrael kaamwa li omukwaniilwa, oyo: Bela yaBeor gwomuDinhaba Jobab yaSera gwomuBozra Husham gwokoshikandjo Teman Hadad yaBedad gwomuAvit (okwa sindi Aamidiana molugodhi moshilongo Moab). Samla gwomuMasreka Shaul gwomuRehobot shopomulonga (Eufrat) Baal-Hanan yaAkbor Hadar gwomuPau (omukadhi oMehetabel yaMatred, omutekulu gwaMe-Sahab).
32
33
34
35
36
37
38
39
40 Esau oye hekulu yaaniikandjo mbaka muEdom: Timna, Alva, Jetet, Oholibama, Ela, Pinon, Kenas, Teman, Mibzar, Magdiel naIram. Oshikandjo shoka sha li sha kalwa koludhi kehe, osha tseyika nedhina lyoludhi ndoka.
1 Jakob okwa kala natango muKaanan, moka mwa kala wo he,
2 nehokololo lyegumbo lyaJakob olyo ndika. Josef, omugundjuka gwomimvo omulongo naheyali, okwa li ha litha oonzi niikombo pamwe naamwahe, aana yaBilha naSilpa, aadhike yahe. Okwa li ha lombola ko aamwahe kuhe, nge ya ningi sha oshiwinayi.
3 Jakob okwa li e hole Josef e vule oyana ayehe, oshoka Josef okwe mu valelwa muukulupe. Okwe mu tungile ohema onde yi na omaako omale.
4 Aamwahe sho ya mono kutya he oku hole Josef e ya vule, oye mu tondo yo inaa popya we naye oohapu dhombili.
5 Esiku limwe Josef okwa lala ondjodhi. Sho e yi hokololele aamwahe, oye mu tondo noku mu tondelela.
6 Okwa ti kuyo: “Pulakeneni ondjodhi ndjoka nda yaguma.
7 Otwa lyeni mepya atuhe tatu mangeni iihampi yiilya. Oshihampi shandje osha thikama po e tashi kala shu ukilila. Iihampi yeni oye shi gongalele e tayi inyongamene kusho.”
8 Aamwahe oya pula ya ti: “Oto dhiladhila, to ka ninga omukwaniilwa u tu pangele?” Oyo noye mu tondele oondjodhi dhe noohapu dhe shi vule shito.
9 Josef okwa lalulula ondjodhi ishewe e te yi hokololele aamwahe ta ti: “Onda lalulula ondjodhi ndi wete etango, omwedhi noonyothi omulongo nayimwe tayi inyongamene kungame.”
10 Okwa hokololele wo he ondjodhi, nahe okwe mu ganda ta ti: “Oondjodhi ndono odha tya ngiini? Oto dhiladhila ano, nyoko, aamwaho nangame tatu ya e tatu ku inyongamene?”
11 Aamwahe yaJosef oye mu sile efupa, ihe he okwa pungula oshinima shika momwenyo gwe noku shi dhiladhila.
12 Esiku limwe, manga aamwahe yaJosef ya li kohambo kuShekem kiimuna yahe,
13 Jakob okwa lombwele Josef ta ti: “Onda hala ndi ku tume kuShekem, nkoka ku na aamwaho taa litha iimuna.” Josef okwa yamukula a ti: “Otandi yi.”
14 He okwa ti: “Inda ko, u ka tale, ngele aamwaho oye li nawa, niimuna ngele oyi li nawa; ngoye u galuke u ye u lombwele ndje.” Osho ngaaka he e mu tumu okuza kolusilu lwaHebron. Josef okwe ya kuShekem
15 nosho a li te ende ta alaala nomalundu, okwi itsu omulumentu gumwe. Omulumentu okwe mu pula ta ti: “Oto kongo shike?”
16 Josef okwa yamukula a ti: “Otandi kongo aamwatate taa litha iimuna yawo. Oto vulu u lombwele ndje mpoka ye li?”
17 Omulumentu okwa yamukula ta ti: “Oya tembuka po nale mpaka. Ondu uvile taa ti, otaa yi kuDotan.” Josef okwa landula aamwahe e te ya adha kuDotan.
18 Sho ye mu mono e li kokule, manga inaa thika kuyo, oye mu uvanene monanguwi, ye mu dhipage.
19 Oya lombwelathana ya ti: “Omumentu gwoondjodhi oye ngwiyaka te ya.
20 Ileni tu mu dhipageni tse tu umbile omudhimba gwe momuthima gwa pwina e tatu ti, oshilikama she mu lya po. Nena otatu tala, ngele oondjodhi dhe otadhi tsu.”
21 Reuben okwe ya uvu nokwa kambadhala okuhupitha Josef e ta ti: “Inatu mu dhipageni.
22 Natu mu umbileni ashike momuthima ngwiyaka gwomombuga, ihe inatu mu monitha oshiponga.” Okwa popi ngaaka, oshoka a li a dhiladhila oku mu hupitha miikaha yawo, ye e mu tume kuhe.
23 Josef sho a thiki kaamwahe oye mu hula ohema ye onde yi na omaako omale.
24 Nena oye mu kutha po e taye mu umbile momuthima gwa pwina.
25 Manga ya kuutumba ya lye, ohaluka oya mono osheendo shAaismaeli taa zi kuGilead yu uka kuEgipiti. Oongamelo dhawo odha li dha humbata iizimba nomaka ga nika nawa gomaludhi gi ili nogi ili.
26 Juda okwa ti kaamwahe: “Otatu likola shike, nge tatu dhipaga omumwatate e tatu holeke ombinzi ye?
27 Natu mu landithii po kAaismaeli. Nena itatu iyetele nando oshiponga; nokuli oye omukwetu, onyama yetu nombinzi yetu.” Aamwahe oya zimine,
28 nosho aahalithi Aamidiana ya thiki puyo, oya hili mo Josef momuthima e taye mu landa po iimaliwa iisiliveli omilongo mbali kAaismaeli, mboka ye mu fala kuEgipiti.
29 Reuben sho a yi komuthima noina adha ko Josef, okwa tuula oonguwo dhe moluhodhi.
30 Okwe ya kaamwahe e ta ti: “Omunona ke mo! Otandi ningi ngiini?”
31 Oya dhipaga oshikombo e taa yaya onguwo yaJosef mombinzi yasho.
32 Oya kutha onguwo ye e taye yi tumu kuhe taa ti: “Otwe yi toola. Yi tala nawa, ngele oyomumwoye nenge aawe.”
33 He okwe yi dhimbulula e ta ti: “Eeno shili, onguwo oyomumwandje ndji! Oshilikama she mu lya po! Josef a lika, a tuulagulwa po!”
34 Jakob okwa tuula oonguwo dhe moluhodhi. Okwa lili omwana ethimbo ele.
35 Oyana aamati ayehe naakadhona oye ya oku mu hupulutha, ihe okwa tindi okutalalekwa e ta ti: “Aawe, otii ka kulukila muusi komumwandje tandi mu lili.” Osho ngaa a tsikile okulila omwana.
36 Aamidiana oye mu landitha po naPotifar, elenga lyomukwaniilwa gwaEgipiti, omukuluntu gwaalangeli yuuwa.
1 Pethimbo ndyoka Juda okwa tembuka paamwahe nokwa ka kala pamwe nomulumentu, edhina lye Hira, gwokoshilando Adullam.
2 Oko nkoka i itsu omukadhona gwaShua, omulumentu Omukaanani. Okwe mu hokana,
3 e te mu valele omumati e te mu luku Er.
4 Okwa ningi ishewe omusimba e ta vala omumati nokwe mu luku Onan.
5 Okwa vala ishewe omumati e te mu luku Shela. Omumati nguka sho a valwa, Juda okwa li muKesib.
6 Juda okwa kongele osheeli she Er omukiintu edhina lye Tamar.
7 Er okwa li inaa opalela Omuwa, nomolwashoka Omuwa okwe mu etha a se.
8 Juda okwa lombwele omumwayina gwaEr Onan a ti: “Inda, u ka lale nomuselekadhi gwomumwanyoko. Gwanitha oshilonga shoye, opo omumwanyoko a kale e na oluvalo.”
9 Ihe okwa li e shi shi kutya uunona kau shi we, onkee shaa tuu a lala nomuselekadhi gwomumwayina, omasita goluvalo okwe ga sitamene pevi, opo kaaha valele omumwayina oluvalo.
10 Shika osha geyitha Omuwa e te mu dhipaga po ishewe.
11 Nena Juda okwa ti koshitenya she Tamar: “Shuna kaandjaho, u kale omuselekadhi, sigo omumwandje Shela ta koko.” Okwa popi ngaaka, oshoka a tila, pamwe Shela naye wo ota ka dhipagwa, ngaashi aamwayina ya ningwa. Tamar okwa shuna kaandjawo.
12 Konima yethimbo ele omukulukadhi gwaJuda, omuna gwaShua, okwa si. Oosa sho dha halakana, Juda nakuume ke Hira gwomuAdullam oya yi kuTimna, a ka kululithe oonzi dhe.
13 Yamwe oya lombwele Tamar kutya hemweno ota yi kuTimna, a ka kululithe oonzi dhe.
14 Tamar okwa hula mo oonguwo dhuuselekadhi e ta siikile oshipala she newiiwili e ta ka kuutumba posheelo shaEnaim, oshilando shi li pondjila yokuya kuTimna. Okwa li a tseya kutya onkelo yaJuda Shela oya koka, ihe ine mu pewa, e mu hokane po natango.
15 Juda sho e mu mono, okwa li e shi ohonda, oshoka okwa siikila oshipala she.
16 Okwa kanduka mondjila, a yi kuye e ta ti: “Ila, tu lale.” (Ine mu dhimbulula kutya oye oshitenya she.) Tamar okwa ti: “Oto futu ndje shike?”
