1
Ritatkala Ida Sang Prabu Yotam, Ahas miwah Sang Prabu Hiskia jumeneng prabu ring panegara Yehuda, Ida Sang Hyang Widi Wasa masabda ring Dane Mika, anak saking kota Moreset. Ida Sang Hyang Widi Wasa ngedengang ring Dane Mika paindikan-paindikan sane nibenin kota Samaria miwah kota Yerusaleme.2
Ih parabangsane sami, pirengangja paindikane puniki, ih sawatek sane urip ring mrecapada pirengangja paindikane puniki! Ida Sang Hyang Widi Wasa Sang Maha Luur makadados saksi nglawan ragane. Pirengangja! Ida masabda saking Perhyangan Idane sane suci.
3
Ida Sang Hyang Widi Wasa medal saking linggih Idane sane suci. Ida pacang tumurun tur mamargi ring pucak-pucak gununge.
4
Irika gunung-gununge pacang enceh ring sor buk padan Idane, tan bina sakadi lilin ring genine sane ngendih; ipun jagi maliah ka lebake sakadi toyane membah saking bukite.
5
Sakancan paindikane punika pacang kalaksanayang, santukan bangsa Israele sampun ngardi dosa tur brontak pamantuka ring Ida Sang Hyang Widi Wasa. Sapasirake sane patut kiwangang, uli krana pembrontakan wong Israele punika? Tan wenten lian wantah ibukotannyane inggih punika: kota Samaria. Sapasirake sane iwang malantaran wentenipun indik nyungsung dewa-dewa ring Yehuda? Wantah Yerusalem, ibukotannyane punika.6 Duaning punika Ida Sang Hyang Widi Wasa raris ngandika kadi asapuniki: “Samaria lakar dadiang Ulun buka gegumuk di tegale, ia lakar dadi tongos mamula anggur. Ulun lakar nglilikang batu-batun kotane ento ka lebake tur lakar ngebet dasar kotane ento.
7 Saananing arca-arcannyane ane maji lakar kanyagang, buina sakancan upah panayange di perhyangane lakar katunjel, tur palawatannyane makejang lakar enu madugdug tur tusing ada anak ngrunguang. Kota Samariane maan barang-barange ento baana ia nyalanang upacara kasuburan. Nanging ane jani musuh-musuhnyane lakar nyuang barang-barange ento lakar anggona mabakti di tongos ane lenan.”
8
Sasampune punika Dane Mika raris mabaos sapuniki: “Malantaran punika tiang jagi nandang sedih tur masesambatan. Buat nyinahang duhkitan manah tiange, tiang jaga mamargi milehan tan pasandal tur malalung. Tiang jaga aung-aung sakadi asu ajage miwah ngulun-ulun sakadi paksi kasuarine.9 Tatu-tatun Samariane nenten pacang sida uas, tur Yehuda taler nandang paindikan sane pateh kadi asapunika. Bencanane sampun rauh ring gapuran kota Yerusaleme, ring genah bangsan tiange.”
10
Sampunang tuturanga ring meseh tiange ring Gat, indik kaon tiange. Sampunang ipun kantos manggihin ragane nangis. Ih wong Bet-Le-Apra; edengangja kamewehan ragane malantaran glalang-gliling ring buke!11 Ih wong Sapir rarisangja mamargi ka paselongan, sarwi malalung tur nandang kimud. Samaliha jadmane sane magenah ring Saanan, ipun tan purun medal saking kotannyane. Yening ragane mireng wong Bet-Haesel pada nandang duhkita, irika ragane wikan, mungguing irika nenten wenten genah masayuban.
12 Anake sane ring Marot sarat pisan ngajap-ajap mangda polih pitulungan, santukan Ida Sang Hyang Widi Wasa sampun ngrauhang bencana sane nganampekin kota Yerusaleme.
13 Samaliha sang sane malinggih ring Lakis, pasangja kudane ring kretane. Ragane nulad-nulad dosa-dosan Israele tur ngawinang Yerusaleme madosa.
14 Sane mangkin ih wong Yehuda, mapamitja ragane saking kota Moreset-Gat. Pararatun bangsa Israel nentenja pacang polih pitulungan saking kota Ahsib.
