1
Puniki sabdan Ida Sang Hyang Widi Wasa ring Dane Yoel okan Dane Petuel.2
Ih paralingsire, pada pirengangja, tur sakancan rakyate ring Yehuda pada pirengangja. Naeninke indik sane kadi asapuniki nibenin semeton wiadin leluur semetone?
3
Tuturangja indike punika ring oka-okan semetone, tur oka-okan semetone pacang nuturang indike punika ring oka-okannyane. Kadi asapunika sapanglanturipun indike punika pacang katuturang, taler ring katurunan sane pacang rauh.
4
Balange pacang ngrauhin pamupon semetone slegenti agrombolan-agrombolan. Napija sisaanga antuk grombolan balange sane riinan, punika pacang kateda antuk sane rauh ungkuran.5
Pada matangi tur nangisja ih anak sane punyah, tur pada nangisja ih anak sane seneng nginum anggur. Woh anggure sane pacang kanggen toya anggur anyar makasami sampun karusakang.
6
Jagat iragane sampun kagebug antuk wadua balan balange. Ipun kuat pisan tur akehnyane kantos tan keni wilangin. Giginnyane mangan pateh sakadi gigin singane.7
Ipun sampun ngrusak woh anggur iragane, tur ipun sampun makpak wit aan iragane. Ipun sampun nglupakin kulit wit aane kantos carang-carangnyane kanten mamutih.
8
Pada nangisja ih parasemeton, sakadi anak luh mangelingin anak mati, inggih punika anak muani sane pacang dados kurenanipune.9
Gandum miwah anggur sane pacang kanggen aturan ring Perhyangan Agung sampun telas, tur parapanditane makasami pada sedih rehning dane tan madue aturan sane pacang katurang ring Ida Sang Hyang Widi Wasa.
10
Tegal-tegale makasami gundul, tur tanahe kaduhkitan santukan gandume rusak miwah woh anggure pada tuh, kadi asapunika taler wit saitune makasami pada layu.
11
Pada ngelingja, ih parapetani, pada ngelingja ih parapanyakap abian anggure, santukan gandum, jelae miwah sakancan pamupone sami rusak.12
Buah anggure miwah wit aane makasami sampun layu, tur wit woh-wohane makasami sampun layu tur padem. Kaliangan rakyate sampun ical.
13
Ih parapandita sane ngancangin pamorboran aturan, anggeja pangangge kaduhkitane tur pada nangisja. Ngranjingja ka Perhyangan Agunge tur nangisja irika awengi mepek, santukan tan wenten gandum miwah anggur sane jaga katurang ring Widin semetone.
14
Prentahangja rakyate mangda pada mapuasa, tur wedalangja dedauhan mangda rakyate paum. Punduhangja parapamimpin miwah sakancan rakyat Yehudane raris ajakja ipun ngranjing ka Perhyangan Agung Ida Sang Widi Wasa, Widin semetone, tur masesambatanja ring Ida irika.
15
Panemayan Ida Sang Hyang Widi Wasa, inggih punika panemayan Ida Sane Maha Kuasa jaga ngrauhang pangrusak sampun nampek. Ambate ageng bencana sane pacang kasinahang ring rahinane punika.
16
Pakantenanipun iraga tan maderbe panulung rikala pamupon iragane karusak. Nenten wenten kaliangan ring Perhyangan Agung Ida Sang Hyang Widi Wasa, Widin iragane.17
Winihe padem ring tanahe sane tuh. Tan wenten wiji-wijian sane pacang kasimpen ring gudang tur jineng-jineng sane puyung taler sampun uug.
18
Bantenge pada embek-embek kamewehan, santukan nenten wenten genah pangonan pabuat ipun, tur biri-birine taler kalayah-layah.
19
Oduh Ratu Sang Hyang Widi Wasa, titiang masesambatan ring ayun Palungguh IRatu, duaning tegal pangonan miwah taru-tarune makasami sampun tuh, sakadi wenten geni muunang ipun.
20
Rauhing sato alase makasami masesambatan ring ayun Palungguh IRatu duaning tukad-tukade makasami pada tuh.
