1

¹ Sîrîrî wanî penaronkon Jesus Cristo rawîronkon pîꞌ teeseurîmasen pe. Jesus Cristo wanî Abraão nurîꞌtî paꞌrî pe moropai Davi nurîꞌtî paꞌrî pe ekaremeꞌnen pe awanî.

"

² Pena Abraão wanîꞌpî.

Mîîkîrî wanîꞌpî Isaque yun pe.
Moropai Isaque wanîꞌpî Jacó yun pe.
Moropai Jacó wanîꞌpî Judá yun pe moropai itonpayamîꞌ yun pe.
"

³

Moropai Judá wanîꞌpî monoiꞌ pe esenpoꞌsan yun pe, toꞌ eseꞌ wanîꞌpî Perez moropai Zerá. Inkamoro yankon wanîꞌpî iteseꞌ Tamar.
Moropai Perez wanîꞌpî Esrom yun pe.
Moropai Esrom wanîꞌpî Arão yun pe.
"

⁴

Moropai Arão wanîꞌpî Aminadabe yun pe.
Moropai Aminadabe wanîꞌpî Naassom yun pe.
Moropai Naassom wanîꞌpî Salmom yun pe.
"

⁵

Moropai Salmom wanîꞌpî Boaz yun pe. Mîîkîrî yan wanîꞌpî Raabe.
Moropai Boaz wanîꞌpî Obede yun pe. Mîîkîrî yan wanîꞌpî iteseꞌ Rute.
Moropai Obede wanîꞌpî Jessé yun pe.
"

⁶

Moropai Jessé wanîꞌpî Davi yun pe, pata esaꞌ pe tîweꞌsen.
Moropai Davi wanîꞌpî Salomão yun pe. Mîîkîrî yan wanîꞌpî Urias noꞌpî rîꞌpî pe.
"

⁷

Moropai Salomão wanîꞌpî Roboão yun pe.
Moropai Roboão wanîꞌpî Abias yun pe.
Moropai Abias wanîꞌpî Asa yun pe.
"

⁸

Moropai Asa wanîꞌpî Josafá yun pe.
Moropai Josafá wanîꞌpî Jorão yun pe.
Moropai Jorão wanîꞌpî Uzias yun pe.
"

⁹

Moropai Uzia wanîꞌpî Jotão yun pe.
Moropai Jotão wanîꞌpî Acaz yun pe.
Moropai Acaz wanîꞌpî Ezequias yun pe.
"

¹⁰

Moropai Ezequias wanîꞌpî Manassés yun pe.
Moropai Manassés wanîꞌpî Amom yun pe.
Moropai Amom wanîꞌpî Josias yun pe.
"

¹¹

Moropai Josias wanîꞌpî Jeconias yun pe moropai itonpayamîꞌ yun pe. Mîrîrî yai Babilônia pata pona Israelponkon yaapîtîꞌpî Babilônia ponkonya tîpoitîrîkon pe toꞌ eꞌtoꞌpe itarumaiꞌpî pe.
"

¹²

Babilônia pona toꞌ yarîꞌpî toꞌya tanne Jeconias wanîꞌpî. Mîîkîrî Jeconias wanîꞌpî Salatiel yun pe.
Moropai Salatiel wanîꞌpî Zorobabel yun pe.
"

¹³

Moropai Zorobabel wanîꞌpî Abiúde yun pe.
Moropai Abiúde wanîꞌpî Eliaquim yun pe.
Moropai Eliaquim wanîꞌpî Azor yun pe.
"

¹⁴

Moropai Azor wanîꞌpî Sadoque yun pe.
Moropai Sadoque wanîꞌpî Aquim yun pe.
Moropai Aquim wanîꞌpî Eliúde yun pe.
"

¹⁵

Moropai Eliúde wanîꞌpî Eleazar yun pe.
Moropai Eleazar wanîꞌpî Matã yun pe.
Moropai Matã wanîꞌpî Jacó yun pe.
"

¹⁶

Moropai Jacó wanîꞌpî José yun pe. Mîîkîrî José wanîꞌpî Jesus Cristo yan Maria niyo pe. Mîîkîrî Jesus wanî Paapa nîmenkaꞌpî pe, Cristo pe tesaꞌsen pe.

"

¹⁷ Sîrîrî warantî Abraão nurîꞌtî payanîꞌsan wanîꞌpî. Inkamoro wanîꞌpî asakîrîrî puꞌ pona tîîmoꞌtai (14) kaisarî. Moropai Davi nurîꞌtî payanîꞌsan wanîꞌpî Babilônia pata pona Israelyamîꞌ yarî toꞌya pîkîrî toꞌ wanîꞌpî asakîrîrî puꞌ pona tîîmoꞌtai (14) kaisarî nîrî. Moropai mîrîrî tîpo Cristo esenpotoꞌ weiyu pîkîrî asakîrîrî puꞌ pona tîîmoꞌtai (14) kaisarî nîrî toꞌ wanîꞌpî.

"

¹⁸ Jesus Cristo esenpotoꞌ wanîꞌpî sîrîrî warantî. Maria tîîse maasa tîniyotapa tînyo ton José yarakkîrî. Tîîse irawîrî more yan pe eenasaꞌ wanîꞌpî Morî Yekaton Wannî winîpai."

¹⁹ Mîîkîrî José yarakkîrî Maria eꞌtoꞌ warayoꞌ wanîꞌpî Paapa maimu yawîrî tîîkoꞌmansen pe. Mîrîrî yeꞌnen yarakkîrî tîwanî namai José esenumenkaꞌpî teesepantoꞌkon yaretîꞌka pîꞌ, tîîse anîꞌya epuꞌtî pra yuꞌse awanîꞌpî. Maasa pra tewasirî Maria winîkîi imakuiꞌpî pe anîꞌ eseurîma namai."

²⁰ Mîrîrî pîꞌ José esenumenka koꞌmannîpî tanne Uyepotorîkon narimaꞌpî inserî esenpoꞌpî José pia iweꞌneꞌ. Moropai taꞌpîiya ipîꞌ: —José, Davi nurîꞌtî paarîꞌpî, eranneꞌ pe pra eꞌkî. Anoꞌpî pe Maria yapiꞌkî. Maasa pra mîîkîrî more yan pe Maria wanî manniꞌ, mîîkîrî man Morî Yekaton Wannî winîpainon pe."

²¹ Moropai mîîkîrîya more warayoꞌ yenpo pe man. Moropai mîîkîrî eseꞌtîya pe nai Jesus pe iteseꞌ. Maasa pra mîîkîrîya tîpemonkonoyamîꞌ pîikaꞌtî pe man, toꞌ nîkupîꞌpî imakuiꞌpî winîpai —taꞌpîiya ipîꞌ.

"

²² Tamîꞌnawîrî mîrîrî eꞌkupîꞌpî maasa pra aweꞌkupî kupî sîrîrî taꞌpî Uyepotorîkonya tîmaimu ekaremeꞌnen profeta nurîꞌtî pîꞌ."

²³ Taꞌpîiya see warantî:

Aurînoꞌpî, warayoꞌ yarakkîrî siꞌpî pepîn ena pe man more yan pe.
Moropai tînre ton yenpoiya warayoꞌ pe.
Mîîkîrî eseꞌtî toꞌya pe man Emanuel kaiꞌma
taꞌpîiya. Uurîꞌnîkon yarakkîrî Paapa wanî taatoꞌ mîrîrî Emanuel.

"

²⁴ Moropai José pakaꞌpî tîwetun yeꞌka pe. Moropai îꞌ kaiꞌma taꞌpî Uyepotorîkon narimaꞌpî inserîya yawîrî ikupîꞌpîiya. Moropai Maria yarîꞌpîiya tewîꞌ ta tînoꞌpî pe."

²⁵ Tîîse yarakkîrî awanî pra José wanîꞌpî. Tînre yenpoiya tîpose aakoꞌmamîꞌpî yarakkîrî tîweꞌse pra. Moropai Joséya mîîkîrî inre eseꞌtîꞌpî Jesus kaiꞌma.

"

2

¹ Jesus esenpoꞌpî Judéia pata po tîweꞌsen cidade iteseꞌ Belém po. Mîrîrî yai Judéia pata ponkon koꞌmannîꞌnen pe Herodes wanîꞌpî. Miarî ya warayoꞌkon epuꞌnenan pe tîweꞌsanon wîtîꞌpî kaiwanoꞌ eraꞌma tîuyaꞌnîkon wenairî wei epaꞌkapîꞌtoꞌ winîpai Jerusalém pona."

² Moropai miarî teerepansaꞌkon pe ekaranmapoꞌpî toꞌya: —Oꞌnon pata Judeuyamîꞌ yepotorî pe esenpoꞌpî more nai? —taꞌpî toꞌya. —Anna yiꞌnî pîꞌ man yapurîi maasa pra kaiwanoꞌ, manniꞌ Uyepotorîkon esenpo ekaremeꞌnen eraꞌma pîꞌ anna man wei epaꞌkapîꞌtoꞌ winîkîi —taꞌpî toꞌya.

"

³ Mîrîrî taa toꞌya eta tîuya yeꞌnen, pata esaꞌ Herodes atasiꞌsirunpaꞌpî. Moropai tamîꞌnawîronkon pemonkonyamîꞌ Jerusalém ponkon esiꞌnîpîꞌpî mîrîrî pîꞌ."

⁴ Taatasiꞌsirunpai tîwanî yeꞌnen, mîîkîrîya teepîremasanon esanon muurukuntîꞌpî. Moropai Moisés nurîꞌtîya yenupantoꞌ pîꞌ yenupatonkon eperepîꞌpî. Moropai inkamoro ekaranmapoꞌpîiya oꞌnon pata mîîkîrî Cristo, Paapa nîmenkaꞌpî esenpo eꞌpainon kaiꞌma."

⁵ Mîîkîrî maimu yuukuꞌpî toꞌya: —Judéia pata po tîweꞌsen Belém po. Maasa pra mîrîrî warantî Paapa maimu ekaremeꞌnen profeta nurîꞌtîya imenukasaꞌ man —taꞌpî toꞌya.

"

⁶ —See warantî aweꞌmenukasaꞌ man:

“ ‘Judéia pata po tîweꞌsen, Belém wanî siꞌmîrikkî pe.
Mîîwîni tîîse ipîkku pe puꞌkuru awanî tiaronkon cidade yentai.
Maasa pra mîrîrî Belém cidade winîpai ipîkku pe tîweꞌsen esenpo pe man pemonkonyamîꞌ esaꞌ ton.
Mîîkîrî wanî pe man upemonkonoyamîꞌ Judeuyamîꞌ yeꞌmaiꞌnorî pe’ taꞌpî Paapaya”
taꞌpî profeta nurîꞌtîya.

"

⁷ Mîrîrî eta tîuya tîpo, pata esaꞌ Herodesya aminke pai iipîꞌsan yannoꞌpî tîîpia, tamîꞌnawîronkonya epuꞌtî pra tîîse. Moropai toꞌ ekaranmapoꞌpîiya: —Îꞌ pensa puꞌkuru see mîrîrî kaiwanoꞌ esenposaꞌ eraꞌmaꞌpîyaꞌnîkon? —taꞌpîiya."

⁸ Moropai toꞌ yaipontîꞌpîiya toꞌ wîtîtoꞌpe Belém pona. Taꞌpîiya toꞌ pîꞌ: —Atîtî moropai mîîkîrî more mîwatîi morî pe epuꞌtîkonpa. Moropai mîîkîrî more esenposaꞌ eposaꞌyaꞌnîkon ya, upîꞌ ekaremeꞌse maaiꞌtîi, uurî nîrî uttîtoꞌpe yapurîi —taꞌpîiya toꞌ pîꞌ.

"

⁹ Mîrîrî taasaꞌ pata esaꞌya tîpo inkamoro epuꞌnenan wîtîꞌpî. Eꞌma taawîrî tuutîkon yeꞌka pe, inkamoroya wei epaꞌka winî tîneraꞌmaꞌpîkon kaiwanoꞌ eraꞌmaꞌpî. Mîrîrî kaiwanoꞌ wîtîꞌpî toꞌ rawîrî, moropai eemîꞌpamîꞌpî wîttî, ita mîîkîrî more eꞌtoꞌ yepoi."

¹⁰ Inkamoro wanîꞌpî mararî pra taatausinpai mîrîrî kureꞌnan kaiwanoꞌ eraꞌmasaꞌ tîuyaꞌnîkon yeꞌnen."

¹¹ Teerepansaꞌkon pe toꞌ ewomîꞌpî wîttî ta moropai mîîkîrî more eporîꞌpî toꞌya. Isan Maria pia awanîꞌpî. Toꞌ eꞌsekunkaꞌpî irawîrî moropai mîîkîrî yapurîꞌpî toꞌya. Mîrîrî tîpo iipia tîntîrîkon pe tînarîꞌpîkon yettapurîkaꞌpî toꞌya. Mîrîrîkon wanîꞌpî ouro pe moropai aꞌpusin pe moropai karaꞌ pe. Mîrîrîkon tîrîꞌpî toꞌya iipia.

"

¹² Moropai Paapaya taꞌpî inkamoro epuꞌnenan pîꞌ toꞌ weꞌneꞌpîꞌtoꞌ yaꞌ, toꞌ wetun tanne. Tîwennaꞌpokon pe pata esaꞌ Herodes poro toꞌ ennaꞌpo namai. Mîrîrî yeꞌnen inkamoro ennaꞌpoꞌpî tîpatakon yaꞌ tiaron eꞌma taawîrî.

"

¹³ Inkamoro epuꞌnenan, aminke pai iipîꞌsan ennaꞌpoꞌpî tanne Uyepotorîkon narimaꞌpî inserî esenpoꞌpî José pia, iwetun tanne iweꞌneꞌ. Moropai taꞌpîiya ipîꞌ: —Epekî more isan yarakkîrî epekî Egito pata pona. Miarî makoꞌmamîi, apîꞌ îꞌ tauya pîkîrî. Maasa pra Herodesya mîîkîrî more yuwa pe man iwîpa kaiꞌma —taꞌpî inserîya ipîꞌ.

"

¹⁴ Mîrîrî yeꞌnen José pakaꞌpî moropai more isan yarakkîrî eepeꞌpî ewaron yaꞌ Egito pata pona."

¹⁵ Moropai toꞌ koꞌmamîꞌpî miarî Herodes saꞌmanta tîpose. Mîrîrî eꞌkupîꞌpî pena aweꞌkupî kupî sîrîrî taꞌpî Uyepotorîkonya yawîrî, tîmaimu ekaremeꞌnen profeta nurîꞌtî pîꞌ.

Uurîya unmu yannoꞌpî Egito pata poi eepaꞌkatoꞌpe
taꞌpî profeta nurîꞌtîya.

"

¹⁶ Inkamoro epuꞌnenan aminke pai iipîꞌsan warayoꞌkonya tenkuꞌtîsaꞌ epuꞌtî tîuya yeꞌnen pata esaꞌ Herodes ekoreꞌmaꞌpî mararî pra. Mîrîrî yeꞌnen tamîꞌnawîronkon moreyamîꞌ warayoꞌkon tîꞌka meꞌpoꞌpîiya asakîꞌne konoꞌ maꞌrankon Belém po. Moropai iwoi tîîkoꞌmansenon. Inkamoro moreyamîꞌ asakîꞌne konoꞌ maꞌrankon tîꞌka meꞌpoꞌpîiya maasa pra inkamoro warayoꞌkon aminke pai iipîꞌsanya, îꞌ pensa kaiwanoꞌ eraꞌmaꞌpî tîuyaꞌnîkon ekaremeꞌsaꞌ yeꞌnen."

¹⁷ Mîrîrî warantî aweꞌkupîꞌpî pena Paapa maimu ekaremeꞌnen profeta Jeremias nurîꞌtîya taꞌpî yawîrî.
"

¹⁸

Entaimepîꞌnîtoꞌ eseta pe man Ramá pata po.
Mîrîrî wanî karawannîtoꞌ.
Mîrîrî wanî Raquel nurîꞌtî payanîꞌsan karau tînmukuyamîꞌ saꞌmanta pîꞌ.
Mararî pra toꞌ karau pe man anîꞌya toꞌ tîꞌnapannîpî eserîke pra.
Maasa pra tamîꞌnawîronkon toꞌ munkîyamîꞌ eꞌtîꞌkaꞌpî yeꞌnen
taꞌpî Jeremiasya.

"

¹⁹ Pata esaꞌ Herodes saꞌmantasaꞌ tîpo Uyepotorîkon narimaꞌpî inserî esenpoꞌpî José pia iweꞌneꞌ Egito pata po."

²⁰ Moropai taꞌpîiya: —Apakakî, ennaꞌpokî. More isan yarakkîrî tarîpai ennaꞌpokî Israel pata pona. Maasa pra manniꞌkan more wîî yuꞌse siꞌsan saꞌmantaꞌpî man.

"

²¹ Mîrîrî yeꞌnen José pakaꞌpî. More moropai isan yarakkîrî toꞌ ennaꞌpoꞌpî Israel pata pona."

²² Tîîse itekare etaꞌpîiya Herodes munmurîꞌpî Arquelau wanî Judéia pata koꞌmannîꞌnen pe tîyun pataꞌpî yaꞌ. Mîrîrî yeꞌnen eranneꞌ pe awanîꞌpî, miarî ya ikoꞌmanse itîîpai pra. Moropai tîweꞌneꞌ inîꞌrî Paapa eseurîma etaꞌpîiya attî namai Judéia pata pona. Mîrîrî yeꞌnen José wîtîꞌpî Galiléia pata pona Judéia pata pona pra."

²³ Moropai mîîkîrî koꞌmamîꞌpî Galiléia pata pon cidade iteseꞌ Nazaré po. Mîrîrî warantî aweꞌkupîꞌpî maasa pra pena aweꞌkupî kupî sîrîrî taꞌpî Paapa maimu ekaremeꞌnenya. Mîîkîrî profeta nurîꞌtîya taꞌpî yawîrî aweꞌkupîꞌpî. See warantî taꞌpîiya:

Mîîkîrî esatî toꞌya pe man Nazaré pon kaiꞌma
taꞌpîiya.

"

3

¹ Mîrîrî yai Jesus arentasaꞌ tanne, João Batista nurîꞌtî erepamîꞌpî keren pona Judéia pata po. Miarî Paapa maimu ekaremeꞌpîtîꞌpî João Batistaya."

² Taꞌpîiya: —Paapa yeseru yapisî pîꞌ esenumenkatî imakuiꞌpî ayeserukon tîrumakai. Maasa pra aminke pra tamîꞌnawîronkon esaꞌ pe Paapa iiꞌtoꞌ weiyu eseponî pîꞌ man! Tîpemonkonoyamîꞌ pîikaꞌtîiya kupî sîrîrî —taꞌpîiya.

"

³ Mîîkîrî João pîꞌ pena Paapa maimu ekaremeꞌnen Isaías nurîꞌtî eseurîmaꞌpî. Moropai mîîkîrîya imenukaꞌpî see warantî:

Pemonkon entaimepîꞌnî pîꞌ man keren po.
Taiya: “Uyepotorîkon erepamî yeꞌmarî ton konekatî.
Eꞌma yarakkanmokatî toꞌsarî eerepantoꞌpe”, taiya
taꞌpî Isaíasya. Mîrîrî warantî Joãoya taꞌpî pemonkonyamîꞌ ekonekatoꞌpe Jesus Cristo erepamî rawîrî.

"

⁴ Mîîkîrî João pon wanîꞌpî camelo siꞌpotîꞌpî pe. Moropai iworomî wanîꞌpî paaka piꞌpî pe. Mîîkîrî João yaꞌreꞌ wanîꞌpî. Moropai itoꞌ wanîꞌpî kaira pe. Moropai wan wanîꞌpî iwuku pe."

⁵ Mîrîrî yai Jerusalém po tîîkoꞌmansenon moropai tamîꞌnawîronkon Judéia pata po tîîkoꞌmansenon, moropai iren Jordão rîꞌpîkîrî tîîkoꞌmansenon wîtîpîtîꞌpî João pia imaimu etai."

⁶ Inkamoroya imakuiꞌpî pe tîweꞌtoꞌkon ekaremekîꞌpî miarî. Moropai inkamoro yenpatakonaꞌpî Joãoya iren Jordão ka.

"

⁷ Mîrîrî yai Joãoya mararî pra fariseuyamîꞌ moropai saduceuyamîꞌ iipî eraꞌmaꞌpî tîîpia esenpatakonai. Inkamoro pîꞌ taꞌpî Joãoya: —Amîrîꞌnîkon wanî nariꞌ îkîiyamîꞌ yeꞌkatonkon warantî. Maasa pra imakuiꞌpî pe aweꞌtoꞌkon ayeserukon tîrumakai pra Paapa ekoreꞌmatoꞌ yapai eꞌpîikaꞌtîpai awanîkon. Tîîse mîrîrî warantî aweꞌpîikaꞌtîkon eserîke pra naatîi."

⁸ Mîrîrî yeꞌnen ayeserukon imakuiꞌpî pe aweꞌtoꞌkon rumakatî. Morî ayeserukon ton yapiꞌtî tamîꞌnawîronkonya ayeseru rîꞌpîkon rumakasaꞌyaꞌnîkon epuꞌtoꞌpe."

⁹ Moropai kîkatî Paapaya utarumaꞌtîkon pepîn ipemonkono pe anna wanî yeꞌnen, maasa pra Abraão payanyamîꞌ pe anna wanî kîkatî. Îꞌ pe pra rî mîrîrî taayaꞌnîkon manniꞌ wanî. Maasa pra Abraão payanîꞌsan pe Paapaya seeniꞌ tîꞌ, miakanma eꞌpainon ayentakon."

¹⁰ Aꞌkî, waꞌka moro man, yei yaꞌtîtoꞌ ton ikara kîꞌpî yapîꞌ. Manniꞌ yei morî pe teperu tîînen pepîn yaꞌtîtoꞌ ton tamîꞌnawîrî. Moropai mîrîrî yenumî toꞌya apoꞌ yaꞌ aarantoꞌpe.

"

¹¹ Tîîse uurîya amîrîꞌnîkon yenpatakona sîrîrî tuna ke neken, ayeserukon imakuiꞌpî kuꞌtoꞌyaꞌnîkon rumakasaꞌyaꞌnîkon ekaremeꞌnen pe. Tîîse uyeꞌmaꞌpî pîꞌ tiaron iipî. Mîîkîrî wanî uurî yentai meruntî ke. Ipîkku pe awanî yeꞌnen mîîkîrî pisaꞌsaꞌ yewa yeukauya eserîke pra awanî, uyentai awanî yeꞌnen. Mîîkîrîya amîrîꞌnîkon yenpatakona pe man ayesaꞌkon pe Morî Yekaton Wannî eꞌtoꞌpe moropai apoꞌ ke amîrîꞌnîkon yenpatakona pe man. ˻Mîrîrî warantî ikupîiya tamîꞌnawîrî imakuiꞌpî moꞌkapa kaiꞌma.˼"

¹² Maasa pra mîîkîrî yenyaꞌ trigo sururukatoꞌ wanî. Mîrîrî ke isururukaiya. Ipiꞌpî koreꞌtapai imenkaiya. Mîrîrî sururukasaꞌ tîuya yaraꞌtîiya itenseꞌ yaꞌ. Mîrîrî piꞌpîrîꞌpî yannukuiya moropai ipoꞌtîiya apoꞌ yaꞌ eesiꞌnîpî neporîton pepîn yaꞌ —taꞌpî Joãoya toꞌ pîꞌ.

"

¹³ Mîrîrî yai Jesus wîtîꞌpî Galiléia poi iren Jordão ka, João Batistaya tenpatakonatoꞌpe kaiꞌma."

¹⁴ Tîîse Joãoya teseru miakanmaꞌpî kaꞌneꞌ pe. Taꞌpîiya: —Uurî neken yenpatakonaya eꞌpai tîîse uyenpatakonakî taaya mîrîrî upîꞌ —taꞌpî Joãoya.

"

¹⁵ Tîîse Jesusya imaimu yuukuꞌpî: —Tîwîrî mîrîrî warantî ikupî eꞌpai awanî. Maasa pra mîrîrî warantî ikupîya yairî ituꞌse Paapa eꞌtoꞌ yawîrî awanî. Moropai —Îꞌ waniꞌ pra man —taꞌpî João Batistaya.

"

¹⁶ Mîrîrî pe rî tenpatakonasaiꞌya tîpo, tuna kapai Jesus eseuꞌka pe, kaꞌ esettapurukaꞌpî. Moropai Jesusya Paapa winîpainon Morî Yekaton Wannî autî eraꞌmaꞌpî tîpona wakuꞌka warantî. Moropai tîpona eereuta eraꞌmaꞌpîiya."

¹⁷ Moropai kaꞌ poi Paapa eseurîmatoꞌ etaꞌpîiya. Taꞌpî Paapaya: —Mîserî unmu, uwakîri puꞌkuru. Kureꞌne ipîꞌ uurî atausinpa —taꞌpî Paapaya.

"

4

¹ Mîrîrî tîpo Jesus yarîꞌpî Morî Yekaton Wannîya keren pona Makuiya yonpatoꞌpe kaiꞌma."

² Mîîkîrî koꞌmamîꞌpî miarî keren po. Asakîꞌne pemonkon wei (40) moropai asakîꞌne pemonkon ewaron kaisarî Jesus epîremapîtîꞌpî Paapa pîꞌ tekkari tonpai pra. Mîrîrî tîpo Jesus wanîꞌpî emiꞌne."

³ Mîrîrî tanne Makui, pemonkonyamîꞌ yekaꞌnunkanen, iipîꞌpî iipia. Moropai taꞌpîiya ipîꞌ: —Innape see Paapa Munmu pe awanî. Mîrîrî yeꞌnen seeniꞌ tîꞌ miakanmakî ayu pe —taꞌpîiya Jesus pîꞌ.

"

⁴ Jesusya mîîkîrî maimu yuukuꞌpî: —Paapa maimu eꞌmenukasaꞌ man see warantî:

“Tiyu pîꞌ neken pemonkon koꞌmamî pepîn.
Tîîse tamîꞌnawîrî îꞌ taasaꞌ Paapaya manniꞌ yawîrî aakoꞌmamî”,
taasaiꞌya man —taꞌpî Jesusya.

"

⁵ Mîrîrî tîpo Makuiya Jesus yarîꞌpî Jerusalém cidaderî pona. Moropai yanuꞌnîpîꞌpîiya kawînan panpîꞌ epîremantoꞌ yewîꞌ nekaꞌta pona."

⁶ Moropai taꞌpîiya Jesus pîꞌ: —Innape Paapa munmu pe awanî yeꞌnen, arapunkî tarîpai. Maasa pra Paapa maimuya taasaꞌ man:

“Paapaya inserîyamîꞌ yarima
amîrî pîikaꞌtîi toꞌ iiꞌtoꞌpe.
Inkamoroya ayapisî tenyakon ke
tîꞌ pona aꞌpu paꞌtîya namai”,
taasaiꞌya man —taꞌpî Makuiya.

"

⁷ Jesusya imaimu yuukuꞌpî: —Aꞌkî, Paapa maimu eꞌmenukasaꞌ man see warantî:

“Ayepotorî Paapa tonpai pra eꞌkî”,
taasaꞌ Paapa maimuya man —taꞌpî Jesusya.

"

⁸ Moropai inîꞌrî Makuiya Jesus yarîꞌpî kawînan wîꞌ pona. Miarî siꞌma tamîꞌnawîron patakon yenpoꞌpîiya, morî pe pata wanî moropai ipîkku pe awanî yenpoꞌpîiya Jesus pia."

⁹ Moropai taꞌpîiya Jesus pîꞌ: —Tamîꞌnawîrî sîrîrî tîrîuya eꞌpainon aapia amîrî pe ipîkku pe awanîpa, sîrîrî uyapurîi aweꞌsekunka ya —taꞌpî Makuiya.

"

¹⁰ Jesusya mîîkîrî maimu yuukuꞌpî. Taꞌpîiya Makui pîꞌ: —Uyeyaton, atarimakî uupiapai. Maasa pra Paapa maimu eꞌmenukasaꞌ man see warantî:

“Ayepotorî neken Paapa yapurîkî.
Mîîkîrî maimu yawîrî neken akoꞌmankî”,
taasaiꞌya man —taꞌpî Jesusya Makui pîꞌ.

"

¹¹ Mîrîrî tîpo Makuiya Jesus rumakaꞌpî. Moropai inserîyamîꞌ iipîꞌpî Jesus pia. Inkamoroya ipîikaꞌtîꞌpî.

"

¹² João Batista yarakkansaꞌ toꞌya yekare etasaꞌ tîuya pe, Jesus wîtîꞌpî Galiléia pata pona."

¹³ Nazaré po aakoꞌmamî pra awanîꞌpî. Tîîse Cafarnaum cidaderî pona ikoꞌmanse attîꞌpî. Mîrîrî wanîꞌpî Galiléia kuꞌpî ena po tîweꞌsen pe. Zebulom pata po tîweꞌsen pe, moropai Naftali pata pon pe nîrî awanîꞌpî."

¹⁴ Mîrîrî poro attîꞌpî maasa pra pena attî pe man taꞌpî Paapa maimu ekaremeꞌnen profeta Isaías nurîꞌtîya yawîrî.
"

¹⁵

Miarî Zebulom pata pona
moropai Naftali pata pona
moropai ikuꞌpî rîꞌpîkîrî pata pona
moropai iren Jordão ratai pata,
manniꞌ pata Judeuyamîꞌ pepîn pataꞌseꞌ pona aꞌka erepamî kupî sîrîrî.
Mîrîrî patakon wanî Galiléia pe iteseꞌ.
"

¹⁶

Miarî pemonkonyamîꞌ koꞌmamî ewaron ta.
Tîîse inkamoroya kureꞌnan aꞌka eraꞌma kupî sîrîrî.
Eranneꞌ pe inkamoro koꞌmamî tîîsaꞌmantatoꞌkon pîꞌ,
tîîse kureꞌnan aꞌka erepamî kupî sîrîrî toꞌ pia
taꞌpî Paapa maimu ekaremeꞌnen Isaías nurîꞌtîya.

"

¹⁷ Mîrîrî pata pai Jesusya Paapa maimu ekaremekî piaꞌtîꞌpî. Taapîtîꞌpîiya see warantî toꞌ pîꞌ: —Paapa yeseru yapisî pîꞌ esenumenkatî, imakuiꞌpî ankupîꞌpîkon tîrumakai sîrîrî pata pai. Maasa pra aminke pra tamîꞌnawîronkon esaꞌ pe Paapa iiꞌtoꞌ eseponî pîꞌ man. Tîpemonkonoyamîꞌ pîikaꞌtîiya kupî sîrîrî —taꞌpî Jesusya pemonkonyamîꞌ pîꞌ.

"

¹⁸ Mîrîrî yai Galiléia kuꞌpî rîꞌpîkîrî tuutî yeꞌka pe, asakîꞌnankon takon yarakkîronkon moroꞌyamîꞌ yapiꞌnenan eraꞌmaꞌpî Jesusya. Tarrafa ke inkamoro wanîꞌpî Simão, tiaron iteseꞌ Pedro. Moropai itakon André wanîꞌpî. Moroꞌyamîꞌ yapisî pîꞌ toꞌ wanîꞌpî mîrîrî ikuꞌpî ka."

¹⁹ Jesusya taꞌpî toꞌ pîꞌ: —Aaseꞌnîkon upîkîrî ayenupatoꞌpeuyaꞌnîkon. Îꞌ kaiꞌma upemonkono pe pemonkonyamîꞌ kupîkonpa. Moroꞌyamîꞌ yapisîyaꞌnîkon manniꞌ warantî toꞌ maakonpa —taꞌpîiya.

"

²⁰ Inkamoroya kaꞌneꞌ pe teesemiꞌtapai moroꞌyamîꞌ yapiꞌtoꞌ tîuyaꞌnîkon rumakaꞌpî moropai toꞌ wîtîꞌpî Jesus pîkîrî.

"

²¹ Inîꞌrî miarî ya panpîꞌ tuutîi, tiaronkon takon yarakkîronkon nîrî eraꞌmaꞌpî Jesusya. Inkamoro wanîꞌpî Zebedeu munkîyamîꞌ pe. Tiago moropai itakon João, inkamoro wanîꞌpî tîyunkon pokonpe kanau yaꞌ. Tîtarrafarikon rumentannîꞌpîtî pîꞌ toꞌ tîîse Jesusya toꞌ yannoꞌpî."

²² Moropai inkamoroya tîyunkon nîmîꞌpî moropai tîkanaukon nîmîꞌpî toꞌya. Moropai toꞌ wîtîꞌpî Jesus pîkîrî.

"

²³ Mîrîrî yai Jesus asarîꞌpî tamîꞌnawîrî Galiléia pata poro toꞌ epereꞌtoꞌkon yewîꞌ tapîꞌ. Toꞌ yenupa pinunpaꞌpîiya morî itekare pîꞌ. Tamîꞌnawîronkon esaꞌ pe Paapa iipî kupî ekaremeꞌpîtîꞌpîiya. Moropai priꞌyawonkon pepîn yepiꞌtî pinunpaꞌpîiya tamîꞌnawîron toꞌ yeparankon yapai."

²⁴ Mîrîrî warantî ikupî Jesusya yekare esetaꞌpî tamîꞌnawîrî Síria pata poro. Mîrîrî yeꞌnen pemonkonyamîꞌya tonpakon priꞌya pra tîweꞌsanon enepîꞌpî toꞌya. Tîmoronkon epuꞌnenan tamîꞌnawîron pîꞌ oꞌmaꞌkon yarakkîrî tîweꞌsanon moropai asakoiꞌkon pepîn ekeꞌnepamîꞌsan enepîꞌpî toꞌya toꞌ yepiꞌtîtoꞌpe Jesusya kaiꞌma. Moropai inkamoro yepiꞌtîꞌpîiya tamîꞌnawîrî."

²⁵ Arinîkon pemonkonyamîꞌ wîtîpîtîꞌpî Jesus pîkîrî Galiléia pata ponkon Decápolis pata ponkon Jerusalém pata ponkon Judéia pata ponkon moropai iren Jordão ratai ponkon wîtîpîtîꞌpî Jesus pia.

"

5

¹ Arinîkon pemonkonyamîꞌ eraꞌma tîuya pe Jesus enukuꞌpî wîꞌ pona. Moropai eereutaꞌpî. Eereutasaꞌ tanne inenupaꞌsan ipemonkonoyamîꞌ iipîꞌpî iipia aminke pra."

² Moropai inkamoro yenupa piaꞌtîꞌpîiya. Taꞌpîiya toꞌ pîꞌ:
"

³

—Morî pe puꞌkuru mannankan îꞌ ton pra tîweꞌsanon wanî. Mannankan Paapa pia tîntîrîkon ton pra awanî epuꞌnenan.
Morî pe toꞌ wanî maasa pra inkamoro esaꞌ pe Paapa wanî moropai ipemonkono pe toꞌ koꞌmamî.
"

⁴

Morî pe puꞌkuru mannankan tîkaruwasenon wanî.
Imakuiꞌpî pîꞌ toꞌ karau tanne, Paapaya toꞌ pîikaꞌtî taatausinpai toꞌ eꞌtoꞌpe.
"

⁵

Morî pe puꞌkuru mannankan moo tîweꞌsanon, tiwinarî teekoreꞌmasanon pepîn wanî.
Morî pe toꞌ wanî maasa pra sîrîrî pata tîrî Paapaya toꞌ pataꞌseꞌ ton.
"

⁶

Morî pe puꞌkuru mannankan wanî kureꞌne Paapa yeseru ankuꞌpai tîweꞌsanon.

Inkamoro wanî mannankan emiꞌne tîweꞌsanon moropai tuna aninnîpai tîweꞌsanon warantî.
Maasa pra kureꞌne yairî eꞌpai toꞌ wanî yeꞌnen.

Morî pe toꞌ wanî maasa pra inkamoro pia Paapaya teseru kuꞌtoꞌpe toꞌya itîrî toꞌ pia.
"

⁷

Morî pe puꞌkuru mannankan pemonkonyamîꞌ saꞌnamanenan wanî,
maasa pra toꞌ saꞌnama Paapaya.
"

⁸

Morî pe puꞌkuru mannankan imakuiꞌpî ton pra tîweꞌsanon wanî,
maasa pra inkamoroya Paapa eraꞌma.
"

⁹

Morî pe puꞌkuru mannankan pemonkonyamîꞌ ekoreꞌmaꞌsan manaꞌpokanenan wanî.
Maasa pra inkamoro manaꞌpokanenan esatî toꞌya Paapa munkî pe.
"

¹⁰

Morî pe puꞌkuru mannankan tîweꞌtarumaꞌtîsanon wanî.

Yairî Paapa yeseru kupî toꞌya wenai toꞌ tarumaꞌtî toꞌya.

Inkamoro awanî taatausinpai maasa pra Paapa, tesaꞌkon pia toꞌ koꞌmamî ipemonkono pe,
—taꞌpî Jesusya toꞌ pîꞌ.

"

¹¹ —Morî pe puꞌkuru amîrîꞌnîkon wanî teuren amuꞌtunpakon toꞌya tanne. Moropai awinîkîiꞌnîkon toꞌ eseurîma seruꞌyeꞌ pe. Moropai tuꞌke imakuiꞌpî kupî toꞌya awinîkîiꞌnîkon upemonkono pe awanîkon wenai."

¹² Mîrîrî yeꞌnen taatausinpai puꞌkuru eꞌtî mararî pra. Maasa pra aapiaꞌnîkon tîntîrî ton konekasaꞌ Paapaya man kaꞌ po. Mîrîrî warantî nîrî pena amîrîꞌnîkon rawîronkon Paapa maimu ekaremeꞌnenan profetayamîꞌ nurîꞌsan tarumaꞌtîꞌpî toꞌya, atarumaꞌtîuyaꞌnîkon manniꞌ warantî —taꞌpîiya.

"

¹³ Jesusya toꞌ yenupa koꞌmannîpîꞌpî. Taꞌpîiya: —Amîrîꞌnîkon yeseru wanî pan warantî morî pe pemonkonyamîꞌ pîikaꞌtîton pe. Tîîse inîꞌmîra pan enasaꞌ ya, morî pe awanî pepîn. Ipoꞌmîra awanî. Pan pe awanî pepîn. Moropai mîrîrî wanî îꞌ pe pra rî. Moropai mîrîrî papo toꞌya poro pona pemonkonyamîꞌya mîrîrî yakiꞌtapapîtî tuutîkon kaisarî.

"

¹⁴ Moropai tiaron ekaremekîꞌpîiya. Taꞌpîiya: —Amîrîꞌnîkon yeseru wanî pata weiyu warantî tamîꞌnawîronkon neraꞌmaton pe. Aꞌkî, cidade konekasaꞌ wîꞌ po tîweꞌsen eraꞌma tamîꞌnawîronkonya eꞌpainon. Teeseraꞌmasen pepîn eena eserîke pra awanî, kawîne tîwanî yeꞌnen aronne eeseraꞌma koꞌmannîpî."

¹⁵ Moropai anîꞌya tîꞌkumaꞌtu yawittanîpî pepîn eꞌpainon waikîraꞌpî yoꞌkoi itîrîpa. Tîîse yawittanîpîiya itaponseꞌ pe tînkonekaꞌpî pona itîrîpa. Tamîꞌnawîronkon wîttî ta tîweꞌsanonya eraꞌmatoꞌpe toꞌ weiyuꞌmatoꞌpeiya."

¹⁶ Mîrîrî warantî nîrî amîrîꞌnîkon yeseru eꞌpai awanî aweiyukon warantî. Tiaronkonya ayeserukon eraꞌmatoꞌpe morî pe puꞌkuru. Moropai mîrîrî ayeserukon wenai inkamoroya nîrî Paapa kaꞌ pon yapurîtoꞌpe —taꞌpîiya.

"

¹⁷ Inîꞌrî Jesus eseurîmaꞌpî. Taꞌpîiya: —Moisés nurîꞌtîya ayenupatoꞌkon moropai penaronkon Paapa maimu ekaremeꞌnenan profetayamîꞌ nurîꞌtîya ayenupatoꞌkon yaretîꞌkai uuiꞌsaꞌ kaiꞌma kîsenumenkatî. Mîrîrî yaretîꞌkai uuiꞌsaꞌ pra wai. Tîîse uuipîꞌpî îꞌ taatoꞌpe awanî ekaremeꞌse apîꞌnîkon. Moropai mîrîrî unkupî ekaremeꞌsaiꞌya yawîrî ikuꞌtoꞌpeuya uuipîꞌpî."

¹⁸ Maasa yairon pîꞌ tauya etatî. Kaꞌ moropai pata ataretîꞌka pîkîrî, Moisésya yenupantoꞌ ataretîꞌka pepîn. Tîîse tamîꞌnawîrî aakoꞌmamî itonpa emoꞌka pepîn. Tîîse tamîꞌnawîrî taasaiꞌya yawîrî aweꞌkupî eꞌtoꞌ yawîrî tamîꞌnawîron ataretîꞌka pîkîrî."

¹⁹ Tîîse anîꞌya Moisésya yenupantoꞌ yawîrî ikupî tanne tîîse tiwin mîrikkî ipuremeꞌsaiꞌya ya, moropai mîrîrî ke tiaron yenupaiya ya, ikupî tîuya manniꞌ warantî. Paapa pia mîîkîrî wanî tiaronkon ipemonkonoyamîꞌ maꞌre awanî. Tîîse anîꞌya Moisésya yenupantoꞌ yawîrî puꞌkuru ikupî ya moropai mîrîrî ke tiaronkon yenupaiya ya innape kupî tîuya manniꞌ warantî, mîîkîrî wanî ipîkku pe puꞌkuru Paapa pia, tiaronkon ipemonkonoyamîꞌ yentai."

²⁰ Maasa pra tauya sîrîrî apîꞌnîkon. Morî ayeserukon awanî ya, manniꞌkan Moisés nurîꞌtîya yenupantoꞌ pîꞌ yenupatonkon yeseru kaisarî moropai fariseuyamîꞌ yeseru kaisarî, ipemonkono pe aakoꞌmamîkon pepîn Paapa pia. Tîîse morî panpîꞌ toꞌ yeseru yentai ayeserukon eꞌpai awanî aakoꞌmamîkonpa Paapa pia ipemonkono pe —taꞌpî Jesusya toꞌ pîꞌ.

"

²¹ Jesusya taꞌpî: —Pena atamokon rîꞌsan pîꞌ îꞌ taꞌpî epuꞌtî pîꞌ naatî? Taꞌpî see warantî:

“Pemonkon kîꞌwîtî. Anîꞌya pemonkon wîîsaꞌ ya mîîkîrî yarî eꞌpai awanî ipîkku tîweꞌsen juiz pia”.
"

²² Tîîse uurîya taa sîrîrî apîꞌnîkon. Anîꞌ ekoreꞌmasaꞌ ya tonpa yarakkîrî mîîkîrî yarî toꞌya eꞌpai awanî ipîkku pe tîweꞌsen juiz pia. Moropai anîꞌya taa ya tonpa winîkîi “Îꞌ epuꞌnen pepîn amîrî”, taiya ya ipîꞌ, mîîkîrî yarî toꞌya ipîkku pe tîweꞌsanon toꞌ yepurukon pia itarumaꞌtîtoꞌpe toꞌya. Moropai anîꞌya tonpa esatî ya, “Imakuiꞌpî amîrî, pakko”, taiya ya, nariꞌ pe awanî. Tîwarî eꞌpai awanî mîîkîrî yenumî Paapaya namai apoꞌ yaꞌ aarantoꞌpe.

"

²³ Mîrîrî yeꞌnen Paapa yapurî pe antîrî tîrîya yai tîîse awenpenata ayonpa awinîkîi ekoreꞌmaꞌpî moro awanî pîꞌ."

²⁴ Mîrîrî tanne, moro antîrî nîmîkî moropai atîkî eꞌmaiꞌ pe ayonpa pia. Yarakkîrî ayeseru konekata. Moropai tamîꞌnawîrî morî pe teekonekai ennaꞌpokî Paapa yapurî pe antîrî tîrîpa.

"

²⁵ Mîrîrî warantî ayeyatonya ayarî ya juiz pia, kaꞌneꞌ pe ayeserukon konekatî ayeyaton yarakkîrî apîꞌ eeseurîma rawîrî. Mîrîrî kupîya pra awanî ya, ayarîiya ipîkku pe tîweꞌsen pia. Moropai mîîkîrî juizya amîrî rumaka surara yenyaꞌ. Moropai mîîkîrîya ayarakkamo atarakkannîtoꞌ ta."

²⁶ Tauya sîrîrî apîꞌ mîrîrî atarakkannîtoꞌ tapai eepaꞌka pepîn kaꞌneꞌ pe. Tamîꞌnawîrî mîrîrî ankupîꞌpî yeꞌmaya pîkîrî aakoꞌmamî —taꞌpî Jesusya.

"

²⁷ —Îꞌ taasaꞌ toꞌya epuꞌtî pîꞌ naatîi.

“Tînoꞌpî ke siꞌma wîriꞌsanyamîꞌ yarakkîrî tîweꞌse pra eꞌtî. Moropai tînyo ke siꞌma tiaron warayoꞌ yarakkîrî tîweꞌse pra eꞌtî”.
"

²⁸ Tîîse uurîya taa sîrîrî apîꞌnîkon anîꞌya wîriꞌ eraꞌma ya, moropai yarakkîrî eꞌpai tîwanî pîꞌ eesenumenka ya, yarakkîrî mîîkîrî eꞌsaꞌ mîrîrî tewan yaꞌ."

²⁹ Mîrîrî yeꞌnen wîriꞌ eraꞌmaya ya ayenu meruntî winon ke imakuiꞌpî kupîya emapuꞌtîiya. Mîrîrî namai imoꞌkakî, yenunkî imakuiꞌpî kupîya namai. Maasa pra asakîꞌne ayenu tîîse, imakuiꞌpî kuꞌsaꞌya ya, attî apoꞌ yaꞌ ankupîꞌpî wenai. Mîrîrî yeꞌnen morî pe panpîꞌ awanî itenu pra aakoꞌmamî ya imakuiꞌpî tîkuꞌse pra."

³⁰ Moropai ayenya meruntî winonya imakuiꞌpî kupîya emapuꞌtî ya, mîrîrî merenkîꞌkî moropai yenunkî imakuiꞌpî kupîya namai. Maasa pra ayenya merenkîꞌsaꞌya ya, aakoꞌmamî enen ipatîkarî. Mîrîrî wanî morî pe panpîꞌ, asakîꞌne ayenya tîîse apoꞌ yaꞌ attî yentai —taꞌpî Jesusya.

"

³¹ —Taasaꞌ toꞌya man nîrî see warantî:

“Anîꞌya tînoꞌpî rumaka ya, irumaka tîuya kaaretarî tîrîiya eꞌpai awanî iipia”,
taa toꞌya."

³² Tîîse uurîya taa sîrîrî apîꞌnîkon, anîꞌya tînoꞌpî rumaka ya tiaron warayoꞌ yarakkîrî aweꞌsaꞌ pra tîîse, mîîkîrîya imakuiꞌpî kupî tînoꞌpîya emapuꞌtî mîrîrî. Maasa pra tiaron warayoꞌ yarakkîrî awanî emapuꞌtîiya aaniyotasaꞌ ya. Moropai manniꞌ warayoꞌ yarakkîrî awanî manniꞌya nîrî imakuiꞌpî kupî —taꞌpî Jesusya.

"

³³ —Epuꞌnenan nîrî amîrîꞌnîkon pena atamokon nurîꞌtî pîꞌ îꞌ kaiꞌma taꞌpî.

“Îꞌ taasaꞌyaꞌnîkon ya Paapa pîꞌ, taꞌpîyaꞌnîkon yawîrî ikuꞌtî, seruꞌyeꞌ pe tîweꞌse pra”,
taa toꞌya."

³⁴ Tîîse uurîya taa sîrîrî apîꞌnîkon. Amîrîꞌnîkon esenumenka see warantî. Paapa winîkîi pra tauya ya, îꞌ waniꞌ awanî pepîn îꞌ taꞌpîuya yawîrî pra ikupîuya, taayaꞌnîkon. Tîîse kaꞌ winîkîi teeseurîmai pra eꞌtî. Maasa pra Paapa yaponseꞌ pe awanî mîrîrî mîîtoꞌpe."

³⁵ Moropai pata winîkîi tîkai pra eꞌtî. Maasa pra Paapa puu yaponseꞌ pe awanî mîrîrî mîîtoꞌpe. Moropai Jerusalém cidaderî winîkîi tîkai pra eꞌtî. Maasa pra Paapa pataꞌseꞌ pe awanî mîrîrî mîîtoꞌpe."

³⁶ Moropai apuꞌpai winîkîi tîkai pra eꞌtî. Maasa pra apuꞌpai siꞌpo miakanmaya pepîn eꞌpainon aimutun pe aweꞌtoꞌpe. Moropai aimutun miakanmaya pepîn îrikkutun pe aweꞌtoꞌpe."

³⁷ Mîrîrî yeꞌnen îꞌ winîkîi takai pra eꞌtî, innape amaimukon wanî ekaremekîkonpa. Tîîse amaimukon eꞌpai awanî see warantî: Inna, kaane, kaiꞌma. Maasa pra tuꞌkan îꞌ taatoꞌyaꞌnîkon amaimukon wanî makui winîpai tuiꞌsen pe.

"

³⁸ Jesusya taꞌpî: —Îꞌ taꞌpî toꞌya epuꞌnenan amîrîꞌnîkon:

“Anîꞌya ayenu pona apaꞌtî ya, mîîkîrî ayenu yai apaꞌtîtîponya tîmoron epuꞌtî eꞌpai awanî akaisarî. Moropai mîrîrî warantî aye pona apaꞌtîtîponya tîmoron epuꞌtî eꞌpai awanî akaisarî ayeꞌmapa”,
taa Moisés nurîꞌtîya yenupantoꞌ."

³⁹ Tîîse uurîya taa sîrîrî apîꞌnîkon, amîrî winîkîi imakuiꞌpî kuꞌnen pîꞌ teeseꞌmai pra eꞌkî. Anîꞌya ayenpata pona apaꞌtî ya, iratai winî eraꞌtîkî apaꞌtîtoꞌpeiya."

⁴⁰ Moropai anîꞌya ayarî ya ipîkku tîweꞌsen juiz pia apon ke yeꞌmapa, tîwî apon moꞌkaiya. Tîwî ayaꞌsan nîrî yarîiya îꞌ rî kîꞌkupîi mîîkîrî yarakkîrî."

⁴¹ Moropai anîꞌya taa ya apîꞌ: “Uyemanne yaakî aminke puꞌkuru pra tiwin quilómetro kaisarî”, taiya ya, itîîpai pra awanî tanne, tîîse yaakî asakîꞌne quilómetros kaisarî yarîya eꞌpai awanî, tuꞌse awanîꞌpî yentai."

⁴² Moropai anîꞌ erepamî ya aapia îꞌ rî esaꞌse. Mîîkîrî pia inesatîꞌpî tîîkî. Moropai anîꞌ erepamî ya aapia tîniru esaꞌse, aꞌnokoꞌpî pe eraꞌmakî tîwî tîkuꞌse pra —taꞌpî Jesusya.

"

⁴³ —Îꞌ taꞌpî toꞌya epuꞌnenan amîrîꞌnîkon:

“Ayonpa awakîrikon puꞌkuru saꞌnama eꞌpai awanî. Moropai ayeyaton kuꞌtî ayewanma pe”,
taa toꞌya."

⁴⁴ Tîîse uurîya taa sîrîrî apîꞌnîkon, anîꞌ ayeyatonkon pe tîweꞌsen wanî ya, mîîkîrî saꞌnamatî kureꞌne. Moropai epîrematî mîîkîrî atarumaꞌtînenkon pona."

⁴⁵ Mîrîrî warantî ikupîyaꞌnîkon ya, ayunkon kaꞌ pon munkîyamîꞌ pe awanîkonpa. Maasa pra mîîkîrîya tamîꞌnawîronkon ton pe wei tîrî, morîkon ton pe moropai imakuiꞌsan ton pe. Mîîkîrîya konoꞌ tîrî, morî kuꞌnenan ton pe moropai imakuiꞌpî kuꞌnenan ton pe."

⁴⁶ Tîîse amîrîꞌnîkonya awakîrikon neken ayonpakon saꞌnama ya tiaronkon tîsaꞌnamai pra. Tîîse îꞌ ton pe mîrîrî warantî siꞌma “Paapa winîpainon yapisîuya”, kaiꞌma eesenumenkakon? Aꞌkî, mîrîrî warantî nîrî imakuiꞌsanya, tîniru yapisî pîꞌ teesenyakaꞌmasanonya ikupî."

⁴⁷ Moropai eeseurîmakon ya awakîrikon neken ayonpakon yarakkîrî, tiaronkon yarakkîrî teeseurîmai pra, îꞌ pe pra rî awanî. Mîrîrî warantî Paapa epuꞌnenan pepînya nîrî ikupî."

⁴⁸ Mîrîrî yeꞌnen yairî puꞌkuru eꞌtî eꞌtoꞌ yawîrî. Yairî puꞌkuru ayunkon Paapa, kaꞌ pon awanî manniꞌ warantî awanîkonpa —taꞌpî Jesusya.

"

6

¹ Jesusya taa koꞌmannîpî: —Aka! tîwarî panpîꞌ eꞌtî Paapa yapurî yeseru pîꞌ. Tiaronkonya ayeraꞌmatoꞌkon pe pra neken. Mîrîrî warantî ikupîyaꞌnîkon ya, Paapa, ayunkon kaꞌ pon nîtîrî, iwinîpainon yapisîyaꞌnîkon pepîn.

"

² Mîrîrî yeꞌnen anîꞌ tîweꞌtarumaꞌtîsen pia îꞌ rî tîîsaꞌyaꞌnîkon ya, “Mîrîrî kin tîrî pîꞌ wai koo iipia rî”, kîkatî, manniꞌkan seruꞌyeꞌ pe teesenkuꞌtîsanonya ikupî warantî pra. Maasa pra inkamoroya ikuꞌpîtî Judeuyamîꞌ epereꞌtoꞌkon yewîꞌkon kaisarî. Moropai pemonkonyamîꞌ wîtîtoꞌkon, eꞌmakon kaisarî pemonkonyamîꞌya tapurîtoꞌkon pe kaiꞌma. Ayenkuꞌtîuyaꞌnîkon pepîn, maasa Paapa winîpainon yapisî toꞌya pepîn. Maasa pra aasîrî pemonkonyamîꞌ piapai yapisîꞌpî toꞌya."

³ Tîîse amîrîya îꞌ rî tîrî ya, tîweꞌtarumaꞌtîsen pia itîîkî amaꞌ pe, anîꞌ ayonpa pîꞌ teekaremeꞌse pra, îꞌ kuꞌsaꞌya epuꞌtîiya namai."

