1
Puniki sabda ngeniang kota Niniwe, inggih punika wahyu sane kakantenin antuk Dane Nahum saking Elkos.2
Ida Sang Hyang Widi Wasa nenten ledang yen wenten sane nyamenin Ida, tur Ida nyisipang anake sane nglawan Ida. Sajeroning pidukan Idane, Ida nibakang pangwales ring anake punika.
3
Ida Sang Hyang Widi Wasa nentenja gelis duka, nanging Ida maha kuasa tur Ida tan manggayang jadmane sane dursila tan keni pasisip.
4
Ida mrentahang segarane, tur segarane punika raris tuh. Ida sane ngawinang tukade pada tuh. Tegal-tegale ring Basan dados tuh, Gunung Karmele magentos dados marupa soklat, tur sekar-sekare ring Libanon pada layu.
5
Ring ayun Ida Sang Hyang Widi Wasa gunung-gununge pada magejeran, tur bukit-bukite dados enceh. Tanahe magenjongan rikala Ida rauh, tur jagat lan rakyatnyane makasami pada ngetor.
6
Sirake sane nyidayang kantun urip, yening Ida Sang Hyang Widi Wasa duka! Sirake sane jaga nyidayang urip rikalaning dukan Idane angarab-arab? Ida mriokang bendun Idane sane murub, tur batu-batune nyag dados abu ring ajeng Idane.
7
Ida Sang Hyang Widi Wasa maraga becik. Ida nyayubin parakaulan Idane ring masa kamewehane, tur miara anake sane mawali tangkil ring Ida.8
Sakadi blabare ageng sane mamuuk, Ida ngenyagang meseh-meseh Idane, tur Ida ngamedalang anake sane purun nglawan Ida.
9
Napike awinanipun ragane saigum jaga nglawan Ida Sang Hyang Widi Wasa? Ida pacang ngenyagang ragane. Wantah apisan kewanten anake mrasidayang nglawan Ida.
10
Sakadi bun duine miwah sumine sane tuh, ragane pacang kabasmi.
11
Ih Niniwe, uli tengah ibane lakar metu jlema aukud ane setata ngreka kacorahan tur ngrincikang daya buat nglawan Ida Sang Hyang Widi Wasa.12 Ida Sang Hyang Widi Wasa ngandika ring kaulan Idane bangsa Israel sapuniki: “Yadiastuja bangsa Asure ento siteng tur ajaka liu, nanging ia lakar kanyagang kanti telah. Ih parakaulan Ulune, Ulun suba nibakang kasangsaran teken kita nanging Ulun tusing lakar buin ngae ane buka keto marep teken kita.
13 Ane jani Ulun lakar nyuudang kakuatan Asure nindes kita, tur lakar ngetep ante-antene ane negul kita.”
14
Puniki pawarah Ida Sang Hyang Widi Wasa ngeniang indik bangsa Asure: “Ia tusing lakar ngelah katurunan ane lakar nutugang adanne. Ulun lakar ngenyagang arca-arca ane di tengah puran dewa-dewanne. Ulun lakar nyediang kuburan pabuat bangsa Asure, sawireh ia tusing pantes enu idup.”15
Indayangja cingakin, punika wenten utusan sane rauh saking gunung-gununge makta orti sane becik. Ipun sedek kantun ring margi, buat ngortiang kamenangan. Ih bangsa Yehuda, marerainan tur taurja sesangin semetone ring Ida Sang Hyang Widi Wasa. Anake sane jaat nenten pacang malih ngebug jagat semetone. Ipun sampun kasirnayang kantos basmi kerta.1
Ih Niniwe, ragane jaga kagebug. Kakuatan sane jaga ngenyagang ragane sampun rauh. Jagaja bentenge! Jagaja margine! Sregepangja ragane jaga mayuda! (2 Ida Sang Hyang Widi Wasa pacang ngwaliang malih kaluihan Israele, sakadi sadurung meseh-mesehnyane ngrampokin ipun.)
3
Paraprajurit mesehe makta tamiang barak tur ngangge pangangge seragam barak. Ipun sampun sregep pacang magegebug. Kreta-kreta perangnyane ngendih sakadi genine, tur kuda-kudannyane jibrag-jibrag.
4
Kreta-kreta perange pasliwer nglintang ring margi-margine, tur ipun bulak-balik ring alun-alun kotane. Kreta-kreta punika ngendih sakadi obor miwah malaib macuet sakadi tatite.5
Paraprawirane sami kapunduhang, dane katanjung rikala dane mangseh maju.
6
Gapura-gapura sane ring sisin tukade kupak mabukak, tur purine kaliput antuk kaributan.
7
Sang pramesuari kambil tur kabakta medal. Parapanyeroan Idane pada ngeling sakadi paksi darane nigtig tangkahnyane kabatek antuk kaduhkitannyane.
8
Sakadi toyane sane membah saking empelan sane uug, rakyate ngrudug medal saking kota Niniwe. Wenten sane jerit-jerit sapuniki: “Ngoyong-ngoyong!” nanging nenten wenten sane nyak malipetan.
