1
Sasampune Dane Musa, parekan Ida Sang Hyang Widi Wasa seda, Ida Sang Hyang Widi Wasa raris ngandika ring Dane Yosua, wakil Dane Musa, okan Dane Nun.2 Sapuniki sabdan Idane: “Parekan Ulune Musa suba mati. Ane jani kinkinangja iban kitane muah rakyat Israele makejang, tur liwatinja Tukad Yordane tur augja gumine ane paicayang Ulun teken bangsa Israele.
3 Ulun suba maicayang teken kita muah teken kaulan Ulune makejang, sakancan gumine ane lakar aug kita, buka ane suba janjiang Ulun teken Musa.
4 Wates gumin kitane, nah ento kelodne nganteg ka tegal melakange, muah kajanne nganteg ka Gunung Libanone, kanginne nganteg ka tukade ane linggah, nah ento Tukad Eprat, muah kauhne nguub gumin wong Hete kanti neked ka Segara Tengah.
5 Ih Yosua, saumur idup kitane tusing ada anak nyidayang ngalahang kita, sawireh Ulun lakar ngiangin kita patuh buka Ulun suba ngiangin Musa. Ulun lakar setata ngiangin kita tur tusing taen lakar ninggal kita.
6 Pracaya tur prawiraja, muah entegangja keneh kitane sawireh kita lakar dadi pamimpin bangsane ene, dikalane ia nongosin gumine ene, ane suba janjiang Ulun teken paraleluurnyane.
7 Melahang entegang muah gedenangja kenehe. Buina ingetang pesan ninutin sakancan pidabdab ane suba uduhanga teken kita baan Musa parekan Ulune. Eda pesan kita lempas angan abedik uli pidabdabe ento, tur apanga saparilampah kitane kita molihing gae.
8 Ingetang pesan apanga cakepan Pidabdabe ento kapaca di kalaning kita ngadakang pangubakti. Plajahin cakepane ento peteng lemah, tur ingetang pesan apanga kita satinut teken sakancan ane sinurat di cakepane ento. Yen suba keto, kita lakar sida karya muah gemuh landuh.
9 Ingetangja mungguing Ulun suba nitahang kita, apang kita sasajaan pracaya tur prawira. Eda pesan kita jejeh wiadin nguon ati, sawireh Ulun Sang Hyang Widi Wasa, Widin kitane ngiangin kita saparilampah kitane.”
10
Dane Yosua raris mrentahang parapamimpin bangsa Israele,11 mangda ngrauhin kemah-kemahe makasami, sarwi mapangarah ring rakyate, sapuniki: “Sediaangja ragane bekel sawireh malih tigang rahina semeton patut nglintangin Tukad Yordane, buat ngaug jagate sane kapaicayang ring semeton antuk Ida Sang Hyang Widi Wasa, Widin semetone.”
12
Dane Yosua raris ngandika ring suku Ruben miwah suku Gad, miwah ring abagian suku Manasene, sapuniki:13 “Elingangja pangandikan Dane Musa parekan Ida Sang Hyang Widi Wasa ring semeton, mungguing Ida Sang Hyang Widi Wasa, Widin semetone sampun maicayang tanahe sane dangin Tukad Yordane ring semeton makadados gumin semetone.
14 Pararabi, oka miwah ingon-ingon semetone, banggayang kantun jenek iriki, nanging paraprajurite mangda sregep jaga mayuda, tur sareng nglintangin tukade puniki, tur mamargi ring ajeng parasemetonnyane bangsa Israel buat mapitulung ring parasemetonnyane punika,
15 kantos parasemetonnyane punika prasida ngaug jagat sane dauh Tukad Yordane punika, sane sampun kapaicayang ring ipun antuk Ida Sang Hyang Widi Wasa, Widin semetone. Sasampun Ida mapaica kerta raharja ring sakancan suku-suku Israele, kala irika semeton dados mawali ka gumin semetone ngraga, ring dangin Tukad Yordane, sane sampun kapicayang ring semeton, antuk Dane Musa, parekan Ida Sang Hyang Widi Wasa.”
16
Irika suku Ruben, Gad miwah abagian saking suku Manasene raris matur ring Dane Yosua, sapuniki: “Tiang sareng sami jaga nglaksanayang sakancan sane nikayang semeton ring tiang, samaliha tiang sareng sami jaga mamargi, kija tiang uduhang semeton.17 Tiang sareng sami jaga satinut ring semeton, pateh sakadi tiang setata satinut ring Dane Musa. Dumadakja Ida Sang Hyang Widi Wasa, Widin semetone nyarengin semeton, sakadi Ida sampun nyarengin Dane Musa.
18 Sapasiraja sane tungkas ring pangandikan semetone, ipun patut keni danda pati. Entegangja kayun semetone tur prawiraja.”
1
Dane Yosua raris ngutus mata-mata kekalih saking genah-genahe makemah ring Sitim, mangda ipun mamargi nyelehin jagat Kanaane punika saking silib, minakadinipun pisan kota Yerikone. Sasampune sang mata-mata rauh rin kotane punika, ipun raris madunungan ring umah anak luh sundel sane mawasta Ni Rahab.2 Sang prabu ring Yeriko raris polih gatra mungguing ring wengine punika wenten makudang-kudang wong Israel rauh, praya nyelehin panegarane punika.
3 Ida raris ngutus utusan ring Ni Rahab saha kadulurin pangandika sapuniki: “Anake ane nginep di jumah nyaine, ento mata-mata buat nyelehin gumi Yerikone makejang. Sawireh keto pesuangja anake totonan.”
4
[4-6] Ni Rahab tumuli matur sapuniki: “Sayuakti wenten makudang-kudang anak simpang ring cecanggahan titiange, nanging titiang nenten uning yen saking dijake rauhipune. Rikalaning suryane sampun surup, tur sadurung gapuran kotane kunebang, ipun sami sampun pada makaon. Titiang nenten uning yen kijake pakaonipun. Nanging yening ragane digelis ngetut pamarginipune, sinah ragane mrasidayang ngejuk ipun.” (Duk punika Ni Rahab sampun ngengkebang mata-matane makakalih punika ring loteng umahipune saha kurugin antuk sumi sane simpan ipun irika.)5
6
7 Utusan ida sang prabu tumuli medal saking kota, tur gapuran kotane raris kaunebang. Utusane punika ngetut pamargin mata-matan Israele ngantos rauh ring sisin Tukad Yordane, ring genah anake biasa nglintangin tukade punika.
8
Ring wengine punika sadurung mata-matane punika pules, Ni Rahab raris munggah ka loteng,9 sarwi mabaos ring sang kalih, sapuniki: “Tiang uning mungguing Ida Sang Hyang Widi Wasa sampun maicayang jagate puniki ring ragane. Sakancan jadmane ring jagate puniki sami ajerih ring ragane.
10 Tiang sareng sami sampun miragi indik Ida Sang Hyang Widi Wasa sampun ngenyatang toyan Segara Gelagahe ring ajeng ragane rikala ragane matilar saking jagat Mesir. Tiang sareng sami taler sampun miragi, indik ragane nyedayang Sang Prabu Sihon miwah Sang Prabu Og, ratun wong Amorine makakalih sane wenten ring dangin Tukad Yordane.
11 Riwau tiang sareng sami miragi indike punika, tiang sareng sami rumasa ajerih pisan. Tiang sareng sami ical kawanenan tiange marep ring ragane. Ida Sang Hyang Widi Wasa, Widin ragane, Ida Widin suarga miwah jagate.
12 Sane mangkin tiang nunas mangda ragane masumpah masrana parab Ida Sang Hyang Widi Wasa, mungguing ragane jaga nyayubin pakurenan tiange, sakadi tiang sampun nyayubin ragane. Wehin tiang tanda, makadados bukti mungguing ragane keni kagugu.
13 Majanjija ring tiang mungguing ragane jaga ngrahayuang meme bapan tiange, nyaman tiange luh miwah muani, miwah sakulawarganipune, mangda tiang sareng sami nenten kapademang.”
14
Mata-matane punika raris mabaos ring ipun: “Dumadak Ida Sang Hyang Widi Wasa mancut urip tiange, yening tiang nenten nglaksanayang sane sampun baosang tiang! Yening ragane nenten nuturang paindikan sane sampun laksanayang tiang puniki ring isapasira jua, tiang majanji ring ragane, mungguing tiang jaga nyayubin ragane saha becik, rikala Ida Sang Hyang Widi Wasa maicayang jagate puniki ring tiang sareng sami.”15
Umah Ni Rahabe punika wenten ring tembok kotane, punika awinannya ipun ngamedalang sang mata-mata punika saking jendelane kulur antuk tali.16 Samaliha ipun mabaos ring sang kalih sapuniki: “Rarisangja lunga masingidan ring pagunungan mangdane ragane nenten kapanggihin antuk utusan ida sang prabu. Mengkebja irika tigang rahina, ngantos parautusane punika pada budal. Sasampune punika ragane dados malih nglanturang pamargin ragane.”
17
Mata-matane punika mabaos ring ipun asapuniki: “Tiang jaga ngagem prajanjian sane sampun baosang tiang ring ragane.18 Indike puniki sane patut margiang ragane. Rikalane tiang ngaug jagat ragane, tegulangja taline barak puniki ring jendelane genah ragane ngulur tiang budal. Punduhangja meme bapan ragane, semeton ragane miwah sakancan kulawargan bapan ragane ring umah ragane puniki.
19 Yening wenten sane medal saking umahe puniki, yen pet ipun padem, indike punika dados iwangipune niri, tur tiang nenten nyak negen indike punika. Nanging yening wenten sane keni kasinangkaonang ring umah ragane, indike punika dados tetegenan tiange sareng sami.
20 Nanging yening ragane nuturang ring sapasira jua paindikane sane sampun margiang tiang, dadosipun tiang nenten jaga ngagem janji sane sampun aturang tiang ring ragane.”
21 Ni Rahab saadung ring indike punika, tumuli ngaturin sang kalih makaon. Sasampun sang mata-mata punika makaon, Ni Rahab raris negulang taline sane barak punika ring jendelane.
22
Mata-matane punika raris malaib ka pagunungan tur masingidan irika. Parautusan sang prabune nylidik ngrereh ipun ring sakuub jagate sami, kantos tigang rahina suenipun, nanging ipun nenten kapanggihin. Punika awinannya parautusan sang prabune raris pada mawali ka kota Yeriko.23 Sasampune punika mata-matane makakalih punika raris tedun saking pagunungan tumuli nglintangin Tukad Yordane, raris mawali ka genah Dane Yosua. Ipun raris nguningayang sapariindik sane sampun laksanayang ipun.
24 Sapuniki aturipune: “Tiang rumasa cager pisan, mungguing Ida Sang Hyang Widi Wasa sampun maicayang ring iraga jagate punika makasami. Sawatek jadmane irika sami pada ajerih ring iraga.”
1
Benjangne palimunan pisan Dane Yosua miwah bangsa Israele sampun pada matangi tumuli kesah saking Sitim, ngungsi Tukad Yordane. Irika dane miwah bangsa Israele makolem, sadurunge dane miwah bangsane punika nglintangin Tukad Yordane punika.2 Sasampun maletan tigang rahina, parapamimpine nyelepin asing-asing kemahe,
3 saha madedauhan ring bangsane punika sami asapuniki: “Yening semeton sampun manggihin parapanditane negen Peti Prajanjian Ida Sang Hyang Widi Wasa, Widin semetone, rarisang ancit kemah semetone tur iringja dane.
4 Semeton durung naenin ngentap margine puniki. Punika awinannyane parapanditane pacang mitujuhin semeton margi sane patut tuut semeton. Nanging sampunang bes nampek ring Peti Prajanjiane punika. Karyanang embang sawatara akilo dohipun ring ungkur Peti Prajanjiane punika.”
5
Dane Yosua ngandika ring bangsa Israele sapuniki: “Suciangja ragan semetone santukan sane benjang Ida Sang Hyang Widi Wasa jaga nyinahang katawahan-katawahan ring pantaran semetone.”6 Sasampune punika dane raris ngaturin parapanditane negen Peti Prajanjian punika tur mamargi ngriinin rakyate. Parapanditane sami nglaksanayang sapituduh danene.
7
Ida Sang Hyang Widi Wasa ngandika ring Dane Yosua sapuniki: “Apaja ane kardi Ulun di dinane jani, ento lakar ngawanang wong Israele makejang ngawitin ngajiang kita, buina apanga ia nawang, mungguing Ulun ngiangin kita, buka Ulun ngiangin Musa.8 Ane jani orahinja parapanditane ane negen Peti Prajanjiane ento, apanga dikalane ia neked di tukade nglaut menceban di yehe, lantas nongos majujuk di sisin yehe.”
9
Dane Yosua raris ngandika ring rakyate sapuniki: “Rarisang parasemeton pada nampek mriki, tur pirengangja sabda sane pacang kasabdayang antuk Ida Sang Hyang Widi Wasa, Widin semetone.10 Rikalaning semeton ngarepang sinah Ida pacang ngaonang wong Kanaan, wong Het, wong Hewi, wong Peris, wong Girgasi, wong Amori miwah wong Yebus punika. Semeton jaga uning mungguing Widi sane nyeneng wenten ring pantaran semetone,
11 rikalaning Peti Prajanjian Widin gumine makasami nglintangin Tukad Yordane, ngriinin semeton.
12 Sane mangkin rarisangja milih anak lanang roras diri. Asing-asing suku bangsa Israele, ngwedalang anak lanang adiri.
13 Rikala parapanditane sane negen Peti Prajanjian Widin jagate sami ngencebang cokor danene ring toyane, Tukad Yordane jaga mararian membah tur toyane sane membah saking luanan jaga mapunduh dados asiki ring satunggaling genah.”
14
[14-15] Duk punika nuju masan ngampung, tur toyan tukade ageng pisan. Rikala rakyate nilar genahnyane makolem, tur jaga nglintangin Tukad Yordane, parapanditane mamargi ngriinin ipun, saha negen Peti Prajanjiane punika.15
16 Riwau parapanditane punika ngencebang cokor danene ring tukade, toyane jeg wusan membah tur nyeleg sakadi tembok ring luanan, nampek ring kota Adam, kotane sane nampek ring kota Sartan. Toyane sane membah ngatebenang, ka Segara Araba, inggih punika Segara Mati, pegat tur nyat pisan, tur rakyate mrasidayang nglintangin genah sane nampek ring kota Yeriko.
17 Risedek rakyate nglintang ring genahe sane tuh, parapanditane sane negen Peti Prajanjiane punika ngadeg ring genahe sane tuh ring basan tengah Tukad Yordane, kantos rakyate makasami prasida telas nglintang.
1
Sasampun bangsane punika makasami nglintangin tukade punika, Ida Sang Hyang Widi Wasa tumuli masabda ring Dane Yosua, sapuniki:2 “Pilihja uli pantaran bangsane ento roras diri liunne, adiri uli pantaran suku bangsannyane suang-suang.
3 Laut tundenja ia nyemak batu roras bungkul uli basan tengah Tukad Yordane, sig tongos panditane pada majujuk. Tunden ia ngaba batu-batune ento tur ngejang di tongos kitane lakar nyujukang kemah di petenge nyanan.”
4
Dane Yosua tumuli ngesengin anake sane lanang-lanang sane sampun pilih dane makaroras punika,5 saha kapangandikain sapuniki: “Rarisangja semeton lunga ka Tukad Yordane, ngriinin Peti Prajanjian Ida Sang Hyang Widi Wasa, Widin semetone. Semeton suang-suang patut ngambil tur negen batu asiki, inggih punika asiki pabuat asing-asing suku bangsa Israele.
6 Batu-batune punika jagi dados pangeling-eling pabuat rakyate ngeniang paindikan sane sampun kakardi antuk Ida Sang Hyang Widi Wasa. Benjang pungkur yen oka-okan semetone mataken, punapike piteges batu-batune punika,
7 semeton patut nuturang ring ipun, mungguing rikala Peti Prajanjian Ida Sang Hyang Widi Wasa nglintang ring Tukad Yordane, toyan tukade puniki jeg pegat tur nenten membah. Batu-batune puniki patut setata dados pangeling-eling buat bangsa Israel, ngeniang ring paindikan sane sampun mamargi iriki.”
8
Anake lanang-lanang makaroras punika raris nglaksanayang sane sampun kasabdayang antuk Ida Sang Hyang Widi Wasa ring Dane Yosua. Anake makaroras punika raris ngambil batu roras bungkul saking basan tengah Tukad Yordane saha akehipun anut ring wilangan suku bangsa Israele, tumuli kategen ka genahnyane jaga makolem miwah nyujukang kemah.9 Dane Yosua taler numpukang batu roras bungkul ring basan tengah Tukad Yordane, ring genah parapanditane sane negen Peti Prajanjiane punika ngadeg. (Batune punika kantun irika rauh mangkin.)
10 Parapanditane sane negen Peti Prajanjiane punika tetep ngadeg ring basan tengah Tukad Yordane, kantos saluiring paindikan sane kapituduhang antuk Ida Sang Hyang Widi Wasa ring Dane Yosua, sane patut karauhang ring bangsa Israele, makasami sampun prasida kamargiang. Indike punika sami sampun kaprentahang antuk Dane Musa.
Bangsane punika raris digelis nglintangin Tukad Yordane.11 Sasampune bangsane punika sami rauh ring sisin tukade sane bedauh, parapanditane sane negen Peti Prajanjian Ida Sang Hyang Widi Wasa punika raris mamargi ngriinin rakyate punika.
12 Sawatek anake sane saking suku Ruben miwah Gad, miwah atenga saking suku Manase, sane siaga jaga mayuda, ngriinin bangsane punika mamargi sakadi sane kaprentahang ring ipun antuk Dane Musa.
13 Sawatara wenten petang dasa tali anake lanang-lanang sane siaga jaga mayuda nglintangin Tukad Yordane ring ajeng Ida Sang Hyang Widi Wasa ngungsi tanahe dangsah sane nampek ring kota Yeriko.
14 Paindikan sane kakardi antuk Ida Sang Hyang Widi Wasa ring rahinane punika, ngawinang bangsa Israele nganggep Dane Yosua punika anak sane mawisesa. Rakyate sami ngajiang dane sapanjang umur danene, sakadi ipun ngajiang Dane Musa.
15
Sasampune punika Ida Sang Hyang Widi Wasa raris ngandika ring Dane Yosua,16 mangda dane ngaturin parapanditane sane negen Peti Prajanjiane punika, pada munggah saking Tukad Yordane.