⁴ Mîrîrî antîrîꞌpî epuꞌtî anîꞌya eꞌpai pra man. Tîîse ayun, tamîꞌnawîron eraꞌmanenya îꞌ kuꞌsaꞌya eraꞌma. Mîrîrî wenai aapia tîntîrî tîrîiya.

"

⁵ —Eepîremakon ya, manniꞌkan seruꞌyeꞌ pe tîweꞌsanonya ikupî warantî kîꞌkuꞌtîi. Maasa pra inkamoro epîremapîtî Judeuyamîꞌ epereꞌtoꞌkon yewîꞌkon tapîꞌ satippe siꞌma. Moropai toꞌ epîremapîtî eꞌmakon, pemonkonyamîꞌ wîtîtoꞌ, eꞌmakon eraꞌtîtoꞌkon ta pîꞌ siꞌma. Tamîꞌnawîronkon pemonkonyamîꞌya teraꞌmatoꞌkon pe kaiꞌma, mîrîrî kupî toꞌya. Ayenkuꞌtîuyaꞌnîkon pepîn. Inkamoroya tamîꞌnawîrî tînapisîkon yapisîꞌpî pemonkonyamîꞌ winîpai, Paapa winîpai îꞌ yapisî toꞌya pepîn."

⁶ Tîîse mîrîrî warantî pra amîrîꞌnîkonya ikupî eꞌpai man. Eepîremakon ya, ayewîꞌkon ta ewontî. Moropai ayewîꞌkon manaꞌta yarakkantî, anîꞌya ayeraꞌmakon namai. Moropai epîrematî, manniꞌ anîꞌ neraꞌma pepîn, Paapa pîꞌ. Moropai mîîkîrî tamîꞌnawîrî îꞌ konekayaꞌnîkon eraꞌmanenya tîntîrî tîrî aapiaꞌnîkon.

"

⁷ Eepîrematoꞌkon yai, eepîremakon ya, seꞌ tapairî mai tinnaꞌpopîꞌse pra eꞌtî, manniꞌkan Paapa epuꞌnenan pepînya ikupî manniꞌ warantî. Maasa pra inkamoro epîrema kusan pe tiwinan manaꞌpopîtî pîꞌ toꞌ koꞌmamî. Mîrîrî warantî neken Paapaya teepîremantoꞌkon eta kaiꞌma toꞌ esenumenka."

⁸ Mîrîrî yeꞌnen tauya sîrîrî, inkamoro warantî pra eꞌtî. Maasa pra Paapa ayunkonya tamîꞌnawîron îꞌ ituꞌse aweꞌtoꞌkon epuꞌtî pîꞌ man, maasa esatîyaꞌnîkon rawîrî epuꞌtî pîꞌ man."

⁹ Mîrîrî yeꞌnen tauya sîrîrî, epîrematî see warantî:

“Paapa anna yunkon, amîrî kaꞌ po tîîkoꞌmansen.
Tamîꞌnawîronkonya morî pe puꞌkuru amîrî wanî epuꞌtî yuꞌse wai.
"

¹⁰

Amîrî wanî tamîꞌnawîronkon esaꞌ pe.

Asiꞌkî anna pia, anna esaꞌ pe awanîpa.

Ituꞌse aweꞌtoꞌ yawîrî ikupî annaya yuꞌse wai,
tarîniꞌ sîrîrî non pona, morî pe puꞌkuru kaꞌ po awanî manniꞌ warantî.
"

¹¹

Sîrîrîpe ituꞌse anna eꞌtoꞌ tîîkî, anna yekkari ton.
Itîîkî anna pia îꞌ ton pra anna wanî namai, Paapa.
"

¹²

Moropai Paapa, anna nîkupîꞌpî imakuiꞌpî awinîkîi ikuꞌkî aawanmîra,
anna wanmîra tamîꞌnawîronkon nîkupîꞌpî imakuiꞌpî anna winîkîi kupî annaya warantî.
"

¹³

Moropai anna pîikaꞌtîkî, imakuiꞌpî ena namai anna yentai.
Moropai Makui moꞌkakî anna piapai, Paapa.
Maasa pra amîrî wanî anna esaꞌ pe.

Meruntî ke amîrî wanî tamîꞌnawîronkon yentai ipatîkarî.
Morî pe aakoꞌmamî ikîꞌpî ton pra.

Mîrîrî warantî awanî pe man”.
Sîrîrî warantî epîrematî —taꞌpî Jesusya.

"

¹⁴ —Aꞌkî, tauya sîrîrî apîꞌnîkon. Anîꞌkan nîkupîꞌpî imakuiꞌpî awinîkîiꞌnîkon kupîyaꞌnîkon ya aawanmîraꞌnîkon, Paapa kaꞌ ponya nîrî tîîwanmîra ikupî, imakuiꞌpî ankupîꞌpîkon."

¹⁵ Tîîse aawanmîraꞌnîkon imakuiꞌpî toꞌ nîkupîꞌpî kupîyaꞌnîkon pra awanî ya, mîrîrî warantî nîrî Ayunkonya ankupîꞌpîkon imakuiꞌpî kupî pepîn tîîwanmîra.

"

¹⁶ Moropai ayekkarikon tonpai pra eepîremakon ya, yairî maꞌre ayenpatakon tîkuꞌse pra eꞌtî, manniꞌkan teesenkuꞌtîsanonya ikupî manniꞌ warantî. Aꞌkî inkamoroya mîrîrî warantî ikupî maasa pra tamîꞌnawîronkonya tekkarikon tonpai pra teepîremakon eraꞌmatoꞌpe kaiꞌma. Ayenkuꞌtîuyaꞌnîkon pepîn, aasîrî tamîꞌnawîronkon pemonkonyamîꞌ teraꞌmatîponoꞌsan winîpai yapisîꞌpî toꞌya. Inîꞌ panpîꞌ yapisî toꞌya pepîn Paapa piapai."

¹⁷ Tîîse amîrîꞌnîkon epîrema ya, ayekkarikon tonpai pra, ayenpatakon ronatî. Moropai apuꞌpaikon yakinatî,"

¹⁸ tiaronkonya ayekkarikon tonpai pra eepîremakon epuꞌtî namai. Tîîse Ayunkon neken, Paapa anîꞌ neraꞌma pepînya ayepuꞌtîkon ayekkarikon tonpai pra eepîremakon. Moropai mîîkîrîya, amaꞌ pe îꞌ kupîyaꞌnîkon eraꞌmanenya tîntîrî tîrî aapiaꞌnîkon.

"

¹⁹ Moropai taꞌpîiya: —Tarî non po ipîkku pe awanîkon pîꞌ teesenumenkai pra eꞌtî. Maasa pra tarî mîrîrî ayemannekon, aponkon yaku oꞌmaꞌkonya. Moropai tarî amaꞌyeꞌkonya ayamaꞌrunpakon."

²⁰ Mîrîrî warantî awanî namai, ayemannekon ton konekayaꞌnîkon yuwatî kaꞌ po. Miarî oꞌmaꞌya aponkon yaku pepîn. Miarî ayemannekon karau pepîn, aataretîꞌka pepîn. Moropai miarî amaꞌyeꞌkonya ayamaꞌrunpakon pepîn."

²¹ Miarî ikonekatî, maasa pra oꞌnon pata po ayemannekon konekasaꞌyaꞌnîkon ya, manniꞌ pata eesenumenkatoꞌkon wanî aakoꞌmamîkon pîꞌ —taꞌpî Jesusya.

"

²² Jesusya taꞌpî: —Aꞌkî, îꞌ kaiꞌma esenumenkan wenai yairî, yairî pra uyeserukon wanî epuꞌtî, uꞌkumaꞌtuya ituꞌna uweiyuꞌmakon warantî. Yairî esenumenkan ya, anneꞌ pe pra siꞌma esenkuꞌtîn pepîn."

²³ Tîîse yairî pra esenumenkan ya, anneꞌ pe eꞌnî yeꞌnen, esenkuꞌtîn mîrîrî. Mîrîrî yeꞌnen uuwarîrîꞌnîkon esenkuꞌtînsaꞌ ya, kureꞌne puꞌkuru esenkuꞌtînsaꞌ mîrîrî, ewaron ta eꞌnî warantî.

"

²⁴ Moropai inîꞌrî taꞌpî Jesusya: —Anîꞌ wanî eserîke pra man, asakîꞌne tîkaraiwarî ke. Maasa pra tiaron yapurîiya morî pe tiaron yentai. Moropai tiaron muꞌtunpaiya tiaron maimu yawîrî awanî. Tîîse tiaron pîinamaiya pepîn. Mîrîrî warantî Paapa poitîrî pe eꞌnî eserîke pra man, inîꞌ panpîꞌ tîniru yuꞌse esekaꞌnunkan ya —taꞌpî Jesusya.

"

²⁵ —Mîrîrî yeꞌnen tauya sîrîrî apîꞌnîkon, ayekkarikon ton pra awanî pîꞌ teesenumenkai pra eꞌtî, moropai awukukon ton pra awanî pîꞌ. Moropai aponkon ton pra awanî pîꞌ kîsenumenkatî. Maasa pra tauya sîrîrî apîꞌnîkon, ipîkku pe panpîꞌ Paapa nîtîrîꞌpî uukoꞌmannîtoꞌkon wanî uyekkarikon yentai. Moropai intîrîꞌpî uyesaꞌkon wanî ipîkku pe panpîꞌ uponkon yentai. ˻Manniꞌ ipîkku pe tîweꞌsen tîîsaiꞌya ya, imaꞌre tîrîiya nîrî.˼"

²⁶ Maasa esenumenkatî toronyamîꞌ pîꞌ. Toꞌ esenyakaꞌma pepîn tekkarikon ton pîmî pîꞌ. Moropai tekkarikon moꞌka pîꞌ toꞌ esenyakaꞌma pepîn. Moropai tekkarikon yewîꞌ ton koneka toꞌya pepîn. Tîîse Ayunkonya inkamoro koꞌmannîpî mîrîrî. Toꞌ yaꞌreꞌ ton tîrîiya. Amîrîꞌnîkon kanan? Îꞌ kaiꞌma eesenumenkakon? Inkamoro toronyamîꞌ koꞌmannîpî tîuya yentai aakoꞌmannîpîkon Paapaya, maasa pra toronyamîꞌ yentai awanîkon yeꞌnen."

²⁷ Mîrîrî warantî teesenumenka wenai anîꞌya inîꞌ panpîꞌ tîîkoꞌmantoꞌ ton kupî pepîn tarî non po. Mîrîrî yeꞌnen kîsenumenkatî mîrîrî pîꞌ.

"

²⁸ Tîîse îꞌ ton pe aponkon ton pra awanî pîꞌ eesenumenkakon mîrîrî? Maasa esenumenkatî parîꞌ yariꞌku, konoꞌ waiyi keren pon pîꞌ. Toꞌ esenyakaꞌma pepîn mîrîrî eporîpa moropai tîponkon ton siꞌpîmî toꞌya pepîn."

²⁹ Tîîse tauya sîrîrî apîꞌnîkon, toꞌ yariꞌkukon wanî morî pe puꞌkuru. Toꞌ warantî anîꞌ epontî pepîn. Teuren Salomão nurîꞌtî ipîkku pe tîweꞌsen epontî morî tîpon yaꞌ. Teuren tîîse toꞌ warantî awanî pepîn."

³⁰ Paapaya parîꞌ keren pon yariꞌkutannîpî. Tîîse manniꞌ parîꞌ koꞌmamî pepîn kureꞌne. Sîrîrîpe eeseraꞌma moropai penane awaꞌpiꞌta. Mîrîrî kupî tîuya yentai puꞌkuru Paapaya amîrîꞌnîkon epontî morî pe awanîkonpa. Îꞌ ton pe mararî mîrikkî innape ikupîyaꞌnîkon mîrîrî?

"

³¹ Mîrîrî yeꞌnen tauya sîrîrî, mîrîrî aakoꞌmantoꞌkon pîꞌ teesenumenkai pra eꞌtî. Kîkatî aawarîrîꞌnîkon: “Oꞌnon pata uyaꞌreꞌ ton moropai uwuku ton moropai upon ton eporîuya eꞌpainon?” kîkatî."

³² Manniꞌkan Paapa epuꞌnenan pepînya mîrîrî warantî taa koꞌmannîpî maasa pra ituꞌse tîweꞌtoꞌkon pîꞌ toꞌ esenumenka kureꞌne. Mîrîrî warantî pra amîrîꞌnîkon eꞌpai awanî. Maasa pra ayunkon Paapa kaꞌ ponya tamîꞌnawîrî îꞌ ituꞌse aweꞌtoꞌkon epuꞌtî pîꞌ man."

³³ Tîîse eꞌmaiꞌ pe Paapa yenyaꞌ eturumakatî, ayepotorîkon pe aweꞌtoꞌpe. Moropai îꞌ ituꞌse Paapa eꞌtoꞌ yawîrî ikuꞌtî. Mîrîrî kupîyaꞌnîkon ya, tamîꞌnawîrî manniꞌ ituꞌse aweꞌtoꞌkon tîrîiya aapiaꞌnîkon."

³⁴ Mîrîrî yeꞌnen penanan wei pîꞌ teesenumenkai pra eꞌtî. Tîîse sîrîrîpan pîꞌ neken esenumenkatî. Maasa pra penanan weiyu yainon ton moro man. Moropai wei kaisarî moro man mîrîrî weiyu yainon ton. Mîrîrî yeꞌnen eerepamî rawîrî kîsenumenkatî mîrîrî pîꞌ —taꞌpî Jesusya.

"

7

¹ Jesusya taꞌpî: —Tiaronkon nîkupîꞌpî pîꞌ taatakoꞌmenkai pra eꞌtî, anîꞌ atakoꞌmenka namai ankupîꞌpîkon pîꞌ."

² Maasa pra tiaronkon pîꞌ aatakoꞌmenkakon warantî tiaron atakoꞌmenka apîꞌnîkon. Tiaronkon pîꞌ ankupîꞌpîkon warantî ikupîiya apîꞌnîkon."

³ Moropai taꞌpîiya inîꞌrî: —Îꞌ waniꞌ awanî yeꞌnen kin ayonpa nîkupîꞌpî, iteseru eraꞌmaya mîrîrî morî pe, ayeseru itentai ankupîꞌpî nura teraꞌmai pra."

⁴ Tîîse îꞌ ton pe mîrîrî warantî taaya ayonpa pîꞌ. “Maasa ayenu yawon moꞌkatoꞌpeuya”, taaya siꞌmîrikkî pe tîweꞌsen pîꞌ. Tîîse îꞌ waniꞌ awanî yeꞌnen kureꞌnan yei warantî tîweꞌsen ayenu yaꞌ eraꞌmaya pepîn?"

⁵ Amîrîꞌnîkon seruꞌyeꞌkon teesenkuꞌtîsanon aawarîrîꞌnîkon. Eꞌmaiꞌ pe ayeserukon eraꞌmatî, ikonekatî morî pe. Mîrîrî ayeseru tîkonekai ayonpa yeseru konekai attîpa.

"

⁶ Moropai taꞌpîiya: —Paapa maimu etatîponkon tîîse innape ikuꞌnenan pepîn, inkamoro yeꞌka pîꞌ kîsekaremeꞌtî. Inkamoro wanî sokoroꞌ pe arinmarakayamîꞌ warantî. Mîrîrî yuꞌse pra tîwanîkon wenai awinîkîiꞌnîkon toꞌ ekoreꞌma. Moropai morî epeꞌke pe tîweꞌsen diamante iteseꞌ yenumî eꞌpai pra awanî porcoyamîꞌ koreꞌta. Maasa pra inkamoroya yakiꞌtapapîtî. Mîrîrî warantî inkamoro Paapa maimu yuꞌsankon pepîn pemonkonyamîꞌ wanî porcoyamîꞌ warantî —taꞌpî Jesusya.

"

⁷ —Tîîse tauya sîrîrî apîꞌnîkon esatî pîꞌ akoꞌmantî teesetaꞌkai pra, moropai yapisîyaꞌnîkon. Moropai yuwa pîꞌ aakoꞌmantî moropai eporîyaꞌnîkon. Moropai manaꞌta paꞌtî pîꞌ akoꞌmantî moropai wîttî esaꞌya yarakkanmoka."

⁸ Maasa pra tamîꞌnawîronkon esaꞌnenanya tînesatîꞌpîkon yapisî. Moropai yuwanenanya tînuwakon eporî. Moropai manaꞌta paꞌtînen pia manaꞌta atarakkanmoka.

"

⁹ Aꞌkî, anmukukonya tiyu ton esatî ya apîꞌnîkon, inesatîꞌpî pepîn tîꞌ tîrîyaꞌnîkon eꞌpainon iipia, ikei esaꞌsaiꞌya tanne?"

¹⁰ Moropai tiyoꞌ ton moroꞌ esaꞌsaiꞌya tanne, inesatîꞌpî pepîn îkîi tîrîyaꞌnîkon pepîn iipia? Kaane, inesatîꞌpî tîrîyaꞌnîkon eꞌpainon."

¹¹ Amîrîꞌnîkon wanî imakuiꞌpî kuꞌnenan pe teuren. Tîîse anmukukon pia morî tîînenan amîrîꞌnîkon, imakuiꞌpî tîînenan pepîn. Mîrîrî morî tîrîyaꞌnîkon manniꞌ yentai, Paapa kaꞌ ponya manniꞌkan tîpîꞌ esaꞌnenan pia morî tîrî —taꞌpî Jesusya.

"

¹² —Mîrîrî yeꞌnen tiaronkon yarakkîrî morî kuꞌtî, inkamoroya nîrî morî kupî yuꞌse awanîkon yawîrî. Mîrîrî warantî ikuꞌtoꞌpe Moisés nurîꞌtîya yenupantoꞌ wanî mîrîrî. Moropai penaronkon Paapa maimu ekaremeꞌnenan profetayamîꞌya yenupantoꞌ wanî mîrîrî.

"

¹³ Moropai taꞌpî Jesusya: —Eꞌtaꞌka manaꞌta yai ewontî. Maasa pra aweneꞌ manaꞌta moropai aweneꞌ eꞌma, mîrîrî wanî atakaꞌmantoꞌ yaꞌ yaaton pe. Mîrîrî wanî saꞌme pra. Mîrîrî yeꞌnen tuꞌkankon pemonkonyamîꞌ esenkuꞌtîsaꞌ wîtî mîrîrî atakaꞌmantoꞌ yaꞌ."

¹⁴ Tîîse manaꞌta eꞌtaꞌka tauya manniꞌ moropai eꞌma siiruru mîrîrî wanî yaaton pe ipatîkarî koꞌmannîtoꞌ pata pona. Mîrîrî wanî saꞌme. Mîrîrî yeꞌnen tuꞌkankon pepîn pemonkonyamîꞌ wîtî mîrîrî eꞌma taawîrî —taꞌpî Jesusya.

"

¹⁵ Moropai Jesusya taꞌpî: —Tîwarî panpîꞌ eꞌtî seruꞌyeꞌ pe yenupatonkon pîꞌ. Inkamoro iipî Paapa pemonkonoyamîꞌ yenkuꞌtîi innape tîmaimukon wanî kaiꞌma toꞌ eꞌtoꞌpe. Tîîse mîrîrî toꞌ yeseru toꞌ nîkupî wanî kaikusiyamîꞌ yeseru warantî nariꞌ uurîꞌnîkon pia."

¹⁶ Mîrîrî yeꞌnen amîrîꞌnîkonya epuꞌtî toꞌ nîkupî wenai. Maasa sîrîrî epuꞌtî —taꞌpîiya. —Mîꞌnî yeꞌ epeta pepîn eꞌpainon uva pe. Moropai figo pe mîꞌnî yeꞌ epeta pepîn eꞌpainon."

¹⁷ Tîîse tamîꞌnawîron yei morîya morî pe teperu tîrî. Moropai yei pakkoriꞌtasaꞌya teperu tîrî imakuiꞌpî pe."

¹⁸ Mîrîrî yeꞌnen yei morîya imakuiꞌpî pe teperu tîrî pepîn. Moropai yei pakkoriꞌtasaꞌya morî pe teperu tîrî pepîn."

¹⁹ Mîrîrî yeꞌnen tamîꞌnawîrî yei morî pe pra teperu tîînen yaꞌtî toꞌya. Moropai mîrîrî yenumî apoꞌ yaꞌ aarantoꞌpe."

²⁰ Mîrîrî warantî inkamoro seruꞌyeꞌ pe tîweꞌsanon yeseru epuꞌtîyaꞌnîkon îꞌ toꞌ nîkupî wenai. Mîrîrî warantî toꞌ epuꞌtîyaꞌnîkon —taꞌpî Jesusya.

"

²¹ Taꞌpî Jesusya: —Tamîꞌnawîronkonya taa kupî sîrîrî upîꞌ: “Anna yepotorî”, taa toꞌya. Tîîse tamîꞌnawîrî inkamoro mîrîrî taatîponoꞌsan wîtî pepîn Paapa pia. Tîîse manniꞌkan neken îꞌ ituꞌse uyun Paapa eꞌtoꞌ manniꞌ yawîrî ikonekanenan, inkamoro neken wîtî iipia, ipemonkono pe."

²² Îꞌ pensa mîrîrî taa toꞌya weiyu erepamî yai, tuꞌkankon pemonkonyamîꞌya taa kupî sîrîrî. “Anna yepotorî, anna eseurîmaꞌpî Paapa maimu ekaremekî pîꞌ ayeseꞌ wenai tiaronkon pîꞌ. Moropai amîrî anna yepotorî eseꞌ pîꞌ pemonkonyamîꞌ yaꞌ ewomîꞌsan imariwaꞌyamîꞌ yenpaꞌkaꞌpî annaya tuꞌke. Moropai tuꞌke iteꞌka anîꞌ nîkupî eserîkan pepîn kuꞌpîtîꞌpî annaya ayeseꞌ pîꞌ”, taa toꞌya kupî sîrîrî."

²³ Inkamoro maimu yuukuuya kupî sîrîrî see warantî: “Anîꞌkan pe awanîkon epuꞌtîuya pra wai. Atarimatî uupiapai. Umaimu yuꞌnenan pepîn amîrîꞌnîkon. Imakuiꞌpî kupî pîꞌ tîîkoꞌmansenon amîrîꞌnîkon”, tauya toꞌ pîꞌ —taꞌpî Jesusya.

"

²⁴ Tamîꞌnawîrî mîrîrî taa yaretîꞌka tîuya pe, Jesusya taꞌpî: —Mîrîrî yeꞌnen oꞌnon yeꞌka pe umaimu etanen neken pepîn tîîse ikuꞌnen wanî? Mîîkîrî wanî epuꞌnen pe puꞌkuru. Awanî manniꞌ warayoꞌ epuꞌnen pe tîweꞌsen warantî. Mîîkîrîya tewîꞌ ton konekaꞌpî saꞌman po eesenumî namai."

²⁵ Tewîꞌ konekasaiꞌya tanne, konoꞌ renaꞌpî mararî pra. Tuna kumaꞌpî kureꞌne ipona eerepamîꞌpî. Moropai aꞌsitun erepamîꞌpî ipona yenumîpa kaiꞌma. Tîîse yenumîiya pra awanî maasa pra saꞌman pona ikonekasaꞌ pe awanî yeꞌnen.

"

²⁶ Tîîse manniꞌ umaimu etanen tîîse ikuꞌnen pepîn pemonkon wanî, manniꞌ yairî pra teesenumenkasen warantî. Yairî pra teesenumenka yeꞌnen, tewîꞌ ton konekaꞌpîiya saꞌman pepîn kasapan pona."

²⁷ Tewîꞌ konekasaiꞌya tanne, konoꞌ renaꞌpî mararî pra. Tuna kumaꞌpî kureꞌne ipona. Moropai aꞌsitun erepamîꞌpî meruntî ke ipona. Aapîtatoꞌ ton pra awanî yeꞌnen yenumîꞌpîiya tamîꞌnawîrî. Îꞌ eꞌnîmî pra awanîꞌpî —taꞌpî Jesusya.

"

²⁸ Mîrîrî warantî teeseurîmatoꞌ yaretîꞌka Jesusya tanne tuꞌkankon pemonkonyamîꞌ esenumenkaꞌpî mararî pra teesewankonoꞌmai tenupatoiꞌyaꞌnîkon pîꞌ."

²⁹ Maasa pra mîîkîrî yeseru eraꞌmaꞌpî toꞌya Moisés nurîꞌtîya yenupantoꞌ pîꞌ yenupatonkon warantî pra. Tîîse epuꞌnen pe tenupatoiꞌyaꞌnîkon epuꞌtîꞌpî toꞌya, meruntî ke tîweꞌtoꞌ ke tenupaiyaꞌnîkon epuꞌtîꞌpî toꞌya.

"

8

¹ Mîrîrî tîpo Jesus autîꞌpî wîꞌ poi. Moropai arinîkon pemonkonyamîꞌ wîtîꞌpî ipîkîrî."

² Mîrîrî ya priꞌya pra tîweꞌsen eꞌrennukuꞌpî iipia. Mîîkîrî saꞌne wanîꞌpî paran, ereꞌ pîꞌ tîweꞌsen pe. Moropai mîîkîrî eꞌsekunkaꞌpî Jesus rawîrî. Mîîkîrîya taꞌpî Jesus pîꞌ: —Yepiꞌtîton amîrî, Uyepotorî. Uurî anepiꞌtîpai awanî ya, uyepiꞌtîkî —taꞌpîiya.

"

³ Mîrîrî taiya yeꞌnen, Jesusya tenya kainumîꞌpî yapîpa kaiꞌma. Moropai taꞌpî Jesusya ipîꞌ: —Inna, esepiꞌtîn pîꞌ nai. Mîrîrî taa Jesusya pe rî, eesepiꞌtîꞌpî. Inîꞌrî ereꞌ ton pra eenaꞌpî."

⁴ Mîîkîrî pîꞌ taꞌpî Jesusya: —Aꞌkî, esepiꞌtîn pîꞌ nai tîîse anîꞌ pîꞌ eesepiꞌtîsaꞌ kîsekaremekîi —taꞌpîiya. —Tîîse atîkî teepîremasen pia îꞌ kaiꞌma amîrî esepiꞌtîsaꞌ eraꞌmatoꞌpeiya iipia matîi. Moropai mîrîrî tîpo, Moisés nurîꞌtîya yenupantoꞌ yawîrî teepîremasen pia antîrî ton marîi, îꞌ kaiꞌma eesepiꞌtîsaꞌ ekaremekîpa tamîꞌnawîrî —taꞌpî Jesusya.

"

⁵ Pemonkonyamîꞌ yeurîma yaretîꞌka tîpo, Jesus wîtîꞌpî Cafarnaum cidaderî pona. Miarî Cafarnaum po surarayamîꞌ yepotorî wanîꞌpî Roma pata pon. Mîîkîrî poitîrî kureꞌne inapurî enasaꞌ wanîꞌpî priꞌya pra. Aasaꞌmanta eserîke awanîꞌpî. Mîrîrî yeꞌnen Jesus ponaya attîꞌpî eporîpa kaiꞌma. Moropai eposaꞌ tîuya pe taꞌpîiya Jesus pîꞌ tîpoitîrî yepiꞌtîtoꞌpeiya."

⁶ Taꞌpîiya Jesus pîꞌ: —Uyepotorî, upoitîrî saꞌne man mararî pra priꞌya pra uyewîꞌ ta. Eꞌmîꞌsaꞌkakoi pepîn kureꞌne tîmoron epuꞌtî pîꞌ aakoꞌmamî mîrîrî —taꞌpîiya.

"

⁷ Mîîkîrî maimu yuukuꞌpî Jesusya: —Uutî moriya yepiꞌtîi —taꞌpîiya ipîꞌ.

"

⁸ Mîrîrî yuukuꞌpî surarayamîꞌ esaꞌya: —Kaane Uyepotorî, uurî saꞌne wanî Judeu pepîn. Mîrîrî yeꞌnen uyewîꞌ ta eewomî eserîke pra nai, Judeu pe awanî yeꞌnen. Tîîse amaimu ke neken taaya yuꞌse wanî sîrîrî upoitîrî enatoꞌpe priꞌya, eewomî pra tîîse —taꞌpî surarayamîꞌ esaꞌya."

⁹ —Epuꞌtî pîꞌ wai seruꞌ pepîn. Kureꞌne uurî wanî tîîse uyesanon moro toꞌ man, uyentainokon. Inkamoro maimu yawîrî tîweꞌsen uurî. Moropai mîrîrî warantî nîrî upemonkonoyamîꞌ moro toꞌ man, surarayamîꞌ, umaimu yawîrî tîꞌweꞌsanon. Tauya ya tiwinan pîꞌ “atîkî” tauya ya, attî umaimu pe. Tiaron pîꞌ “Asiꞌkî” tauya ya, aaipî uupia umaimu pe. Moropai “seeniꞌ kuꞌkî” tauya ya upoitîrî pîꞌ, umaimu pe ikupîiya. Mîrîrî warantî nîrî ikupîya ya, epuꞌtî pîꞌ wai aweꞌkupî sîrîrî. Uyentai puꞌkuru awanî yeꞌnen, amaimu pe aweꞌkupî sîrîrî —taꞌpî surarayamîꞌ yepotorîya.

"

¹⁰ Mîrîrî warantî taa surarayamîꞌ yepotorîya pîꞌ Jesus esenumenkaꞌpî mararî pra teesenumenkai. Moropai taꞌpîiya tîpîkîrî tîweꞌsanon pemonkonyamîꞌ pîꞌ: —Tauya sîrîrî apîꞌnîkon, kureꞌne innape ukupî pîꞌ nai. Mîrîrî yeꞌka eporîuya pra wai Paapa pemonkonoyamîꞌ Judeuyamîꞌ koreꞌta —taꞌpîiya."

¹¹ —Enpenatatî maasa sîrîrî pîꞌ. Maasa tamîꞌnawîronkon esaꞌ pe tîwanî Paapaya yenpotoꞌ weiyu erepansaꞌ yai, tuꞌkankon pemonkonyamîꞌ iipî kupî sîrîrî wei epaꞌka winîpai, moropai wei ewomî winîpai. Inkamoro Judeuyamîꞌ pepîn ereuta kupî sîrîrî Abraão nurîꞌtî, Isaque nurîꞌtî, moropai Jacó nurîꞌtî yarakkîrî kureꞌnan entamoꞌkantoꞌ ya."

¹² Tîîse Judeuyamîꞌ, Paapa pemonkono pe awanîtonkon teuren, ereuta eꞌpai tîîse Paapaya toꞌ yenumî kupî sîrîrî ewaron ta. Toꞌ ewomî pepîn Paapa pia. Iipiapai toꞌ koꞌmamî. Miarî toꞌ karau mararî pra. “Ane” taapîtî toꞌya teekon tîpaꞌtîi.

"

¹³ Moropai taꞌpî Jesusya surarayamîꞌ esaꞌ pîꞌ: —Ennaꞌpokî ayewîꞌ ta, innape puꞌkuru ukuꞌtoꞌya yawîrî aweꞌkupî sîrîrî —taꞌpî Jesusya. Moropai surarayamîꞌ esaꞌ poitîrî esepiꞌtîꞌpî kaꞌneꞌ pe Jesus maimu pe.

"

¹⁴ Mîrîrî tîpo Jesus wîtîꞌpî Pedro yewîꞌ ta. Moropai mîîkîrî yawoꞌpî eraꞌmaꞌpîiya tetteꞌ ta priꞌya pra. Eekomiꞌmasaꞌ awanîꞌpî mararî pra."

¹⁵ Mîîkîrî yenya pîꞌ Jesusya yapisîꞌpî moropai mîrîrî pe rî eekomiꞌmakapîꞌpî, priꞌya eenaꞌpî. Moropai mîîkîrî eꞌmîꞌsaꞌkaꞌpî moropai mîîkîrî yekkari ton koneka piaꞌtîꞌpîiya.

"

¹⁶ Koꞌmamîiya pata enasaꞌ tanne, pemonkonyamîꞌya oꞌmaꞌ yarakkîrî tîweꞌsanon pemonkonyamîꞌ yarîꞌpî Jesus pia oꞌmaꞌkon yenpaꞌkatoꞌpeiya. Moropai tîmaimu ke neken toꞌ yenpaꞌkaꞌpîiya. Moropai tamîꞌnawîrî insamoro priꞌyawonkon pepîn yepiꞌtîꞌpîiya."

¹⁷ Jesusya ikupîꞌpî mîrîrî warantî, maasa pra aweꞌkupî sîrîrî taꞌpî penaroꞌ Paapa maimu ekaremeꞌnen Isaías nurîꞌtîya yawîrî. Taꞌpîiya see warantî:

Mîîkîrîya uyeparankon yaasaꞌ man tîpona,
moropai neꞌneꞌ pe eꞌnîtoꞌ moꞌkasaiꞌya man
taꞌpî Isaías nurîꞌtîya pena.

"

¹⁸ Mîrîrî taa tîpo, Jesus eraꞌtîꞌpî tuꞌkankon pemonkonyamîꞌ tîwoi tîweꞌsanon eraꞌmai moropai tîmenkaꞌsan yaipontîꞌpîiya toꞌ wîtîtoꞌpe ikuꞌpî ratai pona."

¹⁹ Mîrîrî taa Jesusya tanne, Moisés nurîꞌtîya yenupantoꞌ pîꞌ yenupaton erepamîꞌpî Jesus pîꞌ kai. Moropai taꞌpîiya: —Uyenupanen, uurî wanî sîrîrî tarî, oꞌnon pata attî ya, awenairî uttî —taꞌpîiya."

²⁰ Mîîkîrî maimu yuukuꞌpî Jesusya. Taꞌpîiya: —Aꞌkî, maikanyamîꞌ yeutta mororon, toꞌ yewîꞌ. Moropai toronyamîꞌ tîꞌmoikon yenpo yaponseꞌ nîrî mororon. Tîîse uurî, kaꞌ poi iipîꞌpî pemonkon pe uyewîꞌ ton pra man —taꞌpî Jesusya.

"

²¹ Moropai tiaron Jesus wenairî tuutîsenya taꞌpî ipîꞌ: —Uyepotorî, maasa awenairî uutîtoꞌpe eꞌmaiꞌ pe ennaꞌpo tanne uyun pia aasaꞌmanta pîkîrî —taꞌpî tiaronya ipîꞌ."

²² Jesusya imaimu yuukuꞌpî: —Tîwî inkamoro innape umaimu kuꞌnenan pepînya isaꞌmantaꞌsan yuꞌnaꞌtîi —taꞌpîiya. —Tîîse amîrî wîtî yuꞌse wai upîkîrî —taꞌpîiya ipîꞌ.

"

²³ Mîrîrî tîpo Jesus asaraꞌtîꞌpî kanau yaꞌ moropai attîꞌpî tînenupaꞌsan pokonpe."

²⁴ Toꞌ wîtî tanne tiwinarî kaꞌneꞌ pe kureꞌnan sipa sipa erepamîꞌpî, aꞌsitun wanîꞌpî mararî pra. Toꞌ kanau yeuronkaiya eserîke sipa sipa wanîꞌpî nariꞌ pe. Mîrîrî tanne Jesus weꞌnasaꞌ koꞌmamîꞌpî miarî kanau yaꞌ."

²⁵ Mîîkîrî yenpakai inkamoro imenkaꞌsan wîtîꞌpî kaꞌneꞌ pe teesiꞌnîꞌse. Taꞌpî toꞌya: —Uyepotorî, apakakî eꞌtîꞌkan pe man. Îꞌ pîꞌ awetun mîrîrî anna pîikaꞌtîkî —taꞌpî toꞌya Jesus pîꞌ.

"

²⁶ Moropai Jesus eꞌmîꞌsaꞌkaꞌpî moropai taꞌpîiya toꞌ pîꞌ: —Îꞌ waniꞌ awanî yeꞌnen eranneꞌ pe awanîkon mîrîrî? Innape ukupîyaꞌnîkon pepîn mîrîrî? —taꞌpî Jesusya toꞌ pîꞌ.

Mîrîrî taa tîpo aweꞌmîꞌsaꞌkaꞌpî moropai taꞌpîiya aꞌsitun pîꞌ moropai tuna pîꞌ: —Atîꞌnapankî. Moropai tamîꞌnawîrî aatîꞌnapamîꞌpî Jesus maimu pe.

"

²⁷ Mîrîrî warantî Jesusya ikupî eraꞌma tîuyaꞌnîkon yeꞌnen, tamîꞌnawîronkon wanîꞌpî kureꞌne teesenumenkai. Moropai inkamoroya taꞌpî tîîwarîrîꞌnîkon: —Oꞌnon yeꞌka see warayoꞌ mîserî imaimu yawîrî aꞌsitun moropai tuna eꞌtoꞌ —taꞌpî toꞌya tîîwarîrîꞌnîkon.

"

²⁸ Moropai Jesus wîtîꞌpî Galiléia kuꞌpî rataipon pata Gadara pona. Miarî Jesus eseuꞌka tanne, kanau yapai asakîꞌnankon imariwaꞌkaꞌpankon warayoꞌkon wîtîꞌpî Jesus ponaya epose. Inkamoro iipîꞌpî uuruwai koreꞌtapai maasa pra inkamoro koꞌmantoꞌ wanîꞌpî uuruwai koreꞌta. Inkamoro eꞌpîtîꞌpî meruntî ke oꞌnon yeꞌka pe ikupî eserîke pra nariꞌ pe toꞌ wanîꞌpî. Toꞌ rîꞌpîkîrî eꞌma taawîrî wîtîn eserîke pra toꞌ eꞌpîtîꞌpî."

²⁹ Inkamoro entaimeꞌpî. Taꞌpî toꞌya: —Amîrî Paapa kaꞌ pon munmu. Îꞌ kuꞌse aaiꞌsaꞌ sîrîrî anna pîꞌ? Anna tarumaꞌtîi kaꞌrî aaiꞌsaꞌ? Anna kîꞌtarumaꞌtîi maasa eꞌtarumaꞌtîntoꞌ weiyu erepamî pra tîîse —taꞌpî warayoꞌkonya Jesus pîꞌ.

"

³⁰ Miarî, aminke panpîꞌ porcoyamîꞌ wanîꞌpî tuꞌkankon, tekkarikon yenaꞌnenan."

³¹ Oꞌmaꞌkonya Jesus pîꞌ esatîꞌpî teesekaꞌnunkai inkamoro porcoyamîꞌ yaꞌ teewomîkonpa kaiꞌma. —Anna yenpaꞌkaya ya, inkamoro porcoyamîꞌ yaꞌ anna ewontoꞌpe —taꞌpî toꞌya."

³² —Inna moriya, atîtî —taꞌpî Jesusya toꞌ pîꞌ. Mîrîrî yeꞌnen inkamoro oꞌmaꞌkon epaꞌkaꞌpî warayoꞌ yapai. Moropai toꞌ ewomîꞌpî porcoyamîꞌ yaꞌ. Tîîse mîrîrî pe rî porcoyamîꞌ ekaꞌtumîꞌpî irama yai, toꞌ eꞌsorokaꞌpî tuna ka, moropai toꞌ eꞌtîꞌkaꞌpî tîînaꞌse.

"

³³ Warayoꞌkon porcoyamîꞌ pîꞌ teesenyakaꞌmasanonya mîrîrî eꞌkupî eraꞌmaꞌpî. Mîrîrî yeꞌnen inkamoro eꞌtîrîkaꞌpî, moropai toꞌ wîtîꞌpî cidade pona. Miarî mîrîrî tîneramaꞌpîkon ekaremekîꞌpî toꞌya tamîꞌnawîrî. Moropai inkamoro asakîꞌnankon warayoꞌkon imariwaꞌkaꞌ pe siꞌsan esepiꞌtîsaꞌ yekare pîꞌ nîrî toꞌ eseurîmaꞌpî."

³⁴ Mîrîrî yekare eta tîuyaꞌnîkon yeꞌnen, tamîꞌnawîronkon mîrîrî cidade po tîîkoꞌmansenon wîtîꞌpî Jesus epose. Moropai mîîkîrî eposaꞌ tîuyaꞌnîkon pe, tîpatakon yapai Jesus wîtîtoꞌpe esatîꞌpî toꞌya.

"

9

¹ Moropai Jesus asaraꞌtîꞌpî kanau yaꞌ tuutîpa ikuꞌpî ratai pona. Moropai attîꞌpî, eerepamîꞌpî tîpata yaꞌ."

² Mîrîrî yai tiaronkon pemonkonyamîꞌya Jesus pia priꞌyawon pepîn warayoꞌ asakoi pepîn enepîꞌpî tetteꞌ ta tîîse. Jesusya innape puꞌkuru tîkupî toꞌya epuꞌtîꞌpî. Mîrîrî yeꞌnen taꞌpîiya mîîkîrî priꞌyawon pepîn pîꞌ: —Mooyi, meruntî ke eꞌkî. Maasa pra imakuiꞌpî ankupîꞌpî kupî pîꞌ wai uuwanmîra —taꞌpîiya.

"

³ Mîrîrî warantî taa Jesusya eta tîuyaꞌnîkon yeꞌnen, warayoꞌkon Moisés nurîꞌtîya yenupantoꞌ pîꞌ yenupatonkon eseurîmaꞌpî tîîwarîrîꞌnîkon. —Iseruku mîrîrî. Anîꞌya imakuiꞌpî pe warayoꞌ eꞌtoꞌ moꞌka pepîn, Paapa pe pra siꞌma. Tîîse Paapaya neken imoꞌka —taꞌpî toꞌya.

"

⁴ Mîrîrî warantî tewankon yaꞌ toꞌ esenumenka epuꞌtîꞌpî Jesusya. Mîrîrî yeꞌnen taꞌpîiya toꞌ pîꞌ: —Îꞌ ton pe see mîrîrî warantî eesenumenkakon mîrîrî imakuiꞌpî pe? —taꞌpîiya."

⁵ —Imakuiꞌpî ankupîꞌpî rona pîꞌ wai taa pîꞌ wai mîserî priꞌyawon pepîn pîꞌ. Tîîse innape ikuꞌsauꞌya epuꞌtîyaꞌnîkon eserîke pra awanî."

⁶ Mîrîrî yeꞌnen uurîya, pemonkon pe kaꞌ poi iipîꞌpîya aneraꞌmakon ton kupî sîrîrî. Meruntî ke wai imakuiꞌpî ronatoꞌpeuya, seruꞌ pe pra eseurîma epuꞌtîkonpa, mîîkîrî priꞌyawon pepîn yepiꞌtîuya. Iꞌmîꞌsaꞌkauya, tetteꞌ yanmakoꞌmatoꞌpeiya aasatoꞌpe —taꞌpî Jesusya.

"

⁷ Mîrîrî pe rî mîîkîrî warayoꞌ eꞌmîꞌsaꞌkaꞌpî. Moropai attîꞌpî tewîꞌ ta."

⁸ Mîrîrî warantî ikupî Jesusya eraꞌma tîuyaꞌnîkon yeꞌnen, pemonkonyamîꞌ esiꞌnîpîꞌpî mararî pra ipîꞌ. Moropai Paapa yapurîꞌpî toꞌya inamaiꞌma mararî pra. —Tîîse sîrîrî warantî meruntî tîîsaꞌ Paapaya eraꞌma sîrîrî pemonkon pia —taꞌpî toꞌya.

"

⁹ Mîrîrî tîpo Jesus epaꞌkaꞌpî moropai attîꞌpî. Tuutî yeꞌka pe eꞌma taawîrî warayoꞌ eraꞌmaꞌpî Jesusya iteseꞌ Mateus. Mîîkîrî ereutasaꞌ wanîꞌpî tîniru tîrî toꞌya yaponseꞌ pia. Maasa pra mîîkîrî wanîꞌpî tesanonkon pia toꞌ nîtîrî tîniru yapisî pîꞌ teesenyakaꞌmasen pe. Mîîkîrî pîꞌ taꞌpî Jesusya: —Aase uwenairî —taꞌpîiya. Mîrîrî yeꞌnen Mateus eꞌmîꞌsaꞌkaꞌpî moropai attîꞌpî Jesus pîkîrî.

"

¹⁰ Mîrîrî yai tuꞌkan entamoꞌkantoꞌ wanîꞌpî Mateus yewîꞌ ta. Miarî Jesus entamoꞌka tanne, tiaronkon tîniru yapiꞌnenan erepamîꞌpî toꞌ koreꞌta. Moropai tiaronkon pemonkonyamîꞌ Moisésya yenupantoꞌ yawîrî pra tîweꞌsanon nîrî erepamîꞌpî. Inkamoro wanîꞌpî toꞌ entamoꞌkatoꞌ yaponseꞌ pia Jesus pokonpe moropai Jesus nenupaꞌsan pokonpe."

¹¹ Mîrîrî yai tiaronkon fariseuyamîꞌya toꞌ yeseru eraꞌmaꞌpî. Mîrîrî yeꞌnen Jesus nenupaꞌsan ekaranmapoꞌpî toꞌya: —Îꞌ waniꞌ awanî yeꞌnen kin amîrîꞌnîkon yenupanenya tekkari yonpa mîrîrî, inkamoro Moisésya yenupantoꞌ yawîrî pra tîweꞌsanon pemonkonyamîꞌ, moropai tîniru yapisî pîꞌ teesenyakaꞌmasanon pokonpe siꞌma?

"

¹² Inkamoro tînenupaꞌsan ekaranmapo toꞌya etaꞌpî Jesusya. Moropai yuukuꞌpîiya: —Aꞌkî, priꞌyawon pemonkonya tepiꞌtînen ton yuwa pepîn. Tîîse priꞌya pra tîweꞌsenya tepiꞌtînen ton yuwa eꞌpainon —taꞌpî Jesusya."

¹³ Moropai taꞌpîiya: —Paapa maimuya taasaꞌ see warantî:

“Paapa yapurî pe anpoꞌtîkon poꞌtîyaꞌnîkon yuꞌse pra wai.
Tîîse eetîꞌnokoꞌmatoꞌkon yuꞌse wai anpoꞌtîkon yentai”,
taꞌpîiya. Mîrîrî yeꞌnen îꞌ taatoꞌpe awanî epuꞌtî. Maasa pra uuiꞌsaꞌ pra wai morî pe tîweꞌkuꞌsanon yannoi, tîîse imakuiꞌpî pe tîwanîkon epuꞌnenan pemonkonyamîꞌ yannoi uuiꞌsaꞌ sîrîrî —taꞌpîiya.

"

¹⁴ Mîrîrî tîpo João Batista nenupaꞌsan erepamîꞌpî Jesus pia ekaranmapoi. Inkamoroya taꞌpî ipîꞌ: —Îꞌ waniꞌ awanî yeꞌnen anna moropai fariseuyamîꞌ nenupaꞌsan epîremapîtî tuꞌke iteꞌka tekkarikon tonpai pra, tîîse anenupaꞌsanya mîrîrî warantî ikupî pra awanî? —taꞌpî toꞌya Jesus pîꞌ.

"

¹⁵ Inkamoro maimu yuukuꞌpî Jesusya: —Tînetaꞌsan pokonpe tîweꞌmarimasen wanî tanne taꞌreꞌkon tonpai pra toꞌ wanî pepîn. Tîîse toꞌ entamoꞌka moropai toꞌ atausinpa mararî pra. Tîîse tiwin wei mîîkîrî tîweꞌmarimasen moꞌkatoꞌ weiyu erepamî kupî sîrîrî. Mîrîrî yai tekkarikon yonpa toꞌya pepîn kupî sîrîrî teesewankonoꞌmakon yeꞌnen —taꞌpî Jesusya.

"

¹⁶ Inîꞌrî toꞌ nepuꞌtî ton ekaremekîꞌpî Jesusya. Taꞌpîiya: —Aꞌkî, anîꞌya amenan kamisa wanî poiꞌpî iipiaꞌpî yaꞌtî pepîn eꞌpainon, ipoiꞌpî pon eꞌkarakasaꞌ irumentanîꞌtoꞌpe. Maasa pra amenan emoꞌka ipoiꞌpî poi moropai inîꞌ panpîꞌ aweꞌkaraka."

¹⁷ Moropai taꞌpîiya inîꞌrî: —Anîꞌya amenan woꞌ yaraꞌtî pepîn eꞌpainon, ipoiꞌpî pe tîweꞌsen itenseꞌ yaꞌ. Maasa pra woꞌ maiꞌtaya tenseꞌ yaꞌmorikka. Moropai woꞌ etiꞌkamo, aamaꞌta. Mîrîrî namai woꞌ amenan yaraꞌtî eꞌpai awanî amenan itenseꞌ yaꞌ —taꞌpî Jesusya. ˻Mîrîrî taꞌpîiya amenan esenupantoꞌ pîꞌ tenupaiyaꞌnîkon epuꞌtoꞌpe toꞌya.˼

"

¹⁸ Miarî Jesus eseurîma koꞌmannîpî tanne pemonkonyamîꞌ pîꞌ, toꞌ epereꞌtoꞌkon esaꞌ Judeu erepamîꞌpî Jesus pia. Moropai aweꞌsekunkaꞌpî irawîrî. Moropai taꞌpîiya Jesus pîꞌ: —Uyensi saꞌmantan pîꞌ man. Mîrîrî yeꞌnen aase uyewîꞌ ta uyensi pona ayenya tîîtaneꞌkî awennapantoꞌpe.

"

¹⁹ Mîrîrî yeꞌnen Jesus wîtîꞌpî iwenairî moropai inenupaꞌsan nîrî wîtîꞌpî ipîkîrî.

"

²⁰ Mîrîrî yai wîriꞌ wanîꞌpî asakîꞌne puꞌ pona tîîmoꞌtai konoꞌ kaisarî mîn iꞌkamo pîꞌ tîîkoꞌmansen. Mîîkîrî iipîꞌpî Jesus mopai winî moropai mîîkîrîya Jesus pon yeꞌpi pîꞌ yapîꞌpî."

²¹ Mîîkîrî wîriꞌ esenumenkasaꞌ wanîꞌpî see warantî: —Ipon yeꞌpi pîꞌ yapîsauꞌya ya, esepiꞌtî —kaiꞌma eesenumenkasaꞌ wanîꞌpî.

"

²² Jesus eraꞌtîꞌpî mîîkîrî wîriꞌ eraꞌmai, moropai taꞌpîiya ipîꞌ: —Eranneꞌ pe pra eꞌkî, maꞌnon. Innape ukupîya yeꞌnen esepiꞌtîn pîꞌ nai —taꞌpîiya. Moropai mîrîrî pe rî eesepiꞌtîsaꞌ wanîꞌpî."

²³ Mîrîrî tîpo Jesus wîtîꞌpî toꞌ epereꞌtoꞌkon esaꞌ yewîꞌ ta. Teerepamî pe, pemonkonyamîꞌya wîriꞌ saꞌmantasaꞌ yeremu yeꞌnunpa etaꞌpîiya. Moropai pemonkonyamîꞌya mararî pra “waawa” taꞌpî, tîkaraukon yeꞌka pe."

²⁴ Inkamoro pîꞌ taꞌpî Jesusya: —Tamîꞌnawîrî epaꞌkatî tarîpai. Maasa pra mîserî more saꞌmantasaꞌ pra man iweꞌnasaꞌ neken man —taꞌpîiya. Mîrîrî warantî taasaiꞌya yeꞌnen, Jesus pîꞌ toꞌ oꞌmaꞌta piaꞌtîꞌpî."

²⁵ Miarî pai inkamoro pemonkonyamîꞌ epaꞌkaꞌpî tanne, Jesus ewomîꞌpî, oꞌnon pata mîîkîrî wîriꞌ isaꞌmantaꞌpî eꞌtoꞌ ta. Moropai mîîkîrî yenya pîꞌ Jesusya yapisîꞌpî, moropai mîîkîrî eꞌmîꞌsaꞌkaꞌpî."

²⁶ Mîrîrî kuꞌsaꞌ Jesusya mîîkîrî wîriꞌ yarakkîrî yekare etaꞌpî tamîꞌnawîronkon pemonkonyamîꞌya, mîrîrî pata ponkonya.

"

²⁷ Moropai Jesus wîtîꞌpî mîrîrî pata poi. Attî tanne, eꞌma taawîrî asakîꞌnankon warayoꞌkon enkaruꞌnankon iipîꞌpî iteꞌmaꞌpî pîꞌ, tîwentaimepîtîkon yeꞌka pe. Taꞌpî toꞌya ipîꞌ: —Amîrî Davi paarîꞌpî, pemonkonyamîꞌ pîikaꞌtîton, anna eraꞌmakî aꞌnokoꞌpî pe saꞌne —taꞌpî toꞌya ipîꞌ.

"

²⁸ Wîttî ta Jesus ewomîꞌpî, moropai inkamoro enkaruꞌnankon erepamîꞌpî Jesus pia aminke pra. Moropai inkamoro ekaranmapoꞌpî Jesusya: —Innape ayepiꞌtîuyaꞌnîkon kupî pîꞌ naatî? —taꞌpîiya. —Inna, anna yepotorî —taꞌpî toꞌya ipîꞌ."

²⁹ Jesusya toꞌ yenukon yapîꞌpî. Moropai taꞌpîiya: —Innape puꞌkuru ukupîyaꞌnîkon yeꞌnen, ayepiꞌtîuyaꞌnîkon sîrîrî."

³⁰ Moropai inkamoro yenu esepiꞌtîsaꞌ wanîꞌpî. Inkamoro pîꞌ taꞌpî Jesusya: —Anîꞌkan pîꞌ sîrîrî eesepiꞌtîsaꞌkon manniꞌ kîsekaremeꞌtî —taꞌpîiya.

"

³¹ Tîîse inkamoro esepiꞌtîsaꞌ wîtîꞌpî. Moropai inkamoroya tepiꞌtîsaꞌkon Jesusya ekaremekîꞌpî tamîꞌnawîronkon mîrîrî pata poronkon pîꞌ.

"

³² Inkamoro wîtîꞌpî tanne, tiaronkon pemonkonyamîꞌya warayoꞌ eseurîmakoi pepîn yarîꞌpî, Jesusya yepiꞌtîtoꞌpe. Mîîkîrî wanîꞌpî yaꞌ oꞌmaꞌ tîweꞌsen pe. Mîrîrî yeꞌnen eeseurîma pra awanîꞌpî."

³³ Mîîkîrî oꞌmaꞌ yenpaꞌkaꞌpî Jesusya pataꞌpî pe warayoꞌ eseurîma piaꞌtîꞌpî. Mîîkîrî eseurîmakoi pepîn eraꞌma tîuyaꞌnîkon yeꞌnen tamîꞌnawîronkon pemonkonyamîꞌ wanîꞌpî kureꞌne teesenumenkai mîrîrî pîꞌ. Inkamoroya taꞌpî: —Sîrîrî yeꞌka eꞌkupî eraꞌmasaꞌ pra man tarî Israel pata po.

"

³⁴ Tîîse fariseuyamîꞌya taꞌpî: —Mîîkîrî wanî mîrîrî oꞌmaꞌkon yepuru pe tîweꞌsen winîpai meruntî yapiꞌnen pe. Mîrîrî yeꞌnen ikupîiya mîrîrî meruntî ke. Maasa pra mîîkîrî oꞌmaꞌkon yepuruya iipia meruntî tîîsaꞌ ikuꞌtoꞌpeiya —taꞌpî toꞌya.