1
Upinja trompete, tur suarayangja kulkul buluse ring Sion, bukit Ida Sang Hyang Widi Wasa sane suci. Ih rakyat Yehudane, pada ngetorja, santukan panemayan Ida Sang Hyang Widi Wasa gelis pacang rauh.2
Panemayane punika jaga sakadi rahina sane urem tur peteng, rahina sane kaliput gulem sane peteng dedet. Wadua balan balange pacang mangseh sakadi peteng dedete sane nglikub gunung-gununge. Tan naenin wenten indik sane kadi asapunika, tur nenten pacang naenin wenten malih.
3
Ipun pacang neda entik-entikane sakadi genine. Ring arepanipune jagate kanten sakadi Taman Eden, nanging ring ungkurnyane sakadi tegal melakange sane gundul. Tan wenten sane pacang mrasidayang luput saking pamangsehipune.4
Balange punika kanten sakadi kudane, tur malaib sakadi kuda perange.
5
Rikala ipun makecog ring muncuk-muncuk gununge, ipun ngrudug sakadi kreta perange, tur ipun ngrepet sakadi padange tuh kadilap antuk geni. Ipun mabarisan sakadi wadua bala sane ageng, sane sayaga jaga mayuda.
6
Asing-asing anake pada jejeh ngetor tur muannyane kembang lemlem, rikala karauhin antuk ipun.
7
Ipun ngebug sakadi parapahlawan, tur ipun mongkod tembok sakadi paraprajurite. Ipun mabaris mameneng ngarepang tur tan naenin mabelok,
8
wiadin nyuang mambahan timpalnyane. Ipun magrombolan mamuuk sakancan benteng mesehnyane, tur tan wenten sane mrasidayang nyadelin ipun.
9
Ipun mabriuk ngebug kota, tur ipun nglambuk tembok-temboknyane. Ipun mongkod umah-umah tur ngranjing ring jendela-jendelane sakadi malinge.
10
Rikala ipun mangseh, tanahe magejeran tur langite ngetor. Surya miwah bulane dados remrem tur bintang-bintange tan masunaran malih.11
Ida Sang Hyang Widi Wasa nitah wadua balan Idane. Pasukan sane ngiringang Ida akeh tur kuat pisan. Ambate ngresresin rahina panemayan Ida Sang Hyang Widi Wasa. Sirake sane pacang mrasidayang luput?
12
Ida Sang Hyang Widi Wasa masabda asapuniki: “Ane jani kapokja kita saking jujur, tur maija tangkil teken Ulun maduluran mapuasa muah ngeling masesambatan.
13
Edengangja dekdek renyuh keneh kitane buat nyinahang kasedihan kitane. Baan nyetset bajun kitane dogen, ento tusingja cukup.”
14
Menawita Ida Sang Hyang Widi Wasa, Widin semetone pacang ledang ngubah pakayunan Idane, tur ngamertanin semeton antuk pamupon sane maliah-liah. Irika semeton pacang mrasidayang ngaturang gandum miwah anggur ring Ida.
15
Upinja trompete ring Gunung Sion, prentahangja mangda rakyate makasami mapuasa, undang ipun ring paruman sane agung.16
Punduhangja rakyate makasami. Ajak ipun ngwentenang paruman sane suci. Ajakja paralingsir-lingsire, tur punduhangja alit-alit miwah rare-rarene makasami. Yadiastu panganten anyar, ipun taler patut nilar umahipun raris rauh ring parumane punika.
17
Parapandita sane ngancangin Ida Sang Hyang Widi Wasa, ring selagan pamorboran aturane klawan gapuran Perhyangan Agunge makasami patut nangis saha ngastawa sapuniki: “Oduh Ratu Sang Hyang Widi Wasa, ledang Palungguh IRatu kawelas arsan ring kaula druene. Sampunangja banggayanga bangsa-bangsane sane tiosan nganistayang miwah ngewerin titiang saha mabaos sapuniki: ‘Dijake Widin jerone?’ ”
18
Sasampun punika Ida Sang Hyang Widi Wasa raris nyinahang sih kawelas arsan Idane ring jagat Idane, tur kawelas arsan ring parakaulan Idane.
