1
Ambate sepin kota Yerusaleme, kota sane riin rame tur katah penduduknyane. Sane riin kotane punika kajiang antuk jagate, nanging sane mangkin dados sakadi anak luh balu. Sane ngratu ring pantaran kota-kotane, sane mangkin sampun surud tur dados panjak.2
Awengi mepek ipun ngeling, tur yeh paningalannyane nyrekcek ring pipinnyane. Parasawitrannyane sane akeh tan wenten sane kantun buat nglipur ipun. Kantinnyane makasami sampun nglinyokin ipun, tur mabalik ngamesehin ipun.3
Wong Yehudane sampun nenten maderbe panulung. Ipun sampun kapanjakang tur kulah saking umah-umahnyane. Ipun urip ring panegara sane tiosan, tur irika nenten wenten genah sane dados derbenipune. Ipun kiter antuk meseh-mesehipune, tur tan wenten margi buat ngluputang dewek.4
Sane mangkin nenten wenten anak sane rauh ka Perhyangan Agung buat mabakti ring rerainane. Paratrunine sane makidung irika pada nandang sangsara, tur parapanditane wantah mrasidayang daah-duuh maselselan. Gapuran kotane kantun majujuk saha suung, tur Sion wenten ring sajeroning kaduhkitan.5
Meseh-mesehnyane pada labda karya, tur nguasain ipun sajeroning kakuasannyane. Ida Sang Hyang Widi Wasa sampun ngawinang ipun nandang sangsara malantaran dosa-dosannyane sane katah. Pianak-pianakipune sampun kejuk tur kaselong.6
Kaluihan kota Yerusaleme sampun lintang. Parapamimpinnyane sampun pada sakadi manjangan leleh malantaran kasedukan. Kakuatannyane sampun telas anggen ipun malaib rehning kuber antuk juru borose.7
Sane mangkin kota Yerusaleme nyag ajur tur suung mangmung. Ipun mapangenan ngelingang indik kaluihannyane duke nguni. Rikala ipun kakaonang antuk meseh-mesehnyane tan wenten anak sane nulungin ipun. Meseh-mesehnyane ngedekin uugipune.8
Kamuliannyane sampun ical, ipun malalung tur kanistayang. Ipun masesambatan pariselsel tur ngilidang muannyane kabatek antuk kimudnyane. Yerusaleme sampun ngawinang deweknyane jelek malantaran dosa-dosannyane sane kalintang abot.9
Kaletehannyane kanten saha sinah pisan, nanging ipun nenten pisan lingu ring nasibipune. Kakaonane sampun banget pisan, tur tan wenten anak sane mrasidayang nglipur ipun. Meseh-mesehnyane sampun menang, tur ipun masesambatan nunas ica ring Ida Sang Hyang Widi Wasa.10
Meseh-mesehipune ngrampokin arta branannyane makasami. Ipun ngeton meseh-mesehnyane ngranjing ka Perhyangan Agung genah sane nenten kalugrain antuk Ida Sang Hyang Widi Wasa, buat wong kapire jaga ngranjing.11
Penduduknyane mapangenan rikala ipun ngrereh pangan. Ipun pada nukarang arta branannyane antuk pangan, mangda ipun prasida kantun urip. Sapuniki sesambatan kota Yerusaleme: “Oduh Ratu Sang Hyang Widi Wasa aksija titiang, duaning titiang sajeroning kasangsaran.”12
Ipun ngeling masesambatan ring sakancan anake sane nglintang irika sapuniki: “Cingakinja tiang! Tan wenten anak naenin ngrasayang sakit sakadi tiang puniki. Sakite puniki sampun katiwakang antuk Ida Sang Hyang Widi Wasa ring tiang rikala Ida duka.13
Ida nedunang geni saking ambarane, inggih punika geni sane muunang tiang ring tengah. Ida masang jeet pabuat tiang kantos tiang maglebug ring tanahe. Sasampune punika Ida raris ngentungang saha ngutang tiang ring sakite sane tan rered-rered.14