17 Dane Yosua raris sairing,
18 tur ritatkala parapanditane punika pada rauh ring sisin tukade, tukade punika raris ngawitin membah, sarwi ngliahin sisinnyane.
19
Rakyate punika nglintangin Tukad Yordane punika nuju tanggal dasa, sasih kaping pisan, sarwi nyujukang kemah ring Gilgal dangin kota Yerikone.20 Irika Dane Yosua numpukang batune makaroras, sane kabakta saking Tukad Yordane.
21 Dane ngandika ring bangsa Israele sapuniki: “Benjang pungkur yen oka-okan semetone nakenin semeton, punapi piteges batu-batune puniki,
22 semeton patut nuturang ring ipun indik bangsa Israele sane sampun nglintangin Tukad Yordane punika, ring genahe sane tuh tan matoya.
23 Tuturang ring ipun, mungguing Ida Sang Hyang Widi Wasa sampun ngenyatang toyan Tukad Yordane punika pabuat semeton, ngantos semeton sareng sami telas nglintang, pateh sakadi Ida ngenyatang toyan Segara Gelagahe pabuat iraga sareng sami.
24 Malantaran punika sadaging jagate sami pacang uning amunapi ageng kawisesan Ida Sang Hyang Widi Wasa, tur semeton taler pacang ngluihang Ida Sang Hyang Widi Wasa, Widin semetone salami-laminipun.”
1
Pararatun wong Amorine, sane wenten ring dauh Tukad Yordane, miwah pararatun wong Kanaane sane wenten ring pasisin Segara Tengahe, makasami pada mireng indik Ida Sang Hyang Widi Wasa sampun ngenyatang toyan Tukad Yordane, kantos rakyat Israele prasida nglintangin tukade punika. Ida sareng sami pada ajerih miwah sirna kaprawiran idane, uli krana bangsa Israele punika.2
Ida Sang Hyang Widi Wasa raris ngandika ring Dane Yosua, sapuniki: “Ngaeja tiuk aji batu tur sunatja wong Israele.”3 Dane Yosua sairing ring pangandikan Ida Sang Hyang Widi Wasa, tumuli dane nyunat wong Israele ring genahe sane mawasta Bukit Panyunatan.
4 [4-6] Ritatkala bangsa Israel kesah saking Mesir, sawatek anake lanang-lanang sami sampun masunat. Nanging sajeroning petang dasa taun ipun ngumbara ring tegal melakange tan wenten rare muani sane kasunat. Kadi asapunika taler, sakancan anake lanang-lanang sane daweg ipune kesah saking Mesir, sane sampun pantes medal ka payudan ring pamuput masa petang dasa taun punika sami sampun padem, santukan nenten sairing ring pituduh Ida Sang Hyang Widi Wasa. Samaliha sakadi sane sampun kasabdayang majalaran sumpah antuk Ida Sang Hyang Widi Wasa, mungguing ipun nenten kalugra manggihin jagat sane gemuh landuh, sane sampun janjiang Ida ring paraleluuripune.
5
6
7 Pianak-pianak ipune muani, durung wenten sane masunat. Dadosipun parisentanan anake punika sane kasunat antuk Dane Yosua.
8
Sasampune ipun sareng sami puput kasunat, bangsane punika sami pada masandekan ring kemahnyane, ngantos tatunnyane pada was.9 Ida Sang Hyang Widi Wasa ngandika ring Dane Yosua sapuniki: “Di dinane ene Ulun ngaadang kanistan kitane dadi panjak di Mesir.” Punika awinanipun genahe punika kawastanin Gilgal, kantos rauh mangkin.
10
Sadaweg bangsa Israele madunungan ring Gilgal, ring pategalan sane nampek ring kota Yeriko, ipun pada Marerainan Paskah nuju tanggal patbelas nyoreang ring sasihe punika.11 Benjangipun, punika dados rahina sane pangawit ipun nunas dedaaran saking pamupon jagat Kanaane, inggih punika: gandum manyahnyah miwah roti sane tan paragi.
12 Samalihipun roti mannane nenten malih kapaicayang tur bangsa Israele nenten malih polih roti manna. Ngawit saking rahina punika sapanglanturipun bangsa Israele nunas pamupon jagat Kanaane.
13
Rikala Dane Yosua nampek ring kota Yeriko, jeg tan pararapan dane manggihin anak nganggar pedang ring ajeng danene. Dane Yosua maranin anake punika, sarwi mataken sapuniki: “Punapike ragane puniki prajurit tiange, punapi meseh?”14
Pasaur anake punika: “Manira ene tusingja musuh muah tusingja timpal. Manira teka mai, makadadi senapatin Ida Sang Hyang Widi Wasa.” Dane Yosua raris sumungkem, ngantos prarain danene nganteg tanah, sarwi matur sapuniki: “Titiang puniki parekan Palungguh IRatu. Punapike pakarsan Palungguh IRatu sane patut margiang titiang?”15
Senapatin wadua balan Ida Sang Hyang Widi Wasa raris ngandika ring dane: “Embusja sepatun kitane. Kita jani sedek majujuk di tanahe ane suci.” Irika Dane Yosua sairing ring sapituduh idane.1
Gapuran kota Yerikone sampun katutup tur kagebag, mangda bangsa Israele nenten mrasidayang ngranjing. Samaliha nenten wenten anak kalugra ngranjing wiadin medal saking kota punika.2 Ida Sang Hyang Widi Wasa raris ngandika ring Dane Yosua sapuniki: “Ane jani Ulun nyerahang kota Yerikone ene teken kita kayang ratu muah prajuritne ane prawira makejang.
3 Kita muah wadua balan kitane patut majalan mabaris ngilehin kotane ento awai ping cepok, nem dina makelonne.
4 Panditane pitung diri suang-suang ngaba trompet, patut majalan di arepan Peti Prajanjiane. Di dinane ane kaping pitu kita muah prajurit kitane patut ngilehin kotane ento ping pitu muah parapanditane pada ngupin trompetnyane.
5 Sasubane keto parapanditane patut ngupin trompetnyane ngalad. Mara kita ningeh munyin trompet ngalad, anake makejang patut masuryak gargita. Kala ditu tembok kotane lakar uug. Sasubane keto wadua balane makejang patut nglantas masuk ka kotane ento.”
6
Dane Yosua raris ngaturin parapanditane sarwi matur sapuniki: “Rarisangja tegen Peti Prajanjiane punika samaliha parapanditane sareng pepitu saking pantaran ragane patut mamargi ring ajeng Peti Prajanjiane, saha ngagem trompet.”7 Sasampune punika dane raris mrentahang wadua balan danene mamargi ngilehin kotane punika, kasarengin antuk prajurit pangawal sane mamargi ring arepan Peti Prajanjian Ida Sang Hyang Widi Wasa.
8
[8-9] Kenginan sasampune Dane Yosua ngamedalang prentah, pasukan pangawale raris mamargi ngriinin panditane sane ngupin trompet. Ring ungkurnyane raris mamargi parapanditane sane negen Peti Prajanjian, kairing antuk pasukan pangawal sane ring ungkur. Sajeroning pada mamargi, trompete sami terus kupin.9
10 Nanging Dane Yosua sampun ngandikain mangda parawadua balane nenten masuryak miwah sampunang mabaos angan abuku jua, ngantos wenten prentah saking dane.
11 Kadi asapunika dane ngandikayang pasukane punika negen Peti Prajanjian Ida Sang Hyang Widi Wasa ngilehin kotane punika apisan. Wusan punika dane miwah ipun malih mawali ka genahe makolem, tur masandekan irika.
12
[12-13] Benjangne palimunan pisan Dane Yosua sampun matangi, raris kaping kalihipun parapandita miwah paraprajurite mamargi ngilehin kotane punika, manut pidabdab sane sampun kamargiang sane dibinipun, inggih punika: pinih riin pasukan pangawal sane ring ajeng, wusan punika parapandita sane ngupin trompet, wus punika parapandita sane negen Peti Prajanjian Ida Sang Hyang Widi Wasa tur pamuputipun pasukan pangawal sane ring ungkur. Sajeroning punika trompete terus kupin.13
14 Ring rahina sane kaping kalih punika dane sareng sami mamargi ngilehin kotane punika apisan. Wusan punika dane miwah ipun raris mawali ka genahe makolem. Indike punika kamargiang kantos nem rahina suenipun.
15
Ring rahinane sane kaping pitu, riwau galang kangin, dane miwah ipun pada matangi tumuli mamargi ngilehin kotane punika ping pitu, nganggen cara sane pateh sakadi sane sampun-sampun. Sakewanten ring rahinane punika dane miwah ipun mamargi ngilehin kotane punika ping pitu.16 Ring ilehan sane kaping pitu, rikala parapanditane ngupin trompete punika, Dane Yosua mrentahang wadua balan danene mangda masuryak, sarwi ngandika sapuniki: “Ida Sang Hyang Widi Wasa sampun maicayang kotane puniki ring semeton.
17 Kota miwah sadagingipune patut kasirnayang kantos telas sirna, makadados aturan pamantuka ring Ida Sang Hyang Widi Wasa. Sakewanten sundele Ni Rahab miwah sapakurenanipune, banggayang ipun kantun murip, santukan ipun ngengkebang mata-matan iragane.
18 Nanging semeton tan wenang ngambil saananing barang sane patut kasirnayang. Yening semeton ngambil, semeton pacang nibakang kamewehan miwah karusakan pabuat pakemahan bangsa Israele.
19 Sakancan barang-barang sane malakar antuk perak, mas, tembaga wiadin besi, patut kasanehang pabuat Ida Sang Hyang Widi Wasa. Barang-barange punika jaga karanjingang ring genah arta branan Ida Sang Hyang Widi Wasa.”
20
Irika parapanditane raris ngupin trompete punika. Wadua balane sami pada masuryak tur temboke raris uug. Duk punika prajurite raris ngranjing ka kota, tur ngrampas kotane punika.21 Prajurite sami ngaud pedang tur ngamademang sakancan anake sane ring kotane punika, lanang istri agung alit. Sakancan banteng, biri-biri, miwah keledae taler sami kapademang.
22
Duk punika Dane Yosua ngandikain anake sane pecak dados mata-mata makakalih asapuniki: “Mrikaja semeton ka umah sundele punika. Ajak ipun miwah sakulawarganipune sami medal, sakadi janjin semetone ring ipun.” Sang kalih raris mamargi tumuli ngajak Ni Rahab medal, kasarengin antuk meme bapanipune, nyamanipune muani-muani, miwah kulawargannyane sane lianan.23 Sang kalih ngajak ipun sareng sami, kulawarga miwah panjakipune buat masayuban ring genah sane nampek ring kemah wong Israele.
24 Sasampune punika wadua balan Israele raris nunjel kotane punika miwah sadaging ipune sami, kantos telas pisan, sajawining barang-barang sane malakar antuk mas, perak, temaga miwah besi sane kambil tur kasimpen ring genah arta branan Ida Sang Hyang Widi Wasa.
25 Nanging Dane Yosua manggayang sundele Ni Rahab miwah sakulawarganipune kantun murip, santukan ipun sampun ngengkebang mata-matane makakalih, sane pecak utus dane ka Yeriko. (Parisentananipune kantun murip kantos rauh mangkin, ring pantaran bangsa Israele.)
26
Duk punika Dane Yosua raris ngwedalang larangan sane kadi asapuniki: “Sapasira jua sane ngindayang ngwangunang malih kota Yerikone punika, pacang keni temah Ida Sang Hyang Widi Wasa. Sapasiraja sane masang dasar, ipun pacang kicalan pianak muani sane pinih kelih. Sapasiraja sane ngwangun gapurannyane, anake punika jaga kicalan pianak sane pinih alit.”27
Kadi asapunika indik Ida Sang Hyang Widi Wasa nyarengin Dane Yosua, tur kabinawan danene sumebar ring sakuub jagate sami.1
Ida Sang Hyang Widi Wasa sampun mapituduh ring bangsa Israele, mangda saluiring sane wenten ring kota Yeriko kasirnayang, sajawining barang-barang sane kasanehang pabuat Ida Sang Hyang Widi Wasa. Nanging pituduh Idane punika nenten kamargiang antuk wong Israele. Wenten anak mawasta Akan, sane nenten nglaksanayang pituduhe punika. Duaning punika Ida Sang Hyang Widi Wasa kalintang duka ring wong Israele. (Reraman I Akan mawasta Karmi miwah pekakipune mawasta Sabdi saking kulawargan I Serah, suku Yehuda.)2
Duk punika Dane Yosua ngutus makudang-kudang anak saking kota Yeriko ka kota Ai, sane dangin kota Betele tur tan doh saking kota Bet-Awen, buat nyelidikin kotane punika. Sasampune paindikane punika kamargiang,3 sang utusan raris matur ring Dane Yosua, sapuniki: “Nenten perlu iraga sareng sami jagi ngebug kota Aine punika. Sampun cukup yening wenten pasukan kalih wiadin tigang tali sane kutus mrika. Sampunang makasami pasukane nikayanga ngebug kotane punika santukan kotane punika kota alit.”
4 Duaning punika wantah sawatara tigang tali wong Israele kapangandikayang ngebug kotane punika, nanging ipun sami jerih kapilayu.
5 Wong Aine punika ngepung wong Israele saking gapuran kotanipune ngantos doh pisan, tur wenten sawatara tigang dasa nem diri sane kapademang ring sampih bukite. Indike punika ngawinang wong Israele sami rumasa ajerih pisan.
6
Dane Yosua miwah parapamimpine sami pada sedih kingking tur nyetset panganggennyane, tumuli sumungkem ring ajeng Peti Prajanjian Ida Sang Hyang Widi Wasa, kantos prarainnyane nganteg ka tanahe. Duurnyane kabebehin abu, tur sami maguyang irika kantos sore, buat nyinahang kasungsutan danene.7 Dane Yosua tumuli matur: “Duh Ratu Sang Hyang Widi Wasa, Widin titiange, punapi awinannya Palungguh IRatu ngandikayang titiang sareng sami nglintangin Tukad Yordane punika? Punapike Palungguh IRatu mapakayun nyerahang titiang ring wong Amorine mangda titiang kasirnayang? Becikan yening titiang kantun magenah ring dangin Tukad Yordane punika.
8 Duh Ratu Sang Hyang Widi Wasa, sane mangkin punapike sane jaga baosang titiang, santukan wong Israele sampun jerih kapilayu saking arepan mesehipune.
9 Wong Kanaane miwah sawatek jadmane ring jagate puniki jagi miragi indike punika. Ipun sareng sami jaga nyerung titiang tur ngamademang titiang suang-suang. Duaning punika punapike sane jaga margiang Palungguh IRatu, buat ngamanggehang kaluihan parab Palungguh IRatu?”
10
Ida Sang Hyang Widi Wasa raris masabda ring Dane Yosua sapuniki: “Bangunja! Ngudiang dadi kita maguyang di tanahe buka kene.11 Wong Israele suba ngae dosa. Ia suba lompang teken janji ane adakang Ulun ngajak ia. Ia suba nyuang makudang-kudang barang ane patutne kasirnayang. Ia mamaling barang-barange ento, laut engkebanga, tur pejanga sig tongos barang-barangne padidi.
12 Ento awanane wong Israele tusing nyidayang ngarepin musuhne. Ia jerih nglawan musuhne sawireh ia jani kena pasisip tur patut kasirnayang. Ulun tusing ledang buin ngiangin kita, yening kita tusing nyirnayang barang-barange ane suba tombaang Ulun kita nyuang ento.
13 Bangunja kita, tundenja rakyate makejang masuci, tunden ia apanga sedia umedek di ayun Ulun. Tunden ia apanga sedia buin mani, sawireh Ulun Sang Hyang Widi Wasa, Widin Israele mapakayunan ngorahang kene teken ia: ‘Ih wong Israel di pantaran gelah kitane ada barang-barang ane suba pituduhang Ulun apang kasirnayang. Kita tusing lakar nyidayang nglawan musuh-musuh kitane, satonden barange ento kaadang kita!
14 Sawireh keto, buin mani semengan apanga ia pada nangkil di ajeng Ulune slegenti sabilang suku. Suku ane patujuhang Ulun, apanga ia tangkil sabilang palingsehan slegenti. Palingsehan ane patujuhang Ulun apanga ia tangkil sabilang pakurenan slegenti. Pakurenan ane patujuhang Ulun apanga ia tangkil sabilang ukud slegenti.
15 Anake ane lakar patujuhang Ulun tur kadapetan ngengkebang barang-barang ane kena pasisip ento, anake ento patut katunjel, barengang ngajak pakurenan muah saananing pagelahannyane, sawireh ia suba ngletehin wong Israele, muah suba lompang teken prajanjian Ulune.”
16
Benjangne pasemengan, Dane Yosua ngajak wong Israele nangkil ring ayun Ida Sang Hyang Widi Wasa, sabilang suku slegenti, tur suku Yehuda sane kapatujuhang.17 Dane ngajak suku Yehuda nangkil sabilang palingsehan slegenti, raris palingsehan Serah sane kapatujuhang. Sasampune punika dane raris ngajak palingsehan Serahe sabilang pakurenan slegenti, tumuli pakurenan Sabdi sane kapatujuhang.
18 Dane raris ngajak pakurenan Sabdine nangkil slegenti seka ukud, raris Akan pianak Karmine cucun Sabdine sane kapatujuhang.
19 Dane Yosua raris ngandika ring Akan sapuniki: “Cening Akan, angken tur uningangja pepolosan dini di ayun Ida Sang Hyang Widi Wasa, Widin Israele, saluiring ane laksanayang cening. Orahang jani teken bapa, eda pesan cening ngengkebang paundukane ento.”
20
Akan tumuli masaur sapuniki: “Sawiakti pisan, tiang sampun ngardi dosa pamantuka ring Ida Sang Hyang Widi Wasa, Widin Israele, tur laksanan tiange kadi asapuniki:21 Ring pantaran barang-barang jejarahane punika, wenten panggihin tiang jubah sane becik pakaryan wong Babele miwah perak wenten sawatara kalih kilogram, miwah mas akatih sane mabaat wenten tengah kilo. Tiang edot pisan ring barang-barange punika mawinan raris ambil tiang. Barang-barange punika engkebang tiang ring tanahe ring kemah tiange tur perake genahang tiang pinih sor.”
22
Duaning punika Dane Yosua raris ngutus anak digelis ka padunungan I Akane. Irika raris kakeniang barang-barange punika makasami matanem, tur perake sane magenah pinih sor.23 Barang-barange punika raris kabakta medal, kabakta ring ajeng Dane Yosua miwah ring ajeng wong Israele sami, tur katurang ring ayun Ida Sang Hyang Widi Wasa.