19
Ida nyaurin ipun kadi asapuniki: “Ane jani Ulun lakar ngicen kita gandum, anggur muah lengis saitun, tur kita lakar pada cukup. Bangsa-bangsane ane lenan ento tusingja enu buin nemberang kita.
20
Ulun lakar ngulah wadua balan balange ane teka uli kaja, tur abagian lakar ulah Ulun ka tegal melakange. Barisannyane ane paling maluna lakar kentungang ka Segara Matine tur ane paling durina ka Segara Tengah. Bon bangkennyane lakar mangkug. Ulun lakar ngenyagang ia malantaran laksanannyane marep teken kita.
21
Ih tegal-tegale, edaja takut, nanging masuka rena tur liangja, malantaran unduk ane kakardi baan Ida Sang Hyang Widi Wasa pabuat iba.22
Ih paraburone, edaja takut. Tegal pangonane pada gadang lumlum, punyan woh-wohane suba mabuah, aketo masih punyan aa muah punyan anggure pada mabuah liu pesan.
23
Ih pararakyat Sione, pada maliang-liang tur masuka-sukanja malantaran unduk ane kakardi baan Ida Sang Hyang Widi Wasa, Widin kitane pabuat kita. Ida suba mapaica ujan amun benehne teken kita dikalan masan ujane. Aketo masih dimasan endange, buka ane suba-suba.24
Panyosoh-panyosohane lakar bek misi gandum, bak-bake di samping pameresane lakar maliah-liah baan anggur muah lengis saitun.
25
Ulun lakar buin maicayang teken kita barang-barang kitane ane ilang dugas masan grombolan-grombolan balange ngamah pamupon tegalan kitane. Tuah Ulun ane suba ngutus wadua balan balange ento teken kita.
26
Ane jani kita liu pesan ngelah dedaaran, tur kita kacukupan pesan. Kita lakar ngluihang Ida Sang Hyang Widi Wasa, Widin kitane, ane suba ngardi unduk ane melah-melah pabuat kita. Parakaulan Ulune tusing lakar buin kanistayang.
27
Sasubane keto, ih Israel, kita lakar nawang mungguing Ulun malingga di pantaran kitane. Sajaba ento kita lakar nawang mungguing Ulun ene Sang Hyang Widi Wasa, Widin kitane. Tusingja ada buin ane lenan. Parakaulan Ulune tusing lakar taen kanistayang.”
28
“Sasubane keto, Ulun lakar mriokang Roh Ulune teken kita suang-suang. Pianak-pianak kitane luh muah muani lakar nglumbrahang sabdan Ulune. Parawong tuan kitane lakar pada ngipi, tur anake bajang truna lakar maan wahyu.
29
Kala ditu Ulun lakar mriokang Roh Ulune neked teken paraparekan muah panyeroan.
30
Ulun lakar mapaica tanda-tanda ngenain unduk dinane ento. Tandane ento lakar ngenah di langite muah di gumine. Kala ditu lakar ada getih ngecor, api muah gulem.31
Suryane lakar peteng dedet, tur bulane lakar barak buka getihe; buka keto lakar panadinne satonden rauh panemayan Ida Sang Hyang Widi Wasa, nah ento dinane agung tur ngresresin ento.
32
Nanging sakancan anake ane nunas pitulungan Ida Sang Hyang Widi Wasa lakar rahayu. Buka ane suba kasabdayang baan Ida Sang Hyang Widi Wasa, kene: ‘Ada makudang-kudang wong Yerusaleme ane lakar luput, nah ento anak ane selik Ulun apang ia enu idup.’ ”
1
Ida Sang Hyang Widi Wasa masabda asapuniki: “Dimasane ento Ulun lakar buin nadiang gumi Yehuda muah kota Yerusaleme gemuh landuh.2
Ulun lakar munduhang bangsa-bangsane makejang tur ngaba ia ka Lebak Pangadilane. Ditu Ulun lakar nepasin ia manut laksanannyane marep teken kaulun Ulune. Ia suba nyambehang wong Israele ka gumi-gumin wong sunantarane, tur ia ngadum-dum gumi Israele, gumin Ulune.