Ida nyuratang dosa-dosan tiange makasami, tur Ida munduhang dosane punika makasami. Ida raris ngantungang dosa-dosane punika ring baong tiange, mawinan tiang raris sayan leleh katangges antuk abot dosa-dosane punika. Ida Sang Hyang Widi Wasa nyerahang tiang ring meseh-meseh tiange, tur tiang tan mrasidayang nglawan meseh-meseh punika.15
Ida Sang Hyang Widi Wasa ica ring prajurit tiange sane pinih kuat-kuat, tur Ida ngrauhang wadua bala buat nyirnayang truna-trunan tiange. Ida ngenyagang rakyat tiange sakadi woh anggure kaperes ring pameresane.16
Punika awinanipun matan tiange macehceh antuk yeh mata. Tan wenten anak sane mrasidayang nglipur tiang, tur tan wenten sane mrasidayang mangunang semangat tiange. Meseh-meseh tiange sampun ngaonang tiang, tur rakyat tiange sampun telas.17
Tiang ngenjuhang liman tiange, nanging tan wenten anak sane pacang nulungin tiang. Saking milehan Ida Sang Hyang Widi Wasa sampun ngrauhang meseh buat ngebug tiang. Imeseh sampun malaksana ring tiang waluya tiang puniki anak sane tan paji.18
Nanging Ida Sang Hyang Widi Wasa maraga adil, Ida ngardi indike punika duaning tiang sampun tan satinut ring Ida. Pirengangja tiang, ih jadmane makasami, cingakinja sakit tiange. Paratruna trunin tiange makasami sampun kabakta maselong.19
Tiang ngaukin parakantin tiange, nanging ipun tan nyak nulungin tiang. Parapandita miwah parapamimpine makasami seda ring margi-margine ring kota, rikala dane ngrereh pangan mangda dane mrasidayang kantun urip.20
Oduh Ratu Sang Hyang Widi Wasa, ledang Palungguh IRatu ngaksi kasangsaran titiange. Ledang Palungguh IRatu nyingak indik ajerih manah titiange. Manah titiange dekdek renyuh antuk kasedihan malantaran dosa-dosan titiange. Ring margi-margine wenten tukang ngamademang jadma, tur ring obag-obagan jelanane sang pati sampun nyantosang.21
Ledang Palungguh IRatu mirengang sesambatan titiange. Tan wenten anak sane nglipur titiang. Meseh-meseh titiange pada masuka rena duaning Palungguh IRatu ngrauhang bencana ring titiang. Rauhangja rahina sane sampun janjiang Palungguh IRatu, tur kardija mangda meseh-meseh titiange nandang sangsara sakadi sane sampun rasayang titiang.22
Sisipangja ipun malantaran kajaatannyane makasami. Sisipangja ipun sakadi Palungguh IRatu sampun nyisipang titiang malantaran dosa-dosan titiange. Titiang mapangenan ring sajeroning kasangsaran, tur titiang sakit ati pisan.”1
Ida Sang Hyang Widi Wasa ngaput kota Sione antuk peteng dedet sajeroning pidukan Idane. Kaluihannyane sane rauh ka langite sampun gentosin Ida antuk nyag ajur. Ring rahina pangrauh pidukan Idane, Ida ngentungang rauhing Perhyangan Agung Idane.2
Ida Sang Hyang Widi Wasa nenten kantun kawelas arsan rikala Ida ngenyagang kota-kotane ring Yehuda, tur Ida nguugang benteng-benteng sane nawengin jagate punika. Ida ngawinang kaprabon miwah pamrentah-pamrentahnyane nandang kanistan.3
Sajeroning dukan Idane, Ida ngenyagang kakuatan Israele, tur Ida tan kayun nulungin tiang sareng sami rikala imeseh ngrauhin tiang. Ida ngamuk nglawan tiang sakadi geni sane angarab-arab, tur Ida nyirnayang saluiring sane wenten makasami.4
Ida matitisang panah Idane sakadi isatru marep ring tiang, tur Ida ngamademang sakancan anake sane sumbungang tur sayangang tiang. Irika ring Yerusalem tiang ngrasayang pidukan Idane sane ngendih murub.5
