1
Puniki pawuwus Ida Sang Hyang Widi Wasa sane kapaicayang ring Nabi Sepanya, duk panyeneng Ida Sang Prabu Yosia, putran Ida Amon ring Yehuda. (Nabi Sepanya punika katurunan Ida Sang Prabu Hiskia, malantaran Dane Amarya, Gedalya miwah Kusi.)2
Ida Sang Hyang Widi Wasa masabda sapuniki: “Ulun lakar nyirnayang sakancan ane ada di mrecapada.3 Ulun lakar nyirnayang sakancan manusa muah burone, sakancan kedis muah bene. Ulun lakar ngebahang jlemane dursila. Ulun lakar nyirnayang sakancan manusane, tur tusing ada ane lakar enu idup. Ulun Sang Hyang Widi Wasa ane suba masabda buka keto.
4
Ulun lakar ngukum wong Yerusalem muah sakancan wong Yehudane. Ulun lakar nyirnayang sisan tongos panyungsungan Dewa Baale ditu, tur tusing ada anak ane lakar buin ngingetang parapanditannyane ane nyungsung dewa-dewane ento.5 Ulun ngenyagang asing-asing anak ane menek ka raab umahne tur nyumbah matan ai, bulan muah bintang-bintang. Ulun masih lakar nyirnayang anake ane nyungsung Ulun tur masumpah lakar subakti teken Ulun, nanging sasubane keto ia lantas masumpah nyambat adan Dewa Milkome.
6 Ulun lakar nyirnayang anake ane mabalik ninggal Ulun, tur tusing enu ngiring Ulun, anak ane tusing tangkil teken Ulun wiadin nunas tuntunan Ulune.”
7
Rahinan Ida Sang Hyang Widi Wasa sampun nampek, inggih punika panemayan Ida Sang Hyang Widi Wasa pacang malaksana. Duaning punika pada menengja ring ayun Idane. Ida Sang Hyang Widi Wasa sampun sedia jaga nampah kaulan Idane sakadi aturane.8 Ida Sang Hyang Widi Wasa masabda sapuniki: “Di dina panampahane ento, Ulun lakar ngukum paraprakanggone, paraputran sang prabune muah sakancan anake ane nyalanang adat wong sunantarane.
9 Ulun lakar ngukum sakancan anak ane mabakti buka anake ane nyungsung dewa-dewa muah anake ane mamaling tur ngamatiang jlema buat ngebekin umah gustinne aji jejarahan.”
10
Pangandikan Ida Sang Hyang Widi Wasa sapuniki: “Didinane ento, kita lakar ningeh munyin anak ngeling di Gapura Minane di Yerusalem. Kita lakar ningeh anak masesambatan di bagian kotane ane anyar muah kuugan munyin bukit ane apih.11 Dikalan ningeh unduke ento, pada ngeling tur masesambatanja ih kita ane nongos di bagian kotane ane di tebenan, sawireh sakancan sudagare lakar mati.
12
Didinane ento Ulun lakar nyemak lampu laut ngledah kota Yerusaleme. Ulun lakar ngukum anake ane ngagu muah andel teken dewekne padidi, ane ngraos kene: ‘Ida Sang Hyang Widi Wasa tusing lakar ngudiang-ngudiang, yadian ngardi ane melah wiadin ngardi ane jelek.’13 Kasugihannyane lakar kajarah muah umahne lakar kuugang. Ia lakar tusing taen nongosin umah ane gaena, wiadin nginum anggur uli abian anggur ane pulana.”
14
Rahinan Ida Sang Hyang Widi Wasa sane luih punika sampun nampek, kalintang nampek tur digelis pacang rauh. Rahinane punika jaga dados rahina sane meweh pisan, kantos yadian prajurite sane paling suradirana taler jaga ngeling sajeroning putus asa.15 Rahinane punika dados rahina kasedihan, rahina kamewehan miwah baya, rahina karusakan miwah kuugan, rahina sane peteng dedet miwah ngremeng, rahina sane badeng miwah kaliput antuk gulem.
16 Rahina sane kalikub antuk suaran trompet perang miwah suryak prajurit sane ngebug kota-kota sane mabenteng miwah menara-menara sane tegeh-tegeh.
17
Ida Sang Hyang Widi Wasa masabda kadi asapuniki: “Ulun lakar niwakang bencana ane buka keto teken manusane, apanga asing-asing anake lakar pada pati gabag milehan buka anake buta. Ia suba pada madosa marep teken Ulun, tur ane jani getihnyane lakar kakecorang buka yehe, tur bangkennyane lakar nylempang berek duur tanahe.”18
Ring rahinane punika ritatkala Ida Sang Hyang Widi Wasa nyinahang pidukan Idane, yadian sakancan perak miwah masipune, nenten jaga mrasidayang ngrahayuang ipun. Sakuub mrecapada pacang kasirnayang antuk kamuruban pidukan Idane. Ida jaga mapaica pamuput, pamuput sane nadak, ring sakancan sane urip ring mrecapada.1
Inggih bangsa sane nenten maderbe kimud, balikangja pepineh semetone,2 sadurung semeton layu tur padem sakadi sekare, sadurung pidukan Ida Sang Hyang Widi Wasa angarab-arab nibenin semeton, sadurung rauh panemayan Idane nyinahang pidukan Idane.