24 Dane Yosua kasarengin antuk wong Israele sami raris ngejuk I Akan tur ngambil perak, jubah, mas sane makatihan, miwah pianak-pianaknyane luh muani, banteng, keledae miwah biri-birinnyane, kemah miwah saananing sane dados paderbean ipune punika makasami kabakta ka jurange sane mawasta Lebak Kamewehan.
25 Dane Yosua raris ngandika: “Apa krana cening ngadakang sengkala buat iraga ajak makejang? Ane jani Ida Sang Hyang Widi Wasa nibakang sengkala teken cening.” Sasampune punika rakyate makasami raris ngencurin ipun antuk batu kantos ipun padem. Kulawarga miwah sakancan padruennyane taler kencurin antuk batu tur katunjel.
26 Sasampune punika ring genahe punika raris kakaryanang gegumuk antuk batu sane ageng-ageng, sane kantun wenten rauh mangkin. Punika awinanipun genahe punika kawastanin Lebak Kamewehan.
Sasampune punika dukan Ida Sang Hyang Widi Wasa tumuli rered.1
Ida Sang Hyang Widi Wasa ngandika ring Dane Yosua sapuniki: “Kemaja ka Ai, ajak prajurite makejang. Edaja takut, muah edaja nyeh. Ulun lakar maicayang kamenangan teken kita nglawan raja Aine. Panjak kotane muah guminne lakar dadi gelah kitane.2 Apa ane suba laksanayang kita marep teken kota Yeriko muah marep teken rajanne, aketo masih patut laksanayang kita marep teken kota Ai muah rajannyane. Sakewala ane jani kita dadi nyuang barangnyane muah ingon-ingonnyane buat kita ajak makejang. Tundenja prajurite makinkin tur gebug muah tengkejutangja kotane ento uli duri.”
3
Dane Yosua tumuli makinkin jaga lunga ka Ai kasarengin antuk prajurite sami. Saking pantaran pasukan danene sane prawira dane milih prajurit tigang dasa tali diri akehnya, kapangandikayang mamargi rikala wengi,4 saha kapiteketin sapuniki: “Engkebang ragan semetone ring sisin kotane sane irika, nanging sampunang bes doh saking kotane punika. Samaliha sayagaja jaga magebug.
5 Tiang miwah anake sane nyarengin tiang jaga nganampekin kotane punika. Rikala wong Aine rauh nyiatin tiang, tiang jaga mabalik tur malaib sakadi palaib iragane dumun.
6 Ipun jaga nguber tiang, ngantos ipun medal doh saking kotane punika. Ipun jaga ngaden iraga jerih nglawan ipun, sakadi dumun.
7 Sasampune punika semeton patut medal saking pengkeban ngrampas kotane punika. Ida Sang Hyang Widi Wasa, Widin semetone jaga maicayang kotane punika ring semeton.
8 Sasampun semeton ngrampas kotane punika rarisang tunjel sakadi sane sampun kapituduhang antuk Ida Sang Hyang Widi Wasa. Puniki titah sane patut agem semeton.”
9 Kadi asapunika Dane Yosua ngutus pasukane punika, tur pasukane punika raris ngungsi genah pengkebannyane tur nyantosang irika ring dauh kota Aine, ring selagan kota Ai klawan kota Betele. Nanging Dane Yosua kantun makolem ring pakemahane.
10
Benjangne pasemengan pisan Dane Yosua matangi raris munduhang prajurite sami. Sasampune punika dane miwah parapamimpin Israele raris ngaterang paraprajurite punika mamargi ka Ai.11 Prajurite sane nyarengin dane punika raris mamargi ngungsi gapura pamedal kotane punika, tumuli ngwangun kemah baler kotane, kabelat antuk lebak klawan kota Aine punika.
12 Dane tumuli ngesengin prajurit sawatara limang tali akehipun, raris kapangandikayang mengkeb ring dauh kotane punika, inggih punika ring selagan kota Aine klawan kota Betele.
13 Prajurite sane sampun kasregepang buat mayuda, kagenahang ring baler kotane punika, miwah sisannyane kagenahang ring dauh kotane. Ring wengi punika Dane Yosua makolem ring lebake punika.
14 Rikala sang prabu ring Ai ngaksi pasukan Dane Yosua punika, digelis ida makinkin. Ida kairing antuk prajurit idane raris mamargi ngungsi tepin Tukad Yordane jaga ngayudain wong Israele, ring genah idane pecak mayuda nglawan bangsane punika. Ida nenten mitaenang jaga kagebug saking ungkur.
15 Dane Yosua kairing antuk prajurit danene makasami mapi-mapi jerih tur kapilayu, tumuli ngungsi ka tanahe sane melakang.
16 Sawatek wong kotane sami kapangandikayang mangda ngepung mesehe punika. Ritatkala ipun ngepung Dane Yosua, ipun sayan ngedohang saking kota.
17 Sawatek jadmane saking Ai makasami medal ngepung wong Israel tur gapuran kotane kabanggayang mampakan, nenten wenten anak sane ngebag angan asiki.
18
Ida Sang Hyang Widi Wasa raris ngandika ring Dane Yosua, sapuniki: “Amengangja tumbak kitane ka kota Ai. Ane jani Ulun micayang kotane ento teken kita.” Dane Yosua raris nglaksanayang sane kapituduhang ring dane punika.19 Riwau dane ngangkat tangan danene, prajurite sane mengkeb punika digelis bangun, tumuli malaib ngranjing ka kota ngrampas kotane punika. Ipun digelis nunjel kotane punika.
20 Rikala wong Aine punika matolihan ka ungkur, panggihin ipun wenten andus malepug ka ambarane. Irika raris tan wenten genah ipun jaga makelid, santukan wong Israele sane malaib ka tanah melakange sane mangkin mabalik ngayudain ipun.
21 Ritatkala Dane Yosua miwah prajurit danene ngaksi mungguing prajurite sane lianan sampun ngrampas tur nunjel kotane punika, dane miwah paraprajurite sami raris mabalik tur ngamademang wong Aine.
22 Sane mangkin wong Israel sane wenten ring kota raris rauh medal sareng matempuh ring payudan. Punika awinan wong Aine rumasa dewekipune sampun kakurung lan kakaonang antuk wong Israele, tur ipun raris kapademang makasami.
23 Wantah rajannyane kewanten sane kantun urip. Ida raris kejuk tur kabakta ka ajeng Dane Yosua.
24
Wong Israele raris nguber sawatek wong Aine ka tanah melakange, tur irika ipun makasami kapademang. Sasampune punika wong Israele raris mawali ka kota, tur ngamademang sawatek jadmane sane wenten ring kota.25 [25-26] Dane Yosua kantun pageh ngamengang tumbak danene ka Ai, kantos sawatek jadmane ring Ai sami telas kapademang, wenten roras tali akehipun lanang wadon.
26
27 Wong Israele raris sami pada ngambil ingon-ingon miwah barang sane keni jarah ipun ring kota satinut ring pituduh Ida Sang Hyang Widi Wasa sane sampun sabdayang Ida ring Dane Yosua.
28 Dane Yosua tumuli nunjel kotane punika, tur kabanggayang uug maglaturan. Kotane punika kantun uug kantos rauh mangkin.
29 Ida sang prabu ring Ai tumuli kagantung ring satunggiling taru, tur layon idane kabanggayang irika kantos rauh sore. Rikala suryane sampun surup, Dane Yosua mrentahang ngingsirang layone punika, tumuli kentungang ring gapura pamedal kotane punika. Layone punika kagegumukin tur kurugin antuk batu sane ageng-ageng. Gegumuke punika kantun wenten rauh mangkin.
30
Sasampune punika Dane Yosua raris ngwangun pamorboran aturan ring Gunung Ebal, pabuat Ida Sang Hyang Widi Wasa, Widin Israele.31 “Pamorboran aturane punika kawangun satinut ring pituduh sane kapaicayang ring bangsa Israele antuk Dane Musa, parekan Ida Sang Hyang Widi Wasa. Santukan ring cakepan Dane Musa wenten sinurat sapuniki: “Pamorborane punika pacang kawangun antuk batu sane nenten naenin keni tampak prabot sane malakar antuk besi.” Ring duur pamorboran aturane punika bangsa Israele ngaturang aturannyane sane katur ring Ida Sang Hyang Widi Wasa, inggih punika aturan maborbor miwah aturan karahayuan.
32 Irika ring batune punika, Dane Yosua nyuratang Pidabdab Ida Sang Hyang Widi Wasa sane wenten ring cakepan Dane Musa, kasaksinin antuk wong Israele.
33 Wong Israele kasarengin antuk parapamimpinnyane sami, paraprawira miwah parahakimnyane, kadi asapunika taler sawatek wong sunantara sane wenten ring pantarannyane, sami pada ngadeg ring sabilang samping Peti Prajanjian Ida Sang Hyang Widi Wasa, marep-arepan ring parapandita katurunan Dane Lewi, sane negen Peti Prajanjiane punika. Rakyate punika atenga pada majujuk marep ka Gunung Gerisim miwah sane lianan majujuk marep ka Gunung Ebal. Dane Musa parekan Ida Sang Hyang Widi Wasa sampun ngandikayang nglaksanayang paindikane punika, rikalaning sampun rauh panemayanipune pada nampi merta sane kajanjiang antuk Ida Sang Hyang Widi Wasa.
34 Sasampune punika Dane Yosua tumuli ngwacen pidabdabe punika nganggen suara sane santer, makamiwah merta miwah temah, sakadi sane sinurat ring cakepan Pidabdabe punika.
35 Saananing pituduh Dane Musa makasami kawacen antuk Dane Yosua ring arepan rakyate sane mapunduh irika, lanang istri, agung alit, miwah parawong sunantara sane wenten ring pantaran wong Israele.
1
Indik kamenangan wong Israele punika raris kapireng antuk sawatek pararatune sane wenten ring dauh Tukad Yordane, inggih punika sane wenten ring pagunungan, ring bongkol gununge, ring pasisin Segara Tengahe tur kaleripun kantos rauh ring Libanon. Minakadinipun pararatun wong Het, wong Amori, wong Kanaan, wong Peris, wong Hewi miwah wong Yebus.2 Pararatune punika sareng sami saigum jaga matempuh yuda sinarengan nglawan Dane Yosua miwah wong Israele.
3
Nanging jadmane ring Gibeon, inggih punika wong Hewi, miragi indik sane sampun kalaksanayang antuk Dane Yosua marep ring kota Yeriko miwah kota Aine.4 Ipun saigum jaga ngapus Dane Yosua. Ipun raris pada nyediang pangan kinum, karung miwah klukuh blulang sane sampun let, tumuli kapondongang ring keledaenipune.
5 Ipun raris nyaluk pangangge miwah sandal sane buuk tur bek madaging tetampelan. Samaliha roti sane bakta ipun sampun tuh miwah maong.
6 Sasampune punika ipun raris mamargi ka Gilgal ring genah wong Israele makemah, tumuli matur ring Dane Yosua miwah wong Israele, sapuniki: “Titiang sareng sami puniki rauh saking jagat sane doh pisan. Pangaptin titiange, mangda ragane ledang ngardi prajanjian ring titiang sareng sami.”
7
Nanging wong Israele masaur kadi asapuniki: “Napi pikenohipun tiang ngardi prajanjian ring ragane? Menawite genah jerone nenten doh saking iriki?”8
Ipun raris matur ring Dane Yosua: “Titiang nyadia nglaksanayang sapatitah pamekele.” Dane Yosua raris mataken ring ipun: “Sapasira jerone puniki? Saking dija rauh jerone?”9
Irika ipun raris nuturang indikipune kadi asapuniki: “Inggih pamekele, titiang puniki rauh saking genah sane kalintang doh, santukan titiang sampun miragi indik Ida Sang Hyang Widi Wasa, Widin pamekele. Titiang sampun miragi indik sane sampun kardi Ida ring jagat Mesir.10 Samaliha indik sane sampun kardi Ida marep ring pararatun wong Amorine makakalih ring dangin Tukad Yordane inggih punika Sang Prabu Sihon, ratune ring Hesbon miwah Sang Prabu Og, ratune ring Basan, sane malinggih ring Astarot.
11 Parapamimpin titiange miwah rakyate makasami sane wenten ring panegaran titiange, ngenken titiang nyawisang bekel buat jaga luas tur medek tangkil ring pamekele. Titiang sampun kapiteketin mangda titiang ngiringang sapatitah pamekele, tur mapinunas ring pamekele, mangda ledang pamekele ngardi prajanjian ring titiang sareng sami.
12 Indayangja aksi roti bekel titiange puniki. Daweg titiang ngawitin mamargi matilar saking cecanggahan titiange, jaga tangkil ring pamekele, rotine puniki kantun panes. Nanging indayangja aksi, sane mangkin rotine puniki sampun tuh tur mawong.
13 Daweg titiange nagingin klukuh blulange puniki, klukuhe puniki kantun anyar. Nanging indayangja aksi sane mangkin, klukuhe punika sampun uek. Pangangge miwah sandal titiange sami sampun buuk, santukan pamargin titiange kalintang doh.”
14
Wong Israele raris ngambil bekel wong Gibeone punika, nanging ipun nenten nunasang indike punika ring ayun Ida Sang Hyang Widi Wasa.15 Dane Yosua raris ngwentenang prajanjian makanti ring wong Gibeone punika, tur ipun sareng sami nenten jaga kapademang. Parapamimpin pasamuan Israele raris ngwentenang sumpah jaga tuon ring prajanjiane punika.
16
Sasampun maletan tigang rahina prajanjiane punika kamanggehang, wong Israele raris uning mungguing wong Gibeone punika sujatinipun magenah nampek saking irika.17 Duaning punika wong Israele raris mamargi, tur sasampune tigang rahina suenipun mamargi, raris rauh ring kota-kotan wong Gibeone, inggih punika Gibeon, Kepira, Beerot miwah Kiryat-Yearim.
18 Nanging wong Israele nenten ngamademang ipun, santukan parapamimpinnyane sampun masumpah ring ipun, sajeroning parab Ida Sang Hyang Widi Wasa, Widin Israele. Rakyat Israele makasami ngrimikang parapamimpinnyane, ngeniang ring paindikane punika.
19 Nanging parapamimpine punika masaur sapuniki: “Tiang sareng sami sampun masumpah ring ipun, sajeroning parab Ida Sang Hyang Widi Wasa, Widin Israele, duaning punika sane mangkin iraga nenten dados mlegendahang ipun.
20 Iraga patut manggayang ipun kantun murip, duaning iraga sampun majanji. Yening nenten kadi asapunika, Ida Sang Hyang Widi Wasa pacang nyisipang iraga.
21 Sampunang ipun pademanga, nanging anggen ipun tukang ngandik saang miwah ngrereh toya buat iraga.” Indike punika sane katetepang antuk parapamimpine punika.
22
Dane Yosua ngandikayang mangda wong Gibeone punika katangkilang ring ajeng danene, raris dane mataken ring ipun asapuniki: “Apa krana jerone ngapus tiang, tur ngorahang iban jerone uli joh, nanging sasajaane jerone nongos paek uli dini?23 Sawireh buka keto laksanan jerone, Ida Sang Hyang Widi Wasa suba nyisipang jerone. Bangsan jerone lakar setata dadi panjak, dadi juru kandik saang muah dadi juru kajang yeh pabuat Perhyangan Linggih Widin tiange.”
24
Ipun sareng sami tumuli matur: “Inggih titiang sairing kadi asapunika. Santukan titiang miragi, mungguing Ida Sang Hyang Widi Wasa, Widin pamekele, sampun mapituduh ring Dane Musa, kaulan Idane, mangda dane maicayang jagate puniki makasami ring pamekele, tur ngamademang jadmane makasami sane magenah ring jagate puniki, sane wenten ring ajeng pamekele. Titiang nglaksanayang paindikane punika, santukan titiang kalintang ajerih ring pamekele, tur titiang ajerih pisan pacang kapademang.25 Sane mangkin titiang wenten ring sajeroning kakuasaan pamekele. Durusang margiang paindikane sane patut ring pakayunan pamekele.”
26 Duaning punika Dane Yosua raris ngamargiang paindikan sane kadi asapuniki: Dane nyayubin wong Gibeone punika tur bangsa Israele nenten kalugra ngamademang wong Gibeone punika.
27 Nanging duk punika ipun sareng sami raris kadadosang panjak buat ngandik saang miwah ngajang toya pabuat bangsa Israele, miwah pamorboran aturan Ida Sang Hyang Widi Wasa. Kantos rauh mangkin ipun sareng sami kantun nglanturang pakaryane punika ring genah pangubaktine sane sampun kaselik antuk Ida Sang Hyang Widi Wasa.
1
Ida Sang Prabu Adoni-Sedek, ratune ring Yerusalem, mireng mungguing Dane Yosua sampun ngaonang tur nyirnayang kota Aine, tur nyedayang ratunnyane sakadi sane sampun laksanayang dane marep ring kota Yeriko miwah ratunnyane. Ida taler mireng indik wong Gibeone sampun makanti sraya ring bangsa Israele, tur sane mangkin ipun wenten ring pantaran bangsa Israele.2 Duaning punika wong Yerusaleme kalintang resres manahipune, santukan kota Gibeone punika kota sane ageng. Ageng ipun pateh sakadi kota-kota sane kawengku antuk satunggiling prabu. Samaliha kotane punika agengan ring kota Ai, tur rakyatipune sami prawira ring payudan.
3 Punika awinannya Sang Prabu Adoni-Sedek ngutus utusan mangda tangkil ring Ida Sang Prabu Hoham, ratune ring Hebron, Sang Prabu Piream, ratune ring Yarmut, Sang Prabu Yapia, ratune ring Lakis miwah Sang Prabu Debir ratune ring Eglon. Parautusane kapangandikayang nguningayang kadi asapuniki:
4 “Ledang palungguh iratu mapitulung ring titiang, buat ngebug kota Gibeon punika santukan wong Gibeone punika sampun makanti sraya ring Yosua miwah ring wong Israele.”
5 Irika pararatun wong Amorine makalelima, inggih punika pararatune ring Yerusalem, Hebron, Yarmut, Lakis miwah Eglon raris nunggilang wadua balannyane, tumuli ngiter tur ngebug kota Gibeone punika.