Sakadi imeseh, Ida Sang Hyang Widi Wasa sampun nyirnayang bangsa Israele. Ida sampun manggayang benteng-benteng miwah puri-purine uug maglaturan. Ida sampun ngrauhang kasedihan sane tan rered-rered ring wong Yehudane.6
Ida sampun ngrusak kantos nyag Perhyangan Agung genah tiange nyungsung Ida. Ida muputang rerainan-rerainan miwah rahina Sabate. Sang prabu miwah panditane sami pada ngrasayang pidukan Idane.7
Ida Sang Hyang Widi Wasa sampun nulak pamorboran aturan Idane, tur Ida nilar Perhyangan Agung Idane miwah manggayang mesehe ngenyagang tembok-temboknyane. Ring genah tiange pecak mabakti saha suka rena, imeseh masuryak rehning ipun molih kamenangan.8
Ida Sang Hyang Widi Wasa sampun mastikayang mungguing tembok-tembok kota Sione pacang uug. Ida sampun ngukur temboke punika tur mastikayang indik nyag ajurnyane. Menara-menara miwah tembok-temboke punika sane mangkin sami uug maglaturan.9
Gapura-gapurannyane bah dados dugdugan uug-uugan tur palang-palangnyane sami lung. Sane mangkin sang prabu miwah parasulinggihe makasami sampun maselong. Rakyate nenten polih paurukan indik Pidabdab, tur paranabine nenten malih polih wahyu saking Ida Sang Hyang Widi Wasa.10
Paralingsire ring Yerusalem sami pada malinggih saha mapangenan. Dane sareng sami nyambehin duur danene antuk abu tur dane ngangge pangangge kaduhkitan. Paradaane pada nguntul ka tanahe.11
Matan tiange bengul rehning ngeling, jiwan tiange rumasa karesresan. Tiang katiben kasedihan banget pisan malantaran karusakan bangsan tiange. Cerik-cerik miwah rare-rare pada niwang ring margi-margine ring kota.12
Ipun pada ngeling ring memennyane rehning ipun seduk tur bedak. Ipun labuh pacepolpol ring margine, sakadi anake matatu, tur ipun ngraris padem ring liman memennyane.13
Oduh Yerusalem, Yerusalem sane katresnain, napike sane prasida pacang baosang tiang? Sapunapiang tiang pacang nglipur ragane? Tan wenten anak sane naenin nandang sangsara kadi asapunika. Kasangsaran ragane tan wenten batesipun, waluya sakadi segarane, tur nenten wenten sane pacang kajap-ajap malih.14
Paranabin ragane tan pacang mabaos tiosan ring indik sane bobab. Pidartannyane ngapus ragane tur dane tan naenin ngedengang dosa-dosan ragane. Dane ngawinang ragane mapineh mungguing ragane nenten perlu kapok.15
Anake sane nglintang ring kota pada nolih tur nganistayang ragane. Ipun pada kitak-kituk tur ngedekin kota Yerusaleme sane sampun uug saha mabaos sapuniki: “Eneke kotane ane melah ento? Eneke kotane ane kajumang baan gumine?”16
Meseh-meseh ragane makasami pada ngewerin tur nyureng ragane maduluran brangti. Ipun pada ngadesem tur ngewerin ragane maduluran baos sapuniki: “Iraga suba ngenyagang ia. Ene suba dina ane anti-antiang iraga.”17
Ida Sang Hyang Widi Wasa sampun puput ngamargiang indik sane rencanayang Ida. Ida sampun ngenyagang iraga tan pawelas asih, sakadi Ida sampun matinget iraga duke nguni. Ida mapaica kamenangan ring musuh-musuh iraga tur Ida mapaica kaliangan ring ipun rikala iraga nandang kakaonan.18
Oduh Yerusalem banggayangja yeh paningalan ragane membah sakadi tukade rahina wiadin wengi. Medalja tur kaputja ragane antuk tetangisan lan kaduhkitan.19