"

³⁵ Jesus asarîꞌpî cidadekon poro tamîꞌnawîrî moropai pemonkonyamîꞌ koꞌmantoꞌkon poro aasarîꞌpî. Toꞌ yenupa pinunpaꞌpîiya Judeuyamîꞌ epereꞌtoꞌkon yewîꞌkon tapîꞌ. Moropai morî itekare ekaremekîꞌpîiya, tamîꞌnawîronkon esaꞌ pe Paapa iipî kupî ekaremekîꞌpîiya. Moropai tamîꞌnawîronkon pemonkonyamîꞌ yepiꞌtîꞌpîiya. Tuꞌkan parankon winîpai toꞌ yepiꞌtîꞌpîiya."

³⁶ Arinîkon pemonkonyamîꞌ eraꞌma tîuya pe, Jesusya tîꞌnokoꞌpî pe toꞌ eraꞌmaꞌpî. Maasa pra inkamoro pemonkonyamîꞌ wanîꞌpî itesaꞌ pînon carneiroyamîꞌ, ataꞌkaꞌmaꞌsan warantî toꞌ eraꞌmaꞌpîiya. Toꞌ eꞌtarumaꞌtîsaꞌ, toꞌ pîikaꞌtînen ton pra eraꞌmaꞌpîiya."

³⁷ Mîrîrî yeꞌnen taꞌpîiya tînenupaꞌsan pîꞌ: —Maasa eraꞌmatî. Esenyakaꞌmantoꞌ man mararî pra, tîîse teesenyakaꞌmasen ton pra man. Tuꞌke pra teesenyakaꞌmasanon man —taꞌpîiya."

³⁸ —Mîrîrî yeꞌnen Paapa pîꞌ esaꞌtî inîꞌ panpîꞌ teesenyakaꞌmasanon tonkon yarimatoꞌpeiya, mararî pra esenyakaꞌmantoꞌ pîꞌ toꞌ esenyakaꞌmatoꞌpe —taꞌpî Jesusya toꞌ pîꞌ.

"

10

¹ Jesusya warayoꞌkon asakîꞌne puꞌ pona tîîmoꞌtaiꞌnîkon yannoꞌpî tîîpia. Moropai inkamoro pia meruntî tîrîꞌpîiya, oꞌmaꞌkon yarakkîrî tîweꞌsanon yapai toꞌ yenpaꞌkatoꞌpe toꞌya tîmaimu ke. Moropai tamîꞌnawîron paran winîpai toꞌ yepiꞌtîtoꞌpe toꞌya toꞌ yeparankon winîpai."

² Inkamoro asakîꞌne puꞌ pona tîîmoꞌtaiꞌnîkon eseꞌ wanîꞌpî see warantî. Eꞌmaiꞌnon wanîꞌpî Simão, tîîse Pedro kaiꞌma esatîꞌpî toꞌya moropai itakon André. Tiago moropai itakon João Zebedeu munkîyamîꞌ."

³ Moropai Filipe moropai Bartolomeu moropai Tomé moropai Mateus manniꞌ tesanonkon pia toꞌ nîtîrî tîniru yapisî pîꞌ teesenyakaꞌmasen. Moropai Tiago Alfeu munmu moropai Tadeu."

⁴ Moropai Simão, manniꞌ teepîsen Zelote taatoꞌ, moropai Judas Iscariotes manniꞌ Jesus rumakatîpon iteyatonon pia.

"

⁵ Inkamoro warayoꞌkon yaipontîꞌpî Jesusya toꞌ wîtîtoꞌpe. Tîmaimu tîrîꞌpîiya toꞌ pia see warantî: —Attîkon ya, katîtî Judeuyamîꞌ pepîn pata yaꞌ. Moropai Samaria cidaderî pona kewontî —taꞌpîiya."

⁶ —Tîîse aminke Paapa piapainokon Israel ponkon koreꞌta itesaꞌ pînon carneiro warainonkon muwatîi —taꞌpîiya toꞌ pîꞌ."

⁷ —Atîtî inkamoro pîꞌ “Aminke pra tamîꞌnawîronkon esaꞌ pe Paapa iiꞌtoꞌ man”, makatîi toꞌ pîꞌ. “Tîpemonkonoyamîꞌ pîikaꞌtîiya kupî sîrîrî”, makatîi."

⁸ Moropai ereꞌkîpankon mepiꞌtîtîi, moropai tiaron paran pîꞌ tîweꞌsanon mepiꞌtîtîi. Moropai isaꞌmantaꞌsan miꞌmîꞌsaꞌkatîi. Moropai oꞌmaꞌkon yarakkîrî tîweꞌsanon yapai menpaꞌkatîi. Mîrîrî warantî mîkuꞌtîi teꞌmai pra. Maasa pra teꞌmai pra sîrîrî meruntî yapisîꞌpîyaꞌnîkon. Mîrîrî warantî nîrî itîîtî antîrîkon itepeꞌpî tuwai pra."

⁹ Attîkon ya îꞌ rî kîsatî asakunikon yaꞌ. Ouro moropai prata moropai tîniru enaꞌpî kîsatî itenseꞌ yaꞌ."

¹⁰ Attîkon ya aponkon ton kîsatî moropai aꞌsaꞌsakon ton kîsatî. Moropai ameꞌsipukon kîsatî aapîtatoꞌkon ton. Maasa pra teesenyakaꞌmasanonya taꞌreꞌkon ton yapisî eꞌpai awanî —taꞌpîiya toꞌ pîꞌ.

"

¹¹ —Eerepamîkon ya cidade pona pemonkonyamîꞌ koreꞌta, eewomîkon ya amîrîꞌnîkon anapiꞌpai tîweꞌsen pemonkon muwatîi. Moropai mîîkîrî pia makoꞌmantîi attîkon pîkîrî."

¹² Mîîkîrî pemonkon yewîꞌ ta eewomîkon ya makatîi tîîwanmîra eꞌnîtoꞌ wanî pe man sîrîrî wîttî ta."

¹³ Anîꞌ amîrîꞌnîkon yapiꞌnen wanî ya morî pe mîîkîrî pia morî tîîwanmîn wanî yarakkîrî. Tîîse amîrîꞌnîkon yapisîiya pra awanî ya, atîtî iipiapai, iipia tîweꞌse pra. Mîrîrî yeꞌnen tîîwanmîn wanî pepîn iipia, tîîse aapiaꞌnîkon neken awanî."

¹⁴ Moropai miarî tewîꞌkon ta cidade po ayapisîkon toꞌya pra toꞌ wanî ya morî pe, moropai amaimukon anetapai pra toꞌ wanî ya, miarî pai mepaꞌkatîi toꞌ koreꞌtapai. Moropai eepaꞌkakon pe miarîpai aꞌsaꞌsakon pîꞌ atapisîꞌpî non paꞌtîyaꞌnîkon eꞌpai awanî. Mîrîrî kupîyaꞌnîkon ya, Paapa pia morî pe pra toꞌ wanî, amaimukon anetapai pra toꞌ wanî ekaremekîyaꞌnîkon."

¹⁵ Ayenkuꞌtîuyaꞌnîkon pepîn. Îꞌ pensa pemonkonyamîꞌ yenumî Paapaya weiyu erepamî yai toꞌ eꞌtarumaꞌtî pe man. Mîrîrî yai toꞌ eꞌtarumaꞌtî pe man mararî pra, manniꞌkan Sodoma cidaderî ponkon nurîꞌtî moropai Gomorra cidaderî ponkon eꞌtarumaꞌtîꞌpî yentai —taꞌpî Jesusya.

"

¹⁶ —Maasa îꞌ tauya etatî. Amîrîꞌnîkon yarimauya sîrîrî nariꞌkon kaikusiyamîꞌ warainonkon koreꞌta attîkonpa. Amîrîꞌnîkon wanî carneiroyamîꞌ warantî. Mîrîrî yeꞌnen tîwarî eꞌtî, epuꞌnen pe eesenkuꞌtîkon namai. Tîîse eranmîra eꞌtî tiaronkon pîꞌ îꞌ imakuiꞌpî tîkuꞌse pra nariꞌ pe pra wakuꞌkaimîyamîꞌ warantî."

¹⁷ Moropai tepuꞌse eꞌtî, ayarîkon toꞌya ya toꞌ epereꞌtoꞌ yewîꞌkon ta, apîꞌnîkon teeseurîmakonpa. Mîrîrî yai tiaronkonya apoꞌpîtîkon mîrîrî toꞌ epereꞌtoꞌkon yewîꞌ tapîꞌ poꞌpînnîtoꞌ ke."

¹⁸ Uurî wenai mîrîrî warantî akupîkon toꞌya. Pata esaꞌ pia ayarîkon toꞌya moropai pata esanon esaꞌ pia ayarîkon toꞌya. Mîrîrî yai inkamoro pîꞌ umaimu ekaremekîyaꞌnîkon. Moropai manniꞌkan Judeuyamîꞌ pepîn pîꞌ nîrî umaimu ekaremekîyaꞌnîkon."

¹⁹ Îꞌ pensa amîrîꞌnîkon yarî toꞌya yai eꞌtarumaꞌtîntoꞌ yaꞌ, kîsewankonoꞌmatî îꞌ kaiꞌma amaimu ton pra awanî pîꞌ. Maasa pra uurîya amaimukon ton tîrî îꞌ kaiꞌma epuꞌnen pe awanîkonpa. Toꞌ maimu yuꞌtoꞌyakon ton tîrîuya mîrîrî pe rî —taꞌpî Jesusya."

²⁰ —Mîrîrî amaimukon yuꞌtoꞌyaꞌnîkon wanî pepîn aawarîrîꞌnîkon aneporîꞌpîkon pe. Tîîse awanî Paapa yekaton winîpainon pe. Mîrîrî yeꞌnen mîîkîrî eseurîma amîrîꞌnîkon pe.

"

²¹ Mîrîrî yeꞌnen tepuꞌse eꞌtî maasa pra amîrîꞌnîkon rumaka tiaronkon pepîn rî ayonpakonya aasaꞌmantakonpa. Moropai toꞌ yunkonyamîꞌya tînmukukon rumaka toꞌ saꞌmantatoꞌpe nîrî. Moropai toꞌ munkîyamîꞌ ena tîyunkon yeyaton pe moropai tîyunkon wîî meꞌpo toꞌya."

²² Moropai tamîꞌnawîronkon pemonkonyamîꞌ yewanma pe amîrîꞌnîkon ena uyeseꞌ wenai. Tîîse anîꞌya yapîtanîpî ya, eꞌtarumaꞌtîntoꞌ meruntî ke tîîsaꞌmanta pîkîrî, mîîkîrî eꞌpîikaꞌtî pe man."

²³ Oꞌnon pata amîrîꞌnîkon yewanmîrî toꞌya ya, moropai amuꞌtunpakon toꞌya ya, cidade poi mepetîi tiaron pata pona. Maasa pra tauya sîrîrî apîꞌnîkon. Eesenyakaꞌmatoꞌkon yaretîꞌkasaꞌyaꞌnîkon eserîke pra naatîi, tamîꞌnawîrî cidadekon poro Judeuyamîꞌ pata poro, uurî, kaꞌ poi iipîꞌpî erepamî rawîrî.

"

²⁴ Aꞌkî, teesenupasen wanî pepîn tenupanen yentai. Moropai tîkaraiwarî yentai ipoitîrî wanî pepîn."

²⁵ Tîîse teesenupasen wanî ya tenupatîpon kaisarî, morî pe awanî. Moropai tîkaraiwarî kenan poitîrî wanî ya tîkaraiwarî kaisarî, morî pe awanî. Itentai awanî eserîke pra. Mîrîrî yeꞌnen Belzebu winîpai meruntî yapisîiya taa toꞌya ya upîꞌ itentai panpîꞌ taa toꞌya awinîkîiꞌnîkon, maasa pra uwenaironkon pe awanîkon —taꞌpî Jesusya.

"

²⁶ —Mîrîrî yeꞌnen eranneꞌ pe pra eꞌtî inkamoro yeꞌkakon warayoꞌkon seruꞌyeꞌkon pîꞌ. Maasa pra tamîꞌnawîrî uyeserukon teeseraꞌmai pra siꞌpî, eseraꞌma kupî sîrîrî aronne. Moropai tamîꞌnawîrî îꞌ taꞌpî uurîꞌnîkonya amaꞌ pe, umaimukon esepuꞌtî kupî sîrîrî."

²⁷ Mîrîrî warantî îꞌ tauya manniꞌ apîꞌnîkon tiaronkonya eta pra tîîse mîrîrî mekaremeꞌtîi tamîꞌnawîronkon pîꞌ epuꞌtoꞌpe toꞌya. Moropai uwinîpai anetaꞌpîkon tiaronkon netaꞌpî pepîn, mîrîrî mekaremeꞌtîi aronne tamîꞌnawîronkonya epuꞌtoꞌpe."

²⁸ Mîrîrî yeꞌnen tauya sîrîrî apîꞌnîkon. Eranneꞌ pe pra eꞌtî manniꞌ amîrîꞌnîkon wîînen pîꞌ. Awîtîpoꞌnokon ayekatonkon wîiya eserîke pra man. Tîîse tauya sîrîrî eranneꞌ pe eꞌtî Paapa pîꞌ. Maasa pra mîîkîrîya awîkon tarî moropai ayekatonkon yenumîiya eꞌpainon apoꞌ yaꞌ —taꞌpî Jesusya."

²⁹ Moropai taꞌpîiya: —Aꞌkî, îrîwoꞌyamîꞌ ke toꞌ eꞌrepa epeꞌmîra tiwin prata enaꞌpî. Tîîse inkamoro koreꞌta tiwin ena ya non pona, Paapa, Uyunkonya epuꞌtî. Iwanmînon pepîn inkamoro. Toꞌ koꞌmannîpîiya."

³⁰ Mîrîrî warantî amîrîꞌnîkon puꞌpai siꞌpo wanî tuꞌke teuren, tamîꞌnawîrî Paapaya epuꞌtî, maasa pra ikuꞌneꞌtîsaiꞌya yeꞌnen."

³¹ Mîrîrî yeꞌnen eranneꞌ pe pra eꞌtî. Maasa pra inkamoro toronyamîꞌ koꞌmannîpî tîuya yentai Paapaya amîrîꞌnîkon koꞌmannîpî tamîꞌnawîrî —taꞌpî Jesusya.

"

³² —Pemonkonyamîꞌya taa ya aronne tiaronkonya eta tanne, upemonkono pe tîwanî taiya ya. Mîrîrî warantî nîrî tauya Paapa kaꞌ pon rawîrî siꞌma upemonkono mîserî tauya ipîꞌ."

³³ Tîîse anîꞌya tiaronkon rawîrî siꞌma “Uurî kaane, ipemonkono pepîn uurî”, taiya ya, uurîya nîrî mîrîrî warantî taa Paapa kaꞌ pon rawîrî siꞌma. “Upemonkono pepîn mîîkîrî”, tauya —taꞌpî Jesusya.

"

³⁴ —Tîîse kîsenumenkatî morî tîwanmîn enepîuya kaiꞌma sîrîrî non pona uuipî pîꞌ. Tîîse tauya sîrîrî apîꞌnîkon, morî tîwanmîn eneꞌsauꞌya pra wai. Eseyaton pîꞌ pemonkonyamîꞌ wanî kupî sîrîrî uwenai.
"

³⁵

Maasa pra tîyunkon yarakkîrî toꞌ munkîyamîꞌ wanî pe man teekoreꞌmai.
Moropai toꞌ munkîyamîꞌ wîriꞌsanyamîꞌ wanî pe man tîsankon yarakkîrî teekoreꞌmai.
Moropai toꞌ paꞌsetonon wanî pe man tawoꞌpîkon yarakkîrî teekoreꞌmai.
"

³⁶

Mîrîrî warantî ayonpakon rî wanî pe man ayeyatonkon pe, tiaronkon pepîn
—taꞌpî Jesusya.

"

³⁷ —Anîꞌya tîyun, tîsan yapurî ya, uyapurî tîuya yentai mîîkîrî wanî eserîke pra awanî upemonkono pe. Moropai anîꞌya tînmukuyamîꞌ yapurî ya, uyapurî tîuya yentai, mîîkîrî wanî eserîke pra awanî upemonkono pe."

³⁸ Manniꞌ uyapurînen wanî ya, mîîkîrîya uwenai tamîꞌnawîrî tîweꞌtarumaꞌtîtoꞌ yapîtanîpîiya pra awanî ya, upemonkono pe eserîke pra awanî. Moropai uwenairî aaipî eserîke pra awanî."

³⁹ Anîꞌya tîweꞌtarumaꞌtîtoꞌ yapîtanîpî pra awanî ya, kureꞌne tîîkoꞌmantoꞌ pînînmaiya yeꞌnen tarî non po, mîîkîrîya ipatîkarî tîîkoꞌmantoꞌ ton eporî pepîn tîîse aasaꞌmanta pe man. Tîîse anîꞌya tîweꞌtarumaꞌtîtoꞌ nama pra awanî ya uwenai, mîîkîrîya enen tîîkoꞌmantoꞌ ton eporî ipatîkarî —taꞌpî Jesusya.

"

⁴⁰ —Aꞌkî, anîꞌya amîrîꞌnîkon yapisî morî pe, mîîkîrî ayapisîtîponkonya morî pe uyapisî nîrî. Moropai mîîkîrî uyapisîtîponya uyarimatîpon Paapa yapisî nîrî."

⁴¹ Moropai morî pe Paapa maimu ekaremeꞌnen yapiꞌsaꞌ anîꞌya ya tewîꞌ ta, morî eporîya pe man. Maasa pra yapisîꞌpîiya Paapa maimu ekaremeꞌnen pe awanî yeꞌnen. Mîîkîrî repa Paapaya, tîmaimu ekaremeꞌnen repa tîuya warantî. Moropai anîꞌya morî kuꞌnen yapisî ya tewîꞌ ta, morî eporîiya pe man. Maasa pra yapisîꞌpîiya, morî pe mîîkîrî wanî yeꞌnen. Moropai mîîkîrî repa Paapaya, morî kuꞌnen repa tîuya warantî."

⁴² Anîꞌya tuna tîrî ya, iꞌnîꞌ kenan tiwin copo kaisarî upemonkonoyamîꞌ yaꞌmiꞌpî pia, siꞌmîrikkî pe tîîse iwoꞌpaiya ya, mîîkîrî wanî upemonkono pe. Ayenkuꞌtîuya pepîn, mîîkîrî nîrî repa Paapaya. Iwaꞌkaiya pepîn —taꞌpî Jesusya.

"

11

¹ Mîrîrî warantî tînenupaꞌsan yeurîma tîpo, Jesus epaꞌkaꞌpî miarî pai. Moropai attîꞌpî. Pemonkonyamîꞌ yenupa piaꞌtîꞌpîiya. Paapa maimu ekaremekî pinunpaꞌpîiya mîrîrî cidadekon poro aminke pra.

"

² Mîrîrî yai João Batista wanîꞌpî atarakkannîtoꞌ yewîꞌ ta. Miarî siꞌma Cristoya îꞌ kupî yekare etaꞌpî Joãoya. Mîrîrî yeꞌnen tînenupaꞌsan yarimaꞌpî Joãoya."

³ Jesus ekaranmapoi toꞌ wîtîtoꞌpe taatoꞌpe toꞌya: —Amîrî manniꞌ tarîwaya aaipîton anna nînîmîkî, kaane kaꞌrî tiaron moro nai aaipîton? —taꞌpî toꞌya ipîꞌ.

"

⁴ Jesusya inkamoro maimu yuukuꞌpî: —Ennaꞌpotî moropai João pîꞌ aneraꞌmaꞌpîkon moropai anetaꞌpîkon mekaremeꞌtîi —taꞌpîiya toꞌ pîꞌ."

⁵ —Tarî enkaruꞌnankonya eraꞌma pîꞌ man. Moropai asakoiꞌkon pepîn asanî pe man. Moropai priꞌyawonkon pepîn erekîꞌpankon esepiꞌtîsaꞌ man. Moropai panaꞌtîꞌpankonya eta pîꞌ man. Moropai isaꞌmantaꞌsan eꞌmîꞌsaꞌkan pîꞌ man. Moropai Paapa maimu esekaremeꞌnî pîꞌ man manniꞌkan pemonkonyamîꞌ tîweꞌtarumaꞌtîsanon pîꞌ. Tamîꞌnawîrî mîrîrî makatîi João pîꞌ. ˻Pena Paapa nîmenkaꞌpî pîꞌ teeseurîmasen profeta warantî eesekaremeꞌsaꞌ man.˼ —taꞌpî Jesusya."

⁶ —Taatausinpai puꞌkuru manniꞌ innape puꞌkuru ukuꞌnen, tîwî tîkuꞌse pra moropai teesenumenka yawîrî pra unkupî pîꞌ teesewankonoꞌmai pra mîîkîrî wanî —taꞌpîiya.

"

⁷ Inkamoro João nenupaꞌsan wîtîꞌpî tanne, tîîpiapai Jesusya pemonkonyamîꞌ yeurîma piaꞌtîꞌpî, João Batista yekare pîꞌ: —Keren pona attîsaꞌkon yai, João yarakkîrî esepose Îꞌ eraꞌmaꞌpîyaꞌnîkon? Konoiꞌ yepu yarimapîtî aꞌsitunya kaꞌrî? —taꞌpîiya."

⁸ —Îꞌ eraꞌmaꞌpîyaꞌnîkon kin, warayoꞌ morî pe epontîꞌpî kaꞌrî morî tîpon yaꞌ eraꞌmaꞌpîyaꞌnîkon? Aꞌkî, tauya sîrîrî apîꞌnîkon. Warayoꞌ morî pe tîpon yaꞌ epontîꞌpî wanî ya, mîîkîrî koꞌmamî eꞌpainon morî puꞌkuru wîttî ta, ipîkku pe tîweꞌsen yewîꞌ ta —taꞌpîiya."

⁹ —Moriya kaꞌtî upîꞌ îꞌ eraꞌmaꞌpîyaꞌnîkon? Paapa maimu ekaremeꞌnen penaron profeta kaꞌrî? Inna, seruꞌ pepîn tauya sîrîrî apîꞌnîkon. Paapa maimu ekaremeꞌnen profeta yentainon eraꞌmaꞌpîyaꞌnîkon."

¹⁰ Maasa pra mîîkîrî João wanî manniꞌ Paapaya taꞌpî yawîrî.

“Aꞌkî mîserî umaimu ekaremeꞌnen yarimauya kupî sîrîrî arawîrî attîtoꞌpe.
Ayeꞌmarî ton konekai eꞌmaiꞌ pe attîtoꞌpe”,
taꞌpî Paapaya —taꞌpî Jesusya."

¹¹ —Ayenkuꞌtîuya pepîn. Mîîkîrî João wanî tamîꞌnawîronkon pemonkonyamîꞌ yentai tîweꞌsen pe. Tîîse anîꞌ wanî ya innape uurî kuꞌnen ipîkku pe pra siꞌma, mîîkîrî esaꞌ Paapa wanî moropai mîîkîrî wanî João yentai —taꞌpîiya."

¹² Jesusya taa koꞌmannîpîꞌpî: —Joãoya pemonkonyamîꞌ esaꞌ pe Paapa iiꞌtoꞌ ekaremekî piaꞌtîꞌpî patapai, sîrîrî tîpose Paapa pemonkono pe enapai arinîkon pemonkonyamîꞌ wanîꞌpî. Mîrîrî anetapai toꞌ wanî kureꞌne."

¹³ Maasa pra tamîꞌnawîronkon Paapa maimu ekaremeꞌnenan profetayamîꞌ nurîꞌsan moropai Moisés nurîꞌtîya yenupantoꞌya taasaꞌ pîikatîton iipî pe man. Moropai mîrîrî ekaremeꞌse João iipîꞌpî."

¹⁴ Mîîkîrî João wanî mîrîrî Elias pe, manniꞌ Paapa maimu ekaremeꞌnen profetaya aaipî taꞌpî. Mîîkîrî kuꞌtî innape ankuꞌpai awanîkon ya."

¹⁵ Sîrîrî itekare anepuꞌpai awanîkon ya, etatî morî pe —taꞌpîiya.

"

¹⁶ Mîrîrî yeꞌnen taꞌpî Jesusya: —Anîꞌkan warantî see sîrîrî pankon pemonkonyamîꞌ kupîuya eꞌpainon? Inkamoro wanî moreyamîꞌ poroyiꞌpî po siꞌma tîsuꞌminansenon warantî. Tiaron moreyamîꞌ entaimepîtî toꞌ pîꞌ toꞌ pokonpe tîsuꞌminkonpa."

¹⁷ Taꞌpî toꞌya:

“Tîweꞌmarimasen waiyi yeꞌnunpaꞌpî annaya amananukonpa
tîîse amanunukon pra awanîꞌpîkon.
Moropai isaꞌmantaꞌpî kararunpatoꞌ yeremu kupîꞌpî annaya,
tîîse akaraukon pra awanîꞌpîkon”,
taꞌpî toꞌya."

¹⁸ Tonpakonya ikupî warantî pra João Batistaya tekkari yonpa pra awanîꞌpî tuiꞌsaꞌ yai. Moropai tîwuku enîrîiya pra awanîꞌpî. Mîîkîrî pîꞌ tamîꞌnawîronkonya oꞌmaꞌ yarakkîrî tîweꞌsen pe awanî mîrîrî taꞌpî."

¹⁹ Moropai uurî, kaꞌ poi iipîꞌpî entamoꞌka pîꞌ moropai uwuku enîrîuya pîꞌ taa toꞌya upîꞌ: “Aꞌkî mîîkîrî warayoꞌ wanî kureꞌne taꞌreꞌ yonpanen pe moropai kureꞌne tîwuku enîꞌnen pe awanî”, taa toꞌya. “Moropai tesanonkon pia toꞌ nîtîrî tîniru yapiꞌnenan yonpa pe awanî mîrîrî”, taa toꞌya. “Imakuiꞌsan pemonkonyamîꞌ yonpa pe awanî”, taa toꞌya. Tîîse tauya anîꞌya Paapa winîpainon epuꞌnen yapisî ya, mîîkîrî yeseru wanî morî pe —taꞌpî Jesusya.

"

²⁰ Mîrîrî yai Jesusya mîrîrî cidadekon po, eserîkan pepîn kupî tîuya eraꞌmatîponkon yekaꞌnunkaꞌpî mararî pra, maasa pra tîmakuyikon rumakasaꞌ toꞌya pra toꞌ wanî yeꞌnen. Mîrîrî yeꞌnen taꞌpîiya toꞌ pîꞌ:"

²¹ —Aka saꞌne, amîrîꞌnîkon Corazim cidaderî po tîîkoꞌmansenon. Aka saꞌne, amîrîꞌnîkon Betsaida cidaderî po tîîkoꞌmansenon. Maasa pra mîrîrî ikupî eserîkan pepîn apatakon yaꞌ eꞌkupî eꞌkuꞌsaꞌ ya, Tiro cidaderî po moropai Sidom po, miarî tîîkoꞌmansenonya imakuiꞌpî pe tîweꞌtoꞌkon rumakaꞌpî toꞌya eꞌpainon pena. Moropai imakuiꞌpî rumaka tîuyaꞌnîkon ekaremekîꞌpî toꞌya eꞌpainon, moropai saaku yaꞌ yekaꞌmaꞌpî toꞌya eꞌpainon, urunuꞌpî tîrîꞌpî toꞌya eꞌpainon tîpuꞌpaikon pona, teesewankonoꞌmakon ekaremekîkonpa."

²² Ayenkuꞌtîuyaꞌnîkon pepîn. Tamîꞌnawîronkon yenumî Paapaya weiyu yai, eesewankonoꞌmakon kupî sîrîrî mararî pra, Tiro cidaderî ponkon pemonkonyamîꞌ esewankonomaꞌpî yentai. Moropai Sidom ponkon eꞌtarumaꞌtîꞌpî yentai, amîrîꞌnîkon eꞌtarumaꞌtî kupî sîrîrî. Maasa pra innape imaimu kuꞌsaꞌyaꞌnîkon pra awanîkon yeꞌnen."

²³ Amîrîꞌnîkon kanan Cafarnaum ponkon, kaꞌ pona attîkon kaiꞌma eesenumenkakon. Tîîse kaꞌ pona ayanuꞌnîpîkon Paapaya pepîn amakuyikon wenai. Tîîse Paapaya atîꞌkakon kupî sîrîrî. Maasa pra mîrîrî îꞌ ikupî eserîkan pepîn apatakon yaꞌ eꞌkupîꞌpî eꞌkuꞌsaꞌ ya Sidom cidaderî po, moro tîîkoꞌmansenon tîꞌkaꞌpî Paapaya pepîn eꞌpainon sîrîrî tîpose —taꞌpî Jesusya."

²⁴ —Ayenkuꞌtîuyaꞌnîkon pepîn. Paapaya amîrîꞌnîkon tarumaꞌtî kupî sîrîrî mararî pra, Sodoma ponkon tarumaꞌtî tîuya yentai, pemonkonyamîꞌ yenumî tîuya yai —taꞌpî Jesusya.

"

²⁵ Mîrîrî yai Jesus epîremaꞌpî Paapa pîꞌ: —Paapa, tamîꞌnawîron yepotorî amîrî. Kaꞌ konekatîpon amîrî, moropai non konekatîpon. Morî pe man tauya apîꞌ. Maasa pra epuꞌnen pe aweꞌtoꞌ anenomîꞌpî yenposaꞌya epuꞌnenan pepînya ayepuꞌtoꞌpe. Epuꞌnen pe tîweꞌsanonya epuꞌtî namai yenomîꞌpîya moropai pakko pe tîweꞌsanon pia yenposaꞌya epuꞌtoꞌpe toꞌya."

²⁶ Inna Paapa. Sîrîrî kupîꞌpîya ituꞌse awanî yawîrî ikupîꞌpîya.

"

²⁷ Inîꞌrî taꞌpî Jesusya: —Uyunya tamîꞌnawîron tîîsaꞌ man uupia. Anîꞌya uurî, Paapa munmu epuꞌtî pra man tîîse uyunya neken epuꞌtî. Moropai anîꞌya uyun epuꞌtî pra man. Tîîse uurî, inmuya neken epuꞌtî. Moropai manniꞌkanya nîrî epuꞌtî, epuꞌtî toꞌya yuꞌse uurî eꞌtoꞌya. Inkamoro pîꞌ ekaremekîuya —taꞌpî Jesusya.

"

²⁸ Moropai taꞌpîiya toꞌ pîꞌ: —Asiꞌtî uupia tamîꞌnawîronkon amîrîꞌnîkon apîꞌkapîꞌsan. Amîiꞌne pe imakuiꞌpî wanî yeꞌnen aapîꞌkaꞌsaꞌkon. Eturumakatî uupia moropai ipataꞌpî yaꞌ eerîꞌkaꞌtoꞌkon ton tîrîuya."

²⁹ Uurîya ayenupatoꞌkon yapiꞌtî. Esenupatî uyeseru pîꞌ maasa pra uurî eranmîra tîweꞌsen mîîpan pepîn. Mîrîrî warantî eerîꞌkaꞌtoꞌkon eporîyaꞌnîkon uupia."

³⁰ Maasa pra saꞌme pra uyeseru wanî, ikupîkonpa. Moropai aapiaꞌnîkon meruntî tîrîuya amîiꞌmîra aweꞌtoꞌpe —taꞌpî Jesusya.

"

12

¹ Tîîse tîîkoꞌmanse puꞌkuru pra erîꞌkaꞌnîtoꞌ weiyu yai Jesusya mararon pepîn trigo yeꞌka rukkuꞌnîtîꞌpî iratai winîpai tiaron iratai pona tînenupaꞌsan pokonpe siꞌma. Mîrîrî yai emiꞌne toꞌ wanîꞌpî kureꞌne. Mîrîrî yeꞌnen inkamoroya trigo pikka piaꞌtîꞌpî moropai mîrîrî yakuꞌpî toꞌya."

² Mîrîrî kupî toꞌya eraꞌmaꞌpî fariseuyamîꞌya. Inkamoroya taꞌpî Jesus pîꞌ: —Aꞌkî, anenupaꞌsan esenyakaꞌman pîꞌ man erîꞌkaꞌnîtoꞌ weiyu yai. Moisés nurîꞌtîya uyenupaꞌpîkon yawîrî pra, yairî pra toꞌ wanî mîrîrî. Erîꞌkaꞌnîtoꞌ weiyu yai toꞌ esenyakaꞌma —taꞌpî toꞌya.

"

³ Inkamoro maimu yuukuꞌpî Jesusya. Taꞌpîiya toꞌ pîꞌ: —Awenpenatakon pra naatî, pena eꞌmenukaꞌpî kaareta pîꞌ, îꞌ kaiꞌma Davi nurîꞌtî pîꞌ teeseurîmasen? Pena emiꞌne awanîꞌpî moropai itonpayamîꞌ nîrî wanîꞌpî emiꞌne."

⁴ Mîrîrî yeꞌnen mîîkîrî ewomîꞌpî Paapa yewîꞌ ta. Moropai Paapa pia toꞌ nîtîrîꞌpî trigo puusaꞌ moꞌkaꞌpîiya Moisésya yenupantoꞌ yawîrî pra. Moropai tonpayamîꞌ pia itîrîꞌpîiya. Mîrîrî yakuꞌpî toꞌya. Teepîremasanon neken naku toꞌ nîtîrîꞌpî yakuꞌpî toꞌya. ˻Tîîse mîrîrî pîꞌ Paapa ekoreꞌmasaꞌ pra awanîꞌpî.˼"

⁵ Moropai Moisés nurîꞌtî kaaretarîya taasaꞌ erenkasaꞌyaꞌnîkon pra naatî? Erîꞌkaꞌnîtoꞌ weiyu yai teepîremasanon esenyakaꞌma Paapa pia tîntîrîkon poꞌtî pîꞌ epîremantoꞌ yewîꞌ ta. Mîîwîni tîîse Moisés nurîꞌtîya yenupantoꞌ yawîrî pra toꞌ wanî pepîn."

⁶ Tauya sîrîrî apîꞌnîkon. Mîrîrî epîremantoꞌ yewîꞌ eraꞌmayaꞌnîkon manniꞌ yentainon tarî man —taꞌpî Jesusya. ˻Tîpîꞌ eeseurîmaꞌpî epîremantoꞌ yewîꞌ yentai tîwanî pîꞌ.˼"

⁷ —Paapa maimu eꞌmenukasaꞌ see warantî:

“Uurî wanî sîrîrî ituꞌse morî pe eꞌsaꞌnamantoꞌkon tiaronkon yarakkîrî anpoꞌtîkon pe antîrîkon yuꞌse wanî yentai,”
taꞌpî Paapaya. Mîrîrî epuꞌtîyaꞌnîkon ya, îꞌ taatoꞌpe awanî, îꞌ kuꞌnenan pîꞌ aatakoꞌmenkakon pepîn eꞌpainon."

⁸ Maasa pra uurî kaꞌ poi iipîꞌpî wanî erîꞌkaꞌnîtoꞌ weiyu yai, tamîꞌnawîronkon nîkupî ton ekaremeꞌnen pe —taꞌpî Jesusya.

"

⁹ Jesus epaꞌkaꞌpî miarî pai moropai attîꞌpî toꞌ epereꞌtoꞌkon yewîꞌ ta."

¹⁰ Miarî toꞌ epereꞌtoꞌkon yewîꞌ ta tiwin warayoꞌ wanîꞌpî priꞌyawon pepîn itenya apîtaꞌpî. Mîrîrî yai miarî manniꞌkan fariseuyamîꞌ wanîꞌpî îꞌ kupî Jesusya anepuꞌpai, teserukon yawîrî pra, “Aꞌkî, yairî pra awanî,” taakonpa kaiꞌma. Mîrîrî yeꞌnen ekaranmapoꞌpî toꞌya: —Morî pe awanî eꞌpainon? Moisés nurîꞌtîya yenupantoꞌ yawîrî pra pemonkon yepiꞌtîtoꞌpe erîꞌkaꞌnîtoꞌ weiyu yai? —taꞌpî toꞌya.

"

¹¹ Inkamoro maimu yuukuꞌpî Jesusya. Taꞌpîiya toꞌ pîꞌ: —Amîrîꞌnîkon koreꞌta tekîn kenan wanî ya, itekîn carneiro enasaꞌ ya, ituꞌnakan yaꞌ erîꞌkaꞌnîtoꞌ weiyu yai, itesaꞌya kin imoꞌka pepîn eꞌpainon, erîꞌkaꞌnîtoꞌ weiyu pe awanî yeꞌnen? —taꞌpîiya."

¹² —Moriya pemonkon wanî mîrîrî ipîkku pe, carneiro yentai. Mîrîrî yeꞌnen Moisés nurîꞌtîya yenupantoꞌ yawîrî pemonkonyamîꞌ pîikaꞌtîtoꞌpe awanî mîrîrî erîꞌkaꞌnîtoꞌ weiyu yai."

¹³ Moropai Jesusya taꞌpî mîîkîrî warayoꞌ pîꞌ: —Ayenya kainunkî —taꞌpîiya. Moropai temekon kainumîꞌpîiya. Mîîkîrî esepiꞌtîꞌpî. Tiaron itenya ratai warantî, morî pe eenaꞌpî."

¹⁴ Tîîse mîrîrî tîpo fariseuyamîꞌ epaꞌkaꞌpî toꞌ epereꞌtoꞌkon yewîꞌ tapai. Moropai inkamoroya teserukon konekaꞌpî îꞌ kaiꞌma Jesus wîî tîuyaꞌnîkon pîꞌ.

"

¹⁵ Mîrîrî warantî taasaꞌ toꞌya yekare epuꞌtî tîuya pe, Jesus wîtîꞌpî miarîpai. Arinîkon pemonkonyamîꞌ wîtîꞌpî ipîkîrî. Tamîꞌnawîronkon priꞌyawonkon pepîn yepiꞌtîꞌpîiya miarî."

¹⁶ Moropai inkamoro pîꞌ taꞌpî Jesusya teesepiꞌtîsaꞌkon ekaremekî toꞌya namai."

¹⁷ Sîrîrî warantî aweꞌkupîꞌpî maasa pra aweꞌkupî pe man taasaꞌ Paapa maimu ekaremeꞌnen profeta Isaías nurîꞌtîya yawîrî.
"

¹⁸

Taꞌpî Paapaya: —Mîseniꞌ upoitîrî wanî umenkaꞌpî pe, unsaꞌnama pe.
Kureꞌne uurî atausinpasaꞌ puꞌkuru wanî ipîꞌ.
Mîîkîrî pia uyekaton tîrîuya.
Moropai mîîkîrîya îꞌ kaiꞌma Judeuyamîꞌ pepîn pîikaꞌtî kupî yekare ekaremekî, yairî toꞌ eꞌtoꞌpe.
"

¹⁹

Mîîkîrî wanî teesiyuꞌpîꞌsen pe pra tiaron yarakkîrî, moropai tîwentaimepîꞌsen pe pra.
Moropai eꞌma tapîꞌ mîîkîrî maimu eta pemonkonyamîꞌya pepîn.
"

²⁰

Itarumaiꞌsan pemonkonyamîꞌ wanî aꞌtuꞌmîra mana yeꞌ yakiꞌtapapîꞌsaꞌ warantî toꞌ wanî. Tîîse iwaikîꞌ tuꞌkaiya pepîn.
Moropai apoꞌ iparu eꞌtîꞌkaꞌpî yeꞌnen aꞌtuꞌmîra tîweꞌsen yiꞌnîpîiya pepîn.
Tîîse inkamoro yapîtanîpîiya pemonkonyamîꞌ yenumî Paapaya pîkîrî. Mîrîrî yai yairî kuꞌnenan wanî imakuiꞌpî kuꞌnenan yentai.
"

²¹

Mîrîrî yai Judeuyamîꞌ pepînya innape ikupî pe man.
Moropai mîîkîrî winî tîweꞌpîikaꞌtîtoꞌkon nîmîkî pîꞌ toꞌ koꞌmamî pe man,
taꞌpî Isaías nurîꞌtîya pena.

"

²² Mîrîrî yai warayoꞌ enkaruꞌnan moropai imaimu pîn yarîꞌpî toꞌya Jesus pia. Maasa pra imariwaꞌkaꞌ pe awanîꞌpî. Mîîkîrî yepiꞌtîꞌpî Jesusya moropai mîîkîrîya eraꞌma piaꞌtîꞌpî moropai eeseurîmaꞌpî nîrî."

²³ Mîrîrî kupî Jesusya eraꞌmasaꞌ tîuyaꞌnîkon pîꞌ, arinîkon pemonkonyamîꞌ wanîꞌpî mararî pra teesewankonoꞌmai. Moropai inkamoro esekaranmapoꞌpî. Taꞌpî toꞌya: —Pîikaꞌtîton, Davi nurîꞌtî paarîꞌpî, Paapa nîmenkaꞌpî manniꞌ pepîn kin mîserî warayoꞌ? —taꞌpî toꞌya.

"

²⁴ Mîrîrî taa toꞌya eta tîuyaꞌnîkon yeꞌnen, fariseuyamîꞌya yuukuꞌpî: —Inkamoro yeꞌkakon imariwaꞌyamîꞌ yenpaꞌkaiya, meruntîri ton tîîsaꞌ imariwaꞌyamîꞌ yepotorîya mîrîrî iipia Belzebuya, maasa pra makui mîîkîrî Belzebu —taꞌpî toꞌya.

"

²⁵ Tîîse îꞌ kaiꞌma tîpîꞌ toꞌ esenumenkatoꞌ epuꞌtîꞌpî Jesusya. Moropai taꞌpîiya: —Aꞌkî, tiwinan pata yaꞌ tîîkoꞌmansenon wanî ya eseyaton pîꞌ, inkamoro eseyaꞌnama. Moropai toꞌ eꞌtîꞌka tamîꞌnawîrî. Moropai tonpakon pokonpe tîmurukun pe tiwinan wîttî ta tîîkoꞌmansenon wanî ya, inkamoro koꞌmamî teesiyuꞌpîtîkon pîꞌ morî ton pra. Moropai toꞌ ekoreꞌma tuꞌka. Toꞌ eꞌtîꞌka tamîꞌnawîrî. Mîrîrî warantî meruntî ke toꞌ wanî pepîn eꞌpainon."

²⁶ Mîrîrî warantî makui koꞌmamî ya, tîpemonkonoyamîꞌ pokonpe teesiyuꞌpîtî pîꞌ. Meruntî ke awanî pepîn tîpemonkonoyamîꞌ pokonpe. Mîrîrî yeꞌnen Makuiya tîpoitîrîtonon yenpaꞌka pepîn pemonkonyamîꞌ yapai."

²⁷ Tîîse taayaꞌnîkon upîꞌ: “Belzebu meruntîri ke oꞌmaꞌkon yenpaꞌkaiya mîrîrî”, taayaꞌnîkon upîꞌ —taꞌpîiya. —Tîîse mîrîrî warantî awanî ya, anîꞌya meruntî tîrî anenupaꞌsankon pia oꞌmaꞌkon yenpaꞌkatoꞌpe toꞌya? Inkamoroya taa eꞌpainon apîꞌnîkon: “Esenkuꞌtîꞌsan pe awanîkon”, taa toꞌya, ˻Maasa pra inkamoroya meruntî yapisî warantî yapisîuya nîrî —taꞌpîiya.˼"

²⁸ —Tîîse Paapa yekaton meruntîri ke oꞌmaꞌkon yenpaꞌkauya ya, Paapa iiꞌsaꞌ man epuꞌtîyaꞌnîkon ayesaꞌkon pe.

"

²⁹ Aꞌkî, tauya anîꞌ ewomî pepîn eꞌpainon, warayoꞌ tîyurapai kenan tewîꞌ eraꞌmanen pe tîweꞌsen yewîꞌ ta yamaꞌrunpai. Maasa pra meruntî ke awanî yeꞌnen. Tîîse eꞌmaiꞌ pe mîîkîrî yewaꞌtîpîtî yuꞌse wanî moropai îꞌ rî itemanne yamaꞌrunpatoꞌpe.

"

³⁰ Mîrîrî yeꞌnen taꞌpî Jesusya: —Anîꞌya innape ukupî pra awanî ya, uyeyaton pe awanî mîrîrî. Moropai anîꞌ esenyakaꞌma pra awanî ya uurî ton pe, uurî esenyakaꞌmatoꞌ tarumaꞌtîiya mîrîrî —taꞌpî Jesusya."

³¹ —Mîrîrî wenai tauya sîrîrî apîꞌnîkon. Îꞌ rî imakuiꞌpî warayoꞌkon nîkupîꞌpî mîrîrî kupî Paapaya tamîꞌnawîrî tîîwanmîra. Moropai imakuiꞌpî pe Paapa winîkîi toꞌ eseurîmatoꞌkon, mîrîrî kupîiya tîîwanmîra. Tîîse anîꞌ eseurîma ya Morî Yekaton Wannî winîkîi, Makui pe awanî mîrîrî kaiꞌma, imakuiꞌpî pe mîrîrî kupî Paapaya pepîn tîîwanmîra. Tîîse aakoꞌmamî ipatîkarî imakuiꞌpî pe Paapa winîkîi."

³² Moropai taꞌpîiya: —Anîꞌ eseurîma ya uurî kaꞌ poi iipîꞌpî winîkîi imakuiꞌpî pe, mîrîrî imakuiꞌpî inkupîꞌpî kupî Paapaya tîîwanmîra. Tîîse anîꞌ eseurîma ya Morî Yekaton Wannî winîkîi imakuiꞌpî pe, mîrîrî kupî Paapaya pepîn tîîwanmîra sîrîrî pata po tîîse aakoꞌmamî ipatîkarî —taꞌpî Jesusya.

"

³³ Moropai Jesusya taꞌpî: —Aꞌkî, amîrîꞌnîkon pîꞌ tauya îꞌ kaiꞌma yei, teperu tîînen wanî esepuꞌtî iteperu wenai. Morî pe iteperu wanî ya, eesepuꞌtî morî pe ite wanî. Moropai imakuiꞌpî pe iteperu wanî ya, eesepuꞌtî imakuiꞌpî pe ite wanî nîrî."

³⁴ Amîrîꞌnîkon wanî imakuiꞌpî pe îkîiyamîꞌ munkîyamîꞌ wanî imakuiꞌpî pe warantî. Tîîse oꞌnon yeꞌka pe morî pe eeseurîmakon, imakuiꞌpî pe siꞌma? Maasa pra ayewankon tîweꞌsen yawîrî eeseurîmakon."

³⁵ Tîîse warayoꞌ morî pe tîweꞌsen eseurîma morî pe, maasa pra morî pe itewan wanî yeꞌnen. Mîrîrî warantî nîrî warayoꞌ imakuiꞌpî pe tîweꞌsen eseurîma imakuiꞌpî pe, maasa pra imakuiꞌpî pe itewan wanî yeꞌnen, —taꞌpîiya.

"

³⁶ —Mîrîrî pîꞌ tauya —taꞌpî Jesusya. —Tiwin wei Paapaya tamîꞌnawîronkon yenumî yai îꞌ taꞌpî tîuyaꞌnîkon ekaremeꞌse toꞌ eꞌmîꞌsaꞌka kupî sîrîrî Paapa rawîrî. Mîrîrî tamîꞌnawîrî îꞌ taꞌpî tîuyaꞌnîkon, seꞌ tapairî ekaremeꞌtoꞌpe toꞌya Paapa pîꞌ —taꞌpî Jesusya."

³⁷ —Maasa pra amaimuꞌpîkon wenai Paapaya taa kupî sîrîrî: “Imakuiꞌpî pe naatîi. Ayenumîuyaꞌnîkon sîrîrî”, taiya. Mîîwîni pra awanî ya, morî amaimuꞌpîkon wenai Paapaya taa kupî sîrîrî apîꞌnîkon: “Îꞌ waniꞌ pra man, morî pe naatîi”, taiya kupî sîrîrî.

"

³⁸ Mîrîrî yai tiaronkon Moisés nurîꞌtîya yenupatoꞌ pîꞌ yenupatonkonya, moropai fariseuyamîꞌya taꞌpî Jesus pîꞌ: —Anna yenupanen, anna neraꞌmaton anîꞌ nîkupî eserîkan pepîn kupîya yuꞌse anna man —taꞌpî toꞌya.

"

³⁹ Tîîse inkamoro maimu yuukuꞌpî Jesusya: —Îꞌ warantî see sîrîrî pankon pemonkonyamîꞌ wanî sîrîrî imakuiꞌpî pe puꞌkuru. Aneraꞌmakon ton esatîyaꞌnîkon innape uurî kupîkonpa. Tîîse ikupîuya pepîn aneraꞌmakon ton. Tîîse penaron Paapa maimu ekaremeꞌnen Jonas nurîꞌtî yekare neken epuꞌtîyaꞌnîkon yuꞌse wai."

⁴⁰ Maasa pra Jonas koꞌmamîꞌpî seurîwîꞌne wei moropai seurîwîꞌne ewaron kaisarî kureꞌnan moroꞌ roꞌta yaꞌ. Mîrîrî warantî nîrî uurî kaꞌ poi iipîꞌpî koꞌmamî kupî sîrîrî seurîwîꞌne wei moropai seurîwîꞌne ewaron kaisarî non yaꞌ."

⁴¹ Aꞌkî, tiwinanoꞌpî wei yai, Paapaya apoꞌ yaꞌ pemonkonyamîꞌ yenumî yai Níniveponkon pemonkonyamîꞌ nurîꞌtî eꞌmîꞌsaꞌka pe man. Moropai inkamoroya taa kupî sîrîrî apîꞌnîkon: “Îꞌ waniꞌ awanî yeꞌnen amakuyikon rumakayaꞌnîkon pra awanîkon?” taa toꞌya. “Maasa pra pena Jonasya itekare ekaremekî yai, umakuyikon rumakaꞌpî annaya,” taa toꞌya. Mîrîrî yeꞌnen tauya sîrîrî apîꞌnîkon. Uurî tarî awanî manniꞌ akoreꞌtaꞌnîkon, uurî wanî Jonas yentai, tîîse amakuyikon rumakayaꞌnîkon pepîn —taꞌpîiya."

⁴² Inîꞌrî taꞌpîiya: —Mîrîrî yai nîrî pata esaꞌ pe tîweꞌsen nurîꞌtî wîriꞌ Sabá poinon eꞌmîꞌsaꞌka kupî sîrîrî. Moropai mîîkîrîya taa kupî sîrîrî apîꞌnîkon: “Îꞌ waniꞌ awanî yeꞌnen innape ikupîyaꞌnîkon pra aweꞌsaꞌkon”, taiya. Maasa pra mîîkîrî wîriꞌ nurîꞌtî iiꞌpîtîꞌpî aminke pai epuꞌnen pe tîweꞌsen Salomão nurîꞌtîya tenupatoꞌpe kaiꞌma etai. Mîrîrî yeꞌnen tauya sîrîrî apîꞌnîkon. Aꞌkî, uurî wanî akoreꞌtaꞌnîkon manniꞌ Salomão epuꞌnen pe siꞌpî yentai —taꞌpî Jesusya.

"

⁴³ Jesus eseurîmaꞌpî. Taꞌpîiya: —Pemonkon yapai teepaꞌka tîpo, oꞌmaꞌ asarî koꞌmannîpî tuna ton pîn yapîꞌ, teerîꞌkaꞌtoꞌ ton yuwa pîꞌ. Tîîse eporî tîuya pra tîwanî ya, taiya:"

⁴⁴ “Kaane, ennaꞌpoi yaꞌta yapai epaꞌka neꞌtîkini yaꞌrî” taiya. Moropai mîîkîrî ennaꞌpo. Mîîkîrîya yapai teepaꞌkaꞌpî eporî yawon pra tîîse, morî yekaꞌmaiya pra tîîse."

⁴⁵ Moropai mîîkîrî oꞌmaꞌ wîtî iipiapai tiaronkon oꞌmaꞌkon etai tarakkîrî toꞌ koꞌmantoꞌpe kaiꞌma. Mîîkîrîya tiaronkon oꞌmaꞌkon enepî asakîꞌne miaꞌ pona tîîmoꞌtai kaisarî. Inîꞌ panpîꞌ imakuiꞌsan enepîiya mîîkîrî warayoꞌ yaꞌ inkamoro koꞌmantoꞌpe. Inkamoroya mîîkîrî tarumaꞌtî mararî pra. Pena eꞌmaiꞌ pe imakuiꞌpî tîwanîꞌpî yentai mîîkîrî warayoꞌ yeseru wanî. Maasa pra inkamoro wanî yeꞌnen itewan yaꞌ. Mîrîrî warantî awanî pe man, imakuiꞌpî sîrîrî pankon pemonkonyamîꞌ yarakkîrî —taꞌpî Jesusya.

"

⁴⁶ Mîrîrî yai Jesus eseurîma koꞌmannîpî tanne pemonkonyamîꞌ pîꞌ, isan moropai itonpayamîꞌ itaꞌmiꞌsan erepamîꞌpî. Inkamoroya poro po siꞌma yanno meꞌpoꞌpî yarakkîrî teeseurîmakonpa."

⁴⁷ Tiaronya taꞌpî ipîꞌ: —Aꞌkî, asanya moropai ayakontononya ayanno pîꞌ man, ayarakkîrî eseurîmapai toꞌ wanî —taꞌpîiya ipîꞌ.

"

⁴⁸ Mîrîrî taiya yuukuꞌpî Jesusya: —Anîꞌ yeꞌka see pemonkon pîꞌ maamaꞌ moropai mooyi tauya eꞌpainon?"

⁴⁹ Moropai tînenupaꞌsan winîkîi eraꞌmaꞌpîiya, moropai taꞌpîiya: —Tarî tiaronkon man uupia —taꞌpîiya. —Insamoro pîꞌ maamaꞌ moropai mooyi tauya eꞌpainon."

⁵⁰ Uyun Paapa kaꞌ pon yeseru kuꞌnenan pîꞌ mooyi moropai maꞌnon moropai maamaꞌ tauya. Maasa pra Paapa maimu yawîrî tîweꞌsanon wanî uyonpa pe puꞌkuru —taꞌpî Jesusya.

"

13

¹ Mîrîrî weiyu yai Jesus wîtîꞌpî wîttî tapai Galiléia kuꞌpî yena pona."

² Arinîkon pemonkonyamîꞌ iiꞌsaꞌ wanîꞌpî tîpatakon yapai. Inkamoroya mararî pra Jesus woimaꞌtîsaꞌ wanîꞌpî. Mîrîrî yeꞌnen Jesus asaraꞌtîꞌpî kanau yaꞌ. Mîîkîrî eꞌtukkaꞌpî tuna ka. Moropai eereutaꞌpî. Moropai pemonkonyamîꞌ eꞌnîmîꞌpî kasapan po."

³ Mîîkîrîya toꞌ yenupa piaꞌtîꞌpî tuꞌkan panton ke. Taꞌpîiya:

—Warayoꞌ wîtîꞌpî tînmîri pînse."

