1 اؤزونو تارييا قول اتمئش و عئسا مسئحئن حوارئسي پولوسدان، تارينين سِچئلمئشلرئنئن ائماني و حقئقتئن معرئفتي اوچون کي، دئندارليغا موطابئقدئر،
2 ابدي حياتين اومئدئنده کي، يالان دانيشا بئلمهين تاري اونو چوخ عصرلردن قاباق وعده وردي.
3 لاکئن موعيّن زاماندا اؤز کلاميني وعظده ظاهئر اتدي کي، قورتاريجييميز تارينين امري ائله منه امانت ورئلدي.
4 موشترک ائماندا منئم حقئقي اوغلوم تئطوسا: آتا تاريدان و قورتاريجيميز مسئح عئسادان سنه فيض و باريش اولسون.
5 سني اونون اوچون کرئتده قويوب گتدئم کي، قالان ائشلري تاماملاييب هر شهرده سنه تاپشيرديغيم کئمي آغساقّاللار تعيئن ادهسن.
6 او گرک قينانيلماز بئر کئشي اولسون، بئر آروادين اَري، سفاهتلئک و يا عوصيانچيليق تؤهمتي آتيلان اؤولادلارين آتاسي يوخ، ائمانلي اؤولادلارين آتاسي اولسون.
7 چونکي ناظئر گرک تارينين موباشئري اولاراق، قينانيلماز اولسون. عئنادکار، تز حئرصلهنَن، شراب اسئري، زور دئين، و يا حاقسيز قازانجين دالينجا قاچان اولماسين.
8 لاکئن قوناقسِوَن، ياخشيليغي سِوَن، تمکئنلي، عادئل، اؤزونو وقف اتمئش و نفسئنه حاکئم اولان بئري اولسون.
9 تعلئمله موطابئق اولان امئن کلامي جئدّئيّتله توتسون کي، هم اساس تعلئملرده تشوئق اِده بئلسئن، هم ده ضئدّ دورانلاري توبئخ اده بئلسئن.
10 چونکي عاصي، بوشبوغاز و حئيلهگر آداملار چوخدورلار، خوصوصن ختنه اولونانلار آراسيندا
11 کي، اونلارين آغزي گرک باغلانسين. اونا گؤره کي، عايئلهلري تامامن کؤکوندن ييخيب، حاقسيز قازانج اوچون اِله تعلئملر ورئرلر کي، گرک ورمهسئنلر.
12 اونلارين اؤز پيغمبرلرئندن بئري بله ديئب: "کرئتليلر همئشه يالانچي، شرور جاناوارلار و تنبل قارينپالارديرلار."
13 بو شهادت دوغرودور. بو سببدن اونلاري جئدّي توبئخ ات کي، ائماندا صحئح اولسونلار
14 و يهودي افسانهلره و حقئقتدن اوز دؤندهرن آداملارين احکامينا قولاق آسماسينلار.
15 پاک اولانلار اوچون هر شي پاکدير. لاکئن ناپاک اولموشلار و ائمانسيزلار اوچون هچ بئر شي پاک ديئل. امّا اونلارين هم فئکئري هم ده وئجدانلاري نجئس اولوب.
16 اونلار ائدّئعا ادئرلر کي، تاريني تانيييرلار، لاکئن عمللری ائله اونو ائنکار ادئرلر. اونلار مکروه و ناموطئعدئرلر، هچ بئر ياخشي ائشه ده يارامازلار.
1 آمّا سنه گلئنجه، سن اساس تعلئمه موناسئب شيلر تعلئم ور.
2 ياشلي کئشئلر آييق، ووقارلي، تمکئنلي، ائماندا، محبّتده و تحمّولده داواملي اولسونلار.
3 اِلهجه ده ياشلي آروادلار رفتارلاريندا مؤحترم اولسونلار، قيبتچي و شراب اسئري اولماسينلار، ياخشي شيلري اؤيرهتسئنلر
4 کي، جاوان آروادلاري، اَرلرئني و اوشاقلاريني سِومکده تشوئق اتسئنلر.
5 تمکئنلي، عئفّتلي، اِودارليق ادن، مهرئبان و اؤز اَرلرئنه موطئع اولسونلار کي، تارينين کلامي حؤرمتسئز اولماسين.
6 اِلهجه ده جاوان اوغلانلاري تشوئق ات کي، عاغيلّي اولسونلار.
7 هر شيده اؤزونو ياخشي عمللرئن نومونهسي گؤرسد: اساس تعلئمده خالئص، صادئق.
8 دانيشيقدا صحئح و قينانيلمايان اول کي، دوشمن بئزئم حاقّيميزدا پئس بئر شي دئيه بئلمهيئب، اوتانسين.