6
Wong Gibeone raris ngutus utusan mangda matur piuning ring Dane Yosua, ring genah danene masandekan ring Gilgal, kadi asapuniki: “Inggih pamekele, ledang pamekele digelis rauh mapaica pitulungan ring titiang, sampunang pisan titiang tilarina. Santukan sawatek pararatun wong Amorine sane wenten ring pagunungan, sampun nunggilang wadua balannyane tur sampun ngebug titiang.”7
Duaning punika Dane Yosua miwah wadua balan danene sami, kadi asapunika taler prajurite sane sampun jayengrana, mamargi kesah saking Gilgal.8 Ida Sang Hyang Widi Wasa masabda ring Dane Yosua sapuniki: “Edaja kita takut teken ia ajaka makejang. Ulun suba maicayang kamenangan teken kita. Uli pantarannyane aukudko tusing ada ane nyidayang ngarepin kita.”
9 Awengi mepek Dane Yosua miwah wadua balan danene mamargi saking Gilgal ngungsi kota Gibeone punika, tur tan pawangsit dane raris ngebug wong Amorine punika.
10 Ida Sang Hyang Widi Wasa ngawinang wong Amorine bingung tan karwan-karwan ring arepan wadua balan Israele. Wong Israele ngamademang wong Amorine punika ring Gibeon, tur ngepung sane kantun urip tedun ring rejeng gununge ring Bet-Horon, tumuli ngaonang ipun kantos rauh bedelod ring Aseka miwah Makeda.
11 Ritatkala wong Amorine pada kapilayu saking arepan wong Israele, Ida Sang Hyang Widi Wasa ngadakang sabeh es ageng-ageng nepen ipun sareng sami, sapanjang margine sane ngungsi ka Aseka. Sane padem tepen es akehan ring sane kapademang antuk wong Israele.
12
Ring rahinane punika, duk Ida Sang Hyang Widi Wasa mapaica kamenangan ring wong Israele marep ring wong Amorine, Dane Yosua raris matur ring Ida Sang Hyang Widi Wasa, ring arepan wong Israele kadi asapuniki: “Ih matan ai, nongosja ditu di duur kota Gibeone, muah iba bulan, nongos di duur Lebak Ayalone.”13 Kenginan suryane punika raris mandeg tur bulane nenten mamargi ngantos bangsa Israele punika mrasidayang ngaonang meseh ipune. Indike punika sinurat ring Cakepan Yasare. Suryane mandeg ring basan tengah langite tur nenten ngarorokang ngantos arahina mepek.
14 Durung wenten rahina kadi asapunika yadian duking nguni wiadin ring masane sane jaga rauh, inggih punika Ida Sang Hyang Widi Wasa nagingin pinunas manusa kadi asapunika. Ida Sang Hyang Widi Wasa ledang mayuda ngroangin wong Israele!
15
Sasampune punika Dane Yosua miwah wadua balan danene raris mawali ka Gilgal, genah danene masandekan.16
Nanging pararatun wong Amorine makalelima punika kapilayu tur masingidan ring guane ring Makeda.17 Raris wenten anak sane manggihin ida, tumuli genah pasingidane punika kuningang ring Dane Yosua.
18 Dane Yosua raris ngandika sapuniki: “Gulikangja batune sane ageng-ageng punika ka bungas guane punika. Daginginja genahe punika pajagaan,
19 nanging sampunang semeton mararian rauh irika. Kepungja mesehe punika tur gebugja ipun saking ungkur. Sampunangja ipun kantos icena mawali ka kotanipune. Ida Sang Hyang Widi Wasa Widin semetone sampun mapaica kamenangan ring semeton marep ring ipun.”
20 Dane Yosua miwah wong Israele raris ngamademang wong Amorine punika, nanging wenten taler makudang-kudang diri sane mrasidayang malaib tur mengkeb ring kotanipune kantos ipun tan padem.
21 Wusan punika prajurit-prajurit Dane Yosua sami pada rahajeng mawali ring Dane Yosua, ring genah danene ngwangun kemah ring Makeda.
Ring jagate irika adiriko tan wenten anak sane purun nglawan wong Israele, yadiastun jaga wantah antuk bebaosan.22
Dane Yosua tumuli ngandika: “Sane mangkin bukakja bungas guane punika, tur baktaja pararatune sane lelima punika mriki ring genah tiange.”23 Irika bungas guane raris kabukak, tur pararatune, inggih punika pararatun Yerusalem, Hebron, Yarmut, Lakis miwah Eglone, sami kabakta medal.
24 Ida makasami punika kabakta ka ajeng Dane Yosua. Dane Yosua tumuli ngandikain parawong Israele sami mangda rauh mapunduh ring ajeng danene, tur paraprawirane sane pecak ngiring dane ring payudan raris kapangandikayang ngenjekin baong pararatune punika. Indike punika raris kamargiang antuk paraprawirane punika.
25 Sasampune punika Dane Yosua raris ngandika ring paraprawirane sapuniki: “Sampunangja semeton jejeh wiadin takut, semeton patut pracaya tur sura dira. Santukan kadi asapuniki jagi indiknya pakardin Ida Sang Hyang Widi Wasa marep ring parameseh semetone.”
26 Wusan punika Dane Yosua raris nyedayang pararatune lelima punika, tur layon idane kagantung ring tarune lelima ngantos surup surya.
27 Rikalaning suryane sampun surup Dane Yosua raris ngandikayang mangda layon pararatune punika kentungang ring gua pecak idane masingidan. Bungas guane raris katutup antuk batu sane ageng tur batune punika kantun ngantos rauh mangkin.
28
Ring rahinane punika Dane Yosua ngebug tur ngaonang kota Makeda miwah ratunnyane. Sawatek jadmane sane wenten ring kotane punika makasami kapademang, tan wenten angan adiri sane kantun murip. Dane Yosua ngamargiang indik sane pateh marep ring ratun Makedane ring sane sampun margiang dane marep ring ratun Yerikone.29
Wusan punika, Dane Yosua miwah paraprajurit danene raris kesah saking Makeda, ngungsi Libna tur ngebug kotane punika.30 Ida Sang Hyang Widi Wasa taler mapaica kamenangan ring wong Israele, nglawan kota miwah ratun kotane punika. Tan wenten sane kabanggayang kantun murip, nanging sakancan sane wenten ring kotane punika makasami kapademang. Paindikan sane kalaksanayang marep ring ratunnyane pateh sakadi ring sane sampun kalaksanayang marep ring ratun Yerikone.
31
Sasampune punika Dane Yosua miwah paraprajurit danene raris kesah saking Libna ngungsi kota Lakis. Kotane punika raris kakurung tur kagebug.32 Ring rahinane sane kaping kalih Ida Sang Hyang Widi Wasa tumuli mapaica kamenangan ring wong Israele, marep ring kota Lakise punika. Sakadi sane sampun kamargiang ring Libna, kadi asapunika taler ring Lakis, tan wenten jadma sane kantun murip. Sadaging kotane makasami kapademang.
33 Ida Sang Prabu Horam saking Geser raris rauh buat nulungin ratun Lakise, nanging ida miwah wadua balan idane kakaonang antuk Dane Yosua, tur makasami kapademang.
34
Wusan punika Dane Yosua mamargi saking Lakis ngungsi kota Eglon. Kotane punika kakurung tur kagebug.35 Ring rahinane punika ugi kotane punika kakaonang, tur sakancan jadmane sane wenten irika makasami kapademang, pateh sakadi sane sampun kalaksanayang marep ring kota Lakise.
36
Sasampune punika Dane Yosua miwah prajurit danene raris kesah saking kota Eglon, ngungsi ka kota Hebron. Kotane punika raris kagebug,37 tur kakaonang. Sang prabun kotane punika kasedayang, kadi asapunika taler sawatek jadmane ring kotane punika makasami kapademang, sakadi sane margiang dane marep ring kota-kotane sane nampek ring kotane punika. Dane Yosua nyirnayang kotane punika kantos pateh sakadi sane laksanayang dane marep ring kota Eglone. Tan wenten jadma sane kantun murip ring kotane punika.
38
Wusan punika Dane Yosua miwah prajurit danene mawali tur ngebug kota Debire.39 Kotane punika miwah ratunnyane kakaonang, kadi asapunika taler kota-kotane sane nampek irika. Jadmane irika makasami kapademang. Marep ring kota Debir miwah ratunnyane, Dane Yosua ngamargiang paindikan sane pateh sakadi sane sampun margiang dane marep ring kota Hebron, Libna miwah pararatunnyane.
40
Kenginan makasami jagate punika kakaonang antuk Dane Yosua. Dane ngaonang pararatun kotane ring pagunungan, kota-kota sane ring sampih kangin bukite miwah kota-kota sane ring bongkol gununge kauh, kadi asapunika taler kota-kotane sane ring tanahe sane dangsah bedelod. Sakancan jadmane irika makasami kapademang, tan wenten sane kantun murip. Indike punika saadung ring sapatitah Ida Sang Hyang Widi Wasa, Widin wong Israele.41 Dane Yosua ngamargiang payudane punika ngawit saking Kades-Barnea ngantos rauh ka Gasa, kadi asapunika taler sawewidangan Gosen tur kaleripun rauh ring Gibeon.
42 Apisanan pararatu miwah panegarannyane punika makasami kakaonang antuk Dane Yosua. Santukan Ida Sang Hyang Widi Wasa, Widin wong Israele, sane mayuda ngroangin wong Israele.
43 Sasampune punika Dane Yosua miwah paraprajurit danene raris mawali ka pakemahannyane ring Gilgal.
1
Riwau Ida Sang Prabu Yabin, ratune ring Hasor mireng indik kamenangan bangsa Israele punika, ida tumuli ngutus prakanggen idane nunas kanti ring Ida Sang Prabu Yobab, ratune ring Madon, miwah pararatune sane ring panegara Simron miwah Aksap.2 Kadi asapunika taler ring pararatune sane ngratu ring pagunungane baler, miwah sane ngratu ring Lebak Yordan delod Galileane, miwah sane ngratu ring bongkol gununge, miwah sane ngratu ring pasisi sane nampek ring kota Dor.
3 Ida taler ngutus utusan nunas kanti ring pararatun wong Kanaane sane ngratu ring kiwa tengen Tukad Yordane, inggih punika pararatun wong Amorine, wong Het, wong Peris, wong Yebus, sane wenten ring pagunungan, miwah wong Hewi sane magenah ring bongkol Gunung Hermone, ring tanah Mispa.
4 Pararatune punika raris medal ka payudan kairing antuk wadua bala miwah prajurit akeh pisan, tan bina sakadi biase ring pasisi akehnyane. Pararatune punika taler makta tunggangan kreta miwah kuda akeh pisan.
5 Pararatune punika pada makanti sraya, tur misadia ngayudain wong Israele. Ida sareng sami tumuli pada nabdabang gelar idane nampek ring Pangkung Merome.
6
Ida Sang Hyang Widi Wasa tumuli masabda ring Dane Yosua asapuniki: “Edaja kita takut teken ia ajaka makejang. Buin mani sawatara kali jani, Ulun lakar ngamatiang ia ajaka makejang pabuat wong Israele. Kita patut ngelung batis jaranne muah nunjel kretannyane.”7 Dane Yosua miwah wadua balan danene sami tan pawangsit nempuh pararatune punika nampek ring Pangkung Merome.
8 Saking pasuecan Ida Sang Hyang Widi Wasa wong Israele prasida ngaonang pararatune punika makasami. Wong Israele ngepung tur ngebug pararatune punika ngalerang ngantos rauh ring Misrepot-Maim miwah ring Sidon tur nganginang ngantos rauh ring Lebak Mispane. Yudane punika nglantur ngantos mesehe punika padem makasami.
9 Saluiring sane kapituduhang antuk Ida Sang Hyang Widi Wasa tumuli kalaksanayang antuk Dane Yosua, inggih punika sawatek kudan mesehe sami kaelung buntutnyane miwah kreta-kretannyane katunjel makasami.
10
Sasampune punika Dane Yosua tumuli mawali ngebug kota Hasor raris kakaonang, tur ratunnyane kasedayang. (Duk masane punika kota Hasore punika satunggiling kota sane pinih kuat ring pantaran kaprabone makasami.)11 Jadmane irika makasami kapademang tur nenten wenten sane kantun murip, samalihipun kotannyane raris katunjel.
12
Sakancan kotan pararatune punika sami kakaonang antuk Dane Yosua, tur pararatunnyane makasami kasedayang, sakadi sane sampun kaprentahang antuk Dane Musa, parekan Ida Sang Hyang Widi Wasa.13 Nanging kota-kotane sane kawangun ring duur tanahe sane tegeh nenten katunjel antuk wong Israele. Sajawining kota Hasor sane katunjel antuk Dane Yosua ngraga.
14 Arta brana miwah wewalungan sane wenten ring kota-kota punika makasami kajarah antuk wong Israele. Nanging jadmannyane makasami kapademang, tan wenten sane kantun urip.
15 Ida Sang Hyang Widi Wasa sampun ngwecanayang pituduhe punika ring Dane Musa parekan Idane, tur Dane Musa ngrauhang pituduhe punika ring Dane Yosua, tur dane raris nglaksanayang pituduhe punika. Dane Yosua nglaksanayang pituduh Ida Sang Hyang Widi Wasa sane sampun pituduhang Ida ring Dane Musa.
16
Dane Yosua ngaonang sakuub jagate punika makasami, inggih punika kota-kota sane ring pagunungan miwah ring bongkol gununge kaler miwah kelod, wewidangan tanah Gosen miwah tanah melakange sane delod Gosene, kadi asapunika taler Lebak Yordane.17 [17-18] Wewidangan punika nglajur saking pagunungan Gundul sane bedelod, sane nampek ring kota Edom, raris ngalerang ngantos rauh ring Baal-Gad, ring Lebak Libanone sane bedelod Gunung Hermone. Sue pisan Dane Yosua mayuda nglawan pararatune sane ring wewidangan punika, nanging dane prasida ngaonang pararatune punika tur makasami kasedayang.
18
19 Saking pantaran kota-kotane punika sami, wantah kota Gibeon kotan wong Hewine kewanten, sane ngwentenang prajanjian padame ring wong Israele. Kota-kota sane lianan makasami kakaonang ring payudan.
20 Ida Sang Hyang Widi Wasa sane sampun ngawinang manahipune kukuh buat ngayudain wong Israele, mangdane ipun prasida keni pasisip basmi kerta, tur jadmannyane makasami kapademang, tan wenten sane kapadalem. Indike punika saadung ring pituduh Idane ring Dane Musa.
21
Duk masane punika Dane Yosua taler nyirnayang bangsa Enak, sane jadmannyane ageng-ageng inggih punika: ring Hebron, Debir miwah Anab, miwah ring sakuub Pagunungan Yehuda, miwah sakuub pagunungan Israele. Dane Yosua nyirnayang ipun miwah kota-kotannyane makasami.22 Tan wenten malih bangsa Enak sane kantun ring jagat Israel sajawining ring kota Gasa, Gat miwah Asdod.
23
Dane Yosua ngaonang sakuub jagate punika makasami, saadung ring pituduh Ida Sang Hyang Widi Wasa, sane pituduhang Ida ring Dane Musa. Dane Yosua raris micayang jagate ring bangsa Israele makadados paderbeannyane, tur kadum-dum. Sabilang suku polih duman abagian. Sasampune punika bangsa Israele raris wusan mayuda.1
Bangsa Israele sampun ngaonang tur ngaug jagat sane dangin Tukad Yordane saking tanahe dangsah sane ring Arnon ngantos rauh ring Lebak Yordane tur ngalerang rauh ring Gunung Hermon. Wenten pararatu kekalih sane kakaonang.2 Sane asiki maparab Sang Prabu Sihon, ratun wong Amorine sane jumeneng ring Hesbon. Wewidangan sane dados reh-rehan idane, inggih punika tanah Gilead abagian, miwah kota sane wenten ring wewidangan sane nglajur saking Aroer sane wenten ring sisin Tukad Arnone, miwah kota sane wenten ring tengah-tengah lebake irika, ngantos rauh ka Tukad Yabok ring wates panegaran wong Amone.
3 Reh-rehan idane taler rauh ring lebake dangin Tukad Yordane, ngawit saking Danu Galilea ngelodang ngantos rauh ring Bet-Yesimot sane wenten ring dangin Segara Mati, ngraris rauh ka bongkol Gunung Pisgane.
4
Ida Sang Prabu Og sisan wong Repaime, ratune ring Basan sane jumeneng nata ring Astarot miwah ring Edrei taler kakaonang.5 Sane maug dados wewidangan kaprabon idane, inggih punika Gunung Hermon, Salka, miwah sakuub wewidangan Basan ngantos rauh ring wewidangan Gesur miwah Maaka, kadi asapunika taler tanah Gilead abagian, rauh ring wewidangan Sang Prabu Sihon ratune ring Hesbon.
6
Pararatune makakalih punika sane kakaonang antuk Dane Musa miwah wong Israele. Tanah pararatune punika raris kapaicayang antuk Dane Musa parekan Ida Sang Hyang Widi Wasa punika ring suku Ruben miwah Gad, miwah atenga saking suku Manase, makadados paderbennyane.7
Pararatu sane kakaonang antuk Dane Yosua inggih punika sakancan pararatune sane wenten ring dauh Tukad Yordane, saking Baal-Gad sane wenten ring Lebak Libanone rauh ring pagunungan Gundul sane bedelod sane nampek ring Edom. Jagate puniki makasami kadumang ring parasuku-suku bangsa Israele makadados paderbennyane.8 Tanah-tanahe sane kadumang inggih punika: tanah sane ring pagunungan, sampih bukite sane bedauh, Lebak Yordane, miwah sampih-sampih bukitnyane, sampih-sampihe sane bedangin miwah tanah melakange sane bedelod. Wewidangane puniki pecak dados pagenahan wong Het, wong Amori, wong Kanaan, wong Peris, wong Hewi miwah wong Yebus.
9 [9-24] Wong Israele ngaonang pararatune tigang dasa siki akehipun, sane madeg ratu ring kota-kota sane sinurat ring sor puniki, inggih punika kota Yeriko, Ai (sane nampek ring Betel), Yerusalem, Hebron, Yarmut, Lakis, Eglon, Geser, Debir, Geder, Horma, Arad, Libna, Adulam, Makeda, Betel, Tapuah, Heper, Apek, Lasaron, Madon, Hasor, Simron, Aksap, Taanak, Megido, Kades, Yokneam (ring Gunung Karmel), Dor (sane ring pasisi), Goyim (sane ring Galilea), miwah Tirsa.
