1
Kidung geguritan Ida Sang Prabu Salomo sane pinih becik.2
Rarisangja beli nyepsep tur ngaras tiang. Tresnan beline luihan ring rasan anggure.
3
Ambun minyak beline miik ngalub, tur kabinawan parab beline miik sakadi minyake punika. Sakancan bajang-bajange pada tresna ring beli.
4
Ajakja tiang, tur ngiring iraga digelis malaib. Beli makadados ratun tiange, rarisang ajak tiang ka pamereman beline. Iraga jaga rumasa bagia sinarengan. Rarisangja nginum kantos waneh, tur banggayangja dewek iragane kaliput antuk kapitresnan. Sampun pantes yening sakancan luh-luhe pada tresna ring beli.5
Duh paraistri-istrine ring Yerusalem, tiang puniki selem, nangingke tiang jegeg. Tiang selem sakadi kemah-kemah wong Kedare ring tegal melakange, nangingke asri sakadi korden-korden sane ring purin Ida Sang Prabu Salomo.6
Sampunangja beli nganistayang tiang, uli krana warnan kulit tiange, santukan panes suryane sampun morbor tiang. Beli-belin tiange pada gedeg ring tiang, tur ipun ngenken tiang makarya ring abian anggure. Tiang tan polih sela buat mretenin dewek tiange.
7
Oduh beli mas juitan tiange, nikainja tiang, ring dijake beli pacang ngangonang ingon-ingon beline? Dijake ingon-ingon beline pacang mateduh rikala bajeg suryane? Napi gunanipun tiang ngrereh beli ring pantaran ingon-ingon parapangangone tiosan?
8
Punapike adi tan uning ring genahe punika, duh dewa sang sane pinih ayu ring pantaran paraluh-luhe? Rarisang adi nututin ingon-ingone punika tur angonangja kambing adine nampek ring kemah pangangon-pangangone punika.9
Oduh adi juitan beline, yen bandingang beli, adi waluya sakadi kuda sane ngedeng kretan sang prabu Mesire.
10
Rambut adine becik pisan nangkeb pipin adine, tur mleped tuun ring baong adine waluya sakadi sesocane.
11
Beli pacang makarya rante mas pabuat adi, tur kadagingin rerenggan perak.
12
Ratun tiange merem ring pamereman idane, tur minyak wangin tiange ngabyer nglikub irika.13
Ambun mas juitan tiange miik ngalub sakadi mure, rikala ida merem ring duur tangkah tiange.
14
Mas juitan tiange tan bina sakadi sekar ring bete, sane sedek kembang ring abian anggure ring En-Gedi.
15
Oduh adi mas juitan beline, ambate jegeg adine. Penyingakan adine nyinarang kapitresnan.16
Oduh beli sane sayang, ambate bagus beline. Banget pisan beli ngulangunin manah tiange. Padang sane gadang lumlum pacang dados pasarean iragane.17
Umah iragane pacang malambang antuk taru aras, tur taribnyane malakar antuk taru cemara.
1
Tiang puniki waluya sakadi sekare ring Saron, sekar leli sane wenten ring bongkol gununge.2
Tan bina sakadi sekar leli ring tengah bet duine, kadi asapunika taler mas juitan tiange ring pantaran paraluh-luhe.
3
Waluya sakadi wit apel ring pantaran taru-taru alase, kadi asapunika pepacangan tiange ring pantaran lanang-lanange sane tiosan. Tiang demen masayuban ring bongkolnyane, tur wohnyane manis rasanipun.4
Ibeli makta tiang ka genah pestan idane, tur ida raris nyinahang cihnan tresnan idane ring tiang.
5
Ida nguatang tiang malih antuk kismis, tur nyegerang antuk woh apel. Tiang rumasa lemet malantaran kasemaran.
6
Tangan idane sane kiwa dados galeng tiange, tur tangan idane tengen ngusap-ngusapin tiang.
7
Majanjija ring tiang, ih luh-luh Yerusaleme. Masumpahja malantaran kidang-kidange miwah manjangane, mungguing ragane tan pacang ngaduk tresnan tiange.
8
Tiang miragi suaran pepacangan tiange. Ida rauh malaib-laiban nglintangin pagunungan, tur ida malomba nglintangin bukit-bukite buat maranin tiang.
