1

¹

Puniki pangandikan Dane Musa, sane nikayang dane ring sawatek wong Israele duke wenten ring tegal melakang dangin Tukad Yordane, ring Lebak Yordane nampek ring kota Supe, ring pantaran kota Paran klawan kota Topel, Laban, Haserot miwah Di-Sahab.

² (Bangsa Israele mamargi saking Gunung Sinai, tumuli rauh ring Kades-Barnea, nglintangin Pagunungan Edom, wenten solas rahina suenipun mamargi.)

³ Ring tanggal satu, sasih sane kaping solas, taun sane kaping petang dasa, sasampun bangsa Israele makaon saking Mesir, Dane Musa raris ngrauhang ring wong Israele saananing sane kapituduhang antuk Ida Sang Hyang Widi Wasa ring dane, buat miteketin wong Israele.

⁴ Daweg punika Dane Musa sampun ngaonang Sang Prabu Sihon, ratun wong Amorine, sane malinggih ring Hesbon, miwah Sang Prabu Og, ratune ring panegara Basan, sane mrentah kota Astarot miwah Edrei.

⁵ Irika Dane Musa ngawitin nlehtehang pituduh Ida Sang Hyang Widi Wasa punika, ring dangin Tukad Yordane, ring tanah Moab, sapuniki pangandikan danene:

⁶

“Ida Sang Hyang Widi Wasa Widin iragane sampun masabda ring iraga ring Gunung Sinaine kadi asapuniki: ‘Suba makelo pesan kita nongos di gununge ene.

⁷ Ane jani, kema embus kemah-kemah kitane, laut majalan ngungsi pagunungan wong Amorine, muah sig sawatek wewidangan di kiwa tengennyane di Lebak Yordane, di pagunungan, di bukit-bukite muah di lebak-lebak daerah ane bedelod, muah neked ka Segara Tengahe. Kema jani ka gumi Kanaane, tur ngliwat di Pagunungan Libanon ngantos neked di Tukad Eprate ane gede.

⁸ Ulun ene Sang Hyang Widi Wasa suba nyanjiang gumine ento makejang teken leluur kitane Abraham, Ishak, Yakub, muah teken katurunannyane. Kemaja kita majalan tur nongosja di gumine ento.’ ”

⁹

Dane Musa ngandika ring bangsa Israele sapuniki: “Daweg iraga kantun ring Gunung Sinai, tiang sampun mabaos ring parasemeton mungguing tanggung jawab mimpin semeton abot pisan pabuat tiang. Tiang tan mrasidayang ngamargiang indike punika newek.

¹⁰ Ida Sang Hyang Widi Wasa, Widin semetone ngardi semeton kantos akeh pisan sakadi bintang ring langite.

¹¹ Dumadak Ida Sang Hyang Widi Wasa, Widin leluur parasemetone ngwuwuhin parasemeton ngantos tikel ping siu, tur nadosang semeton bangsa sane wibuh, sakadi sane sampun janjiang Ida marep ring semeton.

¹² Nanging kadi asapunapi jaga antuk tiang newek negen tanggung jawab sane abot, buat muputang sakancan wicaran parasemetone?

¹³ Duaning punika, pilihja ring pantaran suku bangsan semetone anak lanang sane wicaksana, midep miwah sampun madue pangalaman. Tiang jaga ngamanggehang semeton punika dados pamimpin parasemetone.

¹⁴ Parasemeton nagingin pinunas tiange punika.

¹⁵ Duaning punika tiang sampun ngambil pamimpin sane wicaksana tur madue pangalaman sane sampun selik semeton saking pantaran suku bangsan semetone, tur tiang raris ngangkat ipun dados pamimpin parasemetone. Wenten sane dados pamimpin pasukan siu diri, pamimpin pasukan satus diri, pamimpin pasukan seket diri, pamimpin pasukan dasa diri. Sajaba punika tiang taler sampun ngangkat pamimpin buat ngapalain suku-suku bangsan semetone.

¹⁶

Samaliha duk punika tiang mrentahang parapamimpin semetone kadi asapuniki: ‘Becikang nabdab wicara-wicara sane wenten ring pantaran bangsan semetone, tur tepasinja saha adil wicaran anake sane mawicara nglawan nyama-nyamaannyane, wiadin nglawan wong sunantara sane wenten ring pantaran semetone.

¹⁷ Sajeroning nepasin wicara, sampunang semeton mapilih kasih. Asing-asing anak mangda katepasin antuk dasar sane pateh tur sampunang maminayang anak. Sampunang semeton ajerih ring sapasira jua, santukan tetepasan semetone punika rauhipun saking Ida Sang Hyang Widi Wasa. Yening wenten wicara sane kalintang abot pabuat semeton, patut semeton ngrauhang wicarane punika ring tiang, mangda tiang sane nepasin.’

¹⁸ Rikala punika tiang sampun ngaturang pakeling ring parasemeton, ngeniang paindikan sane lian-lianan sane patut laksanayang semeton.”

¹⁹

“Sasampune punika iraga raris pada ngamargiang sapatitah Ida Sang Hyang Widi Wasa ring iraga. Iraga makaon saking Gunung Sinai, tur mamargi nglintangin tanah melakang sane linggah tur madurgama punika, tumuli ngungsi ka pagunungan wong Amorine. Rikala iraga rauh ring Kades-Barnea,

²⁰ [20-21] tiang raris mabaos sapuniki: ‘Sane mangkin semeton sampun rauh ring pagunungan wong Amorine. Tanahe punika sane kapaicayang pabuat iraga antuk Ida Sang Hyang Widi Wasa, Widin iragane miwah Widi sane kasungsung antuk leluur iragane. Cingakinja, tanahe punika wenten irika. Rarisang mrika tur malinggih irika anut ring titah Ida Sang Hyang Widi Wasa. Sampunang semeton bimbang wiadin ajerih.’

²¹

²²

Parasemeton sareng sami raris pada rauh ring tiang, sarwi mabaos kadi asapuniki: ‘Ngiringja iraga ngutus makudang-kudang anak ngriinin iraga, buat nyelehin jagate punika, mangda ipun raris ngwehin iraga gatra ngeniang margi sane pacang entap iraga, miwah kota-kota sane wenten irika.’

²³

Indike punika kamanah antuk tiang becik pisan. Duaning punika tiang raris milih anak roras diri, adiri saking asing-asing suku bangsane.

²⁴ Anake makaroras punika raris kesah tur mamargi ngungsi pagunungan, raris rauh ring Lebak Eskol, tumuli nyelehin jagate punika.

²⁵ Ipun sareng sami raris pada mawali ring iraga, tur makta woh-wohan sane keniang ipun irika. Samaliha, ipun taler makta gatra mungguing jagate sane kapaicayang antuk Ida Sang Hyang Widi Wasa ring iraga punika gemuh landuh.

²⁶

Nanging semeton sampun piwal ring titah Ida Sang Hyang Widi Wasa, Widin semetone malantaran nenten kayun lunga mrika.

²⁷ Parasemeton raris pada ngamigmig, sarwi mabaos sapuniki: ‘Ida Sang Hyang Widi Wasa bendu teken iraga. Ida ngajak iraga makaad uli tanah Mesir, tur iraga serahang Ida sig wong Amorine, apanga matianga.

²⁸ Apa lakar alih kema, iraga suba jejeh pesan. Nyama-nyamaan iragane ane utus iraga suba ngorahang teken iraga, mungguing bangsane ane ditu sitengan tur prawiraan teken iraga, tur kota-kota ane tongosina mabenteng tegeh kanti nganteg ka langite. Ia suba pada ningalin raksasa ditu.’

²⁹

Daweg punika tiang matur ring parasemeton, sapuniki: ‘Sampunangja ajerih ring jadmane punika!

³⁰ Ida Sang Hyang Widi Wasa Widin parasemetone, sane mamargi ring ajeng parasemetone, Ida pacang mayuda pabuat parasemetone, sakadi sane sampun aksi semeton ring Mesir,

³¹ miwah ring tegal melakange. Semeton sampun ngaksi mungguing Ida Sang Hyang Widi Wasa, Widin parasemetone sampun nuntun semeton ring margi kantos prasida rahayu rauh ring genahe puniki, tan bina kadi ibapa ngandong pianaknyane.’

³² Nanging yadiastun tiang sampun mabaos kadi asapunika, durung taler semeton pracaya ring Ida Sang Hyang Widi Wasa.

³³ Ida tansah ngriinin semeton buat ngrereh genah makemah. Ida mamargi ngriinin semeton malantaran saka geni rikalaning wengi, tur antuk saka ambun rikalaning rahina, buat mitujuhin semeton margi.”

³⁴

“Ida Sang Hyang Widi Wasa mireng pakrimik parasemetone, mawinan Ida raris duka pisan. Ida tumuli masumpah asapuniki:

³⁵ ‘Aukudko uli pantaran jlemane ane jaat ene tusing lakar ngentap gumi ane suba janjiang Ulun teken leluur kitane.

³⁶ Tuah Kaleb pianak Yepune ene ane lakar ngentap tanahe ento, sawireh ia tetep satia teken Ulun. Kaleb muah katurunannyane lakar icen Ulun gumine ane suba entasina ento.’

³⁷ Ulihan semeton, Ida Sang Hyang Widi Wasa taler sampun duka ring tiang, tur Ida masabda sapuniki: ‘Kita Musa, kita masih tusing lakar ngentap gumine ento.

³⁸ Nanging entegangja keneh Yosua pianak Nune parekan kitane ento. Ia ane lakar mimpin bangsa Israele buat ngaug gumine ento.’

³⁹

Sasampun punika Ida Sang Hyang Widi Wasa raris masabda ring iraga sareng sami kadi asapuniki: ‘Pianak-pianak kitane ane enu cenik-cenik buina ane tonden nawang lepas beneh, ane orahang kita lakar kajarah baan musuh-musuh kitane, ia ane lakar icen Ulun tanahe ento, tur ia ajaka makejang lakar nongos ditu.

⁴⁰ Nanging kita ajak makejang, kemaja malipetan ka tanah melakange ngentasin jalane ane ngungsi Teluk Akabane.’

⁴¹

Semeton tumuli masaur sapuniki: ‘Semeton Musa, tiang sareng sami sampun madosa ring Ida Sang Hyang Widi Wasa. Nanging sane mangkin tiang sareng sami jaga mayuda sakadi sane katitahang antuk Ida Sang Hyang Widi Wasa, Widin iragane.’ Semeton suang-suang tumuli sayaga jaga mayuda tur semeton marasa elah jaga ngebug gumi sane mabukit-bukit punika.

⁴²

Nanging Ida Sang Hyang Widi Wasa raris masabda ring tiang kadi asapuniki: ‘Eda baanga ia maperang, sawireh Ulun lakar tusing ngiangin ia, tur ia lakar kakalahang baan musuhnyane.’

⁴³ Tiang sampun ngrauhang sabdan Ida Sang Hyang Widi Wasa ring semeton, nanging semeton sareng sami nenten nglinguang. Semeton sareng sami raris brontak ring Ida Sang Hyang Widi Wasa, tur maduluran manah sane sumbung semeton raris ngungsi gumine sane wenten ring pagunungan punika.

⁴⁴ Wong Amorine sane nongos ring pagunungan punika raris medal nglawan semeton. Ipun sareng sami akeh pisan sakadi nyawane asebun. Ipun raris nguber parasemeton ngantos rauh ring Horma, tur ngaonang semeton irika ring Pagunungan Edom.

⁴⁵ Sasampune punika semeton raris pagelur nunas ica ring Ida Sang Hyang Widi Wasa, nanging Ida nenten kayun mireng wiadin nglinguang semeton.

⁴⁶ Sasampun punika iraga raris masandekan ring Kades kantos sue pisan.”

2

¹

“Pamuputipun iraga raris mawali ka tegal melakange, nglintangin margi sane ngungsi ka Teluk Akaba, anut ring titah Ida Sang Hyang Widi Wasa. Sasampune punika kantos sue pisan iraga ngumbara ring Pagunungan Edom.

²

Ida Sang Hyang Widi Wasa tumuli ngandika ring tiang,

³ mungguing sampun sue pisan iraga ngumbara ring pagunungane punika.

⁴ Ida Sang Hyang Widi Wasa raris ngandika ring tiang, mangda tiang ngaturin semeton pidabdab-pidabdabe puniki: ‘Tusing buin amunapa makelonne kita lakar ngentap Pagunungan Edom, gumin nyaman kitane katurunan Esaune. Ia lakar pada takut teken kita,

⁵ nanging kita tusing dadi ngebug ia, sawireh gumine ento angan abedikko tusing lakar paicayang Ulun teken kita sawireh gumi Edome suba paicayang Ulun teken katurunan Esaune.

⁶ Kita dadi meli pangan kinum sig iane.’

⁷

Elingang pisan mungguing Ida Sang Hyang Widi Wasa sampun ngamertanin semeton ring saluiring paindikan sane laksanayang semeton. Ida sampun matiningin semeton rikala semeton ngumbara nglintangin tegal melakange sane jimbar puniki. Ida sampun ngiangin semeton sajeroning petang dasa taun punika, tur Ida sampun mapaica saananing sane perluang semeton.

⁸

Iraga tumuli terus mamargi, tur makaon saking margine sane saking kota-kota Elat miwah Esion-Geber ngungsi ka Segara Mati, raris mabelok ngaja kanginang ngungsi ka Moab.

⁹ Ida Sang Hyang Widi Wasa masabda ring tiang sapuniki: ‘Eda pesan plegendahanga tur eda pesan gebuga wong Moab katurunan Lote ento. Kota Ar suba paicayang Ulun teken ia tur tanahe ento abedikko tusing lakar paicayang Ulun teken kita.’ ”

¹⁰

(Sane riin wenten jadma sane ageng-ageng sane kawastanin wong Emim magenah ring kota Ar punika. Tegehnyane pateh ring wong Enak, sane taler soroh raksasa.

¹¹ Sakadi wong Enake, ipun taler kawastanin wong Repaim, nanging wong Moab ngwastanin ipun wong Emim.

¹² Sane riin wong Hori magenah ring Edom, nanging katurunan Esau raris ngaonang tur nyirnayang bangsane punika, tumuli ngaug guminnyane, pateh sakadi bangsa Israel ring benjang pungkur ngaonang meseh-mesehnyane saking tanah sane kapaicayang antuk Ida Sang Hyang Widi Wasa ring ipun.)

¹³

“Sasampune punika iraga raris nglintangin Tukad Sered anut ring titah Ida Sang Hyang Widi Wasa ring iraga.

¹⁴ Indike punika mamargi sasampun tigang dasa kutus taun iraga makaon saking Kades-Barnea. Prajurit-prajurit ring masa punika makasami sampun padem sakadi sane sampun kasabdayang antuk Ida Sang Hyang Widi Wasa.

¹⁵ Ida Sang Hyang Widi Wasa terus-tumerus nglawan ipun, kantos ipun makasami telas kasirnayang.

¹⁶

Sasampune ipun makasami padem,

¹⁷ Ida Sang Hyang Widi Wasa raris ngandika ring iraga sapuniki:

¹⁸ ‘Di dinane ene kita lakar ngentasin gumi Moabe, ngliwatin jalan kota Are.

¹⁹ Dadinne kita suba paek teken gumin wong Amone, katurunan Lote. Eda pesan kita mlegendahang wiadin ngebug ia, sawireh tanahe ane suba paicayang Ulun teken ia ento, abedikko tusing lakar paicayang Ulun teken kita.’ ”

²⁰

(Jagate punika taler mawasta jagat Repaim, inggih punika wastan bangsa sane riin pecak magenah irika. Wong Amon ngwastanin bangsane punika wong Samsumim.

²¹ Bangsane punika taler ageng-ageng jeleganipune sakadi wong Enake. Ipun kuat-kuat pisan tur sareng akeh. Nanging Ida Sang Hyang Widi Wasa sampun nyirnayang ipun kantos wong Amone mrasidayang ngrampas guminipune, saha jenek irika.

²² Paindikan sane pateh sakadi asapunika taler kamargiang antuk Ida Sang Hyang Widi Wasa pabuat wong Edome, katurunan Esau sane magenah ring Pagunungan Edom. Ida Sang Hyang Widi Wasa ngaonang wong Hori, kantos wong Edome mrasidayang ngrampas guminnyane, raris ngaug gumine punika. Kantos rauh mangkin wong Edome kantun magenah irika.

²³ Tanahe sane wenten ring sapanjang pasisin Segara Tengahe kaug antuk jadma sane rauh saking pulo Kreta. Ipun sampun nyirnayang wong Awi, jadma uedan irika. Anak Kreta punika raris ngaug wewidangan tanahe irika, kelodnyane kantos rauh ring Gasa.)

²⁴

“Sasampun iraga nglintangin Moab, Ida Sang Hyang Widi Wasa raris ngandika ring iraga sapuniki: ‘Ane jani kemaja kita ngliwatin Tukad Arnone. Ulun lakar nyerahang teken kita Sang Prabu Sihon, ratun wong Amorine ane mrentah di Hesbon, muah guminnyane. Gebugja ia, lantas tongosin guminnyane.

²⁵ Ngawit uli di dinane ene Ulun lakar ngadakang apanga parabangsane dini ditu pada takut teken kita. Sabilang anak lakar jejeh ngetor yening ia ningeh adan kitane kasambat.’ ”

²⁶

“Tiang raris ngutus makudang-kudang utusan saking tegal melakang Kedemot mangda tangkil ring Sang Prabu Sihon ring Hesbon, buat nunas dame kadi asapuniki:

²⁷ ‘Ledang palungguh iratu nglugrain titiang nglintangin jagat druene. Titiang jagi wantah mamargi ring margine kewanten, tur nenten pacang simpang saking margine punika.

²⁸ Titiang jaga naur pangan kinum sane tunas titiang. Titiang wantah mamanah nglintang ring jagate iriki,

²⁹ kantos titiang nglintangin Tukad Yordane tur ngranjing ka jagat sane sampun kapaicayang antuk Ida Sang Hyang Widi Wasa, Widin titiange ring titiang. Sentanan Dane Esau sane malinggih ring Edom, miwah wong Moab sane magenah ring Ar taler sampun mebasang titiang jagi nglintang ring guminnyane.’

³⁰

Nanging Sang Prabu Sihon nenten nglugrain iraga nglintang ring jagat idane. Ida Sang Hyang Widi Wasa Widin semetone sampun ngawinang ida sang prabu bengkung tur mamayu, mangdane ida sida kaonang iraga tur gumin idane raris ambil iraga. Gumine punika kantun aug iraga kantos rauh mangkin.

³¹

Sasampune punika Ida Sang Hyang Widi Wasa raris ngandika ring tiang sapuniki: ‘Iwasinja Ulun ngadakang Raja Sihon muah guminnyane tusing nyidaang makiba di arepan kitane. Sawireh keto kemaja juang laut tongosinja guminnyane.’

³² Sang Prabu Sihon kasarengin antuk wadua balan idane tumuli rauh ngyudain iraga ring kota Yahas,

³³ nanging Ida Sang Hyang Widi Wasa, Widin iragane nyerahang ida ring iraga, raris ida sedayang iraga rauh ring putra-putran idane miwah wadua balan idane makasami.

³⁴ Daweg punika ugi iraga ngrampas tur nyirnayang saananing kota-kotane, tur ngamademang penduduknyane luh muani, rauh ring pianak-pianaknyane. Nenten wenten sane kabanggayang kantun urip.

³⁵ Ingon-ingonnyane ambil iraga tur kota-kotannyane rampas iraga.

³⁶ Ida Sang Hyang Widi Wasa sampun nglugrain iraga ngrampas kota-kotane punika makasami, ngawit saking kota Aroer, sane wenten ring tanggun Lebak Arnone miwah kota sane wenten ring lebake punika, sapanjang margine sane ngungsi ka Gilead. Nenten wenten kota mabenteng sane kuat pabuat iraga.

³⁷ Nanging iraga nenten nganampekin wong Amone wiadin tepin Tukad Yaboke wiadin kota-kotane ring pagunungan, kadi asapunika taler genah-genahe sane tiosan sane tan kalugrain antuk Ida Sang Hyang Widi Wasa.”

3

¹

“Wusan punika iraga raris mamargi ngalerang tur ngungsi jagat Basan. Irika Ida Sang Prabu Og, ratune ring Basan, kairing antuk wadua balan idane sami, maranin iraga, ayat mayuda nampek ring kota Edrei.

² Nanging Ida Sang Hyang Widi Wasa masabda ring tiang sapuniki: ‘Edaja kita jejeh teken ia, sawireh Ulun nyerahang ia muah wadua balannyane, teked kayang ka guminnyane teken kita. Laksanayangja marep teken ia unduke ane patuh buka ane laksanayang kita marep teken Sang Prabu Sihon, ratun wong Amorine ane mrentah di Hesbon.’

³

Tur Ida Sang Hyang Widi Wasa taler nyerahang Sang Prabu Og, miwah wadua balan idane makasami ring iraga, raris ida miwah kaulan idane pademang iraga makasami.

⁴ Duk punika ugi iraga ngrampas kotannyane makasami, tan wenten kota sane luput. Makasami wenten nem dasa akehipun, inggih punika sakuub wewidangan Argob, sane kaprentah antuk Sang Prabu Og, ratune ring Basan.

⁵ Kota-kotane punika makasami kiter antuk tembok benteng sane tegeh, saha madaging gapura-gapura sane mapalang. Sajaba punika akeh pisan taler kota sane nenten kiter antuk tembok.

⁶ Iraga masmi kota-kotane punika tur wong kotane punika makasami sirnayang iraga pateh sakadi sane sampun laksanayang iraga, marep ring Sang Prabu Sihon, ratune ring Hesbon. Iraga nyirnayang sawatek wong kotane sami, lanang wadon miwah pianak-pianak ipune.

⁷ Sakancan ingon-ingonnyane ambil iraga tur kota-kotannyane jarahin iraga.

⁸

Dadosipun duk punika saking ratun wong Amorine makakalih punika, iraga prasida ngrampas jagat sane wenten ring dangin Tukad Yordane, miwah Tukad Arnon kantos rauh ka Gunung Hermon.”

⁹ (Wong Sidone ngwastanin Gunung Hermon punika Siryon, miwah wong Amorine ngwastanin Senir.)

¹⁰ “Samaliha iraga ngambil kota-kotan Sang Prabu Og, ratune ring Basan, sakancan kotane sane wenten ring pagunungan, sawewidangan kota Gilead miwah Basan, tur nganginang kantos rauh ring Salka miwah Edrei.”

¹¹

(Ida Sang Prabu Og punika wong Repaim sane panguwus. Petin layon idane kakardi antuk batu, panjangnyane 4 meter tur lumbangnyane sawatara 2 meter manut ukuran resmi. Kantos rauh mangkin petine punika kantun wenten ring Raba, kotan wong Amone.)

¹²

“Sasampun gumine punika dados paderbean iragane, tiang raris nyerahang ring suku Ruben miwah Dan, tanahe sane wenten ring baler kota Aroere sane nampek ring Tukad Arnon miwah abagian Pagunungan Gilead makamiwah kota-kotanipune.

¹³ Atenga saking pantaran suku Manasene serahin tiang sisan Pagunungan Gileade miwah kota Basane sane pecak kaprentah antuk Ida Sang Prabu Og, inggih punika sawewidangan kota Argobe.”

(Sakuub Basan punika kawastanin gumin wong Repaime.

¹⁴ Sakuub wewidangan Argob punika, inggih punika saking Basan rauh ring wates Gesur miwah Maaka kambil antuk palingsehan Yair saking suku Manase. Dane raris ngwastanin kota-kotane punika manut ring parab danene ngraga, tur kantos rauh mangkin kotane punika kantun mawasta Yair.)

¹⁵

“Tanah Gilead serahang tiang ring palingsehan Makir saking suku Manase.

¹⁶ Tur pabuat suku Ruben miwah Gad serahin tiang tanah sane wenten ring pantaran Gilead miwah Tukad Arnone. Basan tengah tukade punika dados watesnyane, tur balernyane rauh ring Tukad Yabok, sane taler dados wates jagat wong Amone. Basan tengah tukade punika dados wates kelodnyane, sane apahannyane dados wates gumin wong Amone.

¹⁷ Sisi kauhnyane mabates Tukad Yordan, ngawit saking Danu Galilea sane baler kantos rauh ring Segara Mati sane bedelod, tur kanginnyane rauh ring bongkol Gunung Pisgane.

¹⁸

Daweg punika tiang taler ngrauhang piteket-piteket kadi asapuniki: ‘Ida Sang Hyang Widi Wasa, Widin iragane sampun mapaica gumi ring dangin Tukad Yordane buat dados gumin semetone. Sane mangkin rarisang sregepang prajurit semetone, tur kengken ipun nglintangin Tukad Yordane ngriinin suku-suku Israele sane tiosan, buat nulungin ipun ngaug jagate irika.

¹⁹ Oka-oka, rabi miwah ingon-ingon semetone sane akeh punika, mangda kantun ring kota-kota sane sampun serahang tiang ring semeton.

²⁰ Rarisang tulungin parasemeton-semetone kantos ipun ngaug jagat sane sampun kapaicayang antuk Ida Sang Hyang Widi Wasa ring ipun ring dauh Tukad Yordane, kantos Ida Sang Hyang Widi Wasa sampun mapaica kauripan sane tentrem, sakadi sane paicayang Ida ring semeton ring genahe puniki. Yen sampun sakadi asapunika, parasemeton dados mawali ka tanahe sane sampun serahang tiang ring semeton puniki.’

²¹

Sasampun punika tiang raris mabaos ring Yosua sapuniki: ‘Cening suba ningalin makejang unduk ane suba kalaksanayang baan Ida Sang Hyang Widi Wasa, Widin ceninge marep teken Raja Sihon muah Og. Buka keto masih ane lakar kalaksanayang baan Ida Sang Hyang Widi Wasa marep teken asing-asing raja ane guminne lakar rampas cening.

²² Edaja cening takut teken ia, sawireh Ida Sang Hyang Widi Wasa, Widin ceninge lakar maperang pabuat cening.’ ”

²³

“Daweg punika tiang mapinunas ring Ida Sang Hyang Widi Wasa sapuniki:

²⁴ ‘Oduh Ratu Sang Hyang Widi Wasa, Sane Maha Luur, titiang uning mungguing paindikan sane sinahang Palungguh IRatu ring titiang, punika wau pangawit saking pakardin Palungguh IRatu sane agung tur ngangobin. Nenten wenten Widi ring langite miwah ring gumine sane mrasidayang ngamargiang paindikan sane luih sakadi sane kardi Palungguh IRatu.

²⁵ Oduh Ratu Sang Hyang Widi Wasa ledang Palungguh IRatu nglugrain titiang nglintangin Tukad Yordane mangda titiang prasida ngeton tanah sane gemuh dauh tukad punika, jagat sane madaging bibit-bibit sane ngulangunin miwah Pagunungan Libanone.’

²⁶

Nanging parasemeton sane ngawinang Ida Sang Hyang Widi Wasa duka ring tiang kantos Ida nenten nagingin pinunas tiange. Tungkalikanipun Ida Sang Hyang Widi Wasa raris ngandika sapuniki: ‘Depang amonto dogen Musa, eda kita buin nyambat unduke ento.

²⁷ Kemaja kita menek ka Gunung Pisga tur tingalin marep kaja, kelod, kangin muah kauh. Melahang nlektekang apa ane tingalin kita, sawireh kita tusing lakar ngliwatin Tukad Yordane.

²⁸ Melahang mituturin Yosua. Orahin ia ngentegang bayunne, sawireh ia ane lakar mimpin bangsane ento ngliwatin Tukad Yordane buat ngaug tanahe ane tingalin kita ibusan.’

²⁹

Wus punika iraga raris masandekan ring lebake sane marep-arepan klawan kota Bet-Peore.”

4

¹

Dane Musa raris ngandika ring bangsa Israele sapuniki: “Pada pagehja semeton ngagem pidabdab sane sampun urukang tiang ring parasemeton, mangda semeton kalugra urip tur ngaug tanah sane sampun kapaicayang antuk Ida Sang Hyang Widi Wasa, Widin leluur semetone ring semeton.

² Saluiring sane sampun uduhang tiang, sampunang wuwuhina miwah kirangina angan akidik. Pagehangja ngamargiang titah-titah Ida Sang Hyang Widi Wasa, Widin semetone sane sampun rauhang tiang ring semeton.

³ Parasemeton ngraga sampun ngeton indik sane sampun kamargiang antuk Ida Sang Hyang Widi Wasa ring Gunung Peor. Asing-asing anak sane nyumbah Dewa Baal, sampun kasirnayang ring genahe punika,

⁴ nanging anake sane pageh bakti ngiring Ida Sang Hyang Widi Wasa, Widin semetone, ipun kantun urip rauh mangkin.

