1
Puniki pawuwus Ida Sang Hyang Widi Wasa, sane sinahang Ida ring Nabi Habakuk.2
Duh Ratu Sang Hyang Widi Wasa, malih amunapike suenipun titiang patut nunas ica, mangda Palungguh IRatu ledang mirengang tur ngluputang titiang saking kawirosan?3 Punapike awinanipun Palungguh IRatu ngicen titiang ngeton kamewehan sane kadi asapuniki? Punapike Palungguh IRatu ledang, nglantur nyingak laksana sane iwang? Karusakan miwah kawirosan wenten ring kiwa tengen titiange, samaliha milehan wenten yuda miwah ieg.
4 Undang-undange sampun tan paji miwah tan paguna, samaliha kadilane nenten naen kamargiang. Jadmane dursila akehan mapikolih ring jadmane sane patut, duaning punika kadilane kabadingang.
5
Sasampune punika Ida Sang Hyang Widi Wasa raris masabda ring kaulan Idane, sapuniki: “Tlektekangja bangsa-bangsane ane ada di kiwa tengen kitane ento. Ditu kita lakar angob teken unduk ane tepukin kita ento. Ulun lakar ngardi paundukan ane tusing lakar gugu kita, dikalan kitane ningeh unduke ento.6 Ulun lakar nglugrain wong Babele ento kawisesan, nah ento bangsa ane gemes muah brangasan ento. Bangsane ento lakar majalan pesu nylajah gumine buat ngalahang gumi-gumine ane lenan.
7 Ia lakar nyebar katakutan muah karesresan. Buina sajeroning kasumbungannyane ia pada nyapa kadi aku.
8
Jarannyane becatan teken macan tutule muah galakan teken cicing alase ane layah. Prajuritne ane negakin jaran pada teka uli gumine ane joh-joh, tur jaran-jarannyane ngekeh tanah. Tekannyane buka kedis garudane nyander tetadahannyane.9
Wadua balannyane pada mangseh ngambekang kawirosan, tur asing-asing anake pada karesresan dikalane ia teka. Tawanannyane waluya buka biase liunne.10 Ia pada nganistaang pararatu muah ngedekin paraprakanggone. Tusing ada benteng ane nyidaang ngandeg ia. Ia pada nugdugang tanah tur ngalahang bentenge ento.
11 Sasubane keto anake ane andel teken kakuatanne niri, ia lakar malaib sirna buka angine.”
12
Duh Ratu Sang Hyang Widi Wasa, saking pangawit Palungguh IRatu wantah maraga Widi. Palungguh IRatu wantah Widin titiang, suci miwah langgeng. Duh Ratu Sang Hyang Widi Wasa, Widi miwah pasayuban titiang, Palungguh IRatu sampun nyelik wong Babele tur ngardi ipun kuat ngantos ipun nyidayang ngukum titiang sareng sami.13 Nanging napi awinan Palungguh IRatu meneng kewanten ngaksi jadmane sane jaat miwah gemes punika? Boyake pangaksian Palungguh IRatu kalintang suci buat ngaksi paindikan sane jaat? Nentenke Palungguh IRatu geting ring paindikan sane nenten adil? Napi awinan Palungguh IRatu meneng kewanten rikala jadmane sane patut kasirnayang antuk jadmane sane duraka?
14
Napi awinan Palungguh IRatu nganggep manusane punika sakadi ulam ring segarane, wiadin mrana sane nenten maderbe pamimpin?15 Bangsa Babele ngejuk rakyate antuk pancing sakadi ngejuk ulam. Ipun maid rakyate antuk jaring tur ipun maliang-liang malantaran pikolihnyane punika.
16 Ipun raris nyumbah tur ngaturang banten ring jaringe punika, santukan jaringe punika ngawinang ipun molih bebuktian maliah-liah tur ipun dados kerta raharja.
17
Punapike ipun jaga terus ngaud pedangipune tur nyirnayang bangsa-bangsane punika saha tan maderbe kapiolasan?1
Titiang jaga munggah ring menara paninjoan titiange, tur irika titiang jaga ninjo tur nyantosang indik sane pacang kasabdayang antuk Ida Sang Hyang Widi Wasa ring titiang miwah indik pasaur Idane marep ring sesambatan titiange.2
Ida Sang Hyang Widi Wasa mapaica pasaur sane kadi asapuniki ring titiang: “Tulisangja apang sinah di tebihan batune, unduk ane lakar sinahang Ulun teken kita, apanga anake nyidayang mamaca, yadiastu ia ningalin tuah aseliaban dogen.3 Tulisangja unduke ento, sawireh tonden panemayannyane kasidan. Nanging panemayannyane lakar enggal teka, tur apaja ane sinahang Ulun teken kita ento lakar kasidan. Dikenkene mirib lakar kasep tekannyane, nanging antiangja unduke ento; panemayane ento pasti lakar teka, tur tusingja lakar buung.