9
Rampasja peraknyane, rampas masnyane. Kotane puniki bek madaging arta brana.10
Kota Niniwene uug, kakutang tur suung. Sakancan manah anake sami benyah rehning katakutan. Entudnyane ngetor tur kakuatannyane sampun telas. Muannyane sami pada kembang lece.11
Sane mangkin dijake kotane sane sakadi guan singa punika, genah panak-panak singane pada neda tetedannyane, genah sane kungsi antuk singane luh wiadin muani, genah panak-panaknyane muponin rahayu?12
Singane punika ngamademang tetedannyane tumuli kapukang-pukang buat kawehin timpal miwah panak-panaknyane, tur ipun ngebekin guannyane antuk daging mapukang-pukang.
13
Ida Sang Hyang Widi Wasa Sane Maha Kuasa ngandika kadi asapuniki: “Ulun ene musuh kitane. Ulun lakar ngedeng kreta-kreta perang kitane. Paraprajurit kitane lakar mati di pasiatan tur Ulun lakar nyemak sakancan barang ane suba rampas kita uli anak lenan. Kakuasan kitane di gumine tusing enu buin madingehan.”1
Sengkala ragane ih kota sane dados tukang ngamademang anak, kota sane bek madaging arta brana rerampasan miwah barang rampokan.2
Piragiangja suaran pecute, gredegan roda-rodane, kredekan buntut kudane miwah krosokan kreta-kreta perange.
3
Pasukan sane nunggang kuda mangseh ngebug. Pedang-pedange ngreneb tur tumbake makelep. Bangke-bangkene madugdug, tur bangken jadmane padem tan keni winilang ngawinang anake pada katanjung.
4
Kota Niniwe, sundele punika mangkin kasisipang. Ipun jegeg pisan tur nganggen pangiwa. Ipun ngawinang bangsa-bangsane pada kasemaran, raris bangsa punika kapanjakang.
5
Ida Sang Hyang Widi Wasa Sane Maha Kuasa masabda sapuniki: “Ih Niniwe, Ulun lakar nyisipang kita. Ulun lakar nglalungin kita apang tepukina teken bangsa-bangsane, tur parabangsane lakar pada nepukin kimud kitane.6
Ulun lakar nganistayang kita, tur ngaput kita baan leteh. Anake lakar pada mabalih kita maduluran karesresan.
7
Makejang anake ane ngenot kita lakar pada makirig tur pada ngraos kene: ‘Kota Niniwene suba uug. Nyenke ane lakar madalem ia? Nyenke ane lakar nglipur ia?’ ”
8
Ih Niniwe, apake iba melahan teken kota Tebe ane dadi ibukotan Mesire? Ia masih ngelah tukad ane nyayubin ia patuh buka temboke, nah ento Tukad Nile ane dadi bentengne.9 Ia mrentah Sudan muah Mesire, tur kakuasannyane tusing ada watesne. Gumi Libiane dadi kantinnyane.
10 Nanging yadiastu keto, rakyat Tebene masih suba kaselong. Disabilang belokan jalane pianak-pianaknyane katigtig kanti mati. Parapamimpinnyane katehang maante tur ia lantas kadum-dum baan anake ane nawan ia.
11
Ih Niniwe, kita masih lakar punyah klenger, kita lakar makeneh ngluputang dewek uli sig musuh-musuh kitane.12 Benteng-benteng kitane makejang lakar patuh buka punyan aane ane buahne suba mayang. Yen ia ogar, sinah buahne lakar pacepolpol ulung di bungut kitane.
13 Paraprajurit kitane lakar dadi buka anake luh, tur gumin kitane tusing ada ane melanin di arepan musuh-musuh kitane. Palang-palange ane di gapura-gapuran kitane lakar benyah amah api.
14 Timbaang ibane yeh pasediaan dikalane kita suba kakurung, tur kuatangja benteng-benteng kitane. Jekjekja luluhe anggon bata, tur angkidangja panyitakanne.
15 Kenkenang kitaja mapakibeh, nanging kita masih lakar mati puun wiadin mati di pasiatan. Kita lakar kasapuh buka pamupone amah balang, yadiapinja kita liu buka balange.
16 Parasudagar kitane liunan teken bintang-bintange di langite, nanging ane jani ia makejang pada telah buka balange ngebatang kampidne laut makeber.
17 Paraprakanggon kitane liu buka balange asebun ane nongos di tembok-temboke dimasan dingine. Nanging dikalan suryane endag, ia pada makeber tur tusing ada anak nawang kija kaden pakaadnyane.
18
Ih ratun wong Asure, paragubernur kitane makejang suba mati, tur parasulinggih kitane suba pules sakayang-kayang. Rakyat kitane pablesat di gunung-gununge, tur tusing ada anak ane ngajak ia buin mulih.19 Sakit atin kitane tusing prasida kubadin, tur tatu-tatun kitane tusing lakar dadi uas. Sakancan anake ane ningehang unduk uug kitane lakar andup-andup kabatek baan liang idepne. Apake ada anak ane luput uli laksanan kitane ane tan mari jaat ento?