17 Juda okwa yamukula a ti: “Otandi ke ku tumina okakombwena komoshigunda shandje.” Tamar okwa ti: “Eewa, ihe ongele to pe ndje ombambyona yi kale po, sigo wa tumu oshikombo.”
18 Juda okwa pula a ti: “Ombambyona oyashike?” Tamar okwa yamukula a ti: “Okalinga koshihako shoye nongodhi yako nondhimbo ndjoka u na moshikaha shoye.” Okwe yi mu pe. Nena okwa lala naye e ta ningi ela.
19 Tamar okwa shuna kaandjawo e ti isuukulula ewiiwili nokwa zala oonguwo dhe dhuuselekadhi.
20 Juda okwa tumu kuume ke Hira, a fale oshikombo ye a etelele iinima yombambyona, ihe Hira ina mona Tamar.
21 Okwa pula aantu yopuEnaim ta ti: “Ohonda ndjiyaka ya li pondjila mpano, oyi li peni?” Aantu oya yamukula ya ti: “Kapwa li ohonda yasha mpaka.”
22 Hira okwa shuna kuJuda e ta ti: “Inandi mu mona ko. Aantu otaa ti kutya kakwa li nando ohonda hwiyaka.”
23 Juda okwa ti: “Iinima mbyoka ne yi pungule. Inatu hala, aantu ye tu yole. Onda kambadhala oku mu futa, ihe ino mu mona ko.”
24 Sho pwa piti oomwedhi ndatu, Juda okwa lombwelwa taku tiwa: “Oshitenya shoye Tamar a pundukile moluhondelo noku na ela.” Juda okwa gandja elaka tali ti: “Mu pitithii mo, mu ke mu fike po a se.”
25 Sho a li ta pitithwa mo, okwa tumu elaka kuhemweno tali ti: “Epunda onde li pewa kumwene gwiinima mbika. Yi tala nawa, ngoye u mone kutya oyalye-okalinga koshihako nongodhi yako nondhimbo.”
26 Juda okwe yi dhimbulula e ta ti: “Oku li mondjila, ngame inandi mu gwanithila oshinakugwanithwa shandje, oshoka inandi mu pa omumwandje Shela, e mu hokane po.” Okuza mpoka Juda ina lala we naye.
27 Ethimbo lye lyokuvala sho lya thikana, osha holoka kutya ota ka vala epaha.
28 Manga a li ta thetwa, gumwe gwaakwanambwiyu okwa pititha mo okwaako; omuvalithi okwe ku kwata e te ku manga okangodhi okatiligane e ta ti: “Nguka osheeli.”
29 Ihe okwa shunitha mo okwaako kwe, omumwayina oye a valwa tango. Nena omuvalithi okwa ti: “Owa gwaya mo ngiini,” e te mu luku Perez.
30 Nena omumwayina okwa valwa e na ongodhi ontiligane poshikesho e te mu luku Sera.
1 Aaismaeli oya fala Josef kuEgipiti e taye mu landa po naPotifar, elenga lyomukwaniilwa, omukuluntu gwaalangeli yuuwa.
2 Omuwa okwa li pamwe naJosef nokwe mu pe elago ewanawa. Okwa kala megumbo lyamwene gwe Omuegipiti,
3 ngoka a mono kutya Omuwa okwa pe Josef elago ewanawa mwaayihe te yi ningi.
4 Potifar okwa li e mu hokwa e te mu ningi elenga lye lyomekolo; osho ngaaka a tula egumbo lye niinima ye ayihe metonatelo lye.
5 Okuza mpoka Omuwa okwa yambeke egumbo lyOmuegipiti omolwaJosef, osho wo ayihe e yi na megumbo nenge komalundu.
6 Potifar okwa gandja ayihe a li e yi na miikaha yaJosef nokwa li kee na we oshimpwiyu shasha, shila okulya akuke. Josef okwa li omwaanawa a shitika,
7 nokonima yethimbo omukulukadhi gwaPotifar okwa haluka Josef e te mu lombwele ta ti: “Tu lale.”
8 Josef okwa tindi e ta ti: “Tala ko, mwene gwandje ke na oshimpwiyu shasha megumbo muka, oshoka omo ndi li. Okwa ningi ndje omutonateli gwaayihe e yi na.
9 Megumbo muka ondi na mo oonkondo dhi thike pudhe, noina keelela ndje sha shilwe, kakele koye. Ondi longe ngiini uuwinayi u thike mpono, ndi yone kuKalunga?”
10 Nando omukulukadhi a kala ta pula Josef esiku nesiku, Josef ina zimina a lale naye.
11 Ihe esiku limwe Josef sho a yi megumbo, a longe iilonga ye, megumbo kamwa li nando omupiya gumwe.
12 Omukulukadhi okwe mu kwata konguwo ye e ta ti: “Tu lale.” Ihe Josef okwa thigi onguwo ye miikaha ye e ta yi ondapo pondje.
13 Omukulukadhi sho a mono kutya Josef a thigi po onguwo ye e ta yi ondapo pondje,
14 Okwi igidha aapiya ye yomegumbo e ta ti: “Taleni ko nduno! Okahebeli haka ke etwa komusamane gwandje maandjetu, otake tu sitha ohoni. Oke ya mondjugo yandje noka kambadhala okulala nangame, ihe onda kugu onkugo mokule.
15 Sho nda kugu onkugo, oka yi ontuku pondje, ka thigi po onguwo yako pungame.”
16 Omukulukadhi okwa pungula onguwo puye, sigo mwene gwaJosef e ya kegumbo.
17 Okwe mu hokololele wo e ta ti: “Omupika ngoka Omuhebeli we eta huka, okwe ya kungame, a sithe ndje ohoni.
18 Ihe sho nda kugu onkugo, okwa yi ontuku pondje, a thigi po onguwo ye pungame.”
19 Mwene gwaJosef sho u uvu ehokololo lyomukulukadhi gwe ta ti: “Osho omupika gwoye a ningi ndje,” okwa geye noonkondo
20 e ta kwata Josef e te mu tula mondjedhililo moka mu na oonkwatwa dhomukwaniilwa, nomo a kala e edhililwa moka.
21 Ihe Omuwa okwa li naJosef e te mu yambeke, onkee omukuluntu gwondjedhililo okwe mu hokwa.
22 Okwa langeke Josef, a ninge omutonateli gwoonkwatwa adhihe e te mu inekelele iinima ayihe mondjedhililo.
23 Omukuluntu gwondjedhililo ka li we e na oshimpwiyu shasha, oshoka ayihe oya li miikaha yaJosef, nOmuwa okwe mu pe elago ewanawa mwaayihe e yi longo.
1 Konima yethimbo omupindi gwomaviinu gomukwaniilwa gwaEgipiti nomuteleki omukuluntu gwiikwiila oya yono komukwaniilwa.
2 Okwa geele omalenga ngaka agehe gaali
3 e te ga tula mondjedhililo megumbo lyomukuluntu gwaalangeli, moka mwa li Josef.
4 Oya kala ethimbo ele mondjedhililo, nomukuluntu gwondjedhililo okwa gandja Josef, a ninge omuyakuli gwawo.
5 Uusiku umwe mondjedhililo, omupindi gwomaviinu nomuteleki gwiikwiila oya lala oondjodhi. Odha li dhi ili, inadhi faathana.
6 Josef sho e ya kuyo ongula, okwa mono kutya oya sa oluhodhi.
7 Okwe ya pula a ti: “Omolwashike mwa nika uuthigwa nena?”
8 Oya yamukulwa ya ti: “Otwa lala oondjodhi, nokape na ngoka te dhi tu fatululile.” Josef okwa ti: “Kalunga oye ta gandja owino wokufatulula oondjodhi. Hokololelii ndje oondjodhi dheni.”
9 Omupindi gwomaviinu okwa ti: “Mondjodhi yandje onda mono omuviinu gu li komeho gandje.
10 Omuviinu nguka ogwa li gu na iitayi itatu. Sho tuu omafo ga tameke okumbunyuka, oongala odha holoka wo, nomandjembele oga tiligana.
11 Onda li ndi na oshitenga shomukwaniilwa meke. Onda kutha omandjembele e tii ga kolele moshitenga e tandi mu pe.”
12 Josef okwa ti: “Otayi ti: iitayi itatu oyo omasiku gatatu.
13 Konima yomasiku gatatu omukwaniilwa ote ku mangulula e te ku shuna muulenga woye. Oto ke mu pa oshitenga she, ngaashi wa li ho shi mu pe, sho wa li omupindi gwomaviinu.
14 Ihe dhimbulukwa ndje, ngele ayihe tayi ku endele nawa. Sila ndje ohenda, u popile ndje komukwaniilwa, a kuthe ndje mondjedhililo muka.
15 Oshoka ngame onda yakwa kevi lyAahebeli, naampaka wo inandi ilongela okutulwa mondjedhililo muka.”
16 Omuteleki omukuluntu gwiikwiila sho u uvu efatululo ewanawa lyondjodhi yomupindi gwomaviinu, okwa ti kuJosef: “Ngame wo onda yaguma nda humbata oontungwa ndatu dhiikwiila komutse gwandje.
17 Montungwa yokombanda omwa li mu na iikwiila yi ili noyi ili yokuliwa komukwaniilwa, ihe oondhila odhe yi shomona mo.”
18 Josef okwa yamukula a ti: “Otayi ti: oontungwa ndatu odho omasiku gatatu.
19 Konima yomasiku gatatu omukwaniilwa ote ku mangulula — e ta tetitha ko omutse gwoye. Olutu lwoye ote lu tula kohake, noondhila otadhi li onyama yoye.”
