1

¹

Ida Sang Hyang Widi Wasa ngesengin Dane Musa, tumuli masabda ring dane saking tengah Kemah Linggih Ida Sang Hyang Widi Wasa, tur Ida maicayang pidabdabe puniki ring dane,

² sane patut kalaksanayang antuk bangsa Israele, rikala ipun ngaturang aturanipune.

Yen wenten anak ngaturang aturan wewalungan, aturane punika patut marupa banteng, biri-biri wiadin kambing paderbeanipune.

³ Yening ipun ngaturang aturan maborbor, marupa banteng, ipun patut ngaturang banteng jagiran sane tan paceda. Bantenge punika patut aturang ipun ring arepan gapuran Kemah Linggih Ida Sang Hyang Widi Wasa, mangda Ida Sang Hyang Widi Wasa, ledang nrima ipun.

⁴ Anake punika patut ngenahang limanipune ring tenggek aturane punika, tur aturane punika jaga katrima antuk Ida Sang Hyang Widi Wasa makadados aturan panyupat dosa-dosanipune.

⁵ Sapangrarisipun bantenge punika patut katampah irika ring arepan gapuran Kemah Linggih Ida Sang Hyang Widi Wasa. Parapandita katurunan Dane Harun patut ngaturang getih bantenge punika ring Ida Sang Hyang Widi Wasa, tur sasampune punika raris mriokang getihe punika ring sisin genah aturane punika makaileh, inggih punika pamorboran aturan sane wenten ring ajeng gapuran Kemah Linggih Ida Sang Hyang Widi Wasa punika.

⁶ Sasampune punika, anake punika patut mlulangin tur mukang-mukang bantenge punika.

⁷ Parapanditane patut nabdabang saang ring pamorboran aturane tumuli kancungin geni.

⁸ Parapanditane patut ngenahang pukang-pukangan rauh tenggek miwah muluk wewalungane ring genine punika.

⁹ Anake punika ngumbah jejeron miwah batis wewalungane punika sane durian tur parapanditane sane nabdabang upacarane punika patut morbor aturane punika makasami. Ambun aturan rayunane punika ngawinang ledang pakayunan Ida Sang Hyang Widi Wasa.

¹⁰

Yening sane katurang biri-biri wiadin kambing, biri-biri wiadin kambinge punika patut sane muani samaliha nenten wenten cedanipun.

¹¹ Anake punika patut nampah wewalungane punika ring sisi kaler pamorboran aturane, tur parapanditane patut mriokang getihnyane ring sisin pamorboran aturane makaileh.

¹² Sasampune anake punika mukang-mukang wewalungane punika, parapandita sane nabdabang upacara punika patut ngenahang pukang-pukangane punika makasami, rauh ring tenggek miwah muluknyane ring genine.

¹³ Anake punika patut ngumbah jejeron miwah batis wewalungane punika sane durian tur parapanditane patut ngaturang aturane punika ring Ida Sang Hyang Widi Wasa, saha morbor punika makasami ring pamorboran aturane. Ambun aturan rayunane punika ngawinang ledang pakayunan Ida Sang Hyang Widi Wasa.

¹⁴

Yening wenten anak sane ngaturang paksi buat dados aturan maborbor, ipun patut ngaturang paksi kukur wiadin paksi dara.

¹⁵ Sang pandita patut ngaturang paksine punika ring pamorboran aturane, raris ngilut baong paksi punika, tumuli morbor tenggeknyane ring pamorboran aturane punika. Getihnyane patut kakecorang ring sisin pamorboran aturane punika.

¹⁶ Blimbinnyane miwah sadagingipun patut kamedalang tur kentungang ring dangin pamorbor aturane punika, inggih punika ring genah abune.

¹⁷ Sapangrarisipun paksine punika patut kagemel bongkol kampidnyane buat nyibak awakne, nanging kampidnyane sampunang ngantos keles. Sasampune punika paksine punika raris kaborbor makasami ring pamorboran aturane. Ambun aturan rayunane punika ngawinang ledang pakayunan Ida Sang Hyang Widi Wasa.

2

¹

Yening wenten anak ngaturang aturan sesajen ring Ida Sang Hyang Widi Wasa, gandume punika pinih riin patut kanggen tepung. Tepunge punika patut kadagingin minyak saitun miwah menyan,

² tumuli raris kaserahang ring parapandita katurunan Dane Harun. Sang pandita sane nabdabang upacarane punika patut ngambil tepung miwah minyak saitun punika agemel, miwah menyane punika makasami, tumuli kaborbor ring pamorboran aturane, makadados cihna mungguing aturane punika makasami sampun katur ring Ida Sang Hyang Widi Wasa. Ambun aturan rayunane punika ngawinang ledang pakayunan Ida Sang Hyang Widi Wasa.

³ Sisan aturan gandume punika dados druen sang pandita. Sisane punika kalintang suci, santukan punika kambil saking aturan sane sampun katurang ring Ida Sang Hyang Widi Wasa.

⁴

Yening aturane punika marupa roti sane kaopen ring pangopenan rotine, roti punika patut nenten madaging ragi. Rotine punika dados marupa roti tebel sane kakardi antuk tepung madaging minyak saitun wiadin roti biskuit sane kolesin antuk minyak saitun.

⁵

Yening aturane punika marupa roti sane mapanggang ring pamanggangane, roti punika patut kakaryanin antuk tepung madaging minyak saitun. Nanging nenten madaging ragi.

⁶ Rikalaning ngaturang roti punika, rotine punika patut kenyagang tur kasriokin antuk minyak saitun.

⁷

Yening aturane punika marupa roti sane magoreng antuk pangorengan, roti punika patut kakaryanin antuk tepung miwah minyak saitun.

⁸ Rotine punika makadados aturan ring Ida Sang Hyang Widi Wasa, tur kaserahang ring sang pandita sane jagi ngaturang rotine punika ring pamorboran aturane.

⁹ Sang pandita patut ngambil rotine punika abagian makadados cihna, mungguing rotine punika makasami sampun katur ring Ida Sang Hyang Widi Wasa, tur rotine sane kambil punika patut kaborbor ring pamorboran aturane. Ambun aturan rayunane punika ngawinang ledang pakayunan Ida Sang Hyang Widi Wasa.

¹⁰ Sisan aturane punika dados druen sang pandita. Sisane punika kalintang suci, santukan punika kambil saking aturan sane katurang ring Ida Sang Hyang Widi Wasa.

¹¹

Saananing aturan sesajen sane aturang semeton pamantuka ring Ida Sang Hyang Widi Wasa nenten pisan dados kadagingin ragi. Semeton nenten pisan dados nganggen ragi wiadin madu, ring rayunan sane katur ring Ida Sang Hyang Widi Wasa.

¹² Aturan gandum saking upon-upon semetone sane pangawit nyabran taun patut aturang semeton ring Ida Sang Hyang Widi Wasa, nanging sampunang borbora ring pamorboran aturane.

¹³ Saananing aturan semetone sane marupa gandum patut kadagingin tasik, santukan tasike punika makadados cihna prajanjian semetone ring Ida Sang Hyang Widi Wasa. (Sakancan aturan semetone, patut kadagingin tasik.)

¹⁴ Yening semeton ngaturang aturan sesajen saking upon-upon semetone sane pangawit ring Ida Sang Hyang Widi Wasa, aturangja gandum sane sampun manyahnyah wiadin sane sampun matepung.

¹⁵ Aturane punika patut kadagingin minyak saitun miwah menyan.

¹⁶ Sang pandita patut morbor abagian saking tepung miwah minyak saitune punika, miwah menyane makasami makadados cihna mungguing aturane punika sampun katurang ring Ida Sang Hyang Widi Wasa makadados aturan rayunan.

3

¹

Yen wenten anak ngaturang wewalungan buat dados aturan karahayuan, wewalungane punika patut marupa banteng jagiran wiadin banteng lua, sane tan paceda.

² Anake sane makta aturane punika patut ngisi tenggek wewalungane punika, tumuli wewalungane punika katampah ring pamedal Kemah Linggih Ida Sang Hyang Widi Wasa. Sapangrarisipun, parapandita katurunan Dane Harun patut mriokang getihnyane ring sisin pamorboran aturane punika makaileh.

³ Minakadi aturan rayunan pabuat Ida Sang Hyang Widi Wasa, sane patut katurang inggih punika pah-pahan saking wewalungan punika, luiripun muluk sane ngaput jejeron,

⁴ ginjel rauh ka muluknyane miwah atinne sane pinih becik.

⁵ Sang pandita patut morbor punika makasami ring pamorboran aturane, kasarengang ring aturan maborbor sane lianan. Ambun aturan rayunane punika ngawinang ledang pakayunan Ida Sang Hyang Widi Wasa.

⁶

Yening biri-biri wiadin kambing sane kanggen aturan karahayuan, wewalungane punika dados muani wiadin lua, nanging patut tan paceda.

⁷ Yening anake punika ngaturang biri-biri,

⁸ anake punika patut ngisi tenggek wewalungane punika, tumuli wewalungane punika katampah ring ajeng Kemah Linggih Ida Sang Hyang Widi Wasa. Sang pandita patut mriokang getih wewalungane punika ring sisin pamorboran aturane makaileh.

⁹ Minakadi aturan rayunan pabuat Ida Sang Hyang Widi Wasa, sang pandita patut ngaturang pukang-pukangan biri-birine punika, luiripun: muluknyane, ikuhipun sane madaging muluk kagetep ring tulang gigir ipune, sakancan muluk sane ngaput jejeronnyane,

¹⁰ ginjel katut muluknyane miwah bagian ati sane pinih becik.

¹¹ Panditane sane nuju ngayah irika patut morbor punika makasami ring pamorboran aturane makadados aturan rayunan pamantuka ring Ida Sang Hyang Widi Wasa.

¹²

Yening anake punika ngaturang kambing,

¹³ anake punika patut ngisi tenggek wewalungane punika tumuli nampah kambinge punika ring ajeng Kemah Linggih Ida Sang Hyang Widi Wasa. Sang pandita patut mriokang getihnyane ring sisin pamorboran aturane makaileh.

¹⁴ Minakadi aturan rayunan pabuat Ida Sang Hyang Widi Wasa, sang pandita patut ngaturang pukang-pukangan kambing punika, luiripun: sakancan muluk sane ngaput jejeronipun,

¹⁵ ginjel miwah muluknyane miwah bagian ati sane pinih becik.

¹⁶ Sang pandita patut morbor punika makasami ring pamorboran aturane minakadi dados aturan rayunan, sane ngawinang ledang pakayunan Ida Sang Hyang Widi Wasa. Muluk wewalungane punika makasami katur ring Ida Sang Hyang Widi Wasa.

¹⁷ Bangsa Israele nenten pisan kalugra nunas muluk miwah getih. Pidabdabe punika patut kamanggehang salawas-lawasipun antuk bangsa Israel, ring dijaja ipun magenah.

4

¹

Ida Sang Hyang Widi Wasa masabda ring Dane Musa,

² mangda kuar-uarang ring bangsa Israele ngeniang indik anake sane nenten nyelapang ngardi dosa malantaran ipun mamurug salah tunggal pituduh-pituduh Ida Sang Hyang Widi Wasa. Ipun patut ngamargiang pidabdab sane kadi asapuniki.

³

Yening anake sane ngardi dosa punika Pandita Agung, sane malantaran punika ngawinang bangsane makasami patut iwang, dane patut ngaturang banteng jagiran sane bajang sane tan paceda, katurang ring ayun Ida Sang Hyang Widi Wasa mangda dosannyane kampurayang.

⁴ Dane patut makta bantenge punika ring ajeng gapuran Kemah Linggih Ida Sang Hyang Widi Wasa. Dane patut ngambel tenggek bantenge punika, raris nampah bantenge punika irika ring ayun Ida Sang Hyang Widi Wasa.

⁵ Sasampune punika Sang Pandita Agung patut ngambil getih bantenge punika akedik kabakta ngranjing ring Kemah Linggih Ida Sang Hyang Widi Wasa.

⁶ Dane patut nyelebang jrijin tangan danene ring getihe punika tumuli kaketisang ping pitu marep ka kordene sane suci.

⁷ Sasampune punika dane patut ngolesang getihe punika akidik ring tanduk sane wenten ring bucu-bucun pasepan pamorboran menyan kastanggine sane wenten ring jeron Kemah Linggih Ida Sang Hyang Widi Wasa. Dane patut mriokang sisan getihe punika ring bongkol pamorboran aturane sane wenten ring gapuran Kemah Linggih Ida Sang Hyang Widi Wasa.

⁸ Saking bantenge punika dane patut ngambil muluk bantenge punika sami, muluk sane ngaput isin jejeronnyane,

⁹ muluk sane ring ginjelnyane miwah bagian ati sane pinih becika.

¹⁰ Sang pandita patut ngambil muluke punika tumuli kaborbor ring pamorboran aturane sakadi dane morbor muluk wewalungane sane katurang buat aturan karahayuan.

¹¹ Nanging dane patut ngambil kulitnyane, dagingnyane makasami, tenggekipun, buntutipune miwah jejeronipune rauh ka bacinipune.

¹² Punika sami raris kabakta ring jaban pakemahane, ring genah pangutangan abune, inggih punika genah sane sampun kasuciang, irika raris katunjel antuk saang.

¹³

Yening sane ngardi dosa ulihan nenten nyelapang punika bangsa Israel, malantaran ipun mamurug sinalih tunggil pituduh Ida Sang Hyang Widi Wasa,

¹⁴ tur sasampune dosane punika kuningin, pasamuane punika patut ngaturang banteng jagiran sane kantun bajang buat aturan panyupat dosa. Banteng jagiran punika patut kabakta ring ajeng Kemah Linggih Ida Sang Hyang Widi Wasa.

¹⁵ Parapamimpin pasamuane patut ngambel tenggek bantenge punika, tur bantenge raris katampah irika.

¹⁶ Sang Pandita Agung patut ngambil getih bantenge akedik, kabakta ngranjing ka jeroan Kemah Linggih Ida Sang Hyang Widi Wasa.

¹⁷ Irika dane patut nyelebang jrijin tangan danene ring getihe punika, sarwi ngetisang ping pitu marep ka korden penyelenge sane suci.

¹⁸ Dane patut taler ngolesang getihe punika akidik ring tanduk sane wenten ring bucu-bucun pamorboran menyan kastanggine, sane wenten ring jeroan Kemahe miwah sisan getihe punika kabriokang ring bongkol pamorboran aturane, sane wenten ring jaban Kemah Linggih Ida Sang Hyang Widi Wasa, ring arepan pamedale.

¹⁹ Sasampune punika dane patut ngambil muluknyane makasami raris kaborbor ring pamorboran aturane.

²⁰ Caranipun pateh sakadi ngamargiang upacara ngaturang banteng jagirane buat aturan pangampuraning dosa. Kadi asapunika patutnya dane ngamargiang aturan pabuat dosan pasamuane, tur pasamuane jaga molih pangampura.

²¹ Sasampune punika dane patut makta bantenge punika ka jabaan pakemahane, raris katunjel irika, sakadi dane nunjel aturan banteng pabuat pangampuraning dosan danene ngraga. Kadi asapunika pulah-palihipun ngaturang aturan pabuat molih pangampuraning dosan pasamuane.

²²

Menawita sane ngardi dosa ulihan nenten nyelapang punika sinalih tunggal saking sang pamrentahe, malantaran dane iwang mamurug salah tunggal pituduh Ida Sang Hyang Widi Wasa.

²³ Kenginan sasampune punika kuningayang ring dane, dane digelis patut ngaturang kambing muani sane tan paceda buat pangampuraning dosan danene.

²⁴ Dane patut ngambel tenggek kambinge punika, raris kambinge punika katampah ring sisi kaler pamorboran aturane, ring genah anake nampah wewalungan sane kanggen aturan maborbor.

²⁵ Sang pandita patut nyelebang jrijin tangan danene ring getih wewalungane punika, tur kolesang ring tanduk sane wenten ring bucu-bucun pamorboran aturane, raris sisan getihe punika kabriokang ring bongkol pamorboran aturane.

²⁶ Sasampune punika dane patut morbor muluk kambinge punika makasami ring pamorboran aturane, sakadi dane morbor muluk wewalungan sane katampah pabuat aturan karahayuan. Kadi asapunika patutnya sang pandita ngaturang aturan pabuat dosan satunggaling sang pamrentah, tur Ida Sang Hyang Widi Wasa ngampurayang dosan anake punika.

²⁷

Yening sane ngardi dosa ulihan nenten nyelepang punika rakyat biasa, ipun iwang malantaran mamurug sinalih tunggal pituduh Ida Sang Hyang Widi Wasa,

²⁸ sasampun dosanipune punika kuningin, ipun patut digelis ngaturang kambing asiki sane tan paceda.

²⁹ Ipun patut ngambel tenggek kambinge punika, raris kambinge punika katampah ring sisi kaler pamorboran aturane.

³⁰ Sang pandita patut nyelebang jrijin tangan danene ring getih wewalungane punika, raris kolesang ring tanduk-tanduk sane wenten ring bucu-bucun pamorboran aturane, tur sisan getihe punika kabriokang ring bongkol pamorboran aturane.

³¹ Sasampune punika dane patut ngamedalang muluknyane makasami, sakadi sane margiang dane pabuat aturan karahayuan. Muluke punika tumuli kaborbor ring pamorboran aturane, mangda ambunnyane ngledangin pakayunan Ida Sang Hyang Widi Wasa. Kadi asapunika patutnya sang pandita ngaturang aturan pabuat dosan satunggaling anak saking rakyate biasa, tur anake punika jaga molih pangampura saking Ida Sang Hyang Widi Wasa.

³²

Yening sane kanggen aturan pabuat pangampuraning dosa punika biri-biri, biri-birine punika patutipun biri-biri sane tan paceda.

³³ Anake punika patut ngisi tenggek biri-birine punika, raris biri-birine punika katampah ring sisi kaler pamorboran aturane, ring genah anake nampah wewalungan sane kanggen aturan maborbor.

³⁴ Sang pandita patut nyelebang jrijin tangan danene ring getih wewalungane punika, raris kolesang ring tanduk sane wenten ring bucu-bucun pamorboran aturane punika, tur sisan getihe punika kabriokang ring bongkol pamorboran aturane.

³⁵ Sasampune punika dane patut ngamedalang muluk wewalungane punika makasami, sakadi sane margiang dane marep ring wewalungan sane kanggen aturan karahayuan. Muluke punika patut kaborbor ring pamorboran aturane, sinarengan ring aturan rayunan sane katurang ring Ida Sang Hyang Widi Wasa. Kadi asapunika patutipun sang pandita ngaturang aturan pabuat dosan satunggaling anak, tur Ida Sang Hyang Widi Wasa pacang ngampurayang dosan anake punika.

5

¹

Aturan pangampuraning dosa kabuatang yening wenten paindikan-paindikan sane kadi asapuniki: Yening wenten anak polih panggilan buat dados saksi ring pangadilan, nanging ipun nenten nyak ngaturang kasaksian ngeniang ring paindikan sane sampun panggihin wiadin piragi ipun, ipun sane patut negen palannyane.

²

Yening wenten anak nenten nyelapang ngaplug paindikan sane leteh, luiripun bangken wewalungan, tur sasampune ipun eling ring dewek ngeniang indik sane sampun kardi ipun punika, kenginan ipun dados leteh tur iwang manut sopacaraning agama.

³

Yening ipun ngusud barang sane leteh sane wetu saking imanusa, tur sasampune punika ipun eling ring dewek ngeniang indik sane sampun kardi ipun punika, kenginan ipun taler iwang.

⁴

Yening ipun ngawag-awag masumpah, ngeniang ring paindikan punapija luiripun, sasampune punika ipun eling ring dewek ngeniang ring paindikan sane sampun margiang ipun punika kenginan ipun taler iwang.

⁵

Yening wenten anak sane maiwang, ipun patut ngangkenin dosanipune,

⁶ tur makadados ukuman pabuat dosanipune punika, ipun patut ngaturang aturan biri-biri wiadin kambing lua ring ayun Ida Sang Hyang Widi Wasa. Sang pandita patut ngaturang aturane punika pabuat dosan anake punika.

⁷

Yening anake punika nenten mrasidayang ngaturang aturan biri-biri wiadin kambing, ipun patut ngaturang paksi dara wiadin kukur apacek ring ayun Ida Sang Hyang Widi Wasa, buat nebus dosanipune. Paksine asiki pabuat aturan panyupat dosa, miwah sane malih asiki pabuat aturan maborbor.

⁸ Paksi-paksi aturane punika patut katurang ring sang pandita, tur pinih riin sang pandita patut ngaturang pabuat pangampuraning dosa. Dane patut ngelung baong paksine punika, nangingke tenggekipune sampunang ngantos pegat.

⁹ Getih ipune kaketisang akidik ring sisin pamorboran aturane. Sisan getihne patut kabriokang ring bongkol pamorboran aturan punika. Punika aturan pabuat molih pangampuraning dosa.

¹⁰ Sasampune punika wau dane patut ngaturang paksine lianan makadados aturan maborbor, manut pidabdab sane sampun biasa mamargi. Kadi asapunika patutnya sang pandita ngaturang aturan pabuat anake madosa punika tur Ida Sang Hyang Widi Wasa pacang ngampurayang dosannyane.

¹¹

Yening anake punika nenten mrasidayang ngaturang paksi dara wiadin kukur apacek, ipun patut ngaturang tepung akilo makadados aturan panyupat dosa. Tepunge punika nenten dados kadagingin minyak saitun wiadin menyan, santukan aturane punika aturan panyupat dosa, boyaja aturan sesajen.

¹² Aturane punika patut katurang ring sang pandita. Sang pandita patut ngambil tepunge punika agemel makadados cihna mungguing tepunge punika makasami sampun katurang ring Ida Sang Hyang Widi Wasa. Sang pandita tumuli morbor tepung aturane sakadi aturan rayunan. Punika aturan pabuat panyupat dosa.

¹³ Kadi asapunika patutnya sang pandita ngaturang aturan pabuat dosan anake punika, tur Ida Sang Hyang Widi Wasa pacang ngampurayang dosanipune. Sisan tepunge punika dados pikolih sang pandita, pateh sakadi indik aturan sesajene.

¹⁴

Ida Sang Hyang Widi Wasa maicayang pidabdabe sane ring sor puniki ring Dane Musa.

¹⁵ Yening wenten anak sane nenten nyelapang ngardi dosa, uli krana ipun lenga ngaturang aturanipune sane suci pamantuka ring Ida Sang Hyang Widi Wasa, ipun patut makta aturan panaur danda ring Ida Sang Hyang Widi Wasa. Aturannyane punika patut marupa biri-biri wiadin kambing muani sane tan paceda. Pangargan aturane punika patut katetepang manut patokan sane resmi.

