1
Sedek rahina anu, Ida Sang Hyang Widi Wasa masabda ring Dane Yunus okan Dane Amitai.2 Sapuniki sabdan Idane: “Kemaja kita luas ka Niniwe, kotane ane gede ento, tur orahang teken ia mungguing Ulun nawang unduk dosan rakyate ditu gede pesan.”
3 Nanging Dane Yunus raris lunga ka genah sane tiosan misadia jaga makaon saking ayun Ida Sang Hyang Widi Wasa. Dane tumuli lunga ka Yopa, tur numpang kapal sane pacang malayar ka Sepanyol. Dane raris naur ongkosne, tumuli malayar sareng-sareng ring paraklasin kapale, ngungsi ka Spanyol, tur irika dane jaga doh saking ayun Ida Sang Hyang Widi Wasa.
4 Nanging Ida Sang Hyang Widi Wasa raris ngrauhang angin baret ka segarane punika, tur ngawinang ombake ageng pisan kantos kapale punika tambis-tambis bencah.
5 Paraklasin kapale makasami jejeh ngetor tur ipun pada pagelur nunas ica ring dewannyane suang-suang. Sasampune punika, ipun raris ngentungang muatan kapale mangda kapale nginganang. Rikala punika Dane Yunus sampun tedun tur ngranjing ring tengah kapale, inggih punika ring rongan kapale sane ring sor. Irika dane sirep aris pisan.
6
Rikala kapten kapale manggihin dane sirep irika, ipun tumuli mataken ring dane sapuniki: “Napi awinanipun ragane jeg sirep? Matangija tur ngastawaja nunas ica ring dewan ragane. Menawita dewan ragane rumasa kapiolasan ring iraga, tumuli ngluputang urip iragane.”7
Paraklasin kapale raris pada mabaos sareng timpal-timpalnyane sapuniki: “Jalan iraga ngae undi apang iraga nawang nyen ane ngawanang iraga kena bencana buka kene?” Ipun tumuli makarya undi, tur sane keni Dane Yunus.8 Irika ipun raris mabaos ring Dane Yunus sapuniki: “Sane mangkin indayang baosang, punapike ragane sane ngawinang bencanane puniki? Napi sane sampun kardi ragane. Ragane saking dija tur napike bangsan ragane?”
9
Dane Yunus tumuli masaur sapuniki: “Tiang puniki wong Ibrani. Tiang nyungsung Ida Sang Hyang Widi Wasa, Widin langite sane ngardi tanah miwah segarane.”10 Dane Yunus raris nuturang indik ragan danene sampun malaib saking ayun Ida Sang Hyang Widi Wasa.
Paraklasin kapale raris pada jejeh ngetor tur mabaos sapuniki: “Punika pamargi sane madurgama pisan!”11 Angin ribute sayan ngagengang kewanten, duaning punika paraklasin kapale tumuli mataken ring Dane Yunus sapuniki: “Sapunapiang tiang raris ragane mangda wusan angin ribute puniki?”
12
Dane Yunus tumuli masaur sapuniki: “Entungangja tiang ka segarane, irika jaga teduh. Tiang uning mungguing malantaran dosan tiange ragane katempuh antuk angin ribut sane ageng puniki.”13
Nanging paraklasin kapale ngibehang buat makta kapale ka pasisi, tur ipun nayung kapale punika antuk panelas kakuatanipune. Sakewanten angin ribute malih sayan mangetang, tur ipun tan mrasidayang makeseran.14 Punika awinanipun, ipun raris pada masesambatan ring Ida Sang Hyang Widi Wasa kadi asapuniki: “Oduh Ratu Sang Hyang Widi Wasa, ledang Palungguh IRatu mireng pangastawan titiange. Sampunangja Palungguh IRatu nyisipang tur mademang titiang duaning titiang mancut urip jadmane puniki. Duh Ratu Sang Hyang Widi Wasa, Palungguh IRatu sane ngawinang indike puniki, puniki makasami pakaryan Palungguh IRatu.”
