1
Sasampune Dane Yosua seda, bangsa Israele raris nunasang ring Ida Sang Hyang Widi Wasa, sapuniki: “Saking pantaran suku-suku bangsan titiange, sapasirake sane patut pinih riin mamargi buat ngebug wong Kanaane punika?”2
Ida Sang Hyang Widi Wasa tumuli masabda sapuniki: “Suku Yehuda ane patut majalan paling maluna. Ulun lakar nyerahang tanahe ento teken ia.”3
Suku Yehuda raris mabaos ring suku Simeone, sapuniki: “Ngiringja sarengin tiang ka wewidangan sane kapaicayang ring tiang, tur irika sareng-sareng ngayudain wong Kanaane. Sasampune punika tiang jaga nyarengin semeton ka wewidangan sane kapaicayang ring semeton.” Irika suku Simeon,4 miwah suku Yehuda sinarengan lunga ka payudan. Ida Sang Hyang Widi Wasa mapaica kamenangan ring suku Yehuda miwah Simeon, nglawan wong Kanaan miwah wong Perise, tur wenten dasa tali diri jadmane sane kakaonang ring Besek.
5 Ring Besek suku Yehuda miwah Simeon kapanggih ring Ida Sang Prabu Adoni-Besek, tumuli Ida kayudain.
6 Ida jerih kapilayu, nanging ida terus kuber, tumuli keni kejuk tur kagetep inan jrijin tangan miwah inan jrijin cokor idane.
7 Irika Sang Prabu Adoni-Besek raris mabaos sapuniki: “Wenten pararatu pitung dasa diri akehnya, sane magetep inan lima miwah inan batisnya sane tansah nuduk plispisan ring sor mejan titiange. Sane mangkin Ida Sang Hyang Widi Wasa ngwales ring titiang, sakadi sane sampun kardi titiang marep ring pararatune punika.” Sasampune punika ida raris kabakta ka Yerusalem, tur irika ida seda.
8
Suku Yehuda raris ngebug kota Yerusaleme, tur ngaonang kotane punika. Jadmane ring kotane punika kapademang tur kotane katunjel.9 Sasampune punika suku Yehuda raris mamargi ngebug wong Kanaan sane magenah ring pagunungan miwah sane ring bongkol gununge, miwah sane magenah ring tanah melakange sane bedelod.
10 Suku Yehuda taler mamargi ngebug wong Kanaane sane wenten ring kota Hebron, sane biasa taler kawastanin kota Kiryat-Arba. Irika suku Yehuda ngaonang wong Sesai, Ahiman miwah Talmai.
11
Saking irika suku Yehudane mamargi ngebug kota Debire. Duk punika kotane punika mawasta Kiryat-Seper.12 Saking pantaran suku Yehudane punika, wenten adiri sane mapesengan Kaleb, mabaos sapuniki: “Anak sane mrasidayang ngaonang kota Kiryat-Seper punika, jaga antenang tiang ngajak pianak tiange luh sane mawasta Aksa.”
13 Dane Otniel kaponakan Dane Kaleb okan arin danene sane mapesengan Kenas, raris ngaonang kotane punika. Punika awinan Dane Kaleb raris matemuang Dane Otniel ring okan danene sane mapesengan Aksa.
14 Ring rahina pabuncingannyane, Dane Otniel raris nglelunyuhin rabin danene, mangda rabin danene kayun nunas tegalan ring ajin danene. Rabin Dane Otniel raris tedun saking keledaen danene, tur Dane Kaleb raris nakenin okan danene, napi sane pacang katunas.
15 Dane Aksa tumuli matur sapuniki: “Tiang mamanah nunas makudang-kudang toya klebutan, santukan tegalan sane sampun paicayang aji ring tiang punika magenah ring tanahe sane melakang.” Irika Dane Kaleb raris maicayang ring Dane Aksa toya klebutan sane ring ulu miwah sane wenten ring tebenan.
16
Parakaturunan matuan Dane Musa, inggih punika wong Kenine, nyarengin suku Yehudane saking Yeriko, kota sane bek madaging wit korma, ngungsi tegal melakange sane bedelod kota Arade ring Yehuda. Irika ipun jenek magenah ring pantaran wong Amaleke.17 Suku Yehudane kasarengin antuk suku Simeon raris mamargi ngaonang wong Kanaan sane magenah ring kota Sepat. Kotane punika raris katemah tur kasirnayang tumuli kawastanin Horma.
18 [18-19] Ida Sang Hyang Widi Wasa mapaica pitulungan ring suku Yehudane, ngantos ipun prasida ngaug tanah pagunungane punika dados paderbeannyane. Nanging ipun nenten mrasidayang ngaonang kota Gasa, Askelon miwah Ekron miwah wewidangan sane wenten ring kiwa tengennyane. Bangsane punika magenah ring pasisi tur maderbe kreta besi, punika awinannya wong Yehudane nenten nyidayang ngaonang ipun.
19
20 Sakadi sane sampun kapangandikayang antuk Dane Musa, mungguing kota Hebron punika sampun kapaicayang ring Dane Kaleb, duaning dane sampun ngaonang tigang palingsehan katurunan wong Enake saking kotane punika.
21 Nanging suku Benyamin nenten mrasidayang ngaonang wong Yebuse sane magenah ring Yerusalem. Punika awinanipun wong Yebuse punika kantun magenah irika sareng-sareng ring suku Benyamine.
22
[22-23] Suku-suku Epraim miwah Manasene raris mamargi ngebug kota Betel. Daweg punika kotane punika mawasta Lus. Ida Sang Hyang Widi Wasa mapaica pitulungan ring suku Epraim miwah Manase punika. Suku Epraim miwah Manase punika raris ngutus mata-mata ka kotane punika.23
24 Mata-matane punika kacunduk ring anak sane sedekan medal saking kota. Irika mata-matane punika raris mabaos ring anake punika, sapuniki: “Patujuhinja tiang margi buat ngranjing ka kota, tur tiang nenten jaga nyakitin ragane.”
25 Irika anake punika raris matujuhin mata-matane punika margi. Suku Epraim miwah Manasene raris ngamademang sakancan jadmane sane ring kotane punika, sajawining anake sane iwau punika miwah kulawarganipune.
26 Sasampune punika anake punika raris makaon ngungsi tanah wong Hete, tur irika ipun ngwangun kota, sane kawastanin Lus. Wastan kotane punika kantun kantos rauh mangkin.
27
Suku Manase nenten ngaonang jadmane sane magenah ring kota-kota: Bet-Sean, Taanak, Dor, Yibleam, Megido miwah kota-kotane sane nampek irika. Dadosipun wong Kanaane kantun magenah irika.28 Rikala bangsa Israele sampun sayan kuat, wong Kanaan punika raris kapaksa makarya buat bangsa Israele, nanging ipun kantun tetep nenten kakaonang saking irika.
29
Suku Epraim nenten mrasidayang ngaonang wong Kanaane sane magenah ring kota Geser, punika awinanipun wong Kanaane punika kantun tetep magenah irika sareng-sareng ring suku Epraime.30
Suku Sebulon nenten ngaonang jadmane sane magenah ring kota-kota Kitron miwah Nahalol. Punika awinanipun wong Kanaane tetep magenah irika sareng-sareng ring suku Sebulone, tur wong Kanaane punika kapaksa makarya pabuat suku Sebulone.31
Suku Aser nenten ngaonang jadmane sane magenah ring kota-kota Ako, Sidon, Ahlab, Aksib, Helba, Apek miwah Rehob.32 Suku Aser magenah irika sinarengan ring wong Kanaan sane wenten irika, santukan suku Asere nenten ngaonang ipun.
33
Suku Naptaline nenten ngaonang jadmane sane magenah ring kota-kota Bet-Semes miwah Bet-Anat. Suku Naptaline magenah irika sareng-sareng ring wong Kanaane sane wenten irika, nanging wong Kanaane punika kapaksa makarya pabuat wong Naptaline.34
Wong Amorine nangsek suku Dane ka kota-kota ring pagunungan, tur suku Dane punika nenten kawehin tedun ka tanahe dangsah.35 Wong Amorine kantun tetep magenah ring Ayalon, Saalbim miwah Gunung Heres nanging suku Epraim miwah Manasene mrentah ipun, tur ipun kapaksa makarya pabuat suku-sukune punika.
36
Baler kota Selane, bates wewidangan wong Amorine nglintang ring margine munggah ring Akrabim.1
Malaekat Ida Sang Hyang Widi Wasa raris lunga saking Gilgal, ka Bokim, tur ngandika ring bangsa Israele sapuniki: “Ulun suba nantan kita magedi uli di Mesir, laut ngajak kita ka gumi ane janjiang Ulun teken leluur kitane. Ulun suba ngandika mungguing Ulun tusing lakar muungang janjin Ulune teken kita.2 Kita tusing dadi ngae prajanjian ngajak bangsa-bangsa ane nongos di gumine ene. Kita patut nguugang pamorboran-pamorboran aturannyane. Nanging kita tusing nglaksanayang unduk ane sabdayang Ulun ento. Kita suba nyalanang paundukan ane matungkalikan teken ento.
3 Sawireh keto, ane jani Ulun ngwarahang teken kita, mungguing Ulun tusing lakar ngediang bangsa-bangsane ento uli di arepan kitane. Ia lakar dadi musuh-musuh kitane. Buina kita lakar kena kapus malantaran kita lakar ajaka nyungsung dewannyane.”
4 Sasampun sang malaekat ngandika kadi asapunika, rakyat Israele makasami pada ngeling masesambatan.
5 Punika awinanipun genahe punika kawastanin Bokim. Irika ipun sareng sami ngaturang aturan ring Ida Sang Hyang Widi Wasa.
6
Dane Yosua ngandikayang bangsa Israele mangda pada mamargi ngungsi tanah sane dados dumannyane suang-suang.7 Sapanyeneng Dane Yosua, bangsa Israele astiti bakti ring Ida Sang Hyang Widi Wasa. Kadi asapunika taler sasampun danene seda, sakantun nyeneng parapamimpin sane sampun ngaksi sakancan paindikan sane ageng, sane kakardi antuk Ida Sang Hyang Widi Wasa pabuat bangsa Israele.
8 Dane Yosua okan Dane Nun, parekan Ida Sang Hyang Widi Wasa, seda rikala dane mayusa satus dasa warsa.
9 Dane kapendem ring tanah danene ring Timnat-Heres ring Pagunungan Epraim, baler Gunung Gaase.
10 Sawatek anak sane maiaban ring dane sami sampun seda, tur katurunan sasampun dane punika lali ring Ida Sang Hyang Widi Wasa, miwah ring sakancan paindikan sane sampun kardi Ida pabuat bangsa Israele.
11
Sasampune punika bangsa Israele tumuli ngardi dosa ring ayun Ida Sang Hyang Widi Wasa, tur ipun ngawitin nyungsung Dewa Baal.12 Ipun wusan nyungsung Ida Sang Hyang Widi Wasa, Widin leluurnyane, Widi sane sampun nantan ipun kesah saking Mesir. Ipun ngawitin nyungsung widi sane lianan, widin bangsa-bangsane sane wenten ring kiwa tengenipune. Ipun pada sumuyud nyumbah widi-widine punika, tur ngawinang Ida Sang Hyang Widi Wasa duka.
13 Ipun wusan nyungsung Ida Sang Hyang Widi Wasa, tur ipun raris mabakti ring Dewa-dewa Baal miwah Dewi-dewi Astoret.
14 Punika awinan Ida Sang Hyang Widi Wasa duka ring bangsa Israele, tur manggayang ipun kagebug tur karampas antuk parampoke. Ida manggayang meseh-meseh sane wenten ring kiwa tengenipune ngaonang ipun, tur bangsa Israele nenten mrasidayang malih nindihin dewek ipune.
15 Sabilang ipun medal ka payudan, Ida Sang Hyang Widi Wasa tansah nglawan ipun, sakadi sane sampun sabdayang Ida ring ipun. Irika ipun katempuh antuk kamewehan sane ageng pisan.
16
Sasampune punika Ida Sang Hyang Widi Wasa raris mapaica pamimpin-pamimpin ring bangsa Israele, sane mebasang ipun saking parampok-parampoke punika.17 Nanging bangsa Israele nenten nglinguang pamimpin-pamimpin ipune punika. Bangsa Israele sampun nenten satia ring Ida Sang Hyang Widi Wasa tur ipun nyungsung widi sane lianan. Leluuripune sampun satinut ring sapatitah Ida Sang Hyang Widi Wasa, nanging katurunan sane anyar puniki digelis nenten satia ring titah Idane.
18 Nyabran Ida Sang Hyang Widi Wasa mapaica pamimpin ring bangsa Israele, Ida mapaica pitulungan ring pamimpine punika tur ngrahayuang bangsane punika saking meseh-mesehnyane. Sakantun pamimpine punika urip, Ida Sang Hyang Widi Wasa kawelas arsan ring ipun, santukan ipun masesambatan sajeroning kasangsaran miwah kamewehanipune.
19 Nanging yening pamimpin punika padem, bangsa Israele raris malih nglaksanayang laksananipune sane sampun-sampun, tur laksanannyane kaonan ring paraleluur ipune. Ipun pada nyungsung miwah mabakti ring widi sane lianan, tur nenten nyak mararian saking laksananipune sane jaat.
20 Duaning punika Ida Sang Hyang Widi Wasa duka ring bangsa Israele, sarwi ngandika sapuniki: “Bangsane ene suba nguugang prajanjian ane adakang Ulun apanga kamanggehang baan leluurnyane. Sawireh ia tusing satinut teken Ulun,
21 Ulun tusing buin ngediang bangsa-bangsane ane enu di gumine ene dugase Yosua mati.
22 Ulun lakar nganggon bangsa-bangsane ento buat mintonin bangsa Israele, apake ia satinut teken Ulun buka pajalan leluurnyane, apa tusing.”
23 Punika awinanipun Ida Sang Hyang Widi Wasa nglugrain bangsa-bangsane punika kantun ring jagate punika. Ida nenten nglugrain Dane Yosua ngaonang ipun, kadi asapunika taler sasampun Dane Yosua seda. Ida nenten digelis ngaonang ipun saking irika.
1
Dadosipun, Ida Sang Hyang Widi Wasa nglugrain makudang-kudang bangsa kantun ring jagate punika, buat mintonin bangsa Israel sane nenten naenin mayuda ring tanah Kanaan.2 Ida ngamargiang paindikane puniki, wantah jaga nguruk asing-asing katurunan bangsa Israele, ngeniang indik payudan, minakadinipun pisan katurunan sane durung naenin mayuda duke riin.
3 Bangsa-bangsa sane kantun ring jagate punika inggih punika, bangsa sane magenah ring kota Pilistine lelima, wong Kanaane makasami, wong Sidon miwah wong Hewi sane magenah ring pagunungan Libanone, saking Gunung Baal-Hermon ngantos rauh ka margine ka Hamat.
4 Ipun sareng sami punika kanggen mintonin wong Israele, punapike wong Israele satinut ring pituduh-pituduh Ida Sang Hyang Widi Wasa sane sampun kapaicayang ring leluurnyane malantaran Dane Musa, punapi nenten.
5 Punika awinanipun bangsa Israele magenah tur magumana ring pantaran wong Kanaan, wong Het, wong Amori, wong Peris, wong Hewi miwah wong Yebuse.
6 Ipun pada saling juang ngajak bangsa-bangsane punika, tur ipun nyungsung widin bangsa-bangsane punika.
7
Bangsa Israele lali malih ring Ida Sang Hyang Widi Wasa, Widinnyane. Ipun ngardi dosa ring ayun Idane, tur nyungsung Dewa-dewa Baal miwah Dewi Asera.8 Duaning punika Ida Sang Hyang Widi Wasa duka ring ipun, tur Ida nglugrain Sang Prabu Kusan-Risataim saking Mesopotamia ngaonang ipun, tur ida mrentah ipun ngantos kutus warsa suenipun.
9 Sasampune punika bangsa Israele raris masesambatan nunas ica ring Ida Sang Hyang Widi Wasa tur Ida raris ngutus anak adiri buat mebasang ipun. Anake punika mapesengan Otniel. Dane Otniel punika okan Dane Kenas arin Dane Kaleb.
10 Roh Ida Sang Hyang Widi Wasa ngencegin Dane Otniel tur dane dados pamimpin bangsa Israele. Dane raris medal ka payudan, tur Ida Sang Hyang Widi Wasa mapaica kamenangan ring dane nglawan sang prabu saking Mesopotamia punika.
11 Irika raris wenten sutrepti ring jagate punika ngantos petang dasa warsa suenipun, tur sasampune punika, Dane Otniel raris seda.
12
Bangsa Israele malih ngardi dosa ring ayun Ida Sang Hyang Widi Wasa. Duaning punika Ida Sang Hyang Widi Wasa, ngawinang Sang Prabu Eglon saking Moab dados kuatan ring bangsa Israele.13 Sang Prabu Eglon makanti sraya sareng wong Amon miwah wong Amaleke. Ida raris ngaonang wong Israele tur ngrampas kota Yeriko, inggih punika kota wit kormane.
14 Bangsa Israel kereh antuk Sang Prabu Eglon kantos plekutus warsa suenipun.
15
Sasampune punika bangsa Israele raris masesambatan nunas ica ring Ida Sang Hyang Widi Wasa tur Ida raris ngutus Dane Ehud buat mebasang ipun. Dane Ehud punika anak sane ngebotin. Dane punika okan Dane Gera saking suku Benyamin. Bangsa Israele raris ngutus Dane Ehud tangkil ring Ida Sang Prabu Eglon ring Moab, buat ngaturang upeti.16 Dane Ehud sampun makarya pedang sane marai kekalih, sane panjangipun sawatara seket sentimeter. Pedange punika selet dane ring kenawan, ring tengah kawacan danene.
17 Sasampune punika, dane raris ngambil upeti sane pacang katur ring Sang Prabu Eglon, sane ragannyane kalintang ibuh.
18 Sasampune Dane Ehud ngaturang upetine punika ring ida, dane raris ngajak anake sane makta upetine punika pada mawali budal.
19 Nanging rikala rauh ring batu-batune sane mukir sane nampek ring Gilgal, dane raris mawali tangkil ring Ida Sang Prabu Eglon sarwi matur sapuniki: “Inggih ratu sang prabu, wenten paindikan sane pingit jagi aturang titiang ring palungguh iratu.”
Duaning punika ida sang prabu raris ngandika ring paraparekan idane sapuniki: “Depang icang ajak dadua dogen ngoyong dini.” Irika paraparekane sami pada medal.20
Daweg punika ida sang prabu malinggih ring kamar idane sane dayuh ring loteng purine. Dane Ehud raris tangkil ring ida sarwi matur sapuniki: “Wenten sabdan Ida Sang Hyang Widi Wasa sane patut aturang titiang ring palungguh iratu.” Ida sang prabu raris ngadeg.21 Dane Ehud raris ngaud pedang sane ring tengen danene punika, raris nuek ida sang prabu antuk tangan danene sane kiwa.
22 Pedange punika leb makasami, rai rauh ka patinnyane tur kakaput antuk muluke. Dane Ehud nenten ngabut pedange punika saking waduk ida sang prabu, tur pedange punika bedah rauh ka ungkur ida sang prabu.
