1
Ring sasih sane kaping kutus, taun sane kaping kalih, panyeneng Ida Sang Prabu Darius, Ida Sang Hyang Widi Wasa mapaica pawuwus ring Nabi Sakaria, okan Dane Berekya, putun Dane Ido.2 Ida Sang Hyang Widi Wasa Sane Maha Kuasa, ngandikayang Dane Sakaria mangda ngrauhang pawuwuse punika ring rakyate sami, kadi asapuniki: “Ulun ene Sang Hyang Widi Wasa, suba duka pesan teken paraleluur kitane.
3 Nanging ane jani Ulun ngorahin kita kene: Mabalikja mai sig Ulune, pedas Ulun lakar mabalik sig kitane.
4 Eda kita buka paraleluur kitane. Ane nguni paranabine suba nekedang pawuwus Ulune teken ia ajaka makejang, nunden ia suud malaksana corah muah malaksana ane tan patut. Nanging ia pada tusing nglinguang pawuwus Ulune tur tusing nyak satinut teken Ulun.
5 Paraleluur kitane muah paranabine ento tusing enu idup.
6 Malantaran paraparekan Ulun, nah ento paranabine, Ulun mapaica pituduh muah patinget teken paraleluur kitane, nanging ia tusing nglinguang pituduh muah patingete ento, tur ia suba pada nampi pikolihne. Sasubane keto ia lantas kapok, tur inget mungguing Ulun ene Sang Hyang Widi Wasa Ane Maha Kuasa, suba nyisipang ia amun benehne muah manut buka ane suba pastikayang Ulun.”
7
Ring tanggal patlikur, sasih sane kaping pitu (inggih punika sasih Sebat), taun sane kaping kalih panyeneng Ida Sang Prabu Darius, Ida Sang Hyang Widi Wasa mapaica pawuwus ring tiang, sajeroning wahyu rikalaning wengi.8 Tiang ngeton satunggaling malaekat Ida Sang Hyang Widi Wasa nglinggihin kuda abang. Dane sedekan mararian ring pantaran makudang-kudang wit murade ring lebake, tur ring pungkur danene wenten kuda sane lianan, inggih punika kuda abang, barak kadi nyambune miwah putih.
9 Tiang nunasang ring malaekat punika, sapuniki: “Inggih ratu, punapike piteges kuda-kudane punika?”
Dane masaur sapuniki: “Manira lakar ngedengang teken kita, apa artin jaran-jarane ento.10 Ida Sang Hyang Widi Wasa ngutus jaran-jarane ento buat nylajah muah mreksa mrecapada.”
11
Parakudane punika raris matur ring malaekate punika, sapuniki: “Titiang sampun pada nylajah jagate makasami, tur sampun panggihin titiang mungguing jagate punika magabiag tan padaya tur tan pabayu.”12
Irika sang malaekat raris matur, sapuniki: “Duh Ratu Sang Hyang Widi Wasa Sane Maha Kuasa, sane mangkin sampun pitung dasa warsa suenipun Palungguh IRatu duka ring kota Yerusaleme miwah kota-kotan Yehudane. Malih amunapike suenipun Palungguh IRatu jaga duka, kantos Palungguh IRatu jaga nyinahang sih kapiolasan ring ipun?”13
Ida Sang Hyang Widi Wasa tumuli nyaurin malaekate punika antuk sabda sane nglipur manah,14 tur malaekate punika ngandikayang tiang mangda ngwarah-warahang pawuwus Ida Sang Hyang Widi Wasa Sane Maha Kuasa punika, kadi asapuniki dagingipun: “Ulun kangen muah tresna pesan teken kota Yerusaleme, kotan Ulune ane suci,
15 muah Ulun duka pesan teken bangsa-bangsa ane marasa dewekne tentrem muah aman. Sawireh dugase Ulun ngreredang pidukan Ulune marep teken kaulan Ulune, bangsa-bangsane ento pada ngranayang kasangsaran kaulan Ulune sayan nyangetang.
16 Ento awanane Ulun suba rauh buin ka Yerusalem buat nyinahang sih kawelas arsan Ulune teken kotane ento. Perhyangan Ulune lakar buin kabenahin muah kotane lakar buin kawangun.”
17
Malaekate punika taler ngandikayang tiang ngwarah-warahang sapuniki: “Ida Sang Hyang Widi Wasa Sane Maha Kuasa ngandikayang, mungguing kota-kotan Idane punika pacang malih gemuh landuh miwah Ida pacang malih mapaica pitulungan ring kota Yerusaleme, tur ngarsayang mangda kotane punika dados druen Ida ngraga.”18
Sajeroning wahyu sane lianan, tiang manggihin tanduk banteng jagiran patpat.19 Tiang nunasang ring malaekat sane sampun iring tiang mabaos punika, sapuniki: “Punapike piteges tanduk-tanduke punika?”
Pasaur danene, sapuniki: “Tanduk-tanduke ento dadi lawat kawisesan gumine ane suba nyambehang wong Yehuda muah wong Israel muah wong Yerusaleme.”20
Sasampune punika Ida Sang Hyang Widi Wasa nyinahang ring tiang, pande besi sareng patpat sane pada ngagem palu.21 Irika tiang raris nunasang, sapuniki: “Jadmane puniki pada rauh, punapike sane jaga laksanayang ipun?”
Pasaur danene sapuniki: “Tekan iane lakar nengkejutang tur nguugang bangsa-bangsa ane suba nguugang gumi Yehuda muah nyambehang jlemannyane.”1
Sajeroning wahyu sane lianan tiang manggihin anak sane makta tali sikut.2 Tiang nunasang, sapuniki: “Ragane jaga lunga kija?”
Pasaur dane, sapuniki: “Manira lakar nyikut kota Yerusaleme, apang tawang, amunapa lantang muah linggahne.”3
Irika raris panggihin tiang malaekate sane pecak iring tiang mabaos mamargi ngarepang, tur malaekat sane lianan rauh matemu ring dane.4 Malaekate sane inuni ngandika ring malaekate sane wau punika, sapuniki: “Kemaja malaib, orahin anake truna ane ngaba tali sikute ento, mungguing lakar ada jlema muah ingon-ingon liu pesan di Yerusalem, kanti kotane lakar bes gede yen gaenang tembok.
5 Ida Sang Hyang Widi Wasa majanji, mungguing Ida ngraga ane lakar dadi tembok api ngiter kotane ento, buat lakar nyayubin kotane ento, buina Ida lakar malinggih ditu kadulurin saananing kaluihan Idane.”
