1
Ho’oy tulurn empo de Mori Yésus Kristus, wa’u di Daud, wa’u di Abraham.2 Abraham wing hi Ishak, hi Ishak wing hi Yakub, hi Yakub wing hi Yéhuda agu asé-ka’én,
3 Yéhuda wing hi Pérés agu hi Zéra oné mai hi Tamar, hi Pérés wing hi Hézran, hi Hézran wing hi Ram,
4 Ram wing hi Aminadab, hi Aminadab wing hi Nahason, hi Nahason wing hi Salmon,
5 Salmon wing hi Boas, oné mai hi Rahab, hi Boas wing hi Obéd oné mai hi Rut, hi Obed wing hi Isai,
6 Isai wing hi Raja Daud, hi Raja Daud wing hi Salomo oné mai wina di Uria,
7 Salomo wing hi Réhabéam, hi Réhabéam wing hi Abia, hi Abia wing hi Asa,
8 Asa wing hi Yosafat, Yosafat wing hi Yoram, Yoram wing hi Uzia
9 Uzia wing hi Yotam, Yotam wing hi Ahas, Ahas wing hi Hizkia,
10 Hizkia wing hi Manasé, Manasé wing hi Amon, Amon wing hi Yosia,
11 Yosia wing hi Yékhonya agu sanggét asé-ka’én du oké nggereoné Babél,
12 Du poli oké nggereoné Babél hi Yékhonya wing hi Séaltiél, Séaltiél wing hi Zérubabél,
13 Zérubabél wing hi Abihud, Abihud wing hi Elyakim, Elyakim wing hi Azor,
14 Azor wing hi Zadok, Zadok wing hi Akhim, Akhim wing hi Eliud
15 Eliud wing hi Eléazar, Eléazar wing hi Matan, Matan wing hi Yakub,
16 Yakub wing hi Yosép rona di Maria, ata loas Mori Yésus hitut caron hi Kristus.
17
Jari, sanggén taung manga campulu-pat empo pu’ung oné mai hi Abraham dengkir agu Raja Daud, campulu-pat empo pu’ung oné mai hi Raja Daud dengkir agu oké nggereoné Babél, agu campulu-pat empo pu’ung oné mai du oké nggereoné Babél dengkir agu oné hi Kristus.18
Loasn Mori Yésus Kristus nenggo’oy: Du hi Maria Ended Mori Yésus, toé di naca agu hi Yosép, hi Maria polig na’ang wekin le kuasa de Nai Nggeluk, du toé di wina-ronas.19 Landing hi Yosép ronan, ata ngalis nai, toé ngoéng te pandé wau ngasang de winan oné ranga data do, hia get kudut seduk kaut te pandé céarn.
20 Maik du rémé tenang tu-tu’ungn liha te pandé céarn, malékat de Mori Keraéng ita liha oné nipin, agu mai taén: “Yosép, anak Daud, néka rantang hau te emi hi Maria kudut jiri haé kilom, ai anak hitut lari dé’in le kuasa de Nai Nggeluk.
21 Hia kudut loas anak ata rona, agu téing le hau ngasangn hi Yésus, ai Hia kudut sambé sanggét ro’éngn oné mai ndékokd.”
22 Sanggéd situ kudut rapak reweng de Mori Keraéng ata poli caingd le nabi:
23 “Ata tu’ungn, anak molas hitu kudut na’ang wekin, agu loas cengata anak ata rona, agu téing lisé ngasangn hi Émanuél.” (Ngong Mori Keraéng manga baling itéy.)
24 Du to’o wa mai tokon, hi Yosép lorong ného apa ata baté pedé de malékat de Mori Keraéng agu hia. Itu kali emin liha hi Maria te jiri haé kilon,
25 maik toé manga nekid dengkir agu loas anakn ata rona agu téing ngasangn li Yosép hi Yésus.
1
Du poli loasn Mori Yésus oné béo Bétléhém tana Yudéa, lété du perénta de raja Hérodés, mais ata majus awo mai par te nggersalé Yérusalém,2 nénét kéta réid, mai taéd: “Nia kéta péng Hia, raja data Yahudi hitut loas weru? Polig itan lami ntalan awo par, mai dami ho’o kudut suju Hiakm.”
3 Dengé kaut tombo situ le raja Hérodés, géga hia agu sanggéd isét Yérusalém.
4 Itus kali nekek taungs liha sanggéd imam kepala agu ata pecing Taurat data Yahudi, te réi agu isé, nia wan kudut loasn Mésias.
5 Mai walé disé agu hia: “Oné Bétléhém tana Yudéa, ai nenggitu tulisn oné surak de nabi:
6 Ngong hau Bétléhém, tana Yéhuda, toé kéta hau dé ata dai koén oné mai baling isé ata perénta Yéhuda, ai oné mai hau dé tuan cengata ata kudut caun landuk, te wintuk ro’éng Daku Israél.”
7 Itu kali seduk kauts béntad li Hérodés ata majus situ agu kekét kétas liha réid, du nia kéta itan ntala hitu.
8 Poli hitu, jeras liha ngo nggeroné Bétléhém, taén: “Ngom ga paka mbajik kéta kawén le méu anak hitu, agu émé gélang itan le méu Hia, keréba muing nggércé’é aku, kudut aku kolé néng, ngo suju Hiak.”
9 Du polig dengén pedé de raja hitu, itus kali ngod ga. Agu itay néng ntala hiot ita disé awo par, dumuk manga koléy bebolo mai isé, agu da’ét be éta mai osang loasn Anak hitu.
10 Du itan lisé ntala hitu, cembes kéta naid.
11 Itus kali ocokd isé oné mbaru hitu, agu itag néng lisé Anak hitu, agu endén hi Maria, io agu suju néng lisé Hia. Og emi agu podo cecad oné Hia: emas, kemenyan agu mur.
12 Landing woko polig toin oné nipi le Mori Keraéng kudut isé néka cénggo kolé oné hi Hérodés, itus kali lako salang bana kolé tanad.
13
Du koléd ata majus situ ga, ita li Yosép oné nipi, malékat de Mori Keraéng, mai taén: “To’o ga, dadé Anak hitu agu endén, losi nggeroné Mesir, agu ka’éng nitum dengkir manga kolé reweng’g Aku agu hau, ai hi Hérodés kudut mbelé Anak hitu.”14 Itug kali to’on hi Yosép ga, dadén Anak hitu agu endén, wié hitu kin nggeroné Mesir,
15 agu ka’éng nitud dengkir matan hi Hérodés. Sanggéd taung situ kudut rapak reweng de Mori Keraéng ata poli caing le nabi: “Oné mai Mesir Aku bénta AnakG.”
16
Woko pecing li Hérodés adong hias ata majus situ, rabo tu’ung hia. Mai hia jera mbelé taungs anak koé oné Bétléhém agu baling main tana hitu ata uwa sua ntaung nggerewa, lut ntaung baté tombo disét majus situ.17 Le hitu, rapaks ga reweng de Mori Keraéng ata poli caing agu nabi Yérémia:
18 “Dengég aor rétang oné mai Rama, lorang agu jéjéng te pandé wéong nai; hi Rahél rétang tenang sanggéd anakn, agu hia toé gorin te lémbuy, ai isé toég manga kolés.”
19
Du polig matan hi Hérodés, ita li Yosép malékat de Mori Keraéng oné nipin lau Mesir, mai taén:20 “To’o ga, dadé Anak hitu agu endén agu ngom ga nggeroné tana Israél, ai isé siot kudut mbelé Anak hitu, polis matad.”
21 Itug kali to’on hi Yosép, dadég liha Anak hitu agu endén agu kolé nggeroné tana Israél.
22 Maik du poli dengén liha, hi Arkhélaus ciri raja oné tana Yudéa te célung lonto de eman hi Hérodés, rantang hia te kolé nituy. Landing le toing oné nipin itu tara ngon hi Yosép oné tana Galiléa.
23 Du cain nitu, hia ka’éng oné ca bendar, ngasangn, Nazarét. Sanggéd situ kudut rapak reweng de Mori Keraéng ata poli caing néténg nabi, ai kudut caron Hia: Ata Nazaréty.
1
Du hitu tuan hi Yohanés te téing Cebong oné satar mambak Yudéa agu kréban:2 “Tesérm ga, ai adak Surga ruis gi!”
3 Ata tu’ungn, Hia dé hiot bet du tombo le nabi Yésaya:
“Manga reweng ata kepok oné satar mambak:4
Hi Yohanés paké baju léwé oné mai wulu unta, agu kantengn oné mai luit, hangn pusu agu waé wani.5 Og mai oné hia taungs lawa Yérusalém, lawa Yudéa, agu lawa baling main tana Yordan.
6 Cang agu tura ndékokd, isé cebongs li Yohanés oné waé Yordan.
7
Maik du itad liha ata Parisi agu ata Saduki kudut te cebong, mai taé diha ngong isé: “Oé méut waé de ular rani, céing kéta ata taé agu méu, te ngancéng losi oné mai copél ata kudut cai?8 Jari, cir koé wua ata kopn lorong agu tesérs.
9 Agu néka bet le méu te ngancéng taé oné nais: hi Abraham dé empo dami. Landing aku taé agu méu: Mori Keraéng ngancéng dédék te ciri anaks latang te Abraham oné mai watu-watu so’o!
10 Polig ambin cola lobo waké haju, agu néténg haju ata toé manga cir wua ata di’an, toét toé wését agu longgo oné api taungs.
11 Aku cebong méu le waé te tanda tesér, maik Hia ata mai bemusi mai aku, ata céwé mésé kuasan oné mai aku, agu toé remog aku te tiwit sepatun. Hia kudut te cebong méu le Nai Nggeluk agu le api.
12 Doku polig oné limén. Hia kudut pandé nggelong osang te rik agu kudut moi sanggéd gandum nggere-oné joréng, maik embod situ, kudut tapas Liha oné api ata toé ngancéng pesay.”
13
Poli hitu, og main Mori Yésus oné mai Galiléa nggeroné Yordan, kamping hi Yohanés Cebong lihay.14 Maik hi Yohanés damang te ré’ing Hia, mai taén: “Aku kali ata kopn te cebong Lité, landing Ite kolé ata mai kamping aku?”
15 Mai wantil de Mori Yésus agu hia, taén: “Kong jarid sanggéd situ, ai nenggitu muing ata kopn lité kudut rapak sanggéd ngoéng de Mori Keraéng,” lorong kaut Hia li Yohanés.
16 Du polig cebongn, Mori Yésus hidi-hada pé’ang oné mai waé, rémé nggitun, cengka awang, agu ita liha Nai Nggeluk wa’u ného tekur jawa lobo Hiay,
17 mai nitu main dengég reweng éta mai Surga, nenggo’o taén: “Ho’o dé Anak ata cembes Daku, Hia kéta dé ata kopn Laku.”
1
Mai nitu main, og dadén Mori Yésus le Nai Nggeluk nggere-éta satar mambak kudut kapang le jing da’aty.2 Du poli puasan patmpulu leso agu patmpulu wié darem néng Mori Yésus.
3 Itug kali main jing da’at hitut damang Hia, mai taén ngong Hia: “Émé Anak de Mori Keraéng Hau, jeras dé le Hau watu-watu so’o te ciri roti.”
4 Mai wantil de Mori Yésus: “Manga tulisn: Mosé data manusia toé le roti kanang, maik oné mai néténg reweng ata losa oné mai mu’u de Mori Keraéng.”
5
Poli hitu jing da’at dadé Hia nggere-oné béndar Nggeluk agu peher Hia éta bubung Mbaru de Mori Keraéng,6 mai taén agu Hia: “Émé Anak de Mori Keraéng Hau, tekuh dé nggere-wa, ai manga poli tulisn latang te Hau, kudut préntas Liha malékat-malékat te séndé lisé rantang timpok wa’im le watu.”
7 Mai taé de Mori Yésus agu hia: “Manga kolé poli tulis: hau néka damang Mori Keraéngm!”
8 Dadé kolé le jing da’at hitu nggeréta poco hiot langkas kétay agu toi oné Hias sanggéd rajad lino siot angosn kéta,
9 agu mai taén ngong Hia: “Sanggén taung situ téing Haus laku, émé io agu suju aku le Hau.”
10 Mai taé de Mori Yésus ngong hia: “Ngoh ga, hau jing da’at! Ai manga poli tulisn: Hau paka io agu suju Mori Keraéngm agu hanang Hia kali ata patun te hiang!”
11 Itu kali jing da’at pencang Hia, itas néng ga mai malékat-malékat te gatang Mori Yésus.
12
Du dengén le Mori Yésus poli dekon hi Yohanés, itug kali ngon Hia oné Galiléa.13 Ledong Liha béo Nasarét agu ka’éng oné Kapérnaum, oné lupi sano tana Zébulon agu Naftali,
14 ai kudut rapakn reweng ata poli pedeng de nabi Yésaya:
15
“Tana Zébulon agu tana Naftali, salang nggeroné tacik, tana besina mai waé Yordan, Galiléa, tana de uku-uku bana,
16
uku ata sedep oné nendep itag lisé gérak mésé agu latang te isé siot kumbu le susa polig téa le gérak.”
17
Pu’ung du hitu wéwa le Mori Yésus: “Teserm ga, ai Adak de Surga ruis gi!”18
Agu du Mori Yésus rémé lakon loléng sano Galiléa itas Liha sua taus asé-ka’és hi Simon ata bénta hi Pétrus agu hi Andréas asén. Isé rémé oké ndalad oné sano, ai isé situ ata ndala ikangs.19 Mai curup de Mori Yésus agu isé: “Mai é, lut akum, kudut méu ciri ndala manusia laingm laku.”
20 Itus kali pencang wad kaut ndala, agu lut Hias.
21 Du kolén Mori Yésus nitu main, ita kolé Liha sua taus asé-ka’és hi Yakobus anak di Zébédéus agu hi Yohanés asén, agu emad hi Zébédéus rémé besik ndalad oné wangka, itus kali bénta le Mori Yésus.
22 Toé rémpé-rémpé pencang wa kaut wangka agu emad, ngo lut Hias.
23
Mori Yésus lako léok Galiléa; oné mbaru-mbaru ngaji, nitus Liha toing agu ba kréba di’a de Adak Surga, pandé moras sanggéd beti agu ata lema-léngkus ba wekid oné uku situ.24 Wéron ngasang Diha labok tana Siria, dadé néng lisé nggeroné Hia sanggén ata so’ot riwi-rowos, ata so’ot beti da’at, ata iling le jing da’at, ata beti le ru’u mona, agu ata péko, mai Mori Yésus pandé ina taungs.
25 Londang taungs ata te lut Hia. Isé mai oné mai Galiléa, Dékapolis, Yérusalém, agu oné mai Yudéa agu besina mai Yordan.
1
Woko itas ata do situ le Mori Yésus, itu kali ngon Hia nggeréta golo, lonto wa kaut Hia, caisg ata nungkun.2 Itug kali pu’ung curupn agu toing iséy Mori Yésus, taén:
3
“Mosé di’a kéta ata lénggé oné ranga de Mori Keraéng,
ai disé morin Adak Surga.
4
Mosé di’a kéta ata wéong nai,
ai isé te tiba lémbus.
5
Mosé di’a kéta ata lembés,
ai disé morin lino ho’o.
6
Mosé di’a kétas ata dolong molor,
ai isé te tiba nulas.
7
Mosé di’a kétas ata gawas nai,
ai isé te tiba delék lembaks.
8
Mosé di’a kétas ata nggélok nai,
ai isé te ita Mori Keraéngs.
9
Mosé di’a kétas ata ba hambor,
ai isé te caro latas anak de Mori Keraéngs.
10
Mosé di’a kétas ata luca lata landing le molorn,
ai diséy morin Adak Surga.
11
Mosé di’a kéta méu émé landing Akum méu mbécik agu luca latam, agu oné méu taungs sanggéd pocu ata da’atd.
12
Naka agu nisang ga, ai mésén lahém éta Surga, ai nenggitu kolés poli lucad sanggéd nabi bebolon mai méu.”
13
“Méu ho’o dé ci’é dé lino. Émé ciri lembay ci’é hitu, le pai di pandé cerakn? Toég manga kolé betuan, aikn te oké agu wedi latay.14
Méu dé gérak de lino, béndar ata hesé éta pocoy, toé kong panggun.15 Nenggitu kolé néng ata toé tutung culun poli hitu na’a wa mai gumbang, maik pésék éta mai lobo tongka culu, wiga gérak taung ata oné mbaru hitu.
16 Nenggitu kolé gerak de méu, néray olo mai ranga data, kudut itas lisé pandé di’a de méu agu bong ngasang Emam hitu éta Surga.”
17
“Néka nggo’o nuk de méu, mai Daku kudut té pandé moras Adak Taurat ko Surak de nabi-nabi. Mai Daku toé kudut te pandé moras, maik te pandé jepeks.18 Landing taé Daku agu méu, ata tu’ungn rémé toéd moran awang agu lino ho’o, koném te ca wuku miténgn kaut toé ngancéng moran oné mai Adak Taurat, du toéd jari taung situ.
19 Landing hitu céing ata pandé mora Adak Taurat koném can agu ata dai koén, agu nenggitu koléy toing liha agu ata bana, hia hitu lonto comong wa kétay oné osang Surga. Maik céing ata pandés agu toing sanggéd Adak Taurat hia hitu te lonto comong étay oné Surga.
20 Itup taé Daku agu méu: émé toé pandés le méu apa ata ngoéng de Morin céwé oné mai isét pecing Taurat agu sanggéd ata Parisi, moron tu’ung, méu toé ngancéng ocok nggeroné Surga.
21
Poli dengén le méu siot curup agu empo dité: néka paki ata, céing ata paki atay paka na’a oné buy.22 Maik Aku taé agu méu: Céing kaut ata rabo agu asé-ka’én, paka wahéng: Céing ata taé bapa béngot! ngong asé-ka’én paka ba oné ranga de Adak Agamay, agu céing ata taé: kafir! Paka oké oné api nerakay ata ganggor kin dilan.
23
Landing hitu émé téing takungh éta lobo compang agu rémé nggitun, nuk le hau te manga kin beti nai de asé-ka’ém latang te hau,24 ledo di takung hitu éta lobo compang olong ngo hambor di agu asé ka’ém, poli hitu itu po ngo kolé téing takung hitu.
25
Komét koém hambors agu ata balim rémé lako camas oné salang, kudut ata bali hitu toé condo hau oné adak, agu adak situ te téing hau oné isét wa’i limén agu hau lisé na’a oné bui.26 Aku taé agu méu: Moro matan, hau toé ngancéng pé’ang nitu main émé toé di bajar taung raungm.
27
Polig dengén le méu reweng: Néka loma.28 Maik Aku taé agu méu: Céing kaut ata lélo iné-wai agu humér kin nain, te ngoéng iné-wai hitu polig loman liha oné nain.
29 Itu tara émé mata wanangm te pandé calang laing hau, nggé’i agu okéy hitu, ai céwé di’an latang te hau émé mora can oné mai wekim, itu po déméng weki mongkos péncar nggerwa neraka.
30 Agu émé limé wanang te calang laing hau ndapu agu okéy, ai ata di’an latang te hau, émé mora can oné mai wekim itu po oké déméng mongkos wekim nggerewa neraka.
31
Poli kolég de wéwan: céing ata céar winan, paka téing surat céar agu hia.32 Maik aku taé agu méu: céing ata céar winan, aikn émé le loma latay, hia te pandé loma winan; agu céing ata hitut kawing agu inéwai hiot poli céarn, hia pandé lomay.
33
Poli kolép dengén le méu apa ata curup agu empo dité: néka wada nggopét, maik cau koé wada oné ranga de Mori Keraéng.34 Maik Aku taé agu méu: Néka kaut manga ngasang wada, koném le ngasang de awang, ai awang hitu kedéra de Mori Keraéng.
35 Nggitu kolé le ngasang de lino, ai lino baté menggin wa’iN, ko le ngasang de Yérusalém, ai Yérusalém béndar de Raja Mésé.
36 Néka kolé wada le ngasang de ulum, ai hau toé manga kuasam te pandé bakok ko pandé miténg, koném ca lawar wukm.
37 Ngetuk kautm, paci éng, ngéngur kautm paci toé. Émé labi nitu main de jing da’at morin hitu.
38
Poli dengén le méu gejék: Mata lesing le mata, agu ngis lesing le ngis.39 Maik Aku taé agu méu: Néka koléng le méu émé manga ata te pandé da’at agu méu, maik céing kaut ata pak pacu wanangs, tong kolé pacu léos.
40 Agu latang te ata hiot buang hau soho nanang baju de hauy, téing kolé songkem.
41 Céing kaut ata duduk hau te lako ca kilo métér tadangn, lako cama agu hia tédéng sua kilo métér.
42 Téing agu isét mai tegi agu hau, agu néka kémpa ata hitu te célong agu hau.
43
Polip dengén le méu curup: Momang ga haé atas, agu kodo haé balis.44 Maik Aku taé agu méu: Momang koé haé balim agu ngaji latang te isé ata pandé kélo méu.
45 Ai le hitu méu ciri anak de Emas éta Surga, ata pandé par leso latang te ata da’at agu ata di’a agu concang usang latang te ata molor agu ata toé molor.