15
Ih anak sane malinggih ring Maresa, Ida Sang Hyang Widi Wasa pacang nyerahang ragane ring meseh sane pacang ngaonang kotan ragane. Parapamimpin Israel sane luih pacang makaon tur pacang masingidan ring guane ring Adulam.16 Ih semeton rakyat Yehuda, getepja rambut semetone buat mangenang oka-okan semetone sane tresnain semeton. Gundulja duur semetone kantos lengar sakadi tendas paksi ngosngosane, santukan oka-okan semetone pacang kambil saking ajeng semetone buat jaga kaselong.
1
Ambate sangsaranipun jadmane sane ngrencanayang kajaatan tur ngrincikang pangindrajala ring pasareannyane. Sasampune semengan, rikala ipun sampun polih sela, digelis nglaksanayang kajaatan sane rencanayang ipun.2 Yening ipun mamanah maderbe tegal, ipun ngrampas tegal anak tios. Yening ipun mamanah maderbe umah, ipun ngambil umah anak tiosan. Nenten wenten kulawarga wiadin paderbean sane aman.
3
Punika awinan Ida Sang Hyang Widi Wasa masabda sapuniki: “Ulun mapakayun nibakang bencana marep teken kita, tur kita tusing lakar nyidayang luput uli bencanane ento. Kita lakar nandang kakewehan tur kita lakar tusing nyidayang buin matingkah mrekak.4 Yening masane ento teka, unduk kitane lakar anggona conto bencana baan anake, tur anake lakar pada makidung, ngidungang unduk kakewehan ane tandangin kita kene: ‘Iraga suba dadi dekdek lidek. Ida Sang Hyang Widi Wasa suba ngambil tanah iragane, tur Ida nyerahang tanahe ento teken anake ane nawan iraga.’ ”
5
Ento krana, dikalan teka panemayan tanahe ento lakar buin kulihang teken parakaulan Ida Sang Hyang Widi Wasa, ditu kita lakar tusing maan duman angan abedik.6
Rakyate mituturin tiang sapuniki baosnyane: “Sampunangja mapitutur ring tiang sareng sami. Sampunangja malih maosang sakancan paindikane punika. Ida Sang Hyang Widi Wasa tanja pacang ngawinang kimud.7 Punapike jerone mitaenang wong Israele sampun keni temah? Punapike Ida Sang Hyang Widi Wasa sampun nenten kantun sabar? Punapike Ida wiakti jaga nglaksanayang paindikane punika? Punapike Ida nenten pacang masabda becik ring anake sane mapakerti patut?”
8
Pasaur Ida Sang Hyang Widi Wasa sapuniki: “Kita suba ngamusuhin kaulan Ulune. Anake ane mara mulih uli pasiatan, ia ngaden ibanne rahayu teked jumah. Nanging kita suba nyadang buat lakar mamaling bajunne uli duri.9 Kita nundung luh-luhe apanga makaad uli umah ane tresnaina, laut ngrampas mertan Ulune ane paicayang Ulun teken pianak-pianakne kanti salawas-lawasne.
10 Jani bangunja tur makaad uli dini. Dini tusing ada tongos ane rahayu buat kita. Dosan kitane suba ngranayang tongose ene kuugang.
11
Rakyate ene ngajap-ajap nabi ane bogbog tur bobab, ane ngraos kene: ‘Tiang ngramalang, mungguing anggur muah arake lakar membah sig ragane.’12
Nanging Ulun lakar munduhang kita, sawatek bangsa Israel ane enu masisa dini. Ulun lakar munduhang kita buka biri-birine ane mulih ka kandange. Buka tegal pangonane ane bek misi biri-biri, buka keto masih gumin kitane buin lakar bek baan jlema.”13
Ida Sang Hyang Widi Wasa jaga mukak margi buat ipun tur nuntun ipun medal saking tawanan. Ipun pacang ngrusak gapuran kotane tur makaon saha bebas. Rajanipune, inggih punika Ida Sang Hyang Widi Wasa ngraga pacang nuntun ipun medal.1
Ih parapamimpin bangsa Israel! Pirengangja baos tiange! Semeton mitaenang mungguing semeton sampun ngamargiang kadilan.2 Nanging semeton geting ring sane becik tur seneng ring paindikan sane jaat. Semeton mlulangin bangsan tiange saha mesbes isi sane neket ring tulangnyane.
