1

¹ Mathomong Modimo o hlodile legodimo le lefase.

² Lefase le be le sa dulwe, le se na selo. Bodiba bjo bogolo bo be bo pipilwe ke leswiswi, mme moya wa Modimo o be o akaletše ka godimo ga meetse.

³ Gomme Modimo a laela a re: “A go be le seetša” – seetša sa ba gona.

⁴ Modimo a se bona, a kgahlega. A aroganya seetša le leswiswi,

⁵ mme a re seetša ke “mosegare”, leswiswi ke “bošego”. Gwa feta mantšiboa, gwa tla meso – leo e be e le letšatši la pele.

⁶ Modimo a laela gape a re: “A go be le lefaufau go aroganya meetse le go a dira gore a be mafelong a mabedi” – gwa direga bjalo. Ka gona Modimo a dira lefaufau mme a aroganya meetse a ka fase ga lona le a ka godimo ga lona.

⁷

⁸ A re lefaufau ke “legodimo”. Gwa feta mantšiboa, gwa tla meso – leo e be e le letšatši la bobedi.

⁹ Modimo a laela gape a re: “A meetse a a lego ka fase ga legodimo a kgobokane felo gotee gore naga e bonale” – gwa direga bjalo.

¹⁰ A re naga ke “lefase” mme meetse a a kgobokanego felo gotee a re ke “lewatle”. Modimo a di bona, a kgahlega.

¹¹ Gomme a laela a re: “A lefase le be le mehuta yohle ya dimela – tšeo di hlagišago dithoro, le mehlare ye e enywago dienywa” – gwa direga bjalo.

¹² Ka fao lefase la ba le mehuta ka moka ya dimela – tšeo di hlagišago dithoro, le mehlare ye e enywago dienywa. Gomme Modimo a di bona, a kgahlega.

¹³ Gwa feta mantšiboa, gwa tla meso – leo e be e le letšatši la boraro.

¹⁴ Modimo a laela gape a re: “A dietša di be gona legodimong go aroganya mosegare le bošego, le go bontšha nako yeo go thomago matšatši, le mengwaga, le matšatši a menyanya ya sedumedi;

¹⁵ di tage legodimong go bonega lefase” – gwa direga bjalo.

¹⁶ Ka gona Modimo a dira dietša tše pedi tše kgolo, letšatši go buša mosegare, le ngwedi go buša bošego; a dira le dinaledi.

¹⁷ A bea dietša legodimong gore di bonege lefase,

¹⁸ go laola mosegare le bošego, le go aroganya seetša le leswiswi. Gomme Modimo a di bona, a kgahlega.

¹⁹ Gwa feta mantšiboa, gwa tla meso – leo e be e le letšatši la bone.

²⁰ Modimo a laela gape a re: “A meetse a nyeume diphedi tša mehuta yohle, mme legodimo le tlale dinonyana.”

²¹ Ka gona Modimo a hlola diphedi tše kgolokgolo tša lewatle, le diphedi tša mehuta ka moka ya ka meetseng, le dinonyana tša mehuta ka moka. Gomme Modimo a di bona, a kgahlega.

²² A di šegofatša ka moka, gomme a botša diphedi tša ka meetseng gore di ate di tlale lewatle, le dinonyana a di botša gore di ate.

²³ Gwa feta mantšiboa, gwa tla meso – leo e be e le letšatši la bohlano.

²⁴ Modimo a laela gape a re: “A lefase le be le diphedi tša mehuta yohle – diruiwa, le diphoofolo tša lešoka, le digagabi” – gwa direga bjalo.

²⁵ Ka gona Modimo a di dira ka moka mme a kgahlwa ke tšeo a di bonago.

²⁶ Gape Modimo a re: “Bjale a re direng batho ka seswantšho sa rena, ba swane le rena. Ba tla laola dihlapi, le dinonyana, le diruiwa, le diphoofolo tša lešoka, le digagabi ka moka tša lefase.”

²⁷ Ka gona Modimo a hlola batho, a ba dira gore ba swane le yena. A ba dira e le monna le mosadi,

²⁸ a ba šegofatša mme a re go bona: “Le beng le bana ba bantši gore ditlogolo tša lena di tle di phele gohle lefaseng mme di le laole. Ke le bea balaodi ba dihlapi le dinonyana le diphedi tšohle tša lefase.

²⁹ Ke le file dimela tšohle tša peu lefaseng ka moka le mehlare yohle ya dienywa tša peu, gore e be dijo tša lena.

³⁰ Ge e le diphoofolo tša lešoka le dinonyana le digagabi ka moka, tšona ke di file ditala tšohle gore e be dijo tša tšona” – gwa direga bjalo.

³¹ Modimo a lebelela tšohle tše a di dirilego mme a kgahlega kudu. Mantšiboa a feta, gwa tla meso – leo e be e le letšatši la boselela.

2

¹ Ke ka fao Modimo a phethilego modiro wa go hlola legodimo le tšohle tše di lego go lona, le lefase le tšohle tše di lego go lona.

² Ka letšatši la bošupa Modimo ke ge a feditše mediro ye a bego a e dira; mme ka letšatši leo a khutša, a feditše mediro ka moka ye a bego a e dira.

³ A šegofatša letšatši la bošupa mme a le dira letšatši le lekgethwa, ka gore ka letšatši leo ke ge a feditše tlholo ya gagwe mme a lesa mošomo ka moka.

⁴ Ke ka fao legodimo le lefase di hlotšwego ka gona. Ge Morena Modimo a hlola legodimo le lefase,

⁵ go be go se na dimela lefaseng goba ditala tšeo di medilego, ka gore o be a se a ka a neša pula, gape go se yo a ka lemago.

⁶ Fela meetse ona a be a nyaganyaga fase a nošetša naga.

⁷ Morena Modimo a ntšha mobu fase a bopa monna ka wona; a budulela moya wa bophelo ka dinkong tša gagwe, gomme monna a thoma go phela.

⁸ Morena Modimo a dira serapa kua Edene ka bohlabela, mme a bea monna yola a mmopilego ka moo.

⁹ Fao a mediša dimela tše botse tša mehuta yohle, mme tša enywa dienywa tše bose. Gare ga serapa go be go na le mohlare wo o fago bophelo, le mohlare wo o fago tsebo ya se sebotse le se sebe.

¹⁰ Moo Edene gwa ba le moela wa meetse wo o nošetšago serapa. Ka ntle ga Edene moela woo o be o tšwile dinoka tše nne.

¹¹ Noka ya pele ke Pishone, mme yona e ela go dikologa naga ya Habila mo go hwetšwago gauta.

¹² Gauta yeo ga se ya tswakwa; senkgabose se e sego sa mehleng le mohuta wo mongwe wa magakabje di hwetšwa fao.

¹³ Noka ya bobedi ke Gihone. Yona e ela go dikologa naga ya Kushe.

¹⁴ Noka ya boraro ke Tigrise ye e fetago ka bohlabela bja Asiria, mme ya bone noka yona ke Yufratese.

¹⁵ Ka gona Morena Modimo a bea monna moo serapeng sa Edene gore a se leme, a se lete.

¹⁶ A mmotša a re: “O ka ja dienywa tša mohlare ofe le ofe mo serapeng

¹⁷ ntle le tša mohlare wo o fago tsebo ya se sebotse le se sebe. O se ke wa ja dienywa tša mohlare woo; ge o ka di ja, o tla hwa lehu ka lona letšatši leo.”

¹⁸ Ke moo Morena Modimo a itšego: “Ga go botse ge monna a phela a nnoši. Ke tla mo direla mothuši yo a mo swanetšego.”

¹⁹ Ka fao a ntšha mobu fase a bopa diphoofolo ka moka le dinonyana ka moka, a di tliša pele ga monna gore a bone gore o tla di rea maina afe. Ke ka moo ka moka di reilwego maina.

²⁰ Ka fao monna a rea dinonyana le diruiwa tšohle le diphoofolo tšohle tša lešoka maina, fela a hloka le e tee ya tšona ye e ka bago mothuši yo a mo swanetšego.

²¹ Ke moo Morena Modimo a swarišitšego monna boroko bjo bogolo, mme a re a sa robetše, a ntšha kgopo e tee ya monna mme a thiba sekgala sela ka nama.

²² Ka kgopo yeo a dira mosadi mme a mo tliša go monna.

²³ Ke fao monna a itšego: “Bjale gona ke bile ke hweditše yo a swanago le nna – lešapo le le ntšhitšwego mašapong a ka, le nama ye e ntšhitšwego nameng ya ka. Leina la gagwe ke ‘mosadi’, ka gobane o ntšhitšwe go monna.”

²⁴ Ke ka fao monna a tlogelago tatagwe le mmagwe, a kopana le mosadi wa gagwe, mme bobedi bja bona ya ba mmele o tee.

²⁵ Monna le mosadi bobedi ba be ba se ba tšwara, eupša ba be ba sa lewe ke dihlong.

3

¹ Bjale noga e be e le phoofolo ya mahlajana kudu go feta diphoofolo tšohle tša lešoka tše Morena Modimo a di dirilego. Ka gona noga ya botšiša mosadi ya re: “A Modimo o tloga a le boditše gore le se ke la ja dienywa tša mohlare ofe le ofe ka mo serapeng?”

² Mosadi a e fetola a re: “Re ka ja dienywa tša mohlare ofe le ofe ka mo serapeng,

³ ntle le tša mohlare wo o lego gare ga serapa. Modimo o re boditše gore re se ke ra ja dienywa tša mohlare woo goba ra o kgwatha; ge re ka dira bjalo, re tla hwa.”

⁴ Noga ya mo fetola ya re: “Taba yeo ga se therešo; le ka se hwe.

⁵ Modimo o boletše bjalo ka gobane a tseba gore ge le ka o ja, le tla ba le tlhaologanyo la swana le yena mme la tseba se sebotse le se sebe.”

⁶ Mosadi a bona gore mohlare woo ke wo mobotsebotse le gore dienywa tša wona e ka ba tše bose ge motho a di ja, gomme a gopodišiša gore e ka ba mo gobose bjang go ja dienywa tšeo le go ba le bohlale. Ka fao a fula tše dingwe tša tšona a di ja. A fa mogatšagwe tše dingwe, mme le yena a di ja.

⁷ Ge ba seno di ja, ba ba le tlhaologanyo mme ba lemoga gore ga se ba tšwara. Ka gona ba rokaganya matlakala a mogo, ba a tšwara.

⁸ Mantšiboeng ao ba kwa Morena Modimo a itshepelela ka mo serapeng, mme ba mo utamela gare ga mehlare.

⁹ Eupša Morena Modimo a bitša monna a re: “O go kae?”

¹⁰ Monna a mo araba a re: “Ke go kwele o sepela ka mo serapeng, ka tšhoga mme ka go utamela ka gore ke be ke se ka tšwara.”

¹¹ Modimo a mmotšiša a re: “Ke mang yo a go boditšego gore ga se wa tšwara? A o lle dienywa tšela ke go boditšego gore o se ke wa di ja?”

¹² Monna a mo fetola a re: “Mosadi yo o mmeilego mo le nna o mphile dienywa tšeo mme nna ka di ja.”

¹³ Morena Modimo a botšiša mosadi a re: “Ke ka baka lang o dirile taba ye?” Mosadi a mo fetola a re: “Ke noga yeo e mphoraforeditšego gore ke di je.”

¹⁴ Ke moo Morena Modimo a itšego go noga: “Ka gobane o dirile taba yeo, o tla rwala thogako ye: O tla tšhabja ke diruiwa tšohle le diphoofolo tšohle tša lešoka; go tloga bjale o tla gogoba fase ka mpa mme wa ja lerole bophelo bja gago ka moka.

¹⁵ Ke tla dira gore wena le mosadi le hloyane, le gore ditlogolo tša gagwe le ditlogolo tša gago di hloyane ka mehla. Ditlogolo tša gagwe di tla go pšhatlaganya hlogo, mme wena o tla ba loma direthe.”

¹⁶ Gomme a re go mosadi: “Ke tla go atišetša mathata ge o ima, le bohloko ge o belega. Le ge go le bjalo, o tla no fela o duma mogatšago, mme wa laolwa ke yena.”

¹⁷ Mme a re go monna: “O theeditše mosadi wa gago mme wa ja dienywa tše ke go boditšego gore o se ke wa di ja. Ka baka la seo o se dirilego, mobu o rogakilwe. O tla tlemega go šoma ka boima bophelo bja gago ka moka gore lefase le go hlagišetše dijo tše di lekanego.

¹⁸ Lefase le tla hlagiša ditshehlo le meetlwa, wa ba wa tlemega go ja ditala tša naga.

¹⁹ O tla šoma ka boima wa tšwa kudumela go ikhweletša dijo mobung go fihlela o boela mobung, gobane o bopilwe ka wona. O bopilwe ka mobu mme o tla fetoga mobu gape.”

²⁰ Adamo a rea mosadi wa gagwe leina la Efa, ka gobane e be e le mmagobatho ka moka.

²¹ Gomme Morena Modimo a direla Adamo le mosadi wa gagwe diaparo ka mekgopa ya diphoofolo, a ba apeša tšona.

²² Ke moo Morena Modimo a itšego: “Bjale batho ba swana le rena, ba na le tsebo ya se sebotse le se sebe. Ga ba a swanela go dumelelwa go ja dienywa tša mohlare wa bophelo mme ba phelela sa ruri.”

²³ Ka fao Morena Modimo a ba raka serapeng sa Edene, mme a dira gore monna a leme mobu wo a bopilwego ka wona.

²⁴ Ka lehlakoreng la ka bohlabela la serapa a bea bakerubi, le tšhoša ye e laumelago ka mathoko ohle go thibela motho go batamela mohlare wa bophelo.

4

¹ Adamo a robala le mosadi wa gagwe, mme mosadi a ima. A belega morwa mme a re: “Ka thušo ya Morena ke hweditše morwa.” Ka fao a mo rea leina la Kaine.

² Ka morago a belega morwa yo mongwe, e lego Abele. Yena e ile ya ba modiši, Kaine ya ba molemi.

³ Ka morago ga lebaka Kaine a išetša Morena kabelo ya go tšwa ka tšhemong ya gagwe.

⁴ Abele yena a hlaba maitšibolo a mangwe a dihuswane tša gagwe, mme a dira sehlabelo ka ditho tše dingwe tša makhura. Morena a kgahlwa ke Abele le sehlabelo sa gagwe,

⁵ eupša a se kgahlwe ke Kaine le kabelo ya gagwe. Kaine a befelwa kudu, mme a senya sefahlego.

⁶ Ke moo Morena a itšego go Kaine: “Ke ka baka lang o befetšwe? Ke ka baka lang o sentše sefahlego?

⁷ Ge o ka dira se se lokilego a o ka se thabe? Fela ge o ka dira se se sego sa loka, sebe se go laletše kgauswi se nyaka go go buša, eupša wena o swanetše go se fenya.”

⁸ Kaine a re go Abele, ngwanabo: “A re sepelele mašemong.” Ge ba le kua mašemong, Kaine a tsogela ngwanabo a mmolaya.

⁹ Morena a botšiša Kaine a re: “A Abele, ngwaneno, o kae?” Kaine a mo fetola a re: “Ga ke tsebe. A ke nna mohlokomedi wa ngwanešo?”

¹⁰ Ke moo Morena a itšego: “O dirile eng? Madi a ngwaneno a ntelela a etšwa mobung.

¹¹ Ka gona o rogakilwe, gomme o ka se hlwe o lema mobu wo o nwelego madi a ngwaneno ge o mmolaya.

¹² Ge o ka lema, mobu o ka se ke wa go hlagišetša selo; wena o tla ba motšhabi le moraladi mo lefaseng.”

¹³ Ke moo Kaine a itšego go Morena: “Kotlo yeo ke ye boima kudu go nna go ka e šikara.

¹⁴ O nthaka mo nageng ye lehono mme ke tla ba kgole le wena. Ke tla ba motšhabi le moraladi mo lefaseng, mme mang le mang yo a nkhwetšago o tla mpolaya.”

¹⁵ Fela Morena a mo fetola a re: “Aowa! Ge motho a ka go bolaya, go tla hwa batho ba ba šupago ba meloko yabo go go lefeletša.” Ka gona Morena a swaya Kaine leswao la go tsebiša yo mongwe le yo mongwe yo a gahlanago naye gore a se ke a mmolaya.

¹⁶ Gomme Kaine a tloga pele ga Morena, a yo phela nageng ye e bitšwago “Thalalong”, ka bohlabela bja Edene.

¹⁷ Kaine le mosadi wa gagwe ba ba le morwa, mme ba mo rea leina la Enoko. Kaine a aga motse mme a o reela morwa wa gagwe.

¹⁸ Enoko a ba le morwa mme a mo rea leina la Irade, yo e bilego tatagoMehuyaele; yena ya ba tatagoMethushaele, tatagoLamege.

¹⁹ Lamege a nyala basadi ba babedi, e lego Ada le Tsila.

²⁰ Ada a tswala Jabale, yo e bilego rakgolokhukhu wa bao ba ruago diruiwa mme ba dulago ka mešašeng.

²¹ Ngwanabo e bile Jubale, rakgolokhukhu wa diopedi tša go letša sekgapa le nakana.

²² Tsila a tswala Tubale-Kaine, morulatshipi yoo a bego a dira dilo ka moka tša mphiri le tša tshipi. Kgaetšedi ya Tubale-Kaine e be e le Naama.

²³ Lamege a re go basadi ba gagwe: “Ada le Tsila, ntheetšeng: Ke bolaile lesogana le lengwe ka gobane le nkgobaditše.

²⁴ Ge go ehwa batho ba ba šupago ge go bolailwe Kaine, go tla hwa ba masome a a šupago le metšo ye e šupago ge yo mongwe a ka mpolaya.”

²⁵ Adamo le mosadi wa gagwe ba ba le morwa yo mongwe. Efa a re: “Modimo o mphile morwa yo mongwe legatong la Abele yo Kaine a mmolailego.” Ka gona a mo rea leina la Sete.

²⁶ Sete a ba le morwa yo a ilego a mo rea leina la Enose. Ke ka yona nako yeo moo batho ba thomilego go šomiša leina le lekgethwa la Morena tirelong.

5

¹ Ge Modimo a bopa batho, o ba dirile gore ba swane le yena. O ba bopile ka botona le botshadi, a ba šegofatša mme a ba bitša gore ke “batho”. Le ke lenaneo la ditlogolo tša Adamo.

²

³ Ge Adamo a na le mengwaga ye 130, o ile a ba le morwa yo a swanago le yena mme a mo rea leina la Sete.

⁴ Ka morago ga fao Adamo o phetše mengwaga ye mengwe ye 800. O ile a ba le bana ba bangwe,

⁵ mme a hlokafala a na le mengwaga ye 930.

⁶ Ge Sete a na le mengwaga ye 105, o ile a ba le morwa, e lego Enose,

⁷ mme a phela mengwaga ye mengwe ye 807. O ile a ba le bana ba bangwe,

⁸ mme a hlokafala a na le mengwaga ye 912.

⁹ Ge Enose a na le mengwaga ye 90, o ile a ba le morwa, e lego Kenane,

¹⁰ mme a phela mengwaga ye mengwe ye 815. O ile a ba le bana ba bangwe,

¹¹ mme a hlokafala a na le mengwaga ye 905.

¹² Ge Kenane a na le mengwaga ye 70, o ile a ba le morwa, e lego Mahalalele,

¹³ mme a phela mengwaga ye mengwe ye 840. O bile le bana ba bangwe,

¹⁴ mme a hlokafala a na le mengwaga ye 910.

¹⁵ Ge Mahalalele a na le mengwaga ye 65, o ile a ba le morwa, e lego Jerede,

¹⁶ mme a phela mengwaga ye mengwe ye 830. O bile le bana ba bangwe,

¹⁷ mme a hlokafala a na le mengwaga ye 895.

¹⁸ Ge Jerede a na le mengwaga ye 162, o ile a ba le morwa, e lego Enoko,

¹⁹ mme a phela mengwaga ye mengwe ye 800. O bile le bana ba bangwe,

²⁰ mme a hlokafala a na le mengwaga ye 962.

²¹ Ge Enoko a na le mengwaga ye 65, o ile a ba le morwa, e lego Metushelage.

²² Ka morago ga moo Enoko a phela a ikopantše le Modimo mengwaga ye 300, mme a ba le bana ba bangwe.

²³ O phetše mengwaga ye 365.

²⁴ O phetše bophelo bja gagwe ka moka a ikopantše le Modimo, mme a timelela ka ge Modimo a ile a mo tšea.

²⁵ Ge Metushelage a na le mengwaga ye 187, o ile a ba le morwa, e lego Lamege,

²⁶ mme a phela mengwaga ye mengwe ye 782. O bile le bana ba bangwe,

²⁷ mme a hlokafala a na le mengwaga ye 969.

²⁸ Ge Lamege a na le mengwaga ye 182, o ile a ba le morwa,

²⁹ mme a re: “Ngwana yo o tla re bea pelo medirong yohle ya rena ye boima ye re swanetšego go e dira mobung wo Morena a o rogakilego wo.” Ka fao a mo rea leina la Noa.

³⁰ Lamege a phela mengwaga ye mengwe ye 595; a ba le bana ba bangwe,

³¹ mme a hlokafala a na le mengwaga ye 777.

³² Ka morago ga ge Noa a na le mengwaga ye 500, o ile a ba le barwa ba bararo, e lego Seme le Hamo le Jafeta.

6

¹ Ge batho ba thomile go ikala le lefase ka moka mme barwedi ba belegwa,

² dibopiwa tše dingwe tša legodimo tša bona gore basetsana bao ke ba babotse. Ka fao tša itšeela basadi bao di ba kganyogago.

³ Ke moo Morena a itšego: “Nka se dumelele batho gore ba phelele sa ruri; ke bafeti. Go tloga bjale ba ka se hlwe ba phela go feta mengwaga ye 120.”

⁴ Mehleng yeo, ešita le ka morago ga fao, go be go le ditšitširipa lefaseng tšeo di hlolegilego ge dibopiwa tša legodimo di robala le barwedi ba batho. Ke bona bagale ba bagolo le banna ba go tuma ba bagologolo.

⁵ Ge Morena a bona gore batho ke ba babe kudu, le gore ka mehla megopolo ya bona ke ye mebe kudu,

⁶ o ile a nyama ge a kile a ba dira mme a ba bea lefaseng. O ile a tlala boitsholo

⁷ moo a ilego a ba a re: “Ke tla tloša batho ka moka ba ke ba dirilego, ka tloša le diphoofolo le digagabi le dinonyana, ka gore ke nyama ge ke di dirile.”

⁸ Fela Morena a thabišwa ke Noa.

⁹ Tše ke ditaba tša Noa. O be a na le barwa ba bararo, e lego Seme le Hamo le Jafeta. Noa o be a se na diphošo, mme e le motho a nnoši yo a lokilego gare ga batho ba mehleng yeo. O be a phela a ikopantše le Modimo,

¹⁰

¹¹ mola yo mongwe le yo mongwe e le yo mobe pele ga Modimo, mme polayano e phatlalaletše mo gohle.

¹² Modimo a lebelela lefase mme a bona e le le lebe, ka gobane batho ka moka ba be ba phela bophelo bjo bobe.

¹³ Ke moo Modimo a rilego go Noa: “Ke ikemišeditše go fediša batho ka moka. Ke tlilo ba fediša ka moka ka gobane lefase le tletše mediro ya bona ye mebe.

¹⁴ Ipetlele leselawatle ka dikota tše di tiilego; o dire diphapoši ka go lona mme o le manege ka moti ka ntle le ka gare.

¹⁵ Botelele bja lona e be dimetara tše 138, bophara e be dimetara tše 23, mme bogodimo e be dimetara tše 14.

¹⁶ O direle leselawatle tlhaka, gomme o šadiše lešoba la disentimetara tše 46 kgathe ga tlhaka le mahlakore. O le dire mabato a mararo, mme ka lehlakoreng o tsenye lemati.

¹⁷ Ke tlilo romela lefula lefaseng go fediša se sengwe le se sengwe se se phelago. Se sengwe le se sengwe lefaseng se tla hwa,

¹⁸ eupša nna ke tla dira kgwerano le wena. O tsene ka leselawatleng le mosadi wa gago le barwa ba gago le basadi ba bona.

¹⁹ Ka leselawatleng o tsene le tona le tshadi ya mohuta wo mongwe le wo mongwe wa dinonyana le wa diphoofolo le wa digagabi, gore di tle di phele.

²⁰

²¹ O tšee le dijo tša mehuta ka moka tša lena le tša tšona.”

²² Noa a dira tšohle tše Morena a mo laetšego tšona.

7

¹ Morena a re go Noa: “Tsena ka leselawatleng le ba lapa la gago ka moka; ke bone gore ke wena o nnoši lefaseng ka moka yo o dirago se se lokilego.

² Go mohuta wo mongwe le wo mongwe wa diphoofolo tše di hlwekilego o tšee tše di šupago tše tona le tše di šupago tša ditshadi, mme go mohuta wo mongwe le wo mongwe wa tše di sego tša hlweka o tšee e tee ye tona le e tee ya tshadi.

³ Le go mohuta wo mongwe le wo mongwe wa dinonyana o tšee tše di šupago tše tona le tše di šupago tša ditshadi. O dire ka tsela yeo gore mohuta wo mongwe le wo mongwe wa diphoofolo le dinonyana o phele mme o tle o atafale gape lefaseng.

⁴ Matšatši a a šupago go tloga bjale ke tlile go neša pula ye e tlago tšea matšatši a masome a mane le mašego a ona, gore e fediše dilo ka moka tše di phelago tše ke di dirilego.”

⁵ Noa a dira tšohle tše Morena a mo laetšego tšona.

⁶ Noa o be a na le mengwaga ye 600 ge lefula le etla lefaseng.

⁷ Yena le mosadi wa gagwe le barwa ba gagwe le basadi ba bona ba tsena ka leselawatleng go phonyokga lefula.

⁸ Tona le tshadi ya mohuta wo mongwe le wo mongwe wa diphoofolo le wa dinonyana le wa digagabi, mohuta wo o hlwekilego le wo o sego wa hlweka,

⁹ tša tsena ka leselawatleng le Noa, ka moo Modimo a laetšego ka gona.

¹⁰ Ka morago ga matšatši a a šupago lefula la tla.

¹¹ Ge Noa a na le mengwaga ye 600, ka letšatši la lesome le metšo ye e šupago la kgwedi ya bobedi, methopo ka moka ya lewatle le legolo ka fase ga lefase ya thiboga, mme dithibo ka moka tša mafula a legodimo tša bulega,

¹² gomme pula ya tšhologela lefaseng matšatši a masome a mane le mašego a ona.

¹³ Ka lona letšatši leo Noa le mosadi wa gagwe ba tsena ka leselawatleng le barwa ba bona ba bararo, e lego Seme le Hamo le Jafeta, le basadi ba bona.

¹⁴ Ba tsena le diphoofolo tša mehuta yohle tša lešoka, le diruiwa tša mehuta yohle, le digagabi tša mehuta yohle, le dinonyana tša mehuta yohle.

¹⁵ Tona le tshadi ya mohuta wo mongwe le wo mongwe wa diphedi tša tsena ka leselawatleng le Noa

¹⁶ ka moo Modimo a laetšego ka gona. Ka morago ga fao Morena a tswalelela Noa ka gare.

¹⁷ Lefula la tšea matšatši a masome a mane, mme meetse ya ba a mantši moo e lego gore leselawatle le ile la phaphamala.

¹⁸ Meetse a fela a oketšega kudu mme leselawatle la itshepelela godimo ga ona.

¹⁹ A fela a oketšega kudu a ba a khupetša dithaba tša godimodimo;

²⁰ a fela a rotoga go fihlela a eba dimetara tše di šupago ka godimo ga dintlhohlo tša dithaba.

²¹ Selo se sengwe le se sengwe se se phelago mo lefaseng sa hwa – dinonyana, le diruiwa, le diphoofolo tša lešoka, le digagabi, le batho.

²² Tšohle tše di bušago moya lefaseng tša hwa.

²³ Morena a fediša diphedi tšohle tša lefase – batho le diphoofolo le digagabi le dinonyana. Bao ba ilego ba šala e bile fela Noa le bao ba bego ba na le yena ka leselawatleng.

²⁴ Meetse ga se a ka a thoma go phohlela, gwa ba gwa feta matšatši a 150.

8

¹ Modimo o ile a gopola Noa le diruiwa tšohle le diphoofolo tšohle tša lešoka tše di bego di na le yena ka leselawatleng; a fokiša phefo, mme meetse a thoma go ya fase.

² Methopo ya lewatle ka fase ga lefase le dithibo tša mafula a legodimo tša tswalelwa. Pula ya khula,

³ mme meetse a ya fase ka gonnyane ka gonnyane matšatši a 150.

⁴ Ka letšatši la lesome le metšo ye e šupago la kgwedi ya bošupa leselawatle la rokama thabeng ye nngwe molokolokong wa dithaba tša Ararate.

⁵ Meetse a fela a eya fase, mme ka letšatši la pele la kgwedi ya lesome dintlha tša dithaba tša bonala.

⁶ Ka morago ga matšatši a masome a mane Noa a bula lefasetere

⁷ gomme a ntšha legokobu. Lona le ile la se ke la boa, eupša la fofafofa gohle go fihlela meetse a gopela sa ruri.

⁸ Ge go le bjalo, Noa a roma leeba go yo bona ge e ka ba meetse a ile fase,

⁹ fela ka ge meetse a be a sa khupeditše lefase ka moka, leeba le ile la hloka moo le ka kotamago gona. Le ile la boela ka leselawatleng, mme Noa a obeletša letsogo a le swara a le tsenya ka gare ga lona.

¹⁰ A letela gape matšatši a mangwe a a šupago, a tsebo roma leeba lela gape.

¹¹ Le ile la boela go yena mantšiboa le momile letlakala le lefsa la mohlware. Ka gona Noa a tseba gore meetse a ile fase.

¹² Ka morago ga fao a letela matšatši a mangwe a a šupago, a tsebo roma leeba lela gapegape; ka lekga le le ile la se ke la boa.

¹³ Ge Noa a na le mengwaga ye 601, ka letšatši la pele la kgwedi ya mathomo, meetse a gopa. Noa a šuthiša tlhaka ya leselawatle, a lebelela ka gohle mme a bona lefase le thoma go oma.

¹⁴ Ka letšatši la masome a mabedi le metšo ye e šupago la kgwedi ya bobedi ke ge lefase le omile.

¹⁵ Modimo a re go Noa:

¹⁶ “Tšwaa ka leselawatleng le mosadi le barwa ba gago le basadi ba bona.

¹⁷ O ntšhe le dinonyana le diphoofolo le digagabi ka moka gore di tle di ate di tlale lefase ka moka.”

¹⁸ Ka gona Noa a tšwa ka leselawatleng le mosadi le barwa ba gagwe le basadi ba bona.

¹⁹ Diphoofolo le digagabi le dinonyana ka moka tša tšwa ka leselawatleng ka dihlophanahlophana go ya ka mehuta ya tšona.

²⁰ Noa a agela Morena aletare; a tšea e tee ya mohuta wo mongwe le wo mongwe wa diphoofolo le dinonyana tše di hlwekilego mme a di tšhuma moo aletareng ya ba sehlabelo sa go tšhungwa ka moka.

²¹ Monkgo wa sehlabelo seo wa thabiša Morena mme ka pelong a re: “Nka se tsoge ke rogakile lefase gape ka baka la seo motho a se dirago, ke tseba gore go tloga bofseng megopolo ya gagwe ke ye mebe. Nka se tsoge ke fedišitše diphedi ka moka gape.

²² Ge lefase le sa le gona go tla ba le nako ya go bjala le nako ya go buna. Ka mehla go tla ba le go tonya le go fiša, selemo le marega, mosegare le bošego.”

9

¹ Modimo a šegofatša Noa le barwa ba gagwe mme a re go bona: “Le beng le bana ba bantši gore ditlogolo tša lena di tle di phele gohle lefaseng.

² Diphoofolo le dinonyana le digagabi le dihlapi ka moka di tla phela di le boifa. Ka moka di bewa diatleng tša lena.

³ Bjale le ka di ja, la ja le ditala; ke le fa tšona ka moka gore e be dijo tša lena.

⁴ Selo se tee se le sego la swanela go se ja ke nama ye e nago le madi; ke le iletša yona ka baka la gore bophelo bo mading.

⁵ Yo a bolayago motho ke tla mo otla. Phoofolo efe le efe ye e bolayago motho ke tla e otla.

⁶ Yo a bolayago motho le yena o tla bolawa ke batho, ka gore motho o dirilwe gore a swane le Modimo.

⁷ “Fela lena, le be le bana ba bantši gore ditlogolo tša lena di tle di phele gohle lefaseng.”