9
Pepacangan tiange waluya sakadi kidang miwah sakadi panak manjangane. Ida ngadeg irika ring ungkur temboke. Ida ngintip saking jendelane tur macingak asliaban saking jaronnyane.
10
Pepacangan tiange tumuli mabaos ring tiang.
11
Masan dingine sampun lintang, tur sampun tan wenten sabeh malih.
12
Ring pategalane wit sekare sampun pada masekar. Punika masan anake makakidungan. Suaran paksi darane sampun kapiragi ring tegal-tegale.
13
Woh aane sampun pada tasak, tur ambun bungan anggure miik nglikub. Duaning punika, gelisangja idewa rauh, mrikija ajak beli.
14
Idewa tan bina kadi paksi darane sane mengkeb ring selag-selagan batu kaange. Icenja beli ngeton prarain adine sane ayu, tur miragiang suaran adine sane manis nyunyur.
15
Ngiringja juk asu alase, rauhing sane kantun alit, mangda sampunang ipun kantos ngrusak abian anggur iragane sane sedek mabunga.
16
Pepacangan tiange punika dados dreben tiange, tur tiang dados druen pepacangan tiange. Ida ngangonang ingon-ingon idane ring pantaran sekar leline,17
ngantos angin semengane ngasirsir miwah galang tanah. Oduh beli, mawalija beli digelis sakadi kidange miwah sakadi panak manjangane ring Pagunungan Betere.
1
Nyabran wengi tiang pules ring pedeman tiange, tiang ngipiang anake sane tresnain tiang. Tiang tumuli ngrereh-rerehin ida, nanging nenten panggihin tiang.2
Tiang nglelana ring kota miwah ring margi-marginnyane saha ring rurung-rurungnyane. Tiang ngrereh pepacangan tiange, nanging ida nenten panggihin tiang.
3
Pajagaane sane maronda ring kota manggihin tiang. Tiang mataken sapuniki: “Punapike ragane wenten manggihin pepacangan tiange?”
4
Riwau tiang nilarin parapajagaane punika, tiang tumuli matemu ring pepacangan tiange. Tiang ngisiang ida tur tan jaga wehin tiang makaon, sadurung ida ajak tiang ka umah memen tiange, inggih punika ring kamar genah tiange kalekadang.
5
Majanjija ring tiang, ih luh-luh Yerusaleme. Masumpahja malantaran kidang miwah manjangane, mungguing ragane nenten pacang ngaduk tresnan tiange sareng kalih.6
Napike punika sane saking tegal melakange, ulatan ipun sakadi lepukan anduse, gandanipun miik sakadi menyan miwah mure, inggih punika menyan sane kadol antuk parasudagare?
7
Sang Prabu Salomo sane rauh, ida kategen ring singasanan idane saha kairing antuk tabeng wijang idane sareng nem dasa diri, inggih punika prajurit-prajurit sane papilihan ring Israel.
8
Makasami prajurit punika pascad ngadokang pedang. Ipun sampun pada nyayeng rana. Ipun suang-suang pada magegaman pedang, buat nyagain pangebog mesehe rikalaning wengi.
9
Sang Prabu Salomo kategen ring singasanane sane malakar antuk taru sane pinih becik.
10
Adegan singasanane punika kakaput antuk perak, tur kapayasin antuk kain sane kasulam antuk mas. Pepedek-pepedeknyane kakaput antuk kain mawarna tangi sane katunun saha becik pisan antuk luh-luh Yerusaleme.
11
Ih luh-luh Sione, mrikija cingakin Sang Prabu Salomo, ida nyaluk gelungan sane kapasang ring prabun idane antuk ibun idane daweg rahina pabuncingan idane, inggih punika ring rahina daweg idane rena miwah maica-icaan.
1
Oduh adi, ambate jegeg adine! Panyingakan adine nyunarang kapitresnan saking ungkur kudung adine. Rambut adine magelohan sakadi punduhan kambinge sane pakecogcog nganedunang ring bukit-bukit Gileade.2
Untun adine putih sakadi bulun biri-birine sane wau kagunting tur kumbah. Tan wenten sane kecag angan asiki, tur majejer saha jangkep pisan.
3
Lamben adine tan bina sakadi pitane barak, ambate becikipun rikala adi makenyung mabaos. Pipin adine ngendih ring beten kudung adine.