3 Semeton makpak tur nguluh bangsan tiange. Semeton nglupakin kulitnyane, ngelung-elung tulangnyane, tur ngeet-ngeet isinnyane sakadi ngeet ulame sane jaga kalablab ring pancine.
4 Pacang rauh masan semetone jaga masesambatan nunas ica ring Ida Sang Hyang Widi Wasa, nanging Ida nenten pacang nyaurin pinunas semetone. Ida nenten pacang kayun mireng pangastawan semetone santukan semeton sampun malaksana corah.
5
Bangsan tiange sampun kabelog-belog antuk nabine sane nyanjiang pacang wenten dame ring anake sane ngupahin dane, nanging ring anake sane nenten ngaturang upah, dane ngemprag anake punika, mungguing jaga wenten perang. Pabuat paranabine sane malaksana kadi asapuniki, Ida Sang Hyang Widi Wasa masabda kadi asapuniki:6 “Ih paranabi, masan kitane dadi nabi suba makire suud. Matan aine suba makire ieb buat kita. Sawireh kita suba ngranayang kaulan Ulune kasasar, kita tusing buin maan wahyu, tur kita tusing enu buin nyidayang ngramal.”
7 Anake sane ngramalang masa sane pacang rauh, ipun pacang nandang kimud, santukan indik sane baosang ipun punika sami nenten pacang kasidan. Anake punika sami pacang kanistayang santukan Ida Sang Hyang Widi Wasa nenten nglinggihin aturipune.
8
Nanging pabuat tiang, Ida Sang Hyang Widi Wasa ngebekin tiang antuk roh miwah kawisesan. Ida ngicen tiang rasa kadilan tur kawanenan buat nlehtehang ring bangsa Israele ngeniang indik dosa-dosanipune.9 Pirengangja atur tiange, ih parasemeton pamimpin bangsa Israele. Semeton geting ring kadilan tur nyilurin paindikan sane patut antuk sane iwang.
10 Semeton nasarin kota Yerusaleme, kotan Ida Sang Hyang Widi Wasa, antuk laksana mamati-mati miwah pekerti sane tan adil.
11 Pamrentah kotane punika ngamargiang pamrentahan buat ngulati tetombokan, parapanditane nerangang pidabdab Ida Sang Hyang Widi Wasa mangda dane polih upah, tur paranabine ngwetuang ramalan mangda dane polih jinah, tur dane sareng sami pada maosang, mungguing Ida Sang Hyang Widi Wasa ngiangin dane. Sapuniki baos danene: “Tan wenten bencana sane pacang nibenin iraga, Ida Sang Hyang Widi Wasa ngiangin iraga.”
12
Duaning punika ulihan parasemeton, kota Sione jaga katenggala sakadi nenggala tegalane. Kota Yerusaleme pacang dados gegumuk, tur Perhyangan Agunge pacang dados alas.1
Ring rahinane sane pacang rauh, gunung genah Perhyangan Agunge kadegang, pacang dados gunung sane pinih tegeha, nyeleg nglangkungin bukit-bukite sami. Akeh bangsa-bangsane pacang membah rauh mrika.2
Samaliha rakyatnyane pacang mabaos asapuniki: “Jalanja pada menek ka gunung Ida Sang Hyang Widi Wasa, ka Perhyangan Agung Widin bangsa Israele. Sawireh Ida lakar ngajahin iraga pakarsan Idane, ane patut laksanayang iraga. Iraga majalan di margane ane patujuhang Ida, sawireh paurukan Ida Sang Hyang Widi Wasa metu uli Yerusalem. Uli di Sion Ida masabda teken kaulan Idane.”
