1
Puniki pangandikan Dane Amos, pangangon biri-biri sane saking kota Tekoa. Kalih taun sadurung linuhe ageng, ritatkala panyeneng Ida Sang Prabu Usia ring Yehuda miwah panyeneng Ida Sang Prabu Yerobeam, putran Ida Sang Prabu Yoas ring Israel, Ida Sang Hyang Widi Wasa nyinahang ring Dane Amos saluiring paindikan sane jaga nibenin bangsa Israele.2
Sapuniki pangandikan Dane Amos: “Ida Sang Hyang Widi Wasa ngelur saking Gunung Sion, suaran Idane makuug saking Yerusalem. Tegal pangonane pada tuh latuh miwah padange ring Gunung Karmele pada layu dusdus.”3
Ida Sang Hyang Widi Wasa masabda sapuniki: “Wong Damsike suba tusing suud-suud ngae dosa. Ento krana Ulun lakar sasajaan nyisipang ia. Sawireh ia pada nyapa kadi aku ngambekang kawirosan marep teken wong Gileade.4 Ento awanane Ulun lakar niwakang api buat nunjel puri ane gaena baan Sang Prabu Hasael muah Ulun lakar ngeseng benteng-benteng Sang Prabu Benhadade.
5 Ulun lakar nguugang gapuran kota Damsike, tur lakar ngisidang jlemane ane nongos di Lebak Awene muah anake ane mrentah di Bet-Eden. Wong Siriane lakar kakaadang uli guminne, kadadiang tawanan ka gumi Kir.”
6
Ida Sang Hyang Widi Wasa, masabda sapuniki: “Wong Gasane suba tusing suud-suud ngae dosa. Sawireh keto, Ulun lakar sasajaan nyisipang ia. Ia suba maid bangsane ento makejang, tur ngadep ia teken jlema Edome dadi panjak.7 Ento awanane Ulun lakar mriokang api sig tembok-tembok kota Gasane tur ngeseng bentengnyane.
8 Ulun lakar ngisidang parapamrentah kota Asdod muah Askelone. Ulun lakar nyisipang kota Ekrone muah sawatek wong Pilistine ane enu ento lakar mati.”
9
Ida Sang Hyang Widi Wasa masabda sapuniki: “Wong Tiruse suba tusing suud-suud ngae dosa. Sawireh keto, Ulun lakar sasajaan nyisipang ia. Ia suba ngangkut bangsane makejang, laut selonga di gumin Edome, tur ia tusing ngamanggehang pasubayannyane buat makanti sraya.10 Ento awanane Ulun nedunang api sig tembok kota Tiruse tur ngeseng benteng-bentengnyane.”
11
Ida Sang Hyang Widi Wasa masabda sapuniki: “Wong Edome suba tusing suud-suud ngae dosa. Sawireh keto Ulun lakar sasajaan nyisipang ia. Ia morosin nyamanne nah ento bangsa Israel, tur tusing pesan ngelah kapiolasan teken ia. Pedihnyane tan pawates muah tusing taen empah-empah.12 Ento awanane Ulun lakar nedunang api sig kota Temane muah ngeseng benteng-benteng kota Bosrane.”
13
Ida Sang Hyang Widi Wasa masabda sapuniki: “Wong Amone suba tusing suud-suud ngae dosa. Sawireh keto Ulun lakar sasajaan nyisipang ia. Sajeroning masiat buat nglinggahang wewidangannyane, ia suba pada nudag basang anake luh-luh ane beling di Gilead.14 Ento awanane Ulun lakar mriokang api sig tembok-tembok kota Rabane muah ngeseng benteng-bentengnyane. Sasubane keto, lakar ada suryak perang, tur siate waluya buka angin ribute.
15 Ratunnyane muah prakanggonnyane lakar pada kaselong.”
1
Ida Sang Hyang Widi Wasa masabda sapuniki: “Wong Moabe suba tusing suud-suud ngae dosa. Sawireh keto Ulun lakar sasajaan nyisipang ia. Ia tusing ngajiang tulang-tulang ratun wong Edome, malantaran ia nunjel tulang-tulange ento dadi abu.2 Ulun lakar nedunang api sig Moabe, tur ngeseng benteng-benteng Keriote. Wong Moabe lakar pada pejah di pasiatan ane iur, dikalan prajurite pada masuryak muah munyin trompete pada makuug.
