1

¹

Нум’ Ню’ – Иисус Христос’ нямна ӈэда Маймбабцо Юн’ нерденя.

² Нум’ Вади вадета’ – Исайя’ падаркана тарем’ пады: «Ти, неранд няд сехэрэдамд хамэдавандаӈэ Мань нув’ юне ядэланами ӈэдарадм’».

³ «Вэӈго яхана тюрыта’ вабц со: ‹Нум’ Ерв’ сехэрэдамда хамэдада”, недамда ненземдара”›».

⁴ Тарем’ Иоанн вэӈго ян’ ӈадимя. Хэхэдаӈгованда сер’ ненэцие ханзь тарем’ ма: «Хэбяхыда” хаейда”, хэхэдаӈгуда”, тиканда Нум’ хэбяхыда” ха”авраӈгуда».

⁵ Иудея’ я’, Иерусалим’ марад’ тер” малмбой’ нянда миӈа”. Хэбяхыдо’ индо’ ядан’ ваде”ядо’. Иордан’ яхахана Иоанн сиддо’ хэхэдамби.

⁶ Иоанн маха ху”ла юно’ – верблюд’ таркад паӈгалмы паным’ мэ”ӈа, ёнэнда тяхана тобъёва ни сяры, ӈавраданда явна маирти, юрите”э пилю” юре мэ”ӈа.

⁷ Ненэцие ханзь тарем’ лахана: «Пумнани миндя нядни ва”ӈа. Ӈари” маньзяван нянани Пибита те”ме таси’ хо”леркая екахарта ни серос”.

⁸ Мань сидда” икана хэхэдамбидм’. Пыда сидда” Хэбидя Индкана хэхэдамбаӈгу».

⁹

Тикы ялэ” ёльцьӈгана Галилея’ яхана ӈэда Назаретхад Иисус то. Иордан’ яхахана Иоанн Сита хэхэда.

¹⁰ Икад тарпаванда сер’ тикы’ минда Иисус лакри’ нув’ няра’ няӈгармам’ манэ”ӈа. Голубьм’ нюбета нув’ сармикадарев’ Хэбидя Индад’ Нянда ха”мотавам’ манэ”ӈа.

¹¹ Нув’ няд лаханана мамононда: «Пыдар Мань Мэненами Нюми ӈэ” нинав’, Сейханани поин».

¹²

Таминда тикы’ пуд Хэбидя Инд” Иисусм’ вэӈго ян’ ханада.

¹³ Иисус’ вэӈго яхана тет ю” яля’ мэва’ сер’ Сатана хэбяха серк” Сита ханзь хорпи. Иисус я’ сармик” поӈгана мэ, тикы ялэ” ямбха”на нув’ юне ядэлана” Сита нядаби”.

¹⁴

Иоаннм’ сяр”махадандо’ Нум’ Маймбабцо Юнм’ ваде”манзь Иисус Галилеян’ хая.

¹⁵ Пыда ма: «Ёльцянда тэвы”. Нум’ Параӈода’ Я нядна” хахаялма. Хэбяхыда” хаейда”, Маймбабцо Юнан’ пунрыда”».

¹⁶

Галилея’ то’ хэвувна миманда сер’ Иисус поӈгам’ моёпадаха’ – Симонм’, Андрейм’ манэ”ӈа. Андрей – Симон’ папа ӈэвы. Пыди’ ёртяха’.

¹⁷ Иисус нянди’ ма: «Пумнани тоди’, Мань сидди’ ненэцие Нумд’ тэврамбадаӈэ сертаӈгудм’».

¹⁸ Пыди’ тикаринди’ ӈод” поӈгади’ хае, Пумнанда пяди’.

¹⁹ Ӈамгэ’ пират’ хэ”мяхаданда, Пыда ӈано’ мюня поӈгади’ сэдорпадаха’: Зеведей’ нюм’ – Иаковм’, Иаков’ папам’ – Иоаннм’ манэ”ӈа.

²⁰ Тикаринда ӈод” Нянда хаӈахаюда. Нисямди’ манзаранита ня’ ӈано’ мюня хаеди’, пыди’ Пумнанда хаяха’.

²¹

Иисус тохоламбадита ня’ Капернаум’ март’ тэвыд”. Тикыринда ӈо” еврей” ныланава яляхана Пыда ма”люӈгалава мят’ тю, ненэцие тохоламба пя.

²² Ненэця” Тохоламбабцонда мэсыт’ пысаӈгаць. Пыда Моисей’ Ватом’ теневани” то”лаха нись ӈа”, Пыдхавада ӈарка ерв’ ныхым’ мэтадарев’ сиддо’ тохоламбись.

²³ Та’ мальӈгана ма”люӈгалава мякана ня”маравы ненэць’ мэвы, тарем’ тюры”ӈа:

²⁴ «Назарет’ тер Иисус, нянана” ӈамгэ сел таня? Сидна” хадарабтаванзь тосан? Хибя ӈэвамд теневав – Хэбидя Нумд».

²⁵ Иисус сита таб”ламба ма: «Мунзялв”! Сёнзянда мюд тарпад”!»

²⁶ Тикаринда ӈод” ӈылекада ненэця’ пыхыдм’ ледребтехэя ӈарка тёрм’ мэць ненэця’ сёнзя’ мюд тарпы”.

²⁷ Ненэця” мал’ ӈокхандо’ сейто’ хэсь нидо’ хонрамби”: «Тикы ӈамгэ? Тарця ныхым’ мэць едэй тохоламбада сер”? Пыда ӈылекахарт табэдамби! Пыдо’ ӈо” Мунда сер’ ӈа”!»

²⁸ Тикаринда ӈод” Нямнанда ӈэда юн Галилея’ я’ тиӈгэвна латы”.

²⁹

Ма”люӈгалава мякад тарп”махадандо’, Иисус тохоламбадида няць Симонаха’, Андрейха’ мят’ то. Иаков, Иоанн ӈобтарем’ нянандо’ тоӈаха’.

³⁰ Симон’ пухуцянда небя ӈая’ ядё’ хабцяӈгана хаӈгурць юседа; хаӈгурмамда минхандо’ Иисусан’ ваде”ӈадо’.

³¹ Хэвханда тэвхая, Иисус ӈудахаданда сита тю”уку’ ила. Таминда ӈо”, хабця’ няданда хэ”мяхаданда, не мядондида манзаяць пя.

³² Пэвсюмя’ няна, хаерад’ пакало”махад, хаӈгурти, ня”маравы мал’ Нянда тэволэйдо’.

³³ Харад’ тер” мал’ нёнда си’ хэван’ ма”лыд”.

³⁴ Хуркари хабцяӈга”на хаӈгурта ӈока ненэцям’ Пыда савумдамби, ненэцие” сёнзь” мюд ӈока ӈылекам’ питарӈа. Ӈылека” Сита тенева”. Ӈадьбята Пыда ӈылекаха” ӈамгэхэртм’ нива ваде”ма’ няю’ табеку.

³⁵

Хув’ мер’ нумда пэвван’ Иисус юркы”, пин’ тарпы”. Вэӈго ян’ хая, таняна туёць пэй”.

³⁶ Симонхав нянанда мэна нита ня’ Иисусм’ пюрманзь хая”.

³⁷ Сита хо”махадандо’ Нянда ма”: «Ненэця” мал’ Сит пюрӈа”».

³⁸ Пыда няндо’ ма: «Хахаяда ӈарка хардаха” хэхэва”, таняна ӈобтарем’ Мань Нум’ Вади вадетадм’, Мань тикы’ е”эмня тодамзь».

³⁹ Ӈадьбята Галилея’ я’ тиӈгэвна ӈэда ма”люӈгалава мяка”на Нум’ Вади ненэцяӈг” ваде”ӈа, хаӈгурта ненэцие” ӈылекы питарпи.

⁴⁰

Мерёда ниня тораӈгана ненэць’ Иисусан’ то. Неранда Няд пулыта ни’ мо”нахая хынумда вахалъй”: «Харвабцонд таняб”, Си”ми хабтумда пиртан».

⁴¹ Иисус сита сялилӈа, ӈудамда вэӈгалахая нянда ӈодь’ теба ма: «Ханядм’ харва”, тадхав хабтув”».

⁴² Минхандо’ ниня тораӈгана мерюда тора” – ӈоб’ хабтума.

⁴³ Тадтикахад, сита ӈэдарамба Иисус я”авла нянда тарем’ табекурӈа:

⁴⁴ «Инзеле”, хибяхартан’ ӈамгэхэртм’ нён вадес”, ӈопой, ханонданан’ хань”, пыхыдар нянда манэ”лабтад. Савумаханд ненэцие” пунрава’ е”эмня Моисей’ вади” сер’ ханм’ тэвра”».

⁴⁵ Савумдавэхэв пин’ тарп”махаданда хэвы серода ханяна-таняна вадець пяйда. Ӈадьбята Иисус хардо” помна ӈадя ядэрць нида пирас”. Хардо” хэвхы вэӈго яха”на мэсеты. Тарем’ ӈо” ханяд-таняд Нянда ненэця” турцеты”.

2

¹

Сян яля’ пирка”на Иисус ӈани’ Капернауман’ то. Мякананда мэвамда ненэця” намдадо’.

² Ненэцие” та’ пирувна ӈока ӈэвандо’ нид, нё’ си’ хэвхартахана нусь ядо’ яӈговы. Пыда няндо’ Вадида мэ”ӈа.

³ Мале сян ненэць’ хэвда хабэй нямдо’ Нянда тэвра”. Нямдо’ минренаӈэ тет ненэць’ таравы”.

⁴ Ненэцие” ӈока ӈэва’ нид, Иисусан’ тэвва серта ӈоб’ яӈговы. Ӈадьбята Иисус’ мэсь’ я’ ний харад’ ӈэва’ нийм’ сабкадо’, ниймда ха”аврадо’, хэвда хабэйм’ пэӈасавэй’ таси’ ӈэдарадо’.

⁵ Иисус Нянда пунрёвамдо’ манэ”манда сер’, хэвда хабэйн’ ма: «Ебта’, хэбяхыд ха”мыд”!»

⁶ Мале сян Моисей’ Ватом’ теневана тикахана ӈамдёвы”, ибето’ ӈыл’ тарем’ ибедорӈа”:

⁷ «Ӈамгэ Пыда тарем’ лахана? Пыда Нувм’ вэву”ӈа. Нумли’ хавна хибя ненэцие” хэбяхы ха”авра пир”яда?»

⁸ Иисус инда ӈыл’ ибето’ ядэрабцу минханда хамэдэйда, няндо’ ма: «Пыдара” ӈамгэ ибета” ӈыл’ тикы” нямна ибедорӈада”?

⁹ Хэвда хабэйн’ ханяӈэюм’ вадам’ хэта нензеллаха?: ‹Хэбяхыд ха”мыд”›, нябиюм’ вада тарця: ‹Юркад”, пэӈар хана”, ядэр”›.

¹⁰ Теневаванда” нямна, я’ сяр’ ниня Ненэця’ Ню’ хэбяхы ха”аврамба ныхыда таня». Тадтикахад хэвда хабэйн’ ма:

¹¹ «Мань нянд мадм’, юркад”, пэӈар хана”, мяканд хань”».

¹² Хэвда хабэй тикаринда ӈод” юркы”, ӈока нита сыртан’ пэӈамда содахая тарпы”. Ненэця” мал’ тэри пысэйд”, Нувм’ саву”ӈа”, ма”: «Тарцям’ манэсо”мава” сяхаӈгарт’ яӈгусь».

¹³

Иисус ӈани’ то’ ня’ хая. Ненэця” мал’ Нянда то”, Пыда сиддо’ тохоламби.

¹⁴ Иисус миманда сер’, ӈэва’ мирм’ ма”ламбалавахана ӈамдёда Алфеев’ нюм’ – Левийм’ манэ”ӈа. Иисус нянда ма: «Пумнани ту”!» Левий юркы”, Пумнанда пяда.

¹⁵ Иисус Левий’ мякана ӈаворманда мальӈгана, ӈэва’ мирм’ ма”ламбада”, хэбяхасавэй ненэця” таняна мэвы”. Пыдо’ Иисусм’, Иисус’ тохоламбади няць ӈобкана ӈаворӈа”. Пыдо’ ӈока” ӈэвы”. Иисус’ пумна минзетвы”.

¹⁶ Иисус’ ӈэва’ мирм’ ма”ламбадаха”на, хэбяхасавэй ненэцяӈга”на ӈавор”мам’ манэць, Моисей’ Ватом’ теневана”, фарисей” Иисус’ тохоламбади хонра”: «Ӈамгэ Пыда ӈэва’ мирм’ ма”ламбади, хэбяхасавэй ненэцие няць ӈаворӈа?»

¹⁷ Тарця вади намда Иисус вахалъй”: «Сензха”на лекар’ тарабцода яӈгу, хаӈгуртаха”на тара. Ирт” ӈэда ненэцие хаманзь вунзядм’ ту”, хэбяхасавэй ненэцие” е”эмня тодамзь».

¹⁸

Ӈобӈгуна Иоанн’ тохоламбада”, фарисей” нива ӈавормам’ мэ”мандо’ ёльцьӈгана Иисусан’ ненэця” то”, хонарку”: «Иоанн’ тохоламбада”, фарисей” нива ӈавормамдо’ мэ”ӈа”. Пыдар тохоламбадид ӈамгэ нива ӈавормам’ ни” мэс”?»

¹⁹ Иисус няндо’ тарем’ ма: «Тюва’ ёльцьӈгана нелеванда хасава’ мядонда” нива ӈавормам’ мэцеты”? Нелеванда хасава’ нянандо’ мэва’ ӈэсонд’ нива ӈавормамдо’ мэць нидо’ пирас”.

²⁰ Нелеванда хасавам’ нядандо’ ханава’ ёльця’ тоб”, та’ мальӈгана, тикы яляхана нива ӈавормамдо’ мэтадо’».

²¹ «Ӈахат панэн’ хибяхарт едэй емнь”мям’ ни лабцеӈгу”. Тиканда едэй лабце”мя туркаванда сер’ таӈохэй паны’ пелям’ нянда ныхыбаӈгуда, сида ханяцей’ ӈарамда.

²² Тандая’ сертавы ябе идм’ хибяхарт ӈахат хоба ӈэсянд’ нида сюрпасету”. Тикахана ябе и” ӈэсямда ӈадтада, ябе и” вабтомда, ӈэсянда ӈод” вомда. Ӈадьбята едэй ябе и” едэй хоба ӈэся’ мю’ хамдпада».

²³

Ӈобӈгуна еврей” ныланава яляхана Иисус нянь’ ӈуво” вадюлававна ядэрӈа, тохоламбадида ядвандо’ сер’ нянь’ ӈуво” сэв ныдпа пя”.

²⁴ Фарисей” Сита хонра”: «Сыр”, Тохоламбадид ӈамгэ еврей” ныланава яляхана ниня серота серо пэрӈа”?»

²⁵ Пыда няндо’ ма: «Пыдара” сяхаӈгарт’ нисяра” толабю”? Маӈг’ ёльцьӈгана, ӈаворцявандо’ мальӈгана, Давид ня”мы нита ня’ ханзер” ӈэвы”?

²⁶ Авиафар’ ӈарка ханондана ӈэванда мальӈгана, Давид Нум’ мят’ тювы, хано” нянё ӈавормы, няхата ӈод” мипавы. Тикы ӈавар Нумд’ ханонданари” ӈаворцетвыдо’».

²⁷ Тадтикахад Иисус фарисейха” ма: «Еврей” ныланава яля ненэця’ е”эмня таславы. Ненэць’ еврей” ныланава яля’ е”эмня ӈадимы ни ӈа”.

²⁸ Ӈадьбята Ненэця’ Ню ӈобтарем’ еврей” ныланава яля’ ерв».

3

¹

Иисус ма”люӈгалава мят’ ӈани’ то. Таняна ӈудада тырабэй ненэць’ мэвы.

² Еврей” ныланава яляхана тикы ненэцям’ Иисус савумдаӈгудав’, нидав’? Сита серт’ ха”авравандо’ е”эмня ӈоб’ маниедо’.

³ Ӈудада тырабэй ненэцянд’ Иисус ма: «Юркад”, нерняку’ нулад”».

⁴ Тадтикахад ненэцие хонра: «Еврей” ныланава яляхана хурка серо сертаба мэта вато таня? Сава серо, вэва серо пэрць тара? Ненэця’ илм’ ӈэдаба, хадарабтамба тара?» Пыдо’ ӈани’ мунзи”.

⁵ Сейсявандо’ нид Иисус няндо’ нена сылы”, инда вомзь, ӈудада тырабэян’ ма: «Ӈудар вэӈгалад!» Ӈудамда вэӈгалада, ӈудада ӈахат ӈыхында сензума.

⁶ Тикы’ пуд фарисей” ма”люӈгалава мякад тарпа”махадандо’, Ирод’ няти” ня’ минхандо’ Иисусм’ ханзер” маядавам’ тасламба пя”.

⁷

Иисус тохоламбадита ня’ то’ няна хая”. Галилеяхад Пумнанда ӈока ненэця” хая”.

⁸ Иисус’ сертабада серо” юне” хари намда, ӈули” ӈока ненэця” Иудеяхад, Иерусалимхад, Идумеяхад, Иордан’ яха’ тяхад, Тир’ няби Сидон’ хэвхы яхат ӈобтарем’ Нянда то”.

¹⁰

⁹ Иисус ӈока ненэцие савумдавы. Хуркари хабцяӈга”на хаӈгурта” Сита хахаялтеван’ харва, Нянда минзь тирцькута”. Ӈадьбята ӈока ненэцие” Сита тыеромдавоӈгад Иисус тохоламбадахата Пыда е”эмнянда ӈанокоцям’ хамэда табэда.

¹¹ Хусувэхэд ханзосяди” ӈылека” Сита манэць Неранда няд ян’ мо”нэрцеты”, тёрсавэй’ лаханасеты”: «Пыдар Нум’ Нюн!»