⁴ Tînmîri yaꞌ tînpîmî pîmîꞌpîiya tîsorokaiꞌma. Moropai tiaron inpîmîꞌpî yonpa enaꞌpî eꞌma ena po. Mîrîrî eraꞌmaꞌpî toronyamîꞌya moropai yennoꞌmapîtîꞌpî toꞌya tamîꞌnawîrî, maasa aaroꞌta pra tîîse —taꞌpîiya."

⁵ —Moropai tiaron inpîmîꞌpî yonpa enaꞌpî mararon non yaꞌ tîꞌ parappa pe tîweꞌsen pona. Moropai kaꞌneꞌ pe aaroꞌtaꞌpî tîîse aakaratatoꞌ pataꞌseꞌ ton pra awanîꞌpî."

⁶ Mîrîrî inpîmîꞌpî yonpa aroꞌtaꞌpî tîîse aꞌneꞌ pe puꞌkuru wei aꞌnaꞌpî. Mîrîrîya yaꞌpiꞌtanîpîꞌpî maasa pra kureꞌnan ikara wîtîtoꞌ ton pra awanî yeꞌnen."

⁷ Moropai tiaron inpîmîꞌpî yonpa enaꞌpî mîꞌnî yeꞌkon koreꞌta. Mîrîrî aroꞌtaꞌpî mîꞌnî yeꞌ pokonpe. Mîrîrî mîꞌnî yeꞌya itarumaꞌtîꞌpî teperu tîrîiya pra tîîse."

⁸ Moropai tiaron inpîmîꞌpî yonpa enaꞌpî morî pe tîweꞌsen non pona. Mîrîrî aroꞌtaꞌpî, aarentaꞌpî moropai eepetaꞌpî. Tiaron epetaꞌpî 30 kaisarî moropai tiaron epetaꞌpî 60 kaisarî. Moropai tiaron epetaꞌpî 100 kaisarî. Sîrîrî warantî morî non pona enaꞌpî epetaꞌpî, mararî pra eꞌmaiꞌ pe awanîꞌpî yentai puꞌkuru —taꞌpî Jesusya.

"

⁹ Moropai Jesusya taꞌpî toꞌ pîꞌ: —Anepuꞌpai awanîkon ya, etatî, epuꞌtî —taꞌpîiya.

"

¹⁰ Mîrîrî pe rî Jesus nenupaꞌsan erepamîꞌpî iipia. Inkamoroya ekaranmapoꞌpî. —Îꞌ waniꞌ awanî yeꞌnen pemonkonyamîꞌ yenupaya mîrîrî panton pe —taꞌpî toꞌya ipîꞌ.

"

¹¹ Jesusya toꞌ maimu yuukuꞌpî: —Paapa yekare anîꞌ nepuꞌtî pepîn ekaremekîuya sîrîrî apîꞌnîkon. Îꞌ kaiꞌma pemonkonyamîꞌ esaꞌ pe Paapa iipî ekaremekîuya sîrîrî epuꞌtîkonpa. Tîîse inkamoro Paapa yuꞌsankon pepîn pîꞌ aronne ekaremekîuya pepîn. Tîîse panton pe neken ekaremekîuya epuꞌtî toꞌya namai."

¹² Tîîse mararî Paapa maimu epuꞌtî anîꞌya ya, inîꞌ panpîꞌ epuꞌnen tîrî Paapaya iipia. Moropai epuꞌtîiya ituꞌse tîwanî pîkîrî. Tîîse Paapa maimu yuꞌsan pepîn awanî ya, tamîꞌnawîrî imoꞌka Paapaya iipiapai. Mararî epuꞌtî tîuya kaiꞌma mîîkîrî esenumenka. Tîîse Paapaya imoꞌka iipiapai —taꞌpî Jesusya."

¹³ Taꞌpî Jesusya: —Mîrîrî yeꞌnen panton pe neken toꞌ yenupapîtîuya.

Maasa pra uyeraꞌma toꞌya tîîse anîꞌ pe wanî epuꞌtî toꞌya pepîn.
Moropai umaimu eta toꞌya tîîse îꞌ taasaiꞌya pe awanî epuꞌtî toꞌya pepîn —taꞌpîiya.
"

¹⁴ —Mîrîrî yeꞌnen toꞌ wanî Paapa maimuya taasaꞌ yawîrî, penaroꞌ Paapa maimu ekaremeꞌnen profeta Isaías nurîꞌtî kaaretarîya taasaꞌ yawîrî. Taꞌpî Paapaya pena:

“Etayaꞌnîkon apanakon ke
tîîse îꞌ anetaꞌpîkon epuꞌtîyaꞌnîkon pepîn.
Moropai eraꞌmayaꞌnîkon ayenukon ke.
Tîîse îꞌ aneraꞌmaꞌpîkon epuꞌtîyaꞌnîkon pepîn.
"

¹⁵

Maasa pra inkamoro pemonkonyamîꞌ yewan enaꞌpî saꞌman pe puꞌkuru.
Tuꞌke îꞌ eta toꞌya tîpanakon ke.
Tîîse epuꞌtî toꞌya pepîn.
Moropai tenukon yenpinnukuꞌpî toꞌya,
mîrîrî yeꞌnen îꞌ eraꞌma toꞌya pepîn.
Tîîse eta toꞌya ya,
moropai eraꞌma toꞌya ya,
epuꞌtî toꞌya eꞌpainon.
Mîrîrî wenai tîmakuyikon rumaka toꞌya eꞌpainon.
Moropai inkamoro pîikaꞌtîuya eꞌpainon”,
taꞌpî Paapaya —taꞌpî Jesusya.

"

¹⁶ —Tîîse amîrîꞌnîkon wanî taatausinpai puꞌkuru epuꞌtîyaꞌnîkon yeꞌnen. Maasa pra eraꞌmayaꞌnîkon. Moropai etayaꞌnîkon yeꞌnen, epuꞌtîyaꞌnîkon —taꞌpîiya tînenupaꞌsan pîꞌ."

¹⁷ —Ayenkuꞌtîuyaꞌnîkon pepîn. Inna pîꞌ puꞌkuru tauya sîrîrî. îꞌ aneraꞌmaꞌpîkon uwinîpai, aneraꞌmapai arinîkon penaronkon Paapa maimu ekaremeꞌnenan profetayamîꞌ nurîꞌtî wanîꞌpî. Moropai yairî tîweꞌsanon arinîkon pemonkonyamîꞌ wanîꞌpî nîrî. Tîîse mîrîrî yai uyeraꞌma toꞌya eserîke pra awanîꞌpî. Moropai îꞌ anetaꞌpîkon uwinîpai anetapai nîrî toꞌ wanîꞌpî. Tîîse eta toꞌya eserîke pra toꞌ wanîꞌpî nîrî —taꞌpî Jesusya.

"

¹⁸ Jesusya taꞌpî toꞌ pîꞌ: —Maasa etatî. Îꞌ taa mîserî warayoꞌ tînmîri pînnen pantoniya ekaremekîuya sîrîrî apîꞌnîkon."

¹⁹ Inpîmî yonpa enasaꞌ eꞌma ena pona warantî pemonkonyamîꞌ wanî. Paapa maimu eta toꞌya. Îꞌ kaiꞌma Paapa iipî tesaꞌkon pe kupî yekare eta toꞌya. Tîîse mîrîrî pîinama toꞌya pra awanî. Mîrîrî yeꞌnen Makui iipî kaꞌneꞌ pe itekare toꞌ netaꞌpî moꞌkai. Mîîkîrîya toꞌ netaꞌpî itekare moꞌka inîꞌrî ipîꞌ toꞌ esenumenka namai —taꞌpîiya."

²⁰ —Moropai tiaronkon pemonkonyamîꞌ wanî tîꞌ parappa pona enaꞌpî warantî. Itekare eta toꞌya moropai inkamoroya yapisî mararî pra taatausinpai."

²¹ Tîîse inkamoroya saꞌme puꞌkuru yapisî pepîn tewankon yaꞌ. Tîîse Paapa maimu yapiꞌsaꞌ toꞌya wenai tiaronkonya tîmuꞌtunpakon ya, irumaka toꞌya kaꞌneꞌ pe. Maasa pra ikara ton pra, yei wanî manniꞌ warantî tîꞌ parappa po toꞌ apîtatoꞌ ton pra awanî. Mîrîrî wenai itekare etatoꞌ tîuyaꞌnîkon rumaka toꞌya."

²² Moropai tiaronkon wanî mîꞌnî yeꞌkanaꞌ enaꞌsan warantî. Itekare eta toꞌya. Mîrîrî pîꞌ toꞌ atausinpa. Tîîse tiaron pensa Paapa maimu yawîrî ikupî toꞌya pepîn. Maasa pra kureꞌne inkamoro esenumenka tarîron non yeseru pîꞌ. Moropai inkamoroya teesenkuꞌtîi kureꞌne temannekon yapurî Paapa yapurî tîuyaꞌnîkon yentai. Mîrîrî yeꞌnen inkamoro arenta pepîn Paapa munkîyamîꞌ pe —taꞌpîiya."

²³ —Moropai tiaronkon wanî morî non pona enaꞌsan warantî. Inkamoroya Paapa maimu eta toꞌya moropai epuꞌtî toꞌya. Îꞌ kaiꞌma inpîmî epetaꞌpî warantî eepetaꞌpî. Mararî panpîꞌ eepetaꞌpî warantî tiaronkonya Paapa maimu kupî mararî. Kureꞌne panpîꞌ eepetaꞌpî warantî tiaronkonya Paapa maimu kupî kureꞌne panpîꞌ. Moropai tiaron epetaꞌpî mararî pra warantî tiaronkonya innape Paapa maimu kupî mararî pra —taꞌpî Jesusya.

"

²⁴ Jesusya inîꞌrî panton ekaremekîꞌpî. Îꞌ kaiꞌma tamîꞌnawîronkon esaꞌ pe Paapa iiꞌtoꞌ wanî ekaremekîꞌpîiya. Taꞌpîiya: —See warantî awanî, warayoꞌya tekkari yenaꞌpî pîmîꞌpî ipapoiꞌma tînmîri ya. Moropai ipîmî tîpo eemikkuꞌpî tewîꞌ ta. Moropai iweꞌnaꞌpî ewaron yaꞌ teseru ta."

²⁵ Tîîse tamîꞌnawîronkon wetun tanne, iteyaton wîtîꞌpî inmîri yaꞌ. Mîîkîrîya inpîmîꞌpî trigo yeꞌ koreꞌta kansipuꞌkurai enaꞌpî pîmîꞌpî."

²⁶ Inpîmîꞌpî arentaꞌpî moropai eepeta winîkîi kansipuꞌkurai yeꞌ nîrî arentaꞌpî ipokonpe. Ikoreꞌta awanîꞌpî.

"

²⁷ Mîrîrî yeꞌnen umî esaꞌ poitîrîtonon wîtîꞌpî iipia. Moropai taꞌpî toꞌya ipîꞌ: “Anna karaiwarî, amîrîya morî pîmîꞌpîya innape nai?” taꞌpî toꞌya ipîꞌ. Inkamoro maimu yuukuꞌpî toꞌ karaiwarîya. “Inna morî pîmîꞌpîuya”, taꞌpîiya. “Tîîse oꞌnon pata pai kin kansipuꞌkurai erepansaꞌ mîrîrî ikoreꞌta?” taꞌpî toꞌya.

"

²⁸ Moropai toꞌ maimu yuukuꞌpî warayoꞌ umî esaꞌya. “Uyeyatonya mîrîrî kuꞌsaꞌ” taꞌpîiya. Moropai ipoitîrîtononya taꞌpî ipîꞌ: “Mîrîrî kansipuꞌkurai yaroka annaya yuꞌse nan?” taꞌpî toꞌya.

"

²⁹ “Kaane kîsarokatî maasa” taꞌpîiya. “Maasa pra yarokayaꞌnîkon ya trigo yeꞌ yarokayaꞌnîkon nîrî ipokonpe” taꞌpîiya."

³⁰ “Tîwî narentai tîmurukun pe. Trigo yaꞌtîtoꞌ weiyu eseposaꞌ yai, tauya yaꞌtînenan pîꞌ. Eꞌmaiꞌ pe kansipuꞌkurai yaꞌtîtî moropai mîrîrî yaironpîꞌtî apoꞌ yaꞌ aarantoꞌpe. Tîîse trigo konekatî uyewîꞌ ta aakoꞌmantoꞌpe tauya toꞌ pîꞌ”, taꞌpî warayoꞌya —taꞌpî Jesusya. —Mîrîrî warantî awanî, tamîꞌnawîronkon esaꞌ pe Paapa iipî yai.

"

³¹ Moropai tiaron panton ekaremekîꞌpî Jesusya tînenupaꞌsan pîꞌ. Taꞌpîiya: —Îꞌ kaiꞌma tamîꞌnawîronkon esaꞌ pe Paapa iiꞌtoꞌ wanî ekaremekîuya sîrîrî. Awanî see warantî: Warayoꞌya tînpîmî mostarda enaꞌpî pîmîꞌpî tînmîri yaꞌ —taꞌpîiya."

³² —Aꞌkî, mîrîrî inpîmî mostarda enaꞌpî wanî siꞌmîrikkî pe puꞌkuru. Tiaronkon umî yaꞌ tîpînsenkon yenaꞌpî maꞌre awanî. Tîîse aarenta yai, kureꞌne aarenta tiaronkon yentai. Mîrîrî ena kureꞌne yei pe. Mîrîrî yeꞌnen tuꞌke toronyamîꞌ erepamî ipona. Inkamoroya taponseꞌkon ton konekapîtî ipanta pona —taꞌpî Jesusya. —Mîrîrî warantî awanî, tamîꞌnawîronkon esaꞌ pe Paapa iipî yai —taꞌpîiya.

"

³³ Tiaron panton ekaremekîꞌpî Jesusya îꞌ kaiꞌma tamîꞌnawîronkon esaꞌ pe Paapa iipî ekaremekîpa kaiꞌma. Taꞌpîiya: —See warantî awanî. Wîriꞌya kîsereꞌna koreꞌta fermento tîrîꞌpî moropai mîrîrî yaiꞌmeꞌpîiya. Mîrîrî yeꞌnen tamîꞌnawîrî kîsereꞌna saꞌmoꞌpî fermentoya —taꞌpî Jesusya. —Mîrîrî warantî awanî, tamîꞌnawîronkon esaꞌ pe Paapa iipî yai —taꞌpîiya.

"

³⁴ Tamîꞌnawîrî mîrîrî ekaremekîꞌpî Jesusya panton pe. Îꞌ rî ekaremekîiya pra awanîꞌpî panton pe pra. Tîîse panton pe neken toꞌ yeurîmaꞌpîiya."

³⁵ Mîrîrî warantî aweꞌkupîꞌpî maasa pra penaroꞌ Paapa maimu ekaremeꞌnen profeta nurîꞌtîya taasaꞌ yawîrî aweꞌkuꞌtoꞌpe. Pena taꞌpî profeta nurîꞌtîya:

Paapa maimu ekaremekîuya panton pe.
Pena sîrîrî pata konekaꞌpî tîuya pata pai
anîꞌ nepuꞌtîꞌpî pepîn ekaremekîuya kupî sîrîrî
taꞌpî profeta nurîꞌtîya.

"

³⁶ Mîrîrî tîpo arinîkon pemonkonyamîꞌ nîmîꞌpî Jesusya. Moropai attîꞌpî wîttî ta. Miarî tîîse inenupaꞌsan erepamîꞌpî iipia. Inkamoroya taꞌpî ipîꞌ: —Îꞌ taatoꞌpe mîrîrî kansipuꞌkurai pantoni wanî ekaremeꞌkî anna pîꞌ —taꞌpî toꞌya.

"

³⁷ Jesusya toꞌ maimu yuukuꞌpî: —Uurî kaꞌ poi iipîꞌpî wanî tînpîmî morî pînnen pe —taꞌpîiya."

³⁸ —Mîrîrî umî wanî tamîꞌnawîrî pata pe sîrîrî non po. Inpîmî wanî Paapa pemonkonoyamîꞌ pe, manniꞌkan tesaꞌkon pe aweꞌtoꞌpe Paapa pia eturumakaꞌsan pe. Tîîse kansipuꞌkurai wanî Makui pemonkonoyamîꞌ pe —taꞌpîiya."

³⁹ —Moropai kansipuꞌkurai pînnen wanî Makui pe. Trigo yaꞌtîtoꞌ weiyu tauya manniꞌ wanî tamîꞌnawîron ataretîꞌkasaꞌ pe. Inkamoro yaꞌtînenan wanî inserîyamîꞌ pe —taꞌpîiya."

⁴⁰ —Umî esaꞌ poitîrîtononya kansipuꞌkurai yaꞌtîꞌpî moropai apoꞌ yaꞌ yenumîꞌpî toꞌya aarantoꞌpe. Mîrîrî warantî ikupî inserîyamîꞌya kupî sîrîrî tiwinanoꞌpî weiyu yai tamîꞌnawîron ataretîꞌkasaꞌ yai —taꞌpîiya."

⁴¹ —Mîrîrî weiyu yai uurî, kaꞌ poi iipîꞌpîya inserîyamîꞌ yarima upemonkonoyamîꞌ koreꞌta. Tiaronkonya imakuiꞌpî kupî emapuꞌtînenan menka toꞌya. Moropai pemonkonyamîꞌ imakuiꞌpî kuꞌnenan menka inserîyamîꞌya tamîꞌnawîrî —taꞌpîiya."

⁴² —Moropai inkamoro imakuiꞌpî kuꞌnenan pemonkonyamîꞌ yenumî inserîyamîꞌya apoꞌ kureꞌnan yaꞌ. Miarî apoꞌ yaꞌ siꞌma toꞌ karau mararî pra teekon tîpaꞌtîi neꞌneꞌ pe apoꞌ wanî yeꞌnen —taꞌpîiya."

⁴³ —Tîîse manniꞌkan yaironkon Paapa maimu yawîrî siꞌsan wanî kupî sîrîrî ipîkku pe, Paapa, toꞌ yunkon pata yaꞌ. Ipîkku pe weiya tamîꞌnawîron weiyuꞌma warantî toꞌ wanî kupî sîrîrî —taꞌpîiya. —Umaimu anepuꞌpai awanîkon ya, mîrîrî epuꞌtîyaꞌnîkon —taꞌpî Jesusya.

"

⁴⁴ Tiaron panton ekaremekîꞌpî Jesusya. Taꞌpîiya: —Îꞌ kaiꞌma tamîꞌnawîronkon esaꞌ pe Paapa iiꞌtoꞌ wanî see warantî: Pena epeꞌke tîweꞌsen yenonsaꞌ eporîꞌpî warayoꞌya umî yaꞌ. Mîrîrî eposaꞌ tîuya ya, inîꞌrî yenomîꞌpîiya. Moropai taatausinpai attîꞌpî. Tamîꞌnawîron temanne ke aweꞌrepaꞌpî. Moropai mîrîrî yepeꞌpî ke manniꞌ umî, oꞌnon pata epeꞌke tîweꞌsen yenomî tîuya ya, mîrîrî yennaꞌpîiya —taꞌpî Jesusya. Moropai taꞌpîiya: —Mîrîrî warantî awanî, tamîꞌnawîronkon esaꞌ pe Paapa iiꞌtoꞌ —taꞌpîiya.

"

⁴⁵ —Moropai tiaron panton ekaremekîuya sîrîrî, îꞌ kaiꞌma tamîꞌnawîronkon esaꞌ pe Paapa iipî epuꞌtîkonpa —taꞌpî Jesusya. —Awanî see warantî: Warayoꞌ wanîꞌpî diamante yennanen."

⁴⁶ Kureꞌnan diamante, epeꞌke eposaꞌ tîuya ya, tamîꞌnawîrî temanne ke mîîkîrî eꞌrepaꞌpî, mîrîrî yepeꞌpîkon ke kureꞌnan diamante epeꞌke puꞌkuru eposaꞌ tîuya yennapa —taꞌpî Jesusya. —Mîrîrî warantî awanî, tamîꞌnawîronkon esaꞌ pe Paapa iipî ya —taꞌpîiya.

"

⁴⁷ Jesusya taꞌpî: —Inîꞌrî tiaron panton ekaremekîuya sîrîrî, îꞌ kaiꞌma pemonkonyamîꞌ esaꞌ pe Paapa iipî epuꞌtîkonpa. See warantî awanî: Moroꞌyamîꞌ atawîꞌtoꞌpe ikuꞌsaꞌ yenumîꞌpî warayoꞌkonya ikuꞌpî ka. Inkamoroya moroꞌyamîꞌ yapisîꞌpî tuꞌke siꞌta —taꞌpîiya."

⁴⁸ —Mîrîrî moroꞌyamîꞌ yapiꞌtoꞌ yaꞌ moroꞌyamîꞌ atapiꞌsaꞌ yai tuꞌke intapîkîrî. Mîrîrî woroka warayoꞌkonya aꞌmun pona. Mîrîrî yai warayoꞌkon ereuta moroꞌyamîꞌ eraꞌmai. Moropai inkamoroya morîkon moroꞌyamîꞌ menka. Toꞌ yenseꞌ yaꞌ toꞌ yaraꞌtî toꞌya. Tîîse tiaronkon moroꞌyamîꞌ morîkon pepîn inkamoro papo toꞌya poro pona —taꞌpîiya."

⁴⁹ —Mîrîrî warantî awanî pe man, tiwin wei tamîꞌnawîron ataretîꞌka ya. Mîrîrî yai moroꞌyamîꞌ yapiꞌnenan warayoꞌkon warantî ikupî inserîyamîꞌya kupî sîrîrî. Inkamoro wîtî imakuiꞌpî kuꞌnenan pemonkonyamîꞌ menkai yairî tîweꞌsanon koreꞌtapai."

⁵⁰ Moropai inkamoro tîmenkaꞌsankon yenumî inserîyamîꞌya kureꞌnan apoꞌ yaꞌ. Miarî inkamoro imakuiꞌpî kuꞌnenan karau koꞌmannîpî mararî pra teekon tîpaꞌtîi neꞌneꞌ pe tîwanîkon yeꞌnen —taꞌpîiya.

"

⁵¹ Jesusya tînenupaꞌsan ekaranmapoꞌpî: —Tamîꞌnawîrî umaimu epuꞌtî pîꞌ naatî, mîrîrî tauya manniꞌ? —taꞌpî Jesusya tînenupaꞌsan pîꞌ. —Inna, epuꞌtî pîꞌ anna man —taꞌpî toꞌya.

"

⁵² Mîrîrî yai taꞌpî Jesusya toꞌ pîꞌ: —Moisés nurîꞌtîya yenupantoꞌ pîꞌ esenupaꞌsan esenupa ya, uyesaꞌkon pe Paapa iipî kupî yekare pîꞌ esenupaꞌsan, inkamoro wanî unekaremekî pîꞌ esenupaꞌsan wanî wîttî esaꞌ pe tîweꞌsen warantî. Maasa pra mîîkîrîya miarî pai temannekon amenan pe tîweꞌsen moꞌka. Moropai amenan pe pra tîweꞌsen moꞌkaiya nîrî —taꞌpî Jesusya.

"

⁵³ Moropai mîrîrî pantonkon ekaremekî tîpo, Jesus epaꞌkaꞌpî moropai attîꞌpî."

⁵⁴ Mîrîrî yai Jesus ennaꞌpoꞌpî tarentaꞌpî pata pona. Miarî pemonkonyamîꞌ yenupaꞌpî Jesusya toꞌ epereꞌtoꞌkon yewîꞌ ta. Moropai arinîkon imaimu etanenan esenumenkaꞌpî kureꞌne teesewankonoꞌmai. Inkamoro esekaranmapopîtîꞌpî. Taꞌpî inkamoroya: —Oꞌnon pata epuꞌnen pe tîwanîpa Jesus esenupaꞌpî mîrîrî yeꞌka anîꞌ nîkupî eserîkan pepîn kuꞌtoꞌpeiya? —taꞌpî toꞌya."

⁵⁵ —Maasa pra mîîkîrî Jesus wanî pepîn kin manniꞌ wîttî konekanen munmu pe? Maria more pepîn kin mîîkîrî Jesus? Moropai Tiago, José, Simão, Judas ruinankon pepîn mîîkîrî? —taꞌpî toꞌya ipîꞌ."

⁵⁶ —Moropai iwîrisitonon tarî toꞌ man tîîse îꞌ kaiꞌma tamîꞌnawîrî ikupî mîîkîrî Jesusya? —taꞌpî toꞌya.

"

⁵⁷ Mîrîrî wenai Jesus maimu anetapai pra miarîronkon pemonkonyamîꞌ wanîꞌpî. Tîîse taꞌpî Jesusya toꞌ pîꞌ: —Morî pe puꞌkuru tamîꞌnawîronkonya Paapa maimu ekaremeꞌnen eseurîma eta. Tîîse tonpayamîꞌ ipata yawonkon neken wanî imaimu anetapai pra —taꞌpî Jesusya.

"

⁵⁸ Mîrîrî yai Jesusya tuꞌke anîꞌ nîkupî eserîkan pepîn kupî eserîke pra awanîꞌpî miarî Nazaré po. Maasa pra innape ikupî miarîronkon pemonkonyamîꞌya pra awanî yeꞌnen.

"

14

¹ Mîrîrî yai Galiléia pata esaꞌ pe Herodes wanîꞌpî. Mîîkîrîya tamîꞌnawîrî îꞌ kupî Jesusya yekare etaꞌpî."

² Moropai mîîkîrîya taꞌpî tîpemonkonoyamîꞌ teesenyakaꞌmasanon pîꞌ: —Seruꞌ pepîn see João Batista nurîꞌtî mîîkîrî. Aweꞌmîꞌsaꞌkasaꞌ mîrîrî. Mîrîrî wenai mîîkîrîya anîꞌ nîkupî eserîkan pepîn kuꞌpîtî mîrîrî meruntî ke —taꞌpîiya.

"

³ Mîrîrî taꞌpî mîîkîrî pata esaꞌ Herodesya maasa pra João yarakkamo meꞌposaꞌ tîuya yeꞌnen atarakkannîtoꞌ ta. Mîrîrî kupîꞌpî Herodesya, maasa pra takon Filipe noꞌpî Herodias yarakkîrî awanî pîꞌ João eseurîmasaꞌ yeꞌnen."

⁴ Tuꞌke iteꞌka João Batistaya taapîtîꞌpî pata esaꞌ Herodes pîꞌ: —Paapa nekaremekîꞌpî unkupîkon ton pe yairî pra, imakuiꞌpî kuꞌsaꞌya mîrîrî, ayakon noꞌpî Herodias yarakkîrî tîweꞌse —taꞌpîiya."

⁵ Mîrîrî wenai pata esaꞌ Herodes ekoreꞌmaꞌpî. João Batista anwîpai awanîꞌpî. Tîîse eranneꞌ pe awanîꞌpî Judeuyamîꞌ pîꞌ. Maasa pra Paapa maimu ekaremeꞌnen pe awanî kaiꞌma toꞌ esenumenkaꞌpî.

"

⁶ Tîîse pata esaꞌ Herodesya teesenpoꞌpî weiyu yai, entamoꞌkantoꞌ mararon pepîn konekaꞌpî. Moropai pemonkonyamîꞌ etaꞌpîiya mararî pra entamoꞌkai toꞌ wîtîtoꞌpe. Mîrîrî yai Herodias more, maasaron wîriꞌ aurînoꞌpî mananuꞌpî, tamîꞌnawîronkonya teraꞌma tanne. Mîîkîrî manaꞌtoꞌ pîꞌ pata esaꞌ Herodes atausinpaꞌpî mararî pra."

⁷ Mîrîrî yeꞌnen taꞌpîiya mîîkîrî maasaron wîriꞌ pîꞌ: —Seruꞌ pe pra tauya sîrîrî apîꞌ. Upîꞌ îꞌ rî ituꞌse aweꞌtoꞌ esatîya ya, tamîꞌnawîrî itîrîuya —taꞌpîiya.

"

⁸ Moropai wîriꞌ wîtîꞌpî tîsan Herodias pia. Ekaremekîꞌpîiya. Moropai taꞌpî isanya João puꞌpai mesatîi. Taꞌpî tîsanya yawîrî esatîꞌpîiya. —João Batista puꞌpaiꞌpî yuꞌse wai sunpa po —taꞌpîiya.

"

⁹ Mîrîrî taiya yeꞌnen, pata esaꞌ Herodes enaꞌpî yairî maꞌre. Tîîse tamîꞌnawîronkon tînetaꞌsanya eta tanne, îꞌ ituꞌse aweꞌtoꞌ esatîya ya itîrîuya, taasaꞌ tîuya yeꞌnen, maasaron wîriꞌ nesatî tîrî tîuya taꞌpîiya, seruꞌ pe tîwanî namai."

¹⁰ Mîrîrî yeꞌnen João Batista puꞌparaikkîtî meꞌpoꞌpîiya atarakkannîtoꞌ ta."

¹¹ Mîîkîrî puꞌpaiꞌpî enepîꞌpî toꞌya sunpa po. Mîrîrî tîrîꞌpî toꞌya maasaron aurînoꞌpî wîriꞌ pia. Moropai mîîkîrîya tîsan pia yarîꞌpî."

¹² Mîrîrî yekare etasaꞌ tîuyaꞌnîkon pe João Batista nurîꞌtî nenupaꞌsan iipîꞌpî iipia itesaꞌrîꞌpî eraꞌmai. Moropai mîîkîrî yuꞌnaꞌtîꞌpî toꞌya. Moropai mîrîrî ekaremeꞌse toꞌ wîtîꞌpî Jesus pîꞌ.

"

¹³ Tamîꞌnawîron mîrîrî eꞌkuꞌsaꞌ yekare etasaꞌ tîuya tîpo, Jesus moropai inenupaꞌsan wîtîꞌpî kanau yaꞌ miarîpai keren pona tuutîpa tiwinsarî. Tîîse oꞌnon pata awanî epuꞌtîꞌpî arinîkonya. Mîrîrî yeꞌnen toꞌ epaꞌkaꞌpî tîîkoꞌmantoꞌkon yapai. Moropai toꞌ wîtîꞌpî aꞌmun poro Jesus epose."

¹⁴ Moropai miarî Jesusya toꞌ yeporîꞌpî. Toꞌ erepansaꞌ wanîꞌpî irawîrî, kanau yapai tawautî pe. Jesusya kureꞌne toꞌ eraꞌmaꞌpî tîꞌnokoꞌpî pe, inkamoro itîꞌsan. Mîrîrî yeꞌnen priꞌyawonkon pepîn saꞌne yepiꞌtîꞌpîiya, miarî tîweꞌsanon.

"

¹⁵ Pata koꞌmamî tanne, Jesus nenupaꞌsan erepamîꞌpî iipia. Moropai inkamoroya taꞌpî ipîꞌ: —Insamoro arinîkon pemonkonyamîꞌ wîtîtoꞌpe kaꞌkî wîttîkon ta. Maasa pra koꞌmamîiya pata enasaꞌ man, îꞌ ton pra eꞌnî tanne tarî keren po. Toꞌ wîtîsaꞌ ya, morî pe awanî tekkarikon ton yennatoꞌpe toꞌya —taꞌpîiya.

"

¹⁶ Tîîse Jesusya toꞌ maimu yuukuꞌpî: —Insamoro pemonkonyamîꞌ wîtî eꞌpai pra man —taꞌpîiya. —Tîîse amîrîꞌnîkonya toꞌ yekkariꞌtî eꞌpai man —taꞌpî Jesusya tînenupaꞌsan pîꞌ.

"

¹⁷ Tîîse inkamoroya yuukuꞌpî. Taꞌpî toꞌya: —Îꞌ kaiꞌma see, anna pia miaꞌtaikin neken pão man. Moropai asakîꞌne neken moroꞌyamîꞌ man —taꞌpî toꞌya. —Tamîꞌnawîronkon pia itîrîiya pepîn —taꞌpî toꞌya.

"

¹⁸ —Eneꞌtî moriya uupia —taꞌpî Jesusya toꞌ pîꞌ.

"

¹⁹ Moropai pemonkonyamîꞌ ereutatoꞌpe parîꞌ pona taꞌpîiya toꞌ pîꞌ. Moropai mîîkîrîya miaꞌtaikinan pão yapisîꞌpî moropai asakîꞌnankon moroꞌyamîꞌ. Moropai tenu yanumîꞌpîiya kaꞌ ekaya. Moropai eepîremaꞌpî yekkari wanî pona. —Morî pe puꞌkuru man Paapa —taꞌpîiya. Mîrîrî tîpo pão pirikkapîtîꞌpîiya. Mîrîrî tîrîꞌpîiya tînenupaꞌsanya itîîtoꞌpe pemonkonyamîꞌ pia."

²⁰ Mîrîrî pîꞌ tamîꞌnawîronkon esekkariꞌtîꞌpî ituꞌse tîwanîkon pîkîrî. Moropai inkamoro yekkari yonparîꞌpî yannukuꞌpî Jesus nenupaꞌsanya asakîꞌne puꞌ pona tîîmoꞌtai waikaraꞌpî kaisarî."

²¹ Inkamoro pemonkonyamîꞌ esekkariꞌtîꞌsan wanîꞌpî 5.000 yairî warayoꞌkon, wîriꞌsanyamîꞌ moropai moreyamîꞌ tîkuꞌneꞌtîi pra toꞌ tîîse.

"

²² Mîrîrî tîpo Jesusya tînenupaꞌsan pîꞌ taꞌpî kanau yaꞌ toꞌ asaraꞌtîtoꞌpe. Moropai toꞌ wîtîtoꞌpe tîrawîrî ikuꞌpî ratai pona. Toꞌ wîtî tanne Jesusya arinîkon yaipontîꞌpî toꞌ emiꞌtoꞌpe."

²³ Pemonkonyamîꞌ emiꞌtoꞌpe toꞌ yaipontî tîpo Jesus enukuꞌpî wîꞌ pona epîremai tiwinsarî. Miarî tîîse pata ewaronpamîꞌpî tiwinsarî tîîse."

²⁴ Mîrîrî tanne, inenupaꞌsan wanîꞌpî ikuꞌpî arakkita kanau yaꞌ. Miarî toꞌ tîîse aꞌsitun pe eenaꞌpî. Mararî pra sipa sipa pe awanîꞌpî. Kanau pona eerepamîꞌpî meruntî ke.

"

²⁵ Anoinna pata tîîse, maasa erenmapî rawîrî, tuna poro Jesus asarî eraꞌmaꞌpî inenupaꞌsanya tîponayaꞌnîkon."

²⁶ Tuna poro mîîkîrî asarî eraꞌma tîuyaꞌnîkon pe, inenupaꞌsan wanîꞌpî mararî pra teesiꞌnîꞌse. Inkamoroya taꞌpî: —Katonpî mîîkîrî! Toꞌ entaimeꞌpî teesiꞌnîꞌse mararî pra."

²⁷ Inkamoro pîꞌ Jesus eꞌpamîꞌpî kaꞌneꞌ pe. Taꞌpîiya toꞌ pîꞌ: —Meruntî ke eꞌtî, eranneꞌ pe pra. Uurî mîîkîrî, Jesus —taꞌpîiya.

"

²⁸ Moropai Pedroya taꞌpî ipîꞌ: —Uyepotorî, amîrî pe puꞌkuru awanî ya, oꞌnon pata awanî manniꞌ pata uutîtoꞌpe kaꞌkî tuna poro —taꞌpîiya.

"

²⁹ —Asiꞌkî see —taꞌpî Jesusya Pedro pîꞌ. Moropai Pedro autîꞌpî kanau yapai moropai mîîkîrî asarîꞌpî tuna poro Jesus ekaya."

³⁰ Mîîkîrî asarî tanne, aꞌsitunya ipumaꞌpî. Mîrîrî yeꞌnen eranneꞌ pe eena piaꞌtîꞌpî. Moropai eeseuronka piaꞌtîꞌpî. Mîrîrî yeꞌnen teesiꞌnîpî pe awentaimeꞌpî Jesus pîꞌ. —Uyepotorî, upîikaꞌtîkî! —taꞌpîiya.

"

³¹ Kaꞌneꞌ pe Jesusya tenya kainumîꞌpî Pedro yapisîpa moropai taꞌpîiya Pedro pîꞌ: —Innape ukupîya pra awanî mîrîrî. Îꞌ waniꞌ awanî yeꞌnen innape uurî kupîya pepîn?

"

³² Mîrîrî tîpo inkamoro asaraꞌtîꞌpî kanau yaꞌ. Moropai kureꞌnan aꞌsitun atîꞌnapannîpîꞌpîiya."

³³ Moropai inenupaꞌsanya Jesus yapurîꞌpî. Yapurî yeꞌka pe inkamoroya taꞌpî: —Innape see, Paapa munmu pe amîrî wanî sîrîrî —taꞌpî toꞌya.

"

³⁴ Ikuꞌpî ratai pona teerepansaꞌkon pe, inkamoro autîꞌpî. Genesaré pata pona toꞌ erepamîꞌpî."

³⁵ Miarî mîrîrî pata po, mororonkon pemonkonyamîꞌya Jesus epuꞌtîꞌpî. Moropai inkamoroya priꞌyawonkon pepîn, tamîꞌnawîrî mororonkon moropai tîwoiꞌnîkon tîîkoꞌmansenon eneꞌtoꞌpe toꞌya toꞌ yepiꞌtîtoꞌpeiya."

³⁶ Moropai priꞌyawonkon pepînya Jesus pon yeꞌpi pîꞌ yapîtoꞌpe toꞌya esatîꞌpî toꞌya. Maasa pra ipon yeꞌpi pîꞌ yapîtîponkon esepiꞌtîsaꞌ wanîꞌpî mîîtoꞌpe. Mîrîrî warantî toꞌ esepiꞌtîꞌpî.

"

15

¹ Mîrîrî yai fariseuyamîꞌ moropai Moisés nurîꞌtîya yenupantoꞌ pîꞌ yenupatonkon wîtîsaꞌ wanîꞌpî Jerusalém poi Jesus yarakkîrî eseurîmai."

² Inkamoroya taꞌpî Jesus pîꞌ:

—Îꞌ waniꞌ awanî yeꞌnen kin anenupaꞌsan wanî pepîn utamokonya uyenupaꞌpîkon yawîrî pra toꞌ wanî? Tenyakon rona toꞌya pepîn tekkarikon yonpa tîuyaꞌnîkon rawîrî. Mîrîrî yawîrî kupî toꞌya pra awanî yeꞌnen upanamaꞌpîkon utamokonya yawîrî pra toꞌ wanî mîrîrî —taꞌpî toꞌya.

"

³ Jesusya toꞌ maimu yuukuꞌpî. Moropai taꞌpîiya toꞌ pîꞌ: —Îꞌ waniꞌ kin awanî yeꞌnen Paapa maimuya taasaꞌ yawîrî ikupîyaꞌnîkon pra, atamokonya ayenupaꞌpîkon yawîrî ikupî pîꞌ aakoꞌmamîkon? —taꞌpîiya."

⁴ —Maasa pra Paapaya taꞌpî ankupîkon ton pîꞌ.

“Ayunkon yapurîtî moropai asankon yapurîtî”,
taꞌpîiya. Moropai taꞌpîiya nîrî:

“Anîꞌ eseurîma ya imakuiꞌpî pe tun winîkîi moropai tîsan winîkîi, mîîkîrî wîî eꞌpai awanî”,
taꞌpî Paapaya —taꞌpîiya."

⁵ —Tîîse tiaronkon yenupayaꞌnîkon yairî pra. Amîrîꞌnîkonya taa toꞌ pîꞌ. Tiaron moro awanî tîyun anpîikaꞌtîpainon tîîse taayaꞌnîkon: “ ‘Kaane, untîrî ton pra man uyun pia ipîikaꞌtîtoꞌ ton, maasa pra Paapa pia untîrî pe seeniꞌ moꞌkasauꞌya sîrîrî’ taatoꞌpe toꞌya”, taayaꞌnîkon seruꞌ pe."

⁶ Moriya mîrîrî warantî taayaꞌnîkon ya, ayunkon yapurîyaꞌnîkon pepîn mîrîrî. Mîrîrî warantî Paapa maimu yuꞌse pra awanîkon eseraꞌma mîrîrî, ayeserukon neken yawîrî ikupîkonpa."

⁷ Seruꞌyeꞌkon teesenkuꞌtîsanon tîîwarîrîꞌnîkon. Apîꞌnîkon penaroꞌ Paapa maimu ekaremeꞌnen profeta Isaías nurîꞌtî eseurîmaꞌpî yairî.
"

⁸

“Morî pe eseurîmakoiꞌkon insanan pemonkonyamîꞌ upîꞌ” taa Paapaya.
“Tîîse toꞌ yewan wanî aminke upîꞌ” taiya.
"

⁹

“Mîrîrî yeꞌnen uyapurîtoꞌ toꞌya wanî îꞌ pe pra rî.
Penaronkonya tîpanamaꞌpîkon yawîrî tonpakon yenupa toꞌya,
uurîya tîpanamaꞌpîkon pe tîkuꞌse” taꞌpî Paapaya,
taꞌpî profeta Isaías nurîꞌtîya —taꞌpî Jesusya toꞌ pîꞌ.

"

¹⁰ Mîrîrî taa tîpo Jesusya arinîkon yannoꞌpî moropai taꞌpîiya toꞌ pîꞌ: —Maasa umaimu etatî moropai epuꞌtîyaꞌnîkon yuwatî —taꞌpîiya."

¹¹ —Imakuiꞌpî pe eꞌnî pepîn uyaꞌreꞌkon unenapîkon wenai. Tîîse imakuiꞌpî pe eꞌnî imakuiꞌpî pe eseurîma wenai, imakuiꞌpî pîꞌ esenumenkan wenai. Mîrîrîya imakuiꞌpî pe ukupîkon —taꞌpîiya.

"

¹² Mîrîrî taasaiꞌya tîpo, Jesus nenupaꞌsan wîtîꞌpî iipia. Moropai inkamoroya taꞌpî ipîꞌ: —Uyepotorî, îꞌ taaya manniꞌ pîꞌ fariseuyamîꞌ atasiꞌsirunpasaꞌ man amaimu pîꞌ —taꞌpî toꞌya.

"

¹³ Jesusya taꞌpî: —Tamîꞌnawîronkon tînpîmîꞌpî pepîn aroꞌtasaꞌ yaroka umî esaꞌya. Mîrîrî warantî tamîꞌnawîronkon Paapa pemonkono pe pra tîweꞌsanon moꞌkaiya tîpemonkonoyamîꞌ koreꞌtapai —kaiꞌma toꞌ maimu yuukuꞌpî Jesusya."

¹⁴ —Inkamoro yeꞌkakon tîpîinamai pra eꞌtî. Maasa pra toꞌ wanî enkaruꞌnankon warantî. Mîrîrî yeꞌnen tiaronkon yenupa toꞌya eserîke pra toꞌ wanî. Enkaruꞌne siꞌma enkaruꞌnanya tiaron yarî eserîke pra awanî. Yarî yuꞌse tîwanî ya toꞌ eꞌsoroka ituꞌnakan yaꞌ saꞌnîrî.

"

¹⁵ Mîrîrî taiya yeꞌnen, Pedroya Jesus pîꞌ esatîꞌpî. —Mîrîrî panton ekaremeꞌkî anna pîꞌ —taꞌpîiya.

"

¹⁶ Jesusya taꞌpî: —Sîrîrî tîpose pakko pe aakoꞌmamîkon mîrîrî? —taꞌpîiya."

¹⁷ —Aꞌkî, uyaꞌreꞌkon unennoꞌmakonya imakuiꞌpî pe ukupîkon pepîn. Maasa pra uyewankon yaꞌ eewomî pepîn, uroꞌtakon yaꞌ neken yennoꞌma moropai yenpaꞌka."

¹⁸ Tîîse eseurîmantoꞌ wanî uyewankon yapai teepaꞌkasen esenumenkantoꞌ wenai. Mîrîrîya ukîꞌpakon imakuiꞌpî pe."

¹⁹ Maasa pra uyewankon yaꞌ tîîkoꞌmansen imakuiꞌpî wenai esenumenkan imakuiꞌpî pe, pemonkon anwîpai eꞌnî, moropai tiaron noꞌpî yarakkîrî eꞌnî, moropai seꞌ tapairî wîriꞌsanyamîꞌ yarakkîrî eꞌnî. Moropai amaꞌ pe eꞌnî, moropai seruꞌyeꞌ pe eꞌnî, imakuiꞌpî pe eseurîman tiaronkon winîkîi."

²⁰ Sîrîrîkon imakuiꞌpî uyewankon yaꞌ tîîkoꞌmansen wenai, imakuiꞌpî kupî pîꞌ koꞌmannî. Mîrîrî tîîse uyenyakon tîronai pra uyaꞌreꞌkon yonpasaꞌ wenai, imakuiꞌpî pe eꞌnî pepîn —taꞌpî Jesusya tînenupaꞌsan pîꞌ.

"

²¹ Mîrîrî pata yapai Jesus eseꞌmaꞌtîꞌpî. Attîꞌpî Tiro pata poro aminke pra cidade pîꞌ. Moropai Sidom pata poro attîꞌpî."

²² Miarî wîriꞌ wanîꞌpî Cananeu pon, Judeupaꞌ pepîn. Jesus erepansaꞌ tanne, mîîkîrî iipîꞌpî iipia. Moropai taꞌpîiya tîwentaimepîtî yeꞌka pe: —Uyepotorî, amîrî wanî Davi nurîꞌtî paarîꞌpî pe. Pîikaꞌtîton amîrî. Aꞌnokoꞌpî pe saꞌne uyeraꞌmakî. Oꞌmaꞌ ewonsaꞌ man unre wîriꞌ yaꞌ. Mîîkîrîya toneꞌ ikupî pîꞌ man —taꞌpîiya.

"

²³ Tîîse Jesusya imaimu yuuku pra awanîꞌpî. Mîrîrî tanne, inenupaꞌsan erepamîꞌpî iipia aminke pra. Moropai inkamoroya taꞌpî: —Mîîkîrî wîriꞌ wîtîtoꞌpe kaꞌkî, uwenairîꞌnîkon aaipî koꞌmannîpî mîrîrî taa enepîiya. Moropai awentaimepîtî koꞌmannîpî —taꞌpî toꞌya.

"

²⁴ Jesusya yuukuꞌpî: —Paapaya uyarimasaꞌ man upemonkonoyamîꞌ neken pîikaꞌtîtoꞌpeuya, Judeuyamîꞌ atakaꞌmaꞌsan, carneiro wanî itesaꞌ pra warantî tîweꞌsanon —taꞌpîiya.

"

²⁵ Tîîse mîîkîrî wîriꞌ iipîꞌpî Jesus rawîrî moropai aweꞌsekunkaꞌpî moropai mîîkîrîya taꞌpî: —Uyepotorî, upîikaꞌtîkî saꞌne —taꞌpîiya.

"

²⁶ —Aꞌkî —taꞌpî Jesusya ipîꞌ. —More yaꞌreꞌ tîrî ya arinmaraka pia, morî pe pra awanî. Mîrîrî warantî awanî apîikaꞌtî tîuya ya, Judeupaꞌ pe pra awanî yeꞌnen.

"

²⁷ Tîîse wîriꞌya taꞌpî Jesus pîꞌ: —Innape man, Uyepotorî. Mîrîrî yeꞌka pe tîîse tesaꞌkon yaꞌreꞌ yaꞌpunuꞌpî eꞌsoroka enapî arinmarakayamîꞌya itaponseꞌ yoꞌkoi siꞌma. Mîrîrî yeꞌnen mararî mîrikkî itîîkî uupia.

"

²⁸ Jesusya taꞌpî ipîꞌ: —Mîrîrî taaya yeꞌnen, innape ukupîya epuꞌtî pîꞌ wai, maꞌnon —taꞌpî Jesusya. —Mîrîrî yeꞌnen îꞌ taaya manniꞌ mîrîrî kupîuya. Moropai mîrîrî taa Jesusya pe mîîkîrî wîriꞌ more oꞌmaꞌ yarakkîron esepiꞌtîꞌpî.

"

²⁹ Miarî pai Jesus eseꞌmaꞌtîꞌpî moropai attîꞌpî Galiléia kuꞌpî rî pîkîrî. Moropai mîîkîrî enukuꞌpî wîꞌ pona moropai eereutaꞌpî miarî."

³⁰ Miarî nîrî arinîkon pemonkonyamîꞌya priꞌyawonkon pepîn yarîꞌpî. Asakoiꞌkon pepîn, moropai maꞌtîkîꞌ pankon, moropai enkaruꞌnankon, moropai imaimu pînon moropai tuꞌkan paran pîꞌ tîweꞌsanon yarîꞌpî toꞌya Jesus pia toꞌ yepiꞌtîtoꞌpeiya kaiꞌma. Moropai inkamoro yepiꞌtîꞌpîiya."

³¹ Mîrîrî kupî Jesusya eraꞌma tîuyaꞌnîkon pîꞌ pemonkonyamîꞌ esenumenkaꞌpî mararî pra teesewankonoꞌmai, maasa pra imaimu pîn eseurîma yeꞌnen, moropai maꞌtîkîꞌ pankon esepiꞌtîsaꞌ yeꞌnen, moropai asakoiꞌkon pepîn asarî yeꞌnen, moropai enkaruꞌnankonya eraꞌma yeꞌnen. Mîrîrî pîꞌ Judeuyamîꞌ yepotorî Paapa yapurîꞌpî toꞌya mararî pra.

"

³² Jesusya tînenupaꞌsan yannoꞌpî tîîpia toꞌ yeurîmapa kaiꞌma moropai taꞌpîiya: —Eseurîwîꞌne wei kaisarî insanan pemonkonyamîꞌ koꞌmansaꞌ man uupia. Uꞌnokoꞌpî pe toꞌ eraꞌma pîꞌ wai toꞌ yaꞌreꞌ ton pra tîîse —taꞌpîiya. —Toꞌ anaipontîpai pra wai tekkarikon yonpa toꞌya pra toꞌ tîîse. Maasa pra yai toꞌ wîtî eserîke wanî eꞌma taawîrî emiꞌne tîwanîkon pîꞌ —taꞌpîiya.

"

³³ Inenupaꞌsanya Jesus ekaranmapoꞌpî: —Oꞌnon yeꞌka pe insanan mararonkon pepîn pemonkonyamîꞌ yekkari ton eporî eꞌpainon tarî keren po siꞌma? Îꞌ ton pîn yaꞌ eꞌnî tanne —taꞌpî toꞌya.

"

³⁴ Inkamoro ekaranmapoꞌpî Jesusya: —Îꞌ warapo kaisarî trigo puusaꞌ nai? —taꞌpîiya. —Asakîꞌne miaꞌ pona tîîmoꞌtai kaisarî moropai moroꞌyamîꞌ mîrikkî —taꞌpî toꞌya.

"

³⁵ Moropai tamîꞌnawîronkon pîꞌ taꞌpî Jesusya: —Non pona ereutatî —taꞌpîiya."

³⁶ Moropai Jesusya asakîꞌne miaꞌ pona tîîmoꞌtai kaisaron trigo puusaꞌ yapisîꞌpî, moropai moroꞌyamîꞌ nîrî. Mîrîrî tîpo eepîremaꞌpî Paapa pîꞌ. —Morî puꞌkuru amîrî, anna yaꞌreꞌ ton tîînen —taꞌpîiya Paapa pîꞌ. Mîrîrî tîpo trigo puusaꞌ pirikkapîtîꞌpîiya. Mîrîrî tîrîꞌpîiya tînenupaꞌsan pia itîîtoꞌpe toꞌya pemonkonyamîꞌ pia."

³⁷ Mîrîrî pîꞌ tamîꞌnawîronkon entamoꞌkaꞌpî teesepiꞌtîkon pîkîrî. Mîrîrî yonparîꞌpî yannukuꞌpî inenupaꞌsanya asakîꞌne miaꞌ pona tîîmoꞌtai kaisarî waikaraꞌpî."

³⁸ Inkamoro Jesus nekkariꞌtîꞌsan wanîꞌpî warayoꞌkon 4.000 kaisarî wîriꞌsanyamîꞌ tîkuꞌnetîi pra moropai moreyamîꞌ.

"

³⁹ Mîrîrî tîpo Jesusya pemonkonyamîꞌ yaipontîꞌpî toꞌ wîtîtoꞌpe. Moropai Jesus asaraꞌtîꞌpî kanau yaꞌ, moropai attîꞌpî Magadã pata pona.

"

16

¹ Jesus yarakkîrî eseurîmai tiaronkon fariseuyamîꞌ moropai tiaronkon saduceuyamîꞌ wîtîꞌpî iipia. Jesus anakaꞌmapai toꞌ wanîꞌpî mîîtoꞌpe. Paapa winîpaino pe mîîkîrî wanî pepîn kaiꞌma toꞌ esenumenkaꞌpî. Mîrîrî yeꞌnen kaꞌ winîpainon, tîneraꞌmakon ton esatîꞌpî toꞌya Jesus pîꞌ."

² Tîîse Jesusya toꞌ maimu yuukuꞌpî: —Wei ewomî tanne suuyu pe tîweꞌsen kaꞌ pîꞌ eraꞌmayaꞌnîkon ya, taawonan amîrîꞌnîkon: “Penane morî pe pata wanî pe man. Aꞌkî, kaꞌ pîꞌ suuyu pe awanî”, taayaꞌnîkon."

³ Moropai penane puꞌkuru suuyu pe pata wanî ya taayaꞌnîkon: “Sîrîrîpe konoꞌ rena pe man”, taayaꞌnîkon. Maasa pra kaꞌ pîꞌ katupuru eraꞌmasaꞌyaꞌnîkon yeꞌnen, moropai ewaron pe pata wanî yeꞌnen. Kaꞌ eraꞌmayaꞌnîkon kaisarî, taapîtîyaꞌnîkon îꞌ eꞌkupî epuꞌtîyaꞌnîkon. Tîîse îꞌ waniꞌ awanî yeꞌnen aneraꞌmaꞌpîkon ayenukon ke, kupîyaꞌnîkon pepîn innape? Îꞌ eꞌkupî epuꞌtîyaꞌnîkon pepîn, îꞌ ikupî eserîkan pepîn eraꞌmayaꞌnîkon tîîse —taꞌpîiya."

⁴ —Îꞌ yeꞌka pe amîrîꞌnîkon sîrîrî pankon wanî imakuiꞌpî pe, innape ukupî yeꞌka pe pra. Aneraꞌmakon ton esatîyaꞌnîkon upîꞌ. Tîîse îꞌ rî aneraꞌmakon ton kupîuya pepîn. Tîîse tiwinan neken Jonas nurîꞌtî yarakkîrî eꞌkupîꞌpî. Mîrîrî epuꞌtîyaꞌnîkon yuꞌse wai.

Mîrîrî taa tîpo, Jesus epaꞌkaꞌpî moropai attîꞌpî toꞌ piapai.

"

⁵ Jesus nenupaꞌsanya ikuꞌpî nuurukkuꞌsaꞌ yai, tîwanmîraꞌnîkon tekkarikon yaasaꞌ toꞌya pra toꞌ wanîꞌpî.