4
Kantan adine jegjeg sakadi menaran Ida Sang Prabu Daude, gilik tur alus, saha madaging kalung, sakadi tamiang prajurite panyiuan sane magantung ngiter kantan adine.
5
Susun adine waluya sakadi panak kidange kembar, sane sedek ngrereh tetedan ring pantaran sekar leline.
6
Beli pacang masandekan ring bukit mur miwah menyane, ngantos angin semengane ngasirsir, tur galang tanah.
7
Oduh adi, ambate jegeg adine, tur ambate sampurnan adine.
8
Oduh pepacangan beline, mrikija sareng-sareng ajak beli saking Pagunungan Libanone. Mrikija ajak beli saking Libanon. Mrikija tedun saking Gunung Amana, saking Gunung Senir miwah saking Gunung Hermon, saking genah singa-singane miwah macan tutule.
9
Oduh adi sesayangan beline, sledetan adine miwah kalung sane anggen adi naut keneh beline.
10
Oduh adi pangantungan keneh beline miwah kurenan beline, tresnan adine ngulangunin keneh beline. Tresnan adine luihan ring anggure, tur minyak wangin adine miikan ring sakancan wewangene.
11
Oduh gegelan tiange, rasan lamben adine tan bina kadi madune, lidah adine rumasa susu miwah madu pabuat beli. Busanan adine kalikub antuk ambun miik-miikane sane saking Libanon.
12
Oduh adi pangantungan keneh beline, gegelan beline, adi pinaka tetamanan sane pingit tur masengker miwah toya klebutan beline niri,13
genah entik-entikane tumbuh pasrambiah. Ipun tumbuh sakadi wit delimane sane sarat antuk woh sane becik-becik. Irika tan kirang sekar pacar miwah narwastu,
14
kunyit, tebu miwah kayu manis miwah menyan mawarni-warni. Irika tumbuh wit mur, gaharu miwah sakancan basan minyak wangi sane pinih wangi.
15
Toya klebutane membah melusin tamane punika, antuk toya maliah-liah. Tukad-tukade pada membah tedun saking Pagunungan Libanon.
16
Ih angin sane saking kaler miwah kelod pada mampehja ka taman tiange, tur likubja akasane antuk ambu miik. Banggayangja tunangan tiange rauh ring taman idane tur ngajengang woh-wohan sane pinih becik ring tamane punika.1
Adi pangantungan keneh beline, gegelan beline, beli sampun wenten ring taman. Beli sedek munduhang wewangen miwah mur. Beli sedek naar madu miwah talan madune, tur sedek nginum anggur miwah susu. Rarisang beli, rarisang ngajeng miwah nginum kantos beli punyah antuk kapitresnan.2
Rikala tiang pules, manah tiange nenten nyak pules. Tiang ngipiang pepacangang tiange nogdog jelanan.
3
Tiang sampun ngelus panganggen tiange, buat napi tiang malih meseh. Tiang sampun masehin buntut tiange, buat napi tiang ngamenyiang malih buntut tiange.4
Pepacangan tiange sampun ngabag jelanan, tur tangkah tiange rumasa nrugtug santukan ida sampun nampek.5
Tiang sampun sedia pacang ngaturin ida ngranjing. Liman tiange sampun uap tiang antuk mur, tur jrijin liman tiange taler sampun uap tiang antuk minyak mur, rikala tiang nyujuh kancing jelanan.
6
Tiang tumuli ngampakin pepacangan tiange jelanan, nanging ida sampun makaon. Meled pisan manah tiange pacang miragiang suaran idane. Tiang tumuli ngrereh ida, nanging ida tan wenten panggihin tiang. Tiang ngaukin ida, nanging tan wenten sane masaur.
7
Parapajagaan sane sedek maronda ring kota manggihin tiang. Ipun tumuli nigtig tiang kantos babak belur, tur parapajagaan tembok kotane nyetset slendang tiange.8
Majanjija ring tiang ih luh-luh Yerusaleme, mungguing yening ragane manggihin pepacangan tiange, ragane jaga nguningayang ring ida, mungguing tiang leleh nandang kasemaran.
9
Ih luh sang ayu, punapike pepacangan luhe bina ring anake sane tiosan? Punapike ida punika kalintang bagus, kantos tiang patut majanji ring idewa?10
Pepacangan tiange punika bagus tur siteng, ida bagusan ring anake sareng dasa tali.11
Prarain idane alus sakadi prunggu, rambut idane gelgel tur selem sakadi bulun goake.
