1
Puniki pangandikan Ida Sang Hyang Widi Wasa sane katiba ring Dane Hosea okan Dane Beeri duk Ida Sang Prabu Usia, Yotam, Ahas miwah Hiskia jumeneng ratu ring Yehuda lan Ida Sang Prabu Yerobeam okan Ida Sang Prabu Yoas jumeneng nata ring Israel.2
Rikala pangawitipun Ida Sang Hyang Widi Wasa masabda ring wong Israele majalaran Dane Hosea, Ida ngandika ring Dane Hosea sapuniki: “Ih Hosea kemaja ngalih kurenan, sakewala kurenan kitane lakar tusing satia. Buina pianak-pianak kitane lakar patuh buka memenne. Buka keto masih kaulan Ulune suba nilar Ulun tur tusing satia.”3
Dane Hosea tumuli ngambil rabi. Rabin danene mapesengan Gomer, okan Dane Diblaim. Sasampun okan danene lanang sane pinih duur embas,4 Ida Sang Hyang Widi Wasa ngandika ring Dane Hosea sapuniki: “Adaninja pianak kitane ento I Yisreel, sawireh tusing buin amunapa makelonne Ulun lakar ngukum ratun Israele, uli krana laksanan leluurnyane nah ento Yehu ane ngamatiang anak di Yisreel. Ulun lakar megatang katurunan I Yehune.
5 Buina dikalane ento Ulun lakar nyirnayang kakuatan wadua balan Israele di Lebak Yisreele.”
6
Dane Gomer raris ngembasang rare sane kaping kalih. Rarene sane wau embas punika istri. Ida Sang Hyang Widi Wasa raris ngandika ring Dane Hosea sapuniki: “Adaninja ia Lo-Ruhama. Sawireh Ulun tusing lakar buin nyinahang tresna teken rakyat Israele wiadin tusing lakar ngampurayang ia.7 Nanging teken wong Yehudane Ulun tansah lakar nyinahang tresnan Ulune. Ulun Sang Hyang Widi Wasa, Widinnyane lakar ngluputang ia. Nanging Ulun ngluputang ia dongja malantaran perang, nah ento aji pedang wiadin aji gendewa lan panah wiadin aji jaran muah wadua bala ane majaranan.”
8
Sasampune Dane Gomer nyapih raren danene sane istri punika, dane malih mobot tur ngembasang oka lanang.9 Ida Sang Hyang Widi Wasa tumuli ngandika ring Dane Hosea sapuniki: “Adaninja ia Lo-Ami. Sawireh wong Israele tidong kaulan Ulune, tur Ulun tidong Widinnyane.”
10
Wong Israele pacang sakadi biase ring segarane akehipun, kantos tan keni antuk ngetang wiadin nakeh. Sane mangkin Ida Sang Hyang Widi Wasa ngandika ring ipun sapuniki: “Kita tidong kaulan Ulun.” Nanging pacang rauh masanipun Ida jaga ngandika ring ipun sapuniki: “Kita paraputran Ida Sang Hyang Widi Wasa ane nyeneng.”11 Wong Yehuda lan wong Israele pacang malih katunggilang. Ipun pacang molih pamimpin asiki, tur ipun pacang sayan ngagengang tur pacang malih muponin gemuh landuh ring panegarannyane. Rahinan Yisreele pacang dados rahina ageng.
1
Duaning punika wastaninja semeton ragane wong Israel sane lanang punika: “Ami” miwah sane istri “Ruhama”.2
Ih cening, mapangidihja teken memen kitane, yadiastun ia suba tusing enu dadi kurenan Ulune, tur Ulun suba tusing enu dadi kurenannyane. Mapangidih teken ia apanga ia suud mamitra muah nyundel.3 Yen ia tusing nyak suud, Ulun lakar nglalungin ia apanga kanti buka dugase ia mara lekad. Ulun lakar nadiang ia buka tanahe tuh tur gundul, tur ia lakar mati ulihan bedak.
4 [4-5] Ulun tusing lakar nyinahang sih pasuecan teken pianak-pianaknyane sawireh pianak-pianakne ento pianak bebinjat, pianak baana nyundel. Ia newek ngraos kene: “Tiang lakar luas ngalih mitran tiange. Ia ane maang tiang pangan kinum, kain wol muah kain lenen, lengis saitun muah anggur.”
5
6
Ento krana Ulun lakar magehin ia aji duin ketket tur ngwangun tembok buat ngempetin rurungnyane.7 Ia lakar malaib nututin mitrannyane, nanging tusing bakat baana nguber. Ia lakar ngalih mitrannyane nanging lakar tuara tepukina. Ditu ia lakar ngraos kene: “Idewek lakar malipetan ngalih somah ideweke ane pangawit. Dugase ento idewek enu luungan katimbang teken ane jani.”
8
Ia tusing taen nawang mungguing tuah Ulun ane maang ia gandum, anggur, lengis saitun muah sakancan mas perak ane anggona mabakti teken Dewa Baale ento.9 Ento awanane dimasan manyine Ulun lakar nyuang paican Ulune ane marupa gandum muah anggur, tur lakar nyuang kain wol muah kain lenene ane baang Ulun buat dadi panganggonnyane.
10 Ulun lakar nglalungin ia di arep mitrannyane, tur tusing ada anak ane nyidayang ngluputang ia uli kakuasan Ulune.
11 Ulun lakar nyuudang saananing papestanne nah ento rerainan ane ngataun, rerainan ane ngabulan muah rerainan agamannyane.
12 Ulun lakar ngrusak abian anggurne muah punyan aanne, ane orahanga pabaang uli mitrannyane makadadi upahne ngayahin ia. Ulun lakar ngubah abian anggurne muah abian woh-wohanne dadi alas gede, tur buron alasane lakar ngrusak abiane ento.