23 Sasampune punika Dane Ehud raris medal. Jelanane raris kubetang tur kakancing,
24 tur dane raris makaon. Rikala parekane pada rauh, tur panggihin ipun jelanane makancing, kaden ipun ida sang prabu wenten ring jeroan tur sedekan mawarih.
25 Sasampun sue nyantosang, tur ida sang prabu durung taler ngampakang jelanan, ipun raris ngambil kunci tur ngampakang jelanane punika. Irika panggihin ipun ratunipune sampun seda nylempang ring lantene.
26
Rikala parekane punika pada nyantosang, Dane Ehud digelis makaon. Dane nglintang ring batu-batune sane mukir, tur malaib ngungsi ka Seira.27 Rikala dane rauh ring Pagunungan Epraim, dane raris ngupin trompet buat nauhin wong Israele jaga medal ka payudan. Sasampune punika dane raris mimpin bangsa Israele tedun saking bukite punika.
28 Dane raris ngandika sapuniki: “Tututinja tiang! Ida Sang Hyang Widi Wasa sampun mapaica kamenangan ring semeton, nglawan meseh-meseh semetone, bangsa Moab punika.” Irika bangsa Israele ngiring Dane Ehud nganedunang ngrampas genah wong Moabe, nglintang ring Tukad Yordane. Bangsa Israel nenten ngwehin anak nglintang saha rahayu angan asiki.
29 Ring rahinane punika, bangsa Israel ngamademang prajurit Moabe sane pinih becik sawatara wenten dasa tali akehipun. Adiriko nenten wenten sane luput.
30 Ring rahinane punika bangsa Israele ngaonang wong Moabe, tur raris wenten sutrepti ring jagate punika ngantos wulung dasa warsa suenipun.
31
Pamimpin sane lianan, inggih punika Dane Samgar okan Dane Anat. Dane taler sampun ngluputang bangsa Israele, malantaran dane ngamademang wong Pilistin tigang atak akehipun, antuk tungked sane biasa kanggen ngetakang banteng.1
Sasampun Dane Ehud seda, bangsa Israele malih ngardi dosa pamantuka ring Ida Sang Hyang Widi Wasa.2 Duaning punika Ida Sang Hyang Widi Wasa manggayang ipun kakaonang antuk Sang Prabu Yabin ratun wong Kanaan sane mrentah ring kota Hasor. Senapatin wadua balan idane mapesengan Sisera, sane malinggih ring Haroset-Hagoyim.
3 Sang Prabu Yabin madue kreta perang besi sangang atus akehipun, tur ida kalintang gemes tur keras pisan mrentah bangsa Israele ngantos kalih dasa taun suenipun. Sasampune punika bangsa Israele raris masesambatan nunas pitulungan ring Ida Sang Hyang Widi Wasa.
4
Duk punika sane dados pamimpin bangsa Israele, inggih punika Nabi Debora rabin Dane Lapidot.5 Dane Debora biasanipun malinggih ring sor satunggaling wit korma sane wenten ring pantaran Rama klawan Betel ring Pagunungan Epraim, tur wong Israele pada rauh mrika nunas tetepasan ring dane.
6 Sedek rahina anu, dane ngutus anak ngaturin Dane Barak okan Dane Abinoam saking kota Kedes ring wewidangan Naptali, saha kadulurin atur sapuniki: “Ida Sang Hyang Widi Wasa, Widin Israele, sampun mapaica pituduh ring semeton, sapuniki: ‘Jemakja jlemane muani-muani dasa tali uli suku Naptali muah Sebulon, laut ajak ia ka Gunung Tabor.
7 Ulun lakar nunden Sisera, senapatin Sang Prabu Yabine, nyiatin kita di Tukad Kisone. Ia lakar ngaba kreta-kreta perang muah prajuritne, nanging Ulun lakar mapaica kamenangan teken kita nglawan ia.’ ”
8
Dane Barak tumuli nyaurin Dane Debora sapuniki: “Tiang jaga mamargi yening semeton kayun nyarengin tiang, nanging yening semeton nenten kayun lunga nyarengin tiang, tiang nenten jaga mamargi.”9
Pasaur Dane Debora, sapuniki: “Inggih tiang sareng! Tiang jaga mamargi nyarengin semeton. Nanging semeton nenten jaga molih kabinawan sajeroning kamenangane puniki, santukan Ida Sang Hyang Widi Wasa nyerahang Sisera ring anak istri.” Irika Dane Debora raris matangi tur mamargi ka Kedes sinarengan ring Dane Barak.10 Tur Dane Barak mimpin suku Sebulon miwah Naptali mamargi ka Kedes. Sane ngiring Dane Barak miwah Dane Debora wenten dasa tali diri.
11
Daweg punika, Heber wong Kenine punika sampun ngwangun kemahipun ring Kedes, nampek ring wit taru tarbantine ring Saanaim. Ipun sampun palas saking wong Kenine sane lianan inggih punika katurunan Hobabe. Hobab punika ipen Dane Musa.12
Rikala Dane Sisera mireng mungguing Dane Barak sampun munggah ka Gunung Tabor,13 dane raris munduhang kreta perang danene sane sangang atus punika makamiwah wadua balan danene sami, raris kapangandikayang mamargi saking Haroset-Hagoyim ngungsi ka Tukad Kison.
14
Irika Dane Debora mabaos ring Dane Barak, sapuniki: “Rarisang mamargi. Ida Sang Hyang Widi Wasa sane nuntun semeton. Ring rahinane puniki Ida sampun mapaica kamenangan ring semeton nglawan Sisera.” Duaning punika Dane Barak raris tedun saking Gunung Tabor, kasarengin antuk wadua balan danene dasa tali diri.15 Rikala Dane Barak miwah wadua balan danene matempuh yuda, Ida Sang Hyang Widi Wasa ngawinang Dane Sisera miwah kreta lan wadua balan danene sami bingung. Dane Sisera tumuli tedun saking kretan danene raris jerih kapilayu.
16 Dane Barak nguber kreta-kreta miwah wadua balane punika ngantos rauh ka Haroset-Hagoyim, tur wadua balan Dane Sisera makasami kapademang. Angan adiriko nenten wenten sane kantun urip.
17
Dane Sisera malaib ka kemah Yaele, somah Hebere wong Kenine punika, santukan Sang Prabu Yabin sane ring Hasor ngardi prajanjian padame ngajak kulawargan Hebere.18 Yael raris medal mendakin Dane Sisera, sarwi matur sapuniki: “Rarisang mriki gusti, rarisang ngranjing ring kemah titiange. Sampunangja gusti ajerih.” Irika Dane Sisera raris ngranjing tur dane kengkebang ring ungkur kordene.
19 Dane Sisera raris mabaos ring Yael sapuniki: “Baangja icang ngidih yeh inem, icang bedak pesan.” Yael raris ngungkab klukuh blulang wadah susunnyane, tumuli ngaturin dane nginum. Sasampune punika dane malih kengkebang ring ungkur kordene.
20 Sasampune punika Dane Sisera raris mabaos ring Yael sapuniki: “Majujukja di obag-obagan jelanan kemahe. Yen ada anak teka matakon, apa ada anak malaib mai, orahang tusing ada.”
21
Dane Sisera kalintang lesu, duaning punika dane digelis sirep aris. Irika Ni Yael raris ngambil palu miwah patok kemah, tumuli ipun banban maranin Dane Sisera, raris nyedayang dane malantaran macek pepelengan danene antuk patok kemah, kantos bedah rauh ka tanahe.22 Rikala Dane Barak rauh ngrereh Dane Sisera, Yael raris medal mendakin dane, sarwi matur ring dane sapuniki: “Rarisangja mriki! Tiang jaga ngaturang jadmane sane rereh mekele.” Dane Barak raris ngranjing sareng ring ipun, tur irika kacingak Dane Sisera seda ring kemahe, pepelengannyane mapacek antuk patok kemah kantos bedah.
23
Ring rahinane punika Ida Sang Hyang Widi Wasa mapaica kamenangan ring bangsa Israele nglawan Sang Prabu Yabin, ratun wong Kanaane.24 Bangsa Israele sayan mangetang nangsek Ida Sang Prabu Yabin. Pamuputipun bangsa Israele nyirnayang ida.
1
Ring rahinane punika Dane Debora miwah Dane Barak okan Dane Abinoam makidung kadi asapuniki:2
Pujija Ida Sang Hyang Widi Wasa. Bangsa Israele sampun nyadia jaga mayuda, rakyate saking liang pada dados sukarelawan.
3
Inggih pararatu sami, indayangja pirengang. Inggih parapamrentah, indayangja rengayang. Tiang jaga makidung, tiang nyuarayang tetabuhan pabuat Ida Sang Hyang Widi Wasa, Widin Israele.
4
Duh Ratu Sang Hyang Widi Wasa, yen Palungguh IRatu kesah saking Pagunungan Seire, yen Palungguh IRatu medal saking wewidangan Edome, jagate magejeran tur sabehe mabriok saking ambarane. Kadi asapunika taler toyane masriok saking megane.
5
Gunung-gununge pada magejeran ring ayun Widin Sinaine, ring ayun Ida Sang Hyang Widi Wasa, Widin Israele.
6
Ring masan Dane Samgar okan Dane Anat, ring masannyane Ni Yael, nenten wenten malih pangalu marerod mamargi ring panegara, tur anake sane maleluasan pada mamargi ring margi sesunutane.7
Duh Debora, kota-kota Israele pada kakalain suung, kota-kotane punika suung kantos semeton rauh, semeton rauh waluya sakadi biang Israele.
8
Irika raris wenten yuda ring jagate punika, rikala bangsa Israele milih dewa-dewa anyar. Ring pantaran wong Israele sane petang dasa tali, adiriko nenten wenten sane nganggen tumbak wiadin tamiang.
9
Manah tiange leket ring parasenapatin bangsa Israele, ring paraanake sane saking liang dados sukarelawan. Pujija Ida Sang Hyang Widi Wasa.
10
Tuturangja indike punika, ih semeton sane nunggang keledae putih, sane malinggih ring kedapane, miwah sakancan semeton sane pada mamargi.
11
Pirengangja suaran anake akeh mabiayuhan ring sisin semere, sane nuturang kamenangan Ida Sang Hyang Widi Wasa, kamenangan bangsa Israele.
12
Duh Debora, rarisangja mimpin tur suarayangja kidunge. Duh Barak, okan Abinoam, rarisang matangi tur atehangja sakancan tawanane.
13
Sasampune punika paraanake sane satia tuu pada ngrauhin pamimpinnyane, tur kaulan Ida Sang Hyang Widi Wasa pada rauh ring dane, nyadia jaga mayuda.
14
Ipun pada mamargi saking Epraim ka lebake nututin suku Benyamin miwah rakyatnyane. Parasenapatine pada rauh saking Makir, miwah paraprawirane pada rauh saking Sebulon.
15
Parapamimpin suku Isakare rauh sareng-sareng ring Dane Debora, sawatek suku Isakar rauh, kadi asapunika taler Dane Barak, tur ipun sareng sami pada ngiring dane ka lebake. Nanging suku Ruben nenten saguluk. Ipun nenten mrasidayang mastiang punapi jaga sareng punapi nenten.
16
Napi awinannya ipun kantun ring ungkur, sareng-sareng ring biri-birinnyane? Napike buat miragiang suaran pangangone nyeritin ingon-ingonnyane? Saking sujati suku Ruben sampun tan saguluk, ipun nenten mrasidayang mastiang punapi jaga sareng punapi nenten.
17
Suku Gad magenah ring dangin Tukad Yordane miwah suku Dan kantun ring kapal-kapalnyane. Suku Aser sane magenah nampek ka pasisi, ipun kantun ring pasisi.
18
Nanging suku Sebulon miwah Naptali ngetohang jiwannyane ring ranang gana.
19
Ring Taanak nampek ring Tukad Megidone, pararatune pada rauh tur mayuda, nanging ida pada nenten nyarah perak.20
Bintang-bintange mayuda saking akasane. Rikala ipun pada nglintang ring akasane, ipun pada mayuda nglawan Sisera.
21
Blabare ring Tukad Kisone pada nganyudang ipun, inggih punika Tukad Kison sane suluk toyanipune. Tiang jaga mangseh terus saha kuat.
22
Irika raris wenten kuda ngredeg, ngrudug suaran buntutipune maketeban ring tanahe.
23
Malaekat Ida Sang Hyang Widi Wasa masabda sapuniki: “Temahja kota Merose. Temah, tur temahja sawatek jlemane ane nongos ditu. Ia tusing nyak teka nulungin Ida Sang Hyang Widi Wasa. Ia tusing nyak dadi prajurit masiat pabuat Ida.”24
Ni Yael kurenan Hebere, wong Kenine, anak luh sane pinih ageta. Ipun dados anak luh sane pinih ageta sane nongos ring kemahe.25
Sisera nagih toya, nanging Yael ngwehin ipun susu. Yael maktaang ipun susu antuk gelas sane becik pisan.
26
Limanipune sane aneh makta patok kemah, miwah limannyane sane anehan ngambel palu besi. Ipun manteg Sisera, tur ngencak terasnyane. Ipun raris nyibak tenggek Siserane punika.
27
Sisera bah maglebug. Ipun bah nylempang ring buntut Yaele. Ipun bah ka tanahe raris padem.
28
Memen Siserane nengok saking jendelane. Ipun malengok saking ungkur trali sarwi mataken sapuniki: “Ngudiang dadi kretannyane kasep pesan tekanne? Ngudiang dadi jarannyane tonden teka?”29
Panyeroannyane sane pinih duega raris nyaurin ipun, tur ipun tan mari nglipur dewekipune antuk pepineh sane sapuniki:
30
“Ia ajaka wadua balannyane pada milih muah ngedum-edum jejarahan. Asing-asing prajurite maan anak luh bajang adiri wiadin duang diri. Panganggone ane paling melaha pabuat icening Sisera. Selendang ane masulam katur pabuat ida sang pramesuari.”
31
Duh Ratu Sang Hyang Widi Wasa, dumadak sakancan meseh Palungguh IRatune padem kadi asapunika, nanging parasawitran Palungguh IRatune dumadak pada masinar sakadi suryane sane wau endag. Kenginan ring jagate irika raris wenten sutrepti, kantos petang dasa taun suenipun.1
Bangsa Israele malih ngardi dosa ring ayun Ida Sang Hyang Widi Wasa, punika awinannya Ida Sang Hyang Widi Wasa manggayang ipun kaprentah antuk wong Midiane kantos pitung taun suenipun.2 Bangsa Midiane punika kuatan ring bangsa Israele tur bangsa Israele ajerih ring ipun. Bangsa Israele tumuli pada mengkeb ring gua-guane wiadin ring genah-genahe sane aman ring bukit-bukite.
3 Sabilang bangsa Israele nandur bibit, wong Midiane raris pada rauh ngebug ipun, kasarengin antuk wong Amalek miwah suku-suku bangsa sane wenten ring tegal melakange.
4 Ipun raris ngwangun kemahipune irika, tur nyirnayang sakancan pamupon tetandurane, kantos rauh bedelod ring kiwa tengen kota Gasane. Ipun ngrampas sakancan biri-biri, banteng miwah keledae, tur nenten wenten sane tumanang ipun angan akidik buat pangupa jiwan wong Israele.
5 Ipun pada rauh saha makta ingon-ingon miwah kemahipune, tur akehipune waluya sakadi balange. Ipun miwah unta-untanipune nenten keni antuk ngwilangin akehnyane. Ipun rauh tur ngrusak jagate irika,
6 tur bangsa Israele nenten mrasidayang nglawan ipun.
7
Irika bangsa Israele raris masesambatan nunas pitulungan ring Ida Sang Hyang Widi Wasa, buat nglawan wong Midiane punika.8 Ida Sang Hyang Widi Wasa raris ngutus nabi adiri ngrauhin ipun. Nabine punika mamuat sabdan Ida Sang Hyang Widi Wasa, Widin Israele sane buat karauhang ring ipun, sapuniki: “Ulun suba nantan kita uli tongos kitane mamanjak di Mesir.
9 Ulun suba ngluputang kita uli sig wong Mesire, muah uli bangsane ane nyiatin kita di gumine ene. Ulun suba ngediang ia uli di arepan kitane tur Ulun maicayang guminnyane teken kita.
10 Ulun ngorahin kita mungguing Ulun ene Sang Hyang Widi Wasa, Widin kitane, tur kita tusing dadi nyungsung widin wong Amorine, ane guminnyane jani tongosin kita. Nanging kita tusing nyak ngidepang sabdan Ulune.”
11
Sasampune punika malaekat Ida Sang Hyang Widi Wasa raris rauh ring desa Opra, tur malinggih ring sor wit tarbantine, druen Dane Yoas anak saking palingsehan Abieser. Okan danene, Dane Gideon sedekan mengkeb nyosoh gandum ring genahe meres anggur, mangdane dane nenten kapanggihin antuk wong Midiane.12 Irika malaekat Ida Sang Hyang Widi Wasa raris mapakantenang raga ring dane, sarwi ngandika sapuniki: “Ih anak ane prawira muah prakasa, Ida Sang Hyang Widi Wasa ngiangin kita.”
13
Dane Gideon tumuli matur ring Ida sapuniki: “Inggih Ratu, yening titiang kalugra nunasang, napi awinannya kawentenan titiange sareng sami sakadi mangkin, yening wiakti Ida Sang Hyang Widi Wasa ngiangin titiang. Sapunapike indik katawahan-katawahan sane biasa kakardi antuk Ida Sang Hyang Widi Wasa, sane katuturang antuk parawong tuan titiange, inggih punika indik Idane sane sampun nantan ipun kesah saking Mesir? Ida Sang Hyang Widi Wasa sampun nilar tur ngentungang titiang sajeroning kakuasaan wong Midiane.”14
Irika Ida Sang Hyang Widi Wasa, nitahang dane, kadi asapuniki: “Kemaja anggon sakancan kakuatan kitane ane gede ento, tur bebasang bangsa Israele uli wong Midiane. Ulun ane ngutus kita.”15
Dane Gideon tumuli matur sapuniki: “Nanging sapunapiang titiang jaga mebasang wong Israele? Palingsehan titiange, palingsehan sane pinih alita sajeroning suku Manase, tur titiang puniki jadma sane pinih tan paji ring kulawargan titiange.”16
Ida Sang Hyang Widi Wasa ngandika sapuniki: “Kita nyidayang nglaksanayang unduke ento, sawireh Ulun ane lakar nulungin kita. Kita lakar ngalahang tur ngenyagang wong Midiane patuh buka kita nglawan anak aukud.”17
Dane Gideon raris matur sapuniki: “Yening Palungguh IRatu wiakti ledang ring titiang, icenja titiang makudang-kudang tanda, mungguing Palungguh IRatu wiakti Ida Sang Hyang Widi Wasa.18 Ledang Palungguh IRatu meneng dumun iriki, kantos titiang rauh ngaturin Palungguh IRatu aturan rayunan.”
