1

¹

Puniki pawuwus Ida Sang Hyang Widi Wasa sane katiba ring Nabi Maleaki mangda karauhang ring bangsa Israele.

²

Ida Sang Hyang Widi Wasa masabda ring kaulan Idane, sapuniki: “Ulun tan mari nyuecanin kita.”

Nanging ipun masaur sapuniki: “Kadi asapunapike caran Palungguh IRatu nyuecanin titiang?”

Pangandikan Ida Sang Hyang Widi Wasa sapuniki: “I Esau muah I Yakub ento manyama, nanging Ulun asih sueca teken I Yakub muah katurunannyane,

³ tur Ulun tusing ledang teken I Esau muah katurunannyane. Ulun suba ngusakang pagunungan I Esaune, tur ngutang guminnyane dadi tongos sato alas.”

⁴

Yen katurunan Esaune, wong Edome punika ngucap kadi asapuniki: “Kota-kotan iragane suba uug, nanging iraga lakar buin mangunang kota-kotane ento.” Irika Ida Sang Hyang Widi Wasa jagi masabda kadi asapuniki: “Depang suba ia buin mangunang kotane ento, nanging Ulun lakar buin nguugang. Anake lakar ngadanin ia: Gumi ane jaat muah bangsa ane kena pidukan Ida Sang Hyang Widi Wasa ngantos salawas-lawasne.”

⁵

Bangsa Israele jaga ngeton indike punika antuk paningalannyane niri tur ipun pacang mabaos sapuniki: “Ida Sang Hyang Widi Wasa maraga wisesa, yadiastun ring jabaan jagat Israele.”

⁶

Ida Sang Hyang Widi Wasa Sane Maha Kuasa, masabda ring parapanditane, sapuniki: “Ipianak subakti teken bapannyane, tur iparekan subakti teken gustinnyane. Ulun ene bapan kitane, ngudiang dadi kita tusing subakti teken Ulun? Ulun ene gustin kitane, ngudiang dadi kita tusing ngajiang Ulun? Kita nganistayang Ulun, yadiastun keto kita masih matakon kene: ‘Kadi asapunapike antuk titiang nganistayang Palungguh IRatu?’

⁷ Kene caran kitane, nah ento malantaran kita ngaturang rayunan ane tan paguna di pamorboran aturan Ulune. Sasubane keto, buin kita matakon kene: ‘Kadi asapunapike antuk titiang nenten ngajiang Palungguh IRatu?’ Ulun lakar ngorahin kita, nah ento malantaran kita ngletehin tongos pamorboran aturan Ulune.

⁸ Yen kita ngaba aturan wewalungan ane buta, wiadin gelem wiadin ane perot di ayun Ulune, apake unduke ento kaden kita tusing pelih? Tegarang kita ngaturang wewalungan ane buka keto teken sang bupati. Apake dane lakar ledang teken kita muah nyuciang kita?”

⁹

Sane mangkin, inggih semeton parapandita sami, indayangja mapinunas, mangda Ida Sang Hyang Widi Wasa nyuecanin iraga. Ida nenten jaga nagingin pangastawan semetone, tur indike punika dados iwang semetone ngraga.

¹⁰ Ida Sang Hyang Widi Wasa Sane Maha Kuasa, masabda sapuniki: “Ulun ngranayang apang ada anak adiri uli pantaran kitane ane lakar ngubetang jelanan-jelanan perhyangane, buat nyadelin kita lakar ngendihang api ane tan paguna sig pamorboran aturan Ulune. Ulun tusing ledang teken kita. Ulun tusing lakar tampi teken aturan ane aturang kita teken Ulun.

¹¹ Bangsa-bangsane uli tanggun gumine abesik nganti teked ka tanggunnyane ane lenan, pada ngluihang Ulun. Dija-dijaja luire, ia pada morbor menyan teken Ulun muah pada ngaturang aturan ane tan paleteh. Ia ajaka makejang pada ngluihang Ulun.

¹² Nanging kita tusing ngluihang Ulun malantaran kita ngorahang mungguing pamorboran aturan Ulune ento tan paguna, buina kita ngaturang aturan ane cemer sig pamorboran aturane ento.

¹³ Kita ngorahang kene: ‘Beh ambate kewehne unduke ene makejang,’ tur kita laut ngadesem marep teken Ulun. Makadadi aturan kitane teken Ulun, kita laut ngaturang buron malingan wiadin buron ane perot wiadin ane gelem. Apake kaden kita Ulun lakar ledang nampi aturan kitane ento?

¹⁴ Wastu ibobab ento kena temah, ane ngaturang buron ane tan paguna teken Ulun, nanging sujatinne ia ngelah buron ane melah di pantaran ingon-ingonnyane, ane suba sesangianga lakar anggona aturan teken Ulun. Sawireh Ulun ene Sang Prabu Ane Agung, tur sakancan bangsane pada nungkul teken Ulun.”

2

¹

Ida Sang Hyang Widi Wasa Sane Maha Kuasa ngandika ring parapanditane sapuniki: “Pituduhe ene katiba teken kita ajak makejang.

² Kita patut ngluihang Ulun aji laksanan kitane. Yening kita tusing madingehang pangandikan Ulune, ditu Ulun lakar nibakang temah teken kita. Ulun lakar nibakang temah marep teken sakancan pikolih ane tampi kita. Sujatinne Ulun suba nemah pikolih-pikolih kitane ento, sawireh kita tusing teleb nyalanang pituduh Ulune.

³ Ulun lakar nyisipang pianak-pianak kitane muah lakar nguap muan kitane aji tain wewalungan aturan kitane, tur kita lakar kentungang ka jabaan sig tongos dugdugan taine.

⁴ Sasubane keto kita lakar nawang, mungguing Ulun suba maicayang pituduhe ene teken kita, apanga prajanjian Ulune teken parapandita parakaturunan Lewine, tusing lakar kalompangin.

⁵

Sajeroning prajanjian Ulune ento, Ulun majanji ngicen ia idup muah sutrepti rahayu, tur ento ane paicayang Ulun teken ia, apanga ia prasida subakti teken Ulun. Dugase ento ia pada subakti muah nungkul teken Ulun.

⁶ Ia pada minehin paundukan ane patut, tur tusing minehin paundukan ane pelih. Ia pada idup salulut teken Ulun, ia tusing nglaksanayang paundukan ane beneh pabuat dewekne padidi dogen, nanging ia masih liu nulungin anak ane lenan apanga suud malaksana corah.

⁷ Ento ane mula dadi tetegenan parapanditane, buat ngurukang kaweruhan Ida Sang Hyang Widi Wasa ane patut. Anake patut pada teka sig parapanditane, buat mlajahin pakarsan Ulune, sawireh parapanditane ento dadi utusan Ida Sang Hyang Widi Wasa Ane Maha Kuasa.

⁸

Nanging ane jani, kita soroh panditane, suba lempas uli jalane ane beneh. Paurukan kitane suba liu mimpin anak malaksana ane pelih. Kita suba lompang teken prajanjian ane gae Ulun ngajak kita.

⁹ Sawireh keto, Ulun lakar ngadakang wong Israele pada nganistayang kita sawireh kita tusing satinut teken pakarsan Ulune. Buina yening kita ngurukang kaulan Ulune, tusing patuh baan kita maang paurukan.”

¹⁰

Boyake iraga sareng sami maderbe aji wantah adiri? Boyake iraga sareng sami kakardi antuk Widi sane tunggal? Duaning punika, napi awinannya iraga lompang ring janjin iragane marep ring timpal iragane? Samaliha napi awinannya iraga nganistayang prajanjian sane kakardi antuk Ida Sang Hyang Widi Wasa ring leluur iragane?

¹¹ Wong Yehudane sampun lompang ring janjinnyane pamantuka ring Ida Sang Hyang Widi Wasa, tur ipun nglaksanayang paindikan sane cemer ring Yerusalem miwah ring sakuub jagate sami. Ipun ngletehin Perhyangan Agung sane kasuecanin antuk Ida Sang Hyang Widi Wasa. Jadmane sane muani-muani sampun pada masomahan ring anak luh-luh sane nyungsung widi-widi sunantara.

¹² Dumadak Ida Sang Hyang Widi Wasa ngingsirang sakancan jadmane sane malaksana kadi asapunika saking patunggilan pasamuan Israele, tur nenten malih nglugrain ipun sareng-sareng ring bangsan iragane, buat ngaturang aturan ring ayun Ida Sang Hyang Widi Wasa Sane Maha Kuasa.

¹³

Puniki paindikan sane lianan sane laksanayang semetone. Semeton nyiram pamorboran aturan Ida Sang Hyang Widi Wasa antuk toyan panyingakan, samaliha semeton nangis miwah masesambatan, santukan Ida nenten malih nrima aturan sane aturang semeton ring Ida.

¹⁴ Semeton nunasang, napi awinannya Ida nenten ledang nrima aturane punika. Santukan Ida uning mungguing semeton sampun lompang ring janjin semetone marep ring rabin semetone, sane ambil semeton duke daa miwah truna. Ipun sampun dados timpal semetone, tur semeton sampun lompang ring janjin semetone ngajak ipun, yadiastun semeton majanji ring ayun Ida Sang Hyang Widi Wasa, mungguing semeton jaga satia tuu ring ipun.

¹⁵ Boyake Ida Sang Hyang Widi Wasa nadosang semeton nunggal raga miwah roh ring ipun? Napike sane karsayang Ida sajeroning paindikane punika? Sane arsayang Ida inggih punika semeton patut madue oka, tur okan semetone dados kaulan Idane Sang Hyang Widi Wasa sane sujati. Duaning punika elingja, sampunang wenten ring pantaran semetone sane jaga lompang ring janjinnyane marep ring somahnyane.

¹⁶ Ida Sang Hyang Widi Wasa, Widin Israele masabda, sapuniki: “Ulun geting teken anak ane palas makurenan. Ulun geting teken anak ane ngambekang kawirosan teken somahnyane. Ingetangja mungguing kita tusing dadi lompang teken janji ane patut tuonin kita marep teken somah kitane.”

¹⁷

Semeton sampun makewuhin Ida Sang Hyang Widi Wasa antuk baos semetone. Nanging semeton mataken sapuniki: “Kadi asapunapike antuk tiang makewuhin Ida?” Malantaran semeton mabaos sapuniki: “Ida Sang Hyang Widi Wasa Sane Maha Kuasa mitaenang sakancan jadmane sane malaksana jaat punika becik, sujatinipun Ida ledang ring ipun sareng sami.” Wiadin malantaran semeton mataken sapuniki: “Dijake Ida Sang Hyang Widi Wasa sane kasinanggeh adil punika?”

3

¹

Ida Sang Hyang Widi Wasa Sane Maha Kuasa ngandika sapuniki: “Ulun lakar ngutus utusan Ulune buat nyediaang jalan pabuat Ulun. Sasubane keto Ida Sang Hyang Widi Wasa ane ajap kita ento, tan pararapan lakar rauh sig Perhyangan Idane. Utusane ane ati-ati kita ento lakar teka tur ngwarah-warahang pasubayan Ulune.”

²

Nanging sapasirake sane jaga mrasidayang naanang rahina pangrauhan Idane punika? Sapasirake sane mrasidayang kantun urip rikalaning Ida mapakantenang raga? Ida jagi sakadi sabune sane katos, sakadi geni ring prapen pandene.

³ Ida jaga rauh buat nepasin sakadi anake sane mresihin miwah nyuci perak. Sakadi pande mase mresihin perak miwah mase, kadi asapunika utusan Ida Sang Hyang Widi Wasa pacang nyuciang parapanditane mangdane dane pada ngaturang aturan sane patut ring ayun Ida Sang Hyang Widi Wasa.

⁴ Malantaran punika aturan sane katurang antuk wong Yehuda miwah wong Yerusaleme ring ayun Ida Sang Hyang Widi Wasa, jaga kaledangin antuk Ida, sakadi sane biasanipun ring masa-masa sane sampun langkung.

⁵

Ida Sang Hyang Widi Wasa Sane Maha Kuasa, masabda sapuniki: “Ulun lakar nyinahang raga di pantaran kitane tur lakar mapaica tetepasan. Ulun dienggal lakar dadi saksi marep teken anake ane ngadokang pangiwa, marep teken anake ane mamitra, marep teken anake ane masumpah palsu, marep teken anake ane mekelin buruh, ane nindes anak balu, anak ubuh muah anak sunantara muah marep teken sakancan ane tuara subakti teken Ulun.”

⁶

“Ulun ene Sang Hyang Widi Wasa, tur Ulun tusingja uah-uah. Sawireh keto, kita watek katurunan Yakube, tusingja lakar sirna.

⁷ Kita patuh buka leluur kitane ane suba tusing ngamanggehang pidabdab Ulune ento. Mabalikja sig Ulune, pedas Ulun lakar mabalik sig kitane. Nanging kita matakon kene: ‘Napike sane patut laksanayang titiang buat mawali ring ayun Palungguh IRatu?’

⁸ Ulun matakon teken kita, apake beneh anake ngapus Ida Sang Hyang Widi Wasa? Suba sinah tusing beneh. Nanging kita ngapus Ulun. Kita buin matakon kene: ‘Kadi asapunapike antuk titiang ngapus Palungguh IRatu?’ Sajeroning unduk aturan pahdasan muah aturan-aturan ane lenan.

⁹ Kita ajak makejang kena temah, sawireh bangsane ene makejang ngapus Ulun.

¹⁰ Aturangja pahdasan kitane ka Perhyangan Agung, amunapaja benehne, apanga cukup ada pangan kinum ditu. Pintoninja Ulun, pedas kita nepukin mungguing Ulun lakar ngampakang jendelan langite, tur nyriokin kita aji merta magenepan kanti maliah-liah.

¹¹ Ulun lakar tusing nglugrain mranane ngusakang tetaneman kitane muah punyan anggur kitane lakar sarat ngaba buah.

¹² Sasubane keto bangsa-bangsane makejang lakar ngadanin kita bagia, sawireh gumin kitane dadi tongos magumana ane melah.”

¹³

Ida Sang Hyang Widi Wasa masabda sapuniki: “Kita suba ngorahang unduk ane tusing patut marep teken Ulun. Nanging kita matakon kene: ‘Indik napike sane baosang titiang pamantuka ring Palungguh IRatu?’

¹⁴ Kita suba ngorahang kene: ‘Tusing ada gunane subakti teken Ida Sang Hyang Widi Wasa. Apake gunane nglaksanayang pangandikan Idane, wiadin ngedengang mungguing iraga suba nyelsel teken laksanan iragane di ayun Ida Sang Hyang Widi Wasa Sane Maha Kuasa?

¹⁵ Buka ane tepukin iraga, jlemane ane sumbung ia pada bagia. Jlemane ane corah, tusingja tuah aget dogen, nanging ia pada mintonin Ida Sang Hyang Widi Wasa aji laksanannyane ane corah tur ia pada luput.’ ”

¹⁶

Irika jadmane sane nungkul ring Ida Sang Hyang Widi Wasa pada mabaos ring timpalnyane, tur Ida Sang Hyang Widi Wasa nglinguang tur mirengang baosipune. Ring ayun Idane, wenten sinurat ring satunggaling cakepan, catetan jadmane sane nungkul ring Ida Sang Hyang Widi Wasa miwah sane subakti ring Ida.

¹⁷ Ida Sang Hyang Widi Wasa Sane Maha Kuasa, masabda sapuniki: “Ia ajaka makejang lakar dadi kaulan Ulune. Di panemayan Ulune malaksana, ia lakar dadi duen Ulune ane sayangang Ulun. Ulun lakar asung lugraha teken ia, buka ibapa nyayangang pianak ane subakti teken ia.

¹⁸ Ditu kaulan Ulune buin lakar nawang binan pikolih anake malaksana patut muah anake ane malaksana corah, binan anake subakti teken Ulun muah anake ane tusing subakti.”

4

¹

Ida Sang Hyang Widi Wasa Sane Maha Kuasa masabda sapuniki: “Lakar ada masanne, dikalan sakancan jlemane ane sombong muah dursila kageseng buka sumine. Dimasanne totonan ia lakar basmi kerta, tur tusing ada ane enu magantulan.

² Nanging pabuat kita ane subakti teken Ulun, kawisesan Ulun ane ngrahayuang lakar endag buka suryane sig kitane, tur nyegerang kita buka sinar suryane. Kita lakar bebas tur liang buka godel sampine ane pesu uli badanne.

³ Dimasan Ulune malaksana, ditu kita lakar ngalahang jlemane ane dursila, tur ia lakar buka abune ditelapakan batis kitane.

⁴

Ingetangja paurukan parekan Ulune I Musa, pidabdab muah pituduh-pituduh ane paicayang Ulun teken ia di Gunung Sinai, ane patut katinutin baan sawatek wong Israele.

⁵

Nanging satonden dina panemayan Ida Sang Hyang Widi Wasa ane luih muah ngresresin ento teka, Ulun lakar ngutus Nabi Elia nekain kita.

⁶ Ia lakar mesikang parabapa ngajak parapianaknyane, apanga Ulun tusing buin rauh nguugang gumin kitane.”