3 Ulun lakar ngamatiang pamrentah muah sakancan pamimpin gumi Moabe.”
4
Ida Sang Hyang Widi Wasa masabda sapuniki: “Wong Yehudane suba tusing suud-suud ngae dosa. Sawireh keto Ulun lakar sasajaan nyisipang ia. Ia suba nganistayang paurukan-paurukan Ulune muah suba tusing ngamanggehang sapatitah Ulune. Ia suba pada kasasarang baan widi-widi ane palsu, nah ento widi ane patuh buka ane laad sungsunga baan leluurnyane.5 Sawireh keto Ulun lakar mriokang api sig gumi Yehudane, tur ngeseng benteng-benteng Yerusalame.”
6
Ida Sang Hyang Widi Wasa masabda sapuniki: “Wong Israel suba tusing suud-suud ngae dosa. Sawireh keto Ulun lakar sasajaan nyisipang ia. Ia ngadep anake ane jujur dadi panjak, ane tusing nyidayang ngulihang pipis ane siliha, yadiastun tuah amun aji sandale apasang.7 Ia nyekjek anake ane lemet muah tan padaya tur nuludang anake ane tiwas pesu ka sisin jalane. Ibapa ngajak pianak pada mamitra ngajak panyeroan bajang adiri, tur malantaran ento parab Ulune ane suci suba kaletehin.
8 Sig asing-asing tongos mabakti anake pada pules maled aji panganggo ane baan ngrampas sig anake lacur, ane makadadi gegaden utangne. Sig Perhyangan Agung Widinnyane, ia pada nginum anggur ane baana ngrampas sig anake ane mutang pipis teken ia.
9
Yadianja buka keto, ih kaulan Ulun, tuah uli krana kita Ulun suba nyirnayang wong Amorine kanti basmi kerta, nah ento jlema ane tegehne amun punyan kayu arase muah sitengne amun punyan kayu tarbantine.10 Ulun ngajak kita pesu uli Mesir, tur nantan kita ngentasin tegal melakang petang dasa tiban makelonne muah maicayang tanah wong Amorine teken kita makadadi pagelahan kitane.
11 Ulun nyelik makudang-kudang pianak kitane muani-muani dadi nabi muah makudang-kudang truna-trunan kitane dadi wong Nasir. Apake unduke ento tusing saja, ih wong Israel? Ulun Sang Hyang Widi Wasa ane masabda buka keto.
12 Nanging kita suba maang wong Nasire pada nginum anggur muah mrentahang paranabine apanga ia tusing ngorahang pawuwus Ulune.
13 Nah ane jani Ulun lakar ngenyagang kita di tanahe tur kita lakar makerug buka kretane ane sarat muat gandum.
14 Yadian jlemane ane malaib becatko tusing lakar nyidayang ngluputang dewek. Anake ane siteng lakar ilang kasitengane tur paraprajurite tusing nyidayang ngluputang uripne padidi.
15 Juru panahe tusing lakar nyidayang nglawan, anake ane becat malaib tusing lakar nyidayang malaib muah anake ane negakin jaran tusing lakar nyidayang ngluputang angkihanne.
16 Didinane ento yadianja prajurit ane paling wanena, lakar pada ngentungang sanjatannyane laut malaib.” Ida Sang Hyang Widi Wasa ane suba masabda buka keto.
1
Inggih semeton wong Israel, pirengangja sabdan Ida Sang Hyang Widi Wasa sane sampun masabda ngeniang indik semetone, sakuub bangsa sane sampun ajak Ida medal saking Mesir, sapuniki:2 “Uli pantaran bangsane di gumine, tuah kita dogen ane suba tawang muah patiningin Ulun. Ento ane ngranayang dosa-dosan kitane abot pesan, tur ento awanane Ulun patut nyisipang kita ulihan dosa-dosan kitane ento.”
3
Apake ada anak majalan bareng-bareng ajaka dadua, yen ia tusing mapacukan?4
Apake singane ngelur di alase, yen ia tonden maan tetadahan? Apake pianak singane bareng-bareng di guannyane, yen ia tonden maan amah-amahan?5
Apake ada kedis kena jeet, yening jeete ento tonden kapasang? Apake jeet plantikane ento lakar mlantik, yening ia tonden ngenen?6
Yening trompet perange mamunyi di kota, tusingke ngranayang rakyate pada jejeh? Yening tusing Ida Sang Hyang Widi Wasa ane nibakang, apa ada kota ane kena bencana?7
Ida Sang Hyang Widi Wasa Sane Maha Luur tusing lakar nibakang apa-apa yening Ida tonden nyinahang rencanan Idane teken paraparekan Idane, paranabine.8
Yening singane ngelur, nyenke ane tusing marasa jejeh? Yening Ida Sang Hyang Widi Wasa Sane Maha Luur masabda, nyenke ane patut ngwarah-warahang pawuwus Idane?9
Warah-warahangja ring anake sane wenten ring puri-purine ring Mesir miwah ring Asdod, sapuniki: “Ngiringja mapunduh ring bukit-bukite ring kiwa tengen kota Samariane, tur cingakinja kaributane sane ageng miwah kacorahan sane kalaksanayang irika!”10
Ida Sang Hyang Widi Wasa masabda sapuniki: “Bangsane ene ngebekin umahne ane gede aji barang-barang ane bakatanga aji corah miwah kawirosan. Ia tusing nawang kenken patutne dadi anak ane jujur.11 Sawireh keto, lakar ada musuh ngiter guminnyane, tur nguugang bentengnyane muah nyarah umahnyane ane gede ento.”