¹⁶ Ipun patut naur pabuat aturan sane sampun lemenahang ipun, saha kawewehin malih apahliman saking sane lemenahang ipun punika. Aturan panaur danda punika patut aturang ipun ring sang pandita, tur sang pandita patut ngaturang aturan wewalungan makadados aturan pabuat dosan anake punika, tur Ida Sang Hyang Widi Wasa pacang ngampurayang dosannyane.

¹⁷

Yening wenten anak nenten nyelapang ngardi dosa malantaran ipun mamurug salah tunggal pituduh Ida Sang Hyang Widi Wasa, anake punika taler iwang tur ipun patut keni danda.

¹⁸ Ipun patut ngaturang biri-biri wiadin kambing muani sane tan paceda ring ajeng sang pandita, makadados aturan panaur danda. Pangargan aturane punika patut katetepang manut patokan sane resmi. Sang pandita patut ngaturang aturane punika pabuat dosan anake punika. Irika Ida Sang Hyang Widi Wasa pacang ngicen ipun pangampura.

¹⁹ Aturane punika makadados aturan panaur danda pabuat dosa sane sampun kardi ipun pamantuka ring Ida Sang Hyang Widi Wasa.

6

¹

Ida Sang Hyang Widi Wasa maicayang pidabdabe sane ring sor puniki ring Dane Musa.

² Yening wenten anak ngardi dosa pamantuka ring Ida Sang Hyang Widi Wasa, malantaran ipun nenten nyak ngwaliang barang sane katitipang ring ipun antuk sesamannyane wong Israel, wiadin malantaran mamaling barang sesamannyane, wiadin malantaran nguluk-uluk sesamanipune,

³ wiadin malantaran ipun nenten ngaku ngeniang barange sane sampun ical tur masumpah mungguing ipun nenten wenten ngeniang barange punika, ipun patut ngaturang aturan panaur danda.

⁴ [4-5] Ipun patut ngwaliang napija sane sampun keniang ipun malantaran cara sane nenten jujur. Ring rahina ipun kuningin iwang punika, ipun patut ngwaliang sategepipun ring sang sane nruenang barange punika, samaliha patut kawewehin malih apahliman.

⁵

⁶ Ipun taler patut ngaturang biri-biri wiadin kambing muani sane tan paceda ring ajeng sang pandita, makadados aturan panaur danda pamantuka ring Ida Sang Hyang Widi Wasa. Pangargan aturane punika katetepang manut ring patokan sane resmi.

⁷ Sang pandita patut ngaturang aturan punika pabuat dosan anake punika, irika Ida Sang Hyang Widi Wasa pacang ngampurayang dosannyane.

⁸

Ida Sang Hyang Widi Wasa nitahang ring Dane Musa,

⁹ mangda dane ngrauhang ring Dane Harun miwah paraputran danene, indik pidabdab aturane sane maborbor. Aturane sane maborbor punika patut kabanggayang ring pamorboran aturane awengi mepek, tur geninnyane mangda tetep kantun ngendih.

¹⁰ Sasampune punika sang pandita ngrangsuk jubah miwah jaler lenen raris ngambil abu sane madaging muluk sane kantun ring pamorboran aturane punika raris kagenahang ring sisin pamorboran aturane punika.

¹¹ Sasampune punika dane patut nyalinin busanan danene, tumuli ngambil abune punika kabakta ka genahe sane kasuciang sane wenten ring jaban pakemahane.

¹² Genine sane ring pamorboran aturane punika patut setata ngendih, tur sampunang pisan naenin padem. Nyabran semengan sang pandita patut ngimbuhin saang ring pamorboran aturane punika, saha nabdabang aturane sane maborbor irika miwah morbor muluk aturan karahayuane punika.

¹³ Genine ring pamorboran aturane punika patut setata ngendih tur nenten kengin kabanggayang padem.

¹⁴

Sane inucap ring sor puniki, pidabdab indik aturan sesajen. Sang pandita katurunan Dane Harun, sane patut ngaturang aturan sesajen pamantuka ring Ida Sang Hyang Widi Wasa ring arepan pamorboran aturane.

¹⁵ Sasampune punika dane patut ngambil tepunge punika agemel miwah minyak lan menyan sane ring tepunge punika tumuli kaborbor ring pamorboran aturane makadados cihna mungguing aturane punika makasami sampun katur pamantuka ring Ida Sang Hyang Widi Wasa. Ambun aturane punika ngawinang ledang pakayun Ida Sang Hyang Widi Wasa.

¹⁶ [16-17] Sisannyane patut kajengang antuk parapanditane. Tepunge punika patut kapanggang kanggen roti tan paragi tur kajengang antuk sang pandita ring genahe sane suci, inggih punika ring natar Kemah Linggih Ida Sang Hyang Widi Wasa. Ida Sang Hyang Widi Wasa sampun maicayang punika ring parapanditane makadados eduman danene sajeroning aturan rayunane punika. Aturane punika kalintang suci, tan bina sakadi aturan panyupat dosa, miwah aturan panaur danda punika.

¹⁷

¹⁸ Pabuat sapanglanturipun sawatek katurunan Dane Harun sane lanang kengin ngajengang rotine punika. Punika makadados eduman danene sane tetep saking sakancan aturan rayunane sane katurang ring Ida Sang Hyang Widi Wasa. Anake sane ngusud aturan rayunane sane sampun katurang, pacang keni sengkala ulihan kakuatan kasucian aturane punika.

¹⁹

Ida Sang Hyang Widi Wasa maicayang ring Dane Musa, pidabdab sane inucap ring sor puniki, inggih punika,

²⁰ indik maduijatiang pandita katurunan Dane Harun. Ring rahinan danene kaduijatiang, dane patut ngaturang tepung gandum akilo pamantuka ring Ida Sang Hyang Widi Wasa, (asah ring aturan sesajen sane katurang nyabrah rahina), atenga katurang rikala semeng atenga rikalaning sore.

²¹ Tepung gandume punika patut kadukin minyak, raris kapanggang ring pamanggangane tur sasampune punika raris kenyagang, tumuli katurang dados aturan sesajen, ambunnyane ngawinang ledang pakayunan Ida Sang Hyang Widi Wasa.

²² Ring masa-masa sane jaga rauh, salami-laminipun, sawatek katurunan Dane Harun, sane madeg dados Pandita Agung patut ngaturang aturan sane kadi asapunika. Aturane punika patut kaborbor makasami, makadados aturan pamantuka ring Ida Sang Hyang Widi Wasa.

²³ Aturan sesajen sane katurang antuk sang pandita punika nenten pisan dados kajengang, makasami patut kaborbor.

²⁴

Ida Sang Hyang Widi Wasa nitahang ring Dane Musa,

²⁵ mangda maicayang pidabdab indik aturan panyupat dosa, ring Dane Harun miwah paraputran danene. Wewalungan sane kanggen aturan panyupat dosa, patut katampah ring sisi kaler pamorboran aturane, ring genah anake nampah wewalungan pabuat aturan sane maborbor. Punika aturan sane kalintang suci.

²⁶ Sang pandita sane ngaturang aturan wewalungane punika patut ngajengang aturane punika ring genahe sane suci, inggih punika ring natar Kemah Linggih Ida Sang Hyang Widi Wasa.

²⁷ Sapasiraja wiadin punapija sane ngantug aturane punika, jaga keni sengkala malantaran kakuatan kasucian aturan punika. Yening wenten pangangge wiadin barang sane keni kecritan getih wewalungane punika, pangangge wiadin barange punika patut kumbah ring genahe sane suci.

²⁸ Sakancan payuk tanah sane kanggen nglablab ulam aturane punika patut kabelahang. Tur yening sane kanggen punika payuk temaga, payuke punika patut kasutsut tur kumbah antuk toya.

²⁹ Sakancan kulawargan sang pandita sane lanang kalugra ngrayunang aturane punika; aturane punika kalintang suci.

³⁰ Nanging sakancan wewalungane sane getihnyane kabakta ka jeroan Kemah Sucine, tur kagunayang sajeroning upacara buat ngampurayang dosa, wewalungane punika nenten patut kajengang. Punika patut kaborbor.

7

¹

Puniki pidabdab pabuat aturan panaur danda, aturan sane kalintang suci.

² Wewalungan sane kanggen pabuat aturane punika, patut katampah ring sisi kaler pamorboran aturane, ring genah anake nampah wewalungan sane kanggen aturan maborbor, tur getihnyane patut kabriokang ring sisin pamorboran aturane makaileh.

³ Muluknyane makasami patut kambil tur katurang ring pamorboran aturane inggih punika: muluknyane, muluk sane ngaput jeroannyane,

⁴ ginjel miwah muluk sane wenten ring ginjelnyane punika, miwah bagian ati sane pinih becik.

⁵ Sang pandita patut morbor muluke punika makasami ring pamorboran aturane makadados aturan rayunan pamantuka ring Ida Sang Hyang Widi Wasa. Punika aturan pabuat panaur danda.

⁶ Sawatek anak lanang sane dados kulawargan sang pandita dados ngajengang ulam aturane punika, nangingke patut kajengang ring genahe sane suci, santukan aturane punika kalintang suci.

⁷

Pidabdab sane kanggen ring aturan panyupat dosane pateh ring pidabdabe sane kanggen ring aturan panaur dandane, inggih punika ulam wewalungan aturane punika dados pikolih sang pandita sane ngantebang aturane punika.

⁸ Kulit wewalungane sane katurang dados aturan maborbor punika pikolih sang pandita sane ngantebang aturane punika.

⁹ Sakancan aturan sesajen sane sampun kanyanyah ring panyanyahan wiadin karatengang ring pangorengane wiadin sane mapanggang, punika dados pikolih sang pandita sane ngantebang aturane punika ring ayun Ida Sang Hyang Widi Wasa.

¹⁰ Nanging sakancan aturan sesajen sane nenten maratengang, sane madukan minyak wiadin sane tuh, punika dados eduman parapandita katurunan Dane Harun, tur patut kadumang asah ring pantaran danene.

¹¹

Puniki pidabdab indik aturan karahayuan sane katurang pamantuka ring Ida Sang Hyang Widi Wasa.

¹² Yening wenten anak ngaturang aturan pabuat ngaturang panyuksma ring Ida Sang Hyang Widi Wasa, sinarengan ring aturan wewalungane punika, ipun patut taler ngaturang roti sane tan madaging ragi. Rotine punika kengin tebel, sane kakardi antuk tepung sane kadukin antuk minyak saitun, wiadin dados taler roti tipis sane kolesin minyak, wiadin sanganan sane malakar antuk tepung sane madukan minyak saitun.

¹³ Samaliha makadados wewehannyane, anake punika patut taler ngaturang roti sane madaging ragi.

¹⁴ Saking wewarnaning roti punika ipun patut ngaturang apahan minakadi dados aturan sane kasuciang pabuat Ida Sang Hyang Widi Wasa. Aturane punika dados pikolih sang pandita sane mriokang getih wewalungane ring pamorboran aturane.

¹⁵ Ulam wewalungane punika patut kajengang ring rahinane punika ugi, inggih punika rahina daweg wewalungane punika katurang. Nenten pisan dados kantun makabenjang semengane.

¹⁶

Yening wenten anak ngaturang aturan karahayuan buat naur sesangi wiadin aturan saking suka lilaning manah, nentenja makasami aturane punika patut kajengang ring rahinane punika, nanging yening wenten sisanipun, punika dados kajengang benjangipun.

¹⁷ Yening ring rahinane sane kaping tiganipun ulame taler kantun, ulame punika katunjel.

¹⁸ Nanging yening sisan ulame punika taler kajengang ring rahina sane kaping tiganipun, Ida Sang Hyang Widi Wasa nenten nampi aturan anake punika. Aturane punika nenten dados merta pabuat anake sane ngaturang, nanging kanggep leteh, tur sapasiraja sane nunas aturane punika, ipun jaga nampi palanipun.

¹⁹ Ulame punika patut kaborbor sami, tan pisan kengin kajengang yening ulame punika keni satunggaling barang sane kanggep leteh manut sopacaraning agama. Wantah anak sane suci manut sopacaraning agama sane kengin ngajengang ulam aturan karahayuane punika.

²⁰ Yening anak leteh manut sopacaraning agama nunas ulame punika, ipun nenten malih ketang dados kaulan Ida Sang Hyang Widi Wasa.

²¹ Kadi asapunika taler yening wenten anak sane nunas ulam aturane punika, sasampun ipun ngusud barang sane leteh manut sopacaraning agama, yadian jadma wiadin wewalungan sane leteh, ipun nenten malih patut ketang dados kaulan Ida Sang Hyang Widi Wasa.

²²

Ida Sang Hyang Widi Wasa maicayang pidabdabe sane inucap ring sor puniki ring Dane Musa,

²³ pabuat bangsa Israel. Saananing muluk banteng, biri-biri wiadin kambing tan dados kajengang.

²⁴ Muluk wewalungan sane padem wiadin sane kasarap antuk sato sane galak nenten dados kajengang, nanging dados kagunayang buat kaperluan sane lianan.

²⁵ Sapasiraja sane ngajengang muluk wewalungan sane patut katurang pamantuka ring Ida Sang Hyang Widi Wasa, anake punika patut nenten ketang malih dados kaulan Ida Sang Hyang Widi Wasa.

²⁶ Yadiastun ring dijaja bangsa Israele magenah, ipun nenten dados nunas getih paksi wiadin wewalungan.

²⁷ Sapasiraja sane mamurug pidabdabe punika, ipun tan patut malih ketang dados kaulan Ida Sang Hyang Widi Wasa.

²⁸

Ida Sang Hyang Widi Wasa maicayang ring Dane Musa pidabdabe puniki,

²⁹ pabuat bangsa Israel. Sapasiraja ngaturang aturan karahayuan, ipun patut ngaturang abagian saking aturanipune punika pamantuka ring Ida Sang Hyang Widi Wasa,

³⁰ tur aturane punika patut ipun niri sane makta, makadados aturan rayunan. Ipun patut ngaturang muluk wewalungan punika, miwah tangkahnyane tur katurang dados aturan istimewa ring ayun Ida Sang Hyang Widi Wasa.

³¹ Sang pandita patut morbor muluke punika ring pamorboran aturane, nanging tangkahe dados eduman sang pandita.

³² Paan wewalungane sane di kenawan durian patut kaserahang dados aturan istimewa,

³³ ring dane sang pandita sane ngaturang getih miwah muluk aturan karahayuan punika.

³⁴ Tangkah miwah paan wewalungane sane kenawan durian punika dados aturan istimewa sane sampun kambil antuk Ida Sang Hyang Widi Wasa saking bangsa Israele, tur kapaicayang ring sang pandita. Punika sane patut katurang ring sang pandita antuk bangsa Israele salami-laminipun.

³⁵ Punika dados duman rayunan sane kapaicayang antuk Ida Sang Hyang Widi Wasa ring Dane Harun miwah paraputran danene, ring rahina daweg dane kamanggehang dados pandita.

³⁶ Duk punika Ida Sang Hyang Widi Wasa nitahang ring bangsa Israel, mangda saking aturan sane bakta ipun, paa miwah tangkah aturan wewalungane patut katurang ring sang pandita. Pidabdabe puniki patut kamanggehang antuk bangsa Israele salami-laminipun.

³⁷

Dadosipun kadi asapunika pidabdab buat aturan sane maborbor, aturan sesajen, aturan panyupat dosa, aturan panaur danda, aturan maduijati, miwah aturan karahayuan.

³⁸ Irika ring Gunung Sinai, ring tegal melakange, Ida Sang Hyang Widi Wasa maicayang pituduhe punika ring Dane Musa, inggih punika ring rahina daweg Ida ngandikayang bangsa Israele ngaturang aturanipune ring Ida Sang Hyang Widi Wasa.

8

¹

Ida Sang Hyang Widi Wasa ngandika ring Dane Musa sapuniki:

² “Ajakja I Harun muah pianak-pianaknyane ka arep gapuran Kemah Linggih Ulune, tur abaja busana kapanditane, lengis upacara, godel sampi jagiran aukud buat aturan panyupat dosa, biri-biri muani dadua muah kranjang misi roti ane tan paragi.

³ Sasubane keto tunden bangsa Israele makejang pada mapunduh ditu.”

⁴

Dane Musa tumuli nglaksanayang sapatitah Ida Sang Hyang Widi Wasa. Rikala bangsane punika pada sampun mapunduh,

⁵ dane raris ngandika ring pasamuane sapuniki: “Paindikan sane jaga margiang tiang mangkin puniki, inggih punika paindikan sane sampun kapituduhang antuk Ida Sang Hyang Widi Wasa.”

⁶

Dane Musa tumuli ngajak Dane Harun miwah paraputran danene ngarepang tur ngandikayang mangda dane ngamargiang upacara masuci.

⁷ Sasampune punika Dane Harun raris karangsukin busana, inggih punika kawaca miwah jubah, miwah wangkong danene kapepetetin. Dane taler karangsukin epod, epode punika kaseetang ring wangkong danene.

⁸ Dane kasalukin tabeng dada sane ring tengahnyane madaging Urim miwah Tumim.

⁹ Duur danene kasalukin sorban tur sorbane punika kadagingin rerenggan mas, makacihna mungguing Dane Harun sampun dados padruen Ida Sang Hyang Widi Wasa. Punika makasami kamargiang antuk Dane Musa anut ring pituduh Ida Sang Hyang Widi Wasa ring dane.

¹⁰

Sasampune punika Dane Musa raris ngambil minyak upacarane punika, tur kolesang ring Kemah Linggih Ida Sang Hyang Widi Wasa miwah ring saluiring prabot sane wenten ring jeroan kemahe punika. Malantaran punika dane ngaturang makasami ring Ida Sang Hyang Widi Wasa.

¹¹ Dane tumuli ngambil minyak upacarane punika akidik raris kaketisang ping pitu ring pamorboran aturane miwah ring saananing prabotnyane, miwah ring jambangan pawasuhane rauh ka dasarnyane. Malantaran kadi asapunika dane ngaturang prabote punika makasami ring ayun Ida Sang Hyang Widi Wasa.

¹² Sasampune punika dane nglantik Dane Harun malantaran mriokang minyak upacara akidik ring duur danene.

¹³ Wusan punika, Dane Musa ngajak paraputran Dane Harun ngarepang tur kasalukin kawaca, pepetet ring wangkongnyane, miwah topin pandita ring duurnyane suang-suang manut ring sane sampun kasabdayang antuk Ida Sang Hyang Widi Wasa ring dane.

¹⁴

Sasampune punika godel banteng jagirane punika raris kabakta antuk Dane Musa, kanggen aturan panyupat dosa, tur Dane Harun miwah paraputran danene ngambel tenggek bantenge punika.

¹⁵ Bantenge punika raris katampah antuk Dane Musa, tur getihipune kambil akidik, raris kolesang ring tanduk-tanduke sane wenten ring bucu-bucun pamorboran aturane, mangda malantaran punika pamorboran aturane punika kantebang dados padruen Ida Sang Hyang Widi Wasa. Sisan getihe punika raris kabriokang ring dasar pamorboran aturane. Malantaran punika dane ngaturang tur nyuciang pamorboran aturan punika.

¹⁶ Dane Musa tumuli ngambil saananing muluk sane wenten ring jejeron bantenge punika. Dane taler ngambil sane pinih becik saking atinnyane, ginjel miwah muluk sane wenten ring ginjelnyane, tumuli kaborbor ring pamorboran aturane.

¹⁷ Sisan bantenge punika rauh ka kulitipune, daging miwah jejeronnyane, tumuli katunjel ring jabaan pakemahane, sakadi sane kapituduhang antuk Ida Sang Hyang Widi Wasa.

¹⁸

Wusan punika Dane Musa tumuli makta biri-birine muani sane kanggen aturan maborbor, tur Dane Harun miwah paraputran danene ngambel tenggek biri-birine punika.

¹⁹ Dane Musa raris nampah biri-birine punika, tur getihipune kasriokang ring sisin pamorboran aturan punika makaileh.

²⁰ [20-21] Biri-birine muani punika raris kapukang-pukang, jejeron miwah batisne durian kumbah antuk toya, tur tenggek, muluk miwah sisan biri-birine punika makasami kaborbor ring pamorboran aturane, sakadi sane sampun kapituduhang antuk Ida Sang Hyang Widi Wasa. Aturan sane maborbor punika makadados aturan rayunan tur ambunnyane ngledangin pakayunan Ida Sang Hyang Widi Wasa.

²¹

²²

Sasampune punika Dane Musa raris makta biri-biri muani sane lianan, inggih punika biri-biri pabuat aturan palantikan panditane punika, tur Dane Harun miwah paraputran danene tumuli ngambel tenggek biri-birine punika.

²³ Dane Musa tumuli nampah biri-birine punika, tumuli dane ngambil getihnyane akidik, raris kolesang ring daun karnan Dane Harun sane tengen, ring inan tangan danene sane tengen, miwah ring inan cokor danene sane tengen.

²⁴ Sasampune punika paraputran Dane Harun raris kapangandikayang ngarepang tur Dane Musa raris ngolesang getih ring daun karnan danene sane ring tengen, ring inan tangan danene sane ring tengen miwah ring inan cokor danene ring tengen. Sisan getihe punika raris kasriokang antuk Dane Musa ring sisin genah aturane punika makaileh.

²⁵ Muluk ipune, ikuh sane madaging muluk, muluk sane ngaput jejeronnyane makasami, bagian ati sane pinih becik, ginjel miwah muluk sane wenten ring ginjel punika, buntutipune sane tengawan durian, punika kambil antuk Dane Musa.

²⁶ Sasampune punika dane raris ngambil roti sane tan paragi saking kranjange, sane katurang ring ayun Ida Sang Hyang Widi Wasa, roti sane madaging minyak saitun asiki, miwah roti kering asiki. Makasami punika genahang dane ring duur muluk miwah buntut aturan wewalungan sane tengawan punika.

²⁷ Makasami aturane punika raris genahang dane ring tlapakan tangan Dane Harun miwah ring tlapakan tangan putra-putran danene, tumuli katurang dados aturan sane istimewa ring ayun Ida Sang Hyang Widi Wasa.

²⁸ Sawusan punika Dane Musa raris ngambil aturane punika saking tangan Dane Harun miwah saking tangan paraputran danene tumuli kaborbor ring pamorboran aturane, ring duur aturane sane maborbor, makadados aturan palantikan sang pandita. Punika aturan rayunan, tur ambunnyane ngledangin pakayunan Ida Sang Hyang Widi Wasa.

²⁹ Sasampune punika Dane Musa tumuli ngambil tangkah biri-birine punika, tumuli katurang dados aturan istimewa ring ayun Ida Sang Hyang Widi Wasa. Punika dados eduman Dane Musa saking biri-biri aturan palantikane punika. Dane Musa nglaksanayang paindikane punika makasami saadung ring sane sampun kapituduhang antuk Ida Sang Hyang Widi Wasa.