15 Sasampune punika ipun raris nyemak tur ngentungang Dane Yunus ka segarane. Pramangkin segarane raris teduh.
16 Indike punika ngawinang paraklasin kapale ajerih pisan ring Ida Sang Hyang Widi Wasa, mawinan ipun raris ngaturang aturan ring Ida saha majanji jaga nyungsung Ida.
17
Malantaran titah Ida Sang Hyang Widi Wasa, wenten satunggaling ulam ageng raris nguluh Dane Yunus, tur dane wenten ring basang ulame punika tigang rahina suenipun.1
Saking tengah basang ulame punika Dane Yunus ngastawa ring Ida Sang Hyang Widi Wasa, Widin danene, sapuniki:2
“Oduh Ratu Sang Hyang Widi Wasa, ring sajeroning kasedihan titiange, titiang nunas ica ring Palungguh IRatu, tur Palungguh IRatu ledang nyaurin titiang. Saking tengah pati lokane dalem, titiang masesambatan nunas tulung, tur Palungguh IRatu ledang mireng pangastawan titiange.
3
Palungguh IRatu sampun ngentungang titiang ring genahe sane dalem ring dasar segarane, ring genah toyane ngliput titiang miwah ombak-ombak Palungguh IRatu sane mawisesa ngulung titiang.
4
Pitaenang titiang, mungguing Palungguh IRatu sampun ngingsirang titiang saking ayun Palungguh IRatune, tur nenten jagi naenin malih manggihin Perhyangan Palungguh IRatu sane suci.
5
Toyane sampun nglancah saha maid titiang. Segarane sampun nglikub titiang, tur lumut segarane sampun ngaput tendas titiange.
6
Titiang nganedunang kantos rauh ka dasar-dasar gununge, ka jagate sane gapura-gapurannyane tansah mubetan tur makancing. Nanging Palungguh IRatu, duh Ratu Sang Hyang Widi Wasa, Widin titiange, Palungguh IRatu sampun ngangkidang titiang saking genahe sane dalem punika tur nguripang titiang.
7
Yening titiang rumasa mungguing urip titiange sayan ngreres, titiang raris ngastawa ring Palungguh IRatu, duh Ratu Sang Hyang Widi Wasa. Irika raris Palungguh IRatu mireng pangastawan titiange ring Perhyangan Agung Palungguh IRatune.
8
Anake sane nyungsung arca-arca sane tan paguna, ipun sampun ngutang subaktinipune ring Palungguh IRatu.
9
Nanging titiang pacang makidung muji Palungguh IRatu. Titiang pacang ngaturang aturan ring ayun Palungguh IRatu, tur naur sesangin titiange. Karahayuane punika rauhnya saking Ida Sang Hyang Widi Wasa.”
10
Sasampun punika Ida Sang Hyang Widi Wasa raris mrentahang ulam agenge punika mangda ipun ngutahang Dane Yunus ring pasisi, tur prentahe punika raris laksanayang ipun.1
Ida Sang Hyang Widi Wasa tumuli ngandika malih ring Dane Yunus sapuniki:2 “Kemaja kita ka Niniwe ka kotane ento, tur warah-warahangja teken rakyate ditu sakancan sabda ane titahang Ulun teken kita.”
3 Dane Yunus raris ngiringang pangandikan Ida Sang Hyang Widi Wasa, tur dane raris lunga ka Niniwe. Kotane punika ageng pisan. Buat nylajah kotane punika dane patut mamargi tigang rahina suenipun.
4 Dane Yunus ngawitin mamargi nylajah kotane punika, tur sasampune mamargi arahina mepek, dane raris ngwarah-warahang kadi asapuniki: “Malih petang dasa rahina kota Niniwene pacang kasirnayang.”
5
Penduduk kota Niniwe raris pracaya ring sapangandikan Ida Sang Hyang Widi Wasa. Ipun sareng sami raris mutusang, mungguing sakancan anake patut mapuasa, tur rakyate makasami agung alit ngawit saking sane pinih utama ngantos sane pinih nista, makasami nyaluk pangangge kaduhkitan buat nyinahang ipun sampun kapok.6
Rikala sang prabu ring Niniwe mireng indike punika, ida raris matangi saking singasanan idane. Ida tumuli nglukar busanan idane, tumuli ngrangsuk busana kaduhkitan saha maguyang ring abune.7 Ida tumuli nguarang ring rakyate ring Niniwe kadi asapuniki: “Ene prentah ida sang prabu muah paraprakanggen idane. Tusing ada ane kalugra madaar. Yadian manusa wiadin sampi muah biri-biri, tusing dadi mangan muah nginum.
