1 بو اِلقوشلو ناحومون رؤيالاري کئتابيدير کي، نِينَوا حاقّيندا اونا وحی اولوندو.
2 رب قِيرَتليدئر، قئصاص آلان تاريدير، ائنتئقام آلار، قضبله دولودور، خصملرئندن قئصاص آلار، دوشمنلرئنئن ضئدّئنه قضبئني ساخلايار.
3 رب گِج قضبلَنَندئر، قودرتده گوجلو، تقصئرکاري اصلا جزاسيز قويماز، ربّئن يولو طوفاندادير، کولَکدهدئر، بولودلار آياقلارينين توزودور،
4 دهنزه آجيقلانار و اونو قورودار، بوتون چايلارين سولاريني دا قورودار. باشانين، کَرمِلئن ياشيلليقلاري سارالير، لوبنانين گول-چئچهيي سولور.
5 ربّئن حوضوروندان داغلار تئترهيئر، تپهلر اَرئيئر، ربّئن حوضوروندا يِر اوزو، دونيا و اوندا ساکئن اولانلار يِرلرئندن قالديريرلار.
6 اونون قضبئنئن قاباغيندا کئم دورا بئلر؟ حئدّتلي قيضئنه کئم تاب گتئرَر؟ ربّئن حئرصي اود کئمي تؤکولور، قاباغيندا قايالار تئکه-تئکه اولار.
7 رب ياخشيدير، دار گونده پناهگاهدير، اونا بِل باغلايانلاري تانييير.
8 لاکئن او، نِينَوانين اولدوغو يِري شئدّتلي سِللرله محو ادهجک. دوشمنلرئني ظولمته سالاجاق.
9 ربّئن ضئدّئنه نه قصد حاضيرلاسان، او هر شيه آخير قويار، اونلاردان بئر داها بلا چيخماز.
10 بئربئرئنه دولاشيق تئکانلار کئمي، ائچکئلرئندن کِفلي اولان مستلر کئمي، قورو کولَش کئمي کامئل ياناجاقلار.
11 ای نِينَوا، سندن ربّئن ضئدّئنه پئسلئک دوشونَن، بئر شر مصلحتچي سندن چيخيب!
12 رب بله ديئر: "آشورلولار گوجلو و چوخ اولسا دا، گئنه ده محو اولوب گدهجکلر. ای خالقيم ائسرايئل، گرچي سني ذلئل اتمئشم، سني بئر داها ذلئل اتميهجيم.
13 ائندي سنئن يوغونو سنئن بوينوندان پارچالاييب، قانداللاريني قيراجاغام."
14 ای نِينَوا، رب سنئن حاقّيندا بله امر ورئب: "آرتيق اؤولادلارين اولماياجاق، آديني داشيماياجاق. آللاهلارينين معبدئندن اويما بوتلري، تؤکمه بوتلري محو ادهجيم. قَبئر قازاجاغام سنه، چونکي آلچاقسان!
15 باخ، موژده گتئرهنئن آياقلاري داغلاري آشير، گلئر، باريش خبري گتئرئر! ای يهودا، بايراملاريني کچئرت، نذئرلرئنه وفا ات! او پئس مئلّتئن آياغي اؤلکَندن آرتيق کِچمَيهجک؛ او، کامئل محو اولوب.»
1 ای نِينَوا، او داغيدان بئري سنئن ضئدّئنه چيخيب، ائستِحکاميني موحافئظت ات، يولونو موحافئظت ات، بِلئني مؤحکم قورشا، بوتون گوجونو بئر يِره ييغ!
2 چونکي رب يعقوب نسلئني، ائسرايئلئن اوّلکي عظمتئنه قايتاراجاق. گرچي دارماداغين ادنلر اونو دارماداغين ادئبلر، اوزوم آغاجلاريني محو ادئبلر.
3 ائگئدلرئنئن قالخانلاري قيرميزيدير، دؤيوشچولرئن پالتارلاري قيپقيرميزيدير. اونلار حاضير اولان گون، دؤيوش عارابالارينين دمئرلري نجه ده پاريلدايير، شام آغاجيندان اولان نئزهلر هاوادا اوينايير!
4 دؤيوش عارابالاري کوچهلردن دَلي کئمي قاچيب کچئرلر، مِيدانلاردا اورايا-بورايا هوجوم گتئرئرلر، اونلارين گؤرونوشو مشعللر کئمي پاريلدايير، شئمشَک کئمي جَلد قاچيرلار.
5 نِينَوا پادشاهي سِچمه عسکرلرئني ييغير، يوروش اِدَرکَن بئربئرئنه ائلئشئب ييخيليرلار. تَلهسئک شهر دووارينا طرف قاچيرلار، مودافئعه حاصارلاري قورورلار.
6 چايلارين سويونو ساخلايان بندلر آچيليب، ساراي اَرئيئر.
7 تقدئر يازيليب: شهري اسئر آپاريرلار، کنئزلري قومري کئمي ائنلهيئب، سئنهلرئنه وورورلار.
8 نِينَوا خالقي قاچيب گدئر، بوشالان بئر حوووضون سويو کئمي، باغيريرلار: "دايانين، دايانين!"" آمّا گری دؤنَن يوخدور.
9 گوموشو تالان ادئن، قيزيلي تالان ادئن، چونکي ثروتلرئن آخيري يوخدور، بول مئقداردا قئيمتلي اشيالار وار.