20 Omasiku gatatu sho ga piti po, omukwaniilwa okwa hangele omalenga ge agehe oshituthi shesiku lyokuvalwa kwe; okwa mangulula omupindi gwomaviinu nomuteleki omukuluntu gwiikwiila e te ya eta komeho gomalenga.
21 Okwa shunine omupindi gwomaviinu muulenga we,
22 ihe okwa dhipagitha omuteleki omukuluntu gwiikwiila. Ayihe oya ningwa, ngaashi Josef a ti.
23 Ihe omupindi gwomaviinu ina dhimbulukwa Josef; okwe mu dhimbwa thilu.
1 Sho pwa piti omimvo mbali, omukwaniilwa gwaEgipiti okwa lala ondjodhi a thikama pomulonga Niili.
2 Oonzinzi heyali dho ondoka odha anduka momulonga nodha napa omwiidhi.
3 Nena omwa anduka ishewe oonzinzi oonkwawo heyali oonshona nodha nanga. Odhe ya e tadhi thikama poonzinzi oonkwawo pomunkulo gwomulonga,
4 noonzinzi dha nanga odha li po ndhoka dho ondoka. Nena omukwaniilwa okwa papudhuka.
5 Okwa kothulula ishewe e ta lala ondjodhi onkwawo. Oonyapi heyali dha mena moshihenguti shimwe dha vala nawa.
6 Mudho omwa tsapuka oonyapi oonkwawo heyali. Odha li oonshona nodha thetekwa kombepo yokuuzilo.
7 Oonyapi dha theta odha nina po ndhoka dha vala nawa. Omukwaniilwa okwa papudhuka e ta dhimbulula kutya nani okwa lala oondjodhi.
8 Ongula sho kwa shi, okwa li u uvite nayi. Okwi ithana oompulile noonkulungu dhomuEgipiti. Okwe dhi hokololele oondjodhi dhe, ihe inadhi vula oku dhi mu fatululila.
9 Omupindi gwomaviinu okwa lombwele omukwaniilwa a ti: “Ngashingeyi otandi dhimbulukwa kutya onda yona.
10 Owa li wa geela ndje tse nomuteleki omukuluntu gwiikwiila e to tu tula mondjedhililo megumbo lyomulangeli omukuluntu.
11 Uusiku umwe otwa lala oondjodhi dhi ili nodhi ili.
12 Omumati Omuhebeli okwa li putse, omupika gwomulangeli gwondjedhililo. Otwe mu hokololele oondjodhi dhetu, e te dhi tu fatululile.
13 Iinima oya ningwa, ngaashi a tile; owa shuna ndje muulenga wandje, ihe owa dhipaga omuteleki gwiikwiila.”
14 Omukwaniilwa okwa tumu Josef e ki ithanwe. Oye mu pititha mo mbala mondjedhililo. Okwi ikululitha e ta zala nawa e te ya komukwaniilwa.
15 Omukwaniilwa okwa ti kuye: “Onda lala ondjodhi, nokape na ngoka ta vulu oku yi fatulula. Onda hokololelwa kutya ngoye oho fatulula oondjodhi.”
16 Josef okwa yamukula a ti: “Ngame itandi vulu, Nkeyama, ihe Kalunga ota pe omukwaniilwa eyamukulo lyo opala.”
17 Omukwaniilwa okwa ti: “Onda lala ondjodhi nda li nda thikama pomunkulo gwomulonga Niili,
18 oonzinzi heyali dho ondoka nodho opala dha anduka momulonga e tadhi napa omwiidhi.
19 Nena momulonga omwa anduka oonzinzi oonkwawo heyali oombwinayi dha nanga nodha nama. Inandi mona nale muEgipiti alihe oongombe oombwinayi dha fa ndhoka.
20 Ndhika odha li po oongombe ndhoka dhotango dho opala,
21 ihe kapwa li ngoka e shi ndhindhilike, oshoka odha li natango oombwinayi dha fa shito. Opo mpoka onda papudhuka.
22 Onda lala ondjodhi ishewe. Ondi wete oonyapi heyali dho opala nodha vala nawa dha tsapuka moshihenguti shimwe.
23 Konima opwa tsapuka oonyapi heyali dha theta noonshona.
24 Ndhoka dha theta odha nina po ndhoka dha vala nawa. Oondjodhi onde dhi hokololele oompulile, ihe kape na nando oyimwe ya vulu oku dhi fatululila ndje.”
25 Josef okwa ti komukwaniilwa: “Oondjodhi adhihe mbali otadhi popi oshinima shimwe; Kalunga ote ku lombwele shoka ta ka ninga.
26 Oonzinzi heyali dho ondoka odho oomvula heyali, oonyapi heyali dha vala odho oomvula heyali. Otadhi popi oshinima shimwe.
27 Oonzinzi heyali dha anduka mo konima yaandhoka dho ondoka noonyapi heyali dha theta odho oomvula heyali dhondjala yekomba.
28 Oshi li naanaa; ngaashi te ti — Kalunga okwe ku ulukile shoka ta ka ninga.
29 Otaku ya omimvo heyali dheloolo muEgipiti alihe.
30 Konima yaandhika otaku ya omimvo heyali dhondjala yekomba. Omimvo dheloolo otadhi ka dhimbiwa, oshoka ondjala otayi ka shundula oshilongo.
31 Omimvo dheloolo otadhi ka dhimbiwa thiluthilu, oshoka ondjala ndjoka ya landula ko, oyo ondhigundhigu.
32 Sho wa yaguma lwaali, otashi ti kutya Kalunga okwa tokola shili shoka ta ka longa.
33 “Hogolola ano omulumentu omunandunge e na owino, u mu langeke melelo lyaEgipiti alihe.
34 Langeka wo aambala yalwe, ya taambe oshititano shomateyo momimvo ndhoka heyali dheloolo.
35 Ya lombwela, ya gongele iilya momimvo dheloolo ndhoka tadhi ya, e to ya pe uuthemba wokupungula iilya miilando noku yi tonatela.
36 Iilya otayi ka hepulutha oshilongo pethimbo lyomimvo heyali dhondjala ndjoka tayi ya muEgipiti. Pamukalo nguka aantu itaa ka sa po kondjala.”
37 Oohapu ndhika odho opalele omukwaniilwa nomalenga ge.
38 Oye nokwa ti kugo: “Itatu ka moneni omuntu omwaanawa e vule Josef, ngoka e na ombepo yaKalunga.”
39 Omukwaniilwa okwa ti kuJosef: “Oshoka Kalunga okwe ku ulukile ayihe mbika, kape na ngoka e ku vule muunongo nomowino.
40 Otandi ku lenge moshilongo shandje, naantu yandje ayehe otaa vulika kiipango yoye. Ongame awike tandi kala ndi ku vule.
41 Otandi ku langeke omupangeli gwaEgipiti alihe.”
42 Omukwaniilwa okwa hukula ko okalinga ke koshihako komunwe gwe e te ka zaleke komunwe gwaJosef. Okwe mu zaleke onguwo yoliina nelyenge lyoshingoli mothingo ye.
43 Okwe mu pe etemba lye etiyali meopalo, a londe mo, naalangeli mboka ye mu tetekelele, oyi igidha taa ti: “Isizimikeni! Isizimikeni!” Osho ngaaka Josef a langekwa omupangeli gwaEgipiti.
44 Omukwaniilwa okwa ti kuJosef: “Ngame omukwaniilwa, ihe muEgipiti inamu kala omuntu ta yelutha okwooko nenge ompadhi kee na ezimino lyoye!”
45 Okwe mu luku edhina lyOshiegipiti Zafenat Paneak e te mu pe omukiintu Asenat, omuna gwomuyambi Potifera gwokuOn. Josef okwa li e na omimvo omilongo ndatu, sho a holoka koshipala shaFarao, omukwaniilwa gwaEgipiti. Okwa zi muuwa e te endaenda naEgipiti alihe.
46
47 Momimvo ndhoka heyali dheloolo oshilongo osha teya iilya oyindji.
48 Josef okwe yi gongele e te yi pungula miigandhi yomiilando. Moshilando kehe okwa pungula mo iilya ya zi momapya gopuushiinda.
49 Okwa li ku na iilya oyindjiyindji, noye etha oku yi yeleka — oya li ya fa ehekevi lyomooha dhefuta.
50 Ondjala manga inaayi ya, Josef okwa valelwa aamati yaali kuAsenat.
51 Okwa ti: “Kalunga okwa dhimbitha ndje okuhepekwa kwandje negumbo lyatate.” Okwa luku osheeli she Manasse.
52 Okwa ti ishewe: “Kalunga okwa pe ndje aanona mevi lyuudhigu wandje.” Okwe mu luku Efraim.
53 Omimvo heyali dheloolo ndhoka dha nyanyudha Egipiti, odha hulu po,
54 nomimvo heyali dhondjala odha tameke, ngaashi naanaa Josef a tile. Okwa li ku na ondjala miilongo ayihe, ihe muEgipiti omwa li mu na iilya.
55 Aayegipiti sho ya tameke okusa ondjala, noya pula omukwaniilwa iilya, okwe ya lombwele, ya ye kuJosef, e taa ningi shoka te ya lombwele.
56 Ondjala oya geye e tayi taandele noshilongo ashihe. Nena Josef okwa matula iigandhi ayihe e ta landitha po iilya kAayegipiti.
57 Aantu yomuuyuni auhe oye ya kuEgipiti, ya lande iilya kuJosef, oshoka ondjala oya li ya geya muuyuni auhe.
1 Jakob sho a kundana kutya kuEgipiti oku na iilya, okwa lombwele oyana a ti: “Otamu talathana ngiini?
2 Ondu uvu kutya kuEgipiti oku na iilya. Indeni ko, mu ka lande iilya, opo twaa se kondjala.”
3 Aamwahe yaJosef omulongo oya ka landa iilya kuEgipiti,
4 ihe Jakob ina tuma onkelo Benjamin, omumwayina gwaJosef, oshoka a li a tila, pamwe ota adhika koshiponga.