46 Émé méu momang ata siot momang méuy, apay di lahén latang te méu? Toé weli ata tegi béa kolé pandé nenggituy?
47 Agu émé méu téing tabé agu asé-ka’ém kaut, apay weli ata dio-dolokn agu pandé data bana? Toé weli ata toé pecing Mori kolé pandé nenggitus?
48 Landing hitu, méu paka besik kétam cama ného besik de Emas hitu éta Surga.”
1
“Nuk di’a, néka kéta pandés lut perénta de agamam oné ranga data, kudut pala ita lisé, ai émé nenggitu, méu toé delék lahén oné mai Emas hitut manga éta Surga.2 Jari, émé méu téing reco haé atas, néka gégang kéta le méu cama ného pandé data pisik oné mbaru-mbaru ngaji agu oné ciko-ciko kudut palang naring lata. Aku taé agu méu: Moro matan, isé polig tiba lahén.
3 Maik émé téing recos, néka baé le limé léom, apa hitut pandé le limé wanang.
4 Porong recom hitu téing céhay kaut, wiga Emam hitu kanang ata itan apa te téing le hau agu téing kolé Liha lahén.”
5
“Agu émé ngaji méu, néka ného ngaji data pisik. Isé ngoéng étan ngajid cang agu heséd oné mbaru-mbaru ngaji agu oné salang mésé, kudut pala ita latas. Aku taé agu méu, moro matan, isé polig manga lahén.6 Maik émé ngajim, ngo oné lo’angm, tadu di’a para agu ngaji oné Emam ata ka’éng oné paté cehay. Wiga Emam ata itad situ oné paté ceha, agu téing lahén agu méu.
7
Nenggitu kolé oné ngajim, ketu kaut, néka ndar kéta ného ngaji data siot toé pecing Mori Keraéng. Nuk disé le do go’étn oné ngaji tara sendod.8 Jari, méu néka ného isém, ai Emam pecing taung apa ata sékék de méu du toéd tegi le méu agu Hia.
9 Itu tara ngaji nenggo’o:
Ema dami éta Surga,10
Cai koé perénta Dité,
Jari koé ngoéng Dité
Oné lino ného éta Surga.
11
Téing koé ami leso ho’o,
Mosé nai te ami ata daingn
12
Agu ampong koé ndékok dami, ného ami ampong ata pandé sala agu ami;
13
néka dadé ami nggeroné damang,
Maik tadang koé sanggéd da’at.
[Ai Ité Morin perénta agu kuasa agu bong dengkir lén. Amén.]
14
Ai émé ampongs le méu sala data, Emas hitu éta Surga te ampong kolé méuy.15 Maik émé toé ampongs le méu sala data, Emas kolé toé ampongs sala de méuy.”
16
“Agu méu émé puasam, néka sango rangas, ného pandé data pisik. Isé caling tarad kudut pala ita lata te isé lari puasad. Aku taé agu méu: moro matan, isé polig tiba lahén.17 Maik émé puasa méu, rono di’a ulus agu baki di’a rangas,
18 kudut néka baé lata te méu lari puasas, maik le Emas kali, hitut manga oné paté cehay. Wiga Emas ata ita taung pandé oné céha situ agu téing lahén agu méu.”
19
“Néka ligots le méu wéang oné lino, oné lino kotos agu ta’i upas te pandé da’at agu ata tako, rongkas agu takos lisé.20 Maik ligot le méu paéng de Surga; éta Surga koto agu ta’i upa toé ngancéng te pandé da’ats agu ata tako, toé ngancéng te rongkas agu takos.
21 Ai nia wan naad wéangm, nitu koléy mangan naim.
22
Mata hitu culu de weki. Émé di’ad matam gérak taung sanggén wekim.23 Maik émé da’at matam, nendep taung wekim. Émé néra oné wekim sagém, lengn kéta de tuiln oné nendep hitu.
24
Méu toé ngancéng ciri mendi de sua mori. Ai émé nenggituy jogot dé ho’o ca, ho’o ca ga momangy, ko sundur agu ho’o cengata, ho’o cengata ga toé lélo calay. Méu toé ngancéng lut Mori Keraéng, ngai deming kin wéang.”25
“Landing hitu Aku taé agu méu: Néka simpung latang te mosém, latang te hang ko inung, néka simpung laing kolé latang te wekim, latang apa te pakés. Toé weli mosé hitu céwé mésén, itu pong hang bara, agu weki céwé mésén, itu pong wéngko weki?26 Lélo kaut kaka lélap éta awang toé manga po’ong agu toé manga akod, agu toé manga nongko bokong oné joréngd, maik téing hang kid le Emas éta Surga. Toé weli méu ata céwé mésén kéta, itu po kaka lélap situ?
27 Céing weli oné mai méun ata soho kaut le simpungn ngancéng tambang cepagat mosén?
28 Agu co’o tara simpung laing le méu latang te wéngko wekis? Lélo damang wéla wangkung hitut todo oné umay, agu toé ciwal agu bom tiling lawéy,
29 maik Aku taé agu méu: hi Salomo agu taung bombang boran toé manga paké di’an cama agu can koé oné mai wéla wangkung situ.
30 Jari, émé nggituy sélék le Morin remang pé’ang uma ata leso ho’os mangad agu diang longgo oné apis, toé weli Hia te sélék méu céwé di’an kéta kolé, oé méut toé danga imbi?
31 Landing hitu méu néka simpung agu mai taés, apa kétag te hang dami? Apa kétay te inung dami? Le pai kétay wéngko wekigm?
32 Taung situ kawé le sangged uku siot toé pecing Mori Keraéngs. Maik pecing le Emam hitu éta Surga sanggéd sékék de méu situ.
33 Maik olong kawé di perénta de Mori Keraéng agu molorn, wiga situt ce dod ata tambang kauts oné méus.
34 Landing hitu néka simpung le méu latang te leso diang, ai diang manga agu susan. Susa ca leso remo latang te leso ca.”
1
“Méu néka bicar atam, kudut méu néka beté bicar latam.2 Ai le tepo hitut papé de méu te tepo ata, méu te tepo latam. Agu wolo de méu hitut papé te wolo ata, te wolo laing méuy.
3 Co’o tara ngancéng itan le hau lopat oné mata de haé atam, wokot watang oné mata de rum toé baé le hau?
4 Co’o tara ngancéng taé agu haé atam: kong, laku cokét lopat oné mata de hau, kali manga kin léba oné mata rum.
5 Oé méut ata pisik, olong na’a pé’ang léba oné mai matam, wiga hau ngancéng ita cias, te na’a pé’ang lopat hitut oné mata de haém.”
6
“Méu néka téing ceca ata nggelukn oné acu, agu néka wéwér tubis oné ela, boto wedi le wa’is lisé, poli hitu ngo cowit méuy.”7
“Tegi ga, manga kali téin agu méu, kawé ga, manga kali itan le méu, nontong ga, manga kali céngkan para latang te méu.8 Ai néténg-néténg ata hitut tegi, manga tiban, agu néténg-néténg ata kawé, manga néng itan, agu atat nontong, céngka de para latang te hia.
9 Manga dé’it oné mai méu te téing watu latang te anakn, émé hia tegi hang?
10 Ko téing ulary, émé hia tegi ikang?
11 Jari, émé méut da’at pecing téing apa ata di’an agu anakn, apan kolé Emas hitu éta Surga! Hia te téing ata di’an oné isét tegi agu Hia.”
12
“Sanggéd apa ata ngoéng laing le méu, te pandé lata agu méu, pandé ga nenggitu kolé latang te isé. Hituy icin sanggéd Adak Taurat agu toing de sanggéd nabi.13
Ocok ga, lut para hitut kéot, ai mésén para agu ngénggan salang te pandé copél, agu dod atat lut oné salang hituy;14 ai kéotn para agu salang nggeroné mosé agu cekoé kali atan te haéngn salang hitu.”
15
“Jerék-jerék agu sanggéd nabi tangké, ata mai cé’é méu, biluk ného jimbals, kali cetu’ungn isé situ serigala da’ats.16 Ali wuan le méu tara pecingd isé. Ngancéng weli pua wua anggor oné mai karot gulung, ko wua ara oné mai ndango-rang?
17 Nenggitu kolé néng, néténg-néténg haju di’a, wuan kolé di’a, agu pu’u haju da’at, wuan kolé da’at.
18 Toé ngancéng haju di’a, wuan toé di’a, ko haju da’at cir wua dias.
19 Agu néténg-néténg haju situt cir wua toé di’a, toét-toé wéséts agu oké longgo oné apiy.
20 Jari, oné mai wuad, tara baéd isé le méu.
21
Toét sanggéd ata so’ot nggo’o taéd ngong Aku: Mori, Mori, te ngo nggeroné mbaru Surgas, maik hia hiot lut ngoéng de Ema Daku éta Surga.22 Du leso cemol dod ata taé agu Aku: Mori, Mori, toé weli ami hiot ba pedé le ngasang Ditékm, agu mbér jing da’at le ngasang Ditékm, agu pandé dod tanda lengét le ngasang Dité kolé?
23 Du hitu kéta di Aku te tombo si’ang agu isé: Toé kéta manga baé dé’its méu Laku! Ngom oné mai ranga Dakus, sanggés méu ata pandé da’at!”
24
“Néténg-néténg atat dengé curup Daku so’o agu pandés, cama ného ata nggalas nai, hiot hesé mbarun lobo watu.25 Poli hitu cai usang agu tuan mbang, cain kolé buru warat te héur mbaru hitu, maik mbaru hitu toé rencoy, ai hesé lobo watuy.
26 Maik néténg-néténg atat dengé curup Daku so’o agu toé pandés, hia cama ného ata bapay, hiot hesé mbarun éta lobo laingy.
27 Poli hitu cai usang agu mbang, cain kolé buru warat te héur mbaru hitu wiga rencon agu le kéta rewutn.”
28
Du cemoln tombo ho’o de Mori Yésus, jenger taung ata do situt dengé toing Diha,29 ai toing Diha cama ného ata hiot manga kuasan, toé ného isét pecing Taurat disé.
1
Du poli kolén Mori Yésus éta mai golon, dod ata lako londang, lut Hia.2 Itu kali main cangata ata boké wa ranga Diha, suju agu io Hiay agu mai taén: “Mori, émé gorid ité, pandé ina koé beti daku.”
3 Itu kali losn limé de Mori Yésus, asur ata hitu, agu mai taén: “Gorig Aku, inah ga.” Du hitu muing inan boké data hitu.
4 Maik taé de Mori Yésus ngong hia: “Nuk dé, néka toi apa ho’o agu céing kaut, maik ngoh ga, toto wekim agu imam agu téing takung ata baté wuat di Musa, ai hitu tandan te pecing lisé.”
5
Du Mori Yésus ngo nggeroné béo Kapérnaum, mai cengata kepala de serdadu te cumang Hia, te tegi agu Hia:6 “Mori, mendi daku halas kin oné mbaru, ai pékoy agu kélo-balé tu’ung mosén.”
7 Mai taé de Mori Yésus ngong hia: “Aku ngok te pandé inan.”
8 Maik walé de kepala serdadu hitu agu Hia: “Mori, toé kéta remok aku te tiba Ité oné mbaru daku, maram ca gewékn kaut reweng Dité, toé te toé ina muing beti de mendi daku hitu.
9 Ai weki rug kaku ata bewa-mai perénta datak agu bewa-mai aku manga kolé serdadu ata merik pangkatd. Agu émé nggo’o kaut taé daku ngong cengatan serdadu hitu: Ngoh! Ngo kauty, agu émé nggo’o kolé taé daku ngong cengatan: Mai! Mai kauty, ko latang te mendi rug: pandé ho’o, pandé kauty liha.”
10 Du dengé le Mori Yésus reweng de serdadu hitu, lenget kétay agu mai taén ngong isét lut Hia: “Moro matan, imbi mésé ného nggo’o toé dé’it dengé Laku oné mai ata Israél.
11 Aku taé agu méu: Dod ata te mai awo mai agu salé mai agu lonto hang cama-cama agu hi Abraham, hi Ishak agu hi Yakub oné Surga.
12 Maik sanggéd anak mbaru hitu, te péncar nggeroné nendép tuil da’at, nitu de manga rétang-rembo agu kérek ngis.”
13 Itu kali mai taé de Mori Yésus ngong kepala serdadu hitu: “Koléh ga, agu jari taung hitut imbim.” Wiga du hitu muing di’an mendi de kepala serdadu hitu.
14
Du cain oné mbaru di Pétrus, ita le Mori Yésus, inang di Pétrus halas kin, ai beti pémpang.15 Itu kali cau limén liha inéwai hitu, agu rémé nggitun mora muing pémpangn. Itug to’on agu ris Hian.
16 Du wiég tana, dadé dod ata nggeroné Mori Yésus, ata hena le jing da’at, maik ca mu’u kaut curup de Mori Yésus mbér jing situ, agu pandé ina isét hena le beti situ.
17 Hitus dé cai wad te rapakn curup hiot caing le nabi Yésaya: “Hia ata polad lendé dité, agu ata tanggongd beti dité.”
18
Du ita le Mori Yésus ata do baling mai Hia, jera Liha te lako be sina mais.19 Itu kali main ata pecing Taurat agu mai taén ngong Hia: “Tuang Guru, aku kudut lut Iték nggerenia kaut ngo Dité.”
20 Taé de Mori Yésus agu Hia: “Serigala manga liangn agu kaka lélap manga cewon, maik Anak Manusia kali toé kéta manga osangn latang te bérit sa’in.”
21
Manga ca ata bana, hia cengata oné mai ata nungkun, mai taén agu Hia: “Mori, sendo koék aku Lité te boak emag!”22 Maik mai taé de Mori Yésus agu hia: “Lut Aku, kong isét mata boak cama ata matad.”
23
Itu kali léti perahu Mori Yésus agu ata nungkun kolé lut Hias.24 Rodo tuan kaut buru warat oné sano hitu, wiga wangka disé géréng té kandon le bombang, maik toko kin Mori Yésus.
25 Og kali mai data nungkun te kéngko Hia, taéd: “Campé Mori, copél tité ho’o ga.”
26 Mai taé Diha agu isé: “Co’o tara rantangs, méu ho’ot toé danga imbi?” Itu kali to’on Mori Yésus agu kentay Liha warat agu sano hitu. Itu kali letét kétay sano hitu.
27 Lengét kétas ata situ, mai taéd: “Céi kéta Hia ho’o, wiga warat agu sano lorong kaut le perénta Dihas?”
28
Du cai besinad, oné tana data Gadara, mai sua taus ata oné mai boa ata hena le jings, te cumang Mori Yésus. Ata situ ngancéng copél laing, wiga toé manga cengatan ata cung te lako salang hitu.29 Isé situ ciéks taéd: “Te co’og ami Lité, oé Anak de Mori Keraéng? Cala mai Dité kudut wahéng ami bebolon cai wié leson?”
30 Toé tadang nitu main, manga ca okas ela, rémé oncor kawé hangd.
31 Itu kali jing da’at situ tegi agu Hia, mai taéd: “Émé mbér ami Ité, jera koé ami ngo boné ela do siokm.”
32 Taéd Mori Yésus ngong isé: “Ngom ga!” Itu kali pé’angd agu ngo oné ela situ. Itu kali woncekd sanggéd ela do situ oné téngku nggerewa sano agu mata boné waés.
33 Og kali losid sanggéd ata lami ela situ agu du caid oné béndar tombo kéta taung lisé, nggitu kolé latang te ata do siot hena le jings.
34 Kedang kéta taungs lawa oné béndar hitu te ngo cumang Mori Yésus agu du poli cumangn lisé Hia, soka lisé, kudut Hia ledong tana ata ka’éng diséy.
1
Du poli hitu Mori Yésus léti perahuy agu ngo besinan. Itu kali cain Hia oné béndar de Run.2 Itu kali berotong lata cengata ata péko wa ranga Diha ata ngai halas kin oné wongkan. Du ita le Mori Yésus imbi disé, mai taén ngong ata péko hitu: “Imbi kaut le hau anak, ndékokm polisg ampongd.”
3 Maik nggutd pisa taus ata pecing Taurat oné naid, taéd: “Hia ho’o é, mbécik Mori Keraéngy.”
4 Maik baé le Mori Yésus get nai disé, mai taén: “Co’o tara nuk ata da’ats méu oné nais?
5 Nia ata céwé émongn; taé: Polisg ampongd ndékokm, ko taé: To’oh ga, agu lakoh ga?
6 Maik kudut baé le méu, te oné lino ho’o Anak Manusia manga kuasan te ampong ndékok.” Mai taén ngong ata péko hitu: “To’oh ga, ba wongka tokom agu kolé mbarum!”
7 Itu kali to’on ata hitu agu kolén.
8 Wiga ata do situt ita pandé hitu, rantangs, itu kali naring Mori Keraéngd ata poli téing kuasa nenggitu oné manusia.
9
Du poli ngo nitu main Mori Yésus, ita Liha cengata, ata ngasangn hi Matéus, lonto kin oné mbaru tegi béa, mai taéN ngong hia: “Lut Akuh.” Itu kali hesén hi Matéus agu lut Hiay.10 Ného cepisan du Mori Yésus hang oné mbaru di Matéus, do kétas isét tegi béa agu ata ndékok agu hang cama-cama agu Hia agu ata nungkun.
11 Du itas lata Parisi wintuk hitu, mai taé disé ngong ata nungku de Mori Yésus: “Co’o tara hang cama-cama agu ata tegi béa agu ata ndékokn guru de méu?”
12 Dengé le Mori Yésus, mai taén: “Toé ata weki di’a hitut kawé doktér, maik ata beti.
13 Jari ngom ga, idep di’a betuan reweng ho’o: Ata ngoéng Daku momang agu mohas, toé téing takung, ai mai daku, toé bénta isét molor, maik ata ndékok.”
14
Ného cepisan, mais ata nungku de Yohanés oné Mori Yésus agu mai taéd: “Co’o tara ami agu ata parisin kali te puasa, maik ata nungku Dité toé?”15 Mai walé de Mori Yésus agu isé: “Ngancéng weli haé reba dihat kopé harat wéong naid du rémé hiat kopé cama laing agu isén? Landing manga leson hiat kopé harat dadé oné mai isén, du hitu di po puasas.
16 Toé manga cengatan ata, hitut tumpak caré ata toéd neket oné baju boték, ai émé nenggitu caré-caré hitu te pandé biret baju hitu, agu danga-danga mésén biretn.
17 Nenggitu kolé anggor weru, toé loli nggereoné kandi luit manga, ai émé nenggitu, betéy kandi hitu wiga anggor situ oké taungy, agu lewes bon kolé kandi hitu. Landing anggor weru na’a lata oné kandi weru kolé wiga ali hitu meler kid isét sua.”
18
Lari curup nenggitun Mori Yésus agu isé, mai cengata kepala sinagoga suju wa ranga Diha agu mai taén: “Anak inéwai daku itu koé di rowan, landing weli ga, mai koét Ité agu témba liméd oné hia kudut mosé kolé.”19 Og ngon Mori Yésus cama laing agu ata hitu agu ata nungku Diha.
20 Du hitu manga cengata inéwai ata campulu sua ntaung béhéngn beti ru’u gogangy, lako ruis be musi mai Mori Yésus, agu cabi lindi juba paké Diha,
21 Ai nuk oné nain: “Am cabi kaut laku lindi jubaN, ina bog aku.”
22 Og holés nggere musin Mori Yésus agu lélo hia, mai taéN: “Mberés kaut naim anak Daku, le imbim tara selamak laing hau.” Pu’ung nitu main ina muing beti de inéwai hitu.
23
Du cai oné mbaru de kepala sinagoga hitu ita isét tebang sunding agu ata do ngai ngaoks,24 mai taén: “Pé’angm ga, anak koé ho’o toé matay, maik tokoy.” Maik isé tawa Hias.
25 Du poli taung jera ngo be pé’angd ata do situ, Mori Yésus ngo nggere onéy agu cau limé de anak koé hitu, itug kali to’on anak koé hitu.
26 Wiga wéro-émbon tombo hitu oné temu tana hitu.
27
Du ruda lako nitu main Mori Yésus, sua taus ata buta lorong Hia cang agu ciékd, taéd: “Ba’éng koé ami, oé anak di Daud.”28 Du ngo oné ca mbaruy Mori Yésus, mais sua taus ata buta situ nggere-oné Hia agu Mori Yésus taé agu isé: “Imbi le méu te Aku ngancéng pandén?” Mai walé disé: “Yo Mori, imbi lami.”
29 Itu kali Mori Yésus asur mata disé cang agu mai taén: “Jari ga oné méu, lorong imbis.”
30 Itus kali wela kauts mata disé. Agu Mori Yésus masa kéta pedén latangt isé, mai taéN: “Lélo, porong néka cengatan te baé apa ho’o.”
31 Maik ngo be pé’angs isé, agu wéron lisé Hia, oné temu tana hitu.
32
Rémé ngo be pé’angd sua taus ata buta situ, ba kolé nggere-oné Mori Yésus cengata ata dopel hena le jing da’at.33 Agu du poli mbérn jing da’at hitu, itu po ngancéng curupn ata dopel hitu. Wiga lenget taung ata do, agu mai taéd: “Pandé nenggo’o toé kéta dimanga itan lata oné Israél.”