12
Ida Sang Hyang Widi Wasa masabda sapuniki: “Buka pangangone makatang batis biri-birinne dadua muah kupingne abesik ane laad sarap singa, aketo masih tuah abedik wong Samariane ane lakar enu idup, nah ento ane jani ane masare sig tabane ane melah.”13 Ida Sang Hyang Widi Wasa Sane Maha Luur miwah Sane Maha Kuasa masabda sapuniki: “Ane jani padingehangja tur patingetja parakaturunan Yakube.
14 Didinane ento, dikalan Ulune nyisipang wong Israele uli krana dosa-dosannyane, Ulun lakar nguugang pamorboran aturane di Betel. Bucu-bucun sakancan pamorboran aturane ento lakar kepeh tur ulung ka tanahe.
15 Ulun lakar nguugang bale masan ujan muah bale masan panese. Umahe ane mapayas aji danta lakar bah tur uug maglaturan tur sakancan umahe ane linggah tur gede lakar kasirnayang.”
1
Padingehangja unduke ene, ih paraluh-luh wong Samariane, ane sayan mokoh buka sampi-sampine di Basan ane pepek ngamah, ane nyakitin anake ane lemet, nindes anake ane tiwas, tur nagih apanga kurenan kitane tetep nuukin kita aji inum-inuman.2 Ida Sang Hyang Widi Wasa Sane Maha Luur, ane maraga suci, suba majanji kene: “Lakar ada masanne, ia lakar maid kita aji sangket. Kita suang-suang lakar buka bene ane kene pancing.
3 Kita lakar paida ka bolongan temboke ane paling paeka, laut entunganga pesu.”
4
Ida Sang Hyang Widi Wasa Sane Maha Luur masabda sapuniki: “Ih wong Israele kemaja ka tongose ane suci di Betel, tur laksanayangja paundukan ane madosa. Kemaja ka Gilgal tur laksanayangja paundukane ane madosa sakita karep kitane! Lautangja malaksana buka keto, tur ngabaja wewalungan anggon aturan sabilang semengan, buina aturangja pahdasan kitane ngatelun.5 Lautangja buka keto, tur aturangja roti aturan panyuksman kitane di ayun Ida Sang Hyang Widi Wasa, buina pada banggaja teken aturan istimewa ane aturang kita. Mula tuah paundukan ane buka kene ane demenin kita nglaksanayang.
6
Ulun suba nibakang sayah gede sig sakancan kotan kitane, nanging kita tusing masih nyak mabalik sig Ulune.7 Ulun ngandeg ujane, dikalan tetaneman kitane perlu pesan teken ujan. Ulun nurunang ujan sig kotane ane abesik, nanging di kotane ane lenan Ulun tusing nurunang ujan. Ujane ulung sig tegalane ane acutak, nanging tegalane ane lenan tuh latuh.
8 Jlemane uli makudang-kudang kota pada leleh naenang bedak, laut majalan ngungsi kota lenan. Ditu ia ngajap-ajap lakar maan yeh, nanging ditu tusing cukup ada yeh inem. Nanging kita enu masih tusing nyak mabalik sig Ulune.
9
Ulun nekaang angin ane panes bara buat muunang tetaneman kitane. Sakancan abian muah punyan anggur kitane telah amah balang, keto masih punyan aa muah punyan saitun kitane. Enu masih kita tusing nyak mabalik sig Ulune.10
Ulun nekaang grubug sig kitane, buka ane tekaang Ulun di Mesir. Ulun ngamatiang paratruna-trunan kitane di pasiatan muah jaran-jaran kitane pada kajarah. Ulun nusdus song cunguh kitane aji bangke di pakemahan kitane. Enu masih kita tusing nyak mabalik sig Ulune.11
Ulun masmi makudang-kudang anak di pantaran kitane buka Ulun masmi Sodom muah Gomorane. Anake ane enu idup di pantaran kitane satmaka buka saange atugel sisan amah api. Enu masih kita tusing nyak mabalik sig Ulune.” Kadi asapunika sabdan Ida Sang Hyang Widi Wasa.12 “Wireh keto, ih wong Israel, Ulun lakar nyisipang kita. Sawireh Ulun lakar nglaksanayang unduke ene, ane jani tragiaangja dewek kitane nampi tetepasan Ulune!”