⁸ Modimo a re go Noa le barwa ba gagwe:

⁹ “Bjale ke dira kgwerano ya ka le lena le ditlogolo tša lena

¹⁰ le diphedi tšohle tša lefase tše di bego di na le lena – dinonyana, le diruiwa, le diphoofolo tšohle tša lešoka – se sengwe le se sengwe seo se tšwilego ka leselawatleng le lena.

¹¹ Ke dira kgwerano ya ka le lena ke re: Diphedi ka moka di ka se tsoge di fedišitšwe ka lefula gape; lefula le ka se tsoge le sentše lefase gape.

¹² Sese sešupo sa kgwerano ye ya neng le neng ye ke e dirago le lena le diphedi ka moka:

¹³ ke molalatladi wa ka wo ke o tsemago marung. E tla ba sešupo sa kgwerano ya ka le lefase.

¹⁴ Nako le nako ge ke pipa legodimo ka maru mme molalatladi o bonala,

¹⁵ ke tla gopola kgwerano ya ka le lena le diphoofolo ka moka ya gore lefula le ka se tsoge le fedišitše diphedi ka moka gape.

¹⁶ Ge molalatladi o le marung ke tla o bona, mme ka gopola kgwerano ya go ya go ile gare ga ka le diphedi ka moka lefaseng.

¹⁷ Se ke sešupo sa kgwerano ye ke e dirago le diphedi ka moka.”

¹⁸ Barwa ba Noa bao ba tšwilego ka leselawatleng ke Seme le Hamo le Jafeta. Hamo e be e le tatagoKanana.

¹⁹ Barwa ba ba bararo ba Noa e bile borakgolokhukhu ba batho ka moka lefaseng.

²⁰ Noa, yo e bego e le molemi, e bile yena motho wa mathomo wa go bjala merara.

²¹ Ka morago ga ge a nwele beine o ile a tagwa, mme a ithobalela ka mošašeng wa gagwe a apotše.

²² Ge Hamo, tatagoKanana, a bona gore tatagwe ga a tšwara, o ile a tšwa a yo botša bomorwarragwe ka babedi.

²³ Ke moo Seme le Jafeta ba tšerego kobo mme ba e bea magetleng, ba tsena ka mošašeng ba sepela ka sa morago, gomme ba pipa tatabo ka kobo yela; ba itebelediša thoko gore ba se ke ba mmonela.

²⁴ Ge Noa a tšwiwa ke beine mme a ekwa gore morwagwe yo monnyane o mo dirile eng,

²⁵ a re: “Kanana a a rogakwe! E tla ba lekgobakgoba la bomorwarragwe.

²⁶ Retang Morena, Modimo wa Seme! Kanana e tla ba lekgoba la Seme.

²⁷ A Modimo a atiše Jafeta; ditlogolo tša gagwe di phele le batho ba Seme. Kanana e tla ba lekgoba la Jafeta.”

²⁸ Ka morago ga lefula Noa o phetše mengwaga ye 350,

²⁹ mme a hlokafala a na le mengwaga ye 950.

10

¹ Šedi ditlogolo tša barwa ba Noa, Seme le Hamo le Jafeta. Ba bararo ba ba bile le barwa ka morago ga lefula.

² Barwa ba Jafeta šeba: ke Gomere le Magogo le Madai le Jabane le Tubale le Mesheke le Tirase. Bona e bile borakgolokhukhu ba ditšhaba tšeo di reetšwego maina a bona.

³ Ditlogolo tša Gomere e bile setšhaba sa Ashkenase le sa Rifate le sa Togarma.

⁴ Ditlogolo tša Jabane e bile setšhaba sa Elisha le sa Tarshishe le sa Saeprose le sa Rodose;

⁵ bona e bile borakgolokhukhu ba ditšhaba tše di dulago go ipata le lebopo le dihlakahlakeng. Bao ka moka ke ditlogolo tša Jafeta, mme ba dula melokong le ditšhabeng tša gabobona le dinageng tše di fapanego; sehlopha se sengwe le se sengwe se bolela polelo ya sona.

⁶ Barwa ba Hamo šeba: ke Kushe le Egepeta le Libia le Kanana. Bona e bile borakgolokhukhu ba ditšhaba tšeo di reetšwego maina a bona.

⁷ Ditlogolo tša Kushe e bile setšhaba sa Seba le sa Habila le sa Sabta le sa Rama le sa Sabteka. Ditlogolo tša Rama e bile setšhaba sa Sheba le sa Dedane.

⁸ Kushe o ile a ba le morwa yoo leina la gagwe e bego e le Nimrode. Yena e bile mogale wa mathomo lefaseng.

⁹ E be e le motsomi yo mogolo le mahlong a Morena; ke ka baka leo batho ba rego: “Bjalo ka Nimrode o motsomi yo mogolo le mahlong a Morena.”

¹⁰ Mathomong mmušo wa gagwe o be o akaretša Babele le Ereke le Akade. Naga tše ka moka di Babilonia.

¹¹ Go tloga nageng yeo o ile a ya Asiria, mme fao a aga metse ya Ninibe le Rehobote-Ire le Kelage

¹² le Resene – motse wo o lego gare ga Ninibe le motse wo mogolo wa Kelage.

¹³ Ditlogolo tša Egepeta e bile batho ba Lidia le Anamo le Lehaba le Naftuage

¹⁴ le Patruse le Kasluage le Kreta, bao go bona go tšwilego Bafilista.

¹⁵ Barwa ba Kanana šeba: Sidone, wa leitšibolo, le Hete. Bona e bile borakgolokhukhu ba batho bao ba reetšwego maina a bona.

¹⁶ Kanana gape e bile rakgolokhukhu wa Bajebuse le Baamore le Bagirgashe

¹⁷ le Bahibe le Baaraki le Basine

¹⁸ le Baarbade le Batsemare le Bahamate. Dikgoro tše di fapanego tša Bakanana tša ikala.

¹⁹ Naga ya Bakanana e be e tloga Sidone e leba Gerare go yo fihla Gasa, e leba Sodoma le Gomora le Adma le Tseboime go yo fihla Lesha.

²⁰ Tšeo ke ditlogolo tša Hamo tše di dulago melokong le ditšhabeng tša gabotšona le dinageng tša tšona tše di fapanego; sehlopha se sengwe le se sengwe se bolela polelo ya sona.

²¹ Seme, mogolwaJafeta, e bile rakgolokhukhu wa Baheberu ka moka.

²² Barwa ba Seme šeba: Elamo le Ashure le Arpakshade le Lude le Aramo. Bona e bile borakgolokhukhu ba ditšhaba tšeo ba reetšwego maina a tšona.

²³ Ditlogolo tša Aramo e bile setšhaba sa Utse le sa Hule le sa Getere le sa Mashe.

²⁴ Arpakshade e bile tatagoShelage, yo e bilego tatagoEbere.

²⁵ Ebere o bile le barwa ba babedi: Yo mongwe o ile a bitšwa Pelege, ka gore nakong ya gagwe batho ba lefase ba be ba arogane; yo mongwe yena o ile a bitšwa Jokotane.

²⁶ Ditlogolo tša Jokotane e bile setšhaba sa Almodade le sa Shelefo le sa Hatsarmabete le sa Jerage

²⁷ le sa Hadoramo le sa Usale le sa Dikla

²⁸ le sa Obale le sa Abimaele le sa Sheba

²⁹ le sa Ofire le sa Habila le sa Jobabe. Ka moka ga bona ba tšwile go Jokotane.

³⁰ Naga yeo ba bego ba dula go yona e be e tloga Mesha e fihla Sefare kua mebotong ya ka bohlabela.

³¹ Tšeo ke ditlogolo tša Seme tše di dulago melokong le ditšhabeng tše di fapanego, le dinageng tše di fapanego. Sehlopha se sengwe le se sengwe se bolela polelo ya sona.

³² Ditšhaba tše ka moka ke ditlogolo tša Noa, setšhaba ka setšhaba, go ya ka borakgolokhukhu ba bona bao ba fapanego. Ka morago ga lefula ditšhaba ka moka tša lefase di tšwile barweng ba Noa.

11

¹ Mathomong batho ba lefase lohle ba be ba na le polelo e tee fela, mme ba šomiša mantšu a a swanago.

² Ge ba falalela thoko ya bohlabela ba ile ba fihla molaleng wo mongwe kua Babilonia, gomme ba dula moo.

³ Ba botšana ba re: “Tlang re bopeng ditena mme re di tšhume di butšwe!” Ka gona ba ba le ditena tša go aga, le letsopa la go di swaraganya.

⁴ Ke moo ba itšego: “Bjale a re ageng motse wa tora ye e fihlago legodimong, gore re tle re itirele leina mme re se ka ra šwalalanywa le lefase ka moka.”

⁵ Morena a theoga go tlo bona motse le tora yeo batho bao ba di agilego,

⁶ mme a re: “Bjale bonang, batho ba ka moka ke batho ba tee gomme ba bolela polelo e tee; se e no ba mathomo a se ba tlilego go se dira. Go se gwa ya kae ba tla be ba kgona go dira se sengwe le se sengwe se ba nyakago go se dira.

⁷ A re theogeng re yo hlakahlakanya polelo ya bona gore ba se ke ba kwešišana.”

⁸ Ke moo Morena a ba tšitlantšego gohle lefaseng, mme ba se hlwe ba aga motse wola.

⁹ Motse woo wa bitšwa Babele, ka gobane moo Morena o hlakahlakantše polelo ya batho ka moka, mme go tloga moo a ba tšitlanyetša gohle lefaseng.

¹⁰ Ditlogolo tša Seme šedi: Mengwaga ye mebedi ka morago ga lefula, ge Seme a na le mengwaga ye 100, o ile a ba le morwa, Arpakshade.

¹¹ Ka morago ga fao a phela mengwaga ye mengwe ye 500, mme a ba le bana ba bangwe.

¹² Ge Arpakshade a na le mengwaga ye 35 o ile a ba le morwa, Shelage;

¹³ ka morago ga fao a phela mengwaga ye mengwe ye 403, mme a ba le bana ba bangwe.

¹⁴ Ge Shelage a na le mengwaga ye 30 o ile a ba le morwa, Ebere;

¹⁵ ka morago ga fao a phela mengwaga ye mengwe ye 403, mme a ba le bana ba bangwe.

¹⁶ Ge Ebere a na le mengwaga ye 34 o ile a ba le morwa, Pelege;

¹⁷ ka morago ga fao a phela mengwaga ye mengwe ye 430, mme a ba le bana ba bangwe.

¹⁸ Ge Pelege a na le mengwaga ye 30 o ile a ba le morwa, Regu;

¹⁹ ka morago ga fao a phela mengwaga ye mengwe ye 209, mme a ba le bana ba bangwe.

²⁰ Ge Regu a na le mengwaga ye 32 o ile a ba le morwa, Seruge;

²¹ ka morago ga fao a phela mengwaga ye mengwe ye 207, mme a ba le bana ba bangwe.

²² Ge Seruge a na le mengwaga ye 30 o ile a ba le morwa, Nahoro;

²³ ka morago ga fao a phela mengwaga ye mengwe ye 200, mme a ba le bana ba bangwe.

²⁴ Ge Nahoro a na le mengwaga ye 29 o ile a ba le morwa, Terage;

²⁵ ka morago ga fao a phela mengwaga ye mengwe ye 119, mme a ba le bana ba bangwe.

²⁶ Ge Terage a na le mengwaga ye 70, o ile a ba tatagoAbramo le Nahoro le Harane.

²⁷ Šedi ditlogolo tša Terage yo e bilego tatagoAbramo le Nahoro le Harane: Harane e bile tatagoLote,

²⁸ mme Harane a hwela motseng wa gabo wa Ure kua Babilonia tatagwe a sa phela.

²⁹ Abramo a nyala Sarai, mme Nahoro a nyala Milka, morwedi wa Harane. Morwedi yo mongwe wa Harane e be e le Jiska.

³⁰ Sarai o be a sa belege.

³¹ Terage o ile a tloga motseng wa Ure, kua Babilonia, a na le Abramo, morwagwe, le Lote, setlogolo sa gagwe, morwa wa Harane, le ngwetši ya gagwe, Sarai, mosadi wa Abramo, a leba Kanana. Ba fihla Harane mme ba itulela gona.

³² Terage o ile a hwela moo a na le mengwaga ye 205.

12

¹ Morena o ile a re go Abramo: “Tlogela naga ya geno le meloko ya geno le lapa la tatago mme o ye nageng ye ke tlilego go go laetša yona.

² Ke tla go fa ditlogolo tše ntši, mme ya ba setšhaba se segolo. Ke tla go šegofatša mme ka dira gore leina la gago le tsebalege, gore ba bangwe ba tle ba šegofatšwe ka wena.

³ “Ke tla šegofatša bao ba go šegofatšago, ka rogaka bao ba go rogakago. Ditšhaba tša lefase ka moka di tla nkgopela go di šegofatša bjalo ka ge ke go šegofaditše.”

⁴ Ge Abramo a na le mengwaga ye masome a a šupago a metšo ye mehlano, o ile a tloga Harane ka moo Morena a mmoditšego ka gona; Lote o ile a tloga naye.

⁵ Abramo a tšea mosadi wa gagwe, Sarai, le Lote, morwa morwarragwe, le dithoto ka moka tšeo ba di kgobokantšego, le makgoba ohle ao ba bilego nao Harane, mme ba tloga ba leba nageng ya Kanana. Ge ba fihla Kanana,

⁶ Abramo a phatša naga go fihlela a fihla mohlareng wo mogolo wa More, mo e lego felo mo gokgethwa kua Shekeme. Ka nako yeo Bakanana ba be ba sa dula nageng yeo.

⁷ Morena a iponagatša go Abramo mme a re go yena: “Ye ke naga ye ke tlilego go e fa ditlogolo tša gago.” Ya ba Abramo o agela Morena yo a iponagaditšego go yena aletare fao.

⁸ Ka morago ga moo a hudugela thoko ya borwa dithabeng tšeo di lego ka bohlabela bja motse wa Bethele, gomme a hloma mešaša ya gagwe gare ga Bethele ka bodikela, le Ai ka bohlabela. Moo le gona a aga aletare, a khunamela Morena.

⁹ Ka morago ga fao a fetela pele, a tloga mo a eya mola, a lebile thokong ya borwa bja Kanana.

¹⁰ Go ile gwa wa tlala nageng ya Kanana, gomme ya ba ye šoro mo Abramo a ilego a ba a theogela Egepeta go yo dula moo lebakanyana.

¹¹ Ge a batametše go tshela mollwane go tsena ka Egepeta, a botša mosadi wa gagwe, Sarai, a re: “O mosadi yo mobotse.

¹² Ge Baegepeta ba go bona ba tla re: ‘Ke mosadi wa Abramo’ – ka fao ba tla mpolaya mme wena ba go lesa wa phela.

¹³ O ba botše gore o kgaetšedi ya ka; ke moo ka baka la gago ba tlago ntesa ka phela mme ba ntshwara gabotse.”

¹⁴ Ge a tshela mollwane a tsena ka Egepeta, Baegepeta ba ile ba bona gore mosadi wa gagwe ke yo mobotse kudu.

¹⁵ Ba bangwe ba bakgomana ba mošate ba mmona, gomme ba botša kgoši ka moo e lego yo mobotse ka gona; ka fao a tšewa a išwa mošate.

¹⁶ Ka baka la gagwe kgoši a swara Abramo gabotse, mme a mo fa mehlape ya dihuswane le dikgomo le dipokolo le makgoba le dikamela.

¹⁷ Fela ka gore kgoši a be a tšere Sarai, Morena o ile a mo otla le ba lapa la gagwe ka dikotlo tše kgolo.

¹⁸ Ke moo kgoši a biditšego Abramo, a mmotšiša a re: “A o ntirile eng? Ke ka baka lang o se wa mpotša gore ke mosadi wa gago?

¹⁹ Ke kang o boletše gore ke kgaetšedi ya gago mme wa ntesa ka mo tšea ya ba mosadi wa ka? Mosadi wa gago šoo; mo tšee o tšwe!”

²⁰ Kgoši ya laela banna ba yona go ntšha Abramo ka nageng, yena le mosadi wa gagwe le tšohle tše e bego e le tša gagwe.

13

¹ Abramo o ile go tšwa Egepeta a ya leboa thokong ya borwa bja Kanana le mosadi wa gagwe le tšohle tše e bego e le tša gagwe, gomme Lote a ya naye.

² Abramo e be e le monna wa mohumi kudu a na le diruiwa, gotee le silibera le gauta.

³ O ile a tloga moo gomme a aga mo le mola, a eya Bethele. A fihla kgathe ga Bethele le Ai, felo mola a ilego a hloma mešaša pele

⁴ a ba a aga aletare gona. Moo o ile a khunamela Morena.

⁵ Lote le yena o be a na le diruiwa le la gagwe lapa le bahlanka.

⁶ Naga e be e sa lekane gore bobedi ba ka dula mmogo, ka gore ba be ba na le leruo le lentši kudu.

⁷ Ka gona go ile gwa tsoga diphapano gare ga badiši ba diruiwa tša Abramo le badiši ba diruiwa tša Lote. Ka nako yeo Bakanana le Baperise ba be ba sa dula nageng yeo.

⁸ Ke moo Abramo a itšego go Lote: “A nna le wena re se lwe, badiši ba ka le ba gago le bona ba se lwe, ka gobane re bana ba motho.

⁹ Ka gona a re arogane. Kgetha karolo ye o e nyakago ya naga. O ye go yona mme nna ke tla ya thoko ye nngwe.”

¹⁰ Ke moo Lote a ilego a lealea, gomme a bona gore moedi ka moka wa Jordane go fihlela Tsoare o na le meetse a mantši, go swana le serapa sa Morena, goba go swana le naga ya Egepeta. E be e le pele ga ge Morena a fediša motse wa Sodoma le wa Gomora.

¹¹ Lote a ikgethela moedi wa Jordane ka moka mme a leba thoko ya bohlabela. Ke ka moo banna ba babedi bao ba aroganego ka gona.

¹² Abramo o ile a dula nageng ya Kanana, Lote yena a dula metseng ya ka moeding, mme a hloma mešaša kgauswi le Sodoma.

¹³ Badudi ba Sodoma e be e le ba babe, mme ba fošetša Morena kudu.

¹⁴ Ka morago ga ge Lote a sepetše, Morena o ile a re go Abramo: “Nke o iše mahlo ka gohle o le moo o lego gona.

¹⁵ Naga ka moka ye o e bonago ke tla e fa wena le ditlogolo tša gago, gomme e tla ba ya gago go ya go ile.

¹⁶ Ke tla dira gore ditlogolo tša gago di lekane le lerole la lefase ka bontši; ge eba go na le motho yo a kago bala lerole la lefase, le ditlogolo tša gago a ka di bala.

¹⁷ Eya o sepele le naga yohle, ka gobane ke tlile go go fa yona.”

¹⁸ Ka fao Abramo a hlahlamolla mešaša ya gagwe a yo dula kgauswi le mehlare ye mekgethwa ya Mamre kua Hebrone, gomme moo a agela Morena aletare.

14

¹ Amrafele, kgoši ya Babilonia, le Arioko, kgoši ya Elasara, le Kedore-Laomere, kgoši ya Elamo, le Tidale, kgoši ya Goime,

² di ile tša yo lwa le Bera, kgoši ya Sodoma, le Birsha, kgoši ya Gomora, le Shinabe, kgoši ya Adma, le Semebere, kgoši ya Tseboime, le kgoši ya Bela, goba Tsoare.

³ Dikgoši tše tlhano tše di be di dirile seboka gomme tša kopanya madira a tšona ka moeding wa Sidime, woo bjale e lego Lewatle le le Hwilego.

⁴ Ba be ba hlanketše Kedore-Laomere mengwaga ye lesome le metšo ye mebedi, eupša ka ngwaga wa lesome le metšo ye meraro ba mo tsogela maatla.

⁵ Ka ngwaga wa lesome le metšo ye mene Kedore-Laomere le seboka sa gagwe ba tla ka madira a bona, gomme ba fenya Barafa kua Ashterote-Karnaime, le Basuse kua Hamo, le Baeme molaleng wa Kiriathaime,

⁶ le Bahori dithabeng tša Seire; ba ba rakediša go fihla Ele-Parane, mathomong a lešoka.

⁷ Ke moka ba gomela Kadeshe, yeo e bego e tsebja ka la Ene-Mishpate, ba thopa naga ka moka ya Baamaleke mme ba fenya Baamore bao ba bego ba dula Hatsetsone-Thamare.

⁸ Ke moo kgoši ya Sodoma le ya Gomora le ya Adma le ya Tseboime le ya Bela di ilego tša hlamela madira a tšona ntwa ka moeding wa Sidime, mme tša lwa

⁹ le kgoši ya Elamo le ya Goime le ya Babilonia le ya Elasara, dikgoši tše tlhano tša lwa le dikgoši tše nne.

¹⁰ Moedi o be o tletše dikoti tša sekontiri, gomme ge kgoši ya Sodoma le ya Gomora di leka go tšhaba ntweng tša wela ka moo; fela dikgoši tše dingwe tše tharo tša tšhabela dithabeng.

¹¹ Dikgoši tšela tše nne tša tšea se sengwe le se sengwe Sodoma le Gomora, gotee le dijo, tša tloga natšo.

¹² Lote, morwa wa ngwanaboAbramo, o be a dula Sodoma, ka gona le yena ba mo tšea le tšohle tše e lego tša gagwe.

¹³ Eupša monna yo mongwe a phonyokga gomme a bega ditaba tše go Abramo, Moheberu. Abramo yena o be a dula kgauswi le mehlare ye mekgethwa ye e bego e le ya Mamre, Moamore. Yena le bomorwarragwe, Eshkolo le Anere, e be e le bathuši ba Abramo.

¹⁴ Ge Abramo a ekwa gore morwa wa ngwanabo o thopilwe, a kgoboketša banna ba ba itlhamilego mešašeng ya gagwe, ba makgolo a mararo le ba lesome le metšo ye seswai, mme a wela mohlaleng wa dikgoši tšela tše nne go fihla Dane.

¹⁵ Fao a arola banna ba gagwe dihlopha, a hlasela manaba bošego mme a ba fenya. A ba rakediša go fihla Hoba, ka leboa la Damaskose,

¹⁶ mme a buša thoto ka moka ye e bego e thopile. A ba a buša le morwa wa ngwanabo, Lote, le tše e bego e le tša gagwe, gotee le basadi le mathopša a mangwe.

¹⁷ Ge Abramo a boa go fenya Kedore-Laomere le dikgoši tšela tše dingwe, kgoši ya Sodoma ya tšwa go yo mo gahlanetša kua moeding wa Shabe, woo gape o bitšwago Moedi wa Kgoši.

¹⁸ Melkitsedeke, yo e bego e le kgoši ya Saleme gape e le moprista wa Modimo Yogodimodimo, a tliša senkgwa le beine go Abramo,

¹⁹ a mo šegofatša a re: “A Modimo Yogodimodimo, yo a dirilego legodimo le lefase, a šegofatše Abramo!

²⁰ A Modimo Yogodimodimo a tumišwe, yoo a go fentšhišitšego manaba a gago!” Gomme Abramo a mo fa karolo ya lesome ya thoto yeo.

²¹ Kgoši ya Sodoma ya re go Abramo: “Itšeele thoto mme o mpušetše batho ba ka ka moka.”

²² Abramo a fetola a re: “Ke ena ke tiišitše pele ga Morena, Modimo Yogodimodimo, Mohlodi wa legodimo le lefase,

²³ gore ga go le se tee sa gago se ke tlago itšeela sona, le ge e le tlhale, goba leralana la seeta. Ke moo o ka se tsogego o rile: ‘Ke nna ke humišitšego Abramo.’

²⁴ Nka se itšeele selo. Sa ka e tla ba fela tšeo banna ba ka ba šetšego ba di lle. Fela o lese bathuši ba ka, Anere le Eshkolo le Mamre, ba tšee dikarolo tša bona.”

15

¹ Ka morago ga tšeo Abramo a bona pono gomme a kwa Morena a bolela le yena a re: “O se ke wa boifa, Abramo. Ke tla go phemela kotsing, mme ka go fa moputso wo mogolo.”

² Eupša Abramo a re: “Morena, Mong wa ka, moputso woo o tla nkholang, ka gobane ga ke na bana? Mojalefa wa ka ke Eliesere wa Damaskose a nnoši.

³ Ga se wa mpha bana, gomme yo mongwe wa makgoba a ka o tlile go ja bohwa bja ka.”

⁴ Morena a re go yena: “Lekgoba le le ka se ke la ja lefa la gago; yo e lego morwa wa gago tiitii e tla ba yena mojalefa wa gago.”

⁵ Morena a mo ntšhetša ntle a re: “Lebelela legodimong mme o bale dinaledi, ge o kgona; ditlogolo tša gago di tla ba kaalo.”

⁶ Abramo a dumela go Morena, gomme ka baka la tumelo ya gagwe Morena a mmona e le moloki.

⁷ Ke moo Morena a itšego go yena: “Ke nna Morena yo a go ntšhitšego Ure kua Babilonia go tlo go fa naga ye gore e be bohwa bja gago.”

⁸ Eupša Abramo a re: “Morena, Mong wa ka, nka tseba bjang gore e tla ba ya ka?”

⁹ Morena a mo fetola a re: “Ntlišetše kgomo ya tshadi le pudi le kgapa, ka moka e be tša mengwaga ye meraro, le mokuru le leeba.”

¹⁰ Abramo a tliša diruiwa tšeo go Modimo, a di ripa ka bogare, mme a tšea mephapha a e bea ka go lebana ka methaladi ye mebedi; fela ge e le dinonyana tšela tšona a se ke a di ripaganya.

¹¹ Manong a theogela moo dibelebeleng tšeo, fela Abramo a a raka.

¹² Ge letšatši le dikela, Abramo a swarwa ke boroko bjo bogolo, mme a tlelwa ke poifo le letšhogo.

¹³ Morena a re go yena: “Tseba gore ruri ditlogolo tša gago e tla ba bafaladi nageng e šele; e tla ba makgoba moo gomme ba tla gatelelwa mengwaga ye makgolo a mane.

¹⁴ Eupša ke tla otla setšhaba seo se ba dirago makgoba, gomme ba tla tšea mahumo a mantši ge ba tloga moo nageng yeo.

¹⁵ Ge e le wena, o tla ithobalela ka khutšo wa bolokwa o phetše galelele.

¹⁶ Ba ba tlago boela mo ke moloko wa gago wa bone, mme ka nako yeo ke mo bokgopo bja Baamore bo tlago ba bo gaketše mo ba tlago ba ba swanela gore ke ba otle.”

¹⁷ Ge letšatši le diketše, leswiswi le swere, ka bjako sebešo se se kuelelago muši le serumola se se laumago mollo tša rotoga mme tša feta gare ga mephapha yela ya diruiwa.

¹⁸ Gona moo Morena a dira kgwerano le Abramo a re: “Ke tla fa ditlogolo tša gago naga ye go tloga mollwaneng wa Egepeta go fihlela nokeng ya Yufratese,

¹⁹ go akaretša naga ya Bakene le ya Bakenase le ya Bakadmone

²⁰ le ya Bahete le ya Baperise le ya Barafa

²¹ le ya Baamore le ya Bakanana le ya Bagirgashe le ya Bajebuse.”

16

¹ Mosadi wa Abramo, Sarai, o be a se a belegela Abramo bana. Fela o be a na le lekgoba la mosetsana la Moegepeta leo leina la lona e bego e le Hagare,

² ka gona Sarai a re go Abramo: “Nna Morena o ntimile thari. O reng o sa robale le lekgoba la ka la mosetsana? Mohlomongwe a ka mpelegela ngwana.” Abramo a dumela kgopelo ya Sarai.

³ Ka gona Sarai a mo neela Hagare gore e be mosadi wa gagwe. Ke ge go fetile mengwaga ye lesome Abramo a dutše nageng ya Kanana.

⁴ Abramo a robala le Hagare, mme Hagare a ima. Ge a lemoga gore o imile, a thoma go nyatša Sarai.

⁵ Ke moo Sarai a itšego go Abramo: “Ke molato wa gago ge Hagare a nnyatša. Ke nna ka bonna ke go neetšego yena, gomme e sa le go tloga mola a lemogago gore o imile o a nnyatša. A Morena a ahlole gore nna le wena wa phošo ke mang.”

⁶ Abramo a mo fetola a re: “Go lokile, ke lekgoba la gago mme o laolwa ke wena; dira se o se ratago ka yena.” Ke moka Sarai a swara Hagare gasehlogo, Hagare a ba a tšhaba.

⁷ Morongwa wa Morena a gahlanetša Hagare mothopong kua lešokeng tseleng ya go ya Shure,

⁸ gomme a re: “Hagare, lekgoba la Sarai, a o tšwa kae, mme o ya kae?” A mo fetola a re: “Ke tšhabela mong wa ka, Sarai.”

⁹ Morongwa a re: “Boela go yena gomme o ikokobetše go yena.”

¹⁰ Ke moo a itšego: “Ke tla go fa ditlogolo tše ntši mo e lego gore ga go yo a ka di balago.

¹¹ O tlile go ba le morwa mme o mo ree Ishmaele, ka gobane Morena o kwele sello sa gago sa tlaišego.

¹² Fela morwa wa gago e tla ba monna wa go se tlwaetšege, a etša pitsi; o tla lwa le mang le mang, mme mang le mang o tla lwa naye. O tla phela a hloile meloko ya gabo ka moka.”

¹³ Hagare a ipotšiša a re: “Na e ka ba ruri ke bone Modimo mme ka fela ke phela?” Ka gona a rea Morena yo a boletšego le yena leina la “Modimo yo a bonago”.

¹⁴ Ke ka baka leo batho ba bitšago sediba seo se lego gare ga Kadeshe le Berede “Sediba sa Mophelaampona”.

¹⁵ Hagare a belegela Abramo morwa, mme Abramo a mo rea leina la Ishmaele.

¹⁶ Abramo o be a na le mengwaga ye masome a seswai le metšo ye e selelago ka nako yeo.

17

¹ Ge Abramo a na le mengwaga ye masome a senyane a metšo ye senyane, Morena o ile a iponagatša go yena mme a re: “Ke nna Modimo Ramaatlaohle. O ntheetše mme ka mehla o dire se se lokilego.

² Ke tla dira kgwerano ya ka le wena, mme ka go fa ditlogolo tše ntšintši.”

³ Abramo a itahlela fase ka sefahlego, mme Modimo a re:

⁴ “Še kgwerano ye ke e dirago le wena: O tla ba tatagoditšhaba tše ntši.

⁵ Leina la gago e ka se hlwe e le Abramo, eupša e tla ba Abrahama, ka gore ke go dira tatagoditšhaba tše ntši.

⁶ Ke tla go fa ditlogolo tše ntšintši ya ba ditšhaba, gomme tše dingwe tša tšona e tla ba dikgoši.

⁷ “Ke tla dira kgwerano le wena le ditlogolo tša gago tša meloko ya ka moso, ya ba kgwerano ya neng le neng, ya go re ke tla ba Modimo wa gago le wa ditlogolo tša gago.

⁸ Ke tla fa wena le ditlogolo tša gago yona naga ye bjale o lego mofaladi go yona. Naga ka moka ya Kanana e tla ba ya ditlogolo tša gago go ya go ile, gomme ke tla ba Modimo wa bona.”

⁹ Modimo a re go Abrahama: “Le wena o botegele kgwerano ya ka le wena, wena gotee le ditlogolo tša gago tša meloko ya ka moso.

¹⁰ Sese sešupo sa kgwerano ya ka le wena, wena le ditlogolo tša gago: Motho mang le mang wa monna gare ga lena a bolotšwe.

¹¹ Go tloga bjale le bolotše lesea le lengwe le le lengwe la mošemane ge le na le matšatši a seswai, gotee le makgoba a a tswalwago malapeng a lena, le makgoba a le a rekago go bašele. Se e tla ba sešupo sa kgwerano ya ka le lena.

¹²

¹³ Yo mongwe le yo mongwe a bolotšwe. Leswao le la mmeleng e tla ba sešupo sa kgwerano ya ka le lena ya neng le neng.

¹⁴ Mošemane goba monna ofe le ofe yo a sego a bolotšwa e ka se hlwe e le yo mongwe wa setšhaba sa ka, ka gore ga se a botegela kgwerano ya ka.”

¹⁵ Modimo a re go Abrahama: “O se ke wa hlwa o bitša mosadi wa gago Sarai; go tloga bjale leina la gagwe ke Sara.

¹⁶ Ke tla mo šegofatša gomme ke tla go fa morwa ka yena. Ke tla mo šegofatša gomme e tla ba mmagoditšhaba, mme go tla ba le dikgoši gare ga ditlogolo tša gagwe.”

¹⁷ Abrahama a itahlela fase ka sefahlego a sega ka pelong a re: “Na monna wa mengwaga ye lekgolo a ka tswala ngwana? A Sara a ka ba le ngwana a na le mengwaga ye masome a senyane?”