5 Aana yaJakob pamwe nayalwe wo oye ya, ya lande iilya, oshoka muKaanan omwa li mu na ondjala.
6 Josef okwa li omupangeli gwoshilongo nokwa landitha po iilya kaantu yomuuyuni auhe. Aamwahe yaJosef oye ya e taa inyongamene kuye ya tsa iipala mevi.
7 Josef sho a mono aamwahe, okwe ya dhimbulula, ihe okwe ya idhimbike a fa kee ya shi. Okwe ya pula nomagandambadhi a ti: “Otamu zi peni?” Oya yamukula ya ti: “Otwa zi kuKaanan, twe ya okulanda iilya.”
8 Josef okwa dhimbulula aamwahe, ihe yo inaye mu dhimbulula.
9 Okwa dhimbulukwa oondjodhi ndhoka a yagumine e ta ti kuyo: “One oondaadhi; omwe ya okutala, oshilongo ngele osha nengena.”
10 Oya yamukula ya ti: “Aawe, tatekulu. Tse aapika yoye twe ya okulanda iilya.
11 Tse atuhe aantu naamwayina. Katu shi oondaadhi; tse aantu aayinekelwa.”
12 Josef okwa ti: “Aawe, omwe ya owala mu tale, oshilongo shetu ngele osha nengena.”
13 Oya ti: “Otwa li atuhe kumwe aantu naamwayina omulongo nayaali, aana yomusamane gumwe mevi lyaKaanan. Mukwetu okwa sa, nonkelo oyi li putate kegumbo.”
14 Josef okwa yamukula a ti: “Osho naanaa, ngaashi nda ti: one oondaadhi.
15 Natu taleni, ngele otamu popi oshili. Ote gana medhina lyomukwaniilwa kutya itamu zi po mpaka, manga ondenge yeni onkelo inee ya mpaka.
16 Gumwe gwomune na ye e ke mu tale, yamwe manga taa kala po ya dhigininwa, sigo oshili tayi holoka, ngaashi mwa ti. Ngele hasho, one oondaadhi. Osho oshili, ngaashi omukwaniilwa e na omwenyo.”
17 Nena okwe ya tula mondjedhililo e taa kala mo omasiku gatatu.
18 Mesiku etitatu Josef okwa ti kuyo: “Ngame omutilikalunga nonda hala okuhupitha oomwenyo dheni, ngele otamu ningi ngeyi:
19 Opo tu mone kutya one aantu aayinekelwa, gumwe gwomune na kale mondjedhililo moka mu li, manga yalwe tamu faalele aanaluhepo iilya mbyoka mwa landa.
20 Nena omu na okweetela ndje omumwanyoko onkelo, opo shi ninge ekoleko kutya omwa lombwela ndje oshili, ne mwaa dhipagwe.”
21 Oya zimine e taa lombwelathana taa ti: “Eeno, otatu hepekwa naanaa molwashoka twa ningile omumwamene. Otwa mwene uudhigu we uunene, sho a li e tu indile ohenda, ihe tse inatu pulakena ko. Omolwashoka tu li muudhigu wa tya ngaaka.”
22 Reuben okwa ti: “Inandi mu lombwela, mwaa ehameke omunona, ihe inamu pulakena? Ngashingeyi otatu pulwa ombinzi ye.”
23 Josef oku uvu shoka taa ti, ihe yo inaye shi tseya, oshoka oya popile naye nomutoloki.
24 Josef okwa zi puyo e ta lili. Sho a fudha po, okwa galuka e ta kutha Simeon mokati kawo e te mu mangitha montaneho yawo.
25 Josef okwa ti, oompunda dhawo nadhi udhithwe iilya, iimaliwa yawo yi tulwe mompunda yashaa ngoka, yo ya pewe onguta yomondjila. Shika osha ningwa.
26 Aamwahe oya kutile uusino wawo iilya mbyoka ye yi landa e taa yi.
27 Montanda gumwe okwa dhitulula ompunda ye, a paluthe okasino ke e ta mono iimaliwa mokana kompunda.
28 Okwa lombwele aamwayina a ti: “Iimaliwa yandje oya galukila ndje, oyo mbika mompunda yandje!” Omitima dhawo odha kukuka, nomuumbanda oya lombwelathana ya ti: “Akwetu, Kalunga okwe tu ningi ngiini?”
29 Sho ya thiki kuhe kuKaanan, oye mu hokololele ayihe mbyoka ya ningilwa ya ti:
30 “Omupangeli gwaEgipiti okwe tu popitha nomagandambadhi e te tu pe oombedhi dhokundaadha oshilongo she.
31 Otwa yamukula twa ti: ‘Tse katu shi oondaadhi, tse aantu aainekelwa.
32 Otwa li aantu naamwayina omulongo nayaali, aana yahe gumwe. Omumwameme gumwe okwa sa, nonkelo oku li kuKaanan putate.’
33 Omulumentu omupangeli okwa yamukula a ti: ‘Ningeni ngeyi, opo ku monike kutya ne aantu aainekelwa: Gumwe gwomune na kale pungame, manga yalwe taa ka faalela aanaluhepo iilya.
34 Etelii ndje omumwanyoko onkelo, nena otandi ka tseya kutya ne kamu shi oondaadhi, ihe aayinekelwa. Otandi mu galulile omumwanyoko, opo tamu vulu okweenda noshilongo ashihe.’ ”
35 Sho taa pimpi oompunda dhawo, shaa ngoka okwa mono okampunda ke kiimaliwa. Sho ya mono uumpunda wiimaliwa, oyo pamwe nahe Jakob oya li ya tila.
36 He okwa ti kuyo: “Omwa hala mu yuge ndje aamwandje? Josef ke po; Simeon ke po; ngashingeyi omwa hala mu kuthe ndje Benjamin. Ayihe otayi ehameke ndje.”
37 Reuben okwa ti kuhe: “Ngele itandi ku galulile Benjamin, oto vulu okudhipaga po aamwandje aamati yaali. Mu tula mesiloshimpwiyu lyandje, notandi mu galulile kungoye.”
38 Ihe Jakob okwa ti: “Omumwandje ita yi nane. Omumwayina okwa sa, oye awike a kala po. Ota ningi a adhike koshiponga mondjila. Onda kulupa, noluhodhi ndoka tamu etele ndje, otalu dhipaga ndje.”
1 Ondjala oya li ya gehelela muKaanan.
2 Egumbo lyaJakob sho lya mana po iilya mbyoka ya li ya ka hehela kuEgipiti, Jakob okwa ti koyana: “Indeni ko, mu ke tu landele uulya.”
3 Juda okwa ti kuye: “Omulumentu ngwiyaka okwe tu kumagidha noonkondo, twaa holoke koshipala she twaa na omumwameme.
4 Ngele oto zimine, u tu tume nomumwameme, otatu yi tu ke ku landele iilya.
5 Ngele ino hala, itatu yi ko, oshoka omulumentu ngwiyaka okwe tu lombwele kutya itatu ziminwa okuholoka koshipala she, ngele katu na omumwameme.”
6 Jakob okwa ti: “Omolwashike mwe etele ndje uudhigu u thike mpano, sho mwa lombwele omulumentu ngoka kutya omu na omumwanyoko gulwe?”
7 Oya yamukula ya ti: “Omulumentu ngwiyaka okwe tu pula kombinga yezimo lyetu ta ti: ‘Ho oko e li e na omwenyo? Omu na omumwanyoko natango gulwe?’ Otwa li tu na okuyamukula omapulo ge agehe. Katwa li tu shi shi nando kutya ote ke tu lombwela oku mu etela omumwameme.”
8 Juda okwa ti kuhe: “Tuma omunona nangame, tu ye mbala. Nena kape na we ngoka ta ka sa kondjala.
9 Otandi mu hupulile omwenyo gwandje, oto mu pula ndje. Ngele itandi mu galulile kungoye ondjangandjele, ote kala ndi na ondjo koshipala shoye okukalamwenyo kwandje akuhe.
10 Andola okwa li inaatu kandakanda, ando otwa ya ko nale lwaali nokuli.”
11 He okwa ti kuyo: “Ngele ano osho ngaaka, tuleni iilikolwa iiwanawa yomevi ndika moompunda dheni, mu faalele omupangeli ngwiyaka ombalagelo: omugwayo gwokanakamuma, omagadhi goonyushi, iizimba, omaka ga nika nawa, omankete nomahuku.
12 Kutheni ofuto ya mbalipalekwa, mu shunithe ko iimaliwa mbyoka ya li moompunda dheni. Pamwe osha ningwa mepuko.
13 Kutheni wo omumwanyoko, ne mu shune komulumentu ngwiyaka mbala.
14 Kalunga Omunankondoawike ne mu silithe ohenda komulumentu ngwiyaka, opo a pitike Benjamin nomumwanyoko okugaluka pamwe nane. Ngele te kanitha aamwandje, nandi ya kanithe!”
15 Oya kutha ombalagelo nofuto ya mbalipalekwa noya yi kuEgipiti naBenjamin. Oya holoka koshipala shaJosef.
16 Josef sho a mono Benjamin e li puyo, okwa lombwele elenga lyomegumbo lye a ti: “Fala aantu mbaka megumbo. Ya tselela ontselela, u ya pakele po, oshoka otaa ka lya omwiha nangame nena.”