9 نؤکرلري تشوئق ات کي، اؤز آغالارينا هر شيده موطئع اولوب اونلاري راضي اتسئنلر و سؤزلری ائله عمللري بئر اولسون.
10 اوغورلوق اتمهسئنلر، آمّا بوتون ياخشي ائماني گؤز قاباغينا قويسونلار کي، هر شيده قورتاريجيميز تارينين تعلئمئني بزهسئنلر.
11 چونکي تارينين فيضي ظاهئر اولدو و بوتون ائنسانلارا نئجات گتئرئر
12 و بئزه تربئيه ورئر کي، ائمانسيزليق و دونيهوي هاوا-هوسلري ردّ ادئب بو عصرده تمکئنلي، صالح و تارييا لايئق بئر حيات ياشاياق.
13 و تاعالا تاريميز و قورتاريجيميز مسئح عئسانين موبارک اومئدئني و شؤوکتئنئن ظاهئر اولماسيني گؤزلهيک:
14 او، اؤزونو بئزئم اوچون فدا اتدي کي، بئزي هر جور حاقسيزليقدان خئلاص اتسئن و اؤزونه عاييد بئر خالق طاهئر اتسئن کي، ياخشي ائشلر اوچون قيرتليدئرلر.
15 بو شيلري دانيش و بوتون ائقتئدارلا تشوئق و توبئخ ات. قويما هچ کس سنه اعتئناسيزليق اتسئن.
1 اونلارا خاطيرلا کي، ريئسلر و ائقتئدار صاحئبلرئنه موطئع اولسونلار، ائطاعت اتسئنلر و هر جور ياخشي ائش اوچون حاضير اولسونلار.
2 هچ کئمه ائفتئرا آتماسينلار، داعواچي اولماسينلار، حلئم اولوب بوتون ائنسانلار قاباغيندا تواضؤعکار اولسونلار.
3 چونکي بئز ده بئر زامان آنلاقسيز، ائطاعتسئز، آلدانميش، جوربهجور شهوتلر و عيشلره اسئر ائدئک و حياتيميزي خباثت، پاخيلّيق و نئفرتده کچئردئب، بئربئرئمئزدن نئفرت ادئردئک.
4 آمّا او زامان کي، قورتاريجيميز تارينين مهرئبانليغي و اونون ائنسانلارا اولان محبّتي ظاهئر اولدو،
5 او بئزي صالحلئکده اتدئيئمئز عمللرئن اساسينا يوخ، اؤز مرحمتئنه گؤره تزه خئلقتئن يوماغي و موقدّس روحون تزه اتدئيي ائله نئجات وردي.
6 او روحو، قورتاريجيميز عئسا مسئحئن واسئطهسئله اوستوموزه بول-بول تؤکدو
7 کي، اونون فيضئله صالح ساييليب، ابدي حياتينين اومئدئنه گؤره وارئث اولاق.
8 بو سؤز، اعتئمادا لايئقدئر؛ و بو شيلرئن حاقّيندا سندن ائستهيئرم کي، يقئنلئکله دانيشاسان، اِله کي، تارييا ائنانانلار ياخشي ائشلره مشغول اولسونلار. بو ائشلر ائنسانلار اوچون ياخشي و فايداليدير.
9 لاکئن عاغيلسيز موناقئشهلردن، نسئلنامهلردن، داعوادان و شرئعت اوستونده اولان موباحئثهلردن اؤزونو اوزاق ساخلا. چونکي فايداسيز و دَيَرسئزدئر.
10 فئرقه يارادان آدامي بئرئنجي و ائکئنجي ائخطاردان سونرا ردّ ات.
11 بئلئرسن کي، بله آدام يولونو آزيب و اؤز-اؤزونو محکوم ادئب، گوناه ادئر.
12 آرتئماس يا دا تئخئکوسو سنئن يانينا گؤندهردئيئمده چاليش کي، نئکوپولئسده منئم يانيما گلهسن، چونکي قيشي اورادا کچئرتمهيه قرار ورمئشم.
13 دئقّت ات کي، وکئل زئناس و آپّولوس يولا چيخارکن هچ بئر شيلري اَسکئک اولماسين.
14 قوي بئزئمکئلر ده اؤيرهنسئنلر کي، ضروري احتئياجلاري رفع اتمک اوچون ياخشي ائشلره مشغول اولسونلار کي، بلجه ثمرهسئز اولماسينلار.
15 منئمله اولانلارين هاميسي سنه سالام گؤندهرئر. بئزي ائماندا سِوَنلره سالام يتئر. فيض سئزئن هامينيزلا اولسون.