⁵

Pidabdab-pidabdabe punika makasami sampun urukang tiang ring semeton, sakadi sane katitahang antuk Ida Sang Hyang Widi Wasa, Widin tiange. Tinutinja pidabdabe punika makasami ring gumine sane pacang entap tur aug semeton.

⁶ Parasemeton patut saking satia tuu ngamargiang pidabdab-pidabdabe punika. Yening semeton pageh ngamargiang pidabdabe punika, jaga sinah kawicaksanan parasemetone ring bangsa-bangsane sane tiosan. Yening ipun miragi indik pidabdab-pidabdabe punika, ipun jaga mabaos sapuniki: ‘Ambate wicaksana tur ririh bangsane ane gede ento.’

⁷

Bangsa-bangsa sane tiosan, yadiastu amunapija agengipun, nenten wenten sane madue Widi, sakadi Ida Sang Hyang Widi Wasa, Widin iraga sane tansah nampek ring iraga. Ida nagingin pinunas iragane sabilang iraga nunas ica.

⁸ Bangsa-bangsa sane tiosan amunapija agengnyane, ipun nenten madue pidabdab-pidabdab sane yuakti adil sakadi pidabdabe sane urukang tiang ring parasemeton ring rahinane puniki.

⁹ Telebang tur elingang pisan, mangdane sakantun semeton urip semeton nenten lali ring indike sane sampun aksi semeton punika. Samaliha tuturangja indike punika ring oka miwah paraputun semetone,

¹⁰ inggih punika indik rahina rikala semeton ngadeg ring ayun Ida Sang Hyang Widi Wasa, Widin semetone ring Gunung Sinai. Daweg punika Ida ngandika ring tiang sapuniki: ‘Punduhangja bangsane ento. Ulun mapakayun apanga ia ajaka makejang ningehang unduk ane lakar sabdayang Ulun, apanga ia mlajah pageh ngiring Ulun sanun iane idup, tur apanga ia nguruk pianak-pianakne pageh bakti teken Ulun.’

¹¹

Critayangja ring oka-okan semetone indik semeton sampun rauh tur ngadeg ring bongkol gununge sane kalikub antuk andus peteng dedet, sakadi megane sane tebel miwah geni sane murub kantos rauh ring langite.

¹² Critayangja ring ipun indik Ida Sang Hyang Widi Wasa masabda ring parasemeton saking tengah genine punika, tur indik semeton miragiang sabdan Idane, nanging semeton nenten pisan ngantenang Ida.

¹³ Irika Ida sampun nguduhang ring semeton indik sane patut margiang semeton, buat ngamanggehang prajanjian sane sampun kardi Ida marep ring semeton. Dasa Titah sane sampun suratang Ida ring papan batune kekalih punika patut manggehang semeton.

¹⁴ Ida nitahang ring tiang, mangda tiang ngurukang ring semeton sakancan pidabdab sane patut manggehang semeton ring jagat sane pacang entap tur aug semeton.”

¹⁵

“Daweg Ida Sang Hyang Widi Wasa masabda ring semeton saking genine ring Gunung Sinai, semeton nenten ngantenang punapa-punapi. Dadosipun pabuat karahayuan semetone ngraga semeton patut eling.

¹⁶ Tangarin ragan semetone, sampunang semeton kantos ngardi dosa malantaran ngardi tur nyumbah arca marupa punapi jua, sane marupa muani wiadin luh.

¹⁷ Marupa sato wiadin paksi,

¹⁸ buron sane ngrayang wiadin mina.

¹⁹ Sampunang semeton kantos ngardi dewa malantaran nyumbah wiadin mabakti ring napi sane kantenang semeton ring langite, luiripun: surya, sasih miwah bintang-bintang. Ida Sang Hyang Widi Wasa, Widin semetone manggayang bangsa sane tiosan nyumbah barang-barange punika.

²⁰ Nanging parasemeton puniki bangsa sane sampun bebasang Ida saking panegara Mesir, genah parasemetone kapanjakang banget pisan. Parasemeton sampun bakta Ida medal saking jagate irika, mangda semeton dados kaulan Ida ngraga sakadi kawentenan semetone mangkin.

²¹ Parasemeton sane ngawinang Ida Sang Hyang Widi Wasa, Widin semetone duka ring tiang, tur Ida masumpah mungguing tiang nenten pacang nglintangin Tukad Yordane buat ngentap jagate sane gemuh, sane jaga paicayang Ida ring parasemeton.

²² Nenten malih amunapi suenipun semeton jaga nglintangin tukade punika, tur ngaug jagate sane gemuh punika, sakewanten tiang nenten pacang nyarengin semeton santukan tiang pacang padem iriki.

²³ Elingang pisan, sampunang semeton lali ring prajanjiane sane sampun kakardi antuk Ida Sang Hyang Widi Wasa, Widin semetone marep ring semeton. Manggehangja titah Idane, sampunang semeton ngardi arca sane pacang sungsung semeton, yadiastu marupa punapi kewanten.

²⁴ Santukan Ida Sang Hyang Widi Wasa, Widin semetone, waluya sakadi geni sane ngeseng. Ida nenten ledang yening wenten sane nyamenin Ida.

²⁵

Yening semeton sampun sue malinggih ring jagate punika, sampun madue oka miwah putu, sampunang taler semeton ngardi dosa malantaran makarya arca pabuat ragan semetone, sane marupa punapija luiripun. Pamargine sane kadi asapunika dados kajaatan ring ayun Ida Sang Hyang Widi Wasa tur jaga ngawinang Ida duka.

²⁶ Dumadak langit miwah gumine makadados saksi pabuat semeton ring rahinane puniki, mungguing yening semeton nenten tuwon ring tiang, semeton digelis pacang sirna saking jagate sane jaga aug semeton ring dauh Tukad Yordane punika. Semeton nenten pacang sue jenek irika, nanging semeton jaga kasirnayang makasami.

²⁷ Ida Sang Hyang Widi Wasa jaga nyambragang semeton ring pantaran bangsa-bangsa tiosan, tur wantah akidik saking pantaran semetone sane pacang kantun.

²⁸ Irika semeton pacang mabakti ring widi-widi sane kakardi antuk manusa, widi-widi sane malakar antuk taru miwah batu, sane buta miwah bongol sane nenten midep mangan miwah ngambu.

²⁹ Irika wau semeton pacang ngrereh Ida Sang Hyang Widi Wasa, Widin semetone, tur yening semeton ngrereh Ida antuk saguluk pakayunan semetone, semeton jaga kapanggih ring Ida.

³⁰ Yening semeton wenten sajeroning kamewehan tur makasami sengkalane nibenin parasemeton, pamuputipun semeton jaga mawali ring Ida Sang Hyang Widi Wasa tur pageh ngiring Ida.

³¹ Ida punika Widi sane kalintang kawelas arsan. Ida nenten jaga ngutang wiadin nyirnayang semeton, tur Ida nenten jaga lali ring prajanjian sane kardi Ida marep ring leluur parasemetone.

³²

Indayangja tureksain kawentenan duke nguni, sadurung semeton pada embas, ngawit saking rahina daweg Ida Sang Hyang Widi Wasa ngardi manusa ring jagate puniki. Indayang rereh ring satungkabing rat. Naeninke sadurung punika wenten paindikan sane agung kadi asapuniki? Naeninke wenten jadma miragi indik sane kadi asapuniki?

³³ Naeninke wenten bangsa kantun murip rikala ipun miragi sabdan Widi saking genine, sakadi kawentenan semetone?

³⁴ Naeninke wenten Widi sane purun ngambil bangsa saking pantaran bangsa tiosan, raris kadadosang kaula druen Idane, sakadi sane sampun kalaksanayang antuk Ida Sang Hyang Widi Wasa, Widin semetone marep ring semeton ring panegara Mesir? Parasemeton ngraga sampun pada ngantenang indik Ida Sang Hyang Widi Wasa sampun nibakang bencana miwah yuda, ngardi katawahan-katawahan tur ngamargiang paindikan-paindikan sane madurgama malantaran kawisesan Idane.

³⁵ Ida Sang Hyang Widi Wasa nyinahang indike punika sami ring semeton buat muktiang mungguing wantah Ida kewanten sane maraga Widi, tur nenten wenten malih Widi sane tiosan.

³⁶ Ida masabda saking langite buat nguruk semeton ring jagate puniki. Ida sampun nyinahang genin Idane sane suci pabuat semeton, tur saking genine punika Ida ngandika ring parasemeton.

³⁷ Duaning Ida asih ring leluur parasemetone, parasemeton sampun selik Ida, tur semeton sampun bakta Ida makaon saking Mesir malantaran kawisesan Idane sane ageng.

³⁸ Ring ajeng parasemetone Ida ngaonang bangsa-bangsane sane agengan tur kuatan ring semeton, buat ngaterang parasemeton ka guminnyane sane jaga kapaicayang ring semeton antuk Ida Sang Hyang Widi Wasa. Inggih punika gumi sane dados paderbean semetone sane mangkin.

³⁹ Duaning punika ring rahinane puniki, pada elingja tur sampunang kantos lali mungguing Ida Sang Hyang Widi Wasa punika Widi ring suargan miwah ring jagate. Nenten wenten Widi sane tiosan.

⁴⁰ Pada pagehja ngagem pidabdabe sane aturang tiang ring semeton ring rahinane puniki. Malantaran punika semeton miwah katurunan semetone pacang rahayu. Parasemeton jaga dirga yusa ring jagat sane kapaicayang antuk Ida Sang Hyang Widi Wasa buat dados paderbean semetone salami-laminipun.”

⁴¹

Dane Musa raris netepang kota tetiga ring dangin Tukad Yordane,

⁴² makadados kota pasayuban, inggih punika kota genah anake ngluputang dewek yening ipun nenten nyelapang ngamademang anak lian sane boya mesehipune. Ipun dados malaib ka salah tunggal kotane punika mangda ipun nenten kadanda pati.

⁴³ Buat suku Ruben kasediaang kota Beser, sane ring pagunungan tegal melakange. Pabuat suku Gad, kota Ramot sane ring wewidangan Gilead, tur pabuat suku Manase, kota Golan sane ring wewidangan Basan.

⁴⁴

Dane Musa mapaica pidabdab miwah paurukan-paurukan Ida Sang Hyang Widi Wasa ring bangsa Israel.

⁴⁵ [45-46] Dane maicayang pidabdab-pidabdabe punika ring bangsa Israel sasampun ipun medal saking Mesir tur kantun masandekan ring lebake ring dangin Tukad Yordane, sane marep-arepan ring kota Bet-Peore. Wewidangane punika pecak wewidangan Sang Prabu Sihon, ratun wong Amorine sane pecak mrentah ring kota Hesbon. Dane Musa miwah bangsa Israel sampun ngaonang ida, rikala bangsa Israel makaon saking Mesir.

⁴⁶

⁴⁷ Bangsa Israel ngaug jagat Ida Sang Prabu Sihon punika, kadi asapunika taler jagat Sang Prabu Og sane ring Basan, ratun wong Amorine sane tiosan, sane malinggih ring dangin Tukad Yordane.

⁴⁸ Jagate punika nglajur saking kota Aroer, sane ring sisin Tukad Arnone, ngraris ngalerang kantos rauh ring Gunung Siryon, inggih punika Gunung Hermon.

⁴⁹ Sane maug ring wewidangane punika inggih punika tanah sane ring dangin Tukad Yordane, kelod ipun rauh ring Segara Mati tur kanginipun rauh ring bongkol Gunung Pisgane.

5

¹

Dane Musa raris ngesengin tur munduhang bangsa Israel makasami raris dane ngandika asapuniki: “Parasemeton bangsa Israel, pirengangja pidabdab-pidabdab sane aturang tiang ring parasemeton ring rahinane puniki. Plajahinja pidabdab-pidabdabe punika tur laksanayangja saha tuon.

² Ida Sang Hyang Widi Wasa, Widin iragane sampun ngardi prajanjian ring iraga ring Gunung Sinai,

³ boya wantah ring leluur iragane kewanten, nanging taler ring iraga makasami sane kantun urip ring rahinane puniki.

⁴ Ring gununge punika, Ida Sang Hyang Widi Wasa masabda saking tengah genine marep-arepan ring semeton.

⁵ Daweg punika tiang majujuk ring pantaran parasemetone ring Ida Sang Hyang Widi Wasa buat ngrauhang sabdan Idane ring parasemeton, duaning parasemeton ajerih ring genine tur nenten kayun munggah ka gununge punika. Ida Sang Hyang Widi Wasa ngandika sapuniki:

⁶ ‘Ulun ene Ida Sang Hyang Widi Wasa, Widin kitane, ane ngajak kita pesu uli Mesir, di tongos kitane kapanjakang.

⁷

Edaja kita nyungsung widi-widi ane lenan. Sungsungja Ulun dogen.

⁸

Eda pesan kita ngae arca pabuat dewek kitane yadiastu ane marupa apa jua, ane ada di langite muah di gumine, wiadin ane ada di yehe di beten gumine.

⁹ Edaja kita nyungsung muah nyumbah arcane ento, sawireh Ulun Ida Sang Hyang Widi Wasa, Widin kitane tusing lila yening ada ane nyamenin Ulun. Ulun nyisipang anake ane geting teken Ulun, kanti neked katurunan ane kaping telu wiadin kaping pat.

¹⁰ Nanging Ulun nyinahang sih pasuecan Ulune teken panyiuan katurunan anake ane astiti bakti teken Ulun tur nglaksanayang titah Ulune.

¹¹

Edaja kita ngawag-awag nyambat parab Ulune, sawireh Ulun Ida Sang Hyang Widi Wasa, Widin kitane lakar nyisipang anake ane ngawag-awag nyambat parab Ulune.

¹²

Luihangja dina Sabate, tur ajiang dinane ento dadi dina ane suci, sawireh Ulun ene Ida Sang Hyang Widi Wasa, Widin kitane ane nitahang ento teken kita.

¹³ Kita kalugra magarapan sajeroning nem dina.

¹⁴ Nanging dinane ane kaping pitu ento, dina parerenan ane kasuciang pabuat Ulun. Di dinane ento tusing ada anak ane dadi magarapan. Yadian kita wiadin pianak-pianak kitane, panjak-panjak kitane, ingon-ingon kitane, aketo masih wong sunantara ane nongos di gumin kitane. Panjak-panjak kitane patut mareren patuh buka kita.

¹⁵ Ingetangja dugas kitane kapanjakang di Mesir, tur Ulun Ida Sang Hyang Widi Wasa, Widin kitane suba mebasang kita malantaran kawisesan ane gede. Ento awanane Ulun nitahang apanga kita ngluihang dina Sabate.

¹⁶

Baktija kita teken meme bapan kitane. Ento titah Ida Sang Hyang Widi Wasa, Widin kitane apanga kita rahayu tur dawa tuuh kitane, di gumine ane lakar paicayang Ulun teken kita.

¹⁷

Edaja ngamatiang jlema.

¹⁸

Edaja mamitra.

¹⁹

Edaja mamaling.

²⁰

Edaja dadi saksi bobab marep teken anak len.

²¹

Edaja ngedotang kurenan anak len, edaja ngedotang umahnyane, tanahne, panjakne, ingon-ingonne, keledaenne wiadin barang ane lenan ane dadi pagelahannyane.’

²²

Punika pituduh-pituduh sane kapaicayang antuk Ida Sang Hyang Widi Wasa pabuat parasemeton sareng sami, daweg semeton mapunduh ring gununge punika. Wantah titah-titahe puniki sane paicayang Ida, rikala Ida ngandika antuk suaran kerug-krebek saking geni miwah saking megane sane tebel punika. Sasampune punika Ida raris nyuratang pituduhe punika ring papan batune kekalih, tumuli kapaicayang ring parasemeton.”

²³

“Rikala sakuub gununge punika ngendih, tur semeton mireng wenten sabda saking peteng dedete, parapamimpin miwah panglingsir suku bangsan semetone raris pada rauh ring tiang.

²⁴ Dane pada mabaos sapuniki: ‘Ida Sang Hyang Widi Wasa, Widin iragane sampun nyinahang kagungan miwah kaluihan Idane rikala tiang miragi Ida ngandika saking genine punika. Ring rahinane puniki tiang sampun ngantenang mungguing jadmane kantun mrasidayang urip, yadiastu Ida Sang Hyang Widi Wasa sampun masabda ring ipun.

²⁵ Nanging napi pikenoh tiange ngetohang jiwan tiange malih. Genine sane madurgama punika jaga ngeseng tiang makasami. Tiang pracaya mungguing tiang pacang padem yening Ida Sang Hyang Widi Wasa, Widin tiange malih jaga ngandika ring tiang sareng sami.

²⁶ Naeninke wenten anak kantun urip sasampun ipun miragiang Ida Sang Hyang Widi Wasa, Sang Maraga Urip, masabda saking genine?

²⁷ Duaning punika, inggih semeton Musa, rarisang semeton sane lunga buat mirengang sakancan sabdan Ida Sang Hyang Widi Wasa, Widin iragane. Sasampune punika rarisang malih mawali ring tiang buat nartayang napi sane sampun sabdayang Ida ring semeton. Tiang sareng sami sadia jaga miragiang tur nglaksanayang sabdane punika.’

²⁸

Rikala Ida Sang Hyang Widi Wasa mireng indike punika, Ida tumuli ngandika ring tiang sapuniki: ‘Ulun suba mireng apaja ane suba orahanga teken bangsane ene, tur mula beneh raosne ento.

²⁹ Yen sasajaan ia setata marasa buka keto, yen sajaan ia setata ngajiang Ulun tur nglaksanayang sakancan titah Ulune, ia ajaka makejang muah katurunanne lakar rahayu salawas-lawasne.

³⁰ Ane jani kemaja kita majalan tur tunden bangsane ento mulih ka kemahe suang-suang.

³¹ Nanging kita, Musa, nongosja kita dini ajak Ulun. Kita ane lakar icen Ulun sakancan pidabdab muah titah Ulune. Kita patut ngurukang unduke ento teken bangsane ento apang pada laksanayanga di gumine ane lakar paicayang Ulun teken ia.’

³²

Parasemeton bangsa Israel, pada pagehja nglaksanayang titah Ida Sang Hyang Widi Wasa, Widin semetone. Sampunang wenten angan asikiko sane purug semeton.

³³ Laksanayangja makasami, mangda parasemeton rahayu tur prasida jenek ring jagate sane pacang aug semeton punika.”

6

¹

“Ida Sang Hyang Widi Wasa, Widin semetone ngandikayang mangda tiang ngurukang pidabdab-pidabdabe puniki ring parasemeton. Laksanayangja pidabdabe puniki ring jagate sane digelis jaga aug parasemeton.

² Parasemeton miwah katurunan semetone patut tansah astiti bakti ring Ida Sang Hyang Widi Wasa, Widin semetone sapanjang urip semetone, tur ngamanggehang pidabdab Idane sane pacang rauhang tiang ring semeton, mangda parasemeton dirga yusa ring jagate punika.

³ Parasemeton sareng sami, telebangja tur laksanayangja pidabdab-pidabdabe punika, mangda semeton rahayu tur dados bangsa sane ageng ring jagate sane gemuh landuh punika, sakadi sane sampun kajanjiang antuk Ida Sang Hyang Widi Wasa, Widin leluur iragane.

⁴

Parasemeton elingangja, wantah Ida Sang Hyang Widi Wasa, tur Ida kewanten sane dados Widin iragane.

⁵ Pada astiti baktija ring Ida Sang Hyang Widi Wasa, Widin semetone antuk panelas bayu miwah idep semetone.

⁶ Sakancan titah-titah sane rauhang tiang ring semeton ring rahinane puniki, sampunang pisan kantos lalianga.

⁷ Urukangja titah-titahe punika ring oka-okan semetone. Semeton patut maosang titahe punika ring jumahan wiadin ring jabaan umah semetone. Rikala semeton mararian wiadin makarya.

⁸ Pidabdabe punika patut anggen semeton gelang, miwah tetekes ring gidat semetone, mangda sampunang semeton lali.

⁹ Suratangja titahe punika ring obag-obagan jelanan miwah ring gapuran kotan semetone.”

¹⁰

“Ida Sang Hyang Widi Wasa, Widin semetone sampun majanji ring leluur semetone Dane Abraham, Ishak miwah Yakub, mungguing Ida jaga maicayang ring parasemeton satunggiling panegara sane madaging kota-kota sane ageng tur gemuh, sane boya wangun semeton.

¹¹ Sakancan umahe irika bek madaging barang-barang sane becik, tur boyaja semeton sane nagingin. Parasemeton jaga polih semer-semer, tur boyaja semeton sane nyongcong, taler abian anggur miwah saitun, nanging boya semeton sane nandur. Yening Ida Sang Hyang Widi Wasa nuntun parasemeton ka jagate punika, tur parasemeton maderbe sakancan kaperluan pangan kinum semetone,

¹² tangarinja ragan semetone, mangda sampunang semeton kantos lali ring Ida Sang Hyang Widi Wasa sane sampun mebasang semeton saking Mesir, ring genah semetone kapanjakang.

¹³ Parasemeton patut ngluihang Ida Sang Hyang Widi Wasa, Widin semetone, tur ngaula wantah ring Ida kewanten. Kadi asapunika taler yening semeton ngardi prajanjian, patut wantah masrana parab Idane kewanten.

¹⁴ Sampunang semeton nyungsung widi-widi sane tiosan, yadiastu widin bangsane sane encenja, sane wenten ring sakiwa tengen parasemetone.

¹⁵ Yening semeton nyungsung widi-widi sane tiosan, pidukan Ida Sang Hyang Widi Wasa pacang nibenin semeton waluya sakadi geni, tur parasemeton makasami jaga kasirnayang, duaning Ida Sang Hyang Widi Wasa, Widin semetone sane malingga ring pantaran semetone, nenten pisan kayun yening wenten sane nyamenin Ida.

¹⁶

Sampunang semeton mintonin Ida Sang Hyang Widi Wasa, Widin semetone sakadi sane sampun laksanayang semeton ring Masa.

¹⁷ Laksanayangja sakancan pidabdab sane kapaicayang antuk Ida Sang Hyang Widi Wasa ring semeton.

¹⁸ Margiangja saananing sane kabaos becik lan patut antuk Ida Sang Hyang Widi Wasa, malantaran punika parasemeton pacang rahayu. Jagate sane gemuh sane kajanjiang antuk Ida Sang Hyang Widi Wasa, ring paraleluur semetone, pacang dados paderbean semetone.

¹⁹ Tur parasemeton pacang ngaonang meseh-meseh semetone sakadi sane kajanjiang antuk Ida Sang Hyang Widi Wasa.

²⁰

Benjang pungkur oka-okan semetone jaga mataken ring parasemeton sapuniki: ‘Napi awinanipun Ida Sang Hyang Widi Wasa, Widin iragane nitahang mangda iraga nglaksanayang pidabdab-pidabdab Idane makasami puniki?’

²¹ Parasemeton patut masaur sapuniki: ‘Ipidan iraga ajak makejang kapanjakang baan raja Mesire, nanging Ida Sang Hyang Widi Wasa laut mebasang iraga baan kawisesan ane gede.

²² Ida Sang Hyang Widi Wasa nglaksanayang katawahan-katawahan muah unduk-unduk ane madurgama marep teken wong Mesire, sang prabu kayang paraprakanggonne makejang.

²³ Ida Sang Hyang Widi Wasa mebasang iraga uli di Mesir tur nuntun iraga ka tongose ene laut maicayang gumine ene teken iraga, buka ane suba janjiang Ida teken leluur iragane.

²⁴ Ida Sang Hyang Widi Wasa, Widin iragane nitahang apanga iraga nglaksanayang pidabdab-pidabdabe ento, sawireh Ida ngarsayang apanga iraga ngluihang Ida. Yening iraga malaksana buka keto, ditu Ida lakar tansah matiningin bangsan iragane apanga tetep kerta raharja.

²⁵ Yening iraga tuon nglaksanayang sakancan titah Ida Sang Hyang Widi Wasa ane kapaicayang teken iraga, Ida lakar ledang teken iraga.’ ”

7

¹

“Ida Sang Hyang Widi Wasa, Widin semetone jaga nantan parasemeton ka jagat sane pacang aug semeton, tur Ida pacang ngingsirang bangsa-bangsane saking irika. Ida jaga ngaonang saking ajeng semetone bangsa pepitu sane agengan tur kuatan ring semeton luiripun: Bangsa Het, Girgasi, Amori, Kanaan, Peris, Hewi miwah Yebus.

² Yening Ida Sang Hyang Widi Wasa, Widin semetone sampun nyerahang bangsa-bangsane punika ring kakuasan semetone tur semeton ngaonang ipun makasami, semeton patut ngamademang ipun makasami. Sampunang ngardi prajanjian ring ipun wiadin madalem ipun.

³ Parasemeton nenten dados ngambil ipun dados rabin semetone, tur sampunang icena oka-okan semetone nganten ngajak salah tunggal saking pantaran ipune,

⁴ mangda sampunang kantos ipun ngajak oka-okan semetone doh saking Ida Sang Hyang Widi Wasa raris nyungsung widi-widi sane tiosan. Ida Sang Hyang Widi Wasa pacang duka ring semeton, yening semeton nyungsung widi-widi sane tiosan tur digelis semeton pacang kasirnayang.

⁵ Duaning punika semeton patut nguugang pamorboran aturan bangsa-bangsane punika, uugangja tugu-tugu batunnyane, miwah genahe sane anggep ipun tenget. Tuludangja arca-arcan Dewi Aserane, tur tunjelja arca-arcane sane sembah ipun.

⁶ Margiangja indike punika duaning semeton puniki druen Ida Sang Hyang Widi Wasa, Widin semetone. Semeton sampun selik Ida saking pantaran parabangsane ring mrecapada, jaga dadosang Ida kaulan Idane sane istimewa.

⁷

Parasemeton suecanin tur selik Ida, boyaja ulihan parasemeton agengan ring bangsa-bangsane sane tiosan, malahan semeton puniki dados bangsa sane pinih alita ring mrecapada.

⁸ Nanging Ida Sang Hyang Widi Wasa nyuecanin semeton, tur Ida mapakayun jaga negepang prajanjian Idane marep ring leluur parasemeton. Punika awinanipun Ida sampun ngrahayuang semeton malantaran kakuasan sane ageng, tur mebasang semeton saking genah semetone mamanjak ring sang prabu Mesire.

⁹ Elingangja Ida Sang Hyang Widi Wasa, Widin semetone punika Widi sane tunggal, tur Ida punika Ida Sang Hyang Widi Wasa sane satia. Pabuat anake sane astiti bakti tur nglaksanayang titah-titah Idane, Ida pacang negepang prajanjian Idane tur nyinahang pasuecan Idane sane langgeng kantos siu katurunan.

¹⁰ Nanging Ida pacang tan urungan ngukum anake sane geting ring Ida.

¹¹ Duaning punika, parasemeton patut tuon nglaksanayang sakancan sane sampun kurukang ring semeton. Laksanayangja pidabdab-pidabdabe sane sampun aturang tiang ring parasemeton ring rahinane puniki.”

¹²

“Yening parasemeton ngincepang titah-titahe punika tur tuon nglaksanayang, Ida Sang Hyang Widi Wasa, Widin semetone pacang satia ring prajanjian sane kardi Ida ring semeton. Ida pacang nyinahang pasuecan Idane sane langgeng ring parasemeton, sakadi sane sampun janjiang Ida ring leluur parasemetone.

¹³ Parasemeton jaga suecanin miwah mertanin Ida, kantos semeton madue oka akeh tur sayan mawuwuh-wuwuh. Tegal-tegalan semetone jaga mertanin Ida kantos muponin gandum, anggur miwah minyak saitun. Parasemeton jaga kapaicain banteng miwah biri-biri akeh pisan. Mertane punika makasami pacang kapaicayang antuk Ida Sang Hyang Widi Wasa ring semeton ring jagate sane pacang paicayang Ida ring semeton, anut ring janjin Idane ring leluur parasemetone.

¹⁴ Saking pantaran parabangsane ring mrecapada, angan asikiko nenten wenten sane polih merta sane maliah-liah sakadi semeton. Saking pantaran semetone tan wenten sane pacang bekung, miwah ingon-ingon semetone angan asikiko nenten wenten sane jubeng.

¹⁵ Parasemeton pacang kasayubin antuk Ida Sang Hyang Widi Wasa saking saananing pinakit, tur kadohang saking grubug sane ageng sane aksi semeton ring Mesir, nanging sakancan bencanane punika jaga tiwakang Ida ring meseh-meseh semetone.

¹⁶ Asing-asing bangsa sane kaserahang antuk Ida Sang Hyang Widi Wasa, Widin semetone ring semeton, ipun patut sirnayang semeton. Sampunang semeton madalem bangsane punika. Sampunang pisan semeton nyungsung widin bangsane punika, duaning indike punika pacang ngundang pati pabuat semeton.