6
[6-7] Ida Sang Hyang Widi Wasa masabda ring parakaulan Idane sapuniki: “Ulun suba nyambehang kita nyatur arah. Nanging ane jani, ih kita ane maselong, pada malaibja uli Babel tur mulihja ka Yerusalem.7
8 Asing-asing anak ane manteg kita, ia manteg duen Ulune ane paling luiha.”
Irika Ida Sang Hyang Widi Wasa Sane Maha Kuasa, raris ngutus tiang, ngrauhin parabangsane sane sampun ngrampas kaulan Idane, saha kadulurin pawuwus sakadi asapuniki:9 “Ida Sang Hyang Widi Wasa ngraga ane lakar masiat nglawan kita, tur kita lakar karampas baan anake ane laad dadi parekan kitane.”
Yening indike punika sampun kasidan, sakancan anake jaga uning, mungguing Ida Sang Hyang Widi Wasa Sane Maha Kuasa sane ngutus tiang.10
Ida Sang Hyang Widi Wasa masabda, sapuniki: “Ih wong Yerusalem, makidungja masuka rena. Ulun lakar rauh, tur malinggih di pantaran kitane.”11
Ring masane punika akeh bangsa-bangsane jaga rauh tangkil ring ayun Ida Sang Hyang Widi Wasa, tur dados kaulan Idane. Ida jaga malinggih ring pantaran semetone, tur semeton jaga uning, mungguing Ida sampun ngutus tiang buat ngrauhin semeton.12 Malih apisan wong Yehudane jaga dados drue seselikan Ida Sang Hyang Widi Wasa ring jagat Idane sane suci, tur kota Yerusalem jaga dados kota sane pinih suecanin Ida.
13
Pada mapepanja ring ayun Ida Sang Hyang Widi Wasa, ih sawatek sane murip, santukan Ida rauh saking genah linggih Idane sane suci.1
Sajeroning wahyu sane lianan, Ida Sang Hyang Widi Wasa nyinahang ring tiang Sang Pandita Agung Yosua ngadeg ring ajeng malaekat Ida Sang Hyang Widi Wasa. Tur ring samping Dane Yosua, majujuk I Setan, sane sampun sedia jaga nalih Dane Yosua.2 Malaekat Ida Sang Hyang Widi Wasa raris ngandika ring I Setan, sapuniki: “Ih Setan, madak Ida Sang Hyang Widi Wasa nyisipang iba! Madak Ida Sang Hyang Widi Wasa ane asih sueca teken kota Yerusaleme ento nyisipang iba. Jlemane ene waluya buka tugelan kayune ane kakedeng uli sig apine.”
3
Duk Dane Yosua ngadeg irika, dane ngrangsuk busana sane cemer.4 Malaekate punika raris ngandika ring rencang danene sapuniki: “Embusja panganggone ane cemer ane anggona baan anake ene.” Sasampune punika, dane raris ngandika ring Dane Yosua, sapuniki: “Manira suba ngentungang dosan kitane, tur manira lakar ngicen kita panganggo ane anyar.”
5
Dane raris ngandikayang ring rencang danene mangda nyalukang sorban sane anyar ring duur Dane Yosua. Rencang danene punika raris nglaksanayang indike punika, tur sasampune punika ipun raris ngrangsukin Dane Yosua antuk busana sane anyar, risedek malaekat Ida Sang Hyang Widi Wasa kantun ngadeg irika.6
Sasampune punika, malaekate punika raris ngandikain Dane Yosua,7 mungguing Ida Sang Hyang Widi Wasa Sane Maha Kuasa sampun masabda sapuniki: “Yening kita ninutin pidabdab Ulune muah nyalanang tetegenan ane suba serahang Ulun teken kita, kita lakar nglantur dadi pangenter Perhyangan Agung Ulune muah natarnyane, tur Ulun lakar mirengang pangastawan-pangastawan kitane, patuh buka Ulun mirengang pangastawan paramalaekate ane suba ada di ajeng Ulune.
8 Sawireh keto padingehangja, ih kita Yosua, kita ene dadi Pandita Agung. Tur padingehangja ih parapandita, paratimpal Yosuane, kita ene dadi ciri buat masane melah ane lakar teka. Ulun lakar ngedengang parekan Ulune, ane kadanin Sang Carang.
9 Ulun ngejang di arepan Yosuane batu abesik ane mabucu pepitu. Ulun lakar ngukir prasasti sig batune ento, tur sajeroning awai Ulun lakar ngentungang dosan gumine ene.
10 Yen panemayane ento suba teka, ditu kita suang-suang lakar pada ngundang pisaga-pisagan kitane buat teka bareng-bareng muponin sutrepti muah kerta raharja, kilehin baan punyan anggur muah punyan aan kitane.”
1
Malaekat sane pecak iring tiang mabaos punika raris malih rauh, tur dane nundun tiang, sakadi nundun anak pules.2 Dane tumuli mataken ring tiang sapuniki: “Apake ane tingalin kita?”
Pasaur tiange sapuniki: “Titiang ngeton tatakan lampu sane malakar antuk mas. Ring duurnyane wenten wadah minyak. Tatakan lampune punika madaging lampu pepitu, tur asing-asing lampu punika madaging sigi pepitu.3 Ring samping tatakan lampune punika wenten wit saitun sabilang sampingnyane pada masiki.”
4 Sasampune punika tiang raris matur pitaken ring sang malaekat, sapuniki: “Ratu, punapike pitegesnyane punika makasami?”
5
Pangandikan danene sapuniki: “Tusingke kita nawang?” Pasaur tiange: “Nenten, ratu!”6
Sang malaekat ngandikayang tiang ngrauhang pawuwus Ida Sang Hyang Widi Wasa ring Dane Serubabel, kadi asapuniki: “Kita lakar labda karya, tusingja malantaran kawisesan prajurite, wiadin malantaran kakuatan kitane padidi, nanging malantaran roh Ulune.7 Alangan ane amun gununge gedenne di arep kitane, ento lakar sirna. Kita lakar buin ngwangun Perhyangan Agunge ento. Buina dikalan kita masang batune ane panyuud, ditu rakyate lakar pada masuryak kene: ‘Becik pisan.’ ”
8
Pawuwus Ida Sang Hyang Widi Wasa sane lianan tumuli katiba malih ring tiang.9 Sapuniki sabdan Idane: “I Serubabel suba masang dasar Perhyangan Agunge tur ia lakar mragatang Perhyangane ento. Yen unduke ene kasidan, ditu kaulan Ulune lakar nawang, mungguing Ulun ane ngutus kita nekain ia ajaka makejang.
10 Ia ajaka makejang pada marasa sebet di kenehne, sawireh dabdab pesan gegaene ento. Nanging ia lakar nepukin Serubabel nerusang ngwangun Perhyangane ento, tur ia ajaka makejang lakar pada girang.”