13
Wantah Ida Sang Hyang Widi Wasa sane ngardi gunung-gununge miwah ngardi angine. Ida nglugrain manusane uning ring pakarsan Idane. Ida ngentosin rahinane antuk wengi. Ida mamargi ring genahe sane tegeh ring jagate. Sapuniki parab Idane: “Ida Sang Hyang Widi Wasa, Widi Sane Maha Kuasa”.
1
Inggih semeton wong Israel, pirengangja kakidungan tiange puniki, sane kidungang tiang buat mendem sawan semetone, sapuniki:2
“Paradaa Israele pada bah, tur nenten mrasidayang malih bangun! Ipun pada bah tan kalinguang ring tanahe, tur nenten wenten anak sane nulungin mangunang ipun.”
3
Ida Sang Hyang Widi Wasa Sane Maha Luur masabda sapuniki: “Ada kota di Israel ane ngutus prajurit siu diri ka pasiatan, nanging tuah satus diri ane enu malipetan. Kotane lenan mesuang prajurit satus diri nanging tuah adasa ane teka malipetan.”4
Ida Sang Hyang Widi Wasa ngandika ring wong Israele sapuniki: “Maija sig Ulune, kita lakar muponin idup.5 Edaja kema ka Berseba mabakti. Edaja negarang nagih matemu teken Ulun di Betel. Betele ento lakar tusing enu. Edaja kema ka Gilgal. Wong Gilgale suba kapastikayang lakar kaselong.”
6
Rarisangja tangkil ring Ida Sang Hyang Widi Wasa, janten semeton jaga urip. Yening semeton nenten tangkil rig Ida, Ida jaga nyander semeton, waluya sakadi genine sane nibenin wong Israele. Genine punika jaga ngeseng wong Betele, tur nenten wenten anak sane mrasidayang ngamademang genine punika.7 Semeton sampun keni pasisip. Semeton nyilurin kadilan tur melog-melog nyuang gelah anak!
8
Ida Sang Hyang Widi Wasa sane ngardi bintang-bintang, bintang Kartika miwah bintang Panah. Ida ngentosin petenge antuk galang miwah rahinane antuk wengi. Ida ngesengin toyan segarane tumuli kabriokang ka mrecapada. Parab Idane punika, Ida Sang Hyang Widi Wasa.9 Ida nibakang karusakan ring jadmane sane mawisesa miwah ring bentengipune.
10
Semeton pada geting ring asing-asing anak sane tungkas ring paindikane sane tan adil miwah sane maosang kasujatian ring pangadilan.11 Semeton sampun nindes anake sane tiwas miwah ngrampok gandumipune. Duaning punika, semeton nenten jaga muponin urip ring umah semetone sane malakar antuk batu sane becik-becik sane sampun kardi semeton, wiadin nenten jaga nginum anggur saking abian anggur semetone sane becik, sane sampun tandur semeton.
12 Tiang uning, ambate abot dosa-dosan semetone miwah ambate akeh kacorahan sane laksanayang semeton. Semeton nyangsaren anake sane becik, semeton nagih tetombokan miwah ngalang-ngalangin anake tiwas buat nunas kadilan ring pangadilan.
13 Duaning punika, paindikan sane becik kalaksanayang ring masa sane jaat punika, inggih punika meneng mapepan!
14
Usahangja nglaksanayang paindikan-paindikan sane patut, tur sampunang nglaksanayang paindikan sane jaat, mangdane semeton prasida urip. Yen sampun kadi asapunika, Ida Sang Hyang Widi Wasa, Widi Sane Maha Kuasa, sinah jaga ngiangin semeton, sakadi pangajap-ajap semetone.15 Getingja ring paindikan sane corah, tresnainja paindikan sane patut, tur margiangja kadilan ring pangadilane. Menawita Ida Sang Hyang Widi Wasa pacang asung lugraha ring jadmane sane kantun urip ring bangsane puniki.
16
Duaning punika Ida Sang Hyang Widi Wasa Sane Maha Luur miwah Sane Maha Kuasa, masabda sapuniki: “Lakar ada sesambatan muah ling kaduhkitan di rurung-rurung kotane. Kayang parapetanine masih lakar kakaukin buat mangelingin anake ane mati, bareng-bareng ngajak anake ane mula kaupah buat mangelingin anak mati.17 Lakar ada sesambatan sig sakancan abian anggure. Sakancan unduke ento lakar kasidan, sawireh Ulun lakar teka nyisipang kita.” Kadi asapunika sabdan Ida Sang Hyang Widi Wasa.