¹⁸ Abrahama a re go Modimo: “Hle, a Ishmaele e no ba mojalefa wa ka.”

¹⁹ Eupša Modimo a re: “Aowa, mosadi wa gago, Sara, o tla go belegela morwa gomme o mo ree leina la Isaka. Ke tla botegela kgwerano ya ka le yena le ditlogolo tša gagwe. Ke kgwerano ya go ya go ile.

²⁰ Ke kwele kgopelo ya gago mabapi le Ishmaele, ka fao ke tla mo šegofatša ka mo fa bana ba bantši le ditlogolo tše ntši. E tla ba tatagobabuši ba lesome le metšo ye mebedi, mme ke tla dira ditlogolo tša gagwe setšhaba se segolo.

²¹ Eupša ke tla botegela kgwerano ya ka le morwa wa gago, Isaka, yo a tlago belegwa ke Sara ka tšona nako tše ngwaga wo o tlago.”

²² Ge Modimo a feditše go bolela le Abrahama, o ile a mo tlogela, a rotoga.

²³ Ka lona letšatši leo Abrahama a phetha taelo ya Modimo, a bolotša morwa wa gagwe, Ishmaele, le bašemane le banna ka moka ba lapa la gagwe, gotee le makgoba a a tswetšwego lapeng la gagwe, le ao a a rekilego.

²⁴ Abrahama o be a na le mengwaga ye masome a senyane a metšo ye senyane ge a bolotšwa,

²⁵ mme morwa wa gagwe, Ishmaele, o be a na le mengwaga ye lesome le ye meraro.

²⁶ Bobedi bja bona ba boloditšwe ka letšatši le tee,

²⁷ gotee le makgoba ohle a Abrahama.

18

¹ Morena o ile a iponagatša go Abrahama mehlareng ye mekgethwa ya Mamre. Abrahama o be a dutše mojakong wa mošaša wa gagwe nakong ya ge letšatši le fiša tšhiritšhiri.

² Ya re ge a iša mahlo a bona banna ba bararo ba eme moo. Ge a ba bona a kganyelela go ba gahlanetša. A obamela fase,

³ a re: “Barena, hle, se mpheteng, nna, mohlanka wa lena.

⁴ A ke yo le tšeela meetse le tle le hlape maoto; le ka khutša ka fase ga mohlare wo.

⁵ Ke tla ba ka le tlela le dijonyana tša go le lapološa, le tsebo tšwela pele le leeto la lena, ka gobane le fetile mo lapeng la mohlanka wa lena.” Ba mo fetola ba re: “Go lokile.”

⁶ Abrahama a akgofela mošašeng a re go Sara: “Akgofa o tšee mokotlana wa bupi bja mathume, o bo dube, o apee dinkgwa.”

⁷ Ke moo a kitimetšego mohlapeng mme a kgetha namane ya lerojana ya go nona, a e neela mohlanka, mme yoo a itlhaganela a e hlaba.

⁸ Abrahama a tšea lebebe le maswi le nama a di bea pele ga banna bale ka moo fase ga mohlare, ba ja, yena a ba emaemela.

⁹ Ke moo ba mmotšišitšego ba re: “Mosadi wa gago, Sara, o kae?” A ba fetola a re: “O ka mola mošašeng.”

¹⁰ Yo mongwe wa bona a re: “Ngwaga wo o tlago ka nako ye ke tla boa mo, gomme mosadi wa gago, Sara, o tla be a na le morwa.” Sara o be a le ka morago ga gagwe, mojakong wa mošaša, a theeditše.

¹¹ Abrahama le Sara ba be ba tšofetše kudu, gomme Sara o be a sa hlwe a bona kgwedi.

¹² Ka gona Sara a itshegela a re: “Na nka re ke kgekotše ke le bjale ka hlwa ke sa kgona go ipshina ka go robala le monna? Monna wa ka le yena o tšofetše.”

¹³ Ke moo Morena a botšišitšego Abrahama a re: “Sara o reng a sega ge a re: ‘Na nka re ke tšofetše ka mokgwa wo ka hlwa ke sa ba le ngwana?’

¹⁴ A go na le seo se ka šitago Morena? Bjalo ka ge ke boletše, ngwaga wo o tlago ka nako ye ke tla boa mo, mme Sara o tla be a na le morwa.”

¹⁵ Ka ge Sara a be a boifa o ile a latola a re: “Ga se ka sega.” Morena a re: “Ee, o segile, hle.”

¹⁶ Ke moo banna bao ba tlogilego ba ya felo moo ba ka rego ge ba le gona ba okamela motse wa Sodoma, mme Abrahama a ba felegetša.

¹⁷ Gomme Morena ka pelong a re: “Na nka napa ka utela Abrahama seo ke tlilego go se dira?

¹⁸ Ditlogolo tša gagwe e tla ba setšhaba se segolo se maatla, gomme ditšhaba tša lefase ka moka di tla nkgopela go di šegofatša bjalo ka ge ke mo šegofaditše.

¹⁹ Ke mo kgethile gore a laye barwa ba gagwe le ditlogolo tša gagwe gore ba ntheetše, mme ba dire tše di swanetšego le tše di lokilego. Ge ba ka dira bjalo, ke tla mo direla tšohle tše ke mo holofeditšego tšona.”

²⁰ Ke moo Morena a itšego go Abrahama: “Motse wa Sodoma le wa Gomora e begwa ka tše di šiišago, gomme sebe sa badudi ba gona ke se segolo kudu.

²¹ Ke swanetše go theoga go yo bona ge eba tše ke kwelego ba begwa ka tšona ke nnete; gomme ge e se nnete ke tla tseba.”

²² Ke moo banna ba babedi bao ba tlogilego ba leba Sodoma, Morena yena a šala le Abrahama.

²³ Abrahama a batamela Morena, a mmotšiša a re: “A ruri o yo fediša batho ba ba se nago molato mmogo le bao ba nago le molato?

²⁴ Ge go na le batho ba masome a fetšago seatla ba ba se nago molato motseng, a o ka fediša motse ka moka? A o ka se o swarele ka baka la bao ba masome a mahlano?

²⁵ Hle, taba ye bjalo o se e dire, wa bolaya baloki le bakgopo gotee, wa swara baloki le bakgopo go swana. Hle, yeo taba o se ke wa e dira! Ga ke re Moahlodi wa lefase ka moka o swanetše go dira ka toka?”

²⁶ Morena a mo fetola a re: “Ge nka hwetša baloki ba masome a mahlano kua Sodoma, ke tla swarela motse ka moka ka baka la bona.”

²⁷ Abrahama a buša a re: “Hle, o ntshwarele ge ke fela ke bolela le wena, Mong wa ka. Ke nna motho fela, ga ke na tokelo ya go bolela selo.

²⁸ Mohlomongwe go ka ba le baloki ba masome a mane le ba bahlano fela, e sego ba masome a mahlano. A o tla fediša motse ka moka ka gore go hlaelelwa ba bahlano?” Morena a mo fetola a re: “Nka se fediše motse woo ge nka hwetša baloki ba masome a mane le ba bahlano.”

²⁹ Abrahama a tšwela pele a re: “Mohlomongwe e tla ba ba masome a mane fela.” Morena a mo fetola a re: “Nka se o fediše ge go na le ba masome a mane.”

³⁰ Abrahama a re: “Hle, o se ke wa mpefelelwa, Mong wa ka, ge ke bolela gape. Mohlomongwe e tla ba ba masome a mararo fela.” Morena a mo fetola a re: “Nka se o fediše ge nka hwetša ba masome a mararo.”

³¹ Abrahama a re: “Hle, o ntshwarele ge ke sa fela ke bolela nago, Mong wa ka. Mohlomongwe go ka ba le ba masome a mabedi fela.” Morena a re: “Nka se fediše motse woo ge nka hwetša ba masome a mabedi fela.”

³² Abrahama a re: “Hle, o se ke wa mpefelelwa, Mong wa ka, mme ke tla bolela gatee fela. Mohlomongwe go ka hwetšwa ba lesome fela.” Morena a re: “Nka se o fediše ge e le ba lesome.”

³³ Ya re ge Morena a feditše go bolela le Abrahama a sepela, mme Abrahama a boela gae.

19

¹ Ge barongwa bale ba babedi ba fihla Sodoma mantšiboa ao, Lote o be a dutše kgorong ya motse. Ge a ba bona a emelela a ya go ba gahlanetša. A obamela fase pele ga bona,

² a re: “Barena, a re yeng ngwakong wa ka, nna, mohlanka wa lena. Le hlape maoto, le robale gona. E re ka moswane le tsogele tseleng.” Bona ba mo fetola ba re: “Aowa, re tla robala mo kgorong ya motse.”

³ A fela a ba phegeletše, ba ba ba ya le yena ngwakong wa gagwe. A laela bahlanka ba gagwe gore ba ba apeele dijo le dinkgwa tše di se nago komelo, gomme baeng ba ja.

⁴ Pele ga ge baeng ba eya malaong, banna ba Sodoma ba dikanetša ngwako. Banna ka moka ba motse, masogana le bakgalabje, ba be ba le moo.

⁵ Ba goeletša Lote ba re: “Banna ba ba tlilego mo ga gago bošegong bjono ba kae? Ba ntšhe o ba tliše go rena gore re tle re ba robale!”

⁶ Lote a tšwa, gomme a tswalela lemati.

⁷ A bolela le bona a re: “Bagešo, ke a le rapela, le se ke la dira taba ye mpe ka tsela ye!

⁸ Bonang, ke na le barwedi ba babedi bao ba sego ba ke ba robala le monna. A ke le neeleng bona mme le ka dira seo le se ratago ka bona. Fela banna ba le se ke la ba dira selo; ke baeng ba lapa la ka, gomme ke swanetše go ba šireletša.”

⁹ Eupša bona ba re: “Re šuthelele, mofaladi tena! O mang wena o ka re botšago se re swanetšego go se dira? Šutha, go sego bjalo re tla go swara gampe go feta bona.” Ba kgorometša Lote, mme ba šuthela pele go pšhatla lemati.

¹⁰ Fela banna ba babedi bale ba ka gare ba ntšha matsogo mme ba gogela Lote ka ngwakong, ba tswalela lemati.

¹¹ Ba napa ba foufatša banna ka moka ba ba lego ka ntle moo ba ilego ba šitwa ke go bona lemati.

¹² Banna bao ba babedi ba re go Lote: “Ge eba o na le yo mongwe mo, e ka ba barwa, barwedi, bakgonyana, goba meloko ye mengwe mo motseng wo, ba ntšhe,

¹³ ka gobane re tlile go fediša felo fa. Morena o kwele tše di šiišago tše batho ba ba begwago ka tšona, mme o re romile go tlo fediša Sodoma.”

¹⁴ Ke moo Lote a ilego go bakgonyana ba gagwe, a re go bona: “Itlhaganeleng le tšweng mo; Morena o tlile go fediša felo fa.” Eupša bona ba gopola gore o a swaswa.

¹⁵ Ka masa barongwa ba tutuetša Lote ba re: “Itlhaganele! Tšea mosadi le barwedi ba gago ka babedi o tšwe, gore le se ke la tla la bolawa ge motse o fedišwa.”

¹⁶ Lote a fela a diega. Le ge go le bjalo, Morena a mo šokela; ka gona banna bao ba ba tšea ka matsogo, yena le mosadi le barwedi ba gagwe ka babedi, mme ba ba ntšha motseng.

¹⁷ Ke moo yo mongwe wa barongwa a itšego: “Tšhabang le iphološe! Le se ke la lebelela morago goba la ema ka moeding. Le tšhabeleng dithabeng gore le se ke la tla la bolawa.”

¹⁸ Eupša Lote a mo fetola a re: “Aowa hle, mong wa ka, o se ke wa re kganyediša ka mokgwa woo.

¹⁹ Bona, o bile yo botho go nna, o ntšhoketše kudu mme wa mphološa. Fela nka se kgone go tšhabela kua dithabeng; nka welwa ke masetlapelo ka hwa pele ga ge ke fihla.

²⁰ Motse šole o kgauswi mo e lego gore go wona nka fihla, ebile ke motsana wo monnyane. A ke tšhabele go wona – ga ke re ke motse wo monnyane – mme mola ke tla bolokega.”

²¹ Morongwa a re: “Go lokile. Nka se fediše motse woo.

²² Itlhaganele! Tšhaba! Nka se dire selo pele ga ge o fihla gona.” Ka ge Lote a rile ke wo monnyane, motse woo o ile wa rewa leina la Tsoare.

²³ Ge Lote a fihla Tsoare ke ge letšatši le hlaba.

²⁴ Morena a neša tshebela ye e tukago godimo ga motse wa Sodoma le wa Gomora,

²⁵ mme a e fiša le moedi ka moka, gotee le batho ba fao ka moka le tšohle tše di bego di metše nageng.

²⁶ Mosadi wa Lote yena o ile a lebelela morago, mme a fetošwa sehlwaseeme sa letswai.

²⁷ Ka letšatši le le latelago Abrahama a tsogela felo fale a bego a na le Morena gona.

²⁸ Ge a iša mahlo Sodoma le Gomora le moeding ka moka a bona muši o thunya nageng, o le bjalo ka muši wo o tšwago moubelong wo mogolo.

²⁹ Ge Modimo a fediša metse ya moeding moo Lote a bego a dula gona, o ile a gopola Abrahama, mme a tšhabiša Lote.

³⁰ Ka ge Lote a be a boifa go dula Tsoare, yena le barwedi ba gagwe ka babedi ba ile ba rotogela dithabeng, gomme fao ba dula ka leweng.

³¹ Morwedi yo mogolo a re go ngwanabo: “Tatagorena o a tšofala, gomme ga go banna mo nageng ye ba ba tlago tla ba robala le rena bjalo ka ge e le setlwaedi lefaseng ka moka.

³² Tlaa re tagiše tatagorena beine, gore re tle re kgone go robala naye mme re be le bana le yena.”

³³ Bošego bjoo ba mo noša beine, mme morwedi yo mogolo a robala naye; fela Lote a se tsebe taba yeo.

³⁴ Ka letšatši le le latelago morwedi yo mogolo a re go ngwanabo: “Nna ke robetše naye bošego bja go feta; bjale a re mo tagiše beine gape bošego bjo, mme le wena o robale naye gore re be le bana le tatagorena.”

³⁵ Ka gona le bošego bjoo ba mo tagiša beine, mme morwedi yo monnyane a robala naye. Gapegape a se tsebe taba yeo.

³⁶ Ka tsela ye barwedi ba Lote ka bobedi ba imišwa ke tatagobona.

³⁷ Morwedi yo mogolo a ba le morwa yo a ilego a mo rea leina la Moaba. Yena e bile rakgolokhukhu wa Bamoaba ba lehono.

³⁸ Morwedi yo monnyane le yena a ba le morwa yo a ilego a mo rea leina la Bene-Ami. Yena e bile rakgolokhukhu wa Baamone ba lehono.

20

¹ Abrahama o ile a tloga Mamre a ya seleteng sa ka borwa bja Kanana, mme a dula gare ga Kadeshe le Shure. Mola a falaletše Gerare

² o ile a re mosadi wa gagwe, Sara, ke kgaetšedi ya gagwe. Ka gona, Kgoši Abimeleke wa Gerare a roma bahlanka ba tšea Sara.

³ Ya re bošego Modimo a iponagatša go yena ka toro a re: “O kgauswi le go hwa, ka gore o tšere mosadi yo; ke mosadi wa monna yo mongwe.”

⁴ Fela Abimeleke o be a sešo a robala naye, gomme a re: “Mong wa ka, ga ke na molato! A bjale o tla mpolaya le setšhaba sa ka?

⁵ Abrahama ke yena a itšego ke kgaetšedi ya gagwe, mme le yena mosadi a re Abrahama ke kgaetšedi ya gagwe. Ke dirile taba ye ke se na bomenetša, gomme ga ke ipone molato.”

⁶ Modimo a mo fetola torong yeo a re: “Ee, le nna ke a tseba gore o dirile taba yeo o se na bomenetša; ka fao ke go thibetše gore o se mphošetše ka go robala naye.

⁷ Bjale ge, mmušetše go monna wa gagwe. Yena ke moprofeta, mme o tla go rapelela gore o se ke wa hwa. Eupša ge o sa mmušetše, tseba gore o tlilo hwa, wena le setšhaba sa gago ka moka.”

⁸ Ka le le latelago Abimeleke a tsoga e sa le bošego a bitša bakgomana ba gagwe ka moka, a ba botša tšohle tšeo di hlagilego, mme ba tšhoga kudu.

⁹ Abimeleke a bitša Abrahama, a mmotšiša a re: “Ke taba mang ye o re dirilego yona ye? Ke go fošeditše ka eng ge e bile o hlolela nna le mmušo wa ka molato wo mokaaka? O ntirile taba ye e sa dirwego.

¹⁰ Ke ka baka lang o dirile taba ye?”

¹¹ Abrahama a mo fetola a re: “Ke be ke gopola gore ga go na le motho yo a boifago Modimo mo, le gore ba tla mpolaya gore ba tšee mosadi wa ka.

¹² Yena gabotsebotse ke kgaetšedi ya ka. Ke morwedi wa tate, fela e sego wa mme, gomme ke mo nyetše.

¹³ Ka gona, ge Modimo a nntšha lapeng la tate gore ke ralale le dinaga, ke ile ka re go mosadi wa ka: ‘Se o ka bontšhago ka sona gore o a nthata sese: Gohle mo re fihlago gona o re ke nna kgaetšedi ya gago.’ ”

¹⁴ Ke moo Abimeleke a bušeditšego Sara go Abrahama, a mo fa le dihuswane, dikgomo le makgoba.

¹⁵ A re go Abrahama: “Naga ya ka še; dula mo o go kganyogago.”

¹⁶ A re go Sara: “Ke fa kgaetšedi ya gago dipapetlana tša silibera tše sekete e le bohlatse go bohle ba ba nago le wena gore ga o ne molato; yo mongwe le yo mongwe o tla tseba gore ga go sebe se o se dirilego.”

¹⁷ Ka baka la seo se hlagetšego Sara, mosadi wa Abrahama, Morena o be a dirile gore mosadi yo mongwe le yo mongwe lapeng la Abimeleke a se kgone go ba le bana. Ka gona Abrahama a rapelela Abimeleke, mme Modimo a mo fodiša, a fodiša le mosadi wa gagwe le makgoba a basadi gore ba kgone go ba le bana.

21

¹ Morena o ile a šegofatša Sara, bjalo ka ge a be a holofeditše,

² gomme Sara a ima, a belegela Abrahama morwa mola Abrahama a tšofetše. Mošemanyana a belegwa ka nako yeo Modimo a bego a boletše gore o tla belegwa ka yona.

³ Abrahama a mo rea leina la Isaka.

⁴ Ge lesea le na le matšatši a seswai Abrahama a le bolotša, bjalo ka ge Modimo a be a mo laetše.

⁵ Abrahama o be a na le mengwaga ye lekgolo ge Isaka a belegwa.

⁶ Sara a re: “Modimo o ntlholetše lesego. Yo mongwe le yo mongwe yo a kwago taba ye o tla sega le nna.”

⁷ A tlaleletša ka go re: “Ke mang yo a ka bego a boditše Abrahama a re Sara o tla antšha bana? Le ge go le bjalo, ke mmelegetše morwa mola a tšofetše.”

⁸ Ngwana a gola, gomme ka letšatši le a tshwešwago ka lona Abrahama a dira mokete wo mogolo.

⁹ Ka letšatši le lengwe Ishmaele yoo Hagare, Moegepeta, a bego a mmelegetše Abrahama, o be a bapala le morwa wa Sara, Isaka. Sara a ba bona gomme a re go Abrahama: “Raka lekgoba le la mosetsana le morwa wa lona. Morwa wa lekgoba le ga a swanela go ja bohwa gotee le morwa wa ka, Isaka.”

¹⁰

¹¹ Taba yeo ya nyamiša Abrahama kudu, ka gobane Ishmaele le yena e be e le morwa wa gagwe.

¹² Eupša Modimo a re go Abrahama: “O se ke wa tshwenyega ka mošemanyana le ka lekgoba la gago, Hagare. Dira se sengwe le se sengwe seo Sara a go botšago sona, ka gobane ke ka Isaka moo o tlago ba le ditlogolo.

¹³ Fela morwa wa lekgoba le la mosetsana le yena ke tla mo fa bana ba bantši, gore e tle e be setšhaba, ka gobane le yena ke morwa wa gago.”

¹⁴ Ka le le latelago Abrahama a tsoga e sa le bošego, a neela Hagare dijo le lekuka la meetse. A mmeleša ngwana, a mo fa tsela. Hagare a tloga a ralala le lešoka la Beresheba.

¹⁵ Ge a feletšwe ke meetse, a tlogela ngwana ka fase ga mohlašana,

¹⁶ a yo dula fase bokgole bjo e ka bago dimetara tše lekgolo. Ka pelong a re: “Nka se kgotlelele go bona ngwana a ehwa.” Mola a dutše fao a thoma go lla.

¹⁷ Modimo a kwa ngwana a lla, mme morongwa wa Modimo a bolela le Hagare a le legodimong a re: “A o tshwentšwe ke eng, Hagare? O se ke wa boifa. Modimo o kwele mošemanyana a lla.

¹⁸ Emelela, o ye o mo kuke, o mo homotše. Ke tla dira ditlogolo tša gagwe setšhaba se segolo.”

¹⁹ Ke moo Modimo a mmutšego mahlo, gomme a bona sediba. A ya a tlatša lekuka lela ka meetse, a noša mošemanyana.

²⁰ Modimo a ba le mošemanyana yoo ge a gola; a phela lešokeng gomme ya ba setsebi sa mosebe.

²¹ Mmagwe a mo tšeela mosadi wa Moegepeta.

²² Yona mehleng yeo Abimeleke a ya le Pigole, molaodi wa madira a gagwe, go Abrahama a re: “Modimo o na le wena go tšohle tše o di dirago.

²³ Ka gona nkenele fa pele ga Modimo gore o ka se nthadie, nna le bana ba ka le ditlogolo tša ka. Ke go botegetše, ka fao ena gore le wena o tla mpotegela wa botegela le naga ye o falaletšego go yona.”

²⁴ Abrahama a re: “Ke a ena.”

²⁵ Gomme Abrahama a ipelaetša go Abimeleke ka sediba se bahlanka ba Abimeleke ba bego ba se thopile.

²⁶ Abimeleke a re: “Ga ke tsebe gore ke mang yo a dirilego taba yeo. Ga se wa ka wa mpotša, gomme ke la mathomo ke ekwa taba yeo.”

²⁷ Ke moo Abrahama a neetšego Abimeleke dihuswane le dikgomo, gomme bobedi bja bona ba dira kwano.

²⁸ Abrahama a hlaola dikwanyana tše di šupago tša ditshadi mohlapeng wa gagwe,

²⁹ gomme Abimeleke a mmotšiša a re: “O diretšeng taba yeo?”

³⁰ Abrahama a mo fetola a re: “Tšea dikwanyana tše di šupago tše. Ka go dira seo o dumela gore ke nna ke epilego sediba se.”

³¹ Ka gona felo fao gwa bitšwa Beresheba, ka gobane ke fao bobedi bja bona ba enelanego.

³² Ka morago ga ge ba enelane bjalo fao Beresheba, Abimeleke le Pigole ba boela Filistia.

³³ Abrahama a bjala mohlare wa motamariske moo Beresheba, gomme a khunamela Morena, Modimo wa go sa felego.

³⁴ Abrahama o dutše moo Filistia lebaka le letelele.

22

¹ Ka morago ga lebaka Modimo a leka Abrahama; a mmitša a re: “Abrahama!” Yena a araba a re: “Ke nna yo!”

² Modimo a re: “Tšea morwa wa gago, yo e lego yena a nnoši, Isaka, yo o mo ratago kudu, o ye nageng ya Moria. Fao o ntirele sehlabelo sa go tšhungwa ka moka ka yena thabeng ye ke tlago go laetša yona.”

³ Ka le le latelago e sa le bošego Abrahama a phapha dikgong tša sehlabelo, a saletša pokolo ya gagwe, gomme a tloga le Isaka le bahlanka ba babedi. Ba leba felo fao Modimo a mmoditšego gona.

⁴ Ka letšatši la boraro Abrahama a bona felo fao a sa le kgojana.

⁵ Ke moo a itšego go bahlanka: “Šalang mo le pokolo ye. Nna le mošemanyana re tla fetela mola go yo rapela, mme ka morago ra boela mo go lena.”

⁶ Abrahama a rweša Isaka dikgong tša sehlabelo, gomme yena a swara thipa le magala a go gotša mollo. Ge bobedi bja bona ba swere tsela mmogo,

⁷ Isaka a re go tatagwe: “Tate!” Tatagwe a araba a re: “Eye, ngwanaka.” Isaka a mmotšiša a re: “Mollo le dikgong šedi, kwanyana ya sehlabelo yona e kae?”

⁸ Abrahama a mo fetola a re: “Modimo o tla inyakela yona, ngwanaka.” Gomme bobedi bja bona ba fela ba swere tsela mmogo.

⁹ Ge ba fihla felo fao Modimo a mmoditšego gona, Abrahama a aga aletare, gomme a beakanya dikgong godimo ga yona. A tlema morwa wa gagwe gomme a mmea aletareng godimo ga dikgong.

¹⁰ Ke moka a tšea thipa gore a mmolaye.

¹¹ Eupša morongwa wa Morena a mmitša a le legodimong a re: “Abrahama, Abrahama!” Yena a araba a re: “Ke nna yo.”

¹² Morongwa a re: “O se gobatše mošemanyana yoo goba wa mo dira selo. Bjale ke a tseba gore o boifa Modimo, ka gobane ga se wa gana go mo neela morwa wa gago a nnoši.”

¹³ Abrahama ge a lebelela a bona kgapa e tantšwe ka sethokgwaneng ka dinaka. A ya a e tšea mme a dira sehlabelo sa go tšhungwa ka moka ka yona legatong la morwa wa gagwe.

¹⁴ Abrahama a rea felo fao leina la “Morena o a fa.” Gomme le lehono batho ba sa re: “Thabeng ya Morena o a fa.”

¹⁵ Morongwa wa Morena a bitša Abrahama la bobedi a le legodimong a re:

¹⁶ “Morena o re: ‘Ke ena ka nna mong gore ka ge o dirile taba ye gomme o se wa ntima morwa wa gago a nnoši,

¹⁷ ke tla go šegofatša kudu, ka go fa le ditlogolo tše ntši bjalo ka dinaledi tša legodimo goba dithorwana tša lešabašaba lebopong la lewatle. Ditlogolo tša gago di tla fenya manaba a tšona.

¹⁸ Ditšhaba tša lefase ka moka di tla nkgopela go di šegofatša bjalo ka ge ke šegofaditše ditlogolo tša gago, ka gobane o phethile taelo ya ka.’ ”

¹⁹ Abrahama a boela go bahlanka ba gagwe, gomme ba tloga mmogo ba ya Beresheba, mme Abrahama a dula fao.

²⁰ Ka morago ga lebaka Abrahama a kwa gore le Milka o belegetše Nahoro, ngwanabo, bana:

²¹ Utse, wa mathomo, le Buse, ngwanabo, le Kemuele, tatagoAramo,

²² le Kesede le Haso le Pildashe le Jidelafo le Bethuele,

²³ tatagoRebeka. Milka o belegetše Nahoro, ngwanaboAbrahama, barwa bao ba seswai.

²⁴ Reuma, motlabo wa Nahoro, yena o belege Tebage le Gahama le Tahashe le Maaka.

23

¹ Sara o ile a phela mengwaga ye lekgolo le masome a mabedi le metšo ye e šupago.

² O hwetše Kiriate-Arba, e lego Hebrone, nageng ya Kanana, mme Abrahama a mo ilela.

³ O ile a tloga felo fao setopo sa mosadi wa gagwe se bego se le gona, gomme a ya go Bahete a re:

⁴ “Ke nna mošele le mofaladi gare ga lena; nthekišetšeng naga gore ke kgone go boloka mosadi wa ka.”

⁵ Bona ba mo fetola ba re:

⁶ “Hle, re theetše, morena. O mokgomana yo maatla gare ga rena; boloka mosadi wa gago lebitleng le le phalago mabitla a re nago le ona. Mo gare ga rena ga go yo a ka se thabelego go go fa lebitla gore o boloke mohu wa gago.”

⁷ Ke moo Abrahama a obamilego pele ga bona,

⁸ a re: “Ge le ntumelela gore ke boloke mosadi wa ka mo, hle, mpoleleleng le Efrone, morwa wa Tsohare,

⁹ gore a nthekišetše lewa la Makapela leo le lego ka lešing la tšhemo ya gagwe. Le mo kgopeleng gore a nthekišetše lona ka theko ye e le lekanego le le gona mo, gore e tle e be felo ga ka ga polokelo.”

¹⁰ Efrone yena o be a dutše le Bahete ba bangwe kgorong ya motse; a fetola a kwewa ke yo mongwe le yo mongwe fao a re:

¹¹ “Theetša, morena, ke tla go fa tšhemo ka moka le lewa leo le lego go yona. Mo pele ga batho ba gešo ke tla go fa yona gore o kgone go boloka mosadi wa gago.”

¹² Eupša Abrahama a obama pele ga badudi ba moo,

¹³ a araba Efrone bohle ba ekwa a re: “Hle, anke o ntheetše. Ke nyaka go e reka. Amogela tefelo ya ka, gomme ke tla boloka mosadi wa ka moo.”

¹⁴ Efrone a mo fetola a re:

¹⁵ “Morena, nke o ntheetše. Na re ka napa ra hlwa re ngangišana ka tšhemo ye e jago fela dipapetlana tša silibera tše makgolo a mane? Boloka mosadi wa gago go yona.”

¹⁶ Abrahama a dumela, mme a ela tšhelete ye Efrone a e boletšego a kwewa ke batho – dipapetlana tša silibera tše makgolo a mane, go ya ka dikeloboima tša semmušo tše di šomišwago ke bagwebi.

¹⁷ Ke ka moo tšhemo yela e bego e le ya Efrone kua Makapela, ka bohlabela bja Mamre, e bilego ya Abrahama ka gona. E be e le tšhemo le lewa leo le bego le le go yona le mehlare ka moka go fihlela lešing la tšhemo.

¹⁸ Thekišetšano yeo e ile ya phethwa pele ga Bahete ka moka bao ba bego ba le gona kgorong.

¹⁹ Ka morago ga moo Abrahama a yo boloka mosadi wa gagwe, Sara, ka leweng leo nageng ya Kanana.

²⁰ Ka gona tšhemo yeo e bego e le ya Bahete le lewa le le lego go yona ya ba serapa sa Abrahama sa go bolokela bahu.

24

¹ Bjale Abrahama o be a tšofetše kudu, gomme Morena o be a mo šegofaditše dilong ka moka.

² A bolela le mohlanka wa gagwe yo mogolo yo a bego a hlokometše tšohle tše a bego a na le tšona a re: “Nke o tsenye seatla sa gago gare ga dirope tša ka, o ene.

³ Ke nyaka go go eniša ka Morena, Modimo wa legodimo le lefase, gore o ka se kgethele morwa wa ka mosadi gare ga batho ba ba mo Kanana.

⁴ O boele nageng ye ke tswetšwego go yona, gomme o tšeele morwa wa ka, Isaka, mosadi melokong yešo.”

⁵ Eupša mohlanka a mmotšiša a re: “Bjale ge mosetsana yoo a ka se dumele go tloga ga gabo go tla le nna nageng ye, na ke bušetše morwa wa gago nageng yela o tšwago go yona?”

⁶ Abrahama a mo fetola a re: “Morwa wa ka yena o se ke wa ba wa leka go mmušetša kua!

⁷ Morena, Modimo wa legodimo, o nntšhitše lapeng la tate le nageng ya gešo, gomme a nkenela gore o tla neela ditlogolo tša ka naga ye. O tla roma morongwa wa gagwe a go etelela pele, gore o nyalele morwa wa ka mosadi fao.

⁸ Ge mosetsana yoo a ka gana go tla le wena, o tla bofologa kenong ye. Morwa wa ka yena o se ke wa ba wa mmušetša kua.”

⁹ Ka fao mohlanka yoo a bea seatla gare ga dirope tša Abrahama, mong wa gagwe, gomme a ena gore o tla dira seo Abrahama a se kgopetšego.

¹⁰ Mohlanka yoo a tšea dikamela tše lesome tša mong wa gagwe, a tšea le dimpho tša mehutahuta, gomme a ya motseng wa gaboNahoro kua Mesopotamia.

¹¹ Ge a fihla a khunamiša dikamela sedibeng ka ntle ga motse. E be e le ka merithi ye megolo, nako yeo basadi ba bego ba etla go ga meetse ka yona.

¹² A rapela a re: “Morena, Modimo wa mong wa ka, Abrahama, mphe mahlatse lehono mme o botegele mong wa ka.