3
Ida pacang ngwentenang pasogsag ring pantaran bangsane, ring pantaran parabangsa sane ageng tur kuat, sane doh wiadin sane nampek. Bangsa-bangsane punika pacang noktok pedang-pedange kadadosang pangigi tur tumbak-tumbaknyane kadadosang pangiris. Bangsa-bangsane nenten pacang naenin malih maperang miwah nenten naenin malih malatih buat maperang.4
Anake suang-suang pacang muponin sutrepti rahayu ring pabianan anggur miwah wit aannyane, samaliha nenten wenten anak sane ngawinang ipun jejeh. Ida Sang Hyang Widi Wasa Sane Maha Kuasa sane sampun majanji kadi asapunika.
5
Bangsa-bangsane sane lianan sami pada nyungsung tur ninutin dewannyane suang-suang, nanging iraga pacang nyungsung tur satinut ring Ida Sang Hyang Widi Wasa, Widin iraga salami-laminipun.6
Pangandikan Ida Sang Hyang Widi Wasa sapuniki: “Lakar ada masanne Ulun lakar munduhang sawatek anake ane suba sisipang Ulun, nah ento anake ane suba nandang sangsara di paselongan.7 Anake ento pada perot joh uli umahnyane, nanging Ulun lakar buin majumu aji sisanne ane enu ento. Ia lakar dadi bangsa ane gede. Ulun lakar mrentah ia uli Gunung Sion ngawit uli didinane ento kanti salawas-lawasne.”
8
Pabuat ragane ih kota Yerusalem, ring genah Ida Sang Hyang Widi Wasa makadados pangangon nantan kaulan Idane, ragane malih pacang dados ibukota kaprabone sakadi sane sampun-sampun.9 Napi awinan ragane nangis jerit-jerit sakadi asapunika? Napi awinan ragane nandang sangsara sakadi anak luh nyakit ngembasang rare? Punapike malantaran ragane nenten madue sang prabu? Punapike malantaran parapangabih ragane sampun pada seda?
10 Makliud tur pada duuh-duuhja ih wong Yerusaleme, sakadi anake istri sane jaga ngembasang rare, santukan semeton sane mangkin tan urungan pacang ninggal kotane puniki tur pacang malinggih ring tegale. Semeton tan dados tanan pacang mamargi ka Babel, nanging irika Ida Sang Hyang Widi Wasa pacang ngluputang semeton saking meseh-meseh semetone.
11 Akeh bangsa-bangsane sane sampun pada mapunduh jaga ngebug semeton. Ipun mabaos sapuniki: “Yerusaleme patut kuugang! Iraga dot ngatonang kotane ene uug!”
12 Nanging bangsa-bangsane punika nenten uning napi sujatinne sane dados daging pakayunan Ida Sang Hyang Widi Wasa. Ipun nenten pisan uning mungguing ipun sampun kapunduhang punika buat jaga kasisipang pateh sakadi gabahe sane kabakta ka panyosohane.
13
Pangandikan Ida Sang Hyang Widi Wasa sapuniki: “Ih wong Yerusalem, kema ukum musuh-musuh kitane! Ulun lakar nadiang kita kuat buka sampi jagirane matanduk besi tur makuku temaga. Kita lakar liu ngenyagang bangsa, tur kasugihannyane ane bakatanga baan kawirosan, ento lakar aturang kita teken Ulun, Widin gumine makejang.”1
Ih wong Yerusalem tunggilang kakuatan semetone! Iraga sampun kiter antuk imeseh. Ipun sampun ngebug pamimpin bangsa Israele.2
Ida Sang Hyang Widi Wasa ngandika asapuniki: “Ih Betlehem Eprata, kita kota ane paling cenika dini di Yehuda, nanging uli sig kitane Ulun lakar ngwetuang anak ane lakar dadi pamrentah Israele, ane kawitnyane suba uli purwakala.”3
Punika awinannyane Ida Sang Hyang Widi Wasa pacang nyerahang kaulan Idane ring mesehnyane, kantos rauh panemayanipun anake istri sane pacang ngembasang rare punika, madue putra lanang. Kala punika parasemetonnyane sane tiosan sane kantun ring paselongan pacang malih kapunduhang dados asiki ring kaulan Idane.4 Yening Ida sampun rauh, Ida pacang mrentah kaulan Idane antuk kakuatan paican Ida Sang Panembahan miwah masrana kagungan Ida Sang Hyang Widi Wasa ngraga.