¹² Иисусхав хибя ӈэвамда нива ваде”мандо’ е”эмня няндо’ я”авла табеку.

¹³

Тикы’ пуд Иисус хой’ ни’ танэй”. Хахаялтембадарида Нянда хаӈа. Пыдо’ Нянда то”.

¹⁴ Юкад вата сидям’ тэра, [ӈэдаравэӈэ таслэйда.] Нянанда мэӈгу”ма, Нум’ Вади минренаӈэ ӈэдарамбаӈгудава,

¹⁵ ӈылекы питарпа Нум’ Ерв’ ныхым’ мэта”ма.

¹⁶ Юкад вата сидям’ ӈабта. Симонм’ Петрӈэ нюмдеда,

¹⁷ Зеведей’ нюм’ – Иаковм’, Иаков’ папам’ – Иоаннм’ Воанергесӈэ нюмдеӈахаюда. Тикы нюв’ хамэдита тарця: «Хэхэ’ мун’ ню”».

¹⁸ Андрейм’, Филиппам’, Варфоломейм’, Матфейм’, Фомам’, Алфей’ нюм’ – Иаковм’, Фаддейм’, еврей’ тэнзри сахарамбада Симонм’,

¹⁹ вад’ саюху” Иисусм’ ми”манда Кариот’ терм’ – Иудам’ ӈобтарем’ тэрада.

²⁰

Иисус мят’ то. Ненэця” ӈани’ таня’ ма”лыд”, тиканда Иисус тохоламбадита ня’ ӈаворкарта ни” ерев”.

²¹ Иисус’ хахаяда нида вади” вэкат Сита имда ё”мэӈэ пэрмы”, ӈадьбята Сита ханаванзь яхадандо’ манзада”.

²² Иерусалимхад товы Моисей’ Ватом’ теневана” ма”: «Сёнзянда мюня Веельзевул таня. Пыда ӈылекы” ерв’ ныхым’ мэць ӈылекы питарпи».

²³ Ӈадьбята Иисус сиддо’ нянда хаӈгая, хара явна ӈэда лахарём’ мэць, тарем’ ма: «Сатана ханзер” Сатанам’ питарць пиртада?

²⁴ Параӈода’ я’ тер” харто’ помнандо’ поёмбаб”нандо’, параӈодандо’ я мюданда тахараӈгу, тамна тяха’ нусь нида пирас”.

²⁵ Мяд’ тер” помнандо’ поёмбабто’, мято’ пон’ нусь нида пират”.

²⁶ Сатана’ я мюданда тахарабта, нусь нида пират”, харта техэ’ малханда тэваӈгу” – та’ ёхода.

²⁷ Мэбета ненэця’ илебциеда мякаданда хибяхарт тале нида пират”, сита сяр”марихид илебцо” тале пиртыд”.

²⁸ Ненэся нянда” мадм’, ненэцие” хуркари хэбяхандо’, вэвакумдёвандо’ танявы ӈэб” ӈод”, мал’ ха”маӈгуд”.

²⁹ Хэбидя Индадм’ вэвута’ хэбяхыда иланда панан’ нид” ха”маӈгу”, хэбяхыда пили” нянанда ӈэӈгу”».

³⁰ Ханяӈы” ненэця” Иисус’ сёнзя’ мюня ӈылека мэнаӈэ пэрмы”, ӈадьбята Пыда тарем’ лаханавы.

³¹

Тарем’ мэнаханда Небяда хасава нита ня’ то”. Мяд’ хэвхана ну”, Сита хосая ненэцям’ Нянда ӈэдара”.

³² Иисус’ хэвхана ненэцие” мандал” ӈамды”. Нянда ма”: «Сыр”, пихиня небяр, хасава нид, [не нид] мэ”, Сит хонрамби”».

³³ Тадтикахад Иисус ма: «Мань небями хибя? Мань хасава нини хибя”?»

³⁴ Ӈамдёди” сид” нямна саӈомда ӈэдарахая ма: «Мань небями, Мань хасава нини – ти” мэна”.

³⁵ Нум’ вату нёдана” – тикы” Мань хасава нини, не нини, небями».

4

¹

Иисус то’ хэвхана ӈани’ ненэцие тохоламба пя. Ӈока ненэцие” Нянда ма”лёва’ нид тохона ӈэвы ӈано’ мю’ тий”, ӈамды”. Ненэцяӈгав” мал’ то’ вархана хаи”.

² Хара явна ӈэда лахарю мэць, Иисус сиддо’ хуркари” серк” тохоламби. Тохоламбаванда сер’ няндо’ тарем’ ма:

³ «Инзеледа”! Ти, нянь’ ӈуво” сэв моёпада нянянда ӈуво” сэв моё”манзь тарпы”.

⁴ Нянь’ ӈуво” сэв моёпаванда мальӈгана, ханяӈы нянь’ ӈуво” сэв” сехэры’ ни’ ха”мыд”, нув’ сармик” то”, ӈамъядо’.

⁵ Ханяӈыдо’ пэ я’ ни’ ха”мыд”, ненэй янда хоба тора ӈэвы, минханда тикы яхад ӈамдэдо” сэв” тю”у’ ӈадимя”.

⁶ Хаерад’ тю”у’ тарпава’ сер’ нянь’ ӈамдэд” сэлӈа”, паӈгсявандо’ нид тыра”.

⁷ Ханяӈыдо’ нацдэй ӈуво” понд’ ха”мыд”. Нацдэй ӈуво” тю”у’ вадёва’ сер’ нянь’ ӈуво” сэв” тидха”нато’ вадёда ӈэвадэяд”. Тэри таросялма”.

⁸ Ханяӈыдо’ сава ян’ ха”мыд”, вады”, нядандо’ няхар” юд’ мэва’, мат” юд’ мэва’, юр’ мэва’ нянь’ ӈуво” сэв” вады”».

⁹ Иисус няндо’ ма: «Хавода намдорта инзелея!»

¹⁰ Ӈока ненэцие” хэ”мяхад Харта хаё”мяхаданда юкад вата сидяда, ӈани” хэвхананда мэвы” ненэця” хара явна ваде”мыта нямна Сита хонра”.

¹¹ Няндо’ ма: «Пыдара” нянанда” Нум’ Параӈода’ Я’ таклада сер’ хамэдита ӈади, ӈани” ненэцяӈг” хусувэй ӈамгэ хара явна ӈэда лахарём’ мэць ваде”мы ӈэӈгу.

¹² Пыдо’ ӈани’ сэвто’ сырп” ӈод”, нидо’ мание”, хавото’ намдорп” ӈод”, нидо’ хамэдамбю”. Нум’ няку’ ӈэвы ӈэбто’, хэбяхыдо’ ха”маӈгудаць».

¹³

Иисус няндо’ ма: «Тикы лахарё’ харам’ нира” хамэдамбю”? Тадтикахад ӈани лахарю” хари ханзер” хамэдаӈгуда”?

¹⁴ Нянь’ ӈуво” сэв моёпада – вадам’ моёпадараха.

¹⁵ Ханяӈы” ненэця” сехэры’ ни’ ха”амвы нянь’ ӈуво” сэвраха”. Нум’ Вадам’ намд”махадандо’ няндо’ Сатана минханда турӈа, сейхато’ ха”амвы вади хан”лэйда.

¹⁶ Ӈани ханяӈы” пэ я’ ни’ ха”амвы нянь’ ӈуво” сэвраха”. Намдавы Нум’ Вади минхандо’ маймба сейхато’ пэмбидо’.

¹⁷ Ӈопой, паӈгсяда ӈамдэдо” то”лаха”, ӈадьбято’ пон’ иле нидо’ пирас”. Сяхари’ мая’ ёльцьӈгана Нум’ Вадам’ волтамбади”, питарпади” ӈадимб”, пунрёбцомдо’ минхандо’ ёпидо’.

¹⁸ Ханяӈы” нацдэй” понд’ ха”амвэраха”. Вадам’ намдадо’,

¹⁹ Намдавы вадидо’ ила’ саиро”, тэтерман’ харвабцу”, ӈани сямян харвабцу” тяхаворӈа”, тикы вада” сейхатато’ ян’ ха”морӈа”, таросялворӈа”.

²⁰ Ӈани ханяӈыдо’ сава ян’ ха”амвы нянь’ ӈуво” сэв” то”лаха”: намдавы вадидо’ сейто’, ибето’ ядан’ поя ха”морӈа”, ханяӈыдо’ няхар” юд’ мэва’, нябидо’ мат” юд’ мэва’, ӈани ханяӈыдо’ юр’ мэва’ таром’ ха”аврамби”».

²¹

Иисус тамна тяха’ няндо’ ма: «Ӈамгэ’ е”эмня серекабт тюнебада? Минханда ӈарка хыдяхана лэёмда такалпава’ е”эмня, таси’, ва”ав’ хэван’ ӈабтава’ е”эмня? Нарам’ ни’ ӈабтаванзь таславы ни ӈа”?

²² Ӈобкарт таклада сер” ӈадимадавэй’ хаё нида пирас”, хуркари тале мэта сер” тю”у’ ӈадимда.

²³ Хибя инзелена хавода таняна, намдая».

²⁴ Пыда няндо’ ма: «Намдорта вадахата” сававна инзеледа”: Ся’ пирувна ӈамгэм’ ми”ӈада” – та’ пирувна ӈамгэм’ ня”маӈгуда”, тамна ваць хоӈгуда”.

²⁵ Ӈамгэнда таняна’ ӈамгэда тамна тяха’ ӈокамда, ӈамгэхэртасядахад ӈамгэнда таняб” мармы ӈэӈгу».

²⁶

Тадтикахад Иисус тарем’ ма: «Нум’ Параӈода’ Я тарця’ то”лаха. Ӈопой ненэць’ нянь’ ӈуво” сэв ян’ моё”яда,

²⁷ тикы’ пуд пыда пи’ хоны, яля’ юркорӈа. Ӈамдэдо” паӈго” тю”у’ ханзер” ӈадимяхад, вадёвахад ерме.

²⁸ Я ӈамдэдо харта соябтамбида: пили” нерде ӈамдэдо” сэв ӈадимдемби, тикы’ пуд ӈамдэдо” ӈэва” ӈадиберӈа”, ӈамдэдо” ӈэв” мюня нянь’ ӈуво” сэв” ӈархандо’ сояӈга”.

²⁹ Ма”лава’ ёльцянда тоб”, нянь’ ӈуво” сэв” похо”махадандо’, таминда матора мэта пидерцям’ мэць пяӈгу”».

³⁰

Тадтикахад Иисус ма: «Нум’ Параӈода’ Ям’ ӈамгэ’ то”лахаӈэ таслаӈгува”, хурка хара явна ӈэда лахарём’ мэць вадетава”?

³¹ Нум’ Параӈода’ Я горчица’ пя’ сэв’ то”лахако. Пя’ сэв ян’ моёпава’ мальӈгана сямянхат манорокось.

³² Ян’ ха”ма”махаданда ӈамдэта мал тю”у’ ӈадиберӈа, ӈани нита нимня ӈаркаӈэ, таркаляӈгаӈэ вадюрӈа, тидхананда нув’ сармик” хэӈгадамдо’ хомби”».

³³ Тарця хара явна ӈэда лахарю мэць, хамэдавандо’ пирувна няндо’ лаханась.

³⁴ Хара явна ӈэда лахарёсипой” нись лахан”. Тохоламбадарихита вади” хари хамэдито’ сер’ яӈга ваде”ядась.

³⁵

Тикы яля’ пэвсюмя’ няна Иисус тохоламбадахата ма: «То’ тяханя’ хэхэва”!»

³⁶ Ненэцие хаейдо’, Ӈанонда мюня мэванда сер’, тохоламбадида Сита нянандо’ хана”. Ӈанонда хэвхана ӈани” ӈано” танявы”.

³⁷ Лакри’ сата поӈгэй мерцяӈэ хая, ӈарка хамба” ӈано’ ядан’ тебвандо’ сер’ ӈаном’ икана пандамбидо’.

³⁸ Пыркабтадота Пыда ӈано’ пуй вэкана хоны. Сита сидеба Нянда ма”: «Сидна” тохоламбадава”! Хавандарахава”, нямнана” ир ӈоб’ ни няркан”?»

³⁹ Юрка”махаданда Пыда мерцям’ таӈылмда, тон’ вахалъй”: «Мунзялв”! Ӈэвадад”!» Таминда мерцяда ӈэвадэй”, хури’ хэ”нёӈэ хая.

⁴⁰ Пыда няндо’ ма: «Сейда” нена” ябта”нё”! Пыдара” тедари’ пунрёбцора” тарси” тянёнё”!»

⁴¹ Пыдо’ ӈули” сейсялмы”, помнандо’ няхато’ хонарку”: «Пыда хибя ӈэбта, мерцяхарт, тохорт Муӈганда намдорӈаха’!»

5

¹

То’ тяханяна ӈэда Герасин’ тер” илелава ян’ тэвыд”.

² Иисус ӈанонда мюд ян’ ха”ма”махаданда, неранда няд хальмер” яхад товы ня”маравы ненэць’ минханда Сита ядабта.

³ Пэ’ хоркадёхо”на ӈэда хальмераха”на илесетвы. Хибяхарт еся иняхартаха”на сита сяра я”амвы.

⁴ Ӈока мэва’ ӈэда есяха”на ядыбавыдо’, ӈудида еся иняха”на сярыбавыдо’. Еся ин ныдпавыда, еся таман тахабтамбавыда, хибяхарт сита янимде нивы пирас”.

⁵ Пыда пэ хойха”на, хальмер” поӈгана писавэй ялэ” тюрыцетвы, пыхыдамда пэхэ” ладорпавэда.

⁶ Ӈа”и яхад Иисусм’ манэ”манда сер’ неранда няд сюрамба пулыта ни’ ха”мы”, ӈэвада нибко”ӈа.

⁷ Ӈули” ӈаркавна тюрыць ма: «Самянхат ӈарка Нум’ Ню, Иисус, нянани ӈамгэ сел таня? Нум’ ед’ хынумдадм’, си”ми нён маядамбю”».

⁸ Вахало”манда нерня Иисус нянда тарем’ мамысь: «Ӈылека! Ненэця’ сёнзя’ мюд тарпад”!» Ӈадьбята ня”маравы Иисусан’ тарем’ лаханавы.

⁹ Тадтикахад Иисус сита хонра: «Нюмл ӈамгэ?» Ӈылека тарем’ ма: «Мань нюмми Легион, маня” ӈокава”».

¹⁰ Ӈылека Иисусан’ хынумда ма: «Сидна” тюку яхад хэвня’ нён питарпю”».

¹¹ Хой’ хэвхана парась” мандал” хадырмы”.

¹² Ӈылека” хынумда Нянда ма”: «Сидна” парась” сёнзя’ мю’ пакалць ӈэдара”ма».

¹³ Иисус минханда вадито’ сер’ сертада. Тикаринда ӈод” ӈылека” ненэцяӈгад тарп”махадандо’ парась” сёнзя’ мю’ пакалъяд”. Сидя ёнар’ мян’ парась хой’ ядхад то’ ит’ мялкада”. Мал’ то’ икана хабтюмя”.

¹⁴ Парась лэтамбавы” харад’ ня’, ӈысы” ня’ хунамба хая”, ӈамгэ’ хадкэ”мам’ ваде”ӈадо’. Ненэця” тикым’ манэ”манзь тарпыд”.

¹⁵ Иисусан’ то”, сырӈа”, ня”маравы ӈамды, ембды, ӈахат ӈыхыхында ха”амвы”. Ненэцие” сейдо’ хая”.

¹⁶ Хадкэвы серо манэ”мы” ненэця” ня”маравы’ сензумам’, парась” хавам’ тамна тяха’ няхато’ ваде”ядо’.

¹⁷ Тикы иле”ми намд”махадандо’, ненэця” Иисусм’ яхадандо’ хэвня’ хэсь хынумбидо’.

¹⁸ Иисус’ ӈанонда мю’ ти”мяхад ня”маравы ненэць’ тарем’ ма: «Нянанд мэван’ харвадм’!»

¹⁹ Иисус сита ханаван’ нивы харва”, тарем’ ма: «Мяканд хань”, Нум’ Ерв’ ханзер” сит савумда”мам’, сяё”мям’ няхат вадет».

²⁰ Хэ”мяхаданда Иисус’ сита ханзер” мэ”мам’ Ю” Марад’ я’ ӈардан’ вадець пяйда. Ваде”мэхэта мал’ пысаӈгаць.

²¹

Иисус ӈанохона то’ тяханя’ ӈани’ пуня’ сало”махаданда, ӈока ненэця” хэвханда мандалъядаць. Пыда то’ хэвхана мэсь.

²² Та’ мальӈгана ма”люӈгалава мяд’ ервхат Иаирм’ нюбетадо’ то. Иисусм’ манэць неранда няд пулыта ни’ ха”мы”.

²³ Сита ӈули” ханзь тарем’ ма: «Не нюни яӈгумарида хаи. Ту”ма! Савуманда е”эмня, иле хаёванда е”эмня Ӈудид нинда мэн”ма”!»

²⁴ Иисус нянанда хая. Сита ненэцие” мандал” нёдалӈа”. Ханяд-таняд Сита тыеромдаба пя”.

²⁵ Мандалмы ненэцие” поӈгана юкад вата сидя по’ ямбан’ понзи” ирытормы не мэвы.

²⁶ Хуркари лекарахат маяӈо хомба, ӈаворида мал’ тароси” сад”мыда, хабцянда ханяцей’ сахамы.

²⁸

²⁷ Иисус’ сертабада серо” юнм’ намд”махаданда не ихинянда ма: «Панэхэртаханда тирцядаб”ни савумдадм’». Ӈадьбята ненэцие” помна Пунда няд ембдярканда тирцяда.

²⁹ Хамдумбадада таминда мацяда. Хабцянда савумам’ пыхыдавнанда минханда хамэдада.

³⁰ Иисус та’ мальӈгана пыхыдахаданда ныхында тарпавам’ хамэдавэда. Мандалмы ненэцие” няю’ сюрхалкая тарем’ ма: «Панэхэ”ни хибя тирцяда?»