34 Landing mai taéd ata Parisi: “Le kuasa de tu’a de jing da’at Hia tara ngancéngn mbérd jing da’at situ.”
35
Nenggitu dé Mori Yésus lako temu béndar agu béon, Hia toing oné mbaru-mbaru ngaji agu keréba Injil Adak Surga agu pandé morad sanggéd beti agu lendé.36 Le ita ata do situy, kembuk nain Mori Yésus latang te isé, ai lémas agu lubars cama ného jimbal siot toé manga ata lamid.
37 Maig taéN ngong ata nungkuN: “Bo kéta do dani, maik ata gorid cekoés kali.
38 Landing hitu tegi agu Hiat ngara dani, kudut Hia katu dos ata duat latang te akod.”
1
Mori Yésus bénta ata nungkun situt campulu sua agu téing kuasa agu isé latang te mbér jing da’at agu kudut pandé ina beti agu lendé.2
Ho’os ngasang de rasul situ: Te can hi Simon ngasang banan hi Pétrus agu hi Andréas asén, hi Yakobus agu asén hi Yohanés anak di Zébédéus,3 hi Pelipus agu Bartoloméus, hi Tomas agu hi Matius ata tegi béa, hi Yakobus anak di Alféus, agu hi Tadéus,
4 hi Simon ata Zélot, agu hi Yudas Iskariot hiot tai pika Hiay.
5
Rasul situt campulu sua wuat le Mori Yésus agu mai pedén ngong isé: “Méu néka pa oné salang data banam, ko néka mpéong oné béo data Samaria,6 maik ngo kali oné jimbal situt mora oné mai weki Israéld.
7 Ngom ga, agu tombo le méu: Adak Surga ruis gi.
8 Pandé inas ata beti; pandé mosés ata mata; pandé di’as ata boké agu mbérs jing. Poli tiba bod so’o le méu, itu tara téi bod kolé le meu.
9
Méu néka ba émas ko pérak ko tembaga oné kendiks.10 Méu néka ba bokong oné salang, néka ba suan baju, sepatu ko dongkar, ai ata pala patun te tiba lahén.
11 Émé ngo méu oné béndar ko béo, kawé le méu nitu ata hitut patun, agu ka’éng oné hia dengkir méu ngo kolém.
12 Émé ocok méu oné mbaru data, téing tabé le méu isé.
13 Émé naun isé te tiba, tabé hitu wa’u oné iséy. Émé toé, tabé de méu kolé oné weki rus.
14 Agu émé toé tiba di’a méu lata, agu toé séngét curup de méus, ngo méu ga, agu legong le méu mbaru ko béo hitu agu péntang kebok wa wa’is.
15 Aku taé agu méu: Moro matan, du leso beté-bicar tana Sodom agu Gomora, céwé géal tanggongn itu po de bendar hitu.
16
Lélo, Aku wuat méu cama ného jimbal ngo oné bahi-réha Srigala, landing hitu méu porong nggalas ného ular, tipek ného tekur jawam.17
Landing jaga di’a-di’a agu ata, ai manga ata te téing méu oné isét Adak Agama, agu isé te luca méu oné mbaru ngaji.18 Agu landing kaut Aku, méu todang ba oné ranga disét cau kuasa agu raja-raja ného ca sakasi latang té isé agu té sanggéd uku ata toé pecing Mori Keraéng.
19 Émé téing méu lisé, néka simpung te co’oy, te apa kétag le méu walén, ai sanggéd situ manga kali widang oné méun du hitu muings.
20 Ai toé méu hitut curup, maik Nai de Emas. Hia hitut curup oné mai nai de méu.
21
Ata te téing asé-ka’én te ala, nenggitu kolé ema latang te anakn, agu anak-anakn lawang ata tu’ad, agu te mbelé isés.22 Méu te kodo le sanggén ata, landing kaut le ngasang Daku, maik isét ta’ong dengkir cemoln selamakd moséd.
23 Émé pandé kélo-balé lata méu oné ca béo, losi méu oné béo bana, ai curup tu’ung Daku agu méu: Du toéd laboks le méu lakod béndar data Israél, polig main Anak Manusia.
24 Ca murid toé ngancéng labi oné mai gurun, ko ca mendi oné mai morin.
25 Remo émé ca murid cirik cama agu gurun, agu ca mendi cirik cama agu Morin. Émé ata ngara mbaru caron lisé Bélzébul (tu’a de jing da’at), apan kolé isét ka’éng ca mbaru.
26
Jari, néka rantang méu agu isé ai toé manga can raja ata toé téa oné géraks, agu toé manga can ata cehas ata toé pecings.27 Apa ata curup Daku agu méu oné nendep, paka curups le méu oné géraks, agu apa ata saok molé oné tilu, tombos ga situ éta mai lobo mbaru.
28 Agu néka rantang méu agu isét ngancéng ala weki, maik toé manga kuasad te ala wakars, rantang kéta kali Hiat manga kuasan te calang wakar agu weki oné api neraka.
29
Toé weli kaka cik pika suan ce rimis? Landing toé kéta can oné mai isé te pa’u oné linos, bepé’ang mai ngoéng de Emas.30 Agu méu, wuk éta ulus kolé ngancéng bilang taungd.
31 Landing hitu néka rantang méu, ai méu céwé mésén oné mai cik do situ.
32
Céi-céing ata situt tiba Aku oné ranga de manusia, Aku kolé te tiba hiak oné ranga de Emag éta Surga.33 Landing céi-céing ata pali Akun oné ranga de manusia, Aku kolé néng te pali hiak oné ranga de Emag éta Surga.”
34
“Néka nggo’o nuk de méu, te mai Daku oné lino kudut ba hambor. Mai daku toét ba hambor, maik ba sempilang.35 Ai Aku kudut pandé behas anak ata rona agu eman, anak inéwai agu endén, woté agu inangn,
36 agu bali data, hitus isét cama mbarud.
37
Céi-céing ata céwé momang eman, ko endén itu po Aku, hia toé patun latang te Aku; agu céing kaut ata céwé momang anak ata ronan ko anak inéwain po Aku, hia toé patun latang te Aku.38 Céi-céing ata toé pola panggoln agu toé lut Aku, hia toé kopn latang te Aku.
39 Céi-céing ata momang nain, hia te mamur nawan, agu céing ata mamur nawan landing Aku, hia te mo’éng mosén.
40
Céi-céing ata tiba méu, hia tiba Akuy, agu céing ata tiba Akuy, hia tiba Hiat wuat Akuy.41 Céi-céing ata tiba nabi, ného nabiy, hia te tiba lahé de nabiy, agu céing ata tiba ata molor ného ata molory, hia te tiba lahé data molory.
42 Agu céing kaut ata téing waé ces ce gelasn kaut latang te cengata oné mai isét panga-wa so’o, landing hia ata nungku Dakuy, Aku taé agu méu: Moro matan, toé mora lahén latang te hia.”
1
Du Mori Yésus poli taungs pedén oné rasul situt campulu sua, ngog Hia nitu main te toing agu te tombo Keréba Di’a oné sanggéd béndar disé.2
Oné mai buin hi Yohanés, dengé liha apa ata gori di Kristus,3 itu tara jera ata nungkun, te réi Hia: “Ité hitut mai, ko ami paka géréng ata banakm?”
4 Mai walé de Mori Yésus agu isé: “Ngom ga méu, agu tombo oné hi Yohanés, apa ata dengé agu apa ata ita de méu:
5 Ata buta ngancéng lélo, ata péko ngancéng lako, ata boké ciri helis wekin, ata nenteng ciri nilor, ata mata mosé kolé, agu oné isét lénggé ba keréba di’a.
6 Agu mosé di’a hiat toé doét Akuy.”
7
Du koléd ata nungku di Yohanés, pu’ung Mori Yésus tombo agu ata do situ latang te hi Yohanés: “Kudut te co’os méu ngo oné satar mambak? Kudut lélo helung ata héo-haol le burus?8 Ko kudut apa ngos? Te lélo ata paké ceca hemél? Ata situt paké ceca hemél, osangd oné mbaru de raja.
9 Jari, apa weli tara ngos méu? Kudut lélo nabi? Tu’ung kéta, Aku taé agu méu: Hia céwé mésé oné mai nabi.
10 Ai latang te hia manga tulisn:
Lélo ga, Aku wuat atag bolo mai Ité,11
Aku taé agu méu: Moro matan, oné mai isét loas le inéwai, toé dé’it manga tuan cengatan ata céwé mése oné mai hi Yobanés te Cebong; landing hiat merik-kejik oné osang Surga, céwé méséd oné mai hia.12 Du pu’ung mangan hi Yohanés Cebong dengkir te ho’on, manga ata te purakn Adak Surga, agu hiat purakn, damang te kuasan liha.
13 Ai sanggéd nabi agu Kitab Taurat, ba pedé engkir tuan hi Yohanés,
14 agu-émé goris méu te tiba - hituy hi Élia hitut kudut maiy.
15 Céi-céing ata paéng tilun, séngét koé liha!
16
Agu apa Laku rapangd ata uwa te ho’on? Isé situ rapang cama ného anak koé ata lonto oné ambas agu mai ciékd ngong haé rebad:17
Ami tebang sunding latang te méu, landing méu toé goris te saé,
ami déré ngiwi-ngaéskm maik méu toé manga walus.
18
Soho mai di Yohanés, toé hang agu toé inung maig taé disé: Hia hena le jing da’aty.19 Poli hitu woko cai Anak Manusia, Hia hangy agu inungy, mai taé disé: Lélo damang, Hia ata gomeng agu ata langu, asé-ka’é data tegi béa, agu ata ndékok. Maik le nai ngalis de Mori Keraéng, helek de cengata lélo oné mai pandén.”
20
Itug kali majad le Mori Yésus béndar situt toé gorid te tesers, koném po nitu Hia do pandé tanda lengetn:21 “Copél hau Korazim! Copél hau Bétsaida! Ai émé oné Tirus agu Sidon, manga pandé tanda lenget situt poli mangad oné bahi-réha méu, médésg teserd agu walud.
22 Landing aku taé agu méu: Du leso toto-bicar, mendo disét Tirus agu Sidon, te daing géald, itu po mendo de méu.
23 Agu hau Kapérnaum, asah weli hau, te téti haéng awangh? Toé, hau kéta te rendak na’a wah, haéng lino disét matah! Ai émé oné Sodom mangas tanda lenget, ata poli jirid oné bahi-réha méu, béndar hitu toét-toé manga kin dengkir te ho’on.
24 Maik Aku taé agu méu: du leso beté-bicar, mendo de bendar Sodom céwé géald itu po mendo de méu.”
25
Du hitu curup le Mori Yésus: “Aku wali di’a agu Ité Ema, Mori de awang agu tana, ai sanggéd situ, cehas Lité latang te isét nggalas agu isét nggepuk, maik tois Lité oné isét panga-wa.26 Yo Ema, hitu ata henan oné Ité,
27 Sanggéd taung poli widang agu Akud le Emag, agu toé cengatan ata pecing ngasang Anak, émé toé le Ema, agu toé cengatan ata pecing Ema émé toé le Anak agu oné ata hituy henan toin le Anak hitu.
28
Mai cé’é Akum, sangges méut poso le pola mendo, Aku kudut téing cembes agu méu.29 Pola ga oka ata na’a Laku agu nungku oné Aku, ai Aku ata jinggop agu lembak nai, wiga wakarm te delék melery.
30 Ai oka hitut na’a Laku minakn doing, agu mendo Daku kolé géaln.”
1
Du hitu du leso Sabat, Mori Yésus lako oné uma gandumy. Ai le doing darems ata nungkun, mais isé akos gandum situ agu hangs lisé.2 Ita hitus, mai taé data Parisi ngong Hia: “Lélo ga, ata nungku Dité pandé ata ireng laingn du leso Sabat.”
3 Mai walé de Mori Yésus ngong isé: “Toé bacang le méu, apa ata pandé di Daud, du hia agu isét haé lakon darems,
4 co’os isé ngo oné mbaru de Mori Keraéngd agu co’os isé hang roti takung ata toé ngancéng te hang, koném liha ko isét haé lakon kolé, bom lisét imam kali?
5 Ko toé bacang le méu oné Kitab Taurat, te du leso sabat, imam lagé perénta leso sabat oné Mbaru de Mori Keraéng, maik toé manga sala laingd?
6 Aku taé agu méu: Cé’é ho’o manga ata céwé kuasan oné mai Mbaru de Mori Keraéng.
7 Émé pecing kéta le méu betuan reweng ho’o: ‘Ata nanang laing Dakun hanang mohas, toé takung’, tantu méu dé toé wahéng ata situt toé manga salad.
8 Ai Anak Manusia Mori de leso Sabat.”
9
Du kolé nitu main, Mori Yésus ngo oné mbaru ngaji diséy.10 Nitu manga cengata ata mata limé cecupun. Mai réi disé ngong Hia: “Ngancéng ko toé pandé ina ata du leso Sabat?” Nuk disé kudut ngancéng hena le salan Hia.
11 Maik mai taé de Mori Yésus ngong isé: “Émé cengatan oné mai méu manga paéng can jimbal agu jimbal hitu pa’u oné ngeroy du leso sabat, toé weli karét agu téti na’a be pé’ang le méu ko?
12 Toé weli manusia ata céwé mésén oné mai jimbal? Itu tara ngancéng pandé ata di’an du leso Sabat.”
13 Maig taé de Mori Yésus ngong ata hitu: “Lendor limém!” Itug kali lendor limén, rodo di’ag kaut limén hitu, agu di’a muing ného limé cecupun.
14 Itu kali ngo bepé’angd ata Parisi situ agu ca nais te ala Hia.
15 [15a] Maik pecing le Mori Yésus nai da’at disé situ, itug kali hésing nitu main.
[15b] Do kéta ata lut Mori Yésus agu pandé di’a taung isé Liha.16 Hia ré’ing tu’ung isé te tombo céing Hia,
17 kudut rapakn reweng ata caing le nabi Yésaya:
18
“Lélo ga, hitu Mendi ata pilé Rug ata momang Laku, hitut oné,
Hia henan wakar Daku; Aku te na’a Naig nggeréta Hia,
agu Hia caing bati agil oné uku do.
19
Hia toé manga léwang agu toé manga ciék,
agu ata toé manga dengé reweng Dihad oné salang-salang.
20
Helung hiot tepo ndéo-ndaong, toét pandé kémpuk Liha,
agu sumbu hiot saném dilan toét pandé pesay Liha,
dengkir agu pandé komén Liha perénta hitu.
21
Agu oné Hias kali demingd sangged uku do.”
22
Poli hitu dadé lisé oné Mori Yésus cengata ata rasung le jing da’aty. Ata hitu buta agu dopely, mai Mori Yésus pandé inay wiga hiat dopel hitu ngancéng curupy agu ita atay.23 Itug kali lenget kéta taung ata do situ, mai taéd: “Hia ho’o am Anak di Daud.”
24 Landing woko dengé lata Parisi, mai taé disé: “Ai li Béélzébul tu’a de jing da’at, tara nganceng mbérd Liha jing da’at.”
25 Maik Mori Yésus pecing nai disé, maig taén ngong isé: “Néténg-néténg pemerénta ata poli bikén toét-toé ampusy, agu néténg béndar ko mbaru kilo ata poli biked, toé ngancéng ta’angd.”
26 Nenggitu kolé émé jing da’at mbér jing da’at, hia kolé te mbihi-mbehar agu dungkang kolé weki run; co’od ngancéng ta’ang pemeréntan?
27 Jari, émé Aku mbér jing da’at le kuasa de Béélzébul, le kuasa diongs ata lut méu mbér hia? Landing hitu iséy ata ciri bicar laing méu.
28 Landing émé Aku mbér jing da’at le kuasa de Nai de Mori Keraéng, cetu’un perénta de Mori Keraéng polig mai cé’é méun.
29 Ko co’oy ata ngancéng ngo oné mbaru de cengata ata rani agu purak taungs cecan, émé toé olo pungkut liha ata hitut rani? Du poli pungkutn liha ga, itu pong ngancéng purakn mbaru hitu.
30 Céing ata toé nai ca anggit agu Akun, hia lawang akuy agu céing ata toé tuka ca léléng agu Aku, hia pandé bike agu behas.
31 Landing hitu Aku taé agu méu: “Sanggéd ndékok agu mbéis manusia, ngancéng ampongd, maik mbéis Nai Nggeluk toé kéta ngancéng ampongd.
32 Émé manga cengata ata curup te lawang Anak Manusia, hia ngancéng ampongy, maik émé hia lawang Nai Nggeluky, hia toé kéta ampongy, oné lino ho’o toé, agu oné lino tai kolé toé.
33
Émé can pu’u haju di’an taé de méu, di’an kolé dé wuan, - émé ca pu’u haju toé di’an taé de méu, toé de di’an kolé wuam, ai oné mai wuan haju hitu pecing kolé lata pu’un.34 Oé méut waé de ular mbangi, co’o méu ngancéng pa’u go’ét ata di’an, égém weki rus méu da’ats! Ai situt go’ét de mu’u, tua oné mai tukad.
35 Ata weki di’a, losa ata di’ad oné mai naid, maik ata weki da’at, da’at kolé apa ata losad oné mai naid.
36 Maik aku taé agu méu: néténg curup ata pinanaéngd, situt curup lata, paka tura rajad liha du leso beté bicar.
37 Ai lorong le go’étm hau, te tiba molorh, agu lorong go’étm kolé hau te tiba wahéngh.”
38
Lété hitu, mai taé data pecing Taurat agu ata Parisi ngong Mori Yésus: “Tuang Guru, ami ngoéng te lélo can tanda oné mai Ité.”39 Maik mai taé Diha ngong isé: “Ata uwa weru so’o da’at agu toé junggu, soléng kéta can tanda. Landing oné isé toé kéta ngancéng téing tanda, remo tanda di Yunus.
40 Ai ného hi Yunus ka’éng oné tuka de ikang telu wié telu leso, nenggitu kolé néng Anak Manusia, te ka’éng oné tuka de lino telu wié telu leso.
41 Du leso beté-bicar, ata Niniwé te to’o cama agu uwa ho’os te sakasi lawang isé. Ai ata Niniwé situ tesers du poli dengé keréba di Yunus, agu moron, Hiat manga cé’é ho’o céwé mésé oné mai hi Yunus!
42 Du leso beté bicar, sengaji inéwai hitut lé mai, te to’o agu ata uwa ho’oy agu te sakasi te lawang isé. Ai sengaji hitu mai pé’ang mai binting awangn te séngét nggalas nai di Salomo, moro matan, hiat manga cé’é ho’o céwé mésén oné mai hi Salomo!”
43
“Émé losa jing da’at oné mai manusian, hia mbéo-mbaot lakon kawé du osang situt nggelang te kawé baté ka’éngn. Maik toé ngai dumpun liha.44 Itug kali mai taén: Aku te kolék oné mbaru hiot ledong daku. Itu kali ngon, agu ita mbaru hitu, toé manga ka’éng atan, roi di’a agu iruk di’a.
45 Itug kali ngo kolén agu sawal kolés liha pitu jing da’at ata céwé da’at oné mai hia, agu ngo bonés agu ka’éng nitus. Cemoln ga, weki data hitu céwé da’at oné mai weki laring cain. Nenggitu kolés jirid ata da’at so’o.”
46
Du lari curup Mori Yésus agu ata do situ, endén agu asé-kaén hesé kid bepé’ang agu isé nanang te cumang Hias.47 Mai taé de cengata ngong Hia: “Lélo, endém agu asé-ka’ém manga pé’ang tanas nanang cumang agu Ités.”
48 Maik mai walé de Mori Yésus agu ata hitut ba tombo oné Hia: “Céing néng endé Daku? Agu céings néng asé-ka’é Daku?”
49 Maik taén cang toso nggeroné ata nungkun: “Ho’o endé Daku, agu sanggéd asé-ka’é Daku.
50 Ai céing kaut ata pandé lut ngoéng de Ema Daku hitut éta Surga, hia asé ka’é Daku ata rona, hia wetag, agu hia endé Daku.”
1
Du leso hitu Mori Yésus ngo pé’ang oné mai mbaru hitun agu ngo lonto oné lupi sanoy.2 Itug kali cewurd maid ata do agu hesé rentum léok Hias, wiga Hia ngo léti wangka agu lonto nituy, maik ata do situ hesé pé’ang lupi sanos.
3 Agu Hia do kéta curupn ata ba le rapang molés agu isé. Mai taén: “Manga cengata ata ngo weri winiy.
4 Du werid liha, iwod wini situ pa’u lupi salangs, og cai kaka lélap tenggok kéta taungs wiga cipotd.
5 Iwod pa’u oné watu roga ata toé do tanan, itug kali wini situ gélang todod, ai mipis tanan.
6 Maik du étag leso, mélos agu dangos ai toé manga wakén.
7 Iwod kolé pa’u oné cembot karots, woko tambang méséd karot situ, itug kejékd bélak koé situ agu matad.
8 Agu iwod kolé pa’u oné tana beheng itu kali wuad: mangas ata ceratus ngkali mpalé, manga ata enempulu ngkali mpalé, manga ata telumpulu ngkali mpalé.