¹⁷

Sampunang semeton mapakayun mungguing bangsa-bangsane punika akehan ring semeton kantos semeton nenten nyidayang ngaonang ipun.

¹⁸ Sampunang semeton ajerih ring ipun. Elingangja indik sane kamargiang antuk Ida Sang Hyang Widi Wasa, Widin semetone marep ring sang prabu Mesire miwah rakyat idane.

¹⁹ Elingangja ring bencana-bencana ageng sane aksi semeton ngraga, katawahan-katawahan sane ngangobin miwah kawisesan sane ageng sane kanggen antuk Ida Sang Hyang Widi Wasa, Widin semetone buat mebasang parasemeton. Bangsa-bangsane makasami sane ajerihin semeton pacang kasirnayang antuk Ida Sang Hyang Widi Wasa, sakadi Ida sampun nyirnayang wong Mesire.

²⁰ Malahan Ida pacang ngawinang ipun pada bingung, tur sane malaib buat nyingidang deweknyane pacang kasirnayang.

²¹ Dadosipun, sampunangja semeton ajerih ring bangsa-bangsane punika. Ida Sang Hyang Widi Wasa, Widin semetone ngiangin semeton. Ida punika Widi sane maha agung. Semeton patut ajerih ring Ida.

²² Bangsa-bangsane punika pacang sirnayang Ida saka kidik saking ajeng parasemetone. Parasemeton nenten pacang nyidayang nyirnayang ipun apisan, mangda sampunang sato galake raris ngakehang tur dados pakewuh pabuat parasemeton.

²³ Ida Sang Hyang Widi Wasa pacang nyerahang meseh-meseh semetone ring semeton. Ida jaga ngardi ipun bingung kantos ipun sirna.

²⁴ Pararatunnyane jaga serahang Ida ring kakuasan parasemetone. Pararatune punika makasami jaga sedayang semeton tur pungkuran pacang kalaliang. Nenten wenten anak angan asiki sane jaga nyidayang nawengin semeton, makasami jaga sirnayang semeton.

²⁵ Arca-arcane sane sungsung ipun patut tunjel semeton. Sampunang semeton ngedotang perak wiadin mas sane madeket ring arca-arcane punika tur sampunang semeton ngambil perak wiadin mas punika pabuat ragan semetone. Yening parasemeton mamurug titahe punika, parasemeton pacang padem, duaning Ida Sang Hyang Widi Wasa duka ring indik nyumbah arca.

²⁶ Sampunang parasemeton raris makta arcane punika angan asiki kumah semetone, mangdane temah sane nibenin ipun sampunang nibenin parasemeton. Parasemeton patut geting tur nganistayang arca-arcane punika, duaning ipun sampun keni temah Ida Sang Hyang Widi Wasa.”

8

¹

“Pidabdabe makasami sane aturang tiang ring parasemeton ring rahinane puniki patut laksanayang parasemeton saha tuon, mangda parasemeton tetep urip endah-gumendah tur malinggih ring jagat sane kajanjiang antuk Ida Sang Hyang Widi Wasa ring paraleluur semetone.

² Elingangja! Petang dasa taun suenipun Ida Sang Hyang Widi Wasa, Widin semetone nantan parasemeton nglintangin margi sane doh ring tegal melakange. Ida mapaica kakewuhan-kakewuhan ring parasemeton buat mintonin parasemeton, mangda Ida ngaksi indik sane jaga lakonin semeton, punapike parasemeton yuakti nglaksanayang titah Idane punapi nenten.

³ Ida manggayang semeton kaluen, raris semeton paicain Ida manna makadados ajengang semetone, ajengan sane durung naenin kajeng antuk semeton wiadin leluur parasemetone. Ida Sang Hyang Widi Wasa ngardi indike punika buat nguruk semeton mungguing manusane nentenja urip wantah antuk roti kewanten, nanging antuk sakancan sabdan Ida Sang Hyang Widi Wasa.

⁴ Sajeroning petang dasa warsa puniki panganggen semetone nenten buuk-buuk tur cokor parasemetone nenten bubul.

⁵ Elingangja, mungguing Ida Sang Hyang Widi Wasa, Widin semetone nguruk tur nyisipang parasemeton sakadi ibapa sane nguruk pianak-pianaknyane.

⁶ Duaning punika, lakoninja sakancan titah Ida Sang Hyang Widi Wasa. Semeton patut malaksana satinut ring pidabdab-pidabdab Idane tur parasemeton patut astiti bakti ring Ida.

⁷ Ida Sang Hyang Widi Wasa, Widin semetone jaga nantan parasemeton ka jagate sane gemuh, jagat sane madaging tukad miwah toya klebutan akeh pisan, toya anakan sane membah ring beten tanahe sane muncrat ka lebah-lebahe miwah ka bukit-bukite,

⁸ jagat sane mupuang gandum miwah jagung nasi, anggur, buah aa, buah delima, saitun miwah madu.

⁹ Parasemeton nenten pacang naenin kaluen wiadin kakirangan irika. Batu kaang gumine punika madaging besi, tur ring bukit-bukitnyane semeton jaga ngeniang temaga.

¹⁰ Sakancan ajeng-ajengan sane dotang semeton, jaga kasediaang pabuat semeton, tur parasemeton pacang matur panyuksma ring Ida Sang Hyang Widi Wasa, Widin semetone, santukan parasemeton kapaicain tanah sane gemuh.”

¹¹

“Pada tangarinja, sampunang parasemeton ngantos lali ring Ida Sang Hyang Widi Wasa, Widin semetone. Sampunang semeton lumenah ring titah-titah Idane sane aturang tiang ring semeton ring rahinane puniki.

¹² Yening sane jaga ajengang parasemeton punika sampun cukup, tur parasemeton sampun ngwangun umah sane becik pabuat ragan semetone,

¹³ tur banteng miwah biri-biri, perak miwah mas, makamiwah arta branan semetone sane tios-tiosan sampun mawuwuh,

¹⁴ pada tangarinja ragan semetone mangda sampunang semeton kantos sumbung tur lali ring Ida Sang Hyang Widi Wasa, Widin semetone, sane sampun mebasang semeton saking panegara Mesir, gumi genah semetone kapanjakang.

¹⁵ Ida Sang Hyang Widi Wasa sampun nantan parasemeton nglintangin tanah melakang sane jimbar tur madurgama, genah sane bek madaging ula sandi miwah teledu. Ring tanahe sane tuh tan patoya punika Ida Sang Hyang Widi Wasa nitahang mangda toyane membah saking batu kaange sane katos, kantos semeton nyidayang nginem toya kantos lega.

¹⁶ Ring tanah melakange punika, Ida mapaica manna makadados ajengan parasemetone. Sane riin ajengane punika nenten naenin kajeng antuk paraleluur semetone. Ida ngrauhang pakewuh-pakewuh ring parasemeton buat mintonin semeton mangda ring pamuputipun Ida prasida ngamertanin parasemeton antuk pangan kinum.

¹⁷ Duaning punika sampunang pisan semeton mapakayun mungguing semeton dados sugih malantaran antuk kakuatan semetone ngraga.

¹⁸ Elingangja mungguing Ida Sang Hyang Widi Wasa, Widin semetone kewanten sane nadosang semeton sugih. Indike punika margiang Ida santukan kantos rauh ring rahinane puniki Ida kantun satia ring prajanjian sane sampun kardi Ida ring paraleluur semetone.

¹⁹ Elingang pisan! Sampunang lali ring Ida Sang Hyang Widi Wasa, Widin semetone, wiadin nilar Ida raris nyungsung tur ngaula ring widi-widi sane tiosan. Yening semeton kantos kadi asapunika, ring rahinane puniki tiang malih mapakeling ring parasemeton mungguing parasemeton pasti pacang kasirnayang antuk Ida Sang Hyang Widi Wasa.

²⁰ Yening parasemeton nenten satia tuu ngiring Ida Sang Hyang Widi Wasa, parasemeton taler pacang sirnayang Ida, pateh sakadi bangsa-bangsane sane pacang basmi Ida ring ajeng parasemetone.”

9

¹

“Inggih parasemeton bangsa Israel, pirengangja mangda becik! Ring rahinane puniki parasemeton jaga nglintangin Tukad Yordane jaga ngaug wewidangan bangsa-bangsa sane agengan miwah sitengan ring semeton. Kota-kotannyane ageng-ageng tur benteng-bentengnyane tegeh-tegeh nyucuk langit.

² Pangadeg jadmane irika tegeh-tegeh, pawakanipune ageng-ageng tur siteng-siteng kadi raksasa. Parasemeton sampun pada mireng mungguing nenten wenten anak sane nyidayang nglawan ipun.

³ Nanging sane mangkin parasemeton ngraga jaga ngaksi Ida Sang Hyang Widi Wasa, Widin semetone mamargi ring ajeng semetone sakadi geni sane ngeseng. Ida jaga ngaonang ipun ring ajeng semetone, kantos parasemeton digelis nyidayang ngulah tur nyirnayang ipun, sakadi sane sampun kajanjiang antuk Ida Sang Hyang Widi Wasa.

⁴

[4-5] Sasampune Ida Sang Hyang Widi Wasa, Widin semetone ngulah ipun pabuat parasemeton, pungkuran sampunang pisan semeton raris mabaos ring kayun, mungguing parasemeton tuntun Ida mrika buat nerbeang tanahe punika santukan semeton becik tur ngamargiang pakarsan Ida Sang Hyang Widi Wasa, kantos parasemeton patut nampi tanahe punika. Boya pisan kadi asapunika. Ida Sang Hyang Widi Wasa ngulah bangsane punika pabuat parasemeton, duaning bangsane punika jaat. Ida Sang Hyang Widi Wasa nglugrain parasemeton ngambil tanah ipune, duaning Ida mapakayun jaga negepang prajanjian Idane ring leluur parasemetone: Dane Abraham, Ishak miwah Yakub.

⁵

⁶ Parasemeton patut pracaya mungguing Ida Sang Hyang Widi Wasa nglugrain semeton tanah sane gemuh punika boyaja malantaran semeton pantes nampi tanahe punika. Nentenja asapunika. Parasemeton puniki bangsa sane bengkung.

⁷

Elingangja mungguing parasemeton sampun ngawinang Ida Sang Hyang Widi Wasa, Widin semetone duka, duk ring tanah melakange. Ngawit saking semeton matilar saking Mesir, kantos parasemeton rauh iriki ring rahinane puniki, parasemeton sampun tungkas pamantuka ring Ida Sang Hyang Widi Wasa.

⁸ Malahan ring Gunung Sinai parasemeton ngawinang Ida duka pisan, kantos Ida mapakayunan nyirnayang semeton.

⁹ Tiang munggah ka gununge punika buat nampi papan batune sane madaging tulisan prajanjian sane kardi Ida marep ring semeton. Petang dasa rahina suenipun tiang nongos ring duur gununge punika tur nenten nunas miwah nginum.

¹⁰ Sasampun punika Ida Sang Hyang Widi Wasa raris maicayang papan batune makakalih punika ring tiang. Papane punika sampun tulisin Ida saluiring sabdan Idane sane nikayang Ida ring semeton saking tengah genine, rikala semeton mapupul ring bongkol gununge punika.

¹¹ Dadosipun, sasampune lintang petang dasa rahina punika, Ida Sang Hyang Widi Wasa tumuli maicayang ring tiang papan batune makakalih sane madaging tulisan indik prajanjiane punika.

¹²

Ida Sang Hyang Widi Wasa tumuli masabda ring tiang sapuniki: ‘Kema enggalang tuun uli gununge ene, sawireh bangsan kitane ane pimpin kita makaad uli Mesir, suba alpaka, ia suba malaksana jaat. Ia suba lempas uli titah-titah Ulune, laut ngae arca ane dadi sasungsungannyane.’

¹³

Ida taler ngandika sapuniki: ‘Ulun wikan, mungguing bangsane ene bengkung pesan.

¹⁴ Eda kita matetegar buat nombaang Ulun. Ulun lakar ngeseng ia kantos tusing ada anak ane inget buin teken ia. Nanging kita lakar dadiang Ulun leluur satunggaling bangsa ane gedenan muah kuatan teken bangsane ene.’

¹⁵

Tiang tumuli tedun saking gununge punika sinambi makta papan batune kekalih sane madaging sasuratana prajanjiane punika. Rikala tiang mamargi tedun saking gununge punika, raris metu geni makelep saking muncuk gununge punika.

¹⁶ Tiang manggihin parasemeton sampun mamurug titah Ida Sang Hyang Widi Wasa, Widin semetone sane sampun titahang Ida ring parasemeton. Parasemeton sampun madosa ring Ida Sang Hyang Widi Wasa, duaning semeton sampun makarya arca banteng sane malakar antuk logam pabuat ragan semetone.

¹⁷ Raris ring genahe punika ugi, ring ajeng semetone, papan batune makakalih punika pantigang tiang kantos belah mapilah-pilahan.

¹⁸ Sasampune punika tiang tangkil malih pisan ring ayun Ida Sang Hyang Widi Wasa ring pucak gununge petang dasa rahina suenipun, nenten nunas wiadin nginem. Tiang ngamargiang indike punika duaning semeton sampun madosa ring Ida Sang Hyang Widi Wasa tur ngawinang Ida duka.

¹⁹ Tiang ajerih ring pidukan Idane, duaning Ida duka pisan, kantos Ida mapakayun jaga nyirnayang semeton, nanging daweg punika taler Ida nagingin pinunas tiange.

²⁰ Ida Sang Hyang Widi Wasa taler duka pisan ring Dane Harun, kantos Ida mapakayun jaga nyedayang dane. Duaning punika tiang taler ngastawa pabuat dane.

²¹ Arca bantenge sane kardi semeton antuk logam punika raris entungang tiang ka genine tumuli intuk tur benyahang tiang kantos dekdek dados abu. Abunnyane raris entungang tiang ring tukade sane membah saking gununge punika.

²²

Parasemeton sampun ngawinang Ida Sang Hyang Widi Wasa, Widin semetone duka daweg ring Tabera, Masa miwah ring Kibrot-Taawa.

²³ Sapangrarisipun, rikala Ida Sang Hyang Widi Wasa nitahang mangda semeton matilar saking Kades-Barnea, tur kapangandikayang mangda ngebug jagat sane pacang paicayang Ida ring semeton, parasemeton raris tungkas pamantuka ring Ida, tur semeton nenten pracaya tur nenten tuon ngiring Ida.

²⁴ Ngawit saking tiang uning ring semeton, semeton setata nglawan Ida Sang Hyang Widi Wasa.

²⁵

Tiang raris sumungkem ring ayun Ida Sang Hyang Widi Wasa petang dasa rahina suenipun, duaning tiang uning mungguing Ida Sang Hyang Widi Wasa sampun nyadia jaga nyirnayang parasemeton.

²⁶ Tiang raris ngastawa sapuniki: ‘Oduh Ratu Sang Hyang Widi Wasa Sane Maha Luur, sampunang Palungguh IRatu ngeseng kaulan Palungguh IRatune ngraga. Ipun sampun bebasang miwah tantan IRatu makaon saking Mesir antuk kakuatan miwah kawisesan Palungguh IRatune, sane ageng.

²⁷ Ledang Palungguh IRatu eling ring parekan Palungguh IRatune: Abraham, Ishak miwah Yakub, tur sampunang IRatu nglinguang ambek bangsane sane bengkung, jaat miwah madosa puniki.

²⁸ Yening Palungguh IRatu jaga nyirnayang kaulan Palungguh IRatune puniki, wong Mesire jaga mabaos mungguing Palungguh IRatu nenten mrasidayang nantan kaulan Palungguh IRatune ngungsi jagat sane janjiang Palungguh IRatu ring ipun. Wong Mesire jaga mabaos mungguing Palungguh IRatu sampun makta bangsane puniki ka tanah melakange buat ngamademang ipun, duaning Palungguh IRatu bendu ring ipun.

²⁹ Nanging elingangja, duh Ratu Sang Hyang Widi Wasa, mungguing bangsane puniki sampun selik Palungguh IRatu dados kaulan Palungguh IRatune, tur Palungguh IRatu sampun nantan ipun saking Mesir antuk kakuatan miwah kawisesan sane ageng.’ ”

10

¹

“Sasampune punika Ida Sang Hyang Widi Wasa raris ngandika ring tiang sapuniki: ‘Ngaeja papan batu buin duang tebih, buka ane pangawit, buina ngaeja peti abesik ane malakar aji kayu anggon wadah papan batune ento, suba keto lautang mai menek ka pucak gununge tangkil di ajeng Ulune.

² Ulun lakar nyuratang sig papan batune ento, sakancan sabdan Ulune ane laad tulis Ulun sig papan batune ane pangawit, ane suba belahang kita ento. Suud keto penpenja papan batune ka tengah petine ento.’

³

Irika tiang raris makarya peti asiki, malakar antuk kayu akasia, tur tiang taler makarya papan batu kekalih, sane pateh ring papan batu sane pangawit. Sasampune punika tiang raris munggah ka gununge makta papan batune makakalih punika.

⁴ Ring papan batune punika Ida Sang Hyang Widi Wasa raris nyuratang Dasa Titah, pateh sakadi sane kasuratang ring batune pangawit, inggih punika sabda sane sampun kasabdayang antuk Ida Sang Hyang Widi Wasa ring semeton, duk Ida masabda saking telenging genine, rikalaning semeton pada mapunduh ring bongkol gununge. Sasampune punika Ida Sang Hyang Widi Wasa raris maicayang papan batune punika ring tiang.

⁵ Tiang raris mawali tedun saking duur gununge, tur papan batune punika raris penpen tiang ring petine sane sampun kardi tiang, satinut ring titah Ida Sang Hyang Widi Wasa, tur ngawit saking dauhe punika rauh mangkin batune punika wenten irika.”

⁶

(Wong Israele raris kesah saking semer-semer wong Yaakane ngungsi ka Mosera. Irika Dane Harun seda tur kapendem, raris Dane Eleasar, okan danene ngentosin dane madeg dados pandita.

⁷ Saking irika wong Israele mamargi ka Gudgod tur saking Gudgod ka Yotbata, inggih punika satunggiling genah sane akeh toya klebutannyane.

⁸ Ring gununge punika Ida Sang Hyang Widi Wasa raris nyelik suku Lewi buat ngenterang Peti Prajanjian Ida Sang Hyang Widi Wasa, samaliha kapisara ngancangin Ida Sang Hyang Widi Wasa makadados pandita-panditan Idane, tur nunasang merta masrana nyambat parab Ida Sang Hyang Widi Wasa. Punika sane dados tetegenannyane kantos rauh mangkin.

⁹ Punika awinannya suku Lewi nenten polih duman tanah sakadi suku-suku tiosan. Dumannyane inggih punika wewenang dados panditan Ida Sang Hyang Widi Wasa, sakadi sane sampun kajanjiang antuk Ida Sang Hyang Widi Wasa.)

¹⁰

“Tiang raris nongos ring duur gununge, sakadi daweg duk pangawite petang dasa rahina suenipun, tur duk punika taler Ida Sang Hyang Widi Wasa nagingin pinunas tiange, inggih punika Ida raris ledang ngurungang pakayunan Idane buat nyirnayang semeton.

¹¹ Ida Sang Hyang Widi Wasa raris nitahang tiang mimpin semeton mangda semeton nyidayang nerbeang tanah sane sampun janjiang Ida ring leluur semetone.”

¹²

“Parasemeton bangsa Israel, sane mangkin pirengangja indik sane karsayang antuk Ida Sang Hyang Widi Wasa, Widin semetone saking semeton: Sungsungja tur astiti baktija ring Ida Sang Hyang Widi Wasa tur laksanayangja sakancan titah Idane. Ngaulaja ring Ida antuk panelas kayun semetone.

¹³ Pada pagehja ngagem pidabdab Ida Sang Hyang Widi Wasa sane uningayang tiang ring rahinane mangkin pabuat kabecikan semetone.

¹⁴ Sujatinipun langit sane pinih tegeh, makamiwah buana sadagingipun, makasami punika druen Ida Sang Hyang Widi Wasa.

¹⁵ Nanging sih pasuecan Idane ring leluur semetone, yuakti ageng pisan, kantos parasemeton sane sampun selik Ida, boyaja bangsa sane tiosan, tur kantos rauh mangkin semeton dados kaula seselikan Idane.

¹⁶ Duaning asapunika, ngawit saking mangkin, pada pagehja astiti bakti ring Ida, tur sampunang malih semeton bengkung.

¹⁷ Santukan Ida Sang Hyang Widi Wasa, Widin semetone punika, Ida maraga Widining Widi sane ngungkulin saluiring kakuatan. Ida punika Widi sane luur tur mawisesa, tur Ida sane patut sungsung semeton. Ida nenten mapilih kasih, miwah nenten kayun nrima suap.

¹⁸ Ida ledang nindihin tegak anake sane ubuh miwah anak sane balu, mangda ipun polih kadilan, samaliha Ida ledang nyinahang sih pasuecan Idane ring wong sunantara, sane wenten ring pantaran iragane, malantaran Ida mapaica pangan miwah pangangge ring ipun.

¹⁹ Duaning punika semeton patut nyinahang kapitresnan semetone marep ring wong sunantara, santukan sane nguni semeton taler dados wong sunantara ring tanah Mesir.

²⁰ Luihangja Ida Sang Hyang Widi Wasa, Widin semetone, tur ngaulaja wantah ring Ida kewanten. Semeton patut satia ngiring bakti ring Ida, tur semeton patut masumpah janji wantah masrana parab Idane kewanten.

²¹ Pujija Ida duaning Ida punika Widin semetone. Semeton ngraga sampun manggihin Ida nglaksanayang pakaryan-pakaryan sane agung tur madurgama pabuat semeton.

²² Rikala leluur semetone lunga ka Mesir, pecak wantah sareng pitung dasa diri. Nanging Ida Sang Hyang Widi Wasa, Widin semetone sampun ngawinang semeton dados akeh pisan tan bina sakadi bintang-bintang ring langite.”

11

¹

“Astiti baktija ring Ida Sang Hyang Widi Wasa, Widin semetone tur tinutinja setata sakancan pidabdab Idane.

² Sane mangkin elingangja paindikan sane sampun plajahin semeton, ngeniang indik Ida Sang Hyang Widi Wasa, malantaran pangalaman semetone ngiring Ida. Semeton ngraga sane sampun madue pangalaman punika boyaja oka-okan semetone. Semeton sampun ngaksi kagungan Ida Sang Hyang Widi Wasa, kakuasaan miwah kakuatan Idane,

³ miwah katawahan-katawahan sane sampun margiang Ida. Semeton sampun ngaksi paindikan sane sampun laksanayang Ida marep ring prabune ring Mesir, makamiwah sawewidangan panegaran idane.

⁴ Semeton sampun ngaksi kadi asapunika indik Ida Sang Hyang Widi Wasa nyirnayang wadua balan Mesire makasami, makamiwah kuda lan kretannyane, malantaran Ida ngelemang ipun ring Segara Gelagah, ritatkala ipun ngepung semeton.

⁵ Semeton uning indik sane kakardi antuk Ida Sang Hyang Widi Wasa pabuat semeton ring tegal melakange, sadurunge semeton rauh iriki.

⁶ Parasemeton janten eling ring paindikan sane laksanayang Ida marep ring Dane Datan miwah Abiram, oka-okan Dane Eliab, saking suku Ruben. Ring ajeng parasemetone sareng sami, pretiwine raris engkag raris sang kalih kuluh, sasarengan ring kulawargan danene, kemah, panjak, makamiwah ingon-ingonnyane makasami.

⁷ Sujatinipun semeton ngraga sane sampun nyingak sakancan katawahan, sane sampun kalaksanayang antuk Ida Sang Hyang Widi Wasa.”

⁸

“Tinutinja sakancan pidabdab sane rauhang tiang ring semeton ring rahinane puniki, mangdane semeton mrasidayang nglintangin tukade punika, tumuli ngaug jagate sane ungsi semeton punika.

⁹ Samaliha semeton jaga nutugang tuuh ring jagate sane gemuh landuh, sane sampun kajanjiang antuk Ida Sang Hyang Widi Wasa, jaga kapaicayang ring paraleluur semetone miwah ring parakaturunan danene.

¹⁰ Jagat sane jaga aug semeton punika, nenten pisan pateh ring jagat Mesire, genah semetone sane ipidan. Ring Mesir, yening semeton nyambeh bibit, semeton patut matuyuhin raga buat metengin pategalane,

¹¹ nanging tanah sane jaga ungsi semeton punika inggih punika tanah pagunungan miwah lebak sane nadah sabeh.

¹² Ida Sang Hyang Widi Wasa, Widin semetone, tansah miara tanahe punika, samaliha Ida setata macingak ring tanahe punika.

¹³

Duaning punika, tinutinja pituduh-pituduhe sane aturang tiang ring semeton ring rahinane puniki. Astiti baktija ring Ida Sang Hyang Widi Wasa, Widin semetone tur ngaulaja ring Ida antuk panelas pakayunan semetone.

¹⁴ Yening semeton nglaksanayang indike punika rikala masanipun Ida pacang nurunang sabeh pabuat tanah semetone, inggih punika rikalaning kerta masa miwah masan gegedon, mangdane semeton prasida mupu gandum, anggur miwah minyak saitun,

¹⁵ makamiwah padang pabuat ingon-ingon semetone. Semeton jaga molih saananing pangan kinum sane buatang semeton.

¹⁶ Sampunangja semeton manggayang ragan semetone kagoda kantos lempas saking ayun Ida Sang Hyang Widi Wasa, sarwi nyungsung miwah ngaula ring widi sane lianan.

¹⁷ Yening semeton mamurug titah Idane, Ida Sang Hyang Widi Wasa jaga menggah ring semeton. Ida pacang ngandeg sabehe, tur tanah semetone pacang tuh latuh, kantos tetanduran semetone nenten mupu. Samalihipun semeton pacang gelis seda irika, yadiastun tanahe sane paicayang Ida ring semeton punika tanah sane gemuh.

¹⁸

Elingang tur luihangja pituduh-pituduhe puniki. Tekekang negul ring tangan semetone, miwah tulis ring gidat semetone, makadados painget.

¹⁹ Urukang pituduhe punika ring oka-okan semetone. Rembugang pituduhe punika rikalaning semeton nuju jumah, miwah rikalaning semeton malelungan yadian rikalaning semeton nuju mararian miwah rikalaning semeton nuju makarya.

²⁰ Suratang pituduhe punika ring duur obag-obagan jelanan semetone, miwah ring gapuran kotan semetone.

²¹ Irika semeton miwah oka-okan semetone pacang nutugang tuuh ring tanah sane sampun kajanjian antuk Ida Sang Hyang Widi Wasa, Widin semetone, ring paraleluur semetone. Semeton jaga magenah ring tanahe punika sakantun wenten akasa miwah pretiwi.

²²

Tinutinja saking satia tuu, saananing pituduhe sane sampun aturang tiang ring semeton. Astiti baktija ring Ida Sang Hyang Widi Wasa, Widin semetone, tur laksanayangja sakancan pituduh Idane, tur satia tuuja pamantuka ring Ida.

²³ Irika Ida jaga ngulah sawatek bangsane punika saking ajeng parasemeton, tur semeton jaga ngaug jagat derben bangsa-bangsane sane agengan miwah kuatan ring semeton.

²⁴ Sakancan tanah sane entap semeton punika pacang dados druen semetone. Sane jaga maug dados wewidangan semetone, inggih punika ngawit saking tegal melakange bedelod kantos rauh ring Pagunungan Libanon sane baler, miwah saking Tukad Eprat sane bedangin kantos rauh ring sisin Segara Tengahe bedauh.

²⁵ Kijaja semeton lunga ring jagate punika, Ida Sang Hyang Widi Wasa, Widin semetone, jaga ngawinang jadmane irika ajerih ring semeton, miwah tan wenten sane nyidayang nawengin semeton, sakadi sane sampun janjiang Ida.

²⁶

Ring rahinane puniki semeton aturin tiang milih merta wiadin temah.

²⁷ Parasemeton jaga kamertanin yening semeton ninutin pituduh-pituduh Ida Sang Hyang Widi Wasa, Widin semetone, sane aturang tiang ring semeton ring rahinane puniki.

²⁸ Nanging semeton jaga keni temah, yening semeton nenten satinut ring pituduh-pituduhe puniki, tur lempas saking ayun Ida Sang Hyang Widi Wasa, saha nyungsung widi sane lianan, sane riin nenten naenin sungsung semeton.

²⁹ Yening Ida Sang Hyang Widi Wasa sampun nantan semeton ngranjing ka tanah sane ungsi tur jaga aug semeton punika, semeton patut ngucapang merta saking duur Gunung Gerisime, miwah temah saking duur Gunung Ebale.