³¹ Тохоламбадида Нянда ма”: «Ненэцие” Сит тыеромдабавам’ маниеранё”! Тарем’ ӈод” ман: ‹Хибя Няни тирцяда?›»

³² Пыда Нянда тирцядавым’ пюрць сидя хэвувнанда сырӈа.

³³ Ӈамгэ’ хадкэ”мам’ тенева, не сеянда пина ледре Неранда няд пулыта ни’ мо”нэй”, серта сер’ мал’ ваде”яда.

³⁴ Иисус нянда ма: «Ебтов”, Нумд’ пунрёвар сит ӈэда. Инд таӈга хань”! Хабцяӈгаданд сензув”».

³⁵ Иисус’ тамна лахарёмда малевдавэй’, ма”люӈгалава мяд’ ерв’ мякад товы ненэця” Иаирт’ ма”: «Не нюр яӈгума. Ӈамгэ тамна сит тохоламбадам’ яебтамбир?»

³⁶ Ниня инзеленадарев’, Иисус ма”люӈгалава мяд’ ерван’ ма: «Нён пин”, валакада пунрю”».

³⁷ Нянанда Петр’, Иаков’, Иоанн’ – Иаков’ папако’ хавна хибяхартм’ Пумнанда тось ни табэда”.

³⁸ Ма”люӈгалава мяд’ ерв’ мят’ тю”. Маяӈгана мэна ярта, тюрыта ненэцие Иисус манэ”ӈа.

³⁹ Тюванда сер’ ма: «Ӈамгэ маяндорӈада”, ӈамгэ ярӈада”? Не ӈацекы нивынё” яӈгув”, хонынё”!»

⁴⁰ Сита писяда пя”. Иисус ненэцие мал’ пин’ ӈэдара”махаданда не ӈацекы’ небяха’-нисяха’ ня’, няхар” тохоламбадамда няць, не ӈацекы’ мэсь’ лохон’ тю”.

⁴¹ Иисус не ӈацекым’ ӈудахаданда ня”махая нянда ма: «Талифа-кум». Тикы вадита хамэдито’ тарця: «Ебцотов”, нянд мадм’, юркад”!»

⁴² Не ӈацекы тикаринда ӈод” юркы”, ядэрць пяда. Пыда юкад вата сидям’ пота не ӈацекы ӈэвы. Ненэця” ӈули” пысэйд”.

⁴³ Иисус я”авла табеко ма: «Хибяхартан’ тикы серо нёйда” вадес”. Не ӈацекым’ ӈавлара”».

6

¹

Иисус мэ”ма яхаданда хэ”мяхаданда, харта марканда салъй”. Тохоламбадида ӈобтарем’ Пумнанда хая”.

² Еврей” ныланава яля’ тось, ма”люӈгалава мякана ненэцие тохоламба пя. Нянда инзелевы ненэця” пысаӈга”, тарем’ ма”: «Тикы хасава’ ханяд ховы серода? Ханзер” тарця и’ ӈудм’ Нянда ми”мы? Пыда ханзер” тарця мутры сертаба пир”ӈада?

³ Пыда миртя ни ӈа”? Мария’ хасава ню, Иаков’, Иосии’, Иуда’, Симон’ некадо’ ни ӈа”? Не папанада ӈобтарем’ поӈганана” ни” мы”?» Тарць” хараха”на ненэця” Сита хуревы”.

⁴ Иисус няндо’ тарем’ ма: «Нум’ Вади вадетам’ харта янда хавна, янда тер”, мята тер” хавна хуркари яха”на тисьдедо’».

⁵ Пыда ӈудаха”ната сянри хаӈгуртам’ савумдаванда хавна, таняна ӈамгэхэрт мутрам’ серта нись пирас”.

⁶ Иисус ненэцие” нива пунрёван’ пысаӈгась. Тикы’ пуд Иисус хахаяда ӈысы”мана ядэрць ненэцие тохоламбись.

⁷ Юкад вата сидя тохоламбадамда Иисус нянда ханъяда, ӈылекы питарпавандо’ е”эмня ныхыдамдо’ няндо’ ми”ӈа. Сидлад’ ӈэдарамба пяйда.

⁸ Иисус няндо’ табеко тарем’ ма: «Хэб”нанда” ядацянда” хавна ӈамгэхэртм’ нёда” хана”. Няньхартм’, падхартм’, нихи”нята” ӈэда есьта” ӈэсяӈгартм’ нёда” хана”.

⁹ Пибида” серада”, вата имбытадо’ нёда” серыбю”».

¹⁰ Иисус тамна няндо’ ма: «Хуркари мят’ тюб”нанда”, тикы яхад хэванда” ӈэсонд’ таняна мэда”.

¹¹ Хибяри” сидда” мят’ тюлеван’ ниб”нандо’ харва”, нянда” инзелеван’ ниб”нандо’ харва”, тарця ненэцие” мякад тарпаванда” сер’ вэва ӈэвамдо’ манэ”лабтара” – ӈэта” таб” яӈгъяда”».

¹² Тиканда тохоламбадида хая”. Ненэцие” хэбяхыдо’ хаева’ ед’ вадам’ минре”.

¹³ Пыдо’ ӈока ненэцяӈгат ӈылекы питарпи”, ӈока ненэцие юркана масарпа савумдамби”.

¹⁴

Иисус’ юнда я’ тиӈгэвна латы”, Ирод параӈода’ хаха” тэвы”. Ханяӈы ненэця” ма”: «Тикахав яӈгумы Хэхэдаӈгода Иоанн’ илело”ма, ӈадьбята хуркари мутры сертаба пир”ӈа».

¹⁵ Манда” ма”: «Тикахав Илия». Ӈани ханяӈы” ма”: «Тикахав невхы Нум’ Вади вадетахат ӈобто’ ӈэдакы».

¹⁶ Ирод тарця лахарю намда, тарем’ ма: «Тикахав мань ӈэвасяламдевэни – Иоанн’ илело”ма ӈэ” нив’!»

¹⁷ Иродар папанда Филипп’ нем’ – Иродиадам’ неданда мэдась. Тадтикахад ненда табеко’ сер’ Иоаннм’ ня”маванзь ненэцие ӈэдара, тад пуна сярулава мят’ ӈабтада.

¹⁸ Иоанн Иродан’ манзетвы: «Папанда нем’ неданда мэсь вуни серос”».

¹⁹ Ӈадьбята Иродиадар Иоаннм’ волтамбаванда нид хадаван’ харвадась, ханзеркарт” мэсь нидась пирас”.

²⁰ Ирод Иоаннм’ пилю”ӈадась. Иоанн’ ирт” ӈэда, Нум’ вато’ сер’ илена ненэць’ ӈэвахаданда пыда теневась. Ӈадьбята сяӈадась, тисьдедась. Иоанн’ муӈг” намдорпата ӈод”, ваде”мэхэта инда ядан’ инзелеб”нанда ӈод”, ханяӈы вадида сейханда саць теберцетвы”.

²¹ Ӈоб” та’ ӈэда яля ӈадимя. Ирод соя”ма яляхананда Галилея’ ӈарка ерво, ёнар” сайнорти” ерво, Галилея’ тер” васкуй мал’ мяди”мярманзь ханъяда.

²² Тикы мяди”мярма яляхана Иродиада’ не ню то, тара. Тарабцода Ирод’ сеян’, мядондита сеян’ сававна ха”мы”. Параӈода пирибтян’ ма: «Ӈамгэн’ харван, нянд тарцям’ татадм’».

²³ Тамна тяха’ ватора вахалъй”: «Вадами тарця, ӈамгэм’ хаман’ харван, тарцядар хай”, харвабат параӈода яни пеля ӈэя».

²⁴ Иродиада’ не ню хая, небяханда хонарку: «Ӈамгэм’ хандадм’?» Небяда ма: «Хэхэдаӈгода Иоанн’ ӈэва хай”».

²⁵ Минханда пыда паромба параӈодан’ хая. Ханорць пэй”: «Хэхэдаӈгода Иоанн’ ӈэвам’ педряв хыдя’ мюня мер’ няни тэврад!»

²⁶ Параӈода’ ида ӈули” вома. Ватормы ваданда нид, ӈамдёвы мядондита сякана Иродиада’ не ню’ вадам’ мада нида пирас”.

²⁷ Ирод тикарихина Хэхэдаӈгода Иоанн’ ӈэвам’ хосая ераӈгодамда табэда, ӈэдарада. Ераӈгодада сярулава мят’ хая. Иоанн’ ӈэвам’ сапада,

²⁸ педряв хыдя’ мюня пирибтян’ ми”ӈада. Пирибтя ӈани’ небяханда ми”ӈада.

²⁹ Иоанн’ тохоламбада” тикым’ намд”махадандо’ то”, хальмерамдо’ ханадо’, пэмбад’ мю’ сюрӈадо’.

³⁰

Ӈэдаравыда Иисус’ хэван’ ма”лы”. Пэрмы серодо’, ненэцие ӈамгэн’ тохола”мидо’ Нянда мал’ ваде”ядо’.

³¹ Ӈока ненэця” турмы”, хан”мы”. Ӈаворкарта таӈгадо’ яӈговы. Ӈадьбята Иисус няндо’ ма: «Хар”на” вэӈго ян’ хэхэва”, тянёмбовна нылэйда”».

³² Ӈадьбято’ харто’ яландо’ вэӈго ян’ ӈанута хая”.

³³ Ӈанута хэвамдо’ ӈани ненэця” манэ”ӈадо’, хибя ӈэвамдо’ хамэдадо’, ханяд-таняд хардо” ӈысыхыт пумнандо’ сюрмба, нерандо’ няна таня’ тэввыд”.

³⁴ Иисус ӈанонда мюд ян’ ха”маванда сер’ ӈока ненэцие манэ”ӈа. Пыдо’ танырцяда ху’ мандал’ то”олхаць. Ӈадьбята сиддо’ сялилӈа, ӈокавна тохоламба пяйда.

³⁵ Нумда мале пэвсюмя’ няю’ ха”мыць, тохоламбадида Хэвханда тэвхая, ма”: «Тюкохона яда терси, нумда мале пэвсюмя.

³⁶ Ненэцие хахаяда ӈысыхы”, хардо” ӈысыхы” ӈэдарана”ма, ӈамандадамдо’ тэмдаванзь хэя”ма».

³⁷ Иисус няндо’ ма: «Пыдара” харта” ӈавлэйда”». Тохоламбадида Нянда ма”: «Маня” сидя юр” динарий есяхана няньдамдо’ тэмдаванзь хандава”? Тикаха”на ӈавлаӈгуна”?»

³⁸ Иисус сиддо’ хонра: «Няньра” сяӈок? Хаяда”, манэ”ӈара”». Пыдо’ манэ”ӈадо’, Нянда ма”: «Самляӈг няньва”, сидя халява”».

³⁹ Тадтикахад Иисус ненэцие мале сян мандал”ӈэ илебей ӈамдэцавэй я’ ни’ ӈабта табэдэйда.

⁴⁰ Ненэця” юр’ мян’, самляӈг юд’ мян’ мандал”ӈэ ӈамдыд”.

⁴¹ Иисус самляӈг няньм’, сидя халям’ ня”махая, нув’ няю’ саӈомда ила, Нумд’ сава вади хэтахая, няньм’ маляда. Тадтикахад тохоламбадахата ми”яда, ненэцие” помна тярць табэдэйда, сидя халям’ ӈобтарем’ ненэцие” помна тярманзь ми”ӈахаюда.

⁴² Тикахана мэвы ненэця” малебыхындо’ ӈаворӈаць.

⁴³ Тиканда хавна хаёвы няньхат, халяхат юкад вата сидя паӈгалмы едм’ пандаць.

⁴⁴ Нянё ӈавормы” хасавари” самляӈг ёнарто’ ӈэвы.

⁴⁵

Тадтикахад ненэцие ӈэдарамбаваханда Иисус тохоламбадида ӈано’ мю’ тихия, то’ тяханя’ Вифсаидан’ Неранда няна хэсь табэдэйда.

⁴⁶ Сиддо’ ӈэдара”махаданда хой’ ня’ туё”манзь хая.

⁴⁷ Нумда пэвсюмзь ӈанодо’ то’ ерт’ тэвы”. Иисус ӈопойриӈэ я’ ниня хаи.

⁴⁸ Нерандо’ няд миндя мерцям’ пирда”лемба лабитани – пудана ныхыдо’ мэти манэ”ӈа. Ялянда ӈод” тю”у’ пявдавэй’ Иисус то’ и”мана няндо’ хая. Хэробтаван’ харвэйдась.

⁴⁹ То’ и”мана миндям’ ма”нэмандо’ сер’, тикым’ ихиняндо’ тэри ӈамгэӈэ пядо’, тюры”лыд”.

⁵⁰ Сита мал’ ӈокхандо’ манэ”ӈа”, сейдо’ хая”. Иисус минханда вахалъй”: «Сейда” мэйрэйда”! Маньнё”! Сейда” нёя” пин”».

⁵¹ Тадтикахад Иисус ӈанондо’ мю’ тий”, мерцяда таминда хэ”на. Тохоламбадида тасиримна ёльце пысэйд”.

⁵² Нямэхэна ханзер” нянё ӈокамда”мада, ненэцие ӈавла”мада тохоламбадита ихи” нивы” тэв”. Пыдо’ сёнзьто’ мюй” хонёдадрев’ ӈамгэхэртм’ ни” хамэдамбю”.

⁵³

Том’ тяханя’ мада”махадандо’, Генисарет’ я’ варан’ нултадо’.

⁵⁴ Ӈанондо’ мюд ха”ма”махадандо’, тикана мэна ненэця” Иисусм’ минхандо’ тумдадо’.

⁵⁵ Ненэця” ханямна-танямна хардо” хэвхы я”амна хая”. Иисус’ ханяна мэвам’ намда, таня’ хаӈгуртидо’ пэӈ” ниня мине тэволэйдо’.

⁵⁶ Иисус’ ханяри’ тэвбата, хардо” ӈысыхы”на, марка”на, ӈысыхы”на, хаӈгуртидо’ таӈго ян’ тэврасетыдо’. Паныта вакрихи” тебва’ е”эмня Иисусм’ ханзетыдо’. Нянда тебермы ненэця” мал’ савумзеты”.

7

¹

Фарисей”, Иерусалимхад товы мале сян Моисей’ Ватом’ теневани” мандал” Иисусан’ то”.

² Пыдо’ тарем’ сырпато’, ханяӈы Иисус’ тохоламбада” ӈудидо’ нёхолцавэйӈэ, нябинзер’ манзь, ӈудидо’ халтавдавэй’ няньм’ ӈаворць пя”.

³ Хусувэй иудей’ тэнзм’ мэта’ тотрев’, фарисей” иринато’ ила’ вату нёда, ӈудидо’ сомбовна халтавдавэй’ ӈаворць ни” ӈамдорцету”.

⁴ Пыдо’ тэмдолава яхад то”махадандо’ матувдавэй’ ӈаворць ӈани’ ни” пэр”. Тикы’ хавна тамна ӈока невхы иринато’ табеко” таня”. Хыдидо’, тад ӈани сё ямб идето’ ӈэсяӈо, нярава еддо’, [ва”авто’ хамэдяро] халтамба пэръядо’.

⁵ Ӈадьбято’ фарисей”, Моисей’ Ватом’ теневана” Иисусм’ хонрамба пя”: «Ӈамгэ Тохоламбадид я’ мидхы иринато’ табеку нидо’ нёда”? Ӈудидо’ халтавдавэй’ ӈаворӈа”нё”».

⁶ Иисус няндо’ ма: «Хэбидя Падаркана Нум’ Вади вадета Исайя пыдара” сидта” то”лаха сиди” няндоти” нямна тид” лаханась: ‹Тикы ненэця” нянзилихи”на Си”ми ӈарабцу”ӈа”, сейхабидо’ Нядни сюры”.

⁷ Тароси” Няни туё”ӈа”, ӈабцакавандо’ пыдо’ ненэцие” ховы табекохо” ӈани нидо’ тохоламби”›.

⁸ Пыдара” Нум’ табеком’ хаехая, ненэцие” ховы табекоцейха” инзеледа”. [Сё ямб иде” ӈэсяӈо, хыди халтамбида”ма, тикы” хавна тамна ӈани сертабадара” ӈокава] ».

⁹ Иисус тамна тяха’ лахана: «Харта” ховы табекуда” нёдаванда” нид Нум’ табеком’ тарси” мел”мана хаебида”!

¹⁰ Сяхаӈгав’ Моисей тарем’ маси”: ‹Нисяхаюд-небяхаюд ӈарабцус”›, няби вадада тарця: ‹Нисяхаюда-небяхаюда вэва вадахана ховы хабта тара›.

¹¹ Пыдара” ха”мандада”, хибя Нисяхаюта-небяхаюта ня’ тарем’ мамб”нанда: ‹Мань нядни ня”мувндари’ – корван›. ‹Корван› вада хамэдита тарця: ‹Нум’ е”эй›.

¹² Тикы ненэця’ нисяхаюта-небяхаюта е”эмня сава ӈамгэм’ сертавамда мале таб”лара”.

¹³ Пыдара” нёдана табекохо”ната” Нум’ Вадам’ таб”ламбида”. Тикы’ то”лаха вэвако сертабада серла” ӈокава».

¹⁴

Иисус тикы вадита пуд ненэцие ӈани’ Нянда ханъяда, тарем’ ма: «Няни инзеледа”, Си”ми хамэдада”.

¹⁵ Хэвняд турта ӈамгэри-ӈамгэ ненэцянд’ тэвбата, ненэцям’ нанзхамда нида пирас”. Ненэцяцейхад ӈадиберта ӈамгэ” ненэцям’ нанзхамдамбидо’.

¹⁶ [Хибя’ хавода таня”, тикы намдорӈая] ».

¹⁷ Иисус ненэцие” мандал’ поӈгад хэ”мяхаданда мят’ тю. Тохоламбадида Ваде”мыта вади” хари” нямна Сита хонрамба пя”.