13 Ulun lakar ngukum ia samekelon ia engsap teken Ulun, laut morbor menyan pabuat Dewa Baal tur nganggon mas-masane nguber mitrannyane. Ida Sang Hyang Widi Wasa sampun ngandika asapunika.
14
Sawireh keto Ulun lakar ngaba buin ia ka tegal melakange. Ditu Ulun lakar nglelunyuhin ia laut ngalap kenehne.15 Ulun lakar ngulihang abian anggure tur nadiang Lebak Akore dadi kuri pangajap-ajap. Ditu ia lakar ngisinin munyin Ulune buka dugase ia enu bajang, dugase ia mara teka uli Mesir.
16 Ditu ia lakar buin ngangkenin Ulun somahnyane, tur tusing buin ngadanin Ulun Baalnyane.
17 Ulun tusing lakar maang ia buin nyambat adan Baale.
18
Didinane ento Ulun lakar ngae prajanjian ajak buron-burone di alase muah sawatek kedise, apanga ia tusing makewehin kaulan Ulune. Ulun masih lakar ngisidang sawatek sanjata perange uli di tanahe ento, sawatek pedang muah panah, tur nglugrain kaulan Ulune muponin sutrepti rahayu.19
Ih Israel, Ulun lakar nadiang kita kurenan Ulune. Ulun lakar tuon tur satia. Ulun lakar nyinahang sih pasuecan muah kapitresnan ane tan papegatan, tur nadiang kita druen Ulune salawas-lawasne.
20
Ulun lakar ngamanggehang prajanjian Ulune tur nadiang kita druen Ulun, tur kita lakar ngangkenin Ulun dadi Widin kitane.
21
[21-22] Dikalane ento Ulun lakar ngisinin pangastawan kaulan Ulune Israel. Ulun lakar ngadakang ujan ulung ka gumine. Ditu gumine lakar numbuhang gandum, buah anggur muah buah saitun.
22
23
Ulun lakar ngamanggehang kaulan Ulune di gumine ene, tur nadiang ia gemuh landuh. Ulun lakar nyinahang tresnan Ulune teken anake ane kadanin: “Lo-Ruhama“, muah teken anake ane kadanin”Lo-Ami”. Ulun lakar ngandika: “Kita kaulan Ulune,” tur ditu ia pada matur: “Palungguh IRatu Widin titiange.”
1
Ida Sang Hyang Widi Wasa ngandika ring tiang, sapuniki: “Kema buin edengang tresnan kitane teken anake luh ane sedekan mamitra ajaka mitranne. Kita patut nresnain ia buka Ulun enu tresna teken wong Israele, yadiastu ia mabalik ngalih widi-widi ane lenan, tur demen ngaturang roti kismis teken arca-arcane.”2
Duaning punika tiang raris numbas anake istri punika aji limolas bidang jinah perak miwah gandum 150 kilogram.3 Tiang ngorahin ipun, mungguing ipun patut sue nongos ring genah tiange. Sasuennyane ring genah tiange, ipun tan dados nyundel wiadin mamitra. Tiang taler nyantosang ipun amunika suenipun.
4 Santukan taler amunika suenipun wong Israele nenten madue ratu, pamimpin miwah nenten maturan wiadin madue palelinggan. Taler nenten madue arca-arca wiadin pepindan sane kagunayang dados sasembahan.
5 Nanging pacang rauh masanipun wong Israele pacang mawali ring Ida Sang Hyang Widi Wasa, Widinnyane, tur katurunan Ida Sang Prabu Daude makadados ratunnyane. Ipun pacang ajerih ring Ida Sang Hyang Widi Wasa tur pacang nampi paican Idane sane becik.
1
Ida Sang Hyang Widi Wasa madue wicara marep ring bangsane sane magenah ring panegarane puniki. Ih wong Israel, pirengangja pangandikan Idane sapuniki: “Di tanahe ene, tusing ada anak ane satia wiadin dreda bakti. Tur rakyate tusing ngangkenin Ulun ene Widi.2 Ia ngae prajanjian nanging ia ane mamurug prajanjiane ento. Ia mogbog, ngamatiang jlema, mamaling muah mamitra. Kajaatane sayan ngedenang tur ia pada saling matiang.
3 Ento krana tanahe lakar dadi tuh, mawanan sawatek ane idup ditu lakar mati. Buron-buron, kedis-kedise lakar mati, neked kayang bene ane di tukade masih lakar mati.”
4
Ida Sang Hyang Widi Wasa ngandika sapuniki: “Eda pesan ada anak nalih rakyate wiadin nglemekin ia, sawireh pariselsel Ulune tibakang Ulun teken kita soroh panditane.5 Peteng lemah kita ngae pelih ane gede, tur paranabine tusing melahan teken kita. Ulun lakar ngenyagang Israel, memen kitane.
6 Kaulan Ulune nyag sawireh ia tusing nyak ngangkenin Ulun. Parapanditan kitane tusing nyak ngangkenin Ulun tur nulak paurukan Ulune. Sawireh keto, Ulun nulak kita tur tusing nyak ngangkenin pianak-pianak kitane muani makadadi panditan Ulune.
7
Sayan ngliunang kita dadi pandita, sayan liu dosan kitane teken Ulun. Ento awanane Ulun lakar ngubah kaluihan kitane dadi kanistan.8 Kita sayan nyugihang uli krana dosa-dosan kaulan Ulune, ento awanane kita dot apanga ia sayan ngliunang ngae dosa.
9 Kita lakar ngemasin ukuman patuh teken ukuman rakyate. Ulun lakar ngukum kita tur ngwales kajaatan ane laksanain kita.
10 Kita lakar naar duman surudan aturan kitane, nanging kita tansah seduk. Kita lakar mabakti teken dewa-dewa kasuburan, nanging kita tetep tusing ngelah pianak, sawireh kita suba mabalik tur ngutang Ulun buat nututin widi-widi ane lenan.”