3 Mabalikja ka ayun Ida Sang Hyang Widi Wasa, ih sakancan rakyat sane alap asor ring jagate, sane satinut ring sapatitah Idane. Laksanayangja paindikan sane patut tur asorangja ragan semetone ring ayun Ida Sang Hyang Widi Wasa. Menawita semeton jaga mrasidayang ngelidin ukumane rikala rauh panemayan Ida Sang Hyang Widi Wasa nyinahang pidukan Idane.
4
Nenten wenten anak sane jaga kantun urip ring kota Gasa. Kota Askelone jaga suung mangmung. Rakyate ring Asdod jaga kulah sajeroning aselid, tur jadmane ring Ekron jaga kulah saking kotanipune.5 Ih iba wong Pilistin, jlema ane nongos di pasisi, iba suba kukum. Ida Sang Hyang Widi Wasa suba nibakang pasisip teken iba. Ida lakar nyirnayang iba, tur tusing ada angan aukudko anak ane lakar enu idup.
6 Tanah ibane ane di pasisi lakar dadi tegal nengan, ane misi kubu-kubun pangangon muah kandang-kandang biri-biri.
7 Wong Yehuda ane enu idup lakar ngaug gumin ibane. Ia lakar ngangonang ingon-ingonnyane ditu muah pules di umah-umahe di Askelon. Ida Sang Hyang Widi Wasa, Widinnyane lakar ngiangin ia, tur ngawanang ia buin gemuh landuh.
8
Ida Sang Hyang Widi Wasa Sane Maha Kuasa masabda sapuniki: “Ulun suba mireng wong Moab muah wong Amone minjulin tur nganistayang kaulan Ulune, buina nyumbungang dewek mungguing ia lakar ngrampas guminnyane.9 Sasajaane Ulun ene Widin Israele ane nyeneng. Ulun masumpah, mungguing Moab muah Amon lakar kasirnayang patuh buka Sodom muah Gomorane. Ia lakar dadi tongos anak ngalih uyah tur uug sakayang-kayang, buina katumbuhin baan ketket. Parakaulan Ulune ane enu idup, lakar ngrampas ia, tur nyuang tanahnyane.”
10
Kadi asapunika indik wong Moabe miwah wong Amone pacang kasisipang, malantaran kasumbungan miwah kangaguanipune miwah malantaran ipun nganistayang kaulan Ida Sang Hyang Widi Wasa Sane Maha Kuasa.11 Ida Sang Hyang Widi Wasa jaga ngemprag ipun. Ida pacang nelasang dewan mrecapadane sami, tur sasampune punika sakancan bangsane pacang nyungsung Ida ring guminnyane suang-suang.
12
Ida Sang Hyang Widi Wasa taler pacang ngamademang wong Sudane.13
Ida Sang Hyang Widi Wasa jaga ngunayang kawirosan Idane buat nyirnayang wong Asure. Ida jaga nadosang kota Niniwene punika suung mangmung tur uug miwah tegal melakang sane tuh latuh.14 Kotane punika jaga dados genah papunduhan ingon-ingon miwah sato sawarna-warni sane pada medem-medeman. Paksi clepuke jaga magenah ring pantaran uug-uugane punika, tur kuuk-kuuk saking jendela-jendelane. Paksi guake gaak-gaak ring trundagnyane. Taru arase ring wewangunannyane pacang kabusbusin.
15 Kadi asapunika paindikan sane jaga nibenin kota sane kalintang sumbung ring kawisesannyane niri, tur ngaden dewekipune sampun rahayu. Wong kotane punika ngaden, mungguing kotanipune punika kota sane pinih agung ring jagate. Ipun jaga dados genah sane kalintang suung mangmung, jaga dados genah sato alase pada masayuban. Sakancan anake sane nglintang irika jaga pada karesresan tur makeketan.
1
Sengkala pisan ipun kota Yerusaleme, kota sane jaat miwah brontak, sane nindes rakyatnyane niri.2 Ipun sampun nenten nglinguang Ida Sang Hyang Widi Wasa wiadin ningehang panglemek Idane. Ipun sampun nenten pracaya ring Ida Sang Hyang Widi Wasa miwah nenten nunas pitulungan Idane.