"

⁶ Mîrîrî yai taꞌpî Jesusya: —Enpen panpîꞌ eꞌtî, fariseuyamîꞌ moropai saduceuyamîꞌ pîꞌ tîwarî eꞌtî. Aka, tîwî toꞌ piawon trigo saꞌmotoꞌ toꞌ piawon nîsi —taꞌpîiya.

"

⁷ Mîrîrî taiya pîꞌ Jesus nenupaꞌsan eseurîmaꞌpî teken siꞌma. Taꞌpî toꞌya: —Mîrîrî taiya maasa pra uyekkarikon ton eneꞌsaꞌ pra awanî yeꞌnen —taꞌpî toꞌya.

"

⁸ Inkamoro eseurîmatoꞌ etaꞌpî Jesusya. Mîrîrî yeꞌnen toꞌ ekaranmapoꞌpîiya. Taꞌpîiya: —Îꞌ ton pe see eeseurîmakon koꞌmannîpî mîrîrî, ayekkarikon ton pra awanî pîꞌ? Îꞌ yeꞌka pe see mararî innape ukuꞌtoꞌyaꞌnîkon awanî mîrîrî!"

⁹ Uupia Paapa meruntîri wanî epuꞌtîyaꞌnîkon pra naatî mîîtoꞌpe? Epuꞌtîyaꞌnîkon pra awanîkon mîrîrî ayewankon yaꞌ. Manniꞌ unkupî pîꞌ awenpenatakon pra naatî? Miaꞌtaikinan trigo puusaꞌ pîrikkapîtîꞌpîuya 5.000 kaisaronkon warayoꞌkon yekkariꞌtîꞌpîuya. Moropai îꞌ warapo waikaraꞌpî kaisarî itonparîꞌpî yannukuꞌpîyaꞌnîkon pîꞌ enpenatatî."

¹⁰ Moropai manniꞌ asakîꞌnan miaꞌ pona tîîmoꞌtai kaisaron trigo puusaꞌ mîrîrî ke 4.000 kaisaronkon warayoꞌkon yekkariꞌtîꞌpîuya. Moropai îꞌ warapo waikaraꞌpî kaisarî itonparîꞌpî yannukuꞌpîyaꞌnîkon?"

¹¹ Mîrîrî tauya manniꞌ epuꞌtîyaꞌnîkon pra awanîkon mîrîrî. Maasa pra trigo puusaꞌ pîꞌ eseurîma pepîn sîrîrî. Tîîse fariseuyamîꞌ moropai saduceuyamîꞌ yeseru pîꞌ eseurîma, mîrîrî tîwarî eꞌtî. Mîrîrî toꞌ yeseru wanî kîsereꞌna saꞌmotoꞌ fermento warantî.

"

¹² Mîrîrî Jesus eseurîmatoꞌ epuꞌtîꞌpî inenupaꞌsanya. Maasa pra kîsereꞌna saꞌmotoꞌ pîꞌ eeseurîma pe pra epuꞌtîꞌpî toꞌya. Tîîse pemonkonyamîꞌ yenupatoꞌ fariseuyamîꞌya moropai saduceuyamîꞌya pîꞌ eeseurîma epuꞌtîꞌpî toꞌya. Toꞌ yeseru pîꞌ tîwarî tîwanîkonpa epuꞌtîꞌpî toꞌya.

"

¹³ Moropai Jesus wîtîꞌpî tiaron pata poro, iteseꞌ Cesaréia Filipe. Miarî teerepansaꞌkon pe tînenupaꞌsan ekaranmapoꞌpîiya: —Anîꞌ kaiꞌma uurî, kaꞌ poi iipîꞌpî pîꞌ pemonkonyamîꞌ wanî? —taꞌpîiya.

"

¹⁴ Inkamoroya yuukuꞌpî: —Tiaronkonya taa apîꞌ: “João Batista nurîꞌtî mîîkîrî”, taa toꞌya. Moropai tiaronkonya taa: “Penaroꞌ Paapa maimu ekaremeꞌnen profeta Elias nurîꞌtî mîîkîrî”, taa toꞌya —taꞌpî toꞌya. —Moropai tiaronkonya taa: “Penaroꞌ itekare ekaremeꞌnen profeta Jeremias nurîꞌtî mîîkîrî”, taa toꞌya. “Paapa maimu ekaremeꞌnenan nurîꞌsan yonpa pe awanî”, taa toꞌya —taꞌpî inenupaꞌsanya.

"

¹⁵ —Amîrîꞌnîkon kanan? Anîꞌ pe ukupî pîꞌ naatî? —taꞌpîiya.

"

¹⁶ Simão Pedroya yuukuꞌpî: —Amîrî Paapa nîmenkaꞌpî, Cristo. Ipatîkarî tîîkoꞌmansen Paapa munmu pe awanî —taꞌpî Pedroya.

"

¹⁷ Jesusya taꞌpî Pedro pîꞌ: —Mîrîrî taaya yeꞌnen, morî pe puꞌkuru awanî sîrîrî, Simão, João munmu —taꞌpî Jesusya ipîꞌ. —Maasa pra sîrîrî yairon epuꞌtîya manniꞌ wanî pepîn pemonkon winîpainon pe puꞌkuru. Tîîse uyun kaꞌ pon nîtîrîꞌpî pe awanî aapia —taꞌpî Jesusya Pedro pîꞌ."

¹⁸ Mîrîrî yeꞌnen Jesusya taꞌpî Pedro pîꞌ: —Tauya sîrîrî apîꞌ, amîrî Pedro saꞌman, tîꞌ warainon. Moropai sîrîrî tîꞌparappa pona usoosirî konekauya sîrîrî. Mîrîrîya upemonkonoyamîꞌ, usoosirî tawonkon ena pe man meruntî ke, tamîꞌnawîronkon yentai. Saꞌmantantoꞌ yentai toꞌ ena pe man, Makuiya toꞌ tarumaꞌtî tîîse —taꞌpî Jesusya."

¹⁹ —Sîrîrî meruntî ke uurî eꞌtoꞌ tîrîuya aapia. Îꞌ taayaꞌnîkon umaimu pe sîrîrî non po, mîrîrî pîꞌ inna taa Paapaya kaꞌ po —taꞌpîiya.

"

²⁰ Mîrîrî taa tîpo, Jesusya taꞌpî tînenupaꞌsan pîꞌ: —Tîîse Paapa nîmenkaꞌpî pe uurî wanî kîsekaremeꞌtî anîꞌ pîꞌ —taꞌpî Jesusya tînenupaꞌsan pîꞌ.

"

²¹ Moropai mîrîrî pata pai Jesus eseurîma piaꞌtîꞌpî tîîsaꞌmanta pîꞌ. Tînenupaꞌsan pîꞌ taꞌpîiya: —Uutî eꞌpai awanî sîrîrî Jerusalém pona moropai miarî Judeuyamîꞌ esanonya moropai teepîremasanon esanonya uyewanmarî kupî sîrîrî. Moropai Moisés nurîꞌtîya yenupantoꞌ pîꞌ yenupatonkonya nîrî uyewanmarî kupî sîrîrî. Inkamoroya utarumaꞌtî mararî pra. Inkamoroya uwî meꞌpo kupî sîrîrî. Tîîse uusaꞌmanta tîpo, iteseurîno weiyu yai eꞌmîꞌsaꞌka kupî sîrîrî —taꞌpîiya.

"

²² Mîrîrî taiya yeꞌnen, Pedroya Jesus yarîꞌpî tiaronkon koreꞌtapai tarakkîrî teeseurîmapa, imaimu yuwaꞌtîpa. Moropai taꞌpîiya ipîꞌ: —Uyepotorî, mîrîrî warantî eeseurîma eꞌpai pra man. Paapaya mîrîrî kupî eꞌpai pra man ayarakkîrî —taꞌpî Pedroya Jesus pîꞌ.

"

²³ Jesus eraꞌtîꞌpî Pedro winîkîi. Moropai taꞌpîiya Pedro pîꞌ: —Uupiapai atarimakî, Makui. Uurî maꞌnîpa yuꞌse awanî mîrîrî. Paapa esenumenka warantî eesenumenka pra awanî mîrîrî. Tarî non po tîîkoꞌmansenon esenumenka warantî eesenumenka —taꞌpîiya.

"

²⁴ Moropai Jesusya taꞌpî tînenupaꞌsan pîꞌ. Taꞌpîiya: —Uwanîyakon pe eꞌpai awanîkon ya, ayeserukon, ituꞌse aweꞌtoꞌkon mîrumakatîi moropai ituꞌse uurî eꞌtoꞌ kuꞌtî. Uwanîyakon pe eꞌpai awanîkon ya, eꞌtarumaꞌtîntoꞌ namapai pra eꞌtî. Moropai uwenairî maaiꞌtîi —taꞌpîiya."

²⁵ —Tîîse anîꞌya tîîkoꞌmantoꞌ pînînma ya kureꞌne, tîweꞌtarumaꞌtî namaiya. Mîrîrî yeꞌnen Paapa pia ipatîkarî tîîkoꞌmantoꞌ ton eporîiya pepîn. Tîîse aminke aakoꞌmamî Paapa pîꞌ. Tîîse uwenai anîꞌya tîîkoꞌmantoꞌ pînînma pra awanî ya, tîweꞌtarumaꞌtîtoꞌ yapîtanîpîiya ya, ipatîkarî enen tîîkoꞌmantoꞌ ton eporîiya Paapa pia."

²⁶ Tamîꞌnawîron sîrîrî non pon yemanne esaꞌ pe anîꞌ ena ya, tîîse ipatîkarî enen tîîkoꞌmantoꞌ ton eporîiya pra awanî ya, eporîiya kupî pepîn rî mîrîrî. Aasaꞌmanta yai tekaton yepeꞌ ton eporîiya pepîn. Aweꞌpîikaꞌtî pepîn."

²⁷ Maasa pra uurî, kaꞌ poi iipîꞌpî iipî kupî sîrîrî Paapa meruntîri yarakkîrî, inserîyamîꞌ pokonpe. Moropai mîrîrî yai tamîꞌnawîronkon pia untîrî tîrîuya kupî sîrîrî toꞌ nîkupîꞌpî wenai."

²⁸ Ayenkuꞌtîuyaꞌnîkon pepîn sîrîrî. Uurî, kaꞌ poi iipîꞌpî pemonkon pe wanî pe man tamîꞌnawîronkon esaꞌ pe. Mîrîrî eraꞌma amîrîꞌnîkon yonpayamîꞌya pe man tîîsaꞌmantakon rawîrî —taꞌpî Jesusya.

"

17

¹ Tiwin miaꞌ pona tîîmoꞌtai wei tîpo, Jesus wîtîꞌpî kawînan wîꞌ pona tînenupaꞌsan yonpa pokonpe. Pedro wîtîꞌpî moropai Tiago moropai itakon João wîtîꞌpî ipokonpe."

² Miarî Jesus yenpata etinyakaꞌmaꞌpî toꞌ rawîrî siꞌma. Inkeꞌ pe awanîꞌpî, wei warantî moropai ipon wanîꞌpî aimutun pe puꞌkuru, inkeꞌ pe apoꞌ yaꞌkaru warantî."

³ Mîrîrîya tiwinarî asakîꞌnankon warayoꞌkon, Moisés nurîꞌtî moropai Elias nurîꞌtî esenpoꞌpî toꞌ rawîrî. Moropai Jesus yarakkîrî toꞌ eseurîma eraꞌmaꞌpî toꞌya."

⁴ Mîrîrî yeꞌnen Pedroya taꞌpî Jesus pîꞌ: —Uyepotorî, morî pe puꞌkuru eꞌnî man tarî. Mîrîrî yeꞌnen ituꞌse awanî ya, eseurîwîꞌne kaisarî tappîi ton konekauya sîrîrî, tiwin amîrî ton moropai tiwin Elias ton moropai tiwin Moisés ton kaiꞌma —taꞌpîiya.

"

⁵ Mîrîrî warantî Pedro eseurîma koꞌmannîpî tanne, katupuru inkeꞌya toꞌ napontîꞌpî. Moropai mîrîrî koreꞌta Paapa eseurîmatoꞌ etaꞌpî toꞌya. Taꞌpî Paapaya: —Unmu mîserî uwakîri puꞌkuru ipîꞌ atausinpatoꞌ. Mîîkîrî unmu yuꞌsan uurî mararî pra. Mîîkîrîya îꞌ taatoꞌ etatî —taꞌpî Paapaya.

"

⁶ Paapa eseurîmatoꞌ eta tîuyaꞌnîkon pe, Jesus nenupaꞌsan enaꞌpî mararî pra eranneꞌ pe. Mîrîrîya toꞌ yenkasiꞌpannîpîꞌpî. Non pona tenpatakon erennukuꞌpî toꞌya."

⁷ Tîîse Jesus iipîꞌpî toꞌ pia moropai toꞌ yapîꞌpîiya. Taꞌpîiya toꞌ pîꞌ: —Eꞌmîꞌsaꞌkatî, eranneꞌ pe tîweꞌse pra eꞌtî —taꞌpîiya toꞌ pîꞌ."

⁸ Inkamoro kurantaꞌpî moropai tîwoiꞌnîkon eraꞌma tîuyaꞌnîkon ya, anîꞌ eraꞌma toꞌya pra awanîꞌpî, tîîse Jesus neken, tiwinsarî eraꞌmaꞌpî toꞌya.

"

⁹ Wîꞌ poi tawautîkon pe, Jesusya taꞌpî toꞌ pîꞌ: —Anîꞌ pîꞌ aneraꞌmaꞌpîkon kîsekaremeꞌtî —taꞌpîiya. Uusaꞌmanta tîpo, uurî, kaꞌ poi iipîꞌpî eꞌmîꞌsaꞌkasaꞌ tîpo ekaremekîkonpa.

"

¹⁰ Mîrîrî yeꞌnen inenupaꞌsanya Jesus ekaranmapoꞌpî: —Îꞌ waniꞌ kin awanî yeꞌnen Moisés nurîꞌtîya yenupantoꞌ pîꞌ yenupatonkonya taapîtî mîrîrî? “Eꞌmaiꞌ pe penaroꞌ Paapa maimu ekaremeꞌnen Elias nurîꞌtî iipî pe man. Moropai mîrîrî tîpo Paapa narimaꞌpî Cristo iipî”, taa toꞌya —taꞌpî toꞌya ipîꞌ.

"

¹¹ Jesusya yuukuꞌpî: —Inna, seruꞌ pepîn Elias nurîꞌtî warainon iiꞌsaꞌ man tamîꞌnawîron konekai Paapa maimu yawîrî."

¹² Aaipîꞌpî tîîse tarîronkonya epuꞌtî pra awanîꞌpî. Tîîse itarumaꞌtîꞌpî toꞌya ituꞌse tîwanîkon pîkîrî. Mîrîrî warantî nîrî uurî kaꞌ poi iipîꞌpî tarumaꞌtî inkamoro rî pemonkonyamîꞌya.

"

¹³ Mîrîrî warantî Jesus eseurîma yeꞌnen, inenupaꞌsanya imaimu epuꞌtî tuꞌkaꞌpî. João Batista yekare pîꞌ eeseurîma kaiꞌma toꞌ wanîꞌpî.

"

¹⁴ Arinîkon pemonkonyamîꞌ pia toꞌ erepansaꞌ ya, warayoꞌ iipîꞌpî Jesus pia. Moropai irawîrî aweꞌsekunkaꞌpî."

¹⁵ Mîîkîrîya taꞌpî Jesus pîꞌ: —Uyepotorî, unmu saꞌne aꞌnokoꞌpî pe eraꞌmakî. Oꞌmaꞌ ewonsaꞌ man mîîkîrî yaꞌ. Moropai yeporîiya ya, non pona yenumîiya moropai inta arakkunta. Tuꞌke iteꞌka apoꞌ yaꞌ imasaiꞌya man. Moropai tuna ka yenunsaiꞌya man."

¹⁶ Mîîkîrî enepîꞌpîuya anenupaꞌsanya yepiꞌtîtoꞌpe kaiꞌma. Tîîse yepiꞌtî toꞌya eserîke pra toꞌ wanîꞌpî —taꞌpîiya ipîꞌ.

"

¹⁷ Jesusya warayoꞌ maimu yuukuꞌpî: —Amîrîꞌnîkon, sîrîrîpankonya ukupî pra awanî innape. Imakuiꞌsan amîrîꞌnîkon. Îꞌ pîkîrî ayapîtanîpîuyaꞌnîkon eꞌpai awanî? Îꞌ pîkîrî amîrîꞌnîkon yarakkîrî uukoꞌmamî sîrîrî? —taꞌpî Jesusya. Moropai taꞌpîiya: —Mîîkîrî warayoꞌ maasaron eneꞌtî uupia —taꞌpîiya.

"

¹⁸ Mîîkîrî epaꞌkatoꞌpe taꞌpî Jesusya. Moropai oꞌmaꞌ epaꞌkaꞌpî mîîkîrî warayoꞌ yapai mîrîrî pe rî. Mîrîrî yeꞌnen eesepiꞌtîsaꞌ wanîꞌpî.

"

¹⁹ Mîrîrî kuꞌsaꞌ Jesusya tîpo, inenupaꞌsan erepamîꞌpî Jesus pia tiwinsarî tîîse. Ekaranmapoꞌpî toꞌya: —Îꞌ waniꞌ awanî yeꞌnen oꞌmaꞌ tîrîka annaya eserîke pra awanî mîrîrî? —taꞌpî toꞌya Jesus pîꞌ.

"

²⁰ Moropai Jesusya taꞌpî toꞌ pîꞌ: —Maasa pra innape ukupîyaꞌnîkon pra awanîkon yeꞌnen. Aꞌkî, innape ikupîyaꞌnîkon ya, tîwîrî siꞌmîrikkî pe mîrikkî innape ikuꞌtoꞌyaꞌnîkon tîîse, manniꞌ mostarda yenaꞌpî warantî tîîse, taayaꞌnîkon ya seeniꞌ wîꞌ pîꞌ: “Seeniꞌ patapai emoꞌkakî moropai atîkî” taayaꞌnîkon ya, moropai amaimukon pe mîrîrî wîtî eꞌpainon. Mîrîrî warantî ikupîyaꞌnîkon ya, tamîꞌnawîron mîrîrî yeꞌka kupîya eꞌpainon, innape ikupîyaꞌnîkon ya —taꞌpî Jesusya. ["

²¹ —Tîîse mîîkîrî oꞌmaꞌ yarakkîrî tîweꞌsen yepiꞌtîyaꞌnîkon eꞌpainon eepîremakon yeꞌka pe, ayekkarikon tonpai pra tîîse. Mîrîrî warantî neken mîserî oꞌmaꞌ warainon yenpaꞌkayaꞌnîkon eꞌpainon —taꞌpî Jesusya toꞌ pîꞌ.]

"

²² Tînenupaꞌsan pokonpe teemurukuntîi Galiléia po, Jesusya taꞌpî toꞌ pîꞌ: —Uurî kaꞌ poi iipîꞌpî rumaka tiaronkonya kupî sîrîrî uyeyatonon yenyaꞌ."

²³ Moropai inkamoroya uyapisî kupî sîrîrî. Moropai uwî toꞌya kupî sîrîrî. Tîîse uwîsaꞌ toꞌya tîpo, iteseurîno weiyu yai eꞌmîꞌsaꞌka kupî sîrîrî —taꞌpîiya.

Moropai mîrîrî taa Jesusya eta tîuyaꞌnîkon pîꞌ, inenupaꞌsan esewankonoꞌmasaꞌ wanîꞌpî mararî pra.

"

²⁴ Cafarnaum cidaderî po Jesus erepansaꞌ tanne tînenupaꞌsan pokonpe, toꞌ epîrematoꞌ yewîꞌ ta tîniru yapisî pîꞌ teesenyakaꞌmasanon wîtîꞌpî Pedro pia. Inkamoroya Pedro ekaranmapoꞌpî: —Amîrîꞌnîkon yenupanenya tîniru tîrî pepîn anna pia? —taꞌpîiya.

"

²⁵ —Inna, ayeꞌmaiyaꞌnîkon —taꞌpî Pedroya. Mîrîrî taasaꞌ toꞌya tîpo, Pedro ewomîꞌpî wîttî ta, Jesus eꞌtoꞌ ta. Moropai Jesus eseurîmaꞌpî eꞌmaiꞌ pe Pedro eseurîma pra tîîse. Taꞌpîiya: —Îꞌ kaiꞌma esenumenkan pîꞌ nan, Pedro? Anîꞌkanya yeꞌma eꞌpainon manniꞌkan ipîkkukon pata esanon esanon reiyamîꞌ pia tarîronkonya tiaron pata ponkonya kaꞌrî?

"

²⁶ —Tiaron pata ponkonya yeꞌma —taꞌpî Pedroya. —Inna —taꞌpî Jesusya. —Tîîse tarî tîîkoꞌmansenonya yeꞌma pepîn eꞌpainon maasa pra toꞌ yonpayamîꞌ pe toꞌ wanî yeꞌnen —taꞌpî Jesusya."

²⁷ —Tîîse yeꞌma pra awanî ya, yeꞌma annaya pepîn taa toꞌya namai yeꞌmapai man —taꞌpî Jesusya. —Mîrîrî yeꞌnen konoiꞌ pîꞌ atîkî ikuꞌpî ka. Eꞌmaiꞌnon moroꞌ yeuꞌkasaꞌya ya, mîîkîrî mata yaꞌ tîniru enaꞌpî eporîya. Mîrîrî eꞌtoꞌpe uurî tonpe moropai amîrî tonpe, teepîremasanon pia untîrîkon pe —taꞌpî Jesusya.

"

18

¹ Moropai mîrîrî yai inenupaꞌsanya Jesus ekaranmapoꞌpî. —Anîꞌ wanî eꞌpainon ipîkku pe panpîꞌ anna koreꞌta, Paapa pemonkonoyamîꞌ? —taꞌpî toꞌya.

"

² Mîrîrî taa toꞌya yeꞌnen, toꞌ rawîrî siꞌma Jesusya more yannoꞌpî tîîpia. Moropai mîîkîrî tîrîꞌpîiya toꞌ rawîrî."

³ Moropai taꞌpîiya: —Ayenkuꞌtîuyaꞌnîkon pepîn, yairî tauya sîrîrî. Tiaron pe eesenumenkakon pra awanîkon ya, moropai tiaronkon maꞌre eꞌpai pra awanîkon ya, mîserî more warantî, Paapa wanî pepîn ayesaꞌkon pe, ipemonkono pe awanîkon pepîn."

⁴ Mîrîrî yeꞌnen anîꞌ wanî ya tiaronkon maꞌre eꞌpai, mîserî more warantî, mîîkîrî wanî ipîkku pe panpîꞌ Paapa pemonkonoyamîꞌ koreꞌta."

⁵ Moropai anîꞌya mîserî more warainon yapisî ya tîwakîri pe, uyapurî tîuya yeꞌnen, mîrîrî warantî uurî nîrî yapisîiya tîwakîri pe more yapisî tîuya manniꞌ warantî —taꞌpî Jesusya tînenupaꞌsan pîꞌ.

"

⁶ —Tîîse anîꞌya innape ukuꞌnenan moreyamîꞌ koreꞌta tiwinan toꞌ yonpa yenupa ya imakuiꞌpî kuꞌtoꞌpeiya, mîîkîrî imakuiꞌpî kupîiya emapuꞌtîtîpon tarumaꞌtî Paapaya mararî pra. Morî pe panpîꞌ awanî eꞌpainon, mîîkîrî pîmî pîꞌ kureꞌnan aꞌ pe ikonekasaꞌ tîꞌ yewaꞌtî toꞌya ya, moropai mîîkîrî yenumî toꞌya ya iren kaꞌ. Maasa pra mîrîrî yentai itarumaꞌtî Paapaya imakuiꞌpî kupî tiaronya emapuꞌtîsaiꞌya ya."

⁷ Aka, tîwarî eꞌtî, tamîꞌnawîronkon pemonkonyamîꞌ sîrîrî pata po tîîkoꞌmansenon. Maasa pra imakuiꞌpî kupî toꞌya emapuꞌtîsanon moro awanî. Mîrîrî eꞌkupî eꞌpai awanî, tîîse manniꞌ tiaronya imakuiꞌpî kupî emapuꞌtînen, mîîkîrî tarumaꞌtî Paapaya pe man mararî pra —taꞌpî Jesusya.

"

⁸ —Aꞌkî, imakuiꞌpî kupîya emapuꞌtî ayenya ya, mîrîrî yaꞌtîkî. Moropai aꞌpuya nîrî imakuiꞌpî kupîya emapuꞌtî ya, mîrîrî yaꞌtîkî moropai yenunkî imakuiꞌpî kupîya namai. Morî pe awanî maꞌtîkîꞌ siꞌma enen aakoꞌmantoꞌ ton eporîya ya, morî pe eꞌtoꞌ yawîrî siꞌma apoꞌ yaꞌ ayenumî Paapaya yentai, manniꞌ apoꞌ îꞌ pensa eesiꞌnîpî ton pepîn yaꞌ."

⁹ Moropai ayenuya imakuiꞌpî kupîya emapuꞌtî ya, mîrîrî ayenu ratai moꞌkakî moropai mîrîrî yenunkî poro pona imakuiꞌpî kupîya namai. Maasa pra morî pe awanî, taiken ayenu tîîse, aakoꞌmantoꞌ ton eporîya ya, saꞌnîrî tîîse apoꞌ yaꞌ ayenumî Paapaya yentai —taꞌpî Jesusya.

"

¹⁰ —Mîrîrî yeꞌnen, aka tîwarî eꞌtî manniꞌkan moreyamîꞌ innape ukuꞌnenan kupîyaꞌnîkon namai ayewanmakon pe. Maasa pra tauya sîrîrî apîꞌnîkon, inkamoro koꞌmannîꞌnenankon pe inserîyamîꞌ wanî aminke pra Paapa pia, îꞌ eꞌkupî toꞌ yarakkîrî ekaremeꞌnenan pe. ["

¹¹ Moropai uurî, kaꞌ poi iipîꞌpî sîrîrî non pona atakaꞌmaꞌsan pîikaꞌtîi —taꞌpî Jesusya.]

"

¹² Jesusya toꞌ nepuꞌtî ton ekaremekîꞌpî. Taꞌpîiya: —Îꞌ kaiꞌma eesenumenkakon eꞌpainon. Warayoꞌ wanî ya 100 kaisarî carneiroyamîꞌ esaꞌ pe tîweꞌse, tîîse inkamoro yonpa esepuꞌtî pra awanî ya tiwin, îꞌ kupîiya eꞌpainon? Tîwî inkamoro 99 kaisaronkon nîmîiya tekkarikon yonpa toꞌya tanne. Moropai attî eeseraꞌma pra awanî manniꞌ yuwai, innape nai? —taꞌpî Jesusya."

¹³ —Moropai tauya mîîkîrî eposaiꞌya ya, kureꞌne aatausinpa. Inkamoro 99 kaisaronkon pîꞌ aatausinpa yentai."

¹⁴ Mîrîrî warantî nîrî Paapa ayunkon kaꞌ pon wanî tiwin mîrikkî more, tîpemonkonoyamîꞌ yonpa atakaꞌma yuꞌse pra, imakuiꞌpî yaꞌ attî namai —taꞌpî Jesusya.

"

¹⁵ Moropai taꞌpîiya: —Ayonpaya imakuiꞌpî kuꞌsaꞌ ya awinîkîi, iipia atîkî imakuiꞌpî inkupîꞌpî konekata yarakkîrî. “Yairî pra aweꞌsaꞌ nai, uyonpa”, kaꞌta ipîꞌ. Tîîse mîrîrî konekakî saꞌnîrî siꞌma neken amîrîꞌnîkon, tiaronkon koreꞌta pra siꞌma. Morî pe tîpanamatoꞌya eta ayonpaya ya, morî pe awanî, maasa pra ipîikaꞌtîya yeꞌnen mîrîrî winîpai."

¹⁶ Tîîse tîpanamatoꞌya anetapai pra awanî ya, tiwin asakîꞌnankon innape Jesus kuꞌnenan yaakî ayarakkîrî. Paapa maimu eꞌmenukasaꞌ manniꞌ yawîrî awanîkonpa. Maasa pra see warantî aweꞌmenukasaꞌ man:

Asakîꞌne eseurîwîꞌne etatonkon eꞌpai awanî innape yairî eseurîmannîꞌpî eꞌtoꞌpe,
taasaiꞌya man."

¹⁷ Tîîse toꞌ maimu anetapai pra awanî ya, tamîꞌnawîronkon innape Jesus kuꞌnenan soosi tawonkon pîꞌ ekaremeꞌtî. Mîrîrî warantî tîîse toꞌ maimu anetapai pra wanî ya, mîîkîrî pîꞌ eꞌtî Paapa epuꞌnen pepîn pîꞌ awanîkon warantî ikuꞌtî, imakuiꞌpî pe tîweꞌsen warantî ikuꞌtî —taꞌpî Jesusya.

"

¹⁸ —Yairî tauya sîrîrî apîꞌnîkon, mîrîrî amaimukon pîꞌ inna taa Paapaya. Moropai amaimukon anetapainon yapisîyaꞌnîkon ya inîꞌrî ayonpa pe mîrîrî amaimukon pîꞌ inna taa Paapaya nîrî.

"

¹⁹ Moropai inîꞌrî tauya apîꞌnîkon îꞌ rî anesatîkon asakîꞌne siꞌma esatîyaꞌnîkon ya, Paapa pîꞌ eepîrematoꞌkon ke, tamîꞌnawîrî mîrîrî eta Paapaya. Mîrîrî yeꞌnen itîrî uyun kaꞌ ponya aapiaꞌnîkon."

²⁰ Maasa pra oꞌnon pata siꞌma uyapurînenan emurukuntîsaꞌ wanî ya, asakîꞌnankonya eseurîwîꞌnankonya uyapurî ya uyeseꞌ pîꞌ inkamoro koreꞌta uurî koꞌmamî —taꞌpî Jesusya.

"

²¹ Moropai Pedro wîtîꞌpî Jesus pia. Moropai taꞌpîiya Jesus pîꞌ: —Uyepotorî, îꞌ warapo iteꞌka uyonpa nîkupîꞌpî imakuiꞌpî uwinîkîi kuꞌtoꞌpeuya uuwanmîra? Îꞌ waniꞌ pra man taatoꞌpeuya ipîꞌ? —taꞌpî Pedroya. —Asakîꞌne miaꞌ pona tîîmoꞌtai iteꞌka kaꞌrî tauya eꞌpainon?

"

²² Jesusya yuukuꞌpî: —Asakîꞌne miaꞌ pona tîîmoꞌtai kaisarî tauya pepîn. Tîîse tuꞌke iteꞌka kaꞌkî, 77 kaisarî kaꞌkî —taꞌpî Jesusya ipîꞌ."

²³ —Maasa pra mîrîrî warantî pemonkonyamîꞌ esaꞌ pe tîweꞌsen Paapaya ikupî tîpemonkonoyamîꞌ yarakkîrî. Awanî Reiya epeꞌmîra toꞌ eꞌtoꞌ eraꞌma warantî —taꞌpîiya."

²⁴ —Mîrîrî kupî piaꞌtî toꞌ yepuruya epeꞌmîra tîweꞌsanon pîꞌ. Tiaronkon pemonkonyamîꞌya tiwin ipoitîrî enepîꞌpî iipia. Mîîkîrî ipoitîrî wanîꞌpî tepuru pia mararî pra epeꞌmîra 400 milhão kaisarî."

²⁵ Tîîse mîrîrî epeꞌmîra tîweꞌtoꞌ yeꞌmaiya eserîke pra ipoitîrî wanîꞌpî. Mîrîrî yeꞌnen taꞌpî itepuruya surarayamîꞌ pîꞌ: “Mîserî warayoꞌ ke eꞌrepatî. Moropai inoꞌpî ke moropai inmukuyamîꞌ ke. Moropai tamîꞌnawîrî itewîꞌ ta tîꞌweꞌsen itemanne ke eꞌrepatî mîrîrî yepeꞌpî ke epeꞌmîra aweꞌtoꞌ yeꞌmakonpa”, taꞌpîiya."

²⁶ Mîrîrî taiya yeꞌnen, mîîkîrî ipoitîrî eꞌsekunkaꞌpî irawîrî. Moropai taꞌpîiya tepuru pîꞌ: “Uyepuru, maasa yeꞌmauya nîmîꞌpai man. Ayeꞌmauya pra wanî pepîn tîîse ayeꞌmauya tamîꞌnawîrî” taꞌpî ipoitîrîya.

"

²⁷ Mîrîrî taiya yeꞌnen, mîîkîrî tîpoitîrî eraꞌmaꞌpî itepuruya tîꞌnokoꞌpî pe saꞌne. Mîrîrî yeꞌnen taꞌpîiya tîpoitîrî pîꞌ: “Îꞌ waniꞌ pra man, tîwî natîpamîi uurî kîseꞌmai”, taꞌpîiya ipîꞌ. Moropai attîtoꞌpe taꞌpî itepuruya tîîpiapai.

"

²⁸ Tîkaraiwarî piapai tuutî pe, tiaron warayoꞌ, tepuru pia esenyakaꞌmaꞌpî eporîꞌpîiya. Mîîkîrî saꞌne wanîꞌpî iipia itarumaiꞌpî pe. Mîîkîrî wanîꞌpî mararî epeꞌmîra iipia 300 kaisarî. Mîîkîrî saꞌne yapisîꞌpîiya iꞌmî pîꞌ yapisîꞌpîiya. Moropai taꞌpîiya ipîꞌ: “Uupia epeꞌmîra aweꞌtoꞌ yeꞌmakî tarîpai”, taꞌpîiya ipîꞌ.

"

²⁹ Mîrîrî taiya yeꞌnen, mîîkîrî saꞌne eꞌsekunkaꞌpî irawîrî. Moropai taꞌpîiya mîîkîrî pîꞌ: “Maasa ayeꞌmauya nîmîꞌpai man. Yeꞌmatoꞌ ton eposauꞌya. Ayeꞌmauya pra wanî pepîn tamîꞌnawîrî ayeꞌmauya” taꞌpîiya.

"

³⁰ Tîîse, inna îꞌ waniꞌ pra man, taiya pra mîîkîrî iipia epeꞌmîra aweꞌtoꞌ wanîꞌpî. Mîrîrî yeꞌnen mîîkîrî yarîꞌpîiya amaꞌyeꞌkon atarakkantoꞌ yewîꞌ ta. Miarî yarakkamo yeꞌka pe taꞌpîiya: “Tarî akoꞌmankî uupia epeꞌmîra aweꞌtoꞌ yeꞌmaya pîkîrî”, taꞌpîiya ipîꞌ."

³¹ Tîîse mîrîrî warantî mîîkîrîya ikupî eraꞌmaꞌpî tiaronkon itepuru poitîrîtononya. Inkamoro enaꞌpî yairî maꞌre mararî pra, mîrîrî eraꞌma tîuyaꞌnîkon yeꞌnen. Tarîpai mîrîrî ekaremeꞌse toꞌ erepamîꞌpî tepurukon pia. Moropai mîrîrî ekaremekîꞌpî toꞌya ipîꞌ."

³² Moropai itepuruya mîîkîrî tîpoitîrî eꞌmaiꞌnon yanno meꞌpoꞌpî aaiꞌtoꞌpe tîîpia. Mîîkîrî pîꞌ taꞌpî itepuruya: “Amîrî imakuiꞌpî. Teuren uupia epeꞌmîra aweꞌtoꞌ pîꞌ îꞌ waniꞌ pra man moriya, taasauꞌya tanne, esatîya yeꞌnen."

³³ Tîîse îꞌ waniꞌ awanî yeꞌnen tiaron upoitîrî eraꞌmaya pepîn aꞌnokoꞌpî pe, uurîya uꞌnokoꞌpî pe ayeraꞌmaꞌpî warantî?” taꞌpî itepuruya ipîꞌ."

³⁴ Mîrîrî yai mîîkîrî pîꞌ itepuru ekoreꞌmaꞌpî mararî pra. Mîrîrî yeꞌnen mîîkîrî tîpoitîrî rumakaꞌpîiya surarayamîꞌya yarakkamotoꞌpe atarakkannîtoꞌ yewîꞌ ta. Mîrîrî warantî aweꞌtarumaꞌtîꞌpî tamîꞌnawîrî epeꞌmîra tîweꞌtoꞌ yeꞌma tîuya pîkîrî.

"

³⁵ Sîrîrî warantî uyun kaꞌ po manniꞌya ikupî kupî sîrîrî tiwin pîꞌ amîrîꞌnîkon yarakkîrî, awinîkîiꞌnîkon imakuiꞌpî ayonpakon nîkupîꞌpî kuꞌsaꞌyaꞌnîkon pra awanîkon ya, aawanmîraꞌnîkon —taꞌpî Jesusya toꞌ pîꞌ.

"

19

¹ Mîrîrî warantî teeseurîma yaretîꞌka tîpo, Jesus wîtîꞌpî Galiléia pata poi. Awennaꞌpoꞌpî Judéia pata pona. Iren Jordão ratai poro attîꞌpî."

² Mîrîrî yai arinîkon pemonkonyamîꞌ epereꞌpîtîꞌpî iipia. Moropai priꞌyawonkon pepîn yepiꞌtîꞌpîiya miarî.

"

³ Tiaronkon fariseuyamîꞌ erepamîꞌpî Jesus pia. Jesus anakaꞌmapai toꞌ wanîꞌpî iteseru eraꞌmakonpa kaiꞌma. Mîrîrî yeꞌnen ekaranmapoꞌpî toꞌya: —Warayoꞌya tînoꞌpî rumakasaꞌ ya îꞌ wenai pra, yairî awanî mîrîrî? Moisés nekaremekîꞌpîya taasaꞌ yawîrî? —taꞌpî toꞌya.

"

^{4 (4,5)} Jesusya yuukuꞌpî: —Paapa maimu erenkasaꞌyaꞌnîkon pra naatî, îꞌ kaiꞌma Paapaya taasaꞌ epuꞌtîkonpa? Aweꞌmenukasaꞌ see warantî: “Tamîꞌnawîron koneka tîuya yai, pemonkon konekaꞌpî Paapaya warayoꞌ pe moropai wîriꞌ pe.” Moropai Paapaya taꞌpî:

“Mîrîrî yeꞌnen tîînoꞌpîta yai, warayoꞌya tîsan moropai tîyun rumaka, inîꞌrî toꞌ pia aakoꞌmamî pepîn. Tîîse tînoꞌpî yarakkîrî neken aakoꞌmamî. Inkamoro enasaꞌ mîrîrî, tiwinan pemonkon warantî”,
taꞌpîiya."

⁵ (-)"

⁶ Mîrîrî yeꞌnen asakîꞌnankon warantî pra tîîse, tiwinan warantî toꞌ wanî. Mîrîrî warantî toꞌ kuꞌsaꞌ Paapaya yeꞌnen, anîꞌya toꞌ pantaka eꞌpai pra man. Tînoꞌpî rumakaiya eserîke pra man.

"

⁷ Mîrîrî taa Jesusya yeꞌnen, fariseuyamîꞌya Jesus ekaranmapoꞌpî: —Tîîse îꞌ ton pe Moisésya kaareta menuka meꞌpoꞌpî warayoꞌya tînoꞌpî pia tîîtoꞌpe? “ ‘Tarîpai inîꞌrî unoꞌpî pepîn amîrî’ taiya ya, tînoꞌpî pîꞌ irumakaiya moropai attî”, taꞌpî Moisés nurîꞌtîya —taꞌpî toꞌya Jesus pîꞌ.

"

⁸ Jesusya toꞌ maimu yuukuꞌpî: —Mîrîrî warantî ankupîkon ton menukaꞌpîiya, maasa pra saꞌme puꞌkuru ayewankon wanî eraꞌma tîuya yeꞌnen. Morî kupîyaꞌnîkon eserîke pra awanîkon yeꞌnen. Tîîse pena Paapaya pata koneka yai, mîrîrî warantî ituꞌse pra Paapa wanîꞌpî."

⁹ Mîrîrî yeꞌnen tauya sîrîrî apîꞌnîkon. Warayoꞌya tînoꞌpî rumaka ya tiaron warayoꞌ yarakkîrî aweꞌsaꞌ pra tîîse, moropai tiaron wîriꞌ yarakkîrî awanî ya, imakuiꞌpî kupî mîîkîrîya, mîrîrî Paapa winîkîi —taꞌpîiya.

"

¹⁰ Moropai Jesus nenupaꞌsanya taꞌpî Jesus pîꞌ: —Moriya tînoꞌpî rumaka warayoꞌya namai, moropai wîriꞌya tînyo rumaka namai, warayoꞌ noꞌpîta eꞌpai pra awanî mîrîrî. Moropai wîriꞌ etinyoma eꞌpai pra awanî nîrî —taꞌpî toꞌya.

"

¹¹ Tîîse Jesusya yuukuꞌpî. Taꞌpîiya: —Moriya kanoꞌpîtatî taayaꞌnîkon eserîke pra awanîkon tamîꞌnawîronkon pîꞌ. Tîîse manniꞌkan warayoꞌkon inoꞌpî pra tîîkoꞌmansenon ton pe neken sîrîrî esenupantoꞌ wanî. Maasa pra Paapaya yapîtanîpî toꞌya meruntîri tîîsaꞌ yeꞌnen."

¹² Maasa pra inkamoro yeꞌkakon warayoꞌkon esenpo mararî, tuꞌke pra yemukasaꞌkon warantî. Mîrîrî yeꞌnen toꞌ noꞌpîta eserîke pra toꞌ wanî, maasa pra mîrîrî warantî teesenposaꞌkon yeꞌnen. Tîîse tiaronkon warayoꞌkon yemuka tiaronkonya, mîrîrî warantî inoꞌpî pra toꞌ eꞌtoꞌpe. Moropai tiaronkon noꞌpîta pepîn maasa pra tesaꞌkon pe Paapa wanî yeꞌnen, toꞌ eturumaka eesenyakaꞌmatoꞌ kupîkonpa. Anîꞌ wanî ya, sîrîrî esenupantoꞌ yawîrî ikoꞌmanpai, yapîtanîpî tîuya eserîke awanî ya, ikuꞌkî —taꞌpî Jesusya.

"

¹³ Moropai tiaronkonya moreyamîꞌ yarîꞌpî Jesus pia tenya tîîtoꞌpeiya toꞌ pona moropai toꞌ pîrematoꞌpeiya. Tîîse inenupaꞌsanya taꞌpî pemonkonyamîꞌ pîꞌ: —Insanan moreyamîꞌ moꞌkatî Jesus piapai —taꞌpî toꞌya."

¹⁴ Tîîse Jesusya taꞌpî toꞌ pîꞌ: —Tîwî moreyamîꞌ iiꞌtoꞌpe uupia, toꞌ tîmanenpai pra eꞌtî —taꞌpîiya tînenupaꞌsan pîꞌ. —Maasa pra insamoro moreyamîꞌ warantî Paapa pemonkonoyamîꞌ wanî. Imîrî pe toꞌ wanî —taꞌpî Jesusya.

"

¹⁵ Inkamoro pona tenya tîtîse Jesus epîremaꞌpî. Mîrîrî tîpo attîꞌpî toꞌ piapai.

"

¹⁶ Moropai maasaron warayoꞌ ipîkku pe tîweꞌsen erepamîꞌpî tiwin wei Jesus pia. Moropai Jesus ekaranmapoꞌpîiya: —Uyenupanen, morî puꞌkuru amîrî —taꞌpîiya. —Îꞌ morî kupîuya eꞌpainon ipatîkarî uukoꞌmantoꞌ ton epotoꞌpeuya Paapa pia? —taꞌpîiya.

"

¹⁷ Jesusya taꞌpî ipîꞌ: —Îꞌ waniꞌ awanî yeꞌnen morî amîrî taaya mîrîrî upîꞌ? Tiwinan morî moro man, Paapa neken mîîkîrî, tiaron ton pra man —taꞌpîiya. —Mîîkîrî pia puꞌkuru aakoꞌmantoꞌ ton yuꞌse awanî ya, îꞌ taasaꞌ Paapa maimuya unkupîkon ton, manniꞌ yawîrî ikonekakî —taꞌpî Jesusya warayoꞌ pîꞌ.

"

¹⁸ —Îꞌ yeꞌka see Paapa maimu yawîrî ikuꞌtoꞌpeuya? —kaiꞌma Jesus maimu yuukuꞌpîiya. Jesusya yuukuꞌpî: —Pemonkon kîꞌwîi moropai seꞌ tapairî wîriꞌsanyamîꞌ yarakkîrî tîweꞌse pra eꞌkî. Moropai tiaron kîsamaꞌrunpai, moropai seruꞌyeꞌ pe teeseurîmai pra eꞌkî."

¹⁹ Moropai ayun asan namakî. Moropai ayonpa saꞌnamakî kureꞌne aawarîrî amîrî eꞌsaꞌnama manniꞌ warantî —taꞌpîiya.

"

²⁰ Warayoꞌya yuukuꞌpî: —Pena more pe wanîꞌpî patapai sîrîrî tîpose, mîrîrîkon kuꞌnen uurî tamîꞌnawîrî —taꞌpîiya. —Tîîse îꞌ tiaron kupîuya eꞌpainon? —taꞌpîiya.

"

²¹ Jesusya yuukuꞌpî: —Inna, tamîꞌnawîrî eꞌtoꞌ yawîrî ankuꞌpai awanî ya, tiwinanoꞌpî ankupî ton moro man. Tamîꞌnawîrî ayemanne ke eꞌrepata, moropai mîrîrî yepeꞌpî mîrataikkai manniꞌkan saꞌne îꞌ ton pra tîweꞌtarumaꞌtîsanon pia. Mîrîrî warantî ikupîya ya, inîꞌ panpîꞌ ayemanne ton eporîya kaꞌ po. Moropai maaipîi uwenairî —taꞌpî Jesusya.

"

²² Mîrîrî warantî taa Jesusya eta tîuya yeꞌnen, mîîkîrî maasaron warayoꞌ ipîkku esewankonoꞌmaꞌpî mararî pra. Maasa pra mîrîrî ankuꞌpai pra tîwanî yeꞌnen ipîkku pe tîweꞌtoꞌ pînînmaꞌpîiya. Mîrîrî yeꞌnen attîꞌpî."

²³ Mîîkîrî esewankonoꞌmasaꞌ eraꞌma tîuya pe, Jesusya taꞌpî tînenupaꞌsan pîꞌ: —Aꞌkî, yairî tauya sîrîrî apîꞌnîkon. Saꞌme puꞌkuru awanî ipîkku pe tîweꞌsen eturumakatoꞌpe Paapa yenyaꞌ tesaꞌ pe aweꞌtoꞌpe."

²⁴ Moropai inîꞌrî tauya sîrîrî saꞌme puꞌkuru see awanî ipîkku ewontoꞌpe Paapa pia, itesaꞌ pe Paapa eꞌtoꞌpe. Mararî kameru ewomî pepîn akkusa yeutta yai, kureꞌne tîwanî yeꞌnen. Mîrîrî warantî ipîkku pe tîweꞌsen ewomî pepîn Paapa pataꞌseꞌ yaꞌ. ˻Maasa pra kureꞌne tewan yapiꞌsaiꞌya yeꞌnen temanne pîꞌ˼ —taꞌpî Jesusya.

"

²⁵ Mîrîrî taa Jesusya eta tîuyaꞌnîkon pe, inenupaꞌsan wanîꞌpî teesewankonoꞌmai mararî pra. Mîrîrî yeꞌnen ekaranmapoꞌpî toꞌya Jesus pîꞌ: —Moriya anîꞌkan eꞌpîikaꞌtî eꞌpainon?

"

²⁶ Inkamoro eraꞌmaꞌpî Jesusya moropai toꞌ maimu yuukuꞌpîiya: —Anîꞌ eꞌpîikaꞌtî wanî saꞌme puꞌkuru, pemonkon pia ikupîiya eserîkan pepîn. Tîîse mîrîrîkon wanî saꞌme pra mîîkîrî Paapa pia. Mîrîrî yeꞌnen ikupîiya —taꞌpî Jesusya.

"

²⁷ Moropai Pedroya taꞌpî Jesus pîꞌ: —Tamîꞌnawîrî anna koꞌmantoꞌ, anna yewîꞌkon nîmîꞌsaꞌ annaya sîrîrî awenairî anna wîtîtoꞌpe kaiꞌma. Îꞌ kin yapisî annaya eꞌpainon? —taꞌpîiya.

"

²⁸ Jesusya yuukuꞌpî: —Yairî tauya sîrîrî apîꞌnîkon. Uurî kaꞌ poi iipîꞌpî wanî kupî sîrîrî meruntî ke tiwin wei. Moropai Paapaya tamîꞌnawîron koneka amenan pe. Mîrîrî yai tamîꞌnawîronkon esaꞌ pe ereuta kupî sîrîrî uyaponseꞌ pona ipîkku pataꞌseꞌ yaꞌ. Mîrîrî yai amîrîꞌnîkon, uwenaironkon nîrî ereuta pe naatîi, asakîꞌne puꞌ pona tîîmoꞌtaiꞌnon aponoꞌkon pona, tamîꞌnawîronkon ayonpakon esaꞌ pe awanîkonpa. Mîrîrî warantî inkamoro Israel ponkon yepuru pe eenakon kupî sîrîrî —taꞌpî Jesusya toꞌ pîꞌ."

²⁹ Jesusya taꞌpî: —Manniꞌ tewîꞌ moropai tînoꞌpî, moropai takon tonpayamîꞌ nîmîꞌnen wanî ya uwenai, moropai tînmukuyamîꞌ moropai tîyun, tîsan, moropai tîpata nîmîꞌnen uwenai, Paapaya tannosaꞌ yai, mararî pra mîîkîrîya yapisî kupî sîrîrî inîꞌ panpîꞌ îꞌ nîmîꞌpî tîuya manniꞌ yentai. Moropai tîîkoꞌmantoꞌ ton ipatîkaron eporîiya tiwinanoꞌpî wei yai."

³⁰ Tarî sîrîrî non po tiaronkon pemonkonyamîꞌ wanî ipîkku pe. Tîîse Paapa pia teerepansaꞌkon yai, toꞌ wanî pepîn ipîkku pe. Tiaronkon wanî pepîn ipîkku pe sîrîrî pata po, tîîse Paapa pia teerepansaꞌkon yai, ipîkku pe toꞌ ena kupî sîrîrî —taꞌpî Jesusya.

"

20

¹ Jesusya sîrîrî panton ekaremekîꞌpî îꞌ kaiꞌma pemonkonyamîꞌ esaꞌ pe Paapa iipî ekaremekîpa kaiꞌma. —Tamîꞌnawîronkon esaꞌ pe Paapa iipî yai, awanî pe nai see warantî: Warayoꞌ wanîꞌpî tekkari yeꞌ ton uva yeꞌka pîmîtîpon pe. Mîîkîrî wîtîꞌpî penane puꞌkuru, maasa wei epaꞌka pra tîîse, tîîpia eesenyakaꞌmakon ton yuwai, tînmîri eraꞌmakon ton."

² Moropai toꞌ eseposaꞌ tîuya pe, toꞌ yarakkîrî eeseurîmaꞌpî. Taꞌpîiya toꞌ pîꞌ: “Uupia eesenyakaꞌmakon eꞌpainon? Ayeꞌmauyaꞌnîkon. Tiwin wei tîîse tiwin pîꞌ akaisarîꞌnîkon prata enaꞌpî ke ayeꞌmauyaꞌnîkon”. Moropai inkamoro yaipontîꞌpîiya toꞌ wîtîtoꞌpe esenyakaꞌmai tînmîri yaꞌ."

³ Moropai 9 horas yairî tîîse attîꞌpî tiaron pata sararu ke toꞌ eꞌrepatoꞌ pataꞌseꞌ yaꞌ. Moropai miarî tiaronkon warayoꞌkon eraꞌmaꞌpî mîîkîrîya, îꞌ pîꞌ pra tîweꞌsanon eraꞌmaꞌpîiya."

⁴ Inkamoro pîꞌ taꞌpî warayoꞌya: “Amîrîꞌnîkon nîrî unmîri yaꞌ esenyakaꞌmatantî. Uyekkari yeꞌka, uva yeꞌkanaꞌ eesenyakaꞌmaꞌpîkon yeꞌmauya morî pe”, taꞌpî umî esaꞌya toꞌ pîꞌ.

"

⁵ Moropai toꞌ wîtîꞌpî inmîri yaꞌ esenyakaꞌmai. Inekaꞌta pairî wei tîîse mîrîrî warantî tiaronkon teesenyakaꞌmasanon eporîꞌpîiya, moropai wei eraꞌtîsaꞌ tanne, 3 horas tîîse koꞌmamîiya mîrîrî warantî tiaronkon teesenyakaꞌmasanon yarakkîrî ikupîꞌpîiya."

⁶ Moropai tiaronkon teesenyakaꞌmasanon ton eporîꞌpîiya koꞌmamîiya 5 horas yairî tîîse tîwennaꞌpoi praꞌca pona. Inkamoro ekaranmapoꞌpîiya. “Îꞌ pîꞌ tarî aakoꞌmamîkon sîrîrî wei tamîꞌnawîrî îꞌ tîkonekapîꞌse pra?” taꞌpîiya."

⁷ Inkamoroya yuukuꞌpî: “Anna koꞌmamî sîrîrî maasa pra anîꞌ eseurîmasaꞌ pra man anna yarakkîrî”, taꞌpî toꞌya. Mîrîrî yeꞌnen mîîkîrî warayoꞌya taꞌpî toꞌ pîꞌ: “Moriya unmîri yaꞌ esenyakaꞌmatantî uva yeꞌkanaꞌ”, taꞌpîiya.

"

⁸ Moropai toꞌ esenyakaꞌmatoꞌ weiyu ataretîꞌkasaꞌ yai, toꞌ karaiwarîya teesenyakaꞌmasanon esanon pe tîweꞌsen pîꞌ taꞌpî toꞌ yannotoꞌpeiya. Taꞌpî umî esaꞌya: “Toꞌ yannokî moropai toꞌ yeꞌmakî ikînîꞌpî esenyakaꞌma piaꞌtîꞌpî patapai. Eꞌmaiꞌ pe esenyakaꞌmaꞌsan pîkîrî toꞌ yeꞌmakî”, taꞌpî umî esaꞌya.

"

⁹ Mîrîrî yeꞌnen inkamoro 5 horas tîîse koꞌmamîiya esenyakaꞌmaꞌsanya tiwin pîꞌ prata enaꞌpî yapisîꞌpî tîkaisarîꞌnîkon."

¹⁰ Tîîse tiaronkon eꞌmaiꞌ pe esenyakaꞌmaꞌsan esenumenkasaꞌ wanîꞌpî, inkamoro yentai tepeꞌpîkon yapisî tîuyaꞌnîkon kaiꞌma. Tîîse inkamoroya yapisîꞌpî kaisarî tiwin pîꞌ prata enaꞌpî yapisîꞌpî toꞌya tîkaisarîꞌnîkon."