³⁰

Dane Musa tumuli ngambil minyak upacarane miwah getih akidik sane wenten ring duur pamorboran aturane punika, tumuli kaketisang ring ragan Dane Harun miwah paraputran danene, miwah ring busanan danene sareng sami. Malantaran punika dane ngaturang Dane Harun miwah paraputran danene, ping kalih busanan danene sareng sami, ring ayun Ida Sang Hyang Widi Wasa.

³¹

Dane Musa raris mabaos ring Dane Harun miwah ring paraputran danene sapuniki: “Rarisang bakta ulame punika ring ajeng gapuran Kemah Linggih Ida Sang Hyang Widi Wasa tur ratengangja irika, tur ajengang irika sasarengan ring roti aturan palantikane sane wenten ring kranjange, sakadi sane kapituduhang antuk Ida Sang Hyang Widi Wasa.

³² Tur sisan roti miwah daginge punika rarisang tunjel.

³³ Semeton sampunang pisan matilar saking gapuran Kemah Linggih Ida Sang Hyang Widi Wasa pitung rahina suenipun, kantos upacara palantikan semetone puput makasami, wau dados mapamit.

³⁴ Ida Sang Hyang Widi Wasa nitahang ring iraga, mangda iraga nglaksanayang paindikane sane sampun laksanayang iraga ring rahinane puniki mangda dosa-dosan semetone kampurayang.

³⁵ Semeton patut meneng ring gapuran Kemah Linggih Ida Sang Hyang Widi Wasa rahina wengi, pitung rahina suenipun, sinambi nglaksanayang sane sampun kapituduhang antuk Ida Sang Hyang Widi Wasa. Yening semeton nenten nglaksanayang paindikane punika, semeton pacang padem. Paindikane punika sane sampun kasabdayang antuk Ida Sang Hyang Widi Wasa ring tiang.”

³⁶ Dane Harun miwah paraputran danene raris nglaksanayang saluiring sane kapituduhang antuk Ida Sang Hyang Widi Wasa malantaran Dane Musa.

9

¹

Sasampune jangkep pitung rahina suenipun upacara palantikan punika mamargi, benjangipun Dane Musa maumang Dane Harun sareng paraputran danene miwah parapamimpin bangsa Israele.

² Dane Musa mabaos ring Dane Harun, sapuniki: “Ambilja godel banteng jagiran asiki miwah biri-biri muani asiki sane tan paceda, tumuli aturang ring ayun Ida Sang Hyang Widi Wasa inggih punika: banteng jagirane pabuat aturan panyupat dosa, miwah biri-birine muani pabuat aturan maborbor.

³ Sasampune punika dane ngandikayang bangsa Israele ngambil kambing muani asiki pabuat aturan panyupat dosa, miwah godel banteng lan panak biri-biri sane tan paceda sane matuuh wau ataun pabuat aturan maborbor.

⁴ Samaliha pabuat aturan karahayuan, ipun patut makta banteng jagiran asiki miwah biri-biri muani asiki. Makasami punika patut katurang ring ayun Ida Sang Hyang Widi Wasa, sasarengan ring aturan sesajen sane madaging minyak. Ipun patut nglaksanayang paindikane punika santukan Ida Sang Hyang Widi Wasa mapakayunan mapakantenang raga ring ipun ring rahinane puniki.”

⁵

Saananing sane kapituduhang antuk Dane Musa makasami kabakta ring ajeng Kemah Sucine, tur pasamuane makasami pada mapunduh irika, nyumbah Ida Sang Hyang Widi Wasa.

⁶ Dane Musa tumuli ngandika sapuniki: “Ida Sang Hyang Widi Wasa mituduhang semeton nglaksanayang paindikane punika makasami, mangda semeton mrasidayang ngeton sinar teja wedanan Idane sane dumilah.”

⁷ Sasampune punika dane raris mabaos ring Dane Harun sapuniki: “Mrikija ka pamorboran aturane, rarisangja aturang aturan panyupat dosa miwah aturan maborbor mangda dosan semetone miwah dosan rakyate sami kampurayang antuk Ida Sang Hyang Widi Wasa. Aturangja aturane punika makasami buat ngampurayang dosan rakyate sami, sakadi sane sampun kapituduhang antuk Ida Sang Hyang Widi Wasa.”

⁸

Dane Harun raris lunga ka pamorboran aturane tumuli nampah godel banteng sane kacawisang pabuat aturan panyupat dosan danene ngraga.

⁹ Paraputran danene raris ngaturang getih bantenge punika ring dane tur dane nyelebang jrijin tangan danene ring getihe punika tumuli kolesang ring tanduk-tanduke sane wenten ring bucu-bucun pamorboran aturane, miwah sisanipun raris kabriokang ring dasar pamorboran aturane punika.

¹⁰ Muluk, ginjel miwah bagian atinnyane sane pinih becik raris borbor dane ring pamorboran aturane, sakadi sane sampun kapituduhang antuk Ida Sang Hyang Widi Wasa ring Dane Musa.

¹¹ Nanging ulam miwah kulit bantenge punika tunjel dane ring jabaan pakemahane.

¹²

Dane raris nampah wewalungane sane kacawisang dados aturan maborbor pabuat ragan danene ngraga. Paraputran danene raris ngaturang getih wewalungane punika ring dane, raris kabriokang ring sisin pamorboran aturane punika makaileh.

¹³ Wusan punika paraputran danene raris ngaturang tenggek miwah pukangan wewalungane sane lianan ring dane raris borbor dane ring pamorboran aturane.

¹⁴ Sasampune punika jejeron miwah buntut wewalungane sane durian punika raris umbahin dane, tumuli kaborbor ring pamorboran aturane, ring duur sisan aturane sane maborbor punika.

¹⁵

Sawusan punika dane raris ngaturang aturan rakyate makasami. Dane raris ngambil kambing sane kanggen aturan pabuat panyupat dosan rakyate, tumuli katampah, raris katurang sakadi sane sampun margiang dane daweg dane ngaturang aturan panyupat dosa pabuat ragan danene ngraga.

¹⁶ Raris dane taler ngambil wewalungan sane jaga kanggen aturan maborbor, saha katurang manut ring sopacarannyane.

¹⁷ Dane raris ngaturang aturan sesajen, dane ngambil tepung agemel raris kaborbor ring pamorboran aturane. (Puniki dados wewehan aturan maborbor sane katurang nyabran rahina.)

¹⁸ Dane raris nampah banteng miwah biri-birine muani makadados aturan karahayuan pabuat rakyate sami. Paraputran danene raris ngaturang getihnyane ring dane, raris briokang dane ring sisin pamorboran aturane makaileh.

¹⁹ Dane Harun raris ngenahang saananing muluk banteng miwah biri-birine punika,

²⁰ ring duur tangkah wewalungane punika makakalih, tumuli kabakta ka pamorboran aturane. Muluke punika raris borbor dane ring pamorboran aturane.

²¹ Tangkah miwah batisnyane sane durian aturang dane dados aturan istimewa pabuat Ida Sang Hyang Widi Wasa, pabuat sang pandita sakadi sane sampun kapituduhang antuk Dane Musa.

²²

Sasampune Dane Harun puput ngaturang aturane punika makasami, dane raris ngangkat tangan danene sarwi ngamertanin rakyate sareng sami. Sasampune punika dane raris tedun.

²³ Sapangrarisipun Dane Musa miwah Dane Harun raris ngranjing ka Kemah Linggih Ida Sang Hyang Widi Wasa, tur ritatkala dane medal saking irika, dane ngamertanin rakyate, tumuli sinar tejan Ida Sang Hyang Widi Wasa sane dumilah, kakantenang antuk rakyate makasami.

²⁴ Tan dumade Ida Sang Hyang Widi Wasa raris nedunang geni saha ngeseng aturane sane maborbor miwah sakancan muluke sane wenten ring pamorboran aturane. Riwau rakyate ngatonang indike punika ipun sareng sami raris masuryak tur sumungkem nyumbah Ida Sang Hyang Widi Wasa, ngantos muanipune nganteg ka tanahe.

10

¹

Sedek rahina anu putran Dane Harun, Dane Nadab miwah Abihu, raris ngambil pasepan danene suang-suang tumuli kadagingin baa miwah menyan raris katurang ring ayun Ida Sang Hyang Widi Wasa. Nanging genine punika nenten suci, santukan Ida Sang Hyang Widi Wasa nenten mituduhang dane ngaturang pasepane punika.

² Tan dumade Ida Sang Hyang Widi Wasa raris nedunang geni, sane ngeseng dane sareng kalih ngantos seda irika ring ayun Ida Sang Hyang Widi Wasa.

³ Sasampune punika Dane Musa raris mabaos ring Dane Harun, sapuniki: “Puniki paindikan sane sampun kasabdayang antuk Ida Sang Hyang Widi Wasa, ritatkala Ida masabda sakadi asapuniki: ‘Sawatek anake ane ngancangin Ulun ia patut ngluihang kasucian Ulune. Ulun lakar nyinahang kaluihan Ulune teken kaulan Ulune.’ ” Nanging Dane Harun meneng kewanten.

⁴

Dane Musa raris mabaos ring Dane Misael miwah Dane Elsapan okan Dane Usiel pernah paman Dane Harun, sarwi ngandika ring dane sapuniki: “Maija paman gosongja sawan kaponakan pamane uli Kemah Sucine, tur pejangja di jabaan pakemahane.”

⁵ Duaning punika dane sareng kalih raris ngosong sawane sami rauh panganggennyane kabakta ka jabaan pakemahane, sakadi sane sampun kapangandikayang antuk Dane Musa.

⁶

Sasampune punika Dane Musa tumuli ngandika ring Dane Harun miwah paraputran danene, Dane Eleasar miwah Itamar, sapuniki: “Sampunangja semeton manggayang rambut semetone nenten masuahin tur sampunang mesbes kawaca sane makacihna semeton pada sungsut. Yening semeton kadi asapunika, semeton jaga seda, tur Ida Sang Hyang Widi Wasa jaga menggah piduka ring pasamuane makasami. Nanging semeton bangsa Israele makasami dados sedih kingking mangenang sang padem, sane kageseng antuk geni sane tedun saking Ida Sang Hyang Widi Wasa.

⁷ Sampunang semeton matilas saking gapuran Kemah Sucine mangda sampunang semeton seda, santukan semeton sampun kasuciang buat ngancangin Ida Sang Hyang Widi Wasa.” Duaning punika dane raris nglaksanayang sakadi sane sampun kapangandikayang antuk Dane Musa.

⁸

Ida Sang Hyang Widi Wasa raris ngandika ring Dane Harun sapuniki:

⁹ “Kita muah pianak-pianak kitane tusing pesan dadi macelep ka Kemah Sucine, sasubane kita nginem anggur wiadin arak, apanga eda kita mati. Pidabdabe ene patut kamanggehang baan katurunan kitane makejang.

¹⁰ Kita patut maminayang apa ane kasuciang buat Ida Sang Hyang Widi Wasa, muah apa ane dadi anggon ajak liu, buina encen ane suci muah encen ane leteh.

¹¹ Kita patut ngurukang sakancan bangsa Israele sakancan pidabdabe ane suba paicayang Ulun teken kita majalaran I Musa.”

¹²

Dane Musa raris mabaos ring Dane Harun miwah putran danene sane kantun nyeneng, inggih punika Dane Eleasar miwah Dane Itamar, sapuniki: “Ambilja aturan sesajen sane kantun ring aturan rayunan sane katurang ring Ida Sang Hyang Widi Wasa. Rarisang makarya roti tan paragi antuk tepunge punika, raris ajengang ring sisin pamorboran aturane, santukan aturane punika kalintang suci.

¹³ Ajengangja rotine punika ring genahe sane suci. Punika sane dados eduman semetone miwah oka-okan semetone, saking gandum sane katur ring Ida Sang Hyang Widi Wasa. Punika titah sane sampun kasabdayang antuk Ida Sang Hyang Widi Wasa ring tiang.

¹⁴ Nanging semeton miwah kulawargan semetone dados ngajengang tangkah miwah buntut wewalungan sane durian sane katurang dados aturan istimewa ring Ida Sang Hyang Widi Wasa, pabuat pikolih sang panditane. Semeton kengin ngajengang punika ring genah-genahe sane suci manut sopacaraning agama. Aturane punika sampun kapaicayang ring semeton miwah oka-okan semetone, makadados eduman semetone saking aturan karahayuan wong Israele.

¹⁵ Ipun sareng sami patut makta buntut sane durian, miwah wewalungane punika rikala muluknyane katurang makadados aturan rayunan ring ayun Ida Sang Hyang Widi Wasa. Bagiane punika dados pikolih semetone miwah oka-okan semetone salami-laminipun sakadi sane kapituduhang antuk Ida Sang Hyang Widi Wasa.”

¹⁶

Dane Musa raris nakenang kambinge sane pacang kanggen aturan panyupat dosa tur kuningayang ring dane mungguing aturane punika sampun maborbor. Indike punika ngawinang dane duka ring Dane Eleasar miwah Dane Itamar, tumuli ngandika sapuniki:

¹⁷ “Napi awinan semeton nenten ngajengang aturan panyupat dosane punika ring genahe sane suci? Aturane punika suci pisan, tur Ida Sang Hyang Widi Wasa sampun maicayang punika ring semeton mangda dosan bangsa Israele kampurayang.

¹⁸ Santukan getihnyane nenten kabakta ka jeroan Kemah Sucine, sapatutipun semeton ngajengang aturane punika ring genahe sane suci, sakadi sane sampun baosang tiang ring semeton.”

¹⁹

Dane Harun mabaos ring Dane Musa sapuniki: “Boyake bangsa Israele ring rahinane puniki sampun ngaturang aturan panyupat dosa miwah aturan maborbor ring Ida Sang Hyang Widi Wasa? Nanging yadiastu kadi asapunika bencanane puniki taler nibenin tiang. Yen menawi tiang sampun nunas aturan panyupat dosane punika ring rahinane puniki, janten taler Ida Sang Hyang Widi Wasa pacang nenten ledang ring kayun.”

²⁰ Riwau Dane Musa mireng indike punika dane rumasa liang.

11

¹

Ida Sang Hyang Widi Wasa maicayang pidabdabe sane menggah ring sor puniki ring Dane Musa miwah Dane Harun,

² buat karauhang ring bangsa Israele, kadi asapuniki: “Semeton dados ngajengang saananing wewalungan sane urip ring daatan,

³ sane kukunnyane masepak, tur ipun ngilag tetedanipune.

⁴ [4-6] Nanging semeton nenten dados ngajengang unta, kidang wiadin kelinci. Burone punika patut kanggep leteh santukan, yadiastun ipun ngilag tetedanipune nanging kukunipune nenten masepak.

⁵

⁶

⁷ Sampunang semeton ngajengang bawi. Bawine punika patut kabaos leteh. Yadiastun kukunipune masepak nanging ipun nenten ngilag tetedanipune.

⁸ Sampunang semeton ngajengang wiadin ngusud bangken burone sane kadi asapunika, santukan burone punika leteh.

⁹

Semeton dados ngajengang sakancan ulam sane masisik miwah makepes.

¹⁰ Sakancan ulame sane urip ring toyane, nanging nenten masisik wiadin makepes, punika nenten dados ajengang semeton.

¹¹ Ulame sane kadi asapunika patut kabaos leteh. Semeton nenten pisan dados ngajengang wiadin ngusud bangken ulame punika.

¹² Semeton nenten dados ngajengang saananing ulam sane urip ring toyane, sane nenten masisik miwah makepes.

¹³

[13-19] Semeton nenten pisan dados ngajengang sarwa paksi sane inucap ring sor puniki, inggih punika: Paksi rajawali, celepuk, sakancan soroh sikep, garuda, guak, paksi kasuari, kandik-kandik, kokokan, sakancan soroh cangak, paksi blibis, paksi kasa miwah lelawah.

¹⁴

¹⁵

¹⁶

¹⁷

¹⁸

¹⁹

²⁰

Sakancan soroh prani sane makampid punika makasami leteh,

²¹ sajawining sane uning makecos.

²² Semeton dados ngajengang balang, jangkrik, wiadin balang sane gadang.

²³ Nanging sakancan prani sane alit-alit sane makampid miwah sane ngrepe punika makasami patut kabaos leteh.

²⁴

[24-28] Sapasiraja ngusud bangken burone sane inucap ring sor puniki, ipun kawastanin leteh kantos rauh sore, inggih punika: buron sane makuku, sajawining yen kukunipune masepak tur ipun ngilag tetedanipune, miwah sakancan buron suku pat sane makuku buat anggen ipun ngehkeh. Sapasiraja makta bangken burone punika, ipun patut ngumbah panganggonipune, nanging kantos surup surya ipun kantun taler kabaos leteh.

²⁵

²⁶

²⁷

²⁸

²⁹

[29-30] Bikul, marunju, nyingnying miwah lelasan punika patut kabaos leteh.

³⁰

³¹ Sapasiraja ngusud burone punika wiadin bangkenipune, anake punika kabaos leteh ngantos surup suryane.

³² Yening bangkenipune punika nepen satunggaling barang, kenginan barange punika kabaos leteh. Yadiastun barange jaga kanggen napija, ipun kantun tetep leteh, tur patut kacelebang ring toyane, nanging yadiastun sampun kadi asapunika, barange punika kantun tetep leteh ngantos surup surya. Indike punika ngeniang ring barang-barang sane malakar antuk taru, wastra, blulang, wiadin kaping.

³³ Yening bangken burone punika ulung ka tengah payuk tanahe, sadaging payuke punika sami dados leteh, tur semeton patut ngencak payuke punika.

³⁴ Ajengan sane biasanipun sampun dados ajengang, nanging keni kasriokin antuk toya sane saking payuke iwau, ajengane punika kabaos leteh. Samaliha napija luire sane keni kinum saking payuke punika, makasami kabaos leteh.

³⁵ Napija luire sane katepen antuk bangken burone punika, makasami dados leteh. Anglo miwah pamanggangan sane malakar antuk tanah taler patut kencak.

³⁶ Sawatek sane keni bangken burone punika makasami dados leteh, sajawining toya klebutan wiadin semer. Sajeroning paindikan puniki, semer wiadin toya klebutane punika tetep kantun kabaos nirmala.

³⁷ Yening bangken burone punika nepen winih sane jaga kasambeh, winihe punika tan kawastanin leteh.

³⁸ Nanging yening winihe punika sedekan memem antuk toya, raris katepen antuk bangken burone punika, kenginan winihe punika kabaos leteh.

³⁹

Anake sane ngusud bangken buron sane dados ajengang, anake punika leteh ngantos surup surya.

⁴⁰ Anak sane nunas bangken burone punika, yadiastun napinipun kewantenja sane katunas, anake punika patut ngumbah panganggennyane, nanging yadian kadi asapunika ipun kantun tetep kawastanin leteh ngantos surup surya. Anak sane makta bangken burone punika, ipun patut ngumbah panganggenipune, nanging ipun kantun leteh ngantos kawengi.

⁴¹

Semeton nenten dados ngajengang buron alit sane magaang ring tanahe.

⁴² Yadian sane ngrayang wiadin mamargi punika masuku pat, wiadin masuku katah.

⁴³ Sampunangja semeton ngletehin ragan semetone, malantaran buron sane kadi asapunika.

⁴⁴ Sabdan Ida Sang Hyang Widi Wasa sapuniki: Ulun ene Sang Hyang Widi Wasa, Widin kitane. Sawireh keto nyatnainja dewek kitane apanga kita tetep suci sawireh Ulun suci.

⁴⁵ Ulun ene Sang Hyang Widi Wasa ane nantan kita rarud uli Mesir, apanga Ulun prasida dadi Widin kitane. Kita patut suci sawireh Ulun suci.

⁴⁶

Kenginan kadi asapunika pidabdab ngeniang indik sarwa buron miwah sarwa paksi, pingkalih ngeniang indik sarwa buron sane urip ring toyane miwah sane mamargi ring duur tanahe.

⁴⁷ Semeton patut celang maminayang, encen sane leteh, samaliha encen burone sane dados ajengang miwah sane encen nenten dados ajengang.”

12

¹

Ida Sang Hyang Widi Wasa maicayang pidabdabe sane inucap ring sor puniki ring Dane Musa,

² mangda karauhang ring bangsa Israele, kadi asapuniki: “Yening wenten anak istri ngembasang rare, tur rarene punika muani, kenginan anake istri punika leteh pitung rahina suenipun pateh sakadi ipun sebel ring awak.

³ Ring rahina sane kaping kutusipun, rarene punika patut kasunat.

⁴ Sasampune wusan ngembasang rare, anake istri punika patut kabaos leteh tigang dasa tiga rahina suenipun, santukan ipun sampun ngamedalang rah. Wusan punika wau ipun kabaos bersih. Sadurung wusan upacara pabresihanipune, anake istri punika nenten dados ngusud barang-barang sane suci tur nenten kalugra ngranjing ka Kemah Linggih Ida Sang Hyang Widi Wasa.

⁵

Yening wenten anak istri ngembasang rare tur rarene punika istri, ipun leteh patbelas rahina suenipun, pateh sakadi daweg ipune sebel ring dewek. Sasampune wusan ngembasang rare, anake istri punika kabaos leteh nem dasa nem rahina suenipun, santukan ipun sampun ngamedalang rah.

⁶

Yening upacara pabresihanipune sampun puput, yadiastun rare sane embasang ipun punika rare muani wiadin rare luh, anake punika patut ngaturang aturan ring ajeng sang pandita ring ajeng gapuran Kemah Linggih Ida Sang Hyang Widi Wasa. Aturane punika marupa panak biri-biri aukud sane matuuh ataun jaga kanggen aturan maborbor, miwah paksi kukur wiadin dara aukud buat aturan panyupat dosa.

⁷ Sang pandita patut ngaturang aturannyane punika ring ayun Ida Sang Hyang Widi Wasa, saha ngamargiang upacara pabresihan pabuat anake istri punika mangda ipun prasida bresih. Kenginan kadi asapunika indik sane patut kamargiang antuk anake istri sane wau wusan ngembasang rare.

⁸

Yening anake istri punika nenten mrasidayang ngaturang panak biri-biri, ipun patut ngaturang paksi kukur apacek, wiadin paksi dara apacek. Paksine punika asiki pabuat aturan maborbor miwah sane malih asiki buat aturan panyupat dosa. Sang pandita patut ngamargiang upacarane punika, mangda ipun prasida bresih.”

13

¹

Ida Sang Hyang Widi Wasa maicayang ring Dane Musa miwah ring Dane Harun pidabdab-pidabdab sane kadi asapuniki:

² Yening wenten anak keni pinakit ring kulitnyane, upaminipun magentil wiadin berung wiadin macebleng putih, sane nyidayang dados pinakit kulit sane raat, anake punika patut katangkilang ring ajeng sang pandita katurunan Dane Harun.

³ Sang pandita patut nureksain genah sane keni pinakit ring kulit anake punika. Yening bulun kulitnyane ring genahe punika putih, tur sane keni pinakit punika cekok, anake punika keni pinakit kulit sane raat. Kenginan sang pandita patut nyinahang mungguing anake punika leteh.