Sering-seringja bangun rikala wengi, tur masesambatanja ring Ida Sang Hyang Widi Wasa. Aturangja sadaging pakahyunane ring Ida, tur nunasja sih kapiolasan Idane pabuat oka-okan ragane, inggih punika alit-alite sane tambis-tambis padem nandang seduk ring tanggu-tanggun margine.20
Oduh Ratu Sang Hyang Widi Wasa, rarisang cingak anake sane sakitin IRatu. Paraluh-luhe neda pianak sane sayangang ipun. Parapanditane miwah nabine kasedayang ring Perhyangan Agung.21
Anake tua bajang pajlempang padem ring margi-margine. Truna trunine padem antuk pedangipun imeseh. Palungguh IRatu ngamademang ipun, tur nenten kapiolasan ring ipun rikala Palungguh IRatu bendu ring ipun.22
Palungguh IRatu ngundang meseh-meseh titiange mangda ipun ngwentenang peed bencana sane ngiter titiang, tur tan wenten anak sane prasida luput ring rahina rauh bebendun Palungguh IRatune punika. Ipun ngamademang pianak-pianak titiange sane tresnain tur kelihang titiang.1
Titiang puniki sinalih tunggil anak sane uning ring indik sane jaga katibakin pasisip antuk Ida Sang Hyang Widi Wasa.2
Ida ngentungang tiang sayan doh ka tengah peteng dedete.
3
Tur Ida nigtig tiang mawali-wali saha nenten pisan madalem tiang angan akidik.
4
Ida manggayang isin tiange ngenah tur kakah, tur Ida ngelung tulang-tulang tiange.5
Ida sampun nutup tiang ring pangkeng kasangsaran lan katakutane.
6
Ida maksa tiang mangda tiang magenah ring pati lokane sane peteng dedet.
7
Ida negul tiang antuk ante, tur tiang dados tawanan sane tan maderbe pangajap-ajap jaga luput.8
Tiang jerit-jerit nunas tulung, nanging Ida Sang Hyang Widi Wasa nenten kayun mirengang.
9
Tiang srayang-sruyung yening tiang mamargi, tur batu-batun temboke ngempetin tiang kija jua tiang makipekan.
10
Ida nyaga tiang sakadi beruange, tur Ida nyagrep tiang waluya kadi singane.11
Ida muru tiang ring margine, tur mukang-mukang tiang. Sasampun punika Ida raris nilar tiang.
12
Ida mentangang panah tur matitisang panah-panah Idane ring tiang.
13
Ida niwakang panah-panah Idane kantos macelep ring awak tiange.14
Sapanjang rahina anake pada ngedekin tiang, tur tiang dados kakedekanipune sareng sami.
15
Ida ngeju tiang antuk loloh sane pait, tur ngwaregang tiang antuk pangan kinum sane pait makilit.
16
Ida ngebegang muan tiange ring tanahe tur ida ngelung gigin tiange malantaran tiang kapangandikayang makpak jlijih.17
Tiang kantos lali ring sane mawasta seger, dame miwah bagia.
18
Urip tiange nentenja pacang sue, tur pangajap-ajap tiange ring Ida Sang Hyang Widi Wasa sampun telas.
19
Minehin indik kasakitan tiange miwah indik nenten madue umah, punika tan bina sakadi racun sane pait makilit.20
Tan pegat-pegat tiang minehin indike punika, tur jiwan tiange rumasa katindes.
21
Nanging pangajap-ajap tiange malih tumbuh yening tiang eling ring satunggaling paindikan, inggih punika:
22
Sih pasuecan miwah sih kapiolasan Ida Sang Hyang Widi Wasa sane nenten rered-rered punika kantun nglantur,23
seger sakadi angin rikala semengan, tur pasti sakadi endag suryane.
24
Wantah Ida Sang Hyang Widi Wasa sane dados paderben tiange, tur wantah ring Ida kewanten tiang ngajap-ajap.
25
Ida Sang Hyang Widi Wasa asih sueca ring asing-asing anak sane andel ring Ida.26
Duaning punika, sane pinih becik pabuat iraga inggih punika nyantosang rauh panemayan Idane pacang ngrahayuang iraga.
27
Kalintang becik yening iraga mlajah sabar rikala iraga kantun wimuda.