9 Céing ata manga tilun, pinga koé di’a!”
10
Itug kali maid ata nungkun agu réi oné Hia: “Co’ot Ite tara curup agu isé ba le rapang molés?”11 Mai walé de Mori Yésus: “Latangt méu téing nggalas nai te pecing pété cehad Adak Surga, maik latang te isé toé.
12 Ai céing-céing ata mangad ga, téing oné hias, wiga diha héla-haéd; maik céing ata toé mangad, apa kaut ata mangad oné hia, te emi oné mai hiad.
13 Itu tara curup Daku ba le rapang kaut agu isé; ai koném po lélo isé, landing toé ita agu koném dengé isé toé séngét agu toé ideps.
14 Oné isé kéta rapakn pedé di Yésaya, nenggo’o runingn:
Méu te dengé agu séngét, maik toé ideps,15
Ai nai de uku ho’o penong le cengkang
agu nenteng kéta tilud te séngét agu matad raket raputs;
kudut isé néka ita le matad agu dengé le tilud
agu idep le naid, itu holés, wiga Aku pandé ina isék.
16
Maik komén kéta mata de méu, ai ita agu tilus ai dengé.17 Ai Aku taé agu méu: Moron, dod nabi agu ata molor lélak kudut ita apa ata poli itad le méu, landing toé itas lisé agu lélak kéta te séngéts apa ata dengéd le méu, maik toé dengés lisé.
18
Landing séngét koé betuan toto rapang weri wini hitu.19 Oné néténg ata hitut dengé curup latang te Adak Surga, maik toé pecing betuan, maig jing da’at te rambut apa hitut weri oné nai data hitu. Hitus wini siot wécak oné lupi salangs.
20 Wini siot weri lobo watu rogas ngong ata siot dengé curup situ ata gélang tibad agu nakad.
21 Maik toé wakés oné nai disé agu cekoé kaut ta’ongd. Émé cai rené ko mosé céncés ali reweng hitu, gélang kéta mesotn.
22 Situt wécak oné cembot karots hitus ata siot dengé curup situ, maik simpung de lino ho’o agu nggopét de bora pandé kejé curup situ wiga toé manga wuad.
23 Siot wécak oné tana beheng, ngong ata siot séngét reweng situ agu idep oné naid, ali hitu cir wuad, manga ata alép ceratusd, manga ata alép enempulud, manga ta alépd telumpulud.”
24
Mori Yésus tombo kolé ca rapang bana agu isé, mai taén: “Pété Adak Surga hitu cama ného ata hiot weri wini di’a oné uman.25 Maik du toko taung ata, mais ata balin, wécak wini ri’i oné beréha gandum situ, poli hitu ngo gi.
26 Du todod gandum situ agu wangkasg landod, ita kolés ri’i situ.
27 Itu kali maid mendi dihat ngara uma oné hia agu mai taéd: Mori, toé weli wini di’a kanang situt weri oné uma dité? Nia maid kaut ri’i situ?
28 Mai walé de keraéng hitu: ca ata bali ata pandéd. Maig taé de mendi situ agu Hia: Asa ngoégnd ité kudut ami ngo kebut taungs ri’i situ?
29 Landing mai taé Dihat ngara uma: Néka; boto kebut cala gandumd, du kebut ri’is méu.
30 Sondang todo camad haéng du ako lé. Du hitu aku te taé isét ako: Olong ongkos ri’i situ, agu pongo bilang ujungs te tapa oné apis; poli hitu nongkos gandum situ te na’a oné joréng Dakus.”
31
Mori Yésus tombo kolé ca rapang bana agu isé, mai taén: “Pété Adak Surga Hitu cama ného lincé sawé, hiot emi agu wécak lata oné uma.32 Bo tu’ung lincé situ kéta ata céwé merikn oné mai sanggén lincé, maik émé todos, sawé situ ata céwé méséd oné mai pu’u uté bana, ngot ciri pu’u méséy, wiga kaka lélap éta awang, mai pandé cewo oné pangad.”
33
Agu tombo kolé Liha rapang ho’o agu isé: “Latang te Adak Surga weli ga, cama ného ragi hiot emi le cengata inéwai, hamol agu terigu telumpulu kilo, wiga ramong taungn.”34
Sanggéd situ tombos le Mori Yésus agu ata do ba le rapang molés, agu toé manga ata toé ba le rapangs Liha agu isé,35 kudut rapakn reweng hiot caing le nabi:
“Aku ngoéng wuka mu’ug te curup toto rapang,36
Poli hitu ngoy Mori Yésus ledong ata do situ agu kolé gi. Mais ata nungkun, agu mai taéd ngong Hia: “Si’ang koé agu ami latang te rapang ri’i hiot todo oné uma.”37 Mai waléN: “Ata hiot wécak wini di’a, ngong Anak Manusia;
38 Uma, ngong tana lino. Wini siot di’a, ngong ro’éng de Adak Surga, agu ri’i, ngong ro’éng de jing da’at.
39 Ata bali hitut wécak wini ri’i, ngong jing da’at. Cekéng ako, ngong du cemoln lino agu sanggéd ata ako, ngong malékat.
40 Jari, ného ongko ri’i situ agu longgo oné apid, nenggitu kolé du cemoln lino.
41 Anak Manusia te jera malékatn agu isé te ngo ongkod sanggéd isét pandé wéléng, agu sanggéd ata siot pandé da’at.
42 Sanggéd taung te péncar oné sapo apis; nitu mangan jéjéng agu kérek ngis.
43 Du hitu isét molor, néra ného mata lesos oné osang de Emad. Céing ata manga tilun, porong séngét di’ay.”
44
“Latang te Adak Surga cama ného ceca ata boak oné umay, ata dumpu lata, poli hitu boak koléy. Ali nisang kéta nain itu kali ngo te pika taungs cao-can agu weli uma hitun.45
Nenggitu kolé latang te Adak Surga hitu, cama ného cengata ata dagang, hiot kawé mutiara hitut manik kétay taran.46 Woko dumpu liha mutiara hitut wegit, itug ngon te pika taungs cao-can agu weli mutiara hitu!”
47
“Nenggitu kolé latang te paté Adak Surga, rapang ného ndala hiot oké oné tacik, agu haéng kéta taungs tarad ikang.48 Du penongn ga, itug sorokn lata ndala hitu nggere pé’ang tana masa, itug kali lontod agu igol taung ikang ata di’ad na’a oné roto, agu ikang ata da’at okés lisé.
49 Nenggitu kolé du cemoln lino: Malékat-malékat te mais pandé bégas ata da’at oné mai ata di’a,
50 itug kali okés ata da’at nggeroné sapo api; oné hitu te manga rétang agu kérek ngis.
51
Pecing weli le méu betuad sanggéd situ?” Mai walé disé: “Yo Mori, pecings lami.”52 Poli hitu taé de Mori Yésus kolé agu isé: “Ali hitu néténg isét pecing Taurat siot tiba toing oné mai Adak Surga rapang cama ného Mori mbaru hiot ka’ur taungs ceca weru agu ceca mangan oné mai cao-can.”
53
Du poli taung tombod rapang situ le Mori Yésus, itug kali ngon nitu main.54 Du cain oné béndar de Run, Mori Yésus toing ata situ oné mbaru ngaji rud. Og lenget kéta taungs agu mai taéd: “Mai nia maid Liha dumpun nggalas ho’o agu kuasa te pandé tanda lenget situ?
55 Cala anak de tukang hajup Hia ta? Cala hi Mariap endén agu asé-ka’én: hi Yakobus, hi Yosép hi Simon agu hi Yudas?
56 Agu toé weli sanggéd wetan ka’éng cama agu ités? Jari nia maid Diha dumpud sanggéd apa situ?”
57 Itug kali majan lisé agu doét Hias. Wiga mai taé de Mori Yésus ngong isé; “Cengata nabi hiang lata nia kaut wan, maik toé oné béo run agu oné mbarun.”
58 Agu landing le toé imbi lisé, toé dod tanda lenget ata pandé Liha nitu.
1
Lété hitu dengé tombo latang te Mori Yésus li Hérodés raja tana hitu.2 Maig taén agu pegawén: “Ho’og hi Yohanés Cebong; hia poli mosé kolén oné mai ata matan, wiga le hitu kuasa situ manga oné Hias.”
3 Bebolon hi Hérodés poli jera deko hi Yohanés, langki agu buiy liha, landing le campit hi Hérodias wina di Pelipus asé-ka’én.
4 Ali curup dé’it liha Yohanés, taén: “Toé kéta kopn ité emi hi Hérodias!”
5 Alim po nanang te mbelé li Hérodés, maik hia rantang ata do, ai lélon lisé hi Yohanés cama ného nabiy.
6 Maik du leso ramé loas di Hérodés, saéy anak inéwai di Hérodias oné beréha isé agu pandé lérém hi Hérodés,
7 wiga sumpan, te téing hia, apa kaut ngoéngn.
8 Du poli rekun le endén, mai taé de anak molas hitu: “Téing aku muing ulu di Yohanés Cebong lobo kepar ho’o.”
9 Og wéong kéta nain raja, maik soho kaut sumpan, agu landing mekan situ, perénta kaut liha te téingn.
10 Itu kali jera liha kepu bokak di Yohanés oné bui
11 agu ulu di Yohanés ba lata lobo kepar, poli hitu téing oné anak molas hitu, itu ban néngn kamping endén.
12 Poli hitu mais ata nungku di Yohanés te téti rapun agu te boaky. Itu kali ngod isé te tombo agu Mori Yésus.
13
Du poli dengén le Mori Yésus keréba mata di Yohanés, itug kali hésingn Hia nitu main, agu kudut ka’éng hanang koén, léti wangka te ngo oné osang lingi-lengot. Maik dengé lata do, itus kali lut Hiad, loléng tana masa, oné mai béo disé.14 Du wa’un Mori Yésus, itas Liha ata do situ monggur-kouk, itug kali pa’u nain le momang iséy agu Hia pandé inas isét beti.
15 Du redu manén tana, ngos ata nungkun oné Hia agu mai taéd: “Osang ho’o lingi-lengot bailn, agu manég tana. Jeras ata do so’o te kolés, kudut isé ngancéng weli hang oné béo-béo.”
16 Maik taé de Mori Yésus agu isé: “Néka kolés isé, paka le méus téi hangd.”
17 Mai walé disé: “Ata mangan oné ami, hanang lima mongkod roti agu suad ikang.”
18 Mai taé de Mori Yésus: “Ba cé’é Akus le meu!”
19 Itug kali jerad Liha ata do situ lonto lobo remang. Agu du poli emid Liha lima roti agu suad ikang situ, congay Mori Yésus nggeréta awang agu wan berkak, poli hitu pu’ild Liha roti situ agu téing oné ata nungkun, itus kali ata nungkun pati péar latang te ata do.
20 Agu isé situ hang wiga becurd. Poli hitu ligots lisé roti ata récid, penong campulusua langkangd.
21 Ata ronad kanang ata hang nitu lima sebu atas, toé bilangs inéwai agu ata koéd.
22
Poli hitu Mori Yésus gélang-gélang jera ata nungkun te léti wangka, agu ngo pado-olo isé besina mai itu, Hia jera lawa do situ te kolés.23 Agu du poli jera koléd ata do situ Liha, Mori Yésus ngo éta goloy, te ngaji hanang koén. Du wiég tana, Hia hanang koén nitu.
24 Wangka data nungkun manga pisa kilog tadangn oné mai tana masan agu gégé-goay le bombang, ai buru olo mai.
25 Anggat ongga telu le wié, mai Mori Yésus nggeroné isé, lako lobo waéy.
26 Du itad lata nungkun, Mori Yésus lako lobo waéy, ného wetérs isé agu noangd: “Poti hitu!” Itus kali ciékd taung le rantang.
27 Maik gélang-gélang Mori Yésus taé agu isé: “Néka simpung! Aku ho’o, néka rantang!”
28 Mai taé di Pétrus agu walé curup Diha: Mori, émé tu’ung Ité hitu, jera koé aku nggeresina Iték, lako lobo waé.”
29 Mai taé dé Mori Yésus: “Mai ga!” Og wa’un hi Pétrus oné mai wangka agu lako lobo waé té cumang Mori Yésus.
30 Landing du doing liha wéwét le buru, rantang hia agu pu’ung delepn, og ciékn: “Mori, campé koé aku!”
31 Gélang-gélang los limén Mori Yésus, cau hia agu mai taén: “Oé ata toé danga imbi, co’o tara toé metek naim?”
32 Itu kali isé tuké nggeréta wangka agu lik kolég buru hitu.
33 Agu sanggéd isét oné wangka suju Hias, mai taéd: “Tu’ung-tu’ung kéta Ité Anak de Mori Keraéngt.”
34
Du caid besina isé wa’u oné Génésaréts.35 Woko baé Mori Yésus lata do oné béo hitu, tombo lisé temu tana hitu. Itug kali dadéd lisé sanggéd ata beti nggere-oné ranga Diha.
36 Sawal lisé, cala sendo koé te cabi lindi juban. Agu isét cabi juban ina kéta taungs.
1
Poli hitu mai pisa taus ata Parisi agu ata pecing Taurat oné mai Yérusalém kamping Mori Yésus, agu mai taéd:2 “Co’o ata nungku Dité tara lagé adak de empo ditéd? Isé toé samo liméd du turung hang.”
3 Maik walé de Mori Yésus ngong isé: “Co’o méu kolé tara lagé perénta de Mori Keraéngs, soho kaut adak de empos?
4 Ai taé de Mori Keraéng: Hiang ga endém agu emam, agu céwén kole: Céing-céing ata mawang eman ko endén toét toé mata le pakiy.
5 Maik taé de méu: céing kaut ata taé ngong eman ko endén: sanggéd campé ata, paka tiba le méu oné mai akun, hitus takung latang te Mori Keraéng,
6 ata hitu toé sékékn kolé te hiang eman agu endén. Ali hitu okes le méu reweng de Mori Keraéng, landing kaut le lut adak de rus.
7 Oé ata pisik! Kopn tu’ung curup di nabi Yésaya latang te méu:
8
Wa’u so’o bong Aku éta lobo wiwird,
maik naid tadang oné mai AkuD.
9
Oké bod ngaji disé kamping AkuD,
égém toing hitut wintuk disé perénta de manusia.”
10
Og béntad le Mori Yésus ata do situ, agu mai taén ngong isé:11 “Séngét agu idep koé oné nais: Toé hang ko waé inung ata pandé rinek, maik apa hitut loa oné mai mu’un, hituy ata pandé rinek laing.”
12
Itu kali maid ata nungkun agu réi Hia: “Mori, baé lité, curup Dité hitu pandé kéré kéta naid isét Parisi?”13 Mai walé de Mori Yésus: “Sanggéd po’ong ata toé weri le Ema Daku ata ka’éng éta Surga, kudut kebut agu waké-wakéd.
14 Kongd isé situ: Isé ata buta, todang cama butad. Émé ata buta todang cama butad, toét-toé, isét sua pa’u oné ngalis.”
15
Maig taé di Pétrus agu Hia: “Si’ang koé rapang hitu agu ami.”16 Mai walé de Mori Yésus: “Toé tara pecing kin le méu ko?
17 Toé baé le méu, sanggéd apa ata hang agu inung dité, nggerewa tukas agu oké oné kakus?
18 Maik apa ata losa oné mai mu’ud, mai wa mai naid, hitu te pandé rinék atas.
19 Ai oné mai naid tekad sanggéd nuk da’at, mbelé ata, loma, mbérong, tako, wada nggopé-nggapét, agu mbécik.
20 Ho’os de ata pandé rinek. Maik hang le limé saki, toé manga pandé rinek ata laingn.”
21
Itug kali ngo nitu main Mori Yésus hésing oné tana Tirus agu Sidony.22 Main cengata inéwai Kanaan oné tana hitu agu ciékn: “Ba’éng koé aku, yo Mori, Anak di Daud, ai anak inéwai daku iling le jing da’aty agu leng kéta séréngn.”
23 Landing toé kéta rimba le Mori Yésus. Og maid ata nungkun agu tegi oné Hia: “Co’om jera ngoy, ai hia lut ité agu ciék keta kin.”
24 Mai walé de Mori Yésus: “Wuatg Aku hanang latang te jimbal-jimbal siot mora oné mai ata Israéld.”
25 Landing inéwai hitu mai ruis agu suju Hia mai taén: “Mori, campé koé aku.”
26 Maik mai walé de Mori Yésus: “Toé patun emi roti latang te anak koé, wéwéng oné acuy.”
27 Mai taé de inéwai hitu: “Tu’ung Mori, maik acu hitu hang tora ata pa’u éta mai méja de morin.”
28 Og walén le Mori Yésus agu mai taén ngong hia: “Oé endé, mésén tu’ung imbi de hau, itu tara jarin, ného baté tégim.” Agu du hitu muing inan anakn.
29
Du ledong tana hitu, Mori Yésus lako loléng sano Galiléay agu ngo éta golo agu lonto nituy.30 Remon wa, do ata cewur mai oné Hia, berotong ata péko, ata senggét, ata buta, ata dopel agu dod kolé ata beti bana, pehers lisé wa wa’i de Mori Yésus itu kali pandé ina kéta taungd Liha.
31 Wiga lenget kéta taungs ata do situ ai ita ata dopel ngancéng tombos, ata senggét inas, ata péko lakos, ata buta ngancéng itas, agu sanggéd isé, naring ngasang de Mori Keraéng data Israél.
32
Itu kali bénta taungs ata nungkun Mori Yésus agu mai taén: “Wéong kéta nai Daku le momang ata do so’o. Telug leso isé lut Akus maik toé manga hangd. Aku toé gorig te jera isé kolé déméng daremd, rantang boats oné salang.”33 Mai taé data nungkun ngong Hia: “Co’oy oné osang lentong ho’o ité ngancéng dumpu roti te téing lawa do so’o?”
34 Mai taé de Mori Yésus ngong isé: “Pisa mongkod roti de méu?” Mai waléd: “Pitu mongkod, agu manga kolé pisa mongkod ikang koé.”
35 Itu kali susungd ata do situ le Mori Yésus, lonto wa tana.
36 Poli hitu emis Liha roti pitu mongko agu ikang situ, ngaji wali di’a, pu’ils agu téing oné ata nungkun, mai ata nungkun gatang lawa do situ.
37 Sanggéd lawa do situ hang wiga becurd. Poli hitu ligots ata récid, penong pitu langkangd.
38 Lawa situt hang pat sebu ata ronad, toé rékéng inéwai agu anak koéd.
39 Og jera lawa do situ le Mori Yésus te kolé. Hia léti wangka agu ngo oné tana Magadan.
1
Poli hitu mais ata Parisi agu ata Saduki kudut damang Mori Yésus. Tegi lisé kudut Hia toto can tanda éta mai Surga, oné isé.2 Maik mai walé de Mori Yésus: “Du le mané, ai ndéras awang, mai taé de méu: leso nggirong,
3 agu du gula, ai wara agu sagém awang, mai taé de méu: leso nembeng. Tara de awang baé le méu woléngd, maik tanda wié-1eso toé baé.
4 Ata uwa so’ot da’at agu toé junggu so’o, soléng kéta can tanda. Landing latang te isé, toé kéta téing tanda cedion agu tanda de nabi Yunus.” Itu kali Mori Yésus legong isé agu ngon.
5
Du ngo besina mai sanod ata nungku de Mori Yésus, hémong lisé ba roti.6 Mai taé de Mori Yésus agu isé: “Néka témo, agu jangka koé latang te ragi data Parisi agu Saduki.”
7 Itug kali téntangn lisé agu mai taé cama taud: “Curup hitu Diha, méséng toé manga ba rotid ité.”
8 Agu du baég le Mori Yésus apa hitut curup laing lisé, mai taén: “Co’o méu tara curup laing méséng toé manga roti? Oé, ata toé danga imbi!
9 Toé kin dipecing le méu ko? Toé nuk le méu oné mai lima mongkod roti latang te lima sebu ata agu pisa rotod ata récid ligot le méu du hitu?
10 Ko roti situt pitu mongko latang te pat sebu ata agu pisa rotod ata ligot le méu poli hitu?
11 Co’o kaut méu tara toé pecingn, te toé roti betuan Daku. Jangka koé latang te ragi data Parisi agu Saduki.”
12 Du hitud lisé pecingn betuan Diha: isé toé kudut sesenga’i agu ragi roti, maik latang te toing agu titong data Parisi agu Saduki.
13
Du cain Mori Yésus oné tana Kaisaréa, Pilipi, réi Liha agu ata nungkun: “Taé data, céing Anak Manusia hitu?”14 Mai walé disé: “Manga ata caro hi Yohanés tecebong, manga kolé ata caro: hi Élia agu manga kolé ata taé hi Yérémia ko cengata oné mai Sanggéd nabi.”