11
Ida Sang Hyang Widi Wasa ngandika sapuniki: “Yeh anggure ane let muah ane anyar ngusakang pepineh kaulan Ulune.12 Ia nunas pawisik teken kayune atugel. Tungkede nuturang teken ia apa ane dot tawanga! Ia suba nilar Ulun. Buka anake luh ane nyundel ia suba nyerahang dewekne teken widi-widi ane lenan.
13 Di tongos ane pingit di muncuk-muncuk gununge ia ngaturang aturan tur di bukit-bukite ia morbor menyan di batan kayune ane tegeh-tegeh tur ngremong, sawireh beten kayune ento ngliangin pesan.
Pamragatne pianak kitane ane luh-luh makejang pada nyundel tur mantu-mantun kitane pada mamitra.14 Nanging yadian buka keto, Ulun tusing lakar ngukum ia ulihan ento, sawireh kita newek nututin panayang-panayang purane, tur bareng-bareng ajak ia kita ngaturang aturan buka wong sunantarane. Buka munyin slokane ane kene: Rakyate ane tusing ngelah pangresepan lakar uug.
15
Yadiastu kita rakyat Israel tusing satia teken Ulun, dumadak I Yehuda tusing malaksana pelih ane patuh buka keto. Edaja mabakti di Gilgal wiadin di Betel, wiadin ngae prajanjian ditu masrana parab Ida Sang Hyang Widi Wasa ane nyeneng.16 Rakyat Israele bengkungne patuh buka bagale. Kudiang Ulun lakar ngangonang ia, buka ngangonang biri-birine di tegal pangonane?
17 Wong Israele kena gunan arca-arcane. Depang suba ia majalan nganggoang keneh.
18 Sasubane liu nginum anggur, ia maseneng-seneng di umah sundele. Ia demenan teken kanistan bandingang teken kaluihan.
19 Ia lakar kasabatang buka ampehang angine, tur ia lakar rumasa kimud uli krana nyungsung dewa sunantarane.
1
Ih parapandita padingehangja ene! Ih rakyat Israel pedasinja. Ih sawatek kulawargan pararatune, pada padingehangja! Kita patutne nibakang tetepasan saha adil, sawireh tetepasane ento lakar nibenin dewek kitane! Kita suba dadi jeet di Mispa, dadi jaring ane mapasang di Gunung Tabor,2 dadi bangbang dalem di Lebak Sitime, tur Ulun lakar ngukum kita ajak makejang.
3 Ulun nawang buka nyenke bangsa Israele ento. Ia tusing kasaruan di ajeng Ulune. Ia suba tusing satia tur rakyatne tusing pantes mabakti teken Ulun.”
4
Kajaatan sane sampun laksanayanga antuk rakyate nyadelin ipun mawali ring ayun Widinipune. Indik nyungsung arca-arcane punika sampun nangkeb manahipune, tur ipun sampun tan nyak ngangkenin Ida Sang Hyang Widi Wasa.5 Kasumbungan rakyat Israele sampun makuug nglawan ipun. Dosannyane ngranayang ipun katanjung tur labuh, tur rakyat Yehudane taler labuh sareng ipun.
6 Ipun ngambil biri-biri miwah bantengnyane buat aturan sane katurang ring Ida Sang Hyang Widi Wasa, nanging pakertinnyane punika nenten becik. Ipun nenten mrasidayang manggihin Ida, santukan Ida sampun nilar ipun.
7 Ipun sareng sami sampun tan satia ring Ida Sang Hyang Widi Wasa. Pianak-pianaknyane nenten dados druen Ida. Duaning punika sane mangkin ipun miwah tanahipune pacang kasirnayang.
8
Upinja trompet perange ring Gibea. Suarayangja kulkul buluse ring Rama! Jerit-jeritja ring Betel! Ih wong Benyamin, mangsehja ka payudan.9 Rahina tetepasane sampun rauh, tur bangsa Israele pacang lebur. Ih rakyat Israel indike puniki wiakti jaga kasidan!
10
Ida Sang Hyang Widi Wasa ngandika sapuniki: “Ulun duka sawireh parapamimpin Yehudane suba nyerbu Israel tur ngrampas guminnyane. Sawireh keto Ulun lakar mriokang ukuman teken ia buka blabare.11 Israel katindes. Ia suba kelangan gumi ane dadi gelahnyane, sawireh ia ngidih tulung teken anake ane tuara nyidayang nulungin.
12 Ulun lakar nibakang bencana teken rakyat Israel muah karusakan teken rakyat Yehudane.
13
Dugase Israel nepukin ambate sakit deweknyane, tur dugase Yehuda nepukin dewekne matatu, ditu Israel laut ka Asur ngidih pitulungan teken sang nata ratune ditu, nanging ia tusing nyidayang ngubadin wiadin nyegerang tatunnyane.14 Ulun lakar ngebug rakyat Israel muah Yehudane waluya buka singane. Ulun lakar mukang-mukang ia, suba keto laut ia kalahin Ulun. Yen Ulun maid ia, adiriko tusing ada anak ane nyidayang ngluputang ia.
15
Ulun lakar ngutang kaulan Ulune, apanga ia cukup nandang sangsara uli krana dosannyane, kanti ia teka ngalih Ulun. Miribne uli krana sangsarannyane ento ia lakar mapakibeh ngalih Ulun.”1
Rakyate pada mabaos sapuniki: “Jalan iraga mabalik ka ayun Ida Sang Hyang Widi Wasa. Ida suba natunin iraga, nanging Ida lakar medbed tatun iragane, singke saja buka keto?2 Sajeroning dua wai wiadin telu wai Ida lakar ngurip iraga, tur iraga lakar idup di ayun idane.