1
Sane mangkin Dane Yosua sampun kalintang lingsir. Ida Sang Hyang Widi Wasa raris ngandika ring dane sapuniki: “Yosua, kita suba tua pesan, nanging enu liu gumine ane patut kalahang kita,2 luire: sawewengkon gumin wong Pilistine muah wong Gesure.
3 Keto masih wewengkon gumin wong Awine ane bedelod (gumine ento ngawit uli Tukad Sikore ane di wates gumi Mesire, ngajanang kanti teked di wates wewengkon gumi Ekrone, ento makejang dadi wewengkon wong Kanaan. Muah pararatun wong Pilistine ane madeg ratu di kota-kota Gasa, Asdod, Askelon, Gat muah Ekron.)
4 Aketo masih ane patut rebut kita, nah ento gumin wong Kanaane makejang, muah Meara (ane gelahanga baan wong Sidone), kanti neked ka Apek, di bates wewidangan wong Amorine.
5 Sajaba ento kita patut ngrampas gumin wong Gebale, sakuub wewidangan Libanone, laut beneng kangin uli di Baal-Gad, ane delod Gunung Hermone, kanti neked ka jalane ka Hamat.
6 Aketo masih sakancan wewengkon wong Sidone, ane nongos di tanah pagunungan ane ada di pantaran pagunungan Libanone klawan kota Misrepot-Maime.” Sapangrarisipun Ida Sang Hyang Widi Wasa masabda sapuniki: “Ulun lakar ngulah bangsa-bangsane ento makejang uli arepan wong Israele. Kita patut ngedumang tanahe ento teken wong Israele makadadi gelahnyane buka ane suba titahang Ulun teken kita.
7 Sawireh keto ane jani edumangja tanahe ento teken suku-suku bangsa Israele ane enu sia suku ento muah teken sisan suku Manasene ane buin atenga, makadadi pagelahannyane.”
8
Suku Ruben miwah suku Gad, ping kalih atenga saking suku Manasene, sampun nampi bagian tanah ring dangin Tukad Yordane, sane sampun kapaicayang antuk Dane Musa, parekan Ida Sang Hyang Widi Wasa.9 Sane maug dados wewidangannyane, inggih punika Aroer (sane ring tanggun Lebak Arnone), miwah kota sane wenten ring basan tengah lebake punika, ping kalih tanahe dangsah sane ring pagunungan saking Medeba rauh ka Dibon.
10 Kadi asapunika taler wewidangan wong Amone, miwah kota-kota sane pecak kawengku antuk Sang Prabu Sihon, ratun wong Amorine sane jumeneng nata ring Hesbon.
11 Sapanglanturipun taler wewidangan Gilead, wewidangan wong Gesur miwah wong Maakane. Pagunungan Hermone miwah tanah Basane makasami, kantos rauh ring Salka. Wewidangane punika sami maug dados wewidangan suku Ruben, Gad miwah abagian saking suku Manase.
12 Kadi asapunika taler kaprabon Ida Sang Prabu Og, sisan wong Repaime sane pecak jumeneng nata ring Astarot miwah Edrei. Dane Musa sampun ngaonang miwah ngulah bangsa-bangsane punika sami.
13 Nanging wong Israele nenten ngulah wong Gesur miwah Maakane, punika awinannya ipun kantun ring pantaran wong Israele kantos rauh mangkin.
14
Dane Musa nenten mapaica bagian tanah ring suku Lewi manut sabdan Ida Sang Hyang Widi Wasa ring Dane Musa. Kenginan sane dados duman suku Lewine, inggih punika abagian saking aturan sane kaborbor ring pamorboran aturane, sane katurang ring Ida Sang Hyang Widi Wasa, Widin Israele.15
Dane Musa sampun mapaica duman tanah ring parakulawargan suku Rubene makadados paderbennyane.16 Sane dados wewidangannyane, inggih punika Aroer (sane ring tanggun Lebak Arnone), miwah kota sane wenten ring lebake punika kantos rauh ring sakuub pagunungan sane wenten ring kiwa tengen Medebane.
17 Kadi asapunika taler kota Hesbon miwah kota-kota sane wenten ring tanah pagunungane punika, minakadi Dibon, Bamot-Baal, Bet-Baal-Meon,
18 Yahas, Kademot, Mepaat,
19 Kiryataim, Sibma, Seret-Hasahar, sane wenten ring duur bukite sane wenten ring lebake punika,
20 Bet-Peor, sampih Gunung Pisgane miwah Bet-Yesimot.
21 Kadi asapunika taler kota-kota sane wenten ring pagunungane punika makasami, miwah sakuub kaprabone Ida Sang Prabu Sihon, ratun wong Amorine, sane pecak jumeneng ring kota Hesbon. Dane Musa sampun ngaonang ida, kadi asapunika taler dane sampun ngaonang pararatune sane ring Midian, inggih punika Sang Prabu Ewi, Rekem, Sur, Hur miwah Reba. Pararatune punika pecak kawawa antuk Ida Sang Prabu Sihon.
22 Ring pantaran jadmane sane kapademang antuk wong Israel, taler wenten Dane Bileam, tukang tenunge punika okan Dane Beor.
23 Bates kauh wewidangan Dane Ruben, inggih punika Tukad Yordane. Kota-kota miwah desa-desa sane wenten irika makasami kapaicayang dados padruen parakulawargan suku Rubene.
24
Dane Musa taler mapaica bagian tanah ring parakulawargan suku Gade, makadados padruennyane.25 Sane dados wewidangannyane, inggih punika Yaeser, miwah sakancan kotane sane ring wewidangan Gilead, miwah wewidangan wong Amone atenga sane dangin Rabane, kantos rauh ring Aroer.
26 Sane maug ring wewidangan punika, ngawit saking Hesbon ngantos rauh ring Ramat-Mispa miwah Betonim samaliha saking Mahanaim ngantos rauh ring wewengkon Lodebar. Punika dados padruen suku Gade.
27 Sane ring Lebak Yordane, inggih punika Bet-Haram, Bet-Nimra, Sukot miwah Sapon, sisan reh-rehan kaprabon Ida Sang Prabu Sihon sane jumeneng ring Hesbon. Sane dados bates kauhnyane inggih punika Tukad Yordane, tur bates kalernyane ngantos rauh ring Danu Galileane.
28 Kota-kota miwah desa-desane irika makasami kapaicayang dados padruen parakulawargan suku Gade.
29
Dane Musa sampun mapaica duman tanah ring atenga saking parakulawargan suku Manasene makadados paderbennyane.30 Sane dados wewidangannyane inggih punika: Mahanaim miwah sakuub tanah Basan, wewengkon Ida Sang Prabu Og, ratune ring Basan, kadi asapunika taler desa-desa Yaire sane ring Basan, nem dasa akehipun.
31 Sapanglanturipun, taler jagat Gileade atenga miwah Astarot lan Edrei, inggih punika kota-kota kaprabon Ida Sang Prabu Og ring Basan. Makasami punika sampun kapaicayang ring abagian saking kulawargan Dane Makir saking suku Manase.
32
Kadi asapunika Dane Musa ngedumang tanahe dangin Tukad Yordane miwah dangin kota Yerikone, rikala dane magenah ring tanahe sane dangsah ring jagat Moab.33 Nanging Dane Musa nenten mapaica duman tanah ring suku Lewi. Dane ngandikayang ring suku Lewine, mungguing dumannyane, inggih punika abagian saking aturan-aturan sane katur ring Ida Sang Hyang Widi Wasa, Widin Israele.
1
Paindikane sane ring sor puniki, inggih punika ngeniang indik tanah Kanaan sane dauh Tukad Yordane kadum-dum ring pantaran wong Israele. Sane ngedumang tanahe punika ring pantaran rakyate, inggih punika Pandita Eleasar, Dane Yosua putran Dane Nun miwah parapanglingsir palingsehan sajeroning suku-suku Israele.2 Sakadi sane sampun kapituduhang antuk Ida Sang Hyang Widi Wasa ring Dane Musa, wewidangan sane dauh Tukad Yordane punika dados duman suku bangsa Israele sane asia tengah. Tanahe punika sampun kadum nganggen undi.
3 [3-4] Dane Musa sampun ngedumang tanahe sane dangin Tukad Yordane ring suku bangsa Israele sane kekalih miwah atenga punika. (Katurunan Dane Yusup kadadosang kalih suku, inggih punika Manase miwah Epraim.) Dane Musa nenten mapaica duman tanah ring suku Lewi, nanging suku Lewi kicen kota miwah tegalan buat genah ngangonang ingon-ingon miwah wewalungannyane.
4
5 Kadi asapunika wong Israele ngedumang tanahe punika satinut ring pituduh Ida Sang Hyang Widi Wasa ring Dane Musa.
6
Sedek rahina anu wenten makudang-kudang anak saking pantaran suku Yehuda rauh tangkil ring Dane Yosua ring Gilgal. Salah tunggal anake punika, Dane Kaleb okan Dane Yepune saking palingsehan Kenas, matur ring Dane Yosua sapuniki: “Semeton Yosua, semeton uning ring sabdan Ida Sang Hyang Widi Wasa ring Dane Musa, parekan Ida Sang Hyang Widi Wasa, duke ring Kades-Barnea, ngeniang ring indik ragan semetone miwah tiang.7 Duk Dane Musa parekan Ida Sang Hyang Widi Wasa ngutus tiang saking Kades-Barnea nyelehin jagate puniki, tiang sampun matuuh petang dasa taun. Sapawalin tiange, tiang sampun nguningayang sapariindik sane amun sujatinne ring dane.
8 Nanging anake sane sareng-sareng nyelehin ring tiang, ngawinang rakyate sami pada jejeh. Yadian kadi asapunika tiang saking satia tuu sairing ring Ida Sang Hyang Widi Wasa, Widin tiange.
9 Malantaran paindikane punika Dane Musa majanji ring tiang, mungguing tiang miwah pianak-pianak tiange kapastiang pacang polih tanah-tanahe sane pecak entap tiang punika, makadados bagian tiange.
10 Sane mangkin sampun setiman taun suenipun Ida Sang Hyang Widi Wasa masabda kadi asapunika ring Dane Musa, inggih punika duk wong Israele kantun ngumbara ring tegal melakange, tur Ida Sang Hyang Widi Wasa sampun miara tiang kantos rauh mangkin, satinut ring prajanjian Idane. Sane mangkin indayangja cingakin! Tiang sampun matuuh wulung dasa lima taun,
11 nanging tiang kantun siteng sakadi daweg tiange kutus antuk Dane Musa. Tiang kantun siteng buat jaga mayuda wiadin ngambil pakaryan sane lianan.
12 Duaning punika, sane mangkin paicayangja ring tiang tanah pagunungane punika, inggih punika tanah sane sampun kajanjiang antuk Ida Sang Hyang Widi Wasa ring tiang, duke tiang sareng timpal-timpal tiange nguningayang pamargin tiange dados mata-mata. Tiang sareng sami taler sampun nguningayang ring semeton mungguing irika wenten jadma sane ageng-ageng sakadi raksasa, sane mawasta wong Enak. Ipun magenah ring kota-kota sane ageng-ageng tur kiter antuk benteng. Menawita Ida Sang Hyang Widi Wasa ledang ngiangin tiang, kantos tiang jaga ngaonang ipun saking irika, satinut ring sabdan Ida Sang Hyang Widi Wasa.
13
Dane Yosua tumuli ngamertanin Dane Kaleb okan Dane Yepune, tur dane kicen kota Hebron punika makadados duman danene.14 Kota Hebron punika rauh mangkin dados druen katurunan Dane Kaleb okan Dane Yepune, wong Kenase punika, santukan dane saking satia tuu sairing ring Ida Sang Hyang Widi Wasa, Widin Israele.
15 Sadurung punika, kota Hebron punika mawasta kota Arba. (Arba punika pecak jadma sane pinih ageng ring pantaran wong Enake.)
Sane mangkin jagate irika sampun tenterem kerta raharja.1
Parakulawarga sajeroning suku Yehuda, polih duman tanah sakadi sane sinurat ring sor puniki, inggih punika kelodnyane rauh ring tanggun kelod tegal melakang Sine, ring wates jagat Edome.2 Bates kelodnyane ngawit saking tanggun kelod Segara Matine,
3 saking irika ngraris ngelodang, nglintangin rejeng-rejeng gunung-gunung Akrabime rauh ka Sin. Sapangrarisipun nglintang ring delod Kades-Barneane, ngraris ka Hesron miwah Adar, tumuli mabelok ka Karka.
4 Saking irika watesnyane ngraris ka Asmon nuluh tukad ring wates tanah Mesire. Watese punika bedah rauh ka pasisin Segara Tengah. Punika sane dados wates kelod tanah bagian suku Yehudane.
5
Wates kanginnyane inggih punika Segara Mati, ngraris ngalerang ngantos rauh ring loloan Tukad Yordane. Bates kalernyane, ngawit saking loloan Tukad Yordane punika,6 ngraris munggah ka Bet-Hogla raris nglintang ring baler Lebak Yordane. Saking irika bates kalernyane ngraris ngalerang ngantos rauh ring Batu Bohan, (Bohan punika okan Dane Ruben),
7 ngraris ka Lebak Kamewehan, ngantos rauh ka Debir, ngraris mabelok ngalerang ka Gilgal, sane marep-arepan ring sampih gununge ring Adumim, ring sisi kelod lebake punika. Watese punika nglantur malih ngantos rauh ring empul toyane ring En-Semes, raris ka En-Rogel.
8 Saking irika watese punika raris munggah nglintang ring Lebak Hinom, ring sisi kelod bukite, ring genah wong Yebuse, inggih punika genah kota Yerusaleme. Sasampune punika watese punika raris nglintangin muncuk bukite sane dauh Lebak Hinome inggih punika tanggun baler Lebak Repaime.
9 Saking irika raris nglintang ring toya klebutane ring Me-Neptoah, raris bedah ring kota-kota sane nampek ring Gunung Epron. Saking irika raris mabelok ka Baala (inggih punika Kiryat-Yearim).
10 Saking irika watese punika malih mabelok ngilehin sisi kauh Baalane ngungsi pagunungan Edom, raris terus ka tepi kaler Gunung Yearime, (inggih punika Gunung Kesalon), raris tedun malih ka Bet-Semes tur nglantur rauh ka Timna.
11 Saking Timna watese punika nglantur rauh ka sisi kaler Ekrone raris mabelok ka Sikron nglintangin Gunung Baal, tur bedah ring Yabneel, raris bedah ring pasisin Segara Tengahe.
12 Punika dados wates kauh duman suku Yehudane, tur wewidangane punika makadados genah parakulawargan suku Yehudane.
13
Manut pituduh Ida Sang Hyang Widi Wasa ring Dane Yosua, Dane Kaleb okan Dane Yepune, suku Yehuda kicen duman tanah abagian saking duman suku Yehudane. Dane kicen kota Hebron, kota pecak derben Arbane, bapan Enake.14 Dane Kaleb sampun ngaonang katurunan wong Enake saking kotane punika, inggih punika parapalingsehan Sesai, Ahiman miwah palingsehan Talmaine.
15 Saking irika dane raris ngebug jadmane sane ring kota Debir (kotane puniki sane riin mawasta Kiryat-Seper).
16 Dane Kaleb masesaudan sapuniki: “Sapasiraja sane mrasidayang ngaonang kota Kiryat-Sepere, ipun jagi antenang tiang ring pianak tiange Ni Aksa.”
17 Dane Otniel, okan Dane Kenas semeton Dane Kaleb, raris prasida ngaonang kotane punika. Duaning punika Dane Kaleb raris ngantenang Dane Otniel ring Aksa, okan danene.
18 Ring rahina pabuncingannyane Dane Otniel raris nglelunyuhin rabin danene mangda dane kayun nunas tegal ring ajin danene. Dane Aksa raris tedun saking keledaen danene. Irika dane katakenin antuk Dane Kaleb ajin danene sapuniki: “Apa ane idih cening?”
19 Dane Aksa raris matur sapuniki: “Yening aji ledang, tiang jagi nunas makudang-kudang toya klebutan. Santukan tegale sane sampun picayang aji ring tiang punika makasami tegal sane tuh melakang.” Irika Dane Kaleb raris micayang toya klebutan sane wenten ring luanan miwah sane wenten ring tebenan.
20
Pidagingan, puniki tanah sane kapicayang ring parakulawargan suku Yehudane, makadados paderbennyane.21 [21-32] Kota-kotannyane sane paling doh ring tanggu kelod, sane nampek ring wates jagat Edome, inggih punika Kabseel, Eder, Yagur, Kina, Dimona, Adada, Kedes, Hasor, Yitnan, Sip, Telem, Bealot, Hasor-Hadata, Keriot-Hesron (inggih punika Hasor), Amam, Sema, Molada, Hasar-Gada, Hesmon, Bet-Pelet, Hasar-Sual, Berseba, Bisiotia, Baala, Iyim, Esem, Eltolad, Kesil, Horma, Siklag, Madmana, Sansana, Lebaot, Silhim, Ain miwah Rimon. Makasami punika rauh ring desa-desannyane wenten sangalikur akehipun.
22
23
24
25
26
27
28
29
30
31
32
33
[33-36] Kota-kota sane ring bukite, inggih punika Estaol, Sora, Asna, Sanoah, En-Ganim, Tapuah, Enam, Yarmut, Adulam, Soko, Aseka, Saaraim, Aditaim, Gedera, miwah Gederotaim. Makasami punika rauh ring desa-desannyane wenten patbelas akehipun.34
35
36
37
[37-41] Sajaba punika taler kota Senan, Hadasa, Migdal-Gad, Dilean, Mispa, Yokteel, Lakis, Boskat, Eglon, Kabon, Lahmas, Kitlis, Gederot, Bet-Dagon, Naama miwah Makeda, rauh ring desa-desannyane makasami wenten nembelas akehipun.38
39
40
41
42
[42-44] Lianan ring punika taler kota-kota Libna, Eter, Asan, Yiptah, Asna, Nesib, Kehila, Aksib miwah Maresa rauh ring desa-desanipun makasami wenten asia akehipun.43
44
45
Lianan ring punika taler kota Ekron miwah sakancan desa-desannyane,46 ping kalihipun sakancan kota-kota miwah desa-desa sane nampek ring Asdod ngawit saking Ekron rauh ring Segara Tengah.