¹¹ Inkamoroya tîtînirurîkon yapisîꞌpî moropai inkamoro woꞌmaꞌta piaꞌtîꞌpî tîkaraiwarîkon pîꞌ. Tîkaisarîꞌnîkon tiaronkon yeꞌmasaiꞌya yeꞌnen."

¹² Taꞌpî toꞌya tîîwarîrîꞌnîkon: “Insamoro warayoꞌkon esenyakaꞌmaꞌpî mararî, tiwin hora kaisarî neken. Uyeꞌmaꞌpîkon pîꞌ toꞌ erepamîꞌpî teuren. Tîîse uurîꞌnîkon pena patapai wei kaisarî aꞌneꞌ pe wei moronkaꞌpî. Tîîse inkamoroya yapisî kaisarî yapisî uurîꞌnîkonya”, taꞌpî toꞌya.

"

¹³ Tîîse yuukuꞌpî mîîkîrî umî esaꞌya tiwinan teesenyakaꞌmasen pîꞌ. “Uyonpa, maasa etakî, imakuiꞌpî kuꞌsauꞌya pra wai awinîkîi. Maasa pra tiwin prata enaꞌpî ke ayeꞌmauya tauya yai, inna, morî pe man taꞌpîya. Innape nai?"

¹⁴ Mîrîrî yeꞌnen sîrîrî ayepeꞌpî atînirurî yapiꞌkî moropai atîkî ayewîꞌ ta. Mîserî warayoꞌ, ikînîꞌpî unetaꞌpî yeꞌmapai wai ayeꞌma pîꞌ wai warantî, seꞌ kaisarî."

¹⁵ Îꞌ ankuꞌpai eꞌtoꞌ kupîuya uyemannekon ke. Moropai utînirurîkon ke ikupîuya. Tîîse mîrîrî wanî pepîn imakuiꞌpî pe. Tîîse uyemannekon ke morî kuꞌsauꞌya wenai akinmu mîrîrî”, taꞌpî warayoꞌya ipîꞌ.

"

¹⁶ Moropai Jesusya teeseurîmatoꞌ yaretîꞌkaꞌpî. Taꞌpîiya: —Mîrîrî warantî tîpemonkonoyamîꞌ kupî Paapaya. Eꞌmaiꞌ pe eꞌkupîꞌsan wanî kupî sîrîrî ikînîꞌpî. Moropai ikînîꞌpî esiꞌsan wanî kupî sîrîrî eꞌmaiꞌ pe, ituꞌse Paapa eꞌtoꞌ yawîrî —taꞌpî Jesusya.

"

¹⁷ Jerusalém pona tuutîkon pe, Jesusya tînenupaꞌsan yarîꞌpî tiaron winîkîi. Inkamoro pîꞌ eeseurîmaꞌpî, iponarî toꞌ taase tuutîkon yeꞌka pe eꞌma taawîrî."

¹⁸ Taꞌpîiya: —Wîtîꞌnîkon sîrîrî Jerusalém pona. Miarî uurî kaꞌ poi iipîꞌpî rumaka toꞌya kupî sîrîrî teepîremasanon esanonkon pia. Moropai Moisés nurîꞌtîya yenupantoꞌ pîꞌ yenupatonkon pia. Inkamoroya uwî meꞌpo kupî sîrîrî."

¹⁹ Moropai inkamoroya utîrî kupî sîrîrî Judeuyamîꞌ pepîn pia. Inkamoro woꞌmaꞌta kupî sîrîrî upîꞌ. Uꞌpoꞌpîtî toꞌya. Moropai upokapîtî toꞌya pakîꞌnan pona. Tîîse uusaꞌmanta tîpo, iteseurîno weiyu yai, eꞌmîꞌsaꞌka kupî sîrîrî —taꞌpî Jesusya.

"

²⁰ Mîrîrî yai Zebedeu noꞌpî erepamîꞌpî tînmukuyamîꞌ pokonpe Jesus pia. Moropai irawîrî siꞌma tîpuꞌpai enuꞌtîꞌpîiya non yekaya. Moropai Jesus pîꞌ esatîꞌpîiya ituꞌse tîweꞌtoꞌ kuꞌtoꞌpeiya kaiꞌma."

²¹ Mîîkîrî ekaranmapoꞌpî Jesusya: —Îꞌ yuꞌse kin awanî mîrîrî? —taꞌpîiya ipîꞌ. Mîîkîrîya yuukuꞌpî: —Tamîꞌnawîronkon esaꞌ pe eena yai, insanan unmukuyamîꞌ asakîꞌnankon ereutatoꞌpe kaꞌkî, tiwin ameruntîri winî, moropai tiaron kamaiꞌ winî. Tamîꞌnawîronkon esaꞌ pe toꞌ eꞌtoꞌpe awarantî —taꞌpîiya Jesus pîꞌ.

"

²² Jesusya taꞌpî inkamoro inmukuyamîꞌ pîꞌ: —Anesatîkon kupîuya pepîn eꞌpainon. Anesatîkon epuꞌtîyaꞌnîkon pra naatîi. Tiaronkonya utarumaꞌtî kupî sîrîrî, mîrîrî yapîtanîpîuya kupî sîrîrî. Amîrîꞌnîkon kanan? Uyeseꞌ pîꞌ awanîkon wenai tiaronkonya atarumatîkon ya, yapîtanîpîyaꞌnîkon pe naatî? —taꞌpîiya. —Inna —taꞌpî toꞌya Jesus pîꞌ.

"

²³ Mîrîrî pîꞌ taꞌpî Jesusya: —Inna seruꞌ pepîn. Innape uurî eꞌtarumaꞌtî warantî aweꞌtarumaꞌtîkon nîrî —taꞌpî Jesusya. —Tîîse tauya pepîn apîꞌnîkon umeruntîri winî ereutakî, moropai kamaiꞌ winî ereutakî tauya pepîn apîꞌnîkon. Maasa pra uyunya taa kupî sîrîrî manniꞌkan uupia ereutatonkon tîmenkaꞌsan pîꞌ toꞌ ereutatoꞌpe.

"

²⁴ Mîrîrî kaiꞌma Jesusya toꞌ yeurîma etaꞌpî inenupaꞌsan miaꞌ tamîꞌnawîronkonya. Mîrîrî pîꞌ toꞌ ekoreꞌmaꞌpî inkamoro asakîꞌnankon winîkîi."

²⁵ Inkamoro yannoꞌpî Jesusya tamîꞌnawîrî tîîpia. Moropai taꞌpîiya toꞌ pîꞌ: —Sîrîrî non po pata esanonya tîpemonkonoyamîꞌ yaipontî, epuꞌnenan amîrîꞌnîkon. Maasa pra toꞌ esaꞌ tîwanîkon yeꞌnen."

²⁶ Tîîse amîrîꞌnîkon mîrîrî warantî pra eꞌtî. Tonpakon yentai eꞌpai anîꞌ wanî ya, toꞌ maꞌre eꞌpai awanî."

²⁷ Moropai anîꞌ esenumenka ya tonpayamîꞌ esaꞌ pe eꞌpai mîîkîrî wanî eꞌpai wanî toꞌ poitîrî pe. Mîrîrî warantî neken toꞌ yeꞌmaiꞌnorî pe awanî."

²⁸ Mîrîrî warantî uurî, kaꞌ poi iipîꞌpî yeseru wanî. Tîpoitîrî ke eꞌtoꞌpe kaiꞌma uuiꞌsaꞌ pra wai. Tîîse toꞌ poitîrî pe eꞌtoꞌpe moropai tuꞌkankon pîikaꞌtîtoꞌpeuya kaiꞌma uuipîꞌpî. Arinîkon nîkupîꞌpî imakuiꞌpî yepeꞌ pe uusaꞌmantatoꞌpe kaiꞌma uuipîꞌpî —taꞌpî Jesusya.

"

²⁹ Mîrîrî tîpo Jesus moropai inenupaꞌsan wîtî tanne Jericó pata poi, arinîkon pemonkonyamîꞌ wîtîꞌpî toꞌ wenairî."

³⁰ Miarî mîrîrî eꞌma taawîrî, toꞌ wîtîtoꞌ ena pona asakîꞌnankon enkaruꞌnankon ereutasaꞌ wanîꞌpî. Inkamoroya etaꞌpî mîrîrî eꞌma taawîrî Jesus wîtî yekare. Mîrîrî yeꞌnen toꞌ entaimepîtî piaꞌtîꞌpî: —Uyepotorî, amîrî Davi nurîꞌtî paarîꞌpî, pîikaꞌtîton amîrî, aꞌnokoꞌpî pe saꞌne anna eraꞌmakî —taꞌpî toꞌya.

"

³¹ Mîrîrî pîꞌ arinîkonya taꞌpî moo toꞌ eꞌtoꞌpe. Tîîse yuuku toꞌya pra, inîꞌ panpîꞌ toꞌ entaimepîtîꞌpî. —Anna yepotorî, Davi nurîꞌtî paarîꞌpî, aꞌnokoꞌpî pe saꞌne anna eraꞌmakî —taꞌpî toꞌya.

"

³² Inkamoro maimu eta tîuya pe, Jesus emîꞌpamîꞌpî inkamoro pia. Inkamoro pîꞌ taꞌpîiya: —Îꞌ kupîuya yuꞌse awanîkon mîrîrî? —taꞌpîiya toꞌ pîꞌ.

"

³³ —Anna Yepotorî, anna yenu yenponkaya yuꞌse anna wanî sîrîrî, eraꞌmatoꞌpe annaya —kaiꞌma yuukuꞌpî toꞌya.

"

³⁴ Jesusya tîꞌnokoꞌpî pe saꞌne toꞌ eraꞌmaꞌpî. Mîrîrî yeꞌnen toꞌ yenukon yenponkaꞌpîiya, inîꞌrî eraꞌmatoꞌpe toꞌya. Kaꞌneꞌ pe toꞌ yenu ekonekaꞌpî. Moropai inkamoro wîtîꞌpî Jesus wenairî.

"

21

¹ Jerusalém pona tuutîkon pe, aminke pra rî tîîse toꞌ erepamîꞌpî pemonkonyamîꞌ koꞌmantoꞌ pata iteseꞌ Betfagé pona, Oliveira kîrî po tîweꞌsen pona. Miarîpai Jesusya asakîꞌne tînenupaꞌsan yaipontîꞌpî eꞌmaiꞌ pe tîrawîrî toꞌ wîtîtoꞌpe."

² Taꞌpîiya toꞌ pîꞌ: —Atîtî mîrîrî pata pona eꞌmaiꞌ pe. Moropai miarî eerepansaꞌkon pe jumenta eporîyaꞌnîkon mîîtî ewaꞌtîsaꞌ pe tînre kenan. Mîîkîrî meukatîi, moropai toꞌ meneꞌtîi saꞌnîrî —taꞌpîiya."

³ —Anîꞌya taa ya: “Îꞌ tonpe mîîkîrî yarîyaꞌnîkon mîrîrî”, taa toꞌya ya, “Uyepotorîkon man ituꞌse”, makatîi ipîꞌ. Mîrîrî warantî taayaꞌnîkon ya, irumakaiya toꞌ enepîkonpa —taꞌpîiya.

"

⁴ Mîrîrî warantî aweꞌkupîꞌpî maasa pra penaroꞌ Paapa maimu ekaremeꞌnen profeta nurîꞌtîya imenukaꞌpî yawîrî aweꞌtoꞌpe."

⁵ Taꞌpîiya see warantî:

Makatîi Jerusalém ponkon pîꞌ Paapa pemonkonoyamîꞌ pîꞌ:
“Aꞌkî ayesaꞌkon iipî pe man
jumenta more pona teenuꞌse.
Eranmîra eerepamî pe man” makatîi toꞌ pîꞌ.
Mîrîrî warantî penaroꞌ Paapa maimu ekaremeꞌnenya imenukaꞌpî.

"

⁶ Moropai Jesus nenupaꞌsan wîtîꞌpî eꞌmaiꞌ pe. Moropai inkamoroya îꞌ kaiꞌma taꞌpî Jesusya yawîrî ikupîꞌpî toꞌya."

⁷ Inkamoroya jumenta enepîꞌpî inre yarakkîrî. Inkamoroya taꞌsankon tîrîꞌpî ipona. Moropai Jesus enukuꞌpî ipona."

⁸ Mîîkîrî iipî eraꞌma tîuyaꞌnîkon yeꞌnen, arinîkon pemonkonyamîꞌya taꞌsankon yarenkaꞌpî non pona, iporo Jesus wîtîtoꞌpe kaiꞌma. Moropai tiaronkonya yuꞌ yare sorokaꞌpî eꞌma ta, irawîrî."

⁹ Yarakkîrî tuutîsanon entaimepîtîꞌpî irawîrî siꞌma, moropai iteꞌmaꞌpî pîꞌ siꞌma mararî pra:

—Yapurîpaiꞌnîkon man Davi parîꞌpî pe tîweꞌsen.
Morî pe puꞌkuru man, aaipîꞌpî manniꞌ Uyepotorîkon maimu pe —taꞌpî toꞌya tîwentaimepîꞌse.
—Paapa kaꞌ pon manniꞌ yapurîpaiꞌnîkon man —taa pîꞌ toꞌ koꞌmamîꞌpî.

"

¹⁰ Jesus ewonsaꞌ pe cidade pona, tamîꞌnawîronkon pemonkonyamîꞌ wanîꞌpî tataimurunpai mararî pra. Moropai ekaranmapoꞌpî toꞌya: —Anîꞌ pe see mîîkîrî wanî mîrîrî? —taꞌpî toꞌya.

"

¹¹ Mîrîrî taa toꞌya yuukuꞌpî arinîkonya: —Manniꞌ Paapa maimu ekaremeꞌnen profeta Jesus, Galiléia pata pon, Nazaré poinon —taꞌpî toꞌya.

"

¹² Miarî Jerusalém po, epîremantoꞌ yewîꞌ ta teewomî pe, Jesusya pemonkonyamîꞌ eporîꞌpî. Carneiroyamîꞌ ke moropai paakayamîꞌ ke, wakuꞌkaimîyamîꞌ ke tîweꞌrepasanon eporîꞌpîiya. Inkamoro yenpaꞌkaꞌpîiya teekoreꞌmai. Tamîꞌnawîrî inkamoro eꞌrepa yaponseꞌkon raꞌtîꞌpîiya. Toꞌ tînirurî yenseꞌ raꞌtîꞌpîiya non pona tîsorokai."

¹³ Moropai taꞌpîiya toꞌ pîꞌ: —Paapa maimu eꞌmenukasaꞌya taasaꞌ man see warantî. Paapaya taꞌpî:

“Uyewîꞌ wanî pe man epîremantoꞌ yewîꞌ pe. Tîîse amîrîꞌnîkonya uyewîꞌ kuꞌsaꞌ amaꞌyeꞌkon yewîꞌ pe”,
taꞌpî Paapaya —taꞌpî Jesusya.

"

¹⁴ Mîrîrî yai enkaruꞌnankon moropai maꞌtîkîꞌpankon yarîꞌpî toꞌya iipia, epîremantoꞌ yewîꞌ ta toꞌ esepiꞌtîtoꞌpe. Inkamoro yepiꞌtîꞌpîiya."

¹⁵ Tîîse mîrîrî ikupî eserîkan pepîn kupî Jesusya eraꞌma tîuyaꞌnîkon pîꞌ teepîremasanon esanon moropai Moisés nurîꞌtîya yenupantoꞌ pîꞌ yenupatonkon ekoreꞌmaꞌpî. Moropai epîremantoꞌ yewîꞌ ta moreyamîꞌya Paapa yapurîꞌpî tîwentaimepîꞌse. —Morî puꞌkuru Paapa nîmenkaꞌpî, Davi nurîꞌtî paarîꞌpî man yapurîtoꞌpe —taꞌpî toꞌya Jesus pîꞌ. Mîrîrî pîꞌ toꞌ ekoreꞌmaꞌpî mararî pra.

"

¹⁶ Moropai Jesus pîꞌ taꞌpî toꞌya: —Îꞌ taa toꞌya eta pîꞌ nan? —taꞌpî toꞌya. Yuukuꞌpî Jesusya: —Innape awanî —taꞌpîiya. —Îꞌ taasaꞌ Paapa maimuya epuꞌtîyaꞌnîkon pra kin naatî? Taꞌpî Paapa maimu ekaremeꞌnenya:

Insanan moreyamîꞌ yenupaꞌpî Paapaya
tapurîtoꞌpe toꞌya morî pe puꞌkuru eꞌtoꞌ yawîrî
taasaiꞌya man —taꞌpî Jesusya.

"

¹⁷ Taa tîpo Jesusya toꞌ nîmîꞌpî. Eepaꞌkaꞌpî toꞌ pata cidade poi. Moropai attîꞌpî pemonkonyamîꞌ koꞌmantoꞌ Betânia pona attîꞌpî. Moropai miarî eewaronpamîꞌpî moropai eerenmapîꞌpî.

"

¹⁸ Tiaron wei yai, penane puꞌkuru cidade Jerusalém pona tîwennaꞌpo pe, Jesus wanîꞌpî emiꞌne."

¹⁹ Mîîkîrîya yei, figo yeꞌ eraꞌmaꞌpî eꞌma ena po. Moropai mîîkîrî wîtîꞌpî itekare pîꞌ iteperu moro wanî kaiꞌma. Tîîse iteperu eporîiya pra Jesus wanîꞌpî tîîse yare pe neken awanîꞌpî. Mîrîrî yeꞌnen Jesusya taꞌpî figo yeꞌ pîꞌ: —Ipatîkarî teepetai pra aakoꞌmamî tarîpai —taꞌpîiya. Moropai tiwinarî aawaꞌpiꞌtaꞌpî.

"

²⁰ Mîrîrî eraꞌmaꞌpî inenupaꞌsanya. Mîrîrî kureꞌne teesenumenkai toꞌ wanîꞌpî, mîrîrî taasaꞌ Jesusya pîꞌ. Moropai inkamoroya taꞌpî: —Îꞌ kaiꞌma see aawaꞌpiꞌta mîrîrî kaꞌneꞌ pe? —taꞌpî toꞌya.

"

²¹ Mîrîrî taa toꞌya yeꞌnen, Jesusya taꞌpî: —Ayenkuꞌtîuyaꞌnîkon pepîn. Yairî tauya sîrîrî. Innape puꞌkuru Paapa kuꞌtoꞌyaꞌnîkon wanî ya yairî, mîîkîrî tîmuꞌtunpai pra, mîrîrî yei figo yeꞌ pîꞌ ikuꞌsauꞌya manniꞌ warantî nîrî ikupîyaꞌnîkon eꞌpainon, innape ikuꞌtoꞌyaꞌnîkon wenai. Mîrîrî neken figo yeꞌ pîꞌ ikupîyaꞌnîkon pepîn, tîîse seeniꞌ wîꞌ pîꞌ taayaꞌnîkon ya: “Seeniꞌ apataꞌseꞌ yapai amoꞌtakî, atîkî tuna ka”, taayaꞌnîkon ya, moropai “Esenunkî”, taayaꞌnîkon ya, innape ikuꞌtoꞌyaꞌnîkon wenai, mîrîrî eꞌkupî eꞌpainon —taꞌpî Jesusya."

²² —Innape puꞌkuru Paapa kupîiꞌma esatîyaꞌnîkon ya, eepîremakon pe anesatîkon yapisîyaꞌnîkon —taꞌpî Jesusya.

"

²³ Mîrîrî tîpo Jesus ennaꞌpoꞌpî Jerusalém pona. Miarî epîremantoꞌ yewîꞌ ta siꞌma, pemonkonyamîꞌ yenupaiya tanne, teepîremasanon esanon, moropai Judeuyamîꞌ esanon erepamîꞌpî iipia. Moropai inkamoroya ekaranmapoꞌpî: —Anîꞌ maimu pe see koꞌmanpara manniꞌkan yenpaꞌkaꞌpîya mîrîrî? Anîꞌya ikupîpa taasaꞌ mîrîrî apîꞌ? —taꞌpî toꞌya.

"

²⁴ Inkamoro maimu yuukuꞌpî Jesusya: —Uurî nîrî amîrîꞌnîkon ekaranmapouya sîrîrî. Yairî ayekaranmapotoꞌkonuya yuukuyaꞌnîkon ya, uurî nîrî anîꞌ maimu pe sîrîrî yeꞌka unkupî ekaremekîuya apîꞌnîkon —taꞌpîiya."

²⁵ —Tarîpai yuꞌtî. Anîꞌ maimu pe kin Joãoya tamîꞌnawîronkon yenpatakonaꞌpî? Paapa maimu pe kaꞌrî, pemonkonyamîꞌ maimu pe kaꞌrî? Oꞌnon yeꞌka pe epuꞌtî pîꞌ naatî?

Mîrîrî taiya yeꞌnen toꞌ eseurîmaꞌpî tîîwarîrîꞌnîkon. —Inna Paapa maimu pe taasaꞌ ya, uurîꞌnîkon ekaranmapoiya eserîke awanî. “Tîîse îꞌ tonpe innape João Batista nurîꞌtî kupîyaꞌnîkon pra awanîkon?” taiya eserîke awanî —taꞌpî toꞌya."

²⁶ —Moropai pemonkon maimu pe taasaꞌ ya, arinîkon pemonkonyamîꞌya uurîꞌnîkon tarumaꞌtî eserîke awanî. Maasa pra inkamoroya João Batista nurîꞌtî epuꞌtîꞌpî, Paapa maimu ekaremeꞌnen pe awanî epuꞌtîꞌpî mîîtoꞌpe."

²⁷ Mîrîrî yeꞌnen inkamoroya Jesus maimu yuukuꞌpî: —Epuꞌtî annaya pra man —taꞌpî toꞌya. —Uurî nîrî anîꞌ maimu pe seeniꞌ yeꞌka kupîuya ekaremekîuya pepîn —taꞌpî Jesusya.

"

²⁸ Jesusya tiaron panton ekaremekîꞌpî. Taꞌpîiya: —Îꞌ yeꞌka pe sîrîrî pîꞌ eesenumenkakon eserîke awanî? Warayoꞌ wanîꞌpî asakîꞌnankon inmukuyamîꞌ. Mîîkîrîya taꞌpî tînmu irui pîꞌ: “Unmu, sîrîrîpe umî yaꞌ uva yeꞌkanaꞌ esenyakaꞌmai attî yuꞌse wanî sîrîrî”, taꞌpîiya."

²⁹ Tîîse mîîkîrîya tîyun maimu yuukuꞌpî. “Itîîpai pra wai”, taꞌpîiya. Tîîse mîrîrî tîpo awenpenataꞌpî moropai attîꞌpî."

³⁰ Moropai itakon pîꞌ taꞌpî itunya irui pîꞌ taꞌpî tîuya warantî: “Inna, paapa, uutî”, taꞌpîiya tîyun pîꞌ. Tîîse attî pra awanîꞌpî.

"

³¹ Oꞌnon yeꞌka inmuya ituꞌse tîyun eꞌtoꞌ yawîrî ikupîꞌpî? —taꞌpî Jesusya. Moropai inkamoroya imaimu yuukuꞌpî: —Manniꞌ iruiya ikupîꞌpî —taꞌpî toꞌya.

Mîrîrî pîꞌ taꞌpî Jesusya: —Ayenkuꞌtîuyaꞌnîkon pepîn. Manniꞌkan tesanonkon pia toꞌ nîtîrî tîniru yapisî pîꞌ teesenyakaꞌmasanon, moropai manniꞌkan wîriꞌsanyamîꞌ tesaꞌkon ke tîweꞌrepasanon seꞌ tapairî. Imakuiꞌsan, inkamoro yeꞌka esaꞌ pe Paapa iipî pe man amîrîꞌnîkon rawîrî innape puꞌkuru ikupî toꞌya yeꞌnen."

³² Mîrîrî warantî João Batista nurîꞌtî iipîꞌpî pena yairon puꞌkuru eꞌma ekaremeꞌse. Tîîse innape mîîkîrî nekaremekîꞌpî kuꞌsaꞌyaꞌnîkon pra awanîkon. Tîîse inkamoro tîniru yapiꞌnenanya innape puꞌkuru ikupîꞌpî. Moropai wîriꞌsanyamîꞌ seꞌ tapaironkon, itesaꞌ pînonya innape puꞌkuru ikupîꞌpî. Teuren mîrîrî yeꞌka eraꞌma tîpo, amîrîꞌnîkon enpenata pra aakoꞌmamîkon imakuiꞌpî rumaka pîꞌ innape ikupîkonpa —taꞌpî Jesusya.

"

³³ Jesusya taꞌpî inîꞌrî: —Sîrîrî panton ekaremekîuya etatî —taꞌpîiya. —Warayoꞌya tekkari yeꞌ ton uva yeꞌka pîmîꞌpî mararî pra. Moropai mîrîrî iwatîꞌpîiya inonkon tîꞌkon ke. Moropai tîꞌ yai uva yekku asuꞌkatoꞌ ton konekaꞌpîiya. Moropai kawînan konekaꞌpîiya ipo siꞌma tamîꞌnawîron eraꞌmatoꞌpe tîpoitîrîtononya kaiꞌma. Inkamoro tînmîri eraꞌmanenan pîꞌ taꞌpîiya: “Seeniꞌ uyekkari yonpa ke ayeꞌmauyaꞌnîkon” taꞌpîiya. Mîrîrî yeꞌnen toꞌ wîtîꞌpî moropai toꞌ karaiwarî wîtîꞌpî tiaron pata pona."

³⁴ Mîrîrî tîpo itekkari emîrî piaꞌtîꞌpî. Mîrîrî yeꞌnen umî esaꞌya tîpoitîrîtonon yarimaꞌpî umî eraꞌmanenan pia tîmîrî ton tekkari yonpa eraꞌmai.

"

³⁵ Tîîse inkamoro yapisîꞌpî umî eraꞌmanenanya. Moropai inkamoro tarumaꞌtîꞌpî toꞌya. Moropai tiaron poꞌpîtîꞌpî toꞌya. Moropai tiaron ipoitîrî wîꞌpî toꞌya. Moropai tiaron pona tîꞌ yenunpîtîꞌpî toꞌya. Mîrîrî warantî ikupîꞌpî toꞌya ipoitîrîtonon pîꞌ."

³⁶ Mîrîrî tîpo inîꞌrî tiaronkon yarimaꞌpî umî esaꞌya eꞌmaiꞌ pe toꞌ yarimaꞌpî tîuya yentai. Mîrîrî warantî rî ikupîꞌpî toꞌya inkamoro yarakkîrî."

³⁷ Mîrîrî warantî tamîꞌnawîrî ikupî tîpo umî esaꞌya tînmu yarimaꞌpî. Eesenumenkaꞌpî maasa pra “mîserî unmu yarimasauꞌya ya, îꞌ kupî toꞌya pepîn eꞌpainon. Inama toꞌya eserîke awanî”, taꞌpî umî esaꞌya."

³⁸ Tîîse mîîkîrî umî esaꞌ munmu eraꞌma tîuyaꞌnîkon pe, inkamoro umî eraꞌmanenanya taꞌpî: “Aꞌkî, mîserî umî esaꞌ munmu pîꞌ îꞌ kuꞌpai nai yarakkîrî”, taꞌpî toꞌya. “Iwîpaiꞌnîkon uurîꞌnîkon pe sîrîrî umî eturumakatoꞌpe itun saꞌmanta yai, inmu pe awanî namai”, taꞌpî toꞌya."

³⁹ Mîrîrî yeꞌnen mîîkîrî, umî esaꞌ munmu yapisîꞌpî toꞌya yenpaꞌkaꞌpî toꞌya umî yapai poro pona, moropai iwîꞌpî toꞌya —taꞌpîiya.

"

⁴⁰ Mîrîrî pîꞌ toꞌ ekaranmapoꞌpî Jesusya: —Îꞌ pensa mîîkîrî umî esaꞌ ennaꞌpo ya, îꞌ kupîiya eserîke awanî inkamoro umî eraꞌmatîponkon warayoꞌkon yarakkîrî?

"

⁴¹ Inkamoroya yuukuꞌpî: —Inkamoro warayoꞌkon tînmu wîîtîponkon tîꞌkaiya eserîke awanî. Mîrîrî tîpo tiaronkon warayoꞌkon eporîiya tînmîri eraꞌmatonkon. Moropai inkamoroya itekkari yonpa tîrî iipia, emîrî weiyu yai —taꞌpî toꞌya.

"

⁴² Inîꞌrî Jesusya toꞌ ekaranmapoꞌpî. Taꞌpîiya: —Paapa maimu eꞌmenukasaꞌ erenkasaꞌyaꞌnîkon pra kin naatî, îꞌ taasaiꞌya? Sîrîrî warantî aweꞌmenukasaꞌ:

Wîttî konekanenanya tîꞌ yenumîꞌpî, seeniꞌ tîꞌ wanî morî pe pra taa tîuyaꞌnîkon yeꞌnen.
Tîîse mîrîrî toꞌ newanmîrîꞌpî tîꞌ wanîꞌpî morî pe puꞌkuru tiaronkon tîꞌkon toꞌ nîmenkaꞌpî yentai.
Mîrîrî kupîꞌpî Uyepotorîkonya.
Moropai morî pe puꞌkuru awanî anna pia.

"

⁴³ Tarîpai tauya sîrîrî amîrîꞌnîkon Judeuyamîꞌ piapai imoꞌka Paapaya tîpemonkono pe puꞌkuru awanîkon namai. Moropai tiaronkon esaꞌ pe eena. Manniꞌkan seꞌ tapairî innape ikuꞌnenan pepîn pia, Paapa maimu yawîrî tîîkoꞌmansenon pia itîrîiya, toꞌ esaꞌ pe tîweꞌtoꞌpe."

⁴⁴ Anîꞌ atareꞌmo ya manniꞌ tîꞌ pona, mîîkîrî maꞌta mîrîrî. Tîîse manniꞌ tîꞌ ena ya ipona, mîîkîrî yankaiya tamîꞌnawîrî.

"

⁴⁵ Mîrîrî taa Jesusya etaꞌpî teepîremasanon esanonya moropai fariseuyamîꞌya. Mîrîrî epuꞌtîꞌpî toꞌya, tîpîꞌnîkon Jesus eseurîma pe awanî."

⁴⁶ Mîrîrî yeꞌnen Jesus yapisî tîuyaꞌnîkon pîꞌ toꞌ esenumenkaꞌpî. Tîîse arinîkon rawîrî siꞌma ikupî toꞌya pra awanîꞌpî maasa pra eranneꞌ pe toꞌ wanîꞌpî. Maasa pra pemonkonyamîꞌya Jesus epuꞌtîꞌpî, Paapa maimu ekaremeꞌnen pe awanî.

"

22

¹ Jesusya inîꞌrî panton ekaremekîꞌpî pemonkonyamîꞌ nepuꞌtî tonpe. Taꞌpîiya:"

² —Tamîꞌnawîronkon esaꞌ pe Paapa iipî yai awanî pe man sîrîrî panton warantî. Ipîkku pata esaꞌ pe, rei pe tîweꞌsen tînmu eꞌmarimatoꞌ festarî koneka pîꞌ awanîꞌpî."

³ Mîîkîrîya tîpoitîrîtonon yaipontîꞌpî toꞌ wîtîtoꞌpe pemonkonyamîꞌ yannoi toꞌ iiꞌtoꞌpe tînmu festarî pîꞌ. Tîîse inkamoro toꞌ netaꞌsan iipî pra awanîꞌpî. Iiꞌpai pra toꞌ wanîꞌpî."

⁴ Moropai inîꞌrî tiaronkon tîpoitîrîtonon yarimaꞌpîiya tîmaimu yaatoꞌpe toꞌya toꞌ pia: “Makatîi toꞌ pîꞌ”, taꞌpîiya. “ ‘Tamîꞌnawîrî ekonekasaꞌ man festa yainon tonpe, taa pîꞌ man’, makatîi. ‘Paakayamîꞌ kaiwankon tîꞌkasauꞌya wai, taa pîꞌ man’ makatîi. ‘Tamîꞌnawîron konekasaiꞌya man. Mîrîrî yeꞌnen asiꞌtî festa pona’, makatîi” taꞌpîiya.

"

⁵ —Tîîse innape nai, taa toꞌya pra inetaꞌsan wanîꞌpî. Mîrîrî yeꞌnen puwana pîꞌ tîweꞌtoꞌkon pîꞌ toꞌ wîtîꞌpî. Tiaron wîtîꞌpî tekînon pataꞌseꞌ yaꞌ toꞌ eraꞌmapîꞌse. Moropai tiaron wîtîꞌpî temanne yewîꞌ pe tînkonekaꞌpî yaꞌ ekaya pra."

⁶ Moropai tiaronkonya inkamoro ipîkku poitîrîtonon yapisîꞌpî moropai toꞌ poꞌpîtîꞌpî toꞌya. Moropai toꞌ wîꞌpî toꞌya."

⁷ Mîrîrî pîꞌ mîîkîrî ipîkku rei ekoreꞌmaꞌpî mararî pra. Inkamoro tîpoitîrîtonon wîîtîponkon tîꞌka meꞌpoꞌpîiya moropai toꞌ pata cidade poꞌtî meꞌpoꞌpîiya.

"

⁸ Mîrîrî tîpo inîꞌrî tîpoitîrîtonon yannoꞌpîiya moropai taꞌpîiya toꞌ pîꞌ: “Manniꞌkan unetaꞌsan iipî pra man maasa pra îꞌ pe pra rî toꞌ wanî yeꞌnen” taꞌpîiya."

⁹ “Tarîpai atîtî seeniꞌ eꞌmakon taawîrî. Moropai tamîꞌnawîrî pemonkonyamîꞌ eporîyaꞌnîkon pîkîrî toꞌ metatîi” taꞌpîiya tîpoitîrîtonon pîꞌ."

¹⁰ Moropai ipoitîrîtonon wîtîꞌpî eꞌmakon taawîrî. Inkamoroya toꞌ etaꞌpî tamîꞌnawîrî toꞌ eporî tîuyaꞌnîkon kaisarî. Toꞌ muurukuntîꞌpî toꞌya. Morîkon pemonkonyamîꞌ moropai îrirîkon pemonkonyamîꞌ. Inkamoroya mîrîrî toꞌ pataꞌseꞌ pe ikonekasaꞌ yannîpîꞌpî. Intapîkîrî awanîꞌpî."

¹¹ Mîîkîrî ipîkku epaꞌkaꞌpî inkamoro etasaꞌkon erepansaꞌ eraꞌmai. Moropai mîrîrî toꞌ pataꞌseꞌ pe tînkonekaꞌpî yaꞌ eewomîꞌpî. Miarî warayoꞌ eraꞌmaꞌpîiya festa pîꞌ tîwanî pon yaꞌ pra tîweꞌsen maasa pra tiwin toꞌ pon wanîꞌpî mîîtoꞌpe."

¹² Moropai mîîkîrî yekaranmapoꞌpîiya: “Uwanîyakon, oꞌnon yeꞌka pe eewonsaꞌ sîrîrî tarîwaya, festa pîꞌ awanî pon tekaꞌmai pra?” taꞌpîiya. Tîîse imaimu yuukuiya pra awanîꞌpî."

¹³ Mîrîrî yeꞌnen mîîkîrî ipîkku reiya taꞌpî tîpoitîrîtonon pîꞌ: “Mîserî warayoꞌ yewaꞌtîtî iꞌpu pîꞌ moropai itenya pîꞌ. Moropai yenuntî poro pona, ewaron pe tîweꞌsen yaꞌ, oꞌnon pata karawannîtoꞌ pataꞌseꞌ yaꞌ. Mîîkîrî karawatoꞌpe, tee yeꞌkaiya mararî pra neꞌneꞌ pe tîwanî yeꞌnen”, taꞌpî ipîkkuya —taꞌpî Jesusya.

"

¹⁴ Moropai Jesusya teeseurîmatoꞌ yaretîꞌkaꞌpî. Taꞌpîiya: —Tuꞌke etasaꞌkon pemonkonyamîꞌ wanî sîrîrî Paapa pia aakoꞌmamîtonkon. Tîîse tuꞌkankon iipî pepîn Paapa pia yairî inkamoro yapiꞌtoꞌpeiya —taꞌpî Jesusya.

"

¹⁵ Mîrîrî tîpo fariseuyamîꞌ epaꞌkaꞌpî moropai inkamoroya teserukon konekaꞌpî, îꞌ kaiꞌma Jesus anapiꞌpai tîwanîkon pîꞌ, iiwanmîra teeseurîmakonpa kaiꞌma ipîꞌ."

¹⁶ Mîrîrî yeꞌnen tiaronkon warayoꞌkon yarimaꞌpî toꞌya îꞌ kupî Jesusya eraꞌmatonkon. Moropai inkamoro pokonpe pata esaꞌ Herodes pemonkonoyamîꞌ wîtîꞌpî Jesus ekaranmapopîꞌse. Taꞌpî toꞌya:

—Anna yenupanen, yairon pe puꞌkuru amîrî wanî epuꞌtî pîꞌ anna man —taꞌpî toꞌya. —Maasa pra yairon Paapa maimu ke yenupaton pe awanî yeꞌnen. Moropai tiaronkon pemonkonyamîꞌya taa ya apîꞌ: “Mîrîrî warantî kîseurîmai”. Mîrîrî taa toꞌya pîꞌ tîpîinamai tîweꞌsen pepîn amîrî. Maasa pra seꞌ kaisarî pemonkonyamîꞌ pîꞌ tîweꞌsen amîrî —taꞌpî toꞌya."

¹⁷ —Mîrîrî yeꞌnen îꞌ kaiꞌma epuꞌtî pîꞌ nan? Yairî awanî kaꞌrî, kaane kaꞌrî, yairî pra awanî? Uyesaꞌkon pe tîweꞌsen Romanoyamîꞌ esaꞌ César yeꞌma annaya ya?

"

¹⁸ Tîîse Jesusya îꞌ ankuꞌpai toꞌ wanî tarakkîrî epuꞌtîꞌpî. Moropai taꞌpîiya toꞌ pîꞌ: —Seruꞌyeꞌkon amîrîꞌnîkon. Aawarîrîꞌnîkon teesenkuꞌtîsanon morî pe tîwanîkon kaiꞌma. Îꞌ waniꞌ awanî yeꞌnen uuwanmîra uurî anapiꞌpai awanîkon mîrîrî? —taꞌpîiya."

¹⁹ Moropai taꞌpîiya: —Moriya mîrîrî yeꞌmatoꞌyaꞌnîkon eneꞌtî uupia eraꞌmatoꞌpeuya —taꞌpîiya.

Mîrîrî enepîꞌpî toꞌya."

²⁰ Moropai inkamoro yekaranmapoꞌpîiya: —Anîꞌ eseꞌ mîserî? Anîꞌ yekaton sîrîrî pîrata enaꞌpî pîꞌ? —taꞌpîiya."

²¹ Inkamoroya yuukuꞌpî: —Romanoyamîꞌ esaꞌ César eseꞌ —taꞌpî toꞌya. Mîrîrî taa toꞌya yeꞌnen, Jesusya taꞌpî: —Moriya itîîkî iipia, imîrî pe awanî yeꞌnen, îꞌ taꞌpî Césarya yawîrî ikuꞌtî. Moropai îꞌ kuꞌtî taꞌpî Paapaya yawîrî nîrî ikuꞌtî —taꞌpîiya.

"

²² Mîrîrî taa Jesusya pîꞌ toꞌ esenumenkaꞌpî mararî pra teesenumenkai, îꞌ taiya eta tîuyaꞌnîkon pîꞌ. Mîrîrî yeꞌnen Jesus piapai toꞌ wîtîꞌpî. Îꞌ kupî toꞌya pra awanîꞌpî Jesus pîꞌ.

"

²³ Mîrîrî yai saduceuyamîꞌ wîtîꞌpî Jesus pia. Inkamoro esenumenkatoꞌ wanîꞌpî isaꞌmantaꞌsan eꞌmîꞌsaꞌka pepîn taawonan pe. Mîrîrî yeꞌnen isaꞌmantaꞌsan eꞌmîꞌsaꞌka pepîn taapîtîꞌpî toꞌya."

²⁴ Moropai inkamoroya taꞌpî Jesus pîꞌ:

—Anna yenupanen, pena Moisés nurîꞌtîya anna yenupaꞌpî see warantî —taꞌpî toꞌya. —Tiwin warayoꞌ noꞌpîta, tîîse tînmu ton tepose pra aasaꞌmanta mîîkîrî noꞌpîrîꞌpî eꞌnîmî. Mîîkîrî yarakkîrî itakonoꞌpî wanî eꞌpai awanî —taꞌpîiya. —Moropai more yan pe tîrui noꞌpîrîꞌpî enasaꞌ ya, tînre ton yenpoiya. Mîîkîrî more pîꞌ urui munmuꞌpî taiya, tînmu pe tîîse."

²⁵ Moro toꞌ man anna koreꞌta asakîꞌne miaꞌ pona tîîmoꞌtai kaisarî warayoꞌkon. Toꞌ ruinankon noꞌpîtaꞌpî, tîîse aasaꞌmantaꞌpî inmu ton pra siꞌma. Mîîkîrî noꞌpî rîꞌpî yarakkîrî itakonoꞌpî wanîꞌpî."

²⁶ Tîîse mîrîrî warantî rî mîîkîrî nîrî saꞌmantaꞌpî inmu ton pra tîîse. Moropai toꞌ eseurîno yarakkîrî mîrîrî warantî awanîꞌpî. Moropai tamîꞌnawîrî toꞌ saꞌmantaꞌpî inmuku pra toꞌ tîîse. Inkamoro saꞌmantaꞌpî."

²⁷ Mîrîrî tîpo wîriꞌ nîrî saꞌmantaꞌpî —taꞌpîiya."

²⁸ Mîrîrî ekaranmapoꞌpî saduceuyamîꞌya Jesus pîꞌ. Taꞌpî toꞌya: —Inkamoro warayoꞌkon eꞌsaꞌ asakîꞌne miaꞌ pona tîîmoꞌtai kaisarî mîîkîrî wîriꞌ yarakkîrî. Tamîꞌnawîronkon eꞌmîꞌsaꞌka yai oꞌnon yeꞌka warayoꞌ noꞌpî pe awanî kupî sîrîrî? —taꞌpî toꞌya. —Maasa pra tamîꞌnawîrî yarakkîrî toꞌ eꞌsaꞌ yeꞌnen.

"

²⁹ Jesusya toꞌ maimu yuukuꞌpî: —Aka, eesenkuꞌtîsaꞌkon mîrîrî, îꞌ taasaꞌ Paapa maimu eꞌmenukasaꞌya epuꞌtîyaꞌnîkon pra naatîi. Meruntî ke Paapa wanî epuꞌtîyaꞌnîkon pepîn mîrîrî —taꞌpî Jesusya toꞌ pîꞌ."

³⁰ Aꞌkî, isaꞌmantaꞌsan eꞌmîꞌsaꞌka yai tînoꞌpî ke anîꞌ wanî pepîn. Maasa pra mîrîrî toꞌ wanî inserîyamîꞌ warantî, kaꞌ ponkon warantî. Mîrîrî yeꞌnen tînoꞌpî ke toꞌ wanî pepîn."

³¹ Tîîse isaꞌmantaꞌsan eꞌmîꞌsaꞌkatoꞌ pîꞌ Paapa eseurîmapîtîꞌpî pena. Mîrîrî erenkasaꞌyaꞌnîkon pra naatî? See warantî taꞌpî Paapaya:
"

³²

“Uurî Paapa, Abraão nurîꞌtî yepotorî, moropai Isaque nurîꞌtî yepotorî. Moropai Jacó nurîꞌtî yepotorî pe wanî”,
ekaremekîꞌpîiya. Saꞌmantasaꞌ pe inkamoro koꞌmamî pepîn ipatîkarî. Paapa wanî enen tîîkoꞌmansenon yepotorî pe. Isaꞌmantaꞌsan yepotorî pe pra awanî.

"

³³ Mîrîrî taa Jesusya eta tîuyaꞌnîkon pe, arinîkon pemonkonyamîꞌ wanîꞌpî teesenumenkai mararî pra, îꞌ kaiꞌma toꞌ yenupatoiꞌya pîꞌ.

"

³⁴ Mîrîrî tîpo fariseuyamîꞌ eperepîꞌpî Jesus pia. Maasa pra saduceuyamîꞌ tîꞌnapamî emapuꞌtîsaiꞌya yeꞌnen, toꞌ iipîꞌpî iipia."

³⁵ Warayoꞌ epuꞌnen Moisés nurîꞌtîya yenupantoꞌ pîꞌ yenupaton iipîꞌpî iipia maasa pra seruꞌyeꞌ pe Jesus eseurîma anepuꞌpai awanîꞌpî. Mîrîrî yeꞌnen Jesus ekaranmapoꞌpîiya.

"

³⁶ —Anna yenupanen, oꞌnon wanî mîrîrî ipîkku pe panpîꞌ unkupîkon ton pe Paapa nekaremekîꞌpî pe? —taꞌpîiya.

"

³⁷ Jesusya yuukuꞌpî:

—Ayepotorî Paapa yapurîkî tamîꞌnawîrî ayewan ke, moropai tamîꞌnawîrî ayekaton ke. Moropai tamîꞌnawîrî eesenumenkatoꞌ ke
—taꞌpîiya."

³⁸ —Mîrîrî wanî eꞌmaiꞌnon, ipîkku pe ituꞌse Paapa eꞌtoꞌpe."

³⁹ Moropai itakon moro wanî manniꞌ eꞌmaiꞌnon warantî rî. Taiya:

Ayonpa saꞌnamakî kureꞌne aawarîrî amîrî eꞌsaꞌnama manniꞌ warantî.
"

⁴⁰ Mîrîrî warantî mîrîrî asakîꞌnan yawîrî kuꞌsaꞌyaꞌnîkon ya, tamîꞌnawîron sîrîrî Moisés nurîꞌtî nekaremekîꞌpî yawîrî awanîkon. Moropai penaronkon Paapa maimu ekaremeꞌnenan profetayamîꞌ nurîꞌtî nekaremekîꞌpîya taasaꞌ yawîrî awanîkon —taꞌpî Jesusya.

"

⁴¹ Moropai fariseuyamîꞌ emurukuntîsaꞌ tanne, Jesusya toꞌ ekaranmapoꞌpî:

"

⁴² —Îꞌ kaiꞌma see eesenumenkakon mîrîrî mîîkîrî Paapa nîmenkaꞌpî pîꞌ? Anîꞌ paarîꞌpî pe awanî mîrîrî? —taꞌpîiya.

—Davi nurîꞌtî paarîꞌpî mîîkîrî —taꞌpî toꞌya ipîꞌ.

Moropai inîꞌrî toꞌ ekaranmapoꞌpî Jesusya:"

⁴³ —Îꞌ waniꞌ awanî yeꞌnen kin Davi nurîꞌtî eseurîmaꞌpî Paapa nîmenkaꞌpî pîꞌ pena? Morî Yekaton Wannîya eeseurîma emapuꞌtîꞌpî. “Uyepotorî” taꞌpîya. Davi nurîꞌtî maimu rîꞌpî sîrîrî.
"

⁴⁴

Uyepotorî pîꞌ Paapaya taꞌpî:
“Uupia ereutakî umeruntîri winîkîi
ayeyatonon yaretîꞌkauya pîkîrî” taꞌpîiya
taꞌpî Daviya, sîrîrî imaimu."

⁴⁵ Aꞌkî, Davi paarîꞌpî pe neken Paapa nîmenkaꞌpî wanî ya. Îꞌ waniꞌ awanî yeꞌnen Uyepotorî taa Daviya ipîꞌ, manniꞌ? —taꞌpî Jesusya.

"

⁴⁶ Mîrîrî taa Jesusya yuuku toꞌya pra toꞌ wanîꞌpî. Moropai mîrîrî patapai inîꞌrî Jesus anekaranmapopai pra toꞌ enaꞌpî.

"

23

¹ Jesusya tînenupaꞌsan pîꞌ taꞌpî moropai arinîkon pîꞌ."

² Taꞌpîiya: —Insamoro Moisés nurîꞌtîya yenupantoꞌ pîꞌ yenupatonkon, moropai fariseuyamîꞌ esenyakaꞌma amîrîꞌnîkon yenupa pîꞌ, Moisés nurîꞌtîya ikupîꞌpî manniꞌ warantî."

³ Mîrîrî yeꞌnen toꞌ maimu yawîrî eꞌpai awanîkon. Moropai tamîꞌnawîrî ayenupatoꞌkon toꞌya yawîrî eꞌpai awanîkon. Tîîse toꞌ nîkupî, toꞌ yeseru kîꞌkuꞌtî. Maasa pra ayenupaꞌpîkon tîuyaꞌnîkon yawîrî pra toꞌ koꞌmamî yeꞌnen."

⁴ Aꞌkî, pemonkonyamîꞌ narîton amîiꞌne pe puꞌkuru tîweꞌsen ewaꞌtî toꞌya. Tîîse mîrîrî yarî pîꞌ toꞌ pîikaꞌtî toꞌya pepîn, mararî tenyakon yeperu yaretî ke. Mîrîrî warantî toꞌ yenupatoꞌ toꞌya pîꞌ Jesus eseurîmaꞌpî. ˻Maasa pra taꞌpî tîuyaꞌnîkon yawîrî ikupî toꞌya pra awanî yeꞌnen.˼

"

⁵ Moropai taꞌpîiya: —Mîrîrî yeꞌka kupî toꞌya maasa pra tamîꞌnawîronkon pemonkonyamîꞌya teraꞌmakon yuꞌse toꞌ wanî yeꞌnen. Maasa eraꞌmatî, Paapa maimu eꞌmenukasaꞌ menukapîtî toꞌya moropai mîrîrî yewaꞌtî toꞌya tepinkon pîꞌ moropai temekonkon pîꞌ eeseraꞌmatoꞌpe kaiꞌma. Moropai tîponkon sonpan yeꞌpi kupî toꞌya kusan pe, mîî pe tîwanîkon yeꞌnen."

⁶ Moropai inkamoroya festa weiyu yai, teereutatoꞌkon ton morî aponoꞌ menka. Moropai epereꞌnîtoꞌ yewîꞌ ta nîrî, morî menka toꞌya tapurîtoꞌkon pe toꞌya."

⁷ Moropai inkamoro wanî tamîꞌnawîronkon esekaremekî yuꞌse, aronne panpîꞌ. Moropai uyenupanen kaiꞌma tesatîkon toꞌya yuꞌse toꞌ wanî.

"

⁸ Tîîse inkamoro warantî “Uyepotorî” kaiꞌma ayonpakon esatîyaꞌnîkon eꞌpai pra man. Maasa pra tamîꞌnawîronkon amîrîꞌnîkon wanî seꞌ warantî, eꞌkaisarî ayonpakon pokonpe. Maasa pra Ayepotorîkon moro man tiwinan."

⁹ Moropai tarî non po anîꞌrî esatîyaꞌnîkon eꞌpai pra man Paapa anna yunkon kaiꞌma. Maasa pra amîrîꞌnîkon yunkon moro man, tiwinan neken kaꞌ pon —taꞌpîiya."

¹⁰ —Moropai anîꞌ esatîyaꞌnîkon eꞌpai pra man eꞌmaiꞌnon mîîkîrî tamîꞌnawîronkon yeꞌmaiꞌnorî taayaꞌnîkon eꞌpai pra man. Maasa pra amîrîꞌnîkon yeꞌmaiꞌnorî moro man tiwinan, Cristo mîîkîrî, Paapa nîmenkaꞌpî."

¹¹ Maasa pra anîꞌ wanî ya amîrîꞌnîkon koreꞌta ipîkku panpîꞌ eꞌpai awanî apoitîrî pe tiaronkon maꞌre."

¹² Anîꞌ wanî ya tiaronkon yentai eꞌpai mîîkîrî kupî Paapaya toꞌ maꞌre. Moropai anîꞌ wanî ya tiaronkon maꞌre eꞌpai, mîîkîrî kupî Paapaya tiaronkon yentai —taꞌpî Jesusya.

"

¹³ —Aka tîwarî eꞌtî, amîrîꞌnîkon Moisés nurîꞌtîya yenupantoꞌ pîꞌ yenupatonkon moropai fariseuyamîꞌ. Seruꞌyeꞌkon amîrîꞌnîkon! Pemonkonyamîꞌ maꞌnîpanenan pe awanîkon Paapa pemonkono pe toꞌ ena namai. Ayesaꞌkon pe Paapa kupîyaꞌnîkon pepîn moropai tiaronkonya ikupî tîrîyaꞌnîkon pepîn. Maasa pra toꞌ yenupayaꞌnîkon yairî pra. Mîrîrî wenai atarumaꞌtîkon Paapaya kupî sîrîrî.

"

¹⁴ Aka tîwarî eꞌtî, Moisés nurîꞌtîya yenupantoꞌ pîꞌ yenupatonkon moropai fariseuyamîꞌ morî pe tîweꞌkuꞌsenon pe awanîkon seruꞌyeꞌ pe. Maasa pra inyo isaꞌmantaꞌsan wîriꞌsanyamîꞌ yamaꞌrunpapîtîyaꞌnîkon amaꞌ pe. Moropai mîrîrî siꞌma eepîremapîtîkon kureꞌne kusan pe tiaronkonya ayeraꞌmatoꞌkonpe. Mîrîrî wenai tiaronkon yentai aweꞌtarumaꞌtîkon kupî sîrîrî —taꞌpî Jesusya.

"

¹⁵ —Aka tîwarî eꞌtî, Moisés nurîꞌtîya yenupantoꞌ pîꞌ yenupatonkon moropai fariseuyamîꞌ. Seruꞌyeꞌkon teesenkuꞌtîsanon. Attîpîtîkon patakon kaisarî, moropai erenkon ratai poro. Mîrîrî yai tiaronkon ankuꞌpai awanîkon ayeserukon warantî toꞌ eꞌtoꞌpe. Tîîse ayeserukon yaꞌ eenaꞌpî wanî imakuiꞌpî kuꞌnen pe ayentaiꞌnîkon. Mîîkîrî yenumî Paapaya apoꞌ yaꞌ emapuꞌtîyaꞌnîkon mîrîrî warantî —taꞌpî Jesusya.

"

¹⁶ —Aka tîwarî eꞌtî. Maasa pra enkaruꞌnan warantî siꞌma tiaronkon yeꞌmaiꞌnorî pe eꞌpai awanîkon yeꞌnen. Toꞌ yenupayaꞌnîkon sîrîrî warantî: “Anîꞌya taa ya, ‘Epîremantoꞌ yewîꞌ winîkîi mîrîrî kupîuya pe wai’, taiya ya, tîîse mîrîrî kupîiya pra awanî ya, îꞌ waniꞌ awanî pepîn kaiꞌma. Moropai taa tiaronya ya ‘Ouro epîremantoꞌ yewîꞌ tawon winîkîi mîrîrî kupîuya’ taiya ya, ikupîiya eꞌpai awanî mîrîrî”. Kaiꞌma toꞌ yenupayaꞌnîkon."