3 Jalanja iraga mapakibeh nawang Ida Sang Hyang Widi Wasa. Ida pasti lakar rauh teken iraga buka pastin galang kangine, wiadin buka pastin tekan masan ujane melusin gumine.”
4
Nanging pangandikan Ida Sang Hyang Widi Wasa sapuniki: “Apake ane lakar gaenin Ulun marep teken Israel muah Yehuda? Tresna baktin kitane teken Ulun gangsar pesan ilang buka gangsar ilang sayonge semengan. Ia buka ambune ane enggal ilang dikala suba lemah.5 Ento kranane Ulun suba ngutus nabin Ulune nekain kita buat ngantegang sabdan Ulune ane lakar ngukum muah nguugang kita. Sawireh apa ane arsayang Ulun teken kita jani suba terang.
6 Ulun ngarsayang tresna baktin kitane ane tan papegatan, dongja aturan wewalungan kitane. Ane buatang Ulun dongja aturan kitane maborbor nanging apanga kita nawang Ulun.
7
Nanging mara pesan ia teked di gumine di Adam ia suba mamurug prajanjian Ulune teken ia.8 Gilead ento kota ane bek misi jlema jaat muah tukang ngamatiang jlema.
9 Parapanditannyane waluya buka grombolan parampoke ane nyadang anak. Yadiastu di rurunge ane ngungsi ka tongose ane suci di Sikem, ia masih ngamatiang jlema. Tur ia nyelapang nyalanang kajaatane ento makejang.
10 Ulun suba ngaksi paundukan-paundukan ane ngresresin di Israel. Kaulan Ulune suba ngletehin dewekne malantaran nyungsung arca-arca.
11
Keto masih pabuat kita rakyat Yehuda, Ulun suba netepang satunggaling masa buat ngukum kita uli krana pakardin kitane.1
Sabilang Ulun mabudi nyegerang Israel kaulan Ulune, tur nadiang ia buin gemuh landuh, Ulun tansah nyingak kajaatan ane suba gaenina makejang. Ia pada saling apus, ia mongkar umah tur mamaling, ia ngrampok anak di rurung-rurunge.2 Tusing taen macelep di pepinehnyane, mungguing Ulun tusing lakar ngengsapang sakancan kajaatannyane ento. Nanging dosannyane suba ngaput ia, tur Ulun tusing nyidayang ngelen ulat marep teken ia.”
3
Ida Sang Hyang Widi Wasa ngandika asapuniki: “Rakyate ngapus ratu muah prakanggo-prakanggonnyane aji rerincikan ane jaat.4 Ia ajaka makejang pekel tur tusing satia. Getingnyane ngendih murub buka apine di pamanggangan rotine, ane tusing aduka baan tukang rotine kanti tepungne suba nadi buat lakar kapanggang.
5 Didina pepestan pararatunnyane ia ngawanang sang prabu muah paraprakanggonnyane punyah tur edan aji anggur.
6 Kenehne panes bara buka pamanggangane, ulihan rerincikannyane ento. Apeteng mepek pedihnyane angarab-arab tur semengane pedihne ento makeplug tur ngleplep.
7
Sajeroning pedihne ane tan kadi-kadi ia ngamatiang pamrentahnyane. Pararatunnyane kamatiang sakaukud, nanging tusing ada ane ngastawa nunas tulung teken Ulun.”8
Ida Sang Hyang Widi Wasa ngandika asapuniki: “Rakyat Israel buka rotine ane setengah mateng. Ia andel teken bangsa-bangsa ane ada di kiwa tengennyane,9 tur tusing nawang mungguing kapracayannyane teken wong sunantarane ento suba nelahang kakuatannyane. Dinannyane suba kitung, nanging ia tuara tau.
10 Kasumbungan rakyat Israele nyerit nglawan ia. Yadiastu makejang suba kasidan buka keto, nanging ia tusing nyak mabalik teken Ulun Sang Hyang Widi Wasa, Widinnyane.
11 Israel makeber milehan buka kedis darane ane belog. Paling malu ia singgah di Mesir buat ngidih tulung, suba keto ia laut malaib ka Asur.
12 Nanging Ulun lakar ngebatang jaring tur ngejuk ia buka kedis-kedise dikalane ia makeber. Ulun lakar ngukum ia manut kajaatan ane suba lakonina.
13
Ia suba kena sengkala. Ia suba nilar Ulun tur brontak nglawan Ulun. Ia lakar sirna. Ulun mapakayun ngluputang ia, nanging baktinnyane teken Ulun palsu.14 Ia tusing saking jujur ngastawa teken Ulun. Nanging ia nylempohang dewekne tur gerong-gerong patuh buka tingkah bangsane ane tusing nyumbah Widi. Yen ia ngastawa nunas gandum muah anggur ia nues-nues awakne buka wong sunantarane. Sanget pesan ia brontak.
15 Yadiastu Ulun ane suba nuntun tur ngawanang ia siteng, nanging ia mambek dura cara nglawan Ulun.
16 Ia terus ngalahin Ulun ngalih Widi ane tusing ngelah kakuatan. Ia tusing nyandang andelang buka panahe ane bengkot. Sawireh parapamimpinnyane ngraos sumbung, ia lakar mati ulihan kawirosan, tur wong Mesire lakar pada kedek.”
1
Ida Sang Hyang Widi Wasa ngandika asapuniki: “Tepakja kulkule bulusang. Musuh-musuhe nyander gumin Ulune waluya buka garudane. Kaulan Ulune suba mamurug prajanjian Ulune teken ia tur brontak nglawan paurukan Ulune.2 Yadiastu ia nyambat Ulun ene Widinnyane tur ngorahang mungguing ia kaulan Ulune muah ia nawang Ulun,
3 nanging Israel suba nulak paundukan ane melah. Sawireh keto musuh-musuhnyane lakar nguber-uber ia.