18
Ambate jagi sengkalannyane pabuat semeton sane ngedotang rahinan Ida Sang Hyang Widi Wasa. Napike pikenohipun rahinane punika pabuat semeton? Pabuat semeton rahinane punika jaga dados rahina sane peteng dedet, boyaja rahina sane galang.19 Rahinane punika waluya sakadi anake sane luput saking bungut singane tumuli ulung ka bungut beruange. Wiadin waluya sakadi anak wau rauh jumah, raris ngusud tembok, tumuli kagutil antuk lelipine.
20 Rahinan Ida Sang Hyang Widi Wasa jaga mamuat peteng dedet, tur boyaja galang. Rahina punika jaga dados rahina sane peteng, sane nenten wenten galangipun.
21
Ida Sang Hyang Widi Wasa masabda sapuniki: “Ulun geting teken upacara-upacara agaman kitane. Ulun tusing ledang teken unduke ento makejang.22 Yen kita ngaturang aturan maborbor, aturan gandum teken Ulun, Ulun tusing lakar nampi aturane ento. Ulun tusing lakar nyak nampi wewalungan ane suba mokohang kita buat lakar anggon kita aturan teken Ulun.
23 Suudangja kakidungan kitane ane uyut ento. Ulun tusing ledang mirengang munyin kecapin kitane.
24 Nanging tungkalikane depangja kadilane membah buka yeh tukade muah kapatutane membah buka tukade ane tusing taen nyat.
25
Ih wong Israel, Ulun tusing taen ngarsayang aturan muah banten petang dasa taun makelonne dugase Ulun nantan kita ngliwatin tegal melakange.26 Nanging ane jani sawireh kita suba nyungsung palawatan Sakute, dewan ratun kitane muah Kewan dewa bintang kitane, kita lakar patut negen arcane ento,
27 dikalan Ulune lakar nyelong kita ka gumi ane ngliwatin kota Damsike.” Kadi asapunika sabdan Ida Sang Hyang Widi Wasa sane maparab Ida Sang Hyang Widi Wasa Sane Maha Kuasa.
1
Ambate sengkalan semetone sane muponin urip seneng ring Sion miwah sane marasa sutrepti rahayu ring Samaria, semeton parasulinggih ring bangsa Israel sane ageng punika, semeton sane makadados genah anake pada nunas tulung.2 Mrikaja rarisang cingakin kota Kalnene. Sasampune punika rarisangja lunga ka kota Hamat sane ageng punika, tur saking irika rarisang lunga ka Gat kotan wong Pilistine. Punapike kota-kotane punika becikan yen bandingang ring kaprabon Yehuda miwah Israel? Punapike wewidanganipune linggahan ring wewidangan semetone?
3 Semeton nenten kayun ngangkenin mungguing rahina bencanane punika jaga rauh, nanging paindikan sane laksanayang semeton, sujatinipun ngawinang rauh rahinane punika sayan nampek.
4 Ambate sengkalan semetone sane masare ring pasareannyane sane malakar danta, sarwi mapesta antuk daging lembu miwah panak biri-biri.
5 Semeton seneng ngawi kidung sakadi sane kalaksanayang antuk Ida Sang Prabu Daud, tumuli nabuh kidunge punika antuk kecapi.
6 Semeton nginum anggur saking gucine sane bek, tur ngangge minyak wangi sane pinih miik, nanging semeton nenten mapangenan ngeniang indik uug Israele.
7 Duaning punika, semeton sane pinih riin jaga kaselong. Pesta miwah panamiun semetone jaga wusan.
8
Ida Sang Hyang Widi Wasa Sane Maha Luur miwah Sane Maha Kuasa sampun mapaica piteket, kadi asapuniki: “Ulun geting teken sumbung wong Israele. Ulun nganistayang umahne ane gede tur melah. Ulun lakar nyerahang ibukotannyane muah saisinne makejang, teken musuhnyane.”9
Yening wenten anak sareng dasa kantun urip sajeroning akuren, ipun makadasa jaga padem.10 Nyaman anake sane padem punika, sane ngetangang pamendeman sawannyane punika jaga ngamedalang sawane punika saking umahe. Nyamannyane punika jaga ngaukin sapasiraja sane kantun urip ring umahe punika, sapuniki: “Apake ada ane ajak nyama ditu?”