¹⁸ Иисус няндо’ ма: «Пыдара” ӈани’ ӈамгэхэртм’ нида” хамэдамбю”? Хэвняд турта ӈамгэри-ӈамгэ ненэцям’ нанзкабтадаӈэ серта нива пир”мам’ нира” хамэдамбю”?

¹⁹ Хэвняд турта сеян’ вуни тэвор”, нянкон’ нив’ тэвор”. Таняд тарпорӈа». Тарем’ хусувэй ӈавар хабтоӈэ хан”ӈа.

²⁰ Тамна тяха’ Пыда ма: «Ненэцяӈгад ӈадиберта ненэцям’ вомдаби.

²¹ Тарем’ таслаб”, ненэця’ сёнзя’ мюд, сейхаданда сямян вэвако и’ ядэрабцо ӈадиберӈа: ӈадъебцо, талейӈэва, хавыдава,

²² вэсакохо’-пухуцяха’ ӈобкана мэсь ватом’ мадабава, мародава, вэнзумдава, нельтеӈгова, саева, тидорма, вэва вади мэ”ма, пыхыдм’ ӈарабцу”ма, ханзосява.

²³ Тикы вэва ӈамгэ” ӈархандо’ ненэцяӈгад ӈадиберта ӈамгэ”, ненэцям’ нанзкабтадаӈэ сертабидо’».

²⁴

Тадхава Иисус Тирм’ нюбета ян’ тэвы”, ӈопой мят’ тю. Пыда харвабцода тарцясь; Пыда тикахана мэвахаданда хибяхарт теневабта нись тара”. Ӈопой, тарем’ ни ерев”.

²⁵ Ӈоб” не, Иисус’ товам’ намда, таминда Нянда то, ӈэхэта мо”нэй”. Тикы не’ не нюда ня”маравы ӈэвы.

²⁶ Тикы не Сирофиникия’ яхад ӈэда, ӈани я’ тер ӈэвы. Не нюхуданда ӈылекам’ питарма’ е”эмня Иисусм’ хонрамби.

²⁷ Иисус нянда ма: «Нюрте”э’ ӈацекы” техэ’ малхандо’ таня ӈаворӈая”. Ӈацекэхэт мармы няньм’ вэнекохо” моёпа вэва».

²⁸ Тикы не Иисусан’ тарем’ ма: «Нум’ Ерв, вадавнанд ӈэхэва ӈэ” нив’, ханяӈэхэ”на ӈацекы’ мантэдамбада нянь’ хамболо вэнеко толь’ ӈылад ӈорцетыданё”».

²⁹ Иисус нянда ӈани’ ма: «Тарем’ мамб”нанд, не нюмд пэртя ӈылека няданда хая. Мяканд хань”!»

³⁰ Не мяканда хая, тарем’ сырпата не нюда ва”ав’ ниня хуркаси” хабцянзи” юседа. Ӈылека ненэся няданда хэвы.

³¹

Тадтикахад Иисус Тир’ яхад хэ”мяхаданда Сидон’ я’ сер’, Ю” Марадм’ нюбета я’ няюмд Галилея’ тон’ ӈани’ салъй”.

³² Таняӈы яхана хасьда-нянзьдам’ Иисусан’ тэвра”. Хаӈгуртам’ савумдаванда е”эмня Ӈудида хаӈгурта ни’ мэванзь Сита хонра”.

³³ Иисус хасьда-нянзьдам’ ненэцие” поӈгад хэвняку’ ханада. Ӈудита тарк ненэця’ ха’ мю’ паклейда. Тикы’ пуд Ӈудита тарк Нянда икана ябтарахая, хаӈгурта нямюн’ тебребтейда.

³⁴ Тадтикахад нув’ няю’ Саӈомда ӈэдара, пэдёмда саӈговоць нэкалкая, вахалъй”: «Еффада». Тикы хамэдита тарця: «Нэд”!»

³⁵ Минханда хасьда-нянзьда’ хавода савума”. Варета манзарана нямюда манзада, тадтикахад сававна лаханакурць пэй”.

³⁶ Иисусхав’ ватода тарцясь; ненэця” тикы иле”мям’ хибяхартан’ ваде”пато’ нись тара”. Тарем’ ӈэбта ӈод” ханяцей’ ханяримна-таняримна ваде”ӈадо’.

³⁷ Пыдо’ тэри пысаӈга”, помнандо’ лаханорӈа”: «Тарси” хусувэй ӈамгэм’ сававна сертаби, хасьди намдортаӈэ сертабида, нянзьди лахананаӈэ сертабида!»

8

¹

Та’ мальӈгы яляха”на Иисусан’ ӈока ненэця” ӈани’ ма”лыць. Пыдо’ ӈамандадо’ яӈговы. Иисус Тохоламбадида хаӈгая няндо’ ма:

² «Няхар” яля’ ямбан’ ӈаварципой” Нянани мэна” ненэця” сяялы”.

³ Ханяӈыдо’ ӈа”и яхат товы”. Ӈавормадавэй’ мякато’ ӈэдараб”нани, сехэрэндо’ мюня выдараӈгу”».

⁴ Тохоламбадида Нянда ма”: «Тюку терсяда яхана хибя ханяд тикы ненэцие ӈавлава’ пирувна таӈок няньм’ хось пирта?»

⁵ Пыда сиддо’ хонра: «Сяӈок няньра”?» Пыдо’ ма”: «Си”ив».

⁶ Тиканда Иисус ненэцие я’ ни’ ӈамда табэдэйда. Тадтикахад си”ив няньм’ ня”махая, Нумд’ сава вади ха”авра”махаданда нянё мардэйда, нянё” ютек Харта тохоламбадахата ми”яда, ненэцяӈг” митерць табэдэйда. Пыдо’ ӈани’ ненэцяӈг” тяръядо’.

⁷ Мале сян халякодо’ ӈани’ танявы. Сава вадам’ Нумд’ ха”аврахая, Иисус ӈобтарем’ митерць табэдэйда.

⁸ Тикандо’ малебыхындо’ ӈаворӈаць, хаёвэхэтато’ си”ив паӈгалмы ед’ тер ӈавар” ютек ма”ла”.

⁹ Ӈокханда тет ёнар’ пир ненэць’ ӈэвы. Тадтикахад Иисус сиддо’ ӈэдара.

¹⁰ Таминда Харта тохоламбадита ня’ ӈано’ мю’ тияд”, Далмануфа’ я’ няю’ хая”.

¹¹

Иисусан’ фарисей” то”, Нянанда тасалко пэяд”. Сита хорман’ харвавандо’ нид ненадом’ манэ”лабтавамда хаӈаць.

¹² Иисус пэдёмда ӈахат нэкалкая, ма: «Тюку ила’ ёльцьӈгы ненэця” ӈамгэ ненадом’ манэ”ман’ харва”? Ненэся ини ядан’ мадм’: тюку ненэцяӈг” ненадо’ хурка ӈэва сяхаӈгарт’ ни ӈадимд”!»

¹³ Сиддо’ хаехая, Иисус ӈани’ ӈанохонда тий”, то’ тяханя’ хая.

¹⁴

Тохоламбадида ӈаварм’ сода юрвы”. Ӈанондо’ мюня ӈопойри няньм’ нянандо’ содавы”.

¹⁵ Иисус няндо’ тарем’ табекурӈа: «Сырӈада”, фарисей” тимдеӈгосьхад, Ирод’ тимдеӈгосьхад тосада”».

¹⁶ Тохоламбадида помнандо’ тасалко, лахана”: «Няньна” яӈгова’ нид тарем’ мандакы».

¹⁷ Ӈамгэм’ ваде”мамдо’ Иисус ихинянда таслада, хонарку: «Нянянда” яӈговам’ ваде”ӈада”? Ӈамгэхэртм’ тамна нида” мание”, ӈамгэхэртм’ тамна нида” хамэда”? Сёнзьта” мюня сейда” ӈоб’ хоны”?

¹⁸ Сэвта” таня, ӈамгэхэртм’ нида” мание”, хавота” таня, ӈамгэхэртм’ нида” намдор”? Ӈамгэхэртм’ нида” тене”?

¹⁹ Самляӈг няньм’ самляӈг ёнар” ненэцянд’ мардамбавани мальӈгана сяӈок паӈгалмы ед’ тер нянё” ютек ма”ласада”?» Пыдо’ Нянда ма”: «Юкад вата сидя».

²⁰ Иисус ӈани’ ма: «Си”ив няньхана тет ёнар” ненэцям’ ӈавлавани мальӈгана сяӈок панта паӈгалмы едм’ тердесада”?» Пыдо’ ма” ни”им’: «Си”ив».

²¹ Тамна тяха’ няндо’ ма: «Ханзер” тикамда” тамна нира” хамэдамбю”!»

²²

Вифсаидан’ тэввандо’ мальӈгана, ханяӈы ненэця” Иисусан’ сэвсядам’ тэвра”. Ӈудида нинда лабцебтеванда е”эмня Иисусм’ хынумби”.

²³ Иисус сэвсядам’ ӈудахаданда ня”махая, харад’ хэвня’ ханада. Сэвхата сабцяда, тадтикахад Ӈудида лабцебтехэя сита хонра: «Ӈамгэхэвам’ маниен?»

²⁴ Хаӈгурта ӈэвамда илахая ма: «Ненэцие маниедм’, пядарев’ вэӈгалё ядэрӈа”».

²⁵ Тиканда Иисус ӈани’ ӈудида сэвхата лабцебтейда. Хаӈгурта савамбовна сылы”, сензумы, хусувэй ӈамгэм’ сававна мание.

²⁶ Тадтикахад сита мяканда ӈэдараванда сер’ Иисус тарем’ ма: «Харад’ ӈысывна нён хань”».

²⁷

Тиканда Иисус Харта тохоламбадита ня’ Кесария Филипп’ я’ хэвхана ӈэда хардо”мана хая”. Сехэрэвна ядвандо’ сер’ Тохоламбадида хонрамби: «Ненэця” Си”ми хибяӈэ пэрӈа”?»

²⁸ Пыдо’ Нянда ма”: «Ханяӈы” Хэхэдаӈгода Иоаннаӈэ пэрӈа”, ӈани ханяӈыдо’ Илияӈэ, тамна ӈани ханяӈыдо’ Нум’ Вади вадети” ӈопойӈэ Сит пэрӈа”».

²⁹ Пыда няндо’ ма: «Пыдара” ӈани’ Си”ми хибяӈэ пэрӈада”?» Петр Нянда ма: «Пыдар Христосан ».

³⁰ Тиканда Иисус хибяхартан’ Сита вадець нись табэда”.

³¹

Тадтикахад Иисус тохоламбадида тарем’ тохоламба пяйда: «Ненэця’ Ню ӈока маям’ хованда, ненэцие” ӈаркта”, ханондани” ӈаркта”, Моисей’ Ватом’ теневана” Сита волтамбаӈгу”. Тадтикахад Сита маядаӈгу”. Пыда ӈани’ няхар” яля’ пирка”на илеӈгу”».

³² Иисус тикы’ нямна ӈадя ирт” ма. Петр ӈани’ хэвняку’ Сита хаӈгая, тэдорць пэй”.

³³ Иисус ӈани’ ёӈгамгая, тохоламбадахата сырць Петрм’ тэдорӈада, тарем’ ма: «Сатана, сэвни тяха’ хань”! Пыдар Нум’ серо” нямна ир ни ядэр”, ненэциели” ила’ нямна ибедорӈан».

³⁴ Тадтикахад Иисус ненэцие, Харта тохоламбадида Нянда хаӈгая, ма: «Хибя Пумнани тован’ харва, пыхыдамда юрахая, харта лярць’ пямда мине, Пумнани тоя.

³⁵ Хибя харта илалимда ӈэдаван’ харва, тарця ненэць’ иламда ётада. Хибя Мань’ е”эмняни, Маймбабцо Юн’ е”эмня иламда ёта, тикы харта иламда ӈэдаӈгуда.

³⁶ Яндир’ ний хусувэй ӈамгэм’ ня”ма”махаданда, харта иламда ё”пата, нянанда тарода таняӈав’?

³⁷ Ненэць’ иламда ӈамгэхэна тадаӈгуда?

³⁸ Теда’ пунрёсьда, хэбяхасавэй илӈгана, хибя Нядни, Вадахатани сядоларамбабта, Ненэця’ Нюӈэ нюмдебада Нисянда ӈармдёвам’ мэць, хэбидя нув’ юне ядэлани няць, тованда мальӈгана нядандо’ ӈобтарем’ сядоларамбаӈгу».

9

¹

Иисус няндо’ ма: «Ненэся нянда” мадм’, тюкохона нуни” поӈгана мэни” ханяӈы” ненэця” Нум’ Параӈода’ Я ӈарка ныхым’ мэць товдавэй’ ни” хаӈгу”».

²

Мат” яля’ ваера”махад, Иисус тохоламбадахатата Петрм’, Иаковм’, Иоаннм’ тэра. Тикарида няць пирця хой’ ни’ танэй”. Ӈаво” пирка”на сэвто’ сыртан’ Пыда мирбяда ӈани несэйӈэ хая.

³ Ембдярода сырадарев’ ӈули” сэракоӈэ, яберенаӈэ хая”. Сэв” пэсьда”. Я’ сяр’ ниня хибяхарт тикахад ваць тамна сэракоӈэ серта нида пирас”.

⁴ Тикы’ пуд няндо’ Илия, Моисей ӈадимяха’, Иисус’ ня’ помнандо’ лаханакурць пэяд”.

⁵ Петр ӈани’ Иисусан’ ма: «Равви, тюкохона мэвава” маня” нянана” ӈули” сава. Няхар” мятава” сертахава”, ӈопой мя” Пыдар мя”ал ӈэӈгу, нябиюм’ Моисей’ ед’ ӈэӈгу, ӈани ӈопойхав Илия’ мя” ӈэӈгу” нив’».

⁶ Петр няхаюта тотрев’ сейнда хэсь, вадам’ хось я”ма, ӈадьбята тарця вади хэтвы.

⁷ Ӈаво” пирка”на тир ӈадимя, сиддо’ тикы тир тидхананда тонда, тир’ мюд му’ тэбкада: «Тикы Мань сянда Нюми, Муӈганда намдорӈада”».

⁸ Пыдо’ лакри’ сидя хэвувнандо’ сылыд”, Иисус’ хавна хэвханандо’ хибяхартм’ ни” манэс”.

⁹ Хой’ нид ха”мотаб”нандо’, Иисус няндо’ тарем’ табеку: «Ненэця’ Нюӈэ вадета ха”махаданда яӈор’ илелты”, теда’ манэ”мыда” та’ ёльцянд’ хибяхартан’ нёйда” вадес”».

¹⁰ Пыдо’ Табекохонда намда”, манэ”мыдо’ хибяхартан’ нидо’ вадес”, помнандо’ тарем’ нидо’ хонрамби”: «Ха”махаданда яӈор’ илелты”. Тикы вадита хамэди” ханзер” ӈа?»

¹¹ Тадтикахад Иисусм’ хонра”: «Моисей’ Ватом’ теневана” ӈамгэ тарем’ лахана пэрӈа”?: ‹Христос’ това’ нерня, Илия тобта тара›».

¹² Пыда няндо’ тарем’ ма: «Ненэся ӈод” тарця, Илия ӈахакуд нерде серо хамэдаванзь тованзь пэрӈа. Тиканда ӈамгэ Хэбидя Падаркана Ненэця’ Ню’ нямна тарем’ пады?: ‹Ненэця’ Нюӈэ вадета саць маяндорманда, волтамбувнда, вэнзер’ пэрманда›.

¹³ Мань нянда” мадм’, Илия мале тось. Ханзер” Хэбидя Падаркана нямнанда падса, тарем’ сита ненэця” харвабцондо’ сер’ вэнзер’ пэрӈаць».

¹⁴

Пыдо’ тэвбато’, Иисус’ тохоламбади” няби пеля, ненэцие” мандал’ поӈгана мэвы”. Моисей’ Ватом’ теневана” сиддо’ няць тасалкурӈа”.

¹⁵ Иисусм’ манэ”мандо’ сер’ ненэця” мал’ пысэйд”. Неранда няд сюрбыд”, Нянда торовата”.

¹⁶ Иисус тохоламбадида хонрэйда: «Моисей’ Ватом’ теневани” ня’ ӈаво тасламбида”?»

¹⁷ Ненэцие” мандал’ поӈгад ӈопой хасава вахалъй”: «Сидна” тохоламбадава”, Нянд хасава нюми тэврадм’. Пыда нянзи, ӈылека пявэда.

¹⁸ Ӈылека нянда тэвбата, нюми ян’ мо”набтасетыда. Нянда варан’ сисю” ӈадимзеты”, тадтикахад тивда сякалкая иро”ласетыда, тад пуна пыхыдада хутерцеты”. Мань тохоламбадид ӈылекам’ нюхудани питармандо’ е”эмня хонрамбинась, пыдо’ питарць я”мадонзь».

¹⁹ Иисус няндо’ ма: «Нявэй”, пунрёбцора” тянё. Мань тамна пон’ нянанда” мэвандадм’?! Мань тамна пон’ серта” сер’ ӈэӈгудм’? Хаӈгуртара” Няни тэврара”!»

²⁰ Хаӈгуртам’ Иисусан’ тэврадо’. Ӈылека Иисусм’ манэ”манда сер’ хасава ӈацекым’ манзабтамба пяда, тикыкое ян’ мо”нэй”, сисю” нянда варан’ ӈадимя”, явна манрырць пэй”.

²¹ Иисус ӈацекы’ нисям’ хонра: «Ӈаха”на тарем’ хэса?» Ӈацекы’ нися ма: «Нюдя ӈэбыхында тарця.

²² Сита ӈобкад ӈылека хадаван’ харвасеты, тарць” ямбха”на тун’ моёпасетыдава, ит’ моёпасетыдава. Тяхананд, Пирпат сидни’ сялила”ма, сидни’ няда”ма».