Ida malih ngandika: “Ulun lakar nongos dini, kanti kita teka buin mai.”19
Irika Dane Gideon raris ngranjing ka jeroan danene ngratengang panak kambing asiki miwah ngambil tepung dasa kilogram kanggen roti tan paragi. Ulame punika wadahin dane sokasi miwah kuahnyane wadahin dane payuk, raris kabakta ka ajeng malaekat Ida Sang Hyang Widi Wasa ring sor wit tarbantine, tumuli katurang ring Ida.20 Sang Malaekat ngandika ring dane sapuniki: “Pejang bene muah rotine ento di duur parangane ene, tur sriokang kuahne di duur roti muah bene ento.” Dane Gideon raris ngamargiang kadi asapunika.
21 Sasampune punika malaekat Ida Sang Hyang Widi Wasa tumuli nyujuh tur ngusud ulam miwah rotine punika antuk muncuk teteken sane bakta Ida. Irika raris medal geni saking batu kaange punika tur ngeseng ulam miwah rotine punika. Sasampune punika, sang malaekat raris malecat.
22
Irika Dane Gideon raris uning mungguing dane sampun ngaksi malaekat Ida Sang Hyang Widi Wasa, tur sajeroning katakutan dane raris mabaos sapuniki: “Duh Ratu Sang Hyang Widi Wasa Sane Maha Luih! Titiang sampun ngeton malaekat Palungguh IRatu marep-arepan.”23
Nanging Ida Sang Hyang Widi Wasa ngandika ring dane sapuniki: “Rahayuja kita. Edaja kita takut. Kita tusing lakar mati.”24 Irika Dane Gideon tumuli ngwangun pamorboran aturan ring genahe punika pabuat Ida Sang Hyang Widi Wasa, tur kawastanin: “Ida Sang Hyang Widi Wasa maraga dame.” (Pamorboran aturane punika kantun ring Opra, dados padruen palingsehan Abieser.)
25
Ring wengine punika Ida Sang Hyang Widi Wasa masabda ring Dane Gideon sapuniki: “Jemakja sampin bapan kitane, muah sampi lenan buin aukud ane matuuh pitung tiban, laut uugang pamorboran aturan Dewa Baal bapan kitane muah tektek turus lumbung Dewi Aserane, ane ada di sampingne.26 Laut ngaeja pamorboran aturan ane melah pabuat Ida Sang Hyang Widi Wasa, Widin kitane di duur gegumuke ento. Sasubane keto, jemakja sampine ane buin aukud ento, laut borbor makaukud anggon aturan, tur turus lumbung Dewi Aserane ane suba tektek kita ento anggo saangne.”
27 Irika Dane Gideon raris ngajak parekan danene dasa diri, tumuli nglaksanayang sapatitah Ida Sang Hyang Widi Wasa. Dane kalintang ajerih ring kulawargan danene miwah rakyate ring desane punika, buat ngamargiang indike punika rikalaning rahina. Duaning punika, indike punika margiang dane rikala wengi.
28
Benjang semengnyane rikala jadmane ring desane punika pada bangun, panggihin ipun pamorboran aturan Dewa Baal miwah turus lumbung Dewi Aserane sampun matektek, samaliha bantenge sane tiosan punika sampun kaborbor ring pamorboran aturane sane sampun kawangun irika.29 Ipun raris pada saling takenin sapuniki: “Nyen ane malaksana buka kene ene?” Sasampun selidikin ipun raris uningin ipun mungguing Dane Gideon okan Dane Yoas sane nglaksanayang indike punika.
30 Irika raris ipun mabaos ring Dane Yoas sapuniki: “Medalang okan ragane mriki pacang pademang tiang. Ipun sampun nguugang pamorboran aturan Dewa Baal miwah nektek turus lumbung Dewi Aserane sane ring sampingnyane.”
31
Nanging Dane Yoas raris mabaos ring sakancan anake sane ngarepin dane sapuniki: “Punapike ragane maruang ring Baal? Punapi ragane jaga nindihin Baale punika? Asing-asing anak sane maruang ring Baal pacang kapademang sadurung semengan. Yen Baal punika widi banggayang ipun nindihin dewekipune niri. Puniki wantah pamorboran aturanipune kewanten sane kuugang.”32 Sasukat punika Dane Gideon raris kapesengin antuk anake akeh Yerubaal, santukan Dane Yoas ngandika: “Banggayang Baale punika nindihin dewekipune niri, santukan pamorboran aturanipune sane kuugang.”
33
Sasampun punika sakancan wong Midian, wong Amalek miwah suku-suku bangsa sane wenten ring tegal melakange sami pada mapunduh, raris nglintangin Tukad Yordane, tur ngwangun kemahnyane ring Lebak Yisreel.34 Roh Ida Sang Hyang Widi Wasa tumuli ngencegin Dane Gideon. Dane raris ngupin trompet buat nauhin anak saking palingsehan Abieser mangda ngiring dane.
35 Dane ngutus utusan ka sakancan wewidangan suku Manasene sane dangin tukad miwah dauh Tukad Yordane, nauhin ipun mangda ngiring dane. Dane ngutus anak mangda ngrauhin suku-suku Aser, Sebulon miwah Naptaline, tur ipun sareng sami taler pada nyarengin dane.
36
Sasampune punika Dane Gideon raris matur ring Ida Sang Hyang Widi Wasa sapuniki: “Palungguh IRatu ngandikayang mungguing Palungguh IRatu sampun mastiang jaga nganggen titiang buat mebasang bangsa Israele.37 Inggih sane mangkin titiang jagi ngenahang makudang-kudang wol ring tanahe ring genah titiange nyosoh gandum. Yening benjang semeng wenten damuh wantah ring wole punika kewanten, tur nenten wenten ring tanahe, irika titiang jagi uning mungguing Palungguh IRatu jagi ngangge titiang buat mebasang bangsa Israele.”
38 Kenginan raris sawiakti kasidan kadi asapunika. Benjangne pasemengan rikala Dane Gideon matangi, dane raris meseng wole punika, raris medal damuh saking wole punika ngantos ajembung bek madaging toya.
39 Irika Dane Gideon matur malih ring Ida Sang Hyang Widi Wasa sapuniki: “Sampunangja Palungguh IRatu duka ring titiang. Icenja titiang matur malih apisan. Icenja titiang ngardi pepintonin malih apisan masrana wole punika. Sane mangkin mangda wole punika kewanten sane tuh, nanging tanahe mangda belus.”
40 Ring wengine punika Ida Sang Hyang Widi Wasa raris nglaksanayang indike punika. Benjang semengane, wole punika kantun tuh, nanging tanahe belus antuk damuh.
1
Sedek rahina anu Dane Gideon miwah wadua balan danene sami pada matangi pasemengan, raris ngwangun kemah ring sisin toya klebutan Harode. Pakemahan wong Midiane wenten ring lebake, baler genah danene ngwangun pakemahan nampek ring Bukit More.2
Ida Sang Hyang Widi Wasa masabda ring Dane Gideon sapuniki: “Waduane ane ajak kita ento bes liu buat Ulun, buat lakar micayang kamenangan teken ia nglawan wong Midiane ento. Yen keto, ia lakar ngaden, mungguing kamenangane ento tuah ulihan kasitengannyane niri, tur ulihan ento ia lakar tusing ngajiang Ulun.3 Ane jani uar-uarang teken rakyate kene: ‘Asing-asing anak ane jejeh ia patut mulih, tur tiang lakar nongos dini di Gunung Gilead.’ ” Duaning punika raris wenten malih kalih likur tali anak sane budal, nanging sane kantun irika wenten dasa tali.
4
Sasampune punika Ida Sang Hyang Widi Wasa masabda malih ring Dane Gideon, sapuniki: “Kita enu bes liu ngajak wadua bala. Ajak ia tuunan ka tukade. Ditu Ulun lakar nganehang ia. Yen Ulun ngorahin kita mungguing ia patut nututin kita, ia lakar nututin kita. Yen Ulun ngorahin kita mungguing ia tusing patut nututin kita, ia tusing lakar nututin kita.”5 Dane Gideon tumuli ngajak wadua balane tedun ka tukade tur Ida Sang Hyang Widi Wasa raris ngandika ring dane sapuniki: “Anehangja asing-asing anak ane nginem yeh aji layahne, buka cicinge nginem yeh, klawan anake ane nginum yeh sambilanga matedoh.”
6 Irika raris wenten tigang atus anak sane nginum toya nyalud antuk limanipune raris koyot. Sane lianan makasami pada nginum toya sambilang ipun matedoh.
7 Ida Sang Hyang Widi Wasa raris ngandika ring Dane Gideon sapuniki: “Ulun lakar mebasang kita tur mapaica kamenangan teken kita nglawan wong Midiane ento aji anak telung atus ane nyalud tur ngoyot yeh aji limanne ento. Ane lenan ento makejang tunden ia mulih.”
8 Irika Dane Gideon raris ngandikayang wong Israele sami pada budal, sajawining sane tigang atus diri punika. Dane raris ngambil bekel miwah trompet-trompetnyane makasami. Wong Midiane ngwangun pakemahanipune ring lebake ring sor Dane Gideone ngwangun pakemahan.
9
Ring wengine puniki Ida Sang Hyang Widi Wasa, nitahang Dane Gideon, sapuniki: “Bangunja tur gebug pakemahane ento. Ulun lakar mapaica kamenangan teken kita.10 Nanging yening kita jejeh magebug, kemaja tuunan ka pakemahane ento ngajak parekan kitane I Pura.
11 Kita lakar ningeh unduk ane raosanga teken musuhe, tur sasubane ento kita lakar bani magegebug.” Irika Dane Gideon miwah parekan danene I Pura raris lunga nganedunang ka wates pakemahan mesehe.
12 Wong Midian, wong Amalek miwah suku-suku sane wenten ring tegal melakange sami pada pajlempang ring lebake kadi balang akehipune. Untan ipune akeh pisan, tan bina sakadi biase ring pasisi akehipun.
13
Rikala Dane Gideon rauh irika, dane mireng anak nuturang ipian ring timpalipune, sapuniki baosipune: “Tiang ngipi, ada roti gandum abungkul ngluluk ka pakemahan iragane laut nepen kemahe lantas uug tur benyah asah klawan tanahe.”14
Timpalipune tumuli masaur sapuniki: “Ento suba pedang Gideone pianak Yoase wong Israele ento. Tusingja lenan teken buka keto artin ipiane ento. Ida Sang Hyang Widi Wasa suba ngicen ia kamenangan nglawan wong Midiane muah sawatek wadua balan iragane.”15
Rikala Dane Gideon mireng ipian anake punika, miwah artin ipiane punika, dane raris matedoh tur nyumbah Ida Sang Hyang Widi Wasa. Sasampune punika, dane raris mawali ka kemah wong Israele tumuli ngandika sapuniki: “Bangunja, Ida Sang Hyang Widi Wasa lakar ngicen nyama kamenangan nglawan wadua balan wong Midiane.”16 Dane raris ngepah waduan danene sane tigang atus punika dados tigang pasukan, tur asing-asing prajurite kicen trompet asiki, jun asiki miwah obor asiki ring tengah june punika.
17 Dane raris ngandika ring ipun sapuniki: “Yen tiang suba neked di wates pakemahan musuhe, pedasinja tiang, tur laksanayangja apa ane laksanayang tiang.
18 Yen tiang muah pasukan tiange ngupin trompet, ditu nyama patut ngupin trompet nyamane di kiwa tengen pakemahane ento tur masuryakja kene: ‘Pabuat Ida Sang Hyang Widi Wasa muah pabuat Gideon.’ ”
19
Wau makire tengah wengi Dane Gideon miwah pasukan danene satus diri raris rauh ring wates pakemahan mesehe, duk pajagane wau pisan magentos. Irika dane miwah pasukan danene ngupin trompet tur june sane kabakta tumuli kencak.20 Pasukane kekalih sane lianan, taler nglaksanayang paindikan sane kadi asapunika. Dane miwah pasukan danene makasami ngagem obor ring tangannyane kiwa, trompet ring tangannyane tengen, sarwi masuryak: “Pedang pabuat Ida Sang Hyang Widi Wasa, muah pabuat Gideon.”
21 Dane miwah wadua balan danene sami pada majujuk ring genahnyane suang-suang ngilehin pakemahane punika, tur wadua balan mesehe punika sami pada malaib jerit-jerit.
22 Rikala wadua balan Dane Gideone ngupin trompetnyane, Ida Sang Hyang Widi Wasa ngawinang wadua balan mesehe pada saling sempal antuk pedang ngajak timpalipune. Ipun sareng sami pada malaib ngungsi Serera, kantos rauh ring Bet-Sita miwah kota Abel-Mehola sane nampek ring Tabat.
23
Sasampune punika suku Naptali, Aser miwah Manase dangin tukad miwah dauh Tukad Yordane raris kadauhin mangda medal, tur ipun raris nguber wong Midiane punika.24 Dane Gideon raris ngutus anak ka sawewidangan pagunungan Epraime sami, buat madedauhan sapuniki: “Rarisangja pada medal, tur gebugja wong Midiane punika. Jaga Tukad Yordane miwah tukad-tukade sami ngantos rauh ka Bet-Bara mangda sampunang wong Midiane kantos mrasidayang nglintang.” Wong Epraime makasami kadauhin, tur ipun nyaga Tukad Yordane miwah tukad-tukade sane alit-alit ngantos rauh ka Bet-Bara.
25 Ipun polih ngejuk ratun wong Midiane kekalih, Sang Prabu Oreb miwah Seeb. Sang Prabu Oreb raris kasedayang ring Batu Oreb, miwah Sang Prabu Seeb kasedayang ring pameresan anggur Seebe. Wus punika ipun sareng sami nglanturang ngepung wong Midiane tur punggalan Sang Prabu Oreb miwah Seebe kabakta ka ajeng Dane Gideon, sane sedekan wenten ring dangin Tukad Yordane.
1
Sasampune punika suku Epraime raris mabaos ring Dane Gideon, sapuniki: “Napi awinannya semeton nenten nauhin tiang, rikala semeton lunga ngebug wong Midiane? Napi awinannya semeton matakeh kadi asapunika ring tiang?” Ipun sareng sami banget pisan makeengan ngeniang paindikane punika.2
Nanging Dane Gideon masaur sapuniki: “Paindikan sane sampun margiang tiang punika, tan wenten ajinipun yen bandingang ring paindikan sane sampun laksanayang semeton. Yadiastu paindikan sane alit sane sampun kalaksanayang antuk suku Epraim, paindikan punika agengan pangarganipun ring paindikan sane sampun kalaksanayang antuk suku bangsan tiange sareng sami.3 Yadianja kadi asapunika kawentenannyane, malantaran kakuatan Ida Sang Hyang Widi Wasa, semeton sampun nyedayang ratun wong Midiane kekalih, inggih punika Oreb miwah Seeb. Punapike sane sampun laksanayang tiang sane nyandang kabandingang ring paindikan punika?” Rikala dane mabaos kadi asapunika, ipun sareng sami nenten malih pedih ring dane.
4
Daweg punika Dane Gideon miwah wadua balan danene tigang atus punika sampun rauh ring Tukad Yordane, tur sampun nglintang ring tukade punika. Dane miwah waduane sami kalintang lesu, nanging kantun taler nguber mesehe punika.5 Rikala dane rauh ring Sukot, dane mabaos ring wong kotane irika sapuniki: “Icenja waduan tiange nunas roti makudang-kudang bungkul. Ipun sareng sami sampun kalintang leleh, tur tiang sareng sami ngepung Sebah miwah Salmuna, ratun wong Midiane.”
6
Nanging pamimpin wong Sukote mabaos kadi asapuniki: “Napi awinannya tiang patut maang wadua balan ragane ajengan? Semeton durung nyidayang ngejuk Sebah miwah Salmuna.”7
Duaning punika Dane Gideon raris ngandika sapuniki: “Inggih! Yening Ida Sang Hyang Widi Wasa sampun nyerahang Sebah miwah Salmuna ring tiang, tiang jaga nigtig ragane antuk dui miwah ketket sane saking tanah melakange.”8 Dane Gideon raris lunga ka Penuel, tur mapangidih ring rakyate irika, pateh sakadi iwau, nanging pasaur jadmane ring Penuel pateh sakadi pasaur jadmane ring Sukot.
9 Duaning punika Dane Gideon raris ngandika sapuniki: “Yen tiang mawali saha rahayu, tiang jaga nguugang menaran ragane.”
10
Sang Prabu Sebah miwah Sang Prabu Salmuna wenten ring Karkor kairing antuk wadua balan idane. Saking pantaran wadua balan suku-suku sane ring tegal melakange punika, wantah kantun sawatara 15.000 kewanten. Sane sampun kapademang wenten 120.000 akehipun.11 Dane Gideon mamargi nuluh margine ring sisin tegal melakange, dangin Nobah miwah Yogbehane, tur tan pasamodana ngebug wadua balane punika.
12 Ratun wong Midiane makakalih, inggih punika Sebah miwah Salmuna, jerih kapilayu nanging kakepung tur keni kejuk, tur indike punika ngawinang sakancan wadua balan idane sami pada sambeh pablesat.
13
Rikala Dane Gideon mawali saking payudan nglintang ring margine munggah ka Heres,14 dane ngejuk anak truna saking Sukot adiri, tur nakenin ipun. Anake truna punika raris nyuratang pesengan pamimpin-pamimpin rakyate ring Sukot, wenten pitung dasa pitu diri akehipune, katurang ring Dane Gideon.
15 Sasampune punika Dane Gideon raris lunga maranin jadmane ring Sukot, sarwi ngandika sapuniki: “Elingangja rikala semeton nenten kayun nulungin tiang, semeton maosang mungguing semeton nenten mrasidayang micayang dedaaran ring wadua balan tiange sane kaleson, santukan tiang dereng mrasidayang ngejuk Sebah miwah Salmuna. Inggih sane mangkin puniki Sebah miwah Salmuna.”
16 Irika dane tumuli ngambil dui miwah ketket saking tegal melakange kanggen ngukum pamimpin-pamimpin wong Sukote.
17 Dane taler nguugang menarane ring Penuel tur ngamademang jadmane ring kotane punika.
18
Sasampune punika Dane Gideon raris mataken ring Sang Prabu Sebah miwah Salmuna, sapuniki: “Sapunapike indik jadmane sane pademang ragane ring Tabor?” Pasaur idane sareng kalih, sapuniki: “Pakantenannyane pateh sakadi ragane. Asing-asing anake punika waluya sakadi putran sang prabu.”19
Dane Gideon raris ngandika: “Anake punika makasami nyaman tiange, pianak-pianak memen tiange. Saking sujati tiang masumpah, yen ragane nenten ngamademang ipun, sinah tiang jaga nenten nyedayang ragane.”20 Sasampune punika dane raris ngandika ring Dane Yeter, okan danene sane pinih duur, sapuniki: “Majuja cening, matiang ia makadadua!” Nanging okan danene punika nenten ngaud pedang danene. Dane mangu-mangu, santukan dane kantun alit.