3
Ia pada mulang undi buat lakar ngadum kaulan Ulune ane matawan. Ia ngadep cerik-cerike luh wiadin muani kanggon panjak, tur pamelinne anggona nyewa sundel muah meli anggur.
4
Ih Tirus, Sidon muah Pilistin, apa ane lakar gae iba marep teken Ulun? Apake iba makeneh lakar ngwales laksanan Ulune? Yening keto, dienggal Ulun lakar ngwales laksanan ibane.5 Iba suba nyuang mas muah perak Ulune, tur iba ngaba kasugihan arta branan Ulune ka pura-puran ibane.
6 Iba suba nyemak wong Yehuda muah wong Yerusaleme, tur aba iba joh uli guminnyane laut adep iba teken wong Yunanine.
7 Ane jani Ulun lakar ngaba ia pesu uli tongosnyane suba adep iba. Ulun lakar ngwales teken iba, patuh buka laksanan ibane marep teken ia.
8 Ulun lakar nyerahang pianak-pianak ibane luh wiadin muani buat kadep sig wong Yehudane. Wong Yehudane lakar ngadep ia joh pesan sig wong Sebane. Ulun ene Sang Hyang Widi Wasa ane suba masabda buka keto.”
9
“Warahangja unduke ene di pantaran parabangsane: ‘Pada sayagaja buat maperang. Dauhinja parapahlawan ibane. Punduhangja paraprajurite tur majalanja.
10
Pentenginja besin tenggalan ibane anggon pedang, tur pentenginja blakas-blakas ibane anggon tumbak. Makejang apang pada maperang neked ane lemet-lemet.
11
Ih bangsa-bangsa ane di kiwa tengen, maija enggalang tur mapunduhja di lebake.’ ”
12
“Bangsa-bangsane ento patut sayaga tur pesu ka Lebak Pangadilane. Ditu Ulun, Sang Hyang Widi Wasa, malingga tur nepasin bangsa-bangsane makejang ane ada di kiwa tengen gumine ene.13
Ia makejang jaat pesan. Getepja ia buka nganyi gandume dimasan manyine. Nyagang buka ngenyagang buah anggure di pameresan anggure ane bek, kantos yeh anggure membah pesu.”
14
Panyiuan jadmane ring Lebak Pangadilane. Irika rahina panemayan Ida Sang Hyang Widi Wasa digelis pacang rauh.15
Surya miwah bulane dados peteng, tur bintang-bintange nenten malih masinar.
16
Ida Sang Hyang Widi Wasa mageluran saking Gunung Sion, tur suaran Idane sakadi krebeke saking Yerusalem, sane ngawinang langit miwah pretiwine ngetor. Nanging Ida pacang nyayubin kaulan Idane.
17
“Sasubane keto, ih Israel, kita lakar nawang mungguing Ulun ene Sang Hyang Widi Wasa, Widin kitane. Ulun malingga di Sion, di gunung Ulune ane suci. Kota Yerusaleme lakar dadi kota ane suci, tur dura negarane tusing lakar buin ngalahang ia.
18
Dimasane ento pagunungan-pagunungane lakar bek misi abian anggur, tur di bukit-bukite liu ada sampi. Buina lakar liu ada yeh di sakancan tukad-tukad Yehudane. Lakar ada tukad membah uli di Perhyangan Agung Ida Sang Hyang Widi Wasa, tur tukade ento lakar ngecokin Lebak Sitime.
19
Gumi Mesire lakar dadi tanah melakang, tur gumi Edome lakar dadi dugdugan uug-uugan, sawireh ia suba ngebug gumi Yehudane muah ngamatiang rakyate ane tan padosa.20
[20-21] Ulun lakar nagih pasilih angkihan anake ane suba kamatiang tur Ulun tusing lakar ngenuang buin kajaatane. Nanging gumi Yehuda muah kota Yerusaleme lakar katongosin baan rakyate buat salawas-lawasne, tur Ulun, Sang Hyang Widi Wasa lakar malingga di Gunung Sion.”