47
Samalihipun taler kota Asdod, Gasa miwah desa-desannyane sane sumebar ngantos rauh ring tukad bates jagat Mesire miwah pasisin Segara Tengahe.48
[48-51] Kota-kota sane ring pagunungan inggih punika: Samir, Yatir, Soko, Dana, Kiryat-Sana (inggih punika Debir), Anab, Estemoa, Anim, Gosen, Holon, miwah Giloh rauh ring desa-desannyane makasami wenten solas akehipun.49
50
51
52
[52-54] Kadi asapunika taler kota: Arab, Duma, Esan, Yanum, Bet-Tapuah, Apeka, Humta, Kiryat-Arba wiadin Hebron miwah Sior makasami wenten asia akehipun, makamiwah desa-desannyane taler dados padruen suku Yehudane.53
54
55
[55-57] Samalihipun kota-kota Maon, Karmel, Sip, Yuta, Yisreel, Yokdeam, Sanoah, Kain, Gibea miwah Timna. Makasami wenten adasa akehipun, makamiwah desa-desannyane.56
57
58
[58-59] Kadi asapunika taler kota Halhul, Bet-Sur, Gedor, Maarat, Bet-Anot miwah Eltekon. Makasami wenten nemnem akehnyane, makamiwah desa-desanipune.59
60
Samalihipun: kota Kiryat-Baal (inggih punika Kiryat-Yearim) miwah kota Raba makasami wenten kekalih akehipun, makamiwah desa-desannyane.61
[61-62] Ring tegal melakange inggih punika: Bet-Araba, Midin, Sekaka, Nibsan, Kota Uyah miwah En-Gedi, makasami wenten nemnem makamiwah desa-desannyane.62
63
Nanging suku Yehuda nenten mrasidayang ngaonang tur ngingsirang wong Yebuse sane magenah ring kota Yerusalem. Kenginan wong Yebuse punika kantun irika sareng-sareng ring suku Yehudane kantos rauh mangkin.1
Bates kelod tanah sane dados duman katurunan Dane Yusup, ngawit saking Tukad Yordane sane nampek ring kota Yeriko, inggih punika ring dangin toya klebutane sane wenten ring Yeriko, tumuli nglintang ring tegal melakange. Saking Yeriko, watesnyane punika ngraris munggah ka Betel sane ring pagunungan.2 Saking Betel nglantur ka Lus, nglintangin Atarot, inggih punika genah wong Arkine.
3 Sasampune punika raris ngauhang ka wewidangan bangsa Yaplete, rauh ring Bet-Horon-Tebenan, tur sapanglanturipun raris ka Geser, raris bedah ring Segara Tengah.
4
Punika wewidangan sane kapaicayang ring katurunan Dane Yusup, inggih punika suku Epraim miwah Manase dauh tukad makadados padruennyane.5
Puniki wewidangan parakulawargan suku Epraime. Wates-watesnyane ngawit saking Atarot-Adar, nganginang rauh ka Bet-Horon-Luanan,6 tur saking irika raris ka Segara Tengah. Mikmetat makadados wates kaleripun. Dangin Mikmetate watese punika mabelok ka Taanat-Silo, raris saking irika nglintang ring dangin Taanat-Silone ngungsi ka dangin Yanoahe.
7 Saking Yanoah raris ka Atarot miwah Naharat rauh ka Yeriko, tur bedah ring Tukad Yordane.
8 Bedauh, watese punika ngawit saking Tapuah rauh ring Tukad Kana raris bedah ring Segara Tengah. Punika tanah sane kapaicayang ring parakulawargan suku Epraime, makadados duman padruennyane.
9 Sajaba punika taler wenten makudang-kudang kota miwah desa-desa sane magenah ring wewidangan suku Manase, tanah sane taler dados duman suku Epraime.
10 Nanging wong Kanaan sane magenah ring Geser nenten kakaonang saking irika. Punika awinanipun wong Kanaane punika kantun wenten ring Geser sareng-sareng ring suku Epraime ngantos rauh mangkin. Sakewanten wong Kanaane punika kanggen panjak tur kapetegenin pakaryan-pakaryan sane abot.
1
Abagian saking pantaran parakulawargan suku Manasene, okan Dane Yusup sane pinih duur, kicen duman tanah ring dauh Tukad Yordane. Dane Makir, okan Dane Manase sane pinih duur, ajin Dane Gilead, prajurit sane sura dira, kicen duman tanah wewidangan Gilead miwah wewidangan Basan, sane dangin Tukad Yordane.2 Tanah sane dauh Tukad Yordane kapaicayang ring parakulawarga sane lianan saking suku Manase, inggih punika: Abieser, Helek, Asriel, Sekem, Heper miwah Semida. Dane makasami punika katurunan purusa saking Dane Manase, okan Dane Yusup, sane makadados panglingsir ring kulawargannyane suang-suang.
3 Dane Selapehad, okan Dane Heper, putun Dane Gilead, kompiang Dane Makir, buyut Dane Manase, nenten pisan madue oka lanang, wantah madue oka istri-istri kewanten. Okan danene sane istri-istri punika mapesengan: Mahla, Noa, Hogla, Milka miwah Tirsa.
4 Dane sareng sami tumuli nangkil ring Pandita Eleasar miwah ring Dane Yosua okan Dane Nun, ping kalih ring parapanglingsire, saha matur kadi asapuniki: “Ida Sang Hyang Widi Wasa sampun mapaica pituduh ring Dane Musa, mangda titiang sareng sami taler kicen duman tanah pateh sakadi nyaman titiange sane muani-muani.” Duaning punika, satinut ring pituduh Ida Sang Hyang Widi Wasa punika, dane sareng sami raris kicen duman tanah pateh sakadi parasemeton danene sane lanang-lanang.
5 Punika awinannya Dane Manase polih duman tanah dasa bagian sajaba kota Gilead miwah Basan sane wenten ring dangin Tukad Yordane.
6 Dadosipun boya wantah katurunan Dane Manase sane lanang-lanang kewanten sane polih duman tanah, nanging taler sane istri-istri. Tanah Gilead taler kapaicayang ring katurunan Dane Manase sane lianan.
7
Bates wewidangan tanah suku Manasene ngawit saking Aser ngantos rauh ring Mikmetat dangin Sikeme. Saking irika watese punika tedun, raris ngelodang ngantos rauh ring wewengkon En-Tapuahe.8 Wewengkon Tapuah punika ngranjing dados padruen suku Manase. Nanging kota Tapuahe sane magenah ring wates wewengkone punika, dados druen suku Epraim.
9 Saking irika batese punika ngraris tedun rauh ka Tukad Kanane. Kota-kota sane wenten ring delod tukade punika, yadiastu magenah ring wewidangan suku Manasene, nanging dados druen suku Epraim. Sapanglanturipun bates wewidangan tanah suku Manase punika nuut margine sane baler tukade punika, tur bedah ring Segara Tengah.
10 Dadosipun sane ngelodang punika druen suku Epraim, miwah sane ngalerang punika druen suku Manase, tur ring sisi kauh druen suku Epraim miwah Manase punika mabates antuk Segara Tengah. Ring sisi kaler kauhnyane mabates ring druen suku Aser, tur ring sisi kaler kanginnyane mabates ring druen suku Isakare.
11 Tur ring sajeroning wewidangan suku Isakar miwah suku Asere, wenten taler druen Dane Manase, inggih punika: kota Bet-Sean miwah Yibleam makamiwah desa-desannyane, kadi asapunika taler kota Dor (kota sane ring pasisi), En-Dor, Taanak, Megido makamiwah desa-desa sakiwa tengennyane.
12 Nanging suku Manase nenten mrasidayang ngaonang tur ngingsirang jadma Kanaan sane magenah ring kota-kotane punika. Punika awinannya wong Kanaane kantun magenah irika.
13 Sapanglanturipun yadian wong Israele punika sampun kuat, nanging wong Kanaane punika taler nenten kakaonang tur kusir saking irika, sakewanten ipun kapaksa kanggen panjak miwah pangayah.
14
Parakaturunan Dane Yusup raris matur ring Dane Yosua sapuniki: “Punapi awinannya semeton mapaica duman tanah wantah apahan kewanten ring tiang sareng sami. Tiang puniki sareng akeh pisan, santukan Ida Sang Hyang Widi Wasa sampun ngamertanin tiang.”15
Pasaur Dane Yosua, sapuniki: “Yening semeton sareng akeh pisan, tur Pagunungan Epraime sampun cupek pabuat semeton, rarisangja semeton lunga ngabas alas ring gumin wong Perise miwah wong Repaime, makadados padruen semetone.”16
Dane malih matur: “Tanah pagunungane punika nenten cukup linggahipun pabuat tiang. Samalihipun wong Kanaan sane magenah ring tanahe dangsah ipun maderbe kreta besi. Kadi asapunika taler jadmane sane magenah ring kota Bet-Sean miwah desa-desa sakiwa tengennyane, ping kalih sane magenah ring Lebak Yisreele.”17
Dane Yosua raris ngandika ring suku Epraim miwah suku Manasene, sapuniki: “Sawiakti pisan cacakan semetone kalintang akeh. Samalihipun semeton kalintang kuat. Semeton patut polih langkungan ring aduman.18 Rarisang ambil tanah pagunungane punika makadados druen semetone. Yadian sane mangkin tanahe punika kantun marupa alas, semeton kuat buat ngabas alase punika, tur druenangja saking tanggunnyane asiki ngantos ka tanggunnyane sane lianan. Nanging semeton patut ngusir tur ngaonang wong Kanaane punika, yadiastun ipun maderbe kreta besi miwah dados bangsa sane siteng-siteng.”
1
Sasampun jagate sane kajanjiang antuk Ida Sang Hyang Widi Wasa kakaonang antuk bangsa Israel, wong Israele makasami raris mapunduh ring Silo, tur Kemah Linggih Ida Sang Hyang Widi Wasa raris kadegang irika.2 Duk punika kantun wenten malih pitung suku bangsa Israel sane durung polih duman tanah.
3 Duaning punika, Dane Yosua raris ngandika ring wong Israele, sapuniki: “Malih makapidanke suenipun semeton jaga nyantosang, buat jaga ngaug tur ngambil tanah sane sampun kapaicayang ring semeton antuk Ida Sang Hyang Widi Wasa, Widin leluur semetone?
4 Sane mangkin icenja tiang anak lanang tigang diri saking pantaran sukun semetone suang-suang. Tiang jaga ngenken ipun medal nylajah jagate puniki makasami, buat nyikut wates-wates wewidangan sane edotang ipun jaga dados bagiannyane. Sasampune punika mangda ipun mawali malih ring tiang.
5 Tanahe punika jaga kadum pitung duman ring pantaranipune. Suku Yehuda jaga tetep magenah ring wewidangannyane bedelod. Tur suku Yusup ring wewidangannyane sane baler.
6 Semeton patut nyatet wates-wates tanahe sane pitung duman punika, tur catetane punika raris paicayang ring tiang. Sasampune punika tiang jaga mulang undi, buat nunas pawuwus Ida Sang Hyang Widi Wasa, Widin iragane pabuat semeton.
7 Suku Lewi nenten jaga polih duman tanah ring pantaran semetone, santukan duman danene inggih punika dados pandita druen Ida Sang Hyang Widi Wasa. Sajaba punika, suku Gad, suku Ruben, abagian suku Manase dangin tukad sampun pada nampi duman tanah dangin Tukad Yordane, sane sampun kapaicayang antuk Dane Musa, parekan Ida Sang Hyang Widi Wasa.”
8
Dane Yosua mapaica piteket ring anake sane jaga kutus punika, sapuniki: “Rarisangja mamargi nylajah tur sikut jagate puniki. Sasampune punika rarisang malih mawali ring tiang. Wusan punika tiang jaga nunas pawuwus Ida Sang Hyang Widi Wasa pabuat semeton, malantaran tiang mulang undi iriki ring Silo.” Anake sane kaselik punika raris pada mamargi jagi ngilehin jagate punika.9 Anake punika raris mamargi nylajah jagate punika makasami, tur nyatet tanahe punika, kadadosang pitung duman, samaliha kota-kotannyane sami pada kacatet. Sasampune punika ipun raris mawali ring Dane Yosua ring genahe mapunduh ring Silo.
10 Dane Yosua raris mulang undi, nunas pawuwus Ida Sang Hyang Widi Wasa, pabuat ipun sareng sami. Wusan punika Dane Yosua raris ngedumang tanahe punika ring suku-suku Israele sane durung polih duman.
11
Sane pinih riin polih duman inggih punika parakulawarga sajeroning suku Benyamin. Tanahnyane magenah ring selagan tanah suku Yehudane klawan tanah suku Yusupe.12 Bates sisi kalernyane ngawitin saking Tukad Yordane, ngraris ka sampih gununge sane baler kota Yerikone, raris ngauhang nglintang ring pagunungan, kantos rauh ring tegal melakang Bet-Awene.
13 Batese punika ngraris ka sampih gununge sane delod Luse (sane taler mawasta Betel), ngraris ka Atarot-Adar ring pagunungan sane delod Bet-Horon-Tebenan.
14 Batese punika raris mabelok ngelodang saking sampih gununge punika, ngraris ka Kiryat-Baal (wiadin Kiryat-Yearim) sane dados druen suku Yehudane. Punika sane makadados bates kauhnyane.
15 Bates kelodnyane ngawit saking tanggun Kiryat-Yearime, ngraris ka toya klebutane ring Me-Neptoah.
16 Batese punika nglantur ka bongkol gununge sane marep-arepan ring Lebak Hinom ring tanggun baler Lebak Repaime. Saking irika raris ngelodang nglintang ring Lebak Hinom, delod sampih bukit Yebuse ngraris ka En-Rogel.
17 Saking irika raris mabelok ngalerang ka En-Semes, raris nglantur ka Gelilot, benengan margine ngamunggahang ring Adumim. Batese punika raris nglantur ka Batu Bohan (Bohan punika okan Dane Ruben),
18 raris nglintang ring baler sampih gununge sane marep-arepan ring Lebak Yordane. Saking irika raris tedun ka lebake,
19 nglintang ring baler sampih gununge ring Bet-Hogla, raris bedah ring loloan Tukad Yordane ring sisi kaler Segara Matine. Punika sane dados batesipun.
20 Tukad Yordane punika makadados bates kanginipun. Punika sane dados bates tanah duman parakulawarga sajeroning suku Benyamin.
21
Kota-kota sane dados druen kulawarga-kulawarga sajeroning suku Benyamine, inggih punika: Yeriko, Bet-Hogla, Emek-Kesis,22 Bet-Araba, Semaraim, Betel,
23 Haawim, Para, Opra,
24 Kepar-Haamonai, Opni miwah Geba. Makasami punika wenten roras akehipun, makamiwah desa-desa sakiwa tengennyane.
25 Sajaba punika taler kota Gibeon, Rama, Beerot,
26 Mispa, Kepira, Mosa,
27 Rekem, Yirpeel, Tarala,
28 Sela, Elep, Yebus (wiadin Yerusalem), Gibea miwah Kiryat-Yearim. Makasami wenten patbelas akehipun, makamiwah desa-desa sakiwa tengenipun. Punika makasami dados tanah duman pabuat kulawarga-kulawarga sajeroning suku Benyamine.
1
Sane kaping kalih polih duman tanah, inggih punika kulawarga-kulawarga sajeroning suku Simeon. Edumannyane punika magenah ring pantaran tanah suku Yehudane.2 Sane dados dumannyane, inggih punika Berseba, Seba, Molada,
3 Hasar-Sual, Bala, Esem,
4 Eltolad, Betul, Horma,
5 Siklag, Bet-Hamarkabot, Hasar-Susa,
6 Bet-Lebaot miwah Saruhen. Makasami wenten telulas kota akehipun, makamiwah desa-desa ring kiwa tengennyane.
7
Sajaba punika, taler kota Ain, Rimon, Eter miwah Asan. Makasami wenten petang kota makamiwah desa-desa ring kiwa tengennyane.8 Sajeroning punika taler patut ketang sakancan kota sane wenten ring kiwa tengennyane, minakadi Baalat-Beer (inggih punika Rama) sane wenten bedelod. Punika makasami duman tanah sane kapaicayang ring parakulawarga suku Simeone.
9 Santukan tanah duman suku Yehudane bes linggah, punika awinannya abagian saking dumannyane kapaicayang ring suku Simeon.
10
Sane kaping tiga polih duman tanah, inggih punika kulawarga-kulawarga suku Sebulon. Bates wewidangan tanahnyane ngantos rauh ring Sarid.11 Saking irika batese punika ngauhang ngungsi ka Marala, ngantos rauh ring Dabeset, miwah rauh ring tukad sane dangin Yokneame.
12 Sapanglanturipun batese punika nganginang saking Sarid ngraris ka bates Kislot-Tabore, ngraris ka Dobrat tur nglantur munggah rauh ka Yapia.
13 Saking irika watesnyane ngraris ka Gat-Heper, miwah Et-Kasin, raris mabelok ka Nea, tumuli ngungsi ka Rimon.
14 Ring sisi kalernyane batese punika mabelok nuju ka Hanaton, bedah ring Lebak Yiptah-El.
15 Wates-watesnyane punika, nglikub kota-kota: Katat, Nahalal, Simron, Yidala miwah Betlehem, makasami wenten roras akehipun rauhing desa-desa sane ring kiwa tengennyane.
16 Kota-kota miwah desa-desa sane ring kiwa tengennyane punika makasami magenah ring wewidangan sane dados padruen parakulawarga suku Sebulone.
17
Sane polih duman tanah sane kaping pat, inggih punika parakulawarga suku Isakar.18 Wewidangannyane, inggih punika: Yisreel, Kesulot, Sunem,
19 Haparaim, Sion, Anaharat,
20 Rabit, Kision, Eber,
21 Remet, En-Ganim, En-Hada miwah Bet-Pases.
22 Batesnyane taler nganteg rauh ring Tabor, Sahasima miwah Bet-Semes, bedah ring Tukad Yordane. Wewidangannyane punika wenten nembelas kota akehipun, rauh ring desa-desa sakiwa tengennyane.
23 Punika kota-kota miwah desa-desa sane makadados padruen parakulawarga suku Isakare.
24
Sane kaping lima polih duman tanah, inggih punika parakulawarga sajeroning suku Aser.25 Wewidangannyane inggih punika: Helkat, Hali, Beten, Aksap,
26 Alamelek, Amad miwah Misal. Bates kauhnyane rauh ring Gunung Karmel miwah Tukad Libnat.
27 Saking irika watesnyane mabelok nganginang rauh ka Bet-Dagon, kantos rauh ring bates wewidangan suku Sebulone miwah Lebak Yeptah-Ele, raris ngalerang rauh ka Bet-Emek miwah Nihiel. Saking irika malih ngraris ngalerang rauh ka Kabul,
28 Ebron, Rehob, Hamon miwah Kana, kantos rauh ring Sidon.
29 Saking irika batese punika mabelok ka Rama, kantos rauh ring kota Tirus, inggih punika kota sane mabenteng. Sapanglanturipun watesnyane punika mabelok ka Hosa, tumuli bedah ring Segara Tengah. Wewidangannyane nglikub taler kota-kota minakadi: Mahalab, Aksib,
30 Uma, Apek miwah Rehob. Dados wewidangannyane makasami wenten kalih likur kota akehnyane, rauhing desa-desa sakiwa tengennyane.