Jaga wenten suara masaur sapuniki: “Tusing ada.” Sasampune punika nyamannyane punika raris mabaos sapuniki: “Mendepja! Iraga patut tangar, apanga eda kanti nyambat parab Ida Sang Widi Wasa.”11
Rikala Ida Sang Hyang Widi Wasa mapaica pituduh, umah-umahe agung alit pada uug maglaturan.12 Punapike kuda-kudane malaib ring gunung batune? Punapike anake nekapin segara antuk banteng? Sujatinne semeton sampun nyilurin kadilan antuk racun miwah kapatutan antuk kiwangan.
13
Semeton nyumbungang dewek malantaran semeton ngaonang kota Lodebare. Semeton nyumbungang raga sapuniki: “Iraga suba cukup kuat ngalahang Karnaime.”14
Ida Sang Hyang Widi Wasa, Widi Sane Maha Kuasa ngandika sapuniki: “Ih wong Israel, Ulun lakar ngutus wadua bala sunantara buat lakar ngaug gumin kitane. Bangsane ento lakar nindes kita uli di jalane ane ngungsi ka Hamat ane badaja kanti teked di Lebak Arabane ane bedelod.”1
Tiang polih wahyu saking Ida Sang Hyang Widi Wasa Sane Maha Luur. Sajeroning wahyune punika, tiang manggihin Ida ngardi balang akeh pisan, rikala anake pada puput ngarit padang pabuat ida sang prabu, tur padange sampun pada ngawitin malih makedapan.2 Sajeroning wahyune punika tiang ngeton balange neda sakancan entik-entikan sane gadang ring jagate, tur sasampune punika tiang raris matur sapuniki: “Duh Ratu Sang Hyang Widi Wasa Sane Maha Luur, ampurayangja kaula druene! Sapunapiangipunke jagi urip? Ipun kalintang alit tur lemet!”
3
Ida Sang Hyang Widi Wasa tumuli rumasa pariselsel ring kayun, sarwi ngandika sapuniki: “Sakancan ane tepukin kita tusing lakar kasidan.”4
Tiang manggihin wahyu sane lianan saking Ida Sang Hyang Widi Wasa Sane Maha Luur. Sajeroning wahyune punika tiang manggihin Ida sadia nyisipang kaulan Idane antuk geni. Genine punika ngeseng segarane sane ring sor pretiwine, tur sampun ngawitin nilap jagate.5 Sasampune punika tiang raris matur sapuniki: “Duh Ratu Sang Hyang Widi Wasa Sane Maha Luur, wusangja amunika! Sapunapianga kaula druene jaga urip? Ipun kalintang alit tur lemet!”
6
Ida Sang Hyang Widi Wasa tumuli malih rumasa pariselsel ring kayun, sarwi ngandika sapuniki: “Unduke ene masih tusing lakar kasidan.”7
Tiang polih wahyu sane lianan saking Ida Sang Hyang Widi Wasa. Sajeroning wahyune punika tiang manggihin Ida ngadeg ring sisin temboke sane jegjeg, tur Ida ngambel tali sepat.8 Ida tumuli mataken ring tiang, sapuniki: “Ih Amos, apake ane tepukin kita?”
Pasaur tiange sapuniki: “Tali sepat, Ratu?” Sasampune punika Ida malih ngandika, sapuniki: “Ulun ngunayang tali sepate ene, buat muktiang, mungguing kaulan Ulune waluya buka temboke ane mimpas uli tali sepate. Ulun tusingja buin rumasa pariselsel, buat lakar nyisipang ia.9 Tongos-tongos katurunan Ishake ngaturang bakti lakar kasirnayang. Tongos-tongos ane suci di Israel lakar kadepinin uug. Ulun lakar mragatang katurunan kulawargan Sang Prabu Yerobeame.”
10
Dane Amasia, panditane ring Betel, tumuli nguningayang ring Ida Sang Prabu Yerobeam ratune ring Israel, sapuniki: “Nabi Amos ngwentenang rerincikan ring pantaran rakyate, gumanti jaga nglawan palungguh iratu. Baosipune jaga nguugang jagate puniki.11 Sapuniki baosipune: ‘Sang Prabu Yerobeam lakar seda di payudan, tur wong Israele lakar kaselong joh uli di guminnyane.’ ”
12
Dane Amasia raris mabaos ring Dane Amos sapuniki: “Ih nabi, suud suba amonto! Kemaja malipetan ka Yehuda, lautangja ditu nutur apanga rakyate ditu ngupahin jerone.13 Edaja buin ngramal dini di Betel. Ene tongos ida sang prabu ngaturang bakti, perhyangan gumine dini.”