³⁰ (Gununge makakalih punika wenten ring dauh Tukad Yordane, ring wewidangan wong Kanaane, sane magenah ring Lebak Yordane. Gununge makakalih punika marep kauh, nenten doh saking taru-taru tarbantine ring More, sane nampek ring kota Gilgal.)

³¹ Tan malih asue semeton jaga nglintangin Tukad Yordane, saha jaga ngaug jagat sane kapaicayang ring semeton antuk Ida Sang Hyang Widi Wasa, Widin semetone. Yening semeton sampun ngaug tur jenek alungguh irika,

³² semeton patut satia tuu ninutin sakancan pidabdabe sane aturang tiang ring semeton ring rahinane puniki.”

12

¹

“Puniki pidabdab sane patut tinutin semeton sapanjang umur semetone, sasampune semeton jenek alungguh ring jagat sane kapaicayang ring semeton antuk Ida Sang Hyang Widi Wasa, Widin leluur semetone. Agemja pidabdab-pidabdabe punika.

² Yening semeton sampun ngaug jagate punika, semeton patut nguugang sakancan genah panyungsungan widi-widin jadmane irika, minakadinipun sane ring duur gununge, ring duur bukite, miwah ring sor tarune sane ageng-ageng.

³ Uugang pamorboran-pamorboran aturannyane, miwah nyagang palinggih-palinggihipune sane anggep ipun tenget. Turus lumbung Dewi Aseran ipune patut tunjel semeton, miwah arcan dewanipune patut cakcak semeton ngantos dekdek remuk, mangda sampunang arcane punika malih kasumbah ring genahe punika.

⁴

Sampunang semeton ngaturang bakti ring Ida Sang Hyang Widi Wasa, Widin semetone, sakadi caran jadmane punika ngaturang bakti ring widinipune.

⁵ Ring pantaran wewidangan sakancan suku-suku Israele, Ida Sang Hyang Widi Wasa pacang nyelik satunggiling genah mabakti, inggih punika genah rakyate patut rauh tangkil saha ngaturang bakti ring ayun Idane.

⁶ Ring genahe punika semeton patut ngaturang aturan semetone sane maborbor miwah aturan sane lianan, aturan pahdasan miwah sane tios-tiosan, aturan panaur sesangi, aturan semetone sane madasar antuk manah suka lila, aturan banteng miwah biri-birin semetone sane lekad jumun daana.

⁷ Irika ring ayun Ida Sang Hyang Widi Wasa, Widin semetone sane sampun ngamertanin semeton, semeton miwah kulawargan semetone pacang nunas lan ngrasayang pikolih pakaryan semetone.

⁸

Yen masane punika sampun rauh, sampunang semeton malih malaksana sakadi mangkin. Rauh mangkin semeton kantun ngaturang bakti ninutin sapakitan semetone,

⁹ santukan semeton durung ngranjing ring jagat sane kapaicayang ring semeton antuk Ida Sang Hyang Widi Wasa, Widin semetone, inggih punika genah semetone muponin urip saha sutrepti.

¹⁰ Yen semeton sampun nglintangin Tukad Yordane, Ida Sang Hyang Widi Wasa jaga nglugrain semeton ngaug jagate punika sarwi jenek alungguh irika. Ida pacang nawengin semeton saking saananing meseh semetone tur semeton jaga muponin urip saha sutrepti.

¹¹ Ida Sang Hyang Widi Wasa pacang nyelik satunggaling genah, inggih punika genah pabuat nyungsung Ida. Ring genahe punika semeton patut ngaturang saananing sane sampun uduhang tiang ring semeton, inggih punika: aturan sane maborbor miwah aturan sane lian-lianan, aturan pahdasan, miwah aturan sesangin semetone ring Ida Sang Hyang Widi Wasa.

¹² Pada masuka renaja irika ring ayun Idane, sinarengan ring oka-okan semetone, parekan semetone, ping kalih wong Lewi sane magenah ring kota-kotan semetone, duaning suku Lewi punika nenten polih duman sane makadados druennyane.

¹³ Semeton nenten kapatut ngaturang aturan semetone ring genah-genahe sane senengin semeton,

¹⁴ nanging semeton patut ngaturang aturan-aturane punika, wantah ring satunggiling genah sane jaga kaselik antuk Ida Sang Hyang Widi Wasa, ring wewidangan sinalih tunggil suku bangsan semetone. Wantah irika kewanten semeton patut ngaturang aturan semetone sane maborbor miwah nglaksanayang paindikan-paindikan sane lian-lianan, sane sampun uduhang tiang ring semeton.

¹⁵

Nanging semeton bebas nampah miwah ngajengang daging ring salampah genah semetone. Semeton dados ngajengang amun napija akehipun, manut paican Ida Sang Hyang Widi Wasa ring semeton. Semeton sareng sami yadian sane suci miwah sane leteh manut sopacaraning agama, makasami dados ngajengang daginge punika, tan bina sakadi semeton ngajengang daging kidang wiadin manjangan.

¹⁶ Nanging getihipune tan wenang kajengang. Semeton patut mriokang getih ipune ka tanahe, sakadi mriokang toya.

¹⁷ Ring genah semetone magumana, semeton tan wenang ngajengang aturan sane aturang semeton ring Ida Sang Hyang Widi Wasa, minakadinipun: aturan pahdasan upon-upon gandum, anggur, minyak saitun, aturan banteng miwah biri-birin semetone sane lekad jumun daana, aturan panaur sesangi, aturan suka lila, miwah aturan-aturan sane lian-lianan.

¹⁸ Semeton miwah oka-okan semetone, sinarengan ring paraparekan semetone, miwah suku Lewi sane wenten ring kotan semetone, patut nunas aturan punika wantah ring ayun Ida Sang Hyang Widi Wasa, Widin semetone, inggih punika wantah ring genah mabakti sane sampun kaselik antuk Ida Sang Hyang Widi Wasa, Widin semetone. Irika semeton patut pada masuka rena, ngeniang ring saluiring paindikan sane sampun laksanayang semeton.

¹⁹ Elingang pisan, sampunang semeton nglemenahang suku Lewine sakantun semeton urip ring tanah semetone.

²⁰

Yening Ida Sang Hyang Widi Wasa, Widin semetone nglinggahang wewidangan semetone sakadi sane sampun janjiang Ida, semeton dados ngajeng daging, manut seneng pakayunan semetone.

²¹ Yening genah pangubaktine sane asiki punika kalintang doh genahnyane, semeton dados nampah banteng wiadin biri-biri paican Ida Sang Hyang Widi Wasa ring semeton, manut pakayunan semetone, samalihipun semeton dados nunas dagingnyane ring umah semetone, sakadi sane sampun uningayang tiang ring semeton.

²² Asing-asing anak yadian ipun suci wiadin leteh manut sopacaraning agama, ipun dados nunas daginge punika, sakadi nunas daging kidang wiadin manjangan.

²³ Sakewanten sampunang semeton nunas daging sane kantun madaging rah, santukan angkihane punika wenten ring rahe, tur sampunang semeton nunas angkihan sinarengan ring dagingnyane.

²⁴ Sampunang pisan semeton nunas rah, nanging briokangja rahe punika ka tanahe, sakadi semeton mriokang toya.

²⁵ Yening semeton ninutin pituduhe puniki, Ida Sang Hyang Widi Wasa jaga rumasa ledang ring kayun, tur semeton miwah katurunan semetone pacang rahayu.

²⁶ Sakancan aturan panaur sesangin semetone ring Ida Sang Hyang Widi Wasa patut aturang semeton ring genahe mabakti sane asiki punika.

²⁷ Aturan maborbor miwah aturan-aturan sane dagingnyane jaga tunas semeton, patut aturang semeton ring duur pamorboran aturan Ida Sang Hyang Widi Wasa, tur getihnyane patut briokang semeton ring duur pamorboran aturane punika.

²⁸ Tinutinja saha satia tuu, saluiring paindikan sane sampun uduhang tiang ring semeton. Malantaran punika semeton mapakardi ayu tur kaledangin antuk Ida Sang Hyang Widi Wasa, Widin semetone, kantos parasemeton miwah katurunan semetone jaga rahayu salami-laminipun.”

²⁹

“Rikala semeton ngebug jagate punika, Ida Sang Hyang Widi Wasa, Widin semetone, jaga nyirnayang bangsa-bangsa sane wenten irika kantos semeton nyidayang ngaonang tur ngaug jagate punika.

³⁰ Sasampune Ida Sang Hyang Widi Wasa nyirnayang bangsa-bangsa punika, semeton patut waspada. Sampunang pisan semeton ngindayang jaga mataken, kadi asapunapi caranipune mabakti ring dewa-dewanipune, mangda semeton nyidayang taler mabakti kadi asapunika. Indike punika pacang makta semeton ring patine.

³¹ Sampunangja semeton mabakti ring Ida Sang Hyang Widi Wasa nganggen caranipune mabakti ring dewa-dewanipune, santukan sajeroning ipun mabakti ring dewanipune, ipun pada nglaksanayang saananing paindikan sane kadukain miwah kagetingin antuk Ida Sang Hyang Widi Wasa. Ring asapunapine, ipun ngaturang pianak-pianakipune kaborbor ring duur pamorboran aturanipune.

³²

Laksanayangja saananing paindikan sane sampun uduhang tiang ring semeton. Sampunangja malih wewehina wiadin tunaina.

13

¹

Yening wenten satunggiling nabi wiadin tukang ngartiang ipian masanggup pacang ngwentenang katawahan wiadin praciri,

² mangdane ipun mrasidayang ngedeng semeton buat mabakti muah nyungsung widi-widi sane nenten naenin baktinin semeton,

³ sampunang pisan semeton nglinguang ipun. Ida Sang Hyang Widi Wasa Widin semetone mrabotang ipun buat mintonin semeton, punapike semeton wiakti astiti bakti ring Ida Sang Hyang Widi Wasa saking nulusing ati.

⁴ Iringja Ida Sang Hyang Widi Wasa tur ajerihja ring Ida. Tinutinja Ida tur agemja pituduh-pituduh Idane. Baktininja Ida tur satia tuuja ngiring Ida.

⁵ Nanging pademangja sakancan tukang artiang ipiane miwah nabine sane ngurukang semeton tungkas pamantuka ring Ida Sang Hyang Widi Wasa, sane sampun ngluputang semeton saking tanah Mesir, genah semetone dados panjak. Jadmane sane kadi asapunika sujatinipun jadma durjana, tur ipun ngindayang ngedeng semeton mangda semeton lempas saking urip sane kapituduhang antuk Ida Sang Hyang Widi Wasa. Jadmane punika patut kapademang mangdane semeton prasida luput saking kadursilan puniki.

⁶

Meh-mehan tugelan semetone wiadin okan semetone sane lanang wiadin istri, wiadin rabin semetone sane tresnain semeton, wiadin sawitran semetone sane raket ring semeton, jagi saking silib ngajak semeton mabakti ring widi sane lianan, widi sane nenten naenin baktinin semeton miwah paraleluur semetone.

⁷ Salah tunggal saking pantarannyane jaga ngajakin semeton mabakti ring widi-widin jadmane sane magenah nampek wiadin doh saking semeton.

⁸ Nanging sampunang wehina ipun nguluk-uluk ragan semetone malahan sampunang piragianga baos ipune. Sampunang semeton nyayangang wiadin madalem ipun, miwah sampunang nyayubin ipun.

⁹ Pademangja ipun. Semeton patut dados anak sane pangawit ngencur ipun antuk batu, wusan punika wau banggayang anake sane lianan taler ngencur ipun antuk batu.

¹⁰ Encurin ipun antuk batu, kantos ipun padem! Ipun mamanah ngedeng semeton lempas saking ayun Ida Sang Hyang Widi Wasa, Widin semetone sane sampun ngluputang semeton saking tanah Mesir, genah semetone dados panjak.

¹¹ Kenginan sawatek wong Israele pacang mireng paindikane punika, tur ipun sareng sami jaga ajerih, kantos tan wenten malih anak sane nglaksanayang paindikan sane dura cara sakadi asapunika.

¹²

Yen semeton sampun jenek ring kota-kota sane kapaicayang ring semeton, antuk Ida Sang Hyang Widi Wasa, Widin semetone, menawi semeton jaga mireng gatra,

¹³ mungguing wenten makudang-kudang anak sane jaat saking pantaran bangsan semetone sane sampun murang lampah, nuntun rakyate ring kotan ipune buat mabakti ring widi sane nenten naenin baktinin semeton.

¹⁴ Yen semeton mireng orti sane sakadi asapunika, gelisang selehin, tur yening sawiakti wenten paindikan sane dura cara punika kalaksanayang,

¹⁵ rarisang pademang sakancan rakyate ring kotane punika rauh ring sakancan ingon-ingonipune makasami. Sirnayang kotane punika, kantos basmi kerta.

¹⁶ Ambil tur punduhangja ring alun-alun kotane punika sakancan arta branan jadmane sane ring kotane punika. Sasampune punika raris tunjel kotane punika miwah saluiring sane wenten irika makadados aturan ring ayun Ida Sang Hyang Widi Wasa, Widin semetone. Banggayang ipun dados gegumuk sane uug salami-laminipun, tur nenten dados malih kawangun.

¹⁷ Sampunang pisan semeton malih ngambil barang-barang sane sampun katunjel punika, nanging patut sirnayang semeton. Malantaran asapunika bendu pidukan Ida Sang Hyang Widi Wasa pacang rered, tumuli Ida nyinahang sih pasuecan Idane ring semeton. Ida pacang kalintang sih sueca ring semeton, tur Ida nadosang semeton bangsa sane ageng, sakadi sane sampun janjiang Ida ring leluur semetone,

¹⁸ yening semeton ninutin sakancan pituduh-pituduhe sane sampun uningayang tiang ring semeton ring rahinane puniki, tur nglaksanayang paindikan sane arsayang Ida.”

14

¹

“Semeton puniki kaula druen Ida Sang Hyang Widi Wasa, Widin semetone. Duaning punika yening semeton kaduhkitan malantaran wenten semeton sane seda, sampunang pisan semeton nues-nues ragan semetone wiadin ngundul rambut ring pabaan semetone, sakadi sane kamargiang antuk bangsa-bangsa sane lianan.

² Semeton dados druen Ida Sang Hyang Widi Wasa, Widin semetone. Ida sampun nyelik semeton saking pantaran sakancan bangsane sane urip ring mrecapada buat dados kaulan Idane.”

³

“Sampunangja semeton ngajeng sato sane sampun kanikayang leteh antuk Ida Sang Hyang Widi Wasa.

⁴ Sato-satone sane dados ajengang semeton, inggih punika: banteng, kambing miwah biri-biri,

⁵ manjangan, biri-biri miwah kambing alasan, wiadin kidang,

⁶ miwah sakancan satone sane kukunnyane masepak miwah ngilag.

⁷ Nanging burone sane kukunnyane tan masepak, tur nenten ngilag, nenten dados ajeng semeton. Semeton tan dados ngajengang unta, kelinci, miwah marmut. Burone punika patut kabaos leteh, yadiastu ipun ngilag, nanging kukunipune nenten masepak.

⁸ Sampunang semeton ngajengang bawi. Bawine patut kabaos leteh yadiastun kukunipune masepak, nanging ipun nenten ngilag. Sampunang pisan semeton ngajengang burone punika, wiadin ngusud bangkenipune.

⁹

Saananing ulam sane masisik wiadin makepes, punika dados ajengang semeton,

¹⁰ nanging saananing sane urip ring toyane, sane nenten masisik miwah makepes, punika nenten dados ajengang. Ipun patut kawastanin leteh.

¹¹

Sakancan paksine sane suci, punika dados ajengang semeton.

¹² [12-18] Nanging wenten makudang-kudang soroh paksi sane nenten dados kajeng, minakadinipun: rajawali, celepuk, sikep, bulusan, kukugan, guak, paksi kasuari, cangak, kokokan, ngosngosan, meragai miwah lelawah.

¹³

¹⁴

¹⁵

¹⁶

¹⁷

¹⁸

¹⁹

Soroh balang sane makampid punika makasami leteh tur tan dados ajeng semeton.

²⁰ Soroh balang sane nenten leteh punika dados ajengang semeton.

²¹

Semeton nenten dados ngajengang saananing bangken sato, sane padem tan sangkaning katampah, nanging wong sunantara sane madunungan ring pantaran semetone, ipun dados nunas bangken satone punika wiadin semeton dados ngadol bangken satone punika ring wong sunantara sane lianan. Nanging semeton puniki druen Ida Sang Hyang Widi Wasa, Widin semetone, semeton dados kaulan Idane. Sampunang semeton nglablab panak biri-biri wiadin kambing antuk yeh nyonyon inanipune.”

²²

“Nyabran taun semeton patut nganehang apahdasan saking sakancan pamupon tegalan semetone.

²³ Sapanglanturipun rarisangja lunga ka satunggiling genah sane sampun kaselik antuk Ida Sang Hyang Widi Wasa, Widin semetone, buat ngaturang bakti ring Ida. Irika ring ayun Idane, rarisang ngajengang aturan apahdasan semetone, inggih punika apahdasan gandum, anggur miwah minyak saitun, makamiwah panak banteng lan biri-birin semetone sane pangawit. Laksanayangja paindikan punika mangdane semeton prasida mlajah setata ngluihang Ida Sang Hyang Widi Wasa, Widin semetone.

²⁴ Yening genah pangubaktine punika kalintang doh saking genah semetone, kantos semeton tan mrasidayang makta aturan apahdasan upon-upon semetone sane sampun kamertanin antuk Ida Sang Hyang Widi Wasa, rarisang margiang sapuniki:

²⁵ Adolja upon-upon semetone punika, rarisang baktaja jinahnyane ka genah pangubaktine punika.

²⁶ Raris jinahe punika tumbasang napija sane arsayang semeton minakadinipun, banteng, biri-biri, anggur wiadin bir, tumuli rarisang semeton miwah kulawargan semetone pada ngajengang tur maliang-liang irika ring ayun Ida Sang Hyang Widi Wasa, Widin semetone.

²⁷

Sampunang lalianga suku Lewi sane ring kotan semetone, santukan suku Lewi punika nenten polih duman tanah sakadi semeton.

²⁸ Nyabran tigang taun ring pamuput taun sane kaping tiga, bakta tur punduhangja apahdasan pamupon tegalan semetone ring kotan semetone.

²⁹ Pangane puniki buat suku Lewi, santukan dane nenten polih duman tanah, miwah pabuat wong sunantara, pabuat anak-anak ubuh, miwah anak balu-balu sane wenten ring kotan semetone. Dane ipun sareng sami patut pada rauh tur molih sakancan kabuatannyane. Yening semeton ngamargiang indike puniki, Ida Sang Hyang Widi Wasa, Widin semetone jaga ngamertanin semeton ring saluiring pakaryan semetone.”

15

¹

“Ring pamuput taun sane kaping pitu, semeton patut malilayang utang anake sane mutang ring semeton,

² sapuniki caranipun malilayang utang punika: Asing-asing anak sane mutangang ring sesamannyane wong Israel, ipun patut malilayang piutangnyane punika. Ipun tan patut malih nagih piutangnyane punika, santukan Ida Sang Hyang Widi Wasa sampun nitahang indik malilayang piutange punika.

³ Semeton dados nagih jinah semetone sane kaselang antuk wong sunantara, nanging sane kaselang antuk bangsan semetone ngraga, sampunang tagiha.

⁴

Ida Sang Hyang Widi Wasa pacang ngamertanin semeton ring tanah sane pacang paicayang Ida ring semeton. Tan pacang wenten anak sane tiwas ring pantaran semetone,

⁵ yening semeton satinut ring Ida tur saking sarat nglaksanayang saluiring paindikan sane uduhang tiang ring semeton ring rahinane puniki.

⁶ Ida Sang Hyang Widi Wasa pacang ngamertanin semeton sakadi sane sampun janjiang Ida ring semeton. Semeton pacang maselangang jinah ring bangsa-bangsane akeh, nanging semeton ngraga nenten jaga nyelang punapa-punapi. Semeton jaga nguasain bangsa-bangsa sane akeh, nanging nenten wenten bangsa-bangsa sane jaga nguasain semeton.

⁷

Yening satunggiling kota ring jagat paican Ida Sang Hyang Widi Wasa, Widin semetone ring semeton, wenten semeton Israel sane katunan, sampunang semeton demit miwah tan kayun mitulung ring semetone punika.

⁸ Nanging olasin tur icen ipun nyelang manut ring kabuatanipune.

⁹ Sampunangja tan durus maselangin ipun, malantaran taun palilan utange punika sampun nampek. Sampunangja icena pepinehe sane jaat ngranjing ring pepineh semetone. Yen semeton nenten kayun maselangin ipun, ipun jaga masesambatan, nguningayang indik semetone ring ayun Ida Sang Hyang Widi Wasa, tur semeton pacang kiwangang.

¹⁰ Wehinja ipun saking suka lila, tur sampunang demit, malantaran puniki Ida Sang Hyang Widi Wasa pacang ngamertanin semeton ring pakaryan semetone.

¹¹ Ring pantaran wong Israele setata jagi wenten anak tiwas miwah katunan. Punika awinanipun tiang nguduhang ring semeton, mangda semeton kapiolasan ring semeton punika.”

¹²

“Yening wenten wong Israel, lanang wiadin istri sane kadol wiadin ngadol deweknyane makadados panjak ring semeton, semeton patut mebasang ipun sasampune nem taun ipun ngayahin semeton. Ring taun sane kaping pitu semeton patut mebasang ipun.

¹³ Yening semeton mebasang ipun, sampunang semeton ngenken ipun makaon saha matalang.

¹⁴ Icenja ipun saking suka lila arta brana sane sampun kapaicayang antuk Ida Sang Hyang Widi Wasa ring semeton, minakadinipun: biri-biri, gandum miwah anggur.

¹⁵ Elingangja mungguing semeton sane riin pecak dados panjak ring jagat Mesir, tur Ida Sang Hyang Widi Wasa, Widin semetone mebasang semeton. Punika awinanipun sane mangkin tiang ngaturang pituduhe puniki ring semeton.

¹⁶

Nanging yen prade panjak semetone punika nenten nyak bebas, sangkaning ipun tresna ring semeton miwah kulawargan semetone, tur lila jagi ngiring semeton.

¹⁷ Yening kadi asapunika, rarisang ajak ipun ka obag-obagan jelanan umah semetone, tur irika tebek kupingipune, kenginan ipun jaga dados panjak semetone saumur idupnyane. Kadi asapunika taler patut margiang semeton, marep ring panjak semetone sane luh.

¹⁸ Sampunangja semeton marasa merang ring kayun, yening semeton mebasang panjak, santukan nem taun suenipun, ipun ngayahin semeton, tur pikolihipune wantah atenga yen bandingang ring upah buruhe. Laksanayangja indike puniki. Malantaran punika Ida Sang Hyang Widi Wasa, Widin semetone pacang ngamertanin semeton ring saluiring pakaryan semetone.”

¹⁹

Suciangja pabuat Ida Sang Hyang Widi Wasa, Widin semetone, sakancan panak banteng miwah biri-birin semetone sane muani sane lekad jumun daana. Panak bantenge punika sampunangja anggena makarya, miwah sakancan panak biri-birine punika sampunang guntinga bulunipune.

²⁰ Nyabran taun semeton miwah kulawargan semetone patut ngajengang panak banteng miwah biri-birine punika ring ayun Ida Sang Hyang Widi Wasa, ring genah pangubaktine sane sampun kaselik antuk Ida Sang Hyang Widi Wasa.

²¹ Nanging yen panak bantenge miwah panak biri-birine punika madaging cantula, upaminipun rumpuh wiadin buta, wiadin cacad sane lianan, sampunang ipun anggena aturan pamantuka ring Ida Sang Hyang Widi Wasa, Widin semetone.

²² Semeton dados ngajengang ulam burone punika jumah semetone inggih punika semeton sareng sami yadian sane suci wiadin leteh manut sopacaraning agama dados ngajengang ulame punika sakadi semeton ngajengang ulam manjangan wiadin kidang.

²³ Sakewanten sampunang ajenga getihnyane, nanging semeton patut ngutang getihnyane ring tanahe, sakadi semeton mriokang toya.

16

¹

“Luihangja Ida Sang Hyang Widi Wasa, Widin semetone, malantaran semeton Marerainan Paskah di nuju bulan Abibe, santukan ring bulan Abib punika, rikalaning wengi, Ida sampun mebasang semeton saking tanah Mesir.

² Rarisangja ka genah pangubaktine, tur tampahja irika salah tunggal biri-biri wiadin banteng semetone anggen ajeng-ajengan sajeroning Rerainan Paskahe, buat ngluihang Ida Sang Hyang Widi Wasa, Widin semetone.

³ Rikalaning semeton ngajengang ajeng-ajengane punika, sampunang semeton ngajengang roti sane maragi. Pitung rahina suenipun semeton patut ngajengang roti sane tan paragi, sakadi sane sampun margiang semeton ritatkala semeton gegison kesah saking jagat Mesir. Ajengangja rotine punika sane pacang kawastanin roti kasangsaran, mangdane sapanjang umur semetone, semeton jaga eling ring rahina rikala semeton rarud saking tanah Mesir, jagat genah semetone nandang sangsara.

⁴ Sajeroning pitung rahina ring sakuub wewidangan panegaran semetone sampunangja wenten anak sane nyepel ragi ring umahnyane. Samaliha ulam wewalungan sane katampah rikalaning sore rahinane sane kaping pisan, patut kajengang ring wengine punika, tan dados kantun kantos rauh benjang semengannyane.

⁵

[5-6] Tampahja wewalungan pabuat Rerainan Paskahe punika ring genah pangubaktine sane asiki punika, tur sampunang ring genahe sane lianan, ring wewidangan jagat sane kapaicayang ring semeton antuk Ida Sang Hyang Widi Wasa, Widin semetone. Tampahja wewalungane punika rikala surup suryane, ring dauh wengi, sakadi daweg semetone makaon saking Mesir.

⁶

⁷ Lablabja ulame punika raris ajengang ring genah pangubaktine sane asiki punika tur benjang semengan rarisang semeton budal.

⁸ Sajeroning nem rahina ngawit saking rahinane punika semeton patut ngajengang roti sane nenten madaging ragi, tur ring rahinane sane kaping pitu, semeton patut mapunduh mabakti ring ayun Ida Sang Hyang Widi Wasa, Widin semetone, samaliha sampunang ngambil karya ring rahinane punika.”

⁹

“Ngawit saking semeton ngampung gandum, wilangja pitung uku suenipun.

¹⁰ Ring uku sane kaping pitu punika, wentenangja Rerainan Unduh-unduh, buat ngluihang Ida Sang Hyang Widi Wasa, Widin semetone. Ring rerainane punika semeton patut saking suka lila, ngaturang aturan ring ayun Idane, satinut ring merta sane sampun paicayang Ida ring semeton.

¹¹ Pada masuka renaja ring ayun Ida Sang Hyang Widi Wasa, sinarengan ring oka-okan semetone, parekan miwah panyeroan semetone, miwah suku Lewi, wong sunantara, soroh anake ubuh-ubuh miwah balu-balune sane wenten ring kotan semetone.

¹² Elingangja mangda semeton ninutin pituduh-pituduh puniki, sampunang lali mungguing sane riin semeton pecak dados panjak ring Mesir.”

¹³

“Sasampune semeton puput nyosoh gandum miwah meres woh anggur semetone makasami, rarisangja ngwentenang Rerainan Pondok Daun, pitung rahina suenipun.

¹⁴ Ring rerainane punika semeton sareng sami patut masuka rena sinarengan ring oka-okan semetone, parekan miwah panyeroan semetone, miwah suku Lewi, wong sunantara, soroh anak ubuh-ubuh, miwah anake balu-balu sane wenten ring kotan semetone.

¹⁵ Luihangja Ida Sang Hyang Widi Wasa, Widin semetone, masrana semeton ngluihang rerainan punika pitung rahina suenipun, ring genah pangubaktine sane asiki punika. Pada maliang-liangja semeton santukan Ida Sang Hyang Widi Wasa sampun ngamertanin pamupon miwah pakaryan semetone.

¹⁶

Sawatek anak lanang bangsa Israel patut rauh ngaturang bakti ring ayun Ida Sang Hyang Widi Wasa ping tiga ataun, ring genah pangubaktine inggih punika ring Rerainan Paskahe, ring Rerainan Unduh-unduhe, miwah ring Rerainan Pondok Daune. Asing-asing anak patut makta aturan,

¹⁷ amunapija ipun nyidayang satinut ring merta sane sampun kapaicayang ring ipun antuk Ida Sang Hyang Widi Wasa, Widin semetone.”

¹⁸

“Ring sabilang kota sane kapaicayang ring semeton antuk Ida Sang Hyang Widi Wasa, Widin semetone, semeton patut ngadegang hakim miwah pamrentah sane lianan. Anake sane kadegang punika patut nepasin rakyate saha adil.