¹³ Ke nna yo mo sedibeng seo makgarebe a motse wo a tlago tla go ga meetse.

¹⁴ Ke tla re go yo mongwe wa bona: ‘Hle, sekamiša moeta wa gago gomme o nnoše meetse.’ Ge a ka re: ‘Nwaa, gomme ke tla gela le dikamela tša gago meetse,’ a e be yena yoo o mmeetšego mohlanka wa gago, Isaka. Ge taba ye e ka direga, ke tla tseba gore o botegetše mong wa ka.”

¹⁵ A sešo a fetša go rapela, Rebeka a fihla a beile moeta wa meetse legetleng. Yena e be e le morwedi wa Bethuele, yo e bego e le morwa wa ngwanaboAbrahama, Nahoro, le mosadi wa gagwe, Milka.

¹⁶ E be e le mosetsana yo mobotse kudu, gomme a se a ke a robala le monna. A theogela sedibeng, a tlatša moeta wa gagwe mme a rotoga.

¹⁷ Mohlanka yola a kganyelela go mo gahlanetša gomme a re: “Hle, nnoše meetse moeteng wa gago.”

¹⁸ Mosetsana a re: “O ka nwa, morena,” gomme ka bjako mosetsana a rola moeta legetleng mme a o swareletša ge mohlanka a enwa.

¹⁹ Ge a kgotšwe, mosetsana a re: “Ke tla gela le dikamela tša gago meetse gore di nwe di kgolwe.”

²⁰ Ka bjako a tšhollela meetse ka legopong la diruiwa mme a kganyelela sedibeng go yo di gela gape, go fihlela a nošitše dikamela tša mohlanka yola ka moka.

²¹ Monna yoo a fela a mo lebeletše a homotše go bona ge e ka ba Morena o mo atlile leetong la gagwe.

²² Ge mosetsana a feditše, monna yola a ntšha mphiri wa nko wa gauta wa theko ye kgolo, a o khwamela nkong ya mosetsana, a mo rweša le maseka a mabedi a magolo a gauta matsogong.

²³ A re go mosetsana yoo: “Hle, mpotše gore o morwedi wa mang. A go na le marobalo ngwakong wa tatago moo re ka robalago gona?”

²⁴ Mosetsana a mo fetola a re: “Ke nna morwedi wa Bethuele, morwa wa Nahoro le Milka.

²⁵ Go na le ditlhaka le furu ye ntši ka gešo, le marobalo a gona.”

²⁶ Ke moo monna yoo a obamego, a khunamela Morena

²⁷ a re: “A go retwe Morena, Modimo wa mong wa ka, Abrahama, yo a botegetšego go phetha se a se tshephišetšego mong wa ka. Morena o ntlišitše go meloko ya mong wa ka.”

²⁸ Mosetsana a kganyelela ngwakong wa mmagwe, a yo ba botša ditaba tšeo.

²⁹ Rebeka o be a na le kgaetšedi yo leina la gagwe e bego e le Labane, gomme yena Labane a kganyelela ka ntle a ya sedibeng seo mohlanka wa Abrahama a bego a le go sona.

³⁰ O be a bone mphiri wola wa nko le maseka matsogong a kgaetšediagwe, gomme a mo kwele ge a bolela tšeo monna yoo a mmoditšego tšona. A ya go mohlanka wa Abrahama yoo a bego a eme moo dikameleng tša gagwe sedibeng,

³¹ gomme a re: “A re ye le nna ka gae, wena mošegofatšwa wa Morena. O reng o eme ka ntle? Ke go lokišeditše ka ngwakong wa ka, le sebaka sa dikamela tša gago ke se lokišitše.”

³² Ka gona monna yoo a tsena ka ngwakong, gomme Labane a fološa merwalo dikameleng, a di fa mahlaka le furu. Ka morago ga moo a tlišetša mohlanka wa Abrahama le banna ba gagwe meetse a go hlapa maoto.

³³ Ge ba mo tlišetša dijo a re: “Nka se je ke sešo ka bolela se ke se tletšego.” Labane a re: “Se bolele.”

³⁴ Monna yoo a re: “Ke nna mohlanka wa Abrahama.

³⁵ Morena o šegofaditše mong wa ka kudu, gomme ya ba mohumi. O mo file mehlape ya dihuswane, le ya dikgomo, silibera, gauta, makgoba a banna le a basadi, dikamela le dipokolo.

³⁶ Sara, mosadi wa mong wa ka, o mmelegetše morwa mola yena Sara a šetše a tšofetše. Mong wa ka o file morwa yoo tšohle tše e lego tša gagwe.

³⁷ Mong wa ka o ile a nkeniša gore ke phethe taelo ya gagwe mme a re: ‘O se ke wa nyalela morwa wa ka mosadi go basetsana ba naga ye ya Kanana,

³⁸ eupša o ye go batho ba gabotate, go meloko ya gešo, mme fao o nyalele morwa wa ka mosadi.’

³⁹ Ka botšiša mong wa ka ka re: ‘Ke direng ge mosetsana a ka se dumele go tloga le nna?’

⁴⁰ Yena a mphetola a re: ‘Morena yo ke mo theetšego ka mehla o tla roma morongwa wa gagwe a ya le wena, mme a go fa mahlatse. O tla tšeela morwa wa ka mosadi go batho ba gešo, go lapa la tate.

⁴¹ Ge o ka ya go meloko ya gešo gomme bona ba gana go go neela mosadi, gona o tla bofologa go yona.’

⁴² “Ge ke fihla sedibeng lehono, ke ile ka rapela ka re: ‘Morena, Modimo wa mong wa ka, Abrahama, hle, mphe mahlatse go seo ke se dirago.

⁴³ Ke nna yo mo sedibeng. Ge kgarebe e tlilo ga meetse, ke tla re go yona: “Hle, nnoše meetse moeteng wa gago.”

⁴⁴ Ge a ka mphetola a re: “O ka nwa mme ke tla gela le dikamela tša gago meetse,” a e be yena yo o mmeetšego go ba mosadi wa morwa wa mong wa ka.’

⁴⁵ Ke sešo ka fetša go rapela ka pelong, Rebeka a fihla a beile moeta legetleng, a theogela sedibeng go yo ga meetse. Ka re go yena: ‘Hle, nnoše meetse.’

⁴⁶ Ka bjako a rola moeta wa gagwe legetleng a re: ‘O ka nwa, mme ke tla noša le dikamela tša gago.’ Ke ile ka nwa, gomme yena a noša dikamela.

⁴⁷ Ka mmotšiša ka re: ‘O morwedi wa mang?’ Yena a mphetola a re: ‘Ke nna morwedi wa Bethuele, morwa wa Nahoro le Milka.’ Ke moka ka mo rweša mphiri nkong le maseka matsogong.

⁴⁸ Ka obama, ka khunamela Morena. Ka reta Morena, Modimo wa mong wa ka, Abrahama, yo a ntshepedišitšego ka tsela ye e lokilego gore ke tle go moloko wa mong wa ka, moo ke hweditšego morwedi wa gagwe yo a tlago ba mosadi wa morwa wa mong wa ka.

⁴⁹ Bjale, ge le ikemišeditše go direla mong wa ka lerato le ka potego, hle, mpotšeng; ge le se la ikemišetša, le gona mpotšeng, gomme nna ke tla bona gore ke tla dira eng.”

⁵⁰ Labane le Bethuele ba fetola ba re: “Ka ge taba ye e etšwa go Morena, e ka se be rena re tšeago sephetho.

⁵¹ Rebeka šo; mo tšee o sepele le yena, e be mosadi wa morwa wa mong wa gago, bjalo ka ge Morena a boletše.”

⁵² Ge mohlanka wa Abrahama a ekwa taba ye, o ile a itahlela fase a kunamela Morena.

⁵³ A ntšha dikgabišo tša silibera le tša gauta, le diaparo, a di fa Rebeka. A fa le kgaetšediagwe le mmagwe dimpho tša theko ye kgolo.

⁵⁴ Ka morago ga fao mohlanka wa Abrahama le banna ba ba bego ba na le yena ba ja, ba nwa, gomme ba robala moo. Ge ba tsoga e sa le bošego a re: “A ke boele go mong wa ka.”

⁵⁵ Fela kgaetšedi ya Rebeka le mmagwe ba re: “A mosetsana a dule le rena matšatši a e ka bago a lesome, a kgone a sepela.”

⁵⁶ Eupša mohlanka a re: “Le se ke la re diegiša. Morena o atlegišitše leeto la ka; a ke boele go mong wa ka.”

⁵⁷ Ba fetola ba re: “A re bitšeng mosetsana gomme re kweng gore yena o reng.”

⁵⁸ Ka gona ba bitša Rebeka, ba mmotšiša ba re: “A o nyaka go sepela le monna yo?” A ba fetola a re: “Ee.”

⁵⁹ Ke moo ba lesitšego Rebeka le mofepi wa gagwe ba tloga le mohlanka wa Abrahama le banna ba gagwe.

⁶⁰ Gomme ba šegofatša Rebeka ba re: “A wena, kgaetšedi, o be mmagodiketekete! A ditlogolo tša gago di thope metse ya manaba a bona!”

⁶¹ Ke moo Rebeka le badiredigadi ba gagwe ba itokišitšego mme ba namela dikamela go sepela le mohlanka wa Abrahama, gomme ba thoma leeto.

⁶² Isaka o be a tlile lešokeng la “Sediba sa Mophelaampona”, gomme o be a dula seleteng sa ka borwa bja Kanana.

⁶³ O be a tšwetše mašemong e šetše e le mantšiboa a ikotlolla dinao, gomme a bona dikamela di rotoga.

⁶⁴ Ge Rebeka a bona Isaka, a fologa kamela ya gagwe ka pela,

⁶⁵ a botšiša mohlanka wa Abrahama a re: “Monna yola a lego mašemong a tlago go rena ke mang?” Mohlanka a mo fetola a re: “Ke mong wa ka.” Ka gona Rebeka a tšea lešira la gagwe a ikhurumetša sefahlego.

⁶⁶ Mohlanka a botša Isaka tšohle tše a di dirilego.

⁶⁷ Ke moo Isaka a tsentšego Rebeka ka mošašeng woo Sara, mmagwe, a bego a dula ka go wona, gomme Rebeka ya ba mosadi wa gagwe. Isaka a rata Rebeka, mme a homotšega ka ge a be a lahlegetšwe ke mmagwe.

25

¹ Abrahama o ile a nyala mosadi yo mongwe yoo leina la gagwe e bego e le Ketura.

² Yena a mmelegela Simrane le Jokoshane le Medane le Midiane le Jishbake le Shuage.

³ Jokoshane e bile tatagoSheba le Dedane, gomme ditlogolo tša Dedane e bile Baashure le Baletushe le Baleume.

⁴ Barwa ba Midiane e bile Efa le Efere le Enoko le Abida le Eldaa. Bao e bile ditlogolo tša Ketura.

⁵ Abrahama o tlogeletše Isaka tšohle tša gagwe,

⁶ eupša ge a sa phela, o ile a fa barwa bao metlabo ya gagwe e bego e mmelegetše bona dimpho. Ka morago a romela barwa bao nageng ye e lego ka bohlabela, kgole le morwa wa gagwe, Isaka.

⁷ Abrahama o hwile a tšofetše kudu a na le mengwaga ye lekgolo le masome a šupago le metšo ye mehlano.

⁸

⁹ Barwa ba gagwe, Isaka le Ishmaele, ba ile ba mmoloka ka leweng la Makapela, ka bohlabela bja Mamre, tšhemong yeo e bego e kile ya ba ya Efrone, morwa wa Tsohare, Mohete.

¹⁰ E be e le tšhemo yela Abrahama a bego a e rekile go Bahete; bobedi bja bona, Abrahama le mosadi wa gagwe, Sara, ba ile ba bolokwa fao.

¹¹ Ka morago ga lehu la Abrahama Modimo o ile a šegofatša morwagwe Isaka, yo a bego a dula kgauswi le “Sediba sa Mophelaampona”.

¹² Tše ke ditlogolo tša Ishmaele yoo Hagare, lekgobagadi la Moegepeta la Sara, a mmelegetšego Abrahama.

¹³ Šea maina a barwa ba Ishmaele ka tatelano ya matswalo a bona: Wa mathomo e bile Nebayote, gwa latela Kedara, Adbeele, Mibisamo,

¹⁴ Mishma, Duma, Masa,

¹⁵ Hadade, Tema, Jeture, Nafishe le Kedema.

¹⁶ Bona e bile baetapele ba dikgoro tše lesome le tše pedi, gomme maina a bona a fiwa metse ya bona le mafelo a go hloma mešaša.

¹⁷ Ishmaele o be a na le mengwaga ye lekgolo le masome a mararo a metšo ye e šupago ge a ehwa.

¹⁸ Ditlogolo tša Ishmaele di be di dutše nageng ye e lego gare ga Habila le Shure, ka bohlabela bja Egepeta, tseleng ya go ya Asiria. Bona ba ile ba phela ba hloile ditlogolo tše dingwe tša Abrahama.

¹⁹ Šedi ditaba tša Isaka, morwa wa Abrahama:

²⁰ Isaka o be a na le mengwaga ye masome a mane ge a nyala Rebeka, kgaetšedi ya Labane, morwedi wa Bethuele, Moaramo wa Mesopotamia.

²¹ Ka ge Rebeka a be a se na bana, Isaka o ile a mo rapelela go Morena. Morena a kwa thapelo ya gagwe, gomme Rebeka a ima.

²² O ile a belega mafahla, gomme pele ga ge ba belegwa, ba šušumetšana ka teng ga gagwe. A re: “Ke go reng ke hlagelwa ke taba ya mohuta wo?” Ka gona a yo botšiša Morena.

²³ Morena a re go yena: “Ditšhaba tše pedi di ka popelong ya gago; o tla belega merafe ye mebedi ya go se kwane. Wo mongwe o tla feta wo mongwe ka maatla; morwa yo mogolo o tla hlankela moratho.”

²⁴ Nako ya gore a belege ya fihla, gomme a ba le mafahla a bašemane.

²⁵ Wa mathomo e be e le yo mohubetšwana mme letlalo la gagwe le swana le seaparo sa boya, ka gona a rewa leina la Esau.

²⁶ Wa bobedi a belegwa a swere serethe sa Esau a se tiišitše, ka gona a rewa leina la Jakobo. Isaka o be a na le mengwaga ye masome a a selelago ge ba belegwa.

²⁷ Bašemanyana ba gola, gomme Esau ya ba motsomi wa bokgoni, motho wa go rata bophelo bja lešoka, Jakobo yena ya ba motho wa go ikhomolela, wa go itlhwela gae.

²⁸ Isaka o be a rata Esau ka gore a be a ipshina ka go ja diphoofolo tšeo Esau a bego a di bolaya, eupša Rebeka yena o be a rata Jakobo.

²⁹ Ka letšatši le lengwe ge Jakobo a sa apeile setopša, Esau a goroga a tšo tsoma. O be a lapile kudu,

³⁰ gomme a re go Jakobo: “Ke dikologa ka tlala; a ke fologetše selo seo se sehubedu.” Ke ka moo a ilego a rewa leina la Edomo.

³¹ Jakobo a mo fetola a re: “Nthekišetše tokelo ya bogolo bja gago pele.”

³² Esau a re: “Go lokile, ke kgauswi le go hwa; bogolo bo nkholang?”

³³ Jakobo a mo fetola a re: “Nkenele pele.” Esau a ena gomme a rekišetša Jakobo tokelo ya bogolo bja gagwe.

³⁴ Ke moo Jakobo a mo filego senkgwa a ba a mo tšhelela le setopša sela. Esau a ja, a nwa, gomme a emelela a sepela. Ke ka moo a ilego a nyatša tokelo ya bogolo bja gagwe.

26

¹ Go ile gwa wa tlala ye nngwe nageng, ntle le yela ya pele ya mehleng ya Abrahama. Ka gona Isaka a ya go Abimeleke, kgoši ya Bafilista, kua Gerare.

² Morena o be a iponagaditše go Isaka mme a re: “O se ke wa ya Egepeta; dula nageng ye ke go botšago gore o dule go yona.

³ Dula mo o le mofaladi, gomme ke tla ba nago ka go šegofatša. Wena le ditlogolo tša gago ke tla le fa dinaga tše ka moka. Ke tla phetha se ke se enetšego Abrahama, tatago.

⁴ Ke tla dira gore o be le ditlogolo tše ntši bjalo ka dinaledi tša legodimo, ka ba fa dinaga tše ka moka. Ditšhaba tša lefase ka moka di tla nkgopela go di šegofatša bjalo ka ge ke šegofaditše ditlogolo tša gago.

⁵ Ke tlile go go šegofatša ka gobane Abrahama a ntheeditše, gomme a phetha melao le ditaelo tša ka ka moka.”

⁶ Ka gona Isaka a dula Gerare.

⁷ Ge batho ba moo ba mmotšiša mabapi le mosadi wa gagwe, o ile a re: “Ke kgaetšedi ya ka,” ka gobane a be a boifa go ba botša gore ke mosadi wa gagwe. O be a tšhaba gore banna ba moo ba tla mmolaya gore ba tšee Rebeka, ka gore e be e le yo mobotse.

⁸ Ge Isaka a bile fao lebaka, Kgoši Abimeleke a okamela ka ntle ka lefasetere gomme a bona Isaka le Rebeka ba bapadišana.

⁹ Abimeleke a laela gore Isaka a bitšwe, gomme a re go yena: “Ke bone gabotse gore yola ke mosadi wa gago! Ke ka baka lang o rile ke kgaetšediago?” Isaka a mo fetola a re: “Ke be ke gopola gore ke tla bolawa ge nka re ke mosadi wa ka.”

¹⁰ Abimeleke a re: “O re dirile eng? Yo mongwe wa banna ba ka o be a ka no ithobalela le mosadi wa gago, gomme ya ba ge wena o re obišitše molato.”

¹¹ Abimeleke a lemoša batho ka moka a re: “Yo a tlaišago monna yo goba mosadi wa gagwe o tla bolawa.”

¹² Isaka a lema nageng yeo, gomme ngwageng woo kgetsi ya peu ya mmušetša dikgetsi tše lekgolo, ka gobane Morena o ile a mo šegofatša.

¹³ A huma, a atlega go iša pele gomme ya ba monna wa maemo.

¹⁴ Bafilista ba mo tsebafela ka gobane o be a na le mehlape ye mentši ya dihuswane le dikgomo, le bahlanka ba bantši.

¹⁵ Ka gona ba šiba didiba tšohle tšeo bahlanka ba Abrahama, tatagwe, ba di epilego mola Abrahama a sa phela.

¹⁶ Ke moo Abimeleke a itšego go Isaka: “Re tšwele nageng. O a re imela.”

¹⁷ Ka gona Isaka a tloga, gomme a hloma mešaša moeding wa Gerare, a dula gona.

¹⁸ A šibolla didiba tšela tša go epiwa mehleng ya Abrahama, tšela Bafilista ba di šibilego ka morago ga lehu la Abrahama. Isaka a rea didiba tšeo maina ale tatagwe a bego a di reile ona.

¹⁹ Bahlanka ba Isaka ba epa meetse ka moeding, gomme ba hwetša sediba sa meetse a a runyago.

²⁰ Badiši ba Gerare ba fapana le badiši ba Isaka, gomme ba re: “Meetse a ke a rena.” Ka fao Isaka a rea sediba seo leina la “Phapano”.

²¹ Badiši ba Isaka ba epa sediba se sengwe, le sona seo ba se fapanela, ka fao a se rea leina la “Ngangišano”.

²² A tloga fao mme a epa sediba se sengwe. Gwa se be le ngangišano ka ga sona, ka gona a se rea leina la “Sebaka”. A re: “Bjale Morena o re file sebaka nageng ye, gomme mo re tla atlega.”

²³ Go tloga moo Isaka a ya Beresheba.

²⁴ Bošegong bjoo Morena a iponagatša go yena mme a re: “Ke nna Modimo wa Abrahama, tatago. O se ke wa boifa; ke na le wena. Ke tla go šegofatša ka ba ka go fa ditlogolo tše ntši ka baka la Abrahama, mohlanka wa ka.”

²⁵ Isaka a aga aletare moo, a khunamela Morena. A hloma mešaša ya gagwe fao, gomme bahlanka ba gagwe ba epa sediba se sengwe.

²⁶ Abimeleke a tla go Isaka a etšwa Gerare a na le Ahusate, moeletši wa gagwe, le Pigole, molaodi wa madira a gagwe.

²⁷ Isaka a ba botšiša a re: “Le reng le tlile go nna etšwe le ntlhoile mme le nthakile nageng ya lena?”

²⁸ Ba mo fetola ba re: “Bjale re lemoga gabotse gore Modimo o na le wena, mme re bona gore rena le wena re enelane, re kwane

²⁹ gore o ka se re dire bošula, bjalo ka ge le rena re se ra ka ra go iša seatla. Re bile le botho go wena mme ra dira gore o tloge ka khutšo. Bjale go molaleng gore Morena o go šegofaditše.”

³⁰ Isaka a ba direla monyanya, gomme ba ja, ba nwa.

³¹ Ka le le latelago ba tsoga e sa le bošego ba enelana. Isaka a ba felegetša gomme ba mo tlogela ba thabile.

³² Ka lona letšatši leo bahlanka ba Isaka ba tla ba mmotša ka ga sediba se ba se epilego. Ba re: “Re phutše meetse.”

³³ A rea sediba seo leina la “Keno”. Ke ka fao motse wa Beresheba o reilwego leina la wona.

³⁴ Ge Esau a na le mengwaga ye masome a mane, o ile a nyala basetsana ba babedi ba Bahete, Judite, morwedi wa Beeri, le Basemate, morwedi wa Elone.

³⁵ Bona ba ile ba galakišetša Isaka le Rebeka bophelo.

27

¹ Bjale Isaka o be a tšofetše kudu mme a foufetše. A laela gore Esau, morwagwe yo mogolo, a bitšwe mme a re go yena: “Ngwanaka!” Esau a araba a re: “Tama!”

² Isaka a re: “O a bona gore ke tšofetše gomme nka hwa nako efe le efe.

³ Tšea bora bja gago le mesebe, o ye nageng mme o ntsomele phoofolo.

⁴ O nkapeele dijo tšela tše bose ke di ratago, gomme o ntlišetše tšona. Ge ke di lle ke tla go šegofatša pele ke ehwa.”

⁵ Ge Isaka a bolela le Esau, Rebeka o be a theeditše. Ka gona ge Esau a etšwa a ilo tsoma,

⁶ Rebeka a re go Jakobo: “Ke sa tšo kwa tatago a re go Esau:

⁷ ‘Ntlišetše phoofolo o nkapeele dijo tšela tše bose. Ge ke di lle ke tla go šegofatša pele ga Morena pele ke ehwa.’ ”

⁸ Rebeka a tšwela pele a re: “Bjale, ngwanaka, ntheetše gomme o dire se ke go botšago sona.

⁹ Sepela dihuswaneng, o hlaole diputšane tše pedi tša go nona gore ke tle ke apeele tatago dijo tšela a di ratago.

¹⁰ O tle o di iše go yena gore a di je, gomme yena o tla go šegofatša pele a ehwa.”

¹¹ Jakobo a fetola mmagwe a re: “O a tseba gore Esau ke monna wa boya, eupša nna ke motho yo boreledi.

¹² Mohlomongwe tate o tla mphophola gomme a tšea gore ke mo dira lešilo; ka gona ke tla itlišetša thogako bakeng sa tšhegofatšo.”

¹³ Mmagwe a re go yena: “A thogako yeo e wele godimo ga ka, ngwanake; eno dira bjalo ka ge ke go botša, o ye o ntšeele diputšane tšeo.”

¹⁴ Ka gona a yo di tšea a di tliša go yena, gomme mmagwe a apea dijo tšela tatagwe a di ratago.

¹⁵ Ka morago a tšea diaparo tše kaonekaone tša Esau, morwagwe yo mogolo, tše a bego a di beile ka ngwakong, a apeša Jakobo, morwagwe yo monnyane.

¹⁶ A mo tatetša matsogo le molaleng mo go sego moriri ka matlalo a diputšane tšela.

¹⁷ A mo neela dijo tšela tše bose, gotee le senkgwa se a se apeilego.

¹⁸ Ke moka Jakobo a ya go tatagwe a re: “Tate!” Tatagwe a re: “Eye, o morwa wa ka ofe, ngwanaka?”

¹⁹ Jakobo a mo fetola a re: “Ke nna Esau, morwago wa leitšibolo; ke dirile ka moo o ntaetšego ka gona. Hle, tsoga o dule, o je nama ya phoofolo ye ke go tlišeditšego yona gore o tle o ntšhegofatše.”

²⁰ Isaka a re go morwagwe: “Go tlile bjang gore o e hwetše ka pela ka tsela ye, ngwanaka?” Jakobo a mo fetola a re: “Morena Modimo wa gago o nkgahlantše nayo.”

²¹ Isaka a re go Jakobo: “Hle, batamela ke go phophole, ngwanaka, gore ke kwe ge eba ke wena morwa wa ka, Esau.”

²² Jakobo a batamela, mme Isaka a mo phophola a re: “Lentšu la gago le kwagala bjalo ka la Jakobo, eupša matsogo ona a kwega bjalo ka a Esau.”

²³ O ile a se lemoge Jakobo, ka gore matsogo a gagwe a be a na le boya bjalo ka a Esau. Ke ka baka leo mafelelong a ilego a mo šegofatša.

²⁴ Gomme a mmotšiša a re: “Na ruri ke wena Esau?” Jakobo a mo fetola a re: “Ke nna.”

²⁵ Isaka a re: “Ntlišetše nama yeo ya phoofolo ke je, ngwanaka, gore ke go šegofatše.” Jakobo a e tliša go yena, gomme a ja; a mo tlišetša le beine gore a nwe.

²⁶ Ka morago tatagwe a re: “Hle, batamela o nkatle, ngwanaka.”

²⁷ Ge a batamela a mo atla, Isaka a dupa diaparo tša gagwe; a napa a mo šegofatša a re: “Agaa, monkgo wo mobose wa morwa wa ka o bjalo ka monkgo wa naga ye Morena a e šegofaditšego.

²⁸ A Modimo a go fe phoka ya legodimo, gomme a nontšhe mašemo a gago! A a go fe mabele a mantši le beine ye ntši!

²⁹ A ditšhaba e be bahlanka ba gago, gomme merafe e obame pele ga gago. O buše meloko yeno, mme ditlogolo tša mmago di obame pele ga gago. A bao ba go rogakago ba rogakwe, mme bao ba go šegofatšago ba šegofatšwe.”

³⁰ Isaka a fetša go šegofatša Jakobo, gomme ge Jakobo a seno tloga, Esau, mogolwagwe, a tsena a tšo tsoma.

³¹ Le yena a apea dijo tše bose mme a di iša go tatagwe a re: “Hle, tate, tsoga o je nama ya phoofolo ye ke go tlišeditšego yona, gore o tle o ntšhegofatše.”

³² Isaka a mmotšiša a re: “Ke wena mang?” Esau a mo fetola a re: “Ke nna Esau, morwa wa gago wa leitšibolo.”

³³ Isaka a thothomela kudu, a mmotšiša a re: “Bjale ke mang yo a bolailego phoofolo a ntlišetša yona? Ke e lle pejana ga ge o etla. Ke mo šegofaditše, gomme o šegofaditšwe go ya go ile.”

³⁴ Ge Esau a ekwa taba yeo, a hlaboša lentšu a lla gabohloko kudu a re: “Le nna ntšhegofatše, tate!”

³⁵ Isaka a mo fetola a re: “Ngwaneno o tlile fa ka boradia, a tšea tšhegofatšo ya gago.”

³⁶ Esau a re: “Le ke la bobedi ge a nthadia. Ga go makatše ge leina la gagwe e le Jakobo. O nkamogile bogolo, mme bjale šemo o nkamogile le tšhegofatšo. A ga go na tšhegofatšo ye o ntšhadišeditšego yona?”

³⁷ Isaka a mo fetola a re: “Ke šetše ke mo dirile mong wa gago, mme ke dirile meloko ka moka yabo bahlanka ba gagwe. Ke mo file mabele le beine. Bjale ga go sa le selo se nka go direlago sona, ngwanaka!”

³⁸ Esau a kgopela tatagwe a re: “A o ne tšhegofatšo e tee fela, tate? Tate, le nna ntšhegofatše!” A hlaboša lentšu a lla.

³⁹ Ke moo Isaka a itšego go yena: “O ka se be le mašemo a nonnego; le phoka ya legodimo e ka se a wele.

⁴⁰ O tla phela o elwa, gomme o tla ba mohlanka wa ngwaneno. Eupša mohla o mo fenya, o tla ikhutša yena.”

⁴¹ Esau a tsota Jakobo ka gobane tatagwe a mo šegofaditše. A rera ka pelong a re: “Nako ya go llela tatagorena e a batamela; ka morago ga moo ke tla bolaya Jakobo.”

⁴² Eupša Rebeka a kwa ka maano a Esau, a laela gore Jakobo a bitšwe, gomme a re go yena: “Theetša, Esau, mogolwago, o ikemišeditše go itefetša ka go go bolaya.

⁴³ Bjale ngwanaka, dira se ke go botšago sona. Itlhaganele o tšhabele go kgaetšedi ya ka, Labane, kua Harane.

⁴⁴ O dule le yena lebakanyana go fihlela ngwaneno a buša pelo,

⁴⁵ a lebala se o mo dirilego sona. Ke moo ke tlago roma motho a tla a go bitša. Ga ke nyake go tlo lahlegelwa ke lena ka bobedi ka letšatši le tee.”

⁴⁶ Rebeka a re go Isaka: “Ke lapile wa go hwa ka basadi ba šele ba Esau. Ge Jakobo le yena a ka nyala yo mongwe wa basetsana ba ba mo ba Bahete, go tla re ke ikhwele.”

28

¹ Isaka a bitša Jakobo, a mo šegofatša, gomme a mo laya a re: “O se ke wa nyala mosetsana wa Mokanana.

² Itokiše o ye seleteng sa ka leboa sa Mesopotamia, lapeng la Bethuele, rakgolwago. O nyale kgarebe ye nngwe ka fao, yo mongwe wa barwedi ba malomeago, Labane.

³ A Modimo Ramaatlaohle a šegofatše lenyalo la gago mme a go fe bana ba bantši, gore o tle o be tatagoditšhabatšhaba.

⁴ A a šegofatše wena le ditlogolo tša gago bjalo ka ge a šegofaditše Abrahama, gomme o tle o tšee naga ye o falaletšego go yona, naga ye Modimo a e filego Abrahama.”

⁵ Isaka a roma Jakobo kua Mesopotamia go Labane, morwa wa Bethuele, Moaramo. Labane e be e le kgaetšedi ya Rebeka, mmagoJakobo le Esau.

⁶ Esau a kwa gore Isaka o šegofaditše Jakobo a ba a mo roma Mesopotamia go yo nyala mosadi fao. A kwa le gore ge Isaka a mo šegofatša, o mo laile gore a se ke a nyala mosadi wa Mokanana.

⁷ A lemoga gore Jakobo o phethile taelo ya tatagwe le mmagwe o ile Mesopotamia.

⁸ Ke moo Esau a bonego gore Isaka, tatagwe, ga a rate basadi ba Bakanana.

⁹ Ka gona a ya go Ishmaele, morwa wa Abrahama, gomme a nyala Mahalate, morwediagwe, yo e bego e le kgaetšedi ya Nebayote, ya ba mosadi wa gagwe yo mongwe.

¹⁰ Jakobo a tloga Beresheba, a leba Harane.

¹¹ A fihla felo mo gokgethwa gomme a lala fao, ka gobane letšatši le be le diketše. A tšea letlapa moo, a robala a le sametše.

¹² A lora a bona manamelo a tloga lefaseng a fihla legodimong, gomme barongwa ba namela ba theoga godimo ga wona.

¹³ A bona Morena a eme godimodimo ga manamelo gomme a re go Jakobo: “Ke nna Morena, Modimo wa botatago Abrahama le Isaka. Naga ye o robetšego go yona ke tla e fa wena le ditlogolo tša gago.

¹⁴ Ditlogolo tša gago e tla ba tše ntši bjalo ka lerole la lefase. Ba tla ikala go ya mathokong ohle, gomme ditšhaba tša lefase ka moka di tla nkgopela gore ke di šegofatše bjalo ka ge ke šegofaditše wena le ditlogolo tša gago.

¹⁵ Bona, ke tla ba le wena ka go šireletša gohle mo o yago, ka tla ka go bušetša mo nageng ye. Nka se go tlogele; ke tla ba ka phetha tšohle tše ke go boditšego tšona.”

¹⁶ Jakobo a phafoga gomme a re: “Ruri, Morena o gona felo fa, nna ke be ke sa tsebe!”

