1

¹

Ring taun sane kaping kalih, panyeneng Ida Sang Prabu Darius ring Persia, ring tanggal apisan sasih sane kaping nem, Ida Sang Hyang Widi Wasa masabda malantaran Nabi Hagai. Pawuwus Idane punika katiba ring Dane Serubabel okan Dane Sealtiel, sane dados gubernur ring Yehuda, miwah ring Dane Yosua okan Dane Yosadak, sane madeg dados Pandita Agung.

²

Ida Sang Hyang Widi Wasa Sane Maha Kuasa ngandika ring Nabi Hagai, sapuniki: “Bangsane ene pada ngorahang, mungguing jani tonden masanne buat ngwangun buin Perhyangan Agung.”

³ Duaning punika Ida Sang Hyang Widi Wasa raris mapaica pawuwus ring bangsane punika, malantaran Nabi Hagai, sapuniki:

⁴ “Ih parakaulan Ulune, ngudiang dadi kita nongosin umah ane melah, nanging Perhyangan Agung Ulune enu uug?

⁵ Tusingke kita ngrasayang unduk ane puponin kita jani?

⁶ Kita liu nyambehang bibit, nanging maan pamupon tuah abedik, kita ngelah dedaaran ane lakar daar kita, nanging tusing nyandang buat ngwaregang basang kitane. Kita ngelah anggur ane lakar inem kita, nanging tusing nyandang buat nglegaang kita. Kita ngelah panganggo nanging tusing nyandang buat ngangetang awak kitane. Buina anake ane magae nanggap upah, upahne tusing nyandang buat pangupajiwannyane.

⁷ Tusingke kita nawang, apa kranane kanti buka keto?

⁸ Ane jani kemaja luas ka gunung ngalih kayu, tur jujukangja buin Perhyangan Agunge. Ditu Ulun lakar ledang tur kasungsung amun patutne.

⁹

Kita ngajap-ajap apang maan pamupon liu, nanging kita mupu tuah abedik. Buina dikalan kitane ngaba pamupon kitane ento mulih, Ulun ngampehang aji angin. Apa kranane dadi ketoang Ulun? Sawireh Perhyangan Agung Ulune enu uug, nanging kita suang-suang pada kumuh ngitungang umah kitane padidi dogen.

¹⁰ Ento kranane tusing ada ujan, tur tusing ada entik-entikan ane nyidayang mentik.

¹¹ Ulun suba nibakang masan tuh teken gumine, tur bukite, teken tegalan gandume, teken abian anggure muah teken abian saitune, teken sakancan ane pupuanga baan gumine, teken manusa muah teken burone muah teken sakancan ane lakar pupuang kita.”

¹²

Irika Dane Serubabel miwah Dane Yosua miwah sawatek rakyate sane sampun mawali saking paselongan ring Babel, sami pada nglaksanayang sapituduh Ida Sang Hyang Widi Wasa, Widinnyane, sakadi sane kapituduhang ring dane miwah ipun sareng sami. Dane miwah ipun sareng sami pada ajerih miwah satinut ring Nabi Hagai, utusan Ida Sang Hyang Widi Wasa.

¹³ Irika Nabi Hagai ngrauhang pawuwus Ida Sang Hyang Widi Wasa ring rakyate, kadi asapuniki: “Ulun lakar ngiangin kita. Aketo janjin Ulune.”

¹⁴ Ida Sang Hyang Widi Wasa mangunang semangat sakancan anake buat makarya ring Perhyangan Agung, inggih punika Dane Serubabel, gubernure ring Yehuda, Sang Pandita Agung Yosua miwah sakancan rakyate sane sampun mawali saking paselongan. Dane miwah ipun pada ngawitin makarya ring Perhyangan Agung Idane Sang Hyang Widi Wasa Sane Maha Wisesa, Widinnyane,

¹⁵ ring tanggal patlikur sasih sane kaping nem, ring taun sane kaping kalih, panyeneng Ida Sang Prabu Darius.

2

¹

Ring tanggal slikur, sasih sane kaping pitu ring taun punika, Ida Sang Hyang Widi Wasa malih masabda malantaran Nabi Hagai.

² Ida ngandikayang mangda Nabi Hagai mabaos ring Gubernur Serubabel, ring Pandita Agung Yosua miwah ring rakyate sami, kadi asapuniki:

³ “Adake di pantaran kitane ane enu inget kenken laad kaluihan Perhyangan Agunge? Jani kenkenke rasane tepukin kita? Rasane buka mirib tusing maji.