¹⁹ Sampunangja ipun tan adil wiadin pilih kasih sajeroning ipun nibakang tetepasan samaliha ipun tan dados nampi tetombokan. Santukan tetombokan punika ngawinang anake buta, yadian anake punika wicaksana wiadin jujur tur ngawinang ipun nibakang tetepasan sane iwang.

²⁰ Semeton patut tansah jujur tur adil, mangdane semeton mrasidayang ngaug tanah sane kapaicayang ring semeton antuk Ida Sang Hyang Widi Wasa, Widin semetone, tur semeton pacang nutugang tuuh irika.

²¹

Yening semeton ngwangun pamorboran aturan pabuat Ida Sang Hyang Widi Wasa, Widin semetone, sampunang semeton ngenahang arca taru Dewi Asera ring samping pamorboran aturane punika.

²² Samaliha sampunang semeton ngwangun tugu panyungsungan pabuat widi-widi sane lianan, santukan Ida Sang Hyang Widi Wasa bendu ring paindikane kadi asapunika.

17

¹

Sampunang semeton ngaturang banteng wiadin biri-biri sane mala ring ayun Ida Sang Hyang Widi Wasa, Widin semetone, santukan Ida nenten ledang ring aturan sane kadi asapunika.

²

Menawi semeton mireng, mungguing ring sinalih tunggiling kotan semetone wenten anak lanang wiadin anak istri sampun malaksana iwang pamantuka ring Ida Sang Hyang Widi Wasa, tur mamurug prajanjian Idane,

³ malantaran ipun mabakti miwah nyungsung widi sane lianan, surya, bulan wiadin bintang-bintang, sane tungkas ring pituduh Ida Sang Hyang Widi Wasa.

⁴ Yening semeton mireng gatra sane asapunika, patut becikang nureksain paindikane punika. Yening sawiakti mungguing paindikane sane iwang punika sampun kalaksanayang ring pantaran wong Israele,

⁵ durusang ajak jadmane punika medal saking kota, tur encurin ipun antuk batu kantos padem.

⁶ Jadmane punika keni kapademang, yening wenten saksi kekalih wiadin langkungan, sane ngawiaktiang laksanan jadmane punika. Nanging yening wantah adiri anake sane dados saksi, jadmane punika tan patut ngemasin padem.

⁷ Anake sane dados saksi punika sane patut pinih riin ngencur jadmane punika antuk batu. Wusan punika wau rakyate sane lianan. Malantaran punika semeton mrasidayang nyirnayang kajaatane punika.

⁸

Yening wenten wicara sane sengkil tur nenten prasida katepasin antuk parahakime sane wenten irika, upaminipun, indik warisan, masepegan, wiadin ngamademang anak ulihan nyelapang wiadin tan nyelapang, semeton patut lunga ka genah pangubaktine sane kaselik antuk Ida Sang Hyang Widi Wasa, Widin semetone.

⁹ Irika semeton patut ngaturang wicaran semetone ring parapandita suku Lewine miwah ring parahakime sane polih tugas daweg punika, mangda dane nepasin wicarane punika.

¹⁰ Dane pacang mapaica tetepasan ring semeton, tur semeton patut tan simpang ngamargiang tetepasan sane kapaica ring semeton punika.

¹¹ Tampija kaputusan danene punika, tur tinutinja pituduh-pituduh danene makasami.

¹² Sapasiraja sane purun langgana ring hakim miwah pandita sane ngamargiang sesanannyane duk punika, ipun patut keni danda pati. Malantaran punika semeton prasida nyirnayang kajaatane punika, saking pantaran wong Israele.

¹³ Asing-asing anak sane miragi indike punika pacang ajerih. Dadosipun tan wenten malih jadma sane purun nglaksanayang sane kadi asapunika.”

¹⁴

“Yening semeton sampun ngaug jagat sane sampun kapaicayang ring semeton antuk Ida Sang Hyang Widi Wasa, Widin semetone, tur semeton sampun jenek irika, menawi semeton pacang marasa buat madue sang prabu, sakadi sakancan bangsa-bangsa sane wenten rin kiwa tengen semetone.

¹⁵ Elingangja mungguing wantah anak sane sampun kaselik antuk Ida Sang Hyang Widi Wasa kewanten sane patut adegang semeton dados prabu. Anake punika patut saking pantaran bangsan semetone kawitipun. Sampunang wong sunantara adeganga dados ratu ring pantaran semetone.

¹⁶ Sang prabu punika tan patut madue kuda akeh pisan pabuat wadua balan idane. Samaliha tan patut ngutus anak ka Mesir buat jaga numbas kuda. Santukan Ida Sang Hyang Widi Wasa sampun masabda, mungguing kaulan Idane nenten pacang naenin malih mawali mrika.

¹⁷ Ida sang prabu tan patut madue rabi akeh, santukan indike punika pacang ngawinang ida lempas saking ayun Ida Sang Hyang Widi Wasa. Sajaba punika, ida sang prabu tan dados nyugihang ragan idane antuk perak miwah mas.

¹⁸ Yening wenten anak sane kamanggehang dados prabu, ida patut katurin cakepan, sane madaging pidabdab-pidabdab miwah paurukan-paurukan saking Ida Sang Hyang Widi Wasa sane katurun saking cakepan aslinnyane sane kasimpen antuk parapandita suku Lewine.

¹⁹ Ida patut setata ngagem cakepane punika, tur kawacen sapanjang yusan idane, mangdane ida pacang mlajah ngluihang Ida Sang Hyang Widi Wasa, tur satia tuu ninutin sakancan sane sinurat ring cakepane punika.

²⁰ Yening ida tuon ngwacen cakepane punika, ida nenten pacang rumasa agungan ring bangsan idane Israel, tur ngawinang ida nenten pacang lempas saking pituduh-pituduh Ida Sang Hyang Widi Wasa, ring saluiring paindikan. Kenginan ida miwah katurunan idane pacang mrentah bangsa Israel turun-temurun.”

18

¹

“Suku Lewi sane kawenangang dados pandita nenten patut polih duman tanah ring Israel, nanging dane patut polih pangupa jiwa saking aturan-aturan sane katur ring Ida Sang Hyang Widi Wasa.

² Dane nenten patut madue tanah sakadi suku-suku sane lianan. Duman danene inggih punika linggih buat dados pandita druen Ida Sang Hyang Widi Wasa sakadi sane sampun kajanjiang antuk Ida Sang Hyang Widi Wasa.

³

Yening wenten aturan banteng wiadin biri-biri, parapanditane patut katurin paannyane sane ring arep, cadik miwah basangnyane.

⁴ Dane taler patut katurin pamupon gandum, anggur miwah minyak saitun semetone sane pangawit. Kadi asapunika taler bulun biri-birin semetone sane kagunting pinih pangawit.

⁵ Saking pantaran sakancan suku bangsan semetone, Ida Sang Hyang Widi Wasa nyelik suku Lewi dados pandita, buat ngaturang ayah pamantuka ring Ida Sang Hyang Widi Wasa salami-laminipun.

⁶

Sakancan wong Lewi sane saking salah tunggil kota ring Israel, raris rauh ring genah pangubaktine sane kaselik antuk Ida Sang Hyang Widi Wasa, tur mapakayunan jenek irika,

⁷ dane dados ngaturang ayah irika sakadi pandita druen Ida Sang Hyang Widi Wasa, Widin danene, sakadi wong Lewi sane lianan, sane ngayah irika.

⁸ Dane taler patut polih duman ajengan sane pateh sakadi pandita sane lianan, tur dane dados ngambil sakancan brana sane kakirimang antuk kulawargan danene ring dane.”

⁹

“Yening semeton rauh ring jagate sane pacang kapaicayang antuk Ida Sang Hyang Widi Wasa ring semeton, sampunangja semeton nulad laksana sane cemer, sane kalaksanayang antuk bangsa-bangsane sane wenten irika.

¹⁰ Sampunangja okan semetone anggena aturan sane maborbor ring pamorboran aturan semetone, tur sampunang bangsan semetone nglaksanayang indik matetenungan, matetenger wiadin mabalianan,

¹¹ wiadin nganggen gegemet, tur sampunang maluasang buat matuunang atman anake sane sampun padem.

¹² Ida Sang Hyang Widi Wasa, Widin semetone kalintang bendu ring jadmane sane nglaksanayang paindikan-paindikan sane cemer punika, tur indike punika ngawinang Ida nyapuh bangsa-bangsane punika saking jagate irika ring ajeng parasemetone.

¹³ Semeton patut saking saguluking ati satia tuu ngaula ring Ida Sang Hyang Widi Wasa, Widin semetone.”

¹⁴

Dane Musa raris ngandika sapuniki: “Jadmane ring jagat sane pacang aug semeton, ipun pada ngidepang tutur anake sane ngadokang tenung miwah tetenger-tetenger. Nanging Ida Sang Hyang Widi Wasa, Widin semetone nenten nglugrain semeton nglaksanayang paindikan-paindikan sane kadi asapunika.

¹⁵ Tungkalikanipun, Ida pacang ngutus nabi adiri, sane pateh sakadi tiang, pacang ngrauhin semeton. Nabine punika kaselik saking pantaran bangsan semetone, tur semeton patut satinut ring dane.

¹⁶

Ring rahina daweg semeton mapunduh ring Gunung Sinai, semeton mapinunas mangda semeton sampunang malih miragi Ida Sang Hyang Widi Wasa masabda, miwah ngeton teja wedanan Idane sajeroning geni sane ngendih murub punika, santukan semeton ajerih jagi padem.

¹⁷ Duaning punika Ida Sang Hyang Widi Wasa raris ngandika ring tiang sapuniki: ‘Pinunasnyane ento beneh.

¹⁸ Ulun lakar ngutus nabi adiri ane patuh buka kita buat nekain ia. Nabine ento, selik Ulun uli pantaran bangsannyane. Ulun lakar ngorahin nabine ento, apa ane patut orahanga, ia lakar ngorahin rakyate sakancan ane pituduhang Ulun.

¹⁹ Ia lakar ngraos dadi wakil Ulune, tur Ulun lakar nyisipang anake ane tusing nyak satinut teken ia.

²⁰ Nanging yening ada nabi ane bani ngucapang pawarah sajeroning parab Ulune, sakewala Ulun tusing ada nitahang ia ngraos keto, ulihan ento ia patut mati. Aketo masih sakancan nabine ane ngucapang pawarah, pinaka dadi wakil widi-widi ane lenan.’

²¹

Sapunapi antuk parasemeton mrasidayang uning mungguing pawarah nabine punika saking Ida Sang Hyang Widi Wasa wiadin boya saking Ida?

²² Yening wenten nabi ngucapang pawarah, ngaku dados wakil Ida Sang Hyang Widi Wasa, nanging saluiring sane kawarahang punika nenten sawiakti kasidan, kenginan pawarahe punika boya saking pituduh Ida Sang Hyang Widi Wasa. Nabine punika sampun mabaos nganggen kakuasaanipune niri, tur semeton nenten patut ajerih ring ipun.”

19

¹

“Sasampune Ida Sang Hyang Widi Wasa, Widin semetone masmi bangsa-bangsane, sane tanahnyane kapaicayang ring semeton, tur sasampun semeton ngaug kota-kota, miwah umah-umah ipune saha magumana irika,

² [2-4] rarisang pah wewidangane punika dados tigang pahan, tur asing-asing wewidangan punika madaging kota genah masayuban sane dangan antuk ngrauhin. Yening wenten anak sane nenten nyelapang ngamademang jadma, sane boya mesehnyane, ipun dados malaib ngungsi salah tunggil kotane punika, mangda ipun polih pasayuban.

³

⁴

⁵ Upaminipun sapuniki: Yening wenten anak sareng kalih luas ka alase ngebah taru, raris risedek sane adiri ngandik taru, tumuli keles kandikipune, saha ngenanin timpal ipune kantos ipun padem, anake sane ngandik taru punika dados malaib ka salah tunggiling kota pasayuban sane tetiga punika, mangda ipun luput.

⁶ Yening wantah asiki wenten kota pasayuban, tur genah kotane punika doh, raris yen wenten anak sane patut nindihin sang padem, mamanah ngwales padem nyamanipune punika, sinah ipun mrasidayang ngejuk sang ngamademang punika ring margi, raris sahasa ngamademang anake sane tan padosa kabatek antuk brangtinipune. Makayuaktinipun, ipun nenten nyelapang ngamademang anak, sane boya mesehipune.

⁷ Punika awinanipun tiang nunas ring semeton, mangda semeton nganehang kota tetiga.

⁸

Yening Ida Sang Hyang Widi Wasa sampun nglinggahang wewidangan semetone sakadi sane sampun janjiang Ida ring paraleluur semetone tur maicayang tanahe punika makasami ring semeton,

⁹ kenginan semeton patut nyelik kota pasayuban malih tetiga. (Ida pacang maicayang tanahe punika ring semeton, yening semeton nglaksanayang sakancan pituduhe sane pituduhang tiang ring semeton ring rahinane puniki, tur yening semeton astiti bakti ring Ida Sang Hyang Widi Wasa, Widin semetone, samaliha malaksana satinut ring paurukan Idane.)

¹⁰ Laksanayangja paindikane puniki mangdane semeton nenten madosa malantaran ngukum mati anake sane tan padosa ring tanah sane kapaicayang antuk Ida Sang Hyang Widi Wasa ring semeton.

¹¹

Nanging minab wenten anak mula matagenan pacang ngamademang mesehipune, raris ipun malaib ngungsi ka salah tunggiling kotane punika mangda polih pasayuban.

¹² Sajeroning paindikane punika, parapamimpin kotanipune patut ngandikayang ngrereh tur ngambil ipun saking irika, tumuli nyerahang ipun ring sang sane patut nindihin sang padem, mangda ipun kapademang buat ngwalesang sang padem.

¹³ Sampunang semeton madalem ipun. Bebasangja bangsa Israele saking jadma sane mamati-mati, mangda semeton prasida rahayu.”

¹⁴

“Yening semeton sampun rauh ring tanah sane kapaicayang ring semeton antuk Ida Sang Hyang Widi Wasa, Widin semetone, sampunang semeton ngisidang bates baledan tanah sesaman semetone, sane sampun katetepang saking nguni.”

¹⁵

“Buat nalih anak sajeroning kajaatan, nenten cukup saksi wantah adiri. Sakirang-kirangipun patut wenten saksi kekalih sane ngawiaktiang mungguing anake punika iwang.

¹⁶ Yening wenten anak mamanah nyelekang timpalipune, malantaran ipun misunayang ipun,

¹⁷ anake makakalih punika patut ngungsi ka genah pangubaktine tur irika katepasin antuk pandita miwah parahakim sane sedek polih tugas irika.

¹⁸ Parahakime patut nureksain wicarane punika becik-becik, tur yen kapanggih mungguing anake punika mabukti sampun misunayang timpalipune paturu bangsa Israel,

¹⁹ ipun patut ngemasin pasisip sane patut kamasin antuk anake sane dalih ipun. Malantaran paindikane punika semeton mrasidayang nyirnayang kajaatane sane kadi asapunika saking pantaran bangsan semeton.

²⁰ Sakancan anake sane lianan pacang miragi paindikane punika jagi ajerih, tur nenten wenten malih anak sane purun malaksana sane kadi asapunika.

²¹ Sajeroning paindikane punika sampunangja semeton madalem ipun. Pasisipnyane inggih punika: Angkihan bayah baan angkihan, mata bayah baan mata, gigi bayah baan gigi, lima bayah baan lima, batis bayah baan batis.”

20

¹

“Yening semeton medal ka payudan ngarepin meseh semetone, raris cingak semeton kreta miwah kuda miwah wadua bala akehan ring druen semetone, sampunangja ajerih ring ipun. Ida Sang Hyang Widi Wasa, Widin semetone, sane sampun mebasang semeton saking jagat Mesir, Ida pacang ngiangin semeton.

² Sadurung semeton ngawitin mayuda, patut wenten pandita adiri ngadeg ring ajeng wadua balane tur ngandika sapuniki:

³ ‘Ih wong Israel, padingehangja. Ane jani nyama lakar luas masiat. Eda pesan nyama jejeh teken musuh nyamane wiadin ilang kawanenan nyamane muah bingung.

⁴ Ida Sang Hyang Widi Wasa, Widin nyamane lakar ngiangin nyama, tur Ida lakar mapaica kamenangan teken nyama.’

⁵

Sasampune punika parasenapatine patut mapidarta ring prajurite, sapuniki: ‘Punapike wenten iriki semeton sane wau ngwangun umah, nanging durung mlaspasin umahnyane punika? Yening wenten, ipun patut budal. Duaning yening ipun padem ring payudan, anak lianan sane jaga mlaspas umahipune.

⁶ Punapike wenten iriki semeton sane wau nandur wit anggur, nanging durung naenin polih ngalapin wohnyane? Yening wenten, anake punika patut budal, santukan yening ipun padem ring payudan, anak lianan sane jaga mupuang angguripune.

⁷ Punapike wenten iriki semeton sane magegelan tur jaga mamanah nganten? Yening wenten, ipun patut budal santukan yening ipun padem ring payudan, anak tios jaga nganten ngajak gegelan ipune.’

⁸

Parasenapatine taler patut mabaos ring prajurite sapuniki: ‘Punapike iriki wenten semeton sane gringgingan tur marasa ajerih? Yening wenten ipun patut budal, santukan ipun pacang ngusakang semangat kaprawiran prajurite sane lianan.’

⁹ Yening parasenapatine sampun puput mabaos ring prajurite, irika raris patut kapilih komandan-komandan pasukan, sane jaga mimpin asing-asing pasukane punika.

¹⁰

Yening semeton jaga anglurug satunggiling kota, pinih riin semeton patut nguehin sela ring rakyat kotane punika, buat nyerahang dewek ring semeton.

¹¹ Yening ipun mukak gapurannyane tur nyerah ring semeton, ipun sareng sami patut kapaksa kadadosang panjak miwah pangayah semetone.

¹² Nanging yening wong kotane punika nenten nyak nyerah, nanging ipun mamanah mayuda, kurungja kotane punika antuk wadua balan semetone.

¹³ Samaliha yening Ida Sang Hyang Widi Wasa, Widin semetone, nglugrain semeton ngaonang kotane punika, pademangja sakancan jadmane muani-muani sane wenten irika.

¹⁴ Semeton wantah kalugrain ngambil pabuat ragan semetone ngraga inggih punika: paraistri, pararare, ingon-ingon miwah sane lian-lianan malih, sane wenten ring kotane punika. Semeton dados ngunayang saluiring sane dados paderben meseh semetone. Ida Sang Hyang Widi Wasa, Widin semetone sampun maicayang punika ring semeton.

¹⁵ Kadi asapunika patutipun semeton malaksana marep ring kota-kota sane doh genahipun saking jagat sane pacang aug semeton.

¹⁶

Nanging yen semeton ngaonang kota-kota ring jagat sane jaga kapaicayang ring semeton antuk Ida Sang Hyang Widi Wasa, Widin semetone, pademangja sakancan wong kotane punika.

¹⁷ Jadma-jadmane makasami sane patut sirnayang semeton, inggih punika wong Het, wong Amori, wong Kanaan, wong Peris, wong Hewi, miwah wong Yebus, sakadi pituduh Ida Sang Hyang Widi Wasa ring semeton.

¹⁸ Pademang ipun makasami, mangda sampunang ipun ngawinang semeton madosa pamantuka ring ayun Ida Sang Hyang Widi Wasa, malantaran semeton ninutin paurukan-paurukanipune nglaksanayang paindikan-paindikan sane cemer, sane laksanayang ipun rikalaning ipun mabakti ring widi-widinnyane.

¹⁹

Yening semeton jaga anglurug satunggiling kota, sampunangja semeton ngebah wit woh-wohannyane, yadiastu semeton ngantos sue ngurung kotane punika. Woh-wohanipune dados ajengang nanging punyanipun sampunang sirnayanga, santukan punyanipune punika boya meseh semetone.

²⁰ Wit tarune sane lianan sane nenten ngasilang woh, dados bah tur gunayang anggen gelar sajeroning semeton ngurung kotane punika, kantos kotane punika kaonang semeton.”

21

¹

“Ring jagat sane jaga kapaicayang ring semeton antuk Ida Sang Hyang Widi Wasa, Widin semetone, yening pet wenten anak padem ring pategalan, tur semeton tan uning ring anak sane mademang ipun,

² parapamimpin miwah hakim-hakim semetone patut medal tur nyikut doh genah sawane punika klawan asing-asing kota sane nampek, sane wenten ring kiwa tengenipune.

³ Parapamimpin kotane sane pinih nampek saking genah sawane patut milih godel banteng asiki, sane durung naenin kanggen makarya.

⁴ Parapamimpin kotane punika patut makta godele punika ka sisin tukade sane nenten naenin pegat toyanipune, tur sane tanahipune durung naenin katekapin, wiadin katandurin. Irika baong godele punika patut kaelungang.

⁵ Parapandita suku Lewine taler patut sareng lunga mrika, santukan dane sane patut nepasin saananing wicara sane ngeniang indik kawirosan. Ida Sang Hyang Widi Wasa, Widin semetone sampun nyelik dane, buat ngancangin Ida miwah buat ngucapang merta masrana parab Idane.

⁶ Sasampune punika sakancan pamimpin sane saking kotane sane paling nampeka saking genah sang padem punika, patut masehin tangannyane ring duur godele punika,

⁷ sarwi maucap-ucap sapuniki: ‘Titiang sareng sami nenten wenten ngamademang jadmane punika tur titiang nenten uning sapasira sane ngamademang ipun.

⁸ Duh Ratu Sang Hyang Widi Wasa, ampurayang kaula druene bangsa Israel, sane sampun bebasang Palungguh IRatu saking Mesir. Ampurayangja titiang, tur sampunangja titiang kapitegenin patin jadmane sane tan padosa punika.’

⁹ Dadosipun malantaran semeton ngamargiang pituduh Ida Sang Hyang Widi Wasa, semeton nenten pacang kapetegenin patin anake sane padem punika.”

¹⁰

“Yening Ida Sang Hyang Widi Wasa, Widin semetone mapaica kamenangan ring payudan tur semeton molih tawanan,

¹¹ saking pantaranipune semeton dados milih anak luh sane jegeg sane senengin semeton, sane jaga anggen semeton rabi.

¹² Ajakja ipun ka umah semetone. Tur irika ipun patut ngetep bok miwah kukunipune,

¹³ miwah ngesehin panganggenipune. Ipun patut nongos ring umah semetone. Irika ipun mangelingin meme bapanipune sane padem asasih suenipun. Sasampune punika, semeton dados nganten ngajak ipun.

¹⁴ Benjangan yen semeton nenten kantun seneng ring ipun, semeton patut mebasang ipun. Semeton nenten dados nganggep miwah ngadol ipun sakadi panjak. Santukan semeton sampun mamaksa matemu semara ring ipun.”

¹⁵

“Menawita wenten anak maderbe somah kekalih tur makakalih nglekadang pianak muani-muani, nanging pianak sane paling kelih nenten lekad saking somah sane sayangang ipun.

¹⁶ Rikala ipun mamanah ngedumang waris ring pianak-pianakipune, ipun tan patut mapilih kasih ring somahipune sane sayangang ipun malantaran ipun ngwehin pianakipune, duman sane patut katampi antuk pianak sane pinih keliha.

¹⁷ Pianakipune muani sane pinih keliha patut wehin ipun duman kalih bagian saking pagelahanipune, yadian pianakipune punika nenten lekad saking somah sane sayangang ipun. Anake punika patut ngamanggehang tegak pianakipune sane paling keliha, tur ngwehin ipun duman sane patut dados dumanipune.”

¹⁸

“Menawita wenten anak sane maderbe pianak muani sane bengkung tur duraka, sane nenten nyak ngidepang munyin meme bapanipune, yadiastu ipun sampun kukum.

¹⁹ Meme bapanipune patut ngajak pianakipune ka ajeng parapamimpin kota genahipune mumah, tur irika pianakipune mangda katepasin.

²⁰ Wong tuanipune patut matur ring parapamimpin kotane sapuniki: ‘Pianak tiange puniki kalintang bengkung, samaliha duraka tur nenten nyak ngidepang munyin tiange. Ipun mamotoh, mamiut miwah mamunyah.’

²¹ Irika sawatek wong kotane punika patut ngencurin pianakipune punika antuk batu kantos padem. Malantaran punika semeton jaga ngampuhang kajaatane punika. Sawatek wong Israele pacang miragi indike punika tur pacang pada ajerih.”

²²

“Yening wenten anak sane sampun kukum mati malantaran laksananipune sane jaat, tur sawanipune magantung ring tiang gantungane,

²³ sawanipune punika sampunang banggayanga nginep irika. Sawane punika patut katanem ring rahinane punika ugi. Santukan sawa sane magantung ring tiang gantungane ngrauhang temah Ida Sang Hyang Widi Wasa marep ring jagate. Tanemja sawane punika, mangda sampunang semeton ngletehin jagat sane kapaicayang ring semeton, antuk Ida Sang Hyang Widi Wasa, Widin semetone.

22

¹

Yening semeton manggihin banteng wiadin biri-birin sesaman semetone wong Israel sane paling, sampunangja semeton mapi-mapi tan uning, nanging jukja tur waliang ring sang madue.

² Nanging yen sang sane nruenang punika doh genahipune wiadin semeton tan uning ring sane nerbeang, baktaja ingon-ingone punika ka umah semetone. Yening sane nerbeang rauh ngrereh wewalungane punika, rarisang waliang ring ipun.

³ Kadi asapunika taler margiangja paindikan sane kadi asapunika yening semeton manggihin keledae, pangangge wiadin barang sane dados druen sesaman semetone sane ical.

⁴

Yening semeton manggihin keledae wiadin banteng druen sesaman semetone bah ring margine, sampunangja semeton mapi-mapi tan uning nanging tulunginja mangunang keledaene punika ngantos ipun mrasidayang malih majujuk.

⁵

Anake istri sampunang mapangangge sakadi anak lanang, tur anak lanang sampunang mapangangge sakadi anak istri. Ida Sang Hyang Widi Wasa Widin semetone bendu ring anake sane malaksana kadi asapunika.

⁶

Yen saget semeton manggihin sebun kedis madaging ina ngeem taluh wiadin panakipune ring tarune wiadin ring tanahe, sampunang juka inan kedise punika.

⁷ Semeton dados ngejuk panakipune, nanging inanipune banggayang ipun ngeleb mangdane semeton prasida panjang umur tur muponin gemuh landuh.

⁸

Yening semeton makarya umah anyar (sane maraab beton dangsah), semeton patut nagingin trali milehan ring sisin raabe punika, kenginan semeton nenten jaga kapetegenin danda pati yening wenten anak ulung saking raabe punika kantos ipun padem.

⁹

Sampunangja semeton nandur entik-entikan sane tiosan ring abian anggur semetone. Yen semeton nglaksanayang indike punika, semeton nenten jaga kalugra ngalap upon-upon anggur miwah upon-upon bibit sane lianan punika.

¹⁰

Sampunangja semeton ngakitang keledae ngajak banteng.

¹¹

Sampunangja semeton ngangge sane malakar antuk wol miwah benang kapas sane katunun dados asiki.

¹²

Daginginja oncer tanggun panganggen semetone makapatpat.”

¹³

“Menawita wenten anak lanang ngambil anak luh daa, tur sajeroning makudang-kudang rahina, ipun raris nenten demen ring anake luh punika,

¹⁴ duaning punika ipun raris ngadu ada nalih anake luh punika, baosang ipun mungguing anake luh punika nenten genten dawege ambil ipun.

¹⁵

Yening kadi asapunika, wong tuan anake luh punika patut ngaturang panganggen panganten sane keni kecritan rah, ring pangadilan ring ajeng parapamimpin kotane irika, makadados bukti kagentenan anake luh punika.

¹⁶ Bapan anake luh punika patut matur ring parapamimpin kotane sapuniki: ‘Titiang sampun malilayang pianak titiange bajang nganten sareng ring ipun, nanging sane mangkin ipun tan demen ring pianak titiange.

¹⁷ Ipun sampun ngadu ada nalih pianak titiange, ipun maosang mungguing pianak titiange nenten genten dawege ambil ipun. Nanging niki buktinipun mungguing pianak titiange punika sawiakti genten. Indayang aksi panganggen pangantennyane sane keni kecritan rah puniki.’

¹⁸ Parapamimpin kotane punika patut ngejuk tur nigtig anake lanang punika.

¹⁹ Ipun taler patut keni danda satus bidang jinah perak tur jinahe punika raris kaserahang ring bapan anake luh punika. Santukan anake lanang punika sampun ngusakang wastan satunggiling anak luh genten ring Israel. Sapanglanturipun anake luh punika patut tetep dados somahipune, tur ipun nenten dados malasang anake luh punika sapanjang umuripune.