14
Dane Amos tumuli masaur sapuniki: “Tiang tusingja soroh nabi ane nanggap upah aji ngramal. Tiang ene pangangon, tiang biasa mamula tur miara punyan aa.15 Nanging Ida Sang Hyang Widi Wasa mancut tiang uli geginan tiange dadi pangangon, laut nitahang tiang ngucapang ramalan teken kaulan Idane Israel.
16 Sawireh keto ane jani padingehangja sabdan Ida Sang Hyang Widi Wasa. Jerone nunden tiang suud ngramal, tur nunden tiang suud ngamigmig marep teken wong Israele.
17 Sawireh keto, ih Amasia, Ida Sang Hyang Widi Wasa ngandika teken jerone kene: ‘Kurenan kitane lakar dadi sundel di jalane, tur pianak kitane lakar mati di pasiatan. Gumin kitane lakar kadum-dum, tur kaserahang teken anak lenan, tur kita padidi lakar mati di gumin anake ane tusing nyungsung Widi. Buina wong Israele sasajaan lakar kakaadang uli di guminnyane tur kaselong.’ ”
1
Tiang polih wahyu sane lianan saking Ida Sang Hyang Widi Wasa Sane Maha Luur. Sajeroning wahyune punika tiang manggihin kranjang asiki madaging woh-wohan.2 Ida Sang Hyang Widi Wasa raris mataken sapuniki: “Ih Amos, apake tepukin kita?”
Pasaur tiange, sapuniki: “Kranjang madaging woh-wohan, Ratu!” Ida Sang Hyang Widi Wasa malih ngandika ring tiang sapuniki: “Pamragat kaulan Ulune Israel suba teka. Ulun tusing enu buin marasa pariselsel buat lakar nyisipang ia.3 Didinane ento kidung-kidunge di puri lakar dadi ling kaduhkitan. Lakar ada bangke milehan. Bangke-bangkene ento lakar kentungang aji silib.”
4
Ih parasemeton sane nyekjek anake sane kakirangan, ngindayang jaga nyirnayang anake sane tiwas ring jagate puniki, pirengangja indike puniki.5 Semeton makayun-kayun, sapuniki: “Makelo pesan iraga ngantiang apanga dinane ane suci ento liwat, apanga iraga nyidayang ngadep gandum iragane. Buin pidanke dina Sabate ento suud, apange iraga nyidayang buin nyumunin madepan? Sasubane keto, iraga nyidayang ngamenekang aji, nganggo panakehan ane palsu muah melog-melog langganan aji dacin ane palsu.
6 Iraga nyidayang ngadep tepung ane tan paguna mael-mael. Iraga lakar ngalih anake tiwas-tiwas ane tusing nyidayang mayah utangne, yadianja utangne ento tuah amun ajin sandale apasang. Ditu laut iraga meli ia lakar anggon panjak.”
7
Ida Sang Hyang Widi Wasa, Widin Israele sampun masumpah sapuniki: “Ulun tusing lakar engsap teken laksanannyane ane corah.8 Sawireh keto gumine lakar linuh magejeran, tur sakancan anake di gumine lakar nemu kakewehan. Sakuub gumine lakar magejeran. Gumine lakar bah bangun buka Tukad Nile.
9 Lakar ada masanne Ulun lakar ngengsebang suryane dikalane enu tengai, tur gumine lakar peteng dikalane lemah. Ulun Sang Hyang Widi Wasa Sang Maha Luur ane suba masabda buka keto.
10 Ulun lakar nyilurin pepestan kitane aji kaduhkitan muah ngesehin kaliangan kitane aji ling sesambatan. Ulun lakar ngawanang kanti kita ngundul tendas kitane, laut mapanganggo aji karung, tur kita dadi buka irerama mangelingin matin pianakne muani ane tuah aukud dogen. Didinane ento lakar keweh pesan kanti teked ka panyuud.
11
Lakar ada masanne Ulun lakar nibakang sayah gede di gumine. Rakyate lakar pada seduk, nanging tusingja seduk teken roti. Ia lakar pada bedak, nanging tusing bedak teken yeh. Ia pada seduk muah bedak teken pawuwus Ida Sang Hyang Widi Wasa. Ulun Sang Hyang Widi Wasa Sang Maha Luur ane suba ngandika buka keto.12 Rakyate lakar nglalana uli kaja nganteg kelod muah uli kangin nganteg kauh. Ia lakar kema mai ngalih sabdan Ida Sang Hyang Widi Wasa, nanging ia tusing lakar maan.