²³ Иисус нянда вахалъй”: «Пыдар ман: ‹Пирпат?›, пунрёбцонда таняна’ – я”амнада яӈгу».

²⁴ Тикы’ пуд, таминда хасава ӈацекы’ нися [сэвта хаялцавэй’] тёрей”: «Пунрыдм’! Пунрёбцони тянё ӈэб”, си”ми няда”ма».

²⁵ Иисус ненэцие” мандал’ мимам’ манэ”манда сер’ ӈылекан’ табеко пэй”: «Нянзьда-хасьда ӈылека! Мань нянд тарем’ табекудм’, ӈацекэхэд тарпад”, тад нерня’ сян пуня’ нён сал”».

²⁶ Ӈылека ӈацекы’ пыхыдм’ сатавна манзабтамба, тёрсавэй’ ӈацекэхэд тарпы”. Тикыкое хабэйдарев’ юседа. Ханяӈы ненэця” яӈгумэӈэ ваде”ӈадо’.

²⁷ Иисусхав ӈудахаданда ня”махая, тю”у’ илада, ӈацекы нулъй”.

²⁸ Иисус’ мяд’ мю’ мятю”мяхаданда, Тохоламбадида тасиримна Сита хонра”: «Маня” ӈамгэ ӈылекам’ питарць я”масава”?»

²⁹ Пыда няндо’ ма: «Тикы’ то”лаха ӈылекахав туё”лись, [нива ӈавормам мэ”лись] питарпада».

³¹

³⁰

Тадтикахад тикы яхад хэ”мяхадандо’ Галилея’ явна миӈа”. Иисус тохоламбадида тарем’ табэдамбидась: «Ненэця’ Нюӈэ вадетам’ тадри’ вэва ненэцие” ӈудаха” митадо’, тикахад хадаӈгудо’, Пыда яӈгумда, тад пуна няхар” яля’ хэ”мяхад яӈор’ илелты”». Ӈадьбята Иисус тарем’ харвась – ханя’ ми”махаданда хибяхарт теневабта ни тара”.

³² Пыда вадида тохоламбадида нидо’ хамэда”, тарси” тикы’ нямна хонра сейдо’ пина”.

³³

Пыдо’ Капернауман’ салъяд”. Мякана Иисус сиддо’ хонра: «Ядба”на”, ӈамгэ’ нямна лаханорцада”?»

³⁴ Тохоламбадида мунзи”, пыдо’ ядвандо’ сер’ хибяндо’ ӈарка ӈэвам’ тасламбиць.

³⁵ Иисус ӈамды”, юкад вата сидя тохоламбадамда Нянда ханъяда, вахалъй”: «Хибя нерденяӈэ хэван’ харва, тикы ӈули” пудана ӈэӈгу, хусувэй ненэця’ манзаранаӈэ тараӈгу».

³⁶ Пыда ӈацекым’ ня”ма, поӈгандо’ нултада, ӈацекым’ севолкая няндо’ ма:

³⁷ «Хибя тюку’ то”лаха ӈопой ӈацекым’ Мань е”эмняни нянда тэвраӈгу, тикы Си”ми сёнзянда мю’ ня”маӈгу. Си”ми сёнзянда мю’ ня”мавы Си”лими вуни ня”маӈгу” – Мань хавнани Си”ми ӈэдаранам’ ня”маӈгу” нив’».

³⁸

Иоанн Нянда ма: «Сидна” тохоламбадава”, маня” ӈоб” ненэцям’ манэ”ӈаваць. Пыда Пыдар Нюмд няд”мяць ӈылекы питарпись. Пыда нянана” ниню” ядэр”. Ӈадьбя”на” маня” таб”лаваць».

³⁹ Иисус няндо’ ма: «Нёра” таб”ламбю”, хибя Нюмми няд”мяць мутрам’ сертаӈгу, тикы Мань Си”ми тэри вэнзер’ ни вадет”.

⁴⁰ Хибя няна” ни вэнзумдю”, тикы няна” нята.

⁴¹ Ненэся нянда” мадм’, пыдара” Христосхад переванда” нид, хибя нянда” Мань е”эмняни итамда” тата, тикы ненэць’ ӈуда’ терси” ни хаёд”».

⁴²

«Хибя пунрёбцода тянё ненэцям’ вэвако серт’ тэвраӈгу, тикы ненэцям’ ӈарка манябэм’ иканда тяха’ сярхая, яв’ ит’ моб” сава.

⁴³ Ӈуданд сит хэбяхан’ тэвраб”, ӈудар сапад. Сидя ӈудахана я’ ӈыл’ ӈоб’ тута тун’ тэвванд екававна, та’ екававна вае” ӈудахана иланд’ тэвад”.

⁴⁴ [Таняна халы ни хаӈг”, ту ни хабтюр”.]

⁴⁵ Ӈэнд сит хэбяхан’ тэврамбаб”, ӈэр сапад. Сидя ӈэмд мэць я’ ӈыл’ тэвванд екававна, та’ екававна вае” ӈэхэна иланд’ тэваб” сава.

⁴⁶ [Я’ ӈылна халы ни хаӈг”, ту ни хабтюр”.]

⁴⁷ Сэванд сит хэбяхан’ тэврамбаб”, сэвар тюхулт. Сидя сэвмд мэць я’ ӈыл’ тэвванд екававна, та’ екававна вае” сэвм’ мэць Нум’ Параӈода’ Ян’ тэваб” сава.

⁴⁸ Я’ ӈылна халы ни хаӈг”, ту ни хабтюр”.

⁴⁹ Сэротавы хан’ тотрев’ хусувэй хибя тухуна хабтумдавы ӈэӈгу.

⁵⁰ Сэр” – сава ӈамгэ, ӈопой, сэр” ӈавыцябата, ханзер” ӈавыта хамэдаӈгура”? Сэротавэӈэ помнанда” поёда” сава” ӈэя”».

10

¹

Таняд хэ”мяхаданда Иисус Иудея’ ян’, Иордан’ яха’ тяханяӈы ё” няю’ нэкалӈада. Пыда Нянда ӈани’ ӈока ненэцие” мандал” миӈаць. Пыда ӈахат Харта серта сер’ сиддо’ тохоламба пя.

² Тадхава Нянда мале сян фарисей то”. Сита хорпа, тарем’ хонарку”: «Хасава немда хаебта серо”ӈа?»

³ Иисус няцейндо’ хонарку: «Моисей хасае нянда” ӈамгэм’ табэдамбаса?»

⁴ Пыдо’ ма” ни”им’: «Моисей’ табекохона тодо’ яха” хэсь падарм’ мисо”махад нем’ хае серо”ӈа».

⁵ Иисус пуня’ няндо’ тарем’ ма: «Сейта” вэнзу’ ӈэва’ нид Моисей нянда” тарця табеком’ падвы.

⁶ Ӈабцакаванда ӈули” нюрте”э’, ям’ миделеванда мальӈгана Нум’ хасава’ тэнзӈэ, не’ тэнзӈэ ненэцие сертавы.

⁷ Ӈадьбята ненэць’ небямда-нисямда хае”мяхаданда нехэданда переӈгу.

⁸ Пыди’ ӈопой пыхыдаӈэ хандӈаха’. Ти, пыди’ сидя ненэць’ нихи’ ӈа”, ӈопой ненэцяӈг’.

⁹ Харада тарця, Нум’ ӈобт’ тэвравым’ ненэць’ тодо’ яха” нида мэӈгу”».

¹⁰ Мякана тохоламбадида тикы’ нямна Сита ӈани’ хонрамби”.

¹¹ Иисус няндо’ ма: «Хибя немда хае”мяхаданда ӈани нем’ мэӈгу, тикы ӈахат нехэнда мэ”мы ватомда мадахая, хэбяха серм’ серта.

¹² Неюм’ хасавамда хае”мяхаданда ӈани хасавахана хэбтя, ӈобтикы тарця хэбяха серм’ серта».

¹³

Иисус’ ӈуди” ӈацекэхэто’ тебва’ е”эмня ненэця” ӈацекыдо’ Нянда тэврамбидо’. Тохоламбадида ӈацекы тэволани Нянда нидо’ ӈэдарамбю”.

¹⁴ Иисус тарця серм’ манэць, нерцилы”, няндо’ ма: «Ӈацекы Няни ӈэдарамбида”, нёйда” марембю”. Нум’ Параӈода’ Я тикы” то”лыхы” е”эмня таня.

¹⁵ Ненэся нянда” мадм’, хибя ӈацекэдрев’ Нум’ Параӈода’ Я’ таняван’ ни пунраӈгу”, тикы таня’ ни еремд”».

¹⁶ Ӈацекы севоло”махаданда Ӈудида нимняндо’ мэйда, Нумгад ӈэда сава вади хэта.

¹⁷

Иисус пин’ тарпаванда сер’ неранда няд хибяхав пулыта ни’ мо”нэй”, Сита хонра: «Сава си”ми тохоламбадами, малсяда илм’ ня”амвани е”эмня ӈамгэм’ сертаб”ни сава?»

¹⁸ Иисус ма” нив’: «Ӈамгэ’ е”эмня Си”ми саваӈэ нюмдебин, Нум’ хавна хибяхарт сава ни ӈа”, ӈопой Нумли сава.

¹⁹ Табеку теневыд: Нён хавыд”, нён сае”, нён талэр”, нён нельтеӈгур”, ненэцяӈг” нён вэнзумдю”, небяхаюд-нисяхаюд ӈарабцус”».

²⁰ Пыда ӈо” Нянда ма: «Си”ми тохоламбадами, тикы вадид ӈацекы ӈэвани мальӈгэхэд мал’ нёдэйн».

²¹ Иисус нянда сылаванда сер’ сялилӈада, манзь ханада: «Ӈопой пуня’ сит пэртар таня, теда’ хань”. Сямян таняна ӈаворид мал’ мирдасан”, недва”мы есяд маӈгбада ненэцяӈг” митеран”, тадтикахад нув’ няна илебцял ӈока ӈэӈгу. Тикы’ пуд Няни ту”, [лярць’ пям’ илхая] Пумнани ялад”».

²² Илебцянда ӈока ӈэва’ нид тарця вади намда тарэнзянда ний пармы”, инда вомзь хэвня’ хая.

²³ Иисус сидя хэвувнанда саӈомда ӈэдарахая, тохоламбадахата ма: «Нум’ Параӈода’ Ян’ тэвва тэта ненэцяӈга”на саць саӈгово”ӈа!»

²⁴ Мэ”мы Вадахата тохоламбадида пысэйд”. Иисус няндо’ вадида яӈор’ хэтыда: «Ӈацекые”, Нум’ Параӈода’ Ян’ тэвва [тэта ненэцяӈга”на] тарси” саӈгово”ӈанё”.

²⁵ Нибя’ паха’ сивня маха ху”ла юно’ пакалмахав тэта ненэця’ Нум’ Параӈода’ Ян’ тэввахад нензел”».

²⁶ Пыдо’ тэри пысаӈга”, тадтикахад помнандо’ лаханорӈа”: «Ӈэдавы ненэць’ хибя ӈэӈгобта?»

²⁷ Иисус няндо’ сылы”, манзь ханада: «Ненэцяӈга”на пир”ита яӈгу, ӈопой Нумли пир”ӈада. Нум’ хусувэй ӈамгэм’ пир”ӈа».

²⁸ Тадхава Петр Нянда вахалъй”: «Тинё”, маня” мал’ ӈаворина” хае, Пумнанд това”нё”!»

²⁹ Иисус няндо’ вахалъй”: «Ненэся нянда” мадм’, Мань е”эмняни, Маймбабцо Юн’ е”эмня мята хаевы, нида хаевы, нисямда, небямда хаевы, [неда], нюда хаевы, ямда хаевы,

³⁰ тиканда тюку илӈгананда юр’ ӈэсомана мядо, нядамда, ниси-неби, ӈацекы, ё ня”маӈгу. Тикы’ хавна сита питарпаӈгу”. Вад’ малсяда илм’ ня”маӈгуда.

³¹ Ханяӈэхэв нерденя пудана ӈэӈгу, пудана нердеӈгу».

³²

Иисус тохоламбадита ня’ Иерусалиман’ тэвота, Пыда нерандо’ няна миӈа. Тохоламбадида няркомби”, Пумнанда ядна ненэця” ӈани’ сейдо’ пина”. Юкад вата сидямда Нянда хаӈгая, Пыда ӈани’ ханзер” хадкэвамда вадець пя.

³³ Иисус ма: «Ти, маня” Иерусалиман’ тэвотава”. Таняна Ненэця’ Нюӈэ нюмдебадам’ ӈарка ханонданаха”, Моисей’ Ватом’ теневанаха” митадо’. Тикы’ пуд пыдо’ хадаванзь таслаӈгудо’, ӈани я’ терха” митадо’.

³⁴ Сита письӈэ мэта”, сабцяртадо’, садкосяӈгана садаӈгудо’, тадтикахад маядаӈгудо’. Няхар” яля’ хэ”мяхад, Пыда ха”махаданда ӈани’ илелты”».

³⁵

Тадтикахад Заведеев’ хасава нюху’ – Иаков няби Иоанн, Иисус’ хэван’ тэвхая, маӈаха’: «Сидна” тохоламбадава”, Нянд хэтувнда вадини’ таня”, вади”ни’ сер’ ӈа”ма».

³⁶ Пыда нянди’ ма: «Ӈамгэн’ харвади’? Ӈамгэм’ нянди’ сертаб”ни тара?»

³⁷ Пыди’ Нянда маӈаха’: «Сяхаӈгав’ Юнанд ӈарво”махад, Хэвханд ӈамдаханима, ӈопойюми’ вэняӈы Хэвхананд ӈамдёява, нябиюми’ сятаняӈы Хэвхананд ӈамдёява».

³⁸ Иисус нянди’ ма: «Ӈамгэм’ хамамди’ харти’ нири’ хамэдамбю”. Мань ӈэрпада хыдяни терм’ ӈэрць пиртари’? Хэхэдаӈговаханани хэхэдаӈго пиртари’?»

³⁹ Пыди’ маӈаха’: «Пиртами’». Иисус нянди’ ма: «Мань ӈэрпада хыдяни терм’ ӈэрць пиртари’, хэхэдаӈговаханани хэхэдаӈгодади’.

⁴⁰ Хэвханани ӈамдёвахавари’ – нябинди’ вэняӈы Хэвханани мэва, нябинди’ сятаняӈы Хэвханани мэва Мань нядни ни ӈа”. Таня’ Нум’ таславы ненэця” ӈамдаӈгуд”».

⁴¹ Ӈани ю” тохоламбадада Иаковаха’, Иоаннха’ вади намд”махадандо’ нянди’ нерцилыд”.

⁴² Иисус сиддо’ Нянда хаӈгая манзь ханада: «Пыдара” теневада”, ӈани я’ тер” ӈарктидо’ нянандо’ ервода”, ерводо’ харто’ харвабцото’ сер’ пэръядо’.

⁴³ Пыдара” помнанда” тарцяда” нёда” ӈа”, хибяра” поӈгананда” ӈарка ӈэван’ харваӈгу, тикара” манзарана ӈэӈгу,

⁴⁴ хибяра” поӈгаданда” нерденяӈэ ӈэван’ харва, тикара” хусувэнда” хабиӈэ тараӈгу.

⁴⁵ Ӈабцакаванда Ненэця’ Нюӈэ нюмдебада манзаранадамда хованзь товы ни ӈа”, Харта пыхыдамда манзаранаӈэ ми”манзь товы. Харта иламда ненэцие ӈэдава’ е”эмня ваторць товы».

⁴⁶

Тадтикахад пыдо’ Иерихонан’ тэвыд”. Иисус тохоламбадита хавна ӈани ӈока ненэцие няць Иерихонхад манзадаванда мальӈгана, сехэры’ хэвхана Тимей’ хасава ню – сэвсяда маӈгбадакое Вартимей ӈамдёвы.

⁴⁷ Хэвувнанда миндя Назарет’ тер Иисус ӈэвам’ намда, пыда тёрей”: «Давид’ Ню, Иисус, си”ми сялил”!»

⁴⁸ Нива тюры”манда е”эмня ӈока ненэць’ сита тэдорпавы”, пуня’ пэрмы”. Вартимеяхавар тамна ханяцей’ ӈаркавна тюрыць пэй”: «Давид’ Ню, си”ми сялил”!»

⁴⁹ Иисус нулкая, вахалъй”: «Хаӈара”!» Пыдо’ сэвсядам’ ханзь ма”: «Сеяр нёя пин”, юркад”, Пыда сит хаӈа».

⁵⁰ Вартимей пиняӈы ембдярта екахая, санэй”, Иисусан’ сюрмба хая.

⁵¹ Иисус сита хонра: «Ӈамгэм’ сертаб”ни нянд сава? Ӈамгэн’ харван?» Сэвсяда вахалъй”: «Си”ми тохоламбадами, сэвха”нани сырман’ харвадм’».

⁵² Тадтикахад Иисус нянда ма: «Хань”, харт пунрёбцор сит ӈэда». Таминда сэвсяданд сэвда савумы”. Тикы’ пуд Иисус’ пумна сехэрэвна ялъй”.

11

¹

Пыдо’ Иерусалиман’ – Виффагия’, Вифания’ хэван’ тэвыд”, Елеон’ хой’ хэван’ тэвхава, Иисус сидя тохоламбадахаюда ӈэвпа нянди’ тарем’ ма:

² «Ирт” ӈэда ӈысын’ хаяди’, таняна ӈоб’ мэ”мадавэй сярда ха ямб намна юном’ хоӈгуди’. Сярда инямда ека”махаданди’ тэврари’.

³ Хибяри сидди’ хонрамбаӈгу: ‹Ӈамгэ юном’ пэрӈари’?› Пыдари’ тарем’ манъиди’: ‹Пыда Нум’ Ервахана тара, таняд таминда пырдари’ тюкон’ ӈэдараӈгуда›».

⁴ Пыди’ хаяха’, таняна пихиня харад’ маркад сярда ха ямб юно’ намнам’ хоӈаха’, инямда екади’.