²⁰

Nanging yening dedalihanipune punika sawiakti patut tur nenten wenten bukti mungguing daane punika kantun genten rikala ipun nganten,

²¹ Parapamimpin kotane punika patut ngajak daane punika medal saking umah bapanipune, tur irika sawatek anake lanang ring kotane irika patut ngencur ipun antuk batu kantos ipun padem. Anake luh punika sampun nglaksanayang paindikan sane ngranayang kimud ring pantaran bangsan iragane, malantaran ipun sampun naenin matemu semara sadurung ipun nganten, sakantun ipun nongos jumah bapanipune. Malantaran cara kadi asapunika semeton nyirnayang kajaatane punika.

²²

Yening wenten anak lanang katangehan matemu semara ngajak anak luh kurenan anak lianan, ipun makakalih patut kapademang. Malantaran cara sane kadi asapunika semeton patut nyirnayang kajaatan punika.

²³

Yening ring kota wenten anak muani katangehan matemu semara ngajak anak bajang, sane sampun magegelan ngajak anak lianan,

²⁴ ipun makakalih patut kejuk kajak ka jabaan kotane, tur irika ipun kencur antuk batu ngantos padem. Daane punika patut ngemasin padem, santukan ipun nenten jerit-jerit ngidih tulung, yadiastun ipun nuju wenten ring kota, tur wenten anak mrasidayang miragiang jeritanipune. Kadi asapunika taler anake muani punika patut ngemasin padem, santukan ipun sampun matemu semara ngajak anak bajang sane sampun magegelan. Malantaran cara sane kadi asapunika semeton patut nyirnayang kajaatane punika.

²⁵

Yening ring pategalan wenten anak bajang sane sampun magegelan ngajak anak lianan, kaplegandang antuk anak muani, kenginan wantah anake muani punika sane patut kapademang.

²⁶ Nanging anake bajang punika patut banggayang sakadi asapunika, santukan tan wenten iwangipune sane patut masinipun padem. Paindikane punika pateh sakadi anake ngamuk tur ngamademang anak lianan.

²⁷ Anake muani punika mlegandang anak bajang sane sampun magegelan ring pategalane, yadiastu anake bajang punika jerit-jerit nunas tulung, nanging tan wenten anak sane mrasidayang nulungin ipun.

²⁸

Yening wenten anak muani mlegandang anak bajang sane durung magegelan,

²⁹ anake muani punika patut nyerahang jinah perak seket bidang ring bapan anake bajang punika makadados basan pupur, tur anake bajang punika patut ambil ipun makadados somahipune, santukan ipun sampun mlegandang anake luh punika. Ipun tan dados malasang somahipune sakantune ipun urip.

³⁰

Sampunangja wenten anak sane nganistayang bapanipune, malantaran ipun matemu semara ngajak salah tunggil somah bapanipune.”

23

¹

“Anak muani sane materes wiadin pranannyane magetep, tan kalugra dados kaulan Ida Sang Hyang Widi Wasa.

²

Panak bebinjat wiadin katurunanipune, yadiastu katurunan sane undag ping dasa nenten kalugra dados kaulan Ida Sang Hyang Widi Wasa.

³

Wong Amon wiadin wong Moab, rauh ring katurunanipune sane undag ping dasa, nenten kalugra dados kaulan Ida Sang Hyang Widi Wasa.

⁴ Santukan ipun sampun nenten nyak nyediayang pangan kinum pabuat semeton, rikalaning semeton mamargi rarud saking Mesir, samaliha ipun ngupah Dane Bileam, okan Dane Beor sane saking kota Petor ring Mesopotamia, mangda nemah semeton.

⁵ Nanging Ida Sang Hyang Widi Wasa, Widin semetone nenten kayun mirengang pinunas Dane Bileam, malahan Ida malikang temahe punika dados merta, santukan Ida asih sueca ring semeton.

⁶ Sakantun semeton dados satunggiling bangsa, sampunangja semeton matulung wiadin ngibehang mangda bangsane punika muponin gemuh landuh.

⁷

Sampunangja semeton nganistayang wong Edom, santukan semeton masemeton ring ipun. Sampunang taler nemberang wong Mesir, santukan semeton naenin urip ring jagatipune.

⁸ Ngawit saking katurunanipune sane undag ping tiga, ipun kalugra dados kaulan Ida Sang Hyang Widi Wasa.”

⁹

“Rikalaning semeton wenten ring pakemahan ring masa payudan, semeton patut ngedohang saluiring paindikan sane ngawinang semeton leteh.

¹⁰ Yening wenten anak sane leteh, malantaran ipun ngipi belus ring wengine punika, ipun patut medal saking pakemahane tur nongos ring jabaan pakemahane.

¹¹ Sasampune makire nyoreang, ipun patut mabresih, tur rikalaning surup suryane ipun kalugrain ngranjing ring pakemahane.

¹²

Semeton patut makarya genah ring jabaan pakemahane punika, buat genah semetone makoratan.

¹³ Rikalan semetone makoratan, semeton patut makta panyongcongan anggen nyongcong tanah, buat nanem bacin semetone.

¹⁴ Piaraja pakemahan semetone mangda tetep suci, santukan Ida Sang Hyang Widi Wasa, Widin semetone wenten ring pantaran semetone, ring pakemahan semetone, buat nyayubin semeton, tur ngicen semeton kamenangan arep ring meseh-meseh semetone. Sampunang semeton nglaksanayang paindikan sane tan patut, sane ngawinang Ida Sang Hyang Widi Wasa tan lingu ring semeton.”

¹⁵

“Yening wenten satunggiling panjak sane minggat saking pamekelipune, tur rauh nunas pasayuban ring semeton, sampunang ipun lipetanga ring pamekelipune.

¹⁶ Ipun dados madunungan ring sinalih tunggil kotan semetone sane pilih ipun, tur semeton tan dados ngala-ala ipun.

¹⁷

Watek wong Israel, lanang wiadin wadon, sampunangja wenten sane dados panayang ring pura-puran dewa-dewane.

¹⁸ Kadi asapunika taler jinah pikolih ulihan nayang punika, sampunangja baktana ka Perhyangan Ida Sang Hyang Widi Wasa, Widin semetone buat jaga naur sesangi. Ida Sang Hyang Widi Wasa bendu ring sawatek panayang sane wenten ring pura-purane punika.

¹⁹

Yening semeton maselangang jinah wiadin pangan wiadin barang-barang lianan ring sesaman semetone Israel, sampunangja semeton nagih putranipune.

²⁰ Buat barang-barang sane paselangang semeton ring wong sunantara, semeton dados nagih putranipun, nanging buat barang sane paselangang semeton ring sesaman semetone Israel, sampunang semeton nagih putranipun. Tinutinja pidabdabe puniki, tur Ida Sang Hyang Widi Wasa, Widin semetone jaga ngamertanin sakancan pakibeh semetone ring jagat sane pacang aug semeton.

²¹

Yening semeton masesangi ring ayun Ida Sang Hyang Widi Wasa, Widin semetone, sampunang semeton masangke jaga naur sesangin semetone. Ida Sang Hyang Widi Wasa jaga nagih sesangin semetone, tur semeton madosa yening semeton nenten naur sesangine punika.

²² Yening semeton nenten masesangi ring ayun Ida Sang Hyang Widi Wasa, semeton nentenja madosa,

²³ nanging yen semeton saking suka lila masesangi, semeton patut naur sesangi punika.

²⁴

Yening semeton mamargi nglintangin abian anggur anak lian, semeton dados ngajengang buah anggur sakita karep semetone, nanging sampunang wenten sane penpen semeton ring kranjang semetone.

²⁵ Yening semeton mamargi nglintangin pategalan gandum anak lian sane durung kanyi, semeton dados nunas gandum amunapija sane keni kaud antuk tangan semetone, nanging sampunang arita gandume punika.”

24

¹

“Upaminipun wenten anak muani ngambil anak luh kanggen somah, raris wekasan ipun antuk nenten demen ring anake luh punika, santukan anak luh punika iwang tur laksanannyane ngawinang kimud. Duaning punika ipun raris makarya surat palas makurenan, raris kaserahang ring anake luh punika, tur anake luh punika raris katundung saking umahipune.

² Sapanglanturipun anake luh punika raris nganten ngajak anak muani lianan,

³ tur anake muani punika taler nenten demen ring anake luh punika, raris anake muani punika taler makarya surat palas, tumuli kaserahang ring anake luh punika, tur ipun katundung saking umah anake muani punika. Wiadin kurenanipune sane kaping kalih punika padem.

⁴ Sajeroning paindikane puniki, kenginan somahipune sane pangawit punika nenten dados malih nganten ngajak ipun. Anake muani punika patut nganggep anake luh punika sampun cemer. Yen anake muani punika malih nganten ngajak ipun, indike punika nganistayang Ida Sang Hyang Widi Wasa. Parasemeton nenten dados ngardi dosa sane jaat kadi asapunika ring jagat sane pacang kapaicayang antuk Ida Sang Hyang Widi Wasa, Widin semetone ring semeton.”

⁵

“Yening wenten anak wau makurenan, sampunang ipun pategenina tetegenan dados prajurit wiadin ayah-ayahan sane lianan. Ipun patut kicen luput ayah ataun suenipun, mangdane ipun mrasidayang nabdabang pumahanipune saha ngawinang liang manah somahipune.

⁶

Yening semeton maselangang barang wiadin jinah ring anak lian, sampunangja semeton ngambil batu pangilesan jagungipune anggen semeton gegaden. Indike punika mapiteges semeton ngrampas prabot sane anggen ipun nyediang pakurenanipune pangan mangdane ipun prasida kantun urip.

⁷

Sapasiraja ngejuk sesamanipune wong Israel tur kadadosang panjak wiadin kadol dados panjak, anake punika patut kapademang. Malantaran punika semeton prasida mrasta kajaatane punika.

⁸

Yening semeton keni pinakit kulit sane mayanin, becikangja nglaksanayang pituduh parapandita Lewine ring semeton, tur tinutinja saananing pituduh sane sampun rauhang tiang ring dane sami.

⁹ Elingangja paindikane sane sampun kamargiang antuk Ida Sang Hyang Widi Wasa, Widin semetone, marep ring Dane Miryam, duke semeton rarud saking Mesir.

¹⁰

Yening semeton maselangang barang wiadin jinah ring anak lianan, sampunangja semeton ngranjing ka umah metenipune buat jaga ngambil pangangge sane jaga kanggen gegaden sane jaga kaserahang ring semeton,

¹¹ nanging jantosangja ring sisian tur banggayang ipun newek sane maktayang semeton.

¹² Yening ipun anak lacur, sampunangja inepanga gegadene punika jumah semetone,

¹³ nanging ulihangja ring ipun sabilang sore, mangdane wenten anggen ipun pules. Kenginan ipun pacang marasa suksma ring manah, tur Ida Sang Hyang Widi Wasa, Widin semetone pacang ledang ring semeton.

¹⁴

Sampunangja semeton melog-melog buruh sane tiwas tur kekirangan, yadian ipun wong Israel wiadin wong sunantara sane madunungan ring salah tunggil kotan semetone.

¹⁵ Nyabran rahina, sadurung suryane surup, taurja upah pakaryanipune ring rahinane punika. Ipun merluang jinahe punika tur ngajap-ajap jagi polih upah. Yening semeton nenten naur upahipune, ipun jagi masesambatan ring ayun Ida Sang Hyang Widi Wasa, nguningayang indik semetone, tur semeton jaga kawastanin madosa.

¹⁶

Sampunangja semeton ngamademang wong tuannyane ulihan pianakipune malaksana corah kadi asapunika taler sampunang semeton mademang pianaknyane, malantaran wong tuanipune sane malaksana corah. Asing-asing anak patut kadanda pati wantah malantaran kacorahane sane laksanayang ipun newek.

¹⁷

Sampunangja semeton ngrampas hak wong sunantara miwah anak ubuh, samaliha sampunang semeton ngambil panganggen anak balu makadados gegaden.

¹⁸ Elingangja mungguing semeton taler naenin dados panjak ring Mesir, tur Ida Sang Hyang Widi Wasa, Widin semetone sampun mebasang semeton. Punika awinanipun tiang ngaturin semeton pidabdabe puniki.

¹⁹

Rikalaning semeton ngampung gandum semetone, raris wenten makutang apesel ring pategalane, sampunangja semeton malipetan ka tegale buat ngambil gandum sane makutang punika. Banggayangja gandume punika makutang pabuat parawong sunantara, anake ubuh-ubuh miwah anake balu-balu, mangdane Ida Sang Hyang Widi Wasa, Widin semetone ledang ngamertanin semeton ring saluiring pakibeh semetone.

²⁰ Rikalaning semeton ngalapin woh saitun semetone, sampunangja sliksika ngrereh woh saitun sane makutang. Banggayang punika pabuat parawong sunantara, anake ubuh-ubuh miwah anake balu-balu.

²¹ Rikalaning semeton ngalapin anggur semetone, sampunangja malih wawanina ngrerehin woh anggur sane makutang. Banggayang woh anggur sane makutang punika pabuat parawong sunantara, anak ubuh-ubuh miwah anak balu-balu.

²² Sampunang semeton kantos lali, mungguing semeton naenin dados panjak ring Mesir. Punika awinanipun tiang ngaturin semeton pidabdabe puniki.

25

¹

Upami wenten wong Israel sareng kalih mawicara ring pangadilan, raris sane adiri kabaos patut miwah sane lianan kabaos iwang.

² Yening anake sane iwang punika keni ukuman matigtig, sang hakim patut ngandikayang anake punika makakeb, raris ipun katigtig. Akehnya katigtig patut sanut ring kacorahan sane sampun margiang ipun.

³ Ipun dados katigtig paling akeh ping petang dasa, nenten dados lintangan. Yening lintang ring punika, mapiteges ipun kanistayang ring ajeng anake akeh.

⁴

Sampunangja semeton nyamok bungut banteng sane anggen semeton makarya nglindes gandum.”

⁵

“Yening wenten anak panyamaan sareng kalih mumah dados asiki, raris padem adiri, tur nenten numbuhang sentana, kenginan somahipune nenten dados nganten ngajak anak lianan, sajawining ring pakurenanipune, tur nyaman sang padem punika sane patut ngambil ipun nganggen somah.

⁶ Pianakipune muani sane pinih keliha patut kaperas dados pianak sang padem, mangda sang padem madue katurunan ring pantaran bangsa Israele.

⁷ Nanging yening nyaman sang padem punika nenten nyak ngambil balun sang padem, anake luh punika patut tangkil ring ajeng pamimpin kotane, saha matur asapuniki: ‘Nyaman kurenan titiange, nenten nyak ngamargiang tetegenanipune. Ipun nenten nyak numbuhang sentana pabuat nyamanipune ring pantaran bangsa Israele.’

⁸ Irika pamimpin kotane punika patut ngesengin anake punika sarwi mabaos ring ipun. Yening ipun kantun nenten nyak ngambil anake luh punika,

⁹ anake luh punika patut ngajak ipun nangkil ka ajeng parapamimpin kotane, raris ngembusin sandal anake muani punika asiki, tur ngecuhin muanipune, sarwi mabaos sapuniki: ‘Paindikane puniki sane nibenin anake sane nenten nyak numbuhang sentana pabuat nyamanipune.’

¹⁰ Ring pantaran wong Israele pakurenan anake muani kadi asapunika pacang kasambat: ‘Pakurenan anak sane kembusin sandalnyane.’ ”

¹¹

“Yening wenten anak muani sareng kalih sedekan magulet, raris rauh kurenan salah tunggal anake punika, jaga nulungin somahipune, tur ipun ngambil pranan anake muani sane lianan,

¹² sampunangja padalema anake luh punika nanging getepja limanipune.

¹³

[13-14] Sampunangja semeton melog-melog antuk panimbangan miwah panakehan.

¹⁴

¹⁵ Gunayangja panimbangan miwah panakehan sane patut, mangdane semeton prasida muponin umur panjang ring tanah sane pacang kapaicayang ring semeton antuk Ida Sang Hyang Widi Wasa, Widin semetone.

¹⁶ Ida Sang Hyang Widi Wasa menggah ring anake sane demen melog-melog.”

¹⁷

“Elingangja sakancan laksanan wong Amaleke marep ring semeton rikala semeton rarud saking Mesir.

¹⁸ Ipun nenten takut ring Ida Sang Hyang Widi Wasa. Ipun ngebug semeton saking ungkur rikalaning semeton sampun lesu miwah kuru, tur sane nglawan ring ungkur sami pademang ipun.

¹⁹ Duaning punika, yening Ida Sang Hyang Widi Wasa, Widin semetone, sampun maicayang tanahe punika ring semeton, tur semeton sampun muponin kerta raharja saking sakancan meseh-meseh semetone sane wenten ring kiwa tengen semetone, semeton patut ngamademang sakancan wong Amaleke punika, mangda sampunang malih wenten anak sane ngelingang ipun. Sampunang pisan semeton lali ring indike punika.”

26

¹

“Sasampune ngaug jagat sane kapaicayang ring semeton antuk Ida Sang Hyang Widi Wasa, Widin semetone, tur semeton sampun magumana irika,

² semeton suang-suang patut ngambil upon-upon sane pangawit, kawadahin kranjang raris katurang ka genah pangubaktine sane sampun kapastiang.

³ Uningayang ring sang pandita sane polih tugas duk punika, kadi asapuniki: ‘Sane mangkin titiang ngangken ring ayun Ida Sang Hyang Widi Wasa, Widin titiang, mungguing titiang sampun ngranjing ring jagate sane sampun janjiang Ida ring paraleluur iragane, buat jaga kapaicayang ring iraga.’

⁴

Sang pandita jaga nrima aturan semetone punika tumuli kagenahang ring ajeng pamorboran aturan pabuat Ida Sang Hyang Widi Wasa, Widin semetone.

⁵ Sasampun punika, semeton patut matur ring ayun Ida Sang Hyang Widi Wasa sakadi asapuniki: ‘Leluur titiange punika wong Aram sane ngumbara, wong pararudan sane nenten maderbe genah madunungan. Ipun ngajak pakurenanipune ka Mesir tur madunungan irika. Daweg ipune mrika, ipun wantah sareng akidik nanging ipun raris dados bangsa sane ageng tur mawisesa.

⁶ Wong Mesire ngala-ala titiang sareng sami, tur mamaksa titiang makarya dados panjak.

⁷ Irika titiang raris masesambatan nunas tulung ring Ida Sang Hyang Widi Wasa, Widin leluur titiange. Ida mirengang pinunas titiange, saha nyingak kasangsaran, kamewehan lan kaduhkitan titiange.

⁸ Masrana kawisesan Idane sane maha agung Ida mebasang titiang saking Mesir. Ida ngardi katawahan miwah praciri, miwah ngadakang paindikan-paindikan sane madurgama.

⁹ Ida makta titiang mriki, tur maicayang tanah sane gemuh landuh puniki ring titiang.

¹⁰ Duaning punika sane mangkin titiang ngaturang pamupon sane pangawit, ring Ida Sang Hyang Widi Wasa, sane sampun paicayang Ida ring titiang.’

Sasampune punika kranjang punika raris kagenahang ring ayun Ida Sang Hyang Widi Wasa, tumuli ngaturang bakti ring Ida.

¹¹ Matur panyuksmaja, malantaran sakancan pangupa jiwa sane sampun kapaicayang ring semeton miwah pakurenan semetone antuk Ida Sang Hyang Widi Wasa. Ajakja suku Lewi miwah wong sunantara sane wenten ring pantaran semetone, sareng-sareng sajeroning upacara punika.

¹²

Nyabran tigang taun semeton patut nyerahang aturan apahdasan, inggih punika apahdasa saking pamupon semetone, ring wong Lewi, wong sunantara, anak ubuh-ubuh, miwah anak balu-balu, mangdane ipun pada molih pangupa jiwa ring pantaran semetone. Yen semeton sampun nglaksanayang paindikane punika,

¹³ raris matur ring ayun Ida Sang Hyang Widi Wasa sapuniki: ‘Aturan apahdasan sane dados druen Palungguh IRatu, punika tan wenten sane kantun ring cecanggahan titiange. Makasami sampun serahang titiang ring wong Lewi, wong sunantara, anak sane ubuh-ubuh, anak balu-balu sane pituduhang Palungguh IRatu ring titiang. Titiang nenten pisan tempal miwah lali ring pituduh Palungguh IRatu ngeniang indik aturan apahdasan punika.

¹⁴ Rikalaning titiang katempuh antuk kaduhkitan, titiang nenten nunas aturane punika. Rikalaning titiang wenten ring sajeroning leteh, titiang nenten pisan ngamedalang aturane punika saking cecanggahan titiange, samaliha titiang nenten pisan ngunayang aturane punika pabuat aturan ring anake padem. Duh Ratu Sang Hyang Widi Wasa, titiang sampun sairing ring Palungguh IRatu tur titiang sampun nglaksanayang sapituduh Palungguh IRatu ngeniang indik aturan apahdasan punika.

¹⁵ Ledang Palungguh IRatu macingak saking singasanan Palungguh IRatu sane suci ring suargan, tur mertaninja kaula druene Israel. Ledang taler Palungguh IRatu ngamertanin tanahe sane gemuh landuh punika, sane sampun paicayang Palungguh IRatu ring titiang, sakadi janjin Palungguh IRatune ring paraleluur titiange.’ ”

¹⁶

“Ring rahinane puniki Ida Sang Hyang Widi Wasa, Widin semetone mapituduh ring semeton, mangdane semeton ninutin sakancan pidabdab Idane. Duaning punika tinutinja pidabdab Idane puniki saking satia tuu tur antuk saguluking kayun semetone.

¹⁷ Ring rahinane puniki semeton sampun ngangkenin Ida Sang Hyang Widi Wasa dados Widin semetone. Semeton sampun majanji jaga satinut ring Ida, ngamanggehang sakancan pidabdab Idane, miwah jaga nglaksanayang sakancan pituduh Idane.

¹⁸ Ring rahinane puniki Ida Sang Hyang Widi Wasa sampun nrima semeton dados kaula druen Idane sakadi janjin Idane ring semeton, tur Ida mapituduh ring semeton mangda semeton satinut ring sakancan pidabdab Idane.

¹⁹ Ida ledang nadosang semeton bangsa sane agengan ring bangsa-bangsa sane lianan sane sampun kardi Ida, tur semeton jaga kapuji miwah kajinin. Semeton jaga dados kaulan Ida Sang Hyang Widi Wasa sakadi janjin Idane.”

27

¹

Dane Musa kasarengin antuk panglingsir bangsa Israele, raris ngandika ring bangsane punika, sapuniki: “Tinutinja sakancan prentah sane rauhang tiang ring parasemeton ring rahinane puniki.

² Rikala semeton nglintangin Tukad Yordane, tur ngranjing ring jagat sane kapaicayang ring semeton antuk Ida Sang Hyang Widi Wasa, Widin semeton, semeton patut nyujukang makudang-kudang batu sane ageng-ageng raris plester antuk luluh.

³ Suratangja sakancan pidabdab miwah paurukane puniki ring batune punika. Rikalaning semeton sampun ngranjing ring jagate sane gemuh landuh, sane kajanjiang ring semeton antuk Ida Sang Hyang Widi Wasa, Widin leluur semetone,

⁴ samaliha semeton sampun magenah ring dauh Tukad Yordane, jujukangja batu-batune punika ring duur Gunung Ebale tur plester antuk luluh, sakadi sane prentahang tiang ring semeton ring rahinane puniki.

⁵ Irika semeton patut ngwangun pamorboran aturan, sane malakar antuk batu-batu sane durung naenin keni tampak prabot besi.

⁶ Santukan sakancan pamorboran aturan sane kakardi buat maturan ring Ida Sang Hyang Widi Wasa, Widin semetone, patut kakardi antuk batu sane sukla. Ring pamorboran aturane punika semeton patut ngaturang aturan semetone sane maborbor.

⁷ Irika taler semeton patut ngaturang tur ngajengang aturan karahayuan semetone saha masuka rena ring ayun Ida Sang Hyang Widi Wasa, Widin semetone.

⁸ Ring batune sane maplester punika, suratangja saha terang sabilang akecap pidabdab Ida Sang Hyang Widi Wasa.”

⁹

Dane Musa kasarengin antuk parapandita suku Lewine, ngandika ring sakancan bangsa Israele, sapuniki: “Pirengangja atur tiange, duh bangsa Israel. Ring rahinane puniki semeton sampun dados kaula druen Ida Sang Hyang Widi Wasa, Widin semetone.

¹⁰ Duaning punika tinutinja Ida Sang Hyang Widi Wasa tur agemja sakancan pidabdab Idane, sane aturang tiang ring parasemeton ring rahinane puniki.”

¹¹

Wus punika Dane Musa raris ngandika ring bangsa Israel, sapuniki:

¹² “Sasampune semeton nglintangin Tukad Yordane punika, rikala mertane kuncarang, suku-suku sane patut ngadeg ring duur Gunung Gerisime, inggih punika suku Simeon, Lewi, Yehuda, Isakar, Yusup miwah Benyamin.

¹³ Samaliha rikalaning temahe kuncarang, suku-suku sane jaga ngadeg ring Gunung Ebale, inggih punika: Suku Ruben, Gad, Aser, Sebulon, Dan miwah Naptali.

¹⁴ Raris suku Lewine patut ngucapang baose puniki antuk suara jangih, asapuniki:

¹⁵

‘Ida Sang Hyang Widi Wasa nemah sakancan anake sane ngardi arca batu, taru wiadin logam tur saking silib nyungsung arcane punika. Ida Sang Hyang Widi Wasa menggah piduka marep ring indik nyungsung arcane punika.’ Sawatek bangsane punika patut masaur manuk: ‘Amin.’

¹⁶

‘Ida Sang Hyang Widi Wasa nemah sakancan anake sane nenten bakti ring meme bapanipune.’ Bangsane punika patut masaur manuk: ‘Amin.’

¹⁷

‘Ida Sang Hyang Widi Wasa nemah sakancan anake sane ngisidang baledan tanah sesamannyane.’ Bangsane punika makasami patut masaur manuk: ‘Amin.’

¹⁸

‘Ida Sang Hyang Widi Wasa nemah sakancan anake sane nandan anak buta ka genahe sane iwang.’ Bangsane punika makasami patut masaur manuk: ‘Amin.’

¹⁹

‘Ida Sang Hyang Widi Wasa nemah sakancan anake sane ngrampas hak wong sunantara, anak ubuh-ubuh miwah anak balu-balu.’ Bangsane punika makasami patut masaur manuk: ‘Amin.’

²⁰

‘Ida Sang Hyang Widi Wasa nemah sakancan anake sane nganistayang bapannyane malantaran ipun matemu semara ngajak salah tunggil somah bapanipune.’ Bangsane punika makasami patut masaur manuk: ‘Amin.’

²¹

‘Ida Sang Hyang Widi Wasa nemah sakancan anake sane masanggama ngajak sato.’ Bangsane punika makasami patut masaur manuk: ‘Amin.’

²²

‘Ida Sang Hyang Widi Wasa nemah sakancan anake sane matemu semara ngajak nyama wiadin nyama kualonnyane sane luh.’ Bangsane punika makasami patut masaur manuk: ‘Amin.’

²³

‘Ida Sang Hyang Widi Wasa nemah sakancan anake sane matemu semara ngajak matuannyane sane luh.’ Bangsane punika makasami patut masaur manuk: ‘Amin.’

²⁴

‘Ida Sang Hyang Widi Wasa nemah sakancan anake sane ngamademang anak saking silib.’ Bangsane punika makasami patut masaur manuk: ‘Amin.’

²⁵

‘Ida Sang Hyang Widi Wasa nemah sakancan anake sane nanggap upah buat ngamademang anake sane tan padosa.’ Bangsane punika makasami patut masaur manuk: ‘Amin.’

²⁶

‘Ida Sang Hyang Widi Wasa nemah sakancan anak sane nenten satinut ring sakancan pidabdab miwah paurukan Ida Sang Hyang Widi Wasa.’ Bangsane punika makasami patut masaur manuk: ‘Amin.’ ”

28

¹

“Yening semeton astiti bakti ring Ida Sang Hyang Widi Wasa, Widin semetone, tur satia tuu nglaksanayang sakancan pituduh Idane sane rauhang tiang ring semeton ring rahinane puniki, Ida pacang nadosang semeton bangsa sane agengan ring sakancan bangsa sane lianan ring jagate.

² Astiti baktija ring Ida Sang Hyang Widi Wasa, Widin semetone, janten semeton jaga muponin sakancan mertane puniki:

³

Ida Sang Hyang Widi Wasa jaga ngamertanin kota-kota miwah pategalan semetone.