3 Paraprakanggennyane waluya sakadi singa sane aung-aung. Parahakimnyane waluya sakadi asu ajage sane layah, sane kalintang loba tur nenten numanang tulange kantos benjang semengane.
4 Paranabine pada nyapa kadi aku tur pekel. Parapanditane ngletehin barang-barang sane suci miwah ngesehin pidabdab Ida Sang Hyang Widi Wasa manut pepinehnyane niri.
5 Nanging Ida Sang Hyang Widi Wasa kantun malinggih ring kotane punika. Ida nglaksanayang paindikan sane patut tur nenten naen nglaksanayang paindikan sane iwang. Nyabran semengan Ida tansah mapaica kadilan ring kaulan Idane. Yadiastun kadi asapunika jadmane sane dursila kantun taler malaksana iwang saha nenten maderbe rasa kimud.
6
Ida Sang Hyang Widi Wasa ngandika sapuniki: “Ulun suba nyampatang bangsa-bangsane makejang. Ulun suba nguugang kota-kotannyane tur tembok muah menarannyane depang Ulun enu uug maglaturan. Kota-kotane pada suung mangmung, jalan-jalane pada puyung, tusing ada anak ane enu idup.7 Kaden Ulun mungguing kaulan Ulune lakar nyak subakti teken Ulun muah ningehang panglemek Ulune, mungguing ia tusing taen engsap teken peplajahan ane suba urukang Ulun teken ia. Nanging enggal pesan ia mabikas jele buka ane suba-suba.”
8
Ida Sang Hyang Widi Wasa masabda sapuniki: “Antiangja! Antiangja panemayan Ulune lakar nalih bangsa-bangsane ento. Ulun suba ngamastiang lakar munduhang bangsa-bangsane muah sakancan kaprabone, apanga ia ngrasayang kawisesan pidukan Ulune. Gumine makejang lakar kasirnayang baan pidukan Ulune ane angarab-arab.9
Sasubane keto, Ulun lakar nyilurin jleman bangsa-bangsane ento, tur ia lakar ngastawa teken Ulun ngraga, tur tusing teken widi ane lenan. Ia ajaka makejang lakar pada satinut teken Ulun.10 Yadian uli Sudan ane joh kaulan Ulune ane pasrambiah lakar pada ngaturang aturan teken Ulun.
11 Dimasane ento, kita kaulan Ulune, kita tusing buin nyandang kimud, baana kita suba brontak nglawan Ulun. Ulun lakar ngaadang sakancan anake ane sumbung tur ngagu, tur kita tusing buin brontak nglawan Ulun sig gunung Ulune ane suci,
12 Ulun lakar numanang kaula ane alap asor muah lemet, ane nyak nunas pitulungan teken Ulun.
13 Wong Israele ane enu idup tusing lakar malaksana pelih teken anak lenan muah tusing mobab, wiadin tusing ngapus anak. Ia lakar pada gemuh landuh muah kerta raharja, tur tusing takut teken nyen jua.”
14
Makidung tur masuryakja maliang-liang, ih wong Israel! Pada masuka renaja saking saguluking ati, ih Yerusalem!
15
Ida Sang Hyang Widi Wasa sampun nguusang pasisip semetone; Ida sampun ngingsirang sakancan meseh-meseh semetone. Ida Sang Hyang Widi Wasa, ratun Israele, ngiangin semeton; nenten wenten malih sane nyandang takutin.
16
Sampun rauh panemayane, Ida jaga ngandika ring kota Yerusalem, sapuniki: “Edaja jejeh, ih kota Sion! Edaja baanga liman ibane kepek!
17
Ida Sang Hyang Widi Wasa, Widin ibane ngiangin iba. Kawisesan Idane ngicen iba kamenangan. Ida Sang Hyang Widi Wasa lakar ledang teken iba, tur sajeroning sih pasuecan Idane, Ida lakar ngicen iba idup ane anyar. Ida lakar makidung muah ledang ring kayun ulihan iba,
18
patuh buka liang anake ane marerainan.”
Ida Sang Hyang Widi Wasa ngandika sapuniki:
“Ulun suba nyuudang ukuman panyengkalane, tur ngentungang kimud ibane.
19
Suba teka panemayannyane! Ulun lakar ngukum anake ane nindes iba. Ulun lakar nyegerang sakancan anake ane rumpuh, tur ngamulihang anake ane maselong. Ulun lakar ngesehin kimudne aji kaluihan. Tur gumine makejang lakar pada muji ia.
20
Suba teka panemayannyane! Ulun lakar ngamulihang rakyat ibane ane sambrag pablesat. Ulun lakar ngadakang apang iba kabinawa ka sakuub gumine, tur ngadakang apang iba buin gemuh landuh.”
Kadi asapunika sabdan Ida Sang Hyang Widi Wasa.