15 Mai réi de Mori Yésus agu isé: “Maik le taé de méu ga, ceingk Aku ho’o?”
16 Mai walé di Simon Pétrus: “Ité hi Mésias, Anak de Mori Keraéng ata mosé!”
17 Mai walé de Mori Yésus ngong hia: “Mosé di’a hau Simon Bin Yunus, ai toé manusia hitut taé agu hau, maik Ema Daku hitut éta Surga.
18 Aku taé agu hau: hau Pétrus, hau watu nampar, éta lobo hau Aku te hesed ro’éng Daku, toé ngancéng kodan le kuasa de mata.
19 Oné hau téingn Laku kunci Adak Surga: Apa ata pongo le hau oné lino te pongo kid éta Surga, apa ata caca le hau oné lino, te caca kolés éta Surga.”
20 Poli hitu Mori Yésus ré’ing ata nungkun kudut néka tombo agu céing kaut te Hiay Mésias.
21
Pu’ung du nitu main Mori Yésus wangkag tombon Liha agu ata nungkun te Hia paka ngo oné Yérusalém, agu do kéta cukung susan oné mai isét tu’a laing imam-imam kepala agu ata pecing Taurat, poli hitu ala latay, agu leso te telun to’o koléy.22 Maik hi Pétrus ndol Mori Yésus lupi racapn agu rengkes Hia, taén: “Mori, nahé Mori Keraéng oké tadang koéy ného curup Dité hitu! Nahé curup hitu néka kéta hena Itéy.”
23 Og holésn Mori Yésus agu mai taén ngong hi Pétrus; “Pé’ang hau jing da’at, hau ca watu te timpok Akuh, ai hau toé nuk apa ata nuk de Mori Keraéngh, maik nuk kaut apa ata nuk de manusia.”
24
Itu kali Mori Yésus taé agu ata nungkun: “Émé cengata ata ngoéng te lorong Akuy, paka pali weki run, pola panggoln agu lorong Akuy.25 Céi-céing ata momang nain, hia te mamur nawan, agu céing ata mamur nawan landing Aku, hia te mo’éng mosén.
26 Apa betuan émé cengata ata delék taung tana linoy, maik mora mosén? Agu apa ata ngancéng téing laingn te lesing mosén?
27 Ai Anak Manusia te mai kolé agu néra de Eman agu londang le sanggéd malékat; du hitu Hia te wali néténg ata lorong agu pandén.
28 Aku taé agu méu: Moron, oné mai méu ata manga cé’é ho’o, manga ata toé di matay émé toéd ita lisé main Anak Manusia neho raja oné baté peréntan.”
1
Enem leso wa ga, Mori Yésus dadé hi Pétrus, hi Yakobus agu asén hi Yohanés, agu cama laing agu iséy Hia ngo éta poco langkas. Nitu isé hanang koéd.2 Wa kéta ranga diséy, rodo caling kaut tara de Mori Yésus, rangan cias mana mata leso, agu juban ciri bakok dirap cama ného ciang.
3 Agu itag lisé hi Musa agu hi Élia rémé tombod agu Hia.
4 Mai taé di Pétrus ngong Mori Yésus: “Mori, mosé di’a tu’ungk ami ata manga oné osang ho’o. Émé ngoéngd ité, koném pandé cé’é ho’o laku telun sékang, can latang te Ité, can latang te hi Musa agu can latang te hi Élia.
5 Agu rémé di’an hia curup rodo tuay rewung ata néray, tugep isé agu oné mai rewung hitu dengé reweng, ata nenggo’o taén: ‘Ho’oy anak momang Daku, agu Hia ata henan Laku, séngét koé Hiam.”
6 Dengé kaut hitu, rodo toko cemut taungs rasuln, agu rantang kétas.
7 Og kali main Mori Yésus agu dep isé, mai taén: “Hesém ga, néka rantang!”
8 Agu du ngadakd isé, toég manga ita cengatan lisé, hanang Mori Yésus kali ga.
9
Du kolé éta mai pocod, pedé le Mori Yésus agu isé: “Néka kéta tombo agu ata le méu, apa ho’ot ita de meu oné céing kaut émé toéd to’o kolé oné mai ata matan Anak Manusia.”10 Mai réi data nungkun agu Hia: “Émé nenggitu, co’o tara taé disét Pecing Taurat, hi Élia paka mai oloy?”
11 Mai walé de Mori Yésus: “Tu’ung hi Élia kudut maiy agu te olé sanggéd kéta taung.
12 Agu Aku taé agu méu: Hi Élia polig main, maik ata toé pecing hia, agu sara naid kéta ata pandé agu hia. Nenggitu kolé anak Manusia agu te pandé susay lisé.”
13 Du hitug pecing le rasul de Mori Yésus te Hia tombo ngong hi Yohanés Cebong.
14
Du Mori Yésus agu ata nungkun ngo kolé oné beréha ata do situs, maiy cengata ata cumang Mori Yésus agu io liha,15 mai taén: “Mori, ba’éng koé anak daku. Hia hena le ru’u monay, agu leng bail séréngn. Dongkalin hia pa’u oné api ko oné waéy.
16 Aku poli dadé hia oné ata nungku Dité, landing toé ngancéng lisé pandé inan.”
17 Maig taé de Mori Yésus: “Oé, méu ho’ot toé imbi agu ata wéléng, cai nia kolé di Aku paka ka’éng agu méug? Du nia kolé di Aku paka lembak agu méug? Dadé cé’é anak hitu.”
18 Agu kenta da’atn le Mori Yésus ré’ing hia, itu tara pé’angn jing hitu oné mai hian agu anak hitu ina léléng lut muingy.
19
Poli hitu ata nungku de Mori Yésus mais rémé du hanang koéd agu Hia, réig lisé: “Co’o tara toé ngancéng mbérn lami jing hitu?”20 Mai walé Diha agu isé: “Ai méu toé danga imbi. Aku taé agu meu: Moron, émét nggo’o koé méu manga imbis tamat ného lincé sawé mésen, méu ngancéng taé ngong poco ho’o: Hésing cé’é mai ho’o, ngo nggeresina ituh, ngasang hésing dé poco hitu, agu toé manga ata toén latang te méu [
21 Ného nggo’o, toé ngancéng mbérn, bom le ngaji agu puasay.]”
22
Du hitu Mori Yésus cama-cama agu ata nungkun oné Galiléas, taé Liha kamping isé: “Anak Manusia kudut téing oné limé de manusia23 agu isé kudut mbelé Hias, maik oné leso te telun Hia mosé koléy.” Wiga sanggéd ata nungkun situ kémas kéta naid.
24
Du caid Mori Yésus agu ata nungkun oné Kapérnaum maiy ata tegi béa Mbaru de Mori Keraéng oné hi Pértus agu taén: “Co’o Gurum, tara toé bajar béan?”25 Walé liha: “Ma’u, itan muing te bajars,” agu du ngo oné mbarun hi Pétrus curu muing le réi le Mori Yésus: “Co’oy le nuk de hau Simon? Oné mai céin dé raja-raja oné lino ho’o tegi béa agu taki? Mai oné mai ro’éngd ko mai oné mai ata bali tanan?”
26 Walé li Pétrus: “Mai oné mai ata bali tanan!” Maik taé de Mori Yésus agu hia: “Ngong toé oné ro’éngn.
27 Maik kudut ité néka rabos isé, ngo ga, oké pékang oné sano. Ikang ata haéng laring cain le hau, cau agu céngka mu’un, manga kali itan le hau séng bonén. Emi séng situ agu bajar oné isé latang te ranga Dakud agu te méu.”
1
Du hitu mais ata nungku de Mori Yésus agu mai réid: “Ceing kéta ata céwé mésén oné Adak Surga?”2 Itug kali bénta cengata ata koé le Mori Yésus agu pésék oné beréha iséy
3 agu mai taén: “Aku taé agu méu, moron, émé méu toé teserm agu toé ciri ného anak koé ho’om, méu toé ngancéng ngo oné Adak Surgas.
4 Maik céi-céing ata merik nain agu ciri ného anak koé ho’om, hiay ata céwé mésén kéta oné Adak Surga.
5 Agu céing ata tiba cengatan anak koé ného ho’o le ngasang Daku, hia tiba akuy.”
6
“Maik céing kaut hitut pandé ndékok cengatan oné mai anak koé so’o ata imbi Akus, céwé di’an hia hitu émé can watu mesé wasé oné bokakn, poli hitu pandé delep lau taciky.7 Calang da’at lino agu sanggéd pandé hena ndékok ata laing: bo kali calang ata manga muingy, maik copél hiat pandé mangan.
8
Emé limém ko wa’im te pandé ndékok laing hau, ketek oké situ, ai céwé di’am hau ngo oné mosé le limé tompokm agu senggétm, itu pong déméng limé suam agu wa’i suam oké oné api tédéng lén.9 Agu émé matam hitut te pandé ndékok laing hau, nggé’i okéy hitu, ai céwé di’am hau ngo oné mosé le mata cam, itu pong oké oné api neraka agu mata suam.
10
Nuk di’a-di’a néka hang le hep cengatan oné mai anak koé so’o. Ai Aku taé agu méu: Manga dé malékatd isé éta Surga, ata lélo mtaung ranga de Ema Dakus éta Surga. [11 Ai mai de anak Manusia latang te mo’eng isét mora.”]
12
“Co’o nuk de méu? Émé cengata ata manga paéng ceratus jimbaln, agu can ata wéléngy, toé weli kongd liha situt ciok mpulu ciokd lé poco, agu ngo kawé jimbal hitut wéléngy?13 Agu aku taé agu méu: Moro matan, émé ita néng ga, céwé naka hitut ca liha po ciok mpulu ciok situt toé wéléngd.
14 Nenggitu kolé Emas hitut éta Surga, toé ngoéngn oné mai cengatan anak koé so’o te moras.”
15
“Émé asé-ka’ém pandé ndékok, wahéng di’a-di’a hia sua taus. Émé séngét liha titong de hau, polig boné kolén hia le hau.16 Émé hia toé séngét hauy, dadé cengatan ko sua taun kolé ata, kudut le tombo de sua ko telu taun ata sakasin, perkara hitu toé gégo koléy.
17 Émé hia toé séngét iséy, baro sékék hitu oné asé-kaé do. Agu émé hia toé kin séngét reweng data do, lélo kaut hia, cama ného cengata ata toé pecing Mori Keraéngy ko cengata ata tegi belasténg.
18 Aku taé agu méu: Moro matan apa ata pongo le méu oné lino ho’o, pongo kolé éta Surga, agu apa ata cacas le méu oné lino ho’o, caca kolés éta Surga.
19 Agu can kolé taé Daku agu méu: Émé sua taun oné mai méu oné 1ino ho’o cenais te tegi apa kaut, tegi disé situ sendos le Ema Daku hitut éta Surga.
20 Ai nia manga sua ko telu taun ata impungs landing le ngasang Daku, nitu Aku manga oné beréha isék.”
21
Poli hitu mai hi Pétrus agu mai taén ngong Mori Yésus: “Mori, haéng pisa ngkalig aku te ampong asé-ka’ég émé hia pandé ndékok agu akuy? Haéng pitu ngkalin?”22 Mai taé de Mori Yésus ngong hia: “Toé! Aku taé agu hau: toé hanang pitu ngkalin. Maik haéng pintumpulu ngkali pitungkalin.
23
Ai latang te Adak Surga, rapang ného ca raja hiot kudut manga bilangn agu sanggéd mendin.24 Polig liha pu’ung bilangd, og béntan oné hia cengata ata monggurkouk keta raungn, dod cempulu sebu talénta.
25 Landing le toé ngancéng bajard raung situ liha, raja hitu jera hia kudut pika taungs anak agu winan agu sanggéd paéngn, latang te bajar taung raungn situ.
26 Og sujun mendi hitu io hia, agu mai taén: Mori géréng koé cekoén, sanggéd raung daku te léko taungs.
27 Itu kali wa nain raja hitu le momang mendi hitu, wiga legon, agu koso taungs raungn.
28
Landing du kolén mendi hitu nitu main hia cumang agu cengata mendi bana, ata manga raung ceratus dinar kanang oné hia. Mai hia deko agu hajel bokakn agu mai taén bajars raungm ga!29 Itu kali suju haé reban hitu agu tegi ba’éng diha: Géréng koé cekoén ta ité, kudut bajar taungs laku raung situ.
30 Maik hia ogoy agu téi haé reban hitu oné bui dengkir bajar taungs raungn.
31
Ita hitu haén situ iwo, wéong kéta naid, agu baro kéta taung apa ata ita disé oné morid32 Raja hitu jera bénta ata hitu agu mai taén ngong hia: Oé mendi da’at, sanggéd raungm poli taungs laku kosud, ai hau tegi ba’éng dakuh.
33 Toé weli hau kolé paka ba’éng haé rebam ného aku poli momang haug?
34 Og rabo kéta morin hitu agu téing hia oné isét rani dengkir hia bajar taungs raungn.
35
Nenggitu kolé pandé de Ema Daku éta Surga latang te méu, émé néténg méu toé ampong asé-ka’és mai wa mai naim.”1
Du cemold taung toing de Mori Yésus, itu kali ngon Hia oné mai Galiléan agu cai oné tana Yudéa ata besina mai waé Yordany.2 Ata do lako londang lut Hias agu Hia kolé pandé ina iséy nitu.
3 Itu kali maid ata Parisi agu te damang Hia. Réi 1isé: “Ngancéng ata céar agu winan, landing apa kaut comongn?”
4 Mai walé de Mori Yésus: “Toé bacang le méu, te Hiat dédékn manusia pu’ung du wangkan, dédék isét ata rona agu inéwai?”
5 agu nenggo’o kolé taén: “Landing hitu ata rona ledong eman agu endén te neki ca agu winan, wiga isét sua ciri ca wekis.
6 Nenggitu dé, isé toé sua kolés, maik cas kali ga. Landing hitu, apa ata poli neki cas le Mori Keraéng, toé ngancéng céar le manusiad.”
7 Mai taé disé ngong Hia: “Émé nenggitu, apa weli rajan hi Musa tara jera te téing surak céar émé ata céar agu winan?”
8 Mai taé de Mori Yésus agu isé: “Le ndingur bails méu tara sendos li Musa te céar agu winas, maik du wangka pu’ungn toé nenggitu.
9 Maik aku taé agu méu: Céing kaut ata céar winan, aikn landing le loma, poli hitu kawing agu inéwai banay, hia pandé lomay.”
10 Mai taé data nungkun situ agu Hia: “Émé nenggitu woé-joé wina rona, komé néka kaut kawing.”
11 Landing hitu mai taé Diha agu isé: “Toé sanggén ata ita salangn curup hitu, hanang isét téing widang kali.
12 Manga ata hitut toé ngancéng kawingn soho nenggitu kéta muing hia loas le endén, agu ata hitut nenggitu muing pandén lata bana, agu manga ata hitut pandé weki run nenggitu, ngoéng de run, landing kaut perénta Surga. Céing ata ngancéng pecing betuan paka tingoy.”
13
Itu kali ata, dadé anak koé oné Mori Yésus, kudut Hia témba limén béta isé agu ngaji latang te isé; maik ata nungkun rabo ata situ.14 Maik mai taé de Mori Yésus: “Ondangs anak koé situ, néka cakas te mai nggere-cé’é Aku; ai ata ného isé situ dé morin Adak Surga.”
15 Itu kali Hia témba limén bétan isé agu poli hitu Hia ngog nitu main.
16
Manga cengata ata mai oné Mori Yésus, agu mai taén: “Tuang Guru, apa ata di’an pandé daku, kudut haéng mosé tédéng lén?”17 Mai walé de Mori Yésus: “Apa rajan tara réi Akum hau te apa ata di’an? Ca kanang ata di’an. Maik émé nanang le hau ngo oné mosé, lut le hau sanggéd perénta de Mori Keraéng.”
18 Mai taé data hitu agu Hia: “Perénta hiot niay?” Mai taé de Mori Yésus: “Néka paki ata, néka loma, néka tako, néka sabi nggopét,
19 hiang ga emam agu endém, agu momang haé atam cama ného weki rum.”
20 Mai taé data reba hitu agu Hia: “Sanggéd taung situ poli taungs laku pandéd, apa koléd ata toén?”
21 Mai taé de Mori Yésus agu hia: “Émé ngoéng kudut jepekm hau, ngoh ga, pika kéta taungs paéngm agu téing isét lénggé, le hitu hau tiba paéng de Surga, poli hitu nggere-cé’é Aku agu lut Akuh.”
22 Du dengé lata reba hitu curup hitu, itu kali ngon agu kémas kéta nain, ai do kéta paéngn.
23
Mai taé de Mori Yésus agu ata nungkun: “Aku taé agu méu, moron tu’ung, toé kéta émong latang te cengata ata bora te ngo oné osang Surga.24 Te cengkalin kolé Aku taé agu méu, céwé émong can kaba ngo nggeroné lewo jarum itu po can ata bora ngo oné osang Surga.”
25 Du dengé hitu lata nungkun gejék hitu, lenget kétas isé, agu mai taéd: “Émé nenggitu, céing weli ata ngancéng selamakn?”
26 Mbeler kéta lélod isé le Mori Yésus, agu mai taén: “Latang te manusia paté ho’o toé ngancéng, maik latang te Mori Keraéng ngancéng sanggén taung.”
27
Mai taé di Pétrus agu Mori Yésus: “Ami ho’o poli ledong sanggéd cao-cagm mai lut Itékm: aon weli ga, apay ata te tiba dami?”28 Mai taé de Mori Yésus agu isé: “Aku taé agu méu, moro matan, du leso dédékn kolé, du Anak Manusia lonto lobo seriga mésén, méu so’ot poli lut Akus, te lonto kolé lobo campulusua seriga latang te beté-bicar disét panga campulusua data Israél.
29 Agu nété-néténg ata hitut ledong mbarud landing ngasang Daku, asé-ka’én ko wetan, eman ko endén, anakn ko uman, te tiba kolé ceratus ngkali mpalé agu te haéng mosé tédéng lén.
30
Maik dod ata cai tekolo te ciri ata taki musi laings, agu ata teke musi ciri ata te kolo laings.”1
“Latang te Adak Surga cama ného cengata ata ngara uma anggor ata gula ucap to’oy te ngo kawé ata pala oné uma anggorn.2 Du hia poli retus agu isét duat palan, latang te lahé ca dinar ca leso, hia jera isé duat oné uma anggorn.
3 Am niat ongga ciok le gula, hia ngo pé’ang koléy, agu itas liha manga kid ata iwod, ka’éng bod oné amba.
4 Mai taén agu isé: Ngo koé méu oné uma anggor daku, agu apa ata duhan te téing laku agu méu. Itus kali ngod isé.
5 Anggat ongga campulusua, agu ongga telu le mané, hia ngo pé’ang koléy agu pandé cama ného hio baon.
6 Am ongga lima le mané, hia ngo pé’ang koléy, agu ita kolés liha ata iwod, agu mai taén ngong isé: Co’o méu tara ka’éng bos kaut tédéng lesos?
7 Mai taé disé ngong hia: Ai toé manga atan te téing pala agu ami. Mai taé diha agu isé: Ngo koém kali méu oné uma anggor daku.
8 Du wiég tana, mai taé de tuang hitu agu mandorn: béntas isét duat pala situ agu bajar nggajingd, pu’ung oné mai isét duat taki musi comong dengkir agu isét duat laring cai.
9 Itug kali mai isét pu’ung duat ongga lima, agu néténg-néténg isé tiba gici ca dinard.
10 Poli hitu mais isét duat te kolo, agu bet disé te tiba céwé do, kali nété-néténg isé tiba gici ca dinar kolés.
11 Du tibad lisé, isé ngga’ut kétas agu tuang hitu,
12 mai taéd: Isé so’ot mai taki musi ata duat ca jam kanangs, maik lité cama kauts ného ami ho’ot tédéng lesogm hempe-hut duat agu pari du leso tiling.
13 Maik tuang hitu walé agu hiat cengata oné mai isé: asé-ka’én, aku toé manga toé agil latang te hau. Toé weli poli retusd ité te ca dinar ca leso?
14 Emi néng maki de rum agu ngoh ga; aku kudut te téing isét taki musi so’o cama ného de méu.
15 Toé néng aku nia-naig pandég agu cao-cag nia kaut ba naig? Ko guér hau, méséng gawasg aku?
16
Nenggitu, ata taki musin te ciri ata te kolo laing, agu ata te kolo te ciri ata teke musi laingy.”17
Du Mori Yésus kudut ngo oné Yérusalémy béntas Liha rasul situt campulusua hanang koéd, agu mai taén ngong isé oné bahi-réha salang:18 “Ho’o tité ga, ngo oné Yérusalém agu Anak manusia te téing oné imam-imam kepalay, agu ata pecing Taurat agu isé te tepo Hia wahéng te matay.
19 Agu isé te téing hia oné uku so’ot toé pecing Mori Keraéng, kudut Hia loér latay, luca agu panggoly, maik leso te telun Hia mosé koléy.”
20
Itu kali maig endéd anak di Zébédéus cama agu anakn oné Mori Yésus, itu kali suju wa ranga Dihad te tegi cao-ca agu Hia.21 Mai taé de Mori Yésus: “Apay ngoéng de hau?” Mai walén: “Anor koé lité Mori, kudut anak daku so’ot sua tau, émé ciri rajat Ite ngancéng cengatan lonto oné racap wanang Dité, cengatan kolé oné racap léo Dité.”