21
Sasampune punika Sang Prabu Sebah miwah Salmuna mabaos ring Dane Gideon sapuniki: “Durusangja ragane ngraga sane ngamademang tiang. Indike punika mula dados tetegenan anak lanang.” Duaning punika Dane Gideon raris nyedayang sang kalih. Sasampune punika dane raris ngambil pepayasan sane kagantungang ring baong untan sang kalih punika.22
Wusan punika, bangsa Israele raris matur ring Dane Gideon sapuniki: “Ledang semeton dados pamrentah tiange sareng sami, inggih punika semeton miwah katurunan semetone. Semeton sampun mebasang tiang sareng sami saking wong Midiane.”23
Dane Gideon raris masaur sapuniki: “Tiang nenten nyak dados pamrentah semetone, kadi asapunika taler pianak tiange. Wantah Ida Sang Hyang Widi Wasa sane dados pamrentah semetone.”24 Nanging sapanglanturipun dane raris ngandika sapuniki: “Wenten pinunas tiange asiki ring parasemeton. Semeton suang-suang mangda ledang micayang anting-anting jejarahan semetone ring tiang.” (Sakadi bangsa sane lianan, sane wenten ring tegal melakange, wong Midiane punika sami pada ngangge anting-anting mas.)
25
Irika rakyate sami pada masaur sapuniki: “Saking manah liang, tiang jaga ngaturang punika makasami ring semeton.” Ipun sareng sami ngebatang wastra, tur rakyate makasami ngenahang anting-anting jejarahane punika ring wastrane punika.26 Anting-anting mas sane katampi antuk Dane Gideon punika, beratipun sawatara wenten kalih dasa kilogram, sajawining pangangge mas-masan, kalung miwah wastra ungu sane karangsuk antuk pararatun wong Midiane, miwah bandong sane kanggen antuk unta-untan idane.
27 Dane Gideon tumuli makarya arca malakar antuk mas tur arcane punika genahang dane ring kota uedan danene, inggih punika kota Opra. Bangsa Israele makasami raris ngutang Ida Sang Hyang Widi Wasa tumuli pada ka Opra buat mabakti ring arcane punika. Indike punika dados jeet pabuat Dane Gideon miwah kulawargan danene.
28
Kadi asapunika indik wong Midiane kakaonang antuk wong Israele tur nenten malih wenten baya pabuat wong Israele. Jagate irika raris muponin kerta raharja ngantos petang dasa taun suenipun, ngantos Dane Gideon seda.29
Dane Gideon raris mawali ka jeron danene tur jenek malinggih irika.30 Dane madue oka lanang-lanang pitung dasa diri, santukan dane akeh madue rabi.
31 Dane taler madue selir adiri ring Sikem. Selir danene punika madue oka lanang adiri mapesengan Abimelek.
32 Dane Gideon okan Dane Yoas seda rikala dane sampun lingsir pisan, tur kaperemang ring setran Dane Yoas, ajin danene ring Opra, ring kota palingsehan Dane Abieser.
33
Sasampune Dane Gideon seda, bangsa Israele malih nenten satia ngiring Ida Sang Hyang Widi Wasa tur ipun mabakti ring Dewa Baal. Ipun pada ngadegang Dewa Baal-Berit makadados widinnyane,34 tur ipun nenten malih nyungsung Ida Sang Hyang Widi Wasa, Widinipune, sane sampun ngrahayuang ipun saking sakancan meseh-mesehipune sane wenten ring kiwa tengenipune.
35 Ipun pada nenten marasa suksma ring kulawargan Dane Gideon, pabuat sakancan kabecikan sane sampun kardi dane buat bangsa Israele punika.
1
Dane Abimelek, okan Dane Gideon raris lunga ka kota Sikem ring genah kadang wargan biang danene, tur mabaos ring kadang wargan danene punika,2 mangda dane mataken ring wong Sikeme punika: “Sane encen semeton senengan, punapi kaprentah antuk okan Dane Gideon sareng pitung dasa punapi wantah antuk sane adiri kewanten? Elingangja mungguing Abimelek punika mula magetih abungbung ngajak semeton.”
3 Palelintihan biang Dane Abimelek raris mabaos ring wong Sikeme ngeniang paindikan punika, tur wong Sikeme raris pada saadung jaga ngiring Dane Abimelek, santukan dane punika mula palelintihan ipun.
4 Ipun sareng sami ngaturang jinah perak pitung dasa bidang ring Dane Abimelek, sane kambil saking genah panyungsungan Baal-Berite. Dane Abimelek raris ngupahin makudang-kudang anak sane jaat-jaat, buat dados pangiring danene.
5 Dane raris lunga ka jeron ajin danene ring Opra, tur irika dane nyedayang semeton danene makapitung dasa, inggih punika paraputran Dane Gideon, ring duur batune sane asiki. Nanging Dane Yotam, okan Dane Gideon sane pinih alit, polih masingidan tur nenten keni kasedayang.
6 Sasampun punika sawatek wong Sikem miwah Bet-Milone, sami pada mapunduh, raris mamargi ka genah wit taru tarbantine sane suci ring Sikem, tur irika ipun ngadegang Dane Abimelek dados ratu.
7
Rikala Dane Yotam mireng indike punika, dane tumuli lunga tur ngadeg ring pucak Gunung Gerisime, sarwi jerit-jerit ring anake punika, sapuniki: “Inggih parasemeton wong Sikem, pirengangja atur tiange, tur dumadakja Ida Sang Hyang Widi Wasa jaga mireng pinunas semetone.8 Sedek rahina anu soroh wit tarune pada mapunduh, buat jaga milih ratu ring pantaran ipune. Irika ipun sareng sami raris mabaos ring wit saitune, sapuniki: ‘Ledang semeton dados ratun tiange, sareng sami.’
9 Irika wit saitune masaur kadi asapuniki: ‘Yening dados pamrentah parasemetone, tiang jaga wusan ngwedalang minyak, sane kanggen ngluihang dewa-dewa miwah manusane.’
10 Sasampune punika sawatek tarune punika mabaos ring wit aane sapuniki: ‘Rarisang semeton dados ratun tiange sareng sami.’
11 Nanging wit aane punika masaur sapuniki: ‘Yening tiang mrentah parasemeton, tiang jaga wusan mupuang woh tiange sane manis-manis.’
12 Duaning punika ipun sareng sami raris mabaos ring wit anggure sapuniki: ‘Rarisang semeton dados ratun tiange sareng sami.’
13 Nanging wit anggure punika masaur sapuniki: ‘Yening tiang mrentah parasemeton, tiang jaga wusan ngwedalang toyan anggur tiange, sane ngawinang paradewa miwah manusane pada liang.’
14 Duaning punika sawatek wit tarune sami mabaos ring bet duine, sapuniki: ‘Rarisangja dados ratun tiange sareng sami.’
15 Bet duine punika raris masaur sapuniki: ‘Yening parasemeton saking wiakti mapakayunan jaga nadosang tiang ratun semetone, rarisangja pada rauh masayuban ring sor carang-carang tiange. Yening semeton nenten kayun, jaga wenten geni medal saking carang-carang tiange sane madui tur ngeseng wit arase ring Libanon.’ ”
16
Dane Yotam malih nglanturang pangandikan danene, sapuniki: “Sane mangkin punapike semeton sawiakti saking jujur miwah nulusing kayun ngadegang Dane Abimelek dados ratu? Punapike semeton sampun ngajiang pakeling Dane Gideon tur malaksana sapatutipun marep ring kulawargan danene, sakadi sane patut katampi malantaran pamargin danene.17 Elingangja mungguing ajin tiange sampun mayuda pabuat semeton. Dane ngetohang jiwan danene buat ngluputang semeton saking wong Midiane.
18 Nanging sane mangkin semeton mabalik nglawan kulawargan ajin tiange. Semeton nyedayang oka-okan danene pitung dasa diri ring duur batune sane asiki, ulihan semeton sampun ngadegang Abimelek, pianak panyeroan ajin tiange, sane dados kadang wargan semetone, makadados ratu ring Sikem.
19 Duaning punika, sane mangkin yening paindikan sane margiang semeton marep ring Dane Gideon miwah kulawargan danene, wiakti saking jujur miwah nulusing kayun, rarisangja semeton pada liang ngiring Dane Abimelek miwah dane taler liang ngajak semeton.
20 Nanging yening nenten wiakti kadi asapunika, dumadakja geni nilap saking Dane Abimelek tur ngeseng jadmane ring Sikem miwah Bet-Milo. Dumadak taler wenten geni medal saking wong Sikem miwah wong Bet-Milone, tur ngeseng Dane Abimelek.”
21 Sasampune punika, santukan dane ajerih ring Dane Abimelek, semeton danene, Dane Yotam raris malaib lunga ka Beer, tur jenek malinggih irika.
22
Dane Abimelek mrentah wong Israele tigang taun suenipun.23 Sasampune punika Ida Sang Hyang Widi Wasa ngawinang Dane Abimelek miwah wong Sikeme pada saling mameseh-meseh, tur wong Sikeme brontak nglawan dane.
24 Paindikan punika dados karma palan Dane Abimelek miwah wong Sikeme sane ngangsokang dane buat nyedayang okan Dane Gideon pitung dasa diri punika.
25 Wong Sikeme ngenahang prajurit ring pucak-pucak gununge buat ngejuk Dane Abimelek, tur sawatek anake sane nglintang iriki, sami rampok ipun. Indike punika sampun kuningayang ring Dane Abimelek.
26
Sasampune punika, Dane Gaal okan Dane Ebed, kasarengin antuk parasemeton danene raris rauh ring Sikem, tur wong Sikeme pada pracaya ring dane.27 Ipun sareng sami pada medal ka abian angguripune tur ngalap woh anggur, raris makarya toya anggur, tur ngwentenang pesta. Ipun sareng sami raris ngranjing ka puran dewanipune, tur irika ipun mangan nginum, tur mabaos-baosan nganistayang Dane Abimelek.
28 Dane Gaal raris mabaos sapuniki: “Anake sane sapunapike iraga sane ring Sikem puniki? Punapi awinannya iraga manjakin Abimelek? Sapasirake ipun punika? Ipun wantah panak Gideon, tur Sebul ngamargiang prentahnyane. Nanging napi awinannya iraga mamanjak ring ipun? Pada satiaja ring leluur semetone, Hemor, sane makadados pancer palingsehan semetone.
29 Tiang meled pisan jaga nuntun rakyate puniki. Tiang jaga nyuudang Abimelek, tiang jaga mabaos ring ipun sapuniki: ‘Sregepangja wadua balan ragane, rarisang mriki medal ka payudan.’ ”
30
Dane Sebul pamrentah kotane punika raris kalintang duka, ritatkala dane mireng paindikan sane kapangandikayang antuk Dane Gaal punika.31 Dane raris ngutus anak buat tangkil ring Dane Abimelek ring Aruma, saha kadulurin atur sapuniki: “Gaal pianak Ebede miwah nyama-nyamaanipune rauh ka Sikem, tur ipun masusuin rakyate mangda nglawan pamekele.
32 Duaning punika, sane mangkin rarisang pamekele miwah wadua balan pamekele mamargi rikalaning wengi tur masingidanja ring pategalane.
33 Benjang semengan rikala suryane sampun endag, rarisang matangi, tur tan pasumudana gebugja kotane punika. Yening Gaal miwah waduanipune medal ngarepin pamekele, rarisang gebug ipun sakuat-kuat pamekele.”
34
Irika Dane Abimelek miwah waduan danene makasami raris mamargi rikalaning wengi tur masingidan ring jaban kota Sikeme, dados petang pasukan.35 Rikala Dane Abimelek miwah waduan danene ngaksi Dane Gaal medal tur ngadeg ring gapuran kotane, Dane Abimelek miwah wadua balan danene raris medal saking genah pasingidane.
36 Dane Gaal ngaksi wadua balane punika, tumuli mabaos ring Dane Sebul sapuniki: “Cingakinja! Punika wenten jadma tedun saking pucak-pucak gununge!”
Pasaur Dane Sebul: “Punika boya jadma, punika wantah lawat ring duur gununge.”37
Dane Gaal malih ngandika sapuniki: “Cingakinja! Punika wenten jadma tedun saking pucak gununge, tur apasukan rauh nuluh margine sane saking wit taru tarbantine genah anak maluasang.”38
Sasampune punika Dane Sebul raris mabaos ring Dane Gaal sapuniki: “Sane mangkin dija baos ragane sane sesumbar punika? Ragane sane mataken, napi awinannya tiang sareng sami patut ngaula ring Abimelek punika. Niki sampun jadmane sane nistayang ragane punika. Sane mangkin rarisangja medal ka payudan, siatin dane.”39 Irika Dane Gaal tumuli mimpin wong Sikeme medal ka payudan tur nglawan Dane Abimelek.
40 Dane Gaal jerih kapilayu, tur kuber antuk Dane Abimelek. Akeh jadmane sane kapademang, ngantos rauh ka gapuran kotane.
41 Dane Abimelek jenek malinggih ring Aruma, tur Sebul ngulah Dane Gaal miwah parasemeton danene saking Sikem kantos dane nenten mrasidayang malih magenah irika.
42
Benjangne Dane Abimelek uning mungguing wong Sikeme mamanah jaga pada medal ka tegale.43 Punika awinan dane munduhang waduan danene, raris kaepah dados tigang pasukan, tumuli masingidan ring pategalane, buat nyantosang wong Sikeme punika. Rikala dane ngaksi wong Sikeme pada medal saking kota, dane medal saking pengkeban buat ngamademang ipun sinamian.
44 Risedek Dane Abimelek miwah pasukan danene malaib buat pacang nyaga gapuran kotane, waduan danene sane kalih pasukan punika, pada nyiatin wong Sikeme ring pategalane tur ngamademang ipun makasami.
45 Yudane rames pisan ngantos arahina mepek. Dane Abimelek ngaonang kotane punika. Jadmannyane kapademang, kotane kuugang tur tanahnyane kasambehin tasik kantos nekep tanahe makasami.
46
Rikala sakancan pamimpin sane wenten ring bentenge sane ring Sikem miragi indik punika, ipun sareng sami raris masayuban ring guane sane wenten ring puran Baal-Berite.47 Dane Abimelek mireng mungguing ipun sareng sami sampun mapunduh irika.
48 Punika awinannya dane raris lunga ka Gunung Salmon kairing antuk waduan danene. Irika dane ngambil kapak, ngetep carang taru, raris tegen dane. Dane ngandikayang waduan danene mangda digelis nyarengin dane.
49 Irika sawatek anake raris pada ngetep carang taru, tumuli ngiring Dane Abimelek tur nugdugang tarune punika ring bungas guane punika. Dane raris nunjel tarune punika. Rikala punika jadmane sane ring guane punika, sawatek jadmane sane wenten ring bentenge sami pada padem. Akehipun sawatara wenten siu diri lanang wadon.
50
Sasampune punika Dane Abimelek raris lunga ka Tebes, tumuli ngurung kotane punika, tur kakaonang.51 Ring kotane punika wenten menara sane kukuh bakuh tur sakancan wong kotane lanang wadon, miwah parapamimpinnyane sami pada ngranjing irika. Ipun sareng sami raris ngancing menarane punika saking tengah, tur ipun pada munggah ka raabnyane.
52 Rikala Dane Abimelek rauh jaga ngebug menarane punika, dane munggah ka jelanan menarane mapakayun jaga nunjel menarane punika.
53 Nanging wenten anak luh adiri ngentungang batu pangilesan ngenain duur danene, kantos duur danene belah.
54 Irika dane digelis ngesengin parekan sane ngambel sanjatan danene, tur kapangandikain sapuniki: “Aud pedang caine, laut matiang icang. Icang tusing juari korahang mungguing icang kamatiang baan anak luh.” Irika parekan danene digelis nyedayang dane.
55 Rikala wong Israele manggihin mungguing Dane Abimelek sampun seda, ipun sareng sami raris pada budal.
56
Kadi asapunika Ida Sang Hyang Widi Wasa ngwales kajaatan Dane Abimelek sane laksanayang dane marep ring ajin danene, malantaran dane nyedayang semeton danene pitung dasa diri punika.57 Ida Sang Hyang Widi Wasa taler nibakang kasangsaran ring wong Sikeme malantaran kajaatanipune, manut sakadi temah Dane Yotam, okan Dane Gideon, sane sampun ucapang dane marep ring ipun sareng sami.
1
Sasampune Dane Abimelek seda, raris rauh Dane Tola, okan Dane Pua, putun Dane Dodo, buat mebasang wong Israele. Dane punika wit saking suku Isakar, tur dane malinggih ring Samir, ring Pagunungan Epraim.2 Dane dados pamimpin bangsa Israele kantos tigalikur taun suenipun. Sasampune punika dane raris seda tur kaperemang ring Samir.
3
Sasampun Dane Tola, raris rauh Dane Yair saking Gilead. Dane mimpin bangsa Israele kalih likur taun suenipun.4 Dane madue oka lanang-lanang tigang dasa diri, tur suang-suang pada nglinggihin keledae. Dane madue kota tigang dasa ring tanah Gilead, sane kantun rauh mangkin tur sami kawastanin desa-desan Dane Yair.
5 Dane Yair raris seda tur kaperemang ring Kamon.
6
Bangsa Israele malih ngardi dosa pamantuka ring Ida Sang Hyang Widi Wasa, malantaran ipun nyungsung Dewa Baal miwah Dewi Astoret, makamiwah dewan wong Siria, Sidon, Moab, Amon miwah wong Pilistin. Ipun ngutang Ida Sang Hyang Widi Wasa tur wusan nyungsung Ida.7 Punika awinan Ida Sang Hyang Widi Wasa raris duka ring bangsa Israele, tur manggayang ipun kereh antuk wong Pilistin miwah wong Amon.
8 Plekutus taun suenipun wong Pilistine miwah wong Amone punika nindes miwah nyangsarain sakancan wong Israele sane magenah ring panegaran wong Amorine sane dangin Tukad Yordane inggih punika ring Gilead.
9 Malahan wong Amone taler nglintangin Tukad Yordan buat ngebug suku-suku Yehuda, Benyamin miwah Epraim. Dadosipun bangsa Israele katempuh antuk kakewehan sane ageng pisan.
10
Sasampune punika bangsa Israele raris masesambatan nunas ica ring Ida Sang Hyang Widi Wasa, sapuniki: “Titiang sampun madosa pamantuka ring ayun Palungguh IRatu, santukan titiang sampun nilar Palungguh IRatu, Widin titiange, tur nyungsung Dewa Baal.”11
Ida Sang Hyang Widi Wasa tumuli masabda ring ipun sapuniki: “Ane malu wong Mesir, wong Amori, wong Amon, wong Pilistin,12 wong Sidon, wong Amalek muah wong Maone suba ngala-ala kita, tur kita masesambatan nunas ica teken Ulun. Apake Ulun tusing mebasang kita uli reh-rehan bangsa-bangsane ento?
13 Nanging kita enu masih nilar Ulun laut nyungsung widi-widi ane lenan. Sawireh keto, Ulun tusing lakar mebasang kita buin.
14 Kemaja masesambatan tur nunas ica teken widi-widi ane suba pilih kita ento. Depang ia ane ngluputang kita, di kalan kitane katempuh baan kakewehan.”