4
Kaulan Ulune milih pararatu, nanging ento tusing ulihan ledang Ulune. Ia nyemak mas peraknyane laut ngae arca-arca buat ngrusak dewekne.5 Ulun geting teken godel mas ane sumbaha di Samaria. Ulun duka pesan teken ia. Buina amun apake makelonne ia buka keto kanti ia suud nyumbah arca-arca?
6 Tukang wong Israele ngae arca, tur arcane ento tidongja Widi. Godel mase ane sumbaha di Samaria lakar kanyagang kanti benyah.
7 Yen ia nyambeh angin ia lakar mupu angin ribut. Tegal gandume ane tonden wayah tusing lakar taen ngasilang roti. Dipradene ada buahne ane wayah, anak sunantara ane lakar naar kanti telah.
8 Wong Israele suba dadi buka bangsa ane lenan tur suba tan paguna buka payuke belah.
9 Wong Israele majalan nuut mambahanne niri tur bengkungne patuh buka keledae alasane. Ia suba luas ngalih pitulungan uli wong Asure, tur suba nyewa bangsa len buat nyayubin dewekne.
10 Nanging ane jani Ulun lakar munduhang ia dadi besik, tur lakar ngukum ia. Ia lakar enggal makliud ulihan sakit, dikalan prabune di Asur nindes ia.
11
Ngangcan ngliunang wong Israele ngae pamorboran aturan buat ngilangang dosanne, sayan ngliunang tongos ane gelahanga buat ngae dosa.12 Liu pesan Ulun nulis paurukan pabuat rakyate ene, nanging ia nulak paurukan Ulune ento buka nulak barange ane tawah muah asing.
13 Ia ngaturang aturan teken Ulun tur ia naar ben aturane ento. Nanging Ulun Sang Hyang Widi Wasa tusing ledang teken ia, tur ane jani Ulun ngingetang dosannyane tur ngukum ia uli krana dosannyane ento. Ulun lakar ngirim ia malipetan ka Mesir.
14
Wong Israele suba ngwangun puri, nanging ia suba engsap teken Sang ane ngardi ia. Wong Yehudane suba ngwangun kota-kota ane mabenteng. Nanging Ulun lakar nedunang api ane lakar ngeseng puri muah kota-kotannyane ento.”1
Ih wong Israel, usanangja masuka-sukaan sajeroning papestan semetone sane sakadi wong sunantarane. Semeton sampun nilar Widin semetone tur sampun ngadol ragan semetone sakadi sundele ring Dewa Baal, tur semeton sampun kuduan ring gandum sane pitaenang semeton makadados upah semetone.2 Nanging semeton pacang digelis kakirangan gandum miwah minyak saitun, tur pacang katelasan toya anggur.
3 Wong Israele nenten pacang kantun magenah ring tanah paican Ida Sang Hyang Widi Wasa, nanging ipun pacang mawali ka Mesir, samaliha ipun pacang naar dedaaran sane leteh ring Asur.
4 Ring panegaran wong sunantarane punika ipun tan pacang nyidayang maturan toya anggur ring Ida Sang Hyang Widi Wasa, wiadin ngaturang aturannyane ring Ida. Dedaarannyane pacang ngletehin sang sane naar sakadi naar surudan punjung anak padem. Dedaaran punika wantah kanggen ngwaregang basangnyane kewanten, nenten dados kanggen aturan sane katurang ring Perhyangan Agung Ida Sang Hyang Widi Wasa.
5 Samaliha yan rerainan buat ngluihang Ida Sang Hyang Widi Wasa punika rauh, napike sane pacang kardi ipun?
6 Rikala bencanane rauh tur rakyate pada pablesat, wong Mesire pacang munduhang ipun buat jaga kapendem ring Mempis. Arta brana perak miwah tegak umahnyane pacang kalikub antuk padang miwah bet ketket.
7
Rahina paukumane rauh, inggih punika panemayan rakyate jaga nampi ukuman sane sampun kasediang pabuat ipun. Yening paindikan punika sampun kasidan, irika wong Israele jaga uning. Semeton jaga mabaos sapuniki: “Nabine punika belog, tur anake sane kasurupan punika buduh.” Semeton kalintang geting ring tiang santukan dosan semetone kalintang ageng.8 Ida Sang Hyang Widi Wasa sampun ngutus tiang buat makeling Israel kaulan Idane. Nanging kijaja tiang majalan, semeton tansah ngindayang nyeet tiang sakadi ngejuk paksi. Ring panegara druen Ida Sang Hyang Widi Wasa rakyate dados meseh sang nabi.
9 Pagaennyane jaat tan wenten nyandang cagerang pateh sakadi daweg ipun ring Gibea. Ida Sang Hyang Widi Wasa pacang ngelingang dosannyane tur jaga ngukum ipun malantaran dosannyane punika.
10
Ida Sang Hyang Widi Wasa ngandika asapuniki: “Dugas Ulune mara nyingak Israel, waluya buka nyingak buah anggur di tegal melakange. Dugase Ulun mara nyingak leluur kitane, waluya Ulun nyingak buah aa ane mara tasak dimasannyane mabuah. Nanging dikalane ia ka Gunung Peor, ditu ia nyumunin mabakti teken Dewa Baal, tur enggal pesan ia dadi cemer patuh buka dewa-dewane ane sungkemina ento.11 Kaagungan Israele lakar makeber buka kedise, tur tusing lakar ada buin cerik-cerik ane lakar lekadanga. Tusing ada anak luh beling, tusing ada rare buin belinganga.