12
Panyingakane becik tan bina kadi matan paksi darane sane ring tukade, paksi dara sane manjus ring susune tur mencegan ring sisin toyane sane membah.
13
Pipin idane becik sakadi tamane sane bek madaging daun-daun wewangen. Lamben idane sakadi leline sane belus antuk minyak mur.
14
Tangan idane becik, tur ida nganggen ali-ali mamata soca. Anggan idane sakadi danta sane alus sane kapayasin antuk sesocan.
15
Pupun idane sakadi sesaka marmer sane masendi antuk mas. Kagungan idane sakadi Gunung Libanone sane wit arasnya tegeh-tegeh pisan.
16
Lamben idane manis yening karas, cutetipun saluiring paindikan idane punika nutdut manah tiange. Kadi asapunika kawentenan pepacangan tiange, ih parasemeton paraluh-luh Yerusaleme.
1
Ih luh sang ayu, kijake palungan gegelan luhe? Nikayangja ring tiang. Margine sane encenke sane kaduluh antuk gegelan luhe, mangda tiang sareng sami mrasidayang nulungin luh buat ngrereh ida.2
Gegelan tiange sampun lunga ka tamannyane, inggih punika ring genah wit wewangene pada tumbuh. Ida sedek ngangonang ingon-ingon idane ring taman, tur sedek munduhang sekar leli.3
Gegelan tiange punika paderben tiange, tur tiang dados paderben gegelan tiange. Ida ngangonang ingon-ingon idane ring pantaran sekar-sekar leline.
4
Oduh adi, adi ayu sakadi kota Yerusalem. Kabecikan adine pateh sakadi kota Tirsane, tur adi ngulangunin pisan sakadi kotane sane ageng kekalih punika.
5
Sampunangja adi tansah nganengneng beli santukan indike punika pacang ngawinang beli kabibil. Rambut adine magelohan sakadi gompyokan kambinge sane pakecogcog ngrudug ring bukit-bukite ring Gilead.
6
Untun adine putih sakadi gompyokan biri-birine sane wau wusan kapandusang. Nenten wenten sane kecag, tur ipun sami majejer saha sampurna.
7
Pipin adine ngendih ring sor kudung adine.
8
Banggayang sampun sang prabu maderbe rabi dasa diri, tur selir ulung dasa miwah istri-istri sane tiosan akeh pisan kantos tan keni antuk ngwilangin.
9
Nanging sane tresnain tiang wantah asiki, tur ida jegeg pisan sakadi paksi darane. Ida punika putri tunggal biang idane, tur biang idane banget pisan nresnain ida. Paraistrine sane ngeton ida makasami muji ida. Parapramesuari miwah paraselire sami pada muji ngluihang ida.
10
Sapasirake punika sane ngenter sakadi galang kangine? Ida ayu pisan tur masinar, tan bina kadi sinar surya wiadin sinar bulane.11
Tiang mamargi nganedunang ring selag-selagan wit kenarine misadia jaga ningalin entik-entikan sane kantun nguda ring lebake, tur ningalin daun anggure sane nguda-nguda miwah wit delimane sane sedek masekar.
12
Tiang rumasa ngetor. Adi ngawinang beli kasemaran banget pisan, waluya sakadi kusir kreta perange rikala jaga mayuda.
13
Ih daa sane saking Sulam, pada masolahja. Banggayangja tiang mabalih ragane rikala ragane masolah. Napi awinannya semeton meled mabalih tiang rikalaning tiang ngigel ring tengah parapanontone sane uyut mabiayuhan?1
Ambate ayun adine. Ambate becik cokor adine nganggen sandale punika. Lekukan pupun adine waluya sakadi pakaryan undagine.2
Puser adine waluya sakadi cawan sane becik sane setata madaging toya anggur sane mabasa. Weteng adine waluya kadi dugdugan gandume sane kiter antuk sekar leli.
3
Susun adine waluya sakadi manjangan kembar, tan bina sakadi kidange kekalih.
4
Kantan adine jegjeg sakadi menara dantane. Panyingakan adine waluya sakadi tlagane ring kota Hesbon, inggih punika tlaga sane nampek ring gapuran kotane sane ageng punika. Irung adine waluya kadi menarane ring Libanon, sane ajeg nyaga kota Damsike.