¹⁷ A boifa, mme a re: “Felo fa go boifiša bjang! Mo ke bjona bodulo bja Modimo, ke kgoro ya legodimo.”

¹⁸ Jakobo a tsoga e sa le bošego ka le le latelago, a tšea letlapa le a bego a le sametše, a le hloma ya ba letlapa la segopotšo. A tšhela makhura a mohlware godimo ga lona.

¹⁹ A rea felo fao leina la Bethele. Pele motse woo o be o bitšwa Luse.

²⁰ Ke moka Jakobo a enela Morena a re: “Ge o ka ba le nna, wa ntšhireletša mo leetong le ke le tšeago, wa mpha dijo le diaparo,

²¹ ka ba ka boela ngwakong wa tate ke bolokegile, gona o tla ba Modimo wa ka.

²² Letlapa le la segopotšo le ke le hlomilego e tla ba felo fao o tlago khunamelwa ntshe, gomme ke tla go fa karolo ya lesome ya tšohle tše o mphago tšona.”

29

¹ Jakobo a wela tsela a leba nageng ya bohlabela.

² Ka bjako a bona sediba kua molaleng, le mehlape ye meraro ya dihuswane e robetše moo. Mehlape e be e nošwa sedibeng seo se bego se na le letlapa le legolo molomong.

³ Ge mehlape ka moka e kgobokantšwe fao, badiši ba be ba kgokološa letlapa, ba e noša. Ka morago ga fao ba be ba bušetša letlapa madulong.

⁴ Jakobo a ba botšiša a re: “Banabešo, a le tšwa kae?” Ba mo fetola ba re: “Re tšwa Harane.”

⁵ A ba botšiša a re: “A le tseba Labane, morwa wa Nahoro?” Ba re: “Ee, re a mo tseba.”

⁶ A ba botšiša a re: “A o sa phela gabotse?” Ba mo fetola ba re: “O sa phela gabotse. Ebile Ragele, morwediagwe, šo o tla le dihuswane tša tatagwe.”

⁷ Jakobo a re: “Ka ge e sa le mosegare wo monana gomme e sešo ya ba nako ya go goroša mehlape, le reng le sa e noše mme la e bušetša phulong?”

⁸ Ba mo fetola ba re: “Re ka se kgone go dira bjalo mehlape ka moka e sešo ya ba mo, le letlapa la kgokološwa; ke gona re tlago noša mehlape.”

⁹ Ge Jakobo a sa bolela nabo, Ragele, yo a bego a diša dihuswane tša tatagwe, a fihla le mohlape.

¹⁰ Ge Jakobo a bona Ragele le mohlape wa Labane, malomeagwe, a ya sedibeng, a kgokološa letlapa, gomme a noša dihuswane.

¹¹ Ka morago Jakobo a atla Ragele, a napa a hlaboša lentšu a lla.

¹² A mmotša a re: “Ke nna motlogolo wa tatago, ke morwa wa Rebeka.” Ragele a kitima a yo botša tatagwe,

¹³ gomme yena ge a ekwa tša Jakobo, motlogoloagwe, a kitimela go mo gahlanetša, a mo ubarela a mo atla a thabile, gomme a mo goroša ka lapeng. Ge Jakobo a botša Labane ditaba ka moka,

¹⁴ Labane a re: “Ee, ke therešo, o madi ešo.” Jakobo a dula ka ga gagwe kgwedi ka moka.

¹⁵ Labane a re go Jakobo: “Na o ka napa wa ntšhomela fela e le ka ge o le motlogolo wa ka! Mpotše gore ke go lefe bokae.”

¹⁶ Labane o be a na le barwedi ba babedi; yo mogolo e le Lea, yo monnyane e le Ragele.

¹⁷ Lea o be a na le mahlo a go tiba, Ragele yena a bopegile mme e le yo mobotse.

¹⁸ Jakobo o be a rata Ragele, ka gona a re: “Ke tla go šomela mengwaga ye e šupago gore ke tšee Ragele, morwediago yo monnyane.”

¹⁹ Labane a mo fetola a re: “Go kaone gore a tšewe ke wena go na le gore a tšewe ke yo mongwe; dula le nna.”

²⁰ Jakobo a šoma mengwaga ye e šupago gore a tšee Ragele, gomme lebaka leo la ba bjalo ka matšatši a se makae go yena ka gore o be a rata Ragele.

²¹ Ke moo Jakobo a itšego go Labane: “Mengwaga yela e fedile. Mphe morwedi wa gago ke mo nyale.”

²² Ka gona Labane a dira monyanya gomme a laletša bohle motseng woo.

²³ Eupša bošegong bjoo Labane a iša Lea go Jakobo, gomme Jakobo a robala naye.

²⁴ Labane a tšea lekgoba la gagwe la mosetsana, Silpa, a le fa Lea, morwedi wa gagwe, gore e be mofepi.

²⁵ Jakobo o ile a se ke a lemoga gore ke Lea go fihlela mesong ya le le latelago. O ile a ya go Labane mme a re: “Ke ka baka lang o ntirile taba ye? Ke šometše go nyala Ragele. Bjale o reng o nthadiile?”

²⁶ Labane a mo fetola a re: “Ga se setlwaedi sa mo go nyadiša morwedi yo monnyane pele ga yo mogolo.

²⁷ Letela go fihlela ge beke ya monyanya e fela, mme ke tla go fa Ragele, ge eba o tla ntšhomela mengwaga ye mengwe ye e šupago.”

²⁸ Jakobo a dumela, gomme ge beke ya monyanya e fedile, Labane a mo fa morwedi wa gagwe Ragele gore e be mosadi wa gagwe.

²⁹ Labane a tšea lekgoba la gagwe la mosetsana, Bilha, a le fa Ragele, morwedi wa gagwe, gore e be mofepi.

³⁰ Le Ragele Jakobo a robala naye, gomme a mo rata go feta Lea. A šomela Labane mengwaga ye mengwe ye e šupago.

³¹ Ge Morena a bona gore Lea ga a ratwe, a mo fa thari, Ragele yena a hloka bana.

³² Lea a ima, gomme a belega morwa, a re: “Morena o bone tlaišego ya ka, gomme bjale mogatšake o tla nthata”; ka gona a mo rea leina la Rubene.

³³ A ima gape, gomme a belega morwa yo mongwe, a re: “Morena o mphile le morwa yo, ka gobane a kwele gore ke be ke sa ratwe”; ka gona a mo rea leina la Simeone.

³⁴ A buša a ima, a belega morwa yo mongwe, a re: “Bjale mogatšake o tla nkgomarela ka gore ke mmelegetše barwa ba bararo”; ka gona a mo rea leina la Lefi.

³⁵ Ka morago a ima gapegape, a belega morwa yo mongwe, a re: “Bjale ke tla reta Morena”; ka gona a mo rea leina la Juda. A emiša pelego.

30

¹ Fela Ragele o be a se a belegela Jakobo bana, ka gona a tsebafela mogolwagwe gomme a re go Jakobo: “Mphe bana, go sego bjalo ke tla ikhwela.”

² Jakobo a befelelwa Ragele a re: “A nka kgona go ema legatong la Modimo? Ke yena yo a go thibelago go ba le bana.”

³ Ragele a re: “Lekgoba la ka la mosetsana, Bilha, šo; robala naye a ntlhatswe dirope. Ka tsela yeo le nna ke tla ba mmagongwana ka yena.”

⁴ Ka fao a mo neela Bilha gore e be mosadi wa gagwe, gomme Jakobo a robala naye.

⁵ Bilha a ima, mme a belegela Jakobo morwa.

⁶ Ragele a re: “Modimo o nkahloletše. O kwele thapelo ya ka mme o mphile morwa”; ka gona a mo rea leina la Dane.

⁷ Bilha a ima gape, gomme a belegela Jakobo morwa wa bobedi.

⁸ Ragele a re: “Ke katane o šoro le mogolwake, fela ke fentše”; ka gona a mo rea leina la Naftali.

⁹ Ge Lea a bona gore o emišitše pelego, o ile a neela Jakobo lekgoba la gagwe la mosetsana, Silpa, gore e be mosadi wa gagwe.

¹⁰ Silpa a belegela Jakobo morwa.

¹¹ Lea a re: “Ke bile le mahlatse”; ka gona a mo rea leina la Gade.

¹² Silpa a belegela Jakobo morwa yo mongwe,

¹³ gomme Lea a re: “Ke thabile kudu! Bjale basadi ba tla mpitša yo a thabilego”; ka gona a mo rea leina la Asere.

¹⁴ Ge go bunwa korong Rubene a ya lešokeng gomme a hwetša dienywa tša meratišo, a di tliša go Lea, mmagwe. Ragele a re go Lea: “Hle, mphe dienywa tše dingwe tša morwago.”

¹⁵ Lea a mo fetola a re: “Na ga se wa kgotsofala ge o nkamogile monna? Bjale o nyaka go nkamoga le dienywa tša morwaka tša moratišo.” Ragele a re: “Ge o ka mpha dienywa tšeo o ka no robala le Jakobo bošego bjo.”

¹⁶ Ge Jakobo a boa mašemong mantšiboa, Lea a tšwa a yo mo gahlanetša, a re: “O swanetše go robala le nna bošego bjo ka gore ke go rekile ka dienywa tša morwaka tša moratišo.” Ka gona Jakobo a robala le Lea bošego bjoo.

¹⁷ Modimo a kwa thapelo ya Lea, mme Lea a ima, a belegela Jakobo morwa wa bohlano.

¹⁸ Lea a re: “Modimo o mphile moputso ka ge ke neetše mogatšake lekgoba la ka”; ka gona a rea morwa wa gagwe leina la Isakara.

¹⁹ Lea a ima gape, gomme a belegela Jakobo morwa wa boselela,

²⁰ a re: “Modimo o mphile mpho ye botse. Bjale mogatšake o tla nkgotlelela, ka gobane ke mmelegetše barwa ba ba selelago”; ka gona a mo rea leina la Sebulone.

²¹ Ka morago Lea a belega morwedi, a mo rea leina la Dina.

²² Ke moo Modimo a gopotšego Ragele; a kwa thapelo ya gagwe gomme a mmula pelego.

²³ A ima, a belega morwa, a re: “Modimo o ntlošitše dihlong.

²⁴ A Morena a mphe morwa yo mongwe”; ka gona a mo rea leina la Josefa.

²⁵ Ge Josefa a seno belegwa Jakobo a re go Labane: “E re ke boele gae.

²⁶ Mphe basadi le bana bao ke ba šometšego, ke tloge gobane o a tseba ka moo ke go diretšego ka gona.”

²⁷ Labane a re go yena: “Hle, a re kwane; ke be ke na le madimabe, gomme Morena o ntšhegofaditše ka baka la gago.

²⁸ Mpotše gore ke go lefe bjang, gomme ke tla go lefa.”

²⁹ Jakobo a mo fetola a re: “O tseba ka moo ke go šometšego ka gona, le ka moo mehlape ya gago e atlegilego ka gona e dišwa ke nna.

³⁰ Leruo le lennyane le o bego o na le lona pele ke etla le oketšegile kudu, gomme Morena o go šegofaditše ka baka la ka. Bjale la ka lapa nna ke tla le šomela neng?”

³¹ Labane a mmotšiša a re: “Ke go fe eng?” Jakobo a mo fetola a re: “Ga ke nyake tefo. Ke tla tšwela pele le go go dišetša mehlape ya gago ge o dumela taba ye:

³² A ke sepele le mohlape wa gago ka moka lehono ke kgethe kwanyana tšohle tše ntsho le tše swana, le dinku le dipudi tšohle tše kgwadi le tše kgwana. Tšohle tšeo e be wona moputso wa ka.

³³ Ka moso o tla tla o bona ge eba ke ile ka botega. Ge e ka re ge o etla go lekodišiša dihuswane tša ka, wa hwetša pudi ye nngwe e se ye kgwadi goba ye kgwana, goba kwanyana ye nngwe e se ye ntsho goba ye swana, o tla tseba gore e utswitšwe.”

³⁴ Labane a mo fetola a re: “Go lokile. A re dire bjalo ka ge o bolela.”

³⁵ Eupša letšatši leo Labane a hlaola diphooko tše sega le tše kgwadi, le dipudi tšohle tše kgwana le tše segana, le tšohle tše di nago le bošweu; a hlaola le dikwanyana tšohle tše ntsho le tše swana. A laela barwa ba gagwe gore ba di diše,

³⁶ gomme a tloga go Jakobo le dihuswane tšeo, a di gapa leeto la matšatši a mararo. Jakobo a šala a hlokometše dihuswane tše di šetšego tša Labane.

³⁷ Jakobo a tšea dithupa tše meetse tša mopopoliri, le tša moalmone, le tša moplatane, gomme a di khuma ka mathoko tša ba le methaladi ye mešweu.

³⁸ A bea dithupa tšeo pele ga dihuswane magopong a tšona a go nwela. A di bea fao ka gore di be di goelana ge di tlile go nwa.

³⁹ Ka gona ge dipudi di goelane pele ga dithupa tšeo, di be di tswala diputšanyane tše segana le tše kgwadi le tše kgwana.

⁴⁰ Jakobo a hlaola dinku dipuding mme a di lebanya le dihuswane tše nalana le tše ntsho tša mohlape wa Labane. Ka tsela ye a itirela mohlape wa gagwe a o hlaolela thoko, a se ke a o hlakanya le wa Labane.

⁴¹ Ge diruiwa tše di tiilego di goelana, Jakobo o be a bea dithupa tšela pele ga tšona kua magopong gore di tle di goelane moo gare ga tšona.

⁴² Eupša o ile a se ke a bea dithupa tšeo pele ga diruiwa tše di fokolago. Ka gona Labane a ba le diruiwa tše di fokolago, mola tša Jakobo e le tše di tiilego.

⁴³ Ka tsela ye Jakobo a huma kudukudu. A ba le mehlape ye mentši le makgoba le dikamela le dipokolo.

31

¹ Jakobo a kwa gore barwa ba Labane ba re: “Jakobo o tšere tšohle tše e bego e le tša tatagorena. Lehumo la gagwe ka moka le tšwa go tše e bego e le tša tatagorena.”

² A bona le gore Labane ga a sa mo thabela go swana le pele.

³ Ke moo Morena a itšego go Jakobo: “Boela nageng ya botatago go meloko ya geno. Ke tla ba le wena.”

⁴ Ka gona Jakobo a romela Ragele le Lea molaetša wa go re ba tle ba gahlane naye nageng, moo mehlape ya gagwe e bego e le gona.

⁵ Yena a re go bona: “Ke lemogile gore tatagolena ga a sa nthabela go swana le pele; eupša Modimo wa tate o bile le nna.

⁶ Lena le a tseba gore ke šometše tatagolena ka maatla a ka ka moka.

⁷ Le ge go le bjalo o nthadiile, gomme o fetošitše moputso wa ka galesome. Fela Modimo ga se a ka a mo lesa gore a nkgone.

⁸ Ge Labane a itše: ‘Dipudi tše kgwana e tla ba mogolo wa gago,’ mohlape ka moka o be o tswala diputšanyane tše kgwana. Ge a itše: ‘Dipudi tše segana e tla ba moputso wa gago,’ mohlape ka moka o be o tswala diputšanyane tše segana.

⁹ Modimo o amogile tatagolena mehlape, a e fa nna.

¹⁰ “Ka nako ya ge di goelana, ke ile ka lora ke bona diphokwana tše di bego di di goela e le tše sega le tše kgwadi le tše thamaga.

¹¹ Morongwa wa Modimo a mpitša torong a re: ‘Jakobo!’ Ka araba ka re: ‘Iše!’

¹² Yena a tšwela pele a re: ‘Bona, diphokwana ka moka tšeo di goelago ke tše sega le tše kgwadi le tše thamaga, ka gore ke bone tšohle tše Labane a go dirago tšona.

¹³ Ke nna Modimo yo a iponaditšego go wena kua Bethele, moo o tšhetšego makhura a mohlware godimo ga letlapa lela la segopotšo, gape o nkenetšego. Bjale itokiše, o tloge nageng ye, o boele nageng ya geno.’ ”

¹⁴ Ragele le Lea ba fetola Jakobo ba re: “Ga go sa na le seo se sa re šaletšego se tatagorena a ka re abelago sona.

¹⁵ O re swara bjalo ka batho bašele. O re rekišitše, gomme bjale o lle tšhelete ka moka yeo a re rekišitšego ka yona.

¹⁶ Go bjalo, mahumo a ka moka ao Modimo a a amogilego tatagorena ke a rena le a bana ba rena. Wena dira tšohle tše Modimo a go boditšego tšona.”

¹⁷ Ka gona Jakobo a itokišetša go boela go tatagwe nageng ya Kanana. A nametša bana le basadi ba gagwe dikamela mme a gapa mehlape ya gagwe ka moka, gotee le tšohle tše a di hweditšego Mesopotamia.

¹⁸

¹⁹ Labane o be a sa ile go kota dinku tša gagwe, mme ya re a sa ile Ragele a utswa medimo ya lapa la tatagwe.

²⁰ Jakobo a radia Labane ka go se mo tsebiše gore o a sepela.

²¹ A tšea tšohle tše e bego e le tša gagwe gomme a tloga ka potlako. A tshela noka ya Yufratese, a leba dithabeng tša Gileade.

²² Ka morago ga matšatši a mararo Labane a botšwa gore Jakobo o tšhabile.

²³ A tloga le bomorwarragwe gomme a rakediša Jakobo matšatši a a šupago, go fihlela ge a mo swara dithabeng tša Gileade.

²⁴ Bošegong bjoo Modimo a tla go Labane, a mmotša ka toro a re: “O itshware, o se ke wa re selo go Jakobo.”

²⁵ Jakobo o be a hlomile mešaša thabeng, gomme Labane a hlomile ya gagwe le bomorwarragwe dithabeng tša Gileade.

²⁶ Labane a re go Jakobo: “Ke go reng o nthadiile wa gapa barwedi ba ka bjalo ka basadi ba ba thopilwego ntweng?

²⁷ Ke ka baka lang o nngwegetše, wa nthadia, wa se mpotše? Ge o ka be o mpoditše nkabe ke go laetše ka lethabo le ka dikoša, ka meropa le ka dikgapa.

²⁸ Ga se wa ka wa mpha le sebaka sa go atla ditlogolo tša ka le barwedi ba ka, ka laelana nabo. O dirile taba ya botlaela!

²⁹ Ke na le maatla a go ka go kweša bohloko, fela bošegong bja go feta Modimo wa tatago o mpoditše gore ke itshware ke se ke ka re selo go wena.

³⁰ Bjale go tloga gona šemo o tlogile, ka gobane o be o tloge o hlologetše go boela gageno, bjale ke ka baka lang o utswitše medimo ya ka?”

³¹ Jakobo a mo fetola a re: “Ke be ke boifa, ka gobane ke ile ka gopola gore o tla nkamoga barwedi ba gago.

³² Fela ge o ka hwetša yo mongwe mo a swere medimo ya gago, a bolawe. Nke o nyake se sengwe le se sengwe seo e lego sa gago bomorwarragorena ba lebeletše, gomme o se tšee.” Jakobo o be a sa tsebe gore Ragele o utswitše medimo ya Labane.

³³ Labane a ya a putuka mošaša wa Jakobo; a fetela ka go wa Lea, le ka go ya makgoba ale a mabedi a basadi, eupša a se ke a hwetša medimo ya gagwe. Ke moo a tsenego mošašeng wa Ragele.

³⁴ Ragele o be a tšere medimo yeo ya lapa a e beile ka mokotleng wa sala ya kamela, mme a dutše godimo ga yona. Labane a putuka gohle ka mošašeng, eupša a se ke a e hwetša.

³⁵ Ragele a re go tatagwe: “O se ke wa mpefelelwa, mong wa ka, ka gobane ga ke kgone go emelela o le gona; ke bone kgwedi.” Labane a nyaka eupša a se ke a hwetša medimo ya lapa la gagwe.

³⁶ Ke moo Jakobo a befetšwego, a omanya Labane a re: “Ke molato ofe wo ke o obilego? Ke phošo efe ye ke e dirilego ye e go dirago gore o ntšhale morago ka mokgwa wo?

³⁷ Bjale ka gore o putukile dilong tša ka ka moka, ke eng sa lapa la gago se o se hweditšego? Se ntšhe o se bee mo gore meloko yešo le meloko yeno ba se bone mme ba re ahlolele, nna le wena.

³⁸ Ke bile le wena mengwaga ye masome a mabedi; dinku le dipudi tša gago ga se tša ka tša folotša le gona ga se ka ka ka ja kgapa ya mohlape wa gago.

³⁹ Ge nku e bolailwe ke dibata ke be ke sa e tliše go wena, tshenyegelo e be e eba ya ka. O be o nyaka gore ke lefe ye nngwe le ye nngwe ye e utswitšwego bošego goba mosegare.

⁴⁰ Ke be ke hlwa ke tšhungwa ke letšatši mosegare, ke lala ke bolawa ke phefo bošego, ke bile ke hlobega boroko.

⁴¹ Go bile ka tsela yeo mengwaga ye masome a mabedi yeo ke bilego nago. Ke go šometše mengwaga ye lesome le ye mene gore o nnee barwedi ba gago ba babedi, le mengwaga ye e selelago gore o mphe dihuswane tša gago. Le ge go bile bjalo, o fetošitše mogolo wa ka galesome.

⁴² Ge nkabe Modimo wa botate, Modimo wa Abrahama, yo Isaka a bego a mo hlompha, a se ke a ba le nna, nkabe o ile wa nthaka ke se na selo. Eupša Modimo o bone bothata bja ka le mošomo wo ke o dirilego, gomme bošegong bja go feta a go kgala.”

⁴³ Labane a fetola Jakobo a re: “Basetsana ba ke barwedi ba ka, bana ba bona ke ba ka, le mehlape ye ke ya ka. Gabotsebotse se sengwe le se sengwe se o se bonago fa ke sa ka. Fela bjalo ka ge go sa hlwe go le se nka se direlago barwedi ba ba ka le barwa ba bona,

⁴⁴ nna le wena a re kwane, gomme re dire mokgobo wa matlapa go re gopotša kwano yeo ya rena.”

⁴⁵ Ka gona Jakobo a tšea letlapa a le tsema gore e be segopotšo.

⁴⁶ A laela ba lapa la gagwe gore ba thothe matlapa ba a dire mokgobo. Ka morago ga fao ba ja dijo ka thoko ga mokgobo woo wa matlapa.

⁴⁷ Labane a o rea leina la Jegare-Sahaduta, mola Jakobo a o rea leina la Galede.

⁴⁸ Labane a re go Jakobo: “Mokgobo wo wa matlapa e tla ba segopotšo go rena ka babedi.” Ka baka leo felo fao go ile gwa rewa leina la Galede.

⁴⁹ Labane o ile a ba a re: “A Morena a re hlapetše ge re arogane.” Ka gona felo fao gwa rewa le leina la Mitsepa.

⁵⁰ Labane a tšwela pele a re: “Ge o ka swara barwedi ba ka gampe, goba wa nyala basadi ba bangwe, le ge nka se tsebe taba tšeo, o gopole gore Modimo o re lebeletše.

⁵¹ Šo mokgobo wo ke o kgobokantšego gare ga rena, le letlapa la segopotšo šele.

⁵² Mokgobo wo le letlapa le ke digopotšo. Nka se tsoge ke tshetše mokgobo wo go tlo go hlasela, gomme le wena o se ke wa tsoga o o tshetše, goba o tshetše letlapa le la segopotšo go tlo ntlhasela.

⁵³ Modimo wa Abrahama, yena Modimo wa Nahoro, o tla re ahlolela.” Ka gona Jakobo a ena ka leina la Modimo yo Isaka, tatagwe, a bego a mmoifa gore o tla phetha keno ya gagwe.

⁵⁴ O ile a dira sehlabelo thabeng, gomme a laletša meloko yeo yabo gore ba tle dijong. Ka morago ga ge ba lle, ba robala moo thabeng.

32

¹ Eitše e sa le bošego ka letšatši le le latelago, Labane a atla ditlogolo tša gagwe le barwedi ba gagwe, a ba šadiša gabotse, a tloga a boela gae.

² Ge Jakobo a le tseleng, a gahlanetšwa ke barongwa ba Modimo.

³ Ge a ba bona a re: “Mo ke mešaša ya Modimo”; ka gona a rea felo fao leina la Mahanaime.

⁴ Jakobo a roma batseta ba mo eta pele go yo gahlana le Esau, mogolwagwe, nageng ya Edomo, seleteng sa Seire.

⁵ A ba laela gore ba mmotše ba re: “Nna, Jakobo, mohlanka wa gago, ke begela Esau, mong wa ka, gore ke be ke falaletše go Labane, ka itulela fao go fihlela bjale.

⁶ Ke na le dikgomo, dipokolo, dihuswane le makgoba. Ke go begela bjalo, mong wa ka, gore ke lebelelwe ka botho.”

⁷ Ge batseta bale ba boela go Jakobo, ba ile ba re go yena: “Re fihlile go Esau, mogolwago, gomme o šetše a le tseleng go tlo go gahlanetša. O tla le banna ba makgolo a mane.”

⁸ Jakobo a tšhoga kudu, a tlalelwa. A aroganya batho ba ba bego ba na le yena le dihuswane le dikgomo le dikamela ka dihlopha tše pedi.

⁹ Ka pelong a re: “Ge Esau a ka tla a hlasela sehlopha sa pele, sehlopha se sengwe se tla kgona go tšhaba.”

¹⁰ Ke moo Jakobo a rapetšego a re: “Modimo wa rakgolo Abrahama, Modimo wa tate Isaka, o mpoditše, Morena, gore ke boele nageng ya gešo le go meloko ya gešo, gomme o tla dira gore tšohle di ntshepelele gabotse.

¹¹ Ga ke swanelwe ke botho bjohle le potego ye o ntiretšego yona, nna, mohlanka wa gago. Ke tshetše Jordane ke se ne selo ge e se lepara fela, gomme bjale ke boile le dihlopha tše pedi tše.

¹² Ke a rapela, mphološe go Esau, mogolwake. Ke boifa gore o tlilo re hlasela gomme a re fediša ka moka, le bona basadi le bana.

¹³ Gopola gore o nkholofeditše gore tšohle di tla ntshepelela gabotse, le gore o tla mpha ditlogolo tše ntši go feta tše motho a ka di balago, tše ntši bjalo ka dithorwana tša lešabašaba lebopong la lewatle.”

¹⁴ Jakobo o ile a lala a robetše fao, gomme mosong wa le le latelago a kgethela Esau, mogolwagwe, diloba diruiweng tša gagwe: dipudi tša ditshadi tše makgolo a mabedi le diphooko tše masome a mabedi, ditshelau tše makgolo a mabedi, le dikgapa tše masome a mabedi, dikamela tše di amušago tše masome a mararo le bana ba tšona, dikgomo tša ditshadi tše masome a mane le dipoo tše lesome, dipokolo tša ditshadi tše masome a mabedi le tša dipholo tše lesome.

¹⁵

¹⁶

¹⁷ A di arola mehlape mme a bea bahlanka go hlokomela mohlape wo mongwe le wo mongwe. A re go bona: “Nketeng pele mme le tlogeleng sebaka gare ga mohlape wo mongwe le wo mongwe.”

¹⁸ A laela mohlanka wa mathomo a re: “Ge Esau, mogolwake, a gahlana le wena gomme a go botšiša a re: ‘Mong wa gago ke mang? O ya kae? Diruiwa tše di lego pele ga gago ke tša mang?’

¹⁹ wena o mo fetole o re: ‘Ke tša mohlanka wa gago, Jakobo. O di rometše gore e be seloba go Esau, mong wa gagwe. Jakobo yena o re šetše morago.’ ”

²⁰ A laela mohlanka wa bobedi ka wona mokgwa woo, le go wa boraro a realo, le bahlanka ka moka bao ba bego ba hlokometše mehlape ya gagwe a re: “Le realo ge le gahlana le Esau.

²¹ Le re: ‘Mohlanka wa gago, Jakobo, o re šetše morago.’ ” Jakobo o ile a gopola a re: “Ke tla mo utswa pelo ka diloba tše, gomme ya re ge ke gahlana naye mohlomongwe a ntebalela.”

²² A etiša diloba tšeo pele gomme bošego bjoo a lala mešašeng.

²³ Bjona bošego bjoo Jakobo a tsoga, a tšea basadi ba gagwe ka babedi, le makgoba a gagwe a basadi ka mabedi, le bana ba gagwe ba lesome le o tee, gomme a tshela nokana ya Jaboko ka letšibogong.

²⁴ Ge a seno ba tshediša, a tshediša le thoto yohle ya gagwe,

²⁵ yena a šala ka mošola a le noši. Ke moka monna yo mongwe a tla a katana le yena go fihlela letšatši le nyako hlaba.

²⁶ Ge monna yoo a bona gore Jakobo o a mo palela, a mo itia noka gomme ya tšwa madulong.

²⁷ Monna yoo a re: “Ntese ke sepele; letšatši le a hlaba.” Jakobo a mo fetola a re: “Nka se go lese ge o sa ntšhegofatše.”

²⁸ Monna yoo a mmotšiša a re: “A leina la gago ke wena mang?” Jakobo a mo fetola a re: “Ke nna Jakobo.”

²⁹ Monna yoo a re: “Leina la gago e ka se sa ba Jakobo. O katane le Modimo le batho mme o ba fentše; ka gona leina la gago e tla ba Israele.”

³⁰ Jakobo a re: “Bjale mpotše la gago leina.” Eupša monna yoo a mo fetola a re: “Ke ka baka lang o rata go tseba leina la ka?” Ke moka a šegofatša Jakobo.

³¹ Jakobo a re: “Ke bone Modimo ke lebantše sefahlego le yena, fela ke sa phela”; ka gona a rea felo fao leina la Penuele.

³² Letšatši la hlaba ge Jakobo a tloga Penuele, gomme o be a hlotša ka baka la noka.

³³ Go fihlela le lehono ditlogolo tša Israele ga di je mošifa wo o lego magahlanong a noka, ka gobane ke mo mošifeng wo moo Jakobo a iteilwego gona.

33

¹ Jakobo a bona Esau a etla le banna ba gagwe ba makgolo a mane, ka gona a arolela Lea le Ragele le makgoba a gagwe a basadi ka mabedi bana.

² A etiša makgoba le bana ba ona pele, gwa latela Lea le bana ba gagwe, mme mafelelong gwa ba Ragele le Josefa.

³ Jakobo a ba eta pele ka moka, gomme a obama gašupa ge a batamela mogolwagwe.

⁴ Esau yena a kganyelela go mo gahlanetša, a mo ubarela a mo atla, gomme ba lla.

⁵ Ge Esau a lebelela mme a bona basadi le bana, o ile a mmotšiša a re: “A batho ba ba nago le wena ke bomang?” Jakobo a mo fetola a re: “Ba ke bana ba Modimo a mphilego bona ka botho bja gagwe, nna, mohlanka wa gago.”

⁶ Ke moo makgoba a basadi a tlilego le bana ba ona a obama;

⁷ gwa tla Lea le bana ba gagwe, mme mafelelong gwa tla Josefa le Ragele, ba obama.

⁸ Esau a mmotšiša a re: “A dihlopha tšela ka moka ke gahlanego natšo ke tša eng?” Jakobo a mo fetola a re: “E be e le tša go dira gore o ntebelele ka botho, mong wa ka.”

⁹ Eupša Esau a re: “Ke na le tše di lekanego, morwarre; itshwarele tšeo tša gago.”

¹⁰ Jakobo a re: “Aowa, hle, ge eba o ntebelela ka botho, amogela seloba sa ka. Go bona sefahlego sa gago go nna go swana le go bona sefahlego sa Modimo, gobane o bile yo botho go nna.

¹¹ Hle, amogela seloba se ke go tlišeditšego sona; Modimo o bile yo botho go nna, ka gona ke na le tšohle tše ke di nyakago.” A fela a mo kgopela go fihlela a di amogela.

¹² Esau a re: “A re thothe re tloge. Ke tla go eta pele.”

¹³ Jakobo a mo fetola a re: “Mong wa ka, o a tseba gore bana ba e sa le ba bannyane, le gona ke swanetše go gopola dihuswane le dikgomo tša ditswetši. Ge di ka gapšagapša kudu ešita le letšatši le tee, dihuswane ka moka di tla hwa.

¹⁴ Hle, nkete pele, gomme nna ke tla latela ke neneka ke iketlile, ke eya le moneneko wa dikgomo le bana, go fihlela ke go swara kua Seire.”

¹⁵ Esau a re: “Gona a ke go tlogele le banna ba ka ba bangwenyana.” Fela Jakobo a mo fetola a re: “E le gore o direlang? Nna se ke se nyakago ke fela gore o ntebelele ka botho, mong wa ka.”

¹⁶ Ka lona letšatši leo Esau a swara leeto la go boela Seire.

¹⁷ Jakobo yena a ya Sukote moo a ilego a ikagela ngwako gona le makuba a dikgomo tša gagwe. Ke ka fao felo fao go ilego gwa rewa leina la Sukote.