12 Nanging yadian ia nyidayang numbuhang pianak, Ulun lakar nyuang ia tur tuara nglugrain ia enu idup angan adiri. Dikalane Ulun ngutang bangsane ene, ditu lakar ada pakewuh ane nibenin ia.”
13
Duh Ratu Sang Hyang Widi Wasa, titiang ngeton pianak-pianaknyane kaburu tur kapademang.14 Napike sane patut tunasang titiang ring Palungguh IRatu sane patut margiang IRatu marep ring bangsane puniki? Dadosangja luh-luhnyane bekung. Dadosangja ipun tan mrasidayang mesuang yeh nyonyo.
15
Ida Sang Hyang Widi Wasa ngandika asapuniki: “Sawatek laksanannyane ane jaat ento, kakawitin di Gilgal. Ditu pangawitne Ulun geting teken ia. Tur malantaran kajaatan ane suba laksanayanga ento, Ulun lakar ngaadang ia uli gumin Ulune. Ulun tusing lakar enu buin nresnain ia. Sawatek pamimpinnyane suba brontak nglawan Ulun.16 Wong Israele suba buka tetanemane ane akahne suba tuh tur ane tusing nyidayang mabuah. Ia lakar tuara ngelah pianak, Ulun lakar ngamatiang pianakne ane paling sayanga.”
17
Ida Sang Hyang Widi Wasa sane sungsung tiang pacang nulak kaulan Idane santukan ipun sampun tan ngiringang pangandikan Idane. Ipun pacang dados anak ngumbara ring pantaran parabangsane.1
Bangsa Israele tan bina sakadi wit anggure sane nged mawoh. Sayan ipun gemuh sayan ngakehang ipun makarya pamorboran aturan. Sayan landuh tanahipune, sayan ngamecikang ipun ngardi batu palelinggan sane baktinin ipun.2 Bangsa sane manahne linyok, sane mangkin patut nandang sangsara uli krana dosannyane. Ida Sang Hyang Widi Wasa pacang nguug pamorboran aturannyane lan ngenyagang lelinggannyane.
3
Bangsane puniki gelis jaga mabaos sapuniki: “Iraga jani tuara ngelah ratu sawireh iraga suba tusing takut teken Ida Sang Hyang Widi Wasa. Nanging apake ane nyidayang gaenina baan sang ratu pabuat iraga?”4 Ipun mabaos puyung tur ngardi prajanjian palsu samaliha prajanjian sane tan paguna. Kadilane sampun kadadosang nenten adil. Ipun tumbuh sakadi padang sane nglengehin ring tegale sane sampun matekapin.
5
Rakyate sane magenah ring kota Samaria pacang ajerih tur sedih mangenang icalipun godel lembu mas sane ring Betel. Ipun miwah parapanditane sane nyungsung arcane punika pacang mangelingin godel lembu mase punika. Ipun pacang ngeling rikala mas kamulian godel lembune punika kablulangin.6 Arca punika pacang kabakta ka Asur makadados upeti pabuat sang nata ratu. Wong Israel pacang kanistayang tur nandang kimud malantaran pitutur sane tuutang ipun.
7 Ratunnyane jaga baktana sakadi tugelan tarune ring toyane.
8 Pucak-pucak bukit genah nyungsung Dewa Awen, genah wong Israele mabakti ring arca-arcane pacang kasirnayang. Ketket miwah padange pacang tumbuh ngliput genah pamorborannyane punika. Rakyate pacang jerit-jerit, ngaukin gunung-gununge: “Engkebangja tiang!”, lan ngaukin bukit-bukite: “Tekepinja tiang!”
9
Ida Sang Hyang Widi Wasa ngandika asapuniki: “Bangsa Israele tusing suud-suud ngae dosa nglawan Ulun ngawit uli dosannyane di Gibea. Ento krana di Gibea siate lakar nguber ia.10 Ulun lakar ngebug jlemane ane madosa ene tur ngukum ia. Parabangsane lakar pada bareng nglawan ia, tur ia lakar kukum uli krana dosannyane ane liu ento.
11
Ane pidan Israel waluya godel lambu ane kaajah, suba sedia tur nyak nyosoh gabah. Nanging Ulun masang uga sig baongne ane melah ento, tur mrabotang ia buat gegaen ane abotan. Ulun nganggon Yehuda ngedeng tenggala, tur Israel ngedeng lampit.12 Ulun ngandika kene: ‘Tenggalaangja dewek kitane tanah ane anyar. Pulaja kadilan, tur anyija merta pamupon aturan kitane ane aturang kita teken Ulun. Ene masanne kita malipetan sig Ulune Widin kitane, tur Ulun lakar teka ngujanin kita aji merta.’
13 Nanging tungkalikane kita mamula kajaatan tur nganyi buahnyane. Kita suba naar asil bogbog kitane.
Sawireh kita andel teken kretan kitane muah teken serdadun kitane ane liu,14 perange lakar teka nempuh rakyat kitane, tur sawatek benteng-benteng kitane lakar kuug. Unduke ento lakar patuh buka dugas Sang Prabu Salman nguugang kota Bet-Arbele sajeroning pasiatan. Ditu meme muah pianak-pianaknyane makejang kamatiang.
15 Buka keto ane lakar nibenin kita, ih rakyat Bet-Arbel, uli krana aeng kajaatane, ane suba gaenin kita. Mara siate ngawitin, ditu ratun Israele lakar mati.”
1
Ida Sang Hyang Widi Wasa ngandika asapuniki: “Dugas Israele enu cerik, Ulun tresna teken ia, tur ngesengin ia uli di Mesir buka putran Ulune.2
Nanging sayan kaukin Ulun, ia sayan ngejohang uli sig Ulune. Kaulan Ulune mabakti teken Dewa Baal, tur ia morbor dupa buat arca-arca.