Sang malaekat raris ngandika ring tiang, sapuniki: “Lampune pepitu ento, panyingakan Ida Sang Hyang Widi Wasa ane pepitu, ane ngaksi sakuub mrecapadane.”11
Sasampune punika tiang nunasang ring dane sapuniki: “Punapike piteges wit saitune kekalih sane ring bilang samping tatakan lampune punika?12 Samaliha punapike piteges carang saitune kekalih ring bilang samping pipa mase kekalih, genah minyak saitune ngecor?”
13
Dane raris mataken ring tiang, sapuniki: “Tusingke kita nawang?” Pasaur tiange, sapuniki: “Tiang nenten uning, ratu!”14
Sasampune punika dane raris ngandika, sapuniki: “Ento anak ajaka dadua ane suba kaselik tur kamanggehang baan Ida Sang Hyang Widi Wasa, Panembahan gumine makejang, buat ngancangin Ida.”1
Tiang malih matolihan, irika raris panggihin tiang wenten cakepan anglayang ring ambarane.2 Sang malaekat raris nakenin tiang, napi sane panggihin tiang. Pasaur tiange sapuniki: “Titiang manggihin cakepan anglayang ring ambarane. Panjangnyane wenten sia meter miwah lumbangnyane petang meter atengah.”
3
Irika dane raris ngandika ring tiang, sapuniki: “Di cakepane ento suba matulis temah ane lakar katiba teken gumine makejang. Di lempiran cakepane ane asibak kakecap, mungguing sawatek malinge lakar kakaadang uli di gumine, tur di lempirane ane buin asibak kakecap, mungguing sakancan anake masumpah palsu, ia masih lakar kentungang.4 Ida Sang Hyang Widi Wasa Sane Maha Kuasa ngandikayang, mungguing Ida lakar nibakang temahe ento, tur temahe ento lakar nyelepin sakancan umah malinge muah sakancan umah anake masumpah palsu. Temahe ento lakar nongos sig umah anake ento, tur nguugang umahe ento.”
5
Sang malaekat malih mapakantenang raga, sarwi ngandika sapuniki: “Iwasinja! Apa ane teka ento?”6
Atur tiange, sapuniki: “Napike punika?” Pangandikan danene, sapuniki: “Ento kranjang ane marti dosan gumine makejang.”7
Kranjange punika madaging tekep sane malakar antuk timah. Riwau tlektekang tiang, tekep kranjang punika raris maungkaban, tur ring tengah kranjange punika wenten anak luh negak adiri.8
Sang malaekat raris ngandika, sapuniki: “Anake luh ene makadadi lawat kadursilane.” Sasampune punika dane raris nyogok anake luh punika ka tengah kranjange, tur kranjange malih katekepin.9 Tiang raris matolihan marep menek, tur panggihin tiang wenten anak istri sareng kalih rauh maranin tiang, makeber nganggen kampid sane siteng, sakadi kampid paksi cangake. Sang kalih raris ngangkat kranjang punika tumuli kakeberang.
10
Tiang raris nunasang ring sang malaekat, sapuniki: “Kijake jaga baktana kranjange punika?”11
Dane raris masaur sapuniki: “Lakar abana ka tanah Babel, ditu ia lakar gaenanga perhyangan. Yen perhyangane ento suba pragat, kranjange ento lakar pejanga ditu, tur lakar sungsunga.”1
Tiang polih wahyu sane lianan. Sane mangkin tiang manggihin wenten kreta patpat rauh saking selagan gunung temagane kekalih.2 Kretane sane kaping siki kakedeng antuk kuda abang, sane kaping kalih kakedeng antuk kuda ireng,
3 sane kaping tiga kakedeng antuk kuda petak miwah sane kaping pat kakedeng antuk kuda belang.
4 Irika raris tiang nunasang ring sang malaekat punika, sapuniki: “Ratu, napike piteges kreta-kretane punika?”
5
Dane raris masaur sapuniki: “Ento marti angine ane patpat. Ia makapatpat mara teka uli ajeng Ida Sang Hyang Widi Wasa, Sang murbeng rat.”6
Kretane sane kakedeng antuk kuda ireng punika mamargi ngungsi jagat Babel sane baler, sane kakedeng antuk kuda petak ngungsi ngauhang miwah sane kakedeng antuk kuda belang ngungsi jagate sane bedelod.7 Rikala kudane sane belang punika medal, ipun uyang jaga mamargi nylajah jagate. Sang malaekat raris ngandika, sapuniki: “Kemaja majalan jlajah gumine!” Ipun raris mamargi.
8 Sasampune punika sang malaekat tumuli nyerit ngandikain tiang, sapuniki: “Jarane ane majalan ngajanang ka Babel, suba nglemperang pidukan Ida Sang Hyang Widi Wasa.”
9
Ida Sang Hyang Widi Wasa maicayang pawuwus puniki ring tiang.10 Sapuniki sabdan Idane: “Jemakja aturan ane aturanga baan Heldai, Tobia muah Yedaya, ane suba mulih uli paselongannyane di Babel. Jani enggalangja kema ka umah Yosia pianak Sepanyane.
11 Ngaeja gelungan aji perak muah mas ane suba aturanga ento, laut salukang di sirah Pandita Agunge, nah ento Yosua pianak Yosadake.
12 Orahinja ia, mungguing Ida Sang Hyang Widi Wasa Ane Maha Kuasa ngandika kene: ‘Anake ane kadanin Sang Carang lakar makedapan sig tongosnnyane, tur lakar buin ngwangun Perhyangan Agung Ida Sang Hyang Widi Wasa.
13 Tuah ia ane lakar ngwangun Perhyangane ento, tur lakar nampi kaluihan ane patut katampi baan sang prabu, tur ia lakar mrentah panjaknyane. Satunggiling pandita lakar majujuk di samping singasanannyane, tur ia ajaka dadua lakar magae bareng-bareng saha rahayu tur paras-paros.’
14 Gelungane ento lakar dadi painget di Perhyangan Agung Ida Sang Hyang Widi Wasa, buat ngajiang I Heldai, Tobia, Yedaya muah Yosia pianak Sepanyane.”