¹⁸ Jakobo ge a boa Mesopotamia o ile a fihla a bolokegile motseng wa Shekeme, nageng ya Kanana, gomme a hloma mešaša ya gagwe go lebana le motse.

¹⁹ Setsha seo a hlomilego mešaša ya gagwe go sona a se reka go ditlogolo tša Hamore, tatagoShekeme, ka dipapetlana tša silibera tše lekgolo.

²⁰ A aga aletare moo, gomme a e reela Ele, Modimo wa Israele.

34

¹ Ka letšatši le lengwe Dina, morwedi wa Jakobo le Lea, o ile a etela basadi ba Bakanana.

² Ge Shekeme, morwa wa Hamore, Mohibe, yo e bego e le kgoši ya selete seo, a mmona, a mo tšea a yo mo kata.

³ Fela mosetsana o be a kgahla Shekeme, gomme Shekeme a mo rata mme a leka go thopa pelo ya gagwe.

⁴ A botša tatagwe a re: “Nnyalele mosetsana yo.”

⁵ Jakobo a kwa gore morwedi wa gagwe o gobošitšwe, fela ka gore barwa ba gagwe ba be ba le nageng le dikgomo tša gagwe, a se ke a dira selo go fihlela ba boa.

⁶ Hamore, tatagoShekeme, a tloga a yo bolela le Jakobo

⁷ ka nako ye barwa ba Jakobo ba goroga ba etšwa nageng. Ge ba ekwa taba yeo ba selekega ba befelwa kudu, ka ge Shekeme a dirile taba ya dihlong setšhabeng sa Israele ka go robala le morwedi wa Jakobo, a dirile taba ye e sa dirwego.

⁸ Hamore a re go bona: “Morwa wa ka, Shekeme, o rata morwedi wa lena; hle, ke a le kgopela, a a mo nyale.

⁹ Nke re nyalelaneng – le re neele barwedi ba lena, le rena re le neele barwedi ba rena.

¹⁰ Ke gona le tlago dula le rena mo nageng ya rena; le ka dula mo gongwe le mo gongwe moo le go ratago, la sepela le lokologile la ikhweletša ya lena naga.”

¹¹ Ke moo Shekeme a itšego go tatagoDina le dikgaetšedi tša Dina: “Ntumeleleng ke mo nyale, gomme ke tla le fa se sengwe le se sengwe se le se nyakago.

¹² Le ka rotoša magadi ka moo le ratago ka gona, ke tla le fa se le se nyakago ge eba le tla mpha yena ya ba mosadi wa ka.”

¹³ Barwa ba Jakobo ba fetola Shekeme le Hamore, tatagwe, ka go ba radia, ka gobane Shekeme a be a gobošitše kgaetšedi ya bona, Dina.

¹⁴ Ba re go yena: “Re ka se dumelele gore kgaetšedi ya rena e nyalwe ke monna yo a sego a bolla; seo e ka ba kgobogo go rena.

¹⁵ Re ka dumela taba yeo ge fela lena le ka swana le rena ka go bolotša banna ba lena ka moka.

¹⁶ Ke mo re kago kwana, ra nyalelana. Re tla dula gare ga lena, ra ba setšhaba se tee le lena.

¹⁷ Eupša ge le sa kwane le se re se nyakago la bolotšwa, re tla tšea Dina ra tloga.”

¹⁸ Hamore le Shekeme, morwa wa gagwe, ba kgahlwa ke polelo ya banna bao,

¹⁹ gomme lesogana leo la se hlwe le diega go dira seo se kgopelwago, ka gore o be a rata morwedi wa Jakobo. E be e le yena yo mogolo ka lapeng labo.

²⁰ Hamore le Shekeme, morwa wa gagwe, ba ya kgorong ya motse, ba bolela le banna ba gabobona ba re:

²¹ “Batho ba ga ba tshwenye; a re ba leseng ba dule mo nageng ye le rena, ba sepele ba lokologile. Naga ye ke ye kgolo mme le bona ba ka dula mo. A re nyaleng barwedi ba bona, gomme le bona ba nyale ba rena.

²² Batho ba ba dumela go dula gare ga rena le go ba setšhaba se tee le rena, ge fela re ka phetha lebaka la gore re bolotše banna ba rena ka moka, bjalo ka ge bona ba bolotše.

²³ A ke re diruiwa tša bona ka moka le tšohle tše e lego tša bona e tla ba tša rena? Ka gona a re dumeleng gore ba dule le rena.”

²⁴ Badudi ka moka ba motse ba kwana le seo Hamore le Shekeme ba se bolelago, gomme banna ka moka ba bolotšwa.

²⁵ Ka morago ga matšatši a mararo ge banna ba sa babelwa ke dintho, barwa ba Jakobo ba babedi, Simeone le Lefi, dikgaetšedi tša Dina, ba tšea ditšhoša tša bona, ba tsena motseng ba sa gopolelwe selo, ba bolaya banna ka moka.

²⁶ Ba bolaya le Hamore le Shekeme, morwa wa gagwe, ba tšea Dina ngwakong wa Shekeme, mme ba tloga.

²⁷ Ka morago ga polao yeo barwa ba bangwe ba Jakobo ba thopela motse go lefeletša kgobošo ya kgaetšedi ya bona.

²⁸ Ba tšea dihuswane, dikgomo, dipokolo le se sengwe le se sengwe motseng le mašemong.

²⁹ Ba tšea dithoto tša bona ka moka, ba thopa basadi le bana ka moka, ba tšea le tšohle ka mengwakong.

³⁰ Jakobo a re go Simeone le Lefi: “Le ntsentše bothateng; bjale Bakanana le Baperise le yo mongwe le yo mongwe mo nageng o tlilo ntlhoya. Ga ke ne banna ba bantši; ge ba ka ntirela seboka mme ba ntlhasela, nna le lapa la ka re tla fedišwa.”

³¹ Bona ba mo fetola ba re: “O ra gore re ka lesa kgaetšedi ya rena e swarwa bjalo ka sefebe?”

35

¹ Modimo a re go Jakobo: “Itokiše o ye Bethele o yo dula fao. Moo o age aletare, o e agele Modimo yo a iponagaditšego go wena ge o be o tšhabela ngwaneno Esau.”

² Ka gona Jakobo a re go ba lapa la gagwe le go bohle ba ba bego ba na le yena: “Lahlang medimo e šele ye le nago le yona; itlhwekišeng, gomme le apare diaparo tše di hlwekilego.

³ Re tlile go tloga mo ra ya Bethele, moo ke tlago aga aletare, ka e agela Modimo yo a nthušitšego ka nako ya matshwenyego a ka, a ba a ba le nna gohle mo ke ilego ka ya.”

⁴ Ka fao ba neela Jakobo medimo e šele ka moka ye ba bego ba na le yona, gotee le mangina a ba bego ba a rwele. A di epela ka fase ga mohlare wa moeike wo o bego o le kgauswi le Shekeme.

⁵ Ge Jakobo le barwa ba gagwe ba tloga, Modimo o ile a tšhoša batho ba metse ya kgauswi, mme ba se ke ba ba hlomara.

⁶ Jakobo a fihla le batho ba gagwe ka moka Luse, yeo bjale e tsebjago ka la Bethele, nageng ya Kanana.

⁷ A aga aletare gona, mme a reela felo fao leina la Modimo wa Bethele, ka gobane Modimo o iponaditše go yena fao ge a be a tšhabela mogolwagwe.

⁸ Mofepi wa Rebeka, Debora, a hwa gomme a bolokwa ka fase ga moeike ka tlase ga Bethele. Ka gona gwa rewa leina la “Moeike wa Sello”.

⁹ Ge Jakobo a boa Mesopotamia, Modimo o ile a iponatša go yena gape, gomme a mo šegofatša.

¹⁰ A re go yena: “Leina la gago o Jakobo, fela go tloga bjale o tla ba Israele.” Ka gona Modimo a mo rea leina la Israele.

¹¹ A re go yena: “Ke nna Modimo Ramaatlaohle. O atelwe ke thari. Ditšhaba di tla tšwa go wena, mme o tla ba rakgolokhukhu wa magoši.

¹² Ke tla go fa naga ye ke e filego Abrahama le Isaka, ke tla e neela le ditlogolo tša gago ge o seno hlokafala.”

¹³ Modimo a napa a tloga go yena.

¹⁴ Jakobo a hloma letlapa la segopotšo gona fao Modimo a boletšego naye, gomme a tšhela beine le makhura a mohlware godimo ga lona.

¹⁵ A rea felo fao leina la Bethele.

¹⁶ Jakobo le lapa la gagwe ba tloga Bethele, gomme ya re ba sa le kgojana le Efrata, mabaka a fihla a gore Ragele a belege, mme a swarwa ke lešoko le bohlokohloko.

¹⁷ Ge lešoko la gagwe le gaketše, mmelegiši a re go yena: “O se ke wa boifa; ke mošemanyana yo mongwe gape.”

¹⁸ Fela Ragele o be a ehwa, mme ge moya o etšwa nameng, a rea morwa wa gagwe leina la Benoni, eupša tatagomošemanyana a mo rea leina la Benjamene.

¹⁹ Ragele a hlokafala, mme a bolokwa ka thoko ga tsela ya go ya Efrata, motse wo bjale o tsebjago ka la Betlelehema.

²⁰ Jakobo a hloma letlapa la segopotšo moo, gomme le lehono letlapa leo le sa šupa lebitla la Ragele.

²¹ Jakobo a fetela pele gomme a hloma mešaša ya gagwe ka thoko yela ya tora ya Edere.

²² Ge Jakobo a sa dula nageng yeo, Rubene o ile a robala le Bilha, yo mongwe wa metlabo ya tatagwe. Ge Jakobo a ekwa taba yeo a selekega kudu. Jakobo o be a na le barwa ba lesome le metšo ye mebedi.

²³ Barwa ba Lea e be e le Rubene, leitšibolo la Jakobo, Simeone, Lefi, Juda, Isakara le Sebulone.

²⁴ Barwa ba Ragele e be e le Josefa le Benjamene.

²⁵ Barwa ba Bilha, lekgoba la Ragele, e be e le Dane le Naftali.

²⁶ Barwa ba Silpa, lekgoba la Lea, e be e le Gade le Asere. Barwa ba ba belegwe Mesopotamia.

²⁷ Jakobo a tla go Isaka, tatagwe, kua Mamre, kgauswi le Kiriate-Arba, e lego Hebrone, moo Abrahama le Isaka ba bego ba falaletše gona.

²⁸ Isaka o phetše a ba le mengwaga ye lekgolo le masome a seswai.

²⁹ O hlokafetše a tšofetše kudu, gomme barwa ba gagwe, Esau le Jakobo, ba mmoloka.

36

¹ Šedi ditlogolo tša Esau yoo a bitšwago le ka la Edomo.

² Esau o ile a nyala basadi ba Bakanana: Ada, morwedi wa Elone, Mohete; Oholibama, morwedi wa Ana, morwa wa Tsibone, Mohibe;

³ le Basemate, morwedi wa Ishmaele, kgaetšedi ya Nebayote.

⁴ Ada a belega Elifase; Basemate a belega Reuele;

⁵ Oholibama yena a belega Jeushe, Jalamo le Korage. Barwa ba ba belegetšwe Esau kua nageng ya Kanana.

⁶ Ke moka Esau a tšea basadi ba gagwe, barwa, barwedi, le batho ka moka ba lapa la gagwe, le dikgomo tša gagwe, le diruiwa ka moka, le tšohle tše a bilego natšo nageng ya Kanana, gomme a tloga go Jakobo, ngwanabo, a ya nageng e šele.

⁷ O ile a tloga ka gobane naga yeo yena le Jakobo ba bego ba falaletše go yona e be e sa kgone go ba phediša; ba be ba na le leruo le lentšintši, mme ba se sa kgona go dula mmogo.

⁸ Ka gona Esau a dula nageng ya dithaba ya Edomo. Leina le lengwe la Esau e be e le Edomo.

⁹ Šedi ditlogolo tša Esau, rakgolokhukhu wa Baedomo kua nageng ya dithaba ya Edomo.

¹⁰ Ada, mosadi wa Esau, o mmelegetše morwa o tee, Elifase. Elifase o bile le barwa ba bahlano: Temane, Omare, Tsefo, Gatamo le Kenase. Gomme ka motlabo wo mongwe, Timna, a ba le morwa yo mongwe gape, Amaleke. Basemate, mosadi wa Esau, a mmelegela morwa o tee, Reuele. Reuele o bile le barwa ba bane: Nahate, Serage, Shama le Misa.

¹¹

¹²

¹³

¹⁴ Mosadi wa Esau, Oholibama, morwedi wa Ana, morwa wa Tsibone, a mmelegela barwa ba bararo: Jeushe, Jalamo le Korage.

¹⁵ Dikgoro tše di fapafapanego e bile ditlogolo tša Esau. Morwa wa Esau wa mathomo, Elifase, e bile rakgolokhukhu wa dikgoro tše di latelago: Temane, Omare, Tsefo, Kenase,

¹⁶ Korage, Gatamo le Amaleke. Tšeo ka moka e bile ditlogolo tša Ada, mosadi wa Esau.

¹⁷ Reuele, morwa wa Esau, e bile rakgolokhukhu wa dikgoro tše di latelago: Nahate, Serage, Shama le Misa. Tšeo ka moka e bile ditlogolo tša Basemate, mosadi wa Esau.

¹⁸ Dikgoro tše di latelago di tšwile go Esau ka mosadi wa gagwe, Oholibama, morwedi wa Ana: Jeushe, Jalamo le Korage.

¹⁹ Dikgoro tše ka moka e bile ditlogolo tša Esau.

²⁰ Badudi ba mathomo ba naga ya Edomo e be e le ba dikgoro tše di tšwilego go ditlogolo tše di latelago tša Seire, Mohori: Lotane, Shobale, Tsibone, Ana, Dishone, Etsere le Dishane.

²¹

²² Lotane e bile rakgolokhukhu wa kgorwana ya Hori le ya Hemane. Lotane o be a na le kgaetšedi yo leina la gagwe e bego e le Timna.

²³ Shobale e bile rakgolokhukhu wa kgorwana ya Albane, le ya Manahate, le ya Ebale, le ya Shefi, le ya Onamo.

²⁴ Tsibone o bile le barwa ba babedi, Aya le Ana. Yo ke Ana yo a hweditšego didiba tša meetse a a fišago kua lešokeng ge a be a dišitše dipokolo tša tatagwe.

²⁵ Ana e bile tatagoDishone, yo e bilego rakgolokhukhu wa kgorwana ya Hemdane, le ya Eshbane, le ya Jitrane, le ya Kerane. Ana o be a bile a na le morwedi yo leina la gagwe e bego e le Oholibama.

²⁶

²⁷ Etsere e bile rakgolokhukhu wa kgorwana ya Bilhane, le ya Saabane, le ya Akane.

²⁸ Dishane e bile rakgolokhukhu wa kgorwana ya Utse le ya Arane.

²⁹ Ditšhaba tša Bahori nageng ya Edomo šedi: Lotane, Shobale, Tsibone, Ana, Dishone, Etsere le Dishane.

³⁰

³¹ Dikgoši tše di latelago di bušitše naga ya Edomo ka go latelana ga tšona pele ga ge go eba le dikgoši nageng ya Israele: Bela, morwa wa Beore, wa Dinhaba Jobabe, morwa wa Serage, wa Botsra Hushamo, wa selete sa Temane Hadade, morwa wa Bedade, wa Abite; yena o fentše Bamidiane ntweng nageng ya Moaba Samla wa Masreka Shaulo wa Rehobote-lebopong-la-Yufratese Baale-Hanane, morwa wa Akboro Hadade wa Pagu; mosadi wa gagwe e be e le Mehetabele, morwedi wa Matrede le setlogolwana sa Me-Sahabe.

³²

³³

³⁴

³⁵

³⁶

³⁷

³⁸

³⁹

⁴⁰ Esau e bile rakgolokhukhu wa dikgoro tše di latelago tša Baedomo: Timna, Alba, Jetete, Oholibama, Ela, Pinone, Kenase, Temane, Mibitsare, Magadiele le Iramo. Selete seo setšhaba se sengwe le se sengwe se dutšego go sona se ile sa tsebja ka leina la setšhaba seo.

37

¹ Jakobo o ile a no fela a dutše nageng ya Kanana, moo tatagwe a bego a falaletše gona.

² Ditaba tša lapa la gagwe šedi: Josefa, lesoganyana la mengwaga ye lesome le metšo ye e šupago, o be a diša dihuswane le bomorwarragwe, barwa ba Bilha le Silpa, metlabo ya tatagwe. O be a botša tatagwe dilo tše mpe tše bomorwarragwe ba bego ba di dira.

³ Jakobo o be a rata Josefa go feta barwa ba bangwe ba gagwe ka moka, ka gobane o mmelegetšwe mola a tšofetše. A mo rokela seaparo se setelele sa matsogo a matelele.

⁴ Ge bomorwarragwe ba bona gore tatagobona o rata Josefa go ba feta, ba hloya ngwanabobona kudu moo e lego gore ba be ba sa mmolediše ka botho.

⁵ Bošegong bjo bongwe Josefa a lora toro, mme ge a e botša bomorwarragwe, bona ba mo hloya go fetišiša.

⁶ O ile a re: “Theetšang toro ye ke e lorilego.

⁷ Ka moka ga rena re be re le mašemong re tlema dingata tša mabele, gomme ngata ya ka ya tsoga ya ema thwii. Tša lena tša dikologa ya ka, gomme tša e obamela.”

⁸ Bomorwarragwe ba mmotšiša ba re: “A o gopola gore o tlile go ba kgoši ya rena? A o tlile go re buša?” Ka gona ba mo hloya go fetišiša ka baka la seo a se boletšego ka ditoro tša gagwe.

⁹ Josefa a lora ye nngwe toro gomme a botša bomorwarragwe a re: “Ke lorile toro ye nngwe, ka bona letšatši le ngwedi le dinaledi tše lesome le e tee di nkobamela.”

¹⁰ A botša le tatagwe toro yeo, gomme tatagwe a mo omanya a re: “Ke toro ya mohuta mang yeo? A o gopola gore mmago le bomorwarrago le nna re tlilo tla ra go obamela?”

¹¹ BomorwarragoJosefa ba mo tsebafela, tatagwe yena a fela a gopodišiša taba yeo.

¹² Ka nako ye nngwe ge bomorwarragoJosefa ba ile Shekeme go yo diša dihuswane tša tatagobona,

¹³ Jakobo o ile a re go Josefa: “Ke nyaka gore o ye Shekeme moo bomorwarrago ba dišitšego dihuswane.” Josefa a mo fetola a re: “Go lokile.”

¹⁴ Tatagwe a re go yena: “Sepela o bone ge eba bomorwarrago ba sa iketlile, le ge eba dihuswane di sa le gabotse; gomme o boe o tle o mpotše.” Ka gona tatagwe a mo roma ba le moeding wa Hebrone. Josefa a fihla Shekeme,

¹⁵ mme a ralala le naga yeo. Monna yo mongwe a mmona gomme a mmotšiša a re: “A o nyaka eng?”

¹⁶ Josefa a mo fetola a re: “Ke nyaka bomorwarre. Na o ka mpotša mo ba dišago gona?”

¹⁷ Monna yoo a re: “Ba šetše ba tlogile. Ke ba kwele ba re ba ya Dotane.” Ka fao Josefa a šala bomorwarragwe morago mme a ba hwetša kua Dotane.

¹⁸ Ba mmona a sa le kgole, gomme pele ga ge a fihla go bona, ba kwana go mmolaya.

¹⁹ Ba boledišana ba re: “Raditoro yola šo o etla.

²⁰ Tlang re mmolayeng, re mo lahlele ka moleteng wo mongwe. Re tla re o bolailwe ke sebata. Ke moo re tlago bona gore na ditoro tša gagwe di tla feletša kae.”

²¹ Rubene a ba kwa, gomme a leka go phološa Josefa a re: “A re se ke ra mmolaya.

²² Se tšholleng madi. Mo lahleleng ka mo moleteng wo mo lešokeng, eupša le se ke la mo iša seatla.” A realo gore a mo phološe go bona gomme a mmušetše go tatagwe.

²³ Ge Josefa a fihla go bomorwarragwe, ba mo hlobola seaparo sa gagwe se setelele sa matsogo a matelele.

²⁴ Gomme ba mo tšea ba mo lahlela ka moleteng wo o bego o se na le meetse.

²⁵ Ba dula fase ba ja, ya re ge ba iša mahlo ba bona sehlopha sa Baishmaele se etšwa Gileade se eya Egepeta. Dikamela tša bona di be di rwele dinoko le marokhu.

²⁶ Juda a re go bomorwarragwe: “Re tla boelwa ke eng ka go bolaya ngwanaborena le ka go uta polao yeo?

²⁷ A re mo rekišeng go Baishmaele ba, re se ke ra ba ra mo iša seatla. Ga ke re ke ngwanaborena, ke madi a borena?” Bongwanabo ba dumela,

²⁸ gomme ge bagwebi ba Bamidiane ba etla, bongwanaboJosefa ba mo ntšha moleteng, ba mo rekišetša Baishmaele ka dipapetlana tša silibera tše masome a mabedi; bona ba mo tšea ba ya naye Egepeta.

²⁹ Ge Rubene a etla moo moleteng gomme a hwetša gore Josefa ga a gona, a gagola diaparo tša gagwe.

³⁰ A boela go bomorwarragwe a re: “Mošemanyana yola ga a gona! A ke tlilo dirang?”

³¹ Ke moo ba bolailego phooko, ba korobetša seaparo sa Josefa ka mading a yona.

³² Ba tšea seaparo seo ba se iša go tatagobona mme ba re: “Re hweditše seaparo sese. Nke o se lekodišiše o bone ge eba ke sa morwago goba ga se sona.”

³³ A se lekodišiša mme a re: “Seaparo sa morwake! O llwe ke sebata! Morwa wa ka, Josefa, o rathagantšwe!”

³⁴ Jakobo a gagola diaparo tša gagwe, a apara tša go ilela, a llela morwa wa gagwe nako ye telele.

³⁵ Barwa ba gagwe ka moka le barwedi ba tla go mo homotša, eupša a gana go homotšwa mme a re: “Ke tla theogela bodulabahu ke sa llela morwa wa ka.” Ka gona a tšwela pele a llela morwa wa gagwe, Josefa.

³⁶ Kua Egepeta Bamidiane ba ile ba rekiša Josefa go Potifare, mohlankedi yo mongwe wa kgoši, yo e bego e le molaodi wa baleti ba kgoši.

38

¹ Yona mehleng yeo Juda a tlogela bomorwarragwe, a theoga a yo dula le Hira, monna yo a bego a etšwa motseng wa Adulamo.

² Moo Juda a gahlana le mosetsana wa Mokanana yo tatagwe e bego e le Shua. A mo nyala, a robala naye,

³ gomme mosetsana a ima, a mmelegela morwa; Juda a mo rea leina la Ere.

⁴ A ima gape, a belega morwa yo mongwe, gomme a mo rea leina la Onane.

⁵ A ba le morwa gape, mme a mo rea leina la Shelage. Juda o be a le kua Akesibe ge mosadi a mmelegela Shelage.

⁶ Juda a hweletša morwa wa gagwe wa mathomo, Ere, mosadi; leina la gagwe e be e le Tamare.

⁷ Ere o be a fošetša Morena, ka gona Morena a mmolaya.

⁸ Ke moo Juda a itšego go Onane: “Sepela o yo robala le mohlologadi wa mogolwago. O mo tsenele gore mogolwago a tle a be le ditlogolo.”

⁹ Fela Onane a tseba gore bana bao e ka se tlo ba ba gagwe, ka gona nako ye nngwe le ye nngwe ge a robala le mohlologadi wa mogolwagwe, a tšhollela matšhedi fase gore go se ke gwa ba le bana ba mogolwagwe.

¹⁰ Se a se dirilego sa befediša Morena, mme le yena Morena a mmolaya.

¹¹ Ke moo Juda a itšego go Tamare, ngwetši ya gagwe: “Ipoelele ga geno mme o fele o le mohlologadi go fihlela morwa wa ka, Shelage, a godile.” A realo ka gobane a boifa gore Shelage o tla bolawa bjalo ka bomogolwagwe. Ka gona Tamare a ipoelela ga gabo.

¹² Ka morago ga lebaka le letelele mosadi wa Juda a hwa. Ge Juda a feditše go ilela, yena le mogwera wa gagwe, Hira wa Adulamo, ba ya Timna, moo dinku tša Juda di bego di kotwa ntshe.

¹³ Motho yo mongwe a botša Tamare a re: “Ratswalago o ya Timna go yo kota dinku tša gagwe.”

¹⁴ Ka gona Tamare a apola diaparo tša bohlologadi, a ipipa sefahlego ka lešira, a itira gore a se ke a tsebja, gomme a dula fase moo tsela e phamogelago Enaime, motse wo o bego o le tseleng ya go ya Timna. O be a tseba gabotse gore morwa wa Juda wa mafelelo, Shelage, bjale o godile, gomme le ge go le bjalo ga se a ka a mo fiwa gore a mo tsenele.

¹⁵ Ge Juda a mmona, a gopola gore ke segwebakathobalo, ka gore o be a ipipile sefahlego.

¹⁶ A ya go yena ka thoko ga tsela a re: “Etla re robale.” O be a sa tsebe gore ke ngwetši ya gagwe. Tamare a re: “A o tla mpha eng?”

¹⁷ Juda a mo fetola a re: “Ke tla go romela putšane ya go tšwa mohlapeng wa ka.” Tamare a re: “Go lokile, ge o ka mpha se ke tlago šala ke se swere go fihlela o e romela.”

¹⁸ Juda a mmotšiša a re: “Ke go neele eng se o tlago šala o se swere?” Tamare a mo fetola a re: “Papetlana ya gago ya go itsebiša, le ketanyana ya yona, le lepara le o le swerego.” A mo neela tšona. A robala naye, gomme Tamare a ima.

¹⁹ Tamare a ya gae, a apola lešira, a apara diaparo tšela tša gagwe tša bohlologadi.

²⁰ Juda a roma Hira, mogwera wa gagwe, go iša putšane yela le go tšea dilo tšela mosadi yola a šadilego a di swere, fela a se ke a mo hwetša.

²¹ A botšiša banna ba bangwe kua Enaime a re: “A segwebakathobalo sela se bego se le mo tseleng se kae?” Ba mo fetola ba re: “Ga se gwa ka gwa ba le segwebakathobalo mo.”

²² A boela go Juda a re: “Ga se ka mo hwetša. Banna ba felo fao ba re ga se gwa ka gwa ba le segwebakathobalo fao.”

²³ Juda a re: “A a itshwarele dilo tšeo. Ga re nyake go segwa ke batho. Go leka gona ke lekile go mo lefa, fela ga se wa mo hwetša.”

²⁴ Ka morago ga dikgwedi tše e ka bago tše tharo, motho yo mongwe a botša Juda a re: “Ngwetši ya gago, Tamare, e be e itirile sefebe, mme bjale e imile.” Juda a re: “Mo ntšheng le mo tšhumeng a hwe.”

²⁵ Ge a ntšhetšwa ntle, a roma motho go ratswalagwe a re: “Ke imišitšwe ke monna yoo dilo tše e lego tša gagwe. Di lebeledišiše mme o bone gore ke tša mang – papetlana ye ya go itsebiša, le ketanyana ya yona, le lepara le.”

²⁶ Juda a di tseba gomme a re: “O a rereša ka gobane ga se ka mo neela morwa wa ka, Shelage, gore e be mosadi wa gagwe.” Juda a se ke a hlwa a robala naye gape.

²⁷ Ge nako ya gagwe ya go belega e fihla, go ile gwa lemogwa gore o tlilo belega mafahla.

²⁸ Ge a le gare a belega, yo mongwe wa bona a ntšha letsogwana; mmelegiši a le swara, a le tlema ka tlhale ye khubedu, gomme a re: “Yo o tswetšwe pele.”

²⁹ Fela lesea la gomiša letsogwana lela, mme ngwanabolona a belegwa pele. Ke moo mmelegiši a itšego: “Jo, wa tla wa šwahla?” Ka gona a rewa leina la Peretse.

³⁰ Ka morago gwa belegwa ngwanabo le tlhale yela ye khubedu letsogwaneng la gagwe, gomme a rewa leina la Serage.

39

¹ Baishmaele ba be ba išitše Josefa Egepeta mme ba mo rekišeditše Potifare, mohlankedi yo mongwe wa kgoši, yo e bego e le molaodi wa baleti ba kgoši.

² Morena a ba le Josefa mme a mo atla. O be a dula ngwakong wa mong wa gagwe wa Moegepeta.

³ Yena a bona gore Morena o na le Josefa, o mo atla go se sengwe le se sengwe se a se dirago.

⁴ Potifare a mo thabela mme a mo dira mohlanka wa gagwe yo mogolo, ka gona a mmea mohlokomedi wa ngwako wa gagwe le wa tšohle tša gagwe.

⁵ Go tloga ka nako yeo Morena a šegofatša lapa la Moegepeta yoo ka baka la Josefa. Morena a šegofatša se sengwe le se sengwe se a bego a na le sona lapeng la gagwe le mašemong a gagwe.

⁶ Potifare a bea Josefa mohlokomedi wa tšohle tše a nago le tšona, gomme a se ke a be a itshwenya ka selo ntle le dijo tše a bego a di ja. Josefa o be a bopegile e le yo mobotse.

⁷ Ka morago ga lebaka mosadi wa mong wa gagwe a thoma go mo duma, gomme a mo kgopela gore a robale naye.

⁸ Josefa a gana a re go yena: “Bona, mong wa ka ga a sa itshwenya ka selo ka mo lapeng ka gobane ke le gona. O ntirile mohlokomedi wa tšohle tše a nago le tšona.

⁹ Ke na le maatla a a lekanago le a gagwe mo lapeng le, gomme ga go seo a nkganetšago sona ntle le wena. Bjale nka napa ka dira taba ye mpe ka mokgwa woo, ka fošetša Modimo?”

¹⁰ Le ge a be a kgopela Josefa letšatši ka letšatši, Josefa a se ke a dumela go robala naye.

¹¹ Ka letšatši le lengwe ge Josefa a tsena ka ngwakong go yo dira mošomo wa gagwe, gwa be go se ne motho ka gae.

¹² Mosadi wa Potifare a mo swara ka seaparo a re: “Tlaa o robale le nna!” Eupša Josefa a phonyokga a tšhabela ntle, a šia seaparo sela sa gagwe matsogong a mosadi yola.

¹³ Ge mosadi a bona gore Josefa o tlogetše seaparo sa gagwe gomme o tšhabetše ntle,

¹⁴ a bitša bahlanka ba lapa, a re: “Bonang! Moheberu yo mogatšake a mo tlišitšego mo lapeng o a re hlompholla. O tsene ka phapošing ya ka go tlo nkata, fela nna ka goeletša ka kudu.

¹⁵ Ge a ekwa ke goeletša, a tlogela seaparo sa gagwe ka thoko ga ka, a tšhabela ntle.”

¹⁶ A swara seaparo seo sa Josefa go fihlela mong wa gagwe a etla gae.

¹⁷ Ke moo a mmoditšego yona taba yela a re: “Lekgoba lela la Moheberu o le tlišitšego mo le tsene ka phapošing ya ka mme la ntlhompholla.

¹⁸ Eupša ge ke goeletša, a tšhabela ka ntle, a šia seaparo sa gagwe ka thoko ga ka.”

¹⁹ Mong wa Josefa a befelwa kudu

²⁰ gomme a laela gore Josefa a swarwe, a tsenywe ka kgolegong yeo bagolegwa ba kgoši ba bego ba tswaleletšwe ka go yona, gomme a dula fao.

²¹ Fela Modimo a ba le Josefa mme a mo šegofatša gore rakgolego a mo thabele.

²² A bea Josefa mohlokomedi wa bagolegwa ka moka, le wa tšohle tše di dirwago ka kgolegong.

²³ Rakgolego a se hlwe a tlemegile go hlokomela selo se se bego se le diatleng tša Josefa, ka gobane Morena o be a na le yena, gomme a atla se sengwe le se sengwe se a se dirago.

40

¹ Ka morago ga nako motšhelabeine wa kgoši ya Egepeta le moapeimogolo wa dinkgwa ba befediša kgoši.

² O ile a befelelwa bahlankedi bao ba babedi,

³ gomme a ba hlahlela kgolegong ngwakong wa molaodi wa baleti ba kgoši, gona ka mola Josefa a bego a tswaleletšwe ka gona.

⁴ Ba tšea nako ye telele kgolegong, gomme molaodi a dira Josefa mohlanka wa bona.

⁵ Bošego bjo bongwe gona ka moo kgolegong motšhelabeine le moapeimogolo ba lora ditoro, mme ditoro tšeo di be di na le ditlhathollo tše di fapanego.