13 Didinane ento kayang anake truna-truna ane seger masih lakar limuh naanang bedak.
14 Anake masumpah nganggon adan arcan wong Samariane, ane ngucap kene: ‘Sajeroning parab dewane di Dan,’ wiadin: ‘Sajeroning parab dewane di Berseba,’ anake ento lakar bah tur tusing buin bangun-bangun.”
1
Tiang manggihin Ida Sang Hyang Widi Wasa ngadeg ring samping pamorboran aturane. Ida mapaica prentah sapuniki: “Gebugja muncuk sesakan perhyangane sangetang pesan, apanga sakuub ambenne magejeran. Uugangja ambenne ento makejang apanga ulung nepen tendas rakyate makejang. Sisan rakyate ane enu idup, lakar matiang Ulun di pasiatan. Tusing ada ane lakar nyidaang malaib, tur tusing ada ane luput.2 Yadianja ia macelep tuun ka pati loka, Ulun masih lakar ngejuk ia. Yadianja ia menek ka langite, Ulun lakar maid ia tuun.
3 Yadianja ia mengkeb di muncuk Gunung Karmele, Ulun lakar ngalih tur ngejuk ia. Yen ia mengkeb di dasar pasihe, Ulun lakar nitahang burone ane gede-gede di pasihe apanga ngugut ia.
4 Yening ia katawan baan musuh-musuhne, Ulun lakar nitahang musuh-musuhne apanga ia matianga. Ulun suba ngamastiang buat nyirnayang ia, tur tusingja nulungin ia.”
5
Ida Sang Hyang Widi Wasa Sane Maha Luur miwah Sane Maha Kuasa ngusud pretiwine, kenginan pretiwine raris magejeran, tur sawatek sane urip ring mrecapada sami pada kaduhkitan. Sakuub jagate sami pada bah miwah bangun waluya sakadi Tukad Nile.
6
Ida Sang Hyang Widi Wasa ngwangun purin Idane ring akasane, tur Ida masang lengkungan langite buat nangkeb pretiwine makasami. Ida ngesengin toyan segarane, tumuli briokang Ida ring mrecapada. Parab Idane punika, Ida Sang Hyang Widi Wasa.
7
Ida Sang Hyang Widi Wasa masabda sapuniki: “Ih wong Israel, pabuat Ulun kita patuh buka wong Sudane. Ulun nantan wong Pilistine uli di Kreta muah wong Siriane uli di Kir, patuh buka nantan kita uli di Mesir.8 Ulun Sang Hyang Widi Wasa Sang Maha Luur, suba macingak teken kaprabon Israele ane madosa ene, tur nyirnayang kaprabone ento uli di duur gumine. Nanging Ulun tusing lakar nyirnayang katurunan Yakube makejang.
9
Ulun lakar mapaica pituduh tur ngingsak wong Israele buka gandume di sidine. Ulun lakar ngingsak ia di pantaran bangsa-bangsane, buat lakar ngaadang ane tuara maguna.10 Jlemane ane madosa di pantaran kaulan Ulune lakar mati di pasiatan, sawireh jlemane ento ngraos kene: ‘Ida Sang Hyang Widi Wasa tusing lakar nglugrain bencanane ngenen iraga.’ ”
11
Ida Sang Hyang Widi Wasa ngandika sapuniki: “Lakar ada masanne Ulun lakar buin ngrajegang kaprabon Daude, ane buka umahe uug maglaturan, Ulun lakar menahin temboknyane buka ane jati mula. Ulun lakar buin ngwangun temboke ento apanga patuh buka ane imaluan.12 Ento awanane rakyat Israele lakar ngaug sisan tanah Edom muah sakancan bangsane ane dadi duen Ulune.” Kadi asapunika sabdan Ida Sang Hyang Widi Wasa, sane ngawinang indike punika jaga kasidan.
13 Ida Sang Hyang Widi Wasa masabda sapuniki: “Lakar ada masanne, gandume lakar enggalan wayah bandingang teken ane patutne dadi anyi muah buah anggure enggalan nasak bandingang teken patutne ia dadi peres yehne. Gunung-gununge lakar patrebes pesu yeh anggur manis muah bukit-bukite lakar blabar aji anggur.
14 Ulun lakar ngajak kaulan Ulune buin malipetan ka guminnyane. Ia lakar pada buin ngwangun kota-kotannyane, tur pada nongos ditu. Ia lakar mula anggur muah nginem yeh anggur, ia lakar pada mabian muah naar pamuponnyane.
15 Ulun lakar nyelekang kaulan Ulune di tanahe ane paicayang Ulun teken ia, tur ia tusing lakar buin kabut. Ida Sang Hyang Widi Wasa, Widin kitane ane suba masabda buka keto.”