¹⁷ Pakkokon, îꞌ epuꞌnenan pepîn, enkaruꞌnankon amîrîꞌnîkon. Îꞌ wanî ipîkku pe tîweꞌsen, ouro ou epîremantoꞌ yewîꞌ kaꞌrî ipîkku pe tapurîsen? Epîremantoꞌ yewîꞌ wanî ipîkku pe panpîꞌ maasa pra Paapa yewîꞌ pe awanî yeꞌnen. Moropai mîrîrî ouro wanî imîrî pe maasa pra itewîꞌ ta awanî yeꞌnen —taꞌpîiya."

¹⁸ —Moropai amîrîꞌnîkonya tiaronkon yenupapîtî taapîtîyaꞌnîkon. Anîꞌya taa ya, taransen mîrîrî altar winîkîi ikupîuya taiya ya moropai ikupîiya pra awanî ya, îꞌ waniꞌ awanî pepîn kaiꞌma taayaꞌnîkon. Tîîse altar po tîweꞌsen itîîsaꞌ winîkîi ikupîuya taiya ya, tîwî ikupîiya eꞌpai pra awanî kaiꞌma toꞌ yenupayaꞌnîkon."

¹⁹ Epuꞌnenan pepîn, amîrîꞌnîkon enkaruꞌnankon warainonkon. Îꞌ wanî ipîkku pe tîweꞌsen? Mîrîrî toꞌ naranîꞌpî yaponseꞌ ou ipo manniꞌ taransen? Mîrîrî toꞌ naranîꞌpî yaponseꞌ wanî Paapa yemanne pe, moropai ipo manniꞌ taransen wanî imîrî pe nîrî, itemanne po awanî yeꞌnen —taꞌpîiya."

²⁰ —Mîrîrî yeꞌnen anîꞌya taa ya taranse yaponseꞌ altar winîkîi ikupîuya taiya ya. Tamîꞌnawîron taransen ipo manniꞌ winîkîi taiya nîrî. ˻Mîrîrî yeꞌnen ikupîiya eꞌpai awanî mîrîrî.˼"

²¹ Moropai anîꞌya taa ya epîremantoꞌ yewîꞌ winîkîi ikupîuya taiya ya, mîîkîrîya taa nîrî mîrîrî epîremantoꞌ yewîꞌ tawon, Paapa winîkîi."

²² Moropai anîꞌya taa ya, kaꞌ winîkîi ikupîuya taiya ya, Paapa yaponseꞌ eereutatoꞌ winîkîi taiya nîrî moropai Paapa ereutasaꞌ manniꞌ winîkîi taiya nîrî. ˻Mîrîrî yeꞌnen îꞌ taꞌpî tîuya yawîrî ikupîiya eꞌpai awanî mîrîrî.˼

"

²³ Aka tîwarî eꞌtî amîrîꞌnîkon Moisés nurîꞌtîya yenupantoꞌ pîꞌ yenupatonkon moropai fariseuyamîꞌ. Maasa pra aweꞌtarumaꞌtîkon kupî sîrîrî. Yairî Paapa yapurîyaꞌnîkon kaiꞌma tamîꞌnawîrî antîrîkon ke Paapa repayaꞌnîkon, ayoꞌkon wosi yonpa ke nîrî irepayaꞌnîkon. Tîîse morî panpîꞌ ankupîkon ton pe taꞌpî kupîyaꞌnîkon pepîn, tiaronkon winîkîi yairî pra awanîkon yeꞌnen moropai toꞌ saꞌnamayaꞌnîkon pra awanîkon yeꞌnen. Îꞌ taasaꞌ Paapaya yawîrî kupîyaꞌnîkon pra awanîkon yeꞌnen. Tîîse tamîꞌnawîrî mîrîrî kupîꞌpîyaꞌnîkon eꞌpainon tîwî ankupîꞌpîkon manniꞌ tîkuꞌse pra."

²⁴ Tiaronkon yeꞌmaiꞌnorî pe eꞌpai awanîkon enkaruꞌnan warantî siꞌma. Maasa pra kankîꞌyamîꞌ enasaꞌ yainonkayaꞌnîkon awukukon yaꞌ warantî tamîꞌnawîrî antîrîkon ke Paapa repayaꞌnîkon siꞌmîrikkî pe tîweꞌsen ke nîrî. Tîîse kankîꞌ yentainon kameru warainon kureꞌnan yennoꞌmayaꞌnîkon, maasa pra ipîkku pe panpîꞌ ankupîkon ton Paapa nekaremekîꞌpî kupîyaꞌnîkon pepîn, tîîse mararî mîrikkî neken kupîyaꞌnîkon.

"

²⁵ Aka tîwarî eꞌtî, amîrîꞌnîkon Moisés nurîꞌtîya yenupantoꞌ pîꞌ yenupatonkon, moropai fariseuyamîꞌ. Seruꞌyeꞌkon. Aweꞌtarumaꞌtîkon pe naatîi. Apisaukon ronapîtîyaꞌnîkon poroporo neken, morî pe eeseraꞌmatoꞌpe kaiꞌma. Tîîse ita nura awanî tanne. Mîrîrî taꞌpî Jesusya toꞌ yeseru ekaremekîpa kaiꞌma. Maasa pra toꞌ esenumenkatoꞌ yaꞌ wanî imakuiꞌpî nura pe awanî mararî pra. Kureꞌne temannekon ton yuꞌse toꞌ wanî moropai ituꞌse tîweꞌtoꞌkon yawîrî eꞌpai toꞌ wanî."

²⁶ Mîrîrî yeꞌnen fariseuyamîꞌ enkaruꞌnankon, eꞌmaiꞌ pe apisaukon ronatî ita, morî pe aweꞌtoꞌpe. Morî pe ita wanî ya, poroporo nîrî morî pe eeseraꞌma.

"

²⁷ Aka tîwarî eꞌtî, fariseuyamîꞌ moropai Moisés nurîꞌtîya yenupantoꞌ pîꞌ yenupatonkon. Seruꞌyeꞌkon amîrîꞌnîkon wanî penaron uuruwai kîꞌpasaꞌ iporo aimutun pe warantî. Iporo morî pe puꞌkuru eeseraꞌma. Tîîse ita, ituꞌna mararî pra pemonkonyamîꞌ yeꞌpî rîꞌpî wanî. Moropai mîrîrî wanî ikî pe puꞌkuru."

²⁸ Mîrîrî warantî amîrîꞌnîkon eseraꞌma morî pemonkon warantî. Tîîse ayewankon yaꞌ nura wanî mararî pra. Seruꞌyeꞌ wanî moropai tuꞌkan imakuiꞌpî kuꞌtoꞌyaꞌnîkon wanî mararî pra —taꞌpî Jesusya.

"

²⁹ —Aka tîwarî eꞌtî fariseuyamîꞌ moropai Moisés nurîꞌtîya yenupantoꞌ pîꞌ yenupatonkon. Seruꞌyeꞌkon amîrîꞌnîkonya penaronkon Paapa maimu ekaremeꞌnenan profetayamîꞌ nurîꞌtî uuruwasi ton konekaꞌpî morî pe puꞌkuru, inkamoro yairî koꞌmamîꞌsan yapurîyaꞌnîkon kaiꞌma."

³⁰ Moropai taayaꞌnîkon: “Pena inkamoro wîîtîponkon anna tamorîꞌsan yai anna eꞌsaꞌ ya, inkamoro Paapa maimu ekaremeꞌnenan profetayamîꞌ nurîꞌtî wîꞌpî annaya pepîn eꞌpainon, toꞌ wîꞌpî toꞌya warantî. Mîrîrî ikuꞌsaꞌ toꞌya manniꞌ warantî ikupîꞌpî annaya pepîn eꞌpainon”, taayaꞌnîkon."

³¹ Anna tamorîꞌsan taayaꞌnîkon wenai, inkamoro profetayamîꞌ wîîtîponkon payanîꞌsan anna, taayaꞌnîkon."

³² Mîrîrî yeꞌnen mîrîrî warantî toꞌ yeserurîꞌpî pîꞌ akoꞌmantî yaretîꞌkayaꞌnîkon pîkîrî."

³³ Mîrîrî yeꞌnen amîrîꞌnîkon wanî îkîi yeꞌkaton munkîyamîꞌ warantî. Îkîiyamîꞌ pe awanîkon. Tîîse îꞌ kaiꞌma Paapaya apoꞌ yaꞌ ayenuntoꞌkon winîpai eꞌpîikaꞌtîpai awanîkon mîrîrî? Aweꞌpîikaꞌtîkon pepîn tiwin kin."

³⁴ Mîrîrî yeꞌnen apîꞌnîkon umaimu ekaremeꞌnenan yarimauya kupî sîrîrî warayoꞌkon epuꞌnenan, moropai yenupatonkon. Tîîse inkamoro yonpa wîîyaꞌnîkon kupî sîrîrî. Moropai tiaron pokapîtîyaꞌnîkon kupî sîrîrî pakîꞌnan pona. Moropai tiaronkon poꞌpîtîyaꞌnîkon kupî sîrîrî epereꞌnîtoꞌ yewîꞌkon ta. Moropai toꞌ pokonomayaꞌnîkon kupî sîrîrî toꞌ patakon cidade kaisarî."

³⁵ Mîrîrî kupîyaꞌnîkon wenai atarumaꞌtîkon Paapaya kupî sîrîrî. Tîîse ankupîꞌpîkon neken wenai pra tîîse penaronkon nîkupîꞌpî wenai aweꞌtarumaꞌtîkon, tamîꞌnawîronkon morîkon toꞌ nîwîꞌsan penaroꞌ Abel nurîꞌtî wîꞌpî irui Caimya patapai, moropai Paapa maimu ekaremeꞌnen Baraquias munmu, profeta Zacarias nurîꞌtî wîꞌpî toꞌya pîkîrî. Manniꞌ anwîꞌpîkon Paapa ton pe toꞌ nîpoꞌtî yaponseꞌ yarappana. Paapa yewîꞌ ta teepîremasanon neken wîtîtoꞌ pata iwîꞌpî toꞌya."

³⁶ Ayenkuꞌtîuya pepîn, mîrîrî tamîꞌnawîron kuꞌsaꞌ toꞌya wenai amîrîꞌnîkon, sîrîrî pankon pemonkonyamîꞌ tarumaꞌtî Paapaya kupî sîrîrî —taꞌpî Jesusya.

"

³⁷ Jesusya tîmaimu yaretîꞌkaꞌpî see warantî Jerusalém ponkon pemonkonyamîꞌ pîꞌ: —Amîrîꞌnîkonya umaimu ekaremeꞌnenan wîꞌpî. Moropai tîꞌ ke tiaronkon paꞌtîpîtîꞌpîyaꞌnîkon, umaimu ekaremeꞌse unaipontîꞌsan. Îꞌ warapo iteꞌka amîrîꞌnîkon muurukuntî yuꞌse wanîꞌpî tamîꞌnawîrî, kariwanaya tînmukuyamîꞌ muurukuntî tapîꞌsaꞌ yoꞌkoi warantî. Tîîse ituꞌse pra awanîꞌpîkon."

³⁸ Aꞌkî, tarîpai apatakon ena kupî sîrîrî itesaꞌ pra. Yawon pra eena pe man. Maasa pra Paapaya atarumaꞌtîkon kupî sîrîrî."

³⁹ Tauya sîrîrî apîꞌnîkon. Sîrîrî patapai inîꞌrî uyeraꞌmayaꞌnîkon pe pra naatîi. Uyapurîtoꞌyaꞌnîkon weiyu erepamî pîkîrî aakoꞌmamîkon. Mîrîrî yai neken, taayaꞌnîkon

“Mîîkîrî morî Uyepotorîkon eseꞌ pîꞌ tuiꞌsen yapurîpaiꞌnîkon”,
taayaꞌnîkon kupî sîrîrî —taꞌpî Jesusya.

"

24

¹ Epîremantoꞌ yewîꞌ tapai teepaꞌkakon pe, aasarî tuutîkon yeꞌka pe, Jesus nenupaꞌsan erepamîꞌpî iipia. Moropai inkamoro eseurîmaꞌpî wîttî, epîremantoꞌ yewîꞌ konekasaꞌ pîꞌ. Maasa pra morî pe puꞌkuru awanî yeꞌnen."

² Jesusya toꞌ maimu yuukuꞌpî. Taꞌpîiya: —Ayenkuꞌtîuya pepîn. Seeniꞌ wîttî kureꞌnan eraꞌma pîꞌ naatî? Tîîse aakoꞌmamî pepîn kupî sîrîrî. Maasa pra tiaronkonya yaranka toꞌ weiyu erepamî yai. Tamîꞌnawîrî isoroka toꞌya tiwinan tîꞌ eꞌnîmî pepîn tonpa po. Tîîse tamîꞌnawîrî yenumî toꞌya kupî sîrîrî.

"

³ Mîrîrî tîpo Oliveira yeꞌka kîrî po, Jesus ereutasaꞌ wanîꞌpî. Mîrîrî tanne inenupaꞌsan erepamîꞌpî iipia, tiaronkon ton pra tîîse. Moropai Jesus ekaranmapoꞌpî toꞌya: —Oꞌnon yeꞌka pe mîrîrî eꞌkupî kupî sîrîrî? Oꞌnon yeꞌka pe mîrîrî kupî toꞌya epuꞌtî annaya eꞌpainon? Îꞌ eseraꞌma wenai aminke pra aaiꞌtoꞌpe wanî moropai tamîꞌnawîron eꞌtîꞌka epuꞌtî annaya? —taꞌpî toꞌya.

"

⁴ Jesusya toꞌ maimu yuukuꞌpî: —Tîwarî eꞌtî aka, anîꞌya ayenkuꞌtîkon namai."

⁵ Maasa pra tuꞌkankon asarî kupî sîrîrî uyeseꞌ pîꞌ teeseurîmasanon pe tîweꞌkuꞌse. Moropai taa toꞌya: “Uurî Cristo, Paapa nîmenkaꞌpî”, taa toꞌya. Moropai mîrîrî taa toꞌya pîꞌ tuꞌke pemonkonyamîꞌ esenkuꞌtî kupî sîrîrî."

⁶ Moropai pemonkonyamîꞌ eseyaꞌnamatoꞌ etayaꞌnîkon pîꞌ teesiꞌnîꞌse pra meꞌtîi moropai teepîsanon yekare etayaꞌnîkon ya. Tamîꞌnawîrî mîrîrî yeꞌka eꞌkupî kupî sîrîrî, tîîse maasa pata ataretîꞌka pepîn."

⁷ Pemonkonyamîꞌ eseyaꞌnama tiaron pata ponkon yarakkîrî. Moropai pemonkonyamîꞌ esanon eseyaꞌnama tiaronkon esanon yarakkîrî. Moropai pata eserentîkîꞌma kupî sîrîrî tiaron pata poro. Mîrîrî yai emiꞌnan wanî kupî sîrîrî pata po."

⁸ Sîrîrî yeꞌka eꞌkupî kupî sîrîrî manniꞌ eꞌmaiꞌnon neꞌneꞌ epuꞌtî more yan pe tîweꞌsen wîriꞌya warantî —taꞌpî Jesusya.

"

⁹ —Mîrîrî yai tiaronkonya ayapisîkon kupî sîrîrî tesanonkon pia. Ayarîkon toꞌya atarumatîtoꞌkon pe toꞌya. Moropai inkamoroya amîrîꞌnîkon wîî. Moropai tamîꞌnawîronkonya amuꞌtunpakon uurî yapurîyaꞌnîkon wenai."

¹⁰ Mîrîrî yai tuꞌkankon uyapurînenanya uyapurîtoꞌ tîuyaꞌnîkon kupî tîwî. Maasa pra innape ukupî toꞌya pra toꞌ enasaꞌ yeꞌnen, tiaronkon yewanmîrînenan pe toꞌ wanî kupî sîrîrî. Moropai tonpakon rumaka toꞌya kupî sîrîrî teeyatonon yenyaꞌ."

¹¹ Mîrîrîya Paapa maimu ekaremeꞌnenan, profetayamîꞌ pe tîweꞌkuꞌsanon seruꞌyeꞌkon esenpo kupî sîrîrî pemonkonyamîꞌ yenkuꞌtîi. Inkamoroya tuꞌke toꞌ yenkuꞌtî."

¹² Mîrîrî warantî imakuiꞌpî eꞌparaipîka kupî sîrîrî kaꞌneꞌ pe. Mîrîrî wenai mararonkon pepîn innape Paapa yapurînenanya Paapa yapurîtoꞌ tîuyaꞌnîkon yenomî inîꞌ toꞌ enpenata pepîn."

¹³ Tîîse tamîꞌnawîron mîrîrî yeꞌka yapîtanîpîtîpon wanî ya ikîꞌpî tîpose, mîîkîrî pîikaꞌtîsaꞌ Paapaya mîrîrî —taꞌpîiya."

¹⁴ —Moropai mîrîrî yai îꞌ kaiꞌma pemonkonyamîꞌ esaꞌ pe Paapa wanî esekaremekî kupî sîrîrî tamîꞌnawîrî pata poro. Tamîꞌnawîronkon pemonkonyamîꞌya eta kupî sîrîrî uyekare pîꞌ. Moropai mîrîrî yai tamîꞌnawîron eꞌtîꞌka weiyu erepamî —taꞌpî Jesusya.

"

¹⁵ Moropai Jesus eseurîma koꞌmannîpîꞌpî: —Penaroꞌ Paapa maimu ekaremeꞌnen Daniel nurîꞌtî eseurîmaꞌpî.

“Tamîꞌnawîronkon yewanma pe tîweꞌsen imakuiꞌpî, Paapa newanma pe tîweꞌsen tîrî tiaronkonya epîremantoꞌ yewîꞌ ta. Mîrîrî yeꞌka pataꞌseꞌ pepîn yaꞌ itîrî toꞌya”,
taꞌpî Daniel nurîꞌtîya. Mîrîrî eraꞌmayaꞌnîkon yai, epuꞌtîyaꞌnîkon yuꞌse wai îꞌ taatoꞌpe awanî —taꞌpîiya."

¹⁶ Mîrîrî yeꞌnen anîꞌ wanî ya Judéia pata po, kaꞌneꞌ pe eepe eꞌpai awanî wîꞌ pona."

¹⁷ Moropai anîꞌ wanî ya tewîꞌ po kaꞌneꞌ pe awautî eꞌpai awanî moropai eepe eꞌpai awanî, tewîꞌ ta temanne eraꞌmai teewonse pra."

¹⁸ Moropai anîꞌ wanî ya keren po mîîkîrî ennaꞌpo eꞌpai pra wanî tewîꞌ ta tîponkon eraꞌmai, tîîse eepe eꞌpai awanî kaꞌneꞌ pe."

¹⁹ Mîrîrî yai aka saꞌne wîriꞌsanyamîꞌ more yankon moropai manaꞌpokonkon toꞌ munkîyamîꞌ. Inkamoro eꞌtarumaꞌtî kupî sîrîrî mararî pra maasa pra kaꞌneꞌ pe toꞌ epe eserîke pra toꞌ wanî yeꞌnen."

²⁰ Mepîrematîi Paapa pîꞌ maasa pra konoꞌ yai mîrîrî yeꞌka eꞌkupî namai. Moropai erîꞌkaꞌnîtoꞌ weiyu yai aweꞌkupî namai."

²¹ Maasa pra kureꞌnan eꞌtarumaꞌtîntoꞌ iipî kupî sîrîrî. Paapaya pata konekaꞌpî patapai eseraꞌmaꞌpî pepîn eꞌkupî kupî sîrîrî ikaisaron ton pra."

²² Tamîꞌnawîronkon eꞌtarumaꞌtî kupî sîrîrî mararî pra. Tîîse Paapaya ipîra toꞌ eꞌtarumaꞌtîtoꞌ yaretîꞌka kupî sîrîrî maasa tînkuꞌneꞌtîꞌpî weiyu eseporî pra tîîse. Mîrîrî kuꞌsaiꞌya pra awanî ya enen anîꞌ koꞌmamî pepîn eꞌpainon. Tîîse Paapaya tînmoꞌkakon pînînma kureꞌne tîpemonkono pe toꞌ wanî yeꞌnen. Toꞌ yaretîꞌka eꞌtarumaꞌtîntoꞌya tîrîiya pepîn.

"

²³ Mîrîrî yeꞌnen anîꞌya taa ya apîꞌnîkon: “Paapa nîmenkaꞌpî Cristo tarî man”, taiya ya, innape mîîkîrî maimu kîꞌkuꞌtî. Moropai “Siiniꞌ pata man”, taa toꞌya ya apîꞌnîkon, innape inkamoro yeꞌka maimu kîꞌkuꞌtî."

²⁴ Maasa pra seruꞌyeꞌkon iipî, uurî pe tîweꞌkuꞌsanon, Paapa maimu ekaremeꞌnenan pe tîweꞌkuꞌse toꞌ iipî. Inkamoroya anîꞌ nîkupî eserîkan pepîn kupî pemonkonyamîꞌ neraꞌmakon ton kupî, toꞌ yenkuꞌtîkonpa kaiꞌma. Mîrîrî wenai tamîꞌnawîronkon yenkuꞌtî toꞌya eꞌpainon Paapa nîmenkaꞌsan nîrî toꞌ yenkuꞌtî toꞌya tîrî Paapaya ya. Tîîse itîrîiya pepîn."

²⁵ Tîîse mîrîrî rawîrî apîꞌnîkon ekaremekî pîꞌ wai epuꞌtîkonpa.

"

²⁶ —Mîrîrî yeꞌnen anîꞌya taa ya apîꞌnîkon: “Aꞌkî, sinpata man keren po”, taiya ya, eraꞌmai katîtî. Inîꞌrî taa anîꞌya ya apîꞌnîkon: “Aꞌkî, tarî man eesenonsaꞌ”, taa toꞌya ya, innape toꞌ maimu kîꞌkuꞌtî ayenkuꞌtîkon toꞌya pîꞌ."

²⁷ Maasa pra uurî kaꞌ poinon iiꞌtoꞌ wanî kupî sîrîrî aronne amaꞌ pe pra. Eꞌwinî pairî kaꞌ pîꞌ waraꞌnapi eꞌsisiuka eseraꞌma manniꞌ warantî tamîꞌnawîronkonya eraꞌma uuipî yai —taꞌpîiya.

"

²⁸ —Aꞌkî, oꞌnon pata anîꞌ saꞌmantasaꞌ ya, mîîkîrî pîꞌ watunaiyamîꞌ emurukuntîsaꞌ wanî. Mîrîrî warantî uurî iipî inkamoro imakuiꞌpî kuꞌnenan koreꞌta apoꞌ yaꞌ toꞌ yenuntoꞌpeuya —taꞌpî Jesusya.

"

²⁹ Jesusya taꞌpî inîꞌrî: —Mîrîrî yai tamîꞌnawîronkon eꞌtarumaꞌtîꞌpî tîpo,

wei esiꞌnîpî kupî sîrîrî.
Moropai kapoi ena kupî sîrîrî aꞌka pe pra.
Moropai siirikkîyamîꞌ eꞌsoroka kupî sîrîrî.
Moropai tamîꞌnawîrî kaꞌ pîꞌ tîweꞌsanon eꞌtîtîtîꞌka kupî sîrîrî.

"

³⁰ Mîrîrî tîpo kaꞌ poi iipîꞌpî pemonkon pe eraꞌma tamîꞌnawîronkon pemonkonyamîꞌya. Uuipî katupuru koreꞌta aꞌka pe kaꞌ winîpai. Mîrîrî yai tamîꞌnawîrî pata ponkon karau kupî sîrîrî mararî pra. Maasa pra meruntî ke uuipî aꞌka pe, wei warantî."

³¹ Mîrîrî yai kureꞌnan usinarî yeꞌnunpa pe upoitîrîtonon inserîyamîꞌ yarimauya upemonkono pe umenkaꞌsan muurukuntîi. Tamîꞌnawîrî patakon kaisarî toꞌ wîtîtoꞌpe upemonkono pe umoꞌkaꞌsan eraꞌmai sîrîrî non po —taꞌpî Jesusya.

"

³² Moropai inîꞌrî taꞌpî Jesusya: —Sîrîrî figo yeꞌ yekare pîꞌ esenupatî. Eꞌmaiꞌ pe aarenta. Moropai eepantakasaꞌ ya, aareta. Mîrîrî pîꞌ taayaꞌnîkon aminke pra konoꞌpîtî wanî sîrîrî taawonan amîrîꞌnîkon."

³³ Mîrîrî warantî nîrî ekaremekîuya manniꞌ eꞌkupî eraꞌmayaꞌnîkon yai, Cristo ennaꞌpo kupî sîrîrî kaꞌ poi, taayaꞌnîkon. Mîrîrî warantî aminke pra uuiꞌtoꞌ wanî epuꞌtîyaꞌnîkon."

³⁴ Ayenkuꞌtîuyaꞌnîkon pepîn. Sîrîrî yeꞌka eꞌkupî kupî sîrîrî seruꞌyeꞌ pe pra. Tamîꞌnawîronkon sîrîrî pankon enenankon saꞌmanta pepîn sîrîrî eꞌkupî rawîrî."

³⁵ Tauya sîrîrî, tamîꞌnawîron ataretîꞌka kupî sîrîrî kaꞌ moropai non, pata, tîîse umaimu ataretîꞌka pepîn tiwin kin, ipatîkarî aakoꞌmamî —taꞌpî Jesusya.

"

³⁶ Jesus eseurîma koꞌmannîpîꞌpî. Taꞌpîiya: —Îꞌ pensa moropai îꞌ weiyu yai uuipî inîꞌrî sîrîrî non pona epuꞌtîyaꞌnîkon eserîke pra naatîi. Moropai inserîyamîꞌ kaꞌ ponkonya nîrî epuꞌtî pra man. Moropai uurî, Paapa munmuya epuꞌtî pepîn. Tîîse uyunya neken iweiyu epuꞌtî."

³⁷ Aꞌkî, pena Noé nurîꞌtî wanî yai, aweꞌkupîꞌpî warantî, uurî kaꞌ poi iipîꞌpî sîrîrî non pona ennaꞌpotoꞌ wanî pe man."

³⁸ Maasa pra mîrîrî eꞌkupî rawîrî pemonkonyamîꞌ wanîꞌpî teserukon yawîrî. Toꞌ entamoꞌkaꞌpî mararî pra moropai tîwukukon enîrîꞌpî toꞌya. Moropai mîrîrî yai warayoꞌkon noꞌpîtapîtîꞌpî, moropai wîriꞌsanyamîꞌ etiyomapîtîꞌpî teserukon yawîrî. Mîrîrî kupîꞌpî toꞌya tîkanau yaꞌ Noé nurîꞌtî asaraꞌtî pîkîrî, ikupîꞌpî toꞌya."

³⁹ Mîrîrî kupî pîꞌ toꞌ koꞌmanpîtîꞌpî maasa pra îꞌ eꞌkupî epuꞌtî tîuyaꞌnîkon pra tîwanîkon yeꞌnen. Mîrîrî kupî pîꞌ toꞌ koꞌmamî tanne, Paapaya pata maꞌtînîpîꞌpî tuna ke. Moropai tamîꞌnawîrî inkamoro tîꞌkaꞌpîiya. Mîrîrî warantî nîrî uurî kaꞌ poinon iiꞌtoꞌ weiyu wanî pe man. Inîmîkî toꞌya pra tîîse uuipî."

⁴⁰ Mîrîrî yai asakîꞌnankon warayoꞌkon wanî teesenyakaꞌmakon pîꞌ tînmîri yaꞌ. Tîîse iwanîyakon yarîuya tiwin moropai tiaron eꞌnîmî."

⁴¹ Moropai asakîꞌne wîriꞌsanyamîꞌ wanî teesenyakaꞌmakon pîꞌ. Toꞌ esenyakaꞌma aꞌnai yeꞌpa pîꞌ aꞌ yai. Mîîkîrî wanîyakon yarîuya tiwin moropai tiaron eꞌnîmî. Mîrîrî warantî aweꞌkupî pe man."

⁴² Mîrîrî namai tîwarî panpîꞌ akoꞌmantî maasa pra îꞌ pensa uurî ayepotorîkon erepantoꞌ weiyu sîrîrî non pona, epuꞌtîyaꞌnîkon pra naatîi."

⁴³ Maasa esenumenkatî sîrîrî pîꞌ: Aꞌkî, manniꞌ wîttî esaꞌya sîrîrîpe amaꞌyeꞌ erepamî epuꞌtî ya tewîꞌ yamaꞌrunpai, mîîkîrîya eerepamî nîmîkî eꞌpainon, tewîꞌ yamaꞌrunpaiya namai, innape nai?"

⁴⁴ Mîrîrî warantî nîrî amîrîꞌnîkon koꞌmamî eꞌpai awanî tîwarî. Maasa pra uurî kaꞌ poinon ennaꞌpotoꞌ weiyu sîrîrî non pona epuꞌtîyaꞌnîkon pra naatîi. Enpen eꞌtî unîmîkîyaꞌnîkon pra awanîkon tanne, ayeporîuyaꞌnîkon namai —taꞌpî Jesusya.

"

⁴⁵ Inîꞌrî Jesus eseurîmaꞌpî. Taꞌpîiya: —Oꞌnon yeꞌka mîîkîrî tîkaraiwarî maimu yawîrî tîweꞌsen yairon moropai epuꞌnen? Manniꞌ mîîkîrî ikaraiwarîya tewîꞌ koꞌmannîꞌnen pe itîrîꞌpî. Moropai tiaronkon teesenyakaꞌmasanon esaꞌ pe itîrîꞌpî. Moropai toꞌ yaꞌreꞌ ton tîînen pe itîrîꞌpîiya. Moropai tamîꞌnawîrî taꞌpî tîkaraiwarîya yawîrî ikuꞌnen pe awanîꞌpî —taꞌpîiya."

⁴⁶ —Taatausinpai puꞌkuru mîîkîrî ipoitîrî wanî îꞌ pensa tîkaraiwarî erepantoꞌ weiyu yai, maasa pra îꞌ taꞌpî tîkaraiwarîya yawîrî ikuꞌsaꞌ tîuya yeꞌnen."

⁴⁷ Yairî tauya sîrîrî apîꞌnîkon. Mîrîrî warantî tîkaraiwarî nîtîrîꞌpî koꞌmannîꞌsaiꞌya yeꞌnen. Ikaraiwarîya mîîkîrî tîpoitîrî pia inîꞌ panpîꞌ tamîꞌnawîron temanne tîrî iipia ikoꞌmannîꞌtoꞌpeiya."

⁴⁸ Tîîse mîrîrî warantî pra ipoitîrî wanî ya imakuiꞌpî pe. Maasa pra taiya: “Kaꞌneꞌ pe ukaraiwarî iipî pe pra man”, taiya. Tîîwarîrî siꞌma eeseurîma."

⁴⁹ Mîrîrî yeꞌnen tiaronkon tîkaraiwarî poitîrîtonon tonpayamîꞌ tarumaꞌtî piaꞌtîiya. Toꞌ poꞌpîtîiya toꞌ yaꞌreꞌ ton tîrîiya pepîn. Moropai mîîkîrîya taꞌreꞌ yonpa mararî pra, moropai eetîmî maiꞌ enîꞌnenan pokonpe. Mîrîrî kupîiya maasa pra tîkaraiwarî iipî pra awanî yeꞌnen kaꞌneꞌ pe."

⁵⁰ Moropai mîrîrî tîpo, tîîkoꞌmanse puꞌkuru pra ikaraiwarî erepamî. Mararî enpen pra tîîse tîpoitîrî eporîiya."

⁵¹ Mîrîrî yai inkupîꞌpî eraꞌma tîuya pe, ikaraiwarîya itarumaꞌtî mararî pra. Iꞌpoꞌpîtîiya, moropai yenumîiya tîmaimu yawîronkon pepîn, seruꞌyeꞌkon pataꞌseꞌ yaꞌ, tîmoron epuꞌtoꞌpeiya. Inkamoro seruꞌyeꞌkon pokonpe mîîkîrî karau pe man, mararî pra tee tîpaꞌtîi, neꞌneꞌ pe tîwanî yeꞌnen —taꞌpî Jesusya.

"

25

¹ Inîꞌrî Jesusya panton ekaremekîꞌpî: —Îꞌ kaiꞌma tamîꞌnawîronkon esaꞌ pe Paapa iiꞌtoꞌ wanî pe man, sîrîrî eꞌmarimatoꞌ warantî —taꞌpîiya. —Miaꞌ tamîꞌnawîronkon wîriꞌsanyamîꞌ maasaronkon wanîꞌpî. Inkamoroya tîꞌkumaꞌtukon ton lamparinha yapisîꞌpî moropai toꞌ wîtîꞌpî tîweꞌmarimasen ponaya."

² Tîîse toꞌ yonpayamîꞌ wanîꞌpî miaꞌtaikin kaisarî tîweꞌneꞌnokon. Moropai miaꞌtaikin toꞌ wanîꞌpî tîweꞌneꞌ pra, epuꞌnenan pe toꞌ wanîꞌpî."

³ Mîrîrî yeꞌnen inkamoro wîriꞌsanyamîꞌ tîweꞌneꞌnokonya tîꞌkumaꞌtukon paru ton yarî toꞌya pra toꞌ wanîꞌpî itenseꞌ yaꞌ, maasaron ton."

⁴ Tîîse tiaronkon epuꞌnenan wîriꞌsanyamîꞌya tîꞌkumaꞌtukon lamparinha paru ton yarîꞌpî itenseꞌ yaꞌ maasaron ton. Inkamoroya tîweꞌmarimasen iipî nîmîkîꞌpî."

⁵ Tîîse tîweꞌmarimasen erepamî pra aakoꞌmamîꞌpî. Moropai iweꞌnunpai toꞌ enaꞌpî. Moropai inkamoro weꞌnaꞌpî kaꞌneꞌ pe.

"

⁶ Toꞌ weꞌnasaꞌ tanne, anoinna tîweꞌmarimasen erepamîꞌpî. Mîîkîrî erepamî yeꞌnen, toꞌ entaime etaꞌpî wîriꞌsanyamîꞌya. Taꞌpî toꞌya: “Tîweꞌmarimasen erepannî pîꞌ man! Asiꞌtî iipia kaꞌneꞌ pe erepantî”, taꞌpî toꞌya.

"

⁷ Mîrîrî taa toꞌya pe, inkamoro miaꞌ tamîꞌnawîronkon maasaronkon wîriꞌsanyamîꞌ pakaꞌpî. Moropai inkamoroya tîꞌkumaꞌtukon lamparinha yawittanîpîꞌpî."

⁸ Tîîse inkamoro miaꞌtaikinankon tîweꞌneꞌnokonya taꞌpî tiaronkon epuꞌnenan pîꞌ: “Anna kumaꞌtu paru ton ke anna repatî maasa pra anna kumaꞌtu esiꞌnîꞌnî pîꞌ man”, taꞌpî toꞌya.

"

⁹ Tîîse inkamoroya yuukuꞌpî: “Kaane, anna kumaꞌtu paru man anna pe neken”. Tîîse taꞌpî toꞌya toꞌ pîꞌ: “Aꞌkumaꞌtukon paru ton yuꞌse awanîkon ya, tîweꞌrepasanon pia anennatantî”, taꞌpî toꞌya.

"

¹⁰ Mîrîrî yeꞌnen inkamoro epuꞌnenan pepîn tîweꞌneꞌnokon wîriꞌsanyamîꞌ wîtîꞌpî tîꞌkumaꞌtukon paru ton yennai. Maasa inkamoro tîîse poro po tîweꞌmarimasen erepamîꞌpî. Mîrîrî yeꞌnen miaꞌtaikinankon epuꞌnenan wîriꞌsanyamîꞌ ewomîꞌpî yarakkîrî tîweꞌmarimasen festarî pîꞌ. Moropai mîrîrî tîpo manaꞌta yarakkamoꞌpî toꞌya.

"

¹¹ Tîkoꞌman pe puꞌkuru pra, inkamoro wîriꞌsanyamîꞌ erepamîꞌpî. Moropai inkamoro entaimepîtî piaꞌtîꞌpî. Taꞌpî toꞌya: “Anna yepotorî, anna ewontoꞌpe manaꞌta yarakkanmokakî”, taꞌpî toꞌya.

"

¹² Tîîse tîweꞌmarimasenya yuukuꞌpî. Taꞌpîiya: “Anîꞌkan amîrîꞌnîkon? Ayepuꞌtîuyaꞌnîkon pra wai”, taꞌpîiya toꞌ pîꞌ.

"

¹³ Moropai Jesusya teeseurîmantoꞌ yaretîꞌkaꞌpî see warantî:

—Mîrîrî yeꞌnen tîwarî panpîꞌ akoꞌmantî. Maasa pra îꞌ pensa, îꞌ weiyu yai, erepamî weiyu epuꞌtîyaꞌnîkon pra naatîi —taꞌpî Jesusya.

"

¹⁴ Inîꞌrî tiaron panton ekaremekîꞌpî Jesusya: —Tamîꞌnawîronkon esaꞌ pe Paapa iiꞌtoꞌ wanî pe man see warantî. Warayoꞌ tiaron pata pona tuutîsen wanîꞌpî. Tuutî rawîrî tîpoitîrîtonon yannoꞌpîiya moropai tîpata rumakaꞌpîiya ikoꞌmannîꞌtoꞌpe toꞌya."

¹⁵ Moropai mîîkîrîya tiwin pîꞌ toꞌ tîîse toꞌ nenyakaꞌma ton tîniru tîrîꞌpî yenyakaꞌma toꞌya eserîke eraꞌma tîuya yeꞌnen. Eꞌmaiꞌnon warayoꞌ pia itîrîꞌpîiya 5.000 pîrata enaꞌpî kaisarî. Moropai tiaron pia itîrîꞌpîiya 2.000 kaisarî, pîrata enaꞌpî. Moropai tiaron pia itîrîꞌpîiya 1.000 kaisarî, pîrata enaꞌpî. Mîrîrî tîpo mîîkîrî wîtîꞌpî."

¹⁶ Mîîkîrî eꞌmaiꞌnon warayoꞌ 5.000 kaisarî pîrata enaꞌpî yapisîtîpon epaꞌkaꞌpî yenyakaꞌmai moropai mîîkîrîya mîrîrî ke tiaron 5.000 kaisarî eporîꞌpî."

¹⁷ Mîrîrî warantî nîrî mîîkîrî 2.000 kaisarî yapisîtîponya yenyakaꞌmaꞌpî. Moropai tiaron eporîꞌpîiya mîrîrî ke 2.000 kaisarî."

¹⁸ Tîîse tiaron warayoꞌ 1.000 kaisarî pîrata enaꞌpî yapisîtîpon epaꞌkaꞌpî. Moropai aꞌta yakaꞌpîiya non yai. Moropai mîrîrî tîkaraiwarî tîniru yuꞌnaꞌtîꞌpîiya non yaꞌ.

"

¹⁹ Moropai kureꞌne tîîkoꞌmamî tîpo, toꞌ karaiwarî ennaꞌpoꞌpî. Moropai toꞌ nîkupîꞌpî anepuꞌpai awanîꞌpî, toꞌ eesenyakaꞌmaꞌpî konekapa kaiꞌma toꞌ yarakkîrî."

²⁰ Mîrîrî yeꞌnen mîîkîrî eꞌmaiꞌnon 5.000 kaisarî pîrata enaꞌpî yapisîtîpon erepamîꞌpî iipia, moropai 10.000 kaisarî tînirurîꞌpî rumakaꞌpîiya. Taꞌpîiya: “Seeniꞌ manniꞌ uupia itîrîya neꞌtîkini, 5.000 pîrata enaꞌpî ke tiaron eporîꞌpîuya 5.000 kaisarî”, taꞌpîiya tîkaraiwarî pîꞌ."

²¹ Mîîkîrî pîꞌ taꞌpî ikaraiwarîya: “Morî pe puꞌkuru man, innape yairî puꞌkuru ikonekasaꞌya nai”, taꞌpîiya. “Mîrîrî yeꞌnen aapia tuꞌkan ankoꞌmannîpî ton tîrîuya, morî pe eesenyakaꞌmasaꞌ yeꞌnen. Mararon tîrîꞌpîuya aapia, tîîse morî pe yenyakaꞌmasaꞌya nai. Mîrîrî yeꞌnen asiꞌkî uyarakkîrî aatausinpapa”."

²² Moropai tiaron ipoitîrî 2.000 kaisarî pîrata enaꞌpî yapisîtîpon erepamîꞌpî iipia. Moropai taꞌpîiya tîkaraiwarî pîꞌ: “Uupia 2.000 pîrata enaꞌpî tîrîꞌpîya. Mîrîrî ke seeniꞌ eposauꞌya sîrîrî inîꞌ panpîꞌ 2.000 kaisarî”, taꞌpîiya.

"

²³ Mîîkîrî pîꞌ ikaraiwarîya taꞌpî: “Morî pe puꞌkuru man, upoitîrî”, taꞌpîiya. “Morî pe mararî untîrîꞌpî yenyakaꞌmasaꞌya nai. Mîrîrî yeꞌnen inîꞌ panpîꞌ aapia tuꞌkan tîrîuya, ankoꞌmannîpî ton. Mîrîrî yeꞌnen asiꞌkî uyarakkîrî aatausinpapa”, taꞌpîiya.

"

²⁴ Mîrîrî tîpo tiaron ipoitîrî 1.000 kaisarî pîrata enaꞌpî yapisîtîpon erepamîꞌpî iipia moropai taꞌpîiya: “Ukaraiwarî, ayeseru epuꞌtî pîꞌ wai, ariꞌkeꞌ pe awanî. Mararî eesenyakaꞌma tanne tuꞌke îꞌ eponen pe. Moropai oꞌnon pata îꞌ tîpînse pra miarî imoꞌkanen amîrî mararî pra."

²⁵ Mîrîrî yeꞌnen uurî wanîꞌpî eranneꞌ pe amîrî pîꞌ. Saꞌman amîrî. Mîrîrî yeꞌnen seeniꞌ pîrata ayemanne yuꞌnaꞌtîꞌpîuya itîꞌkauya namai. Mîrîrî manaꞌpouya sîrîrî aapia yapisîꞌpîuya warantîrî”, taꞌpîiya.

"

²⁶ Mîîkîrî pîꞌ taꞌpî ikaraiwarîya: “Amîrî wanî mîrîrî imakuiꞌpî pe, moropai enyaꞌne pe awanî mîrîrî. Anenyakaꞌma pe itîîsaꞌ yenyakaꞌmasaꞌya pra awanî. Epuꞌnen amîrî uyeseru, mararî esenyakaꞌma tanne, tuꞌke îꞌ eponen pe uurî wanî. Moropai îꞌ tîpînse pra îꞌ moꞌkanen pe uurî wanî mararî pra”, taꞌpîiya."

²⁷ “Tîîse îꞌ waniꞌ awanî yeꞌnen mîrîrî utînirurî pîrata enaꞌpî tîrîya pra awanîꞌpî itewîꞌ ta itaponseꞌ pona? Sîrîrî itîîsaꞌya ya ennaꞌposaꞌ yai, inîꞌ panpîꞌ eepansaꞌ tanne eporîuya eꞌpainon” taꞌpî ikaraiwarîya.

Mîrîrî taa tîpo tiaronkon tîpoitîrîtonon winîkîi eeraꞌtîꞌpî moropai taꞌpîiya:"

²⁸ “Mîîkîrî pia manniꞌ pîrata enaꞌpî moꞌkatî. Mîrîrî tîîtî manniꞌ miaꞌ tamîꞌnawîron pîrata enaꞌpî yarakkîron pia”, taꞌpîiya."

²⁹ Tîîse taꞌpî toꞌya: “Îꞌ ton pe see mîîkîrî miaꞌ tamîꞌnawîronya inîꞌ panpîꞌ yapisî?” taꞌpî toꞌya. Moropai toꞌ maimu yuukuꞌpîiya: “Inna, tauya sîrîrî apîꞌnîkon. Manniꞌ tuꞌke panpîꞌ yapisîtîponya yapisî eꞌpai awanî sîrîrî tuꞌke panpîꞌ. Tîîse anîꞌ wanî ya mararon yarakkîrî, mîrîrî konekasaiꞌya pra awanî yeꞌnen iipiapai imoꞌka eꞌpai awanî, îꞌ ton pra aweꞌtoꞌpe”, taꞌpîiya."

³⁰ Moropai taꞌpîiya: “Tarîpai mîîkîrî enyaꞌne imakuiꞌpî pe tîweꞌsen yenumî eꞌpai awanî ewaron ta aweꞌtarumaꞌtîtoꞌpe. Mîîkîrî karau mararî pra miarî teekon tîpaꞌtîi”, taꞌpîiya toꞌ pîꞌ —taꞌpî Jesusya.

"

³¹ Jesusya teeseurîmatoꞌ yaretîꞌkaꞌpî see warantî: —Îꞌ pensa uurî kaꞌ poinon iipîꞌpî erepamî ya inîꞌrî, ipîkku pe, rei pe, tamîꞌnawîronkon upoitîrîtonon inserîyamîꞌ pokonpe uuipî. Uyaponseꞌ pona teereutai uuipî pe man pemonkonyamîꞌ esaꞌ pe."

³² Mîrîrî yai tamîꞌnawîronkon pemonkonyamîꞌ pata ponkon emurukuntî kupî sîrîrî urawîrî. Uurîya pemonkonyamîꞌ menka pe man, manniꞌ carneiroyamîꞌ eraꞌmanenya bodeyamîꞌ menka carneiroyamîꞌ koreꞌtapai teken toꞌ eꞌtoꞌpe warantî."

³³ Toꞌ menkauya yai carneiroyamîꞌ tîrîuya umeruntîri winî. Moropai bodeyamîꞌ tîrîuya kamaiꞌ winî toꞌ eꞌtoꞌpe."

³⁴ Tarîpai mîrîrî yai, uurî, ipîkku ayepurukonya taa kupî sîrîrî inkamoro meruntî winonkon pîꞌ: “Asiꞌtî uupia amîrîꞌnîkon Paapa nîpîikaꞌtîꞌsan asiꞌtî. Aapiaꞌnîkon tîntîrî pe Paapa nîkonekaꞌpî yapiꞌtaneꞌtî. Pena sîrîrî konekaꞌpî Paapaya maasa pata koneka tîuya rawîrî, apataꞌseꞌkon ton konekaꞌpîiya, aapiaꞌnîkon itîrîpa kaiꞌma."

³⁵ Maasa pra emiꞌne wanî tanne uyaꞌreꞌ ton tîrîꞌpîyaꞌnîkon. Moropai tuna aninnîpai wanî tanne uwoꞌpaꞌpîyaꞌnîkon. Moropai ayewîꞌkon ta erepamîꞌpî, anepuꞌtîkon pe pra siꞌma tîîse uyapisîꞌpîyaꞌnîkon ayewîꞌkon ta."

³⁶ Moropai ipon pra uurî wanîꞌpî tîîse upon ton tîrîꞌpîyaꞌnîkon. Moropai priꞌya pra wanî tanne upîꞌ eesenyakaꞌmaꞌpîkon. Moropai amaꞌyeꞌkon atarakkantoꞌ ta wanî tanne, uyeraꞌmapîꞌse attîꞌpîkon”.

"

³⁷ Mîrîrî taiya manniꞌ ekaranmapo inkamoro morîkonya. Taa toꞌya: “Anna yepotorî, îꞌ pensa see emiꞌne awanî tanne, ayaꞌreꞌ ton tîrîꞌpî annaya? Moropai tuna aninnîpai awanî tanne awoꞌpaꞌpî annaya?"

³⁸ Anna yepotorî, îꞌ pensa see kaꞌran pe awanî tanne, anna nepuꞌtî pe pra awanî tanne, ayapisîꞌpî annaya anna yewîꞌ ta? Moropai îꞌ pensa ipon pra awanî eraꞌmaꞌpî annaya apon ton tîrîꞌpî annaya?” taa toꞌya."

³⁹ “Moropai îꞌ pensa see amîrî eraꞌmaꞌpî annaya priꞌya pra apîꞌ anna esenyakaꞌmatoꞌpe? Moropai îꞌ pensa amaꞌyeꞌkon atarakkantoꞌ yewîꞌ ta awanî tanne ayeraꞌmapîꞌse anna wîtîꞌpî?”"

⁴⁰ Mîrîrî yai ayepurukonya yuuku: “Tauya sîrîrî apîꞌnîkon, mîrîrî kupîꞌpîyaꞌnîkon manniꞌkan uyaꞌmiꞌsan pîꞌ moropai uyonpayamîꞌ pîꞌ. Tîîse inkamoro pîꞌ pra ikupîꞌpîyaꞌnîkon tîîse upîꞌ” taiya.

"

⁴¹ Mîrîrî yai taa ayepurukonya kupî sîrîrî, manniꞌkan kamaiꞌ winonkon pîꞌ: “Uupiapai atarimatî amîrîꞌnîkon Paapa nîtîrî anapiꞌpaiꞌnîkon pepîn, atîtî ituꞌse awanîꞌpîkon apoꞌ yaꞌ. Mîrîrî apoꞌ Paapa nîkupîꞌpî makui moropai ipemonkonoyamîꞌ itansuriyamîꞌ pataꞌseꞌ pe. Mîrîrî yaꞌ atîtî”, tauya."

⁴² “Maasa pra emiꞌne wanî tanne, uyaꞌreꞌ ton tîîsaꞌyaꞌnîkon pra naatîi. Moropai tuna aninnîpai wanî tanne uwoꞌpasaꞌyaꞌnîkon pra naatîi."

⁴³ Moropai uyapiꞌsaꞌyaꞌnîkon pra naatîi ayewîꞌkon ta kaꞌran pe wanî yeꞌnen. Moropai ipon pra eꞌtarumaꞌtî tanne, upon ton tîîsaꞌyaꞌnîkon pra naatîi. Moropai priꞌya pra wanî tanne, moropai amaꞌyeꞌkon atarakkantoꞌ ta wanî tanne, uyeraꞌmapîꞌse attîsaꞌkon pra naatîi”.

"

⁴⁴ Mîrîrî pîꞌ ekaranmapo toꞌya kupî sîrîrî: “Anna Yepotorî, îꞌ pensa see emiꞌne awanî eraꞌmaꞌpî annaya? Moropai tuna aninnîpai awanî eraꞌmaꞌpî annaya? Moropai îꞌ pensa anna yewîꞌ ta eerepamîꞌpî anna nepuꞌtî pe pra siꞌma? Moropai îꞌ pensa ipon pra awanî eraꞌmaꞌpî annaya? Moropai îꞌ pensa priꞌya pra awanîꞌpî, îꞌ pensa amaꞌyeꞌkon atarakkantoꞌ ta awanî tanne, ayeraꞌmapîtî annaya pra awanîꞌpî?” taa toꞌya.

"

⁴⁵ Ayepurukonya yuuku pe man: “Yairî tauya sîrîrî amîrîꞌnîkon pîꞌ. Tuꞌke iteꞌka insanan pemonkonyamîꞌ ipîikaꞌtîpainokon pîikaꞌtîsaꞌyaꞌnîkon pra naatîi, nem tiwinan ipîkku pepîn pîikaꞌtîsaꞌyaꞌnîkon pra naatîi. Inkamoro pepîn neken tîîse uurî pîikaꞌtîsaꞌyaꞌnîkon pepîn mîrîrî”.

"

⁴⁶ Sîrîrî warantî Jesusya teeseurîmatoꞌ yaretîꞌkaꞌpî. —Mîrîrî yeꞌnen insamoro wîtî pe man uupiapai, ipatîkarî toꞌ eꞌtarumaꞌtîtoꞌpe. Tîîse morîkon wîtî pe man uupia ipatîkarî enen toꞌ koꞌmannîtoꞌpe —taꞌpî Jesusya.

"

26

¹ Sîrîrî warantî pemonkonyamîꞌ yenupa tîpo, Jesusya taꞌpî tînenupaꞌsan pîꞌ:"

² —Epuꞌtî pîꞌ naatî tarîpai asakîꞌne wei tîpo entamoꞌkantoꞌ weiyu wanî, iteseꞌ páscoa —taꞌpîiya. —Mîrîrî yai uurî, kaꞌ poi iipîꞌpî rumaka toꞌya uyeyatonon pia, pakîꞌnan pona ipokapîꞌtoꞌpe toꞌya.

"

³ Mîrîrî tanne teepîremasanon esanon moropai Judeuyamîꞌ yeꞌmaiꞌnorîꞌsan eperepîꞌpî tepotorîkon Caifás yewîꞌ ta."

⁴ Inkamoroya taꞌpî: —Amaꞌ pe Jesus yapiꞌpai awanî sîrîrî iwîtoꞌpe, eraꞌma arinîkonya pra tîîse —taꞌpî toꞌya.

"

⁵ —Tîîse festa weiyu yai, sîrîrî kuꞌpai pra awanî sîrîrî. Maasa pra mîrîrî yai ikupîꞌnîkon ya, pemonkonyamîꞌ ekoreꞌma eserîke man uwinîkîiꞌnîkon —taꞌpî toꞌya.

"

⁶ Jesus wanîꞌpî pemonkonyamîꞌ koꞌmantoꞌ pata Betânia po leproso iteseꞌ paran pîꞌ siꞌpî Simão yewîꞌ ta."

⁷ Miarî wîriꞌ erepamîꞌpî Jesus pia. Mîîkîrî eꞌrennukuꞌpî aminke pra iipia. Mîîkîrîya karaꞌ aꞌpusin yenseꞌ eneꞌsaꞌ wanîꞌpî tenyaꞌ, non kaꞌsaꞌ iteseꞌ alabastro. Mîrîrî yaꞌ aꞌpusin wanîꞌpî intapîkîrî. Mîrîrî wanîꞌpî epeꞌke pe puꞌkuru moropai Jesus entamoꞌka tanne, wîriꞌya iꞌkanpîtîꞌpî ipuꞌpai pona.

"

⁸ Mîrîrî kupî wîriꞌya eraꞌma tîuyaꞌnîkon pe, Jesus nenupaꞌsan ekoreꞌmaꞌpî ipîꞌ. Moropai mîîkîrî ekaranmapoꞌpî toꞌya: —Îꞌ ton pe see mîrîrî aꞌpusin kanpîtîya mîrîrî, îꞌ pe pra rî?"

⁹ Mîîkîrî wîriꞌ pîꞌ taꞌpî toꞌya: —Mîrîrî iꞌkanpîtîya manniꞌ aꞌpusin, mîrîrî ke aweꞌrepa eꞌpainon seꞌ tapairî tîmaꞌtînîꞌse pra. Tîniru yapisîya eꞌpainon mararî pra, moropai mîrîrî ke tîweꞌtarumaꞌtîsanon pîikaꞌtî eꞌpainon —taꞌpî toꞌya.

"

¹⁰ Tîîse mîrîrî taa toꞌya epuꞌtîꞌpî Jesusya. Moropai taꞌpîiya toꞌ pîꞌ: —Îꞌ waniꞌ wanî yeꞌnen yairî maꞌre wîriꞌ kupî yuꞌse awanîkon mîrîrî? Mîrîrî ikupîiya manniꞌ wanî mîrîrî morî pe puꞌkuru uurî ton pe —taꞌpîiya."