⁶ Ge Josefa a etla go bona mosong, a bona gore ba tshwenyegile.

⁷ A ba botšiša a re: “Ke ka baka lang le tshwenyegile lehono?”

⁸ Ba mo fetola ba re: “Yo mongwe le yo mongwe wa rena o lorile toro, gomme ga go na motho yo a kgonago go di hlatholla.” Josefa a re: “A ga se Modimo yo a kgontšhago motho go hlatholla ditoro? Mpotšeng ditoro tša lena.”

⁹ Ka gona motšhelabeine a re: “Nna ke lorile ke bona morara pele ga ka

¹⁰ o na le mahlogedi a mararo. Ge matlakala a seno hloga, mabue a tšwelela, gomme diterebe tša butšwa.

¹¹ Ke be ke swere senwelo sa kgoši; ka gona ka tšea diterebe ka di pitlela ka senwelong, ka se fa kgoši.”

¹² Josefa a re: “Tlhathollo ya toro yeo še: Mahlogedi a mararo ke matšatši a mararo.

¹³ Ka morago ga matšatši a mararo kgoši o tla go lokolla, a go swarela, a go boetša maemong a gago. O tla mo fa senwelo sa gagwe bjale ka pele ge o be o le motšhelabeine wa gagwe.

¹⁴ Fela hle, o nkgopole ge tšohle di go sepelela gabotse, o ntšwele mohola ka go mpolelela kgoši, mme o nntšhe ka mo kgolegong.

¹⁵ Gabotsebotse ke tšhabišitšwe nageng ya Baheberu, mme le gona mo Egepeta ga go se ke se dirilego gore ke be ke lahlelwe kgolegong.”

¹⁶ Ge moapeimogolo wa dinkgwa a bona tlhathollo ya toro ya motšhelabeine e le ye botse, a re go Josefa: “Le nna ke lorile toro; ke be ke rwele diroto tše tharo tša dinkgwa hlogong.

¹⁷ Ka serotong sa ka godimodimo go be go na le dijo tša kgoši tša mehutahuta tše di apeilwego, gomme dinonyana di be di di ja.”

¹⁸ Josefa a mo fetola a re: “Tlhathollo ya toro yeo še: Diroto tše tharo ke matšatši a mararo.

¹⁹ Ka morago ga matšatši a mararo kgoši o tla go ripa hlogo. Ke moka a lekeletša setopo sa gago koteng, gomme manong a ja nama ya gago.”

²⁰ Ka letšatši la boraro, letšatši la matswalo a kgoši, kgoši a direla bahlankedi ba gagwe ka moka monyanya; a lokolla motšhelabeine le moapeimogolo mme a ba tliša pele ga bahlankedi ba gagwe.

²¹ A boetša motšhelabeine maemong a gagwe a pele,

²² moapeimogolo yena a mmolaya, gwa direga bjalo ka ge Josefa a be a boletše.

²³ Fela motšhelabeine a se ke a gopola Josefa, a mo lebala.

41

¹ Ka morago ga mengwaga ye mebedi kgoši ya Egepeta ya lora e eme ka thoko ga noka ya Naele,

² gomme a bona dikgomo tše di šupago tša ditshadi tša go nona tša go phatsema di etšwa ka nokeng, mme di thoma go fula mahlakanokeng.

³ Ke moka gwa rotoga dikgomo tše dingwe tše di šupago tša ditshadi; tšona e be e le makhoro, di otile. Di ile tša rotoga tša ema kgauswi le dikgomo tšela tše dingwe lebopong la noka.

⁴ Kgomo tša go ota tša ja dikgomo tšela tše di šupago tša go nona. Kgoši a phafoga.

⁵ A swarwa ke boroko gape, gomme a lora la bobedi. A bona diako tše di šupago tša mabele tše di tladitšego mme di budule, di metše lehlakeng le tee.

⁶ Diako tše dingwe tše di šupago tša mabele tša hloga; e be e le tše tshesenyane, mme di tšhumilwe ke phefo ya leganata.

⁷ Diako tšela tše tshesenyane tša metša tšela tša go šupa tša go tlatša tše koto. Kgoši a phafoga mme a lemoga gore o be a lora.

⁸ Ka moswane a tshwenyega, ka gona a bitša didupe ka moka le banna ba bohlale ba Egepeta. A ba botša ditoro tša gagwe, fela le o tee a se kgone go mo hlathollela tšona.

⁹ Ke moo motšhelabeine a itšego go kgoši: “Lehono ke swanetše go ipolela gore ke dirile phošo.

¹⁰ O be o mpefeletšwe, nna le moapeimogolo, wa re lahlela kgolegong ngwakong wa molaodi wa baleti ba kgoši.

¹¹ Bošegong bjo bongwe yo mongwe le yo mongwe wa rena o ile a lora toro, mme ditoro tšeo di be di na le ditlhathollo tše di fapanego.

¹² Lesogana la Moheberu, lekgoba la molaodi wa baleti ba kgoši, le be le na le rena moo. Re ile ra mmotša ditoro tša rena, gomme a re hlathollela tšona.

¹³ Go diregile ka mo a re hlatholletšego ka gona: O mpoeditše maemong a ka, moapeimogolo yena wa mmolaya.”

¹⁴ Kgoši a laela gore Josefa a tlišwe, gomme a ntšhwa kgolegong ka bjako. Ge a bootše maledu, a apara diaparo tše dingwe, a tsena, a ema pele ga kgoši.

¹⁵ Kgoši a re go yena: “Ke lorile toro, gomme ga go yo a kgonago go e hlathollago. Ke boditšwe gore wena o kgona go hlatholla ditoro.”

¹⁶ Josefa a mo fetola a re: “Ga ke kgone, kgoši, fela Modimo o tla go utollela tše botse ka yona.”

¹⁷ Kgoši a re: “Ke lorile ke eme lebopong la noka ya Naele,

¹⁸ gomme ka bona dikgomo tše di šupago tša ditshadi tša go nona tša go phatsema di etšwa ka nokeng, mme di thoma go fula mahlakanokeng.

¹⁹ Ke moka gwa rotoga dikgomo tše dingwe tše di šupago tša ditshadi tše di bego di gwametšwe, e le makhoro, di otile kudu. E be e le makhoro a ke sego ka ke ka a bona nageng ka moka ya Egepeta.

²⁰ Dikgomo tšeo tša makhoro tša ja tšela tša go nona,

²¹ eupša go be go se yo a ka lemogago gore di di lle, ka gobane di ile tša no fela di sa otile bjalo ka pele. Gomme ka phafoga.

²² Ka buša ka lora ke bona diako tše di šupago tša mabele tšeo di bego di tladitše mme di budule, di metše lehlakeng le tee.

²³ Ka bona go hloga tše dingwe diako tše di šupago, tše tshesenyane tše di tšhumilwego ke phefo ya leganata.

²⁴ Diako tšeo tše tshesenyane tša mabele tša metša tšela tša go tlatša tše di šupago. Ke boditše didupe ditoro tše, fela ga go le o tee wa bona yo a kgonnego go ntlhathollela tšona.”

²⁵ Josefa a re go kgoši: “Ditoro tšeo tše pedi di ra selo se tee, kgoši; Modimo o go boditše se a tlilego go se dira.

²⁶ Dikgomo tša go nona tše di šupago ke mengwaga ye e šupago, mme diako tša mabele tše di tladitšego tše di šupago le tšona ke mengwaga ye e šupago; di ra selo se tee.

²⁷ Dikgomo tše di šupago tša ditshadi tša makhoro tše di rotogilego ka morago, le diako tša mabele tše tshesenyane tše di šupago tše di tšhumilwego ke phefo ya leganata ke mengwaga ye e šupago ya tlala.

²⁸ Go ka wona mokgwa woo ke go boditšego, kgoši – Modimo o go laeditše se a tlilego go se dira.

²⁹ Go tla ba le mengwaga ye e šupago ya mokhora wo mogolo nageng ka moka ya Egepeta.

³⁰ Ka morago ga moo go tla ba le mengwaga ye e šupago ya tlala, gomme mengwaga yela ya mokhora e tla lebalwa, ka gobane tlala e tla senya naga.

³¹ Mokhora wola o tla lebalwa, ka gobane tlala ye e tlago latela e tla ba ye šoro kudu.

³² Go ipoeletša ga toro ya gago go ra gore taba yeo e beilwe ke Modimo, le gore o tla e hlagiša kgauswinyana.

³³ “Bjale, kgoši, kgetha monna wa bohlale le kwešišo, o mmee molaodi wa naga.

³⁴ O be o bee bahlapetši ba go ntšhiša batho karolo ya bohlano ya tše ba di bunnego mo mengwageng ye e šupago ya mokhora.

³⁵ O ba laele gore ba kgoboketše dijo ka moka mo mengwageng ya mokhora ye e tlago, gomme o ba fe maatla a go boloka mabele mo metseng, le go a leta.

³⁶ Dijo tše di tla tla di fepa setšhaba mo mengwageng ye e šupago ya tlala ye e tlilego go wela Egepeta, gore batho ba se ke ba tla ba hwa ka tlala.”

³⁷ Kgoši le bakgomana ba gagwe ba amogela keletšo yeo,

³⁸ gomme kgoši a re go bona: “Re ka se tsoge re hweditše motho yo mokaone go feta Josefa, monna yo a nago le moya wa Modimo.”

³⁹ Kgoši a re go Josefa: “Modimo o go utolletše tše ka moka, ka gona go molaleng gore o na le bohlale bjo bogolo le kwešišo go feta batho bohle.

⁴⁰ Ke tla go bea mookamedi wa lapa la ka, gomme batho ba ka ka moka ba tla phetha ditaelo tša gago. Maatla a gago a tla fetwa ke a ka fela.

⁴¹ Bjale ke go bea mmušiši wa Egepeta ka moka.”

⁴² Kgoši a khwamola palamonwana ya gagwe ye e bego e tlokilwe sekibo sa mošate, a e khwamela monwaneng wa Josefa. A mo apeša seaparo sa lešela le boletiana, a mo apeša le ketane ya gauta molaleng.

⁴³ A mo fa koloi ya bobedi ya mošate gore a sepele ka yona, gomme baleti ba gagwe ba mo eta pele ba goa ba re: “Tlogang tseleng! Tlogang tseleng!” Ka gona Josefa a bewa mmušiši wa naga ya Egepeta ka moka.

⁴⁴ Kgoši a re go yena: “Kgoši ke nna – gomme ga go le o tee nageng ya Egepeta ka moka yo a tlago dira selo a se a dumelelwa ke wena.”

⁴⁵ A fa Josefa leina la Seegepeta la Tsafenate-Paneage. A mo fa mosadi, Asenate, morwedi wa Potifera, moprista wa motse wa Heliopolise. Josefa o be a na le mengwaga ye masome a mararo ge a thoma go hlankela kgoši ya Egepeta. O ile a tloga kgorong ya kgoši gomme a ralala le naga ka moka.

⁴⁶

⁴⁷ Mo mengwageng ye e šupago ya mokhora naga e ile ya ntšha mabele a mantši.

⁴⁸ Josefa a kgoboketša dijo ka moka moo mengwageng yeo e šupago, a di boloka mo metseng. Motseng wo mongwe le wo mongwe a boloka dijo tše di tšwago mašemong a wona.

⁴⁹ A boloka mabele a mantši moo a ilego a šala a swana le lešabašaba la lewatle. Ya ba a mantši mo a ilego a ba a lesa go a ela.

⁵⁰ Pele ga ge mengwaga ya tlala e etla Josefa o ile a ba le barwa ba babedi ka Asenate.

⁵¹ A re: “Modimo o ntebadišitše ditlaišego tša ka ka moka, le lapa la tate ka moka”; ka gona a rea morwa wa gagwe wa mathomo leina la Manase.

⁵² A ba a re: “Modimo o mphile bana nageng ye ke hlakilego go yona”; ka gona a rea morwa wa gagwe wa bobedi leina la Efraime.

⁵³ Mengwaga ye e šupago ya mokhora nageng ya Egepeta ya fela,

⁵⁴ mme gwa thoma mengwaga ye e šupago ya tlala, bjalo ka ge Josefa a boletše. Gwa wa tlala nageng ye nngwe le ye nngwe, eupša Egepeta ka moka gwa ba le dijo.

⁵⁵ Ge Baegepeta ba thoma go kwa tlala, ba llela go kgoši gore a ba fe dijo. Yena a re go bona: “Sepelang go Josefa, le direng se a le botšago sona.”

⁵⁶ Tlala ya ba ye šorošoro ya aparela naga ka moka, ka gona Josefa a bula mengwako ka moka ya polokelo, a rekišetša Baegepeta mabele.

⁵⁷ Batho ba tla Egepeta ba etšwa gohle lefaseng go tlo reka mabele go Josefa, ka gobane tlala e be e iphile maatla mo gongwe le mo gongwe.

42

¹ Ge Jakobo a ekwa gore go ne mabele Egepeta, a re go barwa ba gagwe: “Le reng le sa itšhikinye?

² Ke kwa gore go na le mabele kua Egepeta; sepelang gona le yo re rekela, gore re tle re phele re se ke ra hwa.”

³ Ka gona bomorwarragoJosefa ba lesome ba yo reka mabele Egepeta,

⁴ eupša Jakobo a se ke a ba roma le Benjamene, ngwanaboJosefa, ka gobane o be a boifa gore a ka welwa ke kotsi.

⁵ Barwa ba Jakobo ba fihla ba na le batho ba bangwe go tlo reka mabele, ka gobane go be go wele tlala nageng ya Kanana.

⁶ Josefa, ka ge e be e le mmušiši wa naga ya Egepeta, o be a rekišetša batho ba lefase ka moka mabele. Ka gona bomorwarragoJosefa ba fihla, mme ba obama pele ga gagwe.

⁷ Ge Josefa a bona bomorwarragwe, a ba tseba, fela a dira mo nkego ga a ba tsebe. A ba botšiša ka bogale a re: “Le tšwa kae?” Bona ba mo fetola ba re: “Re tšwa Kanana, re tlile go reka dijo.”

⁸ Josefa a tseba bomorwarragwe, eupša bona ba se ke ba mo tseba.

⁹ A gopola ditoro tše a kilego a di lora ka bona, gomme a re: “Ke lena dihlodi; le tlile go bona moo naga ya rena e kago šwahlelwa gabonolo gona.”

¹⁰ Ba mo fetola ba re: “Aowa, mong wa rena. Rena bahlanka ba gago re tlile go reka dijo.

¹¹ Re barwa ba monna o tee ka moka ga rena. Rena bahlanka ba gago ga re dihlodi, re batho bao ba botegago.”

¹² Josefa a re go bona: “Ga go bjalo! Le tlile go bona moo naga ya rena e ka šwahlelwago gabonolo gona.”

¹³ Bona ba re: “Rena bahlanka ba gago re be re le barwa ba lesome le ba babedi, barwa ba monna o tee kua nageng ya Kanana. O tee ga a sa le gona, gomme wa phejane o šetše le tatagorena.”

¹⁴ Josefa a ba fetola a re: “Go no ba ka moo ke boletšego; le dihlodi.

¹⁵ Le tla lekwa ka mokgwa wo: Ke ena ka kgoši gore le ka se sepele, ge e se ge ngwanabolena wa mafelelo a ka tla mo.

¹⁶ Romang yo mongwe wa lena go yo mo tšea. Lena ba bangwe le tla dišwa go fihlela therešo ya se le se bolelago e kgonthišišwa. Go sego bjalo gona ke ena ka kgoši gore le dihlodi.”

¹⁷ Ge a seno realo, a ba tswalelela kgolegong matšatši a mararo.

¹⁸ Ka letšatši la boraro Josefa a re go bona: “Ke nna motho yo a boifago Modimo. Dirang se ke le botšago sona, gomme le tla phela.

¹⁹ Go laetša gore le a botega, yo mongwe wa lena o tla šala ka kgolegong ye le bego le le ka go yona; lena ba bangwe le ka sepela la iša mabele ao le a rekilego malapeng a lena ao a bolawago ke tlala.

²⁰ Mme le tlišeng ngwanabolena wa mafelelo go nna. Seo se tla šupa gore le be le bolela therešo, gomme nka se le bolaye.” Ba kwana le taba yeo,

²¹ gomme ba botšana ba re: “Ee, re tlaišwa ka baka la se re se dirilego ngwanaborena; re bone tlalelo ye kgolo yeo a bego a le go yona ge a be a kgopela kgaugelo, fela ra se ke ra mo theetša. Ke ka baka leo bjale re lego mo matshwenyegong a.”

²² Rubene a re: “Ke le boditše gore le se ke la dira mošemanyana yola bobe, fela la se ke la theetša. Gomme gonabjale lehu la gagwe le lefeletšwa ka rena.”

²³ Josefa o be a kwešiša se ba se bolelago, eupša bona ba sa tsebe, ka gobane ba be ba bolela naye ka mohlatholledi.

²⁴ Josefa a tloga go bona gomme a thoma go lla. Ge a kgona go bolela gape, a boa, a hlaola Simeone, mme a laela gore a tlengwe pele ga bona.

²⁵ Josefa a laela gore mekotla ya bomorwarragwe e tlatšwe mabele, le gore tšhelete ya yo mongwe le yo mongwe e boetšwe ka mokotleng wa gagwe, le gore ba fiwe mefago. Seo sa dirwa.

²⁶ Barwa bao ba rweša dipokolo tša bona mabele a ba a rekilego, gomme ba tloga.

²⁷ Ge ba le lefelong leo go robalwago go lona tseleng, yo mongwe wa bona a tlemolla mokotla wa gagwe gore a fe pokolo ya gagwe dijo, mme a hwetša tšhelete ya gagwe ka molomong wa mokotla wa gagwe.

²⁸ A bitša bomorwarragwe a re: “Tšhelete yela ya ka e bušitšwe; še ka mo mokotleng wa ka!” Ba gakanega, gomme ba botšišana ba tšhogile ba re: “Ke eng se Modimo a re dirilego sona?”

²⁹ Ge ba fihla go Jakobo, tatabo, kua Kanana, ba mmotša tšohle tše di diregilego ba re:

³⁰ “Mmušiši wa Egepeta o boletše le rena ka bogale, a re bea molato wa go re re dihlodi tša naga ya gagwe.

³¹ Re ile ra mo fetola ra re: ‘Ga re dihlodi, re batho bao ba botegago.

³² Re be re le barwa ba lesome le ba babedi ba monna o tee. Yo mongwe o tlogile, gomme wa mafelelo bjale o kua Kanana le tatagorena.’

³³ Monna yoo a re fetola a re: ‘Ge eba le ba ba botegago ke tla bona ka mokgwa wo: Yo mongwe wa lena o tla šala le nna; ba bangwe le tla tšea mabele a malapa a lena a a bolawago ke tlala, la tloga.

³⁴ Le tlišeng ngwanabolena wa mafelelo go nna. Ke moo ke tlago tseba gore ga le dihlodi, le batho ba ba botegago; ke tla le neela ngwanabolena, gomme le ka dula mo la sepela le lokologile.’ ”

³⁵ Ge ba kgothola mekotla, yo mongwe le yo mongwe a hwetša mokotlana wa gagwe wa tšhelete; gomme ge ba bona tšhelete yeo, bona le Jakobo, tatabo, ba tšhoga.

³⁶ Tatabo a re go bona: “A le nyaka go ntahlela bana ba ka ka moka? Josefa o ile, Simeone o ile, mme bjale le nyaka go tšea Benjamene. Bohloko bo kwewa ke nna!”

³⁷ Rubene a re go tatagwe: “Ge nka se boe le Benjamene go wena, o bolaye barwa ba ka ba babedi. Mo gafele diatleng tša ka, gomme ke tla mmušetša go wena.”

³⁸ Eupša Jakobo a re: “Morwa wa ka a ka se ye le lena; mogolwagwe o hwile, mme ke yena a nnoši yo a šetšego. Se sengwe se ka mo hlagela mo tseleng. Ke nna motho yo a tšofetšego, gomme manyami a le kago ntlišetša ona a tla mpolaya.”

43

¹ Tlala e ile ya gakala nageng ya Kanana,

² gomme ge lapa la Jakobo le feditše mabele ao ba bego ba tšo a tšea Egepeta, Jakobo a re go barwa ba gagwe: “Boelelang le yo re selela.”

³ Juda a re go yena: “Monna yola o re boditše tsebegokwa gore re ka se ke ra dumelelwa go boela go yena, ge e se ge re na le ngwanaborena.

⁴ Ge o dumela go re roma le ngwanaborena, re tla ya ra go rekela dijo.

⁵ Ge o sa dumele re ka se ye, ka gobane monna yola o re boditše gore re ka se dumelelwe go boela go yena ge e se ge ngwanaborena a na le rena.”

⁶ Jakobo a re: “Ke ka baka lang ge le ntsošeditše matshwenyego a makaaka ka go botša monna yola gore le na le ngwanabolena yo mongwe?”

⁷ Ba mo fetola ba re: “Monna yola o ile a fela a re botšiša tša rena le tša lapa laborena a re: ‘A tatagolena o sa phela? A le sa na le ngwanabolena?’ Re ile ra tlemega go fetola dipotšišo tša gagwe. Re be re ka tseba bjang gore o tla re botša gore re tle le ngwanaborena?”

⁸ Juda a re go tatagwe: “Lesa mošemanyana yo a sepele le nna, re napeng re tloge, gore rena le wena le bana ba rena re se tlo hwa ka tlala.

⁹ Molato e tla ba wa ka ge a ka se boe; o mo nyake go nna. Ge nka se mmušetše go wena a sa phela gabotse, ke tla šikara molato woo ka mehla.

¹⁰ Ge nkabe re se ra tšea nako ye telele re letile, nkabe bjale re ile fao gabedi mme e bile re boile.”

¹¹ Tatabo a re go bona: “Ge eba go swanetše go ba bjalo, gona dirang se: Tšeang ditšweletšwa tše kaonekaone tša naga ka mekotla ya lena e le diloba tša mmušiši: borokhu bjo bonnyane, todi ye nnyane, dinoko, ditloomake le dialmone.

¹² Le tšeeng le tšhelete ye e lekanago le yela gabedi, ka gobane le swanetše go bušetša tšhelete yela ya go bewa ka melomong ya mekotla ya lena. Mohlomongwe e be e le phošo.

¹³ Tšeang ngwanabolena, le nape le boeleng fao.

¹⁴ A Modimo Ramaatlaohle a dire gore monna yola a le šokele, a le bušetše Benjamene le yoo ngawanabolena yo mongwe. Ge e le nnaena, ge eba ke swanetše go lahlegelwa ke bana ba ka, ga go seo nka se dirago.”

¹⁵ Ka gona barwa ba tšea diloba tšeo le tšhelete ye e lekanago le yela gabedi, ba leba Egepeta le Benjamene. Ba fihla ba itlhagiša go Josefa.

¹⁶ Ge Josefa a bona Benjamene a na le bona, a re go mohlokomedi wa ngwako wa gagwe: “Tšea banna ba o ba iše ka ngwakong. Ba tlile go ja le nna mosegare, ka gona o hlabe seruiwa o se apee.”

¹⁷ Monna yoo a dira ka moo a bego a laelwa ka gona, a iša banna bao ka ngwakong wa Josefa.

¹⁸ Ge ba išwa ngwakong ba boifa, ba re ka pelong: “Re tlišwa mo ka baka la tšhelete yela e ilego ya bušetšwa ka mekotleng ya rena la mathomo. Ba tla tloga ba re hlasela, ba tšea dipokolo tša rena, mme ba re dira makgoba a gagwe.”

¹⁹ Ka gona ge ba le lemating la ngwako ba re go mohlokomedi wa ngwako:

²⁰ “Morena, hle, a re go botše: Re kile ra tla mo go sela.

²¹ Ge re le lefelong leo go robalwago go lona tseleng ya go ya gae, ra bula mekotla ya rena, gomme yo mongwe le yo mongwe wa rena a hwetša tšhelete ya gagwe ka moka ka molomong wa mokotla wa gagwe. Re boile le yona.

²² Re tlile le tšhelete ye nngwe go tlo sela gape. Ga re tsebe gore ke mang yo a bušeditšego tšhelete ya rena ka mekotleng ya rena.”

²³ Mohlokomedi yoo a re: “Le se ke la tshwenyega. Le se ke la boifa. Modimo wa lena, Modimo wa tatagolena, o swanetše go ba a bušeditše tšhelete ya lena ka mekotleng ya lena. Nna ke amogetše tefelo ya lena.” Ke moka a tliša Simeone go bona.

²⁴ Mohlokomedi yoo a iša bomorwarragoJosefa ka ngwakong. A ba fa meetse gore ba hlape maoto, a ba a fepa dipokolo tša bona.

²⁵ Ba lokiša diloba tša bona gore e re ge Josefa a fihla mosegare, ba mo fe tšona, ka gobane ba be ba boditšwe gore ba tla ja naye.

²⁶ Ge Josefa a fihla gae, ba iša diloba tšela ngwakong go yena, gomme ba obama pele ga gagwe.

²⁷ A ba botšiša maphelo, a ba a tšwela pele a re: “A mokgalabje, tatagolena yo le mpoditšego ka yena, o kae? A o sa phela?”

²⁸ Ba mo fetola ba re: “Tatagorena, mohlanka wa gago, o gona o sa phela.” Gomme ba khunama pele ga gagwe ba mo lotšha.

²⁹ Ge Josefa a bona Benjamene, ngwana wa mmagwe, a re: “Na yo ke yena ngwanabolena wa mafelelo yo le mpoditšego ka yena?” Ke moka a re go Benjamene: “Modimo a go šegofatše, morwa wa ka.”

³⁰ A tloga ka potlako, ka gobane o be a rata ngwanabo kudu. O be a nyaka go lla, ka fao a ya phapošing ya gagwe, a llela gona.

³¹ Ge a hlapile mahlo a tšwa a itshwere, a laela gore dijo di tlišwe.

³² Josefa o ile a fiwa dijo tafoleng ye nngwe, bomorwarragwe le bona ba fiwa dijo go ye nngwe. Baegepeta bao ba bego ba eja moo ba ile ba fiwa dijo ka thoko, ka gobane ba be ba bona e le go ikiša fase go ja le Baheberu.

³³ BomorwarragoJosefa ba dudišwa tafoleng pele ga Josefa ka go latelana ga bona matswalong, go tloga ka yo mogolo go fihlela ka yo monnyane. Ge ba bona ka moo ba dudišitšwego ka gona, ba lebelelana ba tlabegile.

³⁴ Ba ile ba fiwa dijo di etšwa tafoleng ya Josefa, gomme Benjamene a fiwa dijo gahlano go feta yo mongwe le yo mongwe wa bona. Ka gona ba ja, ba nwa le Josefa ba khora.

44

¹ Josefa o ile a laela mohlokomedi wa ngwako wa gagwe a re: “Tšhelela banna ba dijo ka mekotleng ya bona tše ba ka kgonago go di rwala, gomme o bee tšhelete ya monna yo mongwe le yo mongwe ka molomong wa mokotla wa gagwe.

² O bee senwelo sa ka sa silibera ka molomong wa mokotla wa yo monnyane, gotee le tšhelete ya mabele a gagwe.” Mohlokomedi a dira ka moo a laetšwego ka gona.

³ E rile e sa le bošego ka la ka moswane bomorwarragoJosefa ba fiwa tsela le dipokolo tša bona.

⁴ Ge ba sa sepetše sekgalanyana go tloga motseng, Josefa a re go mohlokomedi wa ngwako wa gagwe: “Kitima o šale banna bale morago. Ge o seno ba swara tseleng o ba botšiše o re: ‘Ke ka baka la eng le lefelediše botse ka bobe?

⁵ Le reng le utswitše senwelo sa mong wa ka sa silibera? Ke senwelo se mong wa ka a nwago ka sona, gape a laolago ka sona. Le obile molato wo mogolo!’ ”

⁶ Ge mohlokomedi yoo a ba swere tseleng, o ile a bolela ka mokgwa woo.

⁷ Ba mo fetola ba re: “O ra eng, morena, ge o bolela ka mokgwa wo? Ruri, re a go botša, ga ra dira taba ya mohuta woo.

⁸ O a tseba gore re go boetše le tšhelete yela ra go e hwetša ka melomong ya mekotla ya rena ge re boa nageng ya Kanana. Bjale re ka napa ra utswa silibera goba gauta ya ngwako wa mong wa gago?

⁹ Morena, ge yo mongwe wa rena a ka hwetšwa a se swere, a a bolawe, mme rena ka moka re tla ba makgoba a gago.”

¹⁰ Yena a re: “Go lokile; eupša ke fela yoo a tlago hwetšwa a swere senwelo yo e tlago ba lekgoba la ka, lena ka moka le tla lokologa.”

¹¹ Ka gona ba phakiša ba theoša mekotla ya bona, gomme yo mongwe le yo mongwe a tlemolla mokotla wa gagwe.

¹² Mohlanka yoo wa Josefa a nyaka ka tlhokomelo, a thoma ka wa yo mogolo a feleletša ka wa yo monnyane, gomme senwelo seo sa hwetšwa ka mokotleng wa Benjamene.

¹³ BomorwarragoJosefa ba gagola diaparo tša bona, ba rweša dipokolo tša bona mekotla, mme ba gomela motseng.

¹⁴ Ge Juda le bomorwarragwe ba fihla ngwakong wa Josefa, Josefa o be a sa le fao. Ba itahlela fase pele ga gagwe,

¹⁵ gomme yena a re: “Le dirile eng? A le be le sa tsebe gore motho wa maemo a ka o na le maatla a go le utolla ka go phekola?”

¹⁶ Juda a mo fetola a re: “Ke ge re ka hlwa re sa go botšang, mong wa ka? Re ka go ngangiša bjang? Re ka laetša bjang gore ga re na le molato? Modimo o utolotše molato wa rena, bahlanka ba gago. Ka moka ga rena bjale re makgoba a gago, mong wa ka, e sego fela yoo senwelo se hweditšwego go yena.”

¹⁷ Josefa a re: “Aowaowaa! Nka se tsoge ke dirile taba yeo! Ke yoo senwelo se hweditšwego go yena fela yo e tlago ba lekgoba la ka. Lena ka moka le ka ipoelela go tatagolena ka khutšo.”

¹⁸ Juda a batamela go Josefa a re: “Hle, mong wa ka, ntumelele gore ke bolele nago ke lokologile. O se ke wa mpefelelwa; o swana le kgoši ka sebele.

¹⁹ Mong wa ka, o re botšišitše wa re: ‘A le na le tatagolena goba ngwanabolena yo mongwe?’

²⁰ Ra go fetola, mong wa ka, ra re: ‘Re na le tatagorena yo a tšofetšego, le ngwanaborena yo monnyane yo a mmelegetšwego botšofading bja gagwe. Mogolo wa mošemanyana yoo o hlokafetše, gomme yena ke yena a nnoši wa bana ba mmagwe yo a sa phelago; tatagwe o mo rata ka kudu.’

²¹ Ke mo o rilego go rena, bahlanka ba gago: ‘Le mo tlišeng mo, gore ke tle ke mmone.’

²² Gomme rena ra go fetola, mong wa ka, ra re: ‘Mošemanyana yoo a ka se tlogele tatagwe; ge a ka mo tlogela, tatagwe o tla hwa.’

²³ Ke moo wena o itšego go rena, bahlanka ba gago: ‘Le ka se dumelelwe go boela mo go nna ge e se ge ngwanabolena wa mafelelo a ka tla le lena.’

²⁴ “Ge re boetše go tatagorena, re ile ra mmotša seo o se boletšego.

²⁵ Ke moo yena a itšego: ‘Boelelang le yo re selela.’

²⁶ Rena ra mo fetola ra re: ‘Re ka se kgone go ya; re ka se dumelelwe go boela go monna yola ge e se ge ngwanaborena wa mafelelo a na le rena. Re tla ya fela ge ngwanaborena wa mafelelo a ka ya le rena.’

²⁷ Tate, mohlanka wa gago, a re go rena: ‘Le a tseba gore mogatšake, Ragele, o mpelegetše barwa ba babedi fela.

²⁸ Yo mongwe wa bona o šetše a ntlogetše. O swanetše go ba a rathagantšwe ke dibata, ka gore e sa le go tloga mola ga se ka ke ka mmona gape.

²⁹ Ge bjale le ka tšea yo mo go nna, gomme a hlagelwa ke se sengwe, manyami a le tlago a tliša a tla mpolaya, ka gore ke tšofetše kudu.’ ”

³⁰ Juda a tšwela pele a re: “Bjale, mong wa rena, ge nka boela go tate ke se ne mošemanyana yo, ge a seno bona gore mošemanyana ga a ne nna, o tla hwa, ka gobane o rata mošemanyana yo kudu. Le gona o tšofetše mo e lego gore manyami a re ka mo tlišetšago ona a ka mmolaya.