⁴ Nanging yening genahe sane keni pinakit punika putih warnanipune, tur nenten cekokan ring kulite sane tiosan tur bulunnyane taler nenten putih, sang pandita patut nganehang anake punika pitung rahina suenipun.

⁵ Ring rahina sane kaping pitu, sang pandita patut nureksain malih anake punika. Tur yen manut pamanggih sang pandita mungguing pinakit ipune pateh sakadi sane sampun-sampun, tur nenten nglinggahang, dane patut nganehang anake punika malih pitung rahina suenipun.

⁶ Ring rahina sane kaping pitu, sang pandita patut malih nureksain anake punika. Yening pinakitipune sampun rered tur nenten nglinggahang, sang pandita patut nyinahang mungguing anake punika bresih. Pinakitipune wantah pinakit sane nenten raat. Anake punika patut ngumbah panganggenipune, tur ipun kabaos bresih.

⁷ Nanging yening ipun kasinahang bresih antuk sang pandita, raris pinakitipune nglinggahang, anake punika patut malih tangkil ring sang pandita.

⁸ Sang pandita patut malih nureksain ipun. Yening wiakti pinakitipune punika sampun nglinggahang, anake punika patut kasinahang dados leteh. Ipun keni pinakit kulit sane raat.

⁹

Yening wenten anak keni pinakit kulit sane raat, ipun patut katangkilang ring ajeng sang pandita.

¹⁰ Sang pandita patut nureksain anake punika. Yening kulit sane keni pinakit punika putih rupanipune, tur bulunipune taler putih, samaliha kulite punika berung,

¹¹ punika mapiteges mungguing anake punika keni pinakit kulit. Sang pandita patut nyinahang mungguing anake punika leteh. Nenten perlu malih nganehang ipun, santukan sampun sinah mungguing ipun leteh.

¹² Yening sane macebleng putih punika nglinggahang, kantos nglikub anake punika saking batis ngantos rauh ka sirahipune,

¹³ sang pandita patut malih nureksain anake punika. Yening cingak dane mungguing pinakite punika sampun ngleplep ipun makaukud, tur kulitipune makasami dados putih, anake punika kasinahang dados bresih.

¹⁴ [14-15] Nanging yening ring genahe punika wetu berung, sang pandita patut malih nureksain ipun, tur yening wiakti punika berung, anake punika patut kasinahang dados anak leteh, santukan berunge punika nyinahang pinakit kulit sane raat.

¹⁵

¹⁶ Nanging yening berunge punika was, tur malih dados putih, anake punika patut tangkil malih ring ajeng sang pandita

¹⁷ mangda ipun malih katureksain. Yening sampun sinah mungguing berunge punika sampun dados putih, sang pandita patut nyinahang mungguing anake punika bresih.

¹⁸

Yening wenten anak keni busul, tur busulipune punika sampun was,

¹⁹ nanging ring laad busule punika wetu beseh sane putih warnanipune, wiadin macebleng putih masawang barak, anake punika patut tangkil ring ajeng sang pandita,

²⁰ mangda ipun katureksain. Yening ceblenge punika cekok, tur bulunipune taler sampun putih, sang pandita patut ngwastanin anake punika leteh. Busule punika makadados pangawit pinakit kulit sane raat.

²¹ Nanging rikala sampun katureksain antuk sang pandita sinah mungguing bulunipune ring ceblenge punika nenten putih, tur ring ceblengane punika nenten cekok, nanging warnanipune putihan ring sane lianan, sang pandita patut nganehang anake punika pitung rahina suenipun.

²² Yening ceblenge punika nglinggahang, sang pandita patut ngwastanin anake punika leteh, santukan ipun keni pinakit kulit sane raat.

²³ Nanging yening ceblenge punika nenten nglinggahang tur tetep sakadi jati mula, punika wantah laad busul kewanten, kenginan anake punika patut kawastanin bresih.

²⁴

Yening wenten anak kebus, tur kulitipune matatu, raris kulit sane ring tatunipune punika putih wiadin masawang barak,

²⁵ ipun patut katureksain antuk sang pandita. Yening bulun kulitnyane ring tatu punika putih, tur tatunnyane daleman ring kulit sane ring sisinnyane, indike punika mapiteges mungguing tatunipune punika sampun kalahlahin antuk pinakit kulit sane raat. Duaning punika sang pandita patut ngwastanin ipun leteh.

²⁶ Nanging yening bulun kulitnyane ring tatu punika nenten putih, tur tatunipune nenten daleman ring kulit sane ring sisinnyane, nanging warnanipune cedangan, sang pandita patut nganehang anake punika pitung rahina suenipun.

²⁷ Ring rahina sane kaping pitu sang pandita patut nureksain malih anake punika. Yening kapanggihin mungguing pinakit anake punika sampun nglinggahang, punika cihnanipun mungguing anake punika sampun keni pinakit kulit sane raat. Duaning punika, ipun patut kawastanin leteh.

²⁸ Nanging yening ceblenge punika tetep sakadi jati mula, tur nenten nglinggahang tur warnannyane sada cedang punika boyaja pinakit kulit sane raat. Sang pandita patut ngwastanin anake punika bresih, santukan pinakitipune wantah tatu laad kebus kewanten.

²⁹

Yening wenten anak lanang wiadin anak istri sane keni pinakit kulit ring sirah wiadin ring jagutnyane,

³⁰ anake punika patut katureksain antuk sang pandita. Yening sane keni pinakit punika cekok, daleman ring kulit sane ring sisinnyane, tur bulunnyane masawang kuning tur aas, indike punika nyinahang pinakit kulit sane raat. Anake punika patut kawastanin leteh.

³¹ Rikala ipun katureksain antuk sang panditae, raris kapanggih mungguing sane keni pinakit punika nenten cekok miwah daleman ring kulit sane ring sisinnyane, tur rambutnyane nenten seger, anake punika patut kanehang pitung rahina suenipun.

³² Ring rahina sane kaping pitu, sang pandita patut malih nureksain anake punika. Yening pinakitipune nenten nglinggahang tur nenten wenten rambutnyane sane masawang kuning ring genahe punika, samaliha tatunnyane nenten daleman ring kulitnyane sane ring sisinnyane,

³³ kulit sane wenten ring sisin tatune punika patut kakurisin. Sasampune punika sang pandita patut nganehang anake punika pitung rahina suenipun.

³⁴ Ring rahina sane kaping pitu, sang pandita patut malih nureksain anake punika. Yening pinakitipune nenten nglinggahang, samaliha pinakite punika pakantenanipun nenten daleman ring kulit sane wenten ring sisinipune, anake punika patut kawastanin bresih, tur ipun ngumbah panganggen ipune.

³⁵ Nanging yening sasampune ipun kawastanin bresih, raris pinakitipune nglinggahang,

³⁶ ipun patut malih katureksain antuk sang pandita. Yening mula wiakti pinakitipune punika nglinggahang, sang pandita nenten perlu malih nureksain napike bulunnyane kuning punapi tan, santukan sampun sinah mungguing anake punika leteh.

³⁷ Nanging yening manut pamanggih sang pandita, pinakitipune punika nenten nglinggahang, tur tumbuh bulu seger irika, kenginan pinakitipune punika sampun was, tur sang pandita patut ngwastanin ipun bresih.

³⁸

Yening wenten anak lanang wiadin istri sane macebleng-cebleng putih ring kulitnyane,

³⁹ ipun patut katureksain antuk sang pandita. Yening sane macebleng putih punika sada putih saru rupanipune punika mapiteges mungguing ipun keni pinakit kurap, tur ipun dados kawastanin bresih.

⁴⁰

[40-41] Yening wenten anak lanang sane lengar ring gidat wiadin ring kuncirnyane, indike punika nenten ngawinang ipun leteh.

⁴¹

⁴² Nanging yening wenten macebleng putih masawang barak ring lengare, anake punika keni pinakit kulit sane raat.

⁴³ Ipun patut katureksain antuk sang pandita, tur yen wantah wiakti wenten macebleng putih masawang barak,

⁴⁴ ipun patut kawastanin leteh, santukan ipun keni pinakit kulit sane raat ring sirahipune.

⁴⁵

Anake sane keni pinakit kulit sane raat, ipun patut nganggen pangangge sane setset pasranting, tur boknyane mangda nenten naenin kasuahin. Ipun patut nekep muanipune atenga, inggih punika saking cunguh ngantos ka bibih, sinambi jerit-jerit sapuniki: “Leteh, leteh.”

⁴⁶ Sakantun ipun keni pinakit punika, anake punika kawastanin leteh. Ipun patuh magenah ring jabaan pakemahane, mangda doh saking anake sane lianan.

⁴⁷

Yening wenten pangangge wiadin wastra napija luiripun, sane malakar antuk wol wiadin lenen sane mawong,

⁴⁸ wiadin barang-barang sane malakar antuk blulang,

⁴⁹ samaliha yening warnan wonge punika mawasang gadang wiadin masawang barak, indike punika nyinahang mungguing wonge punika sampun ngleplep, tur patut digelis katurang ring sang pandita.

⁵⁰ Barange punika patut katureksain antuk sang pandita, raris kanehang pitung rahina suenipun.

⁵¹ Ring rahina sane kaping pitu, barange punika malih katureksain, tur yen cingak dane wonge punika sampun ngleplep, kenginan barange punika leteh.

⁵² Sang pandita patut nunjel barange punika, santukan wonge punika wong sane ngleplep, punika awinanipun patut kageseng antuk geni.

⁵³

Nanging yening sang pandita sane nureksain barange punika ngaksi, mungguing wonge punika nenten ngleplep ring barange punika,

⁵⁴ dane patut ngandikayang mangda barange punika kumbah tur kanehang malih pitung rahina suenipun.

⁵⁵ Sasampune punika sang pandita patut malih nureksain barange punika. Yening wonge punika kantun tetep sakadi jati mula, yadiastun ipun nenten ngleplep, barange punika kawastanin leteh. Punika awinanipun patut kageseng, yadian ring sisin dijane jua genah wonge punika.

⁵⁶ Nanging ritatkala sang pandita ngwawanin nureksain barange punika, raris kacingak mungguing wonge punika sampun buu, dane patut ngebes sane mawong punika saking wastra wiadin blulange punika.

⁵⁷ Sasampune punika yen malih mawong, punika mapiteges mungguing wonge punika malih ngleplep, kenginan sang maderbe barange punika patut nunjel barange punika.

⁵⁸ Yening sasampun barange punika kumbah, wongnyane punika ical, barange punika patut wawanin umbah, sasampun punika patut kawastanin bresih.

⁵⁹

Kadi asapunika pidabdab ngeniang indik pangangge sane malakar antuk lenen wiadin lianan sane mawong, wiadin barang-barang sane malakar antuk blulang sane mawong.

14

¹

Ida Sang Hyang Widi Wasa maicayang ring Dane Musa,

² pidabdab-pidabdab sane inucap ring sor puniki, ngeniang indik upacara pabresihan anak sane sampun seger saking pinakit kulit sane raat, kadi asapuniki: Ring rahina anake punika jaga kawastanin bresih, ipun patut katangkilang ring ajeng sang pandita.

³ Sang pandita jaga makta anake punika ka jabaan genahe makemah, tumuli katureksain. Yening mula wiakti pinakitipune punika sampun was,

⁴ sang pandita patut ngandikayang ipun makta paksi sane suci kekalih, miwah taru aras atugel, tali barak akatih miwah carang padang hisop akatih.

⁵ Sasampune punika sang pandita patut ngandikayang mangda paksine punika katampah asiki ring duur payuk tanahe sane madaging toya ening, sane kambil saking toya klebutane.

⁶ Paksi sane siosan miwah taru arase, tali barak miwah padang hisope punika patut kacelebang ring getih paksine sane sampun katampah punika.

⁷ Sang pandita patut ngetisang getih paksine punika ping pitu ring anake sane sampun seger punika, tumuli anake punika kawastanin bresih antuk sang pandita. Sasampune punika, paksine sane kantun urip punika patut kalebang ring tegalane.

⁸ Sasampune punika, anake punika patut ngumbah panganggennyane, nyukur bokipune makasami raris manjus. Ipun raris sampun kawastanin bresih. Ipun dados ngranjing ka genahe makemah nanging malih pitung rahina suenipun nenten dados ngranjing ka kemahipune niri.

⁹ Ring rahina sane kaping pitu, ipun patut malih nyukur sirahipune miwah ngurisin jenggot lan alis ipune, makamiwah sakancan bulun dewekipune. Sasampune punika ipun patut ngumbah panganggenipune ngraris manjus. Sawusan punika, wau ipun kawastanin bresih manut sopacaraning agama.

¹⁰

Ring rahina sane kaping kutus, anake punika patut makta panak biri-biri muani kekalih miwah panak biri-biri lua asiki sane wau matuuh ataun tur tan paceda, tepung sane sampun madaging minyak saitun tigang kilo miwah minyak saitun apahtigan liter.

¹¹ Sang pandita patut makta ipun miwah aturanipune ka ajeng gapuran Kemah Linggih Ida Sang Hyang Widi Wasa.

¹² Sang pandita patut ngambil panak biri-birine muani punika asiki miwah minyak saitun sane apahtigan liter punika, buat katurang makadados aturan panaur danda. Aturane punika dados aturan istimewa sane katur ring Ida Sang Hyang Widi Wasa, tur aturane punika dados pikolih sang pandita.

¹³ Sang pandita patut nampah panak biri-birine punika ring genahe sane suci, ring genahe nampah wewalungan buat jaga kanggen aturan panyupat dosa miwah aturan maborbor. Biri-birine punika patut katampah irika, santukan aturan panaur danda miwah aturan panyupat dosa punika kalintang suci, tur dados druen sang pandita.

¹⁴ Sang pandita patut ngambil getih biri-birine punika akidik, raris kolesang ring kuping anake punika sane kenawan, ring inan limanipune sane kenawan, miwah ring inan batisipune sane kenawan.

¹⁵ Sasampune punika sang pandita patut ngambil minyak saitun punika akidik, raris kasriokang ring tlapakan tangan danene sane kiwa.

¹⁶ Sawusan punika dane patut nyelebang jrijin danene sane tengen asiki ring minyake punika, tumuli kaketisang ping pitu ring tengah Kemah Linggih Ida Sang Hyang Widi Wasa.

¹⁷ Sasampune punika dane patut ngambil minyak sane wenten ring tlapakan tangan danene akidik, miwah getih panak biri-birine akidik, tumuli kolesang ring kuping kenawan anake sane jaga kabresihin punika, ring inan limanipune sane kenawan miwah ring inan batisipune sane kenawan.

¹⁸ Sisan minyake sane ring tangan danene punika patut kasriokang ring sirah anake punika. Kadi asapunika caranipun ngamargiang upacara pabresihan.

¹⁹

Sasampune punika sang pandita patut ngaturang aturan panyupat dosa miwah ngamargiang upacara pabresihan. Sawusan punika dane patut nampah wewalungan sane jaga kanggen aturan maborbor,

²⁰ tumuli ngaturang aturane punika ring genah aturane sinarengan ring aturan sesajene. Kadi asapunika caranipun ngamargiang upacara pabresihan, kenginan anake punika raris dados bresih.

²¹

Yening anake punika tiwas, tur ipun nenten mampuh ngaturang wewalungan tetiga sakadi sane sampun kapastiang, ipun dados makta panak biri-biri muani asiki kewanten buat aturan panaur danda. Aturane punika makadados aturan istimewa sane katur ring Ida Sang Hyang Widi Wasa, tur dados pikolih sang pandita. Buat aturan sesajene, ipun dados makta tepung sane madaging minyak saitun akilo kewanten, miwah minyak saitun apahtigan liter.

²² Ipun patut taler makta paksi kukur wiadin paksi dara apacek, inggih punika buat kanggen aturan panyupat dosa asiki miwah aturan maborbor asiki.

²³ Ring rahina sane kaping kutus, rahina pabresihanipune, aturane punika makasami patut bakta ipun ring ajeng sang pandita ring gapuran Kemah Linggih Ida Sang Hyang Widi Wasa.

²⁴ Panak biri-birine miwah minyak saitune patut kambil antuk sang pandita buat katurang ring ayun Ida Sang Hyang Widi Wasa makadados aturan istimewa, tur punika dados pikolih sang pandita.

²⁵ Dane patut nampah panak biri-birine punika, raris getihnyane kambil akidik, kolesang ring kuping anake punika sane kenawan, ring inan limanipune sane kenawan, miwah ring inan batisipune sane kenawan.

²⁶ Dane patut mriokang minyake punika akidik ring tlapakan tangan danene sane kiwa,

²⁷ tumuli ngetisang minyake punika ping pitu ring ayun Ida Sang Hyang Widi Wasa, antuk jrijin tangan danene sane tengen asiki.

²⁸ Dane patut taler ngolesang minyake punika akidik ring kuping anake punika sane kenawan, ring inan limanipune sane kenawan, ring inan batisipune sane kenawan, pateh sakadi getihe iwau.

²⁹ Sisan minyake sane ring tlapakan tangan danene punika patut kasriokang ring sirah anake punika. Kadi asapunika caranipun ngamargiang upacara pabresihan.

³⁰ Sawusan punika dane patut ngaturang paksi dara wiadin paksi kukure punika asiki,

³¹ makadados aturan panyupat dosa, miwah sane malih asiki katurang pabuat aturan maborbor sinarengan ring aturan sesajene. Kadi asapunika caran sang pandita ngamargiang upacara pabresihane.

³² Kadi asapunika pidabdab ngeniang indik anake sane keni pinakit kulit sane raat, sane nenten mampuh ngaturang aturan-aturan sane sampun kapastiang buat upacara pabresihan punika.

³³

Ida Sang Hyang Widi Wasa maicayang ring Dane Musa miwah Dane Harun,

³⁴ pidabdab sane inucap ring sor puniki, ngeniang indik umah sane mawong tur wongipune nglahlah. (Pidabdabe puniki jaga kamargiang sasampun bangsa Israele ngaug tanah Kanaan, jagat sane kapaicayang ring ipun antuk Ida Sang Hyang Widi Wasa.)

³⁵ Sapasiraja manggihin umahnyane mawong, ipun patut tangkil tur nguningayang indike punika, ring sang pandita.

³⁶ Sadurung sang pandita rauh nureksain umahe punika, sadaging umahe punika patut kamedalang. Yan nenten kamedalang, sakancan sane kantun ring umahe punika pacang kawastanin leteh. Sasampun punika, sang pandita patut lunga ka umahe punika,

³⁷ buat jaga nureksa wong umahe punika. Yening wenten kapanggih macebleng-macebleng sane warnanipun sada gadang wiadin sada barak, sane pakantenanipun sakadi nyusup ka temboke,

³⁸ dane patut nilar umahe punika, tur manggayang umahe punika makancing pitung rahina suenipun.

³⁹ Ring rahina sane kaping pitu dane patut rauh malih tur nureksain umahe punika. Yening wonge punika sayan nglahlah,

⁴⁰ [40-41] dane patut mrentahang mangda batu-batune sane mawong punika kabungkah tur kawedalang, raris bagian temboke punika kakeruk. Batu miwah luluhnyane punika iwau raris kakutang ring genahe sane leteh ring jabaan kotane.

⁴¹

⁴² Batu-batu sane sampun kawedalang punika patut kesehin antuk batu sane anyar. Temboke punika taler patut kaplester antuk luluh sane anyar.

⁴³

Yening umahe punika malih mawong, yadiastun batu-batun umahe puniki sampun kakutang miwah tembok-tembok ipune sampun kakeruk tur sampun malih kaplester,

⁴⁴ sang pandita patut malih lunga buat nureksain umahe punika. Yening wongnyane sampun nglahlah, umahe punika kawastanin leteh.

⁴⁵ Umahe punika patut kauug. Batu-batu, kayu-kayu miwah sakancan luluhipune patut kabakta medal ka genahe sane leteh ring jabaan kotane.

⁴⁶ Sadurung punika, sapasiraja ngranjing ring umahe sane makancing punika, ipun leteh ngantos surup surya.

⁴⁷ Sapasiraja masare wiadin madaar ring umahe punika, ipun patut ngumbah panganggenipune.

⁴⁸

Yening rikala sang pandita rauh nureksain umahe sane sampun kaplester anyar punika, umahe punika nenten malih mawong, dane ngwastanin umahe punika bresih, santukan wongnyane sampun ical makasami.

⁴⁹ Buat mresihin umahe punika manut sopacaraning agama, sang pandita patut ngambil paksi kekalih, taru aras, tali barak miwah padang hisop.

⁵⁰ Paksine punika, patut katampah asiki ring duur payuke sane madaging toya sane kambil ring toya klebutane.

⁵¹ Taru aras, tali barak, padang hisop miwah paksi sane kantun urip punika raris kacelebang ring getih paksine sane sampun katampah punika miwah ka toyane sane ening punika. Umahe punika raris kaketisin nyantos ping pitu.

⁵² Dane patut mresihin umahe punika masrana getih paksi, toya ening, paksi urip, taru aras, padang hisop miwah tali barake punika.

⁵³ Sasampune punika dane patut nglebang paksine sane kantun urip punika ring tegale ring jabaan kotane. Kadi asapunika patutne dane ngamargiang upakara pabresihan buat umahe punika, tur umahe punika raris kawastanin bresih.

⁵⁴

Kadi asapunika pidabdab ngeniang indik pinakit kulit sane raat,

⁵⁵ [55-56] ngeniang indik magentil, berung, macebleng putih wiadin beseh, miwah indik pangangge wiadin umah sane mawong.

⁵⁶

⁵⁷ Pidabdabe punika gunanipun buat ngamastiang punapike paindikane punika leteh wiadin bresih manut sopacaraning agama.

15

¹

Ida Sang Hyang Widi Wasa maicayang ring Dane Musa miwah Dane Harun, pidabdab sane inucap ring sor puniki,

² pabuat bangsa Israele. Yening wenten semara sane medal saking pranan anake lanang punika kawastanin leteh,

³ yadian sane kabanggayang ngetel, wiadin sane kantun kampet.

⁴ Pasarean sane kategakin wiadin kapulesin antuk anake punika, taler kawastanin leteh.

⁵ [5-8] Sapasiraja ngusud anak sane ngwedalang semara punika, ngusud pasareanipune, wiadin negak ring genah sane pecak tegakin ipun, wiadin sane kecuhin ipun, anake punika patut ngumbah panganggennyane tur manjus. Ipun leteh ngantos surup surya.

⁶

⁷

⁸

⁹ Kedapa wiadin korsi sane kategakin antuk anake sane ngwedalang semara punika kawastanin leteh.

¹⁰ [10-11] Sapasiraja ngusud wiadin ngambil barang sane pecak kategakin antuk anake sane ngwedalang semara punika, wiadin kusud antuk ipun, sadurung ipun masehin limanipune, anake punika leteh ngantos surup surya. Anake punika patut ngumbah panganggennyane raris manjus tur ipun leteh ngantos surup surya.