8 Sakancan manusa muah burone, patut nyaluk panganggo kaduhkitan. Asing-asing anak patut ngastawa saking nekeng ati teken Ida Sang Hyang Widi Wasa, tur suud ngambekang ane jaat muah ngae dosa.
9 Sing saget Ida Sang Hyang Widi Wasa, ledang ngubah pakayunan Idane, tur Ida suud duka, tur iraga tusing lakar kamatiang.”
10
Ida Sang Hyang Widi Wasa ngaksi indik sane kalaksanayang antuk penduduk kota Niniwe punika. Ida ngaksi mungguing ipun sampun wusan ngambekang kajaatan. Duaning punika Ida raris ngurungang pakayunan Idane, tur Ida tan durus nyisipang ipun sakadi sane sampun rencanayang Ida.1
Dane Yunus nenten pisan seneng ring indike punika tur dane duka pisan.2 Duaning punika dane raris ngastawa sapuniki: “Duh Ratu Sang Hyang Widi Wasa, boyake titiang sampun matur ring Palungguh IRatu sadurung titiange nilarin umah titiange, mungguing Palungguh IRatu pacang ngamargiang indike puniki? Punika awinanipun titiang raris malaib ka Sepanyol. Titiang uning mungguing Palungguh IRatu punika Widi sane maraga sih sueca miwah welas arsa. Palungguh IRatu setata sabar, tansah becik, tur setata kayun ngubah pakayunan tur nenten durus ngrauhang pasisip.
3 Duh Ratu Sang Hyang Widi Wasa, sane mangkin banggayang sampun titiang padem. Becikan titiang padem tinimbang kantun urip.”
4
Ida Sang Hyang Widi Wasa tumuli masabda sapuniki: “Apake beneh kita jeg mamedih buka keto?”5
Dane Yunus raris lunga ka dangin kotane punika tumuli malinggih irika. Dane makarya kubu pabuat ragan danene tumuli malinggih ring tengah kubune punika sambilang dane nyantosang indik sane pacang nibenin kota Niniwe punika.6 Ida Sang Hyang Widi Wasa tumuli numbuhang wit taru asiki kantos ngungkulin Dane Yunus, mangda dane nyidayang mateduh irika, mangdane dane jaga rumasa seneng. Dane Yunus seneng pisan ring wit tarune punika.
7 Nanging benjang semengnyane, malantaran titah Ida Sang Hyang Widi Wasa, raris wenten uled morot wit tarune punika, mawinan wit tarune punika raris padem.
8 Sasampun suryane endag, Ida Sang Hyang Widi Wasa raris ngrauhang angin panes saking kangin sane ngawinang Dane Yunus tambis-tambis niwang kabatek antuk panes suryane sane nujah duur danene. Duaning punika dane ngajap-ajap mangda dane gelis seda. Sapuniki baos danene: “Melahan suba idewek mati bandingang teken enu idup.”
9
Nanging Ida Sang Hyang Widi Wasa raris ngandika ring dane sapuniki: “Apake patut kita pedih ulihan punyan kayune ento?” Dane Yunus tumuli matur sapuniki: “Sampun pantes yening titiang pedih, kantos titiang padem.”10
Ida Sang Hyang Widi Wasa raris ngandika ring dane sapuniki: “Punyan kayune ento tumbuh sajeroning apeteng tur buin manine lantas ia sirna. Kita tusing taen miara kayune ento, tur kita tusing taen numbuhang ia. Nanging jeg kita maselselan ulihan kayune ento.11 Apa buin Ulun, Ulun patut madalem kota Niniwene, kotane ane gede ento. Yen itung, ditu ada anak cerik-cerik ane tan padosa lebihan teken 120.000 diri liunne. Aketo masih ditu liu ada ingon-ingon.”