³¹

³² Go feta moo, nna, mohlanka wa gago, ke itlemile go tate ka baka la mošemanyana yo. Ke mmoditše gore ge nka se bušetše mošemanyana yo go yena, ke tla šikara molato woo bophelo bja ka ka moka.

³³ Gomme bjale, mong wa ka, a go šale nna, mohlanka wa gago, ke le lekgoba la gago bakeng sa mošemanyana yo; mo lese a boele morago le bomorwarragwe.

³⁴ Nka boela bjang go tate ge mošemanyana yo a se na le nna? Nka se kgotlelele go bona masetlapelo ao a ka welago tate.”

45

¹ Josefa o be a se sa kgona go itshwara pele ga bahlanka ba gagwe, ka gona a ba laela ka moka gore ba tloge go yena. Go be go se na motho yo mongwe ge Josefa a botša bomorwarragwe gore ke yena mang.

² O be a llela godimo moo e lego gore Baegepeta ba ile ba mo kwa, gomme taba yeo ya begwa mošate.

³ Josefa a re go bomorwarragwe: “Ke nna Josefa. A tate o sa phela?” Fela bomorwarragwe ba be ba mmoifa moo e lego gore ba ile ba se ke ba mo fetola.

⁴ Ke moo Josefa a itšego go bona: “Hle, batamelang.” Ba batamela, gomme a re: “Ke nna ngwanabolena, Josefa, yola le mo rekišitšego Egepeta.

⁵ Bjale le se ke la tshwenyega goba la itshola ka ge le nthekišitše fa. Gabotsebotse ke Modimo yo a nthometšego mo pele ga ge le etla, gore ke tle ke phološe malapa a lena.

⁶ Wo e sa le fela ngwaga wa bobedi wa tlala nageng; go tla ba le mengwaga ye mehlano gape yeo ka yona go ka se kego gwa lengwa goba gwa bunwa.

⁷ Modimo o nthometše mo pele ga ge le etla gore a tle a phološe ba bantši ba lena, gore le se ke la hwa la felela mo lefaseng.

⁸ Ga se lena le nthometšego mo, ke Modimo. O ntirile mohlankedi yo mogologolo wa kgoši. Ke okametše lapa la gagwe lohle; ke nna mmuši wa Egepeta ka moka.

⁹ “Bjale itlhaganeleng le boeleng go tate le fihle le mmotše le re Josefa, morwago, o re: ‘Modimo o ntirile mmuši wa Egepeta ka moka; tlaa go nna ntle le go dikadika.

¹⁰ O tla dula seleteng sa Goshene moo o tlago ba kgauswi le nna – wena, le bana ba gago, le ditlogolo tša gago, le dihuswane tša gago, le dikgomo tša gago, le tšohle tše e lego tša gago.

¹¹ Ge o le Goshene ke tla kgona go go hlokomela. Go sa tlo ba le mengwaga ye mehlano ya tlala; gomme ga ke nyake gore wena le lapa la gago le diruiwa tša gago le bolawe ke tlala.’ ”

¹² Josefa a tšwela pele a re: “Bjale ka moka ga lena, le wena ngwanešo, Benjamene, le a bona gore ke tloge ke le yena Josefa.

¹³ Le botšeng tate gore ke yo mogolo bjang mo Egepeta, le mmotšeng le ka tšohle tše le di bonego. Gomme le akgofeng le mo tlišeng mo.”

¹⁴ A ubarela ngwanabo, Benjamene, gomme a lla; Benjamene le yena a lla ge a mo ubarela.

¹⁵ A re a sa lla, a ubarela yo mongwe le yo mongwe wa bomorwarragwe, a ba atla. Ka morago ga fao bomorwarragwe ba thoma go bolela le yena.

¹⁶ Ge lapa la mošate le ekwa gore bomorwarragoJosefa ba tlile, kgoši le bakgomana ba gagwe ba thaba.

¹⁷ Kgoši a re go Josefa: “Botša bongwaneno ba rweše diruiwa tša bona merwalo, ba boele nageng ya Kanana;

¹⁸ ba yo tšea tatagobona le malapa a bona, ba boe. Ke tla ba fa naga ye kaonekaone mo Egepeta, gomme ba tla ba le dijo tše ntšintši.

¹⁹ O ba botše le gore ba tloge le dikoloi mo Egepeta tše di tlago namelwa ke basadi ba bona le bana ba bona ba bannyane, le gore ba tle le tatagobona.

²⁰ Ba se ke ba tshwenyega ge ba ka tlogela dilo tše dingwe tša bona, ka gobane tše kaonekaone tša naga ka moka ya Egepeta e tla ba tša bona.”

²¹ Barwa ba Jakobo ba dira ka moo ba boditšwego ka gona. Josefa a ba fa dikoloi bjalo ka ge kgoši a laetše, a ba a ba fa le mefago.

²² A fa le yo mongwe le yo mongwe diaparo tše mpsha, Benjamene yena a mo fa dipapetlana tša silibera tše makgolo a mararo, le diaparo tše mpsha tše tlhano.

²³ A romela tatagwe dipokolo tše lesome di rwele dithoto tše kaonekaone tša Egepeta, le tše lesome di rwele mabele le dinkgwa le mefago ye mengwe ya tatagwe.

²⁴ A laelana le bomorwarragwe, ya re ge ba sepela a re go bona: “Le se ke la tšama le elwa mo tseleng.”

²⁵ Ba tloga Egepeta, ba boela gae go Jakobo, tatabo, kua Kanana.

²⁶ Ba fihla ba mmotša ba re: “Josefa o sa phela! Ke mmuši wa Egepeta ka moka!” Jakobo a gakgamala mme a se ke a ba kgolwa.

²⁷ Eupša ge ba mmotša tšohle tše Josefa a ba boditšego tšona, le ge a bona dikoloi tše Josefa a di rometšego go tlo mo iša Egepeta, a beega pelo.

²⁸ Ke moo a itšego: “Morwa wa ka Josefa o sa phela! Di kwetše! Ke swanetše go yo mmona pele ga ge ke ehwa.”

46

¹ Jakobo o ile a phutha tšohle tše a bego a na le tšona gomme a ya Beresheba, moo a fihla a direla Modimo wa tatagwe Isaka dihlabelo.

² Modimo a bolela le yena ka pono bošego a mmitša a re: “Jakobo! Jakobo!” Jakobo a mo araba a re: “Iše, ke theeditše.”

³ Modimo a re: “Ke nna Modimo, Modimo wa tatago. O se ke wa boifa go ya Egepeta; ke tla dira ditlogolo tša gago setšhaba se segolo fao.

⁴ Ke tla ya nago Egepeta, gomme ka kgonthe ke tla bušetša ditlogolo tša gago mo nageng ye. Josefa o tla ba le wena ge o ehwa.”

⁵ Jakobo a tloga Beresheba. Barwa ba gagwe ba mo nametša le bana ba bona ba bannyane le basadi ba bona dikoloi tšeo kgoši ya Egepeta e bego e di rometše.

⁶ Ba tšea diruiwa tša bona le tšohle tše ba di kgobokantšego Kanana, ba ya Egepeta. Jakobo a tšea ditlogolo ka moka tša gagwe:

⁷ barwa ba gagwe, le ditlogolo tša gagwe tša bašemane, le barwedi ba gagwe, le ditlogolo tša gagwe tša basetsana.

⁸ Šeba bana ba lapa la Jakobo bao ba ilego le yena Egepeta: Rubene, morwa yo mogolo wa Jakobo,

⁹ le barwa ba gagwe: Enoko, Palu, Hetserone le Karmi.

¹⁰ Simeone le barwa ba gagwe: Jemuele, Jamine, Ohade, Jakine, Tsohare le Shaulo, morwa wa mosadi wa Mokanana.

¹¹ Lefi le barwa ba gagwe: Gershone, Kehate le Merari.

¹² Juda le barwa ba gagwe: Shelage, Peretse le Serage. Barwa ba bangwe ba Juda, Ere le Onane, ba hwetše Kanana. Barwa ba Peretse e be e le Hetserone le Hamule.

¹³ Isakara le barwa ba gagwe: Tola, Puba, Jashube le Shimrone.

¹⁴ Sebulone le barwa ba gagwe: Serede, Elone le Jagliele.

¹⁵ Bao ke barwa ba Lea a ba belegetšego Jakobo kua Mesopotamia, go sa balwe le morwedi wa gagwe, Dina. Ka moka ditlogolo tša gagwe ka Lea e be e le tše masome a mararo a metšo ye meraro.

¹⁶ Gade le barwa ba gagwe: Tsifione, Hagi, Shuni, Etsebone, Eri, Arode le Areli.

¹⁷ Asere le barwa ba gagwe: Jimna, Jishba, Jishbi le Beria, le kgaetšedi ya bona, Serage. Barwa ba Beria e be e le Hebere le Malkiele.

¹⁸ Batho ba ba lesome le metšo ye e selelago ke ditlogolo tša Jakobo ka Silpa, mosetsana wa lekgoba yo Labane a mo filego Lea, morwediagwe.

¹⁹ Mosadi wa Jakobo, Ragele, o ile a mmelegela barwa ba babedi: Josefa le Benjamene.

²⁰ Kua Egepeta Josefa o ile a ba le barwa ba babedi, Manase le Efraime, ka Asenate, morwedi wa Potifera, moprista wa Heliopolise.

²¹ Barwa ba Benjamene e be e le Bela, Bekere, Ashbele, Gera, Naamane, Ehi, Roshe, Mupime, Hupime le Arde.

²² Batho ba ba lesome le ba bane ke ditlogolo tša Jakobo ka Ragele.

²³ Dane le morwa wa gagwe, Hushime.

²⁴ Naftali le barwa ba gagwe: Jagtsiele, Guni, Jetsere le Shileme.

²⁵ Batho ba ba šupago ba ke ditlogolo tša Jakobo ka Bilha, mosetsana wa lekgoba yoo Labane a mo filego Ragele, morwediagwe.

²⁶ Batho ka moka ba leloko la Jakobo ka madi ba ba ilego ba ya Egepeta le yena e be e le ba masome a a selelago le metšo ye e selelago, go sa balwe basadi ba barwa ba gagwe.

²⁷ Barwa ba ba belegetšwego Josefa kua Egepeta e be e le ba babedi, ka gona batho ba lapa la Jakobo ka moka ba ba bilego fao ya ba ba masome a a šupago.

²⁸ Jakobo o ile a roma Juda go ba eta pele go kgopela Josefa gore a ba gahlanetše kua Goshene. Ge ba fihla,

²⁹ Josefa a namela koloi ya gagwe gomme a ya Goshene go yo gahlanetša tatagwe. Ge ba gahlana, Josefa a ubarela tatagwe molaleng, gomme a lla nako ye telele.

³⁰ Jakobo a re go Josefa: “Bjale ka gore ke go bone gomme ke a tseba gore o sa phela, nka no ikhwela.”

³¹ Ke moo Josefa a itšego go bomorwarragwe le go ba bangwe ka moka ba lapa la Jakobo: “Ke tla ya ka begela kgoši gore bomorwarre le ba lapa la tate ka moka bao ba bego ba dula Kanana, ba tlile go nna.

³² Ke tla mmotša gore lena le badiši mme le batho ba leruo, le gore le tlile le dihuswane le dikgomo le tšohle tše e lego tša lena.

³³ Ge kgoši a le bitša a le botšiša gore modiro wa lena ke eng,

³⁴ le mmotše gore le dišitše diruiwa bophelo bja lena ka moka, bjalo ka borakgolokhukhu ba lena. Ke moo a tlago le dumelela go dula seleteng sa Goshene.” Josefa o ile realo ka gobane Baegepeta ba be ba hlaswa badiši.

47

¹ Ka gona Josefa a tšea bomorwarragwe ba bahlano a ya nabo go kgoši. A botša kgoši a re: “Tate le bomorwarre ba tlile ba etšwa Kanana le dihuswane le dikgomo tša bona le tšohle tše e lego tša bona. Bjale ba mo seleteng sa Goshene.” A napa a tsebiša kgoši bomorwarragwe.

²

³ Kgoši a ba botšiša a re: “Mošomo wa lena ke eng?” Ba mo fetola ba re: “Re badiši, rena bahlanka ba gago, bjalo ka borakgolokhukhu ba rena.

⁴ Re falaletše mo nageng ye ka gobane nageng ya Kanana komelelo ke ye šorošoro mo e lego gore ga go phulo ya mehlape ya rena. Hle, re dumelele go dula seleteng sa Goshene.”

⁵ Kgoši a re go Josefa: “Bjale ka gore tatago le bomorwarrago ba fihlile,

⁶ naga ya Egepeta ke ya bona. A ba dule seleteng sa Goshene, karolong ye kaonekaone ya naga. Gomme ge eba go na le banna ba tsebo ya leruo gare ga bona, o ba bee bahlokomedi ba diruiwa tša ka.”

⁷ Ke moka Josefa a yo tšea Jakobo, tatagwe, a mo tsebiša kgoši. Jakobo a šegofatša kgoši,

⁸ gomme kgoši a mmotšiša a re: “A o na le mengwaga ye mekae?”

⁹ Jakobo a mo fetola a re: “Bophelo bja ka bja go ralala le naga e bile mengwaga ye lekgolo le masome a mararo. Mengwaga yeo e bile ye mennyane ye methata, ga se ya swana le mengwaga ye mentši ya botate ya go ralala ga bona.”

¹⁰ Jakobo a laela kgoši ka tšhegofatšo, gomme a tloga.

¹¹ Ka gona Josefa a dudiša tatagwe le bomorwarragwe nageng ya Egepeta, a ba fa naga mo go kaonekaone kgauswi le motse wa Ramsese, ka moo kgoši a laetšego ka gona.

¹² Josefa a fa tatagwe le bomorwarragwe le batho ka moka ba lapa la tatagwe dijo, gotee le ba bannyane.

¹³ Tlala e be e iphile maatla go se na le dijo nageng ka moka, gomme batho ba Egepeta le ba Kanana ba fokola ka baka la yona.

¹⁴ Ge ba reka mabele Josefa a kgoboketša tšhelete ka moka, a e iša mošate.

¹⁵ Ge tšhelete ka moka ya Egepeta le Kanana e fedile, Baegepeta ba tla go Josefa ba re: “Re fe dijo! O se ke wa re lesa re ehwa. Tšhelete ya rena e fedile.”

¹⁶ Josefa a ba fetola a re: “Tlišang diruiwa tša lena; ke tla di tšea ka le fa dijo ge eba tšhelete ya lena e fedile.”

¹⁷ Ka gona ba tliša diruiwa tša bona go Josefa, gomme a ba fa dijo; a tšea dipere le dihuswane le dikgomo le dipokolo. Ngwaga woo ba reka mabele go yena ka diruiwa tšohle tša bona.

¹⁸ Ka ngwaga wo o latelago ba tla go yena ba re: “Re ka se go utele, mong wa rena, gore tšhelete ya rena e fedile taa, gomme le diruiwa tša rena di feletše go wena. Ga go seo se šetšego se re ka go neago sona ge e se rena beng le mašemo a rena.

¹⁹ Se re lese re ehwa, le mašemo a rena a omelela wena o lebeletše. Re reke ka dijo, rena gotee le mašemo a rena. Re tla ba makgoba a kgoši, gomme mašemo a rena ya ba a gagwe. Re fe peu gore re phele re se ke ra hwa, le gore mašemo a rena a se ke a senyega.”

²⁰ Josefa a rekela kgoši naga ka moka ya Egepeta. Moegepeta yo mongwe le yo mongwe a gapeletšega go rekiša tšhemo ya gagwe, ka gobane tlala e be e le ye šoro kudu, gomme naga ka moka ya ba ya kgoši.

²¹ Josefa a dira batho ka moka ba naga ya Egepeta makgoba.

²² Ke naga ya baprista fela ye a ilego a se ke a e reka. Bona ba ile ba se gapeletšege go rekiša naga ya bona ka gobane kgoši o ile a ba fa kabelo ye ba ka phelago ka yona.

²³ Josefa a re go batho: “Bonang, bjale ke le rekile gore le be ba kgoši, lena le mašemo a lena. Peu še, le e bjale mašemong a lena.

²⁴ Ka nako ya go buna le swanetše go fa kgoši karolo ya bohlano ya tše le di bunnego. Mabele a a šalago le ka a beela peu le dijo tša lena le tša ba malapa a lena.”

²⁵ Ba mo fetola ba re: “O re phološitše; o ile wa re lokela, mong wa rena, gomme re tla ba makgoba a kgoši.”

²⁶ Ka gona Josefa a beela naga ya Egepeta molao wa go re karolo ya bohlano ya tše di bunnwego ke ya kgoši. Molao wo o sa le gona le lehono. E bile naga ya baprista fela ye e sego ya ka ya ba ya kgoši.

²⁷ Baisraele ba ile ba dula Egepeta seleteng sa Goshene; ba iketla gomme ba ba le bana ba bantši.

²⁸ Jakobo o dutše Egepeta mengwaga ye lesome le ye e šupago, ka gona o phetše mengwaga ye lekgolo le masome a mane a metšo ye e šupago.

²⁹ Ge nako ya gore a hwe e batamela, a laela gore morwa wa gagwe, Josefa, a bitšwe, gomme a re go yena: “Hle, tsenya seatla sa gago gare ga dirope tša ka, gomme o ene o tiišitše gore o ka se mpoloke Egepeta.

³⁰ Ke nyaka go bolokwa moo botate ba lego gona; o nthwale o nntšhe mo Egepeta, gomme o yo mpoloka moo ba bolokilwego gona.” Josefa a mo fetola a re: “Ke tla dira ka moo o nkgopelago ka gona.”

³¹ Jakobo a re: “Nkenele gore o tla dira bjalo.” Josefa a ena, gomme Jakobo a obama a leboga Modimo a le malaong a gagwe.

48

¹ Ka morago ga lebaka Josefa a botšwa gore tatagwe o a babja. Ka gona a tšea barwa ba gagwe ka babedi, Manase le Efraime, a yo bona Jakobo.

² Ge Jakobo a botšwa gore Josefa, morwagwe, o tlile go mmona, a itiiša, a tsoga a dula malaong.

³ A re go Josefa: “Modimo Ramaatlaohle o iponagaditše go nna kua Luse, nageng ya Kanana, a ntšhegofatša.

⁴ A re go nna: ‘Ke tla go fa bana ba bantši, mme ditlogolo tša gago e tla ba ditšhaba tše ntši; ke tla fa ditlogolo tša gago naga ye gore ba dule go yona go ya go ile.’ ”

⁵ Jakobo a tšwela pele a re: “Josefa, barwa ba gago ka babedi bao o ba belegetšwego mo Egepeta pele ga ge ke etla mo, ke ba ka; Efraime le Manase ke ba ka bjalo ka Rubene le Simeone.

⁶ Ge o ka ba le barwa ba bangwe gape, e ka se be ba ka; bohwa bjo ba bo hwetšago bo tla tla ka Efraime le Manase.

⁷ Ke dira se ka baka la Ragele, mmago. Ke ile ka nyama kudu ge a hlokafalela nageng ya Kanana, re šetše re batametše Efrata, ge ke boa Mesopotamia. Ke mmolokile fao ka thoko ga tsela ya go ya Efrata.” Efrata bjale e tsebja ka la Betlelehema.

⁸ Ge Jakobo a bona barwa ba Josefa, a mmotšiša a re: “A bašemanyana ba ke bomang?”

⁹ Josefa a mo fetola a re: “Ba ke bona barwa ba ka bao Modimo a mphilego bona mo Egepeta.” Jakobo a re: “Ba tliše mo go nna gore ke ba šegofatše.”

¹⁰ Mahlo a Jakobo a be a šetše a fifala ka baka la botšofadi, mme o be a sa bone gabotse. Josefa a tliša bašemanyana bao go yena, mme Jakobo a ba ubarela, a ba atla.

¹¹ A re go Josefa: “Ke be ke sa gopole gore ke tla go bona gape, gomme bjale Modimo o ntirile gore ke bone le bana ba gago.”

¹² Ke moo Josefa a ba tšerego difarong tša Jakobo, a obama pele ga gagwe.

¹³ Josefa a tšea Efraime ka letsogo la gagwe la go ja, a mmea go lebana le la nngele la Jakobo, gomme a tšea Manase ka letsogo la gagwe la nngele, a mmea go lebana le la go ja la Jakobo.

¹⁴ Eupša Jakobo a putlaganya matsogo a gagwe, gomme a bea letsogo la go ja hlogong ya Efraime, le ge e be e le yo monnyane, mme letsogo la nngele la ba hlogong ya Manase, yo e bego e le yo mogolo.

¹⁵ Ka gona a šegofatša Josefa a re: “A Modimo yo borakgolo Abrahama le Isaka ba mo hlanketšego a šegofatše bašemanyana ba! A Modimo yo a ntlhokometšego bophelong bja ka ka moka go fihlela letšatši le la lehono a ba šegofatše!

¹⁶ A morongwa yo a mphološitšego bobeng ka moka a ba šegofatše! A leina la ka le maina a borakgolo Abrahama le Isaka a dule a le gona ka bona! A ba be le bana ba bantši le ditlogolo tše ntši!”

¹⁷ Josefa o ile a tshwenyega ge a bona gore tatagwe o beile letsogo la gagwe la go ja godimo ga hlogo ya Efraime; ka gona a swara letsogo la tatagwe go le tloša hlogong ya Efraime go le iša go ya Manase.

¹⁸ A re go tatagwe: “E sego ka mokgwa woo, tate. Mošemanyana yo mogolo šo; bea letsogo la gago la go ja hlogong ya gagwe.”

¹⁹ Tatagwe a gana a re: “Ke a tseba, morwake, ke a tseba. Ditlogolo tša Manase le tšona e tla ba batho ba bantši. Fela moratho wa gagwe e tla ba yo mogolo go mo feta, gomme ditlogolo tša gagwe e tla ba ditšhaba tše kgolo.”

²⁰ A ba šegofatša ka tšatši leo a re: “Baisraele ba tla šegofatšana ka maina a lena. Ba tla re: ‘A Modimo a go šegofatše bjalo ka ge a šegofaditše Efraime le Manase.’ ” Ka tsela yeo Jakobo a etiša Efraime pele ga Manase.

²¹ Ke moo Jakobo a itšego go Josefa: “O a bona, ke batametše go hwa, fela Modimo o tla ba le wena, gomme o tla go bušetša nageng ya borakgolokhukhu ba gago.

²² Shekeme, selete sela sa go nona se ke se tšerego go Baamore ka tšhoša ya ka le bora bja ka, ke e fa wena, e sego bomorwarrago.”

49

¹ Jakobo o ile a laela gore barwa ba gagwe ba bitšwe, a re: “Mpotapoteng, ke le botše tše di tlago le hlagela ka moso:

² “Kgobokanang mme le theetšeng, lena barwa ba Jakobo. Theetšang Israele, tatagolena.

³ “Wena, Rubene, leitšibolo la ka, o maatla a ka, o thakangwaga ya bonna bja ka, o moikgodiši le senatla go feta barwa ba ka ka moka.

⁴ O swana le lefula le le falalago, eupša o ka se be yo mogologolo ka gobane o robetše le motlabo wa ka, wa tšhilafatša malao a tatago.

⁵ “Simeone le Lefi ke motho le moratho. Ditšhoša tša bona ke tša go bolaya batho.

⁶ Nka se be nabo melakeng ya bona, le dikopanong tša bona nka se ye, ka gobane ba bolaile batho ba befetšwe, le dipoo ba di golofaditše ba sa kgathale.

⁷ Pefelo ya bona a e rogakwe, ka gore ke ye šorošoro, le bogale bja bona, ka gobane ke bjo bobebobe. Ke tla ba gašanya le naga ya Israele ka moka, ke tla ba šwalalanya gare ga batho ba yona.

⁸ “Juda, wena bongwaneno ba tla go tumiša. O swara manaba a gago ka melala. Bomorwarrago ba tla obama pele ga gago.

⁹ Juda o swana le tau. O bolaya phoofolo, a gomele segoleng sa gagwe, a ikotlolle a patlame. Ke mang yo a kago mo tshwenya?

¹⁰ Juda o tla swara molamo wa bogoši. Ditlogolo tša gagwe di tla buša ka mehla. Ditšhaba di tla mo tlišetša diloba, tša mo hlompha.

¹¹ O tlema pokolwana ya gagwe morareng, go wo mokaonekaone wa merara ya gagwe. O hlatswa diaparo tša gagwe ka beine, dikobo tša gagwe o di hlatswa ka matutu a diterebe.

¹² O na le beine ye ntši mo e lego gore mahlo a gagwe a hubeditšwe ke go nwa beine, meno a gagwe a šweufaditšwe ke go nwa maswi.

¹³ “Sebulone o tla dula lebopong la lewatle, gomme lona e tla ba boemakepe. Naga ya gagwe e tla fihla Sidone.

¹⁴ “Isakara o swana le pokolo ya lekhoro ye e phatlamego gare ga mekotla ya sala ya yona.

¹⁵ O bona gore mo a khuditšego gona go bose, le gore naga e a mo kgahla. Ka gona o sekamiša legetla a rwala morwalo; o gapeletšega go šoma bjalo ka lekgoba.

¹⁶ “Dane o tla ahlolela batho ba gagwe. Ba tla swana le dikgoro tše dingwe tša Israele.

¹⁷ E tla ba noga ka thoko ga tsela, mokopa kgauswi le tsejana wo o kopago pere tlhakong, gore monamedi a we ka sa morago.

¹⁸ “Ke letetše phološo ya gago, Morena.

¹⁹ “Gade o tla hlaselwa ke lekoko la bahlakodi, eupša o tla ba rakediša.

²⁰ “Nageng ya Asere go tla tšwa dijo tša matsaka. Yena o tla ba le dijo tše di swanetšego kgoši.

²¹ “Naftali ke phala ye e kitimago e lokologile, ye e nago le diphalana tše botse.

²² “Josefa o swana le mohlare sedibeng, mohlare wa dienywa wo o ikalago lebotong.

²³ Manaba a gagwe a a mo rumola, a mo hlasela ka mara le mesebe ya bona.

²⁴ Eupša yena ge a thuntšha, bja gagwe bora ga bo foše, o matšato ka diatleng ke maatla a Modimo Yomaatla wa Jakobo, ke Modiši, Mošireletši wa Israele.

²⁵ Ke Modimo wa tatago, ke yena a go thušago, ke Ramaatlaohle yo a go šegofatšago ka ditšhegofatšo tša pula ye e tšwago godimo, le tša meetse a a runyago ka fase ga lefase, le tša leruo le bana.

²⁶ Ditšhegofatšo tša tatago di phala ditšhegofatšo tša dithaba tša kgalekgale, le dilo tše di kgahlišago tše di tšwago mebotong ya neng le neng. A ditšhegofatšo tše di tlele Josefa, di tlele yoo a kgethilwego go bomorwarragwe.

²⁷ “Benjamene o swana le phiri ye e gagolago. Mosong o hlasela manaba, mantšiboa o abaganya dithebola.”

²⁸ Tšeo ke dikgoro tše lesome le tše pedi tša Israele, gomme seo ke se tatabo a se boletšego ge a šegofatša barwa ba gagwe, mongwe le mongwe a fiwa tšhegofatšo ye e mo swanelago.

²⁹ Ke moo Jakobo a laetšego barwa ba gagwe a re: “Bjale ka gore ke kgauswi le go kopana le batho ba gešo ka go hwa, le mpolokeng le botate ka leweng leo le lego tšhemong ya Efrone, Mohete,

³⁰ kua Makapela, ka bohlabela bja Mamre, nageng ya Kanana. Abrahama o rekile lewa leo le tšhemo yeo go Efrone, Mohete, gore e be serapa sa go bolokela bahu.

³¹ Fao ke mo ba bolokilego Abrahama le mosadi wa gagwe, Sara; fao ke mo ba bolokilego Isaka le mosadi wa gagwe, Rebeka; gomme fao ke mo ke bolokilego Lea.

³² Ke ra tšhemo le lewa le le lego go yona tše di rekilwego go Bahete.”

³³ Ge Jakobo a fetša go laela barwa ba gagwe a boetša maoto malaong, gomme a kgaoga.

50

¹ Josefa a itahlela go tatagwe, a lla, a mo atla sefahlego.

² Ka morago a laela bahlanka ba gagwe ba dingaka gore ba omeletše setopo sa tatagwe.

³ Komeletšo yeo e ile ya tšea matšatši a masome a mane, gobane go omeletša setopo go tšea matšatši a makaalo. Ka morago Baegepeta ba mo ilela matšatši a masome a a šupago.

⁴ Ge nako ya go mo ilela e fetile, Josefa a re go bakgomana ba kgoši: “Hle, mpoleleng le kgoši le re:

⁵ ‘Ge tate a batametše go hwa, o ile a nkeniša gore ke mmoloke lebitleng leo a ipetletšego lona kua Kanana. Ka gona hle, ntumelele ke sepele ke yo boloka tate, gomme ka morago ga moo ke tla boa.’ ”

⁶ Kgoši ya fetola ya re: “Sepela o yo boloka tatago, bjalo ka ge o enne.”

⁷ Ka gona Josefa a ya go boloka tatagwe. Bahlankedi ba kgoši ka moka, le bakgomana ba bagolo ba kgoro ya gagwe, le baetapele ka moka ba Egepeta ba ya le Josefa.

⁸ Lapa la gagwe ka moka, le bomorwarragwe, le lapa la tatagwe ba ya naye. Seleteng sa Goshene go ile gwa šala fela bana ba bona ba bannyane le dihuswane le dikgomo.

⁹ Banna ba makoloi le ba ba nametšego dipere ba ya le yena; ya ba sephohla se segolo kudu.

¹⁰ Ge ba fihla seboeng kua Atade, ka bohlabela bja noka ya Jordane, ba tsoša sello se segolo, gomme Josefa a dira ditlhobogo matšatši a a šupago.

¹¹ Ge badudi ba Kanana ba bona batho bao ba lla kua Atade, ba ile ba re: “Sello sa Baegepeta ke se segolo bjang!” Ke ka baka leo felo fao go ilego gwa rewa leina la Abele-Mitsraime. Lefelo leo le ka bohlabela bja Jordane.

¹² Ka gona barwa ba Jakobo ba ile ba dira ka moo a bego a ba laetše ka gona;

¹³ ba mo iša Kanana, gomme ba mmoloka ka leweng tšhemong ye e lego Makapela, ka bohlabela bja Mamre, yeo Abrahama a bego a e rekile go Efrone, Mohete, gore e be serapa sa go bolokela bahu.

¹⁴ Ge Josefa a bolokile tatagwe, a boela Egepeta le bomorwarragwe le bohle bao ba bego ba ile polokong le yena.

¹⁵ Ge bomorwarragoJosefa ba bona gore tatagobona o hlokafetše ba ile ba re: “Re tla dira eng ge eba Josefa o sa re swere ka pelo, gomme o ikemišeditše go itefeletša bobe ka moka bjo re mo dirilego bjona?”

¹⁶ Ka gona ba romela molaetša go Josefa ba re: “Pele ga ge tatagorena a hlokafala

¹⁷ o boletše gore re go botše re re: ‘Hle, o lebalele bomorwarrago molato wa bona ka ge ba ile ba go dira gampe.’ Bjale hle, re lebalele phošo ye re e dirilego, rena bahlanka ba Modimo wa tatago.” Josefa a lla ge a botšwa molaetša wo.

¹⁸ Ke moka bomorwarragwe le bona ba tla ba itahlela fase pele ga gagwe ba re: “Ke rena ba, re makgoba a gago.”

¹⁹ Eupša Josefa a re go bona: “Le se ke la boifa; nka se ipee maemong a Modimo.

²⁰ Le ile la rera go ntira bobe, eupša Modimo a fetoša bobe bjoo botse, gore a tle a dire se re se bonago lehono, e lego go phološwa ga batho ba bantši.

²¹ Le se ke la boifa selo. Ke tla le hlokomela, lena le bana ba lena.” Ka gona a ba kgothatša a ba bea pelo.

²² Josefa o ile a fela a phela Egepeta le ba lapa la tatagwe; o be a na le mengwaga ye lekgolo le ye lesome ge a ehwa.

²³ O ile a phela, a ba a bona bana ba Efraime le bana ba bona. A amogela bana ba Makire, morwa wa Manase, ya ba ba gagwe.

²⁴ A re go bomorwarragwe: “Ke kgauswi le go hwa, eupša Modimo o tla le hlokomela, a le ntšha mo nageng ye a le iša go ye a enetšego Abrahama le Isaka le Jakobo a re o tla ba fa yona.”

²⁵ Ke moo Josefa a enišitšego barwa ba Jakobo a re: “Nkeneleng gore ge Modimo a le iša nageng yeo, le tla sepela le mašapo a ka.”

²⁶ Ka gona Josefa a hlokafala a na le mengwaga ye lekgolo le ye lesome. Ba omeletša setopo sa gagwe Egepeta, gomme ba se bea ka lepokising.