¹¹ —Îꞌ ton pînon saꞌne wanî mîrîrî wei kaisarî aapiaꞌnîkon. ˻Inkamoro anpîikaꞌtîpai awanîkon ya, morî tîrîyaꞌnîkon eꞌpainon.˼ Tîîse uurî kaane, aapiaꞌnîkon uukoꞌmamî pepîn."

¹² Mîrîrî ikuꞌsaiꞌya manniꞌ wanî mîrîrî Judeuyamîꞌya isaꞌmantaꞌpî karapaima manniꞌ warantî. Mîrîrî epuꞌtî pîꞌ naatîi. Ukarapaimasaiꞌya mîrîrî uusaꞌmantasaꞌ yuꞌnaꞌtî toꞌya rawîrî."

¹³ Ayenkuꞌtîuyaꞌnîkon pepîn. Oꞌnon pata Paapa maimu ekaremekî toꞌya eseta ya mîserî wîriꞌ nîkupîꞌpî nîrî yekare eseta. Moropai mîîkîrî pîꞌ toꞌ enpenata —taꞌpî Jesusya.

"

¹⁴ Mîrîrî tîpo asakîꞌne puꞌ pona tîîmoꞌtaiꞌnîkon Jesus nenupaꞌsan yonpa wîtîꞌpî iteseꞌ Judas Iscariotes eseurîmai teepîremasanon esanon yarakkîrî."

¹⁵ Moropai mîîkîrîya taꞌpî toꞌ pîꞌ: —Îꞌ warapo kaisarî uyeꞌmaya eꞌpainon aapiaꞌnîkon Jesus rumakauya ya? —taꞌpîiya. Teepîremasanon esanonya taꞌpî: —30 prata enaꞌpî kaisarî ayeꞌma annaya —taꞌpî toꞌya. Moropai mîrîrî tîrîꞌpî toꞌya iipia."

¹⁶ Mîrîrî patapai îꞌ kaiꞌma Jesus yapisî tîuya amaꞌ pe yuwaꞌpî Judasya inkamoro pia irumakapa.

"

¹⁷ Eꞌmaiꞌnon wei yai, isaꞌmotoꞌ ton pîn trigo puusaꞌ yaku tîuyaꞌnîkon rawîrî, Jesus nenupaꞌsan erepamîꞌpî iipia ekaranmapoi. —Oꞌnon pata see entamoꞌkantoꞌ páscoa koneka annaya eꞌpainon? —taꞌpî toꞌya.

"

¹⁸ Jesusya inkamoro maimu yuukuꞌpî moropai taꞌpîiya: —Atîtî cidade pona. Miarî eerepansaꞌkon pe, warayoꞌ wîttî esaꞌ mîwatîi. Moropai makatîi ipîꞌ: “Uyenupanenkonya anna yarimasaꞌ sîrîrî upataꞌseꞌ ton yuꞌse wai ayewîꞌ ta, moro unenupaꞌsan yarakkîrî entamoꞌkatoꞌpe páscoa pîꞌ, maasa pra uweiyu eseposaꞌ man, taa pîꞌ uyenupanenkon man”, makatîi —taꞌpîiya.

"

¹⁹ Moropai inenupaꞌsanya tîwentamoꞌkatoꞌkon ton konekaꞌpî miarî taꞌpî Jesusya yawîrî. Páscoa konekaꞌpî toꞌya.

"

²⁰ Moropai pata ewaronpamî pe, Jesus moropai inenupaꞌsan ereutaꞌpî mesa pona tîwentamoꞌkakonpa kaiꞌma.

"

²¹ Mîrîrî pe rî tîwentamoꞌkakon yeꞌka pe, Jesusya taꞌpî tînenupaꞌsan pîꞌ: —Yairî tauya sîrîrî apîꞌnîkon. Amîrîꞌnîkon koreꞌtawonya uyekaremekî pe man uyeyatonon pîꞌ.

"

²² Mîrîrî taa Jesusya yeꞌnen, inenupaꞌsan enaꞌpî yairî maꞌre mararî pra. Mîrîrî yeꞌnen tîîwarîrîꞌnîkon toꞌ esekaranmapopîtîꞌpî tiwin pîꞌ. Moropai taꞌpî toꞌya Jesus pîꞌ: —Uurîya mîrîrî kupî pepîn eꞌpainon? Innape nai? —taꞌpî toꞌya.

"

²³ Tîîse Jesusya yuukuꞌpî. Taꞌpîiya: —Tiwinan ayonpakon uyarakkîrî tiwinan pratopon yanîiya, manniꞌya uyekaremekî kupî sîrîrî uyeyatonon pîꞌ, mîîkîrî uyarakkîrî tekkari yonpaiya manniꞌya."

²⁴ Mîrîrî warantî uurî, kaꞌ poi iipîꞌpî saꞌmanta eꞌpai awanî sîrîrî. Paapa maimu eꞌmenukasaꞌya taasaꞌ yawîrî. Tîîse aka mîîkîrî uurî kaꞌ poi iipîꞌpî rumakatîpon uyeyatonon yenyaꞌ. Mîîkîrî saꞌne yenposaꞌ isanya pra awanî ya, morî pe panpîꞌ awanî eꞌpainon. Maasa pra aweꞌtarumaꞌtî pepîn eꞌpainon."

²⁵ Mîrîrî taiya yeꞌnen mîîkîrî Judasya Jesus ekaranmapoꞌpî: —Yai pra uurî pîꞌ taaya, uyenupanen, innape nai? —Amîrî pe awanî yeꞌnen taaya mîrîrî —taꞌpî Jesusya Judas pîꞌ.

"

²⁶ Tîwentamoꞌkakon yeꞌka pe, Jesusya trigo puusaꞌ yapisîꞌpî tenyaꞌ moropai eepîremaꞌpî. Taꞌpîiya: —Morî puꞌkuru amîrî, uyun. Anna yuu ton tîrî pîꞌ nai —taꞌpîiya Paapa pîꞌ. Mîrîrî tîpo ipîrikkapîtîꞌpîiya. Moropai itîrîꞌpîiya toꞌ kaisarî. Itîrî tîuya pe taꞌpîiya: —Maa, sîrîrî yapiꞌtî. Moropai yaꞌtî, maasa pra sîrîrî wanî upun pe.

"

²⁷ Moropai mîrîrî tîpo uva yekku yenseꞌ pisa yapisîꞌpîiya. Moropai eepîremaꞌpî. —Morî puꞌkuru amîrî, uyun. Anna wuku ton tîrî pîꞌ nai —taꞌpîiya Paapa pîꞌ. Mîrîrî tîpo itîrîꞌpîiya toꞌ kaisarî. Taꞌpîiya toꞌ pîꞌ: —Sîrîrî enîꞌtî tamîꞌnawîrî siꞌma. Moropai tamîꞌnawîronkonya enîrîꞌpî."

²⁸ Jesusya taꞌpî: —Sîrîrî wanî sîrîrî umînî. Tuꞌkankon nîkupîꞌpî imakuiꞌpî yepeꞌ pe iꞌkamouya kupî sîrîrî. Mîrîrî wenai Paapaya tuꞌkankon nîkupîꞌpî kupî eꞌpainon tîîwanmîra, ekaremekîꞌpî tîuya yawîrî —taꞌpîiya."

²⁹ —Tauya sîrîrî apîꞌnîkon. Inîꞌrî uva yekku enîrîuya pepîn kupî sîrîrî apokonpeꞌnîkon tamîꞌnawîron esaꞌ pe tîwanî Paapaya yenpo pîkîrî. Mîrîrî yai amenan uva yekku enîrîuya apokonpeꞌnîkon inîꞌrî —taꞌpîiya.

"

³⁰ Mîrîrî tîpo toꞌ eserenkaꞌpî Paapa yapurî pe. Moropai toꞌ wîtîꞌpî Oliveira yeꞌka kîrî pona.

"

³¹ Moropai Jesusya taꞌpî toꞌ pîꞌ: —Sîrîrîpe ewaron ya, eranneꞌ pe awanîkon wenai, tamîꞌnawîrî eepekon pe naatîi. Moropai urumakayaꞌnîkon pe naatîi, Paapa maimu eꞌmenukasaꞌya taasaꞌ yawîrî. Pena Paapaya taꞌpî:

“Carneiroyamîꞌ eraꞌmanen wîuya yai,
ineraꞌmakon carneiroyamîꞌ eꞌparaipîka kupî sîrîrî,”
taꞌpî Paapaya pena. Tîpîꞌ Jesus eseurîmaꞌpî."

³² —Tîîse uusaꞌmanta tîpo, Paapaya uꞌmîꞌsaꞌkasaꞌ yai, arawîrîꞌnîkon uutî Galiléia pona —taꞌpî Jesusya toꞌ pîꞌ.

"

³³ Mîrîrî taa Jesusya yuukuꞌpî Pedroya: —Tamîꞌnawîronkonya arumaka eꞌpainon eranneꞌ pe tîwanîkon wenai, tîîse uurîya arumaka pepîn, Uyepotorî. Tîîse tiaronkonya neken ikupî.

"

³⁴ Tîîse Jesusya taꞌpî ipîꞌ: —Kaane Pedro, ayenkuꞌtîuya pepîn. Sîrîrîpe ewaron ya, maasa eꞌmaiꞌ pe kariwana yunkon etun rawîrî taaya pe nai. Ayekaranmapo toꞌya ya, seurîwîꞌne iteꞌka “unepuꞌtî pepîn”, taaya pe nai —taꞌpî Jesusya.

"

³⁵ Tîîse Pedroya yuukuꞌpî: —Unepuꞌtî pepîn mîîkîrî Jesus tauya pepîn. Awî toꞌya ya, uurî nîrî tîwî uwî toꞌya —taꞌpîiya.

Moropai tamîꞌnawîronkonya nîrî mîrîrî warantî taꞌpî Jesus pîꞌ.

"

³⁶ Moropai Jesus wîtîꞌpî inenupaꞌsan pokonpe. Eewomîꞌpî jardim iteseꞌ Getsêmani yaꞌ moropai taꞌpîiya: —Maasa tarî eꞌtî, epîremai uutî tanne sinpata —taꞌpîiya tînenupaꞌsan pîꞌ.

"

³⁷ Mîîkîrîya Pedro yarîꞌpî moropai Zebedeu munkîyamîꞌ yarîꞌpî takon yarakkîrî. Mîrîrî yai Jesus esewankonoꞌmaꞌpî mararî pra. Ipîra yairî maꞌre awanîꞌpî."

³⁸ Moropai taꞌpîiya: —Esewankonoꞌmatoꞌya uyewan yannîꞌsaꞌ man. Mîrîrîya uwî pe man —taꞌpîiya. —Maasa tarî eꞌtî tîwarî panpîꞌ eꞌtî unîmîkî pîꞌ akoꞌmantî.

"

³⁹ Inkamoro piapai mîîkîrî atarimaꞌpî mararî. Moropai non ekaya tenpata enuꞌtîꞌpîiya, eepîremaꞌpî. Taꞌpîiya: —Uyun, tamîꞌnawîron kupîya eꞌpainon. Upîikaꞌtîkî eꞌtarumaꞌtî namai. Tîîse ituꞌse wanî yawîrî kîꞌkupîi. Ituꞌse awanî yawîrî neken ikuꞌkî —taꞌpîiya Paapa pîꞌ.

"

⁴⁰ Moropai awennaꞌpoꞌpî inkamoro eseurîwîꞌnankon pia. Inkamoro tînenupaꞌsan wetun tanne, toꞌ eporîꞌpîiya. Moropai taꞌpîiya Pedro pîꞌ: —Awetunkon mîrîrî tîwarî aakoꞌmamîkon eserîke pra naatî? Mararî rî tiwin hora kaisarî aakoꞌmamîkon eserîke pra naatî? —taꞌpîiya."

⁴¹ —Tîwarî akoꞌmantî moropai epîrematî. Paapa yarakkîrî eseurîmatî, makuiya imakuiꞌpî kupîyaꞌnîkon emapuꞌtî namai. Ayewankon yaꞌ Paapa maimu yawîrî ikoꞌmanpai awanîkon. Tîîse ikupîyaꞌnîkon eserîke pra awanîkon aꞌtuꞌmîra awanîkon yeꞌnen.

"

⁴² Moropai inîꞌrî itakon iteꞌka pe, attîꞌpî epîremai, Paapa yarakkîrî eseurîmai. Taꞌpîiya: —Paapa, eꞌtarumaꞌtî namai upîikaꞌtîkî. Tîîse mîrîrî yuꞌse pra awanî ya, îꞌ ituꞌse awanî manniꞌ yawîrî ikuꞌkî —taꞌpîiya.

"

⁴³ Mîîkîrîya tîwennaꞌposaꞌ pe, inîꞌrî toꞌ wetun tanne toꞌ eporîꞌpî. Maasa pra mararî pra iweꞌnunpai toꞌ wanîꞌpî mîîtoꞌpe. Mararî ipokonpe toꞌ wanî eserîke pra."

⁴⁴ Iteseurîno iteꞌka pe, Jesus wîtîꞌpî toꞌ piapai epîremai. Moropai eꞌmaiꞌ pe teepîremaꞌpî warantî taꞌpîiya.

"

⁴⁵ Moropai awennaꞌpoꞌpî inîꞌrî toꞌ pia. Inkamoro ekaranmapoꞌpîiya: —Sîrîrî tîpose awetunkon koꞌmannîpî mîrîrî? Aasîrî man, aaseꞌnîkon, wîtîꞌnîkon. Sîrîrî puꞌkuru uurî, kaꞌ poi iipîꞌpî rumakatoꞌ toꞌya weiyu eseponî pîꞌ man imakuiꞌsan yenyaꞌ."

⁴⁶ Eꞌmîꞌsaꞌkatî aaseꞌnîkon wîtîn. Aꞌkî, mîîkîrî warayoꞌ iipî eraꞌmatî uyeyatonon pia utîrî ton —taꞌpî Jesusya.

"

⁴⁷ Jesus eseurîma tanne, tiwinan inenupaꞌsan yonpa, Judas, erepamîꞌpî. Teepîremasanon esanonkon moropai Judeuyamîꞌ panamanenan narimaꞌsan erepamîꞌpî ipokonpe. Arinîke pemonkonyamîꞌ erepamîꞌpî tetawaraikon, moropai tîtaikapukon yarakkîrî."

⁴⁸ Mîîkîrî Judasya taasaꞌ wanîꞌpî inkamoro Jesus yeyatonon pîꞌ. Manniꞌ warayoꞌ yuꞌnauya eraꞌmayaꞌnîkon ya, mîîkîrî anapisîkon ton. Mapiꞌtîi taasaiꞌya wanîꞌpî."

⁴⁹ Moropai teerepamî pe, Judas wîtîꞌpî Jesus pia. Moropai taꞌpîiya:

—Uyenupanen, tîwanmîn wanî mîîtî aapia —taa yeꞌka pe, Jesus yuꞌnaꞌpîiya itenpata yai."

⁵⁰ Jesusya imaimu yuukuꞌpî. Taꞌpî Jesusya: —Uyonpa, îꞌ ankuꞌpai awanî ya uyarakkîrî ikuꞌkî kaꞌneꞌ pe. Moropai Judas ponkon pe iipîꞌsanya Jesus yapisîꞌpî."

⁵¹ Mîrîrî kupî toꞌya eraꞌma tîuyaꞌnîkon pe, Jesus nenupaꞌsan yonpaya tetawarai moꞌkaꞌpî. Moropai teepîremasanon esanon yepotorî poitîrî pana yaꞌtîꞌpîiya."

⁵² Tîîse Jesusya taꞌpî: —Kaane, mîrîrî warantî pra, ayetawarai yekaꞌmakî iwon yaꞌ. Maasa pra etawara ke epîpainon wanî ya, mîîkîrî saꞌmanta eꞌpai awanî etawara kamo pe —taꞌpî Jesusya."

⁵³ —Uyun pîꞌ upîikaꞌtînenkon ton esatîuya ya, yarimaiya pra awanî kaiꞌma eesenumenkakon mîrîrî? Toꞌ esatîuya eꞌpainon ipîꞌ. Moropai kaꞌneꞌ pe arinîkon inserîyamîꞌ yarima uyunya eꞌpainon."

⁵⁴ Tîîse esatîuya eꞌpai pra awanî. Maasa pra sîrîrî warantî aweꞌkupî pe man kaiꞌma, Paapa maimu eꞌmenukasaꞌ yeꞌnen. Mîrîrî eꞌkupî pe man taasaiꞌya yawîrî.

"

⁵⁵ Moropai Jesusya taꞌpî inkamoro pemonkonyamîꞌ pîꞌ: —Uyapiꞌse aaiꞌsaꞌkon sîrîrî akasuparaikon moropai akaitapukon yarakkîrî, manniꞌ pemonkon wîîtîpon yapisî toꞌya warantî. Teuren wei kaisarî akoreꞌtaꞌnîkon wanî tanne, ayenupakon pîꞌ epîremantoꞌ yewîꞌ ta, mîrîrî kuꞌsaꞌyaꞌnîkon pra naatîi uyapisîkonpa."

⁵⁶ Tîîse tamîꞌnawîrî sîrîrî eꞌkupî sîrîrî maasa pra penaronkon Paapa maimu ekaremeꞌnenan profetayamîꞌ nurîꞌsanya imenukaꞌpî yawîrî.

Mîrîrî taa Jesusya pe, inenupaꞌsanya Jesus rumakaꞌpî moropai iipiapai toꞌ wîtîꞌpî. Toꞌ epeꞌpî.

"

⁵⁷ Inkamoro Jesus yapisîtîponkonya yarîꞌpî teepîremasanon esanon yepotorî Caifás pia. Miarî toꞌ epereꞌsaꞌ wanîꞌpî. Moisés nurîꞌtî yenupatoꞌ pîꞌ yenupatonkon moropai Judeuyamîꞌ panamanenan inkamoro epereꞌsaꞌ wanîꞌpî moro."

⁵⁸ Tîîse Pedro wîtîꞌpî aminke Jesus pîꞌ toꞌ yeꞌmaꞌpî pîꞌ. Teepîremasanon esanon yepotorî yewîꞌ eporî tîuya pîkîrî. Mîîkîrî eꞌnîmîꞌpî poro po surarayamîꞌ pokonpe miarî siꞌma îꞌ kupî toꞌya eraꞌmapa kaiꞌma."

⁵⁹ Imakuiꞌpî pe Jesus winîkîi teeseurîmasen ton pemonkon yuwaꞌpî teepîremasanon esanonya, moropai tamîꞌnawîronkon ipîkkukon Judeuyamîꞌ yepotorîtononya. Innape Jesus nîkupîꞌpî ekaremekî toꞌya ya, iwîkonpa kaiꞌma yuwaꞌpî toꞌya."

⁶⁰ Tîîse mîrîrî warantî toꞌ eseurîma pra awanîꞌpî Jesus winîkîi. Teuren arinîkon eseurîmaꞌpî seruꞌ pe iwinîkîi. Tîîse asakîꞌnankonya îꞌ taꞌpî Jesusya ekaremekî tuꞌkaꞌpî."

⁶¹ Moropai taꞌpî toꞌya: —See warantî taꞌpîiya epîremantoꞌ yewîꞌ pîꞌ: “Seeniꞌ epîremantoꞌ yewîꞌ konekaꞌpî pemonkonyamîꞌya. Tîîse yarankauya kupî sîrîrî. Moropai iꞌmîꞌsaꞌkauya inîꞌrî eseurîwîꞌne wei tîpo”, taꞌpîiya —taꞌpî toꞌya teepîremasanon esanon pîꞌ.

"

⁶² Mîrîrî ya, Jesus eseurîmasaꞌ eta tîuya pe, teepîremasanon esanon yepotorî eꞌmîꞌsaꞌkaꞌpî. Moropai Jesus ekaranmapoꞌpîiya: —Aꞌkî imakuiꞌpî pe insanan warayoꞌkon eseurîman pîꞌ man apîꞌ, îꞌ kaiꞌma awanî pe nan? —taꞌpîiya."

⁶³ Tîîse Jesus wanîꞌpî moo îꞌ taiya pra. Inîꞌrî teepîremasanon esanon yepotorîya Jesus ekaranmapoꞌpî: —Inna, Paapa kaꞌ pon eseꞌ pîꞌ taaya yuꞌse wanî sîrîrî. Amîrî Paapa nîmenkaꞌpî Cristo, Paapa munmu amîrî?

"

⁶⁴ Jesusya yuukuꞌpî: —Inna, amîrîya taa mîrîrî. Tîîse tauya sîrîrî apîꞌnîkon, maasa amîrîꞌnîkonya uurî kaꞌ poi iipîꞌpî ereutasaꞌ eraꞌma kupî sîrîrî Paapa meruntîri winî. Îꞌ pensa sîrîrî non pona uuipî yai, katupuru po autî eraꞌmayaꞌnîkon kupî sîrîrî.

"

⁶⁵ Mîrîrî taa Jesusya eta tîuya pe, teepîremasanon esanon yepotorî ekoreꞌmaꞌpî mararî pra. Mîrîrî yeꞌnen tîpon karakaꞌpîiya teesewankonoꞌmasaꞌ warantî tîweꞌkuꞌse. Moropai taꞌpîiya: —Innape man. Paapa pe eꞌkuꞌnî pîꞌ man. Inîꞌrî anîꞌ yuwapai pra man iteseru pîꞌ teeseurîmasen ton. Maasa pra aasîrî imakuiꞌpî pe eseurîman pîꞌ man Paapa winîkîi. Eeseurîma eta pîꞌ naatîi."

⁶⁶ Îꞌ yeꞌka pe mîserî kuꞌpai nai? —taꞌpîiya toꞌ pîꞌ. Yuukuꞌpî toꞌya: —Iwîpai awanî mîrîrî, enen awanî eꞌpai pra man —taꞌpî toꞌya.

"

⁶⁷ Moropai mîrîrî taa tîpo, tiaronkonya tetakukon yenumîꞌpî itenpata pona. Moropai ipaꞌtîpîtîꞌpî toꞌya."

⁶⁸ Ipaꞌtîpîtî yeꞌka pe taꞌpî toꞌya: —Anîꞌya apaꞌtîsaꞌ pe awanî epuꞌkî, innape Paapa nîmenkaꞌpî pe awanî ya —taꞌpî toꞌya ipîꞌ.

"

⁶⁹ Mîrîrî tanne Pedro ereutasaꞌ wanîꞌpî poro po wîttî iwaꞌtoꞌ pona. Moro tîîse teepîremasanon esanon poitîrîpaꞌ iipîꞌpî iipia. Moropai taꞌpîiya ipîꞌ: —Amîrî nîrî wanîꞌpî mîîkîrî Jesus Nazaré poinon yarakkîrî?

"

⁷⁰ Tîîse Pedroya iwapuꞌtîꞌpî tamîꞌnawîronkon rawîrî siꞌma. Taꞌpîiya: —Anîꞌ pîꞌ eeseurîmakon epuꞌtîuya pra wai."

⁷¹ Moropai Pedro moꞌtaꞌpî wîttî iwaꞌtoꞌ manaꞌta pia. Inîꞌrî tiaron toꞌ poitîrîpaꞌya eraꞌmaꞌpî moropai taꞌpîiya moro tîweꞌsanon pîꞌ, warayoꞌkon pîꞌ: —Mîîkîrî wanîꞌpî Jesus Nazaré pon yarakkîrî —taꞌpîiya.

"

⁷² Mîrîrî pîꞌ Pedroya taꞌpî itakon teꞌka pe: —Unepuꞌtî pepîn mîîkîrî. Useruku pepîn sîrîrî, Paapaya uyeraꞌma pîꞌ man. Seruꞌyeꞌ pe pra wanî.

"

⁷³ Mararî tîîkoꞌmamîkon tîpo, moro tîweꞌsanon eꞌrennukuꞌpî inîꞌrî Pedro pia. Moropai taꞌpî toꞌya: —Maasa pra eeseurîmatoꞌya mîîkîrî yonpa pe awanî ekaremekî, iwarantî eeseurîma yeꞌnen.

"

⁷⁴ Mîrîrî pîꞌ taꞌpî Pedroya: —Seruꞌ pe pra tauya sîrîrî, unepuꞌtî pepîn mîîkîrî warayoꞌ. Seruꞌ pe eseurîma ya, Paapaya utarumaꞌtî eꞌpainon.

Mîrîrî taiya tanne, kariwana yunkon eꞌnaꞌpî."

⁷⁵ Moropai Pedro enpenataꞌpî îꞌ kaiꞌma taꞌpî Jesusya pîꞌ. Maasa pra taꞌpîiya: —Eꞌmaiꞌ pe kariwana yunkon etun rawîrî, unepuꞌtî pepîn mîîkîrî, taaya kupî sîrîrî eseurîwîꞌne iteꞌka —taꞌpîiya ipîꞌ.

Mîrîrî tîpo Pedro epaꞌkaꞌpî miarî pai. Mararî pra tîkarau yeꞌka pe attîꞌpî.

"

27

¹ Pata erenmapî pe, tamîꞌnawîronkon teepîremasanon esanon, moropai Judeuyamîꞌ panamanenan emurukuntîꞌpî. Îꞌ kaiꞌma Jesus kupî tîuyaꞌnîkon pîꞌ eseurîmai iwîkonpa."

² Moropai inkamoroya surarayamîꞌ yaipontîꞌpî Jesus yaironpîtîtoꞌpe toꞌya. Moropai mîîkîrî rumakaꞌpî toꞌya pata esaꞌ Pilatos pia.

"

³ Mîrîrî warantî Jesus wîî toꞌya epuꞌtî tîuya pe, Judas, Jesus rumakatîpon esewankonoꞌmaꞌpî mararî pra. Moropai mîrîrî wenai Jesus rumakaꞌpî tîuya iteyatonon pia yepeꞌpî tîniru 30 prata enaꞌpî tînapisîꞌpî manaꞌpoꞌpî teepîremasanon esanon pia moropai Judeuyamîꞌ panamanenan pia."

⁴ Taꞌpîiya: —Kureꞌne imakuiꞌpî kuꞌsauꞌya sîrîrî. Maasa pra îꞌ konekatîpon pepîn warayoꞌ tîrumakai aasaꞌmantatoꞌpe —taꞌpî Judasya toꞌ pîꞌ.

Imaimu yuukuꞌpî toꞌya: —Îꞌ waniꞌ kin nai, îꞌ ton pra man anna yarakkîrî. Tîîse amîrî yarakkîrî neken.

"

⁵ Mîrîrî taa toꞌya yeꞌnen, Judasya tîniru papoꞌpî epîremantoꞌ yewîꞌ ta, moropai eepaꞌkaꞌpî. Moropai attîꞌpî, mîîkîrî eꞌmutunukuꞌpî moropai aasaꞌmantaꞌpî.

"

⁶ Mîrîrî tîniru yapisîꞌpî teepîremasanon esanonya moropai mîrîrî pîꞌ taꞌpî toꞌya: —Sîrîrî tîniru wanî pepîn morî pe, uurîꞌnîkonya itîrî ya epîremantoꞌ yewîꞌ pratarî koreꞌta. Maasa pra sîrîrî wanî tîîsaꞌmantasen yepeꞌpî pe itîîsaꞌ —taꞌpî toꞌya."

⁷ Tamîꞌnawîrî mîrîrî pîꞌ teeseurîmakon tîpo mîrîrî tîniru ke tiwin pata yennaꞌpî toꞌya, kamote kaꞌnen pataꞌseꞌ. Mîrîrî pata yaꞌ kaꞌranyamîꞌ saꞌmantasaꞌ yuꞌnaꞌtîtoꞌ ton yennaꞌpî toꞌya."

⁸ Mîrîrî yeꞌnen mîrîrî pata toꞌ nennaꞌpî esatî toꞌya sîrîrî tîpose mîn pataꞌseꞌ kaiꞌma. Maasa pra anîꞌ saꞌmantatoꞌ wenai yennaꞌpî toꞌya.

"

⁹ Sîrîrî warantî penaroꞌ Paapa maimu ekaremeꞌnen profeta Jeremias nurîꞌtîya taasaꞌ yawîrî aweꞌkupîꞌpî.

Inkamoroya tîniru yapisîꞌpî 30 prata enaꞌpî kaisarî. Mîrîrî warapo ayeꞌma annaya taꞌpî Judeuyamîꞌya yawîrî.
"

¹⁰

Moropai mîrîrî ke pata yennaꞌpî toꞌya, kamote kaꞌnen pataꞌseꞌ. Îꞌ kaiꞌma taꞌpî Uyepotorîya yawîrî ikuꞌtoꞌpeuya
taꞌpî profeta Jeremias nurîꞌtîya.

"

¹¹ Mîrîrî tanne, pata esaꞌ Pilatos rawîrî Jesus wanî yai, Pilatosya ekaranmapoꞌpî. Taꞌpîiya: —Amîrî, mîîkîrî Judeuyamîꞌ esaꞌ pe tîweꞌsen? —taꞌpîiya. —Inna, amîrîya taa mîrîrî —taꞌpî Jesusya."

¹² Tîîse inkamoro teepîremasanon esanon, moropai Judeuyamîꞌ panamanenan maimu yuuku Jesusya pra awanîꞌpî."

¹³ Moropai Pilatosya taꞌpî: —Toꞌ maimu yuukuya pepîn. “Mararon pepîn imakuiꞌpî kuꞌsaiꞌya”, taa pîꞌ toꞌ man apîꞌ. Mîrîrî etaya pra nan?

"

¹⁴ Tîîse Jesus eseurîma pra awanîꞌpî. Moropai mîrîrî pîꞌ pata esaꞌ Pilatos wanîꞌpî mararî pra teesenumenkai ipîꞌ.

"

¹⁵ Pilatosya festa, iteseꞌ Páscoa kaisarî, tînarakkamoꞌpî rumaka eꞌpîtîꞌpî atarakkannîtoꞌ tapai. Manniꞌ pemonkonyamîꞌ nesatîꞌpî teseru yaꞌ, mîîkîrî rumakaiya."

¹⁶ Mîrîrî yai atarakkannîtoꞌ ta, tiwin warayoꞌ wanîꞌpî tamîꞌnawîronkon nepuꞌtî Barrabás."

¹⁷ Mîrîrî yai arinîkon pemonkonyamîꞌ emurukuntîꞌsan ekaranmapoꞌpî mîîkîrî pata esaꞌ Pilatosya. —Anîꞌ rumakauya yuꞌse naatî, Jesus Paapa nîmenkaꞌpî, Barrabás kaꞌrî? —taꞌpîiya."

¹⁸ Ipîꞌ tîkinmukon yeꞌnen, Jesus eneꞌsaꞌ toꞌya epuꞌtîꞌpî Pilatosya.

"

¹⁹ Moropai ipîkku pe tîweꞌtoꞌ yaponseꞌ pona Pilatos ereutasaꞌ tanne, inoꞌpîya tîmaimu yarimaꞌpî taatoꞌ see warantî: —Mîîkîrî warayoꞌ winîkîi îꞌ kîꞌkupîi, maasa pra morî puꞌkuru mîîkîrî, îꞌ kupîtîpon pepîn. Maasa pra sîrîrîpe uweꞌneꞌ eꞌtarumaꞌtî pîꞌ wai mararî pra, mîîkîrî wenai —taasaiꞌya wanîꞌpî.

"

²⁰ Tîîse teepîremasanon esanonya taꞌpî moropai Judeuyamîꞌ panamanenanya tamîꞌnawîronkon pîꞌ: —Barrabás rumakaya yuꞌse anna man kaꞌtî ipîꞌ —taꞌpî toꞌya. —Moropai Jesus wîî meꞌpotoꞌpeiya —taꞌpî toꞌya."

²¹ Inîꞌrî pata esaꞌya tamîꞌnawîronkon pemonkonyamîꞌ ekaranmapoꞌpî: —Oꞌnon yeꞌka rumakauya yuꞌse naatî? Yuukuꞌpî toꞌya: —Barrabás rumakakî —kaiꞌma imaimu yuukuꞌpî toꞌya.

"

²² Inîꞌrî Pilatosya taꞌpî toꞌ pîꞌ: —Moriya îꞌ kin kupîuya eꞌpainon mîserî Jesus manniꞌ Cristo tesaꞌsen yarakkîrî? —Pakîꞌnan pona ipokapîtî meꞌpokî —taꞌpî tamîꞌnawîronkonya Pilatos pîꞌ.

"

²³ Pilatosya taꞌpî inîꞌrî toꞌ pîꞌ: —Îꞌ kin imakuiꞌpî inkupîꞌpî moro nai mîîtoꞌpe? —taiya yeꞌnen, tamîꞌnawîronkon entaimepîtîꞌpî —Pakîꞌnan pona ipokapîtî meꞌpokî —taꞌpî toꞌya ipîꞌ.

"

²⁴ Mîrîrî warantî îꞌ koneka tîuya eserîke pra tîwanî Jesus yarakkîrî epuꞌtîꞌpî Pilatosya. Moropai Pilatosya tîpîꞌ pemonkonyamîꞌ ekoreꞌma epuꞌtîꞌpî. Mîrîrî yeꞌnen tuna enepî meꞌpoꞌpîiya. Moropai mîrîrî ke tenya ronaꞌpîiya, îꞌ ton pra tîwanî ekaremekîpa mîîkîrî yarakkîrî, arinîkon pemonkonyamîꞌ rawîrî siꞌma. Moropai taꞌpîiya: —Uurî wanî pepîn mîserî warayoꞌ saꞌmantantoꞌ esaꞌ pe. Tîîse amîrîꞌnîkonya ikupî sîrîrî —taꞌpîiya.

"

²⁵ Moropai tamîꞌnawîronkonya yuukuꞌpî: —Mîîkîrî saꞌmantatoꞌ wenai, tîwî anna pona eꞌtarumaꞌtîntoꞌ nenai, moropai anna munkîyamîꞌ pona eena —taꞌpî toꞌya.

"

²⁶ Mîrîrî taasaꞌ toꞌya pe, Pilatosya Barrabás rumakaꞌpî atarakkannîtoꞌ tapai. Tîîse Jesus poꞌpîꞌtoꞌpe toꞌya taꞌpî Pilatosya pemonkon poꞌpîꞌtoꞌ ke, moropai irumakaꞌpîiya pakîꞌnan pona ipokapîꞌtoꞌpe toꞌya.

"

²⁷ Moropai surarayamîꞌya Jesus yarîꞌpî pata esaꞌ Pilatos yewîꞌ ta. Moropai tamîꞌnawîronkon surarayamîꞌ emurukuntîꞌpî iwoi."

²⁸ Inkamoroya Jesus pon moꞌkaꞌpî ipokon moropai ipataꞌpî yaꞌ tiaron taꞌsankon suuyu yekaꞌmaꞌpî toꞌya, ipon ton."

²⁹ Moropai Jesus yarakko ton konekaꞌpî toꞌya mîꞌnî yeꞌ ke rei yarakko, coroa warantî. Ipîꞌ tîwoꞌmaꞌtakon yeꞌnen, rei pe ikupîꞌpî toꞌya. Moropai rei meꞌsipu yeꞌka tîrîꞌpî toꞌya itenyaꞌ meruntî winî. Mîrîrîkon tîrî tîpo, toꞌ eꞌsekunkaꞌpî irawîrî. Moropai inkamoro woꞌmaꞌta piaꞌtîꞌpî ipîꞌ. Taꞌpî toꞌya: —Anna yepuru pe awanî, Jesus. Amîrî wanî Judeuyamîꞌ esaꞌ pe puꞌkuru awanî rei pe —taꞌpî toꞌya."

³⁰ Mîrîrî taa yeꞌka pe, ipona tetakukon yenumîꞌpî toꞌya. Moropai manniꞌ meꞌsipu moꞌkaꞌpî toꞌya, moropai mîrîrî ke ipaꞌtîpîtîꞌpî toꞌya ipuꞌpai pona."

³¹ Ipîꞌ tîwoꞌmaꞌtakon tîpo, ipon tînekaꞌmaꞌpîkon suuyu moꞌkaꞌpî toꞌya. Moropai ipon puꞌkuru tîmoꞌkaꞌpîkon yekaꞌmaꞌpî toꞌya inîꞌrî. Mîrîrî tîpo Jesus yarîꞌpî toꞌya pakîꞌnan pona ipokapîꞌse.

"

³² Miarî pai teepaꞌkakon pe, warayoꞌ eporîꞌpî toꞌya Simão iteseꞌ, Cirene cidaderî pon. Moropai mîîkîrî pîꞌ taꞌpî toꞌya pakîꞌnan yaatoꞌpeiya mîrîrî Jesus narî."

³³ Moropai toꞌ erepamîꞌpî pataꞌseꞌ iteseꞌ Gólgota. Mîrîrî Gólgota, pemonkon puꞌpai rîꞌpî yepin, taatoꞌ mîrîrî."

³⁴ Miarî Jesus wuku ton tîrîꞌpî toꞌya, vinho yaiꞌmesaꞌ maiꞌ ke enîꞌtoꞌpeiya kaiꞌma. Tîîse yonpasaꞌ tîuya pe, ituꞌse pra Jesus wanîꞌpî."

³⁵ Miarî ipokapîtîꞌpî toꞌya. Moropai Jesus pon pantakapîtîkonpa kaiꞌma tîꞌ moreꞌsan pîꞌ toꞌ suꞌminaꞌpî. Anîꞌ pia tîꞌ ena epuꞌtîꞌnîkonpa."

³⁶ Mîrîrî tîpo toꞌ ereutaꞌpî, moropai inkamoroya Jesus konekaꞌpî miarîpai anîꞌya imoꞌka namai."

³⁷ Inkamoroya Jesus puꞌpai yepoi imenukaꞌpî îꞌ waniꞌ awanî yeꞌnen ipokapîtî tîuyaꞌnîkon kaiꞌma. Taatoꞌ see warantî:
"

³⁸ Moropai Jesus pokonpe asakîꞌne amaꞌyeꞌkon pokapîtîꞌpî toꞌya iratai winî, tiwin meruntî winî moropai tiwin kamaiꞌ winî.

"

³⁹ Eꞌma taawîrî tuutîsanon woꞌmaꞌtaꞌpî ipîꞌ tuutîkon kaisarî."

⁴⁰ —Taapîtîꞌpîya: “Epîremantoꞌ yewîꞌ yarankauya tamîꞌnawîrî. Moropai mîrîrî pîmîꞌsaꞌkauya seurîwîꞌne wei tîîse”, taꞌpîya. Innape see Paapa munmu pe awanî ya, maasa kin see autîkî pakîꞌnan poi. Aawarîrî eꞌpîikaꞌtîkî —taꞌpî toꞌya.

"

⁴¹ Teepîremasanon esanon moropai Moisés nurîꞌtîya yenupatoꞌ pîꞌ yenupatonkon moropai Judeuyamîꞌ panamanenan pokonpe siꞌma toꞌ woꞌmaꞌtaꞌpî Jesus pîꞌ."

⁴² Taꞌpî toꞌya: —Tiaronkon pîikaꞌtîpîtîꞌpîya tîîse îꞌ waniꞌ awanî yeꞌnen aawarîrî aweꞌpîikaꞌtî pepîn! Moriya Judeuyamîꞌ esaꞌ pe awanî pepîn mîrîrî. Seruꞌyeꞌ pe awanî. Maasa see autîkî mîrîrî pakîꞌnan poi, innape awautîsaꞌ eraꞌma annaya ya, innape akupî annaya —taꞌpî toꞌya ipîꞌ."

⁴³ —Pena “Paapa narimaꞌpî uurî”, taapîtîꞌpîiya, innape Paapaya ipîikaꞌtî tîkuꞌse. Moropai “Paapa munmu uurî”, taꞌpîiya. Maasa kin see, Paapa munmu pe awanî ya, tîwî Paapaya ipîikaꞌtî sîrîrîpe, eraꞌmatoꞌpe annaya —taꞌpî toꞌya.

"

⁴⁴ Moropai mîrîrî warantî inkamoro amaꞌyeꞌkon Jesus ratai winî ipokapîꞌsaꞌkon woꞌmaꞌtaꞌpî nîrî Jesus pîꞌ.

"

⁴⁵ Mîrîrî tîpo inekaꞌta pairî wei tîîse, pata ewaronpamîꞌpî. Tamîꞌnawîrî pata wanîꞌpî ewaron pe, 3 horas kaisarî aakoꞌmamîꞌpî ewaron pe."

⁴⁶ Moropai koꞌmamîiya 3 horas tîîse, Jesus entaimeꞌpî meruntî ke:

—Eloi, Eloi lamá sabactâni? —taꞌpîiya tîmaimu ta. Paapa, uyun, îꞌ waniꞌ awanî yeꞌnen urumaka pîꞌ nan? taatoꞌ mîrîrî umaimukon ta.

"

⁴⁷ Mîrîrî taa Jesusya etaꞌpî tiaronkon pemonkonyamîꞌya. Moropai taꞌpî toꞌya: —Aꞌkî, Elias, taiya —kaiꞌma toꞌ esenumenkaꞌpî tîîse yairî pra etasaꞌ toꞌya wanîꞌpî.

"

⁴⁸ Kaꞌneꞌ pe tiwin yonpa ekaꞌtumîꞌpî tuna yuꞌnanen esponja eraꞌmai. Mîrîrî yeuronkaꞌpîiya uva yekku ka. Moropai mîrîrî tîrîꞌpîiya, yei poꞌtî pîꞌ tasiꞌtîi inta pona, Jesusya yuꞌnatoꞌpe kaiꞌma."

⁴⁹ Tîîse tiaronkonya taꞌpî ipîꞌ: —Kaane, tîwî mîîkîrî nîsi. Maasa Elias iipî eraꞌmapaiꞌnîkon pakîꞌnan poi imoꞌkai, ipîikaꞌtîpa —taꞌpî toꞌya.

"

⁵⁰ Moropai Jesus entaimeꞌpî meruntî ke tiwin kanoꞌpî pe moropai tekaton eeturumakaꞌpî, aasaꞌmantaꞌpî.

"

⁵¹ Mîrîrî yai epîremantoꞌ yewîꞌ, Paapa pataꞌseꞌ yuwaꞌtoꞌ kamisa eꞌkarakaꞌpî arakkita pairî, kakîsiya pai mai winîkîi non ekaya. Moropai non eserentîkîꞌmaꞌpî, moropai saꞌman pe tîweꞌsen tîꞌkon eꞌrataikaꞌpî."

⁵² Mîrîrî yai tuꞌkankon Paapa pemonkonoyamîꞌ eꞌtîꞌkaꞌsan uuruwasikon atarakkanmokaꞌpî. Moropai inkamoro isaꞌmantaꞌsan eꞌmîꞌsaꞌkaꞌpî."

⁵³ Moropai inkamoro epaꞌkaꞌpî uuruwai yapai. Moropai tîîsaꞌmanta tîpo Jesus eꞌmîꞌsaꞌkasaꞌ yai inkamoro ewomîꞌpî Jerusalém cidaderî pona, oꞌnon pata tuꞌkankonya toꞌ eraꞌmaꞌpî.

"

⁵⁴ Surarayamîꞌ yepotorî Romanoya, moropai mîîkîrî yarakkîrî tîweꞌsanonya, Jesus eraꞌma pîꞌ tîweꞌsanon anîꞌya imoꞌka namai, inkamoroya pata eserentîkîꞌma eraꞌmaꞌpî tamîꞌnawîrî mîrîrî tîweꞌkuꞌsen. Mîrîrî yeꞌnen eranneꞌ pe toꞌ enaꞌpî mararî pra. Moropai taꞌpî toꞌya: —Aꞌkî, innape Paapa munmu pe aweꞌsaꞌ man —taꞌpî toꞌya.

"

⁵⁵ Miarî wîriꞌsanyamîꞌ wanîꞌpî aminke siꞌma, Jesus eraꞌma pîꞌ tîweꞌsanon. Inkamoro wîriꞌsanyamîꞌ wanîꞌpî Jesus wenairî itîꞌsan Galiléia poi ipîikaꞌtîi ituꞌse aweꞌtoꞌ pîkîrî."

⁵⁶ Inkamoro wanîꞌpî Maria Madalena, moropai Maria, Tiago moropai itakon José yankon, moropai Zebedeu munkîyamîꞌ yankon wanîꞌpî.

"

⁵⁷ Pata ewaronpamî kupî tanne, ipîkku warayoꞌ, José iteseꞌ, Arimatéia cidaderî pon erepamîꞌpî. Mîîkîrî wanîꞌpî innape Jesus kuꞌnen pe."

⁵⁸ Mîîkîrî José wîtîꞌpî Pilatos pia Jesus esaꞌrîꞌpî esaꞌse yuꞌnaꞌtîpa, moropai Pilatosya itîîtoꞌpe toꞌya taꞌpî."

⁵⁹ Mîrîrî yeꞌnen Jesus esaꞌrîꞌpî yapisîꞌpîiya. Moropai iwontîꞌpîiya amenan itaꞌsan morî puꞌkuru kamisa linho ke."

⁶⁰ Moropai mîîkîrî yaraꞌtîꞌpîiya ituruwasi pe ikonekasaꞌ, saꞌman tîꞌ yai, amenrî toꞌ nîkonekaꞌpî yaꞌ. Moropai mîrîrî uuruwai yettapuru pe ikonekasaꞌ kureꞌnan tîꞌ ke yettapurîꞌpîiya. Moropai mîrîrî tîpo attîꞌpî miarî pai."

⁶¹ Mîrîrî kupîiya eraꞌmaꞌpî Maria Madalenaya moropai tiaron Maria nîrî wanîꞌpî miarî. Mîrîrî uuruwai pia toꞌ ereutasaꞌ wanîꞌpî.

"

⁶² Tiaron wei yai, sexta feira esuwaꞌkasaꞌ tanne, teepîremasanon esanon moropai fariseuyamîꞌ emurukuntîꞌpî pata esaꞌ Pilatos pia."

⁶³ Moropai inkamoroya taꞌpî pata esaꞌ governador pîꞌ: —Anna yepotorî, anna enpenatan pîꞌ man manniꞌ seruꞌyeꞌya taꞌpî pîꞌ. Pena enen tîwanî yai, taꞌpîiya: “Eseurîwîꞌne wei tîpo eꞌmîꞌsaꞌka kupî sîrîrî”, taꞌpîiya —taꞌpî toꞌya."

⁶⁴ —Mîrîrî yeꞌnen uuruwai eraꞌmanenan tonkon surarayamîꞌ yarimakî, morî pe eraꞌmatoꞌpe toꞌya iteseurîno wei pîkîrî neken. Maasa pra inenupaꞌsanya itesaꞌrîꞌpî yamaꞌrunpa namai. Moropai yamaꞌrunpa tîpo taa toꞌya: “Mîîkîrî eꞌmîꞌsaꞌkan pîꞌ man”, taa toꞌya seruꞌyeꞌ pe. Eꞌmaiꞌ pe seruꞌ pe Jesus wanîꞌpî yentai, seruꞌ pe toꞌ wanî —taꞌpî toꞌya.

"

⁶⁵ Mîrîrî pîꞌ taꞌpî Pilatosya: —Insamoro surarayamîꞌ yaatî, uuruwai erasiꞌtîi. Atîtî uuruwai eraꞌmai. Morî pe meraꞌmatîi, eraꞌmayaꞌnîkon pîkîrî —taꞌpîiya.

"

⁶⁶ Moropai inkamoro wîtîꞌpî. Inkamoroya uuruwai yettapuru konekaꞌpî moronpî ke, selo pe tîkuꞌse aatarakkanmoka namai. Moropai eraꞌmanenan tonkon nîmîꞌpî toꞌya, morî pe uuruwai eraꞌmatoꞌpe toꞌya.

"

28

¹ Judeuyamîꞌ erîꞌkaꞌtoꞌ weiyu esuwaꞌkasaꞌ tanne, eꞌmaiꞌnon wei yai, domingo yai, maasa pata erenmapî pra tîîse, Maria Madalena moropai tiaron Maria pokonpe toꞌ wîtîꞌpî uuruwai pona eraꞌmai."

² Mîrîrî yai kaꞌneꞌ pe kureꞌne pata eꞌtînkaꞌpî. Uyepotorîkon narimaꞌpî inserî erepamîꞌpî kaꞌ poi. Mîîkîrîya uuruwai yettaputoꞌ tîꞌ moꞌkaꞌpî moropai mîrîrî pona eereutaꞌpî."

³ Mîîkîrî wanîꞌpî waraꞌnapiya sisiu taatoꞌ warantî. Moropai ipon wanîꞌpî aimutun pe, imu warantî."

⁴ Mîrîrî pîꞌ mîrîrî uuruwai eraꞌmanenan surarayamîꞌ enaꞌpî eranneꞌ pe. Mararî pra tîtîtî pe toꞌ esiꞌnîꞌsaꞌ wanîꞌpî. Inkamoro esenumîꞌpî non pona, isaꞌmantaꞌsan warantî.

"

⁵ Mîrîrî yeꞌnen inserîya taꞌpî inkamoro wîriꞌsanyamîꞌ pîꞌ: —Eranneꞌ pe pra eꞌtî. Jesus yuwayaꞌnîkon epuꞌtî pîꞌ wai seruꞌ pepîn, manniꞌ pakîꞌnan pona toꞌ nîpokapîtîꞌpî."

⁶ Tîîse tarî anîꞌ ton pra man. Mîîkîrî eꞌmîꞌsaꞌkan pîꞌ man, taꞌpî tîuya neꞌtîkini yawîrî. Maasa ipataꞌpî eraꞌmataneꞌtî oꞌnon pata itîrîꞌpî toꞌya pataꞌpî."

⁷ Tarîpai kaꞌneꞌ pe atîtî ekaremeꞌse inenupaꞌsan pîꞌ. “Mîîkîrî eꞌmîꞌsaꞌkan pîꞌ man”, kaꞌtantî. Moropai “Mîîkîrî wîtî pe man arawîrîꞌnîkon Galiléia pona. Miarî eraꞌmayaꞌnîkon kupî sîrîrî”, kaꞌtantî toꞌ pîꞌ. Mîrîrî yekare ekaremekî pîꞌ wai apîꞌnîkon —taꞌpîiya.

"

⁸ Inkamoro wîtîꞌpî kaꞌneꞌ pe teekaꞌtunse uuruwai poi. Maasa pra mararî pra toꞌ esiꞌnîꞌsaꞌ wanîꞌpî. Tîîse toꞌ atausinpasaꞌ wanîꞌpî nîrî mararî pra. Mîrîrî yeꞌnen Jesus nenupaꞌsan pîꞌ ekaremeꞌse toꞌ wîtîꞌpî.

"

⁹ Toꞌ wîtî tanne, kaꞌneꞌ pe Jesusya toꞌ eporîꞌpî. Moropai taꞌpîiya: —Tîwamîn wanî aapiaꞌnîkon!

Mîrîrî taiya pe toꞌ erepamîꞌpî aminke pra iipia. Inkamoro eꞌsekunkaꞌpî irawîrî. Inkamoroya Jesus puu pîꞌ tapiꞌse yapurîꞌpî."

¹⁰ Moropai Jesusya taꞌpî: —Eranneꞌ pe pra eꞌtî, tîîse atîtî uyonpayamîꞌ pîꞌ ekaremeꞌse toꞌ wîtîtoꞌpe Galiléia pona. Miarî uyeraꞌmatoꞌpe toꞌya —taꞌpî Jesusya.

"

¹¹ Inkamoro wîriꞌsanyamîꞌ tîîse eꞌma ta, tiaronkon, uuruwai eraꞌmanenan surarayamîꞌ ennaꞌpoꞌpî cidade pona. Moropai inkamoroya teepîremasanon esanon pîꞌ tamîꞌnawîrî îꞌ kaiꞌma aweꞌkuꞌsaꞌ ekaremekîꞌpî."

¹² Inkamoro emurukuntîꞌpî teserukon pîꞌ teeseurîmakonpa Judeuyamîꞌ panamanenan pokonpe siꞌma. Inkamoroya ikonekaꞌpî. Mîrîrî yeꞌnen surarayamîꞌ pia tîniru tîrîꞌpî toꞌya mararî pra."

¹³ Moropai toꞌ yaipontîꞌpî toꞌya: —Kaꞌtantî “Inenupaꞌsan iipîꞌpî man, mîrîrî pe ewaron yaꞌ anna wetun tanne. Inkamoroya Jesus esaꞌrîꞌpî yamaꞌrunpaꞌpî man”, makatîi."

¹⁴ Mîrîrî etasaꞌ pata esaꞌya ya, “Inna toꞌ seruku pepîn mîrîrî”, taa annaya ipîꞌ. Mîrîrî warantî awanîꞌpî man, seruꞌ pîn taatoꞌpe annaya. Mîrîrî yeꞌnen îꞌ eꞌkupî pepîn amîrîꞌnîkon yarakkîrî.

"

¹⁵ Inkamoro surarayamîꞌya tîniru yapisîꞌpî. Moropai îꞌ kaiꞌma teepîremasanon esanonya taꞌpî yawîrî ikupîꞌpî toꞌya. Mîrîrî seruꞌ pe toꞌ eꞌtoꞌ esetaꞌpî Judeuyamîꞌ koreꞌta pîꞌ mîrîrî yai. Sîrîrî pe rî seruꞌ pe toꞌ eꞌtoꞌ koꞌmamî sîrîrî tîpose.

"

¹⁶ Inkamoro Jesus nenupaꞌsan tiwin puꞌ pona tîîmoꞌtaiꞌnîkon wîtîꞌpî Galiléia pona. Inkamoro erepamîꞌpî wîꞌ Jesus nekaremekîꞌpî pia."

¹⁷ Miarî teerepansaꞌkon pe, Jesus eraꞌmaꞌpî toꞌya. Moropai yapurîꞌpî toꞌya. Tîîse tiaronkonya innape ikupî pra awanîꞌpî."

¹⁸ Mîrîrî yeꞌnen Jesus erepamîꞌpî toꞌ pia aminke pra. Moropai taꞌpîiya:

—Tamîꞌnawîron meruntî yapisîꞌpîuya kaꞌ po moropai non po."

¹⁹ Mîrîrî yeꞌnen ayaipontîuyaꞌnîkon sîrîrî. Atîtî tamîꞌnawîronkon pemonkonyamîꞌ koreꞌta. Moropai inkamoro mîmatîi upemonkono pe tamîꞌnawîrî. Innape ukupî toꞌya wenai toꞌ menpatakonatîi uyun, Paapa eseꞌ pîꞌ, moropai uurî, inmu eseꞌ pîꞌ, moropai Morî Yekaton Wannî eseꞌ pîꞌ."

²⁰ Moropai inkamoro menupatîi tamîꞌnawîrî îꞌ taꞌpîuya yawîrî toꞌ komantoꞌpe, umaimu yawîrî. Moropai enpenatatî aapiaꞌnîkon uurî koꞌmamî pe wai wei kaisarî. Amîrîꞌnîkon rumakauya pepîn. Sîrîrî pata ataretîꞌka pîkîrî aapiaꞌnîkon uukoꞌmamî —taꞌpî Jesusya.

"