22 Maik mai walé de Mori Yésus, taén: “Toé pecing le méu, apa hitut tegi de méu. Ngancéng weli le méu inung piala, hitut paka inung kéta lakuy?” Mai taé disé agu Hia: “Ngancéng lami.”
23 Taé de Mori Yésus agu isé: “Piala Daku kudut inung muingy le méu, landing latang te lonto oné racap wanang Daku, ko oné racap léog, Aku toé manga hakg te téingd. Situ kudut te téing ata situt poli nangketd le Ema Daku.”
24 Dengé hitu rabos ata nungku iwod situt cepulu agu asé-ka’é sua situ.
25 Maik béntas isé le Mori Yésus, agu mai taéN: “Pecingp le méu, te isét cau perénta sanggéd uku, perénta ro’éngn le semambu, agu isét mésé cau kuasad le wuré-warét agu isé.
26 Toé de nenggitu oné mai méu. Céing ata ngoéng te ciri ata mésé oné mai méu, hia paka ciri ata keturu laing méuy,
27 agu céing ata ngoéng ciri tu’a laing oné mai méu, porong hia mendi laing de méuy,
28 cama ného Anak Manusia, mai toé kudut te tiba keturu, maik latang te gori keturuy agu téing mosén, te sambé latang te ata do.”
29
Du Mori Yésus agu ata nungkun pé’ang oné mai Yériko, ata do lako londang lut Hia.30 Manga sua taus ata buta ata lonto kid lupi salang, dengé te Mori Yésus liba nituy, og kali béntan lisé: “Mori, Anak di Daud, ba’éng koé ami!”
31 Maik ata do situ rondong isé, kudut isé hemas. Maik tambang molé mésén ciék disé, mai taéd: “Mori, Anak di Daud, ba’éng koé ami!”
32 Itu kali asin Mori Yésus agu bénta isén. Mai taé Diha: “Apa ngoéng de méu te pandé Laku latang te méu?”
33 Mai walé disé: “Mori, kudut ngancéng koé itakm.”
34 Wa nain Mori Yésus le momang isé, itug kali asur Liha mata disé, agu du hitu kéta muing isé itas, poli hitu lut Hias.
1
Du Mori Yésus agu ata nungkun cai ruis Yérusalém agu cai oné Bétfagé hitut manga éta golo Zaituny, jera le Mori Yésus sua taus ata nungkun,2 agu pedén: “Ngo oné béo hiot bolo mai méu hitu, ai nitu dumpu le méu, ca keledai kina ata liwing kin agu anakn élor ruis hiay. Cacay keledai hitu agu arus ba ngger cé’é Akus.
3 Agu émé manga ata tenga méun, taé kaut: Lut le sékékn Mori. Toé béhéng Liha ba koléd.”
4
Mangad apa situ kudut rapakd curup siot caing le nabi:5
“Taé agu molas Sion:
Lé1o, rajam mai cé’é hauy Hia élus agu lembakn,
léti ca keledai kina,
agu ca keledai tékék mendo ata laing uwan.”
6
Itus kali ngod ata nungkun situ, agu pandé ného baté wuat de Mori Yésus oné isé.7 Aru lisé keledai kina hitu, agu anakn, poli hitu lapak laings nggebar disé, itug létin étan Mori Yésus.
8 Ata do situt monggur-kouk kétas, wisi towéd oné salang, mangas ata ti’or saung hajud na’a oné salang.
9 Lawa do situt lako bolo mai Mori Yésus agu ata lut musi main rai-raos kétas, agu taéd:
Hosana latang te Anak di Daud10
Agu du Hia ngo oné Yérusalém, rai-raos kéta oné béndar hitu, agu mai taé data: “Céing kéta ata ho’o?”11 Mai walé data do situ: “Ho’oy nabi Yésus oné mai Nazarét, tana Galiléa.”
12
Itu kali Mori Yésus ngo oné Mbaru de Mori Keraéng agu wéling taungs isét manga dagangd oné natas Mbaru de Mori Keraéng. Pandé waléks Liha méja-méja paluk doi agu bangku disét pika tekur jawa,13 mai taén agu isé: “Manga tulis: Mbaru Daku, mbaru te ngaji. Maik le méu ciri kaut cewo data tako laingy.”
14
Itu kali: maid isét buta agu isét senggot oné Hia, oné Mbaru de Mori Keraéng, agu pandé ina taungs Liha.15 Maik du imam-imam kepala agu isét pecing Taurat ita tanda lenget situt pandé Diha agu anak koé situt raos oné Mbaru de Mori Keraéng: “Bong latang te Anak di Daud!” Heres kéta taungs nai disé,
16 itu kali mai taéd agu Hia: “Dengé Lité apa situt taé de anak koé so’o?” Mai taé dé Mori Yésus agu isé: “Dengé Laku; toé dé’it bacang le méu: oné mai mu’u de anak wara agu anak koé ata rémé cucud Ité poli ambi naring?
17
Itu kali Hia pencang isén agu ngo bepé’ang mai béndary, ngo nggeroné Bétaniay agu toko nitun.18
Le gula ucap du kolé nggeroné béndarn noing’g darem le Mori Yésus.19 Oné ruis salang ita Liha pu’u haju ara, itu kali ngo nitun, maik toé manga ita apa-apan Liha oné pu’u haju ara hitu, hanang saungn kali. Mai taén ngong haju hitu: “Hau toé kéta ngancéng wua koléh tédéng lém!” Agu du hitu kéta muing dangon haju ara hitu.
20 Ita hitu ata nungkun lenget taungs, mai taéd: “Co’o kaut tara rodo dangon haju ara hitu?”
21 Mai walé de Mori Yésus agu isé: “Aku taé agu méu, moro matan, émé méu imbi agu toé manga rambang nais méu, toé hanang ngancéng pandé apa ata pandé Daku agu haju ara hitu, maik ngancéng kolé méu émé taé agu poco ho’o: hésing ga agu wéwéng nggeroné tacik! Jariy apa hitu.
22 Agu apa kaut ata tegi de méu oné ngaji, agu imbi tu’ung kéta, mangay kali tiban le méu.”
23
Itu kali ngon Mori Yésus oné Mbaru de Mori Keraéng agu rémé di’an toing nitun Hia, mais imam-imam kepala agu tu’a-tu’a de uku Yahudi oné Hia, mai taéd: “Le kuasa diong tara pandéd Lité paté situ? Agu céing hitut téing kuasa hitu oné Ité?”24 Mai walé de Mori Yésus agu isé: “Aku kolé téi can réi agu méu, agu émé téing walén le méu agu Aku, Aku te toi agu méu kolé le kuasa diong pandéd Laku paté hitu.
25 Nia main cebong di Yohanés? Oné mai surga ko oné mai ata manusian? Téntang lisé cama isén, agu mai taéd, “Émé nggo’o taé Dité; Oné mai surgan, Hia te taé agu ité: Émé nggitu, apay rajan tara toé imbi hia le méu?
26 Maik émé nggo’o taé dité: Oné mai manusian, ité rantang rondong lata do, ai sanggéd ata baé hi Yohanés ho’o cama ného nabiy.”
27 Itu kali mai taéd ngong Mori Yésus: Toé baé lami.” Maig taé de Mori Yésus agu isé: Émé nggitu, Aku kolé toé toi agu méu, le kuasa diong Aku pandéd sangged situ.”
28
“Maik co’o nuk de méu latang te ho’o: Manga cengata ata suad anak ata ronan. Hia ngo oné anak ngason, mai taén: Nana ngo duat koé hau leso ho’o oné uma anggor.29 Mai walé de anak hitu: Toé gorig. Maik bemusi main teser agu ngon.
30 Itu kali ngo oné anak ata suan, agu jéra kolé nenggitu. Agu walé de anak hitu: Yo, ema. Maik poli hitu hia toé ngoy.
31 Céing weli oné mai isét sua situ ata pandé lorong wintuk de emad?”
Mai walé disé: “Hiat laring cain.” Mai taé de Mori Yésus ngong isé: “Aku taé agu méu, moro matan, ata tegi béa agu inéwai mbérong bolo mai méu ngo oné Mbaru de Mori Keraéng.32 Ai hi Yohanés mai kudut karong salang ata molor agu méu, maik méu toé goris te imbi hiam. Maik ata tegi béa agu inéwai mbérong imbi hias. Agu méu, koném itas, maik poli hitu méu toé goris te teserm agu toé kolé goris te imbi hiam.”
33
Séngét koé ca rapang pali bana: Manga cengata mori tana, duat uma anggory agu pandé kena léok main. Hia caké lewo, te kerak anggor agu hesé ténda éta te lami uma hitu. Poli hitu hia téing célong agu isét duat liha uma hitu, poli hitu hia ngo oné tana banay.34 Du tiong cai cekéng puad, hia jera mendin ngo oné isét duat kudut tiba cir ranga dihad.
35 Maik isét duat situ dekos mendi situ: ongga lisé cengata, mbelés iwod agu ata iwod kolé peké le watus.
36 Poli hitu mori hitu jera kolé mendi cebana, ata céwé do oné mai situ tekolo, maik isé so’o pandé kolé cama ného haéd lisé.
37 Turung cemoln hia jera anakn oné isé, taén: Anak rug sengang lisé.
38 Maik du isé situt duat ita lisé anakn hitu, mai taéd cama taud: Hiap ata tiba mbaté, wajo mbelé kolé hia lité, kudut mbatén ciri dités morid.
39 Dekoy lisé agu wéwéng bepé’ang mai uma anggor hituy, poli hitu mbeléy.
40 Du main keraéng hitut morin uma anggor, co’os pandéd liha isé situt duat?”
41 Mai taé disé agu hia: “Pandé ampus kéta taungs liha ata da’at situ agu uma anggorn téing séwa lata banas, hitut cird téing agu hias du hitug cekengd.”
42 Mai taé de Mori Yésus agu isé: “Toé dé’it bacang le méu oné Surak Nggeluk:
Watu hiot oké lata pandé mbaru,43
Landing hitu aku taé agu méu, te Perénta de Mori Keraéng kudut emiy oné mai méun, agu kudut téing oné ca uku ata cir wuan Perénta hitu. [44 “Agu céing-céing ata pa’u béta mai watu hitun, hia rewuty agu céing ata hena le watu hitun, hia méruky.]”
45
Du imam-imam kepala agu ata Parisi dengé rapang hitu, de Mori Yésus, baé lisé, te ngong isé hitu Diha betuan.46 Itu isé lémét te deko Hias, maik isé rantang ata do, ai rékéng data do situ, Hia Nabiy.
1
Itug kali Mori Yésus curup koléy, ba le rapang moléy agu isé:2 “Paté Adak Surga rapang ca raja ata pandé ramé kawing te anakn.
3 Hia wuat mendin te bénta weki situt poli taéd te ramé kawing hitu, maik ata situ toé gorid te mai.
4 Hia jera kolé mendi cebanan, mai pedén: Taé agu isé situt poli taéd: Moro matan, hang poli taungs wédid, lembu laki agu paéng ata liwing daku poli taungs mbeléd; poli taungs nangket, mai koém kali ga oné ramé kawing ho’o.
5 Maik isét poli béntad toé pinga lisé; manga ata duat oné umad, manga ata ngo wintuk gejur koéd,
6 agu ata iwod deko mendi situ, wahéng agu mbelés lisé.
7 Rabo kétay raja hitu, itu kali jera lawan ngo nitu kudut pandé ampus taungs isét ala mendi situ agu tapa bendar disé hitu.
8 Poli hitu taé taung agu mendin: Hang ramé kawing polisg wédid, maik ata so’ot poli taéd, toé remo te hitu.
9 Landing hitu ngo taung oné salang-salang dangka agu bénta taung céing kaut ata cumang de méu, kudut mai oné ramé kawing hitu.
10 Itu kali ngod mendin situ agu impung taung lisé sanggéd ata cumang disé oné salang ata da’at molé, ata di’a molé, wiga penong ndéi ramé kawing hitu le meka.
11 Du ngoy onén raja hitu te cumang agu meka situ, ita liha cengata toé paké ceca raméy.
12 Mai taén agu hia: Oé asé-ka’én, apa maim hau cé’é ho’o, toé paké agu ceca latangt ramé? Maik ata hitu hema kin.
13 Itu kali mai taé de raja hitu ngong mendin: Pongos wa’i agu limén, poli hitu oké oné nendep hitut tuil da’at. Nitu manga jéjéng agu’ kérek ngis.
14 Ai dod ata béntad, maik cekoés kali ata piléd.”
15
Poli hitu ngos ata Parisi; jangka disé, co’o moléy lisé ngancéng seréntén Mori Yésus le can réi.16 Isé jera ata nungku disé cama laing agu ata Hérodian kudut réi agu Hia: “Tuang Guru, baé lami Ité ata molor, agu molor kolé toing salang de Mori Keraéng, agu Ité toé manga rantang céing kautd, ai Ité toé manga pilé atad.
17 Taé koé agu ami, co’o nuk Dité: Ngancég ko toé téing taki agu Kaisér (raja data Roma)?”
18 Maik baé le Mori Yésus nai da’at disé agu mai taén: “Co’o tara damang Akus méu, oé ata pisik?
19 Toto damang agu Aku le méu séng hitut kudut taki laingy.” Ba lisé ca dinar oné Hia.
20 Itu kali Hia réi isén: “Gambar agu tulis diong ho’o?”
21 Mai walé disé: “Gambar agu tulis de Kaisér.” Mai taé de Mori Yésus agu isé: “Téing agu kaisér apa ata paka téing le méu agu kaisér agu oné Mori Keraéng le méu apa ata paka téing oné Mori Keraéng.”
22 Dengé walé hitu lenget kétas isé, agu ledong Mori Yésus, poli hitu ngos ga.
23
Du leso hitu mai pisa taus ata Saduki oné Mori Yésus, ata le ita disé, toé manga mosé kolé du poli mata. Réi lisé agu Hia:24 “Tuang Guru, taé di Musa, émé mata cengata agu toé manga na’a waén, asé-ka’én paka lili winan, kudut manga na’a waén, latang te asé-ka’én hitu.
25 Mangag de pitu taus asé-ka’é, hiat ngaso kawingy, maik poli hitu matay. Landing le toé manga na’a waén, ledong winan hitu te lili le asé-ka’én.
26 Nenggitu kolé hiat tesuan agu hiat te telun dengkir agu hiat tepitun.
27 Agu cemol ga, du poli taungs matad isé, mata kolég inéwai hitu.
28 Céing oné mai isét pitu situ te ciri rona laing de inéwai hitu du leso mosé koléd ata mata? Ai sanggéd isé poli wina laing inéwai hitud.”
29 Walé de Mori Yésus agu isé: “Méu wéléngm, ai méu toé pecing Surak Nggelukm, nenggitu kolé kuasa de Mori Keraéng!
30 Ai du leso to’o kolé, manusia toé laki agu toé wais, maik mosé ného malékat éta Surga.
31 Maik latang te to’o koléd sanggéd ata mata, toéd bacang le méu ko, apa ata taé le Mori Keraéng, du Hia curup:
32 Akuy Mori Keraéng di Abraham, Mori Keraéng di Ishak, agu Mori Keraéng di Yakub? Hia toé Mori Keraéng data matay, maik Mori Keraéng data moséy.”
33 Ata do situt dengén, lenget laing lisé toingN.
34
Du dengén lata Parisi, te Mori Yésus poli pandé jenger ata Saduki, itus nekekd weki disé35 agu cengata oné mai isé ata pecing Tauraty, réi te damang Hia:
36 “Tuang Guru, perénta nia ata mésén oné Taurat?”
37 Mai walé de Mori Yésus agu hia: “Momang Mori Keraéng, mai wa mai nain, lawang wakarm agu lawang taung nuk naim.
38 Hituy perénta ata mésén agu taki lén.
39 Agu perénta tesuan, ata cama ného hituy, momang ga haé atam cama ného weki rum.
40 Oné mai perénta so’o sua, wéod sanggéd Adak Taurat agu surak de sanggéd nabi.”
41
Du rémé impung kid ata Parisi, réi le Mori Yésus, mai taén:42 “Co’oy nuk de méu latang te Mésias? Anak diong Hia?” Mai taé disé ngong Hia: “Anak di Daud.”
43 Mai taé Diha agu isé: “Émé nenggitu, co’o weli hi Daud le titong de Nai Nggeluk ngancéng caro Hia Morig, du taén:
44
Mori Keraéng poli curup agu Mori dakun:
lonto ga oné racap wanang Daku,
dengkir sangged ata bali de hau na’a
Laku wa mai wa’im.
45
Jari émé hi Daud caro Hia, Mori daku, co’oy néng Hia tara anak dihan koléy?”46 Toé kéta manga cengatan ata ngancéng walé Hia, agu pu’ung leso hitu toé kéta manga cengatan kolé ata mberes te réi cao-ca agu Hia.
1
Itug kali tombon Mori Yésus oné ata do agu ata nungkun, taén:2 “Isét pecing Taurat agu ata Parisi poli lonto krosi di Musad.
3 Landing hitu sanggéd taung toing disé agu méu paka lorong agu pandés, maik néka luts wintuk disé, ai isé bo te toing atas, maik toé pandés le weki rud.
4 Pongos lisé mendo mésé, poli hitu na’a éta lédar data, maik weki rud isé, toé gorid te cabi.
5 Sanggéd gori pandé disé, hanang kaut pala ita lata; isé paké wasé ngaji ata nggebak agu lolo cumbi léwé;
6 isé ngoéng lonto pété osang ata di’an laing ramé, agu osang taki olon oné mbaru ngaji;
7 isé ngoéng hiang latas oné amba agu ngoéng te bénta Rabis.
8 Maik méu néka kéta caro rabim; ai ca kanang kali rabi de meu, agu sangges meu asé-ka’ém.
9 Agu méu néka kéta bénta ema, céing kaut oné lino ho’o, ai hanang ca kali emas, Hia hitut éta surga.
10 Méu néka kolé te caro tu’am, ai ca kali tu’as, hi Mésias.
11 Céing-céing ata taki étan oné mai méu, poro hia ciri ata te keturu laing méuy.
12 Agu céing-céing ata pandé tu’a le weki run, hia te ciri ata meriky, agu céing-céing ata merik le weki run, hia te ciri ata teke étay.
13
Copél da’at méu, oé ata pecing Taurat agu méut Parisi, oé méut pisik, ai méu ata tadud parad Adak Surga olo mai ranga data. Ai weki rus méu toé ngo boném maik méus ata panggad isét kudut ngo bonés. [14 Copél da’at méu, oé ata pecing Taurat agu ata Parisi, oé méut pisik, ai le méus kodéld mbaru data luang, maik méu pandé bapur mata datam le ndar bail ngajis; Itu tara méu itan muing haéng wahéng daing mendon.]
15
Copél da’at méu, oé ata pecing Taurat agu ata Parisi, oé méut pisik ai méu limbang tacik agu labok tana masam, kudut pandé teser kaut hiat cengata te lut agama de méu, agu du poli tesern hia ga, méu pandé ciri ata nerakay, ata suang ngkali céwé da’at oné mai weki rus méu.16
Copél da’at méu, oé tu’a ata buta, hiot taés, sumpa le ngasang de Mbaru Nggeluk, sumpa hitu toé tu’ung; maik sumpa le ngasang de emas Mbaru Nggeluk sumpa hitu ata ndeng laingn.17 Oé méut bapa agu méut buta, apa ata céwé mésén, emas ko Mbaru Nggeluk, ata pandé nggeluk emas hitu?
18 Sumpa le ngasang de compang, sumpa hitu toé woky; maik sumpa le ngasang de takung situt condo bétad, sumpa hitu ata ndeng laingn.
19 Oé méut buta, apa ata céwé mésén, takung hitu ko compang ata pandé nggelukd takung situ?
20 Landing hitu céi-céing ata sumpa le ngasang de compang, hia sumpa le ngasang de compangy agu le ngasang apa kaut ata manga bétan compang kolé.
21 Agu céing-céing ata sumpa le ngasang de Mbaru Nggeluk hia sumpa le ngasang de Mbaru Nggeluk agu le ngasang kole Dihat ka’éng nituy.
22 Agu céing-céing ata sumpa le ngasang de surga, hia sumpa le ngasang seriga de Mori Keraéng, agu le ngasang kole Dihat ata lonto bétan.
23
Copél da’at méu, oé ata pecing Taurat agu ata Parisi, oé méut pisik, ai alang nggurus ca weras, lia agu laja bajars le méu, maik ata céwé mésén oné peréntad Taurat toé pingas le méu, ného: agil, momang agu junggu. Hitu ca, paka pandéy agu so’o iwod néka lendé.24 Oé méut tu’a buta, alang lemus le méu céméy oné mai tuakn, maik unta ata manga bonén kodel kaut le méu.
25
Copél da’at méu, oé ata pecing Taurat agu méut Parisi, oé méut pisik, ai gelas agu mangko le méu nawis, bepé’ang maid, maik boned, enggerep agu ngomper.26 Oé ata Parisi buta, olong nawi bonéd gelas situ, wiga nggélok bod bepé’ang maid.