28
Yening iraga katempuh antuk kasangsaran, iraga patut negak padidian saha tenang tur sabar.29
Iraga patut nengkluk sumungkem, duaning menawita wenten sane patut ajap-ajap iraga.
30
Yadiastu iraga patut katigtig miwah kanistayang, iraga patut nampi indike punika makasami.
31
Ida Sang Hyang Widi Wasa maraga sih kapiolas, tur Ida nenten pacang nulak iraga salami-laminipun.32
Menawita Ida ngrauhang kaduhkitan ring iraga, nanging asih suecan Idane pabuat iraga punika pasti tur kuat.
33
Ida tan seneng ngawinang iraga sedih wiadin sakit.
34
Ida Sang Hyang Widi Wasa wikan rikala jiwan iragane dekdek renyuh ring pangkeng.35
Ida wikan yening iraga tungkas ring kapatutan-kapatutan paican Idane.
36
Ida wikan yening ring pangadilan kapatutane kagentosin antuk paindikan sane tan patut.
37
Pakarsan Ida Sang Hyang Widi Wasa tansah tetep mamargi.38
Indik sane becik wiadin kaon sami pada wenten sajeroning titah Idane.
39
Napi awinanipun iraga ngamigmig yening iraga keni pasisip malantaran dosan iragane?
40
Ngiringja iraga nguji pamargin iragane, raris mawali ka ayun Ida Sang Hyang Widi Wasa.41
Ngiringja iraga mukak manah iraga ring ayun Ida Sang Hyang Widi Wasa sane wenten ring suargan tur ngastawa sapuniki:
42
“Oduh Ratu Sang Hyang Widi Wasa, titiang sampun madosa tur tempal ring Palungguh IRatu, samaliha Palungguh IRatu nenten ngampurayang titiang.
43
Palungguh IRatu nguber tur ngamademang titiang. Sih kapiolasan Palungguh IRatu kasingidang antuk pidukan Palungguh IRatune.44
Malantaran bendun Palungguh IRatune sane sakadi megane, ngawinang pangastawan titiange tan prasida rauh ring ayun Palungguh IRatune.
45
Palungguh IRatu sampun nadosang titiang genah nugdugang lulu iriki ring jagate.
46
Titiang kanistayang tur kewerin antuk meseh-meseh titiange makasami.47
Titiang sampun kentungang ring kasangsaran miwah nyag ajur, tur titiang urip sajeroning baya lan katakutan.
48
Yeh matan titiange membah sakadi tukade malantaran karusakan bangsan titiange.
49
Yeh matan titiange pacang membah tan papegatan.50
Kantos Ida Sang Hyang Widi Wasa macingak saking suargan saha ngaksi titiang sareng sami.
51
Manah titiange dekdek renyuh rikala titiang ngeton indik sane nibenin paraluh-luhe sane ring kota.
52
Titiang keni jeet sakadi paksine, inggih punika jeet sane kapasang antuk meseh-meseh titiange sane tan padadalan geting ring titiang.53
Ipun nanem titiang idup-idupan ring bangbange, tur nutup bungut bangbange punika antuk batu.
54
Toyane sampun sayan ngliput titiang, tur kamanah antuk titiang patine sampun nampek.
55
Oduh Ratu Sang Hyang Widi Wasa, saking dasar bangbange titiang masesambatan ring Palungguh IRatu,56
tur rikala titiang mapinunas mangda Palungguh IRatu mirengang pinunas titiange, Palungguh IRatu ledang mirengang.
57
Palungguh IRatu nyaurin titiang, tur masabda ring titiang mangda sampunang titiang ajerih.
58
Oduh Ratu Sang Hyang Widi Wasa, Palungguh IRatu rauh buat mebasang saha ngrahayuang urip titiange.59
Ledang Palungguh IRatu melanin wicaran titiange, duaning Palungguh IRatu wikan ring indik sane iwang sane sampun nibenin titiang.
60
Palungguh IRatu wikan mungguing meseh-meseh titiange geting ring titiang, tur ipun saigum jaga nglawan titiang.