15
Nanging bangsa Israele matur ring Ida Sang Hyang Widi Wasa, sapuniki: “Titiang sampun madosa, rarisang margiang sapakarsan Palungguh IRatu, nanging nawegang, bebasangja titiang ring rahinane mangkin.”16 Duaning punika ipun raris ngutang widi-widi sunantara punika, tumuli nyungsung Ida Sang Hyang Widi Wasa. Irika Ida Sang Hyang Widi Wasa tumuli sungsut makayunin indik kakewuhan bangsa Israele punika.
17
Sasampune punika wadua balan wong Amone raris makinkin jaga mayuda, tur ngwangun pakemahanipune ring Gilead. Wong Israele taler rauh mapunduh, tumuli ngwangun pakemahannyane ring Mispa sane ring Gilead.18 Irika rakyat miwah parapamimpin suku-suku bangsa Israele pada saling takenin, sapuniki: “Sapasirake sane jaga mamucukin yudane nglawan wong Amone punika? Sapasiraja sane jaga mimpin iraga ipun jaga dados pamimpin sawatek jadmane sane wenten ring Gilead.”
1
Dane Yepta prajurit sane sura dira saking Gilead. Dane punika pianak sundel, nanging ajin danene, Dane Gilead.2 Dane Gilead madue oka lanang-lanang sane lianan saking rabin danene sane sah. Rikala oka-okan danene punika sampun pada duur, dane raris nundung Dane Yepta saking jeron danene. Pangandikan danene ring Dane Yepta, sapuniki: “Cai tusing dadi ngwarisang apa-apa uli sig ajin icange, sawireh cai pianak anak luh len.”
3 Dane Yepta raris minggat saking parasemeton danene, raris malinggih ring tanah Tob. Irika dane munduhang jadma-jadmane sane jaat, tur ipun sareng sami pada ngiring dane nglelana.
4
Sasampune maletan makudang-kudang warsa, wong Amone raris medal ka payudan nglawan wong Israele.5 Duk punika, parapamimpin wong Gileade raris ngaturin Dane Yepta mangda mawali saking tanah Tob.
6 Sapuniki baos danene: “Rarisangja budal, pimpinja tiang sareng sami, mangda tiang mrasidayang nglawan wong Amone punika.”
7
Nanging pasaur Dane Yepta, sapuniki: “Semeton sampun kalintang geting pisan ring tiang, kantos semeton maksa tiang nilar jeroan ajin tiange. Sane mangkin napi awinannya semeton rauh ring tiang, rikala semeton katempuh antuk kakewehan?”8
Dane sareng sami raris matur ring Dane Yepta sapuniki: “Tiang sareng sami ngaturin semeton mawali sane mangkin, santukan tiang meled mangda semeton sareng-sareng tiang mamargi tur nyiatin wong Amone, tur mimpin rakyat Gileade makasami.”9
Dane Yepta ngandika ring dane sareng sami, sapuniki: “Yening semeton ngajak tiang mawali budal buat nglawan wong Amone, tur Ida Sang Hyang Widi Wasa ngicen iraga kamenangan, tiang jaga dados pamrentah semetone.”10
Dane sareng sami raris masaur sapuniki: “Inggih tiang sairing. Ida Sang Hyang Widi Wasa makadados saksin iragane.”11 Duaning punika Dane Yepta raris ngiringang parapamimpin Gileade, tur rakyate ngadegang dane dados pamrentah miwah pamimpin. Dane Yepta raris nyinahang panagih danene ring wong Gileade punika ring ayun Ida Sang Hyang Widi Wasa ring Mispa.
12
Sasampune punika Dane Yepta raris ngutus anak tangkil ring sang prabu ring Amon, saha kadulurin atur sapuniki: “Napike sane dados selang pakayunan iratune ring titiang? Napi awinannya iratu sampun nglurug panegaran titiange?”13
Sang prabu ring Amon nyaurin utusan Dane Yepta sapuniki: “Rikala bangsa Israele medal saking Mesir, bangsane punika sampun ngambil tanah tiange, ngawit saking Tukad Arnon, kantos rauh ka Tukad Yabok miwah Tukad Yordane. Sane mangkin semeton patut ngwaliang tanah-tanahe punika saking rahayu.”14
Dane Yepta ngwawanin malih ngutus anak tangkil ring sang prabu ring Amon,15 saha kadulurin atur kadi asapuniki: “Nenten pisan wiakti mungguing bangsa Israele ngambil tanah Moab wiadin tanah Amone.
16 Makasujatinipun, sapuniki indiknyane: Rikala bangsa Israele kesah saking Mesir, ipun mamargi nglintang ring tegal melakange ngungsi Teluk Akaba, raris rauh ring Kades.
17 Sasampune punika ipun raris ngutus anak tangkil ring sang prabu ring Edom, buat mapinunas mangda ipun kalugrain nglintang ring panegaran idane. Nanging sang prabu ring Edom nenten nglugrain ipun. Ipun taler mapinunas ring sang prabu ring Moab, nanging ida taler nenten nglugrain ipun nglintang ring panegaran idane. Duaning punika bangsa Israele raris jenek ring Kades.
18 Sasampune punika, ipun raris mamargi nuluh tegal melakange, ngilehin jagat Edom miwah jagat Moabe, kantos ipun rauh ring sisi kangin panegara Moabe, ring sisin Tukad Arnone sane irikaan. Ipun ngwangun pakemahan ipune irika, nanging ipun nenten nglintangin Tukad Arnon punika, santukan tukade punika makadados wates panegara Moabe.
19 Sasampune punika bangsa Israele raris ngutus anak tangkil ring Ida Sang Prabu Sihon, ratun wong Amorine ring Hesbon, tur mapinunas ring ida mangda ipun kalugrain mamargi nglintang ring panegaran idane, buat ngungsi tanahipune.
20 Nanging Ida Sang Prabu Sihon nenten nglugrain bangsa Israele. Ida raris munduhang wadua balan idane, tur ngwangun pakemahan ring Yahas, raris ngebug bangsa Israele.
21 Nanging Ida Sang Hyang Widi Wasa, Widin Israele, maicayang kamenangan ring bangsa Israele marep ring Ida Sang Prabu Sihon miwah wadua balan idane. Irika bangsa Israele raris ngaug tur ngambil sakancan wewidangan wong Amorine sane pecak nongosin panegarane punika.
22 Ipun ngaug sakuub wewidangan wong Amorine, ngawit saking Tukad Arnone sane bedelod, kantos rauh ring Yabok sane baler, miwah saking tegal melakange sane bedangin kantos rauh ring Tukad Yordane bedauh.
23 Dadosipun Ida Sang Hyang Widi Wasa, Widin Israele sane ngulah wong Amorine, pabuat kaulan idane bangsa Israel.
24 Punapike iratu mapakayunan jaga ngindayang malih ngambil tanahe punika? Iratu dados ngamanggehang saluiring paindikan sane sampun kapaicayang ring iratu, antuk Kamos dewan iratune. Nanging titiang jaga ngamanggehang saluiring paindikan sane sampun kapaicayang ring titiang antuk Ida Sang Hyang Widi Wasa, Widin titiange.
25 Punapike iratu mitaenang ragan iratune luihan ring Sang Prabu Balak okan Ida Sipor, ratune ring Moab? Ida nenten pisan naenin nangtangin bangsa Israele. Naeninke ida medal ka payudan nglawan titiang?
26 Tigang atus taun suenipun bangsa Israele sampun ngaug tur ngwengku kota Hesbon miwah Aroer, miwah kota-kota sakiwa tengenipune, pingkalih sakancan kota-kotane sane ring sisin Tukad Arnone. Napi awinannya iratu nenten ngambil kota-kota punika duk masane punika?
27 Dadosipun, titiang nentenja iwang pamantuka ring iratu. Sujatinipun, iratu sampun iwang malantaran iratu ngayudain titiang. Ida Sang Hyang Widi Wasa sane makadados hakim. Ida jaga nepasin bangsa Israele marep ring wong Amone ring rahinane puniki.”
28 Nanging sang prabu ring Amon nenten nglinguang atur Dane Yepta punika.
29
Sasampune punika roh Ida Sang Hyang Widi Wasa raris ngencegin Dane Yepta. Dane raris lunga ka Gilead miwah Manase, raris mawali ka Mispa sane ring Gilead. Wusan punika dane raris lunga ka panegara Amon.30 Dane Yepta raris masesangi ring Ida Sang Hyang Widi Wasa, sapuniki: “Yening Palungguh IRatu mapaica kamenangan ring titiang marep ring wong Amone,
31 titiang jaga morbor makadados aturan anake sane pinih pangawit medal saking umah titiange buat mapagin titiang, rikalan titiange mawali saking rananggana saha molihing rana. Titiang jaga ngaturang jadmane punika makadados aturan ring ayun Palungguh IRatu.”
32
Irika Dane Yepta raris nglantur mamargi buat ngebug wong Amone, tur Ida Sang Hyang Widi Wasa mapaica kamenangan ring dane.33 Dane ngebug ipun saking Aroer, kantos rauh ring saileh wewidangan Minite. Kalih dasa akehipun kotannyane, ngantos rauh ring Abel-Keramim. Irika akeh pisan jadmane kapademang, tur wong Amone kakaonang antuk bangsa Israele.
34
Rikala Dane Yepta mantuk mawali ka Mispa, irika okan danene sane istri medal mendakin dane, sinambi masolah miwah nabuh tetabuhan. Dane madue oka wantah asiki punika kewanten.35 Rikala dane ngaksi okan danene punika, dane raris nyetset panganggen danene sajeroning kasungsutan, sarwi ngandika sapuniki: “Duh cening pianak bapa. Cening ngenyagang keneh bapane. Apa kranane dadi cening ane ngaenang sakit keneh bapane? Bapa suba masesangi teken Ida Sang Hyang Widi Wasa, tur bapa tusing dadi muungang sesangine ento.”
36
Okan danene raris matur ring dane sapuniki: “Yening aji sampun masesangi ring ayun Ida Sang Hyang Widi Wasa, durusang margiang napija sane sampun sesangiang aji ngeniang dewek tiange, santukan Ida Sang Hyang Widi Wasa sampun mapaica kamenangan ring aji marep ring meseh-meseh ajine, wong Amone punika.”37 Nanging dane mapinunas ring ajin danene sapuniki: “Wenten pinunas tiange asiki. Icenja tiang masangke kalih sasih suenipun, mangdane tiang mrasidayang ngajak timpal-timpal tiange luh ka gunung. Irika tiang jaga mangelingin nasib tiang, santukan tiang pacang padem rikalaning kantun bajang.”
38 Dane Yepta nglugrain dane lunga, tur manggayang dane lunga kalih sasih suenipun. Dane sareng sawitran-sawitran danene lunga ka gunung tur matetangisan irika, santukan dane jaga seda sadurung dane marabian miwah maputra.
39 Sasampune kalih sasih, dane raris budal ring ajin danene. Ajin danene raris ngamargiang sakadi sane sampun sesangiang dane ring Ida Sang Hyang Widi Wasa, tur anake anom punika seda kantun bajang genten.
Indike punika makadados kawit adate ring Israele,40 mungguing paradaane nyabran taun patut matilar saking umahnyane petang rahina suenipun, buat mangelingin okan Dane Yepta sane istri saking Gilead punika.
1
Suku Epraime sampun sayaga jaga mayuda. Ipun sareng sami sampun nglintangin Tukad Yordane ngungsi ka Sapon, sarwi mabaos ring Dane Yepta sapuniki: “Napi awinannya semeton sampun nglintang ring perbatesan buat ngebug wong Amone, nanging semeton nenten ngajak tiang sareng sami, buat nyarengin semeton? Sane mangkin tiang pacang nunjel semeton miwah kulawargan semetone.”2
Nanging Dane Yepta masaur ring ipun sareng sami, kadi asapuniki: “Rakyat tiange miwah tiang newek sampun maiegan banget pisan nglawan wong Amone. Tiang sampun ngaturin semeton, nanging semeton nenten kayun rauh ngluputang tiang saking wong Amone punika.3 Rikala panggihin tiang, mungguing semeton nenten ledang rauh, irika tiang raris ngetohang urip tiange, tur tiang nglintang ring wates panegarane, buat ngebug wong Amone punika. Irika Ida Sang Hyang Widi Wasa maicayang kamenangan ring tiang marep ring ipun. Duaning punika, sane mangkin napi awinannya semeton rauh buat ngebug tiang?”
4 Irika Dane Yepta raris munduhang wong Gileade, tumuli ngebug wong Epraime punika, tur wong Epraime kakaonang. (Wong Epraime sampun mabaos sapuniki: “Semeton wong Gilead sane wenten ring pantaran suku Epraim miwah Manase, sujatinne sampun nilas suku Epraim.”)
5 Mangda suku Epraime nenten mrasidayang jerih makelid, wong Gileade raris nyaga genah-genahe nglintang ring sisin Tukad Yordane. Yening wenten anak Epraim sane mamanah malaib, tur nunas mangda kicen nglintang, wong Gileade raris nakenin anake punika sapuniki: “Punapike ragane punika wong Epraim?” Yening ipun maosang: “Boya,”
6 ipun tumuli kakenken ngucapang “Syibolet”. Yening ipun ngucapang “Sibolet”, santukan ipun nenten mrasidayang ngucapang sapatutipun, irika ipun kejuk tur kapademang ring salah tunggal genahe nglintang ring sisin Tukad Yordane. Duk punika wenten petang dasa kalih tali akehipun wong Epraime kapademang.
7
Dane Yepta mimpin wong Israele kantos nem warsa suenipun. Sasampune punika dane raris seda, tur kaperemang ring kota uedan danene ring Gilead.8
Sasampune Dane Yepta, Dane Ebsan saking Betlehem sane mimpin wong Israele.9 Dane madue putra lanang-lanang tigang dasa diri, miwah putri tigang dasa diri. Dane malilayang oka-okan dane sane istri marabian ngajak anak lanang sane boya palingsehan danene, kadi asapunika taler oka-okan danene sane lanang ngambil rabi anak sane boya palingsehan danene. Dane Ebsan mimpin bangsa Israele pitung taun suenipun.
10 Sasampune punika dane raris seda tur kaperemang ring Betlehem.
11
Sasampun Dane Ebsan, Dane Elon saking suku Sebulon sane mimpin bangsa Israele ngantos dasa taun suenipun.12 Sasampune punika dane raris seda tumuli kaperemang ring Ayalon ring wewidangan suku Sebulon.
13
Sasampun Dane Elon, Dane Abdon, okan Dane Hilel sane saking Piraton sane mimpin bangsa Israele.14 Dane madue oka lanang-lanang petang dasa diri miwah putu lanang-lanang tigang dasa diri. Oka miwah putun danene asing-asing pada nglinggihin keledae. Dane Abdon mimpin bangsa Israele kutus taun suenipun.
15 Sasampune punika dane raris seda tur kaperemang ring Piraton ring wewidangan suku Epraime, ring Pagunungan Amaleke.
1
Bangsa Israel malih ngardi dosa pamantuka ring Ida Sang Hyang Widi Wasa. Duaning punika Ida manggayang ipun kereh antuk wong Pilistin petang dasa taun suenipun.2
Duk punika wenten anak lanang mapesengan Manoah saking kota Sora. Dane punika warga suku Dan. Rabin danene bekung, nenten mrasidayang maputra.3 Malaekat Ida Sang Hyang Widi Wasa raris mapakantenang raga ring rabin danene, sarwi ngandika sapuniki: “Kita tusing taen nyidayang ngelah pianak, nanging ane jani kita lakar enggal beling tur ngelah pianak muani.
4 Sawireh keto jaga dewek kitane eda pesan nginum anggur wiadin bir, wiadin naar dedaaran ane leteh.
5 Sasubane pianak kitane lekad, eda pesan getepa bokne, sawireh ngawit uli ia mara lekad, ia lakar katurang di ayun Ida Sang Hyang Widi Wasa makadadi wong nasir. Ia ane lakar ngawitin mebasang bangsa Israele uli kakuasan wong Pilistine.”
6
Sasampune punika anake istri punika raris nguningayang ring suaminnyane kadi asapuniki: “Utusan Ida Sang Hyang Widi Wasa sampun ngrauhin tiang, tur pakantenannyane ngresresin pisan, waluya sakadi malaekat Ida Sang Hyang Widi Wasa. Tiang nenten nunasang ring dane saking dija rauh danene, tur dane nenten ngandikayang parab danene ring tiang.7 Nanging dane sampun ngandikayang ring tiang, mungguing tiang jaga beling, tur jaga madue pianak muani. Dane ngandikayang tiang, mangda tiang nenten nginum anggur wiadin bir, wiadin nunas dedaaran sane leteh, santukan rarene punika patut katurang ring Ida Sang Hyang Widi Wasa makadados wong nasir, saumur idupnyane.”
8
Sasampune punika, Dane Manoah raris ngastawa ring ayun Ida Sang Hyang Widi Wasa sapuniki: “Duh Ratu Sang Hyang Widi Wasa, ledang Palungguh IRatu ngutus utusan IRatune sane sampun utus Palungguh IRatu punika, malih mawali ngrauhin titiang sareng kalih, tur ngandikain titiang indik sane patut laksanayang titiang marep ring sang rare, rikalaning ipun sampun lekad.”9
Ida Sang Hyang Widi Wasa nagingin pinunas Dane Manoah tur malaekat Idane ngrauhin anake istri punika rikalaning dane malinggih ring tegale. Suamin danene, Dane Manoah kabenengan nenten wenten sareng irika.10 Duaning punika digelis dane malaib tur matur ring suamin danene sapuniki: “Beli ngiringja cingakin! Anake sane ngrauhin tiang ipidan punika sane mangkin sampun rauh malih.”
11
Dane Manoah digelis raris nututin rabin danene. Dane nganampekin anake lanang punika sarwi matur sapuniki: “Punapike ragane puniki anak sane sampun mabaos ring somah tiange?” Pasaur anake punika sapuniki: “Saja suba buka keto.”12
Irika Dane Manoah mataken, sapuniki: “Yening pangandikan IRatune punika jaga kasidan punapike sane patut kalaksanayang antuk rarene punika? Kadi asapunapi jaga parisolah miwah urip rarene punika?”13
Sang malaekat raris masaur, sapuniki: “Somah kitane patut teleb nglaksanayang sakancan ane suba orahang manira teken ia.14 Ia tusing dadi nginem anggur, wiadin naar dedaaran ane leteh. Ia patut nglaksanayang sakancan paundukan ane suba orahang manira teken ia.”