27
Copél da’at méu, oé ata pecing Taurat agu méut Parisi, oé méut pisik, ai méu cama ného boa hiot wulak le cét bakoky, hiot pé’ang main nggélok tu’ung lélon, molors le mata data, maik oné main penong le toko agu sanggéd wéang.28 Nenggitu kolé néng méu, pé’ang main molors lélon le mata data, kali oné main penong kanang pisik agu le da’at.
29
Copél da’at, oé ata pecing Taurat agu ata Parisi, oé méut pisik ai méu pandé boa de nabi-nabi agu pandé di’a compang disét nggeluk30 agu mai taés: Émét manga kami du mosé de empogm, ami toé kéta gorigm te lut isékm, te mbelé nabi-nabi situ.
31 Maik le hitu méu ciri sakasi latang te weki rus, te méu waé data situt mbelé nabi-nabi situm.
32 Jari penong kin kolé kali tongka paka de empos.
33 Oé méut ular, oé méut waé de ular mbangi! Co’o méu kong mo’éngs, oné mai wahéng de api neraka?
34 Landing hitu lélo dé, Aku jera nabi-nabi ngo oné méu, isét nggalas agu ata pecing Taurat: iwod oné mai isé le méu mbelés agu pépék oné panggols, ata iwod te onggas le méu oné mbaru-mbaru ngaji agu pandé kélos le méu moséd, mai oné mai bendar ca agu bendar ca,
35 kudut le méus polad, landing bowo dara disét ata toé manga salad pu’ung oné mai hi Habél, hitut molor, dengkir oné hi Zakaria anak di Bérékya hitut mbelé le méu oné bahiréha osang nggeluk agu compang.
36 Aku taé agu méu: Moro matan, sanggéd so’o pola taung le uwa ho’os!”
37
“Yérusalém, Yérusalém, hau ata mbeléd nabi-nabi agu peké le watus ata jera Daku oné hau! Dongkalin Aku nuk te impung taungs anakm, cama ného iné-manuk hiot igol taungs anakn wa mai lebén, maik méu toé goris.38 Lélo, mbarum ho’o te ledongy agu ciri lingi-lengoty.
39 Agu Aku taé agu méu: Pu’ung ho’o main, méu toé ngancéng ita Aku kolém, wiga mai taés:
Naring koé Hiat mai le ngasang de Mori Keraéngy!”1
PASAL 24-25 Poli hitu Mori Yésus ngo bepé’ang mai Mbaru de Mori Keraéng, agu ngon. Og maid ata nungku Diha agu toso oné Mbaru de Mori Keraéng.2 Mai taé Diha agu isé: “Itas le méu sangéd taung situ ko? Aku taé agu méu, moron matan, agit can koé watu so’o ata ondang kid tondol lobo watu haéd; te pandé lur kéta taungs.”
3
Du lari lonton Mori Yésus éta golo Zaitun, mais ata nungku oné ranga Diha kudut te tombo hanang koéd agu Hia. Mai taéd: “Tombo koé agu ami du niag tai jarid apa situ, agu co’o tandan mai Dité agu tandan te cemol lino?4 Mai walé de Mori Yésus agu isé: “Néka témo, boto manga ata pandé cibul méu!
5 Ai dod ata te mai ba ngasang Dakus, agu mai taéd: Aku dé Mesias, wiga isé situ pandé wéléng ata do.
6 Manga dengén le méu kacik rampas, agu réba kudut manga rampas. Landing néka sogit laing le méu agu néka simpungm; ai sanggéd situ paka mangas, maik toé di hitu leso cemoln.
7 Ai wa’u ca te to’o dungkang wa’u ca, raja ca dungkang raja ca. Te manga darem agu nupung oné néténg tana.
8 Maik sanggéd situ, hitus di wangkad susa pa’it du toé di cekeng weru.
9
“Du hitu méu kudut téi te luca latam, agu te alam agu méu te kodo le sanggén uku landing ngasang Daku,10 agu dod ata te legong agamad; isé pika cama taud agu kodo cama taud.
11 Do tuad nabi tangké situt pandé wéléng taung ata.
12 Agu le tambang dod ata pandé da’at, wiga momang cama haé ata te ciri ces.
13 Landing isét ta’ong dengkir cemoln, ngancéng selamaks.
14 Agu keréba di’a de Adak ho’o kudut te keréba oné temu tana linoy kudut sabin latang te sanggén uku, poli hitu itu pong caiy cemol.”
15
“Jari émé ita le méu ‘Hiat pandé woréng’ hesé oné osang nggeluky, lorong curup hitut poli tombon le nabi Daniél-isét bacang surak porong lélo di’a hitu —16 itu tara isét manga oné Yudéa paka losi nggerlé pocos.
17 Ata do siot lari lonto, é tangis lobo mbarud, néka wa’u nggere-was te emi cecad oné mbaru,
18 agu ata siot rémé oné umad, néka wé’é te emi ceca pakéd.
19 Copél mésé latang te isé endé siot rémé na’ang weki ko rémé cucu anakd du hitu.
20 Ngajim kali, kudut du losis hitu néka du cekeng duréng agu néka hena oné leso Sabat.
21 Ai du hitu te manga wahéng mésé ata toé dé’it mangay pu’ung du mangan lino ho’o, dengkir te ho’on agu hitut toé manga koléy.
22 Agu émé toé pandé wokoky cekengn, oné mai sanggéd apa kaut so’ot moséd, toé kéta manga retangd; landing le manga isét poli lird cekeng hitu te pandé wokok kauty.
23
Du hitu émé manga ata taé agu méu: Lélo hi Mésias manga no’oy ko hi Mésias manga lé hioy, néka imbi le méu.24 Ai mésias-mésias tangké agu nabi-nabi tangké-té cais agu isét ngancéng pandé tanda mésé agu tanda lenget, wiga émé ngancéng kolé pandé wéléng ata poli lird.
25 Nuk di’a-di’a, Aku poli tombo muingn agu méu.
26 Jari, émé manga ata nggo’o taén ngong méu: Lélo, Hia manga oné satar mambaky, néka ngo nitu méu; Lélo, Hia manga oné lo’angy, néka imbi le méu.
27 Ai cama ného ndilap, wili-welok awo main agu wéwéng gérakn haéng salé kolépn, nenggitu kolé tai main Anak Manusia.
28 Nia manga tobo, nitus holid ka rentumd.”
29
“Toé béhéng lété du polin wahéng du hitu, mata leso te ciri nendépy, agu wulang toé manga néran agu sanggén ntala, te pa’u kéta taungs éta mai awang agu sanggéd kuasa de awang gégo kéta taungs.30 Du hitu te ita tanda de Anak Manusia éta awang agu sanggéd uku oné lino te jéjéngs agu te ita lisé Anak Manusia hitu mai lobo rewung éta awang déméng agu kuasa mésén agu angosn.
31 Agu hia te jera pé’ang taungs malékat-malékat kudut tebang terompét ata maor kéta runingn, agu isé te nekek taungs ata poli lird oné mai pat lok de lino, oné mai binting awang ca, haéng binting awang bana.
32
Nuk kaut le méu betuan rapang haju ara: Émé ngoél rengka-rengka koén agu wangkas ludungd, pecing dé le méu te cekeng lena tiong cé’én.33 Nenggitu kolé, émé ita taung situ le méu, pecing dé le méu, tiong cé’én dé ga, wa dungka para mbaru gi.
34 Aku taé agu méu: Moro matan, isét uwa so’o toé kéta retangs, émé toé di manga taung apa so’o.
35 Awang agu lino te mora taungs, landing curup Daku toé ngancéng moray.
36
Landing latang te leson agu wién hitu, toé manga cengatan ata pecingn, malékat-malékat éta Surga kolé toé, agu Anak kolé toé, hanang weki run hi Ema.”37
“Ai cama ného apa du mosé di Nuh, nenggitu kolé néng tai du main Anak Manusia.38 Ai cama ného isé leso bebolon tuan mbang mésé hitu, hang agu inungs, na’a rona agu na’a winas, haéng leso hi Nuh tuké nggeroné kepaln,
39 agu isé toé baé cekoén latang te cao-ca, bebolon cain mbang mésé hitu te pandé ampus taung isé; nenggitu kolé néng tai du main Anak Manusia.
40 Du hitu émé manga sua taus ata oné uma, hiat cengata te dadéy, agu hiat cengata ledong nituy;
41 émé manga sua taus iné-wai rémé tukd, dadé hiat cengata agu hiat cengata ledong nituy.
42 Landing hitu néka témo, ai toé pecing le méu du leso apa Moris hitu te maiy.
43
Landing nuk di’a-di’a ho’o: Émé pecing lata ngara mbaru du nia le wié main ata tako, toét-toé wela kin, agu toé sondang mbarun te rampok 1atay.44 Landing hitu, méu kolé paka jengkek di’a-di’a, ai main Anak Manusia du toé kéta manga nuk calan le méu.”
45
“Céing mendi ata tipek agu nggalas nai, ata téti le morin te sanggéd ata do latang te téing hang du leso hitu?46 Mosé di’a mendi ata repéng le morin rémé gorin, du cain morin hitu.
47 Aku taé agu méu: Moro matan, morin hitu te téti hia ciri ata lami sanggéd paéngn.
48 Landing émé mendin hitu ata da’at agu get oné nain:
49 Mori daku toé di maiy, wiga hia pu’ung ongga taung haé mendin, agu hang-inung cama-cama agu ata languy,
50 maik morin mendi hitu cai du leso ata toé kéta manga nukn liha,
51 agu te ala hiay agu pandé hia cama ného wada disét lopé-lapét. Nitu baén manga jéjéng agu kérek ngis.”
1
“Du hitu latang te Adak Surga ného rapang cepulu taus anak molas, siot emi culu agu ngo curu hiat kopé harat.2 Lima taus oné mai isé ata bapa agu lima taus ata nggalas.
3 Anak molas situt bapa ba culud, landing toé améng minad,
4 maik anak molas situt nggalas, ba culud agu améng kid minad oné botol.
5 Maik ali hiat kopé béhéng kétay toé tara caiy, rendut taungs isé agu lémotd.
6 Du wié toko-tereng dengé reweng data kepok: Caig kopé! Curu hia!
7 Anak molas situ to’o taungs agu tutung di’a culud.
8 Anak molas siot bapa gesar agu anak molas situt nggalas: Téing koé ami cekoén mina de méu, ai tiong te pesas culu dami.
9 Landing mai walé de anak molas situt nggalas: Toé ha, boto toé rapak te rug ami agu latang te méu. Komé ngo méu oné ata pika mina agu weli nitum.
10 Maik du rémé ngo weli minad, cai kin hiat kopé harat, agu isét poli mengkek di’ad ngo cama agu hias nggeroné ndéi kawing, agu tadu para.
11 Poli hitu caid anak molas sio agu mai taéd: Mori, mori, lénga koé ami para!
12 Maik mai walé diha: Aku taé agu méu, moro matan, aku toé pecing méuk.
13 Landing hitu, ambi-ambi koé, ai toé pecing le méu leson, nenggitu kolé wién.”
14
“Ai latang te Adak Surga, cama ného cengata ata kudut ngo pé’ang tana pé’angy, bénta taungs liha mendid agu imbi isé te lami sanggéd paéngn.15 Hia cengata téingy liha lima talénta, hiat cengata kolé sua talénta, agu hiat cengata kolé cay, néténg isé téing lorong nggepukd, poli hitu ngog hia.
16 Itu kali hidi-hadan ngon mendi hiot tiba lima talénta. Pandé bekas liha séng situ wiga bekad lima talénta.
17 Mendi hiot tiba sua talénta, nenggitu kolé pandén wiga beka sua taléntad.
18 Landing mendi hiot tiba ca talénta, ngo caké kombek agu nitu liha cehan séng de morin.
19 Béhéng kéta wa ga kolég morid mendi situ, itu kali mangan bilang agu isé.
20 Mendi hiot tiba lima talénta maiy agu ba bekad lima talénta, mai taén: Mori, lima taléntad téing lité agu aku; lélo, aku poli delék bekad lima taléntad.
21 Mai taé de morin ngong hia: Di’a tu’ung pandé de hau, oé mendi daku ata di’a, ata junggu, hau junggum oné wintuk koé, aku te téing hau cau taé ata mésén. Maih, ngo boné agu cama laing oné mosé di’a de morim.
22 Itu kali main mendi hiot tiba sua talénta, agu mai taén: Mori, sua taléntad ata imbi akus lité; lélo, aku poli delék bekad, sua taléntad.
23 Maig taé de morin agu hia: Di’a tu’ung pandé de hau, oé mendi daku ata di’a agu junggu, hau junggum te cau perkara koé, aku kudut téing hau, cau perkara mésé. Maih, ngo cama laing oné mosé di’a de morim.
24 Itu kali main mendi hiot tiba ca taléntay, mai taén: Mori, pecing laku tité, ité manusia ata rani mésé, ata ako oné osang nia baté toé rédé lité, agu nongko nia baté toé weri dité.
25 Landing hitu rantangk aku, wiga ceha talénta dité wa tana bonéy: Ho’oy, tiba néngm, ranga rum!
26 Maik walé de morin hitu: Oé, hau mendi da’at, ata ngondé, jari polig pecingn le hau, te aku ako oné osang hitut nia baté toé rédé laku, agu nongko oné osang nia baté toé weri laku?
27 Émé nggitu, téing koésb le hau séng daku oné iséd pecing pandé bekad, kudut du kolég aku, cengkali tiba agu bekad.
28 Landing hitu, emiy talénta hitu, oné mai hian, agu téing oné hiat manga cempulu taléntan.
29 Ai néténg ata hitut mangad, oné hia te téing wiga diha héla-haéd. Maik céing ata toé kéta manga apa-apan, situt manga oné hiad, te emi kolés oné mai hiad.
30 Aku péncary mendi hitut toé manga betuan, oné nendep ata céwé tuil kéta. Nitu te manga jéjéng agu kérek ngis.”
31
“Émé cai Anak Manusia agu néra mésén, agu sanggéd malékatn cama laing agu Hias, itu Hia te lonto angos lobo serigan.32 Itug kali sanggéd taung uku te liups oné ranga Diha, agu Hia te céhar isé oné mai cengata cama ného ata lami jimbal hiot lir jimbal agu mbé,
33 agu Hia te pidiks sanggéd jimbal oné racap wanangn, sanggéd mbé pidik oné racap léon.
34 Agu mai curup de raja hitu agu isét oné racap wanang: Mai méu, oé ata berkak le Ema Daku, tiba ga osang ata poli ambin te méu; pu’ung mangan lino ho’o!”
35 Ai du daremg Aku, téing hangk le méu, du masa waég Aku, téing inungk le méu; lété du weki toé pecingk Aku le méu, dadék le méu nggeroné mbarus;
36 du lacog Aku, téing wéngko weki Aku le méu; du betig Aku ngo la’at Aku méu; du oné buig Aku, ngo la’at Aku le méu.
37 Mai walé data molor situ ngong Hia, taéd: Mori, oné pisa ami ita Ité darem, mai ami téing hangt, ko masa waé Ité, mai ami téing inung?
38 Du nia ami ita Ité weki toé pecing, mai ami téing toko oné mbaru, ko lacot, mai ami téing wéngko weki?
39 Du nia ami ita Ité betit ko oné buit, mai ami ngo la’at Itékm?
40 Agu mai walé de Raja hitu agu isé: Moro matan, Aku taé agu méu, sanggéd kaut ata pandé le méu latang te cengatan oné mai asé ka’é Daku so’ot lengki da’at, méu poli pandé latang te Akus.
41 Agu mai kolé curup Diha agu ata situt oné racap léon: Néka ita wa ranga Dakum, oé méut niur, ngo oné api utung tédéng lén ata poli muing améngn latang te jing da’at agu haé didingn.
42 Ai du darem Aku, méu toé téing Aku hang; du masag, méu toé téing Aku waé;
43 Du Aku weki toé pecing, méu toé téing Aku osang te tokog; du lacog, méu toé téing Aku towé, du betig agu du oné buig, méu toé ngo la’at Akum.
44 Itug kali walé disé ngong Hia, taéd: Mori, du nia ami ita Ité daremt, ko masa waét, ko cama ného weki toé pecing, ko lacot, ko betit, ko oné buit, agu ami toé campé Itékm?
45 Itu kali Hia te walé iséy: Aku taé agu méu; moro matan, sanggéd kaut ata toé pandé le méu latang te cengatan oné mai isét lengki da’at so’o, méu toé pandé kolé latang te Aku.
46 Agu isé so’o te ngo oné osang wahéng tédéng lén, landing sanggéd ata molor ngo nggeroné mosé tédéng lén.”
1
Woko poli taungs sanggéd toingn Mori Yésus, mai taén ngong ata nungkun:2 “Pecingp le méu, te téké sua leso kali ramé Paskah, du hitug Anak Manusia te téing kudut panggoly.”
3
Du hitu neki ca taungs imam-imam kepala agu tu’ad ata Yahudi oné natas de Imam Mésé, ngasangn hi Kayafas,4 agu isé jangka te nanéng deko Mori Yésus le adong molé kudut te mbelé Hia.
5 Maik mai taé disé: “Néka du leso ramé, boto raha taud ro’éng.”
6
Du manga oné Bétanian Mori Yésus, oné mbaru di Simon ata hena deit le bokéy,7 mai cengata inéwai oné Hia, ba ca kuntul watu hitut manga mina bengé ata wegitn. Mina hitu loli liha oné sa’i de Mori Yésus, hitut rémé hangn.
8 Ita hitus rabo da’ats ata nungkun agu mai curupd: “Té co’on kéta pandé mbasa-saék ho’o?
9 Ai mina hitu ngancéng pika wegity agu séngn ga, te téing ata lénggés.”
10 Landing Mori Yésus pecing nuk disé agu mai taén: “Co’o méu tara pandé susa inéwai ho’os? Ai hia poli pandé ca ata di’an latang te Aku.
11 Ai ata lénggé mangamtaungs agu méu, landing Aku toé tédéngk agu méu.
12 Ai le pandé loli minan hitu hia oné weki Daku, hia améng latang te du boak Aku.
13 Aku taé agu méu: moro matan, nia-nia kaut wéron keréba di’a ho’o oné temu tana lino, apa ho’ot pandé diha te caro mtaungy kudut nuk hia.”
14
Poli hitu ngog cengata oné mai rasul situt campulu suas, ngasangn hi Yudas Iskariot, oné imam-imam kepala.15 Mai taén: “Apa téing aku le méu, kudut aku téing Hia oné méu?” Bajar lisé agu hia telumpulu ringgi pérak.
16 Pu’ung nitu main hia, kawé salang ata di’an te téing Mori Yésus.
17
Du leso laring cain, leso ramé Roti Toé Manga Ragi, maid rasul-rasul de Mori Yésus oné Hia agu mai taéd: “Nia wan ngoéng Dité ami wintuk hang ramé Paska latang te Ité?”18 Mai walé de Mori Yésus: “Ngo méu sina béndar oné keraéng hitu ata pecing Lakuy, taé agu hia: Pedé de Tuang Guru: leso Daku ruis gi; oné mbaru de hau kéta Aku kudut ramé Paskag, cama laing agu rasul-rasul Daku.”
19 Itus kali ngod ata nungku situ, pandé ného baté pedé de Mori Yésus agu isé, agu kudut te ramé Paskah.
20
Du wiég tana, Mori Yésus lonto hang cama-cama agu campulusuas rasul.21 Agu du rémé hangd isé, mai taén: “Aku taé agu méu, moro matan, cengata oné mai méu te téing Akuy.”
22 Agu wéong kéta naid isé réi gici ca agu Hia: “Cala aku, Mori?”
23 Mai walé Diha: “Hia hiot cama-cama agu Aku lembo limén oné mangko ho’o, hia hituy kudut téing Aku.
24 Anak Manusia ata ngo muingy, duha ného ata poli tulis latang te Hia, landing mata oloy ata hitut liha tara téingn Anak Manusia. Céwé di’an ata hitu émé néka loasy.”
25 Mai walé di Yudas hitut kudut téing Hia taén: “Cala aku Rabi?” Mai walé de Mori Yésus ngong hia: “Polig taé le rum.”
26
Du rémé hangd isé, Mori Yésus emi roti, étan ngaji wali di’a, pu’ils Liha agu téing oné rasul-rasuln, mai taén: “Emi ga, hang ga, ho’o dé weki Daku.”27 Poli hitu emi Liha piala, étan ngaji wali di’a, poli hitu téing agu isé, mai taén: “Inung ga, sanggés méu, oné mai piala ho’o.
28 Ai ho’o dé dara Daku, dara baté reké ata bowo latang té ata do kudut ampong ndékokd.
29 Landing Aku taé agu méu: Pu’ung ho’o maig Aku toé inung kolé oné mai pu’u anggor ho’ok dengkir leso Aku inung ata werun, cama laing agu méu oné Adak de Ema Daku.”