3
Tuah Ulun ane ngurukang Israel majalan. Ia sangkol Ulun aji liman Ulune nanging ia tusing nyak ngangkenin mungguing Ulun ane ngempu ia.
4
Ulun ngedeng ia aji kapitresnan muah sayang. Ulun nyemak ia tur neketang ia di pipin Ulune. Ulun ngeedang raga tur madaarin ia.
5
Ia tusing nyak malipetan teken Ulun, ento krana ia patut malipetan ka Mesir, tur Asur lakar mrentah ia.6 Perange lakar nyampatang kota-kotannyane tur nguug gapuran kotane. Perange ento lakar ngenyagang kaulan Ulune sawireh ia suba nglaksanayang unduk ane kadena melah.
7 Ia pageh ngalah tundunin Ulun. Ia lakar jerit-jerit uli krana uga ane magantung sig baongnyane, nanging tusing ada anak ane lakar ningtingang ugane ento uli baongnyane.
8
Ih Israel, kenkenang Ulun jani mebasang kita? Kenkenang Ulun lakar ngutang kita? Taenke Ulun nyirnayang kita buka Ulun nyirnayang Adma, wiadin matuhang kita buka Seboim? Pakayunan Ulune tusing maang Ulun nglaksanayang ane buka keto. Tresnan Ulune marep teken kita gede pesan.
9
Ulun tusing lakar ngukum kita sajeroning dukan Ulune. Ulun tusing lakar buin ngenyagang Israel. Sawireh Ulun ene Widi tur tidong manusa. Ulun ene Sang Maha Suci, ane ngiangin kita. Ulun tusing lakar nekain kita sajeroning Ulun duka.
10
Kaulan Ulune lakar nututin Ulun yen Ulun gerem-gerem buka singane marep teken musuh-musuhnyane. Ia lakar gegison teka teken Ulun uli kauh.11 Ia lakar teka uli Mesir, masriut buka kedise, tur uli Asur buka kedis darane. Ulun lakar buin nyak ngajak ia ka umahne. Ulun Sang Hyang Widi Wasa suba ngandika buka keto.”
12
Ida Sang Hyang Widi Wasa ngandika sapuniki: “Rakyat Israele suba ngiter Ulun aji bogbog, tur rakyat Yehudane enu brontak nglawan Ulun, Widi Ane Maha Suci tur satia.1
Saananing ane gaenina baan wong Israele uli semengan kanti ka sanja ento makejang tan paguna tur ngranayang usak. Dura cara muah kawirosan sayan ngliunang di pantarannyane. Ia ngae prajanjian ngajak wong Asur muah madedagangan ngajak wong Mesire.”2
Ida Sang Hyang Widi Wasa madue wicara marep ring wong Yehudane. Ida taler jaga ngukum wong Israele ulihan laksanan rakyatnyane. Ida pacang ngwalesang ring ipun manut paindikan sane sampun kardi ipun.3 Dane Yakub leluuripune magulet nglawan Dane Esau semeton kembar danene, rikala sang kalih kantun ring garba wasan ibun danene. Rikala Dane Yakub sampun duur, dane magulet nglawan Ida Sang Hyang Widi Wasa.
4 Dane magulet nglawan malaekat tur dane menang. Dane nangis saha nunas mangda kamertanin. Tur ring Betel Ida Sang Hyang Widi Wasa ngrauhin Dane Yakub leluur iragane sarwi ngandika ring dane.
5 Ida punika Sang Hyang Widi Wasa, Widi Sane Maha Kuasa. Ida patut kasungsung masrana parab Idane, Ida Sang Hyang Widi Wasa.
6 Raris sane mangkin parakaturunan Dane Yakub, pracayaja ring Widin semetone tur mawalija ring Ida. Satiaja tur adil, tur jantosangja saha sabar pakardin Widin semetone.
7
Ida Sang Hyang Widi Wasa ngandika sapuniki: “Wong Israele pekelne patuh buka pekel bangsa Kanaane. Ia demen mekelin langganane aji dacin palsu.8 Kene raosne: ‘Idewek sugih, idewek suba maan bati. Tusing ada anak ane nyalahang idewek ngalih kasugihan aji mamekel.’
9 Nanging Ulun, Sang Hyang Widi Wasa, Widin kitane ane suba nandan kita pesu uli Mesir, Ulun lakar nadiang kita buin nongos di kemah-kemahe, buka ane jalanang kita dugas Ulune rauh nelokin kita di tegal melakange.
10
Ulun suba ngandika teken paranabine tur ngicen ia makudang-kudang wahyu, tur malantaran paranabine ento Ulun matinget kaulan Ulune.11 Nangingke di Gilead ada arca-arca ane kasumbah, tur anake ane nyumbah arca-arcane ento lakar mati. Di Gilgal sampi-sampine pada katurang tur pamorboran aturane ane ditu ento lakar dadi dugdugan batu di tegal-tegale.”
12
Dane Yakub leluur iragane malaib ka Mesopotamia mangda dane polih rabi irika. Dane makarya ring satunggaling anak tios, ngangonang biri-birin anake punika.13 Ida Sang Hyang Widi Wasa ngutus nabi adiri buat ngluputang wong Israele saking genahipune kapanjakang ring Mesir, tur buat miara ipun.
14 Wong Israele sampun ngawinang Ida Sang Hyang Widi Wasa kalintang duka. Ipun patut padem malantaran kajaatannyane punika. Ida Sang Hyang Widi Wasa pacang ngukum ipun uli krana ipun nganistayang Ida Sang Hyang Widi Wasa.