31 Punika kota-kota miwah desa-desa sane dados wewidangan druen parakulawargan suku Asere.
32
Sane kaping nem polih duman tanah, inggih punika parakulawarga sajeroning suku Naptali.33 Bates wewidangannyane ngawit saking Helep rauhing wit tarune ring Saananim, ngraris ka Adami-Nekeb miwah Yabneel, rauh ka Lakum, raris bedah ring Tukad Yordane.
34 Saking irika watese punika mabelok ngauhang ka Asnot-Tabor, tur saking irika ngraris ka Hukok. Ring sisi kelodnyane ngaplug wewidangan suku Sebulon, ring sisi kauhnyane wewidangan suku Aser, miwah sisi kanginnyane Tukad Yordan.
35 Kota-kota sane mabenteng inggih punika: Sidim, Ser, Hamat, Rakat, Kineret,
36 Adama, Rama, Hasor,
37 Kedes, Edrei, En-Hasor,
38 Yiron, Migdal-El, Horem, Bet-Anat miwah Bet-Semes. Ring wewidangan punika wenten kota siangolas akehipun, rauhing desa-desa sakiwa tengennyane.
39 Punika kota-kota miwah desa-desa sane dados druen parakulawargan suku Naptaline.
40
Sane kaping pitu polih duman tanah, inggih punika kulawarga-kulawarga sajeroning suku Dan.41 Sane dados wewidangannyane, inggih punika nglikub: Sora, Estaol, Ir-Semes,
42 Saalabin, Ayalon, Yitla,
43 Elon, Timna, Ekron,
44 Elteke, Gibeton, Baalat,
45 Yehud, Bene-Berak, Gat-Rimon,
46 Me-Yarkon miwah Rakon, rauhing wewengkon sakiwa tengen kota Yopene.
47 Ritatkala suku Dan sampun kakirangan tanah, dane sareng sami raris lunga magegebug ka kota Lesem. Kotane punika raris kakaonang, jadmannyane sami kapademang, tur kotane punika tumuli kaug. Ipun sareng sami tumuli jenek irika, tur wastan kotane punika raris kagentosin dados: Dan, manut pesengan leluurnyane.
48 Punika makasami kota-kota miwah desa-desa sane dados tanah wewidangan kulawarga-kulawarga suku Dane, makadados paderbeannyane.
49
Sasampune wong Israele puput ngedum-ngedum tanahe punika, Dane Yosua okan Dane Nun, tumuli katurin taler duman tanah.50 Satinut ring pituduh Ida Sang Hyang Widi Wasa, dane katurin kota-kota sane arsayang dane, inggih punika: Timnat-Serah ring pagunungan Epraim. Dane tumuli ngwangun kotane punika, tur dane raris jenek malinggih irika.
51
Kadi asapunika dane Pandita Eleasar, Dane Yosua okan Dane Nun miwah parapanglingsir kulawarga-kulawarga suku bangsa Israele ngedumang tanahe punika malantaran mulang undi buat nunas pawuwus Ida Sang Hyang Widi Wasa. Indike punika kamargiang ring Silo ring ajeng lawang Kemah Linggih Ida Sang Hyang Widi Wasa. Kadi asapunika indiknyane dane pada ngedum-ngedum tanahe punika ngantos puput.1
Sasampune punika Ida Sang Hyang Widi Wasa raris ngandikayang Dane Yosua,2 mangda dane mabaos ring wong Israele, kadi asapuniki: “Pilihja makudang-kudang kota ane dadi kota pasayuban, buka ane suba pituduhang Ulun teken kita malantaran Musa.
3 Anake ane ngamatiang anak uli krana tusing nyelepang, ia nyidayang malaib kema, buat ngluputang dewekne uli anake ane mabudi matandang wirang teken ia.
4 Ia dadi malaib ka salah tunggal kota-kotane ento, tur ditu ia nunas tetepasan, malantaran ia nguningayang sapariindiknyane teken parapanglingsir kotane ditu, di arepan kotane ento. Sasubane keto parapanglingsir kotane ento nglugrain ia masuk ka kota, tur kicen tongos madunungan, apanga ia nyidayang nongos ditu.
5 Yen anake ane matandang wirang ento ngetut ia kema, wong kotane patut nyayubin anake ento, sawireh ia ngamatiang anak ulihan tusing nyelapang, buina tusingja ulihan gedeg teken ane mati ento.
6 Anake ento patut nongos di kotane ento, kanti ia nampi tetepasan uli paruman pangadilane, muah kanti anake ane dadi Pandita Agung dugase ento mati. Sasubane keto mara anake ento dadi mulih buin ka kotannyane, kota ane laad kalahina malaib.”
7
Duaning punika, bangsa Israele raris nyelik kota-kota sane makadados kota-kota pasayuban. Inggih punika Kedes ring Galilea, ring Pagunungan Naptali; kota Sikem ring Pagunungan Epraim, miwah kota Hebron ring Pagunungan Yehuda.8 Ring dangin Tukad Yordane, ring pagunungan tanah melakange dangin Yerikone, ipun nyelik kota-kota pasayuban minakadi kota-kota Beser ring wewidangan suku Ruben, Ramot sane ring Gilead ring wewidangan suku Gad, miwah Golan ring Basan, ring wewidangan suku Manase.
9 Punika makasami kota-kota pasayuban, sane kapilih pabuat wong Israele makasami, miwah pabuat bangsa lianan sane magenah ring pantaran wong Israele. Asing-asing anak sane ngamademang jadma, ulihan ipun nenten nyelapang, ipun prasida polih pasayuban irika, luput saking anake sane mamanah matandang wirang. Anake punika tan dados kapademang, sadurung ipun katangkilang ring ajeng paruman pangadilane.
1
Sedek rahina anu, parapanglingsir kulawarga-kulawarga suku Lewine raris nangkil ring Sang Pandita Eleasar, miwah ring Dane Yosua, okan Dane Nun, pingkalih ring paralingsir-lingsir kulawarga sajeroning suku bangsa Israele makasami.2 Irika dane matur ring dane sareng sami ring Silo, ring tanah Kanaan, sapuniki atur danene: “Malantaran Dane Musa, Ida Sang Hyang Widi Wasa sampun mapituduh, mangda tiang sareng sami kicen kota genah tiange mumah, miwah tegalan ring kiwa tengen kotane punika, jaga genah tiange ngangonang ingon-ingon tiange.”
3 Duaning punika, satinut ring pituduh-pituduh Ida Sang Hyang Widi Wasa, bangsa Israele raris ngicen suku Lewine makudang-kudang kota, miwah pategalan genah ngangonang ingon-ingon, ring pantaran wewidangan dumannyane sareng sami.
4
Sane pinih riin polih duman kota inggih punika palingsehan Dane Kehat saking suku Lewi. Kulawarga saking katurunan Pandita Harun, polih duman kota telulas akehipun, sane magenah ring wewidangan suku Yehuda, Simeon miwah Benyamin.5 Kulawarga-kulawargan Dane Kehat sane lianan, polih duman kota adasa akehipun, magenah ring wewidangan suku Epraim, Dan miwah Manase sane dauh Tukad Yordane.
6
Kulawargan Dane Gerson, polih duman kota telulas akehipun, magenah ring wewidangan suku Isakar, Aser, Naptali miwah Manase sane dangin Tukad Yordane.7
Kulawarga sajeroning palingsehan Dane Merari polih kota roras akehipun, magenah ring wewidangan suku Ruben, Gad miwah Sebulon.8
Kadi asapunika wong Israele ngedumang kota-kota miwah pategalan genah ngangon ingon-ingon pabuat suku Lewine malantaran mulang undi, sakadi sane sampun kapituduhang antuk Ida Sang Hyang Widi Wasa malantaran Dane Musa.9
[9-19] Saking palingsehan Dane Kehat, parapandita katurunan Dane Harun sane pinih ngarep katurin nampi kota-kota. Dane katurin kota telulas rauh ka tegal-tegalnyane. Saking suku Yehuda miwah Simeon dane katurin kota-kota sia, inggih punika: Libna, Yatir, Estemoa, Holon, Debir, Ain, Yuta, Bet-Semes miwah Arba sane kawastanin manut wastan bapan suku Enake. Kotane punika, sane mangkin mawasta Hebron, punika makadados kota pasayuban ring Pagunungan Yehuda. Pategalan-pategalan miwah desa-desa ring kotane puniki sampun kapaicayang ring Dane Kaleb okan Dane Yepune makadados padruennyane. Saking suku Benyamin dane nampi kota patpat, inggih punika: Gibeon, Geba, Anatot miwah Almon.10
11
12
13
14
15
16
17
18
19
20
[20-26] Kulawarga-kulawarga sane tiosan sajeroning palingsehan Dane Kehat katurin kota adasa rauh ka tegal-tegalnyane. Saking suku Epraim dane nampi kota patpat, inggih punika: Bet-Horon, Kibsaim, Geser miwah Sikem, satunggaling kota pasayuban ring Pagunungan Epraim. Saking suku Dan, dane polih kota patpat, inggih punika: Elteke, Gibeton, Ayalon miwah Gat-Rimon. Saking suku Manase dauh tukad, dane nampi kota kekalih, inggih punika: Taanak miwah Gat-Rimon.21
22
23
24
25
26
27
[27-33] Satunggaling palingsehan saking suku Lewi, inggih punika palingsehan Dane Gerson, katurin kota telulas rauh ka tegal pangonannyane. Saking suku Manase dangin tukad, dane nampi kota kekalih, inggih punika Beestra miwah Golan, satunggaling kota pasayuban ring Basan. Saking suku Isakar dane nampi kota patpat, inggih punika: Kision, Dobrat, Yarmut miwah En-Ganim. Saking suku Aser dane nampi kota patpat, inggih punika: Misal, Abdon, Helkat miwah Rehob. Saking suku Naptali dane nampi kota tetiga, inggih punika Hamat-Dor, Kartan miwah Kedes, satunggaling kota pasayuban ring Galilea.28
29
30
31
32
33
34
[34-40] Wong Lewi sane tiosan, sane saking palingsehan Dane Merari katurin kota roras rauh ka tegal-tegal pangonannyane. Saking suku Sebulon dane nampi kota patpat, inggih punika: Yokneam, Karta, Dimna miwah Nahalal. Saking suku Ruben dane nampi kota patpat, inggih punika: Beser, Yahas, Kedemot miwah Mepaat. Saking suku Gad dane nampi kota patpat, inggih punika: Mahanaim, Hesbon, Yaeser miwah Ramot, satunggaling kota pasayuban ring Gilead.35
36
37
38
39
40
41
[41-42] Dadosipun saking tanah-tanah sane dados padruen bangsa Israele, wenten petang dasa kutus kota sane katurang ring suku Lewi. Asing-asing kota punika wenten tegal ring sakiwa tengennyane.42
43
Kadi asapunika Ida Sang Hyang Widi Wasa maicayang jagate punika makasami ring bangsa Israele, inggih punika jagat sane sampun janjiang Ida nganggen sumpah, jaga kapaicayang ring leluurnyane. Sasampune ipun ngaug jagate punika ipun tumuli magenah irika.44 Ida Sang Hyang Widi Wasa mapaica kerta raharja ring ipun, ring sawewengkon jagate punika, sakadi sane sampun janjiang Ida ring paraleluurnyane. Meseh-mesehnyane sampun tan wenten sane nyidayang mapas ipun, santukan Ida Sang Hyang Widi Wasa sampun ngicen ipun kamenangan marep ring meseh-mesehipune.
45 Ida Sang Hyang Widi Wasa ngamanggehang saananing prajanjian Idane, sane sampun janjiang Ida marep ring wong Israele.
1
Sasampune punika Dane Yosua raris maumang suku-suku Ruben, Gad miwah Manase sane dangin Tukad Yordane.2 Dane tumuli mabaos ring ipun sareng sami, kadi asapuniki: “Semeton sampun ngamargiang saluiring paindikan sane sampun kapangandikayang antuk Dane Musa, parekan Ida Sang Hyang Widi Wasa, ring semeton. Samaliha semeton taler sampun ngamargiang saananing prentah tiange ring semeton.
3 Ngantos rauh mangkin semeton durung naenin tan sareng mayuda nyarengin semeton ragane wong Israel. Semeton saking teleb nglaksanayang pituduh-pituduh Ida Sang Hyang Widi Wasa, Widin semetone.
4 Sane mangkin satinut ring prajanjian Ida Sang Hyang Widi Wasa, Widin semetone, Ida sampun mapica kerta raharja ring bangsa Israele, semeton druene. Duaning punika sane mangkin rarisangja mawali budal ka tanah sane sampun tampi semeton makadados duman semetone, sane sampun kapaicayang ring semeton dangin Tukad Yordane, antuk Dane Musa parekan Ida Sang Hyang Widi Wasa.
5 Tinutinja pidabdab sane sampun kapangandikayang antuk Dane Musa ring semeton, inggih punika, astiti baktija ring Ida Sang Hyang Widi Wasa, Widin semetone. Laksanayangja sapakarsan Idane tur iringangja sapituduh Idane. Samaliha satia tuuja ngiring Ida, miwah aturangja ayah semetone ring Ida saking nekeng ati, miwah saguluking bayu sabda idep semetone.”
6 [6-8] Dane Yosua raris ngandikayang ipun pada budal, saha ngamertanin ipun sareng sami, kadulurin baos kadi asapuniki: “Sane mangkin semeton pada budal saha akeh makta arta brana, luiripun: Ingon-ingon, mas perak, temaga, besi miwah pangangge. Pada dumangja barang jejarahan sane saking meseh semetone punika ring parasemeton sajeroning sukun semetone.” Sasampune punika ipun sareng sami raris pada mamargi budal.
Dane Musa sampun maicayang duman tanah ring dangin Tukad Yordane pabuat suku Manase sane atenga. Nanging pabuat sane malih atenga kicen duman tanah ring dauh Tukad Yordane antuk Dane Yosua, sinarengan ring suku-suku sane lianan.7
8
9
Duaning punika suku Ruben, Gad miwah Manase dangin tukad, raris pada mamargi budal. Ipun sareng sami pada nilar wong Israel sane lianan ring Silo, ring jagat Kanaan. Ipun pada mamargi ngungsi tanah dumannyane suang-suang ring tanah Gilead, sane sampun tampi ipun, satinut ring pituduh Ida Sang Hyang Widi Wasa, sane sampun kapangandikayang antuk Dane Musa.10
Ritatkala suku Ruben, Gad miwah Manase dangin tukad rauh ring Gelilot, ring sisi kauh Tukad Yordane, ipun sareng sami raris ngwangun pamorboran aturan sane ageng pisan ring sisin Tukad Yordane.11 Raris wenten anak ngrauhang indike punika ring wong Israel sane lianan, sapuniki: “Cingakinja! Suku Ruben, Gad miwah Manase dangin tukad, sampun ngwangun pamorboran aturan sane ageng pisan ring Gelilot, ring sisin Tukad Yordane ring wewidangan iragane!”
12 Ritatkala wong Israele miragi indike punika, raris sami pada rauh paum ring Silo, gumanti praya ngebug suku-suku sane dangin tukad punika.
13
Wong Israele raris ngutus Dane Pinehas, okan Pandita Eleasar, ngrauhin suku Ruben, Gad miwah Manase dangin tukad punika ring tanah Gilead.14 Wenten anak sareng adasa sane nyarengin pamargin Dane Pinehas, inggih punika asing-asing suku sane dauh tukad ngamedalang wakil adiri sane pinaka dados panglingsir ring sukunnyane suang-suang.
15 Sasampun dane rauh ring tanah Gilead dane raris matemu ring suku Ruben, Gad miwah Manase dangin tukad.
16 Irika dane makadados wakil pasamuan druen Ida Sang Hyang Widi Wasa, raris mabaos ring suku sane dangin tukad punika, kadi asapuniki: “Punapi awinannya semeton nglaksanayang paindikan sane dursila sakadi puniki pamantuka ring Ida Sang Hyang Widi Wasa, Widin wong Israele? Malantaran semeton sampun ngwangun pamorboran aturan pabuat ragan semetone puniki, semeton sampun alpaka pamantuka ring Ida Sang Hyang Widi Wasa. Kenginan semeton nenten kantun astiti bakti ring Ida.
17 Punapike semeton lali ring dosan iragane ring Peor? Rikala punika Ida Sang Hyang Widi Wasa nyisipang kaulan Idane antuk grubug. Rauh mangkin iraga kantun ngrasayang paindikane punika. Punapike ukumane punika durung cukup?
18 Punapike sane mangkin semeton jaga nulak astiti bakti ring Ida. Yening ring rahinane mangkin semeton alpaka pamantuka ring Ida Sang Hyang Widi Wasa, ring rahinane benjang Ida jaga ngamargiang piduka ring wong Israele sami.
19 Duaning punika, yening tanah semetone nenten pantes anggen genah ngaturang bakti, ngiring mangkin magingsir ka tanah druen Ida Sang Hyang Widi Wasa, ring genah Kemah Linggih Idane kadegang. Rarisangja ambil tanahe sane ring pantaran tiange sareng sami, nanging sampunang pisan alpaka pamantuka ring Ida Sang Hyang Widi Wasa, wiadin alpaka ring tiang malantaran semeton ngwangun pamorboran aturan sane lianan sajawining pamorboran aturan ring Ida Sang Hyang Widi Wasa, Widin iragane.
20 Elingangja sapunapi indiknyane Akan pianak Serahe, sane tan nyak ngiringang pituduh-pituduh Ida Sang Hyang Widi Wasa ngeniang indik barang-barang sane sampun kapastiang mangda kasirnayang, kenginan pasamuan Israele makasami sane keni pasisip malantaran indike punika. Malantaran dosanipune punika, boya Akan kewanten sane padem.”