4 Kene isin unduk ane sabdayang Ulun: ‘Anake ane dursila, ia tusing lakar enu idup. Nanging anake ane patut, ia lakar idup, sawireh ia pracaya teken Ida Sang Hyang Widi Wasa.’ ”
5
Kasugihane ento palsu. Jlemane ane momo ento sumbung muah uyang, waluya buka sang patine ia tusing taen lega. Ento kranane ia ngalahang bangsa-bangsane makejang sakabesik.6 Bangsa-bangsa ane kalah lakar ngewerin muah nemah misuh jlemane ane ngalahang ia. Bangsa-bangsane ento pada lakar ngucap kene: “Iba nyuang barang ane tuara gelah ibane, nanging iba lakar kena sengkala. Buin amunapa makelonne iba enu terus ngalih kasugihan aji mamaksa anake ane masesilihan teken iba?”
7
Nanging satondene ia engsap, kita ane laad ngalahang anak lenan, kita lakar ngadeang dewek kitane, tur kita lakar kapaksa mayah anak. Musuh-musuhe lakar teka tur ngranayang kita jejeh ngetor. Musuh-musuhe ento lakar ngrampas kita.8 Kita suba liu ngrampas rakyat parabangsane, nanging ane jani, anake ane enu idup lakar ngrampas kita, uli krana laksanan kitane ane mamati-mati, ane suba laksanayang kita muah uli krana kawirosan ane jalanang kita marep teken rakyate di gumine muah marep teken kota-kotannyane.
9
Kita suba kena temah! Kita suba ngranayang kulawargan kitane sugih aji barang-barang ane juang kita baan kawirosan, buina kita suba ngibehang apanga umah kitane aman muah tusing kena baya.10 Nanging rencanan kitane ento suba ngranayang kimud kulawargan kitane, sawireh malantaran nguugang makudang-kudang bangsa kita suba nguugang dewek kitane padidi.
11 Kanti kayang batu-batun temboke pada jerit-jerit nyeritin kita muah balok-baloke pada nyautin jeritane ento.
12
Kita suba kena temah! Kita suba nasarin kota aji kajaatan muah ngwangun kotane ento aji mamati-mati.13 Bangsa-bangsane ane kalahang kita pada nuyuhang dewekne aji pagaen ane tan paguna, tur sakancan ane suba bangunanga ento sirna amah api. Ida Sang Hyang Widi Wasa Sane Maha Kuasa ane suba ngardi unduke ene.
14 Nanging gumine lakar bek misi kaweruh unduk kaluihan Ida Sang Hyang Widi Wasa, buka pasihe bek misi yeh.
15
Kita suba kena temah! Sajeroning pedih kitane, kita suba nganistayang muah ngaenang kimud timpal kitane. Kita ngranayang ia kimud, makadadi silur kaluihanne.16 Ane jani suba teka panemayane kita padidi ane lakar kanistayang, tur tusing kajiang. Kaluihan kitane lakar mabalik dadi kanistan. Ida Sang Hyang Widi Wasa lakar nglugrain kita nginum uli gelas ane misi pasisip kitane. Kita lakar punyah tur srayang-sruyung.
17 Kita suba ngabas alas Libanone, nanging ane jani kita ane lakar kaabas. Kita ngamatiang buronnyane, nanging ane jani buron-burone lakar nengkejutang kita. Unduke ene lakar kalaksanayang uli krana unduk mamati-mati ane suba laksanayang kita muah malantaran kawirosan ane suba jalanang kita marep teken bangsa-bangsane di gumine muah kota-kotannyane.
18
Apake gunanne arcane ento? Arcane tuah pagaen manusa, tusing bisa ngorahang apa sajabaning mobab. Apa ane nyidayang gaena pabuat anake ane ngae ia apanga anake ane ngae ia ento pracaya teken ia, sawireh ia ento arca ane tusing bisa ngraos.19 Kita suba kena temah! Kita ngraos teken kayune atugel, kene: “Rarisangja matangi!“, wiadin teken batune atebih, kene:”Durusangja matangi!” Apake arcane ento bisa nyinahang apa-apaan teken kita? Yadiastu ia kakaput aji perak muah mas, nanging ia tusing mangkihan.