17 Elenga olya ningi, ngaashi lya lombwelwa, e tali ya fala megumbo lyaJosef.
18 Sho ya li taa falwa megumbo, oya haluka e taa dhiladhila: “Otwe etwa muka molwiimaliwa mbiyaka ya li ya shunwa moompunda dhetu, sho twi ile huka lwotango. Otaye tu nukile e taa yugu po uusino wetu, notse otatu ningi aapika.”
19 Posheelo shegumbo oya lombwele elenga lyomegumbo e taa ti:
20 “Tatekulu, sho twi ile huka tu lande iilya lwotango,
21 otwa ka yunga ontanda mondjila yokuya kegumbo. Sho twa dhitula oompunda dhetu, kehe gumwe gwomutse okwa adha iimaliwa ye yi li mompunda ye — ayihe ya gwana po. Otwe yi etelele kungoye.
22 Otwe eta wo iimaliwa yilwe, tu lande iilya. Inatu tseya ngoka a tula iimaliwa moompunda dhetu.”
23 Elenga olya ti: “Inamu tila. Inamu piyagana. Kalunga keni, Kalunga kaho, oye e mu tulile iimaliwa moompunda dheni. Onda taamba iifuta yeni.” Olyo olye eta wo Simeon kuyo.
24 Elenga olye ya fala megumbo. Olye ya pe omeya, ya yoge oompadhi dhawo, nomwiidhi kuusino wawo.
25 Oya longekidha ombalagelo yawo, ye yi pe Josef, sho te ya komwiha, oshoka oya lombwelwa kutya otaa ka lya pamwe naye.
26 Josef sho e ya kegumbo, oya kutha ombalagelo, ye yi mu pe, e taa inyongamene pevi koshipala she.
27 Josef okwe ya kundu e te ya pula a ti: “Omwa lombwelele ndje kutya ho okwa kulupa — oku li po ngiini? Oku na omwenyo natango noku li nawa?”
28 Oya yamukula ya ti: “Omupiya gwoye, tate, oko e li e na omwenyo noku li nawa.” Oya tsu oongolo noye mu inyongamene.
29 Josef sho a mono omumwayina Benjamin, okwa pula a ti: “Oye omumwanyoko onkelo ngono mwa li tamu lombwele ndje?” Nokwa ti: “Mentu gwandje, Kalunga ne ku yambeke.”
30 Nena Josef okwa zi po mbala, oshoka omwenyo gwe ogwa li tagu tende molwomumwayina. Okwa yi mongulu ye e ta lili.
31 Sho i iyogo moshipala, okwa zi mo ti idhidhimike e ta ti, iikulya nayi etwe.
32 Josef okwa li e li poshitaafula shimwe, manga aamwahe ye li pushawo. Aayegipiti oya li pushawo shi ikalela, oshoka otaye shi tala oshidhila okulila pamwe nAahebeli.
33 Aamwahe oya kuutumba poshitaafula ya taalela Josef palandulathano lyuukuluntu wawo okuza kosheeli sigo okonkelo. Sho ya mono, nkene ya kuutumba ya taalelathana, oye shi kuminwa.
34 Iikulya oye yi pewa tayi zi koshitaafula shaJosef, naBenjamin okwa pewa lutano e vule ayehe. Oya li e taa nu pamwe naJosef e taa nyanyukwa.
1 Josef okwa lombwele elenga lyomegumbo lye e ta ti: “Udhitha oompunda dhaalumentu mbano iilya nou tule iimaliwa yawo moompunda dhawo.
2 Mompunda yonkelo tula mo oshitenga shandje shoshisiliveli pamwe niimaliwa ye mbyoka ya li tayi landwa iilya.” Elenga olya ningi ngaashi lya lombwelwa.
3 Ongula onene oya lalekwa noyi idhenge mela lyondjila nuusino wawo.
4 Sho ye ende ko owala oshinano oshifupi okuza koshilando, Josef okwa ti kelenga lyegumbo lye: “Endelela, u ya landule. Ngele we ya adha, ya pula u tye: ‘Uuwanawa oshike tamu u galulile uuwinayi?
5 Omolwashike mwa yaka po oshitenga shoshisiliveli shamwene gwandje? Omo amuke ha nwine nosho ha anekelitha. Omwa longo iihuna!’ ”
6 Elenga sho lye ya adha, olya popi, ngaashi lya lombwela.
7 Oye li yamukula ya ti: “Tatekulu, oto dhiladhila ngiini, sho to ti ngawo? Oshinima shoka oshi li kokule natse sho.
8 Oto tseya kutya otwe etelele niimaliwa mbiyaka twa monene moompunda dhetu twa zile nayo kuKaanan. Otatu vulu ngiini okuyaka po oshitenga shoshisiliveli shamwene gwoye megumbo lye nokuli?
9 Tatekulu, ngoka ta adhika e shi na, oye na dhipagwe, natse atuhe otatu ningi aapika yoye.”
10 Elenga olya ti: “Ote zimine, ihe ngoka awike a kutha po oshitenga, oye ta ningi omupika gwandje, manga ne yalwe otamu yi nombili.”
11 Oya kutululile omitsalo dhawo pevi noshaa ngoka okwa dhitulula ompunda ye.
12 Elenga lyaJosef olya hadha nuudhiginini, okutameka kuyomukuluntu sigo okoyonkelo, oshitenga nosha adhika mompunda yaBenjamin.
13 Aamwayina oya tuula oonguwo dhawo moluhodhi, oya kutile uusino wawo e taa shuna koshilando.
14 Juda naamwayina oye ya kaandjaJosef noye mu adha ko. Oye mu inyongamene,
15 Josef nokwa ti: “Omwa ningi ngiini? Kamu shi kutya omuntu ngangame ote vulu oku mu mona muunkulungu wokwaanekela?”
16 Juda okwa yamukula a ti: “Tatekulu, otatu ti nduno ngiini? Otatu patana shike? Otatu iyopaleke ngiini? Kalunga okwa holola uusama wetu. Atuhe tse aapika yoye pamwe naangoka a adhika e na oshitenga.”
17 Josef okwa ti: “Aawe! Shivalelwe ndi shi ninge! Ngoka awike a adhika e na oshitenga, oye na ninge omupika. Ne yalwe indeni nombili kuho.”
18 Juda okwa hedha kuJosef e ta ti: “Ombili, tatekulu, kwatha ndje ndi popye nangoye. Ino geela ndje; ngoye owa fa omukwaniilwa polwoye mwene.
19 Tatekulu, owe tu pulile to ti: ‘Omu na ho nenge omumwanyoko gulwe?’
20 Otwa yamukulile twa tile: ‘Otu na tate a kulupa nomumwameme onkelo e mu valelwa muukulupe. Omumwayina gwomunona okwa sa, noye awike gwayina e na po omwenyo; he oku mu hole unene.’
21 Tatekulu, owe tu lombwelele, tu mu ete huka, opo u mu mone.
22 Otwa yamukulile kutya omunona ita vulu okuza po puhe; nge ta zi po, he ota si.
23 Owa tile: ‘Itamu pitikwa okuholoka koshipala shandje, ngele omumwanyoko onkelo ite ya nane.’
24 “Sho twa shunine kutate, otwe mu hokololele shoka wa tile.
25 Nena okwe tu lombwele, tu galuke tu ye tu lande iilya.
26 Otwa yamukula twa ti: ‘Itatu vulu okuya; itatu pitikilwa tu holoke koshipala shomulumentu ngwiyaka, ngele omumwameme onkelo itatu yi naye. Otatu vulu okuya ashike, ngele omumwameme onkelo ota yi wo.’
27 Tate okwe tu lombwele a ti: ‘Omu shi shi kutya mukadhandje Rakel okwa valele ndje aamati yaali ayeke.
28 Gumwe okwa thiga ndje po nale. Ngiika okwa lika po kiilikama, oshoka inandi mu mona we sigo onena.
29 Ngele otamu kutha po ishewe nguno pungame, e ta ka adhika koshiponga, oluhodhi ndoka tamu etele ndje, otalu dhipaga ndje.’ ”
30 Juda okwa tsikile a ti: “Ngashingeyi, tatekulu, ngele ote shuna kutate ndaa na omunona, shampa tuu a mono kutya omunona ke li pamwe nangame, ota si. Omwenyo gwe ogu li momwenyo gwomunona ngu, nokwa kulupa lela, tashi ti, oluhodhi nduka tatu mu etele, otalu mu dhipaga.
31
32 Ngame ondu uvanekele tate, ndi sile omunona oshimpwiyu. Onde mu lombwele kutya, ngele itandi eta omunona kuye, ote kala ndi na ondjo koshipala she okukalamwenyo kwandje akuhe.
33 Ngashingeyi, tatekulu, ote kala po, ndi ninge omupika gwoye peha lyomunona; mu etha a ye pamwe naamwahe.
34 Ote vulu ngiini okushuna kutate, ngele omunona inandi ya naye? Ite vulu okwiidhidhimikila okutala oluhodhi lwatate lu thike mpoka.”
1 Josef ina vula okwiidhidhimika we komeho gaamati ye. Okwe ya lombwele, ya pite mo mongulu. Kamwa li we omuntu gulwe, Josef sho i ihololele aamwahe.
2 Okwa tameke okulila nokulililila. Aayegipiti oye shi uvu, noshu uvika wo muuwa womukwaniilwa.
3 Josef okwa ti kaamwahe: “Ongame Josef. Tate oku na omwenyo natango?” Aamwahe sho ye shi uvu, oya li ya kunkwa noinaa tya we sha.
4 Nena Josef okwa ti kuyo: “Hedheni huka.” Oyo noya hedha ko, oye nokwa ti: “Ongame omumwanyoko Josef, ngoka mwe mu landitha kuEgipiti.