5 Kaulan Idane pacang tan mari muponin karahayuan, santukan jadmane makajagat pacang ngangkenin kagungan Idane, samaliha Ida jaga rauh makta dame.
Yening wong Asure rauh ngebug panegaran iragane saha ngrusak benteng iragane, iraga pacang ngutus pamimpin-pamimpin iragane sane pinih siteng buat nglawan ipun.6 Malantaran kawisesan danene, dane jaga ngaonang jagat Asure, tur dane jaga ngluputang iraga saking wong Asure, rikalaning ipun rauh ngebug wewidangan iragane.
7
Wong Israele sane kantun urip pacang sakadi damuh sane tumurun saking Ida Sang Hyang Widi Wasa pabuat parabangsane katah miwah sakadi sabeh sane nyriokin entik-entikane. Ipun wantah pacang andel ring Ida Sang Hyang Widi Wasa kewanten tur nenten ngandelang manusa.8 Wong Israele sane kantun ring pantaran bangsa-bangsane sane tiosan, ipun tan bina sakadi singa sane ngrereh teda ring alase wiadin ring tegal pangonane. Ipun ngranjing ring pantaran biri-birine saha nyarap tur mokeng-mokeng biri-birine punika kantos dados makudang-kudang pukang, tur nenten wenten anak sane rauh nulungin.
9 Israel pacang ngaonang mesehipune tur pacang nyirnayang ipun makasami.
10
Pangandikan Ida Sang Hyang Widi Wasa sapuniki: “Dikalane ento Ulun lakar nyuang jaran-jaran kitane muah ngrusak kreta-kretan kitane.11 Ulun lakar ngrusak kota-kota ane di gumin kitane tur nguug benteng-benteng kitane makejang.
12 Ulun lakar nyirnayang sabuk pangiwa ane anggon kita muah balian tenung kitane lakar kaadang Ulun.
13 Ulun lakar nyirnayang arca-arcan kitane muah palinggih-palinggih kitane ane suci, tur kita tusing enu buin lakar nyungsung barang-barang pagaen kita padidi.
14 Ulun lakar nyirnayang palawatan Dewi Aserane ane di gumin kitane tur nguugang kota-kotan kitane.
15 Sajeroning pidukan Ulune ngendih murub Ulun lakar nibakang pangwales marep teken bangsane ane tusing satinut teken Ulun.”
1
Pirengangja wicaran Ida Sang Hyang Widi Wasa marep ring bangsa Israele. Matangija duh Ratu Sang Hyang Widi Wasa, tur nikayangja wicaran Palungguh IRatune, mangdane gunung-gunung miwah bukit-bukite pada miragi pangandikan Palungguh IRatune.2
Ih gunung-gunung, ih dasar gumi ane langgeng padingehangja wicaran Ida Sang Hyang Widi Wasa! Ida Sang Hyang Widi Wasa madue wicara marep teken kaulan Idane. Ida mapakayunan nalih bangsa Israele.3
Ida Sang Hyang Widi Wasa masabda sapuniki: “Ih parakaulan Ulune, apa ane laksanayang Ulun marep teken kita? Tetegenan apa ane suba taen pategenang Ulun teken kita? Tegarang sautin sabdan Ulune.4 Ulun suba ngajak kita rarud pesu uli Mesir, Ulun suba mebasang kita uli tongos kitane dadi panjak. Ulun ngutus Musa, Harun muah Miryam buat nuntun kita.
5 Ih kaulan Ulune ingetangja rencanan Sang Prabu Balake ane uli Moab ane lakar kalaksanayang marep teken kita, tur buka kenken abetne Bileam pianak Beore ngraos teken ia. Buina ingetangja paundukan ane suba kasidan di jalan, ngawit uli tongose nginep di Sitim kanti neked di Gilgal. Ingetangja paundukane ene, sinah kita lakar ngresep teken unduk ane suba laksanayang Ulun buat lakar ngrahayuang kita.”