20
Ida Sang Hyang Widi Wasa malingga sig Perhyangan Agung Idane. Asing-asing anak ane ada di gumine apanga pada mepepan di ayun Idane.
1
Puniki pangastawan Dane Nabi Habakuk:2
“Duh Ratu Sang Hyang Widi Wasa, titiang sampun miragi saluiring paindikan sane sampun kardi Palungguh IRatu, tur titiang rumasa kalintang angob pisan. Sane mangkin, ring masane puniki, ledang Palungguh IRatu malih makarya pakaryan sane agung, sane biasa kardi Palungguh IRatu punika. Ledang Palungguh IRatu ngetelang kawelas arsan, yadiastuja Palungguh IRatu sajeroning duka.
3
Ida Sang Hyang Widi Wasa malih rauh saking Edom. Ida Sang Hyang Widi Wasa Sane Maha Suci rauh saking pagunungan Paran. Kamulian Idane nglikub akasane, tur mrecapada kabekin antuk kapujian Idane.4
Ida rauh maduluran galanging tatit. Saking tangan Idane metu sinar makebiar. Irika kawisesan Idane kasingidang.
5
Ida ngutus pinakit ngriinin Ida, tur ngandikayang mangda sang pati ngiringang Ida.
6
Yening Ida mararian, mrecapadane raris magejeran, tur yening Ida maksian, parabangsane pada jejeh ngetor. Gunung-gununge sane langgeng pada nyag, bukit-bukite sane langgeng pada kelem, inggih punika bukit-bukit sane pecak marginin Ida duk purwa kala.
7
Titiang ngeton wong Kusane pada ajerih miwah wong Midiane pada jejeh ngetor.8
Duh Ratu Sang Hyang Widi Wasa, punapike tukad-tukade punika sane ngawinang Palungguh IRatu duka? Punapike segarane punika sane ngawinang Palungguh IRatu bendu? Palungguh IRatu mamargi ring duur ambune. Mega sane katempuh angin ribut sane dados kreta palinggihan Palungguh IRatune, rikala Palungguh IRatu makta kamenangan ring kaula druene.
9
Palungguh IRatu sregep jaga ngunayang gandewan Palungguh IRatune, tur Palungguh IRatu sedia jaga niwakang panah druene. Kilap druene makebiar nyibak mrecapada.
10
Rikala gunung-gununge pada ngeton Palungguh IRatu, ipun pada jejeh ngetor tur toyane pada masriok ngecor saking akasane. Toya-toyane sane ring sor pretiwine pada makuug tur ombak-ombakipune nglencok tegeh pisan.
11
Ritatkala panah druene makebiar ngendih tur tumbak druene ngredep makelep, surya miwah cadrane pada mandeg.
12
Sajeroning duka Palungguh IRatu mamargi nglintang ring mrecapada, tur sajeroning bendu, Palungguh IRatu ngemprag parabangsane.
13
Palungguh IRatu medal praya ngrahayuang kaulan Palungguh IRatune, tur praya ngrahayuang sang prabu seselikan druene. Palungguh IRatu nglempag pamimpin jadmane sane dursila, tur nyirnayang pangiring-pangiringipune makasami.
14
Panah Palungguh IRatu nuek senapatin wadua balanipune rikala ipun rauh waluya sakadi angin ribute jaga nyambragang titiang makasami, tur ipun marasa liang, sakadi jadmane sane nindes anake lacur-lacur saking silib.
15
Palungguh IRatu nyekjek segarane antuk kudan Palungguh IRatune tur toyane sane ageng pada maluab.
16
Titiang miragi indike punika makasami tur titiang jejeh ngetor miwah bungut titiange ngejer santukan ajerih pisan. Dewek titiange rumpuh macepol, tur buntut titiange pada katanjung ring genah titiange. Maduluran manah sane degdeg, titiang nyantosang panemayane sane jaga rauh, inggih punika panemayan Ida Sang Hyang Widi Wasa pacang nyisipang jadmane sane ngebug titiang.17
Yadiastu wit aane nenten mawoh miwah anggure nenten mawoh, yadiastun wit saitune nenten mupu miwah pategalane nenten mupu gandum, yadiastun biri-birine padem makasami miwah badan bantenge puyung makasami,18
titiang jaga tetep liang tur masuka rena, santukan Ida Sang Hyang Widi Wasa dados juru rahayun titiange.
19
Ida Sang Hyang Widi Wasa Sane Maha Luur ngicen titiang kakuatan, Ida ngawinang tindakan titiange keted, waluya sakadi manjangane, tur Ida matiningin titiang saha rahayu ring gunung-gununge.”