5 Ngashingeyi inamu shi ningila omwenyo omwiinayi nenge mwi ipe oombedhi, sho mwa landitha ndje po. Kalunga mwene okwa tetekelitha ndje huka, opo a hupithe oomwenyo dheni nodhaantu yalwe.
6 Omumvo nguka omutiyali gwondjala. Oku na natango omimvo ntano itaaku longwa ko itaku teywa.
7 Kalunga okwa tetekelitha ndje huka, opo mune mu thigale oshihupe kombanda yevi, noluvalo lweni lu kale lu na omwenyo, sigo ehupitho enene tali ya.
8 Hane ano mwe eta ndje huka, ihe oKalunga. Okwa ningi ndje elenga enene lyomukwaniilwa. Ongame te lele oshilongo she ashihe; ngame omupangeli gwaEgipiti alihe.
9 “Endeleleni ano, mu ye kutate, mu mu lombwele mu tye: ‘Omumwoye Josef ota ti ngeyi: Kalunga okwa ningi ndje omupangeli gwaEgipiti alihe, ila kungame pwaa na ekwatakwato.
10 Oto vulu okutula moshikandjo shaGoshen, moka to vulu okukala popepi nangame — ongoye mwene, aamwoye, aatekulu yoye, oonzi dhoye, iikombo yoye, oongombe dhoye niinima yoye ayihe u yi na.
11 Ngele ou li muGoshen, ote vulu oku ku sila oshimpwiyu. Oku na natango omimvo ntano dhondjala, ihe ngame ine hala, ngoye mwene, egumbo lyoye naayihe u yi na yi se po kondjala.’ ”
12 Josef okwa tsikile a ti: “Omeho geni oge shi wete, nomeho gomumwameme Benjamin oge shi wete kutya ongame Josef.
13 Ka lombweleni tate kutya onda simana muEgipiti, ne mu mu hokololele ayihe mwe yi mono. Mu eteni mbala huka.”
14 Josef okwi idhingile Benjamin omaako mothingo e ta lili, naBenjamin okwa lilile mothingo ye.
15 Okwa thipi aamwahe ayehe komilungu nokwa lilile mothingo yakehe gumwe. Konima yaambika oya kundathana naamwayina.
16 Elaka olya thiki muuwa kutya aamwayina yaJosef ye ya ko. Omukwaniilwa nomalenga ge oya nyanyukwa.
17 Omukwaniilwa okwa ti kuJosef: “Lombwela aamwanyoko, ya kutile uusino wawo, ya ye kuKaanan.
18 Naa ka tale ko he pamwe negumbo lye, ye ye huka. Otandi ya pe evi ewanawa muEgipiti, notaa ka kala ye na eloolo lyiikulya.
19 Ya lombwela, ya kuthe omatemba muEgipiti, ga ka humbate aakadhi noyana nahe, ye ya ete huka.
20 Inaa ipyakidhila niikolokolo yawo, oshoka iinima ayihe iiwanawa yomuEgipiti oyawo.”
21 Aana yaJakob oya ningi, ngaashi ya lombwelwa. Josef okwe ya pe omatemba, ngaashi omukwaniilwa a ti, nonguta yomondjila.
22 Omulumentu kehe okwa pewa omutsuhu omupe, ihe Benjamin okwa pewa iimaliwa iisiliveli omathele gatatu nomitsuhu ntano.
23 Josef okwa tumine he uusino omulongo wa humbata iinima iiwanawa yomuEgipiti, iilya, iikwiila nonguta yomondjila.
24 Okwa laleke aamwahe, ya ye, e ta ti kuyo: “Inamu tamanana mondjila.”
25 Oya zi kuEgipiti e taa yi kuhe Jakob kuKaanan.
26 Oye mu lombwele ya ti: “Josef oko e li e na omwenyo. Oye omupangeli gwaEgipiti alihe.” Jakob okwa kunkwa noina wapa oku ya itaala.
27 Ihe sho ye mu hokololele ayihe mbyoka Josef e ya lombwele, nosho a mono omatemba ngoka ga tumwa kuJosef, ge mu fale kuEgipiti, ehaluko olye mu zi.
28 Okwa ti: “Omumwandje Josef oku na omwenyo natango! Nda gwana ihe. Otandi yi ndi ke mu tale, manga inaandi sa.”
1 Jakob okwa manga po iinima ye ayihe e ta yi kuBeersheba, hoka a yamba oontselelandjambo kuKalunga kahe Isak.
2 Kalunga okwe mu popitha memoniko uusiku e te mu ithana ta ti: “Jakob, Jakobwee!” Jakob okwa yamukula a ti: “Ee!”
3 Kalunga okwa ti: “Ongame Kalunga, Kalunga kaho. Ino tila okuya kuEgipiti; oluvalo lwoye otandi ke lu ninga oshigwana oshinene.
4 Otandi yi nangoye kuEgipiti notandi ka galulila oluvalo lwoye kevi huka. Josef oye te ku thithikilitha omeho goye, sho to si.”
5 Jakob okwa zi muBeersheba. Oyana oye mu londeke pamwe naanona naakulukadhi yawo momatemba ngoka ga zi komukwaniilwa gwaEgipiti.
6 Oya kutha iinima yawo ayihe mbyoka ye yi imonene muKaanan e taa yi kuEgipiti. Jakob okwa yi noluvalo lwe aluhe:
7 Oyana aamati, aatekulu ye aamati, oyana aakadhona naatekulu ye aakadhona.
8 Aaisraeli mboka ya yi kuEgipiti, oyo mbaka: Jakob nosheeli she Reuben,
9 aana yaReuben Hanok, Pallu, Hezron naKarmi.
10 Simeon noyana Jemuel, Jamin, Ohad, Jakin, Zohar naShaul, omuna gwomukulukadhi Omukaanani.
11 Levi noyana Gerson, Kohat naMerari.
12 Juda noyana Shela, Perez naSera. (Aana yaJuda yalwe Er naOnan oya sile muKaanan). Perez okwa li e na aanona Hezron naHamul.
13 Issaskar noyana Tola, Puwa, Jashub naShimron.
14 Sebulon noyana Sered, Elon naJahleel.
15 Mbaka aamati yaLea e ya valele Jakob muMesopotamia pamwe nomumwayina omukadhona Dina. Aantu ayehe kumwe aamati naakadhona omilongo ndatu nayatatu.
16 Gad noyana Zifjon, Haggi, Shuni, Ezbon, Eri, Arodi naAreli.
17 Aser noyana Imna, Ishva, Ishvi, Beria nomumwayina omukadhona Sera. Aana yaBeria oyo Heber naMalkiel.
18 Mbaka omulongo nayahamano yomoluvalo lwaJakob ya valwa kuSilpa, omudhike ngoka Laban e mu pele omwana Lea.
19 Rakel, omukulukadhi gwaJakob, okwe mu valele aamati yaali, Josef naBenjamin.
20 Oyanamati yaJosef oyo Manasse naEfraim. Oye mu valelwa muEgipiti kuAsenat, omuna gwomuyambi Potifera gwokuOn.
21 Oyanamati yaBenjamin oyo Bela, Beker, Ashbel, Gera, Naeman, Ehi, Rosh, Muppim, Huppim naArd.
22 Mbaka omulongo nayane oyo oluvalo lwaJakob yomuRakel.
23 Dan nomwana Hushim.
24 Naftali noyana Jakzeel, Guni, Jezer naShillem.
25 Mbaka yaheyali oyo oluvalo lwaJakob muBilha, omudhike ngoka Laban e mu pele omwana Rakel.
26 Oluvalo lwaJakob aluhe kumwe ndoka lwa yi kuEgipiti, olwo omilongo hamano nahamano, aakiintu yoyana inaa yalulilwa mo.
27 Josef okwa valelwa aamati yaali muEgipti. Nopo ihe, Aaisraeli ayehe muEgipiti oya ningi omilongo heyali.
28 Jakob okwa tetekelitha Juda, a ka tale Josef e mu tsakaneke muGoshen. Sho a thiki ko,
29 Josef okwa londo metemba lye e ta yi kuGoshen, a ka tsakaneke he. Sho ya tsakanene, Josef okwi idhingile omaako ge mothingo yahe e ta lili olule.
30 Jakob okwa lombwele Josef a ti: “Ngashingeyi otandi ka sa nenyanyu, sho nda mono oshipala shoye nondi shi kutya ou na omwenyo.”
31 Nena Josef okwa ti kaamwahe nokaanegumbo lyahe: “Otandi ka tseyithila omukwaniilwa kutya aamwameme natate negumbo lye alihe mboka ya kala muKaanan, oye ya kungame.
32 Otandi ke mu hokololela kutya one aasita yiimuna mwe etelela oonzi, iikombo, oongombe naayihe mu yi na.
33 Omukwaniilwa nge te mu ithana e te mu pula iilonga yeni,
34 tyeni kutya one aasita yiimuna mokukalamwenyo kweni akuhe, ngaashi naanaa oohokulu ya li haa litha. Nena ote mu pitika, mu kale moshikandjo shaGoshen.” Josef okwa popi ngaaka, oshoka aasita yiimuna oyo oshidhila kAaegipiti.
1 Josef okwa kutha aamwahe yatano e ta yi nayo komukwaniilwa nokwa ti: “Tate naamwameme oye zi kuKaanan niimuna yawo naayihe ye yi na. Ngashingeyi oye li moshikandjo shaGoshen.”
2 Okwa ulukile omukwaniilwa aamwayina mboka yatano.
3 Omukwaniilwa okwe ya pula a ti: “Iilonga yeni oyashike?” Oya yamukula ya ti: “Nkeyama, otse aasita yiimuna ngaashi ootatekulu.
4 Otwe ya, tu kale moshilongo shika oondjendi, oshoka moshilongo shaKaanan omu na ondjala ondhigu nokamu na uunapelo wiimuna yetu. Tu kwatha epitikilo, tu kale moshikandjo shaGoshen.”