15
Jadmane sane magenah doh-doh jaga pada rauh nulungin ngwangun malih Perhyangan Agung Ida Sang Hyang Widi Wasa. Tur yen Perhyangane punika sampun puput malih kawangun, irika semeton jaga uning, mungguing Ida Sang Hyang Widi Wasa Sane Maha Kuasa ngutus tiang ngrauhin semeton. Indike puniki makasami jaga kasidan, yening semeton saking saguluking kayun ninutin sapatitah Ida Sang Hyang Widi Wasa, Widin semetone.1
Ring taun sane kaping pat panyeneng Ida Sang Prabu Darius, tanggal pat, sasih sane kaping sia, sasih Kislew, Ida Sang Hyang Widi Wasa raris mapaica pawuwus ring tiang.2
Duk punika wong Betele sampun ngutus Dane Sareser miwah Dane Regem-Melek kasarengin antuk kaulannyane ka Perhyangan Agung Ida Sang Hyang Widi Wasa Sane Maha Kuasa buat ngastawa nunas mertan Ida Sang Hyang Widi Wasa,3 miwah nunasang ring parapandita miwah paranabine, paindikan sane kadi asapuniki: “Sane mangkin punapike patut tiang kantun masesambatan mangenang uug Perhyangan Agung, malantaran mapuasa ring sasih sane kaping lima, sakadi sane sampun margiang tiang makudang-kudang taun?”
4
Sapuniki pawuwus Ida Sang Hyang Widi Wasa sane katiba ring tiang.5 Sapuniki sabdan Idane: “Orahangja teken rakyate di gumine ene muah teken parapanditane, mungguing yen ia pada mapuasa muah mapangenan disasih ane kaping lima muah ane kaping pitu sajeroning pitung dasa taun tenenan, sujatinne tusingja ia ngluihang Ulun.
6 Buina yen ia mangan muah nginum, sujatinne ento buat deweknyane niri, apanga ia wareg.”
7
Sapunika sabdan Ida Sang Hyang Widi Wasa, sane sabdayang Ida malantaran paranabine sane nguni, daweg kota Yerusaleme kantun gemuh landuh, tur akeh madaging jadma, samaliha boya kewanten daweg akeh jadmane sane magenah ring desa-desa sakiwa tengen kotane, nanging taler rauh ring wewidangan sane bedelod miwah ring bukite sane bedauh.8
Ida Sang Hyang Widi Wasa mapaica pawuwus ring Dane Sakaria, sapuniki:9 “Ane malu Ulun maicayang pituduh kene teken kaulan Ulune: ‘Kita patut ngawasin, apang kadilane kalaksanayang, tur kita patut ngedengang kapiolasan muah saling tresnain.
10 Edaja nindes anak balu-balu, anak ubuh-ubuh, wong sunantarane ane nongos di pantaran kitane, wiadin sakancan anak katunan ane lenan. Buina edaja ngrincikang daya buat saling sakitin.’
11
Nanging kaulan Ulune bengkung pesan, tusing nyak madingehang. Ia pada nekep kupingne,12 tur kenehne katos buka batune. Sawireh ia tusing nyak madingehang paurukan ane paicayang Ulun malantaran paranabine ane nguni, dadinne Ulun laut duka pesan.
13 Sawireh ia tusing nyak madingehang dikalane Ulun ngandika, Ulun masih tusing masaut dikalane ia ngastawa.
14 Waluya buka angin ribute, Ulun ngentungang ia joh, buat nongos di gumi-gumi sunantarane. Gumine ane melah ene kakutang dadi tongos ane suung mangmung tur tusing ada anak ane nongos dini.”
1
Ida Sang Hyang Widi Wasa Sane Maha Kuasa, mapaica pituduh ring Dane Sakaria, kadi asapuniki:2 “Ulun suba dot pesan makeneh nulungin kota Yerusaleme, malantaran tresnan Ulune ane sanget pesan teken jlemane ditu. Tresnan Ulune ento ane ngawanang Ulun duka teken musuh-musuhnyane.
3 Ulun lakar malipetan ka Yerusalem, kotan Ulune ane suci, tur lakar nongos ditu. Kotane ento lakar kasambat dadi kota ane satia, tur gunung Ida Sang Hyang Widi Wasa Ane Maha Kuasa lakar dadi gunung suci.
4 Ditu lakar buin ada anak odah-odah luh muah muani ane suba kaliwat tua, kanti ia matungked majalan, tur ia lakar pada negak di tanah lapang kotane.
5 Buina jalan-jalane lakar buin bek misi anak cerik-cerik luh muani pada macanda.
6
Mirib unduke ento tawah pabuat bangsane ane enu idup jani, nanging pabuat Ulun unduke ento tusingja tawah.7 Ulun lakar ngluputang kaulan Ulune uli di gumi tongos iane kakutang,
8 tur lakar ngamulihang ia uli kangin muah uli kauh, buat nongos di Yerusalem. Ia lakar dadi kaulan Ulune tur Ulun ene lakar dadi Widinnyane ane mrentah ia saha satia muah adil.
9
Entegangja kenehe! Ane jani kita pada madingehang sabda ane warah-warahanga baan paranabine, dugas dasar Perhyangan Agunge kapasang, dikalan Perhyangan Ulune buin kawangun.10 Satondene ento tusing ada anak ane mapikolih muah tusing ada ingon-ingon ane mupu, buina tusing ada anak ane luput uli musuh-musuhnyane. Ulun ngadokang anake apanga pada masogsag nglawan timpalnyane.
11 Nanging ane jani sisa-sisan bangsane ane enu idup ene lakar melahang Ulun pesan ngrunguang.
12 Ia lakar pada nyambeh bibitne saha sutrepti. Punyan anggurne lakar pada mabuah, tanahe lakar mesuang pamupon, tur ditu lakar cukup ada ujan. Ulun lakar maicayang sakancan mertane ene teken bangsan Ulune ane enu idup.
13 Ih wong Yehuda muah wong Israel! Ane malua, wong sunantarane pada saling temah ngajak timpalne, kene pangucapne: ‘Madak cai apang katibanin bencana, patuh buka bencanane ane nibenin wong Yehuda muah Israele!’ Nanging Ulun lakar ngrahayuang kita, tur sasubane ento wong sunantarane ento lakar pada ngucap teken timpalne kene: ‘Madak cai nampi merta ane patuh buka merta ane tampina baan wong Yehuda muah Israele!’ Sawireh keto entegangja kenehe tur edaja takut.”
14
Ida Sang Hyang Widi Wasa Sane Maha Kuasa, masabda sapuniki: “Dugas paraleluur kitane ngae apanga Ulun duka, Ulun ngrencanayang bencana buat nibenin ia, tur Ulun tusing ngubah pakayunan Ulune ento, nanging Ulun lakar nyalanang rencanan Ulune ento.15 Nanging ane jani Ulun ngrencanayang lakar ngamertanin wong Yerusalem muah wong Yehudane. Sawireh keto edaja takut.
16 Buka kene ane patut laksanayang kita, nah ento: Pada ngraos amun sajaane ngajak timpal kitane. Di pangadilan, jalanang kadilan ane amun patutne, nah ento paundukan ane ngranayang dame.