1
Sane riin, yen suku Epraime mabaos, suku-sukune sane tiosan ring Israel sami pada ajerih. Ipun ngajiang suku Epraime. Nanging rakyate sampun ngardi dosa malantaran ipun nyungsung Dewa Baal, tur malantaran indike punika ipun jaga padem.2 Ipun nglanturang dosannyane malantaran ngardi palawatan antuk logam buat kasumbah minakadinipun arca-arca antuk perak, karencanayang antuk pepineh manusa, kakardi antuk tangan manusa. Wusan punika ipun raris mabaos sapuniki: “Aturangja aturane teken arca-arcane ento.” Napi awinannyane manusane niman arca-arca sane magoba godel lembu punika?
3 Duaning punika rakyate punika pacang sirna sakadi sayonge semengan, sakadi damuhe pacang ical rikala sampun rahina. Ipun pacang waluya sakadi gumpang sane ampehang angin saking genah panyosohane, sakadi anduse saking grombong panunjelane.
4
Ida Sang Hyang Widi Wasa ngandika asapuniki: “Ulun ene Sang Hyang Widi Wasa, Widin kitane, ane nantan kita pesu uli Mesir. Kita tusing ngelah Widi sajawining Ulun. Tuah Ulun ngraga ane dadi juru rahayun kitane.5 Ulun ane miara kita di tegal melakange ane tuh latuh.
6 Nanging disubane kita teked di tanahe ane melah, kita dadi tusing kuangan apa-apa, ditu laut kita dadi sumbung tur engsap teken Ulun.
7 Ento kranane Ulun lakar nyagrep kita buka singane. Ulun lakar buka macan tutule makakeb ngantiang kita di sesunutane.
8 Ulun lakar nyarap kita buka beruange ane kelangan panakne, tur lakar mesbes tangkah kitane. Waluya buka singane, ditu Ulun lakar nyagrep kita jalan mula, tur Ulun lakar mukang-mukang kita buka buron alasane.
9
Ulun lakar nyirnayang kita ih rakyat Israel. Nyenke ane lakar nyidaang nulungin kita?10 Kita nunas ratu muah pamimpin, nanging kenkenangake lakar ngluputang bangsane ene?
11 Sajeroning pidukan Ulune, Ulun suba ngicen kita raja-raja, tur sajeroning pidukan Ulune, Ulun suba ngaadang raja-rajane ento.
12
Dosa muah kasalahan Israele suba kacatet, tur catetane ento suba kasimpen ilid pesan.13 Wong Israele maan sela buat idup, nanging ia kaliwat belog, benengan ento tan bina buka rarene ane lakar lekad, ane tusing nyak pesu uli basang memenne.
14 Ulun tusing lakar ngluputang rakyate ene uli pati loka, wiadin ngrahayuang ia uli kakuasan patine. Ih pati, tekaangja grubuge. Ih pati loka, tekaangja bencanane. Ulun tusing enu buin sayang teken bangsane ene.
15 Yadiastu Israel tumbuh mokoh buka padange, Ulun lakar nekaang angin kangin ane kebus uli tegal melakange, tur angine ento lakar ngetuhang yeh anakan muah semernyane. Angine ento lakar ngampehang sawatek ane maji.
16 Samariane musti kukum ulihan ia brontak nglawan Ulun. Rakyatne lakar mati di pasiatan. Cerik-cerike lakar pantiganga, tur paraluh-luhe ane beling lakar tudaga basangne.”
1
Ih wong Israel, mawalija ring Ida Sang Hyang Widi Wasa, Widin semetone. Dosan semetone sane ngawinang semeton katanjung tur labuh.2 Mawalija ring Ida Sang Hyang Widi Wasa, tur ngiringja pangastawane puniki dadosang aturan semetone ring Ida: “Ampurayangja sakatahing dosan titiange, tur tampija pangastawan titiange, janten titiang pacang ngluihang Palungguh IRatu sakadi sane sampun dados janjin titiange.
3 Asur nenten naenin mrasidayang ngluputang titiang, tur kuda-kuda perange nenten mrasidayang nyayubin titiang. Titiang nenten jaga malih mabaos ring arca-arcan titiange, mungguing ipun Widin titiange. Duh Ratu Sang Hyang Widi Wasa, Palungguh IRatu nyinahang sih pasuecan ring anake sane nenten maderbe genah buat mawali.”
4
Ida Sang Hyang Widi Wasa ngandika sapuniki: “Ulun lakar nglipetang kaulan Ulune sig Ulune. Ulun lakar nresnain ia aji saguluking kayun Ulune. Ulun tusing enu buin duka teken ia.
5
Ulun lakar dadi buka ujane di tanahe tuh pabuat bangsa Israele. Ia lakar kembang buka bungane. Ia lakar tumbuh akah kuat buka punyan kayune di Libanon.
6
Ia lakar idup aji troposan ane anyar, tur ngulangunin buka punyan saitune. Ia lakar miik buka punyan arase di Libanon.
7
Buin acepok ia lakar idup sajeroning pasayuban Ulune. Ia lakar tumbuh mokoh waluya abiane, tur mabuah nged buka abian anggure. Ia lakar kasub buka anggure uli Libanon.
8
Wong Israele tusing masidi kara ngajak arca-arcane. Ulun lakar nyautin pangastawannyane tur miara ia. Buka punyan kayune ane donne tansah gadang, Ulun lakar nyayubin ia. Ulun ane dadi sumber mertannyane makejang.”
9
Dumadak paraanake sane wicaksana ngresep ring sane kasuratang iriki, tur dumadak ipun nelebang indike punika ring angennyane. Margin Ida Sang Hyang Widi Wasa punika patut, tur anake sane patut pada muponin urip malantaran nuut margine punika. Nanging anake madosa pada katanjung tur labuh uli krana ipun nenten nglinguang paindikan punika.