⁵ Таняна нуна ненэцие” ханяӈыдо’ сидди’ хонрамби”: «Ханзер” ӈади’? Ӈамгэ ха ямб намна юном’ ӈэдабири’?»

⁶ Пыди’ Иисус’ неры табэдавы вади хэтӈаха’, тиканда ненэця” сидди’ ӈэдара”.

⁷ Ха ямб намна юном’ Иисусан’ тэвради’, юно’ маха’ ни’ паныди’ лехэбтаӈаха’. Иисус юно’ ни’ ӈамды”.

⁸ Ӈока ненэць’ сехэры’ ни’ паныдо’ лехэбтамби”, ханяӈыдо’ лата яхад матормы пи” тарк лехэбтамби”.

⁹ Нерня миндя”, пуда миндя” тюры”ӈа”: «Осанна! Вад’ тованда ялэд Нум’ Ерв’ нюв’ ед’ сава” ӈэя”.

¹⁰ Вад’ тованда маня” ирина”на” – Давид параӈода’ я сенз ӈэя! Тю”уй нумгана иленёв”! Осанна!»

¹¹ Иисус Иерусалим’ март’ тэвы”. Хэбидя Хардан’ тю. Хусувэй ӈамгэм’ манэсо”махаданда, пэвсюмзь юкад вата сидямда няць Вифания’ ӈысын’ хая.

¹²

Нябимдей яляхана Вифания’ ӈысыхыд тарп”махадандо’ Иисус ӈаворман’ харбилы”.

¹³ Ядванда сер’ ӈахат ӈарханда вэбаха”на синдёда смоковницам’ нюбета ӈодя’ пям’ манэ”ӈа. Ӈамгэм’ ховандадрев’ таня’ хая, вэби” хавна ӈамгэхэртм’ ни ху”. Тад ӈо” ӈоди ма”ламбава’ ёльць’ вуни ӈа”.

¹⁴ Тадтикахад Иисус пян’ вахалъй”: «Тад нерня’ хибяхарт няданд ӈодям’ нёя ӈав”». Тикы вадида тохоламбадита хаха” тэвыд”.

¹⁵

Пыдо’ Иерусалиман’ тэв”махадандо’, Иисус Хэбидя Хардан’ тю, таняна ӈавори мирдапади, тэмдорти питарпа пяйда. Есь тадабади” толь, голубьм’ нюбета нув’ сармик мирдапади” ӈамдёрцие няби’ ня’ ярэйда.

¹⁶ Хэбидя Хардавна ӈамгэдикы ӈавори ханабади таб”ламбида.

¹⁷ Нид лахана тохоламбида: «Тарем’ ни паду”?: Мя”ми хусувэй ненэця’ тэнз” туёць мядм’ ни” нюбес”? Пыдара” мя”ми мартик” мэсьӈэ мэ”ӈара”».

¹⁸ Тикы Вадида ӈарка ханондана”, Моисей’ Ватом’ теневана” намдыдо”. Пыдо’ Сита ханзер” хадавандо’ нямна ибедо’ ядэлыд”. Ӈопой, ӈока ненэць’ Иисус’ тохолиркат пысаӈгаць. Тикахад мэсь сейдо’ пинаць.

¹⁹ Пэвсюмзь Иисус тохоламбадита ня’ маркад хэвня’ нэкалӈадо’.

²⁰

Хубтакохона неры пя’ хэвувна ядвандо’ сер’ саӈудо’ таня’ ха”мыд” – пя’ ванота ӈэсонд’ сэбэймы.

²¹ Петр тикы неры хэвы серм’ тензибтеванда сер’ Иисусан’ вахалъй”: «Равви, сыркар”! Мэтавы пяр сэбэймы».

²² Иисус няндо’ вахалъй”: «Нумд’ пунрёбцора” ӈарка ӈэя.

²³ Ненэся нянда” мадм’. Хибя тайкуй пэн’ тарем’ мамбта: ‹Санад”, ямд’ ха”мад”›, инда ядан’ харта вадахата пунрёбта, вадита сер’ ӈэӈгу.

²⁴ Ӈадьбя”ни нянда” мадм’, пунрё туё”пата”, хынумда хандида” мал’ ня”маӈгуда”.

²⁵ Туёць нубта”, няхатата” ненбата”, нита” вэва ӈэвам’ юрара”, тиканда нумгана илена Нисяра” ӈобтарем’ вэва ӈэбида” юраӈгуда, хэбяхыда” ха”авраӈгуда.

²⁶ [Сейнда” мюня вэвам’ минарпата” тикахана нумгана илена Нисяра” ӈобтарем’ вэва ӈэбида” нида юраӈгу”».]

²⁷

Иерусалим’ март’ ӈани’ тэвыд”. Иисус Хэбидя Харад’ ядувна ядэро”маханда Нянда ӈарка ханондана”, Моисей’ Ватом’ теневана”, ненэцие” ӈаркта” то”.

²⁸ Нянда тарем’ ма”: «Пыдар ӈамгэ ватовна тарця серо сертабид? Хибя тарця серо сертаба Нянд ӈардабцом’ таса?»

²⁹ Иисус няндо’ ма: «Мань ӈо” сидда” ӈани’ хонраван’ харвадм’, Няни хэтара”; тиканда Мань ӈо” ӈамгэ ӈардабцом’ мэць тарцям’ сертавам’ нянда” хэтаӈгув.

³⁰ Няни хэтара”, Иоанн’ хэхэдаӈгова нумгад ӈэса? Нибтя ненэцяӈгат ӈэвэкы?»

³¹ Пыдо’ помнандо’ тарем’ тасалкурць пэяд”: «Мамб”нана”: ‹Нумгад ӈа›, Пыда нив’ манд”: ‹Тиканда пыдара” ӈамгэ нянда нисьда” пунра”?›

³² Нябинзер’ мамб”: ‹Ненэцяӈгат ӈась...›». Ненэця” Иоаннм’ ненэся ӈо” Нум’ Вади вадетаӈэ пэрӈадо’. Ӈадьбято’ пыдо’ ненэцяӈг” сейдо’ пина”.

³³ Пыдо’ тасалко”махадандо’ Иисусан’ ма”: «Маня” ехэрава”». Тадтикахад Иисус няндо’ ма: «Мань ӈо” ӈамгэ ӈардабцом’ мэць тарця серо сертавам’ нянда” нив вадет”».

12

¹

Иисус таняна мэна Сита вомдартамбадаха” хара явна ӈэда лахарём’ вадець пя: «Ӈопой ненэць’ виноградм’ нюбета ӈока ӈодя’ пям’ ӈабта, сидя хэвхэмда тавдада. Ӈоди няялпаванда е”эмня ваӈгм’ сабка. Пирцярка ени” харадм’ ми. Тадтикахад пи вадабадаха” тикы ям’ недбявна лакамбой’ мисо”махаданда ӈани несэй ян’ хая.

² Ӈоди ма”ламбава’ ёльць’ тось, виноград’ пи” ерв недбяӈэ ӈоди” пел ня”маванда е”эмня хабимда пи вадабадаха” ӈэдарада.

³ Виноград’ пи пэртя” хабим’ ня”мадо’, ладорӈадо’, пуня’ ӈамгэхэртаси” ӈэдарадо’.

⁴ Тикы’ пуд няндо’ нябимдей хабим’ ӈэдара, хабинда ӈэвам’ лекабтадо’, тадтикахад хурка сяцяламдехэя пуня’ ӈэдарадо’.

⁵ Виноград ӈоди” пи” ерв ӈани ӈопой хабим’ няндо’ ӈэдара. Тикым’ хададо’. Тикы’ пуд тамна ӈока хабим’ ӈэдара, ханяӈыдо’ ладорпавыдо’, ӈани ханяӈыдо’ хадабавыдо’.

⁶ Ӈани ӈэдараванданда яӈго, пили” пуда яланда ӈопой мэнена нюмда няндо’ ӈэдара. Нид ӈэвпаванда сер’ ида тарем’ ядэрӈа: ‹Нюхувахани маси” сядолараӈгуд”›.

⁷ Виноград ӈоди” пи пэртяхав” помнандо’ тарем’ лахана”: ‹Тюкохов яна” ерв’ ню! Хадахава”, нянда тэвувнда илебц’ е”эйда няна” ха”маӈгуд”›.

⁸ Ня”ма”махадандо’, хададо’, виноград пи” вадюлавахад хэвня’ модо’.

⁹ Виноград’ пи” ерв ханзер” ӈэӈгу? Нив’ тут”, тадтикахад ӈоди” пи пэрти хада нидав’ таслаӈгу”? Виноград’ пи” вадюлава ямда ӈани ненэцяӈг” митада.

¹⁰ Пыдара” Хэбидя Падаркана ӈэда вади нисьда” толабю”?: ‹Миртя” хэвня’ мовы пэ, харад’ мэйра”ма пэӈэ хая.

¹¹ Тикы Нум’ Ерв сертавы, маня” сэвха”нана” манэ”мы сер”, мутра сер”!›»

¹² Иисус’ ваде”мы лахарё пыдо’ нямнандо’ ӈэвам’ хамэда, Сита ня”маван’ харваць. Тикахад ненэцяӈг” сейто’ пинва’ нид Няданда хэвняку’ хая”.

¹³

Иисусм’ вомдартамбада” фарисейхат, Ирод’ няти” поӈгад мале сян ненэцям’ Иисусм’ вадаха”на ня”маванзь Нянда ӈэдара”.

¹⁴ Пыдо’ Нянда то”, ма” ни”им’: «Сидна” тохоламбадава”, маня” тенева, Пыдар тидпой” ӈэда ненэцянд, хибяхартан’ нин нялытор”, ненэця’ ся”лин’ нин сыр”. Ненэсявна хамэдамбава’ пирувна Нум’ табекон’ ненэцие тохоламбин. Хэтхарт, ханзер” Нум’ ватовна иле тара? Рим’ параӈодан’ ӈэва’ мирм’ салдамба тараӈав’, нив’?»

¹⁵ Иисус хэд” ибето’ ӈудо’ хамэда, няндо’ ма: «Ӈамгэ Си”ми хорпида”? Няни динарийм’ тэврада”. Мань манэтав».

¹⁶ Пыдо’ есям’ тэвра”. Тикы’ пуд Пыда няндо’ ма: «Тюкохона ӈэда хибя’ сидяӈг, хибя’ нюм’ пады?» Пыдо’ ма”: «Параӈода’».

¹⁷ Иисус няндо’ пырдари’ вахалъй”: «Параӈода’ ӈамгэм’ Параӈодан’ ми”ӈара”, Нум’ е”эйм’ Нумд’ ми”ӈара”». Пыдо’ Нянда тэри пысэйд”.

¹⁸

Тад тикы’ пуд, Иисусан’ саддукеи” то”, пыдо’ яӈор’ ненэця’ илелман’ ни” пунрю”. Сита хонра”:

¹⁹ «Сидна” тохоламбадава”, Моисей’ падаркана е”эмняна” тарем’ падысь. Хибя’ хасава няда хаӈгу, неда нюси” хаёда, пыда нянда нем’ неданда мэбта тара, яӈгумы нянда е”эйӈэ нюм’ хобта тара.

²⁰ Сяхаӈгав’ си”ив некас илевы”: нюртейдо’ нем’ мэ”махаданда хурка нюси” ха;

²¹ немда нябимдей няда мэда, тикы ӈани’ нюсипой” ха, няхаромдэдо’ ӈани’ тарця.

²² Тарем’ си”ив некас мал’ нюси” ха”. Та’ ёльцьӈгана не ӈани’ ха.

²³ Тиканда Нум’ ненэцие илебтеванда ёльцьӈгана, тикы не ханяӈэндо’ не ӈэӈгу? Си”ивандо’ неси”».

²⁴ Иисус няндо’ ма: «Хэбидя Падарм’ ехэра, Нум’ ныхыхыд ерме, тикы иле”мян’ нельтерейда”.

²⁵ Ненэця” яӈгуво”махадандо’ яӈор’ илел”пато’, ни” нелеӈгаӈгу”, ни” хаюпаӈгу”, пыдо’ нумгана илена нув’ юне ядэлани” то”лахаӈэ ханда”.

²⁶ Моисей’ падаркана хавы ненэцие” илело”мам’ нисяра” толабю”? Ханзер” лэёмбада пи” мандалкад Нум’ нянда лаханаса? Нум’ Моисеян’ тарем’ мась: ‹Мань Авраам’ Нумдм’, Исаак’ Нумдм’, Иаков’ Нумдм’›.

²⁷ Нум’ хабэй ненэцие” Хэхэ ни ӈа”, иленя ненэцие” Хэхэ. Пыдара” сацьри нельтерейда”».

²⁸

Ӈопой Моисей’ Ватом’ теневана лахарёхото’ инзеле. Иисус’ явнанда няхата тасалковам’ намда, пыда Хэвханда то, хонрада: «Сямянхат нюрте”э табеко хурка?»

²⁹ Иисус нянда ма: «Сямянхат нюрте”э табеко тарця: ‹Израиль, инзеле”! Нум’ Ерв Нумма” яланда ӈопой ӈобнзер’ Нум’ Ервава”.

³⁰ Нум’ Ерв Нумл сеянд ядан’ мэнед, сёнзянд ёрад’ ӈэсонд’ мэнед, инд ядан’ мэнед, ныхынд ӈардан’ мэнед›.

³¹ Нябимдейюм’ тарця: ‹Хахаяда нямд харт пыхыданд пирувна мэнед›: тикахад ӈарка ӈани табеко яӈгу».

³² Моисей’ Ватом’ теневана Иисусан’ ма: «Сидна” тохоламбадава”, савов”, ненэсям’ хэтан. Нум’ ӈопой, Пыда хавнанда хибяхарт яӈгу.

³³ Сёнзя’ ӈардан’ Сита мэнева, и’ ядан’, ныхы’ ядан’ Сита мэнева, тикы яхад хахаяда ням’ хари” пирувна мэнева – тикы сидя табеко хусувэй ту’ ханхад, тэри ханхад ӈаркаха’».

³⁴ Иисус Нянда иӈудоць лахананам’ мание, ма: «Пыдар Нум’ Параӈода’ Яхад ӈаха”на нин мы”». Тад тикы’ пуд хибяхарт Сита хонрамба нись хокабтамбю”.

³⁵

Иисус Хэбидя Хардахана тохоламбаванда мальӈгана тарем’ лахана: «Ханзер” Моисей’ Ватом’ теневана” манзеты”?: ‹Христос Давид’ хасава ню›.

³⁶ Харта Давид Хэбидя Индадм’ няд”мяць мась: ‹Нум’ Ерв Нум’ Ервахани маси”: Пыдар Саюд Ӈэт хэван’ пулыто’ ни’ Нултавани ӈэсонд’ вэняӈы Ӈудани няюна ӈамдю”›.

³⁷ Харта Давид ӈо” Сита Нум’ Ерваӈэ нюмде. Ханзер” Пыда Давид’ ню ӈэӈгу?» Ӈока ненэць’ Иисусан’ маймба инзелець.

³⁸ Иисус ненэцие тохоламба ма: «Моисей’ Ватом’ теневанаха” тосаркада”, пыдо’ ямб паным’ мэць ядэрмам’ харвобта”, ӈавори мирдапава лата яхана ненэцие” няндо’ тороватвадо’ ихиняндо’ саць сава.

³⁹ Ма”люӈгалава мяка”на, хэбидя яляха”на пыдо’ толь’ тяхана сямян сава яхана ӈамдёван’ харва”.

⁴⁰ Пыдо’ сэра не” ӈавори марпи”, тад пуна ненэцие” сяка”на сиддо’ маниевандо’ е”эмня ёльце пон’ туё”ӈа”. Нум’ сиддо’ тамна ӈаркавна танараӈгу».

⁴¹

Иисус есь” ларас’ ирт” ӈамдахая, ханзер” ненэцие” есьдо’ ларас’ мю’ пэрмамдо’ мание. Ӈока тэта ненэць’ ӈока есям’ мо”.

⁴² Тад пуна ӈоб” маӈгбада сэра не то. Пыда сидя нярава есям’ мо. Тикы ӈули” тянё еся ӈэвы.

⁴³ Иисус тохоламбадида Хэвханда ханзь ма: «Тидпой” нянда” мадм’, тюку маӈгбада сэра не сямян ненэцяӈгад ӈока есям’ мо.

⁴⁴ Есь” ларас’ мю’ есям’ моёпавы ненэця” вата есь моёпиць. Пыда сямянхат маӈгбадакоеӈэ, вад’ нерняӈы иланда есям’ мал’ тикан’ мэда».

13

¹

Иисус’ Хэбидя Хардахад тарп”махаданда ӈопой тохоламбадада Нянда ма: «Сидна” тохоламбадава”, манэкарт, хуркари пэ”, хуркари харад”!»

² Иисус нянда вахалъй”: «Тюку ӈарка хардаха” сырӈан? Вад’ тюкохона пэ’ ниня ӈобкарт пэ ни хаёд”. Хусувэй ӈамгэ мал’ тахараӈгу».

³

Иисус Елеон’ хой’ ниня ӈамды. Е”нянда Хэбидя Харад ну. Петр, Иаков, Иоанн, тад ӈани ӈопой Андрей ненэцяӈгат ерме Сита хонра”:

⁴ «Хэтхарт, тарця ил’ сяха’ тута? Тарця ӈамгэ’ хадкэва’ ёльцянда сяха’ товам’ маня” ханзер” хамэдаӈгува”? Ненадода ӈамгэ?»

⁵ Иисус няндо’ вадамда нэкалӈа: «Тосаркада”, сидда” сиякан’ нёя тэвра”.

⁶ Хуркари” Мань Нюмми мэць турта”, тарем’ лаханорта”: ‹Теда’ тюку тона мань!› Тикы вадан’ ӈока ненэць’ нельтереӈгу”.