17 Edaja ngrincikang kajaatan marep teken timpal kitane. Edaja dadi saksi masumpah palsu. Ulun geting teken unduk ane bobab, ane tuara adil muah unduk kawirosan.”
18
Ida Sang Hyang Widi Wasa Sane Maha Kuasa mapaica pawuwus ring Dane Sakaria, kadi asapuniki:19 “Puasane kajalanang dibulan ane kaping pat, kaping lima, kaping pitu muah ane kaping dasa, lakar dadi rerainan suka rena muah kaliangan pabuat wong Yehudane, kita patut nresnain kasujatian muah dame.”
20
Ida Sang Hyang Widi Wasa Sane Maha Kuasa masabda sapuniki: “Lakar ada masane, mungguing jlemane uli makudang-kudang kota lakar pada teka ka Yerusalem.21 Anake ane uli kotane ane abesik lakar pada ngraos teken anake ane uli kotane ane lenan, kene: ‘Tiang jaga mabakti ring Ida Sang Hyang Widi Wasa Sane Maha Kuasa tur ngastawa nunas mertan Idane. Ngiringja iraga sareng-sareng!’
22 Liu rakyate muah bangsa-bangsa ane mawisesa lakar teka ka Yerusalem buat nyungsung Ida Sang Hyang Widi Wasa Ane Maha Kuasa muah ngastawa nunas mertan Idane.
23 Didinane ento lakar ada wong sunantara ajaka adasa nekain anak Yahudi adiri, sarwi ngucap kene: ‘Tiang sareng sami pacang negen aget lacur ragane, santukan tiang sampun miragi mungguing Ida Sang Hyang Widi Wasa ngiangin ragane.’ ”
1
Puniki pawuwus Ida Sang Hyang Widi Wasa. Ida sampun netepang ukuman pabuat tanah Hadrake miwah pabuat kota Damsike. Boya wantah suku-suku bangsa Israele kewanten, nanging ibukotan Siriane taler dados druen Ida Sang Hyang Widi Wasa.2 Hamat sane mabates ngajak Hadrake punika taler dados druen Idane, kadi asapunika taler kota-kota Tirus miwah Sidon miwah sakancan kawidagdannyane.
3 Kota Tiruse sampun makarya benteng pabuat deweknyane miwah sampun nambunang perak, mas akeh pisan, kantos sakadi abu akehipun.
4 Nanging Ida Sang Hyang Widi Wasa jaga ngentungang sakancan paderbeanipune. Ida jaga ngentungang kasugihanipune ka segarane, tur punika jaga kageseng kantos basmi kerta.
5
Kota Askelone jaga ngeton indike punika, tur ipun ajerih. Kota Gasane jaga manggihin indike punika, tur ipun jaga nandang sakit raat pisan. Kadi asapunika taler kota Ekron jaga nandang sakit tur pangajap-ajapipune jaga sirna. Kota Gasa jaga kicalan ratunipune miwah kota Askelon jaga kakutang suung mangmung.6 Katurunan bangsa pranakan jaga magenah ring Asdod. Ida Sang Hyang Widi Wasa masabda, sapuniki: “Ulun lakar ngasorang sakancan wong Pilistin ane sumbung ene.
7 Ia tusing enu buin lakar naar be ane misi getih, wiadin dedaaran ane lenan ane leteh. Sakancan ane enu idup lakar dadi warga kaulan Ulune, tur lakar patuh buka palingsehan sajeroning suku Yehudane. Ekron lakar dadi warga kaulan Ulune, patuh buka wong Yebuse.
8 Ulun lakar nyaga gumin Ulune, apanga tusing ada wadua bala ane ngliwat ditu. Ulun lakar tusing buin nglugrain anake ane wirosa nyajah kaulan Ulune. Ulun suba nyingak kasangsaran kaulan Ulune.”
9
Pada masuka renaja, ih rakyat Sione. Masuryakja maliang-liang, ih semeton wong Yerusaleme! Cingakinja, Ratun semetone ngrauhin semeton! Ida rauh sajeroning kamenangan miwah nyaya, nanging alap asor tur nglinggihin keledae inggih punika godel keledae, godel keledae pondongan.
10
Ida Sang Hyang Widi Wasa masabda, sapuniki: “Ulun lakar ngisidang kreta perange uli di Israel muah ngaadang jarane uli kota Yerusalem. Panahe ane anggona di pasiatan lakar kasirnayang. Ratun kitane lakar ngae dame di pantaran bangsa-bangsane. Ia lakar mrentah uli pasihe dini kanti teked di pasihe ane ditu, uli Tukad Eprate kanti ka tanggun gumine.”11
Ida Sang Hyang Widi Wasa masabda, sapuniki: “Malantaran pasubayan Ulune teken kita ane kacap aji getih aturane, Ulun lakar mebasang rakyat kitane. Ia lakar bebas uli bangbange ane tuh di paselongan.12
Malipetanja, ih kita ane maselong, ane jani ngelah pangajap-ajap. Mabalikja ka tongos karahayuan kitane. Ane jani Ulun ngorahin kita, mungguing Ulun lakar ngwales kita tikel pindo aji merta, uli krana sakancan sangsara ane suba taanang kita.
13
Ulun lakar nganggo Yehuda buka gandewan prajurite muah Israel buka besin panahe. Ulun lakar nganggo jlemane di Sion buka pedange, buat ngebug wong Yunanine.”
14
Ida Sang Hyang Widi Wasa jaga mapakantenang raga ring parakaulan Idane. Ida jaga niwakang panah Idane sakadi tatite. Ida Sang Hyang Widi Wasa Sane Maha Luur jaga nyuarayang trompet. Ida jaga mamargi sajeroning angin ribute sane saking kelod.
15
Ida Sang Hyang Widi Wasa Sane Maha Kuasa jaga nyayubin kaulan Idane, tur ipun pacang nyirnayang meseh-mesehipune. Ipun jaga masuryak ring payudan waluya sakadi anak punyah, tur ipun jaga ngecorang getih meseh-mesehipune, tur getihe punika jaga membah sakadi getih aturane sane kabriokang saking bokoran ring duur pamorboran aturane.
16
Yen sampun rauh panemayane punika, Ida Sang Hyang Widi Wasa jaga ngluputang kaulan Idane, sakadi pangangone ngluputang ingon-ingonnyane saking bayane. Ipun pada pacang masinar ring jagat Idane, waluya sakadi sesocane ring gelungan kaprabone.
17
Ambate jaga becik miwah endah jagate punika. Paradaa trunane pada sayan ngelihang tur kuat antuk gandum miwah anggur.