61
Oduh Ratu Sang Hyang Widi Wasa, Palungguh IRatu wikan indikipune nganistayang titiang, tur wikan ring paigumanipune.62
Sapanjang rahina ipun maosang titiang tur ngardi rencana-rencananipune.
63
Saking semeng rauh wengi ipun minjulin titiang.
64
Oduh Ratu Sang Hyang Widi Wasa, sisipangja ipun manut sakadi laksananipune.65
Temahja ipun tur bekin ipun antuk putus asa.
66
Borosinja ipun tur sirnayangja ipun saking jagate.”
1
Mas tiange sane pecak ngendih sane mangkin sampun dados mueg tur batu-batun Perhyangan Agunge mabrarakan ring margi-margine.2
Paratruna-trunan Sione maji sakadi mas, nanging sane mangkin ipun kapatehang sakadi tanah legite.3
Inan asu alase miara panak-panakipune, nanging bangsan tiange sakadi paksi kasuari sane galak ring panak-panaknyane.4
Ipun manggayang panaknyane padem nandang seduk lan bedak. Alit-alite pada nunas pangan nanging tan wenten anak sane ngwehin ipun.5
Rakyate sane pecak naar dedaaran sane becik-becik, sane mangkin padem nandang kasedukan ring margi-margine. Sane pecak urip wibuh sane mangkin ngehkeh lulu ngrereh teda.6
Bangsan tiange sampun keni pasisip langkungan ring penduduk kota Sodome, sane tan pararapan karusak antuk tangan Ida Sang Hyang Widi Wasa.7
Parapangeran tiange sane suci tan pataleteh sakadi saljune, sane semangat tur kuat, prarainne bingar rehning pada seger.8
Sane mangkin ida pada pajlempang ring margi-margine tan keni antuk ngelingang. Prarainnyane badeng rehning sampun seda. Kulitnyane kisut sakadi kulit tarune, tur maprurutan ring galihnyane.9
Anake sane padem ring payudan, kantun becik yan bandingang ring sane padem pungkuran, sane padem ngreres rehning kasedukan malantaran tan wenten pangan sane mrasidayang nguripang ipun.10
Bencana sane nibenin bangsan tiange, ngawinang manah resres. Paraibune ngratengang okannyane niri buat kajengang.11
Ida Sang Hyang Widi Wasa sampun numplekang pidukan Idane, tur Ida nunjel kota Sione kantos puun rauh ring tanahnyane.12
Tan wenten jadma yadian ring dija jua magenah, kadi asapunika taler pamrentah-pamrentah bangsane sane jaga pracaya mungguing wenten meseh sane jaga mrasidayang ngranjing ring gapuran kota Yerusaleme.13
Nanging indike punika raris kasidan kadi asapunika, rehning paranabinnyane sampun ngamargiang dosa tur parapanditannyane sami pada iwang, santukan dane sampun ngamademang anak sane tan padosa.14
Parapamimpinnyane nglelana ring margi-margine sakadi anake buta, tur kaletehin antuk getih anak, kantos tan wenten anak sane purun nganampekan dane.15
Rakyate pada pajerit kadi asapuniki: “Kema makaad ih jlema jaat. Eda ngusud tiang.” Parapamimpine punika raris ngumbara ring pantaran parabangsane tiosan tur tan wenten anak sane nyak nampi dane.16
Ida Sang Hyang Widi Wasa sampun tan lingu ring dane, tur dane sampun ngawinang ragan danene kasambragang. Ida Sang Hyang Widi Wasa tan malih lingu ring parapandita miwah parapamimpin tiange.17
Tiang terus ngrereh pitulungan sane tan pacang rauh, tur tiang terus nyantosang pitulungan saking bangsane sane nenten pacang nyak nulungin.18
Imeseh sampun ngintip tiang, tur tiang tan purun malih medal ka margine. Rahina-rahina urip tiange sampun lintang, tur sampun rauh pamuputipun.19
Imeseh nyander tiang becatan ring sikepe nyander saking ambarane. Ipun muru tiang nganedunang ring bukit-bukite, tur ipun nyadang tiang ring tegal melakange.20