¹¹

¹² Payuk tanahe sane kusud antuk anake punika patut kencak, miwah jembung kayu sane gisi ipun patut kumbah.

¹³

Yening anake sane ngamedalang semara punika seger, ipun patut nyantosang malih pitung rahina suenipun. Sasampune punika ipun patut ngumbah panganggennyane tur manjus ring toya anakane, kenginan ipun raris bresih manut sopacaraning agama.

¹⁴ Ring rahina sane kaping kutusipun, ipun patut ngaturang paksi dara wiadin paksi kukur apacek ring sang pandita ring gapuran Kemah Linggih Ida Sang Hyang Widi Wasa.

¹⁵ Sang pandita patut ngaturang paksine punika asiki buat aturan panyupat dosa, miwah sane asiki buat aturan maborbor. Kadi asapunika carannya ngamargiang upacara pabresihan buat anake punika.

¹⁶

Yening wenten anak lanang sane labuh semarannyane, ipun patut manjusang deweknyane tur ipun leteh ngantos surup surya.

¹⁷ Barang-barang sane malakar wastra wiadin blulang sane keni semara punika patut kumbah. Barange punika taler leteh ngantos surup surya.

¹⁸ Sasampun wusan matemu semara, anake lanang miwah anake istri patut masiram. Ipun sareng kalih leteh rauh surup surya.

¹⁹

Anak istri sane sebel di awak, ipun leteh pitung rahina suenipun. Sapasiraja ngusud anake istri punika ipun leteh ngantos surup surya.

²⁰ Saananing sane kategakin wiadin kapulesin rikala ipun sebel di awak, barang-barange punika kawastanin leteh.

²¹ [21-23] Sapasiraja ngusud genah pecak pesarean wiadin tegakan anake luh sane sebel di awak punika, anake punika patut ngumbah panganggennyane ngraris manjus, tur ipun leteh ngantos surup surya.

²²

²³

²⁴ Yening wenten anak muani sane matemu semara ngajak anak luh sane sebel di awak punika, anake muani punika taler leteh pitung rahina suenipun, samaliha pasarean sane pedemin ipun taler dados leteh.

²⁵

Yening wenten anak luh sane ngwedalang rah makudang-kudang rahina suenipun, sajawining ipun sebel di awak, wiadin ipun ngwedalang rah lintangan ring masanipune sebel di awak, anake luh punika leteh sakantun ipun ngwedalang rah punika, pateh sakadi daweg ipune sebel di awak.

²⁶ Genah sane kapulesin wiadin kategakin sakantun ipun ngwedalang rah, punika kawastanin leteh.

²⁷ Sapasiraja ngusud genahe punika, ipun taler dados leteh. Anake punika patut ngumbah panganggenipune tumuli manjus tur ipun leteh ngantos surup surya.

²⁸ Sasampune ipun wusan ngwedalang rah, anake luh punika patut nyantosang pitung rahina suenipun. Wusan punika wau ipun kawastanin bresih.

²⁹ Ring rahina sane kaping kutusipun, anake luh punika patut ngaturang paksi dara wiadin paksi kukur apacek ring sang pandita ring gapuran Kemah Linggih Ida Sang Hyang Widi Wasa.

³⁰ Sang pandita patut ngaturang paksine asiki pabuat aturan panyupat dosa, miwah sane asiki buat aturan maborbor, kadi asapunika patutnya dane ngamargiang upacara pabresihan buat anake luh punika.

³¹

Ida Sang Hyang Widi Wasa ngandikayang Dane Musa, mangda dane mapakeling bangsa Israele, ngeniang indik kawentenanipun sajeroning leteh wiadin tan leteh, mangda ipun sampunang ngantos ngletehin Kemah Linggih Ida Sang Hyang Widi Wasa sane wenten ring pantaran pakemahan bangsane punika. Yening ipun ngletehin Kemah Linggih Ida Sang Hyang Widi Wasa punika, ipun pacang kapademang.

³²

Kadi asapunika pidabdab-pidabdab ngeniang indik anak muani sane ngwedalang semara, wiadin sane nglabuhang semara,

³³ indik anak luh sane sebel di awak miwah indik anak muani sane matemu semara ngajak anak luh sane sebel di awak.

16

¹

Sasampun okan Dane Harun seda kekalih, sane kasedayang antuk Ida Sang Hyang Widi Wasa rikala dane sareng kalih ngaturang geni pasepan sane tan kakarsayang antuk Ida Sang Hyang Widi Wasa, Ida tumuli masabda ring Dane Musa.

² Sapuniki sabdan Idane: “Orahang teken belin kitane I Harun, tuah di dinane ane suba kapastiang dogen ia dadi macelep sig Tongos Ane Maha Suci di durin korden panyelenge, sawireh ditu di duur tekep Peti Prajanjiane Ulun nyinahang raga sajeroning ambun. Yen I Harun mamurug prentahe ene, ia lakar kamatiang.

³ Sasubane ia ngaturang godel sampi jagiran buat aturan panyupat dosa, muah biri-biri muani aukud buat aturan maborbor, ditu mara ia dadi macelep sig Tongose Ane Maha Suci ento.”

⁴

Sasampune punika Ida Sang Hyang Widi Wasa raris maicayang pidabdab-pidabdab sane kadi ring sor puniki. Sadurung Dane Harun ngranjing ka Genahe Sane Maha Suci, dane patut masiram dumun, raris ngrangsuk busana kapanditan, inggih punika kawaca miwah clana bawak, sane malakar antuk lenen, pepetet miwah sorban.

⁵

Sasampune punika, pasamuan Israele patut ngaturang kambing muani kekalih ring Dane Harun buat aturan panyupat dosa, miwah biri-biri muani asiki buat aturan maborbor.

⁶ Dane Harun patut ngaturang banteng jagiran asiki buat panyupat dosan danene ngraga miwah dosan kulawargan danene.

⁷ Kambinge muani-muani sane katurang antuk pasamuan Israele punika, makakalih patut kabakta antuk Dane Harun ring gapuran Kemah Linggih Ida Sang Hyang Widi Wasa.

⁸ Irika dane patut mulang undi antuk batu kekalih. Batune sane asiki kadagingin tanda: “Pabuat Ida Sang Hyang Widi Wasa”, miwah sane lianan: “Buat Asasel”.

⁹ Kambinge sane keni undi “Pabuat Ida Sang Hyang Widi Wasa”, patut katurang dados aturan panyupat dosa.

¹⁰ Kambinge sane keni undi “Buat Asasel” patut katurang idup-idup ring ayun Ida Sang Hyang Widi Wasa. Sasampune punika raris kambinge punika kulah ka Asasel ring tegal melakange, mangda sapsap dosa-dosan bangsa Israele.

¹¹

Rikala Dane Harun ngaturang banteng jagiran punika buat aturan panyupat dosa, pabuat ragan danene ngraga miwah pabuat kulawargan danene,

¹² dane patut ngambil geni saking genahe ngaturang aturan, akehipun abekan wadah geni, miwah menyan alus kalih gemel, raris kabakta ring Genahe Sane Maha Suci.

¹³ Irika ring ayun Ida Sang Hyang Widi Wasa dane patut mebehang menyane punika ka genine. Andus menyane punika jaga nglikub tekep Peti Prajanjiane punika, mangda nenten kacingakin antuk Dane Harun, santukan yening dane nyingak Petine punika, dane pacang seda.

¹⁴ Dane Harun patut ngambil getih bantenge punika akidik, raris antuk jrijin danene dane ngetisang getihe punika ring tekep Petine punika bagian ring arep, sasampune punika raris ngetisang ping pitu ring arepan Petine punika.

¹⁵

Wusan punika Dane Harun patut nampah kambing sane pacang kanggen aturan panyupat dosan rakyate. Getih kambinge punika patut kabakta ka Genahe Sane Maha Suci punika, raris getihe punika kaketisang ring tekep Peti Prajanjiane miwah ring arepan Petine punika, pateh sakadi sane sampun kalaksanayang nganggen rah banteng jagiran punika.

¹⁶ Kadi asapunika caranipun ngamargiang upacara buat nyuciang Genahe Sane Maha Suci, saking kaletehan bangsa Israele miwah saking sakancan dosannyane. Kemah Linggih Ida Sang Hyang Widi Wasa punika patut kasuciang, santukan genah Kemah Linggih Ida Sang Hyang Widi Wasa punika wenten ring pantaran pakemahan rakyate, tur pakemahane punika leteh.

¹⁷ Ngawit saking daweg Dane Harun ngranjing ka Genahe Sane Maha Suci buat ngamargiang upacara panyucian, kantos dane medal saking irika, patut tan wenten anak sane wenten ring tengah Kemahe punika. Sasampune dane puput ngamargiang upacarane punika buat ragan danene ngraga, buat kulawargan danene miwah buat rakyate makasami,

¹⁸ Dane Harun patut medal ngraris ngungsi genahe ngaturang aturan maborbor, buat nyuciang pamorboran aturane punika. Dane patut ngambil getih banteng miwah kambinge punika akidik, tumuli kasriokang ring tanduk sane wenten ring bucu-bucun pamorboran aturan punika.

¹⁹ Antuk jrijin danene dane patut ngetisang getihe punika ping pitu ring pamorboran aturane punika. Kadi asapunika patutipun caran danene nyuciang pamorboran aturane punika.

²⁰

Sasampune Dane Harun puput ngamargiang upacara panyucian Genahe Sane Maha Suci, Kemah Linggih Ida Sang Hyang Widi Wasa makasami miwah pamorboran aturane, dane patut ngaturang kambing sane kari urip sane kacawisang buat Asasel ring ayun Ida Sang Hyang Widi Wasa.

²¹ Dane patut ngambel tenggek kambinge punika antuk tangan danene makakalih, sinambi ngangkenin sakancan kiwangan, dosa miwah kajaatan bangsa Israele. Majalaran punika dane ngingsirang sakancan kajaatan bangsa Israele ka tenggek kambinge punika. Wusan punika, dane patut ngandikayang anak sane sampun kapastiang, ngulah kambinge punika ka tegal melakange.

²² Kambinge punika jaga negen sakancan dosan bangsa Israele ka jagate sane melakang, sane nenten wenten jadmanipun.

²³

Sasampune punika Dane Harun patut ngranjing ka Kemah Linggih Ida Sang Hyang Widi Wasa tumuli nglukar busana kapanditan danene, sane rangsuk dane sadurung dane ngranjing ka Genahe Sane Maha Suci, tur busanane punika kagenahang irika.

²⁴ Wusan punika, dane patut masiram ring genahe sane suci, tumuli ngrangsuk busanan danene ngraga. Sasampune punika, dane patut medal buat ngaturang aturan maborbor buat panyupat dosa-dosan danene ngraga miwah dosa-dosan bangsa Israele.

²⁵ Muluk wewalungane sane kanggen aturan panyupat dosa punika patut kaborbor ring pamorboran aturane.

²⁶ Anake sane kapangandikayang ngulah kambing ka Asasel sane ring tegal melakange punika, ipun patut ngumbah panganggen ipune tur manjus sadurung ipun mawali ka pakemahane.

²⁷ Banteng jagiran miwah kambing sane kanggen aturan panyupat dosa punika kabakta ka jabaan pakemahane, tumuli katunjel irika. Kulit, daging miwah jejeron wewalungane punika makakalih patut katunjel makasami.

²⁸ Anake sane nunjel wewalungane punika ipun patut ngumbah panganggenipune tur manjus sadurung ipun mawali ka pakemahan.

²⁹

[29-31] Benjang pungkur pidabdabe puniki patut kalaksanayang kantos salami-laminipun. Rikala tanggal dasa sasihe sane kaping pitu, sawatek wong Israele miwah sakancan wong sunantara sane wenten ring pantaran wong Israele, patut pada mapuasa tur nenten dados magarapan, santukan rahinane punika kalintang suci. Ring rahinane punika patut kamargiang upacara pabresihan buat bangsa Israele, buat nyuciang ipun saking sakancan dosannyane, mangda ipun prasida dados suci, manut sopacaraning agama.

³⁰

³¹

³² Sang Pandita Agung, sane sampun kaduijatiang tur kasuciang antuk Ida Sang Hyang Widi Wasa buat nylediinin ajin danene, dane sane patut ngamargiang upacara pabresihane punika. Dane patut ngrangsuk busana kapanditan,

³³ tumuli ngamargiang upacara panyucian buat Genahe Sane Maha Suci, Kemah Linggih Ida Sang Hyang Widi Wasa, pamorboran aturane, parapandita miwah rakyat Israele makasami.

³⁴ Upacara puniki patut kamargiang ngataun apisan, buat nyuciang bangsa Israele saking sakancan dosannyane. Pidabdab-pidabdabe punika patut kalaksanayang kantos salami-laminipun.

Kadi asapunika Dane Musa nglaksanayang indike punika, sakadi sane sampun kapituduhang antuk Ida Sang Hyang Widi Wasa.

17

¹

Ida Sang Hyang Widi Wasa ngandikayang Dane Musa,

² mangda dane ngrauhang pidabdab-pidabdab sane sakadi ring sor puniki, ring Dane Harun miwah ring paraputran danene, makamiwah ring bangsa Israele makasami.

³ [3-4] Yening wenten anak Israel ngaturang banteng, biri-biri wiadin kambing ring ayun Ida Sang Hyang Widi Wasa, anake punika patut nampah wewalungane punika ring gapuran Kemah Linggih Ida Sang Hyang Widi Wasa. Yening ipun nampah wewalungane punika ring genahe sane lianan, ipun mamurug pidabdab, santukan ipun sampun ngecorang rah. Ipun nenten dados malih kawastanin kaulan Ida Sang Hyang Widi Wasa.

⁴

⁵ Tetujon prentahe punika mangda ngawit saking mangkin bangsa Israele makta aturan wewalunganipune ka ayun Ida Sang Hyang Widi Wasa, inggih punika aturan wewalungan sane riin biasane tampah ipun ring tegale. Sane mangkin ipun patut makta aturane punika ring ajeng sang pandita ring gapuran Kemah Linggih Ida Sang Hyang Widi Wasa, tumuli katampah irika buat dados aturan karahayuan.

⁶ Sang pandita patut nyriokang getih wewalungane punika ring sisi-sisin pamorboran aturane ring gapuran Kemah Sucine, tumuli morbor muluknyane mangda ambunnyane ngawinang ledang pakayunan Ida Sang Hyang Widi Wasa.

⁷ Bangsa Israele patut satia tuu ring Ida Sang Hyang Widi Wasa, tur nenten pisan dados nampah wewalungan ring tegal-tegale, buat jaga kanggen aturan ring kala buta sane marupa kambing. Pidabdabe punika patut katinutin ngantos salami-laminipun.

⁸

Yening wenten anak Israel wiadin wong sunantara sane sampun magumana ring pantaran wong Israele ngaturang aturan maborbor wiadin aturan sane lianan,

⁹ ring ayun Ida Sang Hyang Widi Wasa, anake punika patut ngaturang ring gapuran Kemah Sucine. Yening ipun ngaturang ring genahe sane liananipun nenten dados malih kawastanin kaulan Ida Sang Hyang Widi Wasa.

¹⁰

Yening wenten anak Israel wiadin wong sunantara sane sampun magumana ring pantaran wong Israele nunas ulam sane kantun madaging rah, Ida Sang Hyang Widi Wasa pacang nglawan anake punika, lan ipun nenten dados malih kawastanin kaulan Idane.

¹¹ Angkihan sawatek sane urip punika wenten sajeroning getihnyane. Punika awinannya Ida Sang Hyang Widi Wasa mituduhang mangda sakancan getihe punika kasriokang ring pamorboran aturane, mangda dosa-dosan rakyate kabrastayang. Getihe punika pateh ring angkihan, tur punika mrastayang dosa.

¹² Punika awinannya Ida Sang Hyang Widi Wasa nenten nglugrain bangsa Israele wiadin wong sunantara sane magumana ring pantaran wong Israele nunas ulam sane kantun madaging getih.

¹³

Yening wenten anak Israel wiadin wong sunantara sane sampun magumana ring pantaran wong Israele polih buron wiadin paksi sane nenten leteh, ipun patut ngutang getih burone punika ring tanahe, tumuli kurugin antuk tanah.

¹⁴ Angkihan sawatek sane murip wenten ring getihipune. Punika awinannya Ida Sang Hyang Widi Wasa nenten nglugrain bangsa Israele nunas ulam sane kantun madaging getih. Asing-asing anak sane mamurug indike punika, ipun nenten jaga kantun kawastanin kaulan Ida Sang Hyang Widi Wasa.

¹⁵

Asing-asing anak Israel wiadin wong sunantara sane nunas ulam buron sane padem ulihan tan katampah, wiadin ulihan sarap sato galak, anake punika patut ngumbah panganggennyane tur manjus, tumuli nyantosang kantos surup surya, wau ipun dados kawastanin suci manut sopacaraning agama.

¹⁶ Yening ipun nenten ngamargiang paindikane punika, ipun patut negen palannyane.

18

¹

Ida Sang Hyang Widi Wasa ngandikayang mangda Dane Musa,

² ngrauhang ring bangsa Israele, pituduh Idane puniki: “Ulun ene Sang Hyang Widi Wasa, Widin kitane.

³ Eda pesan kita matuutin laksanan bangsa Mesire, ane guminnyane taen tongosin kita, wiadin matuutin laksanan bangsa Kanaan, ane guminne aug kita ulihan pitulungan Ulune.

⁴ Tinutinja pidabdab Ulune muah laksanayangja pituduh Ulune. Ulun ene Sang Hyang Widi Wasa Widin kitane.

⁵ Laksanayangja pidabdab-pidabdab muah titah-titah ane paicayang Ulun teken kita. Yening kita nglaksanayang unduke ento, idup kitane lakar rahayu. Ulun ene Sang Hyang Widi Wasa.”

⁶

Ida Sang Hyang Widi Wasa mapaica pidabdab-pidabdab sane inucap ring sor puniki: “Edaja kita matemu semara ngajak salah tunggal kadang wargan kitane.

⁷ Edaja kita matemu semara ngajak memen kitane, apanga meme muah bapan kitane tusing kimud.

⁸ Edaja nganistayang bapan kitane malantaran kita matemu semara ngajak salah tunggal kurenannyane.

⁹ Edaja kita matemu semara ngajak nyama tugelan wiadin nyama kualon kitane, yadian ane bareng-bareng dadi abesik di pumahan kitane, wiadin ane kelih di tongose ane lenan.

¹⁰ Edaja kita matemu semara ngajak cucun kitane. Unduke ento lakar ngranayang kita kimud.

¹¹ Edaja kita matemu semara ngajak nyaman kitane ane luh ane tunggal bapa, wiadin ane tunggal meme teken kita, sawireh ia masih dadi nyaman kitane ane luh.

¹² [12-13] Edaja kita matemu semara ngajak bibin kitane, yadian ia ento nyaman bapan kitane, wiadin nyaman memen kitane.

¹³

¹⁴ Edaja kita matemu semara ngajak kurenan-kurenan uan kitane, sawireh ia masih dadi bibin kitane.

¹⁵ Edaja kita matemu semara ngajak mantun kitane,

¹⁶ wiadin ngajak kurenan belin kitane.

¹⁷ Edaja kita matemu semara ngajak pianak wiadin cucun anake luh ane taen ajak kita matemu semara. Nyen nawang, sing saget ia dadi titisan kitane, tur unduke ento dadi kadanin laksana ane mamurug adat.

¹⁸ Edaja kita nyuang tur nganggon somah nyaman kurenan kitane, senun kurenan kitane idup.

¹⁹

Edaja kita matemu semara ngajak anak luh ane nuju sebel di awak, sawireh anake luh ento sajeroning leteh.

²⁰ Edaja kita matemu semara ngajak somah anak lenan, sawireh laksanane ane buka keto ngranayang kita leteh.

²¹ Edaja kita nyerahang salah tunggal pianak kitane buat kanggon pangubakti teken Dewa Molok, sawireh unduke ento nganistayang parab Ida Sang Hyang Widi Wasa.

²² Anak muani tusing dadi matemu semara ngajak anak muani ane lenan. Ida Sang Hyang Widi Wasa duka teken laksanane ento.

²³ Anake muani wiadin anake luh tusing pesan dadi matemu semara ngajak buron. Laksanane ane jaat buka keto ngranayang kita leteh.

²⁴

Edaja kita ngletehin dewek kitane ulihan laksanane ane buka keto, sawireh ulihan laksana ane buka keto anake ane tan pawidi ngletehin dewekne, nah ento anake ane nongos malunan teken kita di gumi Kanaan. Ento awanane ia kulah baan Ida Sang Hyang Widi Wasa apanga kita nyidayang nongos di gumine ento.

²⁵ [25-27] Sawireh ia suba nglaksanayang sakancan unduke ane cemer ento, dadinne tanahe ento dadi leteh. Ida Sang Hyang Widi Wasa tumuli nyisipang ia tur tusing nglugrain ia nongos ditu. Nanging kita ajak makejang, eda pesan kita nglaksanayang paundukan ane buka keto. Kita ajak makejang wong Israel muah wong sunantara ane suba nongos di pantaran kitane patut satinut teken pidabdab muah pituduh Ida Sang Hyang Widi Wasa,

²⁶

²⁷

²⁸ apanga kita ajak makejang tusing kasisipang baan Ida Sang Hyang Widi Wasa tur kulah uli tanahe ento buka anake ane tan pawidi ane nongos ditu malunan teken kita.

²⁹ Kita suba nawang mungguing nyenja nglaksanayang salah tunggal paundukan ane cemer ento, ia tusing kangkenin dadi kaulan Ida Sang Hyang Widi Wasa.”

³⁰

Punika awinan Ida Sang Hyang Widi Wasa malih masabda: “Tuutangja prentah-prentah ane suba prentahang Ulun, tur eda pesan matuutin tingkah anake ane nongos di tanah Kanaan, ane maluan teken kita. Eda kita ngletehin dewek kitane, ulihan nyalanang laksanane ane buka keto. Ulun ene Sang Hyang Widi Wasa, Widin kitane.”

19

¹

Ida Sang Hyang Widi Wasa ngandikayang Dane Musa,

² mangda ngrauhang pituduhe puniki ring bangsa Israele. Sapuniki sabdan Idane: “Kita ajak makejang patut suci, sawireh Ulun Sang Hyang Widi Wasa, Widin kitane maraga suci.

³ Asing-asing anak patut bakti teken meme bapanne, muah ngluihang dina Sabate, buka ane suba pituduhang Ulun. Ulun ene Ida Sang Hyang Widi Wasa Widin kitane.

⁴

Eda kita ngutang Ulun, laut mabakti teken arca-arcane. Eda kita ngae arca ane malakar aji logam muah nyungsung arcane ento. Ulun ene Ida Sang Hyang Widi Wasa, Widin kitane.