30
Du poli dérén lisé déré naring, ngog Mori Yésus agu sanggéd rasul nggeréta golo Zaitun.31
Mai curup de Mori Yésus ngong isé: “Wié ho’o, sanggés méu te gégo imbis landing Aku. Ai manga tulisn: Aku te mbelé hiat lamid, agu jimbal-jimbal situ, te mbihi-mbehars.32 Landing poli to’og Aku, te olo Aku méu lau Galiléa.”
33 Mai walé di Pétrus: “Koném gégo taung imbi disé, landing Ité, aku kali tadan te gégok.”
34 Mai taé de Mori Yésus ngong hia: “Aku taé agu hau, moro matan, wié ho’o, du toé di kakors manuk hau poli pali Akum telungkalin.”
35 Mai taé di Pétrus ngong Hia: “Koném matak aku cama-cama agu Ité, aku toé pali Iték.” Nggitu kolés curupd rasul do.
36
Itu kali cain Mori Yésus agu sangged rasul oné ca osang ngasangn Gétsémani. Poli hitu mai taén ngong isé: “Géréng cé’é méu, laing koé Aku ngo sina hiok te ngaji.”37 Agu dadé Liha hi Pétrus agu sua taus anak di Zébédéus cama laing agu Hia. Og pu’ung nitu main Hia wéong agu simpung kéta naiN.
38 Mai taén agu isé: “Nai Daku wéong kétay néhot kudut mata Laku doingn. Géréng cé’é agu jerék koém, cama laing agu Akum.”
39 Itu kali Hia lako nggere-olo cekoén, tikuly agu ngaji, mai taéN: “Yo Ema, Emét ngancéng kéta, co’om laun piala séang ho’o oné mai Akun; landing néka ného hitut ngoéng Daku, maik lorong hitut baté ngoéng Dité.”
40 Poli hitu Hia kolé oné rasul-rasul, ita isé rémé toko kid mai taén ngong hi Pétrus: “Toé ngancéng méu te wela cama agu Aku tamat cajamn?
41 Ambi-ambi agu ngaji koém, rantang pa’u oné damangm: ai bo kali nais sundurn, landing weki les-lémbek.”
42 Itu kali ngo té sua ngkalin agu ngaji, mai taén: “Yo Ema Daku, émé toé ngancéng hésingn piala ho’o, aikn émé te inung kéta Lakuy, nia kaut ngoéng Dité.”
43 Agu du mai kolén Hia ita Liha isé lari toko kid, ai leng bail dendutd.
44 Sondangd isé nitu Liha, itu kali ngon te telu ngkalin, hitu kin kali ngajin.
45 Poli hitu, mai kolé Hia oné rasul-rasul, mai taén agu isé: “Toko kis meu ko? Lélo, ho’og dé redun Anak Manusia te téing lobo limé data ndékoky.
46 To’o ga, mai ngot ga. Hiat ata téing Aku ruis gi.”
47
Du rémé di’an tombon Mori Yésus, caig hi Yudas, cengata oné mai campulusua ata rasul situ, agu cama laing agu hia do kéta lawa ata ba sempilang agu semambud ata jera le imam-imam kepala, tu’ad uku Yahudi.48 Ata hitut téing Hia, poli toin tanda ho’o agu isé: “Ata hitut omo daku, hitu dé Hia, deko Hia.”
49 Agu hidi-hadan hia ngo cumang Mori Yésus agu mai taén: “Tabé o Tuang Guru.” Itu kali omon liha Hia.
50 Landing mai taé de Mori Yésus ngong hia: “Oé ase-kaén, latang te hitu mai de hau ko?” Itu kali ngod isé nggere-olo cau Mori Yésus agu dekon.
51 Landing cengata oné mai isé, ata lorong Mori Yésus, werus sempilangn, paki cengata mendi de Imam Mésé, wiga capék muing tilun.
52 Maig taé de Mori Yésus ngong hia: “Na’a kolé oné bakon sempilang hitu, agu céing-céing ata téti sempilang, te mata le sempilangy.
53 Ko, le nuk de hau te Aku toé ngancéng tegi agu Emag, Kudut Hia komét katu béta mai campulu suan lawa malékat te campé Aku?
54 Émé nenggitu, co’og ngancéng cai olon hiat tulis oné Surak Nggeluk, hitut taén, paka jari nenggitu?”
55 Du hitu mai taé de Mori Yésus ngong ata do situ: “Nuk de méu aku ho’o ata tako mésé, wiga méu améng taung sempilang agu semambus te deko Aku? Égém Aku néténg leso lonto toing atak oné Mbaru de Mori Keraéng, maik méu toé deko Akum.
56 Landing, sanggéd so’o tara jarid kudut rapakd situt tulis oné surak de nabi-nabi.” Itu kali sanggéd rasul legong Hias, agu losid.
57
Du poli dekon lisé Mori Yésus, dadéy lisé oné hi Kayafas, Imam Mésé. Nitu poli taung neki-weki ata pecing Taurat, agu sanggéd taung tu’ad.58 Agu hi Pétrus lut Hia tadang main haéng oné natas de Imam Mésé, agu du poli bonén, Hia lonto agu isét lamiy te lélo co’o cemoln bicar hitu.
59
Sanggéd imam kepala, ngaid sanggéd Adak Agama, kawé sakasi ata nggopét latang te Mori Yésus, kudut wahéng te matan60 maik isé toé dumpu sakasi, koném dod maid sakasi nggopét. Turung cemoln hesé sua taus ata,
61 mai taéd: “Taé data ho’o: Aku ngancéng pandé renco Mbaru de Mori Keraéng, agu telu leso kaut wa, ngancéng hesé kolén.”
62 Og hesén Imam Mésé agu mai taén ngong Hia: “Toé kéta walés le Hau mboték de sakasi so’o latang te Hau ko?”
63 Landing Mori Yésus hema kéta kin. Maig taé de Imam Mésé hitu agu Hia: “Lé ngasang de Mori Keraéng, taé agu ami, co’o Hau, hi Mésias Anak de Mori Keraéng, ko toéh?”
64 Walé le Mori Yésus: “Hau polig taé le rum. Landing Aku taé agu hau, pu’ung ho’o ga méu te ita Anak Manusia lonto du racap wanang Dihat kuasa mésé, agu mai lobo rewung éta awangy.”
65 Itu kali Imam Mésé hitu wirot ceca pakén agu mai taén: “Hia ho’o mbécik Mori Keraéngy. Te co’on kolé lité kawé sakasin? Ho’og dengén le méu mbécik Diha.
66 Co’oy weli nuk de méu ga?” Walé disé, taéd: “Hia paka wahéng mata muingy!”
67
Itu kali isé buntar ipo du rangan agu racukn; ata iwod ongga Hia,68 agu mai taéd: “Damang dé taé agu ami, oé Mésias, céing weli ata hitut ongga Hau?”
69
Rémé nggitun hi Pétrus lonto bepé’ang oné natas. Itu kali cain cengata mendi inéwai oné hia, mai taén: “Hau kolép ca ata cama laing mtaung agu Mori Yésus ata Galiléa hitu.”70 Landing pali liha oné ranga data do, mai taén: “Toé pecing laku apa betuan curup de hau.”
71 Du kudut ngo nggerpé’ang lewangn hia, ca mendi bana kolé ita hia, mai taén agu ata do nitu: “Ata ho’o dé cama mtaung agu Mori Yésus, ata Nazarét hitu.”
72 Agu pali kolé liha agu sumpa da’atn: “Aku toé pecing ata hituk.”
73 Toé béhéng wa ga, ata situt manga nitu ngo oné hi Pétrus, mai taéd: “Toé-toét hau muing ca oné mai isé situ, lélo kaut curupm lami.”
74 Itu wangkan hi Pétrus mawang agu sumpan: “Aku toé kéta pecing ata hituk.” Du hitu kakors manuk.
75 Itud nukn li Pétrus apa hitut curup le Mori Yésus agu hia: “Toé di kakors manuk, hau poli pali Akum telu ngkalin.” Itug kali ngo bepé’angn agu nesut rétangn le wéong kéta nain.
1
Du tiongn gérak tana, sanggéd imam kepala agu taung tu’ad uku Yahudi, lonto camas bantang te ala Mori Yésus.2 Isé ranté Hia, itu kali todangn agu téing oné hi Pilatus, wakél de adak Roma itu.
3
Du hi Yudas, ata téing Hia, ita, te Mori Yésus poli letin te alay, og tesern. Itug kali téing koléd liha séng situt telumpulu ringgit pérak oné sanggéd imam kepala agu taung tu’ad,4 agu mai taén: “Aku poli pandé ndékok ai téing dara data toé manga salan.” Landing mai walé disé: “Apay nipu dami hitu? Papong rum hau hitu!”
5 Itu kali pekéd liha séng pérak situ nggere-oné Mbaru Nggeluk, agu kolé nitu main, og wendu le run.
6 Imam-imam kepala emi séng pérak situ agu mai taéd: “Séng so’o néka ondang na’a oné peti takung, ai so’o ringgi dara.”
7 Du poli bantang camad, isé weli ali séng situ tana ata caron Tana Data Tukang Lewing latang te boa data long.
8 Itup tara dengkir leso ho’on caro lata Tana Dara.
9 Le hitu rapakg curup ata poli tombon le nabi Yérémia: “Isé tiba séng telumpulu ringgi pérak, hituy séng co’i ropo te cengata, lorong co’i hitut éta main disét Israél,
10 agu isé téing séng situ latang te jaji tana data tukang lewing, ného baté pedé de Mori agu aku.”
11
Itu kali Mori Yésus dadé oné ranga di Pilatus. Wakél de Adak Roma hitu réi agu Hia: “Raja data Yahudi Hau ko?” Mai walé de Mori Yésus: “Weki rum hau ata taé nenggitu.”12
Maik le buang de imam-imam kepala agu de tu’a do latang te Hia, toé gorin te walé.13 Mai taé di Pilatus agu Hia: “Toé dengés le Hau do kétas buang data sakasi-sakasi so’o latang te hau?”
14
Landing toé kéta walé cekoén Liha, wiga adak tana hitu lenget kétay.15
Laséng olo main, hiat Paténg tana ngancéng ledo can ata bui du leso ramé le lir data do.16 Agu du hitu manga oné bui cengata ata leng kéta bail da’atn, ngasangn hi Yésus Barabas.
17 Le poli impung taungd lé hitu, mai taé di Pilatus ngong isé: “Céing ngoéng de méu kudut lego laku latang te méu, Yésus Barabas ko Yésus hitut caron hi Kristus?”
18 Pecing muing liha, isé téing Mori Yésus le beti naid.
19 Du lari lonton hi Pilatus oné seriga beté-bicar, pedé le winan: “Néka oné hau bicar data molor hitu, ai landing Hia aku susa mésé du nipig oné wié.”
20
Landing le sosok de imam-imam kepala agu taung ata tu’ad, lawa do situ buber kétas te tegi, kudut lego hi Barabas maik ala Mori Yésus.21 Paténg tana hitu walé agu taé oné isé: “Céing oné mai isét sua so’o ata ngoéng le méu kudut lego laku latang te méu?” Mai taé disé “Hi Barabas.”
22 Mai taé di Pilatus ngong isé: “Émé nenggitu, co’oy kéta laku pandén Mori Yésus hitut béntan hi Kristus?” Sanggéd isé ciék kéta taungs: “Pépék Hia oné panggol!”
23
Mai kolé taén: “Landing pandé da’at apa kéta ata poli pandé Diha?” Maik isé tambang kétas ciékd: “Pépék Hia oné panggol.”24 Woko lélo li Pilatus te oké bod sanggéd curup diha, ngot wangkag kolé te manga rihi-rahat, itu kali emi waén agu samo limén oné ranga data do agu mai taén: “Aku toé manga salag latang te dara data ho’o; aiks weki rus méu!”
25 Agu sanggén ro’éng situ walé: “Kong damang dara Diha tanggong lami agu le anak-anak dami!”
26 Itu kali ledon liha hi Barabas latang te isé, maik Mori Yésus lisé lucay, poli hitu condo liha kudut pépék oné panggoly.
27
Poli hitu sedadu-serdadu di Pilatus todang Mori Yésus nggere-oné mbaru di Pilatus, itu kali bénta taung lawa rentum baling mai Mori Yésus.28 Mai isé loak taung ceca pakéN agu onén lisé juba kentusy.
29 Isé rojok ca songkok karot agu na’a oné sa’iN, poli hitu téing Hia lisé ca helung oné limé wanangN. Poli hitu isé tikul olo mai Hia agu loér lokét Hia lisé, mai taéd: “Tabé o, Raja data Yahudi!”
30 Isopé lisé Hia, agu emi helung hitu agu ongga oné sa’in.
31 Poli taung loérn lisé Hia, agu paké kolés ceca Run. Poli hitu todang Hia nggere-pé’ang te pépék oné panggoly.
32
Du isé lako nggerpé’ang béndar, isé cumang agu cengata oné mai Kiréné, ngasangn hi Simon. Dedek molé ata hitu lisé, te pola panggol de Mori Yésus.33
Itu kali caid isé oné ca osang ata ngasangn Golgota, ngong: “Osang Toko Longkor.”34 Itu kali isé téing Hia inung anggor ata halok le pesuy. Du poli cemekn Liha, toé gorin Hia te inung.
35 Du poli pépékn Hia oné panggol, itus kali pati lisé ceca pakén le téka-nampo.
36 Itu kali isé lonto nitud te lami Hia.
37 Agu éta sa’in manga tulis, te tombo, co’o tara pépékn Hia oné panggol: Ho’oy hi Yésus Raja Data Yahudi.”
38
Ata panggol cama-cama agu Hia, manga sua taus ata tako, cengata oné racap wanangN agu cengata oné racap léoN.39
Sanggén ata lako nitu loér Hia, cang agu ngéngur sa’id,40 mai taéd: “Oé Hau hitut kudut pandé renco Mbaru de Mori Keraéng agu hesé kolé le Hau oné telu leso, selamak damang weki ruM, émé Hau Anak de Mori Keraéngh, damang wa’uh de éta mai panggol hitu!”
41 Nenggitu kolé loér de imam-imam kepala agu ata pecing Taurat agu sanggéd tu’a-tu’a, mai taéd:
42 “Ata bana Liha ngancéng selamakd, maik weki ruN toé ngancéng selamakn, émé Hia raja data Israél, damang dé ‘Hia wa’uy éta mai panggol hitu kudut imbi lami Hia.
43 Hia bengkes kéta tu’ung oné mai Mori Keraéng: Di’ab ga, Mori Keraéng te selamak Hiay, Mori Keraéng henan agu Hia. Ai Hia poli taé ruN: Aku dé Anak de Mori Keraéngk.”
44 Ngot ata tako situt cama panggol agu Hia, mbécik kolé Hia nenggitu.
45
Pu’ung ongga campulusua nendep tuil oné temu tana hitu dengkir ongga telu.46 Anggat ongga telu, ciék-idén Mori Yésus: “Eli, Eli, lama sabakhtani?” Ngong: Mori Daku, Mori Daku, co’o tara ledong Akud Ité?
47 Dengé hitus, pisa taus ata hesé lupi nitu mai taéd: “Hia bénta hi Élia.”
48 Og hidi-hada main cengata oné mai isé situ; hia emi bunga karangy, bembo oné anggor héo, itu kali tudukn le laro helung agu téing inung oné Mori Yésus.
49 Landing taé data iwon: “Néka, damang lélon, ot mai hi Elia te campé Hia.”
50 Mori Yésus ciék da’at koléy, agu beté nain.
51
Lélo damang, tabér rinding Mbaru de Mori Keraéng, rodo wirot kaut laing suay, pu’ung éta main haéng-wan, cain nupung mésé, agu golo-golo watu biké laing suas.52 Sanggéd boa lénga kéta taungs agu dod ata nggeluk ata poli matad to’o kolés.
53 Agu du poli to’on Mori Yésus, isé kolé ngo pé’ang oné mai boad, poli hitu ngo oné béndar nggeluks, agu toto wekid oné lawa do.
54
Kepala de serdadu agu sanggéd serdadu ata lami Mori Yésus, cirik rantang kéta taungs du ita lisé nupung agu sanggéd situt ata polid, itug kali mai taéd: “Tu’ung-tu’ung kéta, Hia ho’o Anak de Mori Keraéngy.”55
Agu manga nitu do kolés inéwai ata lélo déu maid, isé inéwai siot lorong Mori Yésus oné mai Galiléa ata laséng gatang Hiad.56 Oné mai isé situ manga kolé hi Maria Magdaléna, agu hi Maria endé di Yakobus agu hi Yosép agu endé de anak-anak di Zébédéus.
57
Redu kudut wiég tana, main cengata ata bora, ata Arimatéa, ngasangn hi Yosép agu hia kolé poli ciri ata nungku de Mori Yésus.58 Hia ngo cumang hi Pilatus agu tegi liha rapu de Mori Yésus. Jera li Pilatus te téing agu hia.
59 Agu mai hi Yosép téti rapu hitu, wuwus le towé hemél ata bakok mbot,
60 agu loling liha oné boa weru, ata poli cakén oné golo watu. Agu du poli nggolingn liha ca watu mésé oné para boa hitu, itug kali kolén.
61
Maik hi Maria Magdaléna agu hi Maria bana, ka’éng kid nitu lonto bolon para boa hitu.62
Ného diangn du leso poli mengkek, mais imam-imam kepala agu ata Parisi cama-cama ngos oné hi Pilatus,63 agu mai taéd: “Keraéng, nuk kin lami, te Hia hitut pandé calang ata du lari mosén, nenggo’o taén: Telu leso wa ga, Aku to’o kolék.
64 Landing hitu, jér koé lité te lami boa hitu haéng leso te telun; émé toé, aram maikin rasul-rasuln te tako rapu Diha, poli hitu ga, mai taéd ngong ro’éng: Hia poli to’o kolén oné mai ata mata, wiga pandé calang ho’o ata céwé da’atn cemoln, oné mai hitut laring cain.”
65 Mai taé di Pilatus ngong isé: “Ho’os ata lami situ latang te méu, ngom kali ga, agu lami di’a-di’a boa hitu.”
66 Os kali ngod isé agu le campé disé situt lamin, cap lisé boa hitu agu lamiy.
1
Du laun leso Sabat, le gula ucap, du leso laring cain minggu hitu, ngo hi Maria Magdaléna agu hi Maria bana, te lélo boa hitu.2 Itu wan cai nupung mésé, ai cengata malékat de Mori wa’u éta mai awangn agu dur watu hituy agu nggoléngy liha, poli hitu lonto bétan.
3 Rangan cama ného hilaty agu ceca pakén mbot mana kampas bombong.
4 Isét lami situ ndéwer taungs wekid le rantang agu cama kaut kudut matas.
5 Maik malékat hitu taé agu inéwai situ: “Néka rantang méu; ai baé laku méu, kawé Mori Yésus, hiot wéo oné panggol.
6 Hia toég manga cé’é ho’on, ai Hia poli to’o kolén, cama ného hiot poli tombo le Run. Mai, lélo damang osang baté lolingn.
7 Agu gélang koé ngos te tombo agu rasul-rasul te Hia polig to’on oné mai ata mata. Cai olo Hia po méu lé Galiléa; nitu méu te itan Hia. Tadan, polig dé taén Laku agu méu.”
8 Gelang-gélangs isé koléd oné mai boa hitu, déméng agu rantangd, maik kais kéta naid agu tendi kétas mburukd te tombo agu rasul-rasul de Mori Yésus.
9 Calak doing, Mori Yésus cumang dungka agu isé mai taén: “Tabé latang te méu.” Isé ngo ruis Hia agu nggao wa’in agu suju Hias.
10 Mai taé de Mori Yésus ngong isé: “Néka rantang. Ngom ga, agu tombo oné asé-ka’é Daku, kudut isé ngo oné Galiléas, agu nitus isé te tiba Akus.”
11
Du isé ngai oné beréha salangd, mais pisa taus oné mai isét lami ngo nggere-oné kota agu tombo taung sanggéd apa ata poli itad lisé agu imam-imam kepala.12 Agu du poli bantang agu iséd taung tu’a, tepo kaut lisé, og téing séng do-do kauts serdadu-serdadu situ,
13 agu mai taéd: “Méu paka tombo, te rasul-rasul Diha mai le wiés agu tako Hia du méu lari tokos.
14 Agu émé dengé keréba ho’o li Pilatus, ami te tombo agu hia, wiga méu toé manga co’o laings.”
15 Isé tiba séng situ agu pandé lorong ného baté pedé disé oné isé. Agu tombo ho’o wéro-émbon oné sanggén ata Yahudi dengkir te ho’on.
16
Og ngod rasul situ campulu ca oné Galiléas, oné golo hiot poli toi le Mori Yésus agu isé.17 Du ita Hiad isé, suju Hia, maik manga pisa taus ata sesenga’is.
18 Mori Yésus mai ruis isé agu mai taén: “Oné Aku poli téing kuasa, oné Surga agu oné lino.
19 Landing hitu ngom ga, pandé koé ciri ata nungku Dakus sanggéd ata agu cebong koé isé le méu, le ngasang de Ema, agu de Anak, agu de Nai Nggeluk,
20 agu toing koé isé te pandé sanggéd apa ata poli jera Laku agu méu. Agu paka idep di’a le méu, Aku loréng méu mtaungk dengkir cemoln lino.”