5
Duur adine tegeh sakadi Gunung Karmel. Rambut adine sane mapusungan makilap sakadi sutrane sane pinih becik, tur kabecikannyane ngawinang kadaut pakayunan ida sang prabu.
6
Saking yuakti wantah adi punika ayu, tur becik pisan. Ambate sampurna rasa kapitresnan adine.7
Pangadeg adine gangsiuh sakadi wit kormane, tur susun adine waluya sakadi ijengan woh kormane.
8
Beli dot pacang menek ring wit kormane punika, tur ngalap wohnyane. Pabuat beli, susun adine waluya kadi woh anggure. Angkihan adine miik waluya kadi miik woh apele,
9
tur cangkem adine tan bina kadi anggure sane pinih becik.
10
Tiang puniki dados druen gegelan tiange, tur ida tansah ngajap-ajap tiang.
11
Oduh beli, mrikija! Ngiringja medal ka padusunan tur ngiringja nginep ring pategalane.
12
Palimunan iraga pacang bangun tur nelokin abian anggure, punapike ipun sampun pada tumbuh. Punapike ipun sampun ngawitin masekar tur pada kembang? Tur napike wit delimane taler sampun masekar. Irika tiang pacang ngaturang tresnan tiange ring beli.
13
Irika beli pacang mrasidayang ngambu wewangen sane miik miwah sakancan woh-wohan sane becik nampek ring obag-obagan jelanan iragane. Oduh beli gegelan tiange, irika tiang sampun nyediaang beli kasukan miwah kawiryan sane lawas miwah sane anyar.
1
Yening upami, beli pinaka dados nyaman tiange, sane kapatiningin tur kasusuin antuk memen tiange, kenginan yening tiang katemu ring beli ring margine, tiang mrasidayang ngaras beli, tur tan wenten anak sane pacang nglinguang.2
Tiang pacang ngajak beli ka umah memen tiange, tur irika beli prasida ngurukang tiang indik kapitresnan. Irika tiang pacang ngaturin beli nginum anggur sane mabasa miwah nginum toyan delima.
3
Tangan beline sane kiwa pacang dados galeng tiange, tur tangan beline sane tengen ngusap-usap tiang.4
Pada majanjija ring tiang, ih luh-luh Yerusaleme, mungguing ragane nenten pacang ngaduk kapitresnan tiange sareng kalih.5
Sirake puniki sane rauh saking tegal melakange, saha madandan tangan sareng gegelannyane?
6
Sampunangja beli nresnain sapasira jua sajawining tiang, tur sampunangja madandan ring sapasira jua, sajabaning ring tiang. Kapitresnane punika kuat sakadi sang patine. Kasemarane taler kuat sakadi sang pati. Ipun ngendih murub tur muunang sakadi genine angarab-arab.
7
Toyane tan mrasidayang ngamademang ipun, tur blabare tan mrasidayang nganyudang ipun. Nanging yen wenten anak ngindayang numbas kapitresnan antuk kasugihannyane ipun jaga wantah molih kanistan.
8
Tiang maderbe nyama luh asiki, tur nyonyonnyane kantun alit. Napike sane patut margiang tiang yening wenten anak truna jaga rauh saha ngidih ipun?9
Yen upami adin tiange punika tembok, tiang pacang ngwangun menara perak pabuat ipun. Nanging yening ipun punika gapura, tiang pacang malangin ipun antuk palang taru aras.
10
Tiang puniki pinaka tembok, tur nyonyon tiange dados menara-menarannyane. Gegelan tiange uning mungguing tiang molih kaliangan tur dame yening tiang sareng-sareng ring ida.11
Ida Sang Prabu Salomo madue abian anggur ring satunggiling genah sane mawasta Baal-Hamon. Irika wenten makudang-kudang panyakap sane nyakap abian anggure punika. Asing-asing panyakape naur jinah perak siu bidang.12
Ida Sang Prabu Salomo nampi jinah perake sane panyiuan punika tur parapanyakape pada nampi dumannyane pada masatak. Tiang niri taler maderbe abian anggur.
13
Oduh adi, gegelan beline, banggayangja beli miragi suaran adine saking tamane. Parasawitran beline jaga mirengang baos adine.14
Oduh beli gegelan tiange, gelisangja rauh sakadi kidange, sakadi panak manjangane ring pagunungan, ring genah wit wewangene pada tumbuh.