⁴

Ida Sang Hyang Widi Wasa pacang ngamertanin semeton malantaran Ida mapaica pianak, asil bumi, biri-biri miwah banteng akeh ring semeton.

⁵

Ida Sang Hyang Widi Wasa pacang ngamertanin pamupon gandum semetone miwah ajeng-ajengan sane kardi semeton antuk pamupone punika.

⁶

Ida Sang Hyang Widi Wasa jaga ngamertanin sakancan pakardin semetone.

⁷

Ida Sang Hyang Widi Wasa jaga ngaonang sakancan meseh semetone, rikalaning ipun ngebug semeton. Ipun jaga ngebug semeton saking margi sane asiki, nanging ipun jagi malaib pablesat nyatur arah saking ajeng semetone.

⁸

Ida Sang Hyang Widi Wasa jagi ngamertanin pakaryan semetone tur ngebekin gudang semetone antuk gandum. Ida pacang ngamertanin semeton ring jagat sane jaga paicayang Ida ring semeton.

⁹

Yening semeton astiti bakti ring Ida Sang Hyang Widi Wasa, Widin semetone, tur nglaksanayang sakancan pituduh Idane, Ida pacang nadosang semeton kaulan Idane, sakadi sane sampun janjiang Ida.

¹⁰ Samaliha sakancan bangsane ring mrecapada pacang uning mungguing Ida Sang Hyang Widi Wasa sampun nyelik semeton dados kaulan Idane, tur ipun sareng sami jaga ajerih ring semeton.

¹¹ Ida Sang Hyang Widi Wasa jaga akeh mapaica pianak, ingon-ingon miwah asil bumi ring semeton, ring jagat sane sampun janjiang Ida ring leluur semetone, buat jaga kapaicayang ring semeton.

¹² Ida pacang nedunang sabeh rikala masan ipun saking genah panyimpenannyane sane bek maliah ring langite, tur ngamertanin sakancan pakaryan semetone, mangdane semeton prasida maselangang ring bangsa-bangsa sane akeh, nanging semeton nenten pacang nyelang ring isapasira jua.

¹³ Ida Sang Hyang Widi Wasa Widin semetone pacang nadosang semeton pamimpin ring pantaran bangsa-bangsane, tur semeton nenten jaga dados pangiring. Yening semeton saking tuu ninutin sakancan pituduh Idane, sane aturang tiang ring semeton ring rahinane puniki, semeton setata jaga mapikolih tur nenten naenin pocol.

¹⁴ Nanging sampunang pisan semeton tempal ring titah Idane malantaran cara sane kadi asapunapi jua. Sampunang semeton nyungsung miwah ngaula ring widi-widi sane lianan.”

¹⁵

“Nanging yening semeton tempal ring Ida Sang Hyang Widi Wasa, Widin semetone, tur nenten satia tuu nglaksanayang sakancan pituduh miwah pidabdab Idane sane aturang tiang ring semeton ring rahinane puniki, kenginan sakancan temahe puniki pacang nibenin semeton:

¹⁶

Ida Sang Hyang Widi Wasa pacang nemah kota-kota miwah pategalan semetone.

¹⁷

Ida Sang Hyang Widi Wasa pacang nemah sakancan pamupon gandum semetone miwah ajeng-ajengan sane kardi semeton antuk gandume punika.

¹⁸

Ida Sang Hyang Widi Wasa pacang nemah semeton kantos semeton wantah akidik muponin pianak, asil bumi, banteng miwah biri-birin semetone.

¹⁹

Ida Sang Hyang Widi Wasa pacang nemah sakancan pakardin semetone.

²⁰

Yening semeton malaksana dursila miwah tungkas ring Ida Sang Hyang Widi Wasa, Ida pacang nedunang bencana, karuetan miwah kamewehan ring saluiring paindikan sane laksanayang semeton, ngantos semeton digelis winasa tur sirna kerta.

²¹ Ida pacang nedunang grubug mawanti-wanti ring semeton, ngantos tan wenten ring pantaran semetone sane kantun ring jagate sane pacang aug semeton punika.

²² Ida Sang Hyang Widi Wasa jaga ngukum semeton antuk pinakit-pinakit sane nglalahin, antuk pinakit beseh miwah panes dingin. Ida pacang nedunang panes banteng, miwah angin nglinus buat ngusakang upon-upon semetone. Sakancan bencana puniki pacang nibenin semeton, ngantos semeton padem.

²³ Nenten jaga wenten sabeh, tur tanah semetone jaga dados katos sakadi batu.

²⁴ Makadados silur sabeh punika Ida Sang Hyang Widi Wasa pacang nedunang sabeh abu miwah sabeh bias kantos semeton sirna.

²⁵

Ida Sang Hyang Widi Wasa pacang mapaica kamenangan ring meseh-meseh semetone nglawan semeton. Semeton jaga ngebug ipun saking margine asiki, nanging semeton jaga malaib pablesat nyatur arah saking arepanipune, tur sakancan bangsane ring mrecapada jaga tengkejut rikala miragi paindikan sane nibenin semeton.

²⁶ Rikalaning semeton padem, paksi miwah sato alase jaga rauh buat neda sawan semetone, tur nenten wenten anak sane jaga ngulah ipun.

²⁷ Ida Sang Hyang Widi Wasa pacang ngukum semeton antuk busul, sakadi sane kardi Ida ring wong Mesire. Ida pacang ngawinang ragan semetone benyah antuk berung. Semeton pacang kakaput antuk koreng pabrengkeng sane nenten mrasidayang katambanin.

²⁸ Ida Sang Hyang Widi Wasa pacang ngawinang semeton buduh, buta miwah bingung.

²⁹ Semeton pacang patigabag sakadi anake buta rikalaning tengai tepet, tur semeton nenten mrasidayang nyingakin margi. Ring saluiring pakaryan semetone, semeton nenten pacang mapikolih. Semeton tan mari pacang kaprakosa miwah karampas, tur tan wenten anak sane pacang nulungin semeton.

³⁰

Semeton pacang kapagelanang ngajak anak bajang, nanging anak lianan sane jaga nganten ngajak gegelan semetone punika. Semeton pacang nyujukang umah, nanging semeton nenten pacang naenin nongosin umahe punika. Semeton jaga nandur wit anggur, nanging semeton nenten jaga naenin ngajengang wohipune.

³¹ Banteng semetone jaga katampah ring arepan semetone, nanging semeton nenten jaga ngajengang benipune. Keledaen semetone jaga kapaid ring arepan semetone, tur nenten jaga kawaliang ring semeton. Biri-birin semetone jaga kaserahang ring meseh-meseh semetone, tur nenten wenten anak sane jaga nulungin semeton.

³² Ring arepan semetone oka-okan semetone lanang istri jaga kaserahang ring wong sunantara buat dados panjak. Nyabran rahina panyingakan semetone jaga bengul buat ngrereh okan semetone, nanging tan wenten pikenohipun, duaning ipun nenten jaga mawali.

³³ Wong sunantara jaga ngambil sakancan pamupon tetanduran semetone, sane tandur semeton saking tuyuh. Semeton nenten muponin punapa-punapi, nanging semeton tan mari kaprakosa miwah kala-ala.

³⁴ Kasangsaran semetone punika jaga ngawinang semeton buduh.

³⁵ Ida Sang Hyang Widi Wasa pacang ngebekin cokor semetone antuk berung sane nenten mrasidayang was. Semeton jaga kabekin antuk busul ngawit saking sirah rauh ring cokor semetone.

³⁶

Ida Sang Hyang Widi Wasa pacang ngutang semeton miwah ratun semetone ka jagat sunantara, jagat sane nenten uningin semeton, miwah paraleluur semetone. Irika semeton jaga nyungsung dewa-dewa sane kakardi antuk taru miwah batu.

³⁷ Bangsa sane wenten ring jagat genah semetone kasambragang antuk Ida Sang Hyang Widi Wasa jagi pada tengkejut manggihin indik semetone punika. Irika semeton jagi kanistayang miwah kanggen kakedekan.

³⁸

Semeton akeh pacang nyambehang bibit, nanging pamuponipun wantah akidik, santukan tetanduran semetone pacang amah balang.

³⁹ Semeton pacang nandur punyan anggur, tur becikang semeton miara nanging semeton nenten pacang ngalap buahipune wiadin nginum toyanipune, santukan wit tarune punika telas kateda antuk uled.

⁴⁰ Punyan saitune jagi mentik milehan ring tanah semetone, nanging semeton nenten jaga madue minyak saitun, santukan woh saitune punika jaga aas.

⁴¹ Semeton jaga madue oka lanang wadon, nanging semeton jaga kelangan oka-okan semetone punika, santukan ipun jaga kajarah dados tawanan perang.

⁴² Sakancan taru miwah tetanduran semetone jaga telas amah merana.

⁴³

Wong sunantara sane madunungan ring jagat semetone, sayan ngagengang kakuasanipune, nanging kakuasan semetone sayan rered.

⁴⁴ Ipun jaga maselangang jinah ring semeton, nanging semeton nenten madue punapa-punapi sane paselangang semeton ring ipun. Pamuputipun, ipun jaga dados pamrentah semetone.

⁴⁵

Sakancan bencanane puniki jaga ngrauhin tur nibenin semeton, kantos semeton sirna, santukan semeton tan astiti bakti ring Ida Sang Hyang Widi Wasa, Widin semetone, miwah nenten nglaksanayang sakancan pidabdab sane paicayang Ida ring semeton.

⁴⁶ Indike punika makasami jaga dados bukti ukuman Ida Sang Hyang Widi Wasa sane katiba ring semeton miwah ring katurunan semetone salami-laminipun.

⁴⁷ Ida Sang Hyang Widi Wasa ngamertanin semeton ring sakancan pakibeh semetone, nanging semeton nenten nyak nyungsung Ida antuk manah liang miwah suka rena.

⁴⁸ Duaning punika semeton jaga ngaula ring meseh-meseh sane pacang karauhang antuk Ida Sang Hyang Widi Wasa, buat nglawan semeton. Semeton pacang nandang bedak layah tur malalung, miwah tan madue punapa-punapi. Ida Sang Hyang Widi Wasa jaga mrakosa tur ngala-ala semeton, kantos semeton sirna.

⁴⁹ Ida Sang Hyang Widi Wasa jaga ngrauhang bangsa saking tanggun gumine pacang nglawan semeton, inggih punika bangsa sane raosipune nenten karesep antuk semeton. Bangsane punika jaga nyander semeton sakadi paksi garuda.

⁵⁰ Bangsane punika pacang gemes tur nenten pacang madalem sapasira jua, anak alit wiadin anak odah.

⁵¹ Ipun jagi nelasang ingon-ingon semetone miwah pamupon tanah semetone. Ipun nenten jaga numanang gandum, anggur, minyak saitun, banteng miwah biri-birin semetone, mawanan semeton pacang padem kaluen.

⁵² Ipun pacang anglurug sakancan kota sane wenten ring jagat sane pacang kapaicayang ring semeton antuk Ida Sang Hyang Widi Wasa, Widin semetone, samaliha tembok-tembok banteng sane tegeh-tegeh sane andelang semeton, sami pacang rubuh.

⁵³

Rikalaning meseh-meseh semetone nglurug kota-kotan semetone, semeton nenten mrasidayang mapineh ulihan semeton seduk, kantos semeton pacang ngajengang oka-okan semetone ngraga, sane sampun kapaicayang ring semeton antuk Ida Sang Hyang Widi Wasa, Widin semetone.

⁵⁴ [54-55] Yadian sang sulinggih sane kalintang wicaksana tur darma sadu, taler jaga nenten mrasidayang mapikayun rikalaning kotane punika kakurung, kantos dane pacang ngajeng okan danene, santukan dane nenten madue ajeng-ajengan sane lianan. Dane nenten pacang kayun maicayang ajeng-ajengan danene punika ring semeton miwah rabin danene sane tresnain dane, wiadin ring oka-okan danene sane kantun.

⁵⁵

⁵⁶ [56-57] Yadian anak istri sane kalintang wicaksana tur darma sadu, miwah kalintang sugih kantos dane nenten naenin medal kija-kija jaga malaksana pateh sakadi asapunika. Rikalaning imeseh ngurung kotannyane, dane jaga nenten mrasidayang mapikayun ulihan nandang kaluen kantos saking silib jaga ngajengang okan danene sane wau embas rauh ring arin-arinnyane. Dane nenten ngedumang ajeng-ajengan danene punika ring rabin danene sane tresnain dane miwah ring oka-okan danene.

⁵⁷

⁵⁸

Yening semeton nenten saking satia tuu ngagem sakancan paurukan Ida Sang Hyang Widi Wasa sane sinurat ring cakepane puniki, miwah yening semeton nenten ngluihang Ida Sang Hyang Widi Wasa, Widin semetone sane luih tur ngangobin,

⁵⁹ Ida pacang ngrauhang pinakit sane nenten mrasidayang kasegerang, miwah grubug sane raat sane nenten pacang wusan-wusan ring semeton miwah katurunan semetone.

⁶⁰ Ida pacang ngrauhang malih apisan pinakit sane raat sane pecak nibenin wong Mesir, sane sampun uningin semeton. Punika jaga tibakang Ida ring semeton, tur semeton nenten mrasidayang seger.

⁶¹ Ida taler pacang nedunang sawatek soroh pinakit miwah grubug sane nenten kakecap ring cakepan pidabdab miwah paurukan Ida Sang Hyang Widi Wasa puniki, tur semeton pacang kasirnayang.

⁶² Yadiastu gebogan semetone akeh sakadi bintange ring langite, wantah akidik kewanten semeton sane pacang kantun, santukan semeton tan astiti bakti ring Ida Sang Hyang Widi Wasa, Widin semetone.

⁶³ Sakadi Ida ledang mapaica pamupu sane maliah-liah ring semeton miwah nadosang cacakan semetone sayan maweweh-weweh, sakadi asapunika taler Ida pacang ledang jaga nyirnayang semeton miwah ngawinang semeton uug. Semeton pacang kabancut saking jagat sane pacang aug semeton punika.

⁶⁴

Ida Sang Hyang Widi Wasa pacang nyambragang semeton ring pantaran bangsa-bangsa sane saking tanggun gumine asiki ngantos ka tanggunnyane sane lianan. Irika semeton jaga nyungsung widi-widi sane malakar antuk batu miwah taru, widi-widi sane durung naenin sungsung semeton miwah leluur semetone.

⁶⁵ Ring dija-dija semeton nenten jaga polih sutrepti, samaliha nenten jaga wenten sane keni kawastanin druen semetone. Ida Sang Hyang Widi Wasa jaga nglikub semeton antuk katakutan, kabimbangan miwah kabingungan.

⁶⁶ Urip semetone setata wenten ring sajeroning baya. Rahina wengi semeton pacang kalikub antuk manah resres, tur semeton tansah rumasa ajerih pacang padem.

⁶⁷ Manah semetone pacang kalikub antuk katakutan ngeniang ring saluiring paindikan sane panggihin semeton. Nyabran semengan semeton ngajap mangda gelis wengi, nyabran wengi semeton ngajap mangda gelis semengan.

⁶⁸

Ida Sang Hyang Widi Wasa pacang ngwaliang semeton malih ka Mesir makapalan, yadiastun tiang sampun maosang mungguing semeton nenten pacang naenin malih mrika. Irika semeton pacang ngindayang ngadol dewek semetone dados panjak ring meseh-meseh semetone, nanging nenten wenten anak sane nyak numbas.”

29

¹

Puniki kecap prajanjian sane kapituduhang antuk Ida Sang Hyang Widi Wasa ring Dane Musa, mangdane karauhang ring bangsa Israel, duk bangsane punika wenten ring tanah Moab. Prajanjiane puniki makadados wewehan prajanjian sane sampun kakardi antuk Ida Sang Hyang Widi Wasa marep ring bangsa Israel duke ring Gunung Sinai.

²

Dane Musa ngandikayang mangda bangsa Israele makasami pada mapunduh raris dane ngandika ring ipun sapuniki: “Semeton sareng sami pada sampun ngaksi paindikan-paindikan sane sampun kamargiang antuk Ida Sang Hyang Widi Wasa tumiba ring prabu Mesire miwah ring parabaudandan idane, samaliha tumiba ring sakuubing jagat idane.

³ Semeton taler sampun ngaksi bencana sane ageng, praciri-praciri miwah katawahan-katawahan sane ageng sane sampun kakardi antuk Ida Sang Hyang Widi Wasa.

⁴ Nanging ngantos rauh mangkin Ida nenten ngicen semeton ngresep ring paindikan-paindikan sane sampun aksi miwah pireng semeton punika.

⁵ Petang dasa taun suenipun Ida Sang Hyang Widi Wasa nuntun semeton nglintangin tegal melakange, tur pangangge miwah sepatu sane anggen semeton nenten buuk-buuk.

⁶ Semeton nenten madue roti sane ajeng semeton wiadin anggur miwah bir sane inem semeton, nanging Ida Sang Hyang Widi Wasa nyediang kaperluan semetone, buat ngurukang semeton, mungguing Ida punika maraga Widin semetone.

⁷ Tur ritatkala iraga rauh ring genahe puniki Ida Sang Prabu Sihon, ratune ring Hesbon, miwah Ida Sang Prabu Og, ratune ring Basan, pada rauh nyiatin iraga. Nanging iraga ngaonang ida,

⁸ tur ngambil jagat idane raris kadumang ring pantaran suku Ruben, Gad, miwah Manase atenga.

⁹ Duaning punika tinutinja saananing kecap prajanjiane puniki saking satia tuu, mangdane semeton jaga mapikolih ring saluiring pakibeh semetone.

¹⁰

Ring rahinane puniki semeton sareng sami ngadeg ring ayun Ida Sang Hyang Widi Wasa, Widin semetone, inggih punika parapamimpin miwah parapamrentah semetone, paralanang-lanang,

¹¹ istri-istri miwah oka-okan semetone makamiwah wong sunantara sane wenten ring pantaran semetone, sane dados juru ngandik saang miwah nimba toya pabuat semeton.

¹² Sane mangkin semeton mapunduh iriki buat ngardi prajanjian, ring Ida Sang Hyang Widi Wasa, Widin semetone, saha nampi sane dados tetegenan semetone.

¹³ Malantaran prajanjiane punika sane mangkin Ida Sang Hyang Widi Wasa ngamanggehang semeton dados kaulan Idane tur Ida dados Widin semetone, sakadi sane sampun janjiang Ida ring semeton miwah ring leluur semetone, inggih punika Dane Abraham, Dane Ishak miwah Dane Yakub.

¹⁴ Ida Sang Hyang Widi Wasa ngardi prajanjian miwah tetegenane puniki, boyaja marep ring semeton kewanten.

¹⁵ Ida ngardi prajanjiane puniki ring iraga sareng sami, sane ngadeg iriki ring ayun Idane ring rahinane puniki, taler ring parakaturunan iragane sane durung lekad.

¹⁶

Semeton kantun eling ring kawentenan iragane ring Mesir, miwah indik iragane nglintangin panegaran bangsa-bangsane sane lianan.

¹⁷ Semeton sampun ngaksi arca-arcanipune sane cemer sane sumbah ipun, sane malakar antuk taru, batu, perak miwah mas.

¹⁸ Elingangja! Sampunang wenten ring pantaran semetone anak lanang, anak istri, pakurenan miwah palingsehan sane ngadeg iriki ring rahinane puniki, jaga nilar Ida Sang Hyang Widi Wasa, Widin iragane, raris nyungsung widi-widin bangsa-bangsane sane lianan punika. Laksanane sane kadi asapunika tan bina sakadi akah sane mentik dados entik-entikan sane pait, miwah nglengehin.

¹⁹ Ring pantaran anak sane ring rahinane puniki miragi pakarsan Ida Sang Hyang Widi Wasa punika, sampunangja wenten sane cager ring manahnya, mungguing ipun pacang setata rahayu, yadiastun ipun bengkung buat ngulurin sapakitanipune niri. Indike punika jaga nyirnayang semeton sareng sami, inggih punika sang sane mapakardi becik miwah kaon.

²⁰ Ida Sang Hyang Widi Wasa nenten ledang ngampurayang anake sane sakadi asapunika. Nanging pidukan Ida Sang Hyang Widi Wasa sane ngendih murub jaga ngeseng ipun. Samaliha saananing bencanane sane sinurat ring cakepane puniki jaga nibenin ipun, kantos Ida Sang Hyang Widi Wasa nyirnayang ipun makasami.

²¹ Ida Sang Hyang Widi Wasa jaga nadosang ipun conto ring arepan sakancan suku bangsa Israele tur nibakang bencana ring ipun, satinut ring sakancan temahe sane manggeh ring prajanjiane sane sinurat ring cakepan paurukan Ida Sang Hyang Widi Wasa puniki.

²²

Benjang pungkur katurunan semetone, miwah wong sunantara sane saking doh-doh, jaga ngeton bencana miwah kasangsaran sane karauhang ring jagat semetone, antuk Ida Sang Hyang Widi Wasa.

²³ Tegal semetone jaga dadosang Ida tegal melakang, katangkeb antuk welirang miwah tasik, tan wenten tanah sane jaga sida katandurin, tur tan wenten padang sane jaga mentik irika. Tanah semetone jaga dados sakadi kota-kotane ring Sodom miwah Gomora, sakadi kota-kotane ring Adma miwah Seboim sane sampun kasirnayang antuk Ida Sang Hyang Widi Wasa, ritatkala Ida kalintang duka.

²⁴ Sadaging jagate sami jaga mataken sapuniki: ‘Punapi awinanipun Ida Sang Hyang Widi Wasa nibakang indike punika marep ring tanahipune! Napi awinanipun Ida kalintang duka kadi asapunika?’

²⁵ Raris pasaurnyane jagi sakadi asapuniki: ‘Santukan kaulan Ida Sang Hyang Widi Wasa sampun lompang ring prajanjian sane kardi ipun pamantuka ring ayun Idane inggih punika Widin leluurnyane, ritatkala Ida nuntun ipun rarud saking Mesir.

²⁶ Ipun nyungsung widi-widi sane lianan, sane durung naenin sungsung ipun, yadiastun Ida Sang Hyang Widi Wasa sampun tan nglugrain ipun nyungsung widi-widi tiosan.

²⁷ Punika awinannya Ida Sang Hyang Widi Wasa menggah piduka ring kaulan Idane, tur ngrauhang bencana-bencana sane sinurat ring cakepane puniki ring panegaranipune.

²⁸ Ida Sang Hyang Widi Wasa kalintang duka tur sajeroning pidukan Idane sane ageng punika, Ida mancut bangsa Israele saking tanahipune, tur kentungang ka jagat sunantara, mawinan sane mangkin ipun wenten irika.’

²⁹

Wenten paindikan-paindikan sane kapingitang antuk Ida Sang Hyang Widi Wasa, nanging Ida sampun nyinahang pidabdab Idane, tur iraga miwah katurunan iragane patut ninutin pidabdabe punika salami-laminipun.”

30

¹

“Sane mangkin semeton aturin tiang milih, punapike semeton milih merta, punapi temah. Yening sakancan paindikane punika sampun nibenin semeton tur semeton magenah ring pantaran bangsa-bangsane, ring genah-genah semetone sampun kasambragang antuk Ida Sang Hyang Widi Wasa, Widin semetone, semeton jagi eling ring pepilihan sane aturang tiang ring semeton.

² Yening semeton miwah katurunan semetone jaga mawali ka ayun Ida Sang Hyang Widi Wasa, tur saguluking kayun satinut ring pituduh Idane sane rauhang tiang ring semeton ring rahinane puniki,

³ kenginan Ida Sang Hyang Widi Wasa, Widin semetone pacang asung lugraha ring semeton. Ida pacang ngwaliang semeton saking bangsa-bangsane, genah semetone kasambragang tur Ida pacang malih nadosang semeton kerta raharja.

⁴ Yadiastun semeton sampun kasambragang kantos rauh ka tanggun gumine sane pinih doha, Ida Sang Hyang Widi Wasa, Widin semetone jaga munduhang semeton sareng sami tur ngwaliang semeton,

⁵ mangdane semeton malih mrasidayang nruenang tanah sane pecak kagenahin antuk leluur semetone. Samaliha Ida pacang ngawinang semeton kerta raharja tur endah-gumendah langkungan ring sane karasayang antuk leluur semetone.

⁶ Semeton miwah katurunan semetone jaga kicen pakayunan sane satinut mangda semeton jaga astiti bakti ring Ida saking saguluking kayun semetone, tur semeton prasida tetep magenah ring tanahe punika.

⁷ Ida Sang Hyang Widi Wasa jaga malikang sakancan temahe punika mangda nibenin meseh semetone sane geting ring semeton, miwah sane mrakosa semeton.

⁸ Semeton malih pacang satinut ring Ida, tur ngagem sakancan pituduh Idane sane rauhang tiang ring semeton ring rahinane puniki.

⁹ Ida Sang Hyang Widi Wasa pacang ngawinang semeton mapikolih ring saluiring pakibeh semetone. Semeton pacang katah madue oka miwah ingon-ingon, tur pategalan semetone jaga mupuang pamupu matikel-tikelan. Ida pacang ledang nadosang semeton kerta raharja, sakadi Ida ledang rikala nadosang leluur semetone kerta raharja.

¹⁰ Nanging semeton patut sairing ring Ida tur tuon ngagem sakancan pidabdab Idane sane sinurat ring cakepan paurukan Idane puniki. Semeton patut mawali ring Ida saking saguluking kayun semetone.

¹¹

Pituduh sane rauhang tiang ring semeton ring rahinane puniki, boyaja abot wiadin tan prasida antuk semeton nglaksanayang.

¹² Nentenja tegeh ring langite genah pituduhe punika, tur semeton nentenja kantos mataken: Sapasirake sane jaga munggah tur makta pidabdabe punika tedun ring iraga mangdane iraga mrasidayang miragiang tur ninutin pidabdabe punika?

¹³ Samaliha nentenja magenah ring selat segara. Semeton nenten kantos mataken: Sapasirake sane jaga malayar nglintangin segarane punika tur makta pituduhe punika ring iraga, mangdane iraga prasida miragiang tur ninutin pituduhe punika?

¹⁴ Nentenja kadi asapunika. Pituduhe punika wenten iriki ring genah semetone. Semeton uning ring pituduhe punika. Duaning punika, sane mangkin tinutinja pituduhe punika!

¹⁵

Ring rahinane puniki semeton aturin tiang milih sane becik wiadin sane kaon, urip wiadin padem.

¹⁶ Yening semeton astiti bakti ring Ida Sang Hyang Widi Wasa, Widin semetone, tur ngagem sakancan pidabdab Idane, sane rauhang tiang ring semeton ring rahinane puniki, kenginan semeton pacang kerta raharja, tur dados bangsa sane ageng. Ida Sang Hyang Widi Wasa, Widin semetone pacang ngamertanin semeton ring tanah sane jaga aug semeton.

¹⁷ Nanging yening semeton tempal tur nenten nyak miragiang, samaliha sampun kadaut buat nyungsung widi sane lianan,

¹⁸ semeton jagi kasirnayang. Kadi asapunika tiang mapakeling semeton mangkin iriki. Semeton nenten pacang panjang umur ring jagat dauh Tukad Yordane sane jaga aug semeton punika.

¹⁹ Sane mangkin semeton aturin tiang milih punapi urip, punapi padem, punapi mertan Ida Sang Hyang Widi Wasa, punapi temah Idane. Tiang nunas mangda akasa miwah pretiwine nyaksinin papilihan semetone punika. Pilihja uripe punika.

²⁰ Astiti baktija ring Ida Sang Hyang Widi Wasa, Widin semetone. Sairingja, tur satia tuuja ring Ida, kenginan semeton miwah katurunan semetone pacang muponin panjang umur ring jagat sane sampun janjiang Ida ring leluur semetone, Dane Abraham, Dane Ishak miwah Dane Yakub.”

31

¹

Dane Musa nglanturang pangandika ring bangsa Israel,

² sapuniki pangandikan danene: “Sane mangkin tiang sampun matuuh satus kalih dasa taun, tur nenten malih amunapi suenipun tiang mrasidayang dados pamimpin semetone. Sajawining punika, Ida Sang Hyang Widi Wasa sampun masabda ring tiang, mungguing tiang nenten pacang nglintangin Tukad Yordane punika.

³ Ida Sang Hyang Widi Wasa, Widin semetone ngraga pacang mamargi ring ajeng parasemetone, tur nyirnayang bangsa-bangsa sane wenten irika, mangda semeton mrasidayang ngaug tanah ipune. Yosua pacang dados pamimpin semetone, sakadi sane sampun kasabdayang antuk Ida Sang Hyang Widi Wasa.

⁴ Ida Sang Hyang Widi Wasa jaga nyirnayang bangsa-bangsane punika, sakadi Ida ngaonang Sang Prabu Sihon miwah Og, pararatun wong Amorine, tur Ida sampun nguugang guminnyane.