Ipun ngejuk empul angkihan tiange, inggih punika sang prabu sane sampun kaselik antuk Ida Sang Hyang Widi Wasa. Wantah ida sane andelang tiang buat melanin rakyate saking meseh sane rauh ngebug.21
Pada kedekja ih wong Edom miwah wong Us. Pada masuka renaja mumpung ragane kantun polih sela. Bencanan ragane taler sampun rauh, tur ragane taler pacang srayang-sruyung malalung nandang kimud.22
Kota Sione sampun naur dosannyane, tur Ida Sang Hyang Widi Wasa tan pacang malih nyelong tiang. Nanging ih Edom, Ida Sang Hyang Widi Wasa pacang nyisipang ragane, tur Ida pacang merberang dosa-dosan ragane.1
Oduh Ratu Sang Hyang Widi Wasa, ledang Palungguh IRatu eling ring indik sane nibenin titiang. Aksija titiang tur cingakja kanistan titiange.2
Arta branan titiange sampun kambil antuk wong sunantarane, tur wong sunantarane sampun nongosin umah-umah titiange.3
Bapa-bapan titiange sampun kapademang antuk imeseh, tur sane mangkin memen titiange dados balu.4
Titiang patut naur toya sane inem titiang, tur titiang patut numbas saang.5
Titiang kulah sakadi keledae wiadin untane. Titiang leleh pisan, nanging tan kawehin mararian.6
Titiang ngidih-idih ka Mesir miwah ka Asur, mangda titiang nyidayang miara urip titiange.7
Paraleluur titiange sampun madosa, nanging sane mangkin ipun sampun tan kantun, tur titiang sane nandang sangsara malantaran dosa-dosanipune.8
Titiang kaprentah antuk jadma sane tan bina sakadi parekan, tur tan wenten anak sane mrasidayang mebasang titiang saking kakuasanipune.9
Paraparampoke pasliwer ring sisin kotane, tur titiang patut ngetohang angkihan titiange buat ngrereh teda.10
Seduk basang titiange ngawinang titiang ngilgil sakadi ngebus dingin kantos kulit titiange panes sakadi paone.11
Kurenan titiange sampun kaplegandang ring Gunung Sion, tur pianak titiange sane bajang-bajang ring desa-desane ring Yehuda kapaksa mangda ipun nyerah.12
Parapamimpin titiange sampun kambil tur kagantung tur paralingsir titiange sampun tan kajiang.13
Paratruna-trunan titiange kapaksa ngiles jagung sakadi parekan-parekan, tur alit-alite srayang-sruyung kapetegenin saang abot pisan.14
Anake lingsir-lingsir nenten wenten malih sane malinggih ring gapuran kotane, tur paratrunane nenten malih matetabuhan.15
Bagiane sampun makaon saking urip titiange, tur kaduhkitane sampun ngentosin igel titiange.16
Tan wenten malih indik sane sedeng sumbungang ring pantaran titiange. Titiang sampun madosa, tur sane mangkin titiang keni pasisip.17
Titiang sakit ati banget pisan, tur matan titiange tan mrasidayang ngeton rehning yeh matan titiange membah.18
Santukan Gunung Sione dados puyung, tur suung mangmung. Irika ring dugdugan uug-uugane, asu alase malaib mrika-mriki.19
Nanging Palungguh IRatu, duh Ratu Sang Hyang Widi Wasa, Palungguh IRatu jumeneng ratu kantos salami-laminipun, tur Palungguh IRatu pacang mrentah kantos rauh ka pamuput masane.20
Napike awinanipun kantos sue pisan Palungguh IRatu nilar titiang? Naeninke Palungguh IRatu pacang eling malih ring titiang?21
Oduh Ratu Sang Hyang Widi Wasa, waliangja titiang ring ayun Palungguh IRatune, waliangja titiang. Ledang Palungguh IRatu ngwaliang malih kaluihan titiange sane nguni.22
Napike Palungguh IRatu jaga nulak titiang salami-laminipun? Nenten wentenke watesnyane bendun Palungguh IRatu?