⁷ Хахаяда яхана, хубта яхана сайнорти намдабата”, сейда” нёя” пин”. Тарць” сер” харто’ таняӈгу”. Тарць” серо” таняб” ӈод” тамна ёльцянда ни тов”.

⁸ Ненэцие” тэнз” ӈани ненэцие” тэнзха”на сайнорта”, параӈода’ ё” тер” ӈани параӈода’ ё” терха”на хавыдаӈгу”, ханяна-таняна я манзадаӈгу. Мале сян яхана сэрад тута. Тикахабида едя’ ниня мэна не’ нюртей тебвы не’ едяраха”».

⁹ «Пыдхавара” ӈоб’ хамэдыда”. Сидда” судеӈголава мяк” тэврамбаӈгу”, ма”люӈгалава мякана сидда” ладорпаӈгу”. Мань е”эмняни, ӈамгэ хадкэвы ваде”манзь параӈоди”, ерво” сяк” сидда” нултамбаӈгу”.

¹⁰ Ёльцянда тэвва’ нерня, хусувэй я’ тер Маймбабцо Юнм’ намдабата тара.

¹¹ Сидда” ня”махая судан’ ханабато’, ӈахакуд ӈаво ваде”манда” нямна сейда” нёя” няркан”. Ёльцянда тоб” тарана вада” харто’ няӈганда” тута”. Вадета вадида” пыдара” вадида” ни” ӈа”, Хэбидя Индкад ӈэӈгу”.

¹² Некаюм’ папамда хадаванзь мита, ню’ нися харта нюмда хадаванзь мита, ӈацекы” небяхато’-нисяхато’ я”авлаӈгу”, тикы’ пуд хадаванзь митыдо’.

¹³ Мань е”эмняни хусувэй ненэць’ сидда” сэхэдаӈгу. Ханяӈэра” ёльцянда това’ ӈэсонд’ ни ладод”, тикара” ӈэдавы ӈэӈгу».

¹⁴

«Ханяна ям’ вомдамбада, нанзкабтада ӈамгэри манэ”пата”, таняна тарця ӈамгэри’ таня ниб”нанда серос”, – тюку вади толабада хамэдамда, – та’ ёльцьӈгана Иудея’ яхана иленя” хоян’ хуныдамд”.

¹⁵ Хибяхав харад’ махалэй’ ниня мэб”нанда, таси’ нёямд” ха”ам”, ӈамгэридамда ханаванзь мят’ нёя тю”.

¹⁶ Нянь’ ӈуво” вадюлавахана мэна панэдамда ханаванзь мят’ нёямд” сал”.

¹⁷ Тикы яляха”на саӈговота не”, ӈаволкода не” саць маяндорта”.

¹⁸ Хынумдада”! Сыра’ ёльцьӈгана тарця хадкэна яӈгоя.

¹⁹ Тикы яляха”на тарця мая’ таняӈгу. Тарця мая’ Нум’ ям’ миделеванда мальӈгэхэд тев’ ӈэсонд’ сяхаӈгарт’ яӈгусь. Сяхаӈгарт’ яӈгода.

²⁰ Та’ мальӈгана Нум’ Ерв тикы ялэ хэбимдевы нибта ӈа”, ӈобкарт ӈэдаванда ненэць’ яӈгодась. Тэравыта е”эмня тикы ялэ хэбимдевыда.

²¹ Та’ ёльцьӈгана хибяри’ нянда” мамб”: ‹Ти, Христос тюкохона мэ›, нябинзер’ мамбта: ‹Ти, Пыда тайна мэ› – тикан’ нёда” пунрю”.

²² Тад ӈо” хуркари сияк христос”, сияк Нум’ Вади вадета” ӈадимда”. Тарем’ хэбтя, Нум’ тэравы ненэцие нельтембаванзь хуркари ненадо, и’ хэбиле”мя серо манэ”лабтамбаӈгу”

²³ Ӈадьбята пыдара” тосаркада”! Тикы’ нямна Мань мале ӈахакуд нянда” вадини мал’ хэтын».

²⁴

«Тикы яляха”на, тикы мая’ пуд, хаер” сиднолты”, иры ялясяӈгу,

²⁵ нумгад нумгы” мантэӈгуд”, нув’ нярахана таняна ныхы” манзадаӈгу”.

²⁶ Тадтикахад Ненэця’ Ню’ ӈарка ныхым’ мэць, ӈарка ӈардабцом’ мэць, тирхана ӈэдалё товамда манэтадо’.

²⁷ Тет я’ панхад – я’ малхад, нув’ пан’ ӈэсонд’ Нум’ тэравы ненэциеда ма”лаванзь нув’ юне ядэлани ӈэдараӈгу».

²⁸

«Пыдара” смоковница пян’ сырӈада”, лахарё’ хари хамэдэйда”: Пя’ мал’ нюламб”, вэбита сибдёб”, теневабта” сава, тадри’ танда хахаялма.

²⁹ Тюкохона ӈобтарем’ тарця: хусувэй тарця хадкэвам’ манэ”пата”, теневада”: Пыда хахаи, нё’ си’ хэвхана мэ!

³⁰ Ненэся нянда” мадм’: тарця сер” теда’ миндя ила’ сусавдавэй’ мале хадкэӈгу”.

³¹ Нумг’-яха’ сэяӈгуху’, Мань вадахабини сяхаӈгарт’ ни” сэяӈгу”».

³²

«Тикы яляхад, тикы часхад хибяхарт ехэра, нумгана иленя нув’ юне ядэлана” ярме”ма, Нюда ехэрава, ӈопой Нисярида тенева.

³³ Сырӈада”, нёда” хоню”, [туё”ӈада”]; сяха’ тарця’ хадкэвахад пыдара” ехэрада”.

³⁴ Тикы тарця’ то”лаха ӈэӈгу. Мяд’ ерв хубта яха” ёндорць хэванда сер’ хабида мята ерв”ӈэ хаейда, хусувэхэндо’ манзаи ми”ӈа, мята ерембада еням’ нись хоню” табэдада.

³⁵ Пыдара” ӈо” нёда” хоню”. Сяха’ мята” ерв’ товахад ехэрада”нё”. Харвобта пэвсюмя’ няна тутнакы, пи’ сава ерня’ тутнакы? Тикахавахад харад’ хоркы’ тёрева’ ёльцьӈгана тутнакы, харвобта ӈули” хубтахана тутнакы?

³⁶ Мята” ерв лакри’ тованда ёльцьӈгана хонёдаханда” сидда” нёя ху”.

³⁷ Мань нянда” вадета вадини, хибярин’ хэтыбин: нёда” хоню”!»

14

¹

Сидя яля’ ёльцьӈгана Пасхаха’, тимд”масяда нянь’ хэбидя яляха’ тутӈаха’. Ӈарка ханондана”, Моисей’ Ватом’ теневана” Иисусм’ маядаванзь хэд”мана ня”маван’ харвадо’.

² Пыдо’ ма” ни”им’: «Ненэцие” нерцилавоӈгад, ӈопой, хэбидя яляхана хада ни тара”».

³

Ӈобӈгуна, Иисус Вифания’ ӈысыхына иленя, ниня тораӈгана мерёхона хаӈгурмы Симон’ мякана мэвы. Ӈаворманда ёльцьӈгана, ӈопой не мирета хыдя’ мюня ё”йда, саць мирета нардам’ нюбета тэбъяна юрм’ минре мятю. Тикы’ пуд хыдямда тахабтахая ё”йда юрта Иисус’ ӈэва’ ни’ вабтада.

⁴ Ханяӈы мядонда” помнандо’ нерцирць лахана”: «Тарем’ мирета юрм’ садпава ӈамгэ тарода таня?

⁵ Тикы ё”йда юрм’ няхар” юр” ненэй есяхад ватавна мирдапа саванё”. Недва”мы есь маӈгбадаха” мип” саванё”». Тарем’ нем’ тэдорпидо’.

⁶ Иисусхав няндо’ ма: «Нем’ ӈэвадалара”! Ӈамгэ нянанда таркуда”? Пыда Мань е”эмняни сава серм’ серта!

⁷ Маӈгбада ненэця” хусувэхэд нянанда” мэӈгу”, харвабцонда” таняб”, пыдара” хусувэхэд нядаба пиртыда”. Ӈари” Маньзяван нянанда” ӈоб’ вунидм’ мэӈгу”.

⁸ Пыдхавада пирувнанда серта серта” нидав’, ӈахакуд Ӈаями сюрма’ нерня масарӈада.

⁹ Ненэся нянда” мадм’, Я’ тиӈгэхэна ханяримна Маймбабцо Юнм’ ненэцяӈг” тэвва’ ёльцьӈгана тюку нем’ тензибтехэя, сертаӈгу”мида вадетыдо’».

¹⁰

Кариот’ тер – Иуда Иисус’ юкад вата сидя тохоламбадита ӈопойдо’ ӈэвы. Пыда ӈарка ханонданаха” Иисусм’ тадаванзь хая.

¹¹ Пыдо’ Иуда’ вади намда, саць майвандо’ нид нянда ненэй есь ми”манзь ватораць. Пыда ӈо” Иисусм’ тадава’ е”эмня сава ёльцярим’ пюрӈа.

¹²

Тимд”масяда Нянь’ хэбидя яля’ нюртей яляхана – Пасха’ ед’ ӈэда хум’ хадава яляхана, Иисус’ тохоламбадида Сита хонра”: «Пыдар ханяна Пасха’ ед’ ӈэда хум’ ӈаман’ харвар? Маня” хандава”, ӈахакуд хамэдаӈгува”».

¹³ Тадтикахад сидя тохоламбадамда ӈэдарахая, ма” нив’: «Март’ хаяди’, неранди’ няна ид’ ӈэсям’ минрена ненэцям’ хоӈгуди’, пумнанда хаяди’.

¹⁴ Ханя’ мятюӈгу, тикы мяд’ ерван’ мади’: ‹Сидна” тохоламбадава” тарем’ хонаркусь: Тохоламбади”ни ня’ Пасха’ ӈаварм’ ханяӈы лабэкана ӈавортава”?›

¹⁵ Тикы’ пуд мяд’ ерв тю”уна ӈэда ӈахакуд хэбидя яля’ ед’ хамэдёда ӈарка”я лабэсм’ манэ”лабтаӈгу. Таняна маня” е”эмняна” Пасха’ ӈаварм’ хамэдада”».

¹⁶ Тохоламбадида хая”. Март’ тэв”махадандо’ Пыда ваданда сер’ ӈэда хусувэй ӈамгэм’ ховы”. Пасха’ ед’ ӈэда ӈаварм’ хамэда”.

¹⁷ Пэвсюмя’ няна Иисус юкад вата сидямда няць то.

¹⁸ Ӈавормандо’ ёльцьӈгана Иисус ма” нив’: «Ненэся нянда” мадм’, Хэвханани ӈавортаӈэ ӈопойра” Си”ми саюху” мита».

¹⁹ Пыдо’ ибедо’ вома”, ӈоб’ пуд Сита хонрамба пя”: «Мань ӈэдакэдм’?»

²⁰ Иисус няндо’ ма” нив’: «Юкад вата сидяхад ӈопойра”, ханяӈэра” няньмда ӈопой хыдя’ мю’ Нянани палабтамбида – тикара”.

²¹ Ӈабцата Хэбидя Падаркана падвы’ сер’ Ненэця’ Ню’ падарта ӈэӈгу. Неноховавна Ненэця’ Нюм’ саюху” ми”манда маяндорта. Та’ екававна нись сояӈгу”, ханяцей’ сава ӈэӈгусь».

²²

Ӈавормандо’ ёльцьӈгана Иисус няньм’ ня”ма, Нумд’ сава вади мэ”ӈа. Няньм’ мардахая, тохоламбадахата нид лахана ми”ӈада: «Ня”мара”, ӈаворӈара”, Тюку Мань пыхыдами».

²³ Хыдям’ ня”ма, Нумд’ сава вади хэта, няндо’ тикы хыдям’ ми”ӈада. Тикы хыдя’ терм’ мал’ тю”у’ ӈэрпидо’.

²⁴ Пыда няндо’ ма: «Тюку ӈока ненэцие” е”эмня хамдавы Мань Вэями. Тикы Ватони Вэя.

²⁵ Ненэся нянда” мадм’, Маньзяв Нум’ Параӈода’ Яхана едэй няръяна сяркам’ ӈэрмани ӈэсонд’ виноградм’ нюбета ӈодяхат сертавы сяркам’ нив ӈэрпаӈгу”».

²⁶ Тадтикахад Нумд’ сёё мэсо”махадандо’ Елеон’ хоян’ хая”.

²⁷

Иисус тохоламбадахата ма” нив’: «Хэбидя Падаркана тарем’ пады: ‹Нум’ еням’ маядаӈгу, ху” хунаӈгуд”›. Пыдара” ӈод” мал’ Нядни таялтыда”.

²⁸ Яӈор’ илело”махадани неранда” няна Галилея’ ян’ хандадм’».

²⁹ Петр Нянда ма” нив’: «Няданд хибяри” пыхыдадо’ таялпабто’, маньзяв сяхаӈгарт’ Сит нидм’ хаеӈгу”».

³⁰ Иисус нянда вахалъй”: «Ненэся нянд мадм’, тюку яля’ пи’, харад’ хоркы сидя’ тёрева’ нерня, пыдар няхар’ Нядни пыхыдамд таялпаӈгур».

³¹ Петркав ханяцей’ тамна саць лаханорӈа: «Нянанд хась мань еремгартба”ни Няданд нив” таялт”». Ӈани тохоламбадида ӈани’ тарем’ лахана”.

³²

Гефсиманиям’ нюбета ян’ тэв”махадандо’ Иисус тохоламбадахата ма” нив’: «Туё”мани ёльцьӈгана пыдара” тюкохона ӈамдыда”».

³³ Нянанда Петрм’, Иаковм’, тика Иоаннм’ хана. Иисус’ сёнзянда мюй тахара.

³⁴ Пыда няндо’ вахалъй”: «Хава’ пирувна сёнзями вэва, тюкохона мэда”, ӈопой, нёда” хоню”».

³⁵ Пыда нядандо’ хаця” нерняку’ хая. Тад тованда сер’ ян’ нибкалкая тарем’ туёць пэй”: «Тикы мая’ Си”ми хэробта пирпата, хэробтая».

³⁶ Пыда тарем’ ма” нив’: «Авва”, Нися”! Пыдар хусувэй ӈамгэм’ пир”ӈан. Тюку хыдя Нядни хэвня’ ханад! Тарем’ ӈэбта ӈод”, Мань харвабцони сер’ нёя ӈа”, Пыдар харвабцонд сер’ ӈэя».

³⁷ Тадтикахад Пыда пуня’ салъй”, тохоламбадида хонёдахандо’ хойда. Петарт’ вахалъй”: «Симон, хонын? Ӈопой часхарт’ немаси” мэсь нир пирас”?

³⁸ Вэва серт’ нива еремя’ е”эмня нёда” хоню”, туё”ӈада”. Сёнзя’ харвабцода ӈока, пыхыдахав’ ныхыда тянё».

³⁹ Иисус ӈани’ пырдари’ хая, ӈобтикы вадаха”ната туё”ӈа.

⁴⁰ Тадтикахад пуня’ салкая, ӈани’ хонёдахандо’ хойда. Пыдо’ сэвто’ вар” ӈоб’ ня’ сюркарӈга”, Нянда ӈамгэм’ хэта таравам’ нидо’ хамэдамбю”.

⁴¹ Няхаромдэй’ няндо’ Тованда сер’, Пыда ма” нив’: «Тамна хоныда”, ныланада”? Мась ӈэя! Ёльцянда то! Ти, Ненэця’ Нюм’ хэбяхасавэй ненэцие” ӈудаха” митадо’.

⁴² Юркыда”, хэхэва”. Сырӈада”, Си”ми ми”манзь ватормы ненэць’ мале хахаи!»

⁴³

Иисус’ вадамда малевдавэй’, юкад вата сидяхад ӈопойдо’ – Иуда тикавна ӈадимя. Ӈарка ханондани”, Моисей’ Ватом’ теневани”, ненэцие” ӈаркти” ӈэдаравы ненэцие” мандал” палысавэй’, ладорабць’ пясавэй’ нянанда то”

⁴⁴ Иисусм’ ми”манзь ватормы ненэць’ няндо’ ненадумда”мам’ вадекая тарем’ лахана: «Хибям’ нюцяӈгудм’, тикы – ти. Ня”маира”, тосарка ханаира”».

⁴⁵ Та’ ёльцьӈгана Иуда тидпой” Иисусан’ ялъй”, вахалъй”: «Равви!» Тикаринда Иисусм’ нюцяда.

⁴⁶ Пыдо’ таминдо’ Сита ня”ма, ерамбидо’.

⁴⁷ Хэвхананда мэвы ӈопойдо’ палым’ нэкалӈа, ӈарка ханондана’ хаби’ хам’ сапада.

⁴⁸ Тадтикахад Иисус няндо’ вахалъй”: «Мартикм’ ня”мувндадрев’ Си”ми ня”маванзь палыта, палкадё Няни тода”?»

⁴⁹ Хусувэй яля’ Мань нянанда” Хэбидя Хардахана мэсетыдамнё”, сидда” тохоламбасетыдамнё”, та’ мальӈгана Си”ми нида”нё” пэрцету”. Тарем’ ӈэбта ӈод”, Хэбидя Падаркана падвы мал’ хадкэбта тара.

⁵⁰ Тикы’ пуд тохоламбадида Сита хае, мал’ хуныд”.

⁵¹

Ӈамгэхэв ӈопой ӈацекы хасава тохоцяри’ ялри’ ӈаянда ний синдё, Иисус’ пумна миӈась. Саю” сита ня”мара пя”.

⁵² Тохоця синд”мяримда хае, хуркаси” паркаси” пыда хуны”.

⁵³

Тадтикахад Иисусм’ ӈарка ханонданан’ тэврадо’. Таня’ ӈарка ханондана”, ненэцие” ӈаркта”, Моисей’ Ватом’ теневана” мал’ ма”лы”.