15
[15-16] Dane Manoah nenten uning, mungguing anake punika malaekat Ida Sang Hyang Widi Wasa. Duaning punika dane raris matur ring dane sapuniki: “Ledang iratu sampunang dumun kesah saking iriki. Titiang jaga ngratengang panak kambing pabuat iratu.” Nanging sang malaekat ngandika sapuniki: “Yadiastu manira nongos dini, manira tusing masih lakar naar dedaaran kitane ento. Nanging yening kita makeneh nyediayang dedaaran, borborja dedaarane ento makadadi aturan di ayun Ida Sang Hyang Widi Wasa.”16
17
Dane Manoah raris matur sapuniki: “Nikayangja pesengan iratune ring titiang, mangda titiang mrasidayang ngluihang iratu, rikala pangandikan iratune punika kasidan.”18
Sang malaekat raris ngandika, sapuniki: “Ngudiang dadi kita makeneh nawang adan manirane? Adan manirane ento adan ane tawah.”19
Irika Dane Manoah raris ngambil pianak kambing aukud miwah gandum akidik, tumuli kagenahang ring duur batune tur katurang ring ayun Ida Sang Hyang Widi Wasa, sane sampun ngardi paindikan-paindikan sane tawah.20 [20-21] Risedek genine ngendih murub ring pamorboran aturane punika, Dane Manoah miwah rabin danene ngaksi malaekat Ida Sang Hyang Widi Wasa munggah ka langite sajeroning endih genine punika. Malantaran punika Dane Manoah raris uning, mungguing anake punika malaekat Ida Sang Hyang Widi Wasa. Irika Dane Manoah miwah rabin danene gelis sumungkem ngantos prarain danene nganteg tanah. Sang kalih nenten naenin malih ngaksi malaekate punika.
21
22
Dane Manoah raris ngandika ring rabin danene, sapuniki: “Sinah iraga lakar mati, sawireh iraga suba nepukin Ida Sang Hyang Widi Wasa.”23
Nanging rabin danene masaur sapuniki: “Yening Ida Sang Hyang Widi Wasa mapakayun ngamatiang iraga, sinah ida nenten ledang nrima aturan iragane. Samaliha sampun janten Ida nenten jaga nyinahang sakancan paindikane punika wiadin ngandikain iraga paindikan-paindikan sane sampun nikayang Ida punika.”24
Nenten asue anake istri punika raris ngembasang rare lanang, tur kapesengin Simson. Anake alit sayan duur tur kamertanin antuk Ida Sang Hyang Widi Wasa.25 Samaliha roh Ida Sang Hyang Widi Wasa ngawitin nguatang dane, risedek dane wenten ring pakemahan suku Dan sane wenten ring pantaran Sora miwah Estaole.
1
Sedek rahina anu Dane Simson lunga ka Timna, tur irika dane ngaksi anak bajang wong Pilistin adiri.2 Dane tumuli mawali budal, tur mabaos ring aji miwah biang danene, kadi asapuniki: “Ring Timna wenten anak bajang wong Pilistin adiri sane sampun nutdut manah tiange. Rarisang padik anake bajang punika, santukan tiang meled pisan nganten ngajak ipun.”
3
Nanging aji miwah biang danene raris mataken ring dane sapuniki: “Apa kranane cening ngalih kurenan wong Pilistin ane tuara nyungsung Widi ento? Apake cening tusing maan ngalih kurenan sig pantaran palelintihan muah di pantaran bangsan iragane?” Nanging Dane Simson matur ring ajin danene sapuniki: “Wantah ipun kewanten sane tunas tiang mangda aji ledangja ngrereh ipun buat tiang. Tiang demen ring ipun.”4
Aji miwah biang danene nenten uning, mungguing Ida Sang Hyang Widi Wasa sane nuntun Dane Simson buat ngamargiang paindikane punika, santukan Ida Sang Hyang Widi Wasa sedekan ngrereh jalaran buat ngebug wong Pilistine. Duk masane punika wong Israele kaprentah antuk wong Pilistine.5
Duaning punika Dane Simson raris lunga ka Timna kasarengin antuk aji miwah biang danene. Rikala sang tiga mamargi nglintangin abian anggur, dane raris mireng suaran singa bajang angaum-aum.6 Tan pararapan kawisesan saking Ida Sang Hyang Widi Wasa raris ngencegin Dane Simson tur ngawinang dane siteng. Irika dane raris mukang-mukang singane punika antuk tangan danene, sakadi mukang-mukang pianak kambing. Nanging dane nenten nguningayang indike punika ring aji miwah biang danene.
7
Sasampune punika dane raris mamargi tur mabaos ring anake bajang punika duaning dane seneng ring ipun.8 Maletan makudang-kudang rahina Dane Simson malih mawali mrika buat jaga nganten ngajak anake bajang punika. Ring margi dane raris simpang ring genah singane sane sampun pademang dane punika, tur irika dane tengkejut nyingakin nyawan asebun ring tengah bangken singane punika, tur nyawane punika madaging madu.
9 Dane tumuli ngambil madune punika raris kajengang sambilang dane mamargi. Sasampune punika dane raris nganampekin aji miwah biang danene, tur sang kalih taler katurin madu akidik. Sang kalih ngajengang madune punika, nanging Dane Simson nenten nguningayang ring dane mungguing madune punika ambil dane saking bangken singane.
10
Ajin danene tumuli mamadik daane punika, tur Dane Simson raris ngwentenang pesta irika. Indike punika mula dados kabiasaan anake truna-truna irika.11 Rikala wong Pilistine manggihin dane, ipun raris nunden anak truna-truna sareng tigang dasa akehipun buat nyarengin dane.
12 [12-13] Dane Simson tumuli ngandika ring paratrunane punika sapuniki: “Sane mangkin tiang ngaturin semeton cecimpedan asiki. Yening sajeroning pitung rahina sakantun pestane puniki semeton mrasidayang nyemped cecimpedane punika, tiang jaga ngaturin semeton suang-suang kain lenen alembar miwah pangangge sane becik arangsukan. Nanging yen semeton nenten mrasidayang, semeton suang-suang patut ngicen tiang kain miwah pangangge sane kadi asapunika.”
Paratrunane punika pada masaur asapuniki: “Indayang nikayang cecimpedan semetone punika ring tiang sareng sami, mangda piragi tiang.”13
14
Dane Simson tumuli ngandika sapuniki: “Saking jeroning sang ngajengang medal ajeng-ajengan. Saking sang sane siteng medal barang sane manis.” Sasampune lintang tigang rahina ipun sareng sami kantun nenten mrasidayang nyemped cecimpedane punika.15
Ring rahina sane kaping pat ipun raris mabaos ring rabin Dane Simson asapuniki: “Lelunyuhinja kurenan luhe, apanga ia nyak ngorahang apa artin cecimpedane ento. Yen luh tusing nyalanang unduke ento tiang ajak makejang lakar nunjel umah bapan luhe, muah luh masih lakar bareng katunjel ditu. Luh ajak dadua ngundang tiang mai, apake luh makeneh ngalih kuntungan uli sig tiange?”16
Irika rabin Dane Simson raris nganampekin dane sarwi matur maduluran tangis kadi asapuniki: “Beli nenten sujati tresna ring tiang. Beli sujatinne geting ring tiang. Beli ngicen timpal-timpal tiange cecimpedan, tur beli nenten ngandikayang ring tiang artin cecimpedane punika.” Dane Simson raris ngandika sapuniki: “Padingehangja. Yadian meme bapan belineko masih tusing orahin beli. Ngudiang dadi adi orahin beli.”17 Sajeroning pitung rahina, sakantun pestane punika, rabin danene nangis ngasih-asih. Nanging ring rahina sane kaping pitu, Dane Simson raris ngandikain ipun artin cecimpedane punika, santukan pinunasipune kalintang banget pisan. Ipun raris ngrauhang indike punika ring wong Pilistine punika.
18 Duaning punika, ring rahinane sane kaping pitu, sadurung Dane Simson ngranjing ka pamereman, jadmane sane ring kota punika pada matur ring dane sapuniki: “Napike sane manisan ring madu, miwah napike sane sitengan ring singa?”
Dane Simson raris masaur sapuniki: “Yening semeton nenten mrabotang kurenan tiange, semeton nenten jaga uning ring artin cecimpedane punika!”19 Tan dumade kawisesan Ida Sang Hyang Widi Wasa tumuli nedunin dane, tur ngawinang dane siteng. Dane tumuli lunga ka Askelon. Irika dane ngamademang anak tigang dasa diri, tur musbusin panganggennyane. Panganggennyane sane becik-becik tumuli kapaicayang ring anake sane nyidayang nyemped cecimpedane punika. Wusan punika, dane raris mawali mantuk, kadulurin antuk duka pisan ngeniang ring paindikane punika iwau.
20 Matuan danene tumuli nyerahang rabin danene ring sawitran Dane Simson sane pinih raket ring dane sajeroning pestane punika.
1
Sasampune maletan makudang-kudang rahina, rikala masan ngampung gandum, Dane Simson tumuli lunga nelokin rabin danene, sarwi makta pianak kambing asiki. Irika dane mabaos ring matuan danene, sapuniki: “Tiang mamanah katemu ring somah tiange.” Nanging matuan danene punika nenten ngicen dane katemu.2 Matuan danene raris mabaos ring Dane Simson, sapuniki: “Kaden bapa cening suba pedih pesan teken ia, ento awanane ia suba serahang bapa teken sawitran ceninge. Nanging adinne buin sanget jegegan teken ia. Cening dadi nyuang ia, makasilur embokne.”
3
Dane Simson tumuli mabaos sapuniki: “Sane mangkin tiang nentenja iwang malantaran saluiring paindikan sane laksanayang tiang marep ring wong Pilistine.”4 Duaning punika dane raris lunga tur ngejuk asu alasan tigang atus akehipun. Sabilang kekalih asune punika raris sambung dane ikut ipune dados asiki, tur ring sambunganipune punika dagingin dane obor.
5 Sasampune punika obore punika nyitin dane, tur asu ajage punika ulah dane ka pategalane gandum wong Pilistine. Malantaran punika dane nunjel gandum-gandum sane sampun kanyi miwah gandum-gandum sane kantun ring pategalane makasami, makamiwah abian-abian wit saitune.
6 Rikala wong Pilistine mataken sapasira sane nglaksanayang paindikane punika, ipun pada ngorahang, mungguing Dane Simson sane sampun nglaksanayang paindikane punika, santukan matuan danene, anak saking Timna punika, sampun nyerahang rabin Dane Simsone ring sawitran Dane Simson. Duaning punika wong Pilistine tumuli mamargi mrika tur nunjel anake luh punika miwah sakulawargan bapan ipune sami, ngantos padem.
7
Dane Simson raris mabaos ring wong Pilistine punika, sapuniki: “Kadi asapunikake laksanan jerone? Tiang masumpah, mungguing tiang nenten pacang wusan sadurung tiang polih ngwales indike punika ring jerone.”8 Dane tumuli ngamuk ipun sareng sami, tur akeh ring pantaran ipune sane pademang dane. Sasampune punika dane raris lunga, tur malinggih ring guane sane ring bukit batune ring Etam.
9
Irika wong Pilistine raris rauh tur ngwangun pakemahannyane ring wewidangan Yehudane tur ngebug kota Lehi.10 Jadmane sane ring Yehuda tumuli mataken ring ipun sapuniki: “Napi awinannya ragane ngebug tiang?”
Wong Pilistine tumuli masaur sapuniki: “Tiang rauh jagi ngejuk tur negul Simson. Sapunapija laksanannyane marep ring tiang, ipun taler jaga sapunikaang tiang.”11 Duaning punika, wong Yehudane sareng tigang tali raris mamargi ngungsi guane ring bukit batune sane ring Etam, tur mabaos ring Dane Simson, sapuniki: “Napike semeton nenten uning mungguing wong Pilistine punika dados pamrentah iragane? Napike sane sampun kardi semeton pabuat tiang sareng sami?”
Dane Simson raris masaur sapuniki: “Paindikan sane laksanayang tiang marep ring ipun, wantah dados pangwales laksananipune ring tiang.”12
Ipun sareng sami raris mabaos sapuniki: “Tiang rauh mriki buat jaga ngejuk tur negul semeton, mangdane tiang mrasidayang nyerahang semeton ring wong Pilistine.” Dane Simson tumuli mabaos sapuniki: “Majanjija semeton mungguing semeton ngraga nenten jaga ngamademang tiang.”13
Ipun sareng sami raris masaur sapuniki: “Inggih tiang majanji, tiang jaga wantah ngejuk tur negul semeton, wusan punika nyerahang semeton ring wong Pilistine. Tiang nenten jaga nyedayang semeton.” Irika ipun sareng sami raris ngejuk tur negul Dane Simson antuk tali anyar kalih katih, tumuli ngajak dane mawali saking guane punika.14
Rikala dane rauh ring Lehi, wong Pilistine pada malaib-laib maranin tur nyuryakin dane. Tan dumade, kawisesan Ida Sang Hyang Widi Wasa tumuli ngencegin dane tur ngawinang dane siteng. Irika dane nastas taline sane negul pala miwah tangan danene, waluya nastas benang sane sampun puun.15 Sasampune punika dane raris polih tulang panggal keledae sane wau pisan padem. Dane tumuli nguntul tur ngambil tulange punika, raris ngamademang jadma siu diri antuk tulange punika.
16 Sasampune punika Dane Simson raris makidung sapuniki: “Antuk tulang panggal keledae, tiang ngamademang jadma siu diri tur antuk tulang panggal keledae tiang nugdugang bangkennyane.”
17 Sasampune punika tulang panggal keledaene punika raris entungang dane. Punika awinanipun genahe punika raris kawastanin Ramat-Lehi.
18
Sasampune punika Dane Simson raris rumasa kasatan pisan. Duaning punika dane raris nunas ica ring Ida Sang Hyang Widi Wasa, sarwi matur sapuniki: “Duh Ratu Sang Hyang Widi Wasa, Palungguh IRatu maicayang ring titiang kamenangan sane ageng puniki. Sane mangkin punapike titiang jaga padem ulihan nandang bedak tur jaga kejuk antuk wong Pilistine sane tan pawidi punika?”19 Irika Ida Sang Hyang Widi Wasa raris ngwentenang bulakan ring tanahe ring Lehi, tur metu toya saking bulakane punika. Dane Simson raris nginum toya tur dane rumasa kenak ring kayun. Duaning punika toya klebutane punika raris kawastanin Hakor. Toya klebutane punika kantun ring Lehi kantos rauh mangkin.
20
Dane Simson mimpin bangsa Israele kalih dasa taun suenipun, rikala wong Pilistine mrentah jagate punika.1
Sedek rahina anu Dane Simson raris lunga ka kotan wong Pilistine sane mawasta Gasa. Irika dane matemu ring anak istri panayang adiri, tur dane raris merem ngajak ipun.2 Jadmane ring Gasa raris uning, mungguing Dane Simson wenten irika. Punika awinannya ipun raris ngurung genahe punika, tur nyaga dane awengi mepek ring gapuran kotane. Ring wengine punika ipun sareng sami pada sayaga nyantosang, santukan sapuniki manahipune: “Iraga ngantiang ia kanti ngedaslemah, tur sasubane keto iraga lakar ngamatiang ia.”
3 Nanging Dane Simson wantah rauh tengah wengi kewanten ring pamereman. Sasampune punika dane raris matangi. Dane tumuli ngancit gapuran kotane punika, inggih punika jelanan, jejeneng miwah palangnyane makasami raris tegen dane sinambi mamargi ngungsi ka pucak bukite sane marep ka Hebron.
4
Wusan punika, Dane Simson tumuli kasemaran ring anak luh sane mawasta Delila, sane saking Lebak Sorek.5 Irika pararatun wong Pilistine sareng lelima raris ngrauhin anake luh punika, sarwi ngandika ring ipun sapuniki: “Lelunyuhinja I Simson, apanga ia nyak ngorahang teken nyai apa krananne ia siteng pesan, tur kenken caranne ngalahang ia. Suba keto gelahe lakar negul ia, apanga ia tusing nyidayang makiba. Gelahe ajak lelima lakar maang nyai pipis perak pada masiu nanggu satus keteng.”
6
Irika Delila raris mabaos ring Dane Simson sapuniki: “Indayangja nikayang ring tiang, napi sane ngawinang beli dados siteng pisan? Yening wenten anak mamanah negul beli mangda beli nenten mrasidayang makiba, sapunapiangipun jaga negul?”7
Dane Simson raris masaur: “Yening ia negul beli aji tali pamentangan panah ane anyar, ane tonden tuh pitung katih liunne, ditu beli lakar lemet patuh buka anake ane lenan.”8
Duaning punika pararatun wong Pilistine raris maicayang tali pamentangan panah sane durung tuh pitung katih ring Delila, tur ipun raris negul Dane Simson.9 Ipun ngenken makudang-kudang anak nyantosang ring kamar sane lianan, tur ipun raris nyerit sapuniki: “Beli Simson, wong Pilistine pada rauh mriki.” Nanging Dane Simson megatang tali pamentangan panahe punika, waluya sakadi benange pegat katempuh antuk geni. Duaning punika ipun sareng sami kantun nenten uning ring rahasia kakuatan danene.
10
Delila malih matur ring Dane Simson sapuniki: “Nah beli sampun melog-melog tiang, tur beli nenten ngandikayang sane sapatutipun ring tiang. Indayang nikayang ring tiang, sapunapi jaga antuka anake mrasidayang negul beli.”11
Pasaur danene, sapuniki: “Yening ia negul beli aji tali anyar ane tonden taen manggo, ditu beli lakar lemet, patuh buka anake ane lenan.”12
Irika Delila raris ngrereh tali anyar makudang-kudang katih, tumuli negul Dane Simson. Sasampune punika ipun raris nyerit sapuniki: “Beli Simson, wong Pilistine sampun pada rauh.” Wong Pilistine sampun nyantosang ring kamar sane lianan. Nanging Dane Simson megatang taline punika saking tangan danene, waluya sakadi megatang benange.13
Delila raris matur ring Dane Simson, sapuniki: “Beli kantun kewanten melog-melog tiang tur nenten ngandikayang sane amun patutipun ring tiang. Indayang nikayang ring tiang, sapunapi caranipun mangda anake mrasidayang negul beli.” Pasaur danene, sapuniki: “Yening luh nunun ebok beline ane mapusungan pepitu ene sig pandalane, tur tekekang aji lait, ditu beli lakar lemet patuh buka anake ane lenan.”14
Irika Delila raris nylikuin dane mangda dane sirep, tur ipun raris ngambil rambut danene sane mapusungan pepitu punika, raris katunun ring pandalane. Ipun raris nekekang antuk lait sarwi ipun nyerit sapuniki: “Beli Simson wong Pilistine sampun rauh.” Nanging dane raris matangi tur ngedeng rambut danene punika saking pandalane.15
Duaning punika Delila raris matur ring dane, sapuniki: “Beli maosang mungguing beli tresna ring tiang, nanging pakayunan beline nenten wiakti kadi asapunika. Beli sampun ping tiga melog-melog tiang tur beli kantun taler nenten kayun ngandikayang ring tiang, napi sane ngawinang beli kalintang siteng.”16 Nyabran rahina ipun nenten wus-wusan nakenang indike punika ring dane, kantos dane rumasa osek tur meweh ring kayun.
17 Pamuputipun, dane ngandikayang ring ipun sane amun sujatinipun, sapuniki: “Bok beline tusing taen macukur. Uli beli mara lekad beli suba katurang teken Ida Sang Hyang Widi Wasa makadadi wong nasir. Yen bok beline kacukur, kasitengan beline lakar ilang, tur beli lakar lemet patuh buka anake ane lenan.”