⁵

Yening kita nampah wewalungan buat lakar anggon kita aturan karahayuan, kita patut nuutang pidabdabe ane suba paicayang Ulun, ditu Ulun lakar nrima aturan kitane ento.

⁶ Isin wewalungane ento patut daar kita di dina wewalungane ento katampah, wiadin kanti buin maninne. Bene ane enu masisa kanti makapuan ento, patut katunjel,

⁷ sawireh bene ento leteh manut sopacaraning agama. Yen bene ento daar kita, dadinne aturane ento tusing lakar trima Ulun.

⁸ Nyenja naar bene ento, ia pelih, baana ia tusing minayang barang ane suba kanehang buat Ulun teken barange ane biasa. Anake ento tusing dadi buin kadanin kaulan Ulune.

⁹

Yening kita manyi, eda anyina gandume ane mentik di sisin-sisin tegale, buina eda malipetan buat manyi gandume ane kaliwatan.

¹⁰ Eda buin malipetan ka abian anggure buat lakar ngalap buah anggure ane enu makutang, wiadin nuduk buah-buah anggure ane suba ulung. Depang kutang ento buat anake ane tiwas muah wong sunantarane. Ulun ene Ida Sang Hyang Widi Wasa, Widin kitane.

¹¹

Edaja kita mamaling, melog-melog wiadin mobab.

¹² Edaja kita majanji sajeroning parab Ulune, yen mula kita tuah lakar tusing ngisinin janjin kitane ento. Unduke ento nganistayang parab Ulune. Ulun ene Ida Sang Hyang Widi Wasa, Widin kitane.

¹³

Edaja kita mamaksa sesaman kitane wiadin ngrampas barangnyane. Edaja kita nganggeh upah anake ane tunden kita magarapan, yadiastun tuah apeteng dogen.

¹⁴ Edaja kita nemah anak bongol, muah edaja kita ngejang barang di arepan anake buta, apanga ia katanjung. Takutja teken Ulun, Ulun ene Ida Sang Hyang Widi Wasa, Widin kitane.

¹⁵

Kita patut jujur tur adil. Yening kita nepasin wicaran anak, eda kita milon teken anak tiwas wiadin takut teken anak sugih.

¹⁶ Edaja kita misunayang anak lenan. Yening idup wiadin matin anake ento magantung teken wicarane ane sedek katepasin ento, kita patut ngraos, yening kasaksian kitane ento prasida nulungin anake ento. Ulun ene Ida Sang Hyang Widi Wasa.

¹⁷

Edaja kita ngadut sekel ati teken anak. Sapsapangja paieg kitane ngajak anake ento, apanga kita tusing madosa ulihan anake ento.

¹⁸ Edaja kita ngwales sakit ati teken anak, wiadin ngadut sekel ati teken anake ento, nanging tresnainja sesaman kitane buka kita nresnain dewek kitane. Ulun ene Ida Sang Hyang Widi Wasa.

¹⁹

Tuutja pituduh-pituduh Ulune. Eda kita nglumbahang ubuhan ane melenan sorohne. Eda kita mamula bibit duang soroh di tegalane ane abesik. Eda masih kita mapanganggo ane malakar aji benang ane duang soroh.

²⁰

Upama, ada anak muani ane suba majanji lakar ngadep panjakne luh teken anak muani lenan lakar anggona selir. Yening anake muani ane lakar meli ento tonden mayah, lantas anake ane ngelahang panjake ento matemu semara ngajak anake luh ento, dadinne ia ajaka dadua ento patut kukum, nanging tusing ukuman mati, sawireh yadiastunja buka kenken, anake eluh ento masih enu dadi panjakne.

²¹ Anake muani ento patut ngaturang biri-biri muani aukud ka gapuran Kemah Sucin Ulune makadadi aturan panebus kapelihan.

²² Sang pandita patut ngaturang aturane ento, buat upacara panyucian, apanga dosan anake ento kabrastayang. Ditu Ida Sang Hyang Widi Wasa lakar ngampurayang anake ento.

²³

Yening kita suba ngaug gumi Kanaane, tur ditu kita mamula woh-wohan apaja luire, kita patut nganggep buahnyane ento leteh telung taun makelonne, uli mara mlajah mabuah. Sajeroning telung taun kita tusing dadi naar buahne ento.

²⁴ Di taune ane kaping pat makejang buahne patut anggon kita aturan buat nyinahang suksman keneh kitane teken Ulun, Sang Hyang Widi Wasa.

²⁵ Di taun ane kaping lima, ditu mara kita dadi naar buahne ento. Yening kita nglaksanayang sakancan pituduhe ene, punyan woh-wohan kitane lakar buin ngedan mabuah. Ulun ene Sang Hyang Widi Wasa, Widin kitane.

²⁶

Edaja kita naar be ane enu misi getih. Edaja kita ngadokang pangiwa apaja luire.

²⁷ Edaja kita nyukur bok kitane ane di samping sirah kitane wiadin ngurisin jenggot kitane.

²⁸ Edaja kita nulisin kulit kitane aji tanda-tanda, wiadin nues-nues kulit kitane makadadi tanda kaduhkitan buat mangenang anake ane mati. Ulun ene Ida Sang Hyang Widi Wasa.

²⁹

Edaja kita nganistayang tegak pianak-pianak kitane ane luh-luh, baane kita nganggon ia panayang di perhyangan dewa-dewane. Yening kita nglaksanayang paundukane ane buka keto, kita lakar nyumbah dewa-dewa tur tingkahe ane tuara patut lakar ngebekin gumin kitane.

³⁰ Luihangja dina Sabate, tur luihangja tongos Ulune kasumbah. Ulun ene Ida Sang Hyang Widi Wasa.

³¹

Edaja kita ngidih pepineh teken anake ane ngidih pepineh teken roh-roh anake ane suba mati. Yening kita nglaksanayang unduke ane buka keto, kita dadi leteh. Ulun ene Ida Sang Hyang Widi Wasa, Widin kitane.

³²

Ajiang tur baktininja anake ane suba wreda. Takut muah astiti baktija teken Ulun, sawireh Ulun ene Sang Hyang Widi Wasa.

³³

Edaja kita matingkah ane tuara patut teken wong sunantara ane nongos di gumin kitane.

³⁴ Matingkahja teken ia buka kita matingkah marep teken bangsan kitane, tur tresnainja ia buka kita nresnain dewek kitane. Ingetangja, kita masih taen dadi wong sunantara di Mesir. Ulun ene Sang Hyang Widi Wasa, Widin kitane.

³⁵

Eda kita ngapus anak len aji ukuran ane palsu, yadian aji ukuran panjang, aji panimbangan wiadin aji panakehan.

³⁶ Kita patut nganggon meteran, panimbangan muah panakehan ane beneh. Ulun ene Sang Hyang Widi Wasa, Widin kitane tur Ulun suba nuntun kita pesu uli Mesir.

³⁷ Tinutinja sakancan pituduh muah pidabdab Ulune. Ulun ene Sang Hyang Widi Wasa.”

20

¹

Ida Sang Hyang Widi Wasa ngandikayang Dane Musa,

² mangda dane ngrauhang sabdan Idane ring bangsa Israele, kadi asapuniki: “Asing-asing anak di pantaran kitane wiadin wong sunantara ane nongos di gumin kitane, ane nyerahang pianakne buat anggona aturan sajeroning pangubakti teken Dewa Molok, anake ento patut kencurin aji batu kanti mati baan rakyate ajaka makejang.

³ Yening ada anak nyerahang salah tunggal pianakne dadi aturan teken Dewa Moloke, kanti ia ngletehin Kemah Ulune ane suci, muah nganistayang parab Ulune ane suci, Ulun lakar nglawan anake ento, tur Ulun tusing enu buin ngangkenin ia dadi kaulan Ulune.

⁴ Nanging yening rakyate nyelapang tusing rungu teken anake ento, tur tusing ngukum anake ento kanti mati,

⁵ Ulun lakar nglawan anake ento, muah sakancan kulawargannyane, aketo masih nglawan anake ane sruron teken ia buat nilas Ulun tur mabakti teken Dewa Moloke ento. Anake ento ajaka makejang tusing enu angkenin Ulun dadi kaulan Ulune.

⁶

Yening ada anak ngidih pepineh teken anake ane bisa ngidih pepineh teken roh anak ane suba mati, Ulun lakar nglawan anake ento, tur ia tusing angkenin Ulun dadi kaulan Ulune.

⁷ Yatnainja dewek kitane, apanga kita enu tetep suci, sawireh Ulun ene Ida Sang Hyang Widi Wasa, Widin kitane.

⁸ Tinutinja pidabdab Ulune, sawireh Ulun ene Ida Sang Hyang Widi Wasa, tur Ulun suba nyelik kita.”

⁹

Ida Sang Hyang Widi Wasa maicayang pidabdab sane inucap ring sor puniki: “Asing-asing anak ane nemah bapa wiadin memennyane, ia patut kukum mati. Ia mati ulihan pelihne padidi.

¹⁰

Yening ada anak Israel mamitra ngajak somah timpalne paturu bangsa Israel, anake ento makadadua, luh muani patut kukum mati.

¹¹ Anake muani ane matemu semara ngajak salah tunggal kurenan bapanne, ia ngranayang bapannyane kimud. Anake muani muah anake luh ento patut kukum mati. Ia ngemasin mati ulihan dosannyane padidi.

¹² Yen ada anak muani matemu semara ngajak mantunnyane, anake ento makadadua patut kukum mati. Ia ajaka dadua suba mamurug adat, tur ia ngemasin mati ulihan dosannyane padidi.

¹³ Yen ada anak muani matemu semara ngajak anak muani lenan, ia ajaka dadua suba nglaksanayang paundukan ane cemer, tur ia ajaka dadua patut kukum mati. Ia ngemasin mati ento ulihan pelihne padidi.

¹⁴ Yen ada anak muani nyuang anak luh kayang ka memennyane kanggon kurenan, anake makatelu ento patut katunjel kantos mati, sawireh ia suba malaksana ane tusing patut. Laksana ane buka keto patut tusing ada di pantaran kitane.

¹⁵ Yen ada anak muani masanggama ngajak buron, anake muani muah burone ento patut kukum mati.

¹⁶ Yen ada anak luh ngindayang masanggama ngajak buron, anake luh muah burone ento patut kukum mati. Ia ngemasin mati, ulihan pelihne padidi.

¹⁷

Yen ada anak muani ane nyuang nyama tugelan wiadin nyama kualonnyane ane luh anggona kurenan, anake ento patut kanistayang di arepan anake liu, lantas kasepekang uli pasamuane. Anake ento suba masanggama ngajak nyamannyane ane luh, sawireh keto, ia patut nampi palannyane.

¹⁸ Yen ada anak muani ane matemu semara ngajak anak luh ane nuju sebel di awak, anake ento makadadua patut kasepekang uli pasamuan, sawireh ia suba lempas uli pidabdab unduk kasucian manut sopacaraning agama.

¹⁹

Yen ada anak muani ane matemu semara ngajak bibinnyane, anake makadadua ento patut ngemasin karma palannyane ane lempas teken adat ento.

²⁰ Yen ada anak muani matemu semara ngajak kurenan pamannyane ia nganistayang pamannyane. Anake muani muah anake luh ento patut ngemasin ukuman, nah ento ia ajaka dadua tusing lakar dadi ngelah pianak.

²¹ Yen ada anak muani ane nyuang kurenan belinne, ia lakar mati tan pasentana. Ia suba malaksana tan patut tur nganistayang belinnyane.”

²²

Ida Sang Hyang Widi Wasa masabda kadi asapuniki: “Tinutinja sakancan pidabdab muah pituduh Ulune, apanga kita tusing kulah uli tanah Kanaan, sig tongos Ulune suba nuntun kita.

²³ Edaja kita ninutin adat istiadat jlemane ane nongos ditu. Jlemane ane tan pawidi ento suba ngranayang Ulun duka, malantaran sakancan laksanannyane ane jaat. Ento kranane ane jani Ulun ngulah ia, apanga kita nyidayang ngaug gumine ento.

²⁴ Ulun suba majanji mungguing tanahe ane gemuh landuh ento lakar dadi gelah kitane. Sawireh keto, Ulun lakar maicayang tanahe ento teken kita. Ulun ene Sang Hyang Widi Wasa, Widin kitane tur Ulun suba nganehang kita uli bangsa-bangsa ane lenan.

²⁵ Sawireh keto kita apang bisa maminayang kanti sinah, encen buron muah kedis ane leteh, muah encen ane tusing leteh. Eda kita naar buron muah kedis ane leteh. Burone ento suba adanin Ulun leteh, dadinne yen kita naar burone ento, kita dadi leteh.

²⁶ Kita suba anehang Ulun uli bangsa-bangsane ane lenan, apanga kita dadi duen Ulune dogen. Kita patut suci, sawireh Ulun ene Ida Sang Hyang Widi Wasa, tur Ulun maraga suci.

²⁷

Asing-asing anak muani wiadin anak luh ane ngidih pepineh teken roh-roh anake ane suba mati, ia patut kencurin baan batu kanti mati. Anake ane buka keto ento ngemasin mati ulihan kapelihannyane padidi.”

21

¹

Ida Sang Hyang Widi Wasa ngandikayang Dane Musa mangda dane ngrauhang sabdan Idane ring parapandita katurunan Dane Harun kadi asapuniki: “Anake ane dadi pandita tusing dadi ngletehin dewekne, ulihan ia milu mrateka kadang warganne ane mati,

² sajabaning yening ane mati ento memenne, bapanne, pianakne muani, wiadin luh, nyama tugelan ane muani,

³ wiadin nyamanne ane luh ane tonden nganten, ane enu ngerob ajaka ia.

⁴ Ia tusing dadi ngletehin dewekne uli krana matin anake ane enu patut makadang ajak ia ulihan juang kajuang.

⁵

Anake ane dadi pandita tusing dadi nyukur sirahne, yadiastu angan abedik, buina ia tusing dadi nguris jenggotne wiadin nues-nues awakne aji tiuk mangan buat ngedengang dewekne mungguing ia katempuh baan kaduhkitan.

⁶ Ia suba kanehang dadi duen Ulune, sawireh keto ia tusing dadi ngletehin parab Ulune. Ia anak ane patut ngaturang aturan rayunan teken Ulun. Sawireh keto ia patut suci.

⁷ Anak ane dadi pandita tan wenang nyuang anak ane dadi panayang wiadin anak luh ane tusing bajang genten wiadin ane suba sapihan, sawireh panditane ento suba kanehang dadi duen Ulune.

⁸ Pasamuane patut ngangkenin, mungguing panditane ento, duen Ulune ane anehang Ulun, sawireh ia ane ngaturang aturan rayunan di ajeng Ulune. Ulun ene Sang Hyang Widi Wasa. Ulun maraga suci, tur Ulun nyuciang kaulan Ulune.

⁹ Yening ada pianak pandita ane luh dadi panayang, anake luh ento nganistayang bapanne. Dadinne ia patut katunjel kanti mati.

¹⁰

Sang Pandita Agung suba kaselik tur kanehang pabuat Ida Sang Hyang Widi Wasa buat nyalanang darmaning pandita. Ia kamanggehang malantaran sirahne kasriokin aji lengis ane suci tur kasalukin panganggon pandita. Sawireh keto ia tan wenang nepang bokne tusing masuah, wiadin nyetset panganggonne buat nyinahang dewekne nandang duhkita.

¹¹ [11-12] Ia suba katurang di ayun Ulune dadi due seselikan Ulune, dadinne ia tan wenang ngletehin dewekne. Ia masih tusing dadi ngletehin Kemah Ulune ane suci, malantaran ia magedi uli ditu laut macelep ka umah anake ane ngelah alangan mati, yadianja anake ane mati ento bapanne wiadin memenne padidi.

¹²

¹³ [13-14] Ia tuah dadi nganten ajak anak luh bajang genten ane uli palingsehannyane niri. Tur tusing dadi nganten ngajak anak balu wiadin sapihan wiadin anak luh ane taen dadi panayang.

¹⁴

¹⁵ Yen ia malaksana buka keto, dadinne pianak-pianakne ane benehne suci, lakar dadi leteh. Ulun ene Sang Hyang Widi Wasa tur Ulun suba nyelik muah nganehang ia dadi Pandita Agung.”

¹⁶

Ida Sang Hyang Widi Wasa ngandikayang Dane Musa,

¹⁷ mangda ngrauhang sabdan Idane ring Dane Harun kadi asapuniki: “Anak ane cacad uli katurunan kitane, tan wenang ngaturang aturan rayunan di ayun Ulune. Unduke ene patut kapagehang kanti salawas-lawasne.

¹⁸ Anak ane cacad, tusing pesan dadi ngaturang aturan, luire anak buta, anak rumpuh, cacad mua muah pawakane,

¹⁹ anak ane kepek limanne wiadin batisne,

²⁰ anak ane bungkut wiadin kate, anak ane sakit mata muah sakit kulit, muah anak ane suba materes.

²¹ Anak ane cacad uli katurunan Pandita Harune tan wenang ngaturang aturan rayunan di ayun Ulune.

²² Nanging ia dadi naar lungsuran aturan rayunane ento, yadian surudan aturan rayunan ane suci, wiadin surudan aturan rayunan ane maha suci.

²³ Sawireh ia cacad ia tan wenang maekin korden panyelenge ane suci, wiadin maekin pamorboran aturane ento. Ia tusing dadi ngletehin barang-barang ane suci, sawireh Ulun ene Sang Hyang Widi Wasa, tur Ulun ane nyuciang barang-barange ento.”

²⁴

Kenginan, kadi asapunika sane karauhang antuk Dane Musa ring Dane Harun miwah paraputran danene ping kalih ring parabangsa Israele makasami.

22

¹

Ida Sang Hyang Widi wasa ngandikayang Dane Musa,

² mangda dane ngrauhang sabdan Idane ring Dane Harun miwah putra-putran danene kadi asapuniki: “Edaja kita nganistayang parab Ulune ane suci. Sawireh keto, aturangja madasar astiti bakti sakancan aturan ane katurang baan bangsa Israele teken Ulun. Ulun ene Ida Sang Hyang Widi Wasa.

³ Yen ada uli pantaran katurunan kita ane leteh maekin aturan-aturan ane suci, ane kasuciang baan bangsa Israele buat Ulun, ia tusing dadi buin ngayah di pamuspane. Pidabdabe ene manggeh kanti salawas-lawasne. Ulun ene Ida Sang Hyang Widi Wasa.

⁴

Katurunan Harune ane kena sakit kulit ane raat, wiadin ane mesuang nanah, tan wenang naar surudan aturane ane suci, satondene ia kadanin bresih manut sopacaraning agama. Panditane kadanin leteh yen ia ngusud barang ane leteh ulihan kena bangke. Ia masih kadanin leteh yen ia mesuang semara,

⁵ keto masih yening ia ngusud buron wiadin anak ane leteh.

⁶ Pandita ane suba leteh, ia enu tetep leteh kanti kayang makasanja. Buina sasubane sanja yen ia tonden manjus, ia masih tusing dadi naar surudan ane suci.

⁷ Sasubane suryane surup, ia dadi bresih, ditu mara ia dadi naar surudan ane suci ento, sawireh mula ento ane dadi dedaarannyane.

⁸ Ia tan wenang naar ben buron ane mati ulihan tusing matampah, wiadin ane mati ulihan sarap sato galak. Yen ia naar ia dadi leteh. Ulun ene Ida Sang Hyang Widi Wasa.

⁹

Sakancan panditane patut ninutin pidabdabe ane suba paicayang Ulun. Yening tuara keto ia lakar pelih tur mati, sawireh ia suba mamurug pidabdab-pidabdabe ane suci ento. Ulun ene Sang Hyang Widi Wasa tur Ulun ane suba nyelik ia buat Ulun.

¹⁰

Tuah kulawargan panditane dogen ane dadi naar surudan aturane ane katur teken Ulun. Anake ane lenan tusing pesan wenang, yadiastun anake ento ngerob ngajak panditane ento wiadin dadi pangayahne.

¹¹ Nanging sakancan panjak panditane ane belina baan pipisne padidi, wiadin ane lekad di umah sang panditane ento, ia dadi naar dedaaran ane tampina baan panditane ento.

¹² Pianak panditane ane luh, ane kajuang baan anak ane tusing dadi pandita, ia tusing dadi naar surudan aturan ane katurang teken Ulun ento.

¹³ Nanging pianak panditane ane luh ane suba balu wiadin sapihan, tur tusing ngelah pianak, tur suba mulih bajang ka umahne, ia dadi naar ane dadi pikolih sang pandita, reramannyane. Tuah kulawargan panditane dogen ane dadi naar surudan aturane.

¹⁴

Yening ada anak ane tusing kulawargan sang pandita ulihan tusing nyelepang suba naar surudan aturan ane suci ento, ia patut masilihin teken sang pandita amun ajin aturane ento, buina kimbuhin buin apahliman.

¹⁵ Parapanditane tan wenang ngletehin aturane ane kanehang pabuat Ulun,

¹⁶ malantaran ia maang anak ane tusing patut naar surudan aturane ento. Unduke ento lakar ngranayang anake ento pelih tur kena ukuman. Ulun ene Sang Hyang Widi Wasa tur Ulun ane nyuciang aturane ento.”

¹⁷

Ida Sang Hyang Widi Wasa ngandikayang Dane Musa,

¹⁸ mangda dane ngrauhang ring Dane Harun miwah ring paraputran danene, ping kalih ring bangsa Israele makasami, pidabdabe sane inucap ring sor puniki. Yening anak Israel wiadin wong sunantara sane wenten ring pantaran wong Israele, ngaturang aturan maborbor buat sesanginnyane, wiadin buat aturan saking suka lila, wewalungane punika patut tan paceda.

¹⁹ Mangda aturane punika prasida katrima, wewalungane punika patut muani tur tan paceda.

²⁰ Yening semeton ngaturang wewalungane sane madaging ceda, Ida Sang Hyang Widi Wasa tan pacang nrima aturane punika.

²¹ Yening wenten anak ngaturang aturan karahayuan ring ayun Ida Sang Hyang Widi Wasa buat naur sesangi wiadin buat aturan saking suka lila wewalungane punika patut tan paceda mangda sida katrima.

²² Sampunang pisan ngaturang aturan ring Ida Sang Hyang Widi Wasa aturan sane buta, sane rumpuh, wiadin sane lung wiadin sane madaging busul sane ngemu nanah, sane sakit kulit wiadin amah krayap, wewalungan sane kadi asapunika sampunang pisan aturanga minakadi aturan rayunan ring pamorboran aturane.

²³ Yen buat aturan saking suka lila, semeton dados ngaturang wewalungan sane kirang becik wiadin sane nenten sampurna pawakanipune, nanging yening jaga anggen naur sesangi, wewalungane sane kadi asapunika nenten patut.

²⁴ Sampunangja ngaturang wewalungan sane batun butuhnyane sampun macaket, encak, materes wiadin makutang. Paindikane sane kadi asapunika tan wenang kamargiang ring jagat semetone.