6
Napike sane patut aturang tiang ring Ida Sang Hyang Widi Wasa, Widi sane ring suargan, rikalane tiang mabakti ring ayun Idane? Punapike tiang patut makta godel banteng makadados aturan sane maborbor pabuat Ida?7 Punapike Ida Sang Hyang Widi Wasa ledang ring kayun, yening tiang ngaturang ring Ida biri-biri panyatusan wiadin minyak saitun sane membah tan papegatan? Punapike tiang patut ngaturang pianak tiange sane pinih keliha, buat nebus dosa-dosan tiange?
8 Boyaja kadi asapunika! Ida Sang Hyang Widi Wasa sampun mapaica dauh pangandika ring tiang sareng sami ngeniang paindikan sane becik. Sane arsayang Ida ring tiang sareng sami inggih punika: malaksana sane adil, nyinahang kapitresnan sane tan rered-rered, tur ngastiti bakti ring Ida Sang Hyang Widi Wasa maduluran manah sane alap asor.
9
Wicaksana pisan sang sane ajerih ring Ida Sang Hyang Widi Wasa. Ida ngandika ring kotane punika, sapuniki: “Padingehangja, ih anak ane mapunduh di kota!10 Sig umah jlemane jaat ditu liu ada brana ane bakatanga baan mamekel. Ia nganggon panakehan ane palsu, unduk ane mula getingin Ulun.
11 Kenkenang Ulun ngampurayang anake ane nganggon timbangan muah panakehan ane palsu?
12 Anake ane sugih nyakitin anake tiwas, buina kita ajak makejang bogbog.
13 Ento awanane Ulun suba sedia lakar ngawitin nguug tur nyirnayang kita uli krana dosa-dosan kitane.
14 Kita lakar ngamah, nanging tusing betek, malahan kita lakar enu layah. Kita lakar ngisiang barang-barang, nanging kita tusing lakar nyidayang nyepel barange ento. Saananing ane sepel kita lakar sirnayang Ulun di pasiatan.
15 Kita lakar nyambeh bibit nanging kita tusing lakar manyi. Kita lakar meres lengis saitun, nanging kita tusing lakar taen nganggon lengise ento. Kita lakar ngae anggur, nanging kita tusing lakar taen nginem anggure ento.
16 Paundukane ene lakar kasidan buka keto, sawireh kita nuutin laksanan Sang Prabu Omri muah pianakne Akab ane jaat. Kita nerusang kawicaksanannyane, ento krana Ulun lakar ngrusak kita, tur makejang anake lakar nganistayang kita. Di sakuub gumine kita lakar tansah kanistayang.”
1
Sampun tan wenten sane nyandang ajap-ajap malih. Tiang tan bina sakadi anake sane seduk sane nenten polih woh taru angan asiki ring punyannyane miwah nenten polih anggur ring punyan anggure. Woh anggur miwah woh aane sami sampun kalap.2 Nenten wenten jadma sane jujur kantun ring jagate punika. Nenten wenten jadma sane astiti bakti ring Ida Sang Hyang Widi Wasa. Anake suang-suang pada ngrereh sela pacang ngamademang anak. Anake suang-suang pada morosin timpalnyane.
3 Ipun sami pada ririh buat mapakardi ala. Paraprakangge lan parahakime pada kuduan ring tetombokan. Anake sane kalekin maosang ring ipun indik sane dotang ipun, punika awinan ipun sareng-sareng mapaiguman.
4 Jadmane sane pinih becik miwah pinih jujur ring pantaran ipune, taler tan paguna waluya sakadi ketkete.
Sampun rauh panemayannyane, Ida Sang Hyang Widi Wasa pacang nyisipang jadmane, sakadi pituduh Idane malantaran paranabine. Sane mangkin ipun pada bingung.5 Sampunangja pracaya ring parapisaga miwah ngugu parasawitran semetone. Tangarin pisan mabaos yadiastun marep ring rabin semetone.
6 Rikala punika ipianak muani pacang nganistayang bapannyane sakadi anak sane nambet, ipianak sane luh nglawan memennyane, samaliha paraibune pacang ieg nglawan matuannyane luh, tur meseh anake punika wenten sajeroning kulawargannyane niri.