5 Omukwaniilwa okwa ti kuJosef: “Ngashingeyi ho naamwanyoko oya thiki.
6 Evi lya Egipiti olyawo. Ya langeka moshikandjo shaGoshen, oshitopolwa oshiwanawa moshilongo. Nongele ope na aalumentwelela mokati kawo, naa ninge aasita yiimuna yandje.”
7 Josef okwe eta he Jakob koshipala shomukwaniilwa. Jakob okwa yambeke omukwaniilwa,
8 omukwaniilwa nokwe mu pula a ti: “Ou na omimvo ngapi?”
9 Jakob okwa yamukula a ti: “Omimvo dhuundjendi wandje ethele nomilongo ndatu. Omimvo ndhika odho omishona nomiwinayi, inadhi fa omimvo dhuundjendi wootatekulu muuwindji.”
10 Jakob okwa laleke omukwaniilwa nuuyamba e ta yi.
11 Josef okwa langeke he naamwahe muEgipiti e te ya pe oshitopolwa oshiwanawa moshilongo popepi noshilando Rameses, ngaashi omukwaniilwa a ti.
12 Josef okwa pe he naamwahe negumbo lyahe alihe iikulya ya yeleka omwaalu gwaanona.
13 Ondjala oya li ya geya moshilongo. Iikulya oya li ya pumba akuhe, nAayegipiti nAakaanana oya nanga kondjala.
14 Sho ya landa iilya, Josef okwa gongele iimaliwa e te yi fala kuuwa.
15 Iimaliwa sho ya pu mo muEgipiti nomuKaanan, Aayegipiti oye ya kuJosef taa ti: “Tu pa iikulya! Ino tu sitha ondjala! Ninga po sha! Iimaliwa yetu ayihe ya pu po.”
16 Josef okwe ya yamukula a ti: “Eteni iimuna yeni; otandi mu pe iilya peha lyiimaliwa ngele oya pwa po.”
17 Oyo noye eta iimuna yawo kuJosef, e te ya pe iilya ya gu uukambe wawo, oonzi, iikombo, oongombe nuusino. Omumvo ngoka okwe ya pe iilya ya landa niinima yawo ayihe.
18 Omumvo gwa landula ko oye ya taa ti: “Tatekulu, sho tu li mpaka, itatu iholeke nando, nokutya iimaliwa yetu niimuna yetu ayihe ya pu po, nena oyoye. Inapa hupa we sha, tu ku pe ando, kakele komalutu getu nomapya getu.
19 Ino tu etha, tu se! Ninga po sha! Ino etha omapya getu ga ninge omaputu! Tu landa po, tu gwe iilya, osho wo omapya getu! Otatu ka ninga aapika yomukwaniilwa, noye ta ningi mwene gwomapya getu. Tu pa iilya, tu kale tu na omwenyo, noombuto tu kune omapya getu!”
20 Josef okwa landa po omapya agehe muEgipiti, ga ninge gomukwaniilwa, Aayegipiti ayehe oya landitha po omapya gawo, oshoka ondjala oya li ya geya; omapya agehe noga ningi eliko lyomukwaniilwa.
21 Josef okwa piki aantu okuza kooha dhaEgipiti sigo okooha oonkwawo.
22 Omapya gaayambi ogo ageke ga hupu ko inaaga landwa po. Inaa landitha po omapya gawo, oshoka oya li haa pewa eziminino lyiilya komukwaniilwa.
23 Josef okwa lombwele aantu ta ti: “Omu wete ko kutya onde mu landa po nomapya geni, nde mu landele omukwaniilwa. Oombuto dhokukuna omapya geni odho ndhika.
24 Pethimbo lyeteyo omu na okupa omukwaniilwa oshititano, ihe oshihupe osheni, mu shi longithe ombuto, okwiipalutha nokupalutha aantu yomomagumbo geni naanona yeni.”
25 Oyo noya yamukula ya ti: “Owa hupitha oomwenyo dhetu; owe tu longele uuwanawa, tatekulu. Otatu ningi aapika yomukwaniilwa.”
26 Josef okwa toto po ompango yomapya gomuEgipiti, nokutya oshititano sheteyo oshomukwaniilwa. Ompango ndjika oyi li po sigo onena. Omapya gaayambi ageke kage shi gomukwaniilwa.
27 Aaisraeli oya kala muEgipiti moshikandjo shaGoshen, moka ya yambapala ye na aanona oyendji.
28 Jakob okwa kala muEgipiti omimvo omulongo naheyali, sigo a gwanitha omimvo ethele nomilongo ne naheyali.
29 Ethimbo sho lya hedha ko, a se, okwi ithana omwana Josef e ta ti kuye: “Tula oshikaha shoye kohi yetundji lyandje e to gana kutya ito fumvike ndje muEgipiti.
30 Onda hala ndi fumvikwe pootate; kutha ndje muEgipiti, u ka fumvike ndje mpoka ya fumvikwa.” Josef okwa yamukula a ti: “Otii ka ninga, ngaashi to ti.”
31 Jakob okwa ti: “Gana ano kutya osho to ka ninga.” Josef okwa gana, naJakob okwi inyongamene e ta galikana i ikwatelela kombete.
1 Konima yaambika Josef okwa lombwelwa kutya he ota alukwa. Josef okwa kutha oyana yaali, Manasse naEfraim, e ta yi a ka talele po he.
2 Jakob sho a lombwelwa kutya omwana Josef okwe ya oku mu talela po, okwi ikankameke e ta kuutumba kombete ye.
3 Jakob okwa ti kuJosef: “Kalunga Omunankondoawike okwi ihololele ndje puLus mevi lyaKaanan e ta yambeke ndje.
4 Okwa lombwele ndje a ti: ‘Otandi ku pe aanona oyendji, opo oluvalo lwoye lu ka ninge oshigwana oshinene. Otandi gandja evi ndika koluvalo lwoye, li ninge eliko lyalwo sigo aluhe.’ ”
5 Jakob okwa tsikile a ti: “Josef, aamwoye yaali ye ku valelwa muEgipiti, manga inaandi ya huka, oyandje. Efraim naManasse oye thike paamwandje mboka Reuben naSimeon.
6 Aamwoye yalwe ye ku valelwa konima yawo, naa kale yoye; mokugandja iitopolwa yevi eliko lyawo nali pitile muEfraim naManasse.
7 Sho nda li mokugaluka kuMesopotamia, onda silwa Rakel mondjila muKaanan, popepi naEfrata. Onde mu fumvike mooha dhondjila yokuEfrata.” (Efrata nena ohaku tiwa Betlehem.)
8 Jakob sho a mono aana yaJosef, okwa pula a ti: “Aanona mbano oolye?”
9 Josef okwa yamukula a ti: “Mbaka aamwandje, Kalunga e ya pele ndje muka muEgipiti.” Jakob okwa ti: “Ya eta kungame, opo ndi ya yambeke.”
10 Omeho gaJakob oga li ga tsiyala kuukulupe, ka li ta mono ko nawa. Josef okwe eta aamati kuye, oye nokwe ya idhingile e te ya thipi komilungu.
11 Jakob okwa lombwele Josef a ti: “Kanda li nda tegelela tandi ku mono we, ihe Kalunga okwa monitha ndje aana yoye nokuli.”
12 Nena Josef okwe ya kutha po pekolo lye e te mu inyongamene a tsa oshipala mevi.
13 Josef okwa tula Efraim kolumoho lwaJakob naManasse kolulyo lwe.
14 Ihe Jakob okwa shigakaneke iikaha ye e ta tenteke olulyo lwe komutse gwaEfraim, nando oye ondenge, nolumoho lwe okomutse gwaManasse, ngoka a li omukuluntu.
15 Okwa yambeke Josef a ti: “Kalunga ngoka a longelwa kootate Abraham naIsak, na yambeke aamati mbaka! Kalunga ngoka e enditha ndje sigo onena, ne ya yambeke!
16 Omuyengeli ngoka a hupitha ndje miiponga ayihe, ne ya yambeke! Edhina lyandje nedhina lyootate Abraham naIsak nali kale maamati mbaka! Yo naa kale ye na okakwiyu, oluvalo olwindji.”
17 Josef okwa li e shi tala epuko, sho a mono he a tenteke olulyo lwe komutse gwaEfraim. Okwa kutha ko oshikaha shahe komutse gwaEfraim e te shi tula komutse gwaManasse.
18 Okwa ti kuhe: “Hangaaka, tate. Omukuluntu oye nguka; tenteka oshikaha shoye shokolulyo komutse gwe.”
19 He okwa tindi e ta ti: “Ondi shi shi, mentu gwandje, ondi shi shi. Oluvalo lwaManasse otalu ka ninga oshigwana oshinene. Ihe ondenge ota ka ninga omunene e mu vule, noluvalo lwe otalu ka ninga iigwana iinene.”
20 Osho ngaaka e ya yambeke esiku ndyoka ta ti: “Aaisraeli otaa ka tumbula omadhina geni, uuna taa tomona omayambeko. Otaa ka tya: ‘Kalunga ne ku faathanithe naEfraim naManasse.’ ” Osho Jakob a tula Efraim komeho gaManasse.
21 Jakob okwa lombwele Josef a ti: “Ngaashi u shi wete, ondi li pokusa, ihe Kalunga ota kala nane note ke mu tembudhila kevi lyoohokulu.
22 Eyana lyokuShekem ongoyelela tandi li pe, haamwanyoko, etathapya ndyoka nda yugu Aayamori negongamwele lyandje nuutati wandje.”