1
Nunasja sabeh ring Ida Sang Hyang Widi Wasa rikalaning masan endang. Ida Sang Hyang Widi Wasa sane nurunang gulem miwah sabeh bales, sane ngawinang tegale dados gadang lumlum pabuat anake makasami.2 Anake pada nunasang ring arca-arcane miwah ring juru tenunge, nanging ipun polih pasaur sane bobab miwah sane tan papuara. Wenten malih sane ngartiang ipian, nanging indike punika wantah ngawinang semeton paling, tur semeton polih panglipur sane tan paguna saking ipun. Duaning punika rakyate pada nglalana milehan, waluya sakadi biri-biri sane paling. Ipun pada nandang kakewehan, santukan ipun nenten maderbe pamimpin.
3
Ida Sang Hyang Widi Wasa, masabda sapuniki: “Ulun duka pesan teken wong sunantara ane mrentah kaulan Ulune, tur Ulun lakar nyisipang ia. Wong Yehudane ento druen Ulune, tur Ulun Sang Hyang Widi Wasa Ane Maha Kuasa, lakar matiningin ia. Ia lakar dadi jaran perang Ulune ane mawisesa.4 Uli pantarannyane lakar metu parapamrentah, parapamimpin muah parasenapati ane lakar mrentah kaulan Ulune.
5 Wong Yehudane lakar jayengrana, waluya buka prajurite ane nyekjek musuh-musuhne di endute di jalane. Ia lakar masiat sawireh Ida Sang Hyang Widi Wasa nyarengin ia. Ia lakar ngalahang musuh-musuhne, yadiastu musuh-musuhne ento negakin jaran.
6
Ulun lakar nadiang wong Yehudane ento kuat, tur Ulun lakar ngluputang wong Israele. Ulun lakar madalem ia, tur lakar ngamulihang ia. Ia lakar dadi buka ane suba-suba, buka anake ane tusing taen tulak Ulun. Ulun Sang Hyang Widi Wasa, dadi Widinnyane. Ulun lakar ngisinin pangastawannyane.
7
Wong Israele lakar siteng buka prajurite, ia lakar liang buka anake ane suud nginum anggur. Katurunannyane lakar inget teken unduk kamenangane ento, tur lakar liang malantaran paundukan ane suba kakardi baan Ida Sang Hyang Widi Wasa.8
Ulun lakar ngesengin kaulan Ulune, tur munduhang ia ajaka makejang. Ulun lakar ngluputang ia, tur lakar nadiang ia liu pesan buka ane suba-suba.9
Yadiastun Ulun suba nyambehang ia di pantaran bangsa-bangsane, yadian di tongos ane joh, ia lakar inget teken Ulun. Ia ajaka pianak-pianakne lakar enu idup tur lakar malipetan, mulih bareng-bareng.
10
Ulun lakar ngajak ia mulih uli di Mesir muah uli di Asur, tur lakar mejang ia di gumi gelahne. Ulun lakar mejang ia di Gilead muah di Libanon tur sakuub gumine lakar bek misi jlema.
11
Dikalane ia ngentasin pasih kakewehane, Ulun Sang Hyang Widi Wasa lakar manteg ombake, tur sawang Tukad Nile lakar tuh. Wong Asure ane sombong, lakar kasorang muah gumi Mesire ane mawisesa lakar surud kawisesannyane.
12
Ulun lakar ngawinang kaulan Ulune kuat. Ia pada lakar nyungsung Ulun muah sairing teken Ulun.” Sapunika pangandikan Ida Sang Hyang Widi Wasa.
1
Ih Libanon, ampakangja jelanan ibane, apanga apine nyidayang ngeseng punyan kayu aras ibane.2
Pada ngeling muah masesambatanja iba, ih punyan sanobar, sawireh punyan arase suba pada pungkat. Punyan kayune ane mautama ento makejang suba sirna. Pada ngeling tur masesambatanja ih punyan tarbantin ane di Basan, sawireh alase ane wayah ento suba mabas!
3
Parapamrentahe pada ngeling nandang duhkita, sawireh kaluihannyane suba sirna. Padingehangja geluran singane aung-aung, sawireh alas tongosne mumah di sisin Tukad Yordane suba kusakang.
4
Ida Sang Hyang Widi Wasa, Widin tiange, masabda ring tiang, sapuniki: “Dadija kita pangangon, tur angonangja biri-birine ane lakar katampah ento.5 Ane ngelahang biri-birine laut nampah biri-birine ento, tur ia tusing kena pasisip. Benne laut adepa, tur ia ngucap kene: ‘Pujija Ida Sang Hyang Widi Wasa. Iraga jani sugih.’ Sasajaane pangangonnyane tusing madalem biri-birine ento.”
6
Ida Sang Hyang Widi Wasa ngandika, sapuniki: “Ulun tusing enu buin madalem nyen-nyen di gumine. Ulun lakar nyerahang manusane di gumine makejang sig kakuasan pamrentahnyane suang-suang. Parapamrentahe ento lakar nguugang gumine ento, tur Ulun lakar tusing buin ngluputang gumine ento uli kakuasannyane.”7
Anake sane numbas miwah sane ngadol biri-birine punika raris ngupahin tiang. Irika tiang raris dados pangangon biri-birine sane jaga katampah punika. Tiang raris ngambil tungked kekalih, sane asiki wastanin tiang Kapiolasan miwah sane lianan wastanin tiang Patunggilan. Tur tiang raris miara ingon-ingone punika.8 Irika tiang nenten sabar malih marep ring pangangone sareng tetiga sane lianan, sane gedeg ring tiang, tur ipun makatetiga sirnayang tiang sajeroning asasih.
9 Sasampune punika tiang raris mabaos ring ingon-ingone punika, sapuniki: “Kai tusing nyak buin dadi pangangon ibane. Ane nagih mati, depang suba ia mati. Ane nagih sirna, depangja ia sirna. Ane enu idup, depang ia saling amah ajaka timpalne.”
10 Sasampune punika tiang raris ngambil tungkede sane mawasta: “Kapiolasan”, raris lung tiang, buat ngurungang prajanjian sane sampun kakardi antuk Ida Sang Hyang Widi Wasa, ring sakancan bangsane sami.
11 Duaning punika, ring rahina punika ugi prajanjiane punika raris kurungang. Anake sane numbas miwah ngadol biri-birine punika pada nlektekang tiang tur ipun raris uning, mungguing Ida Sang Hyang Widi Wasa sampun masabda masrana paindikan sane kardi tiang punika.
12 Irika raris tiang mabaos ring ipun sapuniki: “Yening semeton ledang, taurja upah tiange, nanging yening nenten ledang, inggih banggayang sampun sapuniki.” Irika ipun raris naur upah tiange tigang dasa bidang jinah perak akehipun.