²⁵

Wewalungan sane kakeniang saking wong sunantara, nenten patut kanggen aturan rayunan. Wewalungan sane kadi asapunika kawastanin cacad tur nenten sida katrima.

²⁶

[26-27] Godel banteng, panak biri-biri wiadin kambing sane wau lekad, patut kasarengang ring memenipune pitung rahina suenipun. Sasampune punika wau wewalungane punika dados kanggen aturan rayunan.

²⁷

²⁸ Sampunangja nganggen aturan banteng ngajak godelnyane, biri-biri miwah panaknyane, wiadin kambing sareng panaknyane sibarengan sajeroning arahina.

²⁹ Yening semeton ngaturang aturan panyuksma ring ayun Ida Sang Hyang Widi Wasa, semeton patut nglaksanayang indike punika manut pidabdab, mangda aturan semetone punika katrima.

³⁰ Ajengangja aturane punika ring rahina punika ugi, sampunang wenten sisannyane angan akidik, kantos benjangnyane.

³¹

Ida Sang Hyang Widi Wasa masabda sapuniki: “Tinutinja pituduh-pituduh Ulune. Ulun ene Ida Sang Hyang Widi Wasa.

³² Edaja nganistayang parab Ulune ane suci. Sawatek bangsa Israele makejang patut ngangkenin Ulun ene maraga suci. Ulun ene Sang Hyang Widi Wasa, tur Ulun ene nyuciang kita ajak makejang.

³³ Ulun nuntun kita pesu uli Mesir apanga Ulun dadi Widin kitane. Ulun ene Ida Sang Hyang Widi Wasa.”

23

¹

Ida Sang Hyang Widi Wasa maicayang ring Dane Musa,

² pidabdab-pidabdab indik rerainan-rerainan sapuniki: “Nuju rerainan-rerainane ento bangsa Israele patut pada mapunduh buat ngaturang pangubakti.

³ Dijaja kita nongos, kita patut ngluihang dina Sabate ento di ayun Ida Sang Hyang Widi Wasa. Nem dina makelonne kita kalugra magarapan. Nanging ingetangja mungguing dina ane kaping pitu ento dina Sabat, dina buat mareren. Di dinane ento edaja kita magarapan, nanging pada mapunduhja buat mabakti.

⁴ Di dina ane suba kapastiang, rerainan-rerainane ene patut kuar-uarang.”

⁵

Rerainan Paskah, ane kaluihang buat ngluihang Ida Sang Hyang Widi Wasa ngawit uli surup suryane, tanggal patbelas sasih ane kaping pisan.

⁶ Buin maninne tanggal limolas, ento ngawitin Rerainan Roti Tan Paragi, tur kita tusing dadi naar roti ane misi ragi, pitung dina makelonne.

⁷ [7-8] Pitung dina makelonne kita patut ngaturang aturan rayunan di ayun Ida Sang Hyang Widi Wasa. Di dina ane kapangawit muah ane kaping pitu sajeroning rerainane ento, kita patut mapunduh buat ngaturang bakti, tur tusing pesan dadi magae.

⁸

⁹

[9-10] Yening kita suba neked di tanah ane kapaicayang teken kita baan Ida Sang Hyang Widi Wasa, tur kita suba manyi gandum, ditu seetan gandum kitane ane pangawit, patut aturang kita teken sang pandita.

¹⁰

¹¹ Di dinane ane kapangawit sasuban dina Sabate, sang pandita patut ngaturang gandume ento di ayun Ida Sang Hyang Widi Wasa, makadadi aturan ane istimewa, apanga kita kaledangin baan Ida Sang Hyang Widi Wasa.

¹² Dikalane kita ngaturang aturan gandume ento, kita masih patut ngaturang aturan panak biri-biri ane matuuh atiban, ane tan paceda, makadadi aturan ane maborbor.

¹³ Sibarengan teken aturane ento, kita masih patuh ngaturang tepung ane misi lengis saitun duang kilogram, makadadi aturan rayunan. Bon aturane ento lakar ngranayang ledang pakayunan Ida Sang Hyang Widi Wasa. Sibarengan teken aturane ento, kita patut masih ngaturang aturan anggur aliter.

¹⁴ Satonden kita ngaturang aturane ento di ayun Ida Sang Hyang Widi Wasa, eda pesan kita naar asil gandum ane anyar ento, yadian ane enu matah, ane manyahnyah wiadin matunu. Pidabdabe ene patut kamanggehang baan katurunan kitane kanti salawas-lawasne.

¹⁵

Sasubane dina Sabat, dikalane kita ngaturang seetan gandum kitane ane pangawit teken Ida Sang Hyang Widi Wasa, itungja pitung uku makelonne.

¹⁶ Di dina ane kaping seket, nah ento sasuban dina Sabat ane kaping pitu, kita patut buin ngaturang aturan sesajen di ayun Ida Sang Hyang Widi Wasa.

¹⁷ Asing-asing kulawarga patut ngaturang roti duang bungkul, makadadi aturan ane istimewa di ayun Ida Sang Hyang Widi Wasa. Asing-asing rotine ento patut malakar tepung duang kilogram liunne tur kisinin ragi, tur patut katurang di ayun Ida Sang Hyang Widi Wasa, makadadi aturan gandum ane pangawit ane lakar kanyi.

¹⁸ Sibarengan teken rotine ento, pasamuane patut masih ngaturang biri-biri ane matuuh ataun pitung ukud, sampi jagiran aukud muah kambing duang ukud. Makejang ento tusing pesan dadi ada cacadne. Wewalungane ento patut katurang di ayun Ida Sang Hyang Widi Wasa, makadadi aturan maborbor, sibarengan teken aturan gandum muah aturan anggure. Bon aturane ento ngranayang ledang pakayunan Ida Sang Hyang Widi Wasa.

¹⁹ Kita patut masih ngaturang kambing muani aukud makadadi aturan panyupat dosa, muah biri-biri ane matuuh ataun duang ukud, makadadi aturan karahayuan.

²⁰ Sang pandita patut ngaturang roti muah panak biri-birine makadadua ento, makadadi aturan istimewa di ayun Ida Sang Hyang Widi Wasa, tur ento dadi pikolih sang pandita. Aturan-aturane ento makejang suci.

²¹ Di dinane ento kita tusing pesan dadi ngarap gegaen kitane, nanging kita patut mapunduh buat ngaturang bakti. Katurunan kitane patut ngamanggehang pidabdabe ento di masa ane lakar teka sakayang-kayang, dijaja ia magumana.

²²

Dikalane kita manyi, edaja anyina gandume ane mentik di sisi-sisin tegalane, tur edaja kita malipetan buat lakar nuduk unuhan gandume. Depangja ento makutang pabuat anake tiwas muah wong pendonane. Ida Sang Hyang Widi Wasa ane dadi Widin kitane.

²³

[23-24] Nuju tanggal satu sasih ane kaping pitu, ento patut kaluihang makadadi dina ane kaselik buat mareren. Di dinane ento, di kalane trompet-trompete kasuarayang, kita ajak makejang patut pada mapunduh buat ngaturang bakti.

²⁴

²⁵ Aturangja aturan rayunane teken Ida Sang Hyang Widi Wasa, tur eda pesan kita magarapan.

²⁶

[26-27] Nuju tanggal dasa bulan ane kaping pitu, ento Rerainan Panyupat Dosan rakyate, ane patut kajalanang ngataun. Di dinane ento kita ajak makejang patut mapuasa. Kita patut mapunduh buat ngaturang bakti, tur ngaturang aturan rayunan teken Ida Sang Hyang Widi Wasa.

²⁷

²⁸ Di dinane ento kita tusing dadi magae, sawireh di dinane ento Rerainan Panyupat Dosa.

²⁹ Nyenja ane mamurug puasane di dinane ento, ia tusing enu kangkenin dadi kaulan Ida Sang Hyang Widi Wasa.

³⁰ Buina yen ada anak ane ngarap gegaen di dinane ento, Ida Sang Hyang Widi Wasa lakar nyisipang ia baan ukuman mati.

³¹ Pidabdabe ene patut kamanggehang baan pianak cucun kitane turun-tumurun, yadian dijaja ia nongos.

³² Ngawit uli tanggal sia sasihe ento, kanti neked surup surya tanggal adasa, kita patut ngluihang rerainane ento makadadi rerainan ane kaselik buat mareren. Di dinane ento awai mepek kita patut mapuasa, tur tusing pesan dadi madaar.

³³

[33-34] Rerainan Pondok Daune ento ngawitin tanggal limolas sasih ane kaping pitu, kanti pitung dina makelonne.

³⁴

³⁵ [35-36] Sajeroning pitung dina ento sabilang dina kita patut ngaturang aturan rayunan. Di dinane ane kapangawit muah ane kaping kutus, sajeroning rerainane ento, kita patut mapunduh buat ngaturang bakti muah ngaturang aturan rayunan, tur tusing pesan dadi magae.

³⁶

³⁷

Nah ento rerainan ane manut teken agama, ane patut luihang kita. Di dinane ento kita patut mapunduh buat ngaturang bakti ngluihang Ida Sang Hyang Widi Wasa, saha ngaturang aturan rayunan, aturan maborbor, aturan sesajen, aturan wewalungan muah aturan yeh anggur ane liunne manut ane kaperluang sabilang dina.

³⁸ Rerainane ene makadadi imbuh buat dina Sabat ane biasa, tur aturan-aturane ento masih dadi imbuh aturan-aturan kitane ane biasa, nah ento imbuh pabuat aturan panaur sesangin kitane muah imbuh pabuat aturan ane saking suka lila ane aturang kita teken Ida Sang Hyang Widi Wasa.

³⁹

Sasubane kita suud manyi kita patut ngluihang rerainane ene pitung dina makelonne, ngawit tanggal limolas sasih kapitu. Dina ane pangawit ento patut dadi dina ane kaselik buat mareren.

⁴⁰ Di dinane ento alapja makudang woh-wohan kitane ane paling melaha uli pabianan kitane tur empakja masih makudang-kudang don palma, muah carang-carang kayu ane ngrembun, tur kawitin rerainan ane manut sopacaraning agama, buat ngluihang Ida Sang Hyang Widi Wasa, Widin kitane.

⁴¹ Rerainane ento patut luihang kita pitung dina makelonne. Katurunan kitane manian patut ngamanggehang pidabdabe ene kanti salawas-lawasne.

⁴² Sawatek bangsa Israele makejang patut nongos di pondok-pondok don-donane ento pitung dina,

⁴³ apanga katurunan kitane nawang mungguing Ida Sang Hyang Widi Wasa ngandikayang bangsa Israele nongos di pondok-pondok ane nista dugase Ida nantan bangsane ene rarud uli Mesir. Ida ento maraga Ida Sang Hyang Widi Wasa, Widin kitane.

⁴⁴

Kadi asapunika Dane Musa nerangang ring bangsa Israele, pidabdab-pidabdab ngeniang indik ngluihang rerainan agamane buat ngluihang Ida Sang Hyang Widi Wasa.

24

¹

Ida Sang Hyang Widi Wasa ngandikayang Dane Musa,

² mangda dane ngrauhang pidabdab-pidabdabe puniki ring bangsa Israele sapuniki: Baktaangja minyak saitun sane tulen tur sane pinih becika buat nagingin lampu-lampune sane wenten ring Kemah Sucine, mangda lampu-lampune punika mrasidayang tetep kanyitin.

³ Nyabran sore Dane Harun patut ngenyitin lampu-lampune punika tur manggayang ngendih kantos makasemengan ring ayun Ida Sang Hyang Widi Wasa, ring jaban korden panyelenge, ring ajeng Peti Prajanjiane, sane wenten ring Genahe Sane Maha Suci. Pidabdabe punika patut kamargiang ngantos rauh salami-laminipun.

⁴ Dane Harun patut nabdab miwah ngetangang lampu-lampune sane wenten ring tatakan lampune sane malakar mas murni punika, mangda lampu-lampune punika tetep kanyitin ring Kemah Linggih Ida Sang Hyang Widi Wasa nyabran wengi.

⁵

Rarisang semeton ngambil tepung roras kilogram, tumuli dadosangja roti roras bungkul.

⁶ Raris genahang rotine punika ring mejane sane malapis antuk mas murni, sane wenten ring Kemah Linggih Ida Sang Hyang Widi Wasa. Rotine punika patut jejerang semeton dados kalih jejer, nemnem sane ajejer.

⁷ Sabilang jejer rotine punika patut kadagingin menyan murni. Menyane punika makadados silur roti, samaliha makacihna mungguing rotine punika katurang dados aturan rayunan ring Ida Sang Hyang Widi Wasa.

⁸ Nyabran rahina Sabat, kantos benjang pungkur patut tansah wenten roti sane kagenahang ring Kemah Linggih Ida Sang Hyang Widi Wasa. Indike punika dados tetegenan bangsa Israele kantos salami-laminipun.

⁹ Rotine punika dados pikolih Dane Harun miwah katurunannyane. Dane patut ngajengang rotine punika ring genahe sane suci, santukan rotine punika dados pahan sane kalintang suci, saking rayunan sane katurang ring Ida Sang Hyang Widi Wasa, sane dados pikolih panditane.

¹⁰

[10-11] Ring pakemahan bangsa Israele, wenten anak muani adiri, sane bapan ipune wong Mesir miwah memenipune wong Israel. Memennyane punika mawasta Selomit, pianak Dibri saking suku Dan. Sedek rahina anu anake punika muyutan ngajak anak Israel. Daweg ipun muyutan punika, ipun mamisuh Ida Sang Hyang Widi Wasa. Duaning punika, ipun raris kejuk tumuli katurang ring ajeng Dane Musa.

¹¹

¹² Irika ipun katahan, buat nyantosang pangandikan Ida Sang Hyang Widi Wasa ngeniang indik sane patut katibakang marep ring anake punika.

¹³

Ida Sang Hyang Widi Wasa tumuli masabda ring Dane Musa, kadi asapuniki:

¹⁴ “Ajakja anake ento pesu, ka jabaan pakemahane. Sawatek anake ane suba ningeh ia mamisuh, patut ngungkulang limanne di tendas anake ento, makadadi saksi mungguing anake ento saja pelih. Sasubane keto, pasamuane makejang patut ngencurin anake ento aji batu kanti mati.

¹⁵ Suud keto laut uar-uarang teken bangsa Israele, mungguing nyenja ane mamisuh Ida Sang Hyang Widi Wasa, ia patut ngemasin parisolahnyane,

¹⁶ tur kukum mati. Nyenja, yadian ia anak Israel wiadin wong sunantara ane nongos di Israel, yen ia nemah Ida Sang Hyang Widi Wasa, ia patut kencurin aji batu kanti mati baan pasamuane makejang.

¹⁷

Nyenja ngamatiang anak, ia patut kukum mati.

¹⁸ Nyenja ngamatiang ubuhan anak lenan, ia patut masilihin. Ane dadi dasar, nah ento angkihan patut silurin baan angkihan.

¹⁹

Yen ada anak mencanen anak lenan, kudiangaja anake ento, ia patut kawales patuh buka keto.

²⁰ Yen ia kanti ngelungang tulang, salah tunggal tulangnyane patut masih kaelung. Yen ia ngranayang anake ento buta matanne aneh, matan iane patut masih kabutaang aneh. Yen ia nglempag anak lenan kanti kecag giginne, ia patut kalempag apang kanti kecag salah tunggal giginne. Cacad ane buka kenkenja gaene marep teken anak lenan, ia patut nampi pangwales ane patuh buka keto.

²¹ Nyenja ane ngamatiang ubuhan, ia patut masilihan, nanging nyenja ngamatiang jlema, ia patut kukum mati.

²² Pidabdabe ene patut kanggon di pantaran kitane ajak makejang, yadian ia bangsa Israel wiadin wong sunantara ane nongos di pantaran kitane, sawireh Ulun ene Sang Hyang Widi Wasa, Widin kitane.”

²³

Sasampune Dane Musa mabaos kadi asapunika ring bangsa Israele, pasamuane tumuli ngajak anake sane sampun nemah Ida Sang Hyang Widi Wasa punika medal saking pakemahan, tumuli kencurin antuk batu ngantos padem. Kadi asapunika bangsa Israele ngamargiang pituduh Ida Sang Hyang Widi Wasa sane sampun sabdayang Ida ring Dane Musa.

25

¹

Ring duur Gunung Sinaine Ida Sang Hyang Widi Wasa masabda ring Dane Musa,

² tur ngandikayang dane mangda ngrauhang pidabdab-pidabdabe sane inucap ring sor puniki, ring bangsa Israele: Yening semeton sampun ngaug jagat sane pacang kapaicayang ring semeton antuk Ida Sang Hyang Widi Wasa, sabilang taun sane kaping pitu, semeton nenten dados ngarap tanahe punika. Malantaran kadi asapunika semeton ngluihang Ida Sang Hyang Widi Wasa.

³ Sajeroning nem taun suenipun, semeton patut nandurin pategalan semetone, mretenin abian anggur semetone, miwah munduhang pamupon semetone.

⁴ Nanging taun sane kaping pitu punika makasami kanehang pabuat Ida Sang Hyang Widi Wasa. Ring taun punika tanahe patut kabanggayang neng tur nenten dados kagarap. Pategalan semetone sampunang tandurina, muah sampunang pretenina abian anggur semetone.

⁵ Samaliha buah embong gandum wiadin buah gandum sane ngentikang iba ring tegal semetone, sampunang anyina. Kadi asapunika taler buah anggur sane wetu saking punyan anggure sane tan mapretenan, sampunang alapa. Santukan taune punika taun pararianan pabuat tanahe punika.

⁶ Nanging yadiastun kadi asapunika, tanahe punika jaga ngwetuang pamupon, sane jaga dados pangupa jiwa pabuat semeton, pabuat panjak-panjak semetone, pabuat buruh-buruh semetone, miwah pabuat wong sunantara sane magenah ring pantaran semetone.

⁷ Kadi asapunika taler pabuat ingon-ingon semetone, miwah sato-sato galak sane wenten ring tegalan-tegalan semetone. Sakancan sane kapupuang antuk tanahe punika sami dados ajengang.

⁸

Rarisang etang pitung taun ping pitu, makasami dados petang dasa sia taun.

⁹ Ring tanggal sane kaping dasa sasih sane kaping pitu inggih punika ring Rerainan Panyupat Dosane, rarisang nikayang anak adiri nyuarayang trompet milehan ring sakuubing panegara.

¹⁰ Kadi asapunika patutipun semeton nganehang taun sane kaping seket punika, saha ngwarah-warahang kabebasan ring sakancan anake sane magenah ring panegarane punika. Ring taun punika sakancan arta brana sane sampun kadol, patut kawaliang ring sang sane pecak nerbeang wiadin ring katurunannyane. Anake sane sampun kadol dados panjak, ipun patut kawaliang ring kulawarganipune.

¹¹ Sampunangja semeton nandurin pategalan semetone, wiadin ngampung gandum sane ngentikang iba wiadin ngalap buah anggur saking abian anggur semetone sane nenten mapretenan.

¹² Taun punika dados taun sane suci pabuat semeton. Wantah pamupon entik-entikan sane ngentikang iba ring tegalan semetone kewanten sane dados ajengang semeton.

¹³

Ring taun punika, sakancan arta branane sane sampun kadol patut kawaliang ring sang sane pecak nerbeang.

¹⁴ Duaning punika, yening semeton ngadol tanah ring sesama bangsan semetone, wiadin numbas tanah saking ipun, sampunang ngamargiang padol punika nganggen cara sane nenten adil.

¹⁵ Pangargan tanahe punika patut ketang manut pamupon sane jaga kapupuang kantos rauh ring Taun Kabebasan sane jaga rauh punika.

¹⁶ Yening gebogan taune punika akeh, pangargan tanahe punika maelan. Nanging yen gebogan taune punika akidik, pangarganipun taler patut murahan, santukan sane kadol punika wantah pamupon tanahe punika.

¹⁷ Sampunangja semeton melog-melog sesama bangsan semetone, nanging semeton patut ajerih ring Ida Sang Hyang Widi Wasa Widin semetone.

¹⁸

Tinutinja sakancan pidabdab miwah pituduh Ida Sang Hyang Widi Wasa, mangda semeton prasida muponin urip saha rahayu ring jagate punika.

¹⁹ Tanahe irika jaga ngwetuang pamuponnyane, ngantos semeton jaga molih pangan kinum sane cukup, miwah magenah irika saha sutrepti.

²⁰

Nanging menawita wenten anak sane jaga mataken ngeniang indik sane jaga kajengang ring taun sane kaping pitu punika, rikala tanahe punika nenten katandurin miwah pamuponnyane nenten kapunduhang.

²¹ Ring taun sane kaping nem, Ida Sang Hyang Widi Wasa jaga ngamertanin tanahe punika, ngantos pamuponipun cukup buat kajengang sajeroning kalih taun.

²² Samaliha rikala semeton nandurin tegal semetone ring taun sane kaping kutus, pamupon semetone sane ring taun sane kaping nem punika kantun wenten sisanipun buat dados ajeng-ajengan semetone. Tur pasediaan ajeng-ajengan semetone jaga cukup ngantos rauh masannya semeton munduhang pamupon semetone sane ring taun sane kaping kutus punika.

²³

Tanah semetone punika nenten dados kadol ngantos padem, santukan tanahe punika boya druen semetone, nanging druen Ida Sang Hyang Widi Wasa. Semeton sakewanten kalugra migunayang tanahe punika, waluya sakadi wong sunantara.

²⁴

Yening wenten tanah sane kadol, wewenang sang sane pecak nruenang jaga nebus tanahe punika, patut tansah kelingang.

²⁵ Yening wenten anak Israel sane dados tiwas, kantos ipun tan dados tan jaga ngadol tanahipune, kadang wargannya sane paling nampeke patut nebus tanahnyane punika.

²⁶ Anak sane nenten maderbe kadang warga buat nebus tanahe punika, menawita benjang pungkur ipun newek mrasidayang nebus, rikalaning ipun sampun sugih tur maderbe jinah sane cukup buat nebus tanahe punika.

²⁷ Yening kadi asapunika, anake punika patut naur pangargan pamupon tanahe punika salamin taun sane jaga rauh, sadurung taun kabebasane punika rauh, ring sang sane sampun numbas tanahnyane punika. Sapanglanturipun ring taun punika ugi tanahe punika jaga kawaliang ring ipun.

²⁸ Nanging yen ipun nenten maderbe jinah cukup buat nebus tanahe punika, sang sane sampun numbas tanahe punika tetep kantun kuasa ring tanahe punika ngantos rauh Taun Kabebasan sane jaga rauh. Ring Taun Kabebasan punika tanahe punika jaga kawaliang ring sang sane pecak nerbeang.

²⁹

Yening wenten anak ngadol umah sane magenah ring kota sane matembok panyengker, sasampun maletan ataun mepek, ipun wenang nebus umahipune punika.