18
Rikala Delila uning mungguing dane sampun ngandikayang sane amun sujatinne ring ipun, ipun tumuli matur piuning ring pararatun wong Pilistine, kadi asapuniki: “Rarisang iratu rauh mriki malih apisan. Ipun sampun maosang ring titiang sane amun sujatinipun.” Irika pararatun wong Pilistine raris pada rauh tur makta jinah.19 Delila raris nglelunyuhin Dane Simson mangda dane sirep ring pabinan ipune. Sasampune punika ipun ngaukin anak adiri buat ngetep rambut Dane Simson sane mapusungan pepitu punika. Sasampune punika ipun raris ngawitin nyakitin dane, santukan kasitengan danene sampun ical.
20 Wusan punika, ipun raris nyerit sapuniki: “Beli Simson wong Pilistine sampun pada rauh.” Dane raris matangi tur mapakayun sapuniki: “Idewek lakar luput tur magedi saha bebas, buka ane suba-suba.” Dane nenten uning mungguing Ida Sang Hyang Widi Wasa sampun matilar saking ragan danene.
21 Wong Pilistine tumuli ngejuk dane, tur panyingakan danene raris kaluntik. Ipun sareng sami raris ngajak dane ka Gasa. Irika dane ka tegul antuk ante temaga, tur dane kicen pakaryan nglindes gandum ring pangkeng.
22 Nanging rambut danene raris ngawitin mentik malih.
23
Pararatun wong Pilistine raris pada paum buat jaga ngwentenang piodalan miwah aturan sane ageng ring dewan idane inggih punika Dewa Dagon. Ida miwah kaulan idane pada makidung sapuniki: “Widin iragane suba mapaica kamenangan teken iraga marep teken musuh iragane I Simson.”24 [24-25] Ida sareng sami kalintang ledang ring kayun, saha ngandika sapuniki: “Alih I Simson, tur jalan plegendahang ia!” Rakyate tumuli ngajak Dane Simson medal saking pangkeng, tur dane kapangandikayang ngadeg ring selagan adegane, raris kaplegendahang. Rikala rakyate ngeton dane, ipun pada makidung muji widin ipune sapuniki: “Widin iragane suba mapaica kamenangan teken iraga, marep teken musuh iragane, ane ngusakang gumin iragane, tur liu pesan uli pantaran iragane ane matianga.”
25
26 Dane Simson tumuli ngandika ring anake alit sane nandan dane, sapuniki: “Baangja tiang ngusud adegan balene ene. Tiang makeneh nyleleg di adegane ento.”
27 Balene punika bek pisan madaging jadma lanang istri. Pararatun wong Pilistine makalelima pada wenten irika, tur ring rahab umahe sane dangsah punika, wenten jadma lanang wadon sawatara tigang tali akehipun, buat mabalih miwah mlegendahang Dane Simson.
28
Irika Dane Simson tumuli ngastawa sapuniki: “Duh Ratu Sang Hyang Widi Wasa Sane Maha Wisesa, ledang Palungguh IRatu eling ring titiang. Duh Ratu Sang Hyang Widi Wasa, ledang Palungguh IRatu mapaica kasitengan malih apisan kewanten ring titiang, mangdane malantaran gegebug titiange sane malih apisan puniki, titiang mrasidayang ngwales ring wong Pilistine, duaning matan titiange makakalih sampun luntik ipun.”29 Irika Dane Simson raris mlekuk adegane ring basan tengah umahe punika makakalih. Tangan danene tengen ngambil asiki, sane kiwa ngambil asiki, tumuli dane nyogok adegane punika makakalih,
30 sarwi nyerit kadi asapuniki: “Depang suba idewek mati ajak wong Pilistine.” Dane nyogok adegan punika amun kereng danene, tur umahe punika raris bah nepen pararatun wong Pilistine makalelima miwah sakancan jadmane sane wenten irika. Dane Simson akehan ngamademang jadma rikalaning dane seda, bandingang dawege dane kantun nyeneng.
31
Parasemeton danene miwah kulawargan danene raris pada rauh ngambil layon danene. Layon danene kabakta mawali budal tur kaperemang ring pantaran kota Sora miwah kota Estaole, ring kuburan Dane Manoah, ajin danene. Dane dados pamimpin bangsa Israele kalih dasa taun suenipun.1
Kacrita wenten anak mapesengan Mika, sane magenah ring Pagunungan Epraim.2 Sedek rahina anu dane mabaos ring biang danene sapuniki: “Daweg wenten anak mamaling jinah perak memene sane siu satus bidang, tiang miragi meme nemah malinge punika. Cingakja, tiang sane makta jinahe punika. Tiang sane ngambil jinahe punika.”
Biang danene raris ngandika sapuniki: “Dumadak Ida Sang Hyang Widi Wasa ngamertanin cening.”3 Dane raris ngwaliang jinahe punika ring biang danene. Biang danene raris ngandika sapuniki: “Buat muungang temahe ento, apang eda kanti nibenin pianak memene, melahan meme saking nekeng ati ngaturang perake ento di ayun Ida Sang Hyang Widi Wasa. Perake ento lakar kanggon ngae arca kayu ane makaput baan perak. Wireh keto, ane jani perake ento serahang meme buin teken cening.”
4 Sasampune punika, Dane Mika malih ngwaliang jinah perake punika ring biang danene. Biang danene raris ngambil perake punika satak bidang, tur kaserahang ring pande mase. Pandene punika raris makarya arca malakar taru, kakaput antuk perak. Arcane punika raris kagenahang ring jeroan Dane Mika.
5
Dane Mika madue satunggiling genah mabakti. Dane makarya makudang-kudang arca miwah kawaca epod, tur salah tunggal okan danene kadegang dados pandita.6 Duk masane punika nenten wenten ratu sane madeg ring Israel. Asing-asing anak pada ngamargiang sapakitannyane niri.
7
Daweg masane punika taler wenten anak truna suku Lewi, sane magenah ring kota Betlehem ring Yehuda.8 Dane kesah saking Betlehem buat ngulati genah madunungan ring genahe sane lianan. Rikalaning dane mamargi, dane raris rauh ring jeroan Dane Mika ring pagunungan Epraim.
9 Dane Mika tumuli nakenin dane sapuniki: “Semeton rauh saking dija?”
Pasaur danene, sapuniki: “Tiang wong Lewi saking Betlehem ring Yehuda. Tiang ngulati genah lianan buat jaga madunungan.”10
Dane Mika raris ngandika sapuniki: “Ledang semeton meneng iriki sareng-sareng ring tiang. Ledang semeton dados panasehat miwah panditan tiange. Tiang jaga ngaturin semeton nyabran taun, jinah perak dasa bidang, pangangge makudang-kudang rangsukan, makamiwah pangan lan kinum.”11 Anak truna suku Lewi punika tumuli ledang malinggih irika sareng Dane Mika, tur dane dados pinaka oka pabuat Dane Mika.
12 Dane Mika raris ngadegang anake truna punika dados panditan danene, tur sang pandita jenek ring jeroan Dane Mika.
13 Dane Mika tumuli ngandika sapuniki: “Ane jani idewek ngelah anak Lewi dadi panditan ideweke. Pedas Ida Sang Hyang Widi Wasa lakar asung lugraha teken idewek.”
1
Duk masane punika nenten wenten prabu ring pantaran bangsa Israele. Daweg punika suku Dan ngulati tanah wewidangan buat genahnyane magumana, santukan suku Dan durung polih tanah cecatu ring pantaran suku bangsa Israele.2 Duaning punika suku Dan raris nyelik anak sane sura dira limang diri saking asing-asing kulawarga sajeroning suku Dan, tumuli kutus saking kota Sora miwah Estaol, kapangandikayang nylajah jagate punika. Rikala utusane punika rauh ring Pagunungan Epraime, ipun madunungan ring jeroan Dane Mika.
3 Risedek ipun wenten irika, ipun pada uning ring tabuh bebaosan anak truna Lewine punika, punika awinannya ipun raris ngranjing tur mataken ring dane sapuniki: “Napi pakaryan semetone iriki? Sapasira sane ngajak semeton mriki?”
4
Dane raris masaur sapuniki: “Tiang maderbe prajanjian ring Dane Mika. Dane ngupahin tiang dados panditan danene.”5
Utusane punika raris mabaos ring wong Lewi punika sapuniki: “Indayang tunasang ring Ida Sang Hyang Widi Wasa punapike tiang jaga labda karya sajeroning pamargin tiange puniki.”6
Sang pandita tumuli masaur, sapuniki: “Sampunang semeton sumangsaya. Ida Sang Hyang Widi Wasa ngiangin semeton sajeroning pamargin semetone.”7
Sasampune punika utusane lelima punika raris kesah tur mamargi ngungsi kota Lais. Irika panggihin ipun mungguing rakyate irika pada muponin kerta raharja sakadi wong Sidone. Ipun rakyat sane sutrepti rahayu, tur kerta raharja nenten wenten ieg ring pantarannyane. Ipun pada nenten kirang punapa-punapi. Ipun magenah doh saking wong Sidone, tur nenten pati magubugan ring jagat sane lianan.8 Rikala utusane lelima punika mawali ka Sora miwah Estaol, wong kotane punika pada nakenin ipun, indik sane sampun panggihin ipun.
9 Pasauripune sapuniki: “Mrikija! Ngiring gebug kota Laise. Jagate punika panggihin tiang kalintang becik. Sampunang kliad-kliud, ngiringja gelisang. Ngiring iraga mamargi tur kaonang raris augja jagate punika.
10 Yening semeton sampun rauh irika, semeton jaga manggihin mungguing rakyate irika nentenja sumangsaya ring punapa-punapi. Jagate punika linggah pisan, tur madaging saananing sane kadotang antuk anake, samaliha Ida Sang Hyang Widi Wasa sampun maicayang jagate punika ring semeton.”
11
Duaning punika raris wenten anak sareng tigang atak saking suku Dan kesah saking kota Sora miwah Estaol, sregep jaga mayuda.12 Ipun raris mamargi tur ngwangun pakemahannyane ring Kiryat-Yearim ring Yehuda. Punika awinannya rauh mangkin genahe punika kawastanin Pakemahan Dan.
13 Ipun raris kesah saking irika tur rauh ring jeroan Dane Mika ring Pagunungan Epraim.
14
Irika utusane lelima sane sampun nyelehin kota-kota sakiwa tengen kota Laise punika, raris mabaos ring timpal-timpalnyane sapuniki: “Apake nyama nawang mungguing dini di salah tunggal umahe ene, ada arca kayu ane makaput aji perak? Aketo masih ada arca ane lenan muah baju epod. Yen keto, kenken jani baan madaya!”15 Irika ipun raris mamargi ka jeroan Dane Mika, ring genah wong Lewine madunungan, tur mataken ring dane punapike dane rahajeng?
16 Daweg punika prajurite tigang atak saking suku Dan, sane sregep jaga mayuda sami pada majujuk ring gapurane.
17 Mata-matane sareng lelima punika ngraris ngranjing ka jeroan, tumuli ngambil arca tarune sane makaput antuk perak, arca-arcane sane lianan, miwah kawaca epode rikala sang pandita wenten ring gapurane sareng ring prajurite tigang atak punika.
18
Rikala utusane punika ngranjing ka jeroan Dane Mika, tur ngambil barang-barange sane suci punika, sang pandita tumuli mataken ring dane sapuniki: “Napike sane laksanayang semeton punika?”19
Pasaur parautusane punika sapuniki: “Menengja semeton, sampunangja ngucap angan abuku. Mrikija sarengin tiang, tur dados panasehat miwah panditan tiange. Punapike nenten becikan semeton dados pandita pabuat satunggiling suku bangsa Israele, bandingang ring dados pandita pabuat anak akuren kewanten?”20 Indike punika ngawinang sang pandita liang pisan. Punika awinan dane raris ngambil barange sane suci punika raris lunga nyarengin anake akeh punika.
21
Wong Dane punika raris nglanturang pamargi kasarengin antuk pianak-pianak, ingon-ingon miwah sakancan paderbeannyane.22 Ipun sampun mamargi doh saking jeroan Dane Mika. Dane Mika raris ngaukin pisaga-pisagan danene buat jaga mayuda. Dane ngepung jadmane sane saking Dan punika,
23 sinambi jerit-jerit ngaukin ipun. Jadma suku Dane punika raris matolihan tur mataken ring Dane Mika, sapuniki: “Napi minab wenten? Napi awinan ragane rauh sareng akeh pisan?”
24
Dane Mika raris masaur sapuniki: “Sampunang semeton mapi-mapi tan uning! Semeton ngambil panditan tiange miwah dewa-dewa sane kardi tiang, tur ngraris makaon. Sane mangkin tiang nenten maderbe punapa-punapi malih.”25
Jadma suku Dane punika raris mabaos sapuniki: “Becikan semeton sampunang maosang punapa-punapi mangda sampunang jadmane sareng akeh punika ngantos pedih tur ngebug semeton, sane ngawinang semeton miwah kulawargan semetone sami pacang seda.”26 Sasampune punika ipun raris nglantur mamargi. Dane Mika ngaksi mungguing anake akeh punika kalintang kuat bandingan ring dane. Duaning punika dane raris mawali mantuk.
27
[27-28] Sasampun jadmane sane saking suku Dan punika ngambil pandita miwah barang-barang sane kakardi antuk Dane Mika, ipun raris mamargi tur ngebug kota Laise, kota sane rakyatnyane sutrepti rahayu, tur tentrem. (Kotane punika magenah ring lebake asiki sareng-sareng ring kota Bet-Rehob.) Sadaging kotane kapademang tur kotane katunjel. Tan wenten anak sane nulungin kota punika, santukan kota Lais punika doh saking Sidon, tur jadmane irika nenten pati magubugan ring rakyate sane lianan. Jadmane sane saking suku Dan punika raris malih ngwangun kotane punika, tumuli magumana irika.28
29 Wastan kotane punika raris kagentosin dados: Dan, satinut ring pesengan leluurnyane: Dane Dan, okan Dane Yakub.
30 Jadma suku Dan punika raris ngadegang arcane punika, buat jaga kasungsung tur Dane Yonatan okan Dane Gersom, putun Dane Musa, madeg dados pandita buat suku Dan punika. Sapanglanturipun katurunan danene madeg pandita buat suku Dan, kantos rauh masan rakyate irika sami katawan tur kaselong.
31 Arcan Dane Mika punika kantun tetep wenten irika, daweg Kemah Linggih Ida Sang Hyang Widi Wasa kantun wenten ring Silo.
1
Duk masane punika, sadurung bangsa Israele maderbe sang prabu, wenten wong Lewi adiri magenah ring desa ring pagunungan Epraim. Dane ngambil anak daa adiri saking Betlehem ring Yehuda, anggen dane selir.2 Nanging anake luh punika raris pedih ring dane, tumuli ipun mawali ka umah bapanipune ring Betlehem tur irika ipun jenek ngantos petang sasih suenipun.
3 Wong Lewine punika raris mapikayun jagi ngetut ipun, tur jaga ngindayang nglemesin ipun, mangda ipun nyak malih mawali ring dane. Dane raris ngajak parekan danene miwah keledae kekalih. Anake luh punika raris nuntun wong Lewine punika ngranjing mulihan, tur rikala bapanipune manggihin dane, ipun tumuli nyapa dane saha rahayu.
4 Bapannyane ngidih banget pisan, mangda dane ledang makolem irika, duaning punika dane raris makolem irika tigang rahina suenipun. Sang kalih tumuli ngajengang miwah marerepan irika.
5 Ring rahina sane kaping pat, pasemengan dane matangi tur sampun tragia jaga mamargi. Nanging bapan anake luh punika mabaos ring wong Lewine punika sapuniki: “Lautang cening madaar malu abedik, apanga seger bayun ceninge. Suud keto mara cening dadi majalan.”
6
Irika wong Lewi miwah matuannyane tumuli sareng-sareng majengan miwah nginum. Wusan punika bapan anake luh punika tumuli mabaos ring dane sapuniki: “Nginepja cening buin apeteng tur lipurangja keneh ceninge.”7
Wong Lewine punika raris matangi jaga mamargi, nanging matuannyane mamaksa dane mangda sampunang dumun mamargi. Punika awinan dane makolem malih awengi irika.8 Ring rahina sane kaping lima, pasemengan pisan dane ngawit jaga mamargi nanging matuan danene raris mabaos sapuniki: “Madaarja malu cening abedik. Antiangja apanga kanti lingsir.” Irika sang kalih tumuli majengan sinarengan.
9
Rikala wong Lewi, selirnyane miwah parekannyane malih ngawitin jaga mamargi, matuannyane raris mabaos sapuniki: “Tingalinja jani suba makire peteng, melahan cening nginep buin apeteng. Buin akejep suba lakar peteng. Nongosja cening dini, tur melahangja keneh ceninge. Buin mani cening dadi bangun pasemengan pesan buat nglanturang pajalan ceninge mulih.”10
[10-11] Nanging wong Lewine punika nenten kayun malih ngrerep irika, duaning punika dane miwah selir danene raris mamargi, kairing antuk parekan danene miwah keledaen danene makakalih sane madaging kedapa. Rikala dane rauh nampek ring Yebus (inggih punika Yerusalem) rahinane sampun makire wengi. Irika iparekan matur ring pamekelnyane sapuniki: “Becikan iraga mararian tur makolem iriki ring kotan wong Yebuse puniki.”11
12
[12-13] Nanging pamekelnyane ngandika sapuniki: “Iraga tusingja lakar mareren di kota ane katongosin baan anak ane tidong wong Israel. Iraga lakar nglanturang majalan buin abedik, laut nginep di Gibea wiadin di Rama.”13
14 Duaning punika dane raris nglintangin kota Yebuse tur nglanturang pamargin danene. Rikala dane rauh ring Gibea, ring wewidangan suku Benyamine, suryane sampun surup.
15 Dane tumuli simpang ring kotane punika buat jaga marerepan irika. Dane ngranjing ka kotane punika tur malinggih ring alun-alun kotane, nanging tan wenten anak nyimpangang dane buat ngaturin ngrerep.
16
Risedek dane wenten irika, raris wenten anak odah rauh saking pakaryannyane ring pategalannyane. Anake odah punika kawitipun saking pagunungan Epraim, nanging sane mangkin ipun jenek mumah ring Gibea. (Jadmane sane lianan irika sami saking suku Benyamin.)17 Anak odah punika manggihin wong Lewine punika ring tanah lapang kotane, raris ipun mataken ring dane sapuniki: “Ragane rauh saking dija, tur jagi lunga kija?”
18
Wong Lewine punika raris masaur sapuniki: “Tiang pecak luas ka Betlehem ring Yehuda, tur sane mangkin tiang sedek mamargi budal ka Pagunungan Epraim. Tan wenten anak sane nyimpangang tiang buat ngajakin nginep.19 Yadiastun tiang makta sumi miwah tetedan buat keledaen tiange, kadi asapunika taler pangan kinum pacang daar tiang ngajak kurenan miwah parekan tiange. Tiang sampun makta sakancan kaperluan tiange.”
20
Anake odah punika raris mabaos sapuniki: “Rarisangja simpang ka umah tiange. Tiang jaga nulungin ragane. Sampunangja ragane makolem ring tanah lapang kotane.”21 Irika anake odah punika raris ngajak dane sareng selir miwah parekan danene ka umahipune, tur keledaen danene kawehin neda. Sasampun punika tamiunnyane punika raris masehin cokornyane, tumuli majengan.