21
Parawarga suku Ruben, Gad miwah Manase dangin tukad raris matur ring parapanglingsir suku-suku sane saking dauh tukad punika, kadi asapuniki:22 “Wantah Ida Sang Hyang Widi Wasa sane maraga maha kuasa! Ida sane maraga Widi! Ida sane uning ring indik sane kardi tiang puniki tur tiang meled mangda semeton taler uning ring indike puniki. Menawita tiang sareng sami ngwangun pamorboran aturan puniki madasar manah alpaka miwah nenten satia tuu malih pamantuka ring Ida Sang Hyang Widi Wasa, rarisangja pademang tiang sareng sami iriki ring dauhe puniki.
23 Yening tiang tempal ring Ida Sang Hyang Widi Wasa, tur ngwangun pamorboran aturan pabuat dewek tiange niri, buat jaga morbor aturan maborbor wiadin aturan sesajen miwah aturan karahayuan, ledang Ida Sang Hyang Widi Wasa nyisipang tiang sareng sami.
24 Nenten pisan wenten manah tiange sakadi asapunika. Tiang ngardi indike puniki, santukan tiang ajerih benjang pungkur katurunan semetone jaga mabaos ring katurunan tiange sapuniki: ‘Semeton nenten wenten pasangketan ring Ida Sang Hyang Widi Wasa, Widin wong Israele.
25 Cingakinja becik-becik Tukad Yordane puniki sampun dadosang Ida bates ring pantaran tiange miwah parasemeton warga suku Ruben miwah Gad. Semeton sampun tan wenten pasangketan punapi-punapi pamantuka ring Ida Sang Hyang Widi Wasa.’ Raris benjang pungkur katurunan semetone jaga tan ngwehin katurunan tiange mabakti ring Ida Sang Hyang Widi Wasa.
26 Punika awinannya tiang ngwangun pamorboran aturan puniki, boya jaga anggen tiang morbor aturan wiadin ngaturang aturan.
27 Nanging makadados cihna, pabuat tiang miwah semeton, miwah katurunan iragane ring benjang pungkur, mungguing iraga sareng sami saking sujati mabakti ring Ida Sang Hyang Widi Wasa ring ajeng Kemah Linggih Idane sane suci, masrana antuk aturan sane maborbor, miwah aturan sesajen ping kalih aturan karahayuan. Malantaran punika katurunan semetone nenten jaga mabaos, mungguing katurunan tiange nenten wenten pasangketan punapa-punapi pamantuka ring Ida Sang Hyang Widi Wasa.
28 Kamanah antuk tiang, yen prade benjangan wenten paindikan kadi asapunika, katurunan tiange jaga mrasidayang mabaos, kadi asapuniki: ‘Indayangja cingakin! Leluur tiange sampun ngardi pamorboran aturan pateh sakadi pamorboran aturan druen Ida Sang Hyang Widi Wasa. Nanging punika boyaja kanggen morbor aturan maborbor wiadin aturan tiosan, sakewanten wantah kanggen cihna pabuat wargan tiange miwah wargan semetone.’
29 Sujatinipun tiang nentenja mamanah alpaka pamantuka ring Ida Sang Hyang Widi Wasa, wiadin wusan astiti bakti ring Ida malantaran ngwangun pamorboran aturan sane siosan pabuat morbor aturan maborbor, aturan sesajen wiadin aturan tiosan, santukan sampun wenten pamorboran aturan Ida Sang Hyang Widi Wasa, Widin iragane ring ajeng Kemah Linggih Idane.”
30
Dane Pinehas miwah parapanglingsir pasamuane makadasa sane nyarengin dane, inggih punika parapanglingsir suku-suku sane dauh tukad, sami pada ledang ring kayun mirengang atur suku Ruben, Gad miwah Manase sane dangin tukad punika.31 Dane Pinehas okan Sang Pandita Eleasar punika, tumuli mabaos, ring ipun sareng sami kadi asapuniki: “Sane mangkin tiang uning, mungguing Ida Sang Hyang Widi Wasa ngiangin iraga. Semeton boyaja mamanah alpaka pamantuka ring Ida. Duaning punika semeton sampun ngluputang wong Israele saking pasisip Ida Sang Hyang Widi Wasa.”
32
Sasampune punika Dane Pinehas miwah panglingsire punika raris nilar suku Ruben miwah Gad ring tanah Gilead, tumuli mawali ka Kanaan, saha nguningayang sapariindike punika makasami ring wong Israele.33 Wong Israele sami pada liang tur muji Ida Sang Hyang Widi Wasa. Ipun nenten malih maosang indik jaga magegebug tur ngaug tanah suku Ruben miwah suku Gade.
34
Parasuku Ruben miwah suku Gad, tumuli mabaos sapuniki: “Pamorboran aturane puniki makadados saksi pabuat iraga sareng sami, mungguing Ida Sang Hyang Widi Wasa punika maraga Widi.” Punika awinannya, ipun ngwastanin pamorboran aturane punika “Saksi”.1
Sue pisan Ida Sang Hyang Widi Wasa mapaica sutrepti ring wong Israele. Ipun nenten malih kusak-asik antuk meseh-meseh sane wenten ring kiwa tengennyane. Sajeroning punika, Dane Yosua sampun kalintang lingsir.2 Duaning punika dane raris maumang wong Israele makasami, inggih punika parapanglingsir, parapamimpin, parahakim miwah parasenapatine. Irika dane tumuli ngandika sapuniki: “Sane mangkin tiang sampun kalintang tua.
3 Semeton sareng sami sampun pada nyingak saluiring paindikan sane sampun kakardi pabuat semeton antuk Ida Sang Hyang Widi Wasa, Widin semetone, marep ring bangsa-bangsane punika. Ida Sang Hyang Widi Wasa, Widin semetone sampun mayuda pabuat semeton.
4 Tiang sampun ngedumang tanah bangsa-bangsane sane kantun iriki makadados bagian pabuat suku-suku bangsan semetone, kadi asapunika taler tanah bangsa-bangsane sane sampun kaonang tiang makasami, ngawit saking Tukad Yordane bedangin, kantos rauh ring Segara Tengahe bedauh.
5 Ida Sang Hyang Widi Wasa, Widin semetone pacang ngawinang ipun jerih saking ajeng semetone, tur Ida pacang ngingsirang ipun saking ajeng semetone. Semeton sane jaga nruenang tanahipune, sakadi sane sampun kajanjiang ring semeton antuk Ida Sang Hyang Widi Wasa, Widin semetone.
6 Duaning punika pagehangja ninutin sakancan sane sinurat ring cakepan Pidabdab Dane Musa. Sampunangja semeton tempal saking daging cakepan punika.
7 Samaliha sampunangja semeton masidi kara ngajak bangsa-bangsane sane kantun wenten ring pantaran semeton. Sampunang nyambat wastan dewa-dewan ipune, wiadin masumpah masrana wastan dewane punika, wiadin nyumbah miwah nyungsung dewa-dewane punika.
8 Nanging semeton patut astiti bakti ring Ida Sang Hyang Widi Wasa, sakadi sane sampun laksanayang semeton rauh mangkin.
9 Ida Sang Hyang Widi Wasa sampun ngaonang bangsa-bangsa sane ageng miwah mawisesa saking ajeng semetone, tur tan wenten malih sane purun mapas semeton.
10 Semeton suang-suang mrasidayang nyerihang jadma panyiuan akehipun, santukan Ida Sang Hyang Widi Wasa, Widin semetone sane mayuda pabuat semeton, sakadi sane sampun janjiang Ida ring semeton.
11 Duaning punika, pagehangja astiti baktin semetone ring Ida Sang Hyang Widi Wasa, Widin semetone.
12 Yening semeton nenten satia tuu ring Ida, tur semeton masidi kara ring bangsa-bangsa sane kantun wenten ring pantaran semetone, samaliha semeton juang-kajuang ngajak ipun,
13 elingangja mungguing Ida Sang Hyang Widi Wasa, Widin semetone nenten jaga malih ngaonang bangsa-bangsane punika saking ajeng semeton. Nanging ipun jaga dados baya pabuat semeton, minakadi dados jeet, wiadin bangbang pabuat semeton. Ipun taler pacang ngawinang semeton nandang sangsara, santukan ipun waluya sakadi pecut sane mecutin tundun semetone, wiadin dados dui ring penjekan semetone. Indike punika nglantur mamargi kadi asapunika, kantos semeton telas saking jagate sane becik puniki, sane sampun kapaicayang ring semeton antuk Ida Sang Hyang Widi Wasa, Widin semetone.
14
Sane mangkin, panemayan tiange padem sampun rauh. Semeton suang-suang uning ring angen semetone, mungguing Ida Sang Hyang Widi Wasa, Widin semetone sampun maicayang sakancan paindikan sane becik, sane sampun janjiang Ida ring semeton. Saluiring paindikan sane janjiang Ida makasami sampun kadagingin. Angan asikiko tan wenten sane nenten kalaksanayang.15 Nanging sakadi Ida sampun nagingin sakancan janjin Idane ring semeton, kadi asapunika taler Ida jaga nibakang bebendun Idane ring semeton.
16 Yening semeton nenten ngamanggehang prajanjian sane sampun kapituduhang ring semeton antuk Ida Sang Hyang Widi Wasa, Widin semetone, tur yen semeton ngancangin miwah nyungsung dewa-dewa sane lianan, kenginan Ida pacang menggah tur Ida jaga nyisipang semeton, tur semeton digelis pacang telas saking jagate sane becik puniki, sane sampun paicayang Ida ring semeton.”
1
Dane Yosua tumuli maumang suku-suku Israele makasami ring Sikem. Irika parapanglingsir, parapamimpin, parahakim miwah parasenapatin Israele, sareng sami pada pedek tangkil ring ayun Ida Sang Hyang Widi Wasa.2 Dane Yosua tumuli ngandika ring wong Israele makasami, sapuniki: “Sapuniki sabdan Ida Sang Hyang Widi Wasa, Widin Israele: ‘Imaluan leluur kitane nongos dangin Tukad Eprate, tur nyungsung dewa ane lenan. Salah tunggal leluur kitane ento madan Terah, bapan Abraham muah I Nahor.
3 Sasubane keto, Ulun nyemak, I Abraham, leluur kitane, uli di gumine dangin Tukad Eprate ento, laut Ulun nuntun ia nylajah sakuub gumi Kanaane. Ulun maicayang katurunan liu pesan teken ia. Ulun maicayang Ishak teken ia,
4 tur Ulun maicayang Yakub muah Esau teken Ishak. Ulun maicayang tanah pagunungan Edome teken Esau makadadi tanah gelahnyane, nanging leluur kitane Yakub muah pianak-pianaknyane pada rarud ka Mesir.
5 Sasubane keto Ulun lantas ngutus Musa muah Harun, tur Ulun ngadakang bencana gede di Mesir. Nanging Ulun nuntun kita pesu uli ditu.
6 Ulun ngajak leluur kitane magedi uli di Mesir, tur wong Mesire pada ngepung ia aji kreta muah prajurit ane negakin jaran. Nanging mara leluur kitane neked di Pasih Gelagahe,
7 ia pada masesambatan nunas ica teken Ulun. Ditu Ulun laut ngadakang peteng dedet buat melatin ia klawan wong Mesire. Buina gaenang Ulun apanga ombak pasihe pada magulungan tur nganyudang wong Mesire. Kita suba nawang unduke ane suba laksanayang Ulun marep teken gumi Mesire. Sasubane keto kita laut nongos di tegal melakange makelo pesan.
8 Suud keto Ulun lantas ngajak kita ka gumin wong Amorine ane nongos dangin Tukad Yordane. Wong Amorine pada nyiatin kita, nanging Ulun mapaica kamenangan teken kita. Kita ngaug guminnyane, tur Ulun nyirnayang ia di arepan kitane.
9 Sasubane keto, Balak, pianak Sipore, ane dadi ratu di Moab, teka nyiatin kita. Ia ngutus anak ngalih Bileam pianak Beore, apanga ia teka buat mastu kita.
10 Nanging Ulun tusing ngisinin pinunas Bileame ento. Ento awanane ia lantas ngamertanin kita. Malantaran ento Ulun ngluputang kita uli Balak.
11 Sasubane keto kita lantas ngliwatin Tukad Yordane, tur neked di Yeriko. Ditu wong Yerikone pada teka nyiatin kita. Aketo masih wong Amori, wong Peris, wong Kanaan, wong Het, wong Girgasi, wong Hewi, wong Yebuse pada nyiatin kita. Nanging Ulun mapaica kamenangan teken kita nglawan ia ajaka makejang.
12 Dikalane kita ngarepang mapag imusuh, Ulun ngadakang apanga ia takut tur bingung, mawanan ratun wong Amorine makadadua jerih kapilayu. Dadinne dongja pedang muah panah kitane ngranayang kita menang.
13 Ulun maicayang pategalan ane tusing taen pamulain kita, muah kota-kota ane tusing taen wangun kita. Ane jani kita nongos ditu muponin anggur muah saitun uli abiane ane tuara pamula-mulaan kitane.’ ”
14
Dane Yosua malih nglanturang pangandika sapuniki: “Duaning punika, sane mangkin luihangja Ida Sang Hyang Widi Wasa, tur astiti baktija ring Ida saking nekeng ati miwah satia tuu. Kutangja dewa-dewa sane kasungsung antuk leluur semetone ring Mesopotamia miwah ring Mesir. Astiti baktija wantah ring Ida Sang Hyang Widi Wasa kewanten.15 Yening semeton nenten kayun astiti bakti ring Ida, pastiangja ring rahinane mangkin, sapasira sane jaga sungsung semeton, punapike dewa sane kasungsung antuk leluur semetone ring Mesopotamia, punapike dewan wong Amorine, sane tanahnyane tongosin semeton mangkin? Pabuat tiang miwah kulawargan tiange, tiang wantah jaga astiti bakti ring Ida Sang Hyang Widi Wasa kewanten.”
16
Wong Israele tumuli masaur manuk sapuniki: “Tiang sareng sami nenten jaga nilar Ida Sang Hyang Widi Wasa tur nenten jaga nyungsung dewa-dewa sane lianan.17 Ida Sang Hyang Widi Wasa, Widin iragane sampun nantan leluur iragane miwah iraga sareng sami medal saking Mesir, genah iragane dados panjak, tur iraga sampun ngeton katawahan-katawahan sane sampun sinahang Ida. Ida tansah nyayubin iraga saparilampah iragane ring pantaran bangsa-bangsane sane entap iraga.
18 Rikala iraga ngaug jagate puniki, Ida Sang Hyang Widi Wasa ngaonang wong Amorine sane magenah iriki. Punika awinannya tiang wantah jaga astiti bakti ring Ida Sang Hyang Widi Wasa kewanten santukan wantah Ida sane dados Widin iragane.”
19
Dane Yosua malih ngandika ring anake akeh punika, sapuniki: “Nanging menawita semeton nenten jaga mrasidayang astiti bakti ring Ida Sang Hyang Widi Wasa. Ida maraga Widi sane suci, Ida nenten ledang yen wenten sane nyamenin Ida. Ida nenten kayun jaga ngampurayang dosa-dosan semetone.20 Duaning punika yening semeton nilar Ida tur nyungsung dewa-dewa sane lian, Ida jaga mapas tur nyisipang semeton. Ida jaga nyirnayang semeton, yadiastun sane riin Ida ledang ring semeton.”
21
Rakyate sami pada masaur manuk sapuniki: “Nenten pisan kadi asapunika. Tiang jaga tansah astiti bakti ring Ida Sang Hyang Widi Wasa.”22
Dane Yosua malih ngandika: “Semeton ngraga sampun dados saksi mungguing semeton sareng sami sampun pada ingkup jaga astiti bakti wantah ring Ida Sang Hyang Widi Wasa kewanten.” Pasaur pasamuane: “Inggih titiang makasami dados saksi.”23
Dane Yosua malih ngluedang sapuniki: “Yening kadi asapunika, rarisangja kutang dewa-dewa sunantara sane wenten ring pantaran semetone, tur majanjija mungguing semeton wantah nyungsung Ida Sang Hyang Widi Wasa, Widin wong Israele kewanten.”24
Rakyate raris sumaur, sapuniki: “Tiang jaga astiti bakti ring Ida Sang Hyang Widi Wasa, Widin iragane. Tiang jaga sairing ring sapatitah Idane.”25
Duaning punika, ring rahinane punika Dane Yosua ngardi pasubaya ring bangsane punika, tur irika ring Sikem dane maicayang pidabdab miwah uger-uger sane patut katinutin antuk bangsane punika.26 Dane Yosua nyuratang pidabdab miwah uger-ugere punika ring cakepan Pidabdab Ida Sang Hyang Widi Wasa. Sasampune punika dane raris ngambil batu sane ageng tumuli kajujukang ring wit tarune sane ageng, ring genahe nyungsung Ida Sang Hyang Widi Wasa.
27 Dane raris ngandika ring bangsane punika sami, sapuniki: “Batune puniki jaga dados saksin iragane. Ipun sampun miragiang sabdan Ida Sang Hyang Widi Wasa, sane sampun kasabdayang ring iraga. Duaning punika ipun jaga dados saksi marep ring semeton, mangdane semeton nenten alpaka pamantuka ring Ida Sang Hyang Widi Wasa, Widin semetone.”
28 Sawusan punika Dane Yosua raris ngandikayang rakyate makaon saking irika, tur ipun tumuli pada mawali ka tanahipune suang-suang.
29
Sasampune punika Dane Yosua okan Dane Nun parekan Ida Sang Hyang Widi Wasa raris seda rikala dane mayusa satus dasa warsa.30 Layon danene raris kaperemang ring tanah duman danene ring Timnat-Serah, ring pagunungan Epraim, baler Gunung Gaase.
31
Sapanyeneng Dane Yosua, bangsa Israele tansah pada astiti bakti ring Ida Sang Hyang Widi Wasa. Kadi asapunika taler sapanglanturipun, sasampun dane seda, sapanyeneng parapamimpine sane sampun pada nyingak saluiring paindikan sane kakardi antuk Ida Sang Hyang Widi Wasa pabuat wong Israele, ipun taler pada astiti bakti ring Ida Sang Hyang Widi Wasa.32
Layon Dane Yusup, sane kabuat antuk wong Israele saking Mesir, taler kaperemang ring Sikem, ring tanah sane pecak katumbas antuk Dane Yakub, sane mapangarga satus bidang jinah perak saking oka-okan Dane Hemor, ajin Dane Sikem. Tanahe punika katamiang antuk katurunan Dane Yusup.33
Dane Eleasar, putran Dane Harun taler seda tur kaperemang ring kota Gibea, kota sane ring pagunungan Epraim, sane sampun kapaicayang ring okan danene sane mapesengan Pinehas.