³⁰ Nanging yening umahe punika nenten tumbas ipun malih sajeroning ataun punika, ipun nenten dados malih nebus umahe punika. Kenginan umahe punika tetep dados derben anake sane sampun numbas punika, miwah katurunanipune. Ring Taun Kabebasane, umahe punika nenten jaga kawaliang.

³¹ Pabuat umah sane wenten ring desa sane nenten matembok panyengker, irika kamargiang pidabdab sakadi pidabdab pabuat pategalane, inggih punika: Sang sane pecak nerbeang dados malih nebus, tur ring Taun Kabebasane umahe punika patut kawaliang.

³² Nanging wong Lewine, tan pasengker dados nebus paderbeannyane ring kota-kota sane sampun kapastiang buat ipun.

³³ Yening wenten wong Lewi ngadol umah ring salah tunggil kotane punika, tur ipun nenten mrasidayang nebus malih, umahe punika patut kawaliang ring ipun ring Taun Kabebasane punika. Santukan umah wong Lewine ring kota-kotannyane punika, sujatinipun dados cecatun ipun ring pantaran bangsa Israele.

³⁴ Nanging pategalan sane wenten ring kiwa tengen kotan wong Lewine, nenten pisan dados kadol. Punika dados cecatun wong Lewine buat salami-laminipun.

³⁵

Yen wenten wong Israel sane mapisaga ngajak semeton raris ipun dados tiwas, tur ipun nenten mrasidayang ngupa pira idupnyane, semeton patut nulungin ipun, aji amunapija biasane semeton ngwehin anake sane nanggap upah ring semeton.

³⁶ [36-37] Sampunangja semeton nagih putran jinah semetone sane paselangang semeton ring anake punika, nanging patut semeton ajerih ring Ida Sang Hyang Widi Wasa, tur banggayangja anake punika mapisaga ngajak semeton. Samaliha sampunangja semeton ngalih bati sajeroning pangan kinum sane adol semeton ring ipun.

³⁷

³⁸ Sapunika pituduh Ida Sang Hyang Widi Wasa Widin semetone, sane sampun nantan semeton kesah saking Mesir, jaga maicayang tanah Kanaane punika ring semeton, mangda Ida dados Widin semetone.

³⁹

Yen wenten wong Israel sane mapisaga ngajak semeton, raris ipun dados tiwas, kantos ipun ngadol dewekipune dados panjak ring semeton, kenginan semeton nenten dados nguduhang ipun buat ngambil pakaryan sakadi panjak.

⁴⁰ Ipun patut ajak semeton sakadi anak nanggap upah ring semeton tur makarya pabuat semeton, kantos rauh Taun Kabebasane punika.

⁴¹ Ring taune punika, ipun miwah pianak-pianakipune patut makaon saking umah semetone, tur mawali ring kulawargan ipune, miwah tanah padruen leluuripune.

⁴² Bangsa Israel punika kaulan Ida Sang Hyang Widi Wasa. Ida sane nuntun ipun kesah saking Mesir, punika awinannya ipun tan wenang kadol dados panjak.

⁴³ Duaning punika wong Israel sane mamanjak ring semeton, sampunang ipun kasarina. Semeton patut ajerih ring Widin semetone.

⁴⁴ Yening semeton merluang panjak, semeton kengin numbas ring pantaran bangsa-bangsa sane wenten ring kiwa tengen semetone.

⁴⁵ Semeton kengin numbas pianak-pianak wong sunantara sane wenten ring pantaran semetone. Pianak-pianak wong sunantara sane lekad ring panegaran semetone, ipun kengin dados druen semetone.

⁴⁶ Samaliha kengin taler ipun patamiang semeton ring oka-okan semetone buat dados panjak saumur idup. Nanging marep ring sesaman semetone bangsa Israel, semeton tan wenang malaksana kasar.

⁴⁷

Upaminipun wenten wong sunantara sane magenah ring pantaran semetone dados anak sugih, tur sesaman semetone wong Israel dados tiwas, raris ipun ngadol dewekipune dados panjak ring wong sunantara punika, wiadin ring salah tunggil kulawargan wong sunantara punika.

⁴⁸ Sasampune ipun kadol, wong Israel punika kantun wenang katebus. Salah tunggil saking nyamanipune muani,

⁴⁹ wiadin pamanipune, wiadin misanan ipune, wiadin salah tunggal kadang warganipune sane pinih nampeka kantun dados nebus ipun. Wiadin yen benjang pungkur ipun newek cukup maderbe jinah, ipun dados nebus dewek ipune niri, mangda ipun bebas.

⁵⁰ Anake sane mamanjak punika patut mapiguman ngajak anake sane numbas ipun punika. Ipun sareng kalih patut ngitung taun-taun ngawit saking ipun dados panjak kantos rauh ring Taun Kabebasan sane jaga rauh. Panebus punika patut kapastiang manut upah sane katampi antuk anake nanggap upah.

⁵¹ [51-52] Anake sane dados panjak punika patut ngwaliang apahan saking pangarganipune sane kantun,

⁵²

⁵³ satmaka ipun sampun sakadi pananggap upah sane sampun nampi upah nyabran taun. Pamekelipune nenten dados mambek kasar marep ring ipun.

⁵⁴ Yening manut salah tunggil carane punika ipun tan prasida kabebasang, ipun miwah pianak-pianakipune patut kabebasang ring Taun Kabebasane sane jaga rauh.

⁵⁵ Wong Israel tan wenang dados panjak saumur idup, santukan bangsa Israel punika kaulan Ida Sang Hyang Widi Wasa. Ida Sang Hyang Widi Wasa sane sampun nuntun ipun kesah saking Mesir. Ida punika sane dados Widinipune.

26

¹

Ida Sang Hyang Widi Wasa masabda sapuniki: “Edaja kita ngae arca wiadin nyujukang bedogol wiadin tugu batu ane mukir, buat lakar kasumbah. Ulun ene Ida Sang Hyang Widi Wasa, Widin kitane.

² Luihangja rerainane ane manut sopacaraning agama, tur ajiangja tongos panyungsungan Ulune. Ulun ene Sang Hyang Widi Wasa.

³

Yening kita malaksana satinut teken pidabdab-pidabdab Ulune, sairing teken pituduh-pituduh Ulune,

⁴ Ulun lakar nurunang ujan dikalan masannyane, apanga tanahe ngwetuang pamuponnyane, muah punyan woh-wohane pada mabuah.

⁵ Pamupon tanah kitane lakar maliah-liah, kanti yen suba benehne ngalap buah anggur, kita enu sedeng itepe manyi gandum. Tur dikalan suba masanne nyambehang gandum, kita enu iteh ngalap buah anggur. Kita lakar tetep cukup ngelah pangan kinum tur lakar muponin rahayu di gumin kitane.

⁶

Ulun lakar nedunang kerta rahayu di gumin kitane kanti kita nyidayang pules saha tusing ngelah jejeh teken nyen-nyen. Ulun lakar ngaadang buron-burone ane ngranayang baya uli gumin kitane, buina tusing lakar ada perang buin ditu.

⁷ Kita lakar ngalahang musuh-musuh kitane.

⁸ Ajak lelima kita nyidayang ngalahang musuh satus tur kita ajak satus lakar nyidayang ngalahang musuh dasa tali.

⁹ Ulun lakar ngamertanin kita, tur mapaica pianak liu teken kita. Apaja ane suba janjiang Ulun teken kita, ento lakar isinin Ulun.

¹⁰ Pamupon kitane lakar maliah-liah, kanti pamupone ento cukup buat ataun. Malahan kita kantos ngentungang sisan pamupon ane malunan apanga kita ngelah tongos nyimpen pamupon ane anyar.

¹¹ Ulun lakar malinggih di pantaran kitane, di Kemah Ulune ane suci, tur Ulun tusing lakar taen ninggal kita.

¹² Ulun lakar ngiangin kita. Ulun lakar dadi Widin kitane, tur kita dadi kaulan Ulune.

¹³ Ulun ene Ida Sang Hyang Widi Wasa, Widin kitane ane nuntun kita pesu uli di Mesir, apanga kita tusing buin dadi panjak. Ulun suba nyirnayang kakuasan ane ngala-ala kita, tur ngawanang kita idup buka anake ane merdeka.”

¹⁴

Ida Sang Hyang Widi Wasa masabda sapuniki: “Yening kita tusing satinut teken pituduh Ulune, kita lakar kukum.

¹⁵ Yening kita tusing nyak ngamanggehang pidabdab-pidabdab muah pituduh-pituduh Ulune, tur mamurug prajanjian ane suba adakang Ulun ngajak kita,

¹⁶ Ulun lakar ngukum kita. Ulun lakar nurunang bencana sig kitane, panyakit muah gelem ngetor ane tusing dadi segerang, kanti matan kitane buta muah idup kitane sangsara. Kita lakar nyambeh bibit, nanging kita tusing lakar mupuang asilne, sawireh musuh-musuh kitane lakar teka ngalahang kita tur nyarah kanti telah sakancan ane suba pamula kita.

¹⁷ Ulun lakar nglawan kita kanti kita kakalahang tur sakancan anake ane geting teken kita lakar mrentah kita. Kita lakar kaliput baan jejeh ngetor kanti kita lakar malaib, yadiapin tusing ada anak ane nguber kita.

¹⁸

Yening kita suba ngrasayang ukuman ane buka keto, nanging kita tusing masih nyak satinut teken Ulun, Ulun lakar ngimbuhin ukuman kitane ento kanti tikel ping pitu.

¹⁹ Kita kaliwat mrekak, nanging Ulun lakar ngilangang mrekak kitane ento. Lakar tusing ada ujan ulung, tur tanah kitane lakar tuh latuh kanti buka batune.

²⁰ Sakancan katuyuhan kitane tusing lakar mapikolih, sawireh tanah kitane tusing lakar mupuang muah punyan buah-buahan kitane tusing lakar mabuah.

²¹

Yening kita enu tetep bani nglawan Ulun, tur tusing nyak satinut teken Ulun, Ulun lakar ngimbuhin ukuman kitane kanti tikel ping pitu.

²² Ulun lakar nekaang buron galak sig kitane. Burone ento lakar nyarap pianak-pianak kitane, ngamatiang ubuhan kitane, tur nelahang kita, kanti gebogan kitane enu tuah abedik, tur rurung-rurung di gumin kitane lakar suung.

²³

Yening sasubane kita ngrasayang ukumane ento kita masih tusing nyak satinut teken Ulun, nanging enu bani nglawan Ulun,

²⁴ Ulun lakar nglawan kita tur ngukum kita aji ukuman ane tikel ping pitu abotne teken ane suba-suba.

²⁵ Ulun lakar nekaang siat sig kitane, buat ngukum kita sawireh kita suba lompang teken prajanjian iragane, buina yening kita mapunduh di kotan kitane buat nyayubang dewek kitane, Ulun lakar nibakang panyakit ane tusing dadi segerang sig kitane, kanti sing dadi tusing kita lakar nyerah teken musuh-musuh kitane.

²⁶ Kita lakar kuangan pangan kinum kanti yen ada anak luh ajaka adasa ia merluang pamanggangan roti tuah abesik dogen, buat anggona manggang rotinnyane ajaka makejang. Dedaarane ento lakar dum-dumanga, tur yen suba telah baan kita, kita enu masih marasa seduk.

²⁷

Yening sasubane kita ngrasayang ukumane ento makejang, kita enu masih tetep bani nglawan Ulun, tur tusing nyak satinut teken Ulun,

²⁸ Ulun lakar nglawan kita maduluran bebendu ane sanget pesan, laut ngukum kita buin pitung tikelan sangetan teken ane suba-suba.

²⁹ Kita lakar nandang seduk kaliwat-liwat, kanti kita lakar naar pianak kitane padidi.

³⁰ Ulun lakar nguugang palinggih-palinggih tongos kitane mabakti, nguugang tongos kitane morbor menyan tur ngentungang bangke-bangken kitane di duur arca-arcan kitane ane suba uug ento. Baan seneb Ulune,

³¹ Ulun lakar madingang kota-kotan kitane dadi reruntuhan. Tongos-tongos kitane mabakti lakar uugang Ulun, tur Ulun tusing lakar kayun nrima aturan-aturan kitane.

³² Ulun lakar nguugang gumin kitane kanti benyah latig, kanti musuh-musuh ane ngaug gumin kitane lakar tengkejut nepukin uugane ane bes ngliwat ento.

³³ Ulun lakar nekaang siat di gumin kitane, tur nyambehang kita di gumin wong sunantarane. Tegal-tegalan kitane lakar neng, tur kota-kotan kitane lakar tetep uug maglaturan.

³⁴ [34-35] Dikalane ento tanah kitane ane tusing taen baang kita mangsegan lakar maan mangsegan kanti lega. Dikalan kitane enu di paselongan di gumin musuh-musuh kitane, tanah kitane lakar dadi neng. Malantaran ento tanah kitane lakar maan sela buat mangsegan.

³⁵

³⁶

Kita ane maselong di gumi ane lenan, lakar liput Ulun baan keneh jejeh ane sanget pesan, kanti yen ada krisikan don ampehang angin, kita lakar pada malaib. Kita lakar malaib buka anake malaib di pasiatan, tur kita lakar labuh dikalane tusing ada musuh dikiwa tengen kitane.

³⁷ Kita lakar malaib patikaplug ngajak timpal dikalane tusing ada anak nguber kita, tur kita tusing lakar nyidayang masiat nglawan musuh, yadian ane buka kenkenja gobanne.

³⁸ Kita lakar mati di paselongan uluha baan gumin musuh-musuh kitane.

³⁹ Ada makudang-kudang anak di pantaran kitane, ane lakar enu idup di gumin musuh kitane. Ia lakar nandang sangsara uli krana dosannyane padidi muah uli krana dosan leluur kitane.

⁴⁰

Nanging katurunan kitane lakar ngangkenin dosannyane padidi muah dosan leluurnyane ane suba bani nglawan Ulun, tur brontak nglawan Ulun,

⁴¹ kanti Ulun mabalik nglawan ia tur ngutang ia di paselongan di gumin musuhne. Pamragatne yen katurunan kitane suba ngasorang dewekne tur suba ngemasin ukuman ulihan dosan leluurnyane nglawan Ulun,

⁴² ditu Ulun lakar inget buin teken prajanjian Ulune ngajak Yakub, Ishak muah Abraham. Ulun lakar nganyarin buin janjin Ulune, buat maicayang tanahe ento teken kaulan Ulune.

⁴³ Nanging ane paling malu, jlemane ane nongos di gumine ento patut katelahang makejang, apanga tanahe ento sajaan maan mangsegan, buina kaulan Ulune patut ngemasin sakancan ukumane ane katibakang teken ia, baane ia tusing nyak satinut teken pidabdab muah pituduh-pituduh Ulune.

⁴⁴ Nanging yadiastun dikalan iane enu di gumin musuhne, Ulun tusing lakar ngalahin wiadin nyirnayang ia ajaka makejang. Sawireh yen Ulun nyirnayang ia, ento marti Ulun megatang prajanjian Ulune ngajak ia, apa buin Ulun ene Sang Hyang Widi Wasa, Widinnyane.

⁴⁵ Ulun lakar nganyarang prajanjian ane adakang Ulun ajak leluurnyane, dugase Ulun ngadegang kakuasan Ulune teken sakancan bangsane, malantaran Ulun nuntun kaulan Ulune makaad uli Mesir, apanga Ulun Sang Hyang Widi Wasa prasida dadi Widinnyane.”

⁴⁶

Makasami punika pidabdab miwah pituduh-pituduh sane kapaicayang antuk Ida Sang Hyang Widi Wasa, katiba ring Dane Musa ring duur Gunung Sinaine, pabuat bangsa Israele sami.ANNA, INDONESIA

27

¹

Ida Sang Hyang Widi Wasa maicayang ring Dane Musa,

² pidabdab-pidabdab sane inucap ring sor puniki, pabuat bangsa Israele. Yening wenten anak sane sampun katurang ring ayun Ida Sang Hyang Widi Wasa, makadados panaur sesangi ring Ida, anake punika dados katebus malantaran ngaturang jinah panebus,

³ [3-7] manut pangarga sane katetepang ring Kemah Linggih Ida Sang Hyang Widi Wasa inggih punika:

- Anak lanang sane matuuh kalih dasa kantos nem dasa taun, 50 bidang jinah perak.
- Anak istri sane sampun kelih, 50 bidang jinah perak.
- Anak lanang sane matuuh lima ngantos kalih dasa taun, 20 bidang jinah perak.
- Anak alit istri, 10 bidang jinah perak.
- Rare alit lanang sane umurnyane kirangan ring limang taun, limang bidang jinah perak.
- Rare alit istri, 3 bidang jinah perak.
- Anak lanang sane langkungan ring 60 taun, 15 bidang jinah perak.
- Anak istri sane langkungan ring 60 taun, 10 bidang jinah perak.

⁴

⁵

⁶

⁷

⁸

Yening anake sane masesangi punika kalintang tiwas, ngantos ipun nenten mrasidayang naur sesangi sane sampun kapastiang punika, ipun patut ngajak anake sane sampun katurang ring Ida Sang Hyang Widi Wasa punika ka ajeng sang pandita. Irika sang pandita patut netepang panebus sane murahan, manut kamampuhan anake punika.

⁹

[9-10] Yening sesangi punika marupa wewalungan sane dados kanggen aturan ring ayun Ida Sang Hyang Widi Wasa, anake sane masesangi punika tan wenang nyilurin wewalungane punika antuk wewalungan sane lianan, santukan saananing aturan sane katurang ring ayun Ida Sang Hyang Widi Wasa punika suci. Yening ipun nyilurin wewalungane punika, raris wewalungane punika makakalih dados druen Ida Sang Hyang Widi Wasa.

¹⁰

¹¹ Nanging yening wewalungan aturane punika marupa wewalungan sane leteh, sane nenten wenang katurang ring ayun Ida Sang Hyang Widi Wasa, anake sane ngaturang wewalungan punika patut makta wewalungane punika ring ajeng sang pandita.

¹² Sang pandita pacang netepang pangargannyane, manut kawentenan wewalungane punika, tur pangarga sane sampun katetepang antuk sang pandita punika nenten malih dados tawah.

¹³ Yening anake punika malih mamanah numbas wewalungane punika, ipun patut naur pangargan wewalungan punika, saha kimbuhin malih apahliman.

¹⁴

Yening wenten anak ngaturang umahnyane ring ayun Ida Sang Hyang Widi Wasa, sang pandita patut netepang pangargannyane, manut kawentenan umahe punika. Pangarga sane sampun katetepang punika, nenten dados malih tawah.

¹⁵ Yening anake sane ngaturang umahe punika malih mamanah jagi numbas umahe punika, ipun patut naur pangargannyane punika, saha kimbuhin apahlimannyane.

¹⁶

Yening wenten anak ngaturang tanahnyane abagian ring ayun Ida Sang Hyang Widi Wasa, pangargan tanahe punika katetepang manut akeh winih sane kanggen nandurin tanahe punika. Buat bibit gandum sane kalih dasa kilogram akehipun, katetepang pangarganipun dasa bidang jinah perak.

¹⁷ Yening tanahe punika katurang riwau wusan Taun Kabebasane, pangargannyane patut kataur sategepipun.

¹⁸ Yening tanahe punika katurang sasampun maletan makudang-kudang taun, sang pandita patut naksir pangargannyane, manut akeh taun sane kantun, rauh ring Taun Kabebasane sane jaga rauh, raris netepang pangarga sane murahan ring punika.

¹⁹ Yening anake sane ngaturang tanahe punika mawali mamanah numbas tanahe punika, ipun patut naur pangargan tanahe punika, saha kimbuhin malih apahliman.

²⁰ Yening ipun ngadol tanahe punika ring anak lianan sadurung tebus ipun ring ayun Ida Sang Hyang Widi Wasa, ipun nenten dados malih numbas tanahe punika.

²¹ Ring Taun Kabebasan sane jaga rauh, tanahe punika dados druen Ida Sang Hyang Widi Wasa ngantos salami-laminipun, tur kapaicayang ring parapanditane.

²²

Yening wenten anak ngaturang pategalan sane antuk ipun numbas,

²³ sang pandita patut naksir pangargannyane, manut akeh taun sane kantun, ngantos rauh Taun Kabebasane sane jaga rauh. Raris anake punika patut naur pangargannyane ring rahinane punika ugi. Jinahe punika dados druen Ida Sang Hyang Widi Wasa.

²⁴ Ring Taun Kabebasane, tegale punika patut kawaliang ring sang sane nerbeang pangawit wiadin ring katurunannyane.

²⁵

Saananing pangarga punika patut katetepang manut pangarga sane resmi.

²⁶

Wewalungan sane lekad pangawit, punika dados druen Ida Sang Hyang Widi Wasa. Punika awinanipun jadmane sami nenten dados ngaturang wewalungan punika ring ayun Ida Sang Hyang Widi Wasa, makadados aturan saking suka lila. Panak banteng, panak biri-biri miwah panak kambing sane lekad jumun daana, punika dados druen Ida Sang Hyang Widi Wasa.

²⁷ Wewalungan sane leteh, sane lekad jumun daana punika dados katebus manut pangarga sane resmi, saha kimbuhin malih apahliman. Yening nenten katebus wewalungane punika dados kadol ring anak tiosan manut pangarga sane resmi.

²⁸

Tan wenten anak kalugra ngadol wiadin malih numbas sane sampun katurang saking nekeng ati ring ayun Ida Sang Hyang Widi Wasa, yadian aturane punika marupa manusa, wewalungan wiadin tanah. Punika makasami dados druen Ida Sang Hyang Widi Wasa, ngantos salami-laminipun.

²⁹ Kadi asapunika taler manusa sane sampun katurang saking nekeng ati, ipun nenten dados katebus, ipun patut kapademang.

³⁰

Saananing pamupon tanahe makasami, yadian gandum wiadin woh-wohan apahdasannyane punika dados druen Ida Sang Hyang Widi Wasa.

³¹ Yening wenten anak malih mamanah jaga numbas abagian, ipun patut naur sakadi sane sampun katetepang, saha kimbuhin malih apahliman.

³² Sabilang ingon-ingonnyane adasa, asiki dados druen Ida Sang Hyang Widi Wasa. Yening ingon-ingone punika kawilang, sabilang ingon-ingon sane kaping dasa, punika dados druen Ida Sang Hyang Widi Wasa.

³³ Sang maderbe ingon-ingone punika nenten dados ngatur ingon-ingone punika kantos wewalungane sane kaon sane keni kapilih. Ipun taler nenten dados nyilurin wewalungane punika. Yening silurin ipun antuk wewalungan sane lianan, kenginan wewalungane punika makakalih dados druen Ida Sang Hyang Widi Wasa tur nenten dados malih katumbas.

³⁴

Kadi asapunika pituduh-pituduh sane kapaicayang antuk Ida Sang Hyang Widi Wasa, ring Dane Musa ring duur Gunung Sinaine, pabuat bangsa Israele.