22
Risedek dane pada maliang-liang, tan dumade raris wenten makudang-kudang jadma dursila rauh saking kota. Ipun ngiter umah anake odah punika, tur nogdog jelanannyane. Anake punika mabaos ring anake odah punika sapuniki: “Pesuangja anake muani ane nginep sig bapane! Tiang makeneh nyelekang ia!”23
Nanging anake odah punika raris medal tur mabaos ring ipun sapuniki: “Edaja keto cening. Edaja cening nyalanang laksana ane dursila. Anake ene tamiun bapane.24 Tingalinja! Ene selirnyane muah pianak bapane luh ane enu bajang genten. Ia makadadua jani lakar pesuang bapa, tur cening dadi ngajak ia makadadua. Lautangja jalanang sapakitan ceninge marep teken ia makadadua. Nanging eda pesan cening nyalanang paundukan ane tan patut marep teken anake ene.”
25 Nanging anake punika nenten nyak madingehang munyin anake odah punika. Duaning punika wong Lewine punika raris ngajak selirnyane medal tur kaserahang ring anake punika. Anake punika raris mlegandang miwah mlegendahang ipun awengi mepek, tur tan mararian ngantos rauh pasemengan.
26
Rikala galang kangin, anake luh punika rauh tur bah ring arepan jelanan anake odah, genah kurenannyane madunungan. Ipun kantun irika ngantos tatas rahina.27 Pasemengan kurenannyane matangi, tur irika dane ngampakang jelanan jaga nglanturang pamargin danene. Cingak dane selir danene nylempang ring arepan umahe, tur limannyane magisian ring jelanane.
28 Dane raris ngandika sapuniki: “Bangunja! Jalan jani majalan!” Nanging nenten wenten pasaur angan abuku. Irika dane raris ngangkat ipun tur kagenahang ngandang ring tundun keledaene, tumuli nglanturang pamargin danene budal.
29 Sasampune dane rauh ring jeroan danene, dane raris ngranjing ngajeroang tur ngambil lemat. Sawan selir danene raris ambil dane tumuli kapukang-pukang dados roras pukang, raris katurang pada mapukang ring asing-asing suku-suku Israel makaroras.
30 Asing-asing anak sane manggihin indike punika, sami pada mabaos sapuniki: “Iraga tusing taen ningeh paundukan ane buka kene. Ngawit uli bangsa Israele rarud uli di Mesir tusing taen ada paundukan ane buka kene! Iraga patut ngitungang paundukane ene! Kenkenja lakar panadinne.”
1
Sawatek bangsa Israele, ngawit saking Dan sane baler, rauh ka Berseba sane bedelod, kadi asapunika taler tanah Gilead sane bedangin, makasami nampi arah-arahan punika. Ipun sareng sami mapunduh dados asiki ring ayun Ida Sang Hyang Widi Wasa ring Mispa.2 Parapamimpin sakancan suku-suku Israele sami pada rauh ring pepunduhan kaulan Ida Sang Hyang Widi Wasa punika, tur irika wenten prajurit sane lumampah 400.000 akehipun.
3 Duk punika wong Benyamine miragi mungguing suku-suku Israel sane lianan makasami sampun mapunduh ring Mispa.
Wong Israele raris pada mataken sapuniki: “Tuturangja ring tiang sareng sami, sapunapi indik kajaatane punika kalaksanayang?”4 Wong Lewi sane selirnyane kapademang punika raris masaur sapuniki: “Selir tiange miwah tiang mrika ka Gibea ring wewidangan Benyamine, buat jaga nginep irika.
5 Anake irika raris rauh jaga ngebug tiang tur ngurung umah genah tiange madunungan rikalaning wengi. Ipun mamanah ngamademang tiang, nanging makasilurnyane, ipun mlegandang selir tiange, kantos selir tiange punika padem.
6 Sawanipune ambil tiang, raris pukang-pukang tiang, tur aturang tiang pukang-pukangannyane ring suang-suang suku bangsa Israele makaroras. Jadmane ring Gibea punika sampun nglaksanayang paindikan sane dura cara miwah dursila ring pantaran iragane.
7 Semeton sareng sami puniki bangsa Israel. Punapike sane patut margiang iraga ngeniang ring paindikane punika?”
8
Rakyate punika makasami raris bangun sinarengan tur mabaos sapuniki: “Iraga sareng sami puniki yadian sane magenah ring kemahe wiadin sane magenah ring umahe nenten wenten sane jaga budal.9 Kadi asapuniki sane jaga margiang iraga. Iraga jaga mulang undi tur milih makudang-kudang anak buat magagebug ka Gibea.
10 Apahdasan saking jadmane ring Israel, jaga nyediang pangan kinum buat wadua balane, miwah sane lianan jaga mamargi tur ngukum wong Gibeane malantaran paindikan sane dursila sane sampun laksanayang ipun ring pantaran wong Israele.”
11 Irika sawatek jadmane ring Israel sami mapunduh saha nunggal pangapti inggih punika jaga ngebug kotane punika.
12
Suku-suku Israele raris ngutus anak ngrauhin wewidangan suku Benyamine makasami, saha kadulurin antuk piteket kadi asapuniki: “Ambate jaat laksanan semetone punika!13 Sane mangkin serahangja sawatek jadmane sane jaat ring Gibea, mangdane pademang tiang, tur malantaran punika iraga ngusap kajaatane punika saking Israel.” Nanging suku Benyamine nenten nglinguang piteket suku-suku Israele sane lianan punika.
14 Saking sakancan kota Benyamine ipun sami pada rauh ring Gibea buat jaga mayuda nglawan suku-suku Israel sane lianan.
15 [15-16] Ring rahinane punika ipun munduhang prajurit 26.000 akehipun saking kota-kotanipune. Sajaba punika, jadmane ring Gibea munduhang jadma pepilihan sane kidal pitung atus akehipun. Asing-asing jadmane punika cepeng pisan mlangsut antuk batu, tur nenten naenin mimpas, yadianja amun boke akatih.
16
17 Suku-suku Israel sane lianan munduhang prajurit sane sampun nyaya 400.000 akehipun.
18
Bangsa Israele raris mamargi ka genah pangubaktine ring Betel, tur irika ipun nunasang ring Ida Sang Hyang Widi Wasa, sapuniki: “Saking pantaran suku bangsan titiange, suku sane encenke sane patut pinih riin ngebug wong Benyamine?” Pasaur Ida Sang Hyang Widi Wasa: “Suku Yehuda.”19
Duaning punika, benjangne pasemengan bangsa Israele raris medal tur ngwangun kemah nampek ring kota Gibea.20 Ipun mamargi jaga ngebug wadua balan wong Benyamine, tur raris ngenahang prajurit-prajurite punika ring genah sane marep-arepan ring kota punika.
21 Wadua balan wong Benyamine raris medal saking kota, tur sadurung surup suryane ipun sampun ngamademang prajurit-prajurit Israele 22.000 akehipun.
22 [22-23] Sasampune punika wong Israele tumuli ngungsi genah pangubaktine, tur irika ipun masesambatan ring ayun Ida Sang Hyang Widi Wasa ngantos wengi. Ipun pada nunasang ring Ida, sapuniki: “Punapike titiang patut malih medal ka payudan nglawan nyaman titiange wong Benyamin punika?”
Pangandikan Ida Sang Hyang Widi Wasa sapuniki: “Kemaja buin masiat.” Duaning punika wadua balan Israele malih wetu kawanenannyane, tur ipun malih ngenahang prajurit-prajuritnyane ring genahe sane dibi.23
24 Ring rahina sane kaping kalihipun, prajurit-prajurit Israele medal nempuh wadua balan wong Benyamine.
25 Tur ring rahinane punika wong Benyamin medal saking kota Gibea tur duk punika ipun ngamademang prajurit-prajurit Israele sane sampun nyaya 18.000 akehipun.
26 Sasampune punika, bangsa Israele makasami raris munggah ka Betel tur masesambatan irika. Ipun negak ring ayun Ida Sang Hyang Widi Wasa tur mapuasa ngantos ka wengi. Ipun pada ngaturang aturan karahayuannyane miwah aturan maborbor ring ayun Ida Sang Hyang Widi Wasa.
27 [27-28] Daweg punika Peti Prajanjian Ida Sang Hyang Widi Wasa wenten ring Betel, tur Dane Pinehas okan Dane Eleasar, putun Dane Harun, madeg dados pandita sane ngancangin irika. Rakyate raris nunasang ring Ida Sang Hyang Widi Wasa sapuniki: “Punapike patut titiang malih medal ka payudan nglawan nyaman titiange wong Benyamin, punapike titiang patut wusan?” Ida Sang Hyang Widi Wasa ngandika, sapuniki: “Siatinja ia. Buin mani Ulun lakar mapica kamenangan teken kita.”
28
29
Duaning punika wong Israele raris ngenahang makudang-kudang prajurit mengkeb ring saileh kota Gibeane.30 Sasampune punika ring rahina sane kaping tiga, ipun raris maju nglawan wadua balan wong Benyamine, tur prajurit-prajuritnyane kagenahang marep ka kota Gibea sakadi sane sampun-sampun.
31 Wong Benyamine raris medal ka payudan kantos doh saking kota. Sakadi sane sampun-sampun ipun ngawitin ngamademang makudang-kudang wong Israel ring genahe sane jimbar, ring margine sane ngungsi ka Betel miwah sane ngungsi ka Gibea. Ipun ngamademang wong Israele sawatara wenten tigang dasa akehipun.
32 Wong Benyamine pada mabaos sapuniki: “Iraga suba ngalahang ia buka ane suba-suba.”
Nanging wong Israele sampun ngrencanayang jaga makirig ngawinang wong Benyamine punika medal doh saking kota, ka margi-margine sane ageng.33 Duaning punika, rikala pasukan induk wong Israele mundur tur mapunduh ring Baal-Tamar, prajurite sane mengkeb ring saileh kota Gibeane raris medal saking genah pengkebannyane ring bukit-bukit kaange ring kiwa tengen kotane punika.
34 Wenten dasa tali akehipun, prajurit pepilihan saking pantaran sakancan suku-suku Israele, ngebug kota Gibea punika tur yudane rames pisan. Wong Benyamine nenten uning mungguing ipun pacang kasirnayang.
35 Ida Sang Hyang Widi Wasa mapaica kamenangan ring bangsa Israele nglawan wadua balan wong Benyamine. Ring rahinane punika bangsa Israele ngamademang meseh 25.100 akehipun,
36 tur wong Benyamine raris uning mungguing ipun sampun kakaonang.
Induk pasukan wadua balan Israele sampun mundur saking ajeng wong Benyamine, santukan ipun cager ring prajurit-prajurite sane mengkeb ring kiwa tengen kota Gibeane.37 Prajurit-prajurite punika digelis malaib ngungsi kota Gibea. Ipun pada sumebar ring kota, tur ngamademang sakancan jadmane sane wenten irika.
38 Induk pasukan wadua balan Israele miwah prajurit-prajurite sane mengkeb punika sampun ngwentenang pasubaya, jaga ngardi tanda sapuniki: “Yening wenten kanten andus malepuk saking kota,
39 bangsa Israel sane mundur saking payudan patut mabalik.” Daweg punika wong Benyamine sampun ngamademang wong Israel tigang dasa akehipun. Ipun pada mabaos sapuniki: “Iraga suba ngalahang ia buka ane suba-suba.”
40 Irika raris kanten tandane punika, inggih punika wenten andus malepuk medal saking kota. Wong Benyamine pada matolihan ka ungkur, tur sami pada manggihin kotane kalikub antuk endih murub.
41 Irika wong Israel sami mabalik, tur wong Benyamine raris sami pada bingung, santukan ipun uning mungguing tan urungan ipun pacang kaon.
42 Ipun sami pada mundur saking arepan bangsa Israele, raris jerih kapilayu ka tegale, nanging ipun nenten mrasidayang ngluputang dewekipune. Ipun makurung ring pantaran induk pasukan miwah prajurit-prajurite sane medal saking kota, tur ipun sami raris kasirnayang.
43 Bangsa Israele sampun meletin meseh-mesehnyane tur tan rarianan ipun ngepung tur ngamademang meseh ngantos rauh ring genahe dangin kota Gibeane.
44 Wenten 18.000 akehipun prajurit-prajurit wong Benyamine sane pinih becika kapademang.
45 Sisannyane sami jerih tur malaib ngungsi ka tegale ring bukit batu Rimone. Wenten 5.000 akehipun kapademang sapanjang margine irika. Wong Israele nglanturang ngepung sisannyane ngantos rauh ring Gideom, tur ngamademang kalih tali akehipun.
46 Ring rahinane punika makasami wenten 25.000 akehipun wong Benyamine sane kapademang tur makasami prajurit-prajurit sane sura dira.
47
Nanging wenten tigang atak akehipun sane mrasidayang malaib ngluputang deweknyane ring tegale ring bukit batu Rimone, tur ipun pada jenek irika petang sasih suenipun.48 Bangsa Israel raris mawali ngebug sisan wong Benyamin tur ngamademang jadmane makasami lanang wadon agung alit, rauh ka ingon-ingonipune. Ipun taler nunjel sakancan kota sane wenten ring wewidangane punika.
1
Rikala bangsa Israele sampun mapunduh ring Mispa, ipun sampun masumpah ring ayun Ida Sang Hyang Widi Wasa, sapuniki: “Ring pantaran titiange sareng sami, tan wenten sane jaga ngwehin pianaknyane luh buat jaga kanggen somah antuk wong Benyamine.”2 Duaning asapunika, sane mangkin bangsa Israele raris mamargi ka Betel, tur irika ipun pada negak ring ayun Ida Sang Hyang Widi Wasa ngantos rauh ka wengi. Ipun ngeling masesambatan banget pisan, kadi asapuniki:
3 “Ratu Sang Hyang Widi Wasa, Widin Israele, punapi awinannya kantos wenten paindikan kadi asapuniki? Punapi awinannya suku Benyamine tambis-tambis sirna saking pantaran bangsa Israele?”
4
Benjangne pasemengan pisan rakyate raris ngwangun pamorboran aturan irika tumuli ngaturang aturan maborbor miwah aturan karahayuan.5 Ipun sareng sami raris pada mataken asapuniki: “Punapike wenten saking pantaran bangsa Israele sane nenten sareng mapunduh ring ayun Ida Sang Hyang Widi Wasa ring Mispa?” (Ipun sareng sami sampun masumpah, mungguing sapasiraja sane nenten sareng ka Mispa, anake punika patut kapademang.)
6 Bangsa Israele raris rumasa kangen ring nyamanipune suku Benyamin tumuli ipun raris mabaos sapuniki: “Ring rahina puniki bangsa Israele sampun kicalan suku bangsannyane asiki.
7 Sapunapi mangkin antuk nabdab buat nyediang somah pabuat wong Benyamine sane kantun urip. Iraga sampun masumpah ring ayun Ida Sang Hyang Widi Wasa, mungguing iraga nenten jaga ngwehin pianak-pianak iragane sane luh-luh, buat jaga anggen ipun somah.”
8
Rikala ipun pada nakenang, punapike wenten saking suku-suku Israele sane nenten sareng-sareng mapunduh ring Mispa, irika raris kapanggih mungguing nenten wenten angan adiri anak saking Yabes sane ring Gilead, sane sareng-sareng mapunduh irika.9 Rikala wadua balane kasambat wastanipune suang-suang, nenten wenten angan adiriko anak saking Yabes sane masaur.
10 Duaning punika parumane punika raris ngutus prajurit-prajurit sane sura dira roras tali akehipun, saha kapetegenin kadi asapuniki: “Mamargija semeton, tur pademangja sawatek jadmane ring Yabes lanang-istri agung alit.
11 Pademangja sawatek sane muani miwah jadmane sane luh-luh sane nenten kantun bajang genten.”
12 Ring pantaran jadmane sane ring Yabes, keniang ipun wenten anak bajang samas diri akehipun. Irika anake bajang-bajang punika raris kabakta ka pakemahane ring Silo, sane wenten ring tanah Kanaan.
13
Sasampune punika parumane punika raris ngutus anak buat ngrauhin wong Benyamine sane wenten ring Gunung Batu Rimone, tur maosang indik muputang yudane punika.14 Wong Benyamine raris pada mawali budal, tur suku-suku Israele sane lianan raris ngwehin ipun anake bajang-bajang sane nenten kapademang saking Yabes punika. Nanging anake bajang-bajang punika nenten jangkep pabuat ipun sareng sami.
15
Rakyate sami raris marasa kangen ring wong Benyamine, santukan Ida Sang Hyang Widi Wasa sampun ngawinang patunggilan suku-suku Israele sagsag.16 Duaning punika pamimpin-pamimpin parumane punika tumuli mabaos sapuniki: “Ring pantaran suku-suku Benyamine nenten wenten malih anak luh. Napike sane patut laksanayang iraga buat nyediang somah pabuat jadmane sane kantun punika?
17 Bangsa Israele nenten patut ngutang salah tunggil saking suku bangsane sane roras punika. Iraga patut ngrereh margi buat suku Benyamine mangda ipun kantun nutugang katurunannyane.
18 Nanging iraga nenten ngwehin ipun nyuang pianak iragane sane luh-luh santukan iraga sampun nibakang temah ring asing-asing anak saking pantaran iragane sane malilayang pianak-pianakipune luh kajuang antuk wong Benyamine.”
19
Sasampune punika ipun raris mabaos kadi asapuniki: “Rerainan sane anggen iraga ngluihang Ida Sang Hyang Widi Wasa nyabran taun ring Silo, sane mangkin sampun nampek.” (Silo punika magenah ring baler kota Betele, delod kota Lebonane, dangin margine sane saking Betel ngungsi ka Sikem.)20 Ipun raris mabaos ring wong Benyamine, sapuniki: “Rarisangja semeton mrika ka Silo, tur mengkebja ring abian-abian anggure
21 tur jantosangja irika. Rikala bajang-bajange saking Silo pada medal masolah ring rerainane punika, rarisang semeton medal saking abian anggure punika. Asing-asing semeton dados mamaksa ngambil rabi saking pantaran bajang-bajange punika, raris ajak ipun mawali ka wewidangan wong Benyamine.
22 Yen wenten bapa wiadin nyamannyane sane ngrauhin tur mlungguh semeton, semeton patut masaur sapuniki: ‘Palilayangja ipun ring tiang, santukan tiang ngambil ipun saking semeton buat jagi anggen tiang somah, nenten malantaran mayuda. Samaliha santukan semeton sampun nenten maicayang ipun ring tiang, dadosipun semeton nenten lompang ring janjin semetone.’ ”
23
Wong Benyamine raris nglaksanayang paindikane punika. Ipun suang-suang raris milih somah saking pantaran bajang-bajange sane masolah ring Silo, raris mawali budal ka wewidanganipune, tur malih ngwangun kota-kotanipune, tumuli ipun jenek irika.24 Duk punika wong Israele sane lianan raris pada kesah saking irika, tur pada mawali ring suku bangsa miwah kulawarga miwah paderbennyane suang-suang.
25
Duk masane punika nenten wenten prabu madeg ring pantaran bangsa Israele. Asing-asing anake pada malaksana manut pakitannyane suang-suang.