10 نِينَوا وئران اولوب، بلی، تالان اولوب، خارابا قاليب! اورکلر اَرئيئر، دئزلر طاقتدن دوشوب. هامينين بدنلرئنه آغري دوشوب! هامينين رنگي آتيب.
11 نه اولدو آصلانلار يوواسينا؟ نه اولدو جاوان آصلانلارين يِدئيي يِره؟ اورايا کي، شئرله دئشيسي، بالالاري ائله اورادا قورخوسوز گَزئردي؟
12 آصلان اؤز بالالارينا کئفايت قدر اوو شئکار ادئر، دئشئسي اوچون شئکاريني بوغازلاييب. ماغاراسيني شئکار اتدئيي حيوانلارلا، يوواسيني شئکارلا دولدوروب.
13 قوشونلار ربّی بويورور: "من سئزئن ضئدّئنئزهيَم، دؤيوش عارابالارينيزي توستوده يانديراجاغام، جاوان آصلانلاريني قيلينج يئيهجک، اؤلکهدن شئکاريني کَسهجيم، قاصئدلرئنئن سَسي بئر داها اشئدئلميهجک."
1 قانلي شهرئن واي حالينا! او يالان و سويغونچولوقلا دولودور، اورادا تالان اتمهيئن آردي کَسئلمئر!
2 قامچي سَسي، چرخلر گورولتوسو، چاپان آتلارين، ييرغالانان دؤيوش عارابالارينين سَسي!
3 آتليلار هوجوم ادئرلر، قيلينجلار پاريلدايير، نئزهلر برق وورور، اؤلَنلر ييغين-ييغين، جسدلرئن سايي يوخ، ائنسانلارين آياغي مِيئتلره دولاشير!
4 بونلارين هاميسي او فاحئشهنئن حدسئز فاحئشهلئيئندن اولدو؛ او جاذئبهلئنئن، سِحربازليق ملکهسئنئن کي، مئلّتلري فاحئشهلئيي ائنن ساتير، عايئلهلري ده سِحربازليغي ائله!
5 قوشونلار ربّی بويورور: "ای نِينَوا، من سنئن ضئدّئنهيم! پالتارينين اَتهيئني اوزونه قالديراجاغام، چيلپاقليغيني مئلّتلره گؤرسدهجيم، عاييبيني اؤلکهلره آچاجاغام.
6 اوستونه ائيرنج شيلري آتاجاغام، سني روسواي ادهجيم، تاماشايا قوياجاغام!
7 سني گؤرَنلرئن هاميسي سندن قاچيب بله دئيهجکلر: «نِينَوا وئران قالدي! اونون اوچون کئم آغلاياجاق؟ هارادان سنه تسلّی ورنلر تاپاجاغام؟»
8 مگر سنئن نو-آموندان نهيئن آرتيقدير؟ او شهر نئل چايلاري آراسيندا يِرلَشمئشدي، سولارلا اَحاطه اولموشدو، سئپري دهنز، قالا دوواري دا سولار ائدي.
9 کوش و مئصئر اونون سونسوز قووّتي ائدئلر، پوت و لئبيا دا کؤمکچئلري ائدي.
10 لاکئن اسئر آپاريلدي، اسئرلئيه گتدي، اؤولادلاري پارچا-پارچا دوغراندي، هر کوچه باشينا آتيلدي، آدلي-سانلي آداملاري اوچون پوشک آتديلار، اعيانلاريني قانداللارا سالديلار.
11 سن ده، ای نِينَوا، مست اولاجاقسان، گئزلَنهجکسن، دوشمنلرئن اَلئندن پناهگاه آختاراجاقسان.
12 بوتون ائستِحکاملارين انجئر آغاجينين ائلک يِتئشَن ميوهلري کئمئدئر کي، سئلکهلَنَنده يئيهنئن آغزينا دوشور.
13 باخ، سنئن آراندا، سنئن خالقين آرواد کئمئدئر! اؤلکهنئن دروازالاري دوشمنلرئن اوزونه تايباتاي آچيليب. قاپي چفتهلرئني اود ياخيب محو ادئر.
14 موحاصئره واختي اوچون اؤزونه سو چک، قالالاريني مؤحکملَندئر! زيغا گئر، پالچيغي تاپدا! کرپئج قالئبلرئني حاضيرلا!
15 اورادا اود سني يِيئب قورتاراجاق، قيلينج سني کَسئب قيراجاق، چَيئرتکهلرئن يِدئکلري اَکئن کئمي يوخ اولاجاقسان. ساييني چَيئرتکه کئمي آرتير، اؤزونو قايناشان چَيئرتکه کئمي چوخالت!
16 تاجئرلرئنئن سايي گؤيلردهکي اولدوزلاردان چوخدور، آمّا چَيئرتکهلر اؤلکهني تالان ادئب اوچاجاق.
17 گؤزَتچئلرئن چَيئرتکه کئمي، مأمورلارين چَيئرتکه سوروسو کئمئدئرلر؛ سويوق گونده چَپَرلره يِرلهشئرلر، گون دوغاندا اوچوب گِدئرلر، گتدئکلري يِر بئلئنمئر.
18 ای آشور پادشاهي، چوبانلارين يوخويا گدئب، آدلي-سانلي آداملارين ياتيب. خالقين داغلارا سَپَلهنئب، اونلاري بئر يِره ييغان يوخدور.
19 سنئن دردئنه درمان يوخدور، يارالارين صاغالماز. سنئن حاقّيندا خبر اشئدنلر سِوئنئب اَل چالير. چونکي سنئن بو سونسوز پئسلئيئن کئمه دَيمهيئب؟