1 Jakob okwi ithana oyana e ta ti kuyo: “Gongaleni, notandi ke mu hokololela shoka tamu ka ningilwa komasiku gokomeho:
2 “Ileni pamwe, mu pulakene, ne aana yaJakob. Pulakeneni ho Israel shoka te mu lombwele.
3 “Reuben, ngoye osheeli shandje, oonkondo dhandje, osheeli shuukolele wandje, osheeli mesimano nomondjundo, u vule aamwanyoko.
4 Owa fuluka wa fa omeya, hangoye to ningi omukuluntu, oshoka wa londele kombete yaho, nowe yi nyateke. Eeno, owa londele kontala yandje.
5 “Simeon naLevi aantu namumwayina. Omagongamwele gawo ohaga dhipaga.
6 Itandi zimine oonkundathana dhawo, itandi kala moshigongi shawo, oshoka ya dhipaga aalumentu mondjahi, nomuuntsa wawo oya lemaneke oontsezi.
7 Ondjahi yawo nayi thingwe, oshoka oya pindjala. Uupyakadhi wawo nau thingwe, oshoka kau na ohenda. Otandi ya napeke mokati kaJakob, otandi ya halakanithile muIsrael.
8 “Juda, aamwanyoko otaye ku tanga. Oshikaha shoye osha kwata ekothi lyaatondi yoye. Aamwanyoko otaa inyongamene koshipala shoye.
9 Juda oku li po a fa onkoshi, ya kwata oshihakanwa shayo e tayi shuna mekololo lyayo tayi inana ya taandela pevi. Kape na ngoka ta vulu oku mu pendutha.
10 Ondhimbo yuukwaniilwa itayi zi mo muJuda nepangelo moluvalo lwe, sigo taku ya ngoka te li pewa, ngoka iigwana tayi vulika kuye.
11 Ota pandekele okasino ke pomuviinu nokasinogona ke opekota lyomuviinulela. Oonguwo dhe ote dhi yogele momaviinu.
12 Omeho ge ga tiligana ngaashi omaviinu, omayego ge ga tokithwa ga fa omahini.
13 “Sebulon ota ka kala pooha dhefuta, mpoka tapu ka kala etulilo lyoosikepa. Oshitopolwa she otashi ka adha sigo oSidon.
14 “Issaskar oye okasino ka kola taka lala pokati kiigunda.
15 Okwa mono ko ehala lyaa na uupyakadhi, nevi ndyoka olye mu opalele. Ota petama a humbate ondjoko, ta thiminikilwa iilonga yuupika.
16 “Dan ota tokolele aantu ye, ongaakwawo haa tokolele omazimo gaIsrael.
17 Dan ota kala ngeyoka mepola, a ontela a fa epili mondjila tali shomona okakambe mekondo, nomukayili ta gu okafinyukila.
18 “Ehupitho lyoye, Omuwa, otandi li tegelele.
19 “Gad ota matukilwa kekumbu, ihe ote ya pilukile e te ya landula.
20 “Aser iikulya ye omagadhi, ota ka gandja iitowale yo opalela aakwaniilwa.
21 “Naftali oye oholongo yi na ontuku, oyana oyo opala.
22 Josef okwa fa omuti hagu imi, omuti omutalala pomatondokelo iitayi yagwo tayi taandele kekuma.
23 Oondjumbeta otadhi mu itakeke, otadhi mu ponokele.
24 Ihe uuta we owa kola, omaako ge oga pama. Oga kolekwa kOmunankondo, Kalunga kaJakob, okOmusita nokOmugameni gwaIsrael.
25 Kalunga kooho ne ku kwathe, Kalunga Omunankondoawike ne ku yambeke. Ne ku pe omayambeko taga zi megulu pombanda, omayambeko gefundja mpaka pevi nomayambeko gokomagundji nogomoshivalelo.
26 Omayambeko gaho oge vule ngeyaka gootatekulu, oge vule eopalo lyoondundu dhaaluhe. Omayambeko ngaka naga lambele komutse gwaJosef, okomutse gwomuhogololwa mokati kaamwahe.
27 “Benjamin oye embungu hali lyana. Ongula otali hutagula oshihakanwa shalyo, ongulohi otali topola oshikwatwa shalyo.”
28 Ngaka ogo omazimo gaIsrael omulongo nagaali, noohapu dhomalaleko odho ndhika e dhi tumbulile moku ga yambeka kehe limwe neyambeko lye li opalela.
29 Jakob okwa lombwele oyana a ti: “Otandi yi nondjila yaakuuyuni ayehe; fumvikii ndje mekololo ndyoka li li meyana lyaEfron Omuheti,
30 puMakpela, kuuzilo waMamre, mevi lyaKaanan. Ekololo ndika neyana Abraham okwe li landa kuEfron, li ninge omayendo.
31 Omo tuu moka mwa fumvikwa Abraham nomukadhi Sara, omo mwa fumvikwa Isak nomukadhi Rebekka, nangame nda fumvike mo Lea.
32 Epya nekololo olya li lya landwa kAaheti. Omo tuu fumvikii ndje moka.”
33 Jakob sho a mana omautho ge koyana, okwa taandeleke omagulu ge e ta fudha mo omwenyo gwe, nokwa yi kooyinagulu.
1 Josef okwi iyumbile puhe ta lili e te mu thipi koshipala.
2 Josef okwa ti, omudhimba gwahe nagu gwayekwe, gu kukutikwe.
3 Osha pula omasiku omilongo ne, opo egwayeko lyekukutiko li pwe. Aayegipiti oye mu lili omasiku omilongo heyali.
4 Omasiku gokulila oosa sho ga hulu, Josef okwa ti komalenga gomukwaniilwa: “Kwathii ndje, mu fale elaka ndika komukwaniilwa tamu ti:
5 ‘Tate sho a li popepi nokusa, okwa uvanekitha ndje, ndi ke mu fumvike mombila e yi longekidha mevi lyaKaanan. Laleka ndje, ndi ye ndi ka fumvike tate e tandi galuka.’ ”
6 Omukwaniilwa okwa yamukula a ti: “Inda, u ka fumvike ho, ngaashi wu uvaneke to shi ningi.”
7 Josef okwa yi a ka fumvike he. Omalenga agehe gomukwaniilwa, aanenentu yomombala naawiliki ayehe yaEgipiti oya yi pamwe naJosef.
8 Egumbo lye, aamwahe naanegumbo lyahe ayehe oya yi pamwe naye. Aanona ayeke noonzi dhawo, iikombo noongombe oya kalele moshikandjo shaGoshen.
9 Aalumentu aanamatembakwiita naalondinkambe oya yi wo naye noya li ongundu onene.
10 Sho ya thiki polupale lwaAtad kuuzilo waJordan, oya lili mokule ethimbo ele, naJosef okwa utha, oosa dhi lile omasiku gaheyali.
11 Aakwashilongo Aakaanana sho ya mono aantu mboka taa lili puAtad, oya ti: “Oshituthi shoka oshoosa dhAayegipiti.” Ehala ndyoka nolya lukwa Abel Mizraim.
12 Aana yaJakob oya ningi, ngaashi e ya lombwele.
13 Oya fala omudhimba gwahe kuKaanan e taye gu fumvike mekololo puMakpela, kuuzilo waMamre meyana ndyoka Abraham e li landa kuEfron Omuheti, li ninge omayendo.
14 Josef sho a fumvike he, okwa shuna kuEgipiti pamwe naamwahe mboka ya yile pamwe naye kefumviko.
15 Aamwahe yaJosef sho ya mono he a si, oya ti: “Josef pamwe ote tu tondo e te tu galulile shoka twa li twe mu ningile, sho twe mu ehamekele.”
16 Oya tumu elaka kuJosef tali ti: “Ho manga a li inaa sa,
17 okwe tu lombwele, tu ku indile ombili, ta ti: ‘Kuthila po aamwaho, sho ya li ye ku longele uuwinayi.’ Ngashingeyi tu dhimina po omayono ngoka tse, aapika yaKalunga kaho, twe ga longo.” Josef okwa lili, sho a taamba elaka ndika.
18 Aamwahe yo yene oye ya e taa inyongamene kuye e taa ti: “Otu li mpaka koshipala shoye, aapika yoye.”
19 Josef okwa ti kuyo: “Inamu tila. Kandi li peha lyaKalunga.
20 Omwa ningile shili uuwinayi, ihe Kalunga okwe u mu galulile uuwanawa, opo a gamene oomwenyo dhaantu oyendji mboka ye na omwenyo pethimbo ndika molwashoka sha ningwa po.
21 Itamu pumbwa okutila. Otandi mu sile oshimpwiyu pamwe naana yeni.” Osho ngaaka e ya ngungumaneke noohapu dhombili ndhoka dha talaleke oomwenyo dhawo.
22 Josef negumbo lyahe oya kala muEgipiti. Sho a si, okwa li e na omimvo ethele nomulongo.
23 Okwa kala e na omwenyo e ta mono aana yaEfraim naatekulu sigo aatekulululwa yepipi etitatu. Okwa kala e na omwenyo e ta mono wo aana yaMakir gaManasse ye ya mezimo.
24 Okwa lombwele aamwahe a ti: “Ondi li pokusa, ihe Kalunga ote ke mu dhimbulukwa. Ote mu tembudha mo mevi ndika e te mu fala kevi e li uvanekele Abraham, Isak naJakob nokugana.”
25 Nena Josef okwa ganitha aana yaIsrael e ta ti: “Uvanekelii ndje kutya Kalunga ngele te mu fala kevi ndiyaka, nane wo otamu fala ko iipongo yandje.”
26 Josef okwa sile muEgipiti mepipi lyomimvo ethele nomulongo. Oye mu gwayeke ya kukutike omudhimba gwe e taye gu langeke moshiketha shomudhimba muEgipiti.