7
Sakewanten tiang tan mari pacang nyantosang Ida Sang Hyang Widi Wasa. Tiang pacang ngajap-ajap Ida Sang Hyang Widi Wasa sane ngrahayuang tiang. Widin tiange pacang mireng pinunas tiange.8
Meseh-meseh iragane nenten polih dadalan buat nyumbungang dewek marep ring iraga. Iraga sampun labuh, nangingke pacang bangun malih. Sane mangkin iraga sedek kaliput antuk peteng dedet, nanging Ida Sang Hyang Widi Wasa pacang ngicen iraga galang.9 Iraga sampun madosa pamantuka ring Ida Sang Hyang Widi Wasa tur sane mangkin iraga patut negen pidukan Idane ajebos. Nanging ring pamuputipun Ida pacang nindihin iraga, tur matutang sakancan paindikan sane iwang sane sampun katibakang ring iraga. Ida pacang nuntun iraga ka genahe galang. Iraga pacang urip tur manggihin Ida ngrahayuang iraga sami.
10 Irika parameseh iragane ngatonang indike puniki tur ipun pacang kimud, inggih punika mesehe sane pecak mataken ring tiang: “Dijake Ida Sang Hyang Widi Wasa, Widin jerone?” Iraga pacang manggihin ipun pada kaon, kajekjek tan bina sakadi endute ring margine.
11
Ih wong Yerusalem, panemayan buat ngwangun malih tembok kotane sampun rauh. Ring masane punika wewidangan ragane pacang kalinggahang.12 Rakyat ragane pacang rauh mawali ring ragane saking sakuubing jagat, luiripun saking Asur sane bedangin, saking Mesir sane bedelod, saking wewidangan Eprate, saking segara miwah saking gunung-gunung sane doh-doh.
13 Nanging jagate pacang dados tegal melakang, uli krana jadmane sane jaat-jaat sane magenah irika.
14
Duh Ratu Sang Hyang Widi Wasa, angonangja kaula druene, inggih punika kaula seselikan druene. Yadiastun ipun magenah ring tegal melakange, irika taler wenten tanah sane gemuh landuh ring kiwa tengennyane. Lugrainja ipun ngrereh teda ring pangonane sane lumlum ring Basan miwah ring Gilead, sakadi sane sampun margiang ipun ring masa sane sampun-sampun.15
Duh Ratu Sang Hyang Widi Wasa, rarisangja ngardi katawahan-katawahan pabuat titiang sakadi sane sampun kardi Palungguh IRatu ritatkala Palungguh IRatu nuntun titiang rarud saking Mesir.16 Parabangsane pacang ngeton paindikan punika, tur jaga bingung sajeroning kasitenganipune. Sajeroning ipun rumasa resres, ipun jaga nekep bungutipune, tur nekep kupingipune.
17 Ipun pacang maguyang ring buke sakadi ula. Ipun pacang medal saking benteng-bentenge sarwi ngetor malantaran ajerihipune. Ipun pacang ajerih ring Ida Sang Hyang Widi Wasa, Widin iragane.
18
Nenten wenten Widi sane sakadi Palungguh IRatu, duh Ratu Sang Hyang Widi Wasa. Palungguh IRatu ngampurayang dosa-dosan kaula druene sane kantun urip mangkin. Palungguh IRatu nentenja kantun duka ngantos salami-laminipun, nanging Palungguh IRatu ledang malih ngetelang sih pasuecan sane nenten rered-rered ring titiang.19 Palungguh IRatu malih pacang asung lugraha ring titiang sareng sami. Palungguh IRatu pacang nyekjek dosa-dosan titiange ring sor buk padan Palungguh IRatu, tur jaga ngentungang punika ka dasar segarane.
20 Palungguh IRatu pacang nyinahang kasatian miwah sih pasuecan Palungguh IRatune sane nenten rered-rered ring kaula druen Palungguh IRatu, parakaturunan Dane Abraham miwah Dane Yakub, sakadi janjin Palungguh IRatune ring leluur titiange sane nguni.