⁵⁴ Петр ӈахакуд Пумнанда ядвы, ӈарка ханондана’ мяд’ маряд’ мю’ мятю. Манзарани” поӈгана ту’ хэвхана пыхыдамда юдаба ӈамды.

⁵⁵ Ӈарка ханондана”, серо тасламбади” мандалм’ няць Иисусм’ маядаванзь вэва серо пюрӈаць. Тадтикахад ӈамгэхэртм’ хось я”ма”.

⁵⁶ Тад ӈо” хуркари ӈока ненэця” Иисус’ ет’ сиякавна лаханаць. Тикы сиякадо’ ӈобт’ ни” ха”мор”.

⁵⁷ Ханяӈыдо’ юркорӈаць, Иисус’ ет’ сияк вади ӈадимдехэя, тарем’ лаханаць:

⁵⁸ «Маня” намдорӈаваць, Пыда тарем’ лаханась: ‹Мань тюку ненэцие” ӈудаха”на мивы Хэбидя Харадм’ тахабтаӈгув, няхар” яля’ ёльцьӈгана ӈани несэй харадм’ – ӈудаха”на нивы мивым’ сертаӈгудм’›».

⁵⁹ Тикы ненэцие” ваде”мэхэртадо’ ӈобт’ ни” ха”мор”.

⁶⁰ Ӈадьбята тикы’ пуд ӈарка ханондана ненэцие” ерт’ нулць Иисусм’ хонра: «Пыдо’ Сит вомдартамби”нё”, пырдари’ няндо’ хэтувнда вадар яӈгу?»

⁶¹ Иисусхав мунзи, ӈамгэхэртм’ ни хэтабю”, ӈарка ханондана ӈани’ хонрада: «Пыдар Христосан? Ненэцие” савута Нум’ Нюн?»

⁶² Иисус нянда ма: «Манье, пыдара” Ненэця’ Нюм’, мэбета Нум’ маханяӈы ӈуда’ хэвхана Ӈамдёдаханда манэтара”, нув’ тирхана ӈэдалё Товамда манэтара”».

⁶³ Ӈарка ханондана мэта имбытадода харта ниданда ӈадпахая, ма” нив’: «Теда’ нянана” ӈамгэхэ”на яӈга сырта” тара”?

⁶⁴ Пыдара” харта” Нум’ ет’ ӈэда вэнзу вади намдадаць. Пыдара” теда’ ханзер” таслаӈгура”?» Ненэця” мал’ ӈокхандо’ Сита хадавандо’ пирувна вэваӈэ тасладо’.

⁶⁵ Ханяӈыдо’ Нянда сабцяра”. Сята талахая тырепидо’, тарем’ лахана”: «Тадхава хибя’ сит ладвам’ ход». Тикы’ пуд манзарана” ладорӈадо’.

⁶⁶

Та’ ёльцьӈгана Петркав ӈыл’ няна – харад’ хэвхана мэвы. Ӈарка ханондана’ ӈопой манзарана недо’ то.

⁶⁷ Пыда ту’ хэвхана мэна Петрм’ манэ”манда сер’ сита хамби”ле ма: «Пыдар ӈо” Назарет’ тер Иисус’ ня’ ӈобкана ниди’ мэсету”?»

⁶⁸ Петркав таяла ма” нив’: «Мань ӈамгэхэртахад ехэрадм’, ӈамгэм’ ваде”махартамд нидм’ хамэдамбю”». Вадита пуд маряд’ мюд тарпы”. [Тикаринда харад’ хоркы тёрей”.]

⁶⁹ Манзарана не таняна ӈани’ сита манэць, хэвхананда мэна ненэцяӈг” ма” нив’: «Тайкуй ти, ӈопойдо’».

⁷⁰ Петр ӈани’ таялы”. Ӈаво” пирка”на тикана нуна” Петарт’ ӈани’ вахалъяд”: «Пыдар Галилея’ я’ тернанё”. Ненэся пыдар ӈобто’ нинав’ ӈа”».

⁷¹ Пыда харта пыхыдамда мэтыбахая, няндо’ валыторць ма: «Пыдара” вадета ненэцямда” мань ехэрав».

⁷² Тикарихина харад’ хоркы нябимдей’ тёрей”. Петр Иисус’ неры хэтвы вади тензибте: «Харад’ хоркы сидя’ тёрева’ нерня, пыдар няхар’ Нядни таялтын». Тикы’ пуд сёнзянда тахара, ярума.

15

¹

Ӈули” хубтахана, ӈарка ханондана”, ненэцие” ӈаркти” ня’, Моисей’ Ватом’ теневани” ня’, ӈани серо тасламбади” ня’, ӈобт’ ма”лё тасалкурӈа”. Иисусм’ ӈудида маноӈгая ханадо’, тадтикахад Пилатан’ ми”ӈадо’.

² Пилат Сита хонра: «Пыдар иудей” параӈодан?» Иисус ма: «Пыдар тарем’ ман».

³ Ӈарка ханондана” Иисус’ ет ӈока вэва серо ӈадимдемби”,

⁴ ӈадьбята Пилат ӈани’ яӈор’ хонрада: «Ӈамгэ нин лахан”? Пыдар ет’ ненэця” ӈока вэва серо ӈадимдемби”нё”».

⁵ Тикы вадаха” Иисус мунзи. Пилат тикан’ пысэй”.

⁶

Хусувэй хэбидя яля’ ёльцьӈгана Пилат ненэцие” выкха”на ӈоб” сярдам’ ӈэдасеты.

⁷ Та’ мальӈгана саюдани” мандалм’ ненэцие хадавандо’ нид сярвы”, поӈганандо’ Вараввам’ нюбета ненэць’ танявы.

⁸ Ненэця” Пилатан’ то”махадандо’, пыда ӈахат ӈадимдевы серта сер’ ӈоб” ненэцям’ ӈэдаванзь выкта пэяд”.

⁹ Пилат няндо’ ма: «Иудей” параӈодам’ ӈэдараӈгув? Тарем’ харвада”?»

¹⁰ Ӈарка ханондани” ӈамгэ’ нид Иисусм’ нянда ми”мам’ Пилат хамэдамбида. Пыдо’ Иисусан’ тидорӈаць.

¹¹ Ӈадьбято’ ӈарка ханондана” Иисусм’ ӈэдава’ екававна, Вараввам’ ӈэдаванзь ненэцие манзабтавы”.

¹² Пилат ӈани’ няндо’ ма” нив’: «Иудей” параӈодаӈэ вадетамда” ханзер” мэӈгув?»

¹³ Пыдо’ ӈани’ тарем’ тюры”ӈа”: «Лярць’ пян’ тебарт!»

¹⁴ Пилат ӈани’ хонрэйда: «Ӈамгэ вэвам’ сертаса?» Ненэцяӈгав” тамна ӈанито’ нимня тюры”ӈа”: «Лярць’ пян’ тебарт!»

¹⁵ Тиканда Пилат ненэцие нялыба Вараввам’ ӈэдада. Иисусхавм’ садаванзь, тадтикахада лярць’ пян’ тебарманзь ми”ӈада.

¹⁶

Пилат’ саю” Иисусм’ маряд’ мюня ӈэда мэсь’ яхандо’ ханадо’, таня’ сямян саю ӈокхандо’ ма”лэйдо’.

¹⁷ Тадтикахад Сита письӈэ мэць пя”. Нинда нярморте”э ембдярм’ серибте”, Ӈэванда ни’ ӈэтторта пя’ таркахад сюртявӈэ паӈгалмым’ серибте”.

¹⁸ Тарць” ямбха”на тарем’ тюры”ӈа”: «Иудей” параӈода, ӈари” тяха’ мэд!»

¹⁹ Тад пуна ямб ӈумгана ӈэвамда ладорпидо’, сабцярпидо’, пулыто’ ни’ нулкая, Нянда нибкалӈга”.

²⁰ Писядадета ӈэвадала”махадандо’ Ниданда нярморте”э ембдярта екадо’, Нинда харта паныда серибте”. Тадтикахад Сита лярць’ пян’ тебарманзь хана”.

²¹

Та’ мальӈгана Кирене’ я’ тер Симонм’ нюбета ненэць’ ӈысыхыд тикавна миӈась. Пыда Александрха’ Руфха’ нися ӈэвы. Саю” сита ня”ма ныхыри’ лярць’ пям’ мине табэда”.

²² Иисусм’ Голгофам’ нюбета ян’ тэврадо’. Тикы я’ нюм’, хамэдита ӈэвэйця’ лы’ я.

²³ Нянда ё”йда смирнахана тахаравы няръяна сяркам’ мипа пя”. Пыда нида ӈэр”.

²⁴ Сита лярць’ пян’ тебро”махадандо’ серебяхана матокая, паныда помнандо’ тяръядо’.

²⁵ Сита ӈыдабато’, хубтыхы хасава ю” часась.

²⁶ Ӈэванда ниня, Сита вомдартамбада вада” пады”: «Иудей” параӈода».

²⁷ Иисус’ хэван’ сидя мартикм’ ӈыда”. Ӈопойюм’ маханяӈы Хэвханда тебарӈадо’, нябиюм’ – сятаняӈы Хэвханда.

²⁸ [Хэбидя Падаркана ӈэда вада тикавна ӈадимя: «Вэвако ненэцяӈэ таславы».]

²⁹ Тикавна ядна” ӈэвдо’ яро”лахая ма”: «Вэй, Вэй Пыдаер! Ей”я, няхар” яляхана Хэбидя Харадм’ тахабтавандараси”, няхар” яляхана сертавндараси”.

³⁰ Харт пыхыдар ӈэда”, лярць’ пяхад санад”!»

³¹ Ӈарка ханондана”, Моисей’ Ватом’ теневани няць, Сита ӈани’ писяда, помнандо’ тарем’ лахана”: «Ӈани ненэцие ӈэдавыдаси”, Харта пыхыдамда ӈэда ни пирас”.

³² Израиль’ Параӈода – Христос, сэв”на” сыраць, лярць’ пяхад ха”мымд”. Маня” тикахана Нянда пунраӈгуна”». Хэвхананда ӈыдёдаха’ Нянда ӈани’ вэнзумдаӈаха’.

³³

Яля’ еркана, я’ тиӈгэвна пэвсюмя, тарем’ няхар” час’ ӈэсонд’ тидась.

³⁴ Няхар” часхана Иисус ӈарка”явана тюрыць пэй”: «Элой, Элой, лема савахфани?» Тикы вади” хамэдито’ тарця: «Нум’ Нисями, Нум’ Нисями, ӈамгэ’ е”эмня Си”ми хаен?»

³⁵ Таняна нувы ханяӈы” ненэця” тарця вади намд”махадандо’ тарем’ лахана”: «Ти, Илиям’ хаӈа».

³⁶ Ӈоб” ненэць’ Иисусан’ сюрмба товы, тэцям’ уксусхана ябтарада, пя’ малан’ ӈыдахая, Иисусм’ идилабтамба, тарем’ лахана: «Ӈатенахарӈада”, сыркарцява”, Илия Сита лярць’ пяхад ха”авраванзь тутнакы?»

³⁷ Тикы’ пуд Иисус сёнда ӈардан’ тёре”махаданда Индата сэя.

³⁸ Хэбидя Харад’ синяӈы тохоця тю”уд сидя ян’ пананда ӈэсонд’ ӈадара.

³⁹ Иисус’ ӈари” иркана нувы юр” саю’ ерв ханзер” Иисус’ пудана индата ӈэдаравам’ манэць, тарем’ ма: «Ненэся ӈо” тюку ненэць’ Нум’ Ню ӈэвы».

⁴⁰ Ненэцие” поӈгана ӈахакуд сырта мале сян не танявы”. Поӈганандо’ мэни” ханяӈыто’ нюбедо’ ти: Магдала’ тер Мария, нюдя Иаковаха’, Иосииха’ небя – Мария, Саломия.

⁴¹ Иисус’ Галилея’ яхана мэванда мальӈгана пыдо’ Нянанда мэсеты”, Сита манзаяцеты”. Тикы” хавна Нянанда Иерусалиман’ товы не” ӈокаць.

⁴²

Нумда мале пэвсюмя. Еврей” ныланава яля’ нерцюна хамекова’ яля ӈэвы.

⁴³ Аримафея’ тер Иосиф сейда нись пин”, Пилатан’ то, Иисус’ хальмерм’ хаӈа. Пыда юнда ядэрта, серо тасламбади” мандалкат перена ӈэвы. Пыда ӈо” Нум’ Параӈода’ Я’ ӈадимдевам’ ӈатена ӈэвы.

⁴⁴ Пилат Иисус’ мале яӈгуво”мам’ намда пысэй”. Юр” саюта ервм’ нянда хаӈада, тарем’ хонрада: «Иисус ӈаха”на яӈгумэкы?»

⁴⁵ Саюта ерв’ вади намд”махаданда Пилат Иосифан’ Иисус’ хальмерм’ ми”манзь таслада.

⁴⁶ Иосиф нянзяда тохоцям’ тэмда”махаданда, Иисус’ пыхыдм’ лярць’ пяхад ха”аврахая, тохоцяхана маноӈада. Тадтикахад пэ хой’ хоркадё’ пэмбад’ мю’ мэда. Сюдбяко манябэм’ мантыламбахая нёнда сим’ саркабтада.

⁴⁷ Та’ мальӈгана Магдала’ тер Мария, нябиюм’ Иосии’ небя – Мария, Иисус’ сюрван’ сававна сырмэхэ’.

16

¹

Еврей” ныланава яля’ хэ”мяхад, Иисус’ ӈаям’ масарма’ е”эмня Магдала’ тер Мария, Иаков’ небя – Мария, тадтикахад Саломия ё”йда юре тэмдавы”.

² Еврей” ныланава яля’ пуд, нябимдей яляхана, ӈули” хубтакохона ялянда ӈадимзь, пыдо’ пэ хоркадё’ пэмбад’ ӈэсь’ ян’ хая”.

³ Помнандо’ тарем’ лаханакурӈа”: «Теда’ хибя пэ хоркадё’ нё’ сихина ӈэда саркабта”ма пэм’ маня” е”эмняна” хэвня’ мэӈгуда?»

⁴ Саӈудо’ таня’ ха”мыд”, ӈамгэ ӈэса, сюдбяко пэ хэвня’ мэвы ӈэвы.

⁵ Пэ хоркадё’ мю’ мятю”махадандо’ пыдо’ тэри пысэйд”. Пэмбад’ маханяӈы хэвхана сэр” ембдярм’ мэта ӈацекы хасавам’ манэ”ӈа”.

⁶ Пыда няндо’ тарем’ ма: «Нёда” пысаӈг”. Лярць’ пян’ тебармы Назарет’ тер Иисусм’ пюрӈада”. Пыда илелъяць. Пыда тюкохона яӈгу. Юседа”ма’ яда тям’.

⁷ Хаяда”. Тадтикахад Петарт’, ӈани тохоламбавэхэта мада”, Пыда ваданда сер’ неранда” няна Галилея’ ян’ ханда, таняна Сита хоӈгуда”».

⁸ Пэ хоркадёход пин’ тарп”махадандо’, хадито’ малан’ ледедахая, сейто’ хэсь хэвня’ сюрбыд”. Сейто’ пинва’ нид хибяхартан’ ӈамгэхэртм’ ни” хэт”.

⁹

Иисус илело”махаданда, си”ив яля’ нерденя яляхана ӈули” хубтакохона, нюрте”э’ Магдала’ тер Мариян’ ӈадимя. Ӈаха”на Иисус тикы нехэд си”ив ӈылекам’ питарӈась.

¹⁰ Мария сейто’ тахаравы яртаха” – Иисусм’ хахаялтембавэхэ” хая, манэ”мэмда няндо’ ваде”ӈада.

¹¹ Иисус’ яӈор’ илело”мам’ манэ”мэӈэ няндо’ ваде”пата, пыдо’ нянда ни пунрю”.

¹²

Тикы’ пуд ӈысын’ миндяха’ – сидя тохоламбавэхэюта ня’ ӈани несэй мирбям’ мэць Иисус ӈадимя.

¹³ Ӈани Иисус’ тохоламбавэхэ” пыди’ салъяха’, манэ”мэмди’ няндо’ ваде”ӈади’, пыдо’ нянди’ ӈобтарем’ нид” пунра”.

¹⁴

Тадхава ӈани’ юкад вата ӈопой тохоламбавэта ӈорма’ ёльцьӈгана Иисус тикавна ӈадимя. Пыдо’ Иисус’ илело”мам’ ваде”мы ненэцие” вадаха” ниць пунрю”. Ӈадьбята Пыда нива пунрёвандо’ нид, сейто’ хонёва’ нид сиддо’ тэдорпи.

¹⁵ Иисус няндо’ ма: «Я’ тиӈгэвна хаяда”, Маймбабцо Юнм’ хусувэй ненэцянд’ тэврара”.

¹⁶ Хибя Иисусан’ пунрё хэхэдаӈгода, тикы ӈэдавы ӈэӈгу. Хибя ни” пунраӈгу”, тикы танаравы ӈэӈгу.

¹⁷ Пунрёда ненэцяӈга”на ненадудо’ тарця” ӈэӈгу”: Мань Нюмми няд”мяць пыдо’ ӈылекы питарпаӈгу”, ерменя едэй вадавна лаханакурта”.

¹⁸ Ӈабтацавэй ӈарка халы ня”амбато’, нибтя ӈабтацавэй иде ӈэрпабато’, ӈамгэхэртадо’ ни хадкэӈгу”. Ӈудидо’ хаӈгурти” ни’ мэбто’, хаӈгурта” савумда”».

¹⁹

Тикы Вадида мэсо”махаданда, Иисус нув’ няю’ пее”ра, тадтикахад Нум’ маханяӈы ӈуда’ хэван’ ӈамды”.

²⁰ Тадтикахад тохоламбадида я’ тиӈгэвна хая”, Нум’ Вади минревы”. Сёнзяндо’ мюня Нум’ Ерв манзара, пыдо’ вадидо’ ненадохо”на мэйрамбавыда. Аминь.