⁴ Nanging ane jani edaja kita nglemenah. Garapja gegaene ento, sawireh Ulun ngiangin kita.

⁵ Dugas kitane rarud uli Mesir, Ulun majanji mungguing Ulun lakar setata ngiangin kita. Ulun tetep enu ngiangin kita. Wireh keto edaja kita jejeh.

⁶

Tusingja buin makelo, Ulun lakar ngejerang langit muah gumine, daatane muah pasihe.

⁷ Ulun lakar nguugang bangsa-bangsane makejang, kasugihannyane lakar abana mai, tur Perhyangan Agunge lakar bek misi arta brana.

⁸ Sakancan perak muah mas ane ada di gumine ento duen Ulune.

⁹ Perhyangan Agunge ane anyar lakar luihan teken Perhyangan Agunge ane lawas, tur ditu Ulun lakar mapaica gemuh landuh muah kerta raharja teken kaulan Ulune.” Kadi asapunika sabdan Ida Sang Hyang Widi Wasa Sane Maha Kuasa.

¹⁰

Ring tanggal patlikur, sasih sane kaping sia, taun sane kaping kalih panyeneng Ida Sang Prabu Darius, Ida Sang Hyang Widi Wasa Sane Maha Kuasa, masabda malih ring Nabi Hagai.

¹¹ Sapuniki sabdan Idane: “Takonangja teken parapanditane, pidabdab ane buka kene:

¹² Yen pet ada anak nyemak daging ane suba kasuciang buat aturan atebih uli aturane ento, laut abana sig keliman jubahne, lantas jubahne ento ngosod roti, dedaaran ane lebeng, anggur, lengis saitun, wiadin soroh dedaaran ane lenan, apake dedaarane ento masih dadi suci?”

Rikala indike punika katakenang, parapanditane raris masaur sapuniki: “Nenten suci.”

¹³

Irika Nabi Hagai raris mataken, sapuniki: “Yen pet wenten anak leteh santukan ipun sampun ngusud sawa, raris ipun ngusud salah tunggil ajeng-ajengane punika, punapike indike ngawinang ajeng-ajengane punika taler dados leteh?”

Parapandita punika masaur sapuniki: “Inggih.”

¹⁴

Irika Nabi Hagai raris ngandika sapuniki: “Ida Sang Hyang Widi Wasa ngandika mungguing kadi asapunika taler paindikan sane katepekang ring rakyate ring bangsane puniki miwah ring sakancan pamuponnyane. Duaning saananing sane aturang ipun ring genah pamorboran punika makasami leteh.”

¹⁵

Ida Sang Hyang Widi Wasa masabda, kadi asapuniki: “Tusingke kita nyidayang ngrasayang apa ane puponin kita? Satonden kita ngawitin buin ngwangun Perhyangan Agunge,

¹⁶ kita majalan nelokin dugdugan gandume tur ngajap-ajap maan gandum satak kilogram, nanging ditu ada tuah satus kilogram. Kita majalan lakar meres anggur, tur makeneh maan anggur satus liter, nanging kita maan tuah petang dasa liter.

¹⁷ Ulun ngutus angin ane panes muah ujan es buat ngusakang sakancan ane lakar pupuang kita, nanging kita tusing nyak kapok.

¹⁸ Ane jani, tanggal patlikur, bulan ane kaping sia, dina pamragat pamasangan dasar Perhyangan Agunge. Ngawit uli jani, pedasinja apa ane lakar puponin kita.

¹⁹ Yadiastun tusing enu ada gandum muah punyan anggur, punyan aa, punyan delima muah punyan saitune tonden mabuah, nanging ngawit uli jani Ulun lakar ngamertanin kita.”

²⁰

Ring rahinane punika ugi, ring tanggal patlikur ring sasihe punika, Ida Sang Hyang Widi Wasa malih mapaica pawuwus ring Nabi Hagai,

²¹ mangda karauhang ring Dane Serubabel, gubernur ring Yehuda, kadi asapuniki: “Ulun lakar ngejerang langite muah gumine,

²² tur lakar nguugang sakancan kaprabone muah nyirnayang kakuasannyane. Ulun lakar madingang kreta-kreta muah kusirnyane. Jaranne lakar pada mati muah ane negakin lakar saling matiang ngajak timpalne.

²³ Didinane ento Ulun lakar ngangkat kita Serubabel, parekan Ulune, tur Ulun lakar ngamanggehang kita buat mrentah sajeroning parab Ulune. Tuah kita ane selik Ulun.” Kadi asapunika sabdan Ida Sang Hyang Widi Wasa Sane Maha Kuasa.