⁵ Ida Sang Hyang Widi Wasa pacang mapaica kamenangan ring semeton marep ring ipun, tur semeton patut nibakang ring ipun sakancan paindikan sane sampun rauhang tiang ring semeton.

⁶ Semeton patut pracaya tur sura dira. Sampunangja ajerih ring ipun. Widin semetone Ida Sang Hyang Widi Wasa ngraga pacang nyarengin semeton. Ida nenten jaga manggayang wiadin ngutang semeton.”

⁷

Sasampune punika Dane Musa raris ngesengin Dane Yosua, tur ngandika ring dane ring arepan bangsa Israele makasami, sapuniki: “Pagehang tur entegangja keneh ceninge. Tuah cening ane lakar mimpin bangsane ene buat ngaug gumi ane kajanjiang baan Ida Sang Hyang Widi Wasa teken paraleluurnyane.

⁸ Ida Sang Hyang Widi Wasa ngraga lakar nantan muah ngiangin cening. Ida tusing lakar ngendepin wiadin ngutang cening. Wireh keto edaja jejeh wiadin jerih.”

⁹

Sasampune punika Dane Musa tumuli nyuratang Pidabdab Ida Sang Hyang Widi Wasa punika, raris kaserahang ring parapandita suku Lewine, sane ngetangang Peti Prajanjian Ida Sang Hyang Widi Wasa, miwah ring parapamimpin bangsa Israele.

¹⁰ Dane Musa ngandika ring dane sareng sami sapuniki: “Nyabran pitung taun, ring pamuput taun sane kaping pitu, ring Rerainan Pondok Daune, rikalaning sakancan utang-utang anake kapalilayang, wacenja pidabdabe puniki antuk suara sane jangih.

¹¹ Wacenja ring arepan bangsa Israele rikalaning ipun rauh ngaturang bakti ring Ida Sang Hyang Widi Wasa, Widin semetone, ring genah pangubaktine sane asiki punika.

¹² Nikayang sawatek anake muani, luh-luh miwah rare-rare, miwah parawong sunantara sane magenah ring kotan semetone mangda ipun sami pada mapunduh tur miragiang pidabdabe puniki, tur mangda ipun mlajah ngluihang Ida Sang Hyang Widi Wasa, Widin semetone, samaliha mangda ipun saking tuu sairing ring paurukan-paurukan Idane.

¹³ Malantaran kadi asapunika katurunan semetone sane nenten naenin miragiang Pidabdab Ida Sang Hyang Widi Wasa, Widin semetone, jaga mrasidayang miragiang pidabdabe punika. Tur malantaran punika ipun jaga mlajah sairing ring Ida sakantun ipun urip ring jagat sane jaga aug semeton dauh Tukad Yordane.”

¹⁴

Sasampune punika Ida Sang Hyang Widi Wasa raris masabda ring Dane Musa sapuniki: “Kita tusing enu buin makelo lakar idup. Sawireh keto, kaukinja Yosua tur ajak ia sig Kemah Linggih Ulune, apanga Ulun maang ia pituduh-pituduh.” Dane Musa miwah Dane Yosua tumuli ka Kemah Linggih Ida Sang Hyang Widi Wasa,

¹⁵ tur irika Ida Sang Hyang Widi Wasa makantenang raga ring dane sareng kalih, sajeroning sesaka ambun sane nyeleg ring gapuran Kemah Linggih Ida Sang Hyang Widi Wasa punika.

¹⁶

Ida Sang Hyang Widi Wasa masabda ring Dane Musa sapuniki: “Kita lakar enggal mati, tur sasuban kitane mati, bangsane ene lakar tusing satia teken Ulun tur lompang teken janjin Ulune teken ia. Ia lakar nilar Ulun tur ia lakar nyungsung widi-widin bangsane ane ada di gumine ane lakar auga ento.

¹⁷ Yen ia suba keto, Ulun menggah teken ia. Ulun lakar ngutang ia, tur ia lakar kasirnayang. Liu bencana ane gede lakar nibenin ia, tur ditu ia lakar nawang, mungguing ia katibenin bencana buka keto, sawireh Ulun Widinnyane, tusing enu ngiangin ia.

¹⁸ Dikalane ento Ulun tusing nyak nulungin ia, sawireh ia suba nglaksanayang paundukan ane jaat tur nyungsung widi ane lenan.

¹⁹

Ane jani suratangja kidunge ene. Urukang bangsa Israele kidunge ene, apanga kidunge ene dadi upasaksi marep teken ia.

²⁰ Ulun lakar ngajak ia ka gumine ane gemuh landuh, buka ane janjiang Ulun teken paraleluurnyane. Ditu ia lakar muponin sakancan dedaaran ane perluanga tur ia lakar liang idupne. Nanging ia lakar murang lampah tur nyungsung widi-widi ane lenan. Ia lakar nulak Ulun tur lakar lompang teken janjin Ulune teken ia,

²¹ buina liu bencanane ane gede lakar nibenin ia. Nanging kidunge ene lakar tetep enu kakidungang, tur ento lakar dadi upasaksi marep teken ia. Malahan ane jani, satonden Ulun ngajak ia ka gumine ane janjiang Ulun ento, ulun wikan teken unduk ane kenehanga.”

²²

Ring rahinane punika ugi Dane Musa raris nyuratang kidunge punika, tumuli kurukang ring bangsa Israele.

²³

Sasampune punika Ida Sang Hyang Widi Wasa, raris masabda ring Dane Yosua, okan Dane Nun, sapuniki: “Kita patut pracaya tur sura dira. Kita ane lakar mimpin bangsa Israele ka gumi ane suba janjiang Ulun teken ia, tur Ulun lakar ngiangin kita.”

²⁴

Dane Musa nyuratang Pidabdab Ida Sang Hyang Widi Wasa, ring satunggiling cakepan. Apikang dane pisan nulis, mangda sampunang kantos wenten sane kalaliang.

²⁵ Sasampune dane nyurat, dane raris ngandika ring parapandita suku Lewine, sane ngetangang Peti Prajanjian Ida Sang Hyang Widi Wasa sapuniki:

²⁶ “Ambilja cakepan Pidabdab Ida Sang Hyang Widi Wasa puniki, tur genahangja ring sisin Peti Prajanjian Ida Sang Hyang Widi Wasa, Widin semetone, mangdane cakepane punika tetep wenten irika, makadados upasaksi, marep ring kaulan Idane.

²⁷ Tiang uning mungguing tan kadi-kadi bengkung miwah durakannyane. Sakantun tiang urip, ipun sampun mambek duraka pamantuka ring Ida Sang Hyang Widi Wasa, tur sasampun tiange padem, ambek durhakanipune jaga sayan ngagengang.

²⁸ Sane mangkin paumangja sawatek pamimpin suku miwah paraprakanggene ring arepan tiange, mangda tiang mrasidayang nguningayang paindikane puniki ring dane sareng sami. Tiang jaga nunas mangda akasa miwah pretiwine makadados saksin tiange ring dane sareng sami.

²⁹ Tiang uning, mungguing sasampune tiang padem, bangsane puniki jaga dados jaat tur nulak paindikan sane sampun urukang tiang ring ipun. Wenten masanipun, ipun jaga katibenin bencana, santukan ipun sampun ngawinang Ida Sang Hyang Widi Wasa, menggah malantaran ipun nglaksanayang paindikan sane sampun nenten lugrain Ida.”

³⁰

Sasampune punika Dane Musa tumuli ngidungang kidunge puniki makasami, tur kapiragiang antuk bangsa Israele makasami.

32

¹

“Akasa miwah pretiwine, pirengangja baos tiange, becikang mirengang paindikan sane uningayang tiang.

²
Paurukan tiange jagi ngetel sakadi ketelan sabehe, tur marupa sakadi damuh ring pretiwine. Baos tiange jaga ngripis sakadi sabehe nibenin tetandurane sane wau mentik, tan bina sakadi sabeh grimis nibenin padange sane lumlum.

³
Tiang jaga muji parab Ida Sang Hyang Widi Wasa, tur kaulan Idane jaga nuturang kagungan Idane.

⁴

Ida Sang Hyang Widi Wasa maraga pasayuban semetone sane maha kuasa. Ida maraga sampurna miwah adil ring saluiring pamargin Idane. Widin semetone maraga satia tuu tur sujati Ida ngamargiang sane patut miwah jujur.

⁵
Nanging semeton nenten satia tuu, nenten pantes dados kaulan Idane, bangsa sane kakaput antuk dosa miwah kalintang bobab.

⁶
Ih bangsa sane nambet miwah tan maderbe pangrasa, kadi asapunikake semeton jaga mambek pamantuka ring Ida Sang Hyang Widi Wasa? Ida punika maraga ajin semetone, Ida sane ngardi semeton. Ida sane nadosang semeton satunggiling bangsa.

⁷

Elingangja ring masane sane sampun lintang, masane sane nguni-nguni. Takenangja ring ajin semetone, mangda dane nuturang ring semeton, paindikan-paindikan sane sampun lintang punika. Tunasangja ring paralingsire, mangda dane nyritayang paindikane sane sampun lintang.

⁸
Ida Sane Maha Luur ngedumang tanah pusaka ring parabangsane. Ida ngamastiang genah bangsane suang-suang tur Ida ngedumang ring asing-asing bangsa dewa asiki-asiki.

⁹
Nanging katurunan Dane Yakub selik Ida dados padruen Idane.

¹⁰

Ipun keniang Ida ngumbara ring tegal melakange, tegal melakang sane suung, tur kapuput antuk angin. Ida nyayubin ipun tur matiningin ipun sakadi Ida matiningin ragan Idane ngraga.

¹¹
Tan bina sakadi paksi garudane ngurukang pianakipune makeber, pianakipune katinggahang becik-becik ring kampidipune sane kebat. Ida Sang Hyang Widi Wasa nyaga Israel mangda sampunang kantos labuh.

¹²
Ida Sang Hyang Widi Wasa ngraga sane nantan kaulan Idane, tan wenten dewa sunantara sane mitulungin.

¹³

Ida nglugrain ipun mrentah tanah pagunungan, tur ipun nunas upon-upon sane mentik ring pategalane. Ipun molih madu alas ring gunung batune, tur punyan saitun ipune mentik lanus ring tanahe sane mabatu-batu.

¹⁴
Banteng miwah kambingipune ngwedalang susu akeh pisan. Ipun maderbe biri-biri, kambing miwah banteng sane pinih becik, gandum sane pinih becik miwah anggur sane pepilihan.

¹⁵

Kaulan Ida Sang Hyang Widi Wasa sayan sugih, nanging duraka. Ipun mokoh tur uleg-ulegan antuk dedaaran. Ipun nilar Ida Sang Hyang Widi Wasa sane ngardi ipun, tur nulak Juru Rahayunipune sane maha kuasa.

¹⁶
Indik ipune nyungsung dewa-dewa, ngawinang Ida Sang Hyang Widi Wasa menggah. Indik sane jaat sane laksanayang ipun, ngawinang Ida duka.

¹⁷
Ipun maturan ring widi-widi sane boya widi, widi sane nenten naenin kuningin antuk leluuripune, widi-widi sane nenten naenin kasungsung antuk bangsa Israele.

¹⁸
Ipun lali ring Widinipune, Juru Rahayunipune sane maha kuasa, sane sampun ngicen ipun urip.

¹⁹

Rikala Ida Sang Hyang Widi Wasa ngaksi paindikane punika, Ida tumuli menggah tur nulak pianak-pianakipune luh miwah muani.

²⁰
Sapuniki sabdan Idane: ‘Ulun lakar suud nulungin ia. Ulun lakar ngaksi kenken lakar panadinne, bangsa ane bengkung muah tusing satia ento.

²¹
Ia ngaenang Ulun duka malantaran arca-arca ane gaena ento, buina iri ati teken ane tuara widi adanina widi. Wireh keto, Ulun lakar mrabotang bangsa ane tusing pantes madan bangsa buat ngaenang ia gedeg. Ulun lakar ngaenang ia iri ati, majalaran bangsa ane belog.

²²
Pidukan Ulune lakar ngendih murub buka apine tur ngeseng saananing ane ada di gumine kanti nganteg ka gumine ane sibeten, muah masmi dasar gununge.

²³
Ulun lakar nibenin ia baan bencana ane tan papegatan, tur Ulun lakar nibakang sakancan panah Ulune marep teken ia ajaka makejang.

²⁴
Ia lakar mati ulihan seduk muah gelem panes. Ia lakar mati ulihan grubug ane gede. Ulun lakar nglebang sato alas buat nyarap ia, muah lelipi ane mupas buat lakar nyotot ia.

²⁵
Siate lakar ngadakang pati di jalan-jalane, muah anake ane jumahne lakar tangkeb wisia. Bajang-bajange luh muah muani, aketo masih rare-rare wiadin anake tua cakluk, makejang lakar mati.

²⁶
Ulun makeneh nyirnayang ia kanti basmi kerta, apanga eda kanti ada anak ane lakar inget teken ia.

²⁷
Nanging Ulun tusing nglugrain musuh-musuhnyane nyumbungang awak ngaden ibanne ane suba ngalahang kaulan Ulune, sawireh sujatinne Ulun ane ngenyagang kaulan Ulune.’

²⁸

Bangsa Israel punika bangsa sane nenten maderbe pepineh. Ipun nenten pisan maderbe kawicaksanan.

²⁹
Ipun nenten mrasidayang ngrasayang napi awinan ipun kaon. Ipun nenten uning ngresepang paindikan sane sampun mamargi.

³⁰
Napi awinan ipun sareng siu kakaonang antuk anak adiri, miwah anak alaksa kakaonang antuk jadma sareng kekalih? Ida Sang Hyang Widi Wasa, Widinnyane, sampun nilar ipun, Widinnyane sane mawisesa sampun nyerahang ipun makasami.

³¹
Meseh-mesehipune sami sampun pada uning, mungguing dewanipune niri sujatinipun tan pabayu, nenten mawisesa sakadi Widin Israele.

³²
Meseh-meseh Israele jaat sakadi Sodom miwah Gomorane, sakadi wit anggure sane ngwetuang woh anggur sane pait tur nglengehin.

³³
Sakadi toyan anggure sane kakardi antuk upas lelipi.

³⁴

Ida Sang Hyang Widi Wasa eling ring paindikan sane sampun kalaksanayang antuk meseh-mesehipune. Ida nyantosang dauh sane becik buat jaga nyisipang ipun.

³⁵
Ida Sang Hyang Widi Wasa jaga ngwales tur nyisipang ipun. Wenten masannyane ipun jagi labuh. Masanipune jagi nemu sengkala sampun nampek.

³⁶
Ida Sang Hyang Widi Wasa jaga mebasang kaulan Idane, rikala Ida nyingak mungguing ipun sampun tan pabayu. Ida pacang kawelas arsa ring jadmane sane astiti bakti ring Ida, rikala Ida ngaksi nenten wenten anak sane nulungin ipun.

³⁷
Irika Ida Sang Hyang Widi Wasa jaga mataken ring kaulan Idane sapuniki: ‘Dija ia dewa-dewane ane mawisesa ane cagerang kita?

³⁸
Kita suba maang dewa-dewane ento naar muluk-muluk aturan kitane, buina kita ngaturang anggur apang inuma. Ane jani tunden ia mai buat nulungin kita. Tunden ia malaib buat ngrahayuang kita.

³⁹

Ulun ene, tuah Ulun ngraga ane maraga Widi. Tusing ada buin Widi ane lenan, Ulun ane ngamatiang muah Ulun ane nguripang, Ulun ane natunin muah Ulun ane ngwasang. Tusing pesan ada anak ane nyidayang mapas pakardin Ulune.

⁴⁰
Saking sujati tuah Ulun ene maraga Widi ane nyeneng. Ulun manjerang tangan Ulune sarwi masumpah,

⁴¹
mungguing Ulun lakar nyangih klewang Ulune ane ngendih tur Ulun nyingak apang kadilane kalaksanayang. Ulun lakar ngwales musuh-musuh Ulune muah nyisipang anake ane geting teken Ulun.

⁴²
Panah Ulune lakar liaba baan getihnyane muah pedang Ulune lakar ngamatiang sakancan anake ane tempal teken Ulun. Anake ane masiat nglawan Ulun, aukudko tusing ada ane lakar padalem Ulun. Yadian ia suba matatu wiadin katawan ia masih lakar mati.’

⁴³

Ih parabangsa, ajiangja kaulan Ida Sang Hyang Widi Wasa. Ida nyisipang sakancan anake sane ngamademang kaulan Idane. Ida nibakang pangwales ring musuh-musuhnyane tur Ida ngampurayang dosa-dosan kaulan Idane.”

⁴⁴

Dane Musa miwah Dane Yosua okan Dane Nun ngidungang kidunge punika, kantos bangsa Israele prasida miragiang kidunge punika.

⁴⁵

Sasampune Dane Musa puput ngwarahang paurukan Ida Sang Hyang Widi Wasa ring bangsa Israel,

⁴⁶ dane raris ngandika sapuniki: “Elingangja, semeton patut nglaksanayang saananing pituduhe sane sampun aturang tiang ring semeton ring rahinane puniki. Wali-walininja malih nuturang ring oka-okan semetone, mangda ipun saking satia tuu sairing ring sakancan paurukan Ida Sang Hyang Widi Wasa.

⁴⁷ Paurukane puniki boyaja baos sane puyung, nanging sane dados urip semetone. Tinutinja makasami, kenginan semeton jaga muponin panjang umur ring jagat sane jaga aug semeton ring dauh Tukad Yordane.”

⁴⁸

Ring rahinane punika taler Ida Sang Hyang Widi Wasa masabda ring Dane Musa sapuniki:

⁴⁹ “Kemaja majalan ka Pagunungan Abarime di tanah Moab ane marep-arepan klawan kota Yerikone. Menekja ka muncuk Gunung Nebone, tur iwasinja tanah Kanaane, ane lakar paicayang Ulun teken bangsa Israel.

⁵⁰ Kita lakar mati di muncuk gununge ento, buke belin kitane Harun suba mati di muncuk Gunung Hore,

⁵¹ sawireh kita makadadua tusing satia teken Ulun. Kita suba tusing ngajiang Ulun di arepan bangsa Israele, dugase kita di tongos yeh klebutane di Meriba, paek teken kota Kadese, di tegal melakang Sine.

⁵² Kita lakar nepukin tanahe ento uli joh, nanging kita tusing masuk ka gumine ane paicayang Ulun teken bangsa Israele.”

33

¹

Puniki merta sane kucapang antuk Dane Musa, parekan Ida Sang Hyang Widi Wasa, tumiba ring bangsa Israel, sadurunge dane seda:

²
“Ida Sang Hyang Widi Wasa rauh saking Gunung Sinai, Ida endag sakadi suryane ring duur jagat Edome, tur nyunarin kaulan Idane saking Gunung Paran. Ida kasarengin antuk malaekat alaksa akehipun miwah geni murub wenten ring tangan Idane tengen.

³
Ida Sang Hyang Widi Wasa asih sueca ring kaulan Idane, tur Ida nyayubin anake sane dados druen Idane. Duaning punika, iraga sumuyud ring bukpadan Idane, sarwi sairing ring pituduh-pituduh Idane.

⁴
Iraga satinut ring pidabdab sane kapaicayang ring iraga antuk Dane Musa sane pinaka dados arta branan bangsan iragane sane luih.

⁵
Ida Sang Hyang Widi Wasa jumeneng nata pabuat kaulan Idane Israel, rikala watek suku bangsannyane miwah parapamimpinnyane paum sinarengan.”

⁶

Dane Musa raris ngandika ngeniang indik suku Ruben sapuniki:

“Moga-moga suku Ruben nenten pacang winasa, yadiastun wargannyane wantah akidik.”

⁷

Ngeniang indik suku Yehuda, sapuniki pangandikan danene:

“Duh Ratu Sang Hyang Widi Wasa, pirengangja sesambatanipune nunas tulung. Tunggilangja ipun ring suku-suku sane lianan. Duh Ratu Sang Hyang Widi Wasa sarenginja ipun mayuda, tur tulunginja ipun nglawan meseh-mesehipune.”

⁸

Ngeniang indik suku Lewi, sapuniki pangandikan danene:

“Duh Ratu Sang Hyang Widi Wasa, sinahangja pakarsan Palungguh IRatu masrana Urim miwah Tumim malantaran suku Lewi kaulan Palungguh IRatu sane satia. Palungguh IRatu sampun mintonin ipun ring Masa. Samaliha Palungguh IRatu sampun muktiang mungguing ipun patut dawege ring toya klebutane ring Meriba.

⁹
Ipun sampun nyinahang subakti sane ageng ring Palungguh IRatu, agengan ring tresnan ipune marep ring wong tua, nyama miwah pianak-pianakipune. Ipun sairing ring sapituduh Palungguh IRatu, tur satia tuu ring prajanjian Palungguh IRatu.

¹⁰
Ipun jaga nguruk parakaulan Palungguh IRatu buat ninutin pidabdab Palungguh IRatu. Ipun jaga ngaturang aturan ring pamorboran aturan Palungguh IRatu.

¹¹
Duh Ratu Sang Hyang Widi Wasa, tulunginja sukune puniki mangda ipun sayan kukuh. Ledanginja saananing sane laksanayang ipun. Enyagangja sakancan mesehipune, kantos nenten mrasidayang bangun malih.”

¹²

Ngeniang indik suku Benyamin, sapuniki pangandikan danene:

“Puniki suku sane kasayangang miwah kasayubin antuk Ida Sang Hyang Widi Wasa. Ida nyaga ipun rahina wengi. Samaliha Ida malingga ring pantaranipune.”

¹³

Ngeniang indik suku Yusup, sapuniki pangandikan danene:

“Dumadak Ida Sang Hyang Widi Wasa ngamertanin tanahipune antuk sabeh, miwah antuk toya sane metu saking tanahe.

¹⁴
Dumadak tanahipune kamertanin antuk woh-wohan sane nasak ring punya tur nyabran masa kabekin antuk woh-wohan sane pinih becik.

¹⁵
Dumadak bukit-bukitipune sane wenten saking nguni-nguni kabekin antuk woh-wohan sane becik-becik.

¹⁶
Dumadak tanahipune kabekin antuk sakancan sane becik, kamertanin antuk kabecikan Ida Sang Hyang Widi Wasa sane masabda saking tengah bete sane ngendih murub. Dumadak mertane puniki nibenin suku Yusup. Santukan ipun dados pamimpin ring pantaran nyama-nyamaanipune.

¹⁷
Yusup madue kakuatan sakadi kakuatan banteng jagiran, miwah tanduknyane sakadi tanduk banteng alase. Sane pinaka dados tanduk, inggih punika katurunan Manase sane panyiuan akehipun, miwah katurunan Epraim sane panglaksaan akehnya. Malantaran sang kalih punika ipun nyenggot parabangsane, tur nyabatang bangsa-bangsane punika ngantos rauh ka tanggun jagate.”

¹⁸

Ngeniang indik suku Sebulon, miwah Isakar dane ngandika sapuniki:

“Moga-moga Sebulon gemuh landuh sajeroning padedaganganipune ring segara, samaliha dumadak Isakar sayan nyugihang ring pumahannyane.

¹⁹
Ipun ngundang wong sunantara ngrauhin gunung-gunungipune, tur ngaturang aturan sane patut irika. Ipun molih kasugihan saking segara, miwah saking biase ring pasisi.”

²⁰

Ngeniang indik suku Gad, dane ngandika sapuniki:

“Pujija Ida Sang Hyang Widi Wasa, sane sampun malinggahin wewidanganipune. Gad nyantosang tan bina sakadi singa sane jaga nyarap lima wiadin kaun tendas.

²¹
Ipun ngambil tanah sane pinih becik pabuat dewekipune. Duman parapamimpine sampun kapastikayang pabuat ipun. Ipun sairing ring pituduh miwah Pidabdab Ida Sang Hyang Widi Wasa rikala parapamimpin Israele pada paum sinarengan.”

²²

Ngeniang indik suku Dan, dane ngandika sapuniki:

“Dan punika singa bajang sane makecos medal saking Basan.”

²³

Ngeniang indik suku Naptali, dane ngandika sapuniki:

“Naptali punika sugih merta miwah panugrahan Ida Sang Hyang Widi Wasa. Tanahipune ngawit saking Danu Galilea nglajur ngelodang.”

²⁴

Ngeniang indik suku Aser, dane ngandika sapuniki:

“Aser kamertanin langkungan ring suku-suku sane lianan. Dumadak ipun dados sesayangan nyama-nyamaanipun. Tur tanah ipune dumadak sugih antuk wit saitun.

²⁵
Dumadak kotannyane katabengin antuk gapura-gapura besi. Samaliha dumadakja ipun setata wenten sajeroning kerta raharja.

²⁶
Semeton bangsa Israel, tan wenten Widi sane sakadi Widin semetone, sane mamarga sajeroning kaluihang nglintang ring langite. Sane mamarga sajeroning megane buat rauh mapaica pitulungan ring semeton.

²⁷
Ida Sang Hyang Widi Wasa tansah dados pasayuban semetone. Tangan Idane sane langgeng dados paglantingan semetone. Ida ngulah meseh-meseh semetone saking ajeng semetone, tur Ida ngandikayang semeton, mangda nyirnayang ipun makasami.

²⁸
Kadi asapunika katurunan Dane Yakub jaga urip sajeroning kerta raharja. Kerta raharja ring jagat sane bek madaging gandum miwah anggur, jagat sane kasiam antuk damuh saking langite.

²⁹
Duh Israel, ambate bagian semetone! Tan wenten anak sane sakadi semeton, semeton dados bangsa sane karahayuang antuk Ida Sang Hyang Widi Wasa. Ida Sang Hyang Widi Wasa ngraga dados tameng miwah pedang semetone buat nawengin semeton tur mapaica kamenangan ring semeton. Meseh-meseh semetone jaga rauh nunas kapiolasan ring semeton, tur semeton jaga nyekjek ipun.”

34

¹

Saking tanahe dangsah ring Moab Dane Musa raris munggah ka Gunung Nebo, ka muncuk Gunung Pisga dangin kota Yerikone. Irika Ida Sang Hyang Widi Wasa matujuhang ring dane sakuub jagate punika, inggih punika wewidangan Gilead ngalerang rauh ka kota Dan.

² Wewidangan suku Naptali, wewidangan suku Epraim miwah Manase, wewidangan Yehuda ngauhang ngantos rauh ring Segara Tengah.

³ Tanggu kelod wewidangan suku Yehuda miwah tanahe dangsah sane nglajur saking Soar ngantos rauh ka Yeriko, inggih punika kota sane bek madaging wit korma.

⁴ Ida Sang Hyang Widi Wasa tumuli masabda ring Dane Musa sapuniki: “Ene suba gumi ane janjiang Ulun teken Abraham, Ishak muah Yakub, ane lakar paicayang Ulun teken katurunannyane. Ulun nglugrain kita ngiwasin gumine ento nanging Ulun tusing nglugrain kita kema.”

⁵

Kadi asapunika Dane Musa, parekan Ida Sang Hyang Widi Wasa, seda irika ring tanah Moab, sakadi sane sampun kasabdayang ring dane antuk Ida Sang Hyang Widi Wasa.

⁶ Ida Sang Hyang Widi Wasa mendem dane ring satunggiling jurang ring tanah Moab, mapapas klawan kota Bet-Peor, nanging rauh mangkin nenten wenten anak sane uning genah kuburan danene sane sawiaktinipun.

⁷ Rikala seda, Dane Musa mayusa satus kalih dasa warsa. Dane kantun siteng tur pangaksian danene durung slamur.

⁸ Bangsa Israel mangelingin dane ring tanahe dangsah ring Moab tigang dasa rahina suenipun.

⁹

Dane Yosua okan Dane Nun, sampun kabekin antuk kawicaksanan, santukan Dane Musa sampun nyelik dane buat ngentosin dane. Bangsa Israele satinut ring Dane Yosua, tur nglaksanayang pituduh-pituduh sane sampun kapaicayang antuk Ida Sang Hyang Widi Wasa, malantaran Dane Musa.

¹⁰

Ring Israel tan wenten malih nabi sane sakadi Dane Musa. Ida Sang Hyang Widi Wasa sampun masabda marep-arepan ring dane.

¹¹ Tan wenten nabi sane sampun ngardi katawahan miwah praciri sakadi sane sampun kapituduhang antuk Ida Sang Hyang Widi Wasa ring Dane Musa, mangda kasinahang buat nglawan sang prabu ring Mesir, miwah paraprakanggen idane makamiwah sakuub jagat Mesire.

¹² Tan wenten nabi lianan, sane sampun mrasidayang ngardi paindikan-paindikan sane ageng tur madurgama sakadi sane sampun kakardi antuk Dane Musa ring ajeng bangsa Israele makasami.