13
Ida Sang Hyang Widi Wasa raris ngandika ring tiang sapuniki: “Pejangja pipise ento di panyimpenan pipise di Perhyangan Agunge.” Irika tiang raris ngambil jinah perake tigang dasa bidang punika, inggih punika upah sane anggep ipun patut tampi tiang, tumuli genahang tiang ring panyimpenan jinahe ring Perhyangan Agunge.14 Sasampune punika, tungkede sane malih asiki sane mawasta: “Patunggilan”, tumuli lung tiang, tur patunggilan wong Yehuda sareng ring wong Israel raris sagsag.
15
Sasampune punika Ida Sang Hyang Widi Wasa raris masabda ring tiang, sapuniki: “Dadija kita pangangon buin acepok, tur ane jani, dadija pangangon ane tan paguna.16 Ulun suba ngelah pangangon buat ngangonang ingon-ingon Ulune, nanging ia tusing rungu teken biri-birine ane nagih mati, muah tusing rungu teken ane ilang muah tusing nyak matiningin ane matatu, wiadin tusing nyak maang ngamah biri-birine ane enu idup. Nanging ia ngamah ben biri-birine.
17 Pangangone ane tan paguna ento suba kena sengkala. Ia suba ngutang ingon-ingonne. Kawisesannyane makejang lakar sirna di pasiatan. Limannyane lakar kepek muah matannyane tengawan lakar buta.”
1
Puniki pawuwus Ida Sang Hyang Widi Wasa sane ngebatang akasane, sane ngardi pretiwine, tur mapaica urip ring manusane. Pawuwus punika kadi asapuniki:2 “Ulun lakar nadiang kota Yerusaleme ento, buka anggure agelas. Bangsa-bangsane ane ngiter ia lakar nginem tur lakar srayang-sruyung buka anake punyah. Dikalane ia pada ngurung kota Yerusaleme, kota-kotane ane lenan di Yehuda masih lakar kakurung.
3 Nanging yen masane ento suba teka, Ulun lakar nadiang kota Yerusaleme buka batune ane baat, tur asing-asing bangsa ane makeneh ningting batune ento, ia lakar matatu. Sakancan bangsane di gumine lakar sararem makanti sraya buat ngebug ia.
4 Dikalane ento Ulun lakar nengkejutang jaran-jarannyane muah sakancan ane negakin lakar buduh. Ulun lakar macingak teken wong Yehudane, nanging sakancan jaran musuh-musuhnyane lakar dadiang Ulun buta.
5 Sasubane keto palingsehan-palingsehan Yehudane lakar pada ngucap kene: ‘Ida Sang Hyang Widi Wasa, Widi Sane Maha Kuasa, mapaica kakuatan ring kaulan Idane sane magenah ring kota Yerusalem.’
6
Dikalane ento, palingsehan-palingsehan Yehudane lakar dadiang Ulun buka apine di alase, wiadin buka apine di tegalan gandume ane suba wayah, ditu ia lakar nyirnayang bangsa-bangsane ane ngiter ia. Wong Yerusaleme lakar enu rahayu di tengah kotane.7
Ulun Sang Hyang Widi Wasa lakar mapaica kamenangan teken wadua balan Yehudane paling maluna, apanga kaluihan ane lakar tampine teken katurunan Daude muah wong Yerusaleme, tusing lebihan teken ane tampina teken wong Yehudane ane lenan.8 Dimasane ento Ida Sang Hyang Widi Wasa lakar nyayubin anake ane nongos di Yerusalem, buina yadian anak ane paling lemete di pantarannyane, lakar dadi patuh sitengne buka I Daud. Katurunan Daude lakar mimpin ia ajaka makejang buka malaekat Ida Sang Hyang Widi Wasa, waluya Ida Sang Hyang Widi Wasa ngraga.
9 Dimasane ento Ulun lakar nyirnayang asing-asing bangsa ane makeneh ngebug kota Yerusaleme.
10
Ulun lakar ngebekin katurunan Daude muah anake ane lenan ane di Yerusalem aji roh kapiolasan muah roh pangastawan. Ia lakar nganengneng anake ane tebeka nagih matianga, tur ia lakar mangelingin anake ento buka anake mangelingin pianakne ane tunggal. Ia lakar ngeling sanget pesan, buka anake ane kelangan pianak muani ane paling keliha.11 Dimasane ento elinge di Yerusalem patuh gedenne buka anake mangelingin Hadad-Rimon di Lebak Megidone.
12 [12-14] Asing-asing pakurenan ane di gumine ento lakar pada mangelingin dewekne suang-suang, nah ento pakurenan katurunan Daude, pakurenan Natane, pakurenan katurunan Lewine, pakurenan katurunan Simeine, muah sakancan pakurenan ane lenan. Asing-asing pakurenan lakar mangelingin dewekne padidi, tur anake muani-muani di pakurenane ento lakar pada manehan ngeling teken anake luh-luh.”
1
Ida Sang Hyang Widi Wasa Sane Maha Kuasa, masabda sapuniki: “Yen suba teka panemayane ento, ditu lakar ada yeh klebutan ane lakar mresihin katurunan Daude muah anake ane lenan ane di Yerusalem, uli dosa muah kacemerannyane.2 Dimasane ento, Ulun lakar ngaadang adan arca-arcane uli di gumine ento, tur tusing ada buin anak ane ngingetang ia. Ulun ngentungang asing-asing anak ane ngaku dadi nabi muah ane makeneh nyungsung arca-arcane ento.
3 Sasubane keto yen ada anak ane enu dadi nabi, meme bapanne lakar ngorahin ia mungguing ia patut kena danda pati, sawireh ia ngorahang ibanne ngwarah-warahang sabdan Ida Sang Hyang Widi Wasa, nanging sujatinne ia ngorahang paundukan ane bobab. Yen ia ngramal, meme bapanne lakar nebek ia kanti mati.
4 Yen masane ento suba teka, tusing ada nabi ane nyumbungang dewek ulihan nampi wahyu, wiadin matakeh cara nabi, wiadin nganggo jubah nabi buat lakar melog-melog rakyate.
5 Nanging ia lakar pada ngucap kene: ‘Tiang boyaja nabi. Tiang anak pamacul. Tiang mamacul saumur idup tiange.’
6 Sasubane keto, yen ada anak matakon teken ia kene: ‘Nika laad tatun napike ring tangkah ragane?’ Ditu ia lakar masaut kene: ‘Tiang pecak matatu daweg ring umah timpal tiange.’ ”
7
Ida Sang Hyang Widi Wasa Sane Maha Kuasa masabda sapuniki: “Ih pedang, bangunja. Sepegja pangangone ane ngayah sig Ulune! Matiangja ia, apang biri-birine pada sambeh pablesat. Ulun lakar ngebug kaulan Ulune,8 tur di sakuub gumine, duang pah teluan jlemane lakar mati.
9 Buina ane apah teluan, ane enu idup, lakar uji Ulun tur lakar bresihin Ulun buka perake kabresihin aji api. Ulun lakar nguji ia buka anake nguji mas. Sasubane keto ia lakar ngastawa teken Ulun, tur Ulun lakar nyaurin ia. Ulun lakar ngangkenin mungguing ia ento kaulan Ulune, tur ia lakar ngaku mungguing Ulun ene Widinnyane.”
1
Panemayan Ida Sang Hyang Widi Wasa jaga mapaica tetepasan, sampun nampek. Irika kota Yerusaleme jaga kajarahin, tur jejarahane punika jaga kadum-dum ring ajeng parasemeton.2 Ida Sang Hyang Widi Wasa jaga munduhang parabangsane sami buat jaga ngebug kota Yerusaleme. Kotane jaga kakaonang, umah-umahe jaga kajarahin, miwah paraistrine jaga kaplegandang. Wong kotane atenga jaga kaselong, nanging sisannyane nenten jaga kakaonang saking kota.
3 Sasampune punika Ida Sang Hyang Widi Wasa jaga medal ngayudain bangsa-bangsa punika sakadi duke nguni.
4 Rikala punika Ida pacang ngadeg ring Gunung Saitun, sane dangin kota Yerusaleme. Irika Gunung Saitune jaga belah dados kekalih, saking kangin kantos rauh kauh, tur ring selagannyane punika wenten jurang sane linggah pisan. Gunung punika atenga jaga magingsir ngalerang, tur sane malih atenga magingsir ngelodang.
5 Semeton jaga jerih kapilayu ring jurange, ring selagan gununge punika. Semeton jaga malaib sakadi palaib leluur semetone duke wenten linuh rikala panyeneng Ida Sang Prabu Usia ring Yehuda. Ida Sang Hyang Widi Wasa, Widin tiange jaga rauh, kairing antuk sakancan malaekate sami.
6
Yen masane punika sampun rauh, irika nenten jaga wenten malih masan dingin sane ngawinang toyane dados es,7 tur nenten wenten malih peteng dedet. Irika pacang setata wenten galang yadiastun rikalaning wengi. Indik rauh panemayane punika, wantah kuningin antuk Ida Sang Hyang Widi Wasa kewanten.
8
Yen panemayane punika sampun rauh, irika jaga wenten toya ening membah saking Yerusalem, atenga membah ngungsi ka Segara Mati miwah sane malih atenga membah ngungsi ka Segara Tengah. Toyane punika jaga membah ataun mepek yadiastu rikalaning masan endang yadian rikalaning masan sabeh.9 Sasampune punika Ida Sang Hyang Widi Wasa jaga madeg ratu ngwengku mrecapadane sami. Makasami anake jaga nyungsung Ida makadados Widi, tur uning ring Ida sajeroning parab Idane sane asiki kewanten.
10
Sakuub wewidangane punika, ngawit saking Geba sane baler rauh ring Rimon sane bedelod, jaga dangsah. Kota Yerusaleme jaga nyeleg sakadi tugu, tegehan ring wewidangan sakiwa tengennyane. Kotane jaga makebat ngawit saking Gapura Benyamin rauh ka Gapura Bucune, sane pecak dados genah gapurane sane nguni miwah saking Menara Hananeel, ngantos rauh ka genah pameresan anggur ida sang prabu.11 Irika rakyate jaga pada urip muponin sutrepti raharja tur nenten malih katempuh antuk bencana.
12
Ida Sang Hyang Widi Wasa jaga nibakang pinakit sane raat ring sakancan bangsane sane nyiatin kota Yerusaleme punika. Dewekipune jaga berek yadian ipun kantun urip, mata miwah layahipune taler jaga berek.13
Ring masane punika Ida Sang Hyang Widi Wasa jaga ngawinang ipun sareng sami kalintang bingung miwah ajerih, kantos asing-asing anake jaga ngejuk timpalnyane sane ring sampingipune sarwi nyengkalenipun.14 Wong Yehudane jaga mayuda nindihin kota Yerusaleme. Ipun jaga molih jejarahan saking arta branan sakancan bangsane punika, minakadinipun mas, perak miwah pangangge akeh pisan.
15
Pinakit sane raat taler pacang nibenin sakancan kuda, bagal, unta miwah keledae, ping kalih sakancan ingon-ingon sane wenten ring pakemahan mesehe.16
Sasampune punika, sakancan jadmane sane kantun urip, saking pantaran bangsa-bangsane sane pecak ngebug kota Yerusaleme punika, jaga nyabran taun ka Yerusalem buat nyungsung Ida Sang Hyang Widi Wasa Sane Maha Kuasa, makadados Ratunnyane, sinambi ngluihang Rerainan Pondok Daun.17 Yening wenten bangsa sane nenten nyak mrika tur nyungsung Ida Sang Hyang Widi Wasa Sane Maha Kuasa makadados Ratunnyane, kenginan jaga nenten wenten sabeh ring panegaranipune.
18 Yening wong Mesire nenten nyak ngluihang Rerainan Pondok Daune punika, ipun jaga katibenin antuk pinakit sane pateh sakadi sane katibakang antuk Ida Sang Hyang Widi Wasa, ring sakancan bangsane sane nenten nyak ka Yerusalem.
19 Kadi asapunika jaga ukuman sane pacang katibakang marep ring wong Mesir miwah sakancan bangsa sane lianan, yening ipun nenten ngluihang Rerainan Pondok Daune punika.
20
Ring masane punika, rauh ring gongseng kudane jaga katulisin kadi asapuniki: “Katur ring Ida Sang Hyang Widi Wasa.” Jambangan-jambangane sane ring Perhyangan Agunge jaga suci pateh sakadi bokor-bokore sane wenten ring arepan pamorboran aturane.21 Sakancan jambangane ring Yerusalem miwah ring sakuub jagat Yehudane, pada kasuciang buat jaga kanggen sajeroning pangubaktine ring ayun Ida Sang Hyang Widi Wasa Sane Maha Kuasa. Rakyate sane ngaturang aturane, jaga ngunayang jambangane punika buat nglablab ulam aturane. Yen panemayannyane punika sampun rauh, irika nenten jaga wenten malih sudagar ring Perhyangan Ida Sang